6 bārhaspatyo bharadvāja: |uṣā: | triṣṭup |
udu̍ śri̱ya u̱ṣaso̱ roca̍mānā̱ asthu̍ra̱pāṃ normayo̱ ruśa̍ntaḥ |
kṛ̱ṇoti̱ viśvā̍ su̱pathā̍ su̱gānyabhū̍du̱ vasvī̱ dakṣi̍ṇā ma̱ghonī̍
||1||bha̱drā da̍dṛkṣa urvi̱yā vi bhā̱syutte̍ śo̱cirbhā̱navo̱ dyāma̍paptan |
ā̱virvakṣa̍: kṛṇuṣe śu̱mbhamā̱noṣo̍ devi̱ roca̍mānā̱ maho̍bhiḥ
||2||vaha̍nti sīmaru̱ṇāso̱ ruśa̍nto̱ gāva̍: su̱bhagā̍murvi̱yā pra̍thā̱nām |
ape̍jate̱ śūro̱ aste̍va̱ śatrū̱nbādha̍te̱ tamo̍ aji̱ro na vol̤hā̍
||3||su̱gota te̍ su̱pathā̱ parva̍teṣvavā̱te a̱pasta̍rasi svabhāno |
sā na̱ ā va̍ha pṛthuyāmannṛṣve ra̱yiṃ di̍vo duhitariṣa̱yadhyai̍
||4||sā va̍ha̱ yokṣabhi̱ravā̱toṣo̱ vara̱ṃ vaha̍si̱ joṣa̱manu̍ |
tvaṃ di̍vo duhita̱ryā ha̍ de̱vī pū̱rvahū̍tau ma̱ṃhanā̍ darśa̱tā bhū̍:
||5||utte̱ vaya̍ścidvasa̱tera̍papta̱nnara̍śca̱ ye pi̍tu̱bhājo̱ vyu̍ṣṭau |
a̱mā sa̱te va̍hasi̱ bhūri̍ vā̱mamuṣo̍ devi dā̱śuṣe̱ martyā̍ya
||6||