Ṣaṣṭha Maṇḍala

tvaṃ hya̍gne pratha̱mo ma̱notā̱ 'syā dhi̱yo abha̍vo dasma̱ hotā̍ |

tvaṃ sī̍ṃ vṛṣannakṛṇordu̱ṣṭarī̍tu̱ saho̱ viśva̍smai̱ saha̍se̱ saha̍dhyai

||1||

adhā̱ hotā̱ nya̍sīdo̱ yajī̍yāni̱l̤aspa̱da i̱ṣaya̱nnīḍya̱: san |

taṃ tvā̱ nara̍: pratha̱maṃ de̍va̱yanto̍ ma̱ho rā̱ye ci̱taya̍nto̱ anu̍ gman

||2||

vṛ̱teva̱ yanta̍ṃ ba̱hubhi̍rvasa̱vyai̱3stve ra̱yiṃ jā̍gṛ̱vāṃso̱ anu̍ gman |

ruśa̍ntama̱gniṃ da̍rśa̱ta bṛ̱hanta̍ṃ va̱pāva̍ntaṃ vi̱śvahā̍ dīdi̱vāṃsa̍m

||3||

pa̱daṃ de̱vasya̱ nama̍sā̱ vyanta̍: śrava̱syava̱: śrava̍ āpa̱nnamṛ̍ktam |

nāmā̍ni cid dadhire ya̱jñiyā̍ni bha̱drāyā̍ṃ te raṇayanta̱ saṃdṛ̍ṣṭau

||4||

tvāṃ va̍rdhanti kṣi̱taya̍: pṛthi̱vyāṃ tvāṃ rāya̍ u̱bhayā̍so̱ janā̍nām |

tvaṃ trā̱tā ta̍raṇe̱ cetyo̍ bhūḥ pi̱tā mā̱tā sada̱minmānu̍ṣāṇām

||5||

sa̱pa̱ryeṇya̱: sa pri̱yo vi̱kṣva1gnirhotā̍ ma̱ndro ni ṣa̍sādā̱ yajī̍yān |

taṃ tvā̍ va̱yaṃ dama̱ ā dī̍di̱vāṃsa̱mupa̍ jñu̱bādho̱ nama̍sā sadema

||6||

taṃ tvā̍ va̱yaṃ su̱dhyo̱3 navya̍magne sumnā̱yava̍ īmahe deva̱yanta̍: |

tvaṃ viśo̍ anayo̱ dīdyā̍no di̱vo a̍gne bṛha̱tā ro̍ca̱nena̍

||7||

vi̱śāṃ ka̱viṃ vi̱śpati̱ṃ śaśva̍tīnāṃ ni̱tośa̍naṃ vṛṣa̱bhaṃ ca̍rṣaṇī̱nām |

pretī̍ṣaṇimi̱ṣaya̍ntaṃ pāva̱kaṃ rāja̍ntama̱gniṃ ya̍ja̱taṃ ra̍yī̱ṇām

||8||

so a̍gna īje śaśa̱me ca̱ marto̱ yasta̱ āna̍ṭ sa̱midhā̍ ha̱vyadā̍tim |

ya āhu̍ti̱ṃ pari̱ vedā̱ namo̍bhi̱rviśvet sa vā̱mā da̍dhate̱ tvāta̍:

||9||

a̱smā u̍ te̱ mahi̍ ma̱he vi̍dhema̱ namo̍bhiragne sa̱midho̱ta ha̱vyaiḥ |

vedī̍ sūno sahaso gī̱rbhiru̱kthairā te̍ bha̱drāyā̍ṃ suma̱tau ya̍tema

||10||

ā yasta̱tantha̱ roda̍sī̱ vi bhā̱sā śravo̍bhiśca śrava̱sya1staru̍traḥ |

bṛ̱hadbhi̱rvājai̱: sthavi̍rebhira̱sme re̱vadbhi̍ragne vita̱raṃ vi bhā̍hi

||11||

nṛ̱vad va̍so̱ sada̱middhe̍hya̱sme bhūri̍ to̱kāya̱ tana̍yāya pa̱śvaḥ |

pū̱rvīriṣo̍ bṛha̱tīrā̱rea̍ghā a̱sme bha̱drā sau̍śrava̱sāni̍ santu

||12||

pu̱rūṇya̍gne puru̱dhā tvā̱yā vasū̍ni rājan va̱sutā̍ te aśyām |

pu̱rūṇi̱ hi tve pu̍ruvāra̱ santyagne̱ vasu̍ vidha̱te rāja̍ni̱ tve

||13||

tvaṃ hi kṣaita̍va̱d yaśo 'gne̍ mi̱tro na patya̍se | tvaṃ vi̍carṣaṇe̱ śravo̱ vaso̍ pu̱ṣṭiṃ na pu̍ṣyasi

||1||

tvāṃ hi ṣmā̍ carṣa̱ṇayo̍ ya̱jñebhi̍rgī̱rbhirīl̤a̍te | tvāṃ vā̱jī yā̍tyavṛ̱ko ra̍ja̱stūrvi̱śvaca̍rṣaṇiḥ

||2||

sa̱joṣa̍stvā di̱vo naro̍ ya̱jñasya̍ ke̱tumi̍ndhate | yaddha̱ sya mānu̍ṣo̱ jana̍: sumnā̱yurju̱hve a̍dhva̱re

||3||

ṛdha̱d yaste̍ su̱dāna̍ve dhi̱yā marta̍: śa̱śama̍te | ū̱tī ṣa bṛ̍ha̱to di̱vo dvi̱ṣo aṃho̱ na ta̍rati

||4||

sa̱midhā̱ yasta̱ āhu̍ti̱ṃ niśi̍ti̱ṃ martyo̱ naśa̍t | va̱yāva̍nta̱ṃ sa pu̍ṣyati̱ kṣaya̍magne śa̱tāyu̍ṣam

||5||

tve̱ṣaste̍ dhū̱ma ṛ̍ṇvati di̱vi ṣañchu̱kra āta̍taḥ | sūro̱ na hi dyu̱tā tvaṃ kṛ̱pā pā̍vaka̱ roca̍se

||6||

adhā̱ hi vi̱kṣvīḍyo 'si̍ pri̱yo no̱ ati̍thiḥ | ra̱ṇvaḥ pu̱rī̍va̱ jūrya̍: sū̱nurna tra̍ya̱yāyya̍:

||7||

kratvā̱ hi droṇe̍ a̱jyase 'gne̍ vā̱jī na kṛtvya̍: | pari̍jmeva sva̱dhā gayo 'tyo̱ na hvā̱ryaḥ śiśu̍:

||8||

tvaṃ tyā ci̱dacyu̱tā 'gne̍ pa̱śurna yava̍se | dhāmā̍ ha̱ yat te̍ ajara̱ vanā̍ vṛ̱ścanti̱ śikva̍saḥ

||9||

veṣi̱ hya̍dhvarīya̱tāmagne̱ hotā̱ dame̍ vi̱śāṃ | sa̱mṛdho̍ viśpate kṛṇu ju̱ṣasva̍ ha̱vyama̍ṅgiraḥ

||10||

acchā̍ no mitramaho deva de̱vānagne̱ voca̍: suma̱tiṃ roda̍syoḥ | vī̱hi sva̱stiṃ su̍kṣi̱tiṃ di̱vo nṝn dvi̱ṣo aṃhā̍ṃsi duri̱tā ta̍rema̱ tā ta̍rema̱ tavāva̍sā tarema

||11||

agne̱ sa kṣe̍ṣadṛta̱pā ṛ̍te̱jā u̱ru jyoti̍rnaśate deva̱yuṣṭe̍ |

yaṃ tvaṃ mi̱treṇa̱ varu̍ṇaḥ sa̱joṣā̱ deva̱ pāsi̱ tyaja̍sā̱ marta̱maṃha̍:

||1||

ī̱je ya̱jñebhi̍: śaśa̱me śamī̍bhiṝ̱dhadvā̍rāyā̱gnaye̍ dadāśa |

e̱vā ca̱na taṃ ya̱śasā̱maju̍ṣṭi̱rnāṃho̱ marta̍ṃ naśate̱ na pradṛ̍ptiḥ

||2||

sūro̱ na yasya̍ dṛśa̱tira̍re̱pā bhī̱mā yadeti̍ śuca̱tasta̱ ā dhīḥ |

heṣa̍svataḥ śu̱rudho̱ nāyama̱ktoḥ kutrā̍ cid ra̱ṇvo va̍sa̱tirva̍ne̱jāḥ

||3||

ti̱gmaṃ ci̱dema̱ mahi̱ varpo̍ asya̱ bhasa̱daśvo̱ na ya̍masā̱na ā̱sā |

vi̱jeha̍mānaḥ para̱śurna ji̱hvāṃ dra̱virna drā̍vayati̱ dāru̱ dhakṣa̍t

||4||

sa idaste̍va̱ prati̍ dhādasi̱ṣyañchiśī̍ta̱ tejo'ya̍so̱ na dhārā̍m |

ci̱tradhra̍jatirara̱tiryo a̱ktorverna dru̱ṣadvā̍ raghu̱patma̍jaṃhāḥ

||5||

sa ī̍ṃ re̱bho na prati̍ vasta u̱srāḥ śo̱ciṣā̍ rārapīti mi̱trama̍hāḥ |

nakta̱ṃ ya ī̍maru̱ṣo yo divā̱ nṝnama̍rtyo aru̱ṣo yo divā̱ nṝn

||6||

di̱vo na yasya̍ vidha̱to navī̍no̱d vṛṣā̍ ru̱kṣa oṣa̍dhīṣu nūnot |

ghṛṇā̱ na yo dhraja̍sā̱ patma̍nā̱ yannā roda̍sī̱ vasu̍nā̱ daṃ su̱patnī̍

||7||

dhāyo̍bhirvā̱ yo yujye̍bhira̱rkairvi̱dyunna da̍vidyo̱t svebhi̱: śuṣmai̍: |

śardho̍ vā̱ yo ma̱rutā̍ṃ ta̱takṣa̍ ṛ̱bhurna tve̱ṣo ra̍bhasā̱no a̍dyaut

||8||

yathā̍ hota̱rmanu̍ṣo de̱vatā̍tā ya̱jñebhi̍: sūno sahaso̱ yajā̍si |

e̱vā no̍ a̱dya sa̍ma̱nā sa̍mā̱nānu̱śanna̍gna uśa̱to ya̍kṣi de̱vān

||1||

sa no̍ vi̱bhāvā̍ ca̱kṣaṇi̱rna vasto̍ra̱gnirva̱ndāru̱ vedya̱ścano̍ dhāt |

vi̱śvāyu̱ryo a̱mṛto̱ martye̍ṣūṣa̱rbhud bhūdati̍thirjā̱tave̍dāḥ

||2||

dyāvo̱ na yasya̍ pa̱naya̱ntyabhva̱ṃ bhāsā̍ṃsi vaste̱ sūryo̱ na śu̱kraḥ |

vi ya i̱notya̱jara̍: pāva̱ko 'śna̍sya cicchiśnathat pū̱rvyāṇi̍

||3||

va̱dmā hi sū̍no̱ asya̍dma̱sadvā̍ ca̱kre a̱gnirja̱nuṣājmānna̍m |

sa tvaṃ na̍ ūrjasana̱ ūrja̍ṃ dhā̱ rāje̍va jeravṛ̱ke kṣe̍ṣya̱ntaḥ

||4||

niti̍kti̱ yo vā̍ra̱ṇamanna̱matti̍ vā̱yurna rāṣṭryatye̍tya̱ktūn |

tu̱ryāma̱ yasta̍ ā̱diśā̱marā̍tī̱ratyo̱ na hruta̱: pata̍taḥ pari̱hrut

||5||

ā sūryo̱ na bhā̍nu̱madbhi̍ra̱rkairagne̍ ta̱tantha̱ roda̍sī̱ vi bhā̱sā |

ci̱tro na̍ya̱t pari̱ tamā̍ṃsya̱ktaḥ śo̱ciṣā̱ patma̍nnauśi̱jo na dīya̍n

||6||

tvāṃ hi ma̱ndrata̍mamarkaśo̱kairva̍vṛ̱mahe̱ mahi̍ na̱: śroṣya̍gne |

indra̱ṃ na tvā̱ śava̍sā de̱vatā̍ vā̱yuṃ pṛ̍ṇanti̱ rādha̍sā̱ nṛta̍māḥ

||7||

nū no̍ agne'vṛ̱kebhi̍: sva̱sti veṣi̍ rā̱yaḥ pa̱thibhi̱: parṣyaṃha̍: |

tā sū̱ribhyo̍ gṛṇa̱te rā̍si su̱mnaṃ made̍ma śa̱tahi̍māḥ su̱vīrā̍:

||8||

hu̱ve va̍: sū̱nuṃ saha̍so̱ yuvā̍na̱madro̍ghavācaṃ ma̱tibhi̱ryavi̍ṣṭham |

ya inva̍ti̱ dravi̍ṇāni̱ prace̍tā vi̱śvavā̍rāṇi puru̱vāro̍ a̱dhruk

||1||

tve vasū̍ni purvaṇīka hotardo̱ṣā vasto̱reri̍re ya̱jñiyā̍saḥ |

kṣāme̍va̱ viśvā̱ bhuva̍nāni̱ yasmi̱n tsaṃ saubha̍gāni dadhi̱re pā̍va̱ke

||2||

tvaṃ vi̱kṣu pra̱diva̍: sīda ā̱su kratvā̍ ra̱thīra̍bhavo̱ vāryā̍ṇām |

ata̍ inoṣi vidha̱te ci̍kitvo̱ vyā̍nu̱ṣagjā̍tavedo̱ vasū̍ni

||3||

yo na̱: sanu̍tyo abhi̱dāsa̍dagne̱ yo anta̍ro mitramaho vanu̱ṣyāt |

tama̱jare̍bhi̱rvṛṣa̍bhi̱stava̱ svaistapā̍ tapiṣṭha̱ tapa̍sā̱ tapa̍svān

||4||

yaste̍ ya̱jñena̍ sa̱midhā̱ ya u̱kthaira̱rkebhi̍: sūno sahaso̱ dadā̍śat |

sa martye̍ṣvamṛta̱ prace̍tā rā̱yā dyu̱mnena̱ śrava̍sā̱ vi bhā̍ti

||5||

sa tat kṛ̍dhīṣi̱tastūya̍magne̱ spṛdho̍ bādhasva̱ saha̍sā̱ saha̍svān |

yaccha̱syase̱ dyubhi̍ra̱kto vaco̍bhi̱stajju̍ṣasva jari̱turghoṣi̱ manma̍

||6||

a̱śyāma̱ taṃ kāma̍magne̱ tavo̱tī a̱śyāma̍ ra̱yiṃ ra̍yivaḥ su̱vīra̍m |

a̱śyāma̱ vāja̍ma̱bhi vā̱jaya̍nto̱ 'śyāma̍ dyu̱mnama̍jarā̱jara̍ṃ te

||7||

pra navya̍sā̱ saha̍saḥ sū̱numacchā̍ ya̱jñena̍ gā̱tumava̍ i̱cchamā̍naḥ |

vṛ̱ścadva̍naṃ kṛ̱ṣṇayā̍ma̱ṃ ruśa̍ntaṃ vī̱tī hotā̍raṃ di̱vyaṃ ji̍gāti

||1||

sa śvi̍tā̱nasta̍nya̱tū ro̍cana̱sthā a̱jare̍bhi̱rnāna̍dadbhi̱ryavi̍ṣṭhaḥ |

yaḥ pā̍va̱kaḥ pu̍ru̱tama̍: pu̱rūṇi̍ pṛ̱thūnya̱gnira̍nu̱yāti̱ bharva̍n

||2||

vi te̱ viṣva̱gvāta̍jūtāso agne̱ bhāmā̍saḥ śuce̱ śuca̍yaścaranti |

tu̱vi̱mra̱kṣāso̍ di̱vyā nava̍gvā̱ vanā̍ vananti dhṛṣa̱tā ru̱janta̍:

||3||

ye te̍ śu̱krāsa̱: śuca̍yaḥ śuciṣma̱: kṣāṃ vapa̍nti̱ viṣi̍tāso̱ aśvā̍: |

adha̍ bhra̱masta̍ urvi̱yā vi bhā̍ti yā̱taya̍māno̱ adhi̱ sānu̱ pṛśne̍:

||4||

adha̍ ji̱hvā pā̍patīti̱ pra vṛṣṇo̍ goṣu̱yudho̱ nāśani̍: sṛjā̱nā |

śūra̍syeva̱ prasi̍tiḥ kṣā̱tira̱gnerdu̱rvartu̍rbhī̱mo da̍yate̱ vanā̍ni

||5||

ā bhā̱nunā̱ pārthi̍vāni̱ jrayā̍ṃsi ma̱hasto̱dasya̍ dhṛṣa̱tā ta̍tantha |

sa bā̍dha̱svāpa̍ bha̱yā saho̍bhi̱: spṛdho̍ vanu̱ṣyan va̱nuṣo̱ ni jū̍rva

||6||

sa ci̍tra ci̱traṃ ci̱taya̍ntama̱sme citra̍kṣatra ci̱trata̍maṃ vayo̱dhām |

ca̱ndraṃ ra̱yiṃ pu̍ru̱vīra̍ṃ bṛ̱hanta̱ṃ candra̍ ca̱ndrābhi̍rgṛṇa̱te yu̍vasva

||7||

mū̱rdhāna̍ṃ di̱vo a̍ra̱tiṃ pṛ̍thi̱vyā vai̍śvāna̱ramṛ̱ta ā jā̱tama̱gnim |

ka̱viṃ sa̱mrāja̱mati̍thi̱ṃ janā̍nāmā̱sannā pātra̍ṃ janayanta de̱vāḥ

||1||

nābhi̍ṃ ya̱jñānā̱ṃ sada̍naṃ rayī̱ṇāṃ ma̱hāmā̍hā̱vama̱bhi saṃ na̍vanta |

vai̱śvā̱na̱raṃ ra̱thya̍madhva̱rāṇā̍ṃ ya̱jñasya̍ ke̱tuṃ ja̍nayanta de̱vāḥ

||2||

tvad vipro̍ jāyate vā̱jya̍gne̱ tvad vī̱rāso̍ abhimāti̱ṣāha̍: |

vaiśvā̍nara̱ tvama̱smāsu̍ dhehi̱ vasū̍ni rājan tspṛha̱yāyyā̍ṇi

||3||

tvāṃ viśve̍ amṛta̱ jāya̍māna̱ṃ śiśu̱ṃ na de̱vā a̱bhi saṃ na̍vante |

tava̱ kratu̍bhiramṛta̱tvamā̍ya̱n vaiśvā̍nara̱ yat pi̱troradī̍deḥ

||4||

vaiśvā̍nara̱ tava̱ tāni̍ vra̱tāni̍ ma̱hānya̍gne̱ naki̱rā da̍dharṣa |

yajjāya̍mānaḥ pi̱troru̱pasthe 'vi̍ndaḥ ke̱tuṃ va̱yune̱ṣvahnā̍m

||5||

vai̱śvā̱na̱rasya̱ vimi̍tāni̱ cakṣa̍sā̱ sānū̍ni di̱vo a̱mṛta̍sya ke̱tunā̍ |

tasyedu̱ viśvā̱ bhuva̱nādhi̍ mū̱rdhani̍ va̱yā i̍va ruruhuḥ sa̱pta vi̱sruha̍:

||6||

vi yo rajā̱ṃsyami̍mīta su̱kratu̍rvaiśvāna̱ro vi di̱vo ro̍ca̱nā ka̱viḥ |

pari̱ yo viśvā̱ bhuva̍nāni papra̱the 'da̍bdho go̱pā a̱mṛta̍sya rakṣi̱tā

||7||

pṛ̱kṣasya̱ vṛṣṇo̍ aru̱ṣasya̱ nū saha̱: pra nu vo̍caṃ vi̱dathā̍ jā̱tave̍dasaḥ |

vai̱śvā̱na̱rāya̍ ma̱tirnavya̍sī̱ śuci̱: soma̍ iva pavate̱ cāru̍ra̱gnaye̍

||1||

sa jāya̍mānaḥ para̱me vyo̍mani vra̱tānya̱gnirvra̍ta̱pā a̍rakṣata |

vya1ntari̍kṣamamimīta su̱kratu̍rvaiśvāna̱ro ma̍hi̱nā nāka̍maspṛśat

||2||

vya̍stabhnā̱d roda̍sī mi̱tro adbhu̍to 'nta̱rvāva̍dakṛṇo̱jjyoti̍ṣā̱ tama̍: |

vi carma̍ṇīva dhi̱ṣaṇe̍ avartayad vaiśvāna̱ro viśva̍madhatta̱ vṛṣṇya̍m

||3||

a̱pāmu̱pasthe̍ mahi̱ṣā a̍gṛbhṇata̱ viśo̱ rājā̍na̱mupa̍ tasthuṝ̱gmiya̍m |

ā dū̱to a̱gnima̍bharad vi̱vasva̍to vaiśvāna̱raṃ mā̍ta̱riśvā̍ parā̱vata̍:

||4||

yu̱geyu̍ge vida̱thya̍ṃ gṛ̱ṇadbhyo 'gne̍ ra̱yiṃ ya̱śasa̍ṃ dhehi̱ navya̍sīm |

pa̱vyeva̍ rājanna̱ghaśa̍ṃsamajara nī̱cā ni vṛ̍śca va̱nina̱ṃ na teja̍sā

||5||

a̱smāka̍magne ma̱ghava̍tsu dhāra̱yā'nā̍mi kṣa̱trama̱jara̍ṃ su̱vīrya̍m |

va̱yaṃ ja̍yema śa̱tina̍ṃ saha̱sriṇa̱ṃ vaiśvā̍nara̱ vāja̍magne̱ tavo̱tibhi̍:

||6||

ada̍bdhebhi̱stava̍ go̱pābhi̍riṣṭe̱ 'smāka̍ṃ pāhi triṣadhastha sū̱rīn |

rakṣā̍ ca no da̱duṣā̱ṃ śardho̍ agne̱ vaiśvā̍nara̱ pra ca̍ tārī̱: stavā̍naḥ

||7||

aha̍śca kṛ̱ṣṇamaha̱rarju̍naṃ ca̱ vi va̍rtete̱ raja̍sī ve̱dyābhi̍: |

vai̱śvā̱na̱ro jāya̍māno̱ na rājā 'vā̍tira̱jjyoti̍ṣā̱gnistamā̍ṃsi

||1||

nāhaṃ tantu̱ṃ na vi jā̍nā̱myotu̱ṃ na yaṃ vaya̍nti sama̱re'ta̍mānāḥ |

kasya̍ svit pu̱tra i̱ha vaktvā̍ni pa̱ro va̍dā̱tyava̍reṇa pi̱trā

||2||

sa it tantu̱ṃ sa vi jā̍nā̱tyotu̱ṃ sa vaktvā̍nyṛtu̱thā va̍dāti |

ya ī̱ṃ cike̍tada̱mṛta̍sya go̱pā a̱vaścara̍n pa̱ro a̱nyena̱ paśya̍n

||3||

a̱yaṃ hotā̍ pratha̱maḥ paśya̍te̱mami̱daṃ jyoti̍ra̱mṛta̱ṃ martye̍ṣu |

a̱yaṃ sa ja̍jñe dhru̱va ā niṣa̱tto 'ma̍rtyasta̱nvā̱3 vardha̍mānaḥ

||4||

dhru̱vaṃ jyoti̱rnihi̍taṃ dṛ̱śaye̱ kaṃ mano̱ javi̍ṣṭhaṃ pa̱taya̍tsva̱ntaḥ |

viśve̍ de̱vāḥ sama̍nasa̱: sake̍tā̱ eka̱ṃ kratu̍ma̱bhi vi ya̍nti sā̱dhu

||5||

vi me̱ karṇā̍ patayato̱ vi cakṣu̱rvī̱3daṃ jyoti̱rhṛda̍ya̱ āhi̍ta̱ṃ yat |

vi me̱ mana̍ścarati dū̱raā̍dhī̱: kiṃ svi̍d va̱kṣyāmi̱ kimu̱ nū ma̍niṣye

||6||

viśve̍ de̱vā a̍namasyanbhiyā̱nāstvāma̍gne̱ tama̍si tasthi̱vāṃsa̍m |

vai̱śvā̱na̱ro̍'vatū̱taye̱ no 'ma̍rtyo'vatū̱taye̍ naḥ

||7||

pu̱ro vo̍ ma̱ndraṃ di̱vyaṃ su̍vṛ̱ktiṃ pra̍ya̱ti ya̱jñe a̱gnima̍dhva̱re da̍dhidhvam |

pu̱ra u̱kthebhi̱: sa hi no̍ vi̱bhāvā̍ svadhva̱rā ka̍rati jā̱tave̍dāḥ

||1||

tamu̍ dyumaḥ purvaṇīka hota̱ragne̍ a̱gnibhi̱rmanu̍ṣa idhā̱naḥ |

stoma̱ṃ yama̍smai ma̱mate̍va śū̱ṣaṃ ghṛ̱taṃ na śuci̍ ma̱taya̍: pavante

||2||

pī̱pāya̱ sa śrava̍sā̱ martye̍ṣu̱ yo a̱gnaye̍ da̱dāśa̱ vipra̍ u̱kthaiḥ |

ci̱trābhi̱stamū̱tibhi̍ści̱traśo̍cirvra̱jasya̍ sā̱tā goma̍to dadhāti

||3||

ā yaḥ pa̱prau jāya̍māna u̱rvī dū̍re̱dṛśā̍ bhā̱sā kṛ̱ṣṇādhvā̍ |

adha̍ ba̱hu ci̱t tama̱ ūrmyā̍yāsti̱raḥ śo̱ciṣā̍ dadṛśe pāva̱kaḥ

||4||

nū na̍ści̱traṃ pu̍ru̱vājā̍bhirū̱tī agne̍ ra̱yiṃ ma̱ghava̍dbhyaśca dhehi |

ye rādha̍sā̱ śrava̍sā̱ cātya̱nyān tsu̱vīrye̍bhiścā̱bhi santi̱ janā̍n

||5||

i̱maṃ ya̱jñaṃ cano̍ dhā agna u̱śan yaṃ ta̍ āsā̱no ju̍hu̱te ha̱viṣmā̍n |

bha̱radvā̍jeṣu dadhiṣe suvṛ̱ktimavī̱rvāja̍sya̱ gadhya̍sya sā̱tau

||6||

vi dveṣā̍ṃsīnu̱hi va̱rdhayel̤ā̱ṃ made̍ma śa̱tahi̍māḥ su̱vīrā̍:

||7||

yaja̍sva hotariṣi̱to yajī̍yā̱nagne̱ bādho̍ ma̱rutā̱ṃ na prayu̍kti |

ā no̍ mi̱trāvaru̍ṇā̱ nāsa̍tyā̱ dyāvā̍ ho̱trāya̍ pṛthi̱vī va̍vṛtyāḥ

||1||

tvaṃ hotā̍ ma̱ndrata̍mo no a̱dhruga̱ntarde̱vo vi̱dathā̱ martye̍ṣu |

pā̱va̱kayā̍ ju̱hvā̱3 vahni̍rā̱sā 'gne̱ yaja̍sva ta̱nvaṃ1 tava̱ svām

||2||

dhanyā̍ ci̱ddhi tve dhi̱ṣaṇā̱ vaṣṭi̱ pra de̱vāñjanma̍ gṛṇa̱te yaja̍dhyai |

vepi̍ṣṭho̱ aṅgi̍rasā̱ṃ yaddha̱ vipro̱ madhu̍ ccha̱ndo bhana̍ti re̱bha i̱ṣṭau

||3||

adi̍dyuta̱t svapā̍ko vi̱bhāvā 'gne̱ yaja̍sva̱ roda̍sī urū̱cī |

ā̱yuṃ na yaṃ nama̍sā rā̱taha̍vyā a̱ñjanti̍ supra̱yasa̱ṃ pañca̱ janā̍:

||4||

vṛ̱ñje ha̱ yannama̍sā ba̱rhira̱gnāvayā̍mi̱ srugghṛ̱tava̍tī suvṛ̱ktiḥ |

amya̍kṣi̱ sadma̱ sada̍ne pṛthi̱vyā aśrā̍yi ya̱jñaḥ sūrye̱ na cakṣu̍:

||5||

da̱śa̱syā na̍: purvaṇīka hotarde̱vebhi̍ragne a̱gnibhi̍ridhā̱naḥ |

rā̱yaḥ sū̍no sahaso vāvasā̱nā ati̍ srasema vṛ̱jana̱ṃ nāṃha̍:

||6||

madhye̱ hotā̍ duro̱ṇe ba̱rhiṣo̱ rāl̤a̱gnisto̱dasya̱ roda̍sī̱ yaja̍dhyai |

a̱yaṃ sa sū̱nuḥ saha̍sa ṛ̱tāvā̍ dū̱rāt sūryo̱ na śo̱ciṣā̍ tatāna

||1||

ā yasmi̱n tve svapā̍ke yajatra̱ yakṣa̍d rājan tsa̱rvatā̍teva̱ nu dyauḥ |

tri̱ṣa̱dhastha̍stata̱ruṣo̱ na jaṃho̍ ha̱vyā ma̱ghāni̱ mānu̍ṣā̱ yaja̍dhyai

||2||

teji̍ṣṭhā̱ yasyā̍ra̱tirva̍ne̱rāṭ to̱do adhva̱n na vṛ̍dhasā̱no a̍dyaut |

a̱dro̱gho na dra̍vi̱tā ce̍tati̱ tmannama̍rtyo'va̱rtra oṣa̍dhīṣu

||3||

sāsmāke̍bhire̱tarī̱ na śū̱ṣaira̱gniḥ ṣṭa̍ve̱ dama̱ ā jā̱tave̍dāḥ |

drva̍nno va̱nvan kratvā̱ nārvo̱sraḥ pi̱teva̍ jāra̱yāyi̍ ya̱jñaiḥ

||4||

adha̍ smāsya panayanti̱ bhāso̱ vṛthā̱ yat takṣa̍danu̱yāti̍ pṛ̱thvīm |

sa̱dyo yaḥ spa̱ndro viṣi̍to̱ dhavī̍yānṛ̱ṇo na tā̱yurati̱ dhanvā̍ rāṭ

||5||

sa tvaṃ no̍ arva̱n nidā̍yā̱ viśve̍bhiragne a̱gnibhi̍ridhā̱naḥ |

veṣi̍ rā̱yo vi yā̍si du̱cchunā̱ made̍ma śa̱tahi̍māḥ su̱vīrā̍:

||6||

tvad viśvā̍ subhaga̱ saubha̍gā̱nyagne̱ vi ya̍nti va̱nino̱ na va̱yāḥ |

śru̱ṣṭī ra̱yirvājo̍ vṛtra̱tūrye̍ di̱vo vṛ̱ṣṭirīḍyo̍ rī̱tira̱pām

||1||

tvaṃ bhago̍ na̱ ā hi ratna̍mi̱ṣe pari̍jmeva kṣayasi da̱smava̍rcāḥ |

agne̍ mi̱tro na bṛ̍ha̱ta ṛ̱tasyā'si̍ kṣa̱ttā vā̱masya̍ deva̱ bhūre̍:

||2||

sa satpa̍ti̱: śava̍sā hanti vṛ̱tramagne̱ vipro̱ vi pa̱ṇerbha̍rti̱ vāja̍m |

yaṃ tvaṃ pra̍ceta ṛtajāta rā̱yā sa̱joṣā̱ naptrā̱pāṃ hi̱noṣi̍

||3||

yaste̍ sūno sahaso gī̱rbhiru̱kthairya̱jñairmarto̱ niśi̍tiṃ ve̱dyāna̍ṭ |

viśva̱ṃ sa de̍va̱ prati̱ vāra̍magne dha̱tte dhā̱nyaṃ1 patya̍te vasa̱vyai̍:

||4||

tā nṛbhya̱ ā sau̍śrava̱sā su̱vīrā 'gne̍ sūno sahasaḥ pu̱ṣyase̍ dhāḥ |

kṛ̱ṇoṣi̱ yacchava̍sā̱ bhūri̍ pa̱śvo vayo̱ vṛkā̍yā̱raye̱ jasu̍raye

||5||

va̱dmā sū̍no sahaso no̱ vihā̍yā̱ agne̍ to̱kaṃ tana̍yaṃ vā̱ji no̍ dāḥ |

viśvā̍bhirgī̱rbhira̱bhi pū̱rtima̍śyā̱ṃ made̍ma śa̱tahi̍māḥ su̱vīrā̍:

||6||

a̱gnā yo martyo̱ duvo̱ dhiya̍ṃ ju̱joṣa̍ dhī̱tibhi̍: | bhasa̱nnu ṣa pra pū̱rvya iṣa̍ṃ vurī̱tāva̍se

||1||

a̱gniriddhi prace̍tā a̱gnirve̱dhasta̍ma̱ ṛṣi̍: | a̱gniṃ hotā̍ramīl̤ate ya̱jñeṣu̱ manu̍ṣo̱ viśa̍:

||2||

nānā̱ hya1gne'va̍se̱ spardha̍nte̱ rāyo̍ a̱ryaḥ | tūrva̍nto̱ dasyu̍mā̱yavo̍ vra̱taiḥ sīkṣa̍nto avra̱tam

||3||

a̱gnira̱psāmṛ̍tī̱ṣaha̍ṃ vī̱raṃ da̍dāti̱ satpa̍tim | yasya̱ trasa̍nti̱ śava̍saḥ sa̱ṃcakṣi̱ śatra̍vo bhi̱yā

||4||

a̱gnirhi vi̱dmanā̍ ni̱do de̱vo marta̍muru̱ṣyati̍ | sa̱hāvā̱ yasyāvṛ̍to ra̱yirvāje̱ṣvavṛ̍taḥ

||5||

acchā̍ no mitramaho deva de̱vānagne̱ voca̍: suma̱tiṃ roda̍syoḥ |

vī̱hi sva̱stiṃ su̍kṣi̱tiṃ di̱vo nṝn dvi̱ṣo aṃhā̍ṃsi duri̱tā ta̍rema̱ tā ta̍rema̱ tavāva̍sā tarema

||6||

i̱mamū̱ ṣu vo̱ ati̍thimuṣa̱rbudha̱ṃ viśvā̍sāṃ vi̱śāṃ pati̍mṛñjase gi̱rā |

vetīd di̱vo ja̱nuṣā̱ kacci̱dā śuci̱rjyok ci̍datti̱ garbho̱ yadacyu̍tam

||1||

mi̱traṃ na yaṃ sudhi̍ta̱ṃ bhṛga̍vo da̱dhurvana̱spatā̱vīḍya̍mū̱rdhvaśo̍ciṣam |

sa tvaṃ suprī̍to vī̱taha̍vye adbhuta̱ praśa̍stibhirmahayase di̱vedi̍ve

||2||

sa tvaṃ dakṣa̍syāvṛ̱ko vṛ̱dho bhū̍ra̱ryaḥ para̱syānta̍rasya̱ taru̍ṣaḥ |

rā̱yaḥ sū̍no sahaso̱ martye̱ṣvā cha̱rdirya̍ccha vī̱taha̍vyāya sa̱pratho̍ bha̱radvā̍jāya sa̱pratha̍:

||3||

dyu̱tā̱naṃ vo̱ ati̍thi̱ṃ sva̍rṇarama̱gniṃ hotā̍ra̱ṃ manu̍ṣaḥ svadhva̱ram |

vipra̱ṃ na dyu̱kṣava̍casaṃ suvṛ̱ktibhi̍rhavya̱vāha̍mara̱tiṃ de̱vamṛ̍ñjase

||4||

pā̱va̱kayā̱ yaści̱taya̍ntyā kṛ̱pā kṣāma̍n ruru̱ca u̱ṣaso̱ na bhā̱nunā̍ |

tūrva̱n na yāma̱nneta̍śasya̱ nū raṇa̱ ā yo ghṛ̱ṇe na ta̍tṛṣā̱ṇo a̱jara̍:

||5||

a̱gnima̍gniṃ vaḥ sa̱midhā̍ duvasyata pri̱yaṃpri̍yaṃ vo̱ ati̍thiṃ gṛṇī̱ṣaṇi̍ |

upa̍ vo gī̱rbhira̱mṛta̍ṃ vivāsata de̱vo de̱veṣu̱ vana̍te̱ hi vārya̍ṃ de̱vo de̱veṣu̱ vana̍te̱ hi no̱ duva̍:

||6||

sami̍ddhama̱gniṃ sa̱midhā̍ gi̱rā gṛ̍ṇe̱ śuci̍ṃ pāva̱kaṃ pu̱ro a̍dhva̱re dhru̱vam |

vipra̱ṃ hotā̍raṃ puru̱vāra̍ma̱druha̍ṃ ka̱viṃ su̱mnairī̍mahe jā̱tave̍dasam

||7||

tvāṃ dū̱tama̍gne a̱mṛta̍ṃ yu̱geyu̍ge havya̱vāha̍ṃ dadhire pā̱yumīḍya̍m |

de̱vāsa̍śca̱ martā̍saśca̱ jāgṛ̍viṃ vi̱bhuṃ vi̱śpati̱ṃ nama̍sā̱ ni ṣe̍dire

||8||

vi̱bhūṣa̍nnagna u̱bhayā̱m̐ anu̍ vra̱tā dū̱to de̱vānā̱ṃ raja̍sī̱ samī̍yase |

yat te̍ dhī̱tiṃ su̍ma̱timā̍vṛṇī̱mahe 'dha̍ smā nastri̱varū̍thaḥ śi̱vo bha̍va

||9||

taṃ su̱pratī̍kaṃ su̱dṛśa̱ṃ svañca̱mavi̍dvāṃso vi̱duṣṭa̍raṃ sapema |

sa ya̍kṣa̱d viśvā̍ va̱yunā̍ni vi̱dvān pra ha̱vyama̱gnira̱mṛte̍ṣu vocat

||10||

tama̍gne pāsyu̱ta taṃ pi̍parṣi̱ yasta̱ āna̍ṭ ka̱vaye̍ śūra dhī̱tim |

ya̱jñasya̍ vā̱ niśi̍ti̱ṃ vodi̍tiṃ vā̱ tamit pṛ̍ṇakṣi̱ śava̍so̱ta rā̱yā

||11||

tvama̍gne vanuṣya̱to ni pā̍hi̱ tvamu̍ naḥ sahasāvannava̱dyāt |

saṃ tvā̍ dhvasma̱nvada̱bhye̍tu̱ pātha̱: saṃ ra̱yiḥ spṛ̍ha̱yāyya̍: saha̱srī

||12||

a̱gnirhotā̍ gṛ̱hapa̍ti̱: sa rājā̱ viśvā̍ veda̱ jani̍mā jā̱tave̍dāḥ |

de̱vānā̍mu̱ta yo martyā̍nā̱ṃ yaji̍ṣṭha̱: sa pra ya̍jatāmṛ̱tāvā̍

||13||

agne̱ yada̱dya vi̱śo a̍dhvarasya hota̱: pāva̍kaśoce̱ veṣṭvaṃ hi yajvā̍ |

ṛ̱tā ya̍jāsi mahi̱nā vi yad bhūrha̱vyā va̍ha yaviṣṭha̱ yā te̍ a̱dya

||14||

a̱bhi prayā̍ṃsi̱ sudhi̍tāni̱ hi khyo ni tvā̍ dadhīta̱ roda̍sī̱ yaja̍dhyai |

avā̍ no maghava̱n vāja̍sātā̱vagne̱ viśvā̍ni duri̱tā ta̍rema̱ tā ta̍rema̱ tavāva̍sā tarema

||15||

agne̱ viśve̍bhiḥ svanīka de̱vairūrṇā̍vantaṃ pratha̱maḥ sī̍da̱ yoni̍m |

ku̱lā̱yina̍ṃ ghṛ̱tava̍ntaṃ savi̱tre ya̱jñaṃ na̍ya̱ yaja̍mānāya sā̱dhu

||16||

i̱mamu̱ tyama̍tharva̱vada̱gniṃ ma̍nthanti ve̱dhasa̍: | yama̍ṅkū̱yanta̱māna̍ya̱nnamū̍raṃ śyā̱vyā̍bhyaḥ

||17||

jani̍ṣvā de̱vavī̍taye sa̱rvatā̍tā sva̱staye̍ | ā de̱vān va̍kṣya̱mṛtā̍m̐ ṛtā̱vṛdho̍ ya̱jñaṃ de̱veṣu̍ pispṛśaḥ

||18||

va̱yamu̍ tvā gṛhapate janānā̱magne̱ aka̍rma sa̱midhā̍ bṛ̱hanta̍m |

a̱sthū̱ri no̱ gārha̍patyāni santu ti̱gmena̍ na̱steja̍sā̱ saṃ śi̍śādhi

||19||

tvama̍gne ya̱jñānā̱ṃ hotā̱ viśve̍ṣāṃ hi̱taḥ | de̱vebhi̱rmānu̍ṣe̱ jane̍

||1||

sa no̍ ma̱ndrābhi̍radhva̱re ji̱hvābhi̍ryajā ma̱haḥ | ā de̱vān va̍kṣi̱ yakṣi̍ ca

||2||

vetthā̱ hi ve̍dho̱ adhva̍naḥ pa̱thaśca̍ de̱vāñja̍sā | agne̍ ya̱jñeṣu̍ sukrato

||3||

tvāmī̍l̤e̱ adha̍ dvi̱tā bha̍ra̱to vā̱jibhi̍: śu̱nam | ī̱je ya̱jñeṣu̍ ya̱jñiya̍m

||4||

tvami̱mā vāryā̍ pu̱ru divo̍dāsāya sunva̱te | bha̱radvā̍jāya dā̱śuṣe̍

||5||

tvaṃ dū̱to ama̍rtya̱ ā va̍hā̱ daivya̱ṃ jana̍m | śṛ̱ṇvan vipra̍sya suṣṭu̱tim

||6||

tvāma̍gne svā̱dhyo̱3 martā̍so de̱vavī̍taye | ya̱jñeṣu̍ de̱vamī̍l̤ate

||7||

tava̱ pra ya̍kṣi sa̱ṃdṛśa̍mu̱ta kratu̍ṃ su̱dāna̍vaḥ | viśve̍ juṣanta kā̱mina̍:

||8||

tvaṃ hotā̱ manu̍rhito̱ vahni̍rā̱sā vi̱duṣṭa̍raḥ | agne̱ yakṣi̍ di̱vo viśa̍:

||9||

agna̱ ā yā̍hi vī̱taye̍ gṛṇā̱no ha̱vyadā̍taye | ni hotā̍ satsi ba̱rhiṣi̍

||10||

taṃ tvā̍ sa̱midbhi̍raṅgiro ghṛ̱tena̍ vardhayāmasi | bṛ̱haccho̍cā yaviṣṭhya

||11||

sa na̍: pṛ̱thu śra̱vāyya̱macchā̍ deva vivāsasi | bṛ̱hada̍gne su̱vīrya̍m

||12||

tvāma̍gne̱ puṣka̍rā̱dadhyatha̍rvā̱ nira̍manthata | mū̱rdhno viśva̍sya vā̱ghata̍:

||13||

tamu̍ tvā da̱dhyaṅṅṛṣi̍: pu̱tra ī̍dhe̱ atha̍rvaṇaḥ | vṛ̱tra̱haṇa̍ṃ puraṃda̱ram

||14||

tamu̍ tvā pā̱thyo vṛṣā̱ samī̍dhe dasyu̱hanta̍mam | dha̱na̱ṃja̱yaṃ raṇe̍raṇe

||15||

ehyū̱ ṣu bravā̍ṇi̱ te 'gna̍ i̱ttheta̍rā̱ gira̍: | e̱bhirva̍rdhāsa̱ indu̍bhiḥ

||16||

yatra̱ kva̍ ca te̱ mano̱ dakṣa̍ṃ dadhasa̱ utta̍ram | tatrā̱ sada̍: kṛṇavase

||17||

na̱hi te̍ pū̱rtama̍kṣi̱pad bhuva̍nnemānāṃ vaso | athā̱ duvo̍ vanavase

||18||

āgnira̍gāmi̱ bhāra̍to vṛtra̱hā pu̍ru̱ceta̍naḥ | divo̍dāsasya̱ satpa̍tiḥ

||19||

sa hi viśvāti̱ pārthi̍vā ra̱yiṃ dāśa̍nmahitva̱nā | va̱nvannavā̍to̱ astṛ̍taḥ

||20||

sa pra̍tna̱vannavī̍ya̱sā 'gne̍ dyu̱mnena̍ sa̱ṃyatā̍ | bṛ̱hat ta̍tantha bhā̱nunā̍

||21||

pra va̍: sakhāyo a̱gnaye̱ stoma̍ṃ ya̱jñaṃ ca̍ dhṛṣṇu̱yā | arca̱ gāya̍ ca ve̱dhase̍

||22||

sa hi yo mānu̍ṣā yu̱gā sīda̱ddhotā̍ ka̱vikra̍tuḥ | dū̱taśca̍ havya̱vāha̍naḥ

||23||

tā rājā̍nā̱ śuci̍vratā ''di̱tyān māru̍taṃ ga̱ṇam | vaso̱ yakṣī̱ha roda̍sī

||24||

vasvī̍ te agne̱ saṃdṛ̍ṣṭiriṣaya̱te martyā̍ya | ūrjo̍ napāda̱mṛta̍sya

||25||

kratvā̱ dā a̍stu̱ śreṣṭho̱ 'dya tvā̍ va̱nvan tsu̱rekṇā̍: | marta̍ ānāśa suvṛ̱ktim

||26||

te te̍ agne̱ tvotā̍ i̱ṣaya̍nto̱ viśva̱māyu̍: | tara̍nto a̱ryo arā̍tīrva̱nvanto̍ a̱ryo arā̍tīḥ

||27||

a̱gnisti̱gmena̍ śo̱ciṣā̱ yāsa̱d viśva̱ṃ nya1triṇa̍m | a̱gnirno̍ vanate ra̱yim

||28||

su̱vīra̍ṃ ra̱yimā bha̍ra̱ jāta̍vedo̱ vica̍rṣaṇe | ja̱hi rakṣā̍ṃsi sukrato

||29||

tvaṃ na̍: pā̱hyaṃha̍so̱ jāta̍vedo aghāya̱taḥ | rakṣā̍ ṇo brahmaṇaskave

||30||

yo no̍ agne du̱reva̱ ā marto̍ va̱dhāya̱ dāśa̍ti | tasmā̍nnaḥ pā̱hyaṃha̍saḥ

||31||

tvaṃ taṃ de̍va ji̱hvayā̱ pari̍ bādhasva du̱ṣkṛta̍m | marto̱ yo no̱ jighā̍ṃsati

||32||

bha̱radvā̍jāya sa̱pratha̱: śarma̍ yaccha sahantya | agne̱ vare̍ṇya̱ṃ vasu̍

||33||

a̱gnirvṛ̱trāṇi̍ jaṅghanad draviṇa̱syurvi̍pa̱nyayā̍ | sami̍ddhaḥ śu̱kra āhu̍taḥ

||34||

garbhe̍ mā̱tuḥ pi̱tuṣpi̱tā vi̍didyutā̱no a̱kṣare̍ | sīda̍nnṛ̱tasya̱ yoni̱mā

||35||

brahma̍ pra̱jāva̱dā bha̍ra̱ jāta̍vedo̱ vica̍rṣaṇe | agne̱ yad dī̱daya̍d di̱vi

||36||

upa̍ tvā ra̱ṇvasa̍ṃdṛśa̱ṃ praya̍svantaḥ sahaskṛta | agne̍ sasṛ̱jmahe̱ gira̍:

||37||

upa̍ cchā̱yāmi̍va̱ ghṛṇe̱raga̍nma̱ śarma̍ te va̱yam | agne̱ hira̍ṇyasaṃdṛśaḥ

||38||

ya u̱gra i̍va śarya̱hā ti̱gmaśṛ̍ṅgo̱ na vaṃsa̍gaḥ | agne̱ puro̍ ru̱roji̍tha

||39||

ā yaṃ haste̱ na khā̱dina̱ṃ śiśu̍ṃ jā̱taṃ na bibhra̍ti | vi̱śāma̱gniṃ sva̍dhva̱raṃ

||40||

pra de̱vaṃ de̱vavī̍taye̱ bhara̍tā vasu̱vitta̍mam | ā sve yonau̱ ni ṣī̍datu

||41||

ā jā̱taṃ jā̱tave̍dasi pri̱yaṃ śi̍śī̱tāti̍thim | syo̱na ā gṛ̱hapa̍tim

||42||

agne̍ yu̱kṣvā hi ye tavā'śvā̍so deva sā̱dhava̍: | ara̱ṃ vaha̍nti ma̱nyave̍

||43||

acchā̍ no yā̱hyā va̍hā̱'bhi prayā̍ṃsi vī̱taye̍ | ā de̱vān tso̱ma̍pītaye

||44||

uda̍gne bhārata dyu̱madaja̍sreṇa̱ davi̍dyutat | śocā̱ vi bhā̍hyajara

||45||

vī̱tī yo de̱vaṃ marto̍ duva̱syeda̱gnimī̍l̤ītādhva̱re ha̱viṣmā̍n |

hotā̍raṃ satya̱yaja̱ṃ roda̍syoruttā̱naha̍sto̱ nama̱sā vi̍vāset

||46||

ā te̍ agna ṛ̱cā ha̱virhṛ̱dā ta̱ṣṭaṃ bha̍rāmasi | te te̍ bhavantū̱kṣaṇa̍ ṛṣa̱bhāso̍ va̱śā u̱ta

||47||

a̱gniṃ de̱vāso̍ agri̱yami̱ndhate̍ vṛtra̱hanta̍mam | yenā̱ vasū̱nyābhṛ̍tā tṛ̱l̤hā rakṣā̍ṃsi vā̱jinā̍

||48||

pibā̱ soma̍ma̱bhi yamu̍gra̱ tarda̍ ū̱rvaṃ gavya̱ṃ mahi̍ gṛṇā̱na i̍ndra |

vi yo dhṛ̍ṣṇo̱ vadhi̍ṣo vajrahasta̱ viśvā̍ vṛ̱trama̍mi̱triyā̱ śavo̍bhiḥ

||1||

sa ī̍ṃ pāhi̱ ya ṛ̍jī̱ṣī taru̍tro̱ yaḥ śipra̍vān vṛṣa̱bho yo ma̍tī̱nām |

yo go̍tra̱bhid va̍jra̱bhṛd yo ha̍ri̱ṣṭhāḥ sa i̍ndra ci̱trām̐ a̱bhi tṛ̍ndhi̱ vājā̍n

||2||

e̱vā pā̍hi pra̱tnathā̱ manda̍tu tvā śru̱dhi brahma̍ vāvṛ̱dhasvo̱ta gī̱rbhiḥ |

ā̱viḥ sūrya̍ṃ kṛṇu̱hi pī̍pi̱hīṣo̍ ja̱hi śatrū̍m̐ra̱bhi gā i̍ndra tṛndhi

||3||

te tvā̱ madā̍ bṛ̱hadi̍ndra svadhāva i̱me pī̱tā u̍kṣayanta dyu̱manta̍m |

ma̱hāmanū̍naṃ ta̱vasa̱ṃ vibhū̍tiṃ matsa̱rāso̍ jarhṛṣanta pra̱sāha̍m

||4||

yebhi̱: sūrya̍mu̱ṣasa̍ṃ mandasā̱no 'vā̍sa̱yo'pa̍ dṛ̱l̤hāni̱ dardra̍t |

ma̱hāmadri̱ṃ pari̱ gā i̍ndra̱ santa̍ṃ nu̱tthā acyu̍ta̱ṃ sada̍sa̱spari̱ svāt

||5||

tava̱ kratvā̱ tava̱ tad da̱ṃsanā̍bhirā̱māsu̍ pa̱kvaṃ śacyā̱ ni dī̍dhaḥ |

aurṇo̱rdura̍ u̱sriyā̍bhyo̱ vi dṛ̱l̤hodū̱rvād gā a̍sṛjo̱ aṅgi̍rasvān

||6||

pa̱prātha̱ kṣāṃ mahi̱ daṃso̱ vyu1rvīmupa̱ dyāmṛ̱ṣvo bṛ̱hadi̍ndra stabhāyaḥ |

adhā̍rayo̱ roda̍sī de̱vapu̍tre pra̱tne mā̱tarā̍ ya̱hvī ṛ̱tasya̍

||7||

adha̍ tvā̱ viśve̍ pu̱ra i̍ndra de̱vā eka̍ṃ ta̱vasa̍ṃ dadhire̱ bharā̍ya |

ade̍vo̱ yada̱bhyauhi̍ṣṭa de̱vān tsva̍rṣātā vṛṇata̱ indra̱matra̍

||8||

adha̱ dyauści̍t te̱ apa̱ sā nu vajrā̍d dvi̱tāna̍mad bhi̱yasā̱ svasya̍ ma̱nyoḥ |

ahi̱ṃ yadindro̍ a̱bhyoha̍sāna̱ṃ ni ci̍d vi̱śvāyu̍: śa̱yathe̍ ja̱ghāna̍

||9||

adha̱ tvaṣṭā̍ te ma̱ha u̍gra̱ vajra̍ṃ sa̱hasra̍bhṛṣṭiṃ vavṛtaccha̱tāśri̍m |

nikā̍mama̱rama̍ṇasa̱ṃ yena̱ nava̍nta̱mahi̱ṃ saṃ pi̍ṇagṛjīṣin

||10||

vardhā̱n yaṃ viśve̍ ma̱ruta̍: sa̱joṣā̱: paca̍ccha̱taṃ ma̍hi̱ṣām̐ i̍ndra̱ tubhya̍m |

pū̱ṣā viṣṇu̱strīṇi̱ sarā̍ṃsi dhāvan vṛtra̱haṇa̍ṃ madi̱rama̱ṃśuma̍smai

||11||

ā kṣodo̱ mahi̍ vṛ̱taṃ na̱dīnā̱ṃ pari̍ṣṭhitamasṛja ū̱rmima̱pām |

tāsā̱manu̍ pra̱vata̍ indra̱ panthā̱ṃ prārda̍yo̱ nīcī̍ra̱pasa̍: samu̱dram

||12||

e̱vā tā viśvā̍ cakṛ̱vāṃsa̱mindra̍ṃ ma̱hāmu̱grama̍ju̱ryaṃ sa̍ho̱dām |

su̱vīra̍ṃ tvā svāyu̱dhaṃ su̱vajra̱mā brahma̱ navya̱mava̍se vavṛtyāt

||13||

sa no̱ vājā̍ya̱ śrava̍sa i̱ṣe ca̍ rā̱ye dhe̍hi dyu̱mata̍ indra̱ viprā̍n |

bha̱radvā̍je nṛ̱vata̍ indra sū̱rīn di̱vi ca̍ smaidhi̱ pārye̍ na indra

||14||

a̱yā vāja̍ṃ de̱vahi̍taṃ sanema̱ made̍ma śa̱tahi̍māḥ su̱vīrā̍:

||15||

tamu̍ ṣṭuhi̱ yo a̱bhibhū̍tyojā va̱nvannavā̍taḥ puruhū̱ta indra̍: |

aṣā̍l̤hamu̱graṃ saha̍mānamā̱bhirgī̱rbhirva̍rdha vṛṣa̱bhaṃ ca̍rṣaṇī̱nām

||1||

sa yu̱dhmaḥ satvā̍ khaja̱kṛt sa̱madvā̍ tuvimra̱kṣo na̍danu̱mām̐ ṛ̍jī̱ṣī |

bṛ̱hadre̍ṇu̱ścyava̍no̱ mānu̍ṣīṇā̱meka̍: kṛṣṭī̱nāma̍bhavat sa̱hāvā̍

||2||

tvaṃ ha̱ nu tyada̍damāyo̱ dasyū̱m̐reka̍: kṛ̱ṣṭīra̍vano̱rāryā̍ya |

asti̍ svi̱nnu vī̱ryaṃ1 tat ta̍ indra̱ na svi̍dasti̱ tadṛ̍tu̱thā vi vo̍caḥ

||3||

sadiddhi te̍ tuvijā̱tasya̱ manye̱ saha̍: sahiṣṭha tura̱tastu̱rasya̍ |

u̱gramu̱grasya̍ ta̱vasa̱stavī̱yo 'ra̍dhrasya radhra̱turo̍ babhūva

||4||

tanna̍: pra̱tnaṃ sa̱khyama̍stu yu̱ṣme i̱tthā vada̍dbhirva̱lamaṅgi̍robhiḥ |

hanna̍cyutacyud dasme̱ṣaya̍ntamṛ̱ṇoḥ puro̱ vi duro̍ asya̱ viśvā̍:

||5||

sa hi dhī̱bhirhavyo̱ astyu̱gra ī̍śāna̱kṛnma̍ha̱ti vṛ̍tra̱tūrye̍ |

sa to̱kasā̍tā̱ tana̍ye̱ sa va̱jrī vi̍tanta̱sāyyo̍ abhavat sa̱matsu̍

||6||

sa ma̱jmanā̱ jani̍ma̱ mānu̍ṣāṇā̱mama̍rtyena̱ nāmnāti̱ pra sa̍rsre |

sa dyu̱mnena̱ sa śava̍so̱ta rā̱yā sa vī̱rye̍ṇa̱ nṛta̍ma̱: samo̍kāḥ

||7||

sa yo na mu̱he na mithū̱ jano̱ bhūt sumantu̍nāmā̱ cumu̍ri̱ṃ dhuni̍ṃ ca |

vṛ̱ṇak pipru̱ṃ śamba̍ra̱ṃ śuṣṇa̱mindra̍: pu̱rāṃ cyau̱tnāya̍ śa̱yathā̍ya̱ nū ci̍t

||8||

u̱dāva̍tā̱ tvakṣa̍sā̱ panya̍sā ca vṛtra̱hatyā̍ya̱ ratha̍mindra tiṣṭha |

dhi̱ṣva vajra̱ṃ hasta̱ ā da̍kṣiṇa̱trā 'bhi pra ma̍nda purudatra mā̱yāḥ

||9||

a̱gnirna śuṣka̱ṃ vana̍mindra he̱tī rakṣo̱ ni dha̍kṣya̱śani̱rna bhī̱mā |

ga̱mbhī̱raya̍ ṛ̱ṣvayā̱ yo ru̱rojādhvā̍nayad duri̱tā da̱mbhaya̍cca

||10||

ā sa̱hasra̍ṃ pa̱thibhi̍rindra rā̱yā tuvi̍dyumna tuvi̱vāje̍bhira̱rvāk |

yā̱hi sū̍no sahaso̱ yasya̱ nū ci̱dade̍va̱ īśe̍ puruhūta̱ yoto̍:

||11||

pra tu̍vidyu̱mnasya̱ sthavi̍rasya̱ ghṛṣve̍rdi̱vo ra̍rapśe mahi̱mā pṛ̍thi̱vyāḥ |

nāsya̱ śatru̱rna pra̍ti̱māna̍masti̱ na pra̍ti̱ṣṭhiḥ pu̍rumā̱yasya̱ sahyo̍:

||12||

pra tat te a̱dyā kara̍ṇaṃ kṛ̱taṃ bhū̱t kutsa̱ṃ yadā̱yuma̍tithi̱gvama̍smai |

pu̱rū sa̱hasrā̱ ni śi̍śā a̱bhi kṣāmut tūrva̍yāṇaṃ dhṛṣa̱tā ni̍netha

||13||

anu̱ tvāhi̍ghne̱ adha̍ deva de̱vā mada̱n viśve̍ ka̱vita̍maṃ kavī̱nām |

karo̱ yatra̱ vari̍vo bādhi̱tāya̍ di̱ve janā̍ya ta̱nve̍ gṛṇā̱naḥ

||14||

anu̱ dyāvā̍pṛthi̱vī tat ta̱ ojo 'ma̍rtyā jihata indra de̱vāḥ |

kṛ̱ṣvā kṛ̍tno̱ akṛ̍ta̱ṃ yat te̱ astyu̱kthaṃ navī̍yo janayasva ya̱jñaiḥ

||15||

ma̱hām̐ indro̍ nṛ̱vadā ca̍rṣaṇi̱prā u̱ta dvi̱barhā̍ ami̱naḥ saho̍bhiḥ |

a̱sma̱drya̍gvāvṛdhe vī̱ryā̍yo̱ruḥ pṛ̱thuḥ sukṛ̍taḥ ka̱rtṛbhi̍rbhūt

||1||

indra̍me̱va dhi̱ṣaṇā̍ sā̱taye̍ dhād bṛ̱hanta̍mṛ̱ṣvama̱jara̱ṃ yuvā̍nam |

aṣā̍l̤hena̱ śava̍sā śūśu̱vāṃsa̍ṃ sa̱dyaści̱d yo vā̍vṛ̱dhe asā̍mi

||2||

pṛ̱thū ka̱rasnā̍ bahu̱lā gabha̍stī asma̱drya1k saṃ mi̍mīhi̱ śravā̍ṃsi |

yū̱theva̍ pa̱śvaḥ pa̍śu̱pā damū̍nā a̱smām̐ i̍ndrā̱bhyā va̍vṛtsvā̱jau

||3||

taṃ va̱ indra̍ṃ ca̱tina̍masya śā̱kairi̱ha nū̱naṃ vā̍ja̱yanto̍ huvema |

yathā̍ ci̱t pūrve̍ jari̱tāra̍ ā̱surane̍dyā anava̱dyā ari̍ṣṭāḥ

||4||

dhṛ̱tavra̍to dhana̱dāḥ soma̍vṛddha̱: sa hi vā̱masya̱ vasu̍naḥ puru̱kṣuḥ |

saṃ ja̍gmire pa̱thyā̱3 rāyo̍ asmin tsamu̱dre na sindha̍vo̱ yāda̍mānāḥ

||5||

śavi̍ṣṭhaṃ na̱ ā bha̍ra śūra̱ śava̱ oji̍ṣṭha̱mojo̍ abhibhūta u̱gram |

viśvā̍ dyu̱mnā vṛṣṇyā̱ mānu̍ṣāṇāma̱smabhya̍ṃ dā harivo māda̱yadhyai̍

||6||

yaste̱ mada̍: pṛtanā̱ṣāl̤amṛ̍dhra̱ indra̱ taṃ na̱ ā bha̍ra śūśu̱vāṃsa̍m |

yena̍ to̱kasya̱ tana̍yasya sā̱tau ma̍ṃsī̱mahi̍ jigī̱vāṃsa̱stvotā̍:

||7||

ā no̍ bhara̱ vṛṣa̍ṇa̱ṃ śuṣma̍mindra dhana̱spṛta̍ṃ śūśu̱vāṃsa̍ṃ su̱dakṣa̍m |

yena̱ vaṃsā̍ma̱ pṛta̍nāsu̱ śatrū̱n tavo̱tibhi̍ru̱ta jā̱mīm̐rajā̍mīn

||8||

ā te̱ śuṣmo̍ vṛṣa̱bha e̍tu pa̱ścādotta̱rāda̍dha̱rādā pu̱rastā̍t |

ā vi̱śvato̍ a̱bhi same̍tva̱rvāṅindra̍ dyu̱mnaṃ sva̍rvaddhehya̱sme

||9||

nṛ̱vat ta̍ indra̱ nṛta̍mābhirū̱tī va̍ṃsī̱mahi̍ vā̱maṃ śroma̍tebhiḥ |

īkṣe̱ hi vasva̍ u̱bhaya̍sya rāja̱n dhā ratna̱ṃ mahi̍ sthū̱raṃ bṛ̱hanta̍m

||10||

ma̱rutva̍ntaṃ vṛṣa̱bhaṃ vā̍vṛdhā̱namaka̍vāriṃ di̱vyaṃ śā̱samindra̍m |

vi̱śvā̱sāha̱mava̍se̱ nūta̍nāyo̱graṃ sa̍ho̱dāmi̱ha taṃ hu̍vema

||11||

jana̍ṃ vajri̱n mahi̍ ci̱nmanya̍māname̱bhyo nṛbhyo̍ randhayā̱ yeṣvasmi̍ |

adhā̱ hi tvā̍ pṛthi̱vyāṃ śūra̍sātau̱ havā̍mahe̱ tana̍ye̱ goṣva̱psu

||12||

va̱yaṃ ta̍ e̱bhiḥ pu̍ruhūta sa̱khyaiḥ śatro̍:śatro̱rutta̍ra̱ it syā̍ma |

ghnanto̍ vṛ̱trāṇyu̱bhayā̍ni śūra rā̱yā ma̍dema bṛha̱tā tvotā̍:

||13||

dyaurna ya i̍ndrā̱bhi bhūmā̱ryasta̱sthau ra̱yiḥ śava̍sā pṛ̱tsu janā̍n |

taṃ na̍: sa̱hasra̍bharamurvarā̱sāṃ da̱ddhi sū̍no sahaso vṛtra̱tura̍m

||1||

di̱vo na tubhya̱manvi̍ndra sa̱trā 'su̱rya̍ṃ de̱vebhi̍rdhāyi̱ viśva̍m |

ahi̱ṃ yad vṛtrama̱po va̍vri̱vāṃsa̱ṃ hannṛ̍jīṣi̱n viṣṇu̍nā sacā̱naḥ

||2||

tūrva̱nnojī̍yān ta̱vasa̱stavī̍yān kṛ̱tabra̱hmendro̍ vṛ̱ddhama̍hāḥ |

rājā̍bhava̱nmadhu̍naḥ so̱myasya̱ viśvā̍sā̱ṃ yat pu̱rāṃ da̱rtnumāva̍t

||3||

śa̱taira̍padran pa̱ṇaya̍ i̱ndrātra̱ daśo̍ṇaye ka̱vaye̱'rkasā̍tau |

va̱dhaiḥ śuṣṇa̍syā̱śuṣa̍sya mā̱yāḥ pi̱tvo nāri̍recī̱t kiṃ ca̱na pra

||4||

ma̱ho dru̱ho apa̍ vi̱śvāyu̍ dhāyi̱ vajra̍sya̱ yat pata̍ne̱ pādi̱ śuṣṇa̍: |

u̱ru ṣa sa̱ratha̱ṃ sāra̍thaye ka̱rindra̱: kutsā̍ya̱ sūrya̍sya sā̱tau

||5||

pra śye̱no na ma̍di̱rama̱ṃśuma̍smai̱ śiro̍ dā̱sasya̱ namu̍cermathā̱yan |

prāva̱nnamī̍ṃ sā̱pyaṃ sa̱santa̍ṃ pṛ̱ṇagrā̱yā sami̱ṣā saṃ sva̱sti

||6||

vi pipro̱rahi̍māyasya dṛ̱l̤hāḥ puro̍ vajri̱ñchava̍sā̱ na da̍rdaḥ |

sudā̍ma̱n tad rekṇo̍ apramṛ̱ṣyamṛ̱jiśva̍ne dā̱traṃ dā̱śuṣe̍ dāḥ

||7||

sa ve̍ta̱suṃ daśa̍māya̱ṃ daśo̍ṇi̱ṃ tūtu̍ji̱mindra̍: svabhi̱ṣṭisu̍mnaḥ |

ā tugra̱ṃ śaśva̱dibha̱ṃ dyota̍nāya mā̱turna sī̱mupa̍ sṛjā i̱yadhyai̍

||8||

sa ī̱ṃ spṛdho̍ vanate̱ apra̍tīto̱ bibhra̱d vajra̍ṃ vṛtra̱haṇa̱ṃ gabha̍stau |

tiṣṭha̱ddharī̱ adhyaste̍va̱ garte̍ vaco̱yujā̍ vahata̱ indra̍mṛ̱ṣvam

||9||

sa̱nema̱ te'va̍sā̱ navya̍ indra̱ pra pū̱rava̍: stavanta e̱nā ya̱jñaiḥ |

sa̱pta yat pura̱: śarma̱ śāra̍dī̱rdarddhan dāsī̍: puru̱kutsā̍ya̱ śikṣa̍n

||10||

tvaṃ vṛ̱dha i̍ndra pū̱rvyo bhū̍rvariva̱syannu̱śane̍ kā̱vyāya̍ |

parā̱ nava̍vāstvamanu̱deya̍ṃ ma̱he pi̱tre da̍dātha̱ svaṃ napā̍tam

||11||

tvaṃ dhuni̍rindra̱ dhuni̍matīṝ̱ṇora̱paḥ sī̱rā na srava̍ntīḥ |

pra yatsa̍mu̱dramati̍ śūra̱ parṣi̍ pā̱rayā̍ tu̱rvaśa̱ṃ yadu̍ṃ sva̱sti

||12||

tava̍ ha̱ tyadi̍ndra̱ viśva̍mā̱jau sa̱sto dhunī̱cumu̍rī̱ yā ha̱ siṣva̍p |

dī̱daya̱dit tubhya̱ṃ some̍bhiḥ su̱nvan dabhīti̍ri̱dhmabhṛ̍tiḥ pa̱kthya1rkaiḥ

||13||

i̱mā u̍ tvā puru̱tama̍sya kā̱rorhavya̍ṃ vīra̱ havyā̍ havante |

dhiyo̍ rathe̱ṣṭhāma̱jara̱ṃ navī̍yo ra̱yirvibhū̍tirīyate vaca̱syā

||1||

tamu̍ stuṣa̱ indra̱ṃ yo vidā̍no̱ girvā̍hasaṃ gī̱rbhirya̱jñavṛ̍ddham |

yasya̱ diva̱mati̍ ma̱hnā pṛ̍thi̱vyāḥ pu̍rumā̱yasya̍ riri̱ce ma̍hi̱tvam

||2||

sa it tamo̍'vayu̱naṃ ta̍ta̱nvat sūrye̍ṇa va̱yuna̍vaccakāra |

ka̱dā te̱ martā̍ a̱mṛta̍sya̱ dhāmeya̍kṣanto̱ na mi̍nanti svadhāvaḥ

||3||

yastā ca̱kāra̱ sa kuha̍ svi̱dindra̱: kamā jana̍ṃ carati̱ kāsu̍ vi̱kṣu |

kaste̍ ya̱jño mana̍se̱ śaṃ varā̍ya̱ ko a̱rka i̍ndra kata̱maḥ sa hotā̍

||4||

i̱dā hi te̱ vevi̍ṣataḥ purā̱jāḥ pra̱tnāsa̍ ā̱suḥ pu̍rukṛ̱t sakhā̍yaḥ |

ye ma̍dhya̱māsa̍ u̱ta nūta̍nāsa u̱tāva̱masya̍ puruhūta bodhi

||5||

taṃ pṛ̱cchanto'va̍rāsa̱: parā̍ṇi pra̱tnā ta̍ indra̱ śrutyānu̍ yemuḥ |

arcā̍masi vīra brahmavāho̱ yāde̱va vi̱dma tāt tvā̍ ma̱hānta̍m

||6||

a̱bhi tvā̱ pājo̍ ra̱kṣaso̱ vi ta̍sthe̱ mahi̍ jajñā̱nama̱bhi tat su ti̍ṣṭha |

tava̍ pra̱tnena̱ yujye̍na̱ sakhyā̱ vajre̍ṇa dhṛṣṇo̱ apa̱ tā nu̍dasva

||7||

sa tu śru̍dhīndra̱ nūta̍nasya brahmaṇya̱to vī̍ra kārudhāyaḥ |

tvaṃ hyā̱3piḥ pra̱divi̍ pitṝ̱ṇāṃ śaśva̍d ba̱bhūtha̍ su̱hava̱ eṣṭau̍

||8||

protaye̱ varu̍ṇaṃ mi̱tramindra̍ṃ ma̱ruta̍: kṛ̱ṣvāva̍se no a̱dya |

pra pū̱ṣaṇa̱ṃ viṣṇu̍ma̱gniṃ pura̍ṃdhiṃ savi̱tāra̱moṣa̍dhī̱: parva̍tām̐śca

||9||

i̱ma u̍ tvā puruśāka prayajyo jari̱tāro̍ a̱bhya̍rcantya̱rkaiḥ |

śru̱dhī hava̱mā hu̍va̱to hu̍vā̱no na tvāvā̍m̐ a̱nyo a̍mṛta̱ tvada̍sti

||10||

nū ma̱ ā vāca̱mupa̍ yāhi vi̱dvān viśve̍bhiḥ sūno sahaso̱ yaja̍traiḥ |

ye a̍gniji̱hvā ṛ̍ta̱sāpa̍ ā̱surye manu̍ṃ ca̱krurupa̍ra̱ṃ dasā̍ya

||11||

sa no̍ bodhi purae̱tā su̱geṣū̱ta du̱rgeṣu̍ pathi̱kṛd vidā̍naḥ |

ye aśra̍māsa u̱ravo̱ vahi̍ṣṭhā̱stebhi̍rna indrā̱bhi va̍kṣi̱ vāja̍m

||12||

ya eka̱ iddhavya̍ścarṣaṇī̱nāmindra̱ṃ taṃ gī̱rbhira̱bhya̍rca ā̱bhiḥ |

yaḥ patya̍te vṛṣa̱bho vṛṣṇyā̍vān tsa̱tyaḥ satvā̍ purumā̱yaḥ saha̍svān

||1||

tamu̍ na̱: pūrve̍ pi̱taro̱ nava̍gvāḥ sa̱pta viprā̍so a̱bhi vā̱jaya̍ntaḥ |

na̱kṣa̱ddā̱bhaṃ tatu̍riṃ parvate̱ṣṭhāmadro̍ghavācaṃ ma̱tibhi̱: śavi̍ṣṭham

||2||

tamī̍maha̱ indra̍masya rā̱yaḥ pu̍ru̱vīra̍sya nṛ̱vata̍: puru̱kṣoḥ |

yo askṛ̍dhoyura̱jara̱: sva̍rvā̱n tamā bha̍ra harivo māda̱yadhyai̍

||3||

tanno̱ vi vo̍co̱ yadi̍ te pu̱rā ci̍jjari̱tāra̍ āna̱śuḥ su̱mnami̍ndra |

kaste̍ bhā̱gaḥ kiṃ vayo̍ dudhra khidva̱: puru̍hūta purūvaso'sura̱ghnaḥ

||4||

taṃ pṛ̱cchantī̱ vajra̍hastaṃ rathe̱ṣṭhāmindra̱ṃ vepī̱ vakva̍rī̱ yasya̱ nū gīḥ |

tu̱vi̱grā̱bhaṃ tu̍vikū̱rmiṃ ra̍bho̱dāṃ gā̱tumi̍ṣe̱ nakṣa̍te̱ tumra̱maccha̍

||5||

a̱yā ha̱ tyaṃ mā̱yayā̍ vāvṛdhā̱naṃ ma̍no̱juvā̍ svatava̱: parva̍tena |

acyu̍tā cid vīl̤i̱tā svo̍jo ru̱jo vi dṛ̱l̤hā dhṛ̍ṣa̱tā vi̍rapśin

||6||

taṃ vo̍ dhi̱yā navya̍syā̱ śavi̍ṣṭhaṃ pra̱tnaṃ pra̍tna̱vat pa̍ritaṃsa̱yadhyai̍ |

sa no̍ vakṣadanimā̱naḥ su̱vahmendro̱ viśvā̱nyati̍ du̱rgahā̍ṇi

||7||

ā janā̍ya̱ druhva̍ṇe̱ pārthi̍vāni di̱vyāni̍ dīpayo̱'ntari̍kṣā |

tapā̍ vṛṣan vi̱śvata̍: śo̱ciṣā̱ tān bra̍hma̱dviṣe̍ śocaya̱ kṣāma̱paśca̍

||8||

bhuvo̱ jana̍sya di̱vyasya̱ rājā̱ pārthi̍vasya̱ jaga̍tastveṣasaṃdṛk |

dhi̱ṣva vajra̱ṃ dakṣi̍ṇa indra̱ haste̱ viśvā̍ ajurya dayase̱ vi mā̱yāḥ

||9||

ā sa̱ṃyata̍mindra ṇaḥ sva̱stiṃ śa̍tru̱tūryā̍ya bṛha̱tīmamṛ̍dhrām |

yayā̱ dāsā̱nyāryā̍ṇi vṛ̱trā karo̍ vajrin su̱tukā̱ nāhu̍ṣāṇi

||10||

sa no̍ ni̱yudbhi̍: puruhūta vedho vi̱śvavā̍rābhi̱rā ga̍hi prayajyo |

na yā ade̍vo̱ vara̍te̱ na de̱va ābhi̍ryāhi̱ tūya̱mā ma̍drya̱drik

||11||

su̱ta it tvaṃ nimi̍śla indra̱ some̱ stome̱ brahma̍ṇi śa̱syamā̍na u̱kthe |

yad vā̍ yu̱ktābhyā̍ṃ maghava̱n hari̍bhyā̱ṃ bibhra̱d vajra̍ṃ bā̱hvori̍ndra̱ yāsi̍

||1||

yad vā̍ di̱vi pārye̱ suṣvi̍mindra vṛtra̱hatye'va̍si̱ śūra̍sātau |

yad vā̍ dakṣa̍sya bi̱bhyuṣo̱ abi̍bhya̱dara̍ndhaya̱: śardha̍ta indra̱ dasyū̍n

||2||

pātā̍ su̱tamindro̍ astu̱ soma̍ṃ praṇe̱nīru̱gro ja̍ri̱tāra̍mū̱tī |

kartā̍ vī̱rāya̱ suṣva̍ya u lo̱kaṃ dātā̱ vasu̍ stuva̱te kī̱raye̍ cit

||3||

ganteyā̍nti̱ sava̍nā̱ hari̍bhyāṃ ba̱bhrirvajra̍ṃ pa̱piḥ soma̍ṃ da̱dirgāḥ |

kartā̍ vī̱raṃ narya̱ṃ sarva̍vīra̱ṃ śrotā̱ hava̍ṃ gṛṇa̱taḥ stoma̍vāhāḥ

||4||

asmai̍ va̱yaṃ yad vā̱vāna̱ tad vi̍viṣma̱ indrā̍ya̱ yo na̍: pra̱divo̱ apa̱skaḥ |

su̱te some̍ stu̱masi̱ śaṃsa̍du̱kthendrā̍ya̱ brahma̱ vardha̍na̱ṃ yathāsa̍t

||5||

brahmā̍ṇi̱ hi ca̍kṛ̱ṣe vardha̍nāni̱ tāva̍t ta indra ma̱tibhi̍rviviṣmaḥ |

su̱te some̍ sutapā̱: śaṃta̍māni̱ rāndyā̍ kriyāsma̱ vakṣa̍ṇāni ya̱jñaiḥ

||6||

sa no̍ bodhi puro̱l̤āśa̱ṃ rarā̍ṇa̱: pibā̱ tu soma̱ṃ goṛ̍jīkamindra |

edaṃ ba̱rhiryaja̍mānasya sīdo̱ruṃ kṛ̍dhi tvāya̱ta u̍ lo̱kam

||7||

sa ma̍ndasvā̱ hyanu̱ joṣa̍mugra̱ pra tvā̍ ya̱jñāsa̍ i̱me a̍śnuvantu |

preme havā̍saḥ puruhū̱tama̱sme ā tve̱yaṃ dhīrava̍sa indra yamyāḥ

||8||

taṃ va̍: sakhāya̱: saṃ yathā̍ su̱teṣu̱ some̍bhirīṃ pṛṇatā bho̱jamindra̍m |

ku̱vit tasmā̱ asa̍ti no̱ bharā̍ya̱ na suṣvi̱mindro'va̍se mṛdhāti

||9||

e̱vedindra̍: su̱te a̍stāvi̱ some̍ bha̱radvā̍jeṣu̱ kṣaya̱dinma̱ghona̍: |

asa̱d yathā̍ jari̱tra u̱ta sū̱ririndro̍ rā̱yo vi̱śvavā̍rasya dā̱tā

||10||

vṛṣā̱ mada̱ indre̱ śloka̍ u̱kthā sacā̱ some̍ṣu suta̱pā ṛ̍jī̱ṣī |

a̱rca̱tryo̍ ma̱ghavā̱ nṛbhya̍ u̱kthairdyu̱kṣo rājā̍ gi̱rāmakṣi̍totiḥ

||1||

tatu̍rirvī̱ro naryo̱ vice̍tā̱: śrotā̱ hava̍ṃ gṛṇa̱ta u̱rvyū̍tiḥ |

vasu̱: śaṃso̍ na̱rāṃ kā̱rudhā̍yā vā̱jī stu̱to vi̱dathe̍ dāti̱ vāja̍m

||2||

akṣo̱ na ca̱kryo̍: śūra bṛ̱han pra te̍ ma̱hnā ri̍rice̱ roda̍syoḥ |

vṛ̱kṣasya̱ nu te̍ puruhūta va̱yā vyū̱3tayo̍ ruruhurindra pū̱rvīḥ

||3||

śacī̍vataste puruśāka̱ śākā̱ gavā̍miva sru̱taya̍: sa̱ṃcara̍ṇīḥ |

va̱tsānā̱ṃ na ta̱ntaya̍sta indra̱ dāma̍nvanto adā̱māna̍: sudāman

||4||

a̱nyada̱dya karva̍rama̱nyadu̱ śvo 'sa̍cca̱ sanmuhu̍rāca̱kririndra̍: |

mi̱tro no̱ atra̱ varu̍ṇaśca pū̱ṣā 'ryo vaśa̍sya parye̱tāsti̍

||5||

vi tvadāpo̱ na parva̍tasya pṛ̱ṣṭhādu̱kthebhi̍rindrānayanta ya̱jñaiḥ |

taṃ tvā̱bhiḥ su̍ṣṭu̱tibhi̍rvā̱jaya̍nta ā̱jiṃ na ja̍gmurgirvāho̱ aśvā̍:

||6||

na yaṃ jara̍nti śa̱rado̱ na māsā̱ na dyāva̱ indra̍mavaka̱rśaya̍nti |

vṛ̱ddhasya̍ cid vardhatāmasya ta̱nūḥ stome̍bhiru̱kthaiśca̍ śa̱syamā̍nā

||7||

na vī̱l̤ave̱ nama̍te̱ na sthi̱rāya̱ na śardha̍te̱ dasyu̍jūtāya sta̱vān |

ajrā̱ indra̍sya gi̱raya̍ścidṛ̱ṣvā ga̍mbhī̱re ci̍d bhavati gā̱dhama̍smai

||8||

ga̱mbhī̱reṇa̍ na u̱ruṇā̍matri̱n preṣo ya̍ndhi sutapāva̱n vājā̍n |

sthā ū̱ ṣu ū̱rdhva ū̱tī ari̍ṣaṇyanna̱ktorvyu̍ṣṭau̱ pari̍takmyāyām

||9||

saca̍sva nā̱yamava̍se a̱bhīka̍ i̱to vā̱ tami̍ndra pāhi ri̱ṣaḥ |

a̱mā cai̍na̱mara̍ṇye pāhi ri̱ṣo made̍ma śa̱tahi̍māḥ su̱vīrā̍:

||10||

yā ta̍ ū̱tira̍va̱mā yā pa̍ra̱mā yā ma̍dhya̱mendra̍ śuṣmi̱nnasti̍ |

tābhi̍rū̱ ṣu vṛ̍tra̱hatye̍'vīrna e̱bhiśca̱ vājai̍rma̱hān na̍ ugra

||1||

ābhi̱: spṛdho̍ mitha̱tīrari̍ṣaṇyanna̱mitra̍sya vyathayā ma̱nyumi̍ndra |

ābhi̱rviśvā̍ abhi̱yujo̱ viṣū̍cī̱rāryā̍ya̱ viśo'va̍ tārī̱rdāsī̍:

||2||

indra̍ jā̱maya̍ u̱ta ye'jā̍mayo'rvācī̱nāso̍ va̱nuṣo̍ yuyu̱jre |

tvame̍ṣāṃ vithu̱rā śavā̍ṃsi ja̱hi vṛṣṇyā̍ni kṛṇu̱hī parā̍caḥ

||3||

śūro̍ vā̱ śūra̍ṃ vanate̱ śarī̍raistanū̱rucā̱ taru̍ṣi̱ yat kṛ̱ṇvaite̍ |

to̱ke vā̱ goṣu̱ tana̍ye̱ yada̱psu vi kranda̍sī u̱rvarā̍su̱ bravai̍te

||4||

na̱hi tvā̱ śūro̱ na tu̱ro na dhṛ̱ṣṇurna tvā̍ yo̱dho manya̍māno yu̱yodha̍ |

indra̱ naki̍ṣṭvā̱ pratya̍styeṣā̱ṃ viśvā̍ jā̱tānya̱bhya̍si̱ tāni̍

||5||

sa pa̍tyata u̱bhayo̍rnṛ̱mṇama̱yoryadī̍ ve̱dhasa̍: sami̱the hava̍nte |

vṛ̱tre vā̍ ma̱ho nṛ̱vati̱ kṣaye̍ vā̱ vyaca̍svantā̱ yadi̍ vitanta̱saite̍

||6||

adha̍ smā te carṣa̱ṇayo̱ yadejā̱nindra̍ trā̱tota bha̍vā varū̱tā |

a̱smākā̍so̱ ye nṛta̍māso a̱rya indra̍ sū̱rayo̍ dadhi̱re pu̱ro na̍:

||7||

anu̍ te dāyi ma̱ha i̍ndri̱yāya̍ sa̱trā te̱ viśva̱manu̍ vṛtra̱hatye̍ |

anu̍ kṣa̱tramanu̱ saho̍ yaja̱trendra̍ de̱vebhi̱ranu̍ te nṛ̱ṣahye̍

||8||

e̱vā na̱: spṛdha̱: sama̍jā sa̱matsvindra̍ rāra̱ndhi mi̍tha̱tīrade̍vīḥ |

vi̱dyāma̱ vasto̱rava̍sā gṛ̱ṇanto̍ bha̱radvā̍jā u̱ta ta̍ indra nū̱nam

||9||

śru̱dhī na̍ indra̱ hvayā̍masi tvā ma̱ho vāja̍sya sā̱tau vā̍vṛṣā̱ṇāḥ |

saṃ yad viśo'ya̍nta̱ śūra̍sātā u̱graṃ no'va̱: pārye̱ aha̍n dā:

||1||

tvāṃ vā̱jī ha̍vate vājine̱yo ma̱ho vāja̍sya̱ gadhya̍sya sā̱tau |

tvāṃ vṛ̱treṣvi̍ndra̱ satpa̍ti̱ṃ taru̍tra̱ṃ tvāṃ ca̍ṣṭe muṣṭi̱hā goṣu̱ yudhya̍n

||2||

tvaṃ ka̱viṃ co̍dayo̱'rkasā̍tau̱ tvaṃ kutsā̍ya̱ śuṣṇa̍ṃ dā̱śuṣe̍ vark |

tvaṃ śiro̍ ama̱rmaṇa̱: parā̍hannatithi̱gvāya̱ śaṃsya̍ṃ kari̱ṣyan

||3||

tvaṃ ratha̱ṃ pra bha̍ro yo̱dhamṛ̱ṣvamāvo̱ yudhya̍ntaṃ vṛṣa̱bhaṃ daśa̍dyum |

tvaṃ tugra̍ṃ veta̱save̱ sacā̍ha̱n tvaṃ tuji̍ṃ gṛ̱ṇanta̍mindra tūtoḥ

||4||

tvaṃ tadu̱kthami̍ndra ba̱rhaṇā̍ ka̱: pra yaccha̱tā sa̱hasrā̍ śūra̱ darṣi̍ |

ava̍ gi̱rerdāsa̱ṃ śamba̍raṃ ha̱nprāvo̱ divo̍dāsaṃ ci̱trābhi̍rū̱tī

||5||

tvaṃ śra̱ddhābhi̍rmandasā̱naḥ somai̍rda̱bhīta̍ye̱ cumu̍rimindra siṣvap |

tvaṃ ra̱jiṃ piṭhī̍nase daśa̱syanṣa̱ṣṭiṃ sa̱hasrā̱ śacyā̱ sacā̍han

||6||

a̱haṃ ca̱na tatsū̱ribhi̍rānaśyā̱ṃ tava̱ jyāya̍ indra su̱mnamoja̍: |

tvayā̱ yatstava̍nte sadhavīra vī̱rāstri̱varū̍thena̱ nahu̍ṣā śaviṣṭha

||7||

va̱yaṃ te̍ a̱syāmi̍ndra dyu̱mnahū̍tau̱ sakhā̍yaḥ syāma mahina̱ preṣṭhā̍: |

prāta̍rdaniḥ kṣatra̱śrīra̍stu̱ śreṣṭho̍ gha̱ne vṛ̱trāṇā̍ṃ sa̱naye̱ dhanā̍nām

||8||

kima̍sya̱ made̱ kimva̍sya pī̱tāvindra̱: kima̍sya sa̱khye ca̍kāra |

raṇā̍ vā̱ ye ni̱ṣadi̱ kiṃ te a̍sya pu̱rā vi̍vidre̱ kimu̱ nūta̍nāsaḥ

||1||

sada̍sya̱ made̱ sadva̍sya pī̱tāvindra̱: sada̍sya sa̱khye ca̍kāra |

raṇā̍ vā̱ ye ni̱ṣadi̱ satte a̍sya pu̱rā vi̍vidre̱ sadu̱ nūta̍nāsaḥ

||2||

na̱hi nu te̍ mahi̱mana̍: samasya̱ na ma̍ghavanmaghava̱ttvasya̍ vi̱dma |

na rādha̍sorādhaso̱ nūta̍na̱syendra̱ naki̍rdadṛśa indri̱yaṃ te̍

||3||

e̱tattyatta̍ indri̱yama̍ceti̱ yenāva̍dhīrva̱raśi̍khasya̱ śeṣa̍: |

vajra̍sya̱ yatte̱ niha̍tasya̱ śuṣmā̍tsva̱nācci̍dindra para̱mo da̱dāra̍

||4||

vadhī̱dindro̍ va̱raśi̍khasya̱ śeṣo̍'bhyāva̱rtine̍ cāyamā̱nāya̱ śikṣa̍n |

vṛ̱cīva̍to̱ yaddha̍riyū̱pīyā̍yā̱ṃ hanpūrve̱ ardhe̍ bhi̱yasāpa̍ro̱ dart

||5||

tri̱ṃśaccha̍taṃ va̱rmiṇa̍ indra sā̱kaṃ ya̱vyāva̍tyāṃ puruhūta śrava̱syā |

vṛ̱cīva̍nta̱: śara̍ve̱ patya̍mānā̱: pātrā̍ bhindā̱nā nya̱rthānyā̍yan

||6||

yasya̱ gāvā̍varu̱ṣā sū̍yava̱syū a̱ntarū̱ ṣu cara̍to̱ reri̍hāṇā |

sa sṛñja̍yāya tu̱rvaśa̱ṃ parā̍dādvṛ̱cīva̍to daivavā̱tāya̱ śikṣa̍n

||7||

dva̱yām̐ a̍gne ra̱thino̍ viṃśa̱tiṃ gā va̱dhūma̍to ma̱ghavā̱ mahya̍ṃ sa̱mrāṭ |

a̱bhyā̱va̱rtī cā̍yamā̱no da̍dāti dū̱ṇāśe̱yaṃ dakṣi̍ṇā pārtha̱vānā̍m

||8||

ā gāvo̍ agmannu̱ta bha̱drama̍kra̱ntsīda̍ntu go̱ṣṭhe ra̱ṇaya̍ntva̱sme |

pra̱jāva̍tīḥ puru̱rūpā̍ i̱ha syu̱rindrā̍ya pū̱rvīru̱ṣaso̱ duhā̍nāḥ

||1||

indro̱ yajva̍ne pṛṇa̱te ca̍ śikṣa̱tyupedda̍dāti̱ na svaṃ mu̍ṣāyati |

bhūyo̍bhūyo ra̱yimida̍sya va̱rdhaya̱nnabhi̍nne khi̱lye ni da̍dhāti deva̱yum

||2||

na tā na̍śanti̱ na da̍bhāti̱ taska̍ro̱ nāsā̍māmi̱tro vyathi̱rā da̍dharṣati |

de̱vām̐śca̱ yābhi̱ryaja̍te̱ dadā̍ti ca̱ jyogittābhi̍: sacate̱ gopa̍tiḥ sa̱ha

||3||

na tā arvā̍ re̱ṇuka̍kāṭo aśnute̱ na sa̍ṃskṛta̱tramupa̍ yanti̱ tā a̱bhi |

u̱ru̱gā̱yamabha̍ya̱ṃ tasya̱ tā anu̱ gāvo̱ marta̍sya̱ vi ca̍ranti̱ yajva̍naḥ

||4||

gāvo̱ bhago̱ gāva̱ indro̍ me acchā̱ngāva̱: soma̍sya pratha̱masya̍ bha̱kṣaḥ |

i̱mā yā gāva̱: sa ja̍nāsa̱ indra̍ i̱cchāmīddhṛ̱dā mana̍sā ci̱dindra̍m

||5||

yū̱yaṃ gā̍vo medayathā kṛ̱śaṃ ci̍daśrī̱raṃ ci̍tkṛṇuthā su̱pratī̍kam |

bha̱draṃ gṛ̱haṃ kṛ̍ṇutha bhadravāco bṛ̱hadvo̱ vaya̍ ucyate sa̱bhāsu̍

||6||

pra̱jāva̍tīḥ sū̱yava̍saṃ ri̱śantī̍: śu̱ddhā a̱paḥ su̍prapā̱ṇe piba̍ntīḥ |

mā va̍: ste̱na ī̍śata̱ māghaśa̍ṃsa̱: pari̍ vo he̱tī ru̱drasya̍ vṛjyāḥ

||7||

upe̱damu̍pa̱parca̍namā̱su goṣūpa̍ pṛcyatām | upa̍ ṛṣa̱bhasya̱ reta̱syupe̍ndra̱ tava̍ vī̱rye̍

||8||

indra̍ṃ vo̱ nara̍: sa̱khyāya̍ sepurma̱ho yanta̍: suma̱taye̍ cakā̱nāḥ |

ma̱ho hi dā̱tā vajra̍hasto̱ asti̍ ma̱hāmu̍ ra̱ṇvamava̍se yajadhvam

||1||

ā yasmi̱nhaste̱ naryā̍ mimi̱kṣurā rathe̍ hira̱ṇyaye̍ rathe̱ṣṭhāḥ |

ā ra̱śmayo̱ gabha̍styoḥ sthū̱rayo̱rādhva̱nnaśvā̍so̱ vṛṣa̍ṇo yujā̱nāḥ

||2||

śri̱ye te̱ pādā̱ duva̱ ā mi̍mikṣurdhṛ̱ṣṇurva̱jrī śava̍sā̱ dakṣi̍ṇāvān |

vasā̍no̱ atka̍ṃ sura̱bhiṃ dṛ̱śe kaṃ sva1rṇa nṛ̍taviṣi̱ro ba̍bhūtha

||3||

sa soma̱ āmi̍ślatamaḥ su̱to bhū̱dyasmi̍npa̱ktiḥ pa̱cyate̱ santi̍ dhā̱nāḥ |

indra̱ṃ nara̍: stu̱vanto̍ brahmakā̱rā u̱kthā śaṃsa̍nto de̱vavā̍tatamāḥ

||4||

na te̱ anta̱: śava̍so dhāyya̱sya vi tu bā̍badhe̱ roda̍sī mahi̱tvā |

ā tā sū̱riḥ pṛ̍ṇati̱ tūtu̍jāno yū̱thevā̱psu sa̱mīja̍māna ū̱tī

||5||

e̱vedindra̍: su̱hava̍ ṛ̱ṣvo a̍stū̱tī anū̍tī hiriśi̱praḥ satvā̍ |

e̱vā hi jā̱to asa̍mātyojāḥ pu̱rū ca̍ vṛ̱trā ha̍nati̱ ni dasyū̍n

||6||

bhūya̱ idvā̍vṛdhe vī̱ryā̍ya̱m̐ eko̍ aju̱ryo da̍yate̱ vasū̍ni |

pra ri̍rice di̱va indra̍: pṛthi̱vyā a̱rdhamida̍sya̱ prati̱ roda̍sī u̱bhe

||1||

adhā̍ manye bṛ̱hada̍su̱rya̍masya̱ yāni̍ dā̱dhāra̱ naki̱rā mi̍nāti |

di̱vedi̍ve̱ sūryo̍ darśa̱to bhū̱dvi sadmā̍nyurvi̱yā su̱kratu̍rdhāt

||2||

a̱dyā ci̱nnū ci̱ttadapo̍ na̱dīnā̱ṃ yadā̍bhyo̱ ara̍do gā̱tumi̍ndra |

ni parva̍tā adma̱sado̱ na se̍du̱stvayā̍ dṛ̱l̤hāni̍ sukrato̱ rajā̍ṃsi

||3||

sa̱tyamittanna tvāvā̍m̐ a̱nyo a̱stīndra̍ de̱vo na martyo̱ jyāyā̍n |

aha̱nnahi̍ṃ pari̱śayā̍na̱marṇo'vā̍sṛjo a̱po acchā̍ samu̱dram

||4||

tvama̱po vi duro̱ viṣū̍cī̱rindra̍ dṛ̱l̤hama̍ruja̱: parva̍tasya |

rājā̍bhavo̱ jaga̍taścarṣaṇī̱nāṃ sā̱kaṃ sūrya̍ṃ ja̱naya̱ndyāmu̱ṣāsa̍m

||5||

abhū̱reko̍ rayipate rayī̱ṇāmā hasta̍yoradhithā indra kṛ̱ṣṭīḥ |

vi to̱ke a̱psu tana̍ye ca̱ sūre'vo̍canta carṣa̱ṇayo̱ vivā̍caḥ

||1||

tvadbhi̱yendra̱ pārthi̍vāni̱ viśvācyu̍tā ciccyāvayante̱ rajā̍ṃsi |

dyāvā̱kṣāmā̱ parva̍tāso̱ vanā̍ni̱ viśva̍ṃ dṛ̱l̤haṃ bha̍yate̱ ajma̱nnā te̍

||2||

tvaṃ kutse̍nā̱bhi śuṣṇa̍mindrā̱śuṣa̍ṃ yudhya̱ kuya̍va̱ṃ gavi̍ṣṭau |

daśa̍ prapi̱tve adha̱ sūrya̍sya muṣā̱yaśca̱kramavi̍ve̱ rapā̍ṃsi

||3||

tvaṃ śa̱tānyava̱ śamba̍rasya̱ puro̍ jaghanthāpra̱tīni̱ dasyo̍: |

aśi̍kṣo̱ yatra̱ śacyā̍ śacīvo̱ divo̍dāsāya sunva̱te su̍takre bha̱radvā̍jāya gṛṇa̱te vasū̍ni

||4||

sa sa̍tyasatvanmaha̱te raṇā̍ya̱ ratha̱mā ti̍ṣṭha tuvinṛmṇa bhī̱mam |

yā̱hi pra̍pathi̱nnava̱sopa̍ ma̱drikpra ca̍ śruta śrāvaya carṣa̱ṇibhya̍:

||5||

apū̍rvyā puru̱tamā̍nyasmai ma̱he vī̱rāya̍ ta̱vase̍ tu̱rāya̍ |

vi̱ra̱pśine̍ va̱jriṇe̱ śaṃta̍māni̱ vacā̍ṃsyā̱sā sthavi̍rāya takṣam

||1||

sa mā̱tarā̱ sūrye̍ṇā kavī̱nāmavā̍sayadru̱jadadri̍ṃ gṛṇā̱naḥ |

svā̱dhībhi̱ṝkva̍bhirvāvaśā̱na udu̱sriyā̍ṇāmasṛjanni̱dāna̍m

||2||

sa vahni̍bhi̱ṝkva̍bhi̱rgoṣu̱ śaśva̍nmi̱tajñu̍bhiḥ puru̱kṛtvā̍ jigāya |

pura̍: puro̱hā sakhi̍bhiḥ sakhī̱yandṛ̱l̤hā ru̍roja ka̱vibhi̍: ka̱viḥ san

||3||

sa nī̱vyā̍bhirjari̱tāra̱macchā̍ ma̱ho vāje̍bhirma̱hadbhi̍śca̱ śuṣmai̍: |

pu̱ru̱vīrā̍bhirvṛṣabha kṣitī̱nāmā gi̍rvaṇaḥ suvi̱tāya̱ pra yā̍hi

||4||

sa sarge̍ṇa̱ śava̍sā ta̱kto atyai̍ra̱pa indro̍ dakṣiṇa̱tastu̍rā̱ṣāṭ |

i̱tthā sṛ̍jā̱nā ana̍pāvṛ̱dartha̍ṃ di̱vedi̍ve viviṣurapramṛ̱ṣyam

||5||

ya oji̍ṣṭha indra̱ taṃ su no̍ dā̱ mado̍ vṛṣantsvabhi̱ṣṭirdāsvā̍n |

sauva̍śvya̱ṃ yo va̱nava̱tsvaśvo̍ vṛ̱trā sa̱matsu̍ sā̱saha̍da̱mitrā̍n

||1||

tvāṃ hī̱3ndrāva̍se̱ vivā̍co̱ hava̍nte carṣa̱ṇaya̱: śūra̍sātau |

tvaṃ vipre̍bhi̱rvi pa̱ṇīm̐ra̍śāya̱stvota̱ itsani̍tā̱ vāja̱marvā̍

||2||

tvaṃ tām̐ i̍ndro̱bhayā̍m̐ a̱mitrā̱ndāsā̍ vṛ̱trāṇyāryā̍ ca śūra |

vadhī̱rvane̍va̱ sudhi̍tebhi̱ratkai̱rā pṛ̱tsu da̍rṣi nṛ̱ṇāṃ nṛ̍tama

||3||

sa tvaṃ na̍ i̱ndrāka̍vābhirū̱tī sakhā̍ vi̱śvāyu̍ravi̱tā vṛ̱dhe bhū̍: |

sva̍rṣātā̱ yaddhvayā̍masi tvā̱ yudhya̍nto ne̱madhi̍tā pṛ̱tsu śū̍ra

||4||

nū̱naṃ na̍ indrāpa̱rāya̍ ca syā̱ bhavā̍ mṛl̤ī̱ka u̱ta no̍ a̱bhiṣṭau̍ |

i̱tthā gṛ̱ṇanto̍ ma̱hina̍sya̱ śarma̍ndi̱vi ṣyā̍ma̱ pārye̍ go̱ṣata̍māḥ

||5||

saṃ ca̱ tve ja̱gmurgira̍ indra pū̱rvīrvi ca̱ tvadya̍nti vi̱bhvo̍ manī̱ṣāḥ |

pu̱rā nū̱naṃ ca̍ stu̱taya̱ ṛṣī̍ṇāṃ paspṛ̱dhra indre̱ adhyu̍kthā̱rkā

||1||

pu̱ru̱hū̱to yaḥ pu̍rugū̱rta ṛbhvā̱m̐ eka̍: purupraśa̱sto asti̍ ya̱jñaiḥ |

ratho̱ na ma̱he śava̍se yujā̱no̱3'smābhi̱rindro̍ anu̱mādyo̍ bhūt

||2||

na yaṃ hiṃsa̍nti dhī̱tayo̱ na vāṇī̱rindra̱ṃ nakṣa̱ntīda̱bhi va̱rdhaya̍ntīḥ |

yadi̍ sto̱tāra̍: śa̱taṃ yatsa̱hasra̍ṃ gṛ̱ṇanti̱ girva̍ṇasa̱ṃ śaṃ tada̍smai

||3||

asmā̍ e̱taddi̱vya1rceva̍ mā̱sā mi̍mi̱kṣa indre̱ nya̍yāmi̱ soma̍: |

jana̱ṃ na dhanva̍nna̱bhi saṃ yadāpa̍: sa̱trā vā̍vṛdhu̱rhava̍nāni ya̱jñaiḥ

||4||

asmā̍ e̱tanmahyā̍ṅgū̱ṣama̍smā̱ indrā̍ya sto̱traṃ ma̱tibhi̍ravāci |

asa̱dyathā̍ maha̱ti vṛ̍tra̱tūrya̱ indro̍ vi̱śvāyu̍ravi̱tā vṛ̱dhaśca̍

||5||

ka̱dā bhu̍va̱nratha̍kṣayāṇi̱ brahma̍ ka̱dā sto̱tre sa̍hasrapo̱ṣya̍ṃ dāḥ |

ka̱dā stoma̍ṃ vāsayo'sya rā̱yā ka̱dā dhiya̍: karasi̱ vāja̍ratnāḥ

||1||

karhi̍ svi̱ttadi̍ndra̱ yannṛbhi̱rnṝnvī̱rairvī̱rānnī̱l̤ayā̍se̱ jayā̱jīn |

tri̱dhātu̱ gā adhi̍ jayāsi̱ goṣvindra̍ dyu̱mnaṃ sva̍rvaddhehya̱sme

||2||

karhi̍ svi̱ttadi̍ndra̱ yajja̍ri̱tre vi̱śvapsu̱ brahma̍ kṛ̱ṇava̍: śaviṣṭha |

ka̱dā dhiyo̱ na ni̱yuto̍ yuvāse ka̱dā goma̍ghā̱ hava̍nāni gacchāḥ

||3||

sa goma̍ghā jari̱tre aśva̍ścandrā̱ vāja̍śravaso̱ adhi̍ dhehi̱ pṛkṣa̍: |

pī̱pi̱hīṣa̍: su̱dughā̍mindra dhe̱nuṃ bha̱radvā̍jeṣu su̱ruco̍ rurucyāḥ

||4||

tamā nū̱naṃ vṛ̱jana̍ma̱nyathā̍ ci̱cchūro̱ yaccha̍kra̱ vi duro̍ gṛṇī̱ṣe |

mā nira̍raṃ śukra̱dugha̍sya dhe̱norā̍ṅgira̱sānbrahma̍ṇā vipra jinva

||5||

sa̱trā madā̍sa̱stava̍ vi̱śvaja̍nyāḥ sa̱trā rāyo'dha̱ ye pārthi̍vāsaḥ |

sa̱trā vājā̍nāmabhavo vibha̱ktā yadde̱veṣu̍ dhā̱raya̍thā asu̱rya̍m

||1||

anu̱ pra ye̍je̱ jana̱ ojo̍ asya sa̱trā da̍dhire̱ anu̍ vī̱ryā̍ya |

syū̱ma̱gṛbhe̱ dudha̱ye'rva̍te ca̱ kratu̍ṃ vṛñja̱ntyapi̍ vṛtra̱hatye̍

||2||

taṃ sa̱dhrīcī̍rū̱tayo̱ vṛṣṇyā̍ni̱ pauṃsyā̍ni ni̱yuta̍: saścu̱rindra̍m |

sa̱mu̱draṃ na sindha̍va u̱kthaśu̍ṣmā uru̱vyaca̍sa̱ṃ gira̱ ā vi̍śanti

||3||

sa rā̱yaskhāmupa̍ sṛjā gṛṇā̱naḥ pu̍ruśca̱ndrasya̱ tvami̍ndra̱ vasva̍: |

pati̍rbabhū̱thāsa̍mo̱ janā̍nā̱meko̱ viśva̍sya̱ bhuva̍nasya̱ rājā̍

||4||

sa tu śru̍dhi̱ śrutyā̱ yo du̍vo̱yurdyaurna bhūmā̱bhi rāyo̍ a̱ryaḥ |

aso̱ yathā̍ na̱: śava̍sā cakā̱no yu̱geyu̍ge̱ vaya̍sā̱ ceki̍tānaḥ

||5||

a̱rvāgratha̍ṃ vi̱śvavā̍raṃ ta u̱grendra̍ yu̱ktāso̱ hara̍yo vahantu |

kī̱riści̱ddhi tvā̱ hava̍te̱ sva̍rvānṛdhī̱mahi̍ sadha̱māda̍ste a̱dya

||1||

pro droṇe̱ hara̍ya̱: karmā̍gmanpunā̱nāsa̱ ṛjya̍nto abhūvan |

indro̍ no a̱sya pū̱rvyaḥ pa̍pīyāddyu̱kṣo mada̍sya so̱myasya̱ rājā̍

||2||

ā̱sa̱srā̱ṇāsa̍: śavasā̱namacchendra̍ṃ suca̱kre ra̱thyā̍so̱ aśvā̍: |

a̱bhi śrava̱ ṛjya̍nto vaheyu̱rnū ci̱nnu vā̱yora̱mṛta̱ṃ vi da̍syet

||3||

vari̍ṣṭho asya̱ dakṣi̍ṇāmiya̱rtīndro̍ ma̱ghonā̍ṃ tuvikū̱rmita̍maḥ |

yayā̍ vajrivaḥ pari̱yāsyaṃho̍ ma̱ghā ca̍ dhṛṣṇo̱ daya̍se̱ vi sū̱rīn

||4||

indro̱ vāja̍sya̱ sthavi̍rasya dā̱tendro̍ gī̱rbhirva̍rdhatāṃ vṛ̱ddhama̍hāḥ |

indro̍ vṛ̱traṃ hani̍ṣṭho astu̱ satvā ''tā sū̱riḥ pṛ̍ṇati̱ tūtu̍jānaḥ

||5||

apā̍di̱ta udu̍ naści̱trata̍mo ma̱hīṃ bha̍rṣaddyu̱matī̱mindra̍hūtim |

panya̍sīṃ dhī̱tiṃ daivya̍sya̱ yāma̱ñjana̍sya rā̱tiṃ va̍nate su̱dānu̍:

||1||

dū̱rācci̱dā va̍sato asya̱ karṇā̱ ghoṣā̱dindra̍sya tanyati bruvā̱ṇaḥ |

eyame̍naṃ de̱vahū̍tirvavṛtyānma̱drya1gindra̍mi̱yamṛ̱cyamā̍nā

||2||

taṃ vo̍ dhi̱yā pa̍ra̱mayā̍ purā̱jāma̱jara̱mindra̍ma̱bhya̍nūṣya̱rkaiḥ |

brahmā̍ ca̱ giro̍ dadhi̱re sama̍sminma̱hām̐śca̱ stomo̱ adhi̍ vardha̱dindre̍

||3||

vardhā̱dyaṃ ya̱jña u̱ta soma̱ indra̱ṃ vardhā̱dbrahma̱ gira̍ u̱kthā ca̱ manma̍ |

vardhāhai̍namu̱ṣaso̱ yāma̍nna̱ktorvardhā̱nmāsā̍: śa̱rado̱ dyāva̱ indra̍m

||4||

e̱vā ja̍jñā̱naṃ saha̍se̱ asā̍mi vāvṛdhā̱naṃ rādha̍se ca śru̱tāya̍ |

ma̱hāmu̱gramava̍se vipra nū̱namā vi̍vāsema vṛtra̱tūrye̍ṣu

||5||

ma̱ndrasya̍ ka̱verdi̱vyasya̱ vahne̱rvipra̍manmano vaca̱nasya̱ madhva̍: |

apā̍ na̱stasya̍ saca̱nasya̍ de̱veṣo̍ yuvasva gṛṇa̱te goa̍grāḥ

||1||

a̱yamu̍śā̱naḥ paryadri̍mu̱srā ṛ̱tadhī̍tibhiṝta̱yugyu̍jā̱naḥ |

ru̱jadaru̍gṇa̱ṃ vi va̱lasya̱ sānu̍ṃ pa̱ṇīm̐rvaco̍bhira̱bhi yo̍dha̱dindra̍:

||2||

a̱yaṃ dyo̍tayada̱dyuto̱ vya1ktūndo̱ṣā vasto̍: śa̱rada̱ indu̍rindra |

i̱maṃ ke̱tuma̍dadhu̱rnū ci̱dahnā̱ṃ śuci̍janmana u̱ṣasa̍ścakāra

||3||

a̱yaṃ ro̍cayada̱ruco̍ rucā̱no̱3'yaṃ vā̍saya̱dvyṛ1tena̍ pū̱rvīḥ |

a̱yamī̍yata ṛta̱yugbhi̱raśvai̍: sva̱rvidā̱ nābhi̍nā carṣaṇi̱prāḥ

||4||

nū gṛ̍ṇā̱no gṛ̍ṇa̱te pra̍tna rāja̱nniṣa̍: pinva vasu̱deyā̍ya pū̱rvīḥ |

a̱pa oṣa̍dhīravi̱ṣā vanā̍ni̱ gā arva̍to̱ nṝnṛ̱case̍ rirīhi

||5||

indra̱ piba̱ tubhya̍ṃ su̱to madā̱yā'va̍ sya̱ harī̱ vi mu̍cā̱ sakhā̍yā |

u̱ta pra gā̍ya ga̱ṇa ā ni̱ṣadyā'thā̍ ya̱jñāya̍ gṛṇa̱te vayo̍ dhāḥ

||1||

asya̍ piba̱ yasya̍ jajñā̱na i̍ndra̱ madā̍ya̱ kratve̱ api̍bo virapśin |

tamu̍ te̱ gāvo̱ nara̱ āpo̱ adri̱rindu̱ṃ sama̍hyanpī̱taye̱ sama̍smai

||2||

sami̍ddhe a̱gnau su̱ta i̍ndra̱ soma̱ ā tvā̍ vahantu̱ hara̍yo̱ vahi̍ṣṭhāḥ |

tvā̱ya̱tā mana̍sā johavī̱mīndrā yā̍hi suvi̱tāya̍ ma̱he na̍:

||3||

ā yā̍hi̱ śaśva̍duśa̱tā ya̍yā̱thendra̍ ma̱hā mana̍sā soma̱peya̍m |

upa̱ brahmā̍ṇi śṛṇava i̱mā no'thā̍ te ya̱jñasta̱nve̱3 vayo̍ dhāt

||4||

yadi̍ndra di̱vi pārye̱ yadṛdha̱gyadvā̱ sve sada̍ne̱ yatra̱ vāsi̍ |

ato̍ no ya̱jñamava̍se ni̱yutvā̍ntsa̱joṣā̍: pāhi girvaṇo ma̱rudbhi̍:

||5||

ahe̍l̤amāna̱ upa̍ yāhi ya̱jñaṃ tubhya̍ṃ pavanta̱ inda̍vaḥ su̱tāsa̍: |

gāvo̱ na va̍jri̱ntsvamoko̱ acchendrā ga̍hi pratha̱mo ya̱jñiyā̍nām

||1||

yā te̍ kā̱kutsukṛ̍tā̱ yā vari̍ṣṭhā̱ yayā̱ śaśva̱tpiba̍si̱ madhva̍ ū̱rmim |

tayā̍ pāhi̱ pra te̍ adhva̱ryura̍sthā̱tsaṃ te̱ vajro̍ vartatāmindra ga̱vyuḥ

||2||

e̱ṣa dra̱pso vṛ̍ṣa̱bho vi̱śvarū̍pa̱ indrā̍ya̱ vṛṣṇe̱ sama̍kāri̱ soma̍: |

e̱taṃ pi̍ba harivaḥ sthātarugra̱ yasyeśi̍ṣe pra̱divi̱ yaste̱ anna̍m

||3||

su̱taḥ somo̱ asu̍tādindra̱ vasyā̍na̱yaṃ śreyā̍ñciki̱tuṣe̱ raṇā̍ya |

e̱taṃ ti̍tirva̱ upa̍ yāhi ya̱jñaṃ tena̱ viśvā̱stavi̍ṣī̱rā pṛ̍ṇasva

||4||

hvayā̍masi̱ tvendra̍ yāhya̱rvāṅara̍ṃ te̱ soma̍sta̱nve̍ bhavāti |

śata̍krato mā̱daya̍svā su̱teṣu̱ prāsmām̐ a̍va̱ pṛta̍nāsu̱ pra vi̱kṣu

||5||

pratya̍smai̱ pipī̍ṣate̱ viśvā̍ni vi̱duṣe̍ bhara | a̱ra̱ṃga̱māya̱ jagma̱ye'pa̍ścāddaghvane̱ nare̍

||1||

eme̍naṃ pra̱tyeta̍na̱ some̍bhiḥ soma̱pāta̍mam | ama̍trebhirṝjī̱ṣiṇa̱mindra̍ṃ su̱tebhi̱rindu̍bhiḥ

||2||

yadī̍ su̱tebhi̱rindu̍bhi̱: some̍bhiḥ prati̱bhūṣa̍tha | vedā̱ viśva̍sya̱ medhi̍ro dhṛ̱ṣattaṃta̱mideṣa̍te

||3||

a̱smāa̍smā̱ idandha̱so'dhva̍ryo̱ pra bha̍rā su̱tam | ku̱vitsa̍masya̱ jenya̍sya̱ śardha̍to̱'bhiśa̍sterava̱spara̍t

||4||

yasya̱ tyacchamba̍ra̱ṃ made̱ divo̍dāsāya ra̱ndhaya̍: | a̱yaṃ sa soma̍ indra te su̱taḥ piba̍

||1||

yasya̍ tīvra̱suta̱ṃ mada̱ṃ madhya̱manta̍ṃ ca̱ rakṣa̍se | a̱yaṃ sa soma̍ indra te su̱taḥ piba̍

||2||

yasya̱ gā a̱ntaraśma̍no̱ made̍ dṛ̱l̤hā a̱vāsṛ̍jaḥ | a̱yaṃ sa soma̍ indra te su̱taḥ piba̍

||3||

yasya̍ mandā̱no andha̍so̱ māgho̍naṃ dadhi̱ṣe śava̍: | a̱yaṃ sa soma̍ indra te su̱taḥ piba̍

||4||

yo ra̍yivo ra̱yiṃta̍mo̱ yo dyu̱mnairdyu̱mnava̍ttamaḥ | soma̍: su̱taḥ sa i̍ndra̱ te'sti̍ svadhāpate̱ mada̍:

||1||

yaḥ śa̱gmastu̍viśagma te rā̱yo dā̱mā ma̍tī̱nām | soma̍: su̱taḥ sa i̍ndra̱ te'sti̍ svadhāpate̱ mada̍:

||2||

yena̍ vṛ̱ddho na śava̍sā tu̱ro na svābhi̍rū̱tibhi̍: | soma̍: su̱taḥ sa i̍ndra̱ te'sti̍ svadhāpate̱ mada̍:

||3||

tyamu̍ vo̱ apra̍haṇaṃ gṛṇī̱ṣe śava̍sa̱spati̍m | indra̍ṃ viśvā̱sāha̱ṃ nara̱ṃ maṃhi̍ṣṭhaṃ vi̱śvaca̍rṣaṇim

||4||

yaṃ va̱rdhaya̱ntīdgira̱: pati̍ṃ tu̱rasya̱ rādha̍saḥ | taminnva̍sya̱ roda̍sī de̱vī śuṣma̍ṃ saparyataḥ

||5||

tadva̍ u̱kthasya̍ ba̱rhaṇendrā̍yopastṛṇī̱ṣaṇi̍ | vipo̱ na yasyo̱tayo̱ vi yadroha̍nti sa̱kṣita̍:

||6||

avi̍da̱ddakṣa̍ṃ mi̱tro navī̍yānpapā̱no de̱vebhyo̱ vasyo̍ acait |

sa̱sa̱vāntstau̱lābhi̍rdhau̱tarī̍bhiruru̱ṣyā pā̱yura̍bhava̱tsakhi̍bhyaḥ

||7||

ṛ̱tasya̍ pa̱thi ve̱dhā a̍pāyi śri̱ye manā̍ṃsi de̱vāso̍ akran |

dadhā̍no̱ nāma̍ ma̱ho vaco̍bhi̱rvapu̍rdṛ̱śaye̍ ve̱nyo vyā̍vaḥ

||8||

dyu̱matta̍ma̱ṃ dakṣa̍ṃ dhehya̱sme sedhā̱ janā̍nāṃ pū̱rvīrarā̍tīḥ |

varṣī̍yo̱ vaya̍: kṛṇuhi̱ śacī̍bhi̱rdhana̍sya sā̱tāva̱smām̐ a̍viḍḍhi

||9||

indra̱ tubhya̱minma̍ghavannabhūma va̱yaṃ dā̱tre ha̍rivo̱ mā vi ve̍naḥ |

naki̍rā̱pirda̍dṛśe martya̱trā kima̱ṅga ra̍dhra̱coda̍naṃ tvāhuḥ

||10||

mā jasva̍ne vṛṣabha no rarīthā̱ mā te̍ re̱vata̍: sa̱khye ri̍ṣāma |

pū̱rvīṣṭa̍ indra ni̱ṣṣidho̱ jane̍ṣu ja̱hyasu̍ṣvī̱npra vṛ̱hāpṛ̍ṇataḥ

||11||

uda̱bhrāṇī̍va sta̱naya̍nniya̱rtīndro̱ rādhā̱ṃsyaśvyā̍ni̱ gavyā̍ |

tvama̍si pra̱diva̍: kā̱rudhā̍yā̱ mā tvā̍dā̱māna̱ ā da̍bhanma̱ghona̍:

||12||

adhva̍ryo vīra̱ pra ma̱he su̱tānā̱mindrā̍ya bhara̱ sa hya̍sya̱ rājā̍ |

yaḥ pū̱rvyābhi̍ru̱ta nūta̍nābhirgī̱rbhirvā̍vṛ̱dhe gṛ̍ṇa̱tāmṛṣī̍ṇām

||13||

a̱sya made̍ pu̱ru varpā̍ṃsi vi̱dvānindro̍ vṛ̱trāṇya̍pra̱tī ja̍ghāna |

tamu̱ pra ho̍ṣi̱ madhu̍mantamasmai̱ soma̍ṃ vī̱rāya̍ śi̱priṇe̱ piba̍dhyai

||14||

pātā̍ su̱tamindro̍ astu̱ soma̱ṃ hantā̍ vṛ̱traṃ vajre̍ṇa mandasā̱naḥ |

gantā̍ ya̱jñaṃ pa̍rā̱vata̍ści̱dacchā̱ vasu̍rdhī̱nāma̍vi̱tā kā̱rudhā̍yāḥ

||15||

i̱daṃ tyatpātra̍mindra̱pāna̱mindra̍sya pri̱yama̱mṛta̍mapāyi |

matsa̱dyathā̍ saumana̱sāya̍ de̱vaṃ vya1smaddveṣo̍ yu̱yava̱dvyaṃha̍:

||16||

e̱nā ma̍ndā̱no ja̱hi śū̍ra̱ śatrū̍ñjā̱mimajā̍miṃ maghavanna̱mitrā̍n |

a̱bhi̱ṣe̱ṇām̐ a̱bhyā̱3dedi̍śānā̱nparā̍ca indra̱ pra mṛ̍ṇā ja̱hī ca̍

||17||

ā̱su ṣmā̍ ṇo maghavannindra pṛ̱tsva1smabhya̱ṃ mahi̱ vari̍vaḥ su̱gaṃ ka̍: |

a̱pāṃ to̱kasya̱ tana̍yasya je̱ṣa indra̍ sū̱rīnkṛ̍ṇu̱hi smā̍ no a̱rdham

||18||

ā tvā̱ hara̍yo̱ vṛṣa̍ṇo yujā̱nā vṛṣa̍rathāso̱ vṛṣa̍raśma̱yo'tyā̍: |

a̱sma̱trāñco̱ vṛṣa̍ṇo vajra̱vāho̱ vṛṣṇe̱ madā̍ya su̱yujo̍ vahantu

||19||

ā te̍ vṛṣa̱nvṛṣa̍ṇo̱ droṇa̍masthurghṛta̱pruṣo̱ normayo̱ mada̍ntaḥ |

indra̱ pra tubhya̱ṃ vṛṣa̍bhiḥ su̱tānā̱ṃ vṛṣṇe̍ bharanti vṛṣa̱bhāya̱ soma̍m

||20||

vṛṣā̍si di̱vo vṛ̍ṣa̱bhaḥ pṛ̍thi̱vyā vṛṣā̱ sindhū̍nāṃ vṛṣa̱bhaḥ stiyā̍nām |

vṛṣṇe̍ ta̱ indu̍rvṛṣabha pīpāya svā̱dū raso̍ madhu̱peyo̱ varā̍ya

||21||

a̱yaṃ de̱vaḥ saha̍sā̱ jāya̍māna̱ indre̍ṇa yu̱jā pa̱ṇima̍stabhāyat |

a̱yaṃ svasya̍ pi̱turāyu̍dhā̱nīndu̍ramuṣṇā̱daśi̍vasya mā̱yāḥ

||22||

a̱yama̍kṛṇodu̱ṣasa̍: su̱patnī̍ra̱yaṃ sūrye̍ adadhā̱jjyoti̍ra̱ntaḥ |

a̱yaṃ tri̱dhātu̍ di̱vi ro̍ca̱neṣa̱ tri̱teṣu̍ vindada̱mṛta̱ṃ nigū̍l̤ham

||23||

a̱yaṃ dyāvā̍pṛthi̱vī vi ṣka̍bhāyada̱yaṃ ratha̍mayunaksa̱ptara̍śmim |

a̱yaṃ goṣu̱ śacyā̍ pa̱kvama̱ntaḥ somo̍ dādhāra̱ daśa̍yantra̱mutsa̍m

||24||

ya āna̍yatparā̱vata̱: sunī̍tī tu̱rvaśa̱ṃ yadu̍m | indra̱: sa no̱ yuvā̱ sakhā̍

||1||

a̱vi̱pre ci̱dvayo̱ dadha̍danā̱śunā̍ ci̱darva̍tā | indro̱ jetā̍ hi̱taṃ dhana̍m

||2||

ma̱hīra̍sya̱ praṇī̍tayaḥ pū̱rvīru̱ta praśa̍stayaḥ | nāsya̍ kṣīyanta ū̱taya̍:

||3||

sakhā̍yo̱ brahma̍vāha̱se'rca̍ta̱ pra ca̍ gāyata | sa hi na̱: prama̍tirma̱hī

||4||

tvameka̍sya vṛtrahannavi̱tā dvayo̍rasi | u̱tedṛśe̱ yathā̍ va̱yam

||5||

naya̱sīdvati̱ dviṣa̍: kṛ̱ṇoṣyu̍kthaśa̱ṃsina̍: | nṛbhi̍: su̱vīra̍ ucyase

||6||

bra̱hmāṇa̱ṃ brahma̍vāhasaṃ gī̱rbhiḥ sakhā̍yamṛ̱gmiya̍m | gāṃ na do̱hase̍ huve

||7||

yasya̱ viśvā̍ni̱ hasta̍yorū̱curvasū̍ni̱ ni dvi̱tā | vī̱rasya̍ pṛtanā̱ṣaha̍:

||8||

vi dṛ̱l̤hāni̍ cidadrivo̱ janā̍nāṃ śacīpate | vṛ̱ha mā̱yā a̍nānata

||9||

tamu̍ tvā satya somapā̱ indra̍ vājānāṃ pate | ahū̍mahi śrava̱syava̍:

||10||

tamu̍ tvā̱ yaḥ pu̱rāsi̍tha̱ yo vā̍ nū̱naṃ hi̱te dhane̍ | havya̱: sa śru̍dhī̱ hava̍m

||11||

dhī̱bhirarva̍dbhi̱rarva̍to̱ vājā̍m̐ indra śra̱vāyyā̍n | tvayā̍ jeṣma hi̱taṃ dhana̍m

||12||

abhū̍ru vīra girvaṇo ma̱hām̐ i̍ndra̱ dhane̍ hi̱te | bhare̍ vitanta̱sāyya̍:

||13||

yā ta̍ ū̱tira̍mitrahanma̱kṣūja̍vasta̱māsa̍ti | tayā̍ no hinuhī̱ ratha̍m

||14||

sa rathe̍na ra̱thīta̍mo̱'smāke̍nābhi̱yugva̍nā | jeṣi̍ jiṣṇo hi̱taṃ dhana̍m

||15||

ya eka̱ ittamu̍ ṣṭuhi kṛṣṭī̱nāṃ vica̍rṣaṇiḥ | pati̍rja̱jñe vṛṣa̍kratuḥ

||16||

yo gṛ̍ṇa̱tāmidāsi̍thā̱''pirū̱tī śi̱vaḥ sakhā̍ | sa tvaṃ na̍ indra mṛl̤aya

||17||

dhi̱ṣva vajra̱ṃ gabha̍styo rakṣo̱hatyā̍ya vajrivaḥ | sā̱sa̱hī̱ṣṭhā a̱bhi spṛdha̍:

||18||

pra̱tnaṃ ra̍yī̱ṇāṃ yuja̱ṃ sakhā̍yaṃ kīri̱coda̍nam | brahma̍vāhastamaṃ huve

||19||

sa hi viśvā̍ni̱ pārthi̍vā̱m̐ eko̱ vasū̍ni̱ patya̍te | girva̍ṇastamo̱ adhri̍guḥ

||20||

sa no̍ ni̱yudbhi̱rā pṛ̍ṇa̱ kāma̱ṃ vāje̍bhira̱śvibhi̍: | goma̍dbhirgopate dhṛ̱ṣat

||21||

tadvo̍ gāya su̱te sacā̍ puruhū̱tāya̱ satva̍ne | śaṃ yadgave̱ na śā̱kine̍

||22||

na ghā̱ vasu̱rni ya̍mate dā̱naṃ vāja̍sya̱ goma̍taḥ | yatsī̱mupa̱ śrava̱dgira̍:

||23||

ku̱vitsa̍sya̱ pra hi vra̱jaṃ goma̍ntaṃ dasyu̱hā gama̍t | śacī̍bhi̱rapa̍ no varat

||24||

i̱mā u̍ tvā śatakrato̱'bhi pra ṇo̍nuvu̱rgira̍: | indra̍ va̱tsaṃ na mā̱tara̍:

||25||

dū̱ṇāśa̍ṃ sa̱khyaṃ tava̱ gaura̍si vīra gavya̱te | aśvo̍ aśvāya̱te bha̍va

||26||

sa ma̍ndasvā̱ hyandha̍so̱ rādha̍se ta̱nvā̍ ma̱he | na sto̱tāra̍ṃ ni̱de ka̍raḥ

||27||

i̱mā u̍ tvā su̱tesu̍te̱ nakṣa̍nte girvaṇo̱ gira̍: | va̱tsaṃ gāvo̱ na dhe̱nava̍:

||28||

pu̱rū̱tama̍ṃ purū̱ṇāṃ sto̍tṝ̱ṇāṃ vivā̍ci | vāje̍bhirvājaya̱tām

||29||

a̱smāka̍mindra bhūtu te̱ stomo̱ vāhi̍ṣṭho̱ anta̍maḥ | a̱smānrā̱ye ma̱he hi̍nu

||30||

adhi̍ bṛ̱buḥ pa̍ṇī̱nāṃ varṣi̍ṣṭhe mū̱rdhanna̍sthāt | u̱ruḥ kakṣo̱ na gā̱ṅgyaḥ

||31||

yasya̍ vā̱yori̍va dra̱vadbha̱drā rā̱tiḥ sa̍ha̱sriṇī̍ | sa̱dyo dā̱nāya̱ maṃha̍te

||32||

tatsu no̱ viśve̍ a̱rya ā sadā̍ gṛṇanti kā̱rava̍: | bṛ̱buṃ sa̍hasra̱dāta̍maṃ sū̱riṃ sa̍hasra̱sāta̍mam

||33||

tvāmiddhi havā̍mahe sā̱tā vāja̍sya kā̱rava̍: |

tvāṃ vṛ̱treṣvi̍ndra̱ satpa̍ti̱ṃ nara̱stvāṃ kāṣṭhā̱svarva̍taḥ

||1||

sa tvaṃ na̍ścitra vajrahasta dhṛṣṇu̱yā ma̱haḥ sta̍vā̱no a̍drivaḥ |

gāmaśva̍ṃ ra̱thya̍mindra̱ saṃ ki̍ra sa̱trā vāja̱ṃ na ji̱gyuṣe̍

||2||

yaḥ sa̍trā̱hā vica̍rṣaṇi̱rindra̱ṃ taṃ hū̍mahe va̱yam |

saha̍sramuṣka̱ tuvi̍nṛmṇa̱ satpa̍te̱ bhavā̍ sa̱matsu̍ no vṛ̱dhe

||3||

bādha̍se̱ janā̍nvṛṣa̱bheva̍ ma̱nyunā̱ ghṛṣau̍ mī̱l̤ha ṛ̍cīṣama |

a̱smāka̍ṃ bodhyavi̱tā ma̍hādha̱ne ta̱nūṣva̱psu sūrye̍

||4||

indra̱ jyeṣṭha̍ṃ na̱ ā bha̍ra̱m̐ oji̍ṣṭha̱ṃ papu̍ri̱ śrava̍: |

yene̱me ci̍tra vajrahasta̱ roda̍sī̱ obhe su̍śipra̱ prāḥ

||5||

tvāmu̱gramava̍se carṣaṇī̱saha̱ṃ rāja̍nde̱veṣu̍ hūmahe |

viśvā̱ su no̍ vithu̱rā pi̍bda̱nā va̍so̱'mitrā̍ntsu̱ṣahā̍nkṛdhi

||6||

yadi̍ndra̱ nāhu̍ṣī̱ṣvām̐ ojo̍ nṛ̱mṇaṃ ca̍ kṛ̱ṣṭiṣu̍ |

yadvā̱ pañca̍ kṣitī̱nāṃ dyu̱mnamā bha̍ra sa̱trā viśvā̍ni̱ pauṃsyā̍

||7||

yadvā̍ tṛ̱kṣau ma̍ghavandru̱hyāvā jane̱ yatpū̱rau kacca̱ vṛṣṇya̍m |

a̱smabhya̱ṃ tadri̍rīhi̱ saṃ nṛ̱ṣāhye̱'mitrā̍npṛ̱tsu tu̱rvaṇe̍

||8||

indra̍ tri̱dhātu̍ śara̱ṇaṃ tri̱varū̍thaṃ svasti̱mat |

cha̱rdirya̍ccha ma̱ghava̍dbhyaśca̱ mahya̍ṃ ca yā̱vayā̍ di̱dyume̍bhyaḥ

||9||

ye ga̍vya̱tā mana̍sā̱ śatru̍māda̱bhura̍bhipra̱ghnanti̍ dhṛṣṇu̱yā |

adha̍ smā no maghavannindra girvaṇastanū̱pā anta̍mo bhava

||10||

adha̍ smā no vṛ̱dhe bha̱vendra̍ nā̱yama̍vā yu̱dhi |

yada̱ntari̍kṣe pa̱taya̍nti pa̱rṇino̍ di̱dyava̍sti̱gmamū̍rdhānaḥ

||11||

yatra̱ śūrā̍sasta̱nvo̍ vitanva̱te pri̱yā śarma̍ pitṝ̱ṇām |

adha̍ smā yaccha ta̱nve̱3 tane̍ ca cha̱rdira̱citta̍ṃ yā̱vaya̱ dveṣa̍:

||12||

yadi̍ndra̱ sarge̱ arva̍taśco̱dayā̍se mahādha̱ne |

a̱sa̱ma̱ne adhva̍ni vṛji̱ne pa̱thi śye̱nām̐ i̍va śravasya̱taḥ

||13||

sindhū̍m̐riva prava̱ṇa ā̍śu̱yā ya̱to yadi̱ klośa̱manu̱ ṣvaṇi̍ |

ā ye vayo̱ na varvṛ̍ta̱tyāmi̍ṣi gṛbhī̱tā bā̱hvorgavi̍

||14||

svā̱duṣkilā̱yaṃ madhu̍mām̐ u̱tāyaṃ tī̱vraḥ kilā̱yaṃ rasa̍vām̐ u̱tāyam |

u̱to nva1sya pa̍pi̱vāṃsa̱mindra̱ṃ na kaśca̱na sa̍hata āha̱veṣu̍

||1||

a̱yaṃ svā̱duri̱ha madi̍ṣṭha āsa̱ yasyendro̍ vṛtra̱hatye̍ ma̱māda̍ |

pu̱rūṇi̱ yaścyau̱tnā śamba̍rasya̱ vi na̍va̱tiṃ nava̍ ca de̱hyo̱3 han

||2||

a̱yaṃ me̍ pī̱ta udi̍yarti̱ vāca̍ma̱yaṃ ma̍nī̱ṣāmu̍śa̱tīma̍jīgaḥ |

a̱yaṃ ṣal̤u̱rvīra̍mimīta̱ dhīro̱ na yābhyo̱ bhuva̍na̱ṃ kacca̱nāre

||3||

a̱yaṃ sa yo va̍ri̱māṇa̍ṃ pṛthi̱vyā va̱rṣmāṇa̍ṃ di̱vo akṛ̍ṇoda̱yaṃ saḥ |

a̱yaṃ pī̱yūṣa̍ṃ ti̱sṛṣu̍ pra̱vatsu̱ somo̍ dādhāro̱rva1ntari̍kṣam

||4||

a̱yaṃ vi̍daccitra̱dṛśī̍ka̱marṇa̍: śu̱krasa̍dmanāmu̱ṣasā̱manī̍ke |

a̱yaṃ ma̱hānma̍ha̱tā skambha̍ne̱noddyāma̍stabhnādvṛṣa̱bho ma̱rutvā̍n

||5||

dhṛ̱ṣatpi̍ba ka̱laśe̱ soma̍mindra vṛtra̱hā śū̍ra sama̱re vasū̍nām |

mādhya̍ṃdine̱ sava̍na̱ ā vṛ̍ṣasva rayi̱sthāno̍ ra̱yima̱smāsu̍ dhehi

||6||

indra̱ pra ṇa̍: purae̱teva̍ paśya̱ pra no̍ naya prata̱raṃ vasyo̱ accha̍ |

bhavā̍ supā̱ro a̍tipāra̱yo no̱ bhavā̱ sunī̍tiru̱ta vā̱manī̍tiḥ

||7||

u̱ruṃ no̍ lo̱kamanu̍ neṣi vi̱dvāntsva̍rva̱jjyoti̱rabha̍yaṃ sva̱sti |

ṛ̱ṣvā ta̍ indra̱ sthavi̍rasya bā̱hū upa̍ stheyāma śara̱ṇā bṛ̱hantā̍

||8||

vari̍ṣṭhe na indra va̱ndhure̍ dhā̱ vahi̍ṣṭhayoḥ śatāva̱nnaśva̍yo̱rā |

iṣa̱mā va̍kṣī̱ṣāṃ varṣi̍ṣṭhā̱ṃ mā na̍stārīnmaghava̱nrāyo̍ a̱ryaḥ

||9||

indra̍ mṛ̱l̤a mahya̍ṃ jī̱vātu̍miccha co̱daya̱ dhiya̱maya̍so̱ na dhārā̍m |

yatkiṃ cā̱haṃ tvā̱yuri̱daṃ vadā̍mi̱ tajju̍ṣasva kṛ̱dhi mā̍ de̱vava̍ntam

||10||

trā̱tāra̱mindra̍mavi̱tāra̱mindra̱ṃ have̍have su̱hava̱ṃ śūra̱mindra̍m |

hvayā̍mi śa̱kraṃ pu̍ruhū̱tamindra̍ṃ sva̱sti no̍ ma̱ghavā̍ dhā̱tvindra̍:

||11||

indra̍: su̱trāmā̱ svavā̱m̐ avo̍bhiḥ sumṛl̤ī̱ko bha̍vatu vi̱śvave̍dāḥ |

bādha̍tā̱ṃ dveṣo̱ abha̍yaṃ kṛṇotu su̱vīrya̍sya̱ pata̍yaḥ syāma

||12||

tasya̍ va̱yaṃ su̍ma̱tau ya̱jñiya̱syā'pi̍ bha̱dre sau̍mana̱se syā̍ma |

sa su̱trāmā̱ svavā̱m̐ indro̍ a̱sme ā̱rācci̱ddveṣa̍: sanu̱taryu̍yotu

||13||

ava̱ tve i̍ndra pra̱vato̱ normirgiro̱ brahmā̍ṇi ni̱yuto̍ dhavante |

u̱rū na rādha̱: sava̍nā pu̱rūṇya̱po gā va̍jrinyuvase̱ samindū̍n

||14||

ka ī̍ṃ stava̱tkaḥ pṛ̍ṇā̱tko ya̍jāte̱ yadu̱graminma̱ghavā̍ vi̱śvahāve̍t |

pādā̍viva pra̱hara̍nna̱nyama̍nyaṃ kṛ̱ṇoti̱ pūrva̱mapa̍ra̱ṃ śacī̍bhiḥ

||15||

śṛ̱ṇve vī̱ra u̱gramu̍graṃ damā̱yanna̱nyama̍nyamatinenī̱yamā̍naḥ |

e̱dha̱mā̱na̱dvil̤u̱bhaya̍sya̱ rājā̍ coṣkū̱yate̱ viśa̱ indro̍ manu̱ṣyā̍n

||16||

parā̱ pūrve̍ṣāṃ sa̱khyā vṛ̍ṇakti vi̱tartu̍rāṇo̱ apa̍rebhireti |

anā̍nubhūtīravadhūnvā̱naḥ pū̱rvīrindra̍: śa̱rada̍startarīti

||17||

rū̱paṃrū̍pa̱ṃ prati̍rūpo babhūva̱ tada̍sya rū̱paṃ pra̍ti̱cakṣa̍ṇāya |

indro̍ mā̱yābhi̍: puru̱rūpa̍ īyate yu̱ktā hya̍sya̱ hara̍yaḥ śa̱tā daśa̍

||18||

yu̱jā̱no ha̱ritā̱ rathe̱ bhūri̱ tvaṣṭe̱ha rā̍jati |

ko vi̱śvāhā̍ dviṣa̱taḥ pakṣa̍ āsata u̱tāsī̍neṣu sū̱riṣu̍

||19||

a̱ga̱vyū̱ti kṣetra̱māga̍nma devā u̱rvī sa̱tī bhūmi̍raṃhūra̱ṇābhū̍t |

bṛha̍spate̱ pra ci̍kitsā̱ gavi̍ṣṭāvi̱tthā sa̱te ja̍ri̱tra i̍ndra̱ panthā̍m

||20||

di̱vedi̍ve sa̱dṛśī̍ra̱nyamardha̍ṃ kṛ̱ṣṇā a̍sedha̱dapa̱ sadma̍no̱ jāḥ |

aha̍ndā̱sā vṛ̍ṣa̱bho va̍sna̱yanto̱davra̍je va̱rcina̱ṃ śamba̍raṃ ca

||21||

pra̱sto̱ka innu rādha̍sasta indra̱ daśa̱ kośa̍yī̱rdaśa̍ vā̱jino̍'dāt |

divo̍dāsādatithi̱gvasya̱ rādha̍: śāmba̱raṃ vasu̱ pratya̍grabhīṣma

||22||

daśāśvā̱ndaśa̱ kośā̱ndaśa̱ vastrādhi̍bhojanā | daśo̍ hiraṇyapi̱ṇḍāndivo̍dāsādasāniṣam

||23||

daśa̱ rathā̱npraṣṭi̍mataḥ śa̱taṃ gā atha̍rvabhyaḥ | a̱śva̱thaḥ pā̱yave̍'dāt

||24||

mahi̱ rādho̍ vi̱śvaja̍nya̱ṃ dadhā̍nānbha̱radvā̍jāntsārñja̱yo a̱bhya̍yaṣṭa

||25||

vana̍spate vī̱ḍva̍ṅgo̱ hi bhū̱yā a̱smatsa̍khā pra̱tara̍ṇaḥ su̱vīra̍: |

gobhi̱: sana̍ddho asi vī̱l̤aya̍svā''sthā̱tā te̍ jayatu̱ jetvā̍ni

||26||

di̱vaspṛ̍thi̱vyāḥ paryoja̱ udbhṛ̍ta̱ṃ vana̱spati̍bhya̱: paryābhṛ̍ta̱ṃ saha̍: |

a̱pāmo̱jmāna̱ṃ pari̱ gobhi̱rāvṛ̍ta̱mindra̍sya̱ vajra̍ṃ ha̱viṣā̱ ratha̍ṃ yaja

||27||

indra̍sya̱ vajro̍ ma̱rutā̱manī̍kaṃ mi̱trasya̱ garbho̱ varu̍ṇasya̱ nābhi̍: |

semāṃ no̍ ha̱vyadā̍tiṃ juṣā̱ṇo deva̍ ratha̱ prati̍ ha̱vyā gṛ̍bhāya

||28||

upa̍ śvāsaya pṛthi̱vīmu̱ta dyāṃ pu̍ru̱trā te̍ manutā̱ṃ viṣṭhi̍ta̱ṃ jaga̍t |

sa du̍ndubhe sa̱jūrindre̍ṇa de̱vairdū̱rāddavī̍yo̱ apa̍ sedha̱ śatrū̍n

||29||

ā kra̍ndaya̱ bala̱mojo̍ na̱ ā dhā̱ niḥ ṣṭa̍nihi duri̱tā bādha̍mānaḥ |

apa̍ protha dundubhe du̱cchunā̍ i̱ta indra̍sya mu̱ṣṭira̍si vī̱l̤aya̍sva

||30||

āmūra̍ja pra̱tyāva̍rtaye̱māḥ ke̍tu̱maddu̍ndu̱bhirvā̍vadīti |

samaśva̍parṇā̱ścara̍nti no̱ naro̱'smāka̍mindra ra̱thino̍ jayantu

||31||

Sūkta 48

22 śaṃyurbārhaspatya: [tṛṇapāṇi:] |1-10agni:; 11- 15, 20 – 21 maruta: [ 13-15 liṃgoktā vā ], 16-19 pūṣā, 22 dyāvābhūmī vā pṛśnirvā | pragātha:; =[ 1,3 bṛhatī; 2, 4 satobṛhatī; 5 bṛhatī, 6 mahāsatobṛhatī; 7 mahābṛhatī, 8 mahāsatobṛhatī; 9 bṛhatī, 10 satobṛhatī; 11 kakup , 12 satobṛhatī ], 13 purauṣṇik ,14 bṛhatī, 15 atijagatī, 16 kakup , 17 satobṛhatī, 18 purauṣṇik, 19-20 bṛhatī , 21 mahābṛhatī yavamadhyā, 22 anuṣṭup |

ya̱jñāya̍jñā vo a̱gnaye̍ gi̱rāgi̍rā ca̱ dakṣa̍se | prapra̍ va̱yama̱mṛta̍ṃ jā̱tave̍dasaṃ pri̱yaṃ mi̱traṃ na śa̍ṃsiṣam

||1||

ū̱rjo napā̍ta̱ṃ sa hi̱nāyama̍sma̱yurdāśe̍ma ha̱vyadā̍taye | bhuva̱dvāje̍ṣvavi̱tā bhuva̍dvṛ̱dha u̱ta trā̱tā ta̱nūnā̍m

||2||

vṛṣā̱ hya̍gne a̱jaro̍ ma̱hānvi̱bhāsya̱rciṣā̍ | aja̍sreṇa śo̱ciṣā̱ śośu̍cacchuce sudī̱tibhi̱: su dī̍dihi

||3||

ma̱ho de̱vānyaja̍si̱ yakṣyā̍nu̱ṣaktava̱ kratvo̱ta da̱ṃsanā̍ | a̱rvāca̍: sīṃ kṛṇuhya̱gne'va̍se̱ rāsva̱ vājo̱ta va̍ṃsva

||4||

yamāpo̱ adra̍yo̱ vanā̱ garbha̍mṛ̱tasya̱ pipra̍ti | saha̍sā̱ yo ma̍thi̱to jāya̍te̱ nṛbhi̍: pṛthi̱vyā adhi̱ sāna̍vi

||5||

ā yaḥ pa̱prau bhā̱nunā̱ roda̍sī u̱bhe dhū̱mena̍ dhāvate di̱vi | ti̱rastamo̍ dadṛśa̱ ūrmyā̱svā śyā̱vāsva̍ru̱ṣo vṛṣā śyā̱vā a̍ru̱ṣo vṛṣā̍

||6||

bṛ̱hadbhi̍ragne a̱rcibhi̍: śu̱kreṇa̍ deva śo̱ciṣā̍ | bha̱radvā̍je samidhā̱no ya̍viṣṭhya re̱vanna̍: śukra dīdihi dyu̱matpā̍vaka dīdihi

||7||

viśvā̍sāṃ gṛ̱hapa̍tirvi̱śāma̍si̱ tvama̍gne̱ mānu̍ṣīṇām | śa̱taṃ pū̱rbhirya̍viṣṭha pā̱hyaṃha̍saḥ same̱ddhāra̍ṃ śa̱taṃ himā̍: sto̱tṛbhyo̱ ye ca̱ dada̍ti

||8||

tvaṃ na̍ści̱tra ū̱tyā vaso̱ rādhā̍ṃsi codaya | a̱sya rā̱yastvama̍gne ra̱thīra̍si vi̱dā gā̱dhaṃ tu̱ce tu na̍:

||9||

parṣi̍ to̱kaṃ tana̍yaṃ pa̱rtṛbhi̱ṣṭvamada̍bdhai̱rapra̍yutvabhiḥ | agne̱ hel̤ā̍ṃsi̱ daivyā̍ yuyodhi̱ no'de̍vāni̱ hvarā̍ṃsi ca

||10||

ā sa̍khāyaḥ saba̱rdughā̍ṃ dhe̱numa̍jadhva̱mupa̱ navya̍sā̱ vaca̍: | sṛ̱jadhva̱mana̍pasphurām

||11||

yā śardhā̍ya̱ māru̍tāya̱ svabhā̍nave̱ śravo'mṛ̍tyu̱ dhukṣa̍ta | yā mṛ̍l̤ī̱ke ma̱rutā̍ṃ tu̱rāṇā̱ṃ yā su̱mnaire̍va̱yāva̍rī

||12||

bha̱radvā̍jā̱yāva̍ dhukṣata dvi̱tā | dhe̱nuṃ ca̍ vi̱śvado̍hasa̱miṣa̍ṃ ca vi̱śvabho̍jasam

||13||

taṃ va̱ indra̱ṃ na su̱kratu̱ṃ varu̍ṇamiva mā̱yina̍m | a̱rya̱maṇa̱ṃ na ma̱ndraṃ sṛ̱prabho̍jasa̱ṃ viṣṇu̱ṃ na stu̍ṣa ā̱diśe̍

||14||

tve̱ṣaṃ śardho̱ na māru̍taṃ tuvi̱ṣvaṇya̍na̱rvāṇa̍ṃ pū̱ṣaṇa̱ṃ saṃ yathā̍ śa̱tā | saṃ sa̱hasrā̱ kāri̍ṣaccarṣa̱ṇibhya̱ ām̐ ā̱virgū̱l̤hā vasū̍ karatsu̱vedā̍ no̱ vasū̍ karat

||15||

ā mā̍ pūṣa̱nnupa̍ drava̱ śaṃsi̍ṣa̱ṃ nu te̍ apika̱rṇa ā̍ghṛṇe | a̱ghā a̱ryo arā̍tayaḥ

||16||

mā kā̍ka̱mbīra̱mudvṛ̍ho̱ vana̱spati̱maśa̍stī̱rvi hi nīna̍śaḥ | mota sūro̱ aha̍ e̱vā ca̱na grī̱vā ā̱dadha̍te̱ veḥ

||17||

dṛte̍riva te'vṛ̱kama̍stu sa̱khyam | acchi̍drasya dadha̱nvata̱: supū̍rṇasya dadha̱nvata̍:

||18||

pa̱ro hi martyai̱rasi̍ sa̱mo de̱vairu̱ta śri̱yā | a̱bhi khya̍: pūṣa̱npṛta̍nāsu na̱stvamavā̍ nū̱naṃ yathā̍ pu̱rā

||19||

vā̱mī vā̱masya̍ dhūtaya̱: praṇī̍tirastu sū̱nṛtā̍ | de̱vasya̍ vā maruto̱ martya̍sya vejā̱nasya̍ prayajyavaḥ

||20||

sa̱dyaści̱dyasya̍ carkṛ̱tiḥ pari̱ dyāṃ de̱vo naiti̱ sūrya̍: | tve̱ṣaṃ śavo̍ dadhire̱ nāma̍ ya̱jñiya̍ṃ ma̱ruto̍ vṛtra̱haṃ śavo̱ jyeṣṭha̍ṃ vṛtra̱haṃ śava̍:

||21||

sa̱kṛddha̱ dyaura̍jāyata sa̱kṛdbhūmi̍rajāyata | pṛśnyā̍ du̱gdhaṃ sa̱kṛtpaya̱stada̱nyo nānu̍ jāyate

||22||

stu̱ṣe jana̍ṃ suvra̱taṃ navya̍sībhirgī̱rbhirmi̱trāvaru̍ṇā sumna̱yantā̍ |

ta ā ga̍mantu̱ ta i̱ha śru̍vantu sukṣa̱trāso̱ varu̍ṇo mi̱tro a̱gniḥ

||1||

vi̱śovi̍śa̱ īḍya̍madhva̱reṣvadṛ̍ptakratumara̱tiṃ yu̍va̱tyoḥ |

di̱vaḥ śiśu̱ṃ saha̍saḥ sū̱numa̱gniṃ ya̱jñasya̍ ke̱tuma̍ru̱ṣaṃ yaja̍dhyai

||2||

a̱ru̱ṣasya̍ duhi̱tarā̱ virū̍pe̱ stṛbhi̍ra̱nyā pi̍pi̱śe sūro̍ a̱nyā |

mi̱tha̱sturā̍ vi̱cara̍ntī pāva̱ke manma̍ śru̱taṃ na̍kṣata ṛ̱cyamā̍ne

||3||

pra vā̱yumacchā̍ bṛha̱tī ma̍nī̱ṣā bṛ̱hadra̍yiṃ vi̱śvavā̍raṃ ratha̱prām |

dyu̱tadyā̍mā ni̱yuta̱: patya̍mānaḥ ka̱viḥ ka̱vimi̍yakṣasi prayajyo

||4||

sa me̱ vapu̍śchadayada̱śvino̱ryo ratho̍ vi̱rukmā̱nmana̍sā yujā̱naḥ |

yena̍ narā nāsatyeṣa̱yadhyai̍ va̱rtiryā̱thastana̍yāya̱ tmane̍ ca

||5||

parja̍nyavātā vṛṣabhā pṛthi̱vyāḥ purī̍ṣāṇi jinvata̱mapyā̍ni |

satya̍śrutaḥ kavayo̱ yasya̍ gī̱rbhirjaga̍taḥ sthāta̱rjaga̱dā kṛ̍ṇudhvam

||6||

pāvī̍ravī ka̱nyā̍ ci̱trāyu̱: sara̍svatī vī̱rapa̍tnī̱ dhiya̍ṃ dhāt |

gnābhi̱racchi̍draṃ śara̱ṇaṃ sa̱joṣā̍ durā̱dharṣa̍ṃ gṛṇa̱te śarma̍ yaṃsat

||7||

pa̱thaspa̍tha̱: pari̍patiṃ vaca̱syā kāme̍na kṛ̱to a̱bhyā̍nal̤a̱rkam |

sa no̍ rāsacchu̱rudha̍śca̱ndrāgrā̱ dhiya̍ṃdhiyaṃ sīṣadhāti̱ pra pū̱ṣā

||8||

pra̱tha̱ma̱bhāja̍ṃ ya̱śasa̍ṃ vayo̱dhāṃ su̍pā̱ṇiṃ de̱vaṃ su̱gabha̍sti̱mṛbhva̍m |

hotā̍ yakṣadyaja̱taṃ pa̱styā̍nāma̱gnistvaṣṭā̍raṃ su̱hava̍ṃ vi̱bhāvā̍

||9||

bhuva̍nasya pi̱tara̍ṃ gī̱rbhirā̱bhī ru̱draṃ divā̍ va̱rdhayā̍ ru̱drama̱ktau |

bṛ̱hanta̍mṛ̱ṣvama̱jara̍ṃ suṣu̱mnamṛdha̍gghuvema ka̱vine̍ṣi̱tāsa̍:

||10||

ā yu̍vānaḥ kavayo yajñiyāso̱ maru̍to ga̱nta gṛ̍ṇa̱to va̍ra̱syām |

a̱ci̱traṃ ci̱ddhi jinva̍thā vṛ̱dhanta̍ i̱tthā nakṣa̍nto naro aṅgira̱svat

||11||

pra vī̱rāya̱ pra ta̱vase̍ tu̱rāyā'jā̍ yū̱theva̍ paśu̱rakṣi̱rasta̍m |

sa pi̍spṛśati ta̱nvi̍ śru̱tasya̱ stṛbhi̱rna nāka̍ṃ vaca̱nasya̱ vipa̍:

||12||

yo rajā̍ṃsi vima̱me pārthi̍vāni̱ triści̱dviṣṇu̱rmana̍ve bādhi̱tāya̍ |

tasya̍ te̱ śarma̍nnupada̱dyamā̍ne rā̱yā ma̍dema ta̱nvā̱3 tanā̍ ca

||13||

tanno'hi̍rbu̱dhnyo̍ a̱dbhira̱rkaistatparva̍ta̱statsa̍vi̱tā cano̍ dhāt |

tadoṣa̍dhībhira̱bhi rā̍ti̱ṣāco̱ bhaga̱: pura̍ṃdhirjinvatu̱ pra rā̱ye

||14||

nū no̍ ra̱yiṃ ra̱thya̍ṃ carṣaṇi̱prāṃ pu̍ru̱vīra̍ṃ ma̱ha ṛ̱tasya̍ go̱pām |

kṣaya̍ṃ dātā̱jara̱ṃ yena̱ janā̱ntspṛdho̱ ade̍vīra̱bhi ca̱ kramā̍ma̱ viśa̱ āde̍vīra̱bhya1śnavā̍ma

||15||

hu̱ve vo̍ de̱vīmadi̍ti̱ṃ namo̍bhirmṛl̤ī̱kāya̱ varu̍ṇaṃ mi̱trama̱gnim |

a̱bhi̱kṣa̱dāma̍rya̱maṇa̍ṃ su̱śeva̍ṃ trā̱tṝnde̱vāntsa̍vi̱tāra̱ṃ bhaga̍ṃ ca

||1||

su̱jyoti̍ṣaḥ sūrya̱ dakṣa̍pitṝnanāgā̱stve su̍maho vīhi de̱vān |

dvi̱janmā̍no̱ ya ṛ̍ta̱sāpa̍: sa̱tyāḥ sva̍rvanto yaja̱tā a̍gniji̱hvāḥ

||2||

u̱ta dyā̍vāpṛthivī kṣa̱tramu̱ru bṛ̱hadro̍dasī śara̱ṇaṃ su̍ṣumne |

ma̱haska̍ratho̱ vari̍vo̱ yathā̍ no̱'sme kṣayā̍ya dhiṣaṇe ane̱haḥ

||3||

ā no̍ ru̱drasya̍ sū̱navo̍ namantāma̱dyā hū̱tāso̱ vasa̱vo'dhṛ̍ṣṭāḥ |

yadī̱marbhe̍ maha̱ti vā̍ hi̱tāso̍ bā̱dhe ma̱ruto̱ ahvā̍ma de̱vān

||4||

mi̱myakṣa̱ yeṣu̍ roda̱sī nu de̱vī siṣa̍kti pū̱ṣā a̍bhyardha̱yajvā̍ |

śru̱tvā hava̍ṃ maruto̱ yaddha̍ yā̱tha bhūmā̍ rejante̱ adhva̍ni̱ pravi̍kte

||5||

a̱bhi tyaṃ vī̱raṃ girva̍ṇasama̱rcendra̱ṃ brahma̍ṇā jarita̱rnave̍na |

śrava̱diddhava̱mupa̍ ca̱ stavā̍no̱ rāsa̱dvājā̱m̐ upa̍ ma̱ho gṛ̍ṇā̱naḥ

||6||

o̱māna̍māpo mānuṣī̱ramṛ̍kta̱ṃ dhāta̍ to̱kāya̱ tana̍yāya̱ śaṃ yoḥ |

yū̱yaṃ hi ṣṭhā bhi̱ṣajo̍ mā̱tṛta̍mā̱ viśva̍sya sthā̱turjaga̍to̱ jani̍trīḥ

||7||

ā no̍ de̱vaḥ sa̍vi̱tā trāya̍māṇo̱ hira̍ṇyapāṇiryaja̱to ja̍gamyāt |

yo datra̍vām̐ u̱ṣaso̱ na pratī̍kaṃ vyūrṇu̱te dā̱śuṣe̱ vāryā̍ṇi

||8||

u̱ta tvaṃ sū̍no sahaso no a̱dyā de̱vām̐ a̱sminna̍dhva̱re va̍vṛtyāḥ |

syāma̱haṃ te̱ sada̱midrā̱tau tava̍ syāma̱gne'va̍sā su̱vīra̍:

||9||

u̱ta tyā me̱ hava̱mā ja̍gmyāta̱ṃ nāsa̍tyā dhī̱bhiryu̱vama̱ṅga vi̍prā |

atri̱ṃ na ma̱hastama̍so'mumukta̱ṃ tūrva̍taṃ narā duri̱tāda̱bhīke̍

||10||

te no̍ rā̱yo dyu̱mato̱ vāja̍vato dā̱tāro̍ bhūta nṛ̱vata̍: puru̱kṣoḥ |

da̱śa̱syanto̍ di̱vyāḥ pārthi̍vāso̱ gojā̍tā̱ apyā̍ mṛ̱l̤atā̍ ca devāḥ

||11||

te no̍ ru̱draḥ sara̍svatī sa̱joṣā̍ mī̱l̤huṣma̍nto̱ viṣṇu̍rmṛl̤antu vā̱yuḥ |

ṛ̱bhu̱kṣā vājo̱ daivyo̍ vidhā̱tā pa̱rjanyā̱vātā̍ pipyatā̱miṣa̍ṃ naḥ

||12||

u̱ta sya de̱vaḥ sa̍vi̱tā bhago̍ no̱'pāṃ napā̍davatu̱ dānu̱ papri̍: |

tvaṣṭā̍ de̱vebhi̱rjani̍bhiḥ sa̱joṣā̱ dyaurde̱vebhi̍: pṛthi̱vī sa̍mu̱draiḥ

||13||

u̱ta no'hi̍rbu̱dhnya̍: śṛṇotva̱ja eka̍pātpṛthi̱vī sa̍mu̱draḥ |

viśve̍ de̱vā ṛ̍tā̱vṛdho̍ huvā̱nāḥ stu̱tā mantrā̍: kaviśa̱stā a̍vantu

||14||

e̱vā napā̍to̱ mama̱ tasya̍ dhī̱bhirbha̱radvā̍jā a̱bhya̍rcantya̱rkaiḥ |

gnā hu̱tāso̱ vasa̱vo'dhṛ̍ṣṭā̱ viśve̍ stu̱tāso̍ bhūtā yajatrāḥ

||15||

udu̱ tyaccakṣu̱rmahi̍ mi̱trayo̱rām̐ eti̍ pri̱yaṃ varu̍ṇayo̱rada̍bdham |

ṛ̱tasya̱ śuci̍ darśa̱tamanī̍kaṃ ru̱kmo na di̱va udi̍tā̱ vya̍dyaut

||1||

veda̱ yastrīṇi̍ vi̱dathā̍nyeṣāṃ de̱vānā̱ṃ janma̍ sanu̱tarā ca̱ vipra̍: |

ṛ̱ju marte̍ṣu vṛji̱nā ca̱ paśya̍nna̱bhi ca̍ṣṭe̱ sūro̍ a̱rya evā̍n

||2||

stu̱ṣa u̍ vo ma̱ha ṛ̱tasya̍ go̱pānadi̍tiṃ mi̱traṃ varu̍ṇaṃ sujā̱tān |

a̱rya̱maṇa̱ṃ bhaga̱mada̍bdhadhītī̱nacchā̍ voce sadha̱nya̍: pāva̱kān

||3||

ri̱śāda̍sa̱: satpa̍tī̱m̐rada̍bdhānma̱ho rājña̍: suvasa̱nasya̍ dā̱tṝn |

yūna̍: sukṣa̱trānkṣaya̍to di̱vo nṝnā̍di̱tyānyā̱myadi̍tiṃ duvo̱yu

||4||

dyau̱3ṣpita̱: pṛthi̍vi̱ māta̱radhru̱gagne̍ bhrātarvasavo mṛ̱l̤atā̍ naḥ |

viśva̍ ādityā adite sa̱joṣā̍ a̱smabhya̱ṃ śarma̍ bahu̱laṃ vi ya̍nta

||5||

mā no̱ vṛkā̍ya vṛ̱kye̍ samasmā aghāya̱te rī̍radhatā yajatrāḥ |

yū̱yaṃ hi ṣṭhā ra̱thyo̍ nasta̱nūnā̍ṃ yū̱yaṃ dakṣa̍sya̱ vaca̍so babhū̱va

||6||

mā va̱ eno̍ a̱nyakṛ̍taṃ bhujema̱ mā tatka̍rma vasavo̱ yaccaya̍dhve |

viśva̍sya̱ hi kṣaya̍tha viśvadevāḥ sva̱yaṃ ri̱pusta̱nva̍ṃ rīriṣīṣṭa

||7||

nama̱ idu̱graṃ nama̱ ā vi̍vāse̱ namo̍ dādhāra pṛthi̱vīmu̱ta dyām |

namo̍ de̱vebhyo̱ nama̍ īśa eṣāṃ kṛ̱taṃ ci̱deno̱ nama̱sā vi̍vāse

||8||

ṛ̱tasya̍ vo ra̱thya̍: pū̱tada̍kṣānṛ̱tasya̍ pastya̱sado̱ ada̍bdhān |

tām̐ ā namo̍bhiruru̱cakṣa̍so̱ nṝnviśvā̍nva̱ ā na̍me ma̱ho ya̍jatrāḥ

||9||

te hi śreṣṭha̍varcasa̱sta u̍ nasti̱ro viśvā̍ni duri̱tā naya̍nti |

su̱kṣa̱trāso̱ varu̍ṇo mi̱tro a̱gniṝ̱tadhī̍tayo vakma̱rāja̍satyāḥ

||10||

te na̱ indra̍: pṛthi̱vī kṣāma̍ vardhanpū̱ṣā bhago̱ adi̍ti̱: pañca̱ janā̍: |

su̱śarmā̍ṇa̱: svava̍saḥ sunī̱thā bhava̍ntu naḥ sutrā̱trāsa̍: sugo̱pāḥ

||11||

nū sa̱dmāna̍ṃ di̱vyaṃ naṃśi̍ devā̱ bhāra̍dvājaḥ suma̱tiṃ yā̍ti̱ hotā̍ |

ā̱sā̱nebhi̱ryaja̍māno mi̱yedhai̍rde̱vānā̱ṃ janma̍ vasū̱yurva̍vanda

||12||

apa̱ tyaṃ vṛ̍ji̱naṃ ri̱puṃ ste̱nama̍gne durā̱dhya̍m | da̱vi̱ṣṭhama̍sya satpate kṛ̱dhī su̱gam

||13||

grāvā̍ṇaḥ soma no̱ hi ka̍ṃ sakhitva̱nāya̍ vāva̱śuḥ | ja̱hī nya1triṇa̍ṃ pa̱ṇiṃ vṛko̱ hi ṣaḥ

||14||

yū̱yaṃ hi ṣṭhā su̍dānava̱ indra̍jyeṣṭhā a̱bhidya̍vaḥ | kartā̍ no̱ adhva̱nnā su̱gaṃ go̱pā a̱mā

||15||

api̱ panthā̍maganmahi svasti̱gāma̍ne̱hasa̍m | yena̱ viśvā̱: pari̱ dviṣo̍ vṛ̱ṇakti̍ vi̱ndate̱ vasu̍

||16||

na taddi̱vā na pṛ̍thi̱vyānu̍ manye̱ na ya̱jñena̱ nota śamī̍bhirā̱bhiḥ |

u̱bjantu̱ taṃ su̱bhva1: parva̍tāso̱ ni hī̍yatāmatiyā̱jasya̍ ya̱ṣṭā

||1||

ati̍ vā̱ yo ma̍ruto̱ manya̍te no̱ brahma̍ vā̱ yaḥ kri̱yamā̍ṇa̱ṃ nini̍tsāt |

tapū̍ṃṣi̱ tasmai̍ vṛji̱nāni̍ santu brahma̱dviṣa̍ma̱bhi taṃ śo̍catu̱ dyauḥ

||2||

kima̱ṅga tvā̱ brahma̍ṇaḥ soma go̱pāṃ kima̱ṅga tvā̍hurabhiśasti̱pāṃ na̍: |

kima̱ṅga na̍: paśyasi ni̱dyamā̍nānbrahma̱dviṣe̱ tapu̍ṣiṃ he̱tima̍sya

||3||

ava̍ntu̱ māmu̱ṣaso̱ jāya̍mānā̱ ava̍ntu mā̱ sindha̍va̱: pinva̍mānāḥ |

ava̍ntu mā̱ parva̍tāso dhru̱vāso'va̍ntu mā pi̱taro̍ de̱vahū̍tau

||4||

vi̱śva̱dānī̍ṃ su̱mana̍saḥ syāma̱ paśye̍ma̱ nu sūrya̍mu̱ccara̍ntam |

tathā̍ kara̱dvasu̍pati̱rvasū̍nāṃ de̱vām̐ ohā̱no'va̱sāga̍miṣṭhaḥ

||5||

indro̱ nedi̍ṣṭha̱mava̱sāga̍miṣṭha̱: sara̍svatī̱ sindhu̍bhi̱: pinva̍mānā |

pa̱rjanyo̍ na̱ oṣa̍dhībhirmayo̱bhura̱gniḥ su̱śaṃsa̍: su̱hava̍: pi̱teva̍

||6||

viśve̍ devāsa̱ ā ga̍ta śṛṇu̱tā ma̍ i̱maṃ hava̍m | edaṃ ba̱rhirni ṣī̍data

||7||

yo vo̍ devā ghṛ̱tasnu̍nā ha̱vyena̍ prati̱bhūṣa̍ti | taṃ viśva̱ upa̍ gacchatha

||8||

upa̍ naḥ sū̱navo̱ gira̍: śṛ̱ṇvantva̱mṛta̍sya̱ ye | su̱mṛ̱l̤ī̱kā bha̍vantu naḥ

||9||

viśve̍ de̱vā ṛ̍tā̱vṛdha̍ ṛ̱tubhi̍rhavana̱śruta̍: | ju̱ṣantā̱ṃ yujya̱ṃ paya̍:

||10||

sto̱tramindro̍ ma̱rudga̍ṇa̱stvaṣṭṛ̍mānmi̱tro a̍rya̱mā | i̱mā ha̱vyā ju̍ṣanta naḥ

||11||

i̱maṃ no̍ agne adhva̱raṃ hota̍rvayuna̱śo ya̍ja | ci̱ki̱tvāndaivya̱ṃ jana̍m

||12||

viśve̍ devāḥ śṛṇu̱temaṃ hava̍ṃ me̱ ye a̱ntari̍kṣe̱ ya upa̱ dyavi̱ ṣṭha |

ye a̍gniji̱hvā u̱ta vā̱ yaja̍trā ā̱sadyā̱sminba̱rhiṣi̍ mādayadhvam

||13||

viśve̍ de̱vā mama̍ śṛṇvantu ya̱jñiyā̍ u̱bhe roda̍sī a̱pāṃ napā̍cca̱ manma̍ |

mā vo̱ vacā̍ṃsi pari̱cakṣyā̍ṇi vocaṃ su̱mneṣvidvo̱ anta̍mā madema

||14||

ye ke ca̱ jmā ma̱hino̱ ahi̍māyā di̱vo ja̍jñi̱re a̱pāṃ sa̱dhasthe̍ |

te a̱smabhya̍mi̱ṣaye̱ viśva̱māyu̱: kṣapa̍ u̱srā va̍rivasyantu de̱vāḥ

||15||

agnī̍parjanyā̱vava̍ta̱ṃ dhiya̍ṃ me̱'sminhave̍ suhavā suṣṭu̱tiṃ na̍: |

il̤ā̍ma̱nyo ja̱naya̱dgarbha̍ma̱nyaḥ pra̱jāva̍tī̱riṣa̱ ā dha̍ttama̱sme

||16||

stī̱rṇe ba̱rhiṣi̍ samidhā̱ne a̱gnau sū̱ktena̍ ma̱hā nama̱sā vi̍vāse |

a̱sminno̍ a̱dya vi̱dathe̍ yajatrā̱ viśve̍ devā ha̱viṣi̍ mādayadhvam

||17||

va̱yamu̍ tvā pathaspate̱ ratha̱ṃ na vāja̍sātaye | dhi̱ye pū̍ṣannayujmahi

||1||

a̱bhi no̱ narya̱ṃ vasu̍ vī̱raṃ praya̍tadakṣiṇam | vā̱maṃ gṛ̱hapa̍tiṃ naya

||2||

adi̍tsantaṃ cidāghṛṇe̱ pūṣa̱ndānā̍ya codaya | pa̱ṇeści̱dvi mra̍dā̱ mana̍:

||3||

vi pa̱tho vāja̍sātaye cinu̱hi vi mṛdho̍ jahi | sādha̍ntāmugra no̱ dhiya̍:

||4||

pari̍ tṛndhi paṇī̱nāmāra̍yā̱ hṛda̍yā kave | athe̍ma̱smabhya̍ṃ randhaya

||5||

vi pū̍ṣa̱nnāra̍yā tuda pa̱ṇeri̍ccha hṛ̱di pri̱yam | athe̍ma̱smabhya̍ṃ randhaya

||6||

ā ri̍kha kiki̱rā kṛ̍ṇu paṇī̱nāṃ hṛda̍yā kave | athe̍ma̱smabhya̍ṃ randhaya

||7||

yāṃ pū̍ṣanbrahma̱coda̍nī̱mārā̱ṃ bibha̍rṣyāghṛṇe | tayā̍ samasya̱ hṛda̍ya̱mā ri̍kha kiki̱rā kṛ̍ṇu

||8||

yā te̱ aṣṭrā̱ goo̍pa̱śā''ghṛ̍ṇe paśu̱sādha̍nī | tasyā̍ste su̱mnamī̍mahe

||9||

u̱ta no̍ go̱ṣaṇi̱ṃ dhiya̍maśva̱sāṃ vā̍ja̱sāmu̱ta | nṛ̱vatkṛ̍ṇuhi vī̱taye̍

||10||

saṃ pū̍ṣanvi̱duṣā̍ naya̱ yo añja̍sānu̱śāsa̍ti | ya e̱vedamiti̱ brava̍t

||1||

||

samu̍ pū̱ṣṇā ga̍memahi̱ yo gṛ̱hām̐ a̍bhi̱śāsa̍ti | i̱ma e̱veti̍ ca̱ brava̍t

||2||

pū̱ṣṇaśca̱kraṃ na ri̍ṣyati̱ na kośo'va̍ padyate | no a̍sya vyathate pa̱viḥ

||3||

yo a̍smai ha̱viṣāvi̍dha̱nna taṃ pū̱ṣāpi̍ mṛṣyate | pra̱tha̱mo vi̍ndate̱ vasu̍

||4||

pū̱ṣā gā anve̍tu naḥ pū̱ṣā ra̍kṣa̱tvarvataḥ | pū̱ṣā vāja̍ṃ sanotu naḥ

||5||

pūṣa̱nnanu̱ pra gā i̍hi̱ yaja̍mānasya sunva̱taḥ | a̱smāka̍ṃ stuva̱tāmu̱ta

||6||

māki̍rneśa̱nmākī̍ṃ riṣa̱nmākī̱ṃ saṃ śā̍ri̱ keva̍ṭe | athāri̍ṣṭābhi̱rā ga̍hi

||7||

śṛ̱ṇvanta̍ṃ pū̱ṣaṇa̍ṃ va̱yamirya̱mana̍ṣṭavedasam | īśā̍naṃ rā̱ya ī̍mahe

||8||

pūṣa̱ntava̍ vra̱te va̱yaṃ na ri̍ṣyema̱ kadā̍ ca̱na | sto̱tāra̍sta i̱ha sma̍si

||9||

pari̍ pū̱ṣā pa̱rastā̱ddhasta̍ṃ dadhātu̱ dakṣi̍ṇam | puna̍rno na̱ṣṭamāja̍tu

||10||

ehi̱ vāṃ vi̍muco napā̱dāghṛ̍ṇe̱ saṃ sa̍cāvahai | ra̱thīṝ̱tasya̍ no bhava

||1||

ra̱thīta̍maṃ kapa̱rdina̱mīśā̍na̱ṃ rādha̍so ma̱haḥ | rā̱yaḥ sakhā̍yamīmahe

||2||

rā̱yo dhārā̍syāghṛṇe̱ vaso̍ rā̱śira̍jāśva | dhīva̍todhīvata̱: sakhā̍

||3||

pū̱ṣaṇa̱ṃ nva1jāśva̱mupa̍ stoṣāma vā̱jina̍m | svasu̱ryo jā̱ra u̱cyate̍

||4||

mā̱turdi̍dhi̱ṣuma̍brava̱ṃ svasu̍rjā̱raḥ śṛ̍ṇotu naḥ | bhrātendra̍sya̱ sakhā̱ mama̍

||5||

ājāsa̍: pū̱ṣaṇa̱ṃ rathe̍ niśṛ̱mbhāste ja̍na̱śriya̍m | de̱vaṃ va̍hantu̱ bibhra̍taḥ

||6||

ya e̍namā̱dide̍śati kara̱mbhāditi̍ pū̱ṣaṇa̍m | na tena̍ de̱va ā̱diśe̍

||1||

u̱ta ghā̱ sa ra̱thīta̍ma̱: sakhyā̱ satpa̍tiryu̱jā | indro̍ vṛ̱trāṇi̍ jighnate

||2||

u̱tādaḥ pa̍ru̱ṣe gavi̱ sūra̍śca̱kraṃ hi̍ra̱ṇyaya̍m | nyai̍rayadra̱thīta̍maḥ

||3||

yada̱dya tvā̍ puruṣṭuta̱ bravā̍ma dasra mantumaḥ | tatsu no̱ manma̍ sādhaya

||4||

i̱maṃ ca̍ no ga̱veṣa̍ṇaṃ sā̱taye̍ sīṣadho ga̱ṇam | ā̱rātpū̍ṣannasi śru̱taḥ

||5||

ā te̍ sva̱stimī̍maha ā̱rea̍ghā̱mupā̍vasum | a̱dyā ca̍ sa̱rvatā̍taye̱ śvaśca̍ sa̱rvatā̍taye

||6||

indrā̱ nu pū̱ṣaṇā̍ va̱yaṃ sa̱khyāya̍ sva̱staye̍ | hu̱vema̱ vāja̍sātaye

||1||

soma̍ma̱nya upā̍sada̱tpāta̍ve ca̱mvo̍: su̱tam | ka̱ra̱mbhama̱nya i̍cchati

||2||

a̱jā a̱nyasya̱ vahna̍yo̱ harī̍ a̱nyasya̱ sambhṛ̍tā | tābhyā̍ṃ vṛ̱trāṇi̍ jighnate

||3||

yadindro̱ ana̍ya̱drito̍ ma̱hīra̱po vṛṣa̍ntamaḥ | tatra̍ pū̱ṣābha̍va̱tsacā̍

||4||

tāṃ pū̱ṣṇaḥ su̍ma̱tiṃ va̱yaṃ vṛ̱kṣasya̱ pra va̱yāmi̍va | indra̍sya̱ cā ra̍bhāmahe

||5||

utpū̱ṣaṇa̍ṃ yuvāmahe̱'bhīśū̍m̐riva̱ sāra̍thiḥ | ma̱hyā indra̍ṃ sva̱staye̍

||6||

śu̱kraṃ te̍ a̱nyadya̍ja̱taṃ te̍ a̱nyadviṣu̍rūpe̱ aha̍nī̱ dyauri̍vāsi |

viśvā̱ hi mā̱yā ava̍si svadhāvo bha̱drā te̍ pūṣanni̱ha rā̱tira̍stu

||1||

a̱jāśva̍: paśu̱pā vāja̍pastyo dhiyaṃji̱nvo bhuva̍ne̱ viśve̱ arpi̍taḥ |

aṣṭrā̍ṃ pū̱ṣā śi̍thi̱rāmu̱dvarī̍vṛjatsa̱ṃcakṣā̍ṇo̱ bhuva̍nā de̱va ī̍yate

||2||

yāste̍ pūṣa̱nnāvo̍ a̱ntaḥ sa̍mu̱dre hi̍ra̱ṇyayī̍ra̱ntari̍kṣe̱ cara̍nti |

tābhi̍ryāsi dū̱tyāṃ sūrya̍sya̱ kāme̍na kṛta̱ śrava̍ i̱cchamā̍naḥ

||3||

pū̱ṣā su̱bandhu̍rdi̱va ā pṛ̍thi̱vyā i̱l̤aspati̍rma̱ghavā̍ da̱smava̍rcāḥ |

yaṃ de̱vāso̱ ada̍duḥ sū̱ryāyai̱ kāme̍na kṛ̱taṃ ta̱vasa̱ṃ svañca̍m

||4||

pra nu vo̍cā su̱teṣu̍ vāṃ vī̱ryā̱3 yāni̍ ca̱krathu̍: |

ha̱tāso̍ vāṃ pi̱taro̍ de̱vaśa̍trava̱ indrā̍gnī̱ jīva̍tho yu̱vam

||1||

bal̤i̱tthā ma̍hi̱mā vā̱mindrā̍gnī̱ pani̍ṣṭha̱ ā | sa̱mā̱no vā̍ṃ jani̱tā bhrāta̍rā yu̱vaṃ ya̱māvi̱heha̍mātarā

||2||

o̱ki̱vāṃsā̍ su̱te sacā̱m̐ aśvā̱ saptī̍ i̱vāda̍ne | indrā̱ nva1gnī ava̍se̱ha va̱jriṇā̍ va̱yaṃ de̱vā ha̍vāmahe

||3||

ya i̍ndrāgnī su̱teṣu̍ vā̱ṃ stava̱tteṣvṛ̍tāvṛdhā | jo̱ṣa̱vā̱kaṃ vada̍taḥ pajrahoṣiṇā̱ na de̍vā bha̱satha̍śca̱na

||4||

indrā̍gnī̱ ko a̱sya vā̱ṃ devau̱ marta̍ściketati |

viṣū̍co̱ aśvā̍nyuyujā̱na ī̍yata̱ eka̍: samā̱na ā rathe̍

||5||

indrā̍gnī a̱pādi̱yaṃ pūrvāgā̍tpa̱dvatī̍bhyaḥ | hi̱tvī śiro̍ ji̱hvayā̱ vāva̍da̱ccara̍ttri̱ṃśatpa̱dā nya̍kramīt

||6||

indrā̍gnī̱ ā hi ta̍nva̱te naro̱ dhanvā̍ni bā̱hvoḥ | mā no̍ a̱sminma̍hādha̱ne parā̍ varkta̱ṃ gavi̍ṣṭiṣu

||7||

indrā̍gnī̱ tapa̍nti mā̱'ghā a̱ryo arā̍tayaḥ | apa̱ dveṣā̱ṃsyā kṛ̍taṃ yuyu̱taṃ sūryā̱dadhi̍

||8||

indrā̍gnī yu̱vorapi̱ vasu̍ di̱vyāni̱ pārthi̍vā | ā na̍ i̱ha pra ya̍cchataṃ ra̱yiṃ vi̱śvāyu̍poṣasam

||9||

indrā̍gnī ukthavāhasā̱ stome̍bhirhavanaśrutā | viśvā̍bhirgī̱rbhirā ga̍tama̱sya soma̍sya pī̱taye̍

||10||

śnatha̍dvṛ̱tramu̱ta sa̍noti̱ vāja̱mindrā̱ yo a̱gnī sahu̍rī sapa̱ryāt |

i̱ra̱jyantā̍ vasa̱vya̍sya̱ bhūre̱: saha̍stamā̱ saha̍sā vāja̱yantā̍

||1||

tā yo̍dhiṣṭama̱bhi gā i̍ndra nū̱nama̱paḥ sva̍ru̱ṣaso̍ agna ū̱l̤hāḥ |

diśa̱: sva̍ru̱ṣasa̍ indra ci̱trā a̱po gā a̍gne yuvase ni̱yutvā̍n

||2||

ā vṛ̍trahaṇā vṛtra̱habhi̱: śuṣmai̱rindra̍ yā̱taṃ namo̍bhiragne a̱rvāk |

yu̱vaṃ rādho̍bhi̱raka̍vebhiri̱ndrāgne̍ a̱sme bha̍vatamutta̱mebhi̍:

||3||

tā hu̍ve̱ yayo̍ri̱daṃ pa̱pne viśva̍ṃ pu̱rā kṛ̱tam | i̱ndrā̱gnī na ma̍rdhataḥ

||4||

u̱grā vi̍gha̱ninā̱ mṛdha̍ indrā̱gnī ha̍vāmahe | tā no̍ mṛl̤āta ī̱dṛśe̍

||5||

ha̱to vṛ̱trāṇyāryā̍ ha̱to dāsā̍ni̱ satpa̍tī | ha̱to viśvā̱ apa̱ dviṣa̍:

||6||

indrā̍gnī yu̱vāmi̱me̱3'bhi stomā̍ anūṣata | piba̍taṃ śambhuvā su̱tam

||7||

yā vā̱ṃ santi̍ puru̱spṛho̍ ni̱yuto̍ dā̱śuṣe̍ narā | indrā̍gnī̱ tābhi̱rā ga̍tam

||8||

tābhi̱rā ga̍cchataṃ na̱rope̱daṃ sava̍naṃ su̱tam | indrā̍gnī̱ soma̍pītaye

||9||

tamī̍l̤iṣva̱ yo a̱rciṣā̱ vanā̱ viśvā̍ pari̱ṣvaja̍t | kṛ̱ṣṇā kṛ̱ṇoti̍ ji̱hvayā̍

||10||

ya i̱ddha ā̱vivā̍sati su̱mnamindra̍sya̱ martya̍: | dyu̱mnāya̍ su̱tarā̍ a̱paḥ

||11||

tā no̱ vāja̍vatī̱riṣa̍ ā̱śūnpi̍pṛta̱marva̍taḥ | indra̍ma̱gniṃ ca̱ vol̤ha̍ve

||12||

u̱bhā vā̍mindrāgnī āhu̱vadhyā̍ u̱bhā rādha̍saḥ sa̱ha mā̍da̱yadhyai̍ |

u̱bhā dā̱tārā̍vi̱ṣāṃ ra̍yī̱ṇāmu̱bhā vāja̍sya sā̱taye̍ huve vām

||13||

ā no̱ gavye̍bhi̱raśvyai̍rvasa̱vyai̱3rupa̍ gacchatam |

sakhā̍yau de̱vau sa̱khyāya̍ śa̱mbhuve̍ndrā̱gnī tā ha̍vāmahe

||14||

indrā̍gnī śṛṇu̱taṃ hava̱ṃ yaja̍mānasya sunva̱taḥ | vī̱taṃ ha̱vyānyā ga̍ta̱ṃ piba̍taṃ so̱myaṃ madhu̍

||15||

i̱yama̍dadādrabha̱samṛ̍ṇa̱cyuta̱ṃ divo̍dāsaṃ vadhrya̱śvāya̍ dā̱śuṣe̍ |

yā śaśva̍ntamāca̱khādā̍va̱saṃ pa̱ṇiṃ tā te̍ dā̱trāṇi̍ tavi̱ṣā sa̍rasvati

||1||

i̱yaṃ śuṣme̍bhirbisa̱khā i̍vāruja̱tsānu̍ girī̱ṇāṃ ta̍vi̱ṣebhi̍rū̱rmibhi̍: |

pā̱rā̱va̱ta̱ghnīmava̍se suvṛ̱ktibhi̱: sara̍svatī̱mā vi̍vāsema dhī̱tibhi̍:

||2||

sara̍svati deva̱nido̱ ni ba̍rhaya pra̱jāṃ viśva̍sya̱ bṛsa̍yasya mā̱yina̍: |

u̱ta kṣi̱tibhyo̱'vanī̍ravindo vi̱ṣame̍bhyo asravo vājinīvati

||3||

pra ṇo̍ de̱vī sara̍svatī̱ vāje̍bhirvā̱jinī̍vatī | dhī̱nāma̍vi̱trya̍vatu

||4||

yastvā̍ devi sarasvatyupabrū̱te dhane̍ hi̱te | indra̱ṃ na vṛ̍tra̱tūrye̍

||5||

tvaṃ de̍vi sarasva̱tyavā̱ vāje̍ṣu vājini | radā̍ pū̱ṣeva̍ naḥ sa̱nim

||6||

u̱ta syā na̱: sara̍svatī gho̱rā hira̍ṇyavartaniḥ | vṛ̱tra̱ghnī va̍ṣṭi suṣṭu̱tim

||7||

yasyā̍ ana̱nto ahru̍tastve̱ṣaśca̍ri̱ṣṇura̍rṇa̱vaḥ | ama̱ścara̍ti̱ roru̍vat

||8||

sā no̱ viśvā̱ ati̱ dviṣa̱: svasṝ̍ra̱nyā ṛ̱tāva̍rī | ata̱nnahe̍va̱ sūrya̍:

||9||

u̱ta na̍: pri̱yā pri̱yāsu̍ sa̱ptasva̍sā̱ suju̍ṣṭā | sara̍svatī̱ stomyā̍ bhūt

||10||

ā̱pa̱pruṣī̱ pārthi̍vānyu̱ru rajo̍ a̱ntari̍kṣam | sara̍svatī ni̱daspā̍tu

||11||

tri̱ṣa̱dhasthā̍ sa̱ptadhā̍tu̱: pañca̍ jā̱tā va̱rdhaya̍ntī | vāje̍vāje̱ havyā̍ bhūt

||12||

pra yā ma̍hi̱mnā ma̱hinā̍su̱ ceki̍te dyu̱mnebhi̍ra̱nyā a̱pasā̍ma̱pasta̍mā |

ratha̍ iva bṛha̱tī vi̱bhvane̍ kṛ̱topa̱stutyā̍ ciki̱tuṣā̱ sara̍svatī

||13||

sara̍svatya̱bhi no̍ neṣi̱ vasyo̱ māpa̍ spharī̱: paya̍sā̱ mā na̱ ā dha̍k |

ju̱ṣasva̍ naḥ sa̱khyā ve̱śyā̍ ca̱ mā tvatkṣetrā̱ṇyara̍ṇāni ganma

||14||

stu̱ṣe narā̍ di̱vo a̱sya pra̱santā̱'śvinā̍ huve̱ jara̍māṇo a̱rkaiḥ |

yā sa̱dya u̱srā vyuṣi̱ jmo antā̱nyuyū̍ṣata̱: paryu̱rū varā̍ṃsi

||1||

tā ya̱jñamā śuci̍bhiścakramā̱ṇā ratha̍sya bhā̱nuṃ ru̍rucū̱ rajo̍bhiḥ |

pu̱rū varā̱ṃsyami̍tā̱ mimā̍nā̱'po dhanvā̱nyati̍ yātho̱ ajrā̍n

||2||

tā ha̱ tyadva̱rtiryadara̍dhramugre̱tthā dhiya̍ ūhathu̱: śaśva̱daśvai̍: |

mano̍javebhiriṣi̱raiḥ śa̱yadhyai̱ pari̱ vyathi̍rdā̱śuṣo̱ martya̍sya

||3||

tā navya̍so̱ jara̍māṇasya̱ manmopa̍ bhūṣato yuyujā̱nasa̍ptī |

śubha̱ṃ pṛkṣa̱miṣa̱mūrja̱ṃ vaha̍ntā̱ hotā̍ yakṣatpra̱tno a̱dhrugyuvā̍nā

||4||

tā va̱lgū da̱srā pu̍ru̱śāka̍tamā pra̱tnā navya̍sā̱ vaca̱sā vi̍vāse |

yā śaṃsa̍te stuva̱te śambha̍viṣṭhā babhū̱vatu̍rgṛṇa̱te ci̱trarā̍tī

||5||

tā bhu̱jyuṃ vibhi̍ra̱dbhyaḥ sa̍mu̱drāttugra̍sya sū̱numū̍hathū̱ rajo̍bhiḥ |

a̱re̱ṇubhi̱ryoja̍nebhirbhu̱jantā̍ pata̱tribhi̱rarṇa̍so̱ niru̱pasthā̍t

||6||

vi ja̱yuṣā̍ rathyā yāta̱madri̍ṃ śru̱taṃ hava̍ṃ vṛṣaṇā vadhrima̱tyāḥ |

da̱śa̱syantā̍ śa̱yave̍ pipyathu̱rgāmiti̍ cyavānā suma̱tiṃ bhu̍raṇyū

||7||

yadro̍dasī pra̱divo̱ asti̱ bhūmā̱ hel̤o̍ de̱vānā̍mu̱ta ma̍rtya̱trā |

tadā̍dityā vasavo rudriyāso rakṣo̱yuje̱ tapu̍ra̱ghaṃ da̍dhāta

||8||

ya ī̱ṃ rājā̍nāvṛtu̱thā vi̱dadha̱draja̍so mi̱tro varu̍ṇa̱ścike̍tat |

ga̱mbhī̱rāya̱ rakṣa̍se he̱tima̍sya̱ droghā̍ya ci̱dvaca̍sa̱ āna̍vāya

||9||

anta̍raiśca̱kraistana̍yāya va̱rtirdyu̱matā yā̍taṃ nṛ̱vatā̱ rathe̍na |

sanu̍tyena̱ tyaja̍sā̱ martya̍sya vanuṣya̱tāmapi̍ śī̱rṣā va̍vṛktam

||10||

ā pa̍ra̱mābhi̍ru̱ta ma̍dhya̱mābhi̍rni̱yudbhi̍ryātamava̱mābhi̍ra̱rvāk |

dṛ̱l̤hasya̍ ci̱dgoma̍to̱ vi vra̱jasya̱ duro̍ vartaṃ gṛṇa̱te ci̍trarātī

||11||

kva1 tyā va̱lgū pu̍ruhū̱tādya dū̱to na stomo̍'vida̱nnama̍svān |

ā yo a̱rvāṅnāsa̍tyā va̱varta̱ preṣṭhā̱ hyasa̍tho asya̱ manma̍n

||1||

ara̍ṃ me ganta̱ṃ hava̍nāyā̱smai gṛ̍ṇā̱nā yathā̱ pibā̍tho̱ andha̍: |

pari̍ ha̱ tyadva̱rtiryā̍tho ri̱ṣo na yatparo̱ nānta̍rastutu̱ryāt

||2||

akā̍ri vā̱mandha̍so̱ varī̍ma̱nnastā̍ri ba̱rhiḥ su̍prāya̱ṇata̍mam |

u̱ttā̱naha̍sto yuva̱yurva̍va̱ndā ''vā̱ṃ nakṣa̍nto̱ adra̍ya āñjan

||3||

ū̱rdhvo vā̍ma̱gnira̍dhva̱reṣva̍sthā̱tpra rā̱tire̍ti jū̱rṇinī̍ ghṛ̱tācī̍ |

pra hotā̍ gū̱rtama̍nā urā̱ṇo'yu̍kta̱ yo nāsa̍tyā̱ havī̍man

||4||

adhi̍ śri̱ye du̍hi̱tā sūrya̍sya̱ ratha̍ṃ tasthau purubhujā śa̱toti̍m |

pra mā̱yābhi̍rmāyinā bhūta̱matra̱ narā̍ nṛtū̱ jani̍manya̱jñiyā̍nām

||5||

yu̱vaṃ śrī̱bhirda̍rśa̱tābhi̍rā̱bhiḥ śu̱bhe pu̱ṣṭimū̍hathuḥ sū̱ryāyā̍: |

pra vā̱ṃ vayo̱ vapu̱ṣe'nu̍ papta̱nnakṣa̱dvāṇī̱ suṣṭu̍tā dhiṣṇyā vām

||6||

ā vā̱ṃ vayo'śvā̍so̱ vahi̍ṣṭhā a̱bhi prayo̍ nāsatyā vahantu |

pra vā̱ṃ ratho̱ mano̍javā asarjī̱ṣaḥ pṛ̱kṣa i̱ṣidho̱ anu̍ pū̱rvīḥ

||7||

pu̱ru hi vā̍ṃ purubhujā de̱ṣṇaṃ dhe̱nuṃ na̱ iṣa̍ṃ pinvata̱masa̍krām |

stuta̍śca vāṃ mādhvī suṣṭu̱tiśca̱ rasā̍śca̱ ye vā̱manu̍ rā̱timagma̍n

||8||

u̱ta ma̍ ṛ̱jre pura̍yasya ra̱ghvī su̍mī̱l̤he śa̱taṃ pe̍ru̱ke ca̍ pa̱kvā |

śā̱ṇḍo dā̍ddhira̱ṇina̱: smaddi̍ṣṭī̱ndaśa̍ va̱śāso̍ abhi̱ṣāca̍ ṛ̱ṣvān

||9||

saṃ vā̍ṃ śa̱tā nā̍satyā sa̱hasrā'śvā̍nāṃ puru̱panthā̍ gi̱re dā̍t |

bha̱radvā̍jāya vīra̱ nū gi̱re dā̍ddha̱tā rakṣā̍ṃsi purudaṃsasā syuḥ

||10||

ā vā̍ṃ su̱mne vari̍mantsū̱ribhi̍: ṣyām

||11||

udu̍ śri̱ya u̱ṣaso̱ roca̍mānā̱ asthu̍ra̱pāṃ normayo̱ ruśa̍ntaḥ |

kṛ̱ṇoti̱ viśvā̍ su̱pathā̍ su̱gānyabhū̍du̱ vasvī̱ dakṣi̍ṇā ma̱ghonī̍

||1||

bha̱drā da̍dṛkṣa urvi̱yā vi bhā̱syutte̍ śo̱cirbhā̱navo̱ dyāma̍paptan |

ā̱virvakṣa̍: kṛṇuṣe śu̱mbhamā̱noṣo̍ devi̱ roca̍mānā̱ maho̍bhiḥ

||2||

vaha̍nti sīmaru̱ṇāso̱ ruśa̍nto̱ gāva̍: su̱bhagā̍murvi̱yā pra̍thā̱nām |

ape̍jate̱ śūro̱ aste̍va̱ śatrū̱nbādha̍te̱ tamo̍ aji̱ro na vol̤hā̍

||3||

su̱gota te̍ su̱pathā̱ parva̍teṣvavā̱te a̱pasta̍rasi svabhāno |

sā na̱ ā va̍ha pṛthuyāmannṛṣve ra̱yiṃ di̍vo duhitariṣa̱yadhyai̍

||4||

sā va̍ha̱ yokṣabhi̱ravā̱toṣo̱ vara̱ṃ vaha̍si̱ joṣa̱manu̍ |

tvaṃ di̍vo duhita̱ryā ha̍ de̱vī pū̱rvahū̍tau ma̱ṃhanā̍ darśa̱tā bhū̍:

||5||

utte̱ vaya̍ścidvasa̱tera̍papta̱nnara̍śca̱ ye pi̍tu̱bhājo̱ vyu̍ṣṭau |

a̱mā sa̱te va̍hasi̱ bhūri̍ vā̱mamuṣo̍ devi dā̱śuṣe̱ martyā̍ya

||6||

e̱ṣā syā no̍ duhi̱tā di̍vo̱jāḥ kṣi̱tīru̱cchantī̱ mānu̍ṣīrajīgaḥ |

yā bhā̱nunā̱ ruśa̍tā rā̱myāsvajñā̍yi ti̱rastama̍saścida̱ktūn

||1||

vi tadya̍yuraruṇa̱yugbhi̱raśvai̍ści̱traṃ bhā̍ntyu̱ṣasa̍śca̱ndrara̍thāḥ |

agra̍ṃ ya̱jñasya̍ bṛha̱to naya̍ntī̱rvi tā bā̍dhante̱ tama̱ ūrmyā̍yāḥ

||2||

śravo̱ vāja̱miṣa̱mūrja̱ṃ vaha̍ntī̱rni dā̱śuṣa̍ uṣaso̱ martyā̍ya |

ma̱ghonī̍rvī̱rava̱tpatya̍mānā̱ avo̍ dhāta vidha̱te ratna̍ma̱dya

||3||

i̱dā hi vo̍ vidha̱te ratna̱mastī̱dā vī̱rāya̍ dā̱śuṣa̍ uṣāsaḥ |

i̱dā viprā̍ya̱ jara̍te̱ yadu̱kthā ni ṣma̱ māva̍te vahathā pu̱rā ci̍t

||4||

i̱dā hi ta̍ uṣo adrisāno go̱trā gavā̱maṅgi̍raso gṛ̱ṇanti̍ |

vya1rkeṇa̍ bibhidu̱rbrahma̍ṇā ca sa̱tyā nṛ̱ṇāma̍bhavadde̱vahū̍tiḥ

||5||

u̱cchā di̍vo duhitaḥ pratna̱vanno̍ bharadvāja̱vadvi̍dha̱te ma̍ghoni |

su̱vīra̍ṃ ra̱yiṃ gṛ̍ṇa̱te ri̍rīhyurugā̱yamadhi̍ dhehi̱ śravo̍ naḥ

||6||

vapu̱rnu tacci̍ki̱tuṣe̍ cidastu samā̱naṃ nāma̍ dhe̱nu patya̍mānam |

marte̍ṣva̱nyaddo̱hase̍ pī̱pāya̍ sa̱kṛcchu̱kraṃ du̍duhe̱ pṛśni̱rūdha̍:

||1||

ye a̱gnayo̱ na śośu̍cannidhā̱nā dviryattrirma̱ruto̍ vāvṛ̱dhanta̍ |

a̱re̱ṇavo̍ hira̱ṇyayā̍sa eṣāṃ sā̱kaṃ nṛ̱mṇaiḥ pauṃsye̍bhiśca bhūvan

||2||

ru̱drasya̱ ye mī̱l̤huṣa̱: santi̍ pu̱trā yām̐śco̱ nu dādhṛ̍vi̱rbhara̍dhyai |

vi̱de hi mā̱tā ma̱ho ma̱hī ṣā setpṛśni̍: su̱bhve̱3 garbha̱mādhā̍t

||3||

na ya īṣa̍nte ja̱nuṣo'yā̱ nva1ntaḥ santo̍'va̱dyāni̍ punā̱nāḥ |

niryaddu̱hre śuca̱yo'nu̱ joṣa̱manu̍ śri̱yā ta̱nva̍mu̱kṣamā̍ṇāḥ

||4||

ma̱kṣū na yeṣu̍ do̱hase̍ cida̱yā ā nāma̍ dhṛ̱ṣṇu māru̍ta̱ṃ dadhā̍nāḥ |

na ye stau̱nā a̱yāso̍ ma̱hnā nū ci̍tsu̱dānu̱rava̍ yāsadu̱grān

||5||

ta idu̱grāḥ śava̍sā dhṛ̱ṣṇuṣe̍ṇā u̱bhe yu̍janta̱ roda̍sī su̱meke̍ |

adha̍ smaiṣu roda̱sī svaśo̍ci̱rāma̍vatsu tasthau̱ na roka̍:

||6||

a̱ne̱no vo̍ maruto̱ yāmo̍ astvana̱śvaści̱dyamaja̱tyara̍thīḥ |

a̱na̱va̱so a̍nabhī̱śū ra̍ja̱stūrvi roda̍sī pa̱thyā̍ yāti̱ sādha̍n

||7||

nāsya̍ va̱rtā na ta̍ru̱tā nva̍sti̱ maru̍to̱ yamava̍tha̱ vāja̍sātau |

to̱ke vā̱ goṣu̱ tana̍ye̱ yama̱psu sa vra̱jaṃ dartā̱ pārye̱ adha̱ dyoḥ

||8||

pra ci̱trama̱rkaṃ gṛ̍ṇa̱te tu̱rāya̱ māru̍tāya̱ svata̍vase bharadhvam |

ye sahā̍ṃsi̱ saha̍sā̱ saha̍nte̱ reja̍te agne pṛthi̱vī ma̱khebhya̍:

||9||

tviṣī̍manto adhva̱rasye̍va di̱dyuttṛ̍ṣu̱cyava̍so ju̱hvo̱3 nāgneḥ |

a̱rcatra̍yo̱ dhuna̍yo̱ na vī̱rā bhrāja̍jjanmāno ma̱ruto̱ adhṛ̍ṣṭāḥ

||10||

taṃ vṛ̱dhanta̱ṃ māru̍ta̱ṃ bhrāja̍dṛṣṭiṃ ru̱drasya̍ sū̱nuṃ ha̱vasā vi̍vāse |

di̱vaḥ śardhā̍ya̱ śuca̍yo manī̱ṣā gi̱rayo̱ nāpa̍ u̱grā a̍spṛdhran

||11||

viśve̍ṣāṃ vaḥ sa̱tāṃ jyeṣṭha̍tamā gī̱rbhirmi̱trāvaru̍ṇā vāvṛ̱dhadhyai̍ |

saṃ yā ra̱śmeva̍ ya̱matu̱ryami̍ṣṭhā̱ dvā janā̱m̐ asa̍mā bā̱hubhi̱: svaiḥ

||1||

i̱yaṃ madvā̱ṃ pra stṛ̍ṇīte manī̱ṣopa̍ pri̱yā nama̍sā ba̱rhiraccha̍ |

ya̱ntaṃ no̍ mitrāvaruṇā̱vadhṛ̍ṣṭaṃ cha̱rdiryadvā̍ṃ varū̱thya̍ṃ sudānū

||2||

ā yā̍taṃ mitrāvaruṇā suśa̱styupa̍ pri̱yā nama̍sā hū̱yamā̍nā |

saṃ yāva̍pna̱:stho a̱pase̍va̱ janā̍ñchrudhīya̱taści̍dyatatho mahi̱tvā

||3||

aśvā̱ na yā vā̱jinā̍ pū̱taba̍ndhū ṛ̱tā yadgarbha̱madi̍ti̱rbhara̍dhyai |

pra yā mahi̍ ma̱hāntā̱ jāya̍mānā gho̱rā martā̍ya ri̱pave̱ ni dī̍dhaḥ

||4||

viśve̱ yadvā̍ṃ ma̱ṃhanā̱ manda̍mānāḥ kṣa̱traṃ de̱vāso̱ ada̍dhuḥ sa̱joṣā̍: |

pari̱ yadbhū̱tho roda̍sī cidu̱rvī santi̱ spaśo̱ ada̍bdhāso̱ amū̍rāḥ

||5||

tā hi kṣa̱traṃ dhā̱raye̍the̱ anu̱ dyūndṛ̱ṃhethe̱ sānu̍mupa̱mādi̍va̱ dyoḥ |

dṛ̱l̤ho nakṣa̍tra u̱ta vi̱śvade̍vo̱ bhūmi̱mātā̱ndyāṃ dhā̱sinā̱yoḥ

||6||

tā vi̱graṃ dhai̍the ja̱ṭhara̍ṃ pṛ̱ṇadhyā̱ ā yatsadma̱ sabhṛ̍tayaḥ pṛ̱ṇanti̍ |

na mṛ̍ṣyante yuva̱tayo'vā̍tā̱ vi yatpayo̍ viśvajinvā̱ bhara̍nte

||7||

tā ji̱hvayā̱ sada̱medaṃ su̍me̱dhā ā yadvā̍ṃ sa̱tyo a̍ra̱tiṝ̱te bhūt |

tadvā̍ṃ mahi̱tvaṃ ghṛ̍tānnāvastu yu̱vaṃ dā̱śuṣe̱ vi ca̍yiṣṭa̱maṃha̍:

||8||

pra yadvā̍ṃ mitrāvaruṇā spū̱rdhanpri̱yā dhāma̍ yu̱vadhi̍tā mi̱nanti̍ |

na ye de̱vāsa̱ oha̍sā̱ na martā̱ aya̍jñasāco̱ apyo̱ na pu̱trāḥ

||9||

vi yadvāca̍ṃ kī̱stāso̱ bhara̍nte̱ śaṃsa̍nti̱ ke ci̍nni̱vido̍ manā̱nāḥ |

ādvā̍ṃ bravāma sa̱tyānyu̱kthā naki̍rde̱vebhi̍ryatatho mahi̱tvā

||10||

a̱vori̱tthā vā̍ṃ cha̱rdiṣo̍ a̱bhiṣṭau̍ yu̱vormi̍trāvaruṇā̱vaskṛ̍dhoyu |

anu̱ yadgāva̍: sphu̱rānṛ̍ji̱pyaṃ dhṛ̱ṣṇuṃ yadraṇe̱ vṛṣa̍ṇaṃ yu̱naja̍n

||11||

śru̱ṣṭī vā̍ṃ ya̱jña udya̍taḥ sa̱joṣā̍ manu̱ṣvadvṛ̱ktaba̍rhiṣo̱ yaja̍dhyai |

ā ya indrā̱varu̍ṇāvi̱ṣe a̱dya ma̱he su̱mnāya̍ ma̱ha ā̍va̱varta̍t

||1||

tā hi śreṣṭhā̍ de̱vatā̍tā tu̱jā śūrā̍ṇā̱ṃ śavi̍ṣṭhā̱ tā hi bhū̱tam |

ma̱ghonā̱ṃ maṃhi̍ṣṭhā tuvi̱śuṣma̍ ṛ̱tena̍ vṛtra̱turā̱ sarva̍senā

||2||

tā gṛ̍ṇīhi nama̱sye̍bhiḥ śū̱ṣaiḥ su̱mnebhi̱rindrā̱varu̍ṇā cakā̱nā |

vajre̍ṇā̱nyaḥ śava̍sā̱ hanti̍ vṛ̱traṃ siṣa̍ktya̱nyo vṛ̱jane̍ṣu̱ vipra̍:

||3||

gnāśca̱ yannara̍śca vāvṛ̱dhanta̱ viśve̍ de̱vāso̍ na̱rāṃ svagū̍rtāḥ |

praibhya̍ indrāvaruṇā mahi̱tvā dyauśca̍ pṛthivi bhūtamu̱rvī

||4||

sa itsu̱dānu̱: svavā̍m̐ ṛ̱tāvendrā̱ yo vā̍ṃ varuṇa̱ dāśa̍ti̱ tman |

i̱ṣā sa dvi̱ṣasta̍re̱ddāsvā̱nvaṃsa̍dra̱yiṃ ra̍yi̱vata̍śca̱ janā̍n

||5||

yaṃ yu̱vaṃ dā̱śva̍dhvarāya devā ra̱yiṃ dha̱ttho vasu̍mantaṃ puru̱kṣum |

a̱sme sa i̍ndrāvaruṇā̱vapi̍ ṣyā̱tpra yo bha̱nakti̍ va̱nuṣā̱maśa̍stīḥ

||6||

u̱ta na̍: sutrā̱tro de̱vago̍pāḥ sū̱ribhya̍ indrāvaruṇā ra̱yiḥ ṣyā̍t |

yeṣā̱ṃ śuṣma̱: pṛta̍nāsu sā̱hvānpra sa̱dyo dyu̱mnā ti̱rate̱ tatu̍riḥ

||7||

nū na̍ indrāvaruṇā gṛṇā̱nā pṛ̱ṅktaṃ ra̱yiṃ sau̍śrava̱sāya̍ devā |

i̱tthā gṛ̱ṇanto̍ ma̱hina̍sya̱ śardho̱'po na nā̱vā du̍ri̱tā ta̍rema

||8||

pra sa̱mrāje̍ bṛha̱te manma̱ nu pri̱yamarca̍ de̱vāya̱ varu̍ṇāya sa̱pratha̍: |

a̱yaṃ ya u̱rvī ma̍hi̱nā mahi̍vrata̱: kratvā̍ vi̱bhātya̱jaro̱ na śo̱ciṣā̍

||9||

indrā̍varuṇā sutapāvi̱maṃ su̱taṃ soma̍ṃ pibata̱ṃ madya̍ṃ dhṛtavratā |

yu̱vo ratho̍ adhva̱raṃ de̱vavī̍taye̱ prati̱ svasa̍ra̱mupa̍ yāti pī̱taye̍

||10||

indrā̍varuṇā̱ madhu̍mattamasya̱ vṛṣṇa̱: soma̍sya vṛṣa̱ṇā vṛ̍ṣethām |

i̱daṃ vā̱mandha̱: pari̍ṣiktama̱sme ā̱sadyā̱sminba̱rhiṣi̍ mādayethām

||11||

saṃ vā̱ṃ karma̍ṇā̱ sami̱ṣā hi̍no̱mīndrā̍viṣṇū̱ apa̍saspā̱re a̱sya |

ju̱ṣethā̍ṃ ya̱jñaṃ dravi̍ṇaṃ ca dhatta̱mari̍ṣṭairnaḥ pa̱thibhi̍: pā̱raya̍ntā

||1||

yā viśvā̍sāṃ jani̱tārā̍ matī̱nāmindrā̱viṣṇū̍ ka̱laśā̍ soma̱dhānā̍ |

pra vā̱ṃ gira̍: śa̱syamā̍nā avantu̱ pra stomā̍so gī̱yamā̍nāso a̱rkaiḥ

||2||

indrā̍viṣṇū madapatī madānā̱mā soma̍ṃ yāta̱ṃ dravi̍ṇo̱ dadhā̍nā |

saṃ vā̍mañjantva̱ktubhi̍rmatī̱nāṃ saṃ stomā̍saḥ śa̱syamā̍nāsa u̱kthaiḥ

||3||

ā vā̱maśvā̍so abhimāti̱ṣāha̱ indrā̍viṣṇū sadha̱mādo̍ vahantu |

ju̱ṣethā̱ṃ viśvā̱ hava̍nā matī̱nāmupa̱ brahmā̍ṇi śṛṇuta̱ṃ giro̍ me

||4||

indrā̍viṣṇū̱ tatpa̍na̱yāyya̍ṃ vā̱ṃ soma̍sya̱ mada̍ u̱ru ca̍kramāthe |

akṛ̍ṇutama̱ntari̍kṣa̱ṃ varī̱yo'pra̍thataṃ jī̱vase̍ no̱ rajā̍ṃsi

||5||

indrā̍viṣṇū ha̱viṣā̍ vāvṛdhā̱nā'grā̍dvānā̱ nama̍sā rātahavyā |

ghṛtā̍sutī̱ dravi̍ṇaṃ dhattama̱sme sa̍mu̱draḥ stha̍: ka̱laśa̍: soma̱dhāna̍:

||6||

indrā̍viṣṇū̱ piba̍ta̱ṃ madhvo̍ a̱sya soma̍sya dasrā ja̱ṭhara̍ṃ pṛṇethām |

ā vā̱mandhā̍ṃsi madi̱rāṇya̍gma̱nnupa̱ brahmā̍ṇi śṛṇuta̱ṃ hava̍ṃ me

||7||

u̱bhā ji̍gyathu̱rna parā̍ jayethe̱ na parā̍ jigye kata̱raśca̱naino̍: |

indra̍śca viṣṇo̱ yadapa̍spṛdhethāṃ tre̱dhā sa̱hasra̱ṃ vi tadai̍rayethām

||8||

ghṛ̱tava̍tī̱ bhuva̍nānāmabhi̱śriyo̱rvī pṛ̱thvī ma̍dhu̱dughe̍ su̱peśa̍sā |

dyāvā̍pṛthi̱vī varu̍ṇasya̱ dharma̍ṇā̱ viṣka̍bhite a̱jare̱ bhūri̍retasā

||1||

asa̍ścantī̱ bhūri̍dhāre̱ paya̍svatī ghṛ̱taṃ du̍hāte su̱kṛte̱ śuci̍vrate |

rāja̍ntī a̱sya bhuva̍nasya rodasī a̱sme reta̍: siñcata̱ṃ yanmanu̍rhitam

||2||

yo vā̍mṛ̱jave̱ krama̍ṇāya rodasī̱ marto̍ da̱dāśa̍ dhiṣaṇe̱ sa sā̍dhati |

pra pra̱jābhi̍rjāyate̱ dharma̍ṇa̱spari̍ yu̱voḥ si̱ktā viṣu̍rūpāṇi̱ savra̍tā

||3||

ghṛ̱tena̱ dyāvā̍pṛthi̱vī a̱bhīvṛ̍te ghṛta̱śriyā̍ ghṛta̱pṛcā̍ ghṛtā̱vṛdhā̍ |

u̱rvī pṛ̱thvī ho̍tṛ̱vūrye̍ pu̱rohi̍te̱ te idviprā̍ īl̤ate su̱mnami̱ṣṭaye̍

||4||

madhu̍ no̱ dyāvā̍pṛthi̱vī mi̍mikṣatāṃ madhu̱ścutā̍ madhu̱dughe̱ madhu̍vrate |

dadhā̍ne ya̱jñaṃ dravi̍ṇaṃ ca de̱vatā̱ mahi̱ śravo̱ vāja̍ma̱sme su̱vīrya̍m

||5||

ūrja̍ṃ no̱ dyauśca̍ pṛthi̱vī ca̍ pinvatāṃ pi̱tā mā̱tā vi̍śva̱vidā̍ su̱daṃsa̍sā |

sa̱ṃra̱rā̱ṇe roda̍sī vi̱śvaśa̍mbhuvā sa̱niṃ vāja̍ṃ ra̱yima̱sme sami̍nvatām

||6||

udu̱ ṣya de̱vaḥ sa̍vi̱tā hi̍ra̱ṇyayā̍ bā̱hū a̍yaṃsta̱ sava̍nāya su̱kratu̍: |

ghṛ̱tena̍ pā̱ṇī a̱bhi pru̍ṣṇute ma̱kho yuvā̍ su̱dakṣo̱ raja̍so̱ vidha̍rmaṇi

||1||

de̱vasya̍ va̱yaṃ sa̍vi̱tuḥ savī̍mani̱ śreṣṭhe̍ syāma̱ vasu̍naśca dā̱vane̍ |

yo viśva̍sya dvi̱pado̱ yaścatu̍ṣpado ni̱veśa̍ne prasa̱ve cāsi̱ bhūma̍naḥ

||2||

ada̍bdhebhiḥ savitaḥ pā̱yubhi̱ṣṭvaṃ śi̱vebhi̍ra̱dya pari̍ pāhi no̱ gaya̍m |

hira̍ṇyajihvaḥ suvi̱tāya̱ navya̍se̱ rakṣā̱ māki̍rno a̱ghaśa̍ṃsa īśata

||3||

udu̱ ṣya de̱vaḥ sa̍vi̱tā damū̍nā̱ hira̍ṇyapāṇiḥ pratido̱ṣama̍sthāt |

ayo̍hanuryaja̱to ma̱ndraji̍hva̱ ā dā̱śuṣe̍ suvati̱ bhūri̍ vā̱mam

||4||

udū̍ ayām̐ upava̱kteva̍ bā̱hū hi̍ra̱ṇyayā̍ savi̱tā su̱pratī̍kā |

di̱vo rohā̍ṃsyaruhatpṛthi̱vyā arī̍ramatpa̱taya̱tkacci̱dabhva̍m

||5||

vā̱mama̱dya sa̍vitarvā̱mamu̱ śvo di̱vedi̍ve vā̱mama̱smabhya̍ṃ sāvīḥ |

vā̱masya̱ hi kṣaya̍sya deva̱ bhūre̍ra̱yā dhi̱yā vā̍ma̱bhāja̍: syāma

||6||

indrā̍somā̱ mahi̱ tadvā̍ṃ mahi̱tvaṃ yu̱vaṃ ma̱hāni̍ pratha̱māni̍ cakrathuḥ |

yu̱vaṃ sūrya̍ṃ vivi̱dathu̍ryu̱vaṃ sva1rviśvā̱ tamā̍ṃsyahataṃ ni̱daśca̍

||1||

indrā̍somā vā̱saya̍tha u̱ṣāsa̱mutsūrya̍ṃ nayatho̱ jyoti̍ṣā sa̱ha |

upa̱ dyāṃ ska̱mbhathu̱: skambha̍ne̱nāpra̍thataṃ pṛthi̱vīṃ mā̱tara̱ṃ vi

||2||

indrā̍somā̱vahi̍ma̱paḥ pa̍ri̱ṣṭhāṃ ha̱tho vṛ̱tramanu̍ vā̱ṃ dyaura̍manyata |

prārṇā̍ṃsyairayataṃ na̱dīnā̱mā sa̍mu̱drāṇi̍ paprathuḥ pu̱rūṇi̍

||3||

indrā̍somā pa̱kvamā̱māsva̱ntarni gavā̱midda̍dhathurva̱kṣaṇā̍su |

ja̱gṛ̱bhathu̱rana̍pinaddhamāsu̱ ruśa̍cci̱trāsu̱ jaga̍tīṣva̱ntaḥ

||4||

indrā̍somā yu̱vama̱ṅga taru̍tramapatya̱sāca̱ṃ śrutya̍ṃ rarāthe |

yu̱vaṃ śuṣma̱ṃ narya̍ṃ carṣa̱ṇibhya̱: saṃ vi̍vyathuḥ pṛtanā̱ṣāha̍mugrā

||5||

yo a̍dri̱bhitpra̍thama̱jā ṛ̱tāvā̱ bṛha̱spati̍rāṅgira̱so ha̱viṣmā̍n |

dvi̱barha̍jmā prāgharma̱satpi̱tā na̱ ā roda̍sī vṛṣa̱bho ro̍ravīti

||1||

janā̍ya ci̱dya īva̍ta u lo̱kaṃ bṛha̱spati̍rde̱vahū̍tau ca̱kāra̍ |

ghnanvṛ̱trāṇi̱ vi puro̍ dardarīti̱ jaya̱ñchatrū̍m̐ra̱mitrā̍npṛ̱tsu sāha̍n

||2||

bṛha̱spati̱: sama̍jaya̱dvasū̍ni ma̱ho vra̱jāngoma̍to de̱va e̱ṣaḥ |

a̱paḥ siṣā̍sa̱ntsva1rapra̍tīto̱ bṛha̱spati̱rhantya̱mitra̍ma̱rkaiḥ

||3||

somā̍rudrā dhā̱raye̍thāmasu̱ryaṃ1 pra vā̍mi̱ṣṭayo'ra̍maśnuvantu |

dame̍dame sa̱pta ratnā̱ dadhā̍nā̱ śaṃ no̍ bhūtaṃ dvi̱pade̱ śaṃ catu̍ṣpade

||1||

somā̍rudrā̱ vi vṛ̍hata̱ṃ viṣū̍cī̱mamī̍vā̱ yā no̱ gaya̍māvi̱veśa̍ |

ā̱re bā̍dhethā̱ṃ niṝ̍tiṃ parā̱caira̱sme bha̱drā sau̍śrava̱sāni̍ santu

||2||

somā̍rudrā yu̱vame̱tānya̱sme viśvā̍ ta̱nūṣu̍ bheṣa̱jāni̍ dhattam |

ava̍ syataṃ mu̱ñcata̱ṃ yanno̱ asti̍ ta̱nūṣu̍ ba̱ddhaṃ kṛ̱tameno̍ a̱smat

||3||

ti̱gmāyu̍dhau ti̱gmahe̍tī su̱śevau̱ somā̍rudrāvi̱ha su mṛ̍l̤ataṃ naḥ |

pra no̍ muñcata̱ṃ varu̍ṇasya̱ pāśā̍dgopā̱yata̍ṃ naḥ sumana̱syamā̍nā

||4||

Sūkta 75

19 pāyurbhāradvāja: | { saṃgrāmāśiṣa: } 1 varma, 2 dhanu:, 3 jyā , 4 ārtnī, iṣudhi:, 6 [ pūrvārdha:] sārathi :, 6 {uttarārdha:} raśmaya: , 7 aśvā: , 8 ratha: , 9 rathagopā:, 10 brāhmaṇa–pitṛ-soma-dyāvā-pṛthivī-pūṣāṇa: ; 11-12, 15-16 iṣava:, 13 pratoda:, 14 hastaghna:, 17 yuddhabhūmi-kavaca–brahmaṇaspatyādaya:, 18 varma–soma–varuṇā:, 19 devabrahmāṇī| triṣṭup ; 6,10 jagatī; 12,13,15,16,19 anuṣṭup , 17 paṅkti: |

jī̱mūta̍syeva bhavati̱ pratī̍ka̱ṃ yadva̱rmī yāti̍ sa̱madā̍mu̱pasthe̍ |

anā̍viddhayā ta̱nvā̍ jaya̱ tvaṃ sa tvā̱ varma̍ṇo mahi̱mā pi̍partu

||1||

dhanva̍nā̱ gā dhanva̍nā̱jiṃ ja̍yema̱ dhanva̍nā tī̱vrāḥ sa̱mado̍ jayema |

dhanu̱: śatro̍rapakā̱maṃ kṛ̍ṇoti̱ dhanva̍nā̱ sarvā̍: pra̱diśo̍ jayema

||2||

va̱kṣyantī̱vedā ga̍nīganti̱ karṇa̍ṃ pri̱yaṃ sakhā̍yaṃ pariṣasvajā̱nā |

yoṣe̍va śiṅkte̱ vita̱tādhi̱ dhanva̱ñjyā i̱yaṃ sama̍ne pā̱raya̍ntī

||3||

te ā̱cara̍ntī̱ sama̍neva̱ yoṣā̍ mā̱teva̍ pu̱traṃ bi̍bhṛtāmu̱pasthe̍ |

apa̱ śatrū̍nvidhyatāṃ saṃvidā̱ne ārtnī̍ i̱me vi̍ṣphu̱rantī̍ a̱mitrā̍n

||4||

ba̱hvī̱nāṃ pi̱tā ba̱hura̍sya pu̱traści̱ścā kṛ̍ṇoti̱ sama̍nāva̱gatya̍ |

i̱ṣu̱dhiḥ saṅkā̱: pṛta̍nāśca̱ sarvā̍: pṛ̱ṣṭhe nina̍ddho jayati̱ prasū̍taḥ

||5||

rathe̱ tiṣṭha̍nnayati vā̱jina̍: pu̱ro yatra̍yatra kā̱maya̍te suṣāra̱thiḥ |

a̱bhīśū̍nāṃ mahi̱māna̍ṃ panāyata̱ mana̍: pa̱ścādanu̍ yacchanti ra̱śmaya̍:

||6||

tī̱vrānghoṣā̍nkṛṇvate̱ vṛṣa̍pāṇa̱yo'śvā̱ rathe̍bhiḥ sa̱ha vā̱jaya̍ntaḥ |

a̱va̱krāma̍nta̱: prapa̍daira̱mitrā̍nkṣi̱ṇanti̱ śatrū̱m̐rana̍pavyayantaḥ

||7||

ra̱tha̱vāha̍naṃ ha̱vira̍sya̱ nāma̱ yatrāyu̍dha̱ṃ nihi̍tamasya̱ varma̍ |

tatrā̱ ratha̱mupa̍ śa̱gmaṃ sa̍dema vi̱śvāhā̍ va̱yaṃ su̍mana̱syamā̍nāḥ

||8||

svā̱du̱ṣa̱ṃsada̍: pi̱taro̍ vayo̱dhāḥ kṛ̍cchre̱śrita̱: śaktī̍vanto gabhī̱rāḥ |

ci̱trase̍nā̱ iṣu̍balā̱ amṛ̍dhrāḥ sa̱tovī̍rā u̱ravo̍ vrātasā̱hāḥ

||9||

brāhma̍ṇāsa̱: pita̍ra̱: somyā̍saḥ śi̱ve no̱ dyāvā̍pṛthi̱vī a̍ne̱hasā̍ |

pū̱ṣā na̍: pātu duri̱tādṛ̍tāvṛdho̱ rakṣā̱ māki̍rno a̱ghaśa̍ṃsa īśata

||10||

su̱pa̱rṇaṃ va̍ste mṛ̱go a̍syā̱ danto̱ gobhi̱: saṃna̍ddhā patati̱ prasū̍tā |

yatrā̱ nara̱: saṃ ca̱ vi ca̱ drava̍nti̱ tatrā̱smabhya̱miṣa̍va̱: śarma̍ yaṃsan

||11||

ṛjī̍te̱ pari̍ vṛṅdhi̱ no'śmā̍ bhavatu nasta̱nūḥ | somo̱ adhi̍ bravītu̱ no'di̍ti̱: śarma̍ yacchatu

||12||

ā ja̍ṅghanti̱ sānve̍ṣāṃ ja̱ghanā̱m̐ upa̍ jighnate | aśvā̍jani̱ prace̍ta̱so'śvā̍ntsa̱matsu̍ codaya

||13||

ahi̍riva bho̱gaiḥ parye̍ti bā̱huṃ jyāyā̍ he̱tiṃ pa̍ri̱bādha̍mānaḥ |

ha̱sta̱ghno viśvā̍ va̱yunā̍ni vi̱dvānpumā̱npumā̍ṃsa̱ṃ pari̍ pātu vi̱śvata̍:

||14||

ālā̍ktā̱ yā ruru̍śī̱rṣṇyatho̱ yasyā̱ ayo̱ mukha̍m | i̱daṃ pa̱rjanya̍retasa̱ iṣvai̍ de̱vyai bṛ̱hannama̍:

||15||

ava̍sṛṣṭā̱ parā̍ pata̱ śara̍vye̱ brahma̍saṃśite | gacchā̱mitrā̱npra pa̍dyasva̱ māmīṣā̱ṃ kaṃ ca̱nocchi̍ṣaḥ

||16||

yatra̍ bā̱ṇāḥ sa̱mpata̍nti kumā̱rā vi̍śi̱khā i̍va |

tatrā̍ no̱ brahma̍ṇa̱spati̱radi̍ti̱: śarma̍ yacchatu vi̱śvāhā̱ śarma̍ yacchatu

||17||

marmā̍ṇi te̱ varma̍ṇā chādayāmi̱ soma̍stvā̱ rājā̱mṛte̱nānu̍ vastām |

u̱rorvarī̍yo̱ varu̍ṇaste kṛṇotu̱ jaya̍nta̱ṃ tvānu̍ de̱vā ma̍dantu

||18||

yo na̱: svo ara̍ṇo̱ yaśca̱ niṣṭyo̱ jighā̍ṃsati | de̱vāstaṃ sarve̍ dhūrvantu̱ brahma̱ varma̱ mamānta̍ram

||19||