Śaṅkara by tradition
prauḍhaprauḍhanijānubhūtigalitadvaitendrajālo guru-
rgūḍhaṃ gūḍhamaghaughaduṣṭakudhiyāṃ spaṣṭaṃ sudhīśālinām |
svānte samyagihānubhūtamapi sacchiśiṣyāvabodhāya ta-
tsatyaṃ saṃsmṛtavānsamastajagatāṃ naijaṃ nijālokanāt ||
||1||dvaitaṃ mayyakhilaṃ samutthitamidaṃ mithyā manaḥkalpitaṃ
toyaṃ toyavivarjite marutale bhrāntyaiva siddhaṃ na hi |
yadyevaṃ khalu dṛśyametadakhilaṃ nāhaṃ na vā tanmama
prauḍhānandacidekasanmayavapuḥ śuddho'smyakhaṇḍo'smyaham ||
||2||deho nāhamacetano'yamaniśaṃ kuḍyādivanniścito
nāhaṃ prāṇamayo'pi vā dṛtidhṛto vāyuryathā niścitaḥ |
so'haṃ nāpi manomayaḥ kapicalaḥ kārpaṇyaduṣṭo na vā
buddhirbuddhakuvṛttikeva kuhanā nājñānamandhaṃtamaḥ ||
||3||nāhaṃ khādirapi sphuṭaṃ marutalabhrājatpayaḥsāmyata-
stebhyo nityavilakṣaṇo'khiladṛśiḥ sauraprakāśo yathā |
dṛśyaiḥ saṅgavivarjito gaganavatsampūrṇarūpo'smyahaṃ
vastusthityanurodhatastvahamidaṃ vīcyādi sindhuryathā ||
||4||nirdvaito'smyahamasmi nirmalacidākāśo'smi pūrṇo'smyahaṃ
nirdeho'smi nirindriyo'smi nitarāṃ niṣprāṇavargo'smyaham |
nirmuktāśubhamānaso'smi vigaladvijñānakośo'smyahaṃ
nirmāyo'smi nirantaro'smi vipulaprauḍhaprakāśo'smyaham ||
||5||matto'nyanna hi kiṃcidasti yadi cidbhāsyaṃ tatastanmṛṣā
guñjāvahnivadeva sarvakalanādhiṣṭhānabhūto'smyaham |
sarvasyāpi dṛgasmyahaṃ samarasaḥ śānto'smyapāpo'smyahaṃ
pūrṇo'smi dvayavarjito'smi vipulākāśo'smi nityo'smyaham ||
||6||mayyasminparamārthake śrutiśirovedye svato bhāsane
kā vā vipratipattiretadakhilaṃ bhātyeva yatsaṃnidheḥ |
saurālokavaśātpratītamakhilaṃ paśyanna tasmiñjanaḥ
saṃdigdho'styata eva kevalaśivaḥ ko'pi prakāśo'smyaham ||
||7||nityasphūrtimayo'smi nirmalasadākāśo'smi śānto'smyahaṃ
nityānandamayo'smi nirgatamahāmohāndhakāro'smyaham |
vijñātaṃ paramārthatattvamakhilaṃ naijaṃ nirastāśubhaṃ
muktaprāpyamapāstabhedakalanākaivalyasaṃjño'smyaham ||
||8||svāpnadvaitavadeva jāgratamapi dvaitaṃ manomātrakaṃ
mithyetyeva vihāya saccidamalasvāntaikarūpo'smyaham |
yadvā vedyamaśeṣametadaniśaṃ madrūpamevetyapi
jñātvā tyaktamarunmahodadhiriva prauḍho gabhīro'smyaham ||
||9||gantavyaṃ kimihāsti sarvaparipūrṇasyāpyakhaṇḍākṛteḥ
kartavyaṃ kimihāsti niṣkriyatanormokṣaikarūpasya me |
nirdvaitasya na heyamanyadapi vā no vāpyupeyāntaraṃ
śānto'dyāsmi vimuktatoyavimalo megho yathā nirmalaḥ ||
||10||kiṃ na prāptamitaḥ purā kimadhunā labdhaṃ vicārādinā
yasmāttatsukharūpameva satattaṃ jājvalyamāno'smyaham |
kiṃ vāpekṣyamihāpi mayyatitarāṃ mithyāvicārādikaṃ
dvaitādvaitavivarjite samarase maunaṃ paraṃ sammatam ||
||11||śrotavyaṃ ca kimasti pūrṇasudṛśo mithyāparokṣasya me
mantavyaṃ ca na me'sti kiṃcidapi vā niḥsaṃśayajyotiṣaḥ |
dhyātṛdhyeyavibhedahānivapuṣo na dhyeyamastyeva me
sarvātmaikamahārasasya satataṃ no vā samādhirmama ||
||12||ātmānātmavivecanāpi mama no vidvatkṛtā rocate-
'nātmā nāsti yadasti gocaravapuḥ ko vā vivektuṃ kṣamī |
mithyāvādavicāracintanamaho kurvantyadṛṣṭātmakā
bhrāntā eva na pāragā dṛḍhadhiyastūṣṇīṃ śilāvatsthitaḥ ||
||13||vastusthityanurodhatastvahamaho kaścitpadārtho na cā-
pyevaṃ ko'pi vibhāmi saṃtatadṛśī vāṅmānasāgocaraḥ |
niṣpāpo'smyabhayo'smyahaṃ vigataduḥśaṅkākalaṅko'smyahaṃ
saṃśāntānupamānaśītalamahaḥprauḍhaprakāśo'smyaham ||
||14||yo'haṃ pūrvamitaḥ praśāntakalanāśuddho'smi buddho'smyahaṃ
yasmānmatta idaṃ samutthitamabhūdetanmayā dhāryate |
mayyeva pralayaṃ prayāti niradhiṣṭhānāya tasmai sadā
satyānandacidātmakāya vipulaprajñāya mahyaṃ namaḥ ||
||15||sattācitsukharūpamasti satataṃ nāhaṃ ca na tvaṃ mṛṣā
nedaṃ vāpi jagatpradṛṣṭamakhilaṃ nāstīti jānīhi bho |
yatproktaṃ karuṇāvaśāttvayi mayā tatsatyametatsphuṭaṃ
śraddhatsvānagha śuddhabuddhirasi cenmātrāstu te saṃśayaḥ ||
||16||svārasyaikasubodhacārumanase prauḍhānubhūtistviyaṃ
dātavyā na tu mohadugdhakudhiye duṣṭāntaraṅgāya ca |
yeyaṃ ramyavidarpitottamaśiraḥ prāptā cakāsti svayaṃ
sā cenmarkaṭahastadeśapatitā kiṃ rājate ketakī ||
||17||iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau prauḍhānubhūtiḥ sampūrṇā