25 maitrāvaruṇirvasiṣṭha:| agni: | virāṭ ,19-25 triṣṭup |
a̱gniṃ naro̱ dīdhi̍tibhira̱raṇyo̱rhasta̍cyutī janayanta praśa̱stam |
dū̱re̱dṛśa̍ṃ gṛ̱hapa̍timatha̱ryum
||1||tama̱gnimaste̱ vasa̍vo̱ nyṛ̍ṇvantsuprati̱cakṣa̱mava̍se̱ kuta̍ścit |
da̱kṣāyyo̱ yo dama̱ āsa̱ nitya̍:
||2||preddho̍ agne dīdihi pu̱ro no'ja̍srayā sū̱rmyā̍ yaviṣṭha |
tvāṃ śaśva̍nta̱ upa̍ yanti̱ vājā̍:
||3||pra te a̱gnayo̱'gnibhyo̱ vara̱ṃ niḥ su̱vīrā̍saḥ śośucanta dyu̱manta̍: |
yatrā̱ nara̍: sa̱māsa̍te sujā̱tāḥ
||4||dā no̍ agne dhi̱yā ra̱yiṃ su̱vīra̍ṃ svapa̱tyaṃ sa̍hasya praśa̱stam |
na yaṃ yāvā̱ tara̍ti yātu̱māvā̍n
||5||upa̱ yameti̍ yuva̱tiḥ su̱dakṣa̍ṃ do̱ṣā vasto̍rha̱viṣma̍tī ghṛ̱tācī̍ |
upa̱ svaina̍ma̱rama̍tirvasū̱yuḥ
||6||viśvā̍ a̱gne'pa̍ da̱hārā̍tī̱ryebhi̱stapo̍bhi̱rada̍ho̱ jarū̍tham |
pra ni̍sva̱raṃ cā̍taya̱svāmī̍vām
||7||ā yaste̍ agna idha̱te anī̍ka̱ṃ vasi̍ṣṭha̱ śukra̱ dīdi̍va̱: pāva̍ka |
u̱to na̍ e̱bhiḥ sta̱vathai̍ri̱ha syā̍:
||8||vi ye te̍ agne bheji̱re anī̍ka̱ṃ martā̱ nara̱: pitryā̍saḥ puru̱trā |
u̱to na̍ e̱bhiḥ su̱manā̍ i̱ha syā̍:
||9||i̱me naro̍ vṛtra̱hatye̍ṣu̱ śūrā̱ viśvā̱ ade̍vīra̱bhi sa̍ntu mā̱yāḥ |
ye me̱ dhiya̍ṃ pa̱naya̍nta praśa̱stām
||10||mā śūne̍ agne̱ ni ṣa̍dāma nṛ̱ṇāṃ māśeṣa̍so̱'vīra̍tā̱ pari̍ tvā |
pra̱jāva̍tīṣu̱ duryā̍su durya
||11||yama̱śvī nitya̍mupa̱yāti̍ ya̱jñaṃ pra̱jāva̍ntaṃ svapa̱tyaṃ kṣaya̍ṃ naḥ |
svaja̍nmanā̱ śeṣa̍sā vāvṛdhā̱nam
||12||pā̱hi no̍ agne ra̱kṣaso̱ aju̍ṣṭātpā̱hi dhū̱rterara̍ruṣo aghā̱yoḥ |
tvā yu̱jā pṛ̍tanā̱yūm̐ra̱bhi ṣyā̍m
||13||seda̱gnira̱gnīm̐ratya̍stva̱nyānyatra̍ vā̱jī tana̍yo vī̱l̤upā̍ṇiḥ |
sa̱hasra̍pāthā a̱kṣarā̍ sa̱meti̍
||14||seda̱gniryo va̍nuṣya̱to ni̱pāti̍ same̱ddhāra̱maṃha̍sa uru̱ṣyāt |
su̱jā̱tāsa̱: pari̍ caranti vī̱rāḥ
||15||a̱yaṃ so a̱gnirāhu̍taḥ puru̱trā yamīśā̍na̱: samidi̱ndhe ha̱viṣmā̍n |
pari̱ yametya̍dhva̱reṣu̱ hotā̍
||16||tve a̍gna ā̱hava̍nāni̱ bhūrī̍śā̱nāsa̱ ā ju̍huyāma̱ nityā̍ | u̱bhā kṛ̱ṇvanto̍ vaha̱tū mi̱yedhe̍
||17||i̱mo a̍gne vī̱tata̍māni ha̱vyā 'ja̍sro vakṣi de̱vatā̍ti̱maccha̍ | prati̍ na īṃ sura̱bhīṇi̍ vyantu
||18||mā no̍ agne̱'vīra̍te̱ parā̍ dā du̱rvāsa̱se'ma̍taye̱ mā no̍ a̱syai |
mā na̍: kṣu̱dhe mā ra̱kṣasa̍ ṛtāvo̱ mā no̱ dame̱ mā vana̱ ā ju̍hūrthāḥ
||19||nū me̱ brahmā̍ṇyagna̱ uccha̍śādhi̱ tvaṃ de̍va ma̱ghava̍dbhyaḥ suṣūdaḥ |
rā̱tau syā̍mo̱bhayā̍sa̱ ā te̍ yū̱yaṃ pā̍ta sva̱stibhi̱: sadā̍ naḥ
||20||tvama̍gne su̱havo̍ ra̱ṇvasa̍ṃdṛksudī̱tī sū̍no sahaso didīhi |
mā tve sacā̱ tana̍ye̱ nitya̱ ā dha̱ṅmā vī̱ro a̱smannaryo̱ vi dā̍sīt
||21||mā no̍ agne durbhṛ̱taye̱ sacai̱ṣu de̱veddhe̍ṣva̱gniṣu̱ pra vo̍caḥ |
mā te̍ a̱smāndu̍rma̱tayo̍ bhṛ̱mācci̍dde̱vasya̍ sūno sahaso naśanta
||22||sa marto̍ agne svanīka re̱vānama̍rtye̱ ya ā̍ju̱hoti̍ ha̱vyam |
sa de̱vatā̍ vasu̱vani̍ṃ dadhāti̱ yaṃ sū̱rira̱rthī pṛ̱cchamā̍na̱ eti̍
||23||ma̱ho no̍ agne suvi̱tasya̍ vi̱dvānra̱yiṃ sū̱ribhya̱ ā va̍hā bṛ̱hanta̍m |
yena̍ va̱yaṃ sa̍hasāva̱nmade̱mā'vi̍kṣitāsa̱ āyu̍ṣā su̱vīrā̍:
||24||nū me̱ brahmā̍ṇyagna̱ uccha̍śādhi̱ tvaṃ de̍va ma̱ghava̍dbhyaḥ suṣūdaḥ |
rā̱tau syā̍mo̱bhayā̍sa̱ ā te̍ yū̱yaṃ pā̍ta sva̱stibhi̱: sadā̍ naḥ
||25||11maitrāvaruṇirvasiṣṭha:|āprīsūktaṃ= (1 idhma: samiddho'gnirvā, 2 narāśaṃsa:,3 il̤a :, 4 barhi:, 5 devīrdvāra: , 6 uṣāsānaktā, 7 daivyo hotārau pracetaso, 8 tisro devya: sarasvatīl̤ābhāratya:, 9 tvaṣṭā , 10 vanaspati : , 11 svāhākṛtaya: } | triṣṭup |
ju̱ṣasva̍ naḥ sa̱midha̍magne a̱dya śocā̍ bṛ̱hadya̍ja̱taṃ dhū̱mamṛ̱ṇvan |
upa̍ spṛśa di̱vyaṃ sānu̱ stūpai̱: saṃ ra̱śmibhi̍statana̱: sūrya̍sya
||1||narā̱śaṃsa̍sya mahi̱māna̍meṣā̱mupa̍ stoṣāma yaja̱tasya̍ ya̱jñaiḥ |
ye su̱krata̍va̱: śuca̍yo dhiya̱ṃdhāḥ svada̍nti de̱vā u̱bhayā̍ni ha̱vyā
||2||ī̱l̤enya̍ṃ vo̱ asu̍raṃ su̱dakṣa̍ma̱ntardū̱taṃ roda̍sī satya̱vāca̍m |
ma̱nu̱ṣvada̱gniṃ manu̍nā̱ sami̍ddha̱ṃ sama̍dhva̱rāya̱ sada̱minma̍hema
||3||sa̱pa̱ryavo̱ bhara̍māṇā abhi̱jñu pra vṛ̍ñjate̱ nama̍sā ba̱rhira̱gnau |
ā̱juhvā̍nā ghṛ̱tapṛ̍ṣṭha̱ṃ pṛṣa̍dva̱dadhva̍ryavo ha̱viṣā̍ marjayadhvam
||4||svā̱dhyo̱3 vi duro̍ deva̱yanto'śi̍śrayū ratha̱yurde̱vatā̍tā |
pū̱rvī śiśu̱ṃ na mā̱tarā̍ rihā̱ṇe sama̱gruvo̱ na sama̍neṣvañjan
||5||u̱ta yoṣa̍ṇe di̱vye ma̱hī na̍ u̱ṣāsā̱naktā̍ su̱dughe̍va dhe̱nuḥ |
ba̱rhi̱ṣadā̍ puruhū̱te ma̱ghonī̱ ā ya̱jñiye̍ suvi̱tāya̍ śrayetām
||6||viprā̍ ya̱jñeṣu̱ mānu̍ṣeṣu kā̱rū manye̍ vāṃ jā̱tave̍dasā̱ yaja̍dhyai |
ū̱rdhvaṃ no̍ adhva̱raṃ kṛ̍ta̱ṃ have̍ṣu̱ tā de̱veṣu̍ vanatho̱ vāryā̍ṇi
||7||ā bhāra̍tī̱ bhāra̍tībhiḥ sa̱joṣā̱ il̤ā̍ de̱vairma̍nu̱ṣye̍bhira̱gniḥ |
sara̍svatī sārasva̱tebhi̍ra̱rvākti̱sro de̱vīrba̱rhiredaṃ sa̍dantu
||8||tanna̍stu̱rīpa̱madha̍ poṣayi̱tnu deva̍ tvaṣṭa̱rvi ra̍rā̱ṇaḥ sya̍sva |
yato̍ vī̱raḥ ka̍rma̱ṇya̍: su̱dakṣo̍ yu̱ktagrā̍vā̱ jāya̍te de̱vakā̍maḥ
||9||vana̍spa̱te'va̍ sṛ̱jopa̍ de̱vāna̱gnirha̱viḥ śa̍mi̱tā sū̍dayāti |
sedu̱ hotā̍ sa̱tyata̍ro yajāti̱ yathā̍ de̱vānā̱ṃ jani̍māni̱ veda̍
||10||ā yā̍hyagne samidhā̱no a̱rvāṅindre̍ṇa de̱vaiḥ sa̱ratha̍ṃ tu̱rebhi̍: |
ba̱rhirna̍ āstā̱madi̍tiḥ supu̱trā svāhā̍ de̱vā a̱mṛtā̍ mādayantām
||11||10 maitrāvaruṇirvasiṣṭha:| agni: | triṣṭup |
a̱gniṃ vo̍ de̱vama̱gnibhi̍: sa̱joṣā̱ yaji̍ṣṭhaṃ dū̱tama̍dhva̱re kṛ̍ṇudhvam |
yo martye̍ṣu̱ nidhru̍viṝ̱tāvā̱ tapu̍rmūrdhā ghṛ̱tānna̍: pāva̱kaḥ
||1||protha̱daśvo̱ na yava̍se'vi̱ṣyanya̱dā ma̱haḥ sa̱ṃvara̍ṇā̱dvyasthā̍t |
āda̍sya̱ vāto̱ anu̍ vāti śo̱ciradha̍ sma te̱ vraja̍naṃ kṛ̱ṣṇama̍sti
||2||udyasya̍ te̱ nava̍jātasya̱ vṛṣṇo'gne̱ cara̍ntya̱jarā̍ idhā̱nāḥ |
acchā̱ dyāma̍ru̱ṣo dhū̱ma e̍ti̱ saṃ dū̱to a̍gna̱ īya̍se̱ hi de̱vān
||3||vi yasya̍ te pṛthi̱vyāṃ pājo̱ aśre̍ttṛ̱ṣu yadannā̍ sa̱mavṛ̍kta̱ jambhai̍: |
sene̍va sṛ̱ṣṭā prasi̍tiṣṭa eti̱ yava̱ṃ na da̍sma ju̱hvā̍ vivekṣi
||4||tamiddo̱ṣā tamu̱ṣasi̱ yavi̍ṣṭhama̱gnimatya̱ṃ na ma̍rjayanta̱ nara̍: |
ni̱śiśā̍nā̱ ati̍thimasya̱ yonau̍ dī̱dāya̍ śo̱cirāhu̍tasya̱ vṛṣṇa̍:
||5||su̱sa̱ṃdṛkte̍ svanīka̱ pratī̍ka̱ṃ vi yadru̱kmo na roca̍sa upā̱ke |
di̱vo na te̍ tanya̱ture̍ti̱ śuṣma̍ści̱tro na sūra̱: prati̍ cakṣi bhā̱num
||6||yathā̍ va̱: svāhā̱gnaye̱ dāśe̍ma̱ parīl̤ā̍bhirghṛ̱tava̍dbhiśca ha̱vyaiḥ |
tebhi̍rno agne̱ ami̍tai̱rmaho̍bhiḥ śa̱taṃ pū̱rbhirāya̍sībhi̱rni pā̍hi
||7||yā vā̍ te̱ santi̍ dā̱śuṣe̱ adhṛ̍ṣṭā̱ giro̍ vā̱ yābhi̍rnṛ̱vatī̍ruru̱ṣyāḥ |
tābhi̍rnaḥ sūno sahaso̱ ni pā̍hi̱ smatsū̱rīñja̍ri̱tṝñjā̍tavedaḥ
||8||niryatpū̱teva̱ svadhi̍ti̱: śuci̱rgātsvayā̍ kṛ̱pā ta̱nvā̱3 roca̍mānaḥ |
ā yo mā̱troru̱śenyo̱ jani̍ṣṭa deva̱yajyā̍ya su̱kratu̍: pāva̱kaḥ
||9||e̱tā no̍ agne̱ saubha̍gā didī̱hyapi̱ kratu̍ṃ su̱ceta̍saṃ vatema |
viśvā̍ sto̱tṛbhyo̍ gṛṇa̱te ca̍ santu yū̱yaṃ pā̍ta sva̱stibhi̱: sadā̍ naḥ
||10||10 maitrāvaruṇirvasiṣṭha:|agni: | triṣṭup |
pra va̍: śu̱krāya̍ bhā̱nave̍ bharadhvaṃ ha̱vyaṃ ma̱tiṃ cā̱gnaye̱ supū̍tam |
yo daivyā̍ni̱ mānu̍ṣā ja̱nūṃṣya̱ntarviśvā̍ni vi̱dmanā̱ jigā̍ti
||1||sa gṛtso̍ a̱gnistaru̍ṇaścidastu̱ yato̱ yavi̍ṣṭho̱ aja̍niṣṭa mā̱tuḥ |
saṃ yo vanā̍ yu̱vate̱ śuci̍da̱nbhūri̍ ci̱dannā̱ samida̍tti sa̱dyaḥ
||2||a̱sya de̱vasya̍ sa̱ṃsadyanī̍ke̱ yaṃ martā̍saḥ śye̱taṃ ja̍gṛ̱bhre |
ni yo gṛbha̱ṃ pauru̍ṣeyīmu̱voca̍ du̱roka̍ma̱gnirā̱yave̍ śuśoca
||3||a̱yaṃ ka̱viraka̍viṣu̱ prace̍tā̱ marte̍ṣva̱gnira̱mṛto̱ ni dhā̍yi |
sa mā no̱ atra̍ juhuraḥ sahasva̱: sadā̱ tve su̱mana̍saḥ syāma
||4||ā yo yoni̍ṃ de̱vakṛ̍taṃ sa̱sāda̱ kratvā̱ hya1gnira̱mṛtā̱m̐ atā̍rīt |
tamoṣa̍dhīśca va̱nina̍śca̱ garbha̱ṃ bhūmi̍śca vi̱śvadhā̍yasaṃ bibharti
||5||īśe̱ hya1gnira̱mṛta̍sya̱ bhūre̱rīśe̍ rā̱yaḥ su̱vīrya̍sya̱ dāto̍: |
mā tvā̍ va̱yaṃ sa̍hasāvanna̱vīrā̱ māpsa̍va̱: pari̍ ṣadāma̱ mādu̍vaḥ
||6||pa̱ri̱ṣadya̱ṃ hyara̍ṇasya̱ rekṇo̱ nitya̍sya rā̱yaḥ pata̍yaḥ syāma |
na śeṣo̍ agne a̱nyajā̍tama̱styace̍tānasya̱ mā pa̱tho vi du̍kṣaḥ
||7||na̱hi grabhā̱yāra̍ṇaḥ su̱śevo̱'nyoda̍ryo̱ mana̍sā̱ manta̱vā u̍ |
adhā̍ ci̱doka̱: puna̱ritsa e̱tyā ''no̍ vā̱jya̍bhī̱ṣāl̤e̍tu̱ navya̍:
||8||tvama̍gne vanuṣya̱to ni pā̍hi̱ tvamu̍ naḥ sahasāvannava̱dyāt |
saṃ tvā̍ dhvasma̱nvada̱bhye̍tu̱ pātha̱: saṃ ra̱yiḥ spṛ̍ha̱yāyya̍: saha̱srī
||9||e̱tā no̍ agne̱ saubha̍gā didī̱hyapi̱ kratu̍ṃ su̱ceta̍saṃ vatema |
viśvā̍ sto̱tṛbhyo̍ gṛṇa̱te ca̍ santu yū̱yaṃ pā̍ta sva̱stibhi̱: sadā̍ naḥ
||10||9 maitrāvaruṇirvasiṣṭha:| vaiśvānaro'gni: | triṣṭup |
prāgnaye̍ ta̱vase̍ bharadhva̱ṃ gira̍ṃ di̱vo a̍ra̱taye̍ pṛthi̱vyāḥ |
yo viśve̍ṣāma̱mṛtā̍nāmu̱pasthe̍ vaiśvāna̱ro vā̍vṛ̱dhe jā̍gṛ̱vadbhi̍:
||1||pṛ̱ṣṭo di̱vi dhāyya̱gniḥ pṛ̍thi̱vyāṃ ne̱tā sindhū̍nāṃ vṛṣa̱bhaḥ stiyā̍nām |
sa mānu̍ṣīra̱bhi viśo̱ vi bhā̍ti vaiśvāna̱ro vā̍vṛdhā̱no vare̍ṇa
||2||tvadbhi̱yā viśa̍ āya̱nnasi̍knīrasama̱nā jaha̍tī̱rbhoja̍nāni |
vaiśvā̍nara pū̱rave̱ śośu̍cāna̱: puro̱ yada̍gne da̱raya̱nnadī̍deḥ
||3||tava̍ tri̱dhātu̍ pṛthi̱vī u̱ta dyaurvaiśvā̍nara vra̱tama̍gne sacanta |
tvaṃ bhā̱sā roda̍sī̱ ā ta̍ta̱nthāja̍sreṇa śo̱ciṣā̱ śośu̍cānaḥ
||4||tvāma̍gne ha̱rito̍ vāvaśā̱nā gira̍: sacante̱ dhuna̍yo ghṛ̱tācī̍: |
pati̍ṃ kṛṣṭī̱nāṃ ra̱thya̍ṃ rayī̱ṇāṃ vai̍śvāna̱ramu̱ṣasā̍ṃ ke̱tumahnā̍m
||5||tve a̍su̱ryaṃ1 vasa̍vo̱ nyṛ̍ṇva̱nkratu̱ṃ hi te̍ mitramaho ju̱ṣanta̍ |
tvaṃ dasyū̱m̐roka̍so agna āja u̱ru jyoti̍rja̱naya̱nnāryā̍ya
||6||sa jāya̍mānaḥ para̱me vyo̍manvā̱yurna pātha̱: pari̍ pāsi sa̱dyaḥ |
tvaṃ bhuva̍nā ja̱naya̍nna̱bhi kra̱nnapa̍tyāya jātavedo daśa̱syan
||7||tāma̍gne a̱sme iṣa̱mera̍yasva̱ vaiśvā̍nara dyu̱matī̍ṃ jātavedaḥ |
yayā̱ rādha̱: pinva̍si viśvavāra pṛ̱thu śravo̍ dā̱śuṣe̱ martyā̍ya
||8||taṃ no̍ agne ma̱ghava̍dbhyaḥ puru̱kṣuṃ ra̱yiṃ ni vāja̱ṃ śrutya̍ṃ yuvasva |
vaiśvā̍nara̱ mahi̍ na̱: śarma̍ yaccha ru̱drebhi̍ragne̱ vasu̍bhiḥ sa̱joṣā̍:
||9||7 maitrāvaruṇirvasiṣṭha:| vaiśvānaro'gni: | triṣṭup |
pra sa̱mrājo̱ asu̍rasya̱ praśa̍stiṃ pu̱ṃsaḥ kṛ̍ṣṭī̱nāma̍nu̱mādya̍sya |
indra̍syeva̱ pra ta̱vasa̍skṛ̱tāni̱ vande̍ dā̱ruṃ vanda̍māno vivakmi
||1||ka̱viṃ ke̱tuṃ dhā̱siṃ bhā̱numadre̍rhi̱nvanti̱ śaṃ rā̱jyaṃ roda̍syoḥ |
pu̱ra̱ṃda̱rasya̍ gī̱rbhirā vi̍vāse̱'gnervra̱tāni̍ pū̱rvyā ma̱hāni̍
||2||nya̍kra̱tūngra̱thino̍ mṛ̱dhravā̍caḥ pa̱ṇīm̐ra̍śra̱ddhām̐ a̍vṛ̱dhām̐ a̍ya̱jñān |
prapra̱ tāndasyū̍m̐ra̱gnirvi̍vāya̱ pūrva̍ścakā̱rāpa̍rā̱m̐ aya̍jyūn
||3||yo a̍pā̱cīne̱ tama̍si̱ mada̍ntī̱: prācī̍śca̱kāra̱ nṛta̍ma̱: śacī̍bhiḥ |
tamīśā̍na̱ṃ vasvo̍ a̱gniṃ gṛ̍ṇī̱ṣe'nā̍nataṃ da̱maya̍ntaṃ pṛta̱nyūn
||4||yo de̱hyo̱3 ana̍mayadvadha̱snairyo a̱ryapa̍tnīru̱ṣasa̍śca̱kāra̍ |
sa ni̱rudhyā̱ nahu̍ṣo ya̱hvo a̱gnirviśa̍ścakre bali̱hṛta̱: saho̍bhiḥ
||5||yasya̱ śarma̱nnupa̱ viśve̱ janā̍sa̱ evai̍sta̱sthuḥ su̍ma̱tiṃ bhikṣa̍māṇāḥ |
vai̱śvā̱na̱ro vara̱mā roda̍syo̱rāgniḥ sa̍sāda pi̱troru̱pastha̍m
||6||ā de̱vo da̍de bu̱dhnyā̱3 vasū̍ni vaiśvāna̱ra udi̍tā̱ sūrya̍sya |
ā sa̍mu̱drādava̍rā̱dā para̍smā̱dāgnirda̍de di̱va ā pṛ̍thi̱vyāḥ
||7||7 maitrāvaruṇirvasiṣṭha:| agni: | triṣṭup |
pra vo̍ de̱vaṃ ci̍tsahasā̱nama̱gnimaśva̱ṃ na vā̱jina̍ṃ hiṣe̱ namo̍bhiḥ |
bhavā̍ no dū̱to a̍dhva̱rasya̍ vi̱dvāntmanā̍ de̱veṣu̍ vivide mi̱tadru̍:
||1||ā yā̍hyagne pa̱thyā̱3 anu̱ svā ma̱ndro de̱vānā̍ṃ sa̱khyaṃ ju̍ṣā̱ṇaḥ |
ā sānu̱ śuṣmai̍rna̱daya̍npṛthi̱vyā jambhe̍bhi̱rviśva̍mu̱śadha̱gvanā̍ni
||2||prā̱cīno̍ ya̱jñaḥ sudhi̍ta̱ṃ hi ba̱rhiḥ prī̍ṇī̱te a̱gnirī̍l̤i̱to na hotā̍ |
ā mā̱tarā̍ vi̱śvavā̍re huvā̱no yato̍ yaviṣṭha jajñi̱ṣe su̱śeva̍:
||3||sa̱dyo a̍dhva̱re ra̍thi̱raṃ ja̍nanta̱ mānu̍ṣāso̱ vice̍taso̱ ya e̍ṣām |
vi̱śāma̍dhāyi vi̱śpati̍rduro̱ṇe̱3'gnirma̱ndro madhu̍vacā ṛ̱tāvā̍
||4||asā̍di vṛ̱to vahni̍rājaga̱nvāna̱gnirbra̱hmā nṛ̱ṣada̍ne vidha̱rtā |
dyauśca̱ yaṃ pṛ̍thi̱vī vā̍vṛ̱dhāte̱ ā yaṃ hotā̱ yaja̍ti vi̱śvavā̍ram
||5||e̱te dyu̱mnebhi̱rviśva̱māti̍ranta̱ mantra̱ṃ ye vāra̱ṃ naryā̱ ata̍kṣan |
pra ye viśa̍sti̱ranta̱ śroṣa̍māṇā̱ ā ye me̍ a̱sya dīdha̍yannṛ̱tasya̍
||6||nū tvāma̍gna īmahe̱ vasi̍ṣṭhā īśā̱naṃ sū̍no sahaso̱ vasū̍nām |
iṣa̍ṃ sto̱tṛbhyo̍ ma̱ghava̍dbhya ānaḍyū̱yaṃ pā̍ta sva̱stibhi̱: sadā̍ naḥ
||7||7 maitrāvaruṇirvasiṣṭha:| agni: | triṣṭup |
i̱ndhe rājā̱ sama̱ryo namo̍bhi̱ryasya̱ pratī̍ka̱māhu̍taṃ ghṛ̱tena̍ |
naro̍ ha̱vyebhi̍rīl̤ate sa̱bādha̱ āgniragra̍ u̱ṣasā̍maśoci
||1||a̱yamu̱ ṣya suma̍hām̐ avedi̱ hotā̍ ma̱ndro manu̍ṣo ya̱hvo a̱gniḥ |
vi bhā a̍kaḥ sasṛjā̱naḥ pṛ̍thi̱vyāṃ kṛ̱ṣṇapa̍vi̱roṣa̍dhībhirvavakṣe
||2||kayā̍ no agne̱ vi va̍saḥ suvṛ̱ktiṃ kāmu̍ sva̱dhāmṛ̍ṇavaḥ śa̱syamā̍naḥ |
ka̱dā bha̍vema̱ pata̍yaḥ sudatra rā̱yo va̱ntāro̍ du̱ṣṭara̍sya sā̱dhoḥ
||3||praprā̱yama̱gnirbha̍ra̱tasya̍ śṛṇve̱ vi yatsūryo̱ na roca̍te bṛ̱hadbhāḥ |
a̱bhi yaḥ pū̱ruṃ pṛta̍nāsu ta̱sthau dyu̍tā̱no daivyo̱ ati̍thiḥ śuśoca
||4||asa̱nnittve ā̱hava̍nāni̱ bhūri̱ bhuvo̱ viśve̍bhiḥ su̱manā̱ anī̍kaiḥ |
stu̱taści̍dagne śṛṇviṣe gṛṇā̱naḥ sva̱yaṃ va̍rdhasva ta̱nva̍ṃ sujāta
||5||i̱daṃ vaca̍: śata̱sāḥ saṃsa̍hasra̱muda̱gnaye̍ janiṣīṣṭa dvi̱barhā̍: |
śaṃ yatsto̱tṛbhya̍ ā̱paye̱ bhavā̍ti dyu̱mada̍mīva̱cāta̍naṃ rakṣo̱hā
||6||nū tvāma̍gna īmahe̱ vasi̍ṣṭhā īśā̱naṃ sū̍no sahaso̱ vasū̍nām |
iṣa̍ṃ sto̱tṛbhyo̍ ma̱ghava̍dbhya ānaḍyū̱yaṃ pā̍ta sva̱stibhi̱: sadā̍ naḥ
||7||6 maitrāvaruṇirvasiṣṭha:| agni: | triṣṭup |
abo̍dhi jā̱ra u̱ṣasā̍mu̱pasthā̱ddhotā̍ ma̱ndraḥ ka̱vita̍maḥ pāva̱kaḥ |
dadhā̍ti ke̱tumu̱bhaya̍sya ja̱ntorha̱vyā de̱veṣu̱ dravi̍ṇaṃ su̱kṛtsu̍
||1||sa su̱kratu̱ryo vi dura̍: paṇī̱nāṃ pu̍nā̱no a̱rkaṃ pu̍ru̱bhoja̍saṃ naḥ |
hotā̍ ma̱ndro vi̱śāṃ damū̍nāsti̱rastamo̍ dadṛśe rā̱myāṇā̍m
||2||amū̍raḥ ka̱viradi̍tirvi̱vasvā̍ntsusa̱ṃsanmi̱tro ati̍thiḥ śi̱vo na̍: |
ci̱trabhā̍nuru̱ṣasā̍ṃ bhā̱tyagre̱'pāṃ garbha̍: pra̱sva1 ā vi̍veśa
||3||ī̱l̤enyo̍ vo̱ manu̍ṣo yu̱geṣu̍ samana̱gā a̍śucajjā̱tave̍dāḥ |
su̱sa̱ṃdṛśā̍ bhā̱nunā̱ yo vi̱bhāti̱ prati̱ gāva̍: samidhā̱naṃ bu̍dhanta
||4||agne̍ yā̱hi dū̱tyaṃ1 mā ri̍ṣaṇyo de̱vām̐ acchā̍ brahma̱kṛtā̍ ga̱ṇena̍ |
sara̍svatīṃ ma̱ruto̍ a̱śvinā̱po yakṣi̍ de̱vānra̍tna̱dheyā̍ya̱ viśvā̍n
||5||tvāma̍gne samidhā̱no vasi̍ṣṭho̱ jarū̍thaṃ ha̱nyakṣi̍ rā̱ye pura̍ṃdhim |
pu̱ru̱ṇī̱thā jā̍tavedo jarasva yū̱yaṃ pā̍ta sva̱stibhi̱: sadā̍ naḥ
||6||5 | maitrāvaruṇirvasiṣṭha:| agni: | triṣṭup
u̱ṣo na jā̱raḥ pṛ̱thu pājo̍ aśre̱ddavi̍dyuta̱ddīdya̱cchośu̍cānaḥ |
vṛṣā̱ hari̱: śuci̱rā bhā̍ti bhā̱sā dhiyo̍ hinvā̱na u̍śa̱tīra̍jīgaḥ
||1||sva1rṇa vasto̍ru̱ṣasā̍maroci ya̱jñaṃ ta̍nvā̱nā u̱śijo̱ na manma̍ |
a̱gnirjanmā̍ni de̱va ā vi vi̱dvāndra̱vaddū̱to de̍va̱yāvā̱ vani̍ṣṭhaḥ
||2||acchā̱ giro̍ ma̱tayo̍ deva̱yantī̍ra̱gniṃ ya̍nti̱ dravi̍ṇa̱ṃ bhikṣa̍māṇāḥ |
su̱sa̱ṃdṛśa̍ṃ su̱pratī̍ka̱ṃ svañca̍ṃ havya̱vāha̍mara̱tiṃ mānu̍ṣāṇām
||3||indra̍ṃ no agne̱ vasu̍bhiḥ sa̱joṣā̍ ru̱draṃ ru̱drebhi̱rā va̍hā bṛ̱hanta̍m |
ā̱di̱tyebhi̱radi̍tiṃ vi̱śvaja̍nyā̱ṃ bṛha̱spati̱mṛkva̍bhirvi̱śvavā̍ram
||4||ma̱ndraṃ hotā̍ramu̱śijo̱ yavi̍ṣṭhama̱gniṃ viśa̍ īl̤ate adhva̱reṣu̍ |
sa hi kṣapā̍vā̱m̐ abha̍vadrayī̱ṇāmata̍ndro dū̱to ya̱jathā̍ya de̱vān
||5||5 maitrāvaruṇirvasiṣṭha:| agni: | triṣṭup |
ma̱hām̐ a̍syadhva̱rasya̍ prake̱to na ṛ̱te tvada̱mṛtā̍ mādayante |
ā viśve̍bhiḥ sa̱ratha̍ṃ yāhi de̱vairnya̍gne̱ hotā̍ pratha̱maḥ sa̍de̱ha
||1||tvāmī̍l̤ate aji̱raṃ dū̱tyā̍ya ha̱viṣma̍nta̱: sada̱minmānu̍ṣāsaḥ |
yasya̍ de̱vairāsa̍do ba̱rhira̱gne'hā̍nyasmai su̱dinā̍ bhavanti
||2||triści̍da̱ktoḥ pra ci̍kitu̱rvasū̍ni̱ tve a̱ntardā̱śuṣe̱ martyā̍ya |
ma̱nu̱ṣvada̍gna i̱ha ya̍kṣi de̱vānbhavā̍ no dū̱to a̍bhiśasti̱pāvā̍
||3||a̱gnirī̍śe bṛha̱to a̍dhva̱rasyā̱'gnirviśva̍sya ha̱viṣa̍: kṛ̱tasya̍ |
kratu̱ṃ hya̍sya̱ vasa̍vo ju̱ṣantā'thā̍ de̱vā da̍dhire havya̱vāha̍m
||4||āgne̍ vaha havi̱radyā̍ya de̱vānindra̍jyeṣṭhāsa i̱ha mā̍dayantām |
i̱maṃ ya̱jñaṃ di̱vi de̱veṣu̍ dhehi yū̱yaṃ pā̍ta sva̱stibhi̱: sadā̍ naḥ
||5||3 maitrāvaruṇirvasiṣṭha:| agni: | triṣṭup |
aga̍nma ma̱hā nama̍sā̱ yavi̍ṣṭha̱ṃ yo dī̱dāya̱ sami̍ddha̱: sve du̍ro̱ṇe |
ci̱trabhā̍nu̱ṃ roda̍sī a̱ntaru̱rvī svā̍hutaṃ vi̱śvata̍: pra̱tyañca̍m
||1||sa ma̱hnā viśvā̍ duri̱tāni̍ sā̱hvāna̱gniḥ ṣṭa̍ve̱ dama̱ ā jā̱tave̍dāḥ |
sa no̍ rakṣiṣadduri̱tāda̍va̱dyāda̱smāngṛ̍ṇa̱ta u̱ta no̍ ma̱ghona̍:
||2||tvaṃ varu̍ṇa u̱ta mi̱tro a̍gne̱ tvāṃ va̍rdhanti ma̱tibhi̱rvasi̍ṣṭhāḥ |
tve vasu̍ suṣaṇa̱nāni̍ santu yū̱yaṃ pā̍ta sva̱stibhi̱: sadā̍ naḥ
||3||3 maitrāvaruṇirvasiṣṭha:|vaiśvānaro'gni:| triṣṭup|
prāgnaye̍ viśva̱śuce̍ dhiya̱ṃdhe̍'sura̱ghne manma̍ dhī̱tiṃ bha̍radhvam |
bhare̍ ha̱virna ba̱rhiṣi̍ prīṇā̱no vai̍śvāna̱rāya̱ yata̍ye matī̱nām
||1||tvama̍gne śo̱ciṣā̱ śośu̍cāna̱ ā roda̍sī apṛṇā̱ jāya̍mānaḥ |
tvaṃ de̱vām̐ a̱bhiśa̍steramuñco̱ vaiśvā̍nara jātavedo mahi̱tvā
||2||jā̱to yada̍gne̱ bhuva̍nā̱ vyakhya̍: pa̱śūnna go̱pā irya̱: pari̍jmā |
vaiśvā̍nara̱ brahma̍ṇe vinda gā̱tuṃ yū̱yaṃ pā̍ta sva̱stibhi̱: sadā̍ naḥ
||3||3 maitrāvaruṇirvasiṣṭha:| agni: | triṣṭup , 1 bṛhatī |
sa̱midhā̍ jā̱tave̍dase de̱vāya̍ de̱vahū̍tibhiḥ |
ha̱virbhi̍: śu̱kraśo̍ciṣe nama̱svino̍ va̱yaṃ dā̍śemā̱gnaye̍
||1||va̱yaṃ te̍ agne sa̱midhā̍ vidhema va̱yaṃ dā̍śema suṣṭu̱tī ya̍jatra |
va̱yaṃ ghṛ̱tenā̍dhvarasya hotarva̱yaṃ de̍va ha̱viṣā̍ bhadraśoce
||2||ā no̍ de̱vebhi̱rupa̍ de̱vahū̍ti̱magne̍ yā̱hi vaṣa̍ṭkṛtiṃ juṣā̱ṇaḥ |
tubhya̍ṃ de̱vāya̱ dāśa̍taḥ syāma yū̱yaṃ pā̍ta sva̱stibhi̱: sadā̍ naḥ
||3||15 maitrāvaruṇirvasiṣṭha:| agni: |gāyatrī |
u̱pa̱sadyā̍ya mī̱l̤huṣa̍ ā̱sye̍ juhutā ha̱viḥ | yo no̱ nedi̍ṣṭha̱māpya̍m
||1||yaḥ pañca̍ carṣa̱ṇīra̱bhi ni̍ṣa̱sāda̱ dame̍dame | ka̱virgṛ̱hapa̍ti̱ryuvā̍
||2||sa no̱ vedo̍ a̱mātya̍ma̱gnī ra̍kṣatu vi̱śvata̍: | u̱tāsmānpā̱tvaṃha̍saḥ
||3||nava̱ṃ nu stoma̍ma̱gnaye̍ di̱vaḥ śye̱nāya̍ jījanam | vasva̍: ku̱vidva̱nāti̍ naḥ
||4||spā̱rhā yasya̱ śriyo̍ dṛ̱śe ra̱yirvī̱rava̍to yathā | agre̍ ya̱jñasya̱ śoca̍taḥ
||5||semāṃ ve̍tu̱ vaṣa̍ṭkṛtima̱gnirju̍ṣata no̱ gira̍: | yaji̍ṣṭho havya̱vāha̍naḥ
||6||ni tvā̍ nakṣya viśpate dyu̱manta̍ṃ deva dhīmahi | su̱vīra̍magna āhuta
||7||kṣapa̍ u̱sraśca̍ dīdihi sva̱gnaya̱stvayā̍ va̱yam | su̱vīra̱stvama̍sma̱yuḥ
||8||upa̍ tvā sā̱taye̱ naro̱ viprā̍so yanti dhī̱tibhi̍: | upākṣa̍rā saha̱sriṇī̍
||9||a̱gnī rakṣā̍ṃsi sedhati śu̱kraśo̍ci̱rama̍rtyaḥ | śuci̍: pāva̱ka īḍya̍:
||10||sa no̱ rādhā̱ṃsyā bha̱reśā̍naḥ sahaso yaho | bhaga̍śca dātu̱ vārya̍m
||11||tvama̍gne vī̱rava̱dyaśo̍ de̱vaśca̍ savi̱tā bhaga̍: | diti̍śca dāti̱ vārya̍m
||12||agne̱ rakṣā̍ ṇo̱ aṃha̍sa̱: prati̍ ṣma deva̱ rīṣa̍taḥ | tapi̍ṣṭhaira̱jaro̍ daha
||13||adhā̍ ma̱hī na̱ āya̱syanā̍dhṛṣṭo̱ nṛpī̍taye | pūrbha̍vā śa̱tabhu̍jiḥ
||14||tvaṃ na̍: pā̱hyaṃha̍so̱ doṣā̍vastaraghāya̱taḥ | divā̱ nakta̍madābhya
||15||12 maitrāvaruṇirvasiṣṭha:| agni: | pragātha: (=viṣamā bṛhatī , samā satobṛhatī ) |
e̱nā vo̍ a̱gniṃ nama̍so̱rjo napā̍ta̱mā hu̍ve | pri̱yaṃ ceti̍ṣṭhamara̱tiṃ sva̍dhva̱raṃ viśva̍sya dū̱tama̱mṛta̍m
||1||sa yo̍jate aru̱ṣā vi̱śvabho̍jasā̱ sa du̍drava̱tsvā̍hutaḥ |
su̱brahmā̍ ya̱jñaḥ su̱śamī̱ vasū̍nāṃ de̱vaṃ rādho̱ janā̍nām
||2||uda̍sya śo̱cira̍sthādā̱juhvā̍nasya mī̱l̤huṣa̍: |
uddhū̱māso̍ aru̱ṣāso̍ divi̱spṛśa̱: sama̱gnimi̍ndhate̱ nara̍:
||3||taṃ tvā̍ dū̱taṃ kṛ̍ṇmahe ya̱śasta̍maṃ de̱vām̐ ā vī̱taye̍ vaha |
viśvā̍ sūno sahaso marta̱bhoja̍nā̱ rāsva̱ tadyattvema̍he
||4||tvama̍gne gṛ̱hapa̍ti̱stvaṃ hotā̍ no adhva̱re | tvaṃ potā̍ viśvavāra̱ prace̍tā̱ yakṣi̱ veṣi̍ ca̱ vārya̍m
||5||kṛ̱dhi ratna̱ṃ yaja̍mānāya sukrato̱ tvaṃ hi ra̍tna̱dhā asi̍ |
ā na̍ ṛ̱te śi̍śīhi̱ viśva̍mṛ̱tvija̍ṃ su̱śaṃso̱ yaśca̱ dakṣa̍te
||6||tve a̍gne svāhuta pri̱yāsa̍: santu sū̱raya̍: | ya̱ntāro̱ ye ma̱ghavā̍no̱ janā̍nāmū̱rvāndaya̍nta̱ gonā̍m
||7||yeṣā̱mil̤ā̍ ghṛ̱taha̍stā duro̱ṇa ām̐ api̍ prā̱tā ni̱ṣīda̍ti |
tām̐strā̍yasva sahasya dru̱ho ni̱do yacchā̍ na̱: śarma̍ dīrgha̱śrut
||8||sa ma̱ndrayā̍ ca ji̱hvayā̱ vahni̍rā̱sā vi̱duṣṭa̍raḥ | agne̍ ra̱yiṃ ma̱ghava̍dbhyo na̱ ā va̍ha ha̱vyadā̍tiṃ ca sūdaya
||9||ye rādhā̍ṃsi̱ dada̱tyaśvyā̍ ma̱ghā kāme̍na̱ śrava̍so ma̱haḥ | tām̐ aṃha̍saḥ pipṛhi pa̱rtṛbhi̱ṣṭvaṃ śa̱taṃ pū̱rbhirya̍viṣṭhya
||10||de̱vo vo̍ draviṇo̱dāḥ pū̱rṇāṃ vi̍vaṣṭyā̱sica̍m | udvā̍ si̱ñcadhva̱mupa̍ vā pṛṇadhva̱mādidvo̍ de̱va o̍hate
||11||taṃ hotā̍ramadhva̱rasya̱ prace̍tasa̱ṃ vahni̍ṃ de̱vā a̍kṛṇvata | dadhā̍ti̱ ratna̍ṃ vidha̱te su̱vīrya̍ma̱gnirjanā̍ya dā̱śuṣe̍
||12||7 maitrāvaruṇirvasiṣṭha:| agni:| dvipadā triṣṭup|
agne̱ bhava̍ suṣa̱midhā̱ sami̍ddha u̱ta ba̱rhiru̍rvi̱yā vi stṛ̍ṇītām 1
u̱ta dvāra̍ uśa̱tīrvi śra̍yantāmu̱ta de̱vām̐ u̍śa̱ta ā va̍he̱ha
||1||2
agne̍ vī̱hi ha̱viṣā̱ yakṣi̍ de̱vāntsva̍dhva̱rā kṛ̍ṇuhi jātavedaḥ 3
sva̱dhva̱rā ka̍rati jā̱tave̍dā̱ yakṣa̍dde̱vām̐ a̱mṛtā̍npi̱praya̍cca
||2||4
vaṃsva̱ viśvā̱ vāryā̍ṇi pracetaḥ sa̱tyā bha̍vantvā̱śiṣo̍ no a̱dya 5
tvāmu̱ te da̍dhire havya̱vāha̍ṃ de̱vāso̍ agna ū̱rja ā napā̍tam
||3||6
te te̍ de̱vāya̱ dāśa̍taḥ syāma ma̱ho no̱ ratnā̱ vi da̍dha iyā̱naḥ
||4||25 maitrāvaruṇirvasiṣṭha:| indra:, 22-25 sudā: paijavana: | triṣṭup |
tve ha̱ yatpi̱tara̍ścinna indra̱ viśvā̍ vā̱mā ja̍ri̱tāro̱ asa̍nvan |
tve gāva̍: su̱dughā̱stve hyaśvā̱stvaṃ vasu̍ devaya̱te vani̍ṣṭhaḥ
||1||rāje̍va̱ hi jani̍bhi̱: kṣeṣye̱vā'va̱ dyubhi̍ra̱bhi vi̱duṣka̱viḥ san |
pi̱śā giro̍ maghava̱ngobhi̱raśvai̍stvāya̱taḥ śi̍śīhi rā̱ye a̱smān
||2||i̱mā u̍ tvā paspṛdhā̱nāso̱ atra̍ ma̱ndrā giro̍ deva̱yantī̱rupa̍ sthuḥ |
a̱rvācī̍ te pa̱thyā̍ rā̱ya e̍tu̱ syāma̍ te suma̱tāvi̍ndra̱ śarma̍n
||3||dhe̱nuṃ na tvā̍ sū̱yava̍se̱ dudu̍kṣa̱nnupa̱ brahmā̍ṇi sasṛje̱ vasi̍ṣṭhaḥ |
tvāminme̱ gopa̍ti̱ṃ viśva̍ ā̱hā ''na̱ indra̍: suma̱tiṃ ga̱ntvaccha̍
||4||arṇā̍ṃsi citpaprathā̱nā su̱dāsa̱ indro̍ gā̱dhānya̍kṛṇotsupā̱rā |
śardha̍ntaṃ śi̱myumu̱catha̍sya̱ navya̱: śāpa̱ṃ sindhū̍nāmakṛṇo̱daśa̍stīḥ
||5||pu̱ro̱l̤ā ittu̱rvaśo̱ yakṣu̍rāsīdrā̱ye matsyā̍so̱ niśi̍tā̱ apī̍va |
śru̱ṣṭiṃ ca̍kru̱rbhṛga̍vo dru̱hyava̍śca̱ sakhā̱ sakhā̍yamatara̱dviṣū̍coḥ
||6||ā pa̱kthāso̍ bhalā̱naso̍ bhana̱ntā'li̍nāso viṣā̱ṇina̍: śi̱vāsa̍: |
ā yo'na̍yatsadha̱mā ārya̍sya ga̱vyā tṛtsu̍bhyo ajaganyu̱dhā nṝn
||7||du̱rā̱dhyo̱3 adi̍tiṃ sre̱vaya̍nto'ce̱taso̱ vi ja̍gṛbhre̱ paru̍ṣṇīm |
ma̱hnāvi̍vyakpṛthi̱vīṃ patya̍mānaḥ pa̱śuṣka̱vira̍śaya̱ccāya̍mānaḥ
||8||ī̱yurartha̱ṃ na nya̱rthaṃ paru̍ṣṇīmā̱śuśca̱neda̍bhipi̱tvaṃ ja̍gāma |
su̱dāsa̱ indra̍: su̱tukā̍m̐ a̱mitrā̱nara̍ndhaya̱nmānu̍ṣe̱ vadhri̍vācaḥ
||9||ī̱yurgāvo̱ na yava̍sā̱dago̍pā yathākṛ̱tama̱bhi mi̱traṃ ci̱tāsa̍: |
pṛśni̍gāva̱: pṛśni̍nipreṣitāsaḥ śru̱ṣṭiṃ ca̍krurni̱yuto̱ ranta̍yaśca
||10||eka̍ṃ ca̱ yo vi̍ṃśa̱tiṃ ca̍ śrava̱syā vai̍ka̱rṇayo̱rjanā̱nrājā̱ nyasta̍: |
da̱smo na sadma̱nni śi̍śāti ba̱rhiḥ śūra̱: sarga̍makṛṇo̱dindra̍ eṣām
||11||adha̍ śru̱taṃ ka̱vaṣa̍ṃ vṛ̱ddhama̱psvanu̍ dru̱hyuṃ ni vṛ̍ṇa̱gvajra̍bāhuḥ |
vṛ̱ṇā̱nā atra̍ sa̱khyāya̍ sa̱khyaṃ tvā̱yanto̱ ye ama̍da̱nnanu̍ tvā
||12||vi sa̱dyo viśvā̍ dṛṃhi̱tānye̍ṣā̱mindra̱: pura̱: saha̍sā sa̱pta da̍rdaḥ |
vyāna̍vasya̱ tṛtsa̍ve̱ gaya̍ṃ bhā̱gjeṣma̍ pū̱ruṃ vi̱dathe̍ mṛ̱dhravā̍cam
||13||ni ga̱vyavo'na̍vo dru̱hyava̍śca ṣa̱ṣṭiḥ śa̱tā su̍ṣupu̱: ṣaṭ sa̱hasrā̍ |
ṣa̱ṣṭirvī̱rāso̱ adhi̱ ṣaḍdu̍vo̱yu viśvedindra̍sya vī̱ryā̍ kṛ̱tāni̍
||14||indre̍ṇai̱te tṛtsa̍vo̱ vevi̍ṣāṇā̱ āpo̱ na sṛ̱ṣṭā a̍dhavanta̱ nīcī̍: |
du̱rmi̱trāsa̍: prakala̱vinmimā̍nā ja̱hurviśvā̍ni̱ bhoja̍nā su̱dāse̍
||15||a̱rdhaṃ vī̱rasya̍ śṛta̱pāma̍ni̱ndraṃ parā̱ śardha̍ntaṃ nunude a̱bhi kṣām |
indro̍ ma̱nyuṃ ma̍nyu̱myo̍ mimāya bhe̱je pa̱tho va̍rta̱niṃ patya̍mānaḥ
||16||ā̱dhreṇa̍ ci̱ttadveka̍ṃ cakāra si̱ṃhya̍ṃ ci̱tpetve̍nā jaghāna |
ava̍ sra̱ktīrve̱śyā̍vṛśca̱dindra̱: prāya̍ccha̱dviśvā̱ bhoja̍nā su̱dāse̍
||17||śaśva̍nto̱ hi śatra̍vo rāra̱dhuṣṭe̍ bhe̱dasya̍ ci̱cchardha̍to vinda̱ randhi̍m |
martā̱m̐ ena̍: stuva̱to yaḥ kṛ̱ṇoti̍ ti̱gmaṃ tasmi̱nni ja̍hi̱ vajra̍mindra
||18||āva̱dindra̍ṃ ya̱munā̱ tṛtsa̍vaśca̱ prātra̍ bhe̱daṃ sa̱rvatā̍tā muṣāyat |
a̱jāsa̍śca̱ śigra̍vo̱ yakṣa̍vaśca ba̱liṃ śī̱rṣāṇi̍ jabhru̱raśvyā̍ni
||19||na ta̍ indra suma̱tayo̱ na rāya̍: sa̱ṃcakṣe̱ pūrvā̍ u̱ṣaso̱ na nūtnā̍: |
deva̍kaṃ cinmānyamā̱naṃ ja̍gha̱nthā'va̱ tmanā̍ bṛha̱taḥ śamba̍raṃ bhet
||20||pra ye gṛ̱hādama̍madustvā̱yā pa̍rāśa̱raḥ śa̱tayā̍tu̱rvasi̍ṣṭhaḥ |
na te̍ bho̱jasya̍ sa̱khyaṃ mṛ̍ṣa̱ntā'dhā̍ sū̱ribhya̍: su̱dinā̱ vyu̍cchān
||21||dve naptu̍rde̱vava̍taḥ śa̱te gordvā rathā̍ va̱dhūma̍ntā su̱dāsa̍: |
arha̍nnagne paijava̱nasya̱ dāna̱ṃ hote̍va̱ sadma̱ parye̍mi̱ rebha̍n
||22||ca̱tvāro̍ mā paijava̱nasya̱ dānā̱: smaddi̍ṣṭayaḥ kṛśa̱nino̍ nire̱ke |
ṛ̱jrāso̍ mā pṛthivi̱ṣṭhāḥ su̱dāsa̍sto̱kaṃ to̱kāya̱ śrava̍se vahanti
||23||yasya̱ śravo̱ roda̍sī a̱ntaru̱rvī śī̱rṣṇeśī̍rṣṇe viba̱bhājā̍ vibha̱ktā |
sa̱ptedindra̱ṃ na sra̱vato̍ gṛṇanti̱ ni yu̍dhyāma̱dhima̍śiśāda̱bhīke̍
||24||i̱maṃ na̍ro marutaḥ saśca̱tānu̱ divo̍dāsa̱ṃ na pi̱tara̍ṃ su̱dāsa̍: |
a̱vi̱ṣṭanā̍ paijava̱nasya̱ keta̍ṃ dū̱ṇāśa̍ṃ kṣa̱trama̱jara̍ṃ duvo̱yu
||25||11 maitrāvaruṇirvasiṣṭha:| indra: | triṣṭup |
yasti̱gmaśṛ̍ṅgo vṛṣa̱bho na bhī̱ma eka̍: kṛ̱ṣṭīścyā̱vaya̍ti̱ pra viśvā̍: |
yaḥ śaśva̍to̱ adā̍śuṣo̱ gaya̍sya praya̱ntāsi̱ suṣvi̍tarāya̱ veda̍:
||1||tvaṃ ha̱ tyadi̍ndra̱ kutsa̍māva̱: śuśrū̍ṣamāṇasta̱nvā̍ sama̱rye |
dāsa̱ṃ yacchuṣṇa̱ṃ kuya̍va̱ṃ nya̍smā̱ ara̍ndhaya ārjune̱yāya̱ śikṣa̍n
||2||tvaṃ dhṛ̍ṣṇo dhṛṣa̱tā vī̱taha̍vya̱ṃ prāvo̱ viśvā̍bhirū̱tibhi̍: su̱dāsa̍m |
pra pauru̍kutsiṃ tra̱sada̍syumāva̱: kṣetra̍sātā vṛtra̱hatye̍ṣu pū̱rum
||3||tvaṃ nṛbhi̍rnṛmaṇo de̱vavī̍tau̱ bhūrī̍ṇi vṛ̱trā ha̍ryaśva haṃsi |
tvaṃ ni dasyu̱ṃ cumu̍ri̱ṃ dhuni̱ṃ cā'svā̍payo da̱bhīta̍ye su̱hantu̍
||4||tava̍ cyau̱tnāni̍ vajrahasta̱ tāni̱ nava̱ yatpuro̍ nava̱tiṃ ca̍ sa̱dyaḥ |
ni̱veśa̍ne śatata̱māvi̍veṣī̱raha̍ñca vṛ̱traṃ namu̍cimu̱tāha̍n
||5||sanā̱ tā ta̍ indra̱ bhoja̍nāni rā̱taha̍vyāya dā̱śuṣe̍ su̱dāse̍ |
vṛṣṇe̍ te̱ harī̱ vṛṣa̍ṇā yunajmi̱ vyantu̱ brahmā̍ṇi puruśāka̱ vāja̍m
||6||mā te̍ a̱syāṃ sa̍hasāva̱npari̍ṣṭāva̱ghāya̍ bhūma harivaḥ parā̱dai |
trāya̍sva no'vṛ̱kebhi̱rvarū̍thai̱stava̍ pri̱yāsa̍: sū̱riṣu̍ syāma
||7||pri̱yāsa̱ itte̍ maghavanna̱bhiṣṭau̱ naro̍ madema śara̱ṇe sakhā̍yaḥ |
ni tu̱rvaśa̱ṃ ni yādva̍ṃ śiśīhyatithi̱gvāya̱ śaṃsya̍ṃ kari̱ṣyan
||8||sa̱dyaści̱nnu te ma̍ghavanna̱bhiṣṭau̱ nara̍: śaṃsantyuktha̱śāsa̍ u̱kthā |
ye te̱ have̍bhi̱rvi pa̱ṇīm̐radā̍śanna̱smānvṛ̍ṇīṣva̱ yujyā̍ya̱ tasmai̍
||9||e̱te stomā̍ na̱rāṃ nṛ̍tama̱ tubhya̍masma̱drya̍ñco̱ dada̍to ma̱ghāni̍ |
teṣā̍mindra vṛtra̱hatye̍ śi̱vo bhū̱: sakhā̍ ca̱ śūro̍'vi̱tā ca̍ nṛ̱ṇām
||10||nū i̍ndra śūra̱ stava̍māna ū̱tī brahma̍jūtasta̱nvā̍ vāvṛdhasva |
upa̍ no̱ vājā̍nmimī̱hyupa̱ stīnyū̱yaṃ pā̍ta sva̱stibhi̱: sadā̍ naḥ
||11||10 maitrāvaruṇirvasiṣṭha:| indra: | triṣṭup |
u̱gro ja̍jñe vī̱ryā̍ya sva̱dhāvā̱ñcakri̱rapo̱ naryo̱ yatka̍ri̱ṣyan |
jagmi̱ryuvā̍ nṛ̱ṣada̍na̱mavo̍bhistrā̱tā na̱ indra̱ ena̍so ma̱haści̍t
||1||hantā̍ vṛ̱tramindra̱: śūśu̍vāna̱: prāvī̱nnu vī̱ro ja̍ri̱tāra̍mū̱tī |
kartā̍ su̱dāse̱ aha̱ vā u̍ lo̱kaṃ dātā̱ vasu̱ muhu̱rā dā̱śuṣe̍ bhūt
||2||yu̱dhmo a̍na̱rvā kha̍ja̱kṛtsa̱madvā̱ śūra̍: satrā̱ṣāḍja̱nuṣe̱maṣā̍l̤haḥ |
vyā̍sa̱ indra̱: pṛta̍nā̱: svojā̱ adhā̱ viśva̍ṃ śatrū̱yanta̍ṃ jaghāna
||3||u̱bhe ci̍dindra̱ roda̍sī mahi̱tvā ''pa̍prātha̱ tavi̍ṣībhistuviṣmaḥ |
ni vajra̱mindro̱ hari̍vā̱nmimi̍kṣa̱ntsamandha̍sā̱ made̍ṣu̱ vā u̍voca
||4||vṛṣā̍ jajāna̱ vṛṣa̍ṇa̱ṃ raṇā̍ya̱ tamu̍ ci̱nnārī̱ narya̍ṃ sasūva |
pra yaḥ se̍nā̱nīradha̱ nṛbhyo̱ astī̱naḥ satvā̍ ga̱veṣa̍ṇa̱: sa dhṛ̱ṣṇuḥ
||5||nū ci̱tsa bhre̍ṣate̱ jano̱ na re̍ṣa̱nmano̱ yo a̍sya gho̱ramā̱vivā̍sāt |
ya̱jñairya indre̱ dadha̍te̱ duvā̍ṃsi̱ kṣaya̱tsa rā̱ya ṛ̍ta̱pā ṛ̍te̱jāḥ
||6||yadi̍ndra̱ pūrvo̱ apa̍rāya̱ śikṣa̱nnaya̱jjyāyā̱nkanī̍yaso de̱ṣṇam |
a̱mṛta̱ itparyā̍sīta dū̱ramā ci̍tra̱ citrya̍ṃ bharā ra̱yiṃ na̍:
||7||yasta̍ indra pri̱yo jano̱ dadā̍śa̱dasa̍nnire̱ke a̍driva̱: sakhā̍ te |
va̱yaṃ te̍ a̱syāṃ su̍ma̱tau cani̍ṣṭhā̱: syāma̱ varū̍the̱ aghna̍to̱ nṛpī̍tau
||8||e̱ṣa stomo̍ acikrada̱dvṛṣā̍ ta u̱ta stā̱murma̍ghavannakrapiṣṭa |
rā̱yaskāmo̍ jari̱tāra̍ṃ ta̱ āga̱ntvama̱ṅga śa̍kra̱ vasva̱ ā śa̍ko naḥ
||9||sa na̍ indra̱ tvaya̍tāyā i̱ṣe dhā̱stmanā̍ ca̱ ye ma̱ghavā̍no ju̱nanti̍ |
vasvī̱ ṣu te̍ jari̱tre a̍stu śa̱ktiryū̱yaṃ pā̍ta sva̱stibhi̱: sadā̍ naḥ
||10||10 maitrāvaruṇirvasiṣṭha:| indra: | triṣṭup |
asā̍vi de̱vaṃ goṛ̍jīka̱mandho̱ nya̍smi̱nnindro̍ ja̱nuṣe̍muvoca |
bodhā̍masi tvā haryaśva ya̱jñairbodhā̍ na̱: stoma̱mandha̍so̱ made̍ṣu
||1||pra ya̍nti ya̱jñaṃ vi̱paya̍nti ba̱rhiḥ so̍ma̱mādo̍ vi̱dathe̍ du̱dhravā̍caḥ |
nyu̍ bhriyante ya̱śaso̍ gṛ̱bhādā dū̱rau̍pabdo̱ vṛṣa̍ṇo nṛ̱ṣāca̍:
||2||tvami̍ndra̱ sravi̍ta̱vā a̱paska̱: pari̍ṣṭhitā̱ ahi̍nā śūra pū̱rvīḥ |
tvadvā̍vakre ra̱thyo̱3 na dhenā̱ reja̍nte̱ viśvā̍ kṛ̱trimā̍ṇi bhī̱ṣā
||3||bhī̱mo vi̍ve̱ṣāyu̍dhebhireṣā̱mapā̍ṃsi̱ viśvā̱ naryā̍ṇi vi̱dvān |
indra̱: puro̱ jarhṛ̍ṣāṇo̱ vi dū̍dho̱dvi vajra̍hasto mahi̱nā ja̍ghāna
||4||na yā̱tava̍ indra jūjuvurno̱ na vanda̍nā śaviṣṭha ve̱dyābhi̍: |
sa śa̍rdhada̱ryo viṣu̍ṇasya ja̱ntormā śi̱śnade̍vā̱ api̍ guṝ̱taṃ na̍:
||5||a̱bhi kratve̍ndra bhū̱radha̱ jmanna te̍ vivyaṅmahi̱māna̱ṃ rajā̍ṃsi |
svenā̱ hi vṛ̱traṃ śava̍sā ja̱ghantha̱ na śatru̱ranta̍ṃ vividadyu̱dhā te̍
||6||de̱vāści̍tte asu̱ryā̍ya̱ pūrve'nu̍ kṣa̱trāya̍ mamire̱ sahā̍ṃsi |
indro̍ ma̱ghāni̍ dayate vi̱ṣahyendra̱ṃ vāja̍sya johuvanta sā̱tau
||7||kī̱riści̱ddhi tvāmava̍se ju̱hāveśā̍namindra̱ saubha̍gasya̱ bhūre̍: |
avo̍ babhūtha śatamūte a̱sme a̍bhikṣa̱ttustvāva̍to varū̱tā
||8||sakhā̍yasta indra vi̱śvaha̍ syāma namovṛ̱dhāso̍ mahi̱nā ta̍rutra |
va̱nvantu̍ smā̱ te'va̍sā samī̱ke̱3'bhī̍tima̱ryo va̱nuṣā̱ṃ śavā̍ṃsi
||9||sa na̍ indra̱ tvaya̍tāyā i̱ṣe dhā̱stmanā̍ ca̱ ye ma̱ghavā̍no ju̱nanti̍ |
vasvī̱ ṣu te̍ jari̱tre a̍stu śa̱ktiryū̱yaṃ pā̍ta sva̱stibhi̱: sadā̍ naḥ
||10||9 maitrāvaruṇirvasiṣṭha:| indra: | virāṭ, 9 triṣṭup |
pibā̱ soma̍mindra̱ manda̍tu tvā̱ yaṃ te̍ su̱ṣāva̍ harya̱śvādri̍: | so̱turbā̱hubhyā̱ṃ suya̍to̱ nārvā̍
||1||yaste̱ mado̱ yujya̱ścāru̱rasti̱ yena̍ vṛ̱trāṇi̍ haryaśva̱ haṃsi̍ | sa tvāmi̍ndra prabhūvaso mamattu
||2||bodhā̱ su me̍ maghava̱nvāca̱memāṃ yāṃ te̱ vasi̍ṣṭho̱ arca̍ti̱ praśa̍stim | i̱mā brahma̍ sadha̱māde̍ juṣasva
||3||śru̱dhī hava̍ṃ vipipā̱nasyādre̱rbodhā̱ vipra̱syārca̍to manī̱ṣām | kṛ̱ṣvā duvā̱ṃsyanta̍mā̱ sace̱mā
||4||na te̱ giro̱ api̍ mṛṣye tu̱rasya̱ na su̍ṣṭu̱tima̍su̱rya̍sya vi̱dvān | sadā̍ te̱ nāma̍ svayaśo vivakmi
||5||bhūri̱ hi te̱ sava̍nā̱ mānu̍ṣeṣu̱ bhūri̍ manī̱ṣī ha̍vate̱ tvāmit | māre a̱smanma̍ghava̱ñjyokka̍:
||6||tubhyedi̱mā sava̍nā śūra̱ viśvā̱ tubhya̱ṃ brahmā̍ṇi̱ vardha̍nā kṛṇomi | tvaṃ nṛbhi̱rhavyo̍ vi̱śvadhā̍si
||7||nū ci̱nnu te̱ manya̍mānasya da̱smoda̍śnuvanti mahi̱māna̍mugra | na vī̱rya̍mindra te̱ na rādha̍:
||8||ye ca̱ pūrva̱ ṛṣa̍yo̱ ye ca̱ nūtnā̱ indra̱ brahmā̍ṇi ja̱naya̍nta̱ viprā̍: |
a̱sme te̍ santu sa̱khyā śi̱vāni̍ yū̱yaṃ pā̍ta sva̱stibhi̱: sadā̍ naḥ
||9||6 maitrāvaruṇirvasiṣṭha:| indra: | triṣṭup |
udu̱ brahmā̍ṇyairata śrava̱syendra̍ṃ sama̱rye ma̍hayā vasiṣṭha |
ā yo viśvā̍ni̱ śava̍sā ta̱tāno̍paśro̱tā ma̱ īva̍to̱ vacā̍ṃsi
||1||ayā̍mi̱ ghoṣa̍ indra de̱vajā̍mirira̱jyanta̱ yacchu̱rudho̱ vivā̍ci |
na̱hi svamāyu̍ściki̱te jane̍ṣu̱ tānīdaṃhā̱ṃsyati̍ parṣya̱smān
||2||yu̱je ratha̍ṃ ga̱veṣa̍ṇa̱ṃ hari̍bhyā̱mupa̱ brahmā̍ṇi jujuṣā̱ṇama̍sthuḥ |
vi bā̍dhiṣṭa̱ sya roda̍sī mahi̱tvendro̍ vṛ̱trāṇya̍pra̱tī ja̍gha̱nvān
||3||āpa̍ścitpipyuḥ sta̱ryo̱3 na gāvo̱ nakṣa̍nnṛ̱taṃ ja̍ri̱tāra̍sta indra |
yā̱hi vā̱yurna ni̱yuto̍ no̱ acchā̱ tvaṃ hi dhī̱bhirdaya̍se̱ vi vājā̍n
||4||te tvā̱ madā̍ indra mādayantu śu̱ṣmiṇa̍ṃ tuvi̱rādha̍saṃ jari̱tre |
eko̍ deva̱trā daya̍se̱ hi martā̍na̱smiñchū̍ra̱ sava̍ne mādayasva
||5||e̱vedindra̱ṃ vṛṣa̍ṇa̱ṃ vajra̍bāhu̱ṃ vasi̍ṣṭhāso a̱bhya̍rcantya̱rkaiḥ |
sa na̍: stu̱to vī̱rava̍ddhātu̱ goma̍dyū̱yaṃ pā̍ta sva̱stibhi̱: sadā̍ naḥ
||6||6 maitrāvaruṇirvasiṣṭha:| indra: | triṣṭup |
yoni̍ṣṭa indra̱ sada̍ne akāri̱ tamā nṛbhi̍: puruhūta̱ pra yā̍hi |
aso̱ yathā̍ no'vi̱tā vṛ̱dhe ca̱ dado̱ vasū̍ni ma̱mada̍śca̱ somai̍:
||1||gṛ̱bhī̱taṃ te̱ mana̍ indra dvi̱barhā̍: su̱taḥ soma̱: pari̍ṣiktā̱ madhū̍ni |
visṛ̍ṣṭadhenā bharate suvṛ̱ktiri̱yamindra̱ṃ johu̍vatī manī̱ṣā
||2||ā no̍ di̱va ā pṛ̍thi̱vyā ṛ̍jīṣinni̱daṃ ba̱rhiḥ so̍ma̱peyā̍ya yāhi |
vaha̍ntu tvā̱ hara̍yo ma̱drya̍ñcamāṅgū̱ṣamacchā̍ ta̱vasa̱ṃ madā̍ya
||3||ā no̱ viśvā̍bhirū̱tibhi̍: sa̱joṣā̱ brahma̍ juṣā̱ṇo ha̍ryaśva yāhi |
varī̍vṛja̱tsthavi̍rebhiḥ suśiprā̱'sme dadha̱dvṛṣa̍ṇa̱ṃ śuṣma̍mindra
||4||e̱ṣa stomo̍ ma̱ha u̱grāya̱ vāhe̍ dhu̱rī̱3vātyo̱ na vā̱jaya̍nnadhāyi |
indra̍ tvā̱yama̱rka ī̍ṭṭe̱ vasū̍nāṃ di̱vī̍va̱ dyāmadhi̍ na̱: śroma̍taṃ dhāḥ
||5||e̱vā na̍ indra̱ vārya̍sya pūrdhi̱ pra te̍ ma̱hīṃ su̍ma̱tiṃ ve̍vidāma |
iṣa̍ṃ pinva ma̱ghava̍dbhyaḥ su̱vīrā̍ṃ yū̱yaṃ pā̍ta sva̱stibhi̱: sadā̍ naḥ
||6||6 maitrāvaruṇirvasiṣṭha:| indra: | triṣṭup |
ā te̍ ma̱ha i̍ndro̱tyu̍gra̱ sama̍nyavo̱ yatsa̱mara̍nta̱ senā̍: |
patā̍ti di̱dyunnarya̍sya bā̱hvormā te̱ mano̍ viṣva̱drya1gvi cā̍rīt
||1||ni du̱rga i̍ndra śnathihya̱mitrā̍na̱bhi ye no̱ martā̍so a̱manti̍ |
ā̱re taṃ śaṃsa̍ṃ kṛṇuhi nini̱tsorā no̍ bhara sa̱ṃbhara̍ṇa̱ṃ vasū̍nām
||2||śa̱taṃ te̍ śiprinnū̱taya̍: su̱dāse̍ sa̱hasra̱ṃ śaṃsā̍ u̱ta rā̱tira̍stu |
ja̱hi vadha̍rva̱nuṣo̱ martya̍syā̱'sme dyu̱mnamadhi̱ ratna̍ṃ ca dhehi
||3||tvāva̍to̱ hī̍ndra̱ kratve̱ asmi̱ tvāva̍to'vi̱tuḥ śū̍ra rā̱tau |
viśvedahā̍ni taviṣīva ugra̱m̐ oka̍: kṛṇuṣva harivo̱ na ma̍rdhīḥ
||4||kutsā̍ e̱te harya̍śvāya śū̱ṣamindre̱ saho̍ de̱vajū̍tamiyā̱nāḥ |
sa̱trā kṛ̍dhi su̱hanā̍ śūra vṛ̱trā va̱yaṃ taru̍trāḥ sanuyāma̱ vāja̍m
||5||e̱vā na̍ indra̱ vārya̍sya pūrdhi̱ pra te̍ ma̱hīṃ su̍ma̱tiṃ ve̍vidāma |
iṣa̍ṃ pinva ma̱ghava̍dbhyaḥ su̱vīrā̍ṃ yū̱yaṃ pā̍ta sva̱stibhi̱: sadā̍ naḥ
||6||5 maitrāvaruṇirvasiṣṭha:| indra: | triṣṭup |
na soma̱ indra̱masu̍to mamāda̱ nābra̍hmāṇo ma̱ghavā̍naṃ su̱tāsa̍: |
tasmā̍ u̱kthaṃ ja̍naye̱ yajjujo̍ṣannṛ̱vannavī̍yaḥ śṛ̱ṇava̱dyathā̍ naḥ
||1||u̱kthau̍kthe̱ soma̱ indra̍ṃ mamāda nī̱thenī̍the ma̱ghavā̍naṃ su̱tāsa̍: |
yadī̍ṃ sa̱bādha̍: pi̱tara̱ṃ na pu̱trāḥ sa̍mā̱nada̍kṣā̱ ava̍se̱ hava̍nte
||2||ca̱kāra̱ tā kṛ̱ṇava̍nnū̱nama̱nyā yāni̍ bru̱vanti̍ ve̱dhasa̍: su̱teṣu̍ |
janī̍riva̱ pati̱reka̍: samā̱no ni mā̍mṛje̱ pura̱ indra̱: su sarvā̍:
||3||e̱vā tamā̍huru̱ta śṛ̍ṇva̱ indra̱ eko̍ vibha̱ktā ta̱raṇi̍rma̱ghānā̍m |
mi̱tha̱stura̍ ū̱tayo̱ yasya̍ pū̱rvīra̱sme bha̱drāṇi̍ saścata pri̱yāṇi̍
||4||e̱vā vasi̍ṣṭha̱ indra̍mū̱taye̱ nṝnkṛ̍ṣṭī̱nāṃ vṛ̍ṣa̱bhaṃ su̱te gṛ̍ṇāti |
sa̱ha̱sriṇa̱ upa̍ no māhi̱ vājā̍nyū̱yaṃ pā̍ta sva̱stibhi̱: sadā̍ naḥ
||5||5 maitrāvaruṇirvasiṣṭha:| indra: | triṣṭup |
indra̱ṃ naro̍ ne̱madhi̍tā havante̱ yatpāryā̍ yu̱naja̍te̱ dhiya̱stāḥ |
śūro̱ nṛṣā̍tā̱ śava̍saścakā̱na ā goma̍ti vra̱je bha̍jā̱ tvaṃ na̍:
||1||ya i̍ndra̱ śuṣmo̍ maghavante̱ asti̱ śikṣā̱ sakhi̍bhyaḥ puruhūta̱ nṛbhya̍: |
tvaṃ hi dṛ̱l̤hā ma̍ghava̱nvice̍tā̱ apā̍ vṛdhi̱ pari̍vṛta̱ṃ na rādha̍:
||2||indro̱ rājā̱ jaga̍taścarṣaṇī̱nāmadhi̱ kṣami̱ viṣu̍rūpa̱ṃ yadasti̍ |
tato̍ dadāti dā̱śuṣe̱ vasū̍ni̱ coda̱drādha̱ upa̍stutaścida̱rvāk
||3||nū ci̍nna̱ indro̍ ma̱ghavā̱ sahū̍tī dā̱no vāja̱ṃ ni ya̍mate na ū̱tī |
anū̍nā̱ yasya̱ dakṣi̍ṇā pī̱pāya̍ vā̱maṃ nṛbhyo̍ a̱bhivī̍tā̱ sakhi̍bhyaḥ
||4||nū i̍ndra rā̱ye vari̍vaskṛdhī na̱ ā te̱ mano̍ vavṛtyāma ma̱ghāya̍ |
goma̱daśvā̍va̱dratha̍va̱dvyanto̍ yū̱yaṃ pā̍ta sva̱stibhi̱: sadā̍ naḥ
||5||5 maitrāvaruṇirvasiṣṭha:| indra: | triṣṭup |
brahmā̍ ṇa i̱ndropa̍ yāhi vi̱dvāna̱rvāñca̍ste̱ hara̍yaḥ santu yu̱ktāḥ |
viśve̍ ci̱ddhi tvā̍ vi̱hava̍nta̱ martā̍ a̱smāka̱micchṛ̍ṇuhi viśvaminva
||1||hava̍ṃ ta indra mahi̱mā vyā̍na̱ḍbrahma̱ yatpāsi̍ śavasi̱nnṛṣī̍ṇām |
ā yadvajra̍ṃ dadhi̱ṣe hasta̍ ugra gho̱raḥ sankratvā̍ janiṣṭhā̱ aṣā̍l̤haḥ
||2||tava̱ praṇī̍tīndra̱ johu̍vānā̱ntsaṃ yannṝnna roda̍sī ni̱netha̍ |
ma̱he kṣa̱trāya̱ śava̍se̱ hi ja̱jñe'tū̍tujiṃ ci̱ttūtu̍jiraśiśnat
||3||e̱bhirna̍ i̱ndrāha̍bhirdaśasya durmi̱trāso̱ hi kṣi̱taya̱: pava̍nte |
prati̱ yaccaṣṭe̱ anṛ̍tamane̱nā ava̍ dvi̱tā varu̍ṇo mā̱yī na̍: sāt
||4||vo̱cemedindra̍ṃ ma̱ghavā̍namenaṃ ma̱ho rā̱yo rādha̍so̱ yaddada̍nnaḥ |
yo arca̍to̱ brahma̍kṛti̱mavi̍ṣṭho yū̱yaṃ pā̍ta sva̱stibhi̱: sadā̍ naḥ
||5||5 maitrāvaruṇirvasiṣṭha:| indra: | triṣṭup |
a̱yaṃ soma̍ indra̱ tubhya̍ṃ sunva̱ ā tu pra yā̍hi hariva̱stado̍kāḥ |
pibā̱ tva1sya suṣu̍tasya̱ cāro̱rdado̍ ma̱ghāni̍ maghavanniyā̱naḥ
||1||brahma̍nvīra̱ brahma̍kṛtiṃ juṣā̱ṇo̍'rvācī̱no hari̍bhiryāhi̱ tūya̍m |
a̱sminnū̱ ṣu sava̍ne mādaya̱svopa̱ brahmā̍ṇi śṛṇava i̱mā na̍:
||2||kā te̍ a̱styara̍ṃkṛtiḥ sū̱ktaiḥ ka̱dā nū̱naṃ te̍ maghavandāśema |
viśvā̍ ma̱tīrā ta̍tane tvā̱yā'dhā̍ ma indra śṛṇavo̱ have̱mā
||3||u̱to ghā̱ te pu̍ru̱ṣyā̱3 idā̍sa̱nyeṣā̱ṃ pūrve̍ṣā̱maśṛ̍ṇo̱ṝṣī̍ṇām |
adhā̱haṃ tvā̍ maghavañjohavīmi̱ tvaṃ na̍ indrāsi̱ prama̍tiḥ pi̱teva̍
||4||vo̱cemedindra̍ṃ ma̱ghavā̍namenaṃ ma̱ho rā̱yo rādha̍so̱ yaddada̍nnaḥ |
yo arca̍to̱ brahma̍kṛti̱mavi̍ṣṭho yū̱yaṃ pā̍ta sva̱stibhi̱: sadā̍ naḥ
||5||5 maitrāvaruṇirvasiṣṭha:| indra: | triṣṭup |
ā no̍ deva̱ śava̍sā yāhi śuṣmi̱nbhavā̍ vṛ̱dha i̍ndra rā̱yo a̱sya |
ma̱he nṛ̱mṇāya̍ nṛpate suvajra̱ mahi̍ kṣa̱trāya̱ pauṃsyā̍ya śūra
||1||hava̍nta u tvā̱ havya̱ṃ vivā̍ci ta̱nūṣu̱ śūrā̱: sūrya̍sya sā̱tau |
tvaṃ viśve̍ṣu̱ senyo̱ jane̍ṣu̱ tvaṃ vṛ̱trāṇi̍ randhayā su̱hantu̍
||2||ahā̱ yadi̍ndra su̱dinā̍ vyu̱cchāndadho̱ yatke̱tumu̍pa̱maṃ sa̱matsu̍ |
nya1gniḥ sī̍da̱dasu̍ro̱ na hotā̍ huvā̱no atra̍ su̱bhagā̍ya de̱vān
||3||va̱yaṃ te ta̍ indra̱ ye ca̍ deva̱ stava̍nta śūra̱ dada̍to ma̱ghāni̍ |
yacchā̍ sū̱ribhya̍ upa̱maṃ varū̍thaṃ svā̱bhuvo̍ jara̱ṇāma̍śnavanta
||4||vo̱cemedindra̍ṃ ma̱ghavā̍namenaṃ ma̱ho rā̱yo rādha̍so̱ yaddada̍nnaḥ |
yo arca̍to̱ brahma̍kṛti̱mavi̍ṣṭho yū̱yaṃ pā̍ta sva̱stibhi̱: sadā̍ naḥ
||5||12 maitrāvaruṇirvasiṣṭha:| indra: |gāyatrī, 10-12 virāṭ |
pra va̱ indrā̍ya̱ māda̍na̱ṃ harya̍śvāya gāyata | sakhā̍yaḥ soma̱pāvne̍
||1||śaṃsedu̱kthaṃ su̱dāna̍va u̱ta dyu̱kṣaṃ yathā̱ nara̍: | ca̱kṛ̱mā sa̱tyarā̍dhase
||2||tvaṃ na̍ indra vāja̱yustvaṃ ga̱vyuḥ śa̍takrato | tvaṃ hi̍raṇya̱yurva̍so
||3||va̱yami̍ndra tvā̱yavo̱'bhi pra ṇo̍numo vṛṣan | vi̱ddhī tva1sya no̍ vaso
||4||mā no̍ ni̱de ca̱ vakta̍ve̱'ryo ra̍ndhī̱rarā̍vṇe | tve api̱ kratu̱rmama̍
||5||tvaṃ varmā̍si sa̱pratha̍: puroyo̱dhaśca̍ vṛtrahan | tvayā̱ prati̍ bruve yu̱jā
||6||ma̱hām̐ u̱tāsi̱ yasya̱ te'nu̍ sva̱dhāva̍rī̱ saha̍: | ma̱mnāte̍ indra̱ roda̍sī
||7||taṃ tvā̍ ma̱rutva̍tī̱ pari̱ bhuva̱dvāṇī̍ sa̱yāva̍rī | nakṣa̍māṇā sa̱ha dyubhi̍:
||8||ū̱rdhvāsa̱stvānvinda̍vo̱ bhuva̍nda̱smamupa̱ dyavi̍ | saṃ te̍ namanta kṛ̱ṣṭaya̍:
||9||pra vo̍ ma̱he ma̍hi̱vṛdhe̍ bharadhva̱ṃ prace̍tase̱ pra su̍ma̱tiṃ kṛ̍ṇudhvam | viśa̍: pū̱rvīḥ pra ca̍rā carṣaṇi̱prāḥ
||10||u̱ru̱vyaca̍se ma̱hine̍ suvṛ̱ktimindrā̍ya̱ brahma̍ janayanta̱ viprā̍: | tasya̍ vra̱tāni̱ na mi̍nanti̱ dhīrā̍:
||11||indra̱ṃ vāṇī̱ranu̍ttamanyume̱va sa̱trā rājā̍naṃ dadhire̱ saha̍dhyai | harya̍śvāya barhayā̱ samā̱pīn
||12||27 (1-25) maitrāvaruṇirvasiṣṭha: , 26 pūrvārdharcasya śaktirvāsiṣṭho vā (śāṭyāyane brāhmaṇe),26-27 śaktirvāsiṣṭho vā (tāṇḍake brāhmaṇe) | indra: | pragātha: – (bṛhatī , satobṛhatī),3 dvipadā virāṭ |
mo ṣu tvā̍ vā̱ghata̍śca̱nā''re a̱smanni rī̍raman |
ā̱rāttā̍ccitsadha̱māda̍ṃ na̱ ā ga̍hī̱ha vā̱ sannupa̍ śrudhi
||1||i̱me hi te̍ brahma̱kṛta̍: su̱te sacā̱ madhau̱ na makṣa̱ āsa̍te |
indre̱ kāma̍ṃ jari̱tāro̍ vasū̱yavo̱ rathe̱ na pāda̱mā da̍dhuḥ
||2||rā̱yaskā̍mo̱ vajra̍hastaṃ su̱dakṣi̍ṇaṃ pu̱tro na pi̱tara̍ṃ huve
||3||i̱ma indrā̍ya sunvire̱ somā̍so̱ dadhyā̍śiraḥ |
tām̐ ā madā̍ya vajrahasta pī̱taye̱ hari̍bhyāṃ yā̱hyoka̱ ā
||4||śrava̱cchrutka̍rṇa īyate̱ vasū̍nā̱ṃ nū ci̍nno mardhiṣa̱dgira̍: |
sa̱dyaści̱dyaḥ sa̱hasrā̍ṇi śa̱tā dada̱nnaki̱rditsa̍nta̱mā mi̍nat
||5||sa vī̱ro apra̍tiṣkuta̱ indre̍ṇa śūśuve̱ nṛbhi̍: |
yaste̍ gabhī̱rā sava̍nāni vṛtrahantsu̱notyā ca̱ dhāva̍ti
||6||bhavā̱ varū̍thaṃ maghavanma̱ghonā̱ṃ yatsa̱majā̍si̱ śardha̍taḥ |
vi tvāha̍tasya̱ veda̍naṃ bhajema̱hyā dū̱ṇāśo̍ bharā̱ gaya̍m
||7||su̱notā̍ soma̱pāvne̱ soma̱mindrā̍ya va̱jriṇe̍ |
paca̍tā pa̱ktīrava̍se kṛṇu̱dhvamitpṛ̱ṇannitpṛ̍ṇa̱te maya̍:
||8||mā sre̍dhata somino̱ dakṣa̍tā ma̱he kṛ̍ṇu̱dhvaṃ rā̱ya ā̱tuje̍ |
ta̱raṇi̱rijja̍yati̱ kṣeti̱ puṣya̍ti̱ na de̱vāsa̍: kava̱tnave̍
||9||naki̍: su̱dāso̱ ratha̱ṃ paryā̍sa̱ na rī̍ramat |
indro̱ yasyā̍vi̱tā yasya̍ ma̱ruto̱ gama̱tsa goma̍ti vra̱je
||10||gama̱dvāja̍ṃ vā̱jaya̍nnindra̱ martyo̱ yasya̱ tvama̍vi̱tā bhuva̍: |
a̱smāka̍ṃ bodhyavi̱tā rathā̍nāma̱smāka̍ṃ śūra nṛ̱ṇām
||11||udinnva̍sya ricya̱teṃ'śo̱ dhana̱ṃ na ji̱gyuṣa̍: |
ya indro̱ hari̍vā̱nna da̍bhanti̱ taṃ ripo̱ dakṣa̍ṃ dadhāti so̱mini̍
||12||mantra̱makha̍rva̱ṃ sudhi̍taṃ su̱peśa̍sa̱ṃ dadhā̍ta ya̱jñiye̱ṣvā |
pū̱rvīśca̱na prasi̍tayastaranti̱ taṃ ya indre̱ karma̍ṇā̱ bhuva̍t
||13||kastami̍ndra̱ tvāva̍su̱mā martyo̍ dadharṣati |
śra̱ddhā itte̍ maghava̱npārye̍ di̱vi vā̱jī vāja̍ṃ siṣāsati
||14||ma̱ghona̍: sma vṛtra̱hatye̍ṣu codaya̱ ye dada̍ti pri̱yā vasu̍ |
tava̱ praṇī̍tī haryaśva sū̱ribhi̱rviśvā̍ tarema duri̱tā
||15||tavedi̍ndrāva̱maṃ vasu̱ tvaṃ pu̍ṣyasi madhya̱mam |
sa̱trā viśva̍sya para̱masya̍ rājasi̱ naki̍ṣṭvā̱ goṣu̍ vṛṇvate
||16||tvaṃ viśva̍sya dhana̱dā a̍si śru̱to ya ī̱ṃ bhava̍ntyā̱jaya̍: |
tavā̱yaṃ viśva̍: puruhūta̱ pārthi̍vo'va̱syurnāma̍ bhikṣate
||17||yadi̍ndra̱ yāva̍ta̱stvame̱tāva̍da̱hamīśī̍ya |
sto̱tāra̱middi̍dhiṣeya radāvaso̱ na pā̍pa̱tvāya̍ rāsīya
||18||śikṣe̍ya̱minma̍haya̱te di̱vedi̍ve rā̱ya ā ku̍haci̱dvide̍ |
na̱hi tvada̱nyanma̍ghavanna̱ āpya̱ṃ vasyo̱ asti̍ pi̱tā ca̱na
||19||ta̱raṇi̱ritsi̍ṣāsati̱ vāja̱ṃ pura̍ṃdhyā yu̱jā |
ā va̱ indra̍ṃ puruhū̱taṃ na̍me gi̱rā ne̱miṃ taṣṭe̍va su̱drva̍m
||20||na du̍:ṣṭu̱tī martyo̍ vindate̱ vasu̱ na sredha̍ntaṃ ra̱yirna̍śat |
su̱śakti̱rinma̍ghava̱ntubhya̱ṃ māva̍te de̱ṣṇaṃ yatpārye̍ di̱vi
||21||a̱bhi tvā̍ śūra nonu̱mo'du̍gdhā iva dhe̱nava̍: |
īśā̍nama̱sya jaga̍taḥ sva̱rdṛśa̱mīśā̍namindra ta̱sthuṣa̍:
||22||na tvāvā̍m̐ a̱nyo di̱vyo na pārthi̍vo̱ na jā̱to na ja̍niṣyate |
a̱śvā̱yanto̍ maghavannindra vā̱jino̍ ga̱vyanta̍stvā havāmahe
||23||a̱bhī ṣa̱tastadā bha̱rendra̱ jyāya̱: kanī̍yasaḥ | pu̱rū̱vasu̱rhi ma̍ghavantsa̱nādasi̱ bhare̍bhare ca̱ havya̍:
||24||parā̍ ṇudasva maghavanna̱mitrā̍ntsu̱vedā̍ no̱ vasū̍ kṛdhi |
a̱smāka̍ṃ bodhyavi̱tā ma̍hādha̱ne bhavā̍ vṛ̱dhaḥ sakhī̍nām
||25||indra̱ kratu̍ṃ na̱ ā bha̍ra pi̱tā pu̱trebhyo̱ yathā̍ |
śikṣā̍ ṇo a̱sminpu̍ruhūta̱ yāma̍ni jī̱vā jyoti̍raśīmahi
||26||mā no̱ ajñā̍tā vṛ̱janā̍ durā̱dhyo̱3 māśi̍vāso̱ ava̍ kramuḥ |
tvayā̍ va̱yaṃ pra̱vata̱: śaśva̍tīra̱po'ti̍ śūra tarāmasi
||27||14 (1-9) maitrāvaruṇirvasiṣṭha: , 10–14 vasiṣṭhaputrā:| 1-9 vasiṣṭhaputrā: indro vā ; 10 – 14 vasiṣṭha : | triṣṭup |
śvi̱tyañco̍ mā dakṣiṇa̱taska̍pardā dhiyaṃji̱nvāso̍ a̱bhi hi pra̍ma̱nduḥ |
u̱ttiṣṭha̍nvoce̱ pari̍ ba̱rhiṣo̱ nṝnna me̍ dū̱rādavi̍tave̱ vasi̍ṣṭhāḥ
||1||dū̱rādindra̍manaya̱nnā su̱tena̍ ti̱ro vai̍śa̱ntamati̱ pānta̍mu̱gram |
pāśa̍dyumnasya vāya̱tasya̱ somā̍tsu̱tādindro̍'vṛṇītā̱ vasi̍ṣṭhān
||2||e̱vennu ka̱ṃ sindhu̍mebhistatāre̱vennu ka̍ṃ bhe̱dame̍bhirjaghāna |
e̱vennu ka̍ṃ dāśarā̱jñe su̱dāsa̱ṃ prāva̱dindro̱ brahma̍ṇā vo vasiṣṭhāḥ
||3||juṣṭī̍ naro̱ brahma̍ṇā vaḥ pitṝ̱ṇāmakṣa̍mavyaya̱ṃ na kilā̍ riṣātha |
yacchakva̍rīṣu bṛha̱tā rave̱ṇendre̱ śuṣma̱mada̍dhātā vasiṣṭhāḥ
||4||uddyāmi̱vettṛ̱ṣṇajo̍ nāthi̱tāso'dī̍dhayurdāśarā̱jñe vṛ̱tāsa̍: |
vasi̍ṣṭhasya stuva̱ta indro̍ aśrodu̱ruṃ tṛtsu̍bhyo akṛṇodu lo̱kam
||5||da̱ṇḍā i̱vedgo̱aja̍nāsa āsa̱npari̍cchinnā bhara̱tā a̍rbha̱kāsa̍: |
abha̍vacca purae̱tā vasi̍ṣṭha̱ ādittṛtsū̍nā̱ṃ viśo̍ aprathanta
||6||traya̍: kṛṇvanti̱ bhuva̍neṣu̱ reta̍sti̱sraḥ pra̱jā āryā̱ jyoti̍ragrāḥ |
trayo̍ gha̱rmāsa̍ u̱ṣasa̍ṃ sacante̱ sarvā̱m̐ ittām̐ anu̍ vidu̱rvasi̍ṣṭhāḥ
||7||sūrya̍syeva va̱kṣatho̱ jyoti̍reṣāṃ samu̱drasye̍va mahi̱mā ga̍bhī̱raḥ |
vāta̍syeva praja̱vo nānyena̱ stomo̍ vasiṣṭhā̱ anve̍tave vaḥ
||8||ta inni̱ṇyaṃ hṛda̍yasya prake̱taiḥ sa̱hasra̍valśama̱bhi saṃ ca̍ranti |
ya̱mena̍ ta̱taṃ pa̍ri̱dhiṃ vaya̍nto'psa̱rasa̱ upa̍ sedu̱rvasi̍ṣṭhāḥ
||9||vi̱dyuto̱ jyoti̱: pari̍ sa̱ṃjihā̍naṃ mi̱trāvaru̍ṇā̱ yadapa̍śyatāṃ tvā |
tatte̱ janmo̱taika̍ṃ vasiṣṭhā̱'gastyo̱ yattvā̍ vi̱śa ā̍ja̱bhāra̍
||10||u̱tāsi̍ maitrāvaru̱ṇo va̍siṣṭho̱rvaśyā̍ brahma̱nmana̱so'dhi̍ jā̱taḥ |
dra̱psaṃ ska̱nnaṃ brahma̍ṇā̱ daivye̍na̱ viśve̍ de̱vāḥ puṣka̍re tvādadanta
||11||sa pra̍ke̱ta u̱bhaya̍sya pravi̱dvāntsa̱hasra̍dāna u̱ta vā̱ sadā̍naḥ |
ya̱mena̍ ta̱taṃ pa̍ri̱dhiṃ va̍yi̱ṣyanna̍psa̱rasa̱: pari̍ jajñe̱ vasi̍ṣṭhaḥ
||12||sa̱tre ha̍ jā̱tāvi̍ṣi̱tā namo̍bhiḥ ku̱mbhe reta̍: siṣicatuḥ
samā̱nam | tato̍ ha̱ māna̱ udi̍yāya̱ madhyā̱ttato̍ jā̱tamṛṣi̍māhu̱rvasi̍ṣṭham
||13||u̱ktha̱bhṛta̍ṃ sāma̱bhṛta̍ṃ bibharti̱ grāvā̍ṇa̱ṃ bibhra̱tpra va̍dā̱tyagre̍ |
upai̍namādhvaṃ sumana̱syamā̍nā̱ ā vo̍ gacchāti pratṛdo̱ vasi̍ṣṭhaḥ
||14||25 maitrāvaruṇirvasiṣṭha:|viśve devā:, 16 ahi:, 17 ahirbudhnya:|dvipadā virāṭ ,22-25 triṣṭup |
pra śu̱kraitu̍ de̱vī ma̍nī̱ṣā a̱smatsuta̍ṣṭo̱ ratho̱ na vā̱jī
||1||vi̱duḥ pṛ̍thi̱vyā di̱vo ja̱nitra̍ṃ śṛ̱ṇvantyāpo̱ adha̱ kṣara̍ntīḥ
||2||āpa̍ścidasmai̱ pinva̍nta pṛ̱thvīrvṛ̱treṣu̱ śūrā̱ maṃsa̍nta u̱grāḥ
||3||ā dhū̱rṣva̍smai̱ dadhā̱tāśvā̱nindro̱ na va̱jrī hira̍ṇyabāhuḥ
||4||a̱bhi pra sthā̱tāhe̍va ya̱jñaṃ yāte̍va̱ patma̱ntmanā̍ hinota
||5||tmanā̍ sa̱matsu̍ hi̱nota̍ ya̱jñaṃ dadhā̍ta ke̱tuṃ janā̍ya vī̱ram
||6||uda̍sya̱ śuṣmā̍dbhā̱nurnārta̱ bibha̍rti bhā̱raṃ pṛ̍thi̱vī na bhūma̍
||7||hvayā̍mi de̱vām̐ ayā̍turagne̱ sādha̍nnṛ̱tena̱ dhiya̍ṃ dadhāmi
||8||a̱bhi vo̍ de̱vīṃ dhiya̍ṃ dadhidhva̱ṃ pra vo̍ deva̱trā vāca̍ṃ kṛṇudhvam
||9||ā ca̍ṣṭa āsā̱ṃ pātho̍ na̱dīnā̱ṃ varu̍ṇa u̱graḥ sa̱hasra̍cakṣāḥ
||10||rājā̍ rā̱ṣṭrānā̱ṃ peśo̍ na̱dīnā̱manu̍ttamasmai kṣa̱traṃ vi̱śvāyu̍
||11||avi̍ṣṭo a̱smānviśvā̍su vi̱kṣvadyu̍ṃ kṛṇota̱ śaṃsa̍ṃ nini̱tsoḥ
||12||vye̍tu di̱dyuddvi̱ṣāmaśe̍vā yu̱yota̱ viṣva̱grapa̍sta̱nūnā̍m
||13||avī̍nno a̱gnirha̱vyānnamo̍bhi̱: preṣṭho̍ asmā adhāyi̱ stoma̍:
||14||sa̱jūrde̱vebhi̍ra̱pāṃ napā̍ta̱ṃ sakhā̍yaṃ kṛdhvaṃ śi̱vo no̍ astu
||15||a̱bjāmu̱kthairahi̍ṃ gṛṇīṣe bu̱dhne na̱dīnā̱ṃ raja̍: su̱ ṣīda̍n
||16||mā no'hi̍rbu̱dhnyo̍ ri̱ṣe dhā̱nmā ya̱jño a̍sya sridhadṛtā̱yoḥ
||17||u̱ta na̍ e̱ṣu nṛṣu̱ śravo̍ dhu̱: pra rā̱ye ya̍ntu̱ śardha̍nto a̱ryaḥ
||18||tapa̍nti̱ śatru̱ṃ sva1rṇa bhūmā̍ ma̱hāse̍nāso̱ ame̍bhireṣām
||19||ā yanna̱: patnī̱rgama̱ntyacchā̱ tvaṣṭā̍ supā̱ṇirdadhā̍tu vī̱rān
||20||prati̍ na̱: stoma̱ṃ tvaṣṭā̍ juṣeta̱ syāda̱sme a̱rama̍tirvasū̱yuḥ
||21||tā no̍ rāsanrāti̱ṣāco̱ vasū̱nyā roda̍sī varuṇā̱nī śṛ̍ṇotu |
varū̍trībhiḥ suśara̱ṇo no̍ astu̱ tvaṣṭā̍ su̱datro̱ vi da̍dhātu̱ rāya̍:
||22||tanno̱ rāya̱: parva̍tā̱stanna̱ āpa̱stadrā̍ti̱ṣāca̱ oṣa̍dhīru̱ta dyauḥ |
vana̱spati̍bhiḥ pṛthi̱vī sa̱joṣā̍ u̱bhe roda̍sī̱ pari̍ pāsato naḥ
||23||anu̱ tadu̱rvī roda̍sī jihātā̱manu̍ dyu̱kṣo varu̍ṇa̱ indra̍sakhā | a
nu̱ viśve̍ ma̱ruto̱ ye sa̱hāso̍ rā̱yaḥ syā̍ma dha̱ruṇa̍ṃ dhi̱yadhyai̍
||24||tanna̱ indro̱ varu̍ṇo mi̱tro a̱gnirāpa̱ oṣa̍dhīrva̱nino̍ juṣanta |
śarma̍ntsyāma ma̱rutā̍mu̱pasthe̍ yū̱yaṃ pā̍ta sva̱stibhi̱: sadā̍ naḥ
||25||15 maitrāvaruṇirvasiṣṭha:| viśve devā:| triṣṭup |
śaṃ na̍ indrā̱gnī bha̍vatā̱mavo̍bhi̱: śaṃ na̱ indrā̱varu̍ṇā rā̱taha̍vyā |
śamindrā̱somā̍ suvi̱tāya̱ śaṃ yoḥ śaṃ na̱ indrā̍pū̱ṣaṇā̱ vāja̍sātau
||1||śaṃ no̱ bhaga̱: śamu̍ na̱: śaṃso̍ astu̱ śaṃ na̱: pura̍ṃdhi̱: śamu̍ santu̱ rāya̍: |
śaṃ na̍: sa̱tyasya̍ su̱yama̍sya̱ śaṃsa̱: śaṃ no̍ arya̱mā pu̍rujā̱to a̍stu
||2||śaṃ no̍ dhā̱tā śamu̍ dha̱rtā no̍ astu̱ śaṃ na̍ urū̱cī bha̍vatu sva̱dhābhi̍: |
śaṃ roda̍sī bṛha̱tī śaṃ no̱ adri̱: śaṃ no̍ de̱vānā̍ṃ su̱havā̍ni santu
||3||śaṃ no̍ a̱gnirjyoti̍ranīko astu̱ śaṃ no̍ mi̱trāvaru̍ṇāva̱śvinā̱ śam |
śaṃ na̍: su̱kṛtā̍ṃ sukṛ̱tāni̍ santu̱ śaṃ na̍ iṣi̱ro a̱bhi vā̍tu̱ vāta̍:
||4||śaṃ no̱ dyāvā̍pṛthi̱vī pū̱rvahū̍tau̱ śama̱ntari̍kṣaṃ dṛ̱śaye̍ no astu |
śaṃ na̱ oṣa̍dhīrva̱nino̍ bhavantu̱ śaṃ no̱ raja̍sa̱spati̍rastu ji̱ṣṇuḥ
||5||śaṃ na̱ indro̱ vasu̍bhirde̱vo a̍stu̱ śamā̍di̱tyebhi̱rvaru̍ṇaḥ su̱śaṃsa̍: |
śaṃ no̍ ru̱dro ru̱drebhi̱rjalā̍ṣa̱: śaṃ na̱stvaṣṭā̱ gnābhi̍ri̱ha śṛ̍ṇotu
||6||śaṃ na̱ somo̍ bhavatu̱ brahma̱ śaṃ na̱: śaṃ no̱ grāvā̍ṇa̱: śamu̍ santu ya̱jñāḥ |
śaṃ na̱: svarū̍ṇāṃ mi̱tayo̍ bhavantu̱ śaṃ na̍: pra̱sva1: śamva̍stu̱ vedi̍:
||7||śaṃ na̱: sūrya̍ uru̱cakṣā̱ ude̍tu̱ śaṃ na̱ścata̍sraḥ pra̱diśo̍ bhavantu |
śaṃ na̱: parva̍tā dhru̱vayo̍ bhavantu̱ śaṃ na̱: sindha̍va̱: śamu̍ sa̱ntvāpa̍:
||8||śaṃ no̱ adi̍tirbhavatu vra̱tebhi̱: śaṃ no̍ bhavantu ma̱ruta̍: sva̱rkāḥ |
śaṃ no̱ viṣṇu̱: śamu̍ pū̱ṣā no̍ astu̱ śaṃ no̍ bha̱vitra̱ṃ śamva̍stu vā̱yuḥ
||9||śaṃ no̍ de̱vaḥ sa̍vi̱tā trāya̍māṇa̱: śaṃ no̍ bhavantū̱ṣaso̍ vibhā̱tīḥ |
śaṃ na̍: pa̱rjanyo̍ bhavatu pra̱jābhya̱: śaṃ na̱: kṣetra̍sya̱ pati̍rastu śa̱mbhuḥ
||10||śaṃ no̍ de̱vā vi̱śvade̍vā bhavantu̱ śaṃ sara̍svatī sa̱ha dhī̱bhira̍stu |
śama̍bhi̱ṣāca̱: śamu̍ rāti̱ṣāca̱: śaṃ no̍ di̱vyāḥ pārthi̍vā̱: śaṃ no̱ apyā̍:
||11||śaṃ na̍: sa̱tyasya̱ pata̍yo bhavantu̱ śaṃ no̱ arva̍nta̱: śamu̍ santu̱ gāva̍: |
śaṃ na̍ ṛ̱bhava̍: su̱kṛta̍: su̱hastā̱: śaṃ no̍ bhavantu pi̱taro̱ have̍ṣu
||12||śaṃ no̍ a̱ja eka̍pādde̱vo a̍stu̱ śaṃ no'hi̍rbu̱dhnya1: śaṃ sa̍mu̱draḥ |
śaṃ no̍ a̱pāṃ napā̍tpe̱rura̍stu̱ śaṃ na̱: pṛśni̍rbhavatu de̱vago̍pā
||13||ā̱di̱tyā ru̱drā vasa̍vo juṣante̱daṃ brahma̍ kri̱yamā̍ṇa̱ṃ navī̍yaḥ |
śṛ̱ṇvantu̍ no di̱vyāḥ pārthi̍vāso̱ gojā̍tā u̱ta ye ya̱jñiyā̍saḥ
||14||ye de̱vānā̍ṃ ya̱jñiyā̍ ya̱jñiyā̍nā̱ṃ mano̱ryaja̍trā a̱mṛtā̍ ṛta̱jñāḥ |
te no̍ rāsantāmurugā̱yama̱dya yū̱yaṃ pā̍ta sva̱stibhi̱: sadā̍ naḥ
||15||9 maitrāvaruṇirvasiṣṭha:| viśve devā: | triṣṭup |
pra brahmai̍tu̱ sada̍nādṛ̱tasya̱ vi ra̱śmibhi̍: sasṛje̱ sūryo̱ gāḥ |
vi sānu̍nā pṛthi̱vī sa̍sra u̱rvī pṛ̱thu pratī̍ka̱madhyedhe̍ a̱gniḥ
||1||i̱māṃ vā̍ṃ mitrāvaruṇā suvṛ̱ktimiṣa̱ṃ na kṛ̍ṇve asurā̱ navī̍yaḥ |
i̱no vā̍ma̱nyaḥ pa̍da̱vīrada̍bdho̱ jana̍ṃ ca mi̱tro ya̍tati bruvā̱ṇaḥ
||2||ā vāta̍sya̱ dhraja̍to ranta i̱tyā apī̍payanta dhe̱navo̱ na sūdā̍: |
ma̱ho di̱vaḥ sada̍ne̱ jāya̍mā̱no'ci̍kradadvṛṣa̱bhaḥ sasmi̱nnūdha̍n
||3||gi̱rā ya e̱tā yu̱naja̱ddharī̍ ta̱ indra̍ pri̱yā su̱rathā̍ śūra dhā̱yū |
pra yo ma̱nyuṃ riri̍kṣato mi̱nātyā su̱kratu̍marya̱maṇa̍ṃ vavṛtyām
||4||yaja̍nte asya sa̱khyaṃ vaya̍śca nama̱svina̱: sva ṛ̱tasya̱ dhāma̍n |
vi pṛkṣo̍ bābadhe̱ nṛbhi̱: stavā̍na i̱daṃ namo̍ ru̱drāya̱ preṣṭha̍m
||5||ā yatsā̱kaṃ ya̱śaso̍ vāvaśā̱nāḥ sara̍svatī sa̱ptathī̱ sindhu̍mātā |
yāḥ su̱ṣvaya̍nta su̱dughā̍: sudhā̱rā a̱bhi svena̱ paya̍sā̱ pīpyā̍nāḥ
||6||u̱ta tye no̍ ma̱ruto̍ mandasā̱nā dhiya̍ṃ to̱kaṃ ca̍ vā̱jino̍'vantu |
mā na̱: pari̍ khya̱dakṣa̍rā̱ cara̱ntyavī̍vṛdha̱nyujya̱ṃ te ra̱yiṃ na̍:
||7||pra vo̍ ma̱hīma̱rama̍tiṃ kṛṇudhva̱ṃ pra pū̱ṣaṇa̍ṃ vida̱thyaṃ1 na vī̱ram |
bhaga̍ṃ dhi̱yo̍'vi̱tāra̍ṃ no a̱syāḥ sā̱tau vāja̍ṃ rāti̱ṣāca̱ṃ pura̍ṃdhim
||8||acchā̱yaṃ vo̍ maruta̱: śloka̍ e̱tvacchā̱ viṣṇu̍ṃ niṣikta̱pāmavo̍bhiḥ |
u̱ta pra̱jāyai̍ gṛṇa̱te vayo̍ dhuryū̱yaṃ pā̍ta sva̱stibhi̱: sadā̍ naḥ
||9||8 maitrāvaruṇirvasiṣṭha:| viśve devā: | triṣṭup |
ā vo̱ vāhi̍ṣṭho vahatu sta̱vadhyai̱ ratho̍ vājā ṛbhukṣaṇo̱ amṛ̍ktaḥ |
a̱bhi tri̍pṛ̱ṣṭhaiḥ sava̍neṣu̱ somai̱rmade̍ suśiprā ma̱habhi̍: pṛṇadhvam
||1||yū̱yaṃ ha̱ ratna̍ṃ ma̱ghava̍tsu dhattha sva̱rdṛśa̍ ṛbhukṣaṇo̱ amṛ̍ktam |
saṃ ya̱jñeṣu̍ svadhāvantaḥ pibadhva̱ṃ vi no̱ rādhā̍ṃsi ma̱tibhi̍rdayadhvam
||2||u̱voci̍tha̱ hi ma̍ghavande̱ṣṇaṃ ma̱ho arbha̍sya̱ vasu̍no vibhā̱ge |
u̱bhā te̍ pū̱rṇā vasu̍nā̱ gabha̍stī̱ na sū̱nṛtā̱ ni ya̍mate vasa̱vyā̍
||3||tvami̍ndra̱ svaya̍śā ṛbhu̱kṣā vājo̱ na sā̱dhurasta̍me̱ṣyṛkvā̍ |
va̱yaṃ nu te̍ dā̱śvāṃsa̍: syāma̱ brahma̍ kṛ̱ṇvanto̍ harivo̱ vasi̍ṣṭhāḥ
||4||sani̍tāsi pra̱vato̍ dā̱śuṣe̍ ci̱dyābhi̱rvive̍ṣo haryaśva dhī̱bhiḥ |
va̱va̱nmā nu te̱ yujyā̍bhirū̱tī ka̱dā na̍ indra rā̱ya ā da̍śasyeḥ
||5||vā̱saya̍sīva ve̱dhasa̱stvaṃ na̍: ka̱dā na̍ indra̱ vaca̍so bubodhaḥ |
asta̍ṃ tā̱tyā dhi̱yā ra̱yiṃ su̱vīra̍ṃ pṛ̱kṣo no̱ arvā̱ nyu̍hīta vā̱jī
||6||a̱bhi yaṃ de̱vī niṝ̍tiści̱dīśe̱ nakṣa̍nta̱ indra̍ṃ śa̱rada̍: su̱pṛkṣa̍: |
upa̍ triba̱ndhurja̱rada̍ṣṭime̱tyasva̍veśa̱ṃ yaṃ kṛ̱ṇava̍nta̱ martā̍:
||7||ā no̱ rādhā̍ṃsi savita sta̱vadhyā̱ ā rāyo̍ yantu̱ parva̍tasya rā̱tau | sa
dā̍ no di̱vyaḥ pā̱yuḥ si̍ṣaktu yū̱yaṃ pā̍ta sva̱stibhi̱: sadā̍ naḥ
||8||8 maitrāvaruṇirvasiṣṭha:| 1-6 savitā , 6 uttarārdhasya bhago vā , 7-8 vājina: | triṣṭup |
udu̱ ṣya de̱vaḥ sa̍vi̱tā ya̍yāma hira̱ṇyayī̍ma̱mati̱ṃ yāmaśi̍śret |
nū̱naṃ bhago̱ havyo̱ mānu̍ṣebhi̱rvi yo ratnā̍ purū̱vasu̱rdadhā̍ti
||1||udu̍ tiṣṭha savitaḥ śru̱dhya1sya hira̍ṇyapāṇe̱ prabhṛ̍tāvṛ̱tasya̍ |
vyu1rvīṃ pṛ̱thvīma̱mati̍ṃ sṛjā̱na ā nṛbhyo̍ marta̱bhoja̍naṃ suvā̱naḥ
||2||api̍ ṣṭu̱taḥ sa̍vi̱tā de̱vo a̍stu̱ yamā ci̱dviśve̱ vasa̍vo gṛ̱ṇanti̍ |
sa na̱: stomā̍nnama̱sya1ścano̍ dhā̱dviśve̍bhiḥ pātu pā̱yubhi̱rni sū̱rīn
||3||a̱bhi yaṃ de̱vyadi̍tirgṛ̱ṇāti̍ sa̱vaṃ de̱vasya̍ savi̱turju̍ṣā̱ṇā |
a̱bhi sa̱mrājo̱ varu̍ṇo gṛṇantya̱bhi mi̱trāso̍ arya̱mā sa̱joṣā̍:
||4||a̱bhi ye mi̱tho va̱nuṣa̱: sapa̍nte rā̱tiṃ di̱vo rā̍ti̱ṣāca̍: pṛthi̱vyāḥ |
ahi̍rbu̱dhnya̍ u̱ta na̍: śṛṇotu̱ varū̱tryeka̍dhenubhi̱rni pā̍tu
||5||anu̱ tanno̱ jāspati̍rmaṃsīṣṭa̱ ratna̍ṃ de̱vasya̍ savi̱turi̍yā̱naḥ |
bhaga̍mu̱gro'va̍se̱ joha̍vīti̱ bhaga̱manu̍gro̱ adha̍ yāti̱ ratna̍m
||6||śaṃ no̍ bhavantu vā̱jino̱ have̍ṣu de̱vatā̍tā mi̱tadra̍vaḥ sva̱rkāḥ |
ja̱mbhaya̱nto'hi̱ṃ vṛka̱ṃ rakṣā̍ṃsi̱ sane̍mya̱smadyu̍yava̱nnamī̍vāḥ
||7||vāje̍vāje'vata vājino no̱ dhane̍ṣu viprā amṛtā ṛtajñāḥ |
a̱sya madhva̍: pibata mā̱daya̍dhvaṃ tṛ̱ptā yā̍ta pa̱thibhi̍rdeva̱yānai̍:
||8||7 maitrāvaruṇirvasiṣṭha:| viśve devā: | triṣṭup |
ū̱rdhvo a̱gniḥ su̍ma̱tiṃ vasvo̍ aśretpratī̱cī jū̱rṇirde̱vatā̍timeti |
bhe̱jāte̱ adrī̍ ra̱thye̍va̱ panthā̍mṛ̱taṃ hotā̍ na iṣi̱to ya̍jāti
||1||pra vā̍vṛje supra̱yā ba̱rhire̍ṣā̱mā vi̱śpatī̍va̱ bīri̍ṭa iyāte |
vi̱śāma̱ktoru̱ṣasa̍: pū̱rvahū̍tau vā̱yuḥ pū̱ṣā sva̱staye̍ ni̱yutvā̍n
||2||jma̱yā atra̱ vasa̍vo ranta de̱vā u̱rāva̱ntari̍kṣe marjayanta śu̱bhrāḥ |
a̱rvākpa̱tha u̍rujrayaḥ kṛṇudhva̱ṃ śrotā̍ dū̱tasya̍ ja̱gmuṣo̍ no a̱sya
||3||te hi ya̱jñeṣu̍ ya̱jñiyā̍sa̱ ūmā̍: sa̱dhastha̱ṃ viśve̍ a̱bhi santi̍ de̱vāḥ |
tām̐ a̍dhva̱ra u̍śa̱to ya̍kṣyagne śru̱ṣṭī bhaga̱ṃ nāsa̍tyā̱ pura̍ṃdhim
||4||āgne̱ giro̍ di̱va ā pṛ̍thi̱vyā mi̱traṃ va̍ha̱ varu̍ṇa̱mindra̍ma̱gnim |
ārya̱maṇa̱madi̍ti̱ṃ viṣṇu̍meṣā̱ṃ sara̍svatī ma̱ruto̍ mādayantām
||5||ra̱re ha̱vyaṃ ma̱tibhi̍rya̱jñiyā̍nā̱ṃ nakṣa̱tkāma̱ṃ martyā̍nā̱masi̍nvan |
dhātā̍ ra̱yima̍vida̱syaṃ sa̍dā̱sāṃ sa̍kṣī̱mahi̱ yujye̍bhi̱rnu de̱vaiḥ
||6||nū roda̍sī a̱bhiṣṭu̍te̱ vasi̍ṣṭhaiṝ̱tāvā̍no̱ varu̍ṇo mi̱tro a̱gniḥ |
yaccha̍ntu ca̱ndrā u̍pa̱maṃ no̍ a̱rkaṃ yū̱yaṃ pā̍ta sva̱stibhi̱: sadā̍ naḥ
||7||7 maitrāvaruṇirvasiṣṭha:| viśve devā: | triṣṭup |
o śru̱ṣṭirvi̍da̱thyā̱3 same̍tu̱ prati̱ stoma̍ṃ dadhīmahi tu̱rāṇā̍m |
yada̱dya de̱vaḥ sa̍vi̱tā su̱vāti̱ syāmā̍sya ra̱tnino̍ vibhā̱ge
||1||mi̱trastanno̱ varu̍ṇo̱ roda̍sī ca̱ dyubha̍kta̱mindro̍ arya̱mā da̍dātu |
dide̍ṣṭu de̱vyadi̍tī̱ rekṇo̍ vā̱yuśca̱ yanni̍yu̱vaite̱ bhaga̍śca
||2||sedu̱gro a̍stu maruta̱: sa śu̱ṣmī yaṃ martya̍ṃ pṛṣadaśvā̱ avā̍tha |
u̱tema̱gniḥ sara̍svatī ju̱nanti̱ na tasya̍ rā̱yaḥ pa̍rye̱tāsti̍
||3||a̱yaṃ hi ne̱tā varu̍ṇa ṛ̱tasya̍ mi̱tro rājā̍no arya̱māpo̱ dhuḥ |
su̱havā̍ de̱vyadi̍tirana̱rvā te no̱ aṃho̱ ati̍ parṣa̱nnari̍ṣṭān
||4||a̱sya de̱vasya̍ mī̱l̤huṣo̍ va̱yā viṣṇo̍re̱ṣasya̍ prabhṛ̱the ha̱virbhi̍: |
vi̱de hi ru̱dro ru̱driya̍ṃ mahi̱tvaṃ yā̍si̱ṣṭaṃ va̱rtira̍śvinā̱virā̍vat
||5||mātra̍ pūṣannāghṛṇa irasyo̱ varū̍trī̱ yadrā̍ti̱ṣāca̍śca̱ rāsa̍n |
ma̱yo̱bhuvo̍ no̱ arva̍nto̱ ni pā̍ntu vṛ̱ṣṭiṃ pari̍jmā̱ vāto̍ dadātu
||6||nū roda̍sī a̱bhiṣṭu̍te̱ vasi̍ṣṭhaiṝ̱tāvā̍no̱ varu̍ṇo mi̱tro a̱gniḥ |
yaccha̍ntu ca̱ndrā u̍pa̱maṃ no̍ a̱rkaṃ yū̱yaṃ pā̍ta sva̱stibhi̱: sadā̍ naḥ
||7||7 maitrāvaruṇirvasiṣṭha:|1 agnīndramitrāvaruṇāśvibhagapūṣabrahmaṇaspatisomarudrā:, 2-6 bhaga:, 7 uṣasa:| triṣṭup , 1 jagatī |
prā̱tara̱gniṃ prā̱tarindra̍ṃ havāmahe prā̱tarmi̱trāvaru̍ṇā prā̱tara̱śvinā̍ |
prā̱tarbhaga̍ṃ pū̱ṣaṇa̱ṃ brahma̍ṇa̱spati̍ṃ prā̱taḥ soma̍mu̱ta ru̱draṃ hu̍vema
||1||prā̱ta̱rjita̱ṃ bhaga̍mu̱graṃ hu̍vema va̱yaṃ pu̱tramadi̍te̱ryo vi̍dha̱rtā |
ā̱dhraści̱dyaṃ manya̍mānastu̱raści̱drājā̍ ci̱dyaṃ bhaga̍ṃ bha̱kṣītyāha̍
||2||bhaga̱ praṇe̍ta̱rbhaga̱ satya̍rādho̱ bhage̱māṃ dhiya̱muda̍vā̱ dada̍nnaḥ |
bhaga̱ pra ṇo̍ janaya̱ gobhi̱raśvai̱rbhaga̱ pra nṛbhi̍rnṛ̱vanta̍: syāma
||3||u̱tedānī̱ṃ bhaga̍vantaḥ syāmo̱ta pra̍pi̱tva u̱ta madhye̱ ahnā̍m |
u̱todi̍tā maghava̱ntsūrya̍sya va̱yaṃ de̱vānā̍ṃ suma̱tau syā̍ma
||4||bhaga̍ e̱va bhaga̍vām̐ astu devā̱stena̍ va̱yaṃ bhaga̍vantaḥ syāma |
taṃ tvā̍ bhaga̱ sarva̱ ijjo̍havīti̱ sa no̍ bhaga purae̱tā bha̍ve̱ha
||5||sama̍dhva̱rāyo̱ṣaso̍ namanta dadhi̱krāve̍va̱ śuca̍ye pa̱dāya̍ |
a̱rvā̱cī̱naṃ va̍su̱vida̱ṃ bhaga̍ṃ no̱ ratha̍mi̱vāśvā̍ vā̱jina̱ ā va̍hantu
||6||aśvā̍vatī̱rgoma̍tīrna u̱ṣāso̍ vī̱rava̍tī̱: sada̍mucchantu bha̱drāḥ |
ghṛ̱taṃ duhā̍nā vi̱śvata̱: prapī̍tā yū̱yaṃ pā̍ta sva̱stibhi̱: sadā̍ naḥ
||7||6 maitrāvaruṇirvasiṣṭha:| viśve devā: | triṣṭup |
pra bra̱hmāṇo̱ aṅgi̍raso nakṣanta̱ pra kra̍nda̱nurna̍bha̱nya̍sya vetu |
pra dhe̱nava̍ uda̱pruto̍ navanta yu̱jyātā̱madrī̍ adhva̱rasya̱ peśa̍:
||1||su̱gaste̍ agne̱ sana̍vitto̱ adhvā̍ yu̱kṣvā su̱te ha̱rito̍ ro̱hita̍śca |
ye vā̱ sadma̍nnaru̱ṣā vī̍ra̱vāho̍ hu̱ve de̱vānā̱ṃ jani̍māni sa̱ttaḥ
||2||samu̍ vo ya̱jñaṃ ma̍haya̱nnamo̍bhi̱: pra hotā̍ ma̱ndro ri̍rica upā̱ke |
yaja̍sva̱ su pu̍rvaṇīka de̱vānā ya̱jñiyā̍ma̱rama̍tiṃ vavṛtyāḥ
||3||ya̱dā vī̱rasya̍ re̱vato̍ duro̱ṇe syo̍na̱śīrati̍thirā̱cike̍tat |
suprī̍to a̱gniḥ sudhi̍to̱ dama̱ ā sa vi̱śe dā̍ti̱ vārya̱miya̍tyai
||4||i̱maṃ no̍ agne adhva̱raṃ ju̍ṣasva ma̱rutsvindre̍ ya̱śasa̍ṃ kṛdhī naḥ |
ā naktā̍ ba̱rhiḥ sa̍datāmu̱ṣāso̱śantā̍ mi̱trāvaru̍ṇā yaje̱ha
||5||e̱vāgniṃ sa̍ha̱syaṃ1 vasi̍ṣṭho rā̱yaskā̍mo vi̱śvapsnya̍sya staut |
iṣa̍ṃ ra̱yiṃ pa̍pratha̱dvāja̍ma̱sme yū̱yaṃ pā̍ta sva̱stibhi̱: sadā̍ naḥ
||6||5 maitrāvaruṇirvasiṣṭha:| viśve devā: | triṣṭup |
pra vo̍ ya̱jñeṣu̍ deva̱yanto̍ arca̱ndyāvā̱ namo̍bhiḥ pṛthi̱vī i̱ṣadhyai̍ |
yeṣā̱ṃ brahmā̱ṇyasa̍māni̱ viprā̱ viṣva̍gvi̱yanti̍ va̱nino̱ na śākhā̍:
||1||pra ya̱jña e̍tu̱ hetvo̱ na sapti̱rudya̍cchadhva̱ṃ sama̍naso ghṛ̱tācī̍: |
stṛ̱ṇī̱ta ba̱rhira̍dhva̱rāya̍ sā̱dhūrdhvā śo̱cīṃṣi̍ deva̱yūnya̍sthuḥ
||2||ā pu̱trāso̱ na mā̱tara̱ṃ vibhṛ̍trā̱: sānau̍ de̱vāso̍ ba̱rhiṣa̍: sadantu |
ā vi̱śvācī̍ vida̱thyā̍mana̱ktvagne̱ mā no̍ de̱vatā̍tā̱ mṛdha̍skaḥ
||3||te sī̍ṣapanta̱ joṣa̱mā yaja̍trā ṛ̱tasya̱ dhārā̍: su̱dughā̱ duhā̍nāḥ |
jyeṣṭha̍ṃ vo a̱dya maha̱ ā vasū̍nā̱mā ga̍ntana̱ sama̍naso̱ yati̱ ṣṭha
||4||e̱vā no̍ agne vi̱kṣvā da̍śasya̱ tvayā̍ va̱yaṃ sa̍hasāva̱nnāskrā̍: |
rā̱yā yu̱jā sa̍dha̱mādo̱ ari̍ṣṭā yū̱yaṃ pā̍ta sva̱stibhi̱: sadā̍ naḥ
||5||5 maitrāvaruṇirvasiṣṭha:| dadhikā:, 1 dadhikāśvyuṣo' gnibhagendraviṣṇupūṣabrahmaṇaspatyādityadyāvāpṛthivyāpa:| triṣṭup ,1 jagatī|
da̱dhi̱krāṃ va̍: pratha̱mama̱śvino̱ṣasa̍ma̱gniṃ sami̍ddha̱ṃ bhaga̍mū̱taye̍ huve |
indra̱ṃ viṣṇu̍ṃ pū̱ṣaṇa̱ṃ brahma̍ṇa̱spati̍mādi̱tyāndyāvā̍pṛthi̱vī a̱paḥ sva̍:
||1||da̱dhi̱krāmu̱ nama̍sā bo̱dhaya̍nta u̱dīrā̍ṇā ya̱jñamu̍papra̱yanta̍: |
il̤ā̍ṃ de̱vīṃ ba̱rhiṣi̍ sā̱daya̍nto̱'śvinā̱ viprā̍ su̱havā̍ huvema
||2||da̱dhi̱krāvā̍ṇaṃ bubudhā̱no a̱gnimupa̍ bruva u̱ṣasa̱ṃ sūrya̱ṃ gām |
bra̱dhnaṃ ma̍ṃśca̱torvaru̍ṇasya ba̱bhruṃ te viśvā̱smaddu̍ri̱tā yā̍vayantu
||3||da̱dhi̱krāvā̍ pratha̱mo vā̱jyarvā'gre̱ rathā̍nāṃ bhavati prajā̱nan |
sa̱ṃvi̱dā̱na u̱ṣasā̱ sūrye̍ṇā''di̱tyebhi̱rvasu̍bhi̱raṅgi̍robhiḥ
||4||ā no̍ dadhi̱krāḥ pa̱thyā̍manaktvṛ̱tasya̱ panthā̱manve̍ta̱vā u̍ |
śṛ̱ṇotu̍ no̱ daivya̱ṃ śardho̍ a̱gniḥ śṛ̱ṇvantu̱ viśve̍ mahi̱ṣā amū̍rāḥ
||5||4 maitrāvaruṇirvasiṣṭha:| savitā | triṣṭup |
ā de̱vo yā̍tu savi̱tā su̱ratno̍'ntarikṣa̱prā vaha̍māno̱ aśvai̍: |
haste̱ dadhā̍no̱ naryā̍ pu̱rūṇi̍ nive̱śaya̍ñca prasu̱vañca̱ bhūma̍
||1||uda̍sya bā̱hū śi̍thi̱rā bṛ̱hantā̍ hira̱ṇyayā̍ di̱vo antā̍m̐ anaṣṭām |
nū̱naṃ so a̍sya mahi̱mā pa̍niṣṭa̱ sūra̍ścidasmā̱ anu̍ dādapa̱syām
||2||sa ghā̍ no de̱vaḥ sa̍vi̱tā sa̱hāvā ''sā̍viṣa̱dvasu̍pati̱rvasū̍ni |
vi̱śraya̍māṇo a̱mati̍murū̱cīṃ ma̍rta̱bhoja̍na̱madha̍ rāsate naḥ
||3||i̱mā gira̍: savi̱tāra̍ṃ suji̱hvaṃ pū̱rṇaga̍bhastimīl̤ate supā̱ṇim |
ci̱traṃ vayo̍ bṛ̱hada̱sme da̍dhātu yū̱yaṃ pā̍ta sva̱stibhi̱: sadā̍ naḥ
||4||4 maitrāvaruṇirvasiṣṭha:|rūdra:| jagatī, 4 triṣṭup |
i̱mā ru̱drāya̍ sthi̱radha̍nvane̱ gira̍: kṣi̱preṣa̍ve de̱vāya̍ sva̱dhāvne̍ |
aṣā̍l̤hāya̱ saha̍mānāya ve̱dhase̍ ti̱gmāyu̍dhāya bharatā śṛ̱ṇotu̍ naḥ
||1||sa hi kṣaye̍ṇa̱ kṣamya̍sya̱ janma̍na̱: sāmrā̍jyena di̱vyasya̱ ceta̍ti |
ava̱nnava̍ntī̱rupa̍ no̱ dura̍ścarānamī̱vo ru̍dra̱ jāsu̍ no bhava
||2||yā te̍ di̱dyudava̍sṛṣṭā di̱vaspari̍ kṣma̱yā cara̍ti̱ pari̱ sā vṛ̍ṇaktu naḥ |
sa̱hasra̍ṃ te svapivāta bheṣa̱jā mā na̍sto̱keṣu̱ tana̍yeṣu rīriṣaḥ
||3||mā no̍ vadhī rudra̱ mā parā̍ dā̱ mā te̍ bhūma̱ prasi̍tau hīl̤i̱tasya̍ |
ā no̍ bhaja ba̱rhiṣi̍ jīvaśa̱ṃse yū̱yaṃ pā̍ta sva̱stibhi̱: sadā̍ naḥ
||4||4 maitrāvaruṇirvasiṣṭha:|āpa:| triṣṭup |
āpo̱ yaṃ va̍: pratha̱maṃ de̍va̱yanta̍ indra̱pāna̍mū̱rmimakṛ̍ṇvate̱l̤aḥ |
taṃ vo̍ va̱yaṃ śuci̍mari̱prama̱dya ghṛ̍ta̱pruṣa̱ṃ madhu̍mantaṃ vanema
||1||tamū̱rmimā̍po̱ madhu̍mattamaṃ vo̱'pāṃ napā̍davatvāśu̱hemā̍ |
yasmi̱nnindro̱ vasu̍bhirmā̱dayā̍te̱ tama̍śyāma deva̱yanto̍ vo a̱dya
||2||śa̱tapa̍vitrāḥ sva̱dhayā̱ mada̍ntīrde̱vīrde̱vānā̱mapi̍ yanti̱ pātha̍: |
tā indra̍sya̱ na mi̍nanti vra̱tāni̱ sindhu̍bhyo ha̱vyaṃ ghṛ̱tava̍jjuhota
||3||yāḥ sūryo̍ ra̱śmibhi̍rāta̱tāna̱ yābhya̱ indro̱ ara̍dadgā̱tumū̱rmim |
te si̍ndhavo̱ vari̍vo dhātanā no yū̱yaṃ pā̍ta sva̱stibhi̱: sadā̍ naḥ
||4||4 maitrāvaruṇirvasiṣṭha:| ṛbhava:, 4 viśve devā vā | triṣṭup |
ṛbhu̍kṣaṇo vājā mā̱daya̍dhvama̱sme na̍ro maghavānaḥ su̱tasya̍ |
ā vo̱'rvāca̱: krata̍vo̱ na yā̱tāṃ vibhvo̱ ratha̱ṃ narya̍ṃ vartayantu
||1||ṛ̱bhuṝ̱bhubhi̍ra̱bhi va̍: syāma̱ vibhvo̍ vi̱bhubhi̱: śava̍sā̱ śavā̍ṃsi |
vājo̍ a̱smām̐ a̍vatu̱ vāja̍sātā̱vindre̍ṇa yu̱jā ta̍ruṣema vṛ̱tram
||2||te ci̱ddhi pū̱rvīra̱bhi santi̍ śā̱sā viśvā̍m̐ a̱rya u̍pa̱ratā̍ti vanvan | i
ndro̱ vibhvā̍m̐ ṛbhu̱kṣā vājo̍ a̱ryaḥ śatro̍rmitha̱tyā kṛ̍ṇava̱nvi nṛ̱mṇam
||3||nū de̍vāso̱ vari̍vaḥ kartanā no bhū̱ta no̱ viśve'va̍se sa̱joṣā̍: |
sama̱sme iṣa̱ṃ vasa̍vo dadīranyū̱yaṃ pā̍ta sva̱stibhi̱: sadā̍ naḥ
||4||4 maitrāvaruṇirvasiṣṭha:| āpa: | triṣṭup |
sa̱mu̱drajye̍ṣṭhāḥ sali̱lasya̱ madhyā̍tpunā̱nā ya̱ntyani̍viśamānāḥ |
indro̱ yā va̱jrī vṛ̍ṣa̱bho ra̱rāda̱ tā āpo̍ de̱vīri̱ha māma̍vantu
||1||yā āpo̍ di̱vyā u̱ta vā̱ srava̍nti kha̱nitri̍mā u̱ta vā̱ yāḥ sva̍ya̱ṃjāḥ |
sa̱mu̱drārthā̱ yāḥ śuca̍yaḥ pāva̱kāstā āpo̍ de̱vīri̱ha māma̍vantu
||2||yāsā̱ṃ rājā̱ varu̍ṇo̱ yāti̱ madhye̍ satyānṛ̱te a̍va̱paśya̱ñjanā̍nām |
ma̱dhu̱ścuta̱: śuca̍yo̱ yāḥ pā̍va̱kāstā āpo̍ de̱vīri̱ha māma̍vantu
||3||yāsu̱ rājā̱ varu̍ṇo̱ yāsu̱ somo̱ viśve̍ de̱vā yāsūrja̱ṃ mada̍nti |
vai̱śvā̱na̱ro yāsva̱gniḥ pravi̍ṣṭa̱stā āpo̍ de̱vīri̱ha māma̍vantu
||4||4 maitrāvaruṇirvasiṣṭha:|1 mitrāvaruṇau,2 agni:, 3 viśve devā:, 4nadya: | jagatī ,4 atijagatī śakvvarī vā |
ā māṃ mi̍trāvaruṇe̱ha ra̍kṣataṃ kulā̱yaya̍dvi̱śvaya̱nmā na̱ ā ga̍n |
a̱ja̱kā̱vaṃ du̱rdṛśī̍kaṃ ti̱ro da̍dhe̱ mā māṃ padye̍na̱ rapa̍sā vida̱ttsaru̍:
||1||yadvi̱jāma̱nparu̍ṣi̱ vanda̍na̱ṃ bhuva̍daṣṭhī̱vantau̱ pari̍ ku̱lphau ca̱ deha̍t |
a̱gniṣṭacchoca̱nnapa̍ bādhatāmi̱to mā māṃ padye̍na̱ rapa̍sā vida̱ttsaru̍:
||2||yaccha̍lma̱lau bhava̍ti̱ yanna̱dīṣu̱ yadoṣa̍dhībhya̱: pari̱ jāya̍te vi̱ṣam |
viśve̍ de̱vā niri̱tastatsu̍vantu̱ mā māṃ padye̍na̱ rapa̍sā vida̱ttsaru̍:
||3||yāḥ pra̱vato̍ ni̱vata̍ u̱dvata̍ uda̱nvatī̍ranuda̱kāśca̱ yāḥ |
tā a̱smabhya̱ṃ paya̍sā̱ pinva̍mānāḥ śi̱vā de̱vīra̍śipa̱dā bha̍vantu̱ sarvā̍ na̱dyo̍ aśimi̱dā bha̍vantu
||4||3 maitrāvaruṇirvasiṣṭha:| ādityā: | triṣṭup |
ā̱di̱tyānā̱mava̍sā̱ nūta̍nena sakṣī̱mahi̱ śarma̍ṇā̱ śaṃta̍mena |
a̱nā̱gā̱stve a̍diti̱tve tu̱rāsa̍ i̱maṃ ya̱jñaṃ da̍dhatu̱ śroṣa̍māṇāḥ
||1||ā̱di̱tyāso̱ adi̍tirmādayantāṃ mi̱tro a̍rya̱mā varu̍ṇo̱ raji̍ṣṭhāḥ |
a̱smāka̍ṃ santu̱ bhuva̍nasya go̱pāḥ piba̍ntu̱ soma̱mava̍se no a̱dya
||2||ā̱di̱tyā viśve̍ ma̱ruta̍śca̱ viśve̍ de̱vāśca̱ viśva̍ ṛ̱bhava̍śca̱ viśve̍ |
indro̍ a̱gnira̱śvinā̍ tuṣṭuvā̱nā yū̱yaṃ pā̍ta sva̱stibhi̱: sadā̍ naḥ
||3||3 maitrāvaruṇirvasiṣṭha:| ādityā: | triṣṭup |
ā̱di̱tyāso̱ adi̍tayaḥ syāma̱ pūrde̍va̱trā va̍savo martya̱trā |
sane̍ma mitrāvaruṇā̱ sana̍nto̱ bhave̍ma dyāvāpṛthivī̱ bhava̍ntaḥ
||1||mi̱trastanno̱ varu̍ṇo māmahanta̱ śarma̍ to̱kāya̱ tana̍yāya go̱pāḥ |
mā vo̍ bhujemā̱nyajā̍ta̱meno̱ mā tatka̍rma vasavo̱ yaccaya̍dhve
||2||tu̱ra̱ṇyavo'ṅgi̍raso nakṣanta̱ ratna̍ṃ de̱vasya̍ savi̱turi̍yā̱nāḥ |
pi̱tā ca̱ tanno̍ ma̱hānyaja̍tro̱ viśve̍ de̱vāḥ sama̍naso juṣanta
||3||3 maitrāvaruṇirvasiṣṭha:| dyāvāpṛthivī|triṣṭup |
pra dyāvā̍ ya̱jñaiḥ pṛ̍thi̱vī namo̍bhiḥ sa̱bādha̍ īl̤e bṛha̱tī yaja̍tre |
te ci̱ddhi pūrve̍ ka̱vayo̍ gṛ̱ṇanta̍: pu̱ro ma̱hī da̍dhi̱re de̱vapu̍tre
||1||pra pū̍rva̱je pi̱tarā̱ navya̍sībhirgī̱rbhiḥ kṛ̍ṇudhva̱ṃ sada̍ne ṛ̱tasya̍ |
ā no̍ dyāvāpṛthivī̱ daivye̍na̱ jane̍na yāta̱ṃ mahi̍ vā̱ṃ varū̍tham
||2||u̱to hi vā̍ṃ ratna̱dheyā̍ni̱ santi̍ pu̱rūṇi̍ dyāvāpṛthivī su̱dāse̍ |
a̱sme dha̍tta̱ṃ yadasa̱daskṛ̍dhoyu yū̱yaṃ pā̍ta sva̱stibhi̱: sadā̍ naḥ
||3||3 maitrāvaruṇirvasiṣṭha:| vāstoṣpati:| triṣṭup |
vāsto̍ṣpate̱ prati̍ jānīhya̱smāntsvā̍ve̱śo a̍namī̱vo bha̍vā naḥ |
yattvema̍he̱ prati̱ tanno̍ juṣasva̱ śaṃ no̍ bhava dvi̱pade̱ śaṃ catu̍ṣpade
||1||vāsto̍ṣpate pra̱tara̍ṇo na edhi gaya̱sphāno̱ gobhi̱raśve̍bhirindo |
a̱jarā̍saste sa̱khye syā̍ma pi̱teva̍ pu̱trānprati̍ no juṣasva
||2||vāsto̍ṣpate śa̱gmayā̍ sa̱ṃsadā̍ te sakṣī̱mahi̍ ra̱ṇvayā̍ gātu̱matyā̍ |
pā̱hi kṣema̍ u̱ta yoge̱ vara̍ṃ no yū̱yaṃ pā̍ta sva̱stibhi̱: sadā̍ naḥ
||3||8 maitrāvaruṇirvasiṣṭha:| vāstoṣpati:, 2- 8 indra:( 2-8 prasvāpinī upaniṣad ) |1 gāyatrī, 2-4 upariṣṭādbṛhatī, 5-8 anuṣṭup |
a̱mī̱va̱hā vā̍stoṣpate̱ viśvā̍ rū̱pāṇyā̍vi̱śan | sakhā̍ su̱śeva̍ edhi naḥ
||1||yada̍rjuna sārameya da̱taḥ pi̍śaṅga̱ yaccha̍se | vī̍va bhrājanta ṛ̱ṣṭaya̱ upa̱ srakve̍ṣu̱ bapsa̍to̱ ni ṣu sva̍pa
||2||ste̱naṃ rā̍ya sārameya̱ taska̍raṃ vā punaḥsara | sto̱tṝnindra̍sya rāyasi̱ kima̱smāndu̍cchunāyase̱ ni ṣu sva̍pa
||3||tvaṃ sū̍ka̱rasya̍ dardṛhi̱ tava̍ dardartu sūka̱raḥ | sto̱tṝnindra̍sya rāyasi̱ kima̱smāndu̍cchunāyase̱ ni ṣu sva̍pa
||4||sastu̍ mā̱tā sastu̍ pi̱tā sastu̱ śvā sastu̍ vi̱śpati̍: | sa̱santu̱ sarve̍ jñā̱taya̱: sastva̱yama̱bhito̱ jana̍:
||5||ya āste̱ yaśca̱ cara̍ti̱ yaśca̱ paśya̍ti no̱ jana̍: | teṣā̱ṃ saṃ ha̍nmo a̱kṣāṇi̱ yathe̱daṃ ha̱rmyaṃ tathā̍
||6||sa̱hasra̍śṛṅgo vṛṣa̱bho yaḥ sa̍mu̱drādu̱dāca̍rat | tenā̍ saha̱sye̍nā va̱yaṃ ni janā̍ntsvāpayāmasi
||7||pro̱ṣṭhe̱śa̱yā va̍hyeśa̱yā nārī̱ryāsta̍lpa̱śīva̍rīḥ | striyo̱ yāḥ puṇya̍gandhā̱stāḥ sarvā̍: svāpayāmasi
||8||25 maitrāvaruṇirvasiṣṭha:| maruta: | triṣṭup , 1-11 dvipadā virāṭ |
ka ī̱ṃ vya̍ktā̱ nara̱: sanī̍l̤ā ru̱drasya̱ maryā̱ adha̱ svaśvā̍: 1
naki̱rhye̍ṣāṃ ja̱nūṃṣi̱ veda̱ te a̱ṅga vi̍dre mi̱tho ja̱nitra̍m
||1||2
a̱bhi sva̱pūbhi̍rmi̱tho va̍panta̱ vāta̍svanasaḥ śye̱nā a̍spṛdhran 3
e̱tāni̱ dhīro̍ ni̱ṇyā ci̍keta̱ pṛśni̱ryadūdho̍ ma̱hī ja̱bhāra̍
||2||4
sā viṭ su̱vīrā̍ ma̱rudbhi̍rastu sa̱nātsaha̍ntī̱ puṣya̍ntī nṛ̱mṇam 5
yāma̱ṃ yeṣṭhā̍: śu̱bhā śobhi̍ṣṭhāḥ śri̱yā sammi̍ślā̱ ojo̍bhiru̱grāḥ
||3||6
u̱graṃ va̱ oja̍: sthi̱rā śavā̱ṃsyadhā̍ ma̱rudbhi̍rga̱ṇastuvi̍ṣmān 7
śu̱bhro va̱: śuṣma̱: krudhmī̱ manā̍ṃsi̱ dhuni̱rmuni̍riva̱ śardha̍sya dhṛ̱ṣṇoḥ
||4||8
sane̍mya̱smadyu̱yota̍ di̱dyuṃ mā vo̍ durma̱tiri̱ha praṇa̍ṅnaḥ 9
pri̱yā vo̱ nāma̍ huve tu̱rāṇā̱mā yattṛ̱panma̍ruto vāvaśā̱nāḥ
||5||10
svā̱yu̱dhāsa̍ i̱ṣmiṇa̍: suni̱ṣkā u̱ta sva̱yaṃ ta̱nva1: śumbha̍mānāḥ
||6||11
śucī̍ vo ha̱vyā ma̍ruta̱: śucī̍nā̱ṃ śuci̍ṃ hinomyadhva̱raṃ śuci̍bhyaḥ |
ṛ̱tena̍ sa̱tyamṛ̍ta̱sāpa̍ āya̱ñchuci̍janmāna̱: śuca̍yaḥ pāva̱kāḥ
||12||aṃse̱ṣvā ma̍rutaḥ khā̱dayo̍ vo̱ vakṣa̍:su ru̱kmā u̍paśiśriyā̱ṇāḥ |
vi vi̱dyuto̱ na vṛ̱ṣṭibhī̍ rucā̱nā anu̍ sva̱dhāmāyu̍dhai̱ryaccha̍mānāḥ
||13||pra bu̱dhnyā̍ va īrate̱ mahā̍ṃsi̱ pra nāmā̍ni prayajyavastiradhvam |
sa̱ha̱sriya̱ṃ damya̍ṃ bhā̱game̱taṃ gṛ̍hame̱dhīya̍ṃ maruto juṣadhvam
||14||yadi̍ stu̱tasya̍ maruto adhī̱thetthā vipra̍sya vā̱jino̱ havī̍man |
ma̱kṣū rā̱yaḥ su̱vīrya̍sya dāta̱ nū ci̱dyama̱nya ā̱dabha̱darā̍vā
||15||atyā̍so̱ na ye ma̱ruta̱: svañco̍ yakṣa̱dṛśo̱ na śu̱bhaya̍nta̱ maryā̍: |
te ha̍rmye̱ṣṭhāḥ śiśa̍vo̱ na śu̱bhrā va̱tsāso̱ na pra̍krī̱l̤ina̍: payo̱dhāḥ
||16||da̱śa̱syanto̍ no ma̱ruto̍ mṛl̤antu variva̱syanto̱ roda̍sī su̱meke̍ |
ā̱re go̱hā nṛ̱hā va̱dho vo̍ astu su̱mnebhi̍ra̱sme va̍savo namadhvam
||17||ā vo̱ hotā̍ johavīti sa̱ttaḥ sa̱trācī̍ṃ rā̱tiṃ ma̍ruto gṛṇā̱naḥ |
ya īva̍to vṛṣaṇo̱ asti̍ go̱pāḥ so adva̍yāvī havate va u̱kthaiḥ
||18||i̱me tu̱raṃ ma̱ruto̍ rāmayantī̱me saha̱: saha̍sa̱ ā na̍manti |
i̱me śaṃsa̍ṃ vanuṣya̱to ni pā̍nti gu̱ru dveṣo̱ ara̍ruṣe dadhanti
||19||i̱me ra̱dhraṃ ci̍nma̱ruto̍ junanti̱ bhṛmi̍ṃ ci̱dyathā̱ vasa̍vo ju̱ṣanta̍ |
apa̍ bādhadhvaṃ vṛṣaṇa̱stamā̍ṃsi dha̱tta viśva̱ṃ tana̍yaṃ to̱kama̱sme
||20||mā vo̍ dā̱trānma̍ruto̱ nira̍rāma̱ mā pa̱ścādda̍ghma rathyo vibhā̱ge |
ā na̍: spā̱rhe bha̍jatanā vasa̱vye̱3 yadī̍ṃ sujā̱taṃ vṛ̍ṣaṇo vo̱ asti̍
||21||saṃ yaddhana̍nta ma̱nyubhi̱rjanā̍sa̱: śūrā̍ ya̱hvīṣvoṣa̍dhīṣu vi̱kṣu |
adha̍ smā no maruto rudriyāsastrā̱tāro̍ bhūta̱ pṛta̍nāsva̱ryaḥ
||22||bhūri̍ cakra maruta̱: pitryā̍ṇyu̱kthāni̱ yā va̍: śa̱syante̍ pu̱rā ci̍t |
ma̱rudbhi̍ru̱graḥ pṛta̍nāsu̱ sāl̤hā̍ ma̱rudbhi̱ritsani̍tā̱ vāja̱marvā̍
||23||a̱sme vī̱ro ma̍rutaḥ śu̱ṣmya̍stu̱ janā̍nā̱ṃ yo asu̍ro vidha̱rtā |
a̱po yena̍ sukṣi̱taye̱ tare̱mā'dha̱ svamoko̍ a̱bhi va̍: syāma
||24||tanna̱ indro̱ varu̍ṇo mi̱tro a̱gnirāpa̱ oṣa̍dhīrva̱nino̍ juṣanta |
śarma̍ntsyāma ma̱rutā̍mu̱pasthe̍ yū̱yaṃ pā̍ta sva̱stibhi̱: sadā̍ naḥ
||25||7 maitrāvaruṇirvasiṣṭha:|maruta:| triṣṭup |
madhvo̍ vo̱ nāma̱ māru̍taṃ yajatrā̱: pra ya̱jñeṣu̱ śava̍sā madanti |
ye re̱jaya̍nti̱ roda̍sī cidu̱rvī pinva̱ntyutsa̱ṃ yadayā̍suru̱grāḥ
||1||ni̱ce̱tāro̱ hi ma̱ruto̍ gṛ̱ṇanta̍ṃ praṇe̱tāro̱ yaja̍mānasya̱ manma̍ |
a̱smāka̍ma̱dya vi̱dathe̍ṣu ba̱rhirā vī̱taye̍ sadata pipriyā̱ṇāḥ
||2||naitāva̍da̱nye ma̱ruto̱ yathe̱me bhrāja̍nte ru̱kmairāyu̍dhaista̱nūbhi̍: |
ā roda̍sī viśva̱piśa̍: piśā̱nāḥ sa̍mā̱nama̱ñjya̍ñjate śu̱bhe kam
||3||ṛdha̱ksā vo̍ maruto di̱dyuda̍stu̱ yadva̱ āga̍: puru̱ṣatā̱ karā̍ma |
mā va̱stasyā̱mapi̍ bhūmā yajatrā a̱sme vo̍ astu suma̱tiścani̍ṣṭhā
||4||kṛ̱te ci̱datra̍ ma̱ruto̍ raṇantā'nava̱dyāsa̱: śuca̍yaḥ pāva̱kāḥ |
pra ṇo̍'vata suma̱tibhi̍ryajatrā̱: pra vāje̍bhistirata pu̱ṣyase̍ naḥ
||5||u̱ta stu̱tāso̍ ma̱ruto̍ vyantu̱ viśve̍bhi̱rnāma̍bhi̱rnaro̍ ha̱vīṃṣi̍ | da
dā̍ta no a̱mṛta̍sya pra̱jāyai̍ jigṛ̱ta rā̱yaḥ sū̱nṛtā̍ ma̱ghāni̍
||6||ā stu̱tāso̍ maruto̱ viśva̍ ū̱tī acchā̍ sū̱rīntsa̱rvatā̍tā jigāta |
ye na̱stmanā̍ śa̱tino̍ va̱rdhaya̍nti yū̱yaṃ pā̍ta sva̱stibhi̱: sadā̍ naḥ
||7||6 maitrāvaruṇirvasiṣṭha:| maruta:| triṣṭup |
pra sā̍ka̱mukṣe̍ arcatā ga̱ṇāya̱ yo daivya̍sya̱ dhāmna̱stuvi̍ṣmān |
u̱ta kṣo̍danti̱ roda̍sī mahi̱tvā nakṣa̍nte̱ nāka̱ṃ niṝ̍terava̱ṃśāt
||1||ja̱nūści̍dvo marutastve̱ṣye̍ṇa̱ bhīmā̍sa̱stuvi̍manya̱vo'yā̍saḥ |
pra ye maho̍bhi̱roja̍so̱ta santi̱ viśvo̍ vo̱ yāma̍nbhayate sva̱rdṛk
||2||bṛ̱hadvayo̍ ma̱ghava̍dbhyo dadhāta̱ jujo̍ṣa̱nninma̱ruta̍: suṣṭu̱tiṃ na̍: |
ga̱to nādhvā̱ vi ti̍rāti ja̱ntuṃ pra ṇa̍: spā̱rhābhi̍rū̱tibhi̍stireta
||3||yu̱ṣmoto̱ vipro̍ marutaḥ śata̱svī yu̱ṣmoto̱ arvā̱ sahu̍riḥ saha̱srī |
yu̱ṣmota̍: sa̱mrāl̤u̱ta ha̍nti vṛ̱traṃ pra tadvo̍ astu dhūtayo de̱ṣṇam
||4||tām̐ ā ru̱drasya̍ mī̱l̤huṣo̍ vivāse ku̱vinnaṃsa̍nte ma̱ruta̱: puna̍rnaḥ |
yatsa̱svartā̍ jihīl̤i̱re yadā̱virava̱ tadena̍ īmahe tu̱rāṇā̍m
||5||pra sā vā̍ci suṣṭu̱tirma̱ghonā̍mi̱daṃ sū̱ktaṃ ma̱ruto̍ juṣanta |
ā̱rācci̱ddveṣo̍ vṛṣaṇo yuyota yū̱yaṃ pā̍ta sva̱stibhi̱: sadā̍ naḥ
||6||12 maitrāvaruṇirvasiṣṭha:| 1-11 maruta:, 12 rūdra: ( mṛtyuvimocinī ṛk ) | pragātha: = ( viṣamā bṛhatī, samā satobṛhatī ), 7-8, 9-11 gāyatrī, 12 anuṣṭup |
yaṃ trāya̍dhva i̱dami̍da̱ṃ devā̍so̱ yaṃ ca̱ naya̍tha| tasmā̍ agne̱ varu̍ṇa̱ mitrārya̍ma̱nmaru̍ta̱: śarma̍ yacchata
||1||yu̱ṣmāka̍ṃ devā̱ ava̱sāha̍ni pri̱ya ī̍jā̱nasta̍rati̱ dviṣa̍: |
pra sa kṣaya̍ṃ tirate̱ vi ma̱hīriṣo̱ yo vo̱ varā̍ya̱ dāśa̍ti
||2||na̱hi va̍ścara̱maṃ ca̱na vasi̍ṣṭhaḥ pari̱maṃsa̍te | a̱smāka̍ma̱dya ma̍rutaḥ su̱te sacā̱ viśve̍ pibata kā̱mina̍:
||3||na̱hi va̍ ū̱tiḥ pṛta̍nāsu̱ mardha̍ti̱ yasmā̱ arā̍dhvaṃ naraḥ |
a̱bhi va̱ āva̍rtsuma̱tirnavī̍yasī̱ tūya̍ṃ yāta pipīṣavaḥ
||4||o ṣu ghṛ̍ṣvirādhaso yā̱tanāndhā̍ṃsi pī̱taye̍ |
i̱mā vo̍ ha̱vyā ma̍ruto ra̱re hi ka̱ṃ mo ṣva1nyatra̍ gantana
||5||ā ca̍ no ba̱rhiḥ sada̍tāvi̱tā ca̍ naḥ spā̱rhāṇi̱ dāta̍ve̱ vasu̍ |
asre̍dhanto marutaḥ so̱mye madhau̱ svāhe̱ha mā̍dayādhvai
||6||sa̱svaści̱ddhi ta̱nva1: śumbha̍mānā̱ ā ha̱ṃsāso̱ nīla̍pṛṣṭhā apaptan |
viśva̱ṃ śardho̍ a̱bhito̍ mā̱ ni ṣe̍da̱ naro̱ na ra̱ṇvāḥ sava̍ne̱ mada̍ntaḥ
||7||yo no̍ maruto a̱bhi du̍rhṛṇā̱yusti̱raści̱ttāni̍ vasavo̱ jighā̍ṃsati |
dru̱haḥ pāśā̱nprati̱ sa mu̍cīṣṭa̱ tapi̍ṣṭhena̱ hanma̍nā hantanā̱ tam
||8||sāṃta̍panā i̱daṃ ha̱virmaru̍ta̱stajju̍juṣṭana | yu̱ṣmāko̱tī ri̍śādasaḥ
||9||gṛha̍medhāsa̱ ā ga̍ta̱ maru̍to̱ māpa̍ bhūtana | yu̱ṣmāko̱tī su̍dānavaḥ
||10||i̱heha̍ vaḥ svatavasa̱: kava̍ya̱: sūrya̍tvacaḥ | ya̱jñaṃ ma̍ruta̱ ā vṛ̍ṇe
||11||trya̍mbakaṃ yajāmahe su̱gandhi̍ṃ puṣṭi̱vardha̍nam | u̱rvā̱ru̱kami̍va̱ bandha̍nānmṛ̱tyormu̍kṣīya̱ māmṛtā̍t
||12||12 maitrāvaruṇirvasiṣṭha:| 1 sūrya: , 2-12 mitrāvaruṇau | triṣṭup|
yada̱dya sū̍rya̱ bravo'nā̍gā u̱dyanmi̱trāya̱ varu̍ṇāya sa̱tyam |
va̱yaṃ de̍va̱trādi̍te syāma̱ tava̍ pri̱yāso̍ aryamangṛ̱ṇanta̍:
||1||e̱ṣa sya mi̍trāvaruṇā nṛ̱cakṣā̍ u̱bhe ude̍ti̱ sūryo̍ a̱bhi jman |
viśva̍sya sthā̱turjaga̍taśca go̱pā ṛ̱ju marte̍ṣu vṛji̱nā ca̱ paśya̍n
||2||ayu̍kta sa̱pta ha̱rita̍: sa̱dhasthā̱dyā ī̱ṃ vaha̍nti̱ sūrya̍ṃ ghṛ̱tācī̍: |
dhāmā̍ni mitrāvaruṇā yu̱vāku̱: saṃ yo yū̱theva̱ jani̍māni̱ caṣṭe̍
||3||udvā̍ṃ pṛ̱kṣāso̱ madhu̍manto asthu̱rā sūryo̍ aruhacchu̱kramarṇa̍: |
yasmā̍ ādi̱tyā adhva̍no̱ rada̍nti mi̱tro a̍rya̱mā varu̍ṇaḥ sa̱joṣā̍:
||4||i̱me ce̱tāro̱ anṛ̍tasya̱ bhūre̍rmi̱tro a̍rya̱mā varu̍ṇo̱ hi santi̍ |
i̱ma ṛ̱tasya̍ vāvṛdhurduro̱ṇe śa̱gmāsa̍: pu̱trā adi̍te̱rada̍bdhāḥ
||5||i̱me mi̱tro varu̍ṇo dū̱l̤abhā̍so'ce̱tasa̍ṃ ciccitayanti̱ dakṣai̍: |
api̱ kratu̍ṃ su̱ceta̍sa̱ṃ vata̍ntasti̱raści̱daṃha̍: su̱pathā̍ nayanti
||6||i̱me di̱vo ani̍miṣā pṛthi̱vyāści̍ki̱tvāṃso̍ ace̱tasa̍ṃ nayanti |
pra̱vrā̱je ci̍nna̱dyo̍ gā̱dhama̍sti pā̱raṃ no̍ a̱sya vi̍ṣpi̱tasya̍ parṣan
||7||yadgo̱pāva̱dadi̍ti̱: śarma̍ bha̱draṃ mi̱tro yaccha̍nti̱ varu̍ṇaḥ su̱dāse̍ |
tasmi̱nnā to̱kaṃ tana̍ya̱ṃ dadhā̍nā̱ mā ka̍rma deva̱hel̤a̍naṃ turāsaḥ
||8||ava̱ vedi̱ṃ hotrā̍bhiryajeta̱ ripa̱: kāści̍dvaruṇa̱dhruta̱: saḥ |
pari̱ dveṣo̍bhirarya̱mā vṛ̍ṇaktū̱ruṃ su̱dāse̍ vṛṣaṇā u lo̱kam
||9||sa̱svaści̱ddhi samṛ̍tistve̱ṣye̍ṣāmapī̱cye̍na̱ saha̍sā̱ saha̍nte |
yu̱ṣmadbhi̱yā vṛ̍ṣaṇo̱ reja̍mānā̱ dakṣa̍sya cinmahi̱nā mṛ̱l̤atā̍ naḥ
||10||yo brahma̍ṇe suma̱timā̱yajā̍te̱ vāja̍sya sā̱tau pa̍ra̱masya̍ rā̱yaḥ |
sīkṣa̍nta ma̱nyuṃ ma̱ghavā̍no a̱rya u̱ru kṣayā̍ya cakrire su̱dhātu̍
||11||i̱yaṃ de̍va pu̱rohi̍tiryu̱vabhyā̍ṃ ya̱jñeṣu̍ mitrāvaruṇāvakāri |
viśvā̍ni du̱rgā pi̍pṛtaṃ ti̱ro no̍ yū̱yaṃ pā̍ta sva̱stibhi̱: sadā̍ naḥ
||12||7 maitrāvaruṇirvasiṣṭha:| mitrāvaruṇau | triṣṭup |
udvā̱ṃ cakṣu̍rvaruṇa su̱pratī̍kaṃ de̱vayo̍reti̱ sūrya̍stata̱nvān |
a̱bhi yo viśvā̱ bhuva̍nāni̱ caṣṭe̱ sa ma̱nyuṃ martye̱ṣvā ci̍keta
||1||pra vā̱ṃ sa mi̍trāvaruṇāvṛ̱tāvā̱ vipro̱ manmā̍ni dīrgha̱śrudi̍yarti |
yasya̱ brahmā̍ṇi sukratū̱ avā̍tha̱ ā yatkratvā̱ na śa̱rada̍: pṛ̱ṇaithe̍
||2||prorormi̍trāvaruṇā pṛthi̱vyāḥ pra di̱va ṛ̱ṣvādbṛ̍ha̱taḥ su̍dānū |
spaśo̍ dadhāthe̱ oṣa̍dhīṣu vi̱kṣvṛdha̍gya̱to ani̍miṣa̱ṃ rakṣa̍māṇā
||3||śaṃsā̍ mi̱trasya̱ varu̍ṇasya̱ dhāma̱ śuṣmo̱ roda̍sī badbadhe mahi̱tvā |
aya̱nmāsā̱ aya̍jvanāma̱vīrā̱: pra ya̱jñama̍nmā vṛ̱jana̍ṃ tirāte
||4||amū̍rā̱ viśvā̍ vṛṣaṇāvi̱mā vā̱ṃ na yāsu̍ ci̱traṃ dadṛ̍śe̱ na ya̱kṣam |
druha̍: sacante̱ anṛ̍tā̱ janā̍nā̱ṃ na vā̍ṃ ni̱ṇyānya̱cite̍ abhūvan
||5||samu̍ vāṃ ya̱jñaṃ ma̍haya̱ṃ namo̍bhirhu̱ve vā̍ṃ mitrāvaruṇā sa̱bādha̍: |
pra vā̱ṃ manmā̍nyṛ̱case̱ navā̍ni kṛ̱tāni̱ brahma̍ jujuṣanni̱māni̍
||6||i̱yaṃ de̍va pu̱rohi̍tiryu̱vabhyā̍ṃ ya̱jñeṣu̍ mitrāvaruṇāvakāri |
viśvā̍ni du̱rgā pi̍pṛtaṃ ti̱ro no̍ yū̱yaṃ pā̍ta sva̱stibhi̱: sadā̍ naḥ
||7||6 maitrāvaruṇirvasiṣṭha:| 1-3 sūrya:, 4-6 mitrāvaruṇau | triṣṭup |
utsūryo̍ bṛ̱hada̱rcīṃṣya̍śretpu̱ru viśvā̱ jani̍ma̱ mānu̍ṣāṇām |
sa̱mo di̱vā da̍dṛśe̱ roca̍māna̱: kratvā̍ kṛ̱taḥ sukṛ̍taḥ ka̱rtṛbhi̍rbhūt
||1||sa sū̍rya̱ prati̍ pu̱ro na̱ udgā̍ e̱bhiḥ stome̍bhireta̱śebhi̱revai̍: |
pra no̍ mi̱trāya̱ varu̍ṇāya vo̱co'nā̍gaso arya̱mṇe a̱gnaye̍ ca
||2||vi na̍: sa̱hasra̍ṃ śu̱rudho̍ radantvṛ̱tāvā̍no̱ varu̍ṇo mi̱tro a̱gniḥ |
yaccha̍ntu ca̱ndrā u̍pa̱maṃ no̍ a̱rkamā na̱: kāma̍ṃ pūpurantu̱ stavā̍nāḥ
||3||dyāvā̍bhūmī adite̱ trāsī̍thāṃ no̱ ye vā̍ṃ ja̱jñuḥ su̱jani̍māna ṛṣve |
mā hel̤e̍ bhūma̱ varu̍ṇasya vā̱yormā mi̱trasya̍ pri̱yata̍masya nṛ̱ṇām
||4||pra bā̱havā̍ sisṛtaṃ jī̱vase̍ na̱ ā no̱ gavyū̍timukṣataṃ ghṛ̱tena̍ |
ā no̱ jane̍ śravayataṃ yuvānā śru̱taṃ me̍ mitrāvaruṇā̱ have̱mā
||5||nū mi̱tro varu̍ṇo arya̱mā na̱stmane̍ to̱kāya̱ vari̍vo dadhantu |
su̱gā no̱ viśvā̍ su̱pathā̍ni santu yū̱yaṃ pā̍ta sva̱stibhi̱: sadā̍ naḥ
||6||6 maitrāvaruṇirvasiṣṭha:| 1-4 sūrya:, 5 sūrya – mitrāvaruṇā:, 6 mitrāvaruṇau aryamā ca | triṣṭup |
udve̍ti su̱bhago̍ vi̱śvaca̍kṣā̱: sādhā̍raṇa̱: sūryo̱ mānu̍ṣāṇām |
cakṣu̍rmi̱trasya̱ varu̍ṇasya de̱vaścarme̍va̱ yaḥ sa̱mavi̍vya̱ktamā̍ṃsi
||1||udve̍ti prasavī̱tā janā̍nāṃ ma̱hānke̱tura̍rṇa̱vaḥ sūrya̍sya |
sa̱mā̱naṃ ca̱kraṃ pa̍ryā̱vivṛ̍tsa̱nyade̍ta̱śo vaha̍ti dhū̱rṣu yu̱ktaḥ
||2||vi̱bhrāja̍māna u̱ṣasā̍mu̱pasthā̍dre̱bhairude̍tyanuma̱dyamā̍naḥ |
e̱ṣa me̍ de̱vaḥ sa̍vi̱tā ca̍cchanda̱ yaḥ sa̍mā̱naṃ na pra̍mi̱nāti̱ dhāma̍
||3||di̱vo ru̱kma u̍ru̱cakṣā̱ ude̍ti dū̱rea̍rthasta̱raṇi̱rbhrāja̍mānaḥ |
nū̱naṃ janā̱: sūrye̍ṇa̱ prasū̍tā̱ aya̱nnarthā̍ni kṛ̱ṇava̱nnapā̍ṃsi
||4||yatrā̍ ca̱krura̱mṛtā̍ gā̱tuma̍smai śye̱no na dīya̱nnanve̍ti̱ pātha̍: |
prati̍ vā̱ṃ sūra̱ udi̍te vidhema̱ namo̍bhirmitrāvaruṇo̱ta ha̱vyaiḥ
||5||nū mi̱tro varu̍ṇo arya̱mā na̱stmane̍ to̱kāya̱ vari̍vo dadhantu |
su̱gā no̱ viśvā̍ su̱pathā̍ni santu yū̱yaṃ pā̍ta sva̱stibhi̱: sadā̍ naḥ
||6||5 maitrāvaruṇirvasiṣṭha:| mitrāvaruṇau| triṣṭup |
di̱vi kṣaya̍ntā̱ raja̍saḥ pṛthi̱vyāṃ pra vā̍ṃ ghṛ̱tasya̍ ni̱rṇijo̍ dadīran |
ha̱vyaṃ no̍ mi̱tro a̍rya̱mā sujā̍to̱ rājā̍ sukṣa̱tro varu̍ṇo juṣanta
||1||ā rā̍jānā maha ṛtasya gopā̱ sindhu̍patī kṣatriyā yātama̱rvāk |
il̤ā̍ṃ no mitrāvaruṇo̱ta vṛ̱ṣṭimava̍ di̱va i̍nvataṃ jīradānū
||2||mi̱trastanno̱ varu̍ṇo de̱vo a̱ryaḥ pra sādhi̍ṣṭhebhiḥ pa̱thibhi̍rnayantu |
brava̱dyathā̍ na̱ āda̱riḥ su̱dāsa̍ i̱ṣā ma̍dema sa̱ha de̱vago̍pāḥ
||3||yo vā̱ṃ garta̱ṃ mana̍sā̱ takṣa̍de̱tamū̱rdhvāṃ dhī̱tiṃ kṛ̱ṇava̍ddhā̱raya̍cca |
u̱kṣethā̍ṃ mitrāvaruṇā ghṛ̱tena̱ tā rā̍jānā sukṣi̱tīsta̍rpayethām
||4||e̱ṣa stomo̍ varuṇa mitra̱ tubhya̱ṃ soma̍: śu̱kro na vā̱yave̍'yāmi |
a̱vi̱ṣṭaṃ dhiyo̍ jigṛ̱taṃ pura̍ṃdhīryū̱yaṃ pā̍ta sva̱stibhi̱: sadā̍ naḥ
||5||5 maitrāvaruṇirvasiṣṭha:| mitrāvaruṇau | triṣṭup |
prati̍ vā̱ṃ sūra̱ udi̍te sū̱ktairmi̱traṃ hu̍ve̱ varu̍ṇaṃ pū̱tada̍kṣam |
yayo̍rasu̱rya1makṣi̍ta̱ṃ jyeṣṭha̱ṃ viśva̍sya̱ yāma̍nnā̱citā̍ jiga̱tnu
||1||tā hi de̱vānā̱masu̍rā̱ tāva̱ryā tā na̍: kṣi̱tīḥ ka̍ratamū̱rjaya̍ntīḥ |
a̱śyāma̍ mitrāvaruṇā va̱yaṃ vā̱ṃ dyāvā̍ ca̱ yatra̍ pī̱paya̱nnahā̍ ca
||2||tā bhūri̍pāśā̱vanṛ̍tasya̱ setū̍ dura̱tyetū̍ ri̱pave̱ martyā̍ya |
ṛ̱tasya̍ mitrāvaruṇā pa̱thā vā̍ma̱po na nā̱vā du̍ri̱tā ta̍rema
||3||ā no̍ mitrāvaruṇā ha̱vyaju̍ṣṭiṃ ghṛ̱tairgavyū̍timukṣata̱mil̤ā̍bhiḥ |
prati̍ vā̱matra̱ vara̱mā janā̍ya pṛṇī̱tamu̱dno di̱vyasya̱ cāro̍:
||4||e̱ṣa stomo̍ varuṇa mitra̱ tubhya̱ṃ soma̍: śu̱kro na vā̱yave̍'yāmi |
a̱vi̱ṣṭaṃ dhiyo̍ jigṛ̱taṃ pura̍ṃdhīryū̱yaṃ pā̍ta sva̱stibhi̱: sadā̍ naḥ
||5||19 maitrāvaruṇirvasiṣṭha:| mitrāvaruṇau, 4-13 ādityā:, 14-16 sūrya: |gāyatrī,10-15 pragātha: = (samā bṛhatī, viṣamā satobṛhatī ), 16 pura uṣṇik |
pra mi̱trayo̱rvaru̍ṇayo̱: stomo̍ na etu śū̱ṣya̍: | nama̍svāntuvijā̱tayo̍:
||1||yā dhā̱raya̍nta de̱vāḥ su̱dakṣā̱ dakṣa̍pitarā | a̱su̱ryā̍ya̱ prama̍hasā
||2||tā na̍: sti̱pā ta̍nū̱pā varu̍ṇa jaritṝ̱ṇām | mitra̍ sā̱dhaya̍ta̱ṃ dhiya̍:
||3||yada̱dya sūra̱ udi̱te'nā̍gā mi̱tro a̍rya̱mā | su̱vāti̍ savi̱tā bhaga̍:
||4||su̱prā̱vīra̍stu̱ sa kṣaya̱: pra nu yāma̍ntsudānavaḥ | ye no̱ aṃho̍'ti̱pipra̍ti
||5||u̱ta sva̱rājo̱ adi̍ti̱rada̍bdhasya vra̱tasya̱ ye | ma̱ho rājā̍na īśate
||6||prati̍ vā̱ṃ sūra̱ udi̍te mi̱traṃ gṛ̍ṇīṣe̱ varu̍ṇam | a̱rya̱maṇa̍ṃ ri̱śāda̍sam
||7||rā̱yā hi̍raṇya̱yā ma̱tiri̱yama̍vṛ̱kāya̱ śava̍se | i̱yaṃ viprā̍ me̱dhasā̍taye
||8||te syā̍ma deva varuṇa̱ te mi̍tra sū̱ribhi̍: sa̱ha | iṣa̱ṃ sva̍śca dhīmahi
||9||ba̱hava̱: sūra̍cakṣaso'gniji̱hvā ṛ̍tā̱vṛdha̍: | trīṇi̱ ye ye̱murvi̱dathā̍ni dhī̱tibhi̱rviśvā̍ni̱ pari̍bhūtibhiḥ
||10||vi ye da̱dhuḥ śa̱rada̱ṃ māsa̱mādaha̍rya̱jñama̱ktuṃ cādṛca̍m |
a̱nā̱pyaṃ varu̍ṇo mi̱tro a̍rya̱mā kṣa̱traṃ rājā̍na āśata
||11||tadvo̍ a̱dya ma̍nāmahe sū̱ktaiḥ sūra̱ udi̍te | yadoha̍te̱ varu̍ṇo mi̱tro a̍rya̱mā yū̱yamṛ̱tasya̍ rathyaḥ
||12||ṛ̱tāvā̍na ṛ̱tajā̍tā ṛtā̱vṛdho̍ gho̱rāso̍ anṛta̱dviṣa̍: |
teṣā̍ṃ vaḥ su̱mne su̍ccha̱rdiṣṭa̍me nara̱: syāma̱ ye ca̍ sū̱raya̍:
||13||udu̱ tyadda̍rśa̱taṃ vapu̍rdi̱va e̍ti pratihva̱re | yadī̍mā̱śurvaha̍ti de̱va eta̍śo̱ viśva̍smai̱ cakṣa̍se̱ ara̍m
||14||śī̱rṣṇaḥśī̍rṣṇo̱ jaga̍tasta̱sthuṣa̱spati̍ṃ sa̱mayā̱ viśva̱mā raja̍: |
sa̱pta svasā̍raḥ suvi̱tāya̱ sūrya̱ṃ vaha̍nti ha̱rito̱ rathe̍
||15||taccakṣu̍rde̱vahi̍taṃ śu̱kramu̱ccara̍t | paśye̍ma śa̱rada̍: śa̱taṃ jīve̍ma śa̱rada̍: śa̱tam
||16||kāvye̍bhiradā̱bhyā ''yā̍taṃ varuṇa dyu̱mat | mi̱traśca̱ soma̍pītaye
||17||di̱vo dhāma̍bhirvaruṇa mi̱traścā yā̍tama̱druhā̍ | piba̍ta̱ṃ soma̍mātu̱jī
||18||ā yā̍taṃ mitrāvaruṇā juṣā̱ṇāvāhu̍tiṃ narā | pā̱taṃ soma̍mṛtāvṛdhā
||19||10 maitrāvaruṇirvasiṣṭha:| aśvinau| triṣṭup |
prati̍ vā̱ṃ ratha̍ṃ nṛpatī ja̱radhyai̍ ha̱viṣma̍tā̱ mana̍sā ya̱jñiye̍na |
yo vā̍ṃ dū̱to na dhi̍ṣṇyā̱vajī̍ga̱racchā̍ sū̱nurna pi̱tarā̍ vivakmi
||1||aśo̍cya̱gniḥ sa̍midhā̱no a̱sme upo̍ adṛśra̱ntama̍saści̱dantā̍: |
ace̍ti ke̱turu̱ṣasa̍: pu̱rastā̍cchri̱ye di̱vo du̍hi̱turjāya̍mānaḥ
||2||a̱bhi vā̍ṃ nū̱nama̍śvinā̱ suho̍tā̱ stomai̍: siṣakti nāsatyā viva̱kvān |
pū̱rvībhi̍ryātaṃ pa̱thyā̍bhira̱rvāksva̱rvidā̱ vasu̍matā̱ rathe̍na
||3||a̱vorvā̍ṃ nū̱nama̍śvinā yu̱vāku̍rhu̱ve yadvā̍ṃ su̱te mā̍dhvī vasū̱yuḥ |
ā vā̍ṃ vahantu̱ sthavi̍rāso̱ aśvā̱: pibā̍tho a̱sme suṣu̍tā̱ madhū̍ni
||4||prācī̍mu devāśvinā̱ dhiya̱ṃ me'mṛ̍dhrāṃ sā̱taye̍ kṛtaṃ vasū̱yum |
viśvā̍ aviṣṭa̱ṃ vāja̱ ā pura̍ṃdhī̱stā na̍: śaktaṃ śacīpatī̱ śacī̍bhiḥ
||5||a̱vi̱ṣṭaṃ dhī̱ṣva̍śvinā na ā̱su pra̱jāva̱dreto̱ ahra̍yaṃ no astu |
ā vā̍ṃ to̱ke tana̍ye̱ tūtu̍jānāḥ su̱ratnā̍so de̱vavī̍tiṃ gamema
||6||e̱ṣa sya vā̍ṃ pūrva̱gatve̍va̱ sakhye̍ ni̱dhirhi̱to mā̍dhvī rā̱to a̱sme |
ahe̍l̤atā̱ mana̱sā yā̍tama̱rvāga̱śnantā̍ ha̱vyaṃ mānu̍ṣīṣu vi̱kṣu
||7||eka̍smi̱nyoge̍ bhuraṇā samā̱ne pari̍ vāṃ sa̱pta sra̱vato̱ ratho̍ gāt |
na vā̍yanti su̱bhvo̍ de̱vayu̍ktā̱ ye vā̍ṃ dhū̱rṣu ta̱raṇa̍yo̱ vaha̍nti
||8||a̱sa̱ścatā̍ ma̱ghava̍dbhyo̱ hi bhū̱taṃ ye rā̱yā ma̍gha̱deya̍ṃ ju̱nanti̍ |
pra ye bandhu̍ṃ sū̱nṛtā̍bhisti̱rante̱ gavyā̍ pṛ̱ñcanto̱ aśvyā̍ ma̱ghāni̍
||9||nū me̱ hava̱mā śṛ̍ṇutaṃ yuvānā yāsi̱ṣṭaṃ va̱rtira̍śvinā̱virā̍vat |
dha̱ttaṃ ratnā̍ni̱ jara̍taṃ ca sū̱rīnyū̱yaṃ pā̍ta sva̱stibhi̱: sadā̍ naḥ
||10||9 maitrāvaruṇirvasiṣṭha:| aśvinau|virāṭ, 8-9 triṣṭup |
ā śu̍bhrā yātamaśvinā̱ svaśvā̱ giro̍ dasrā jujuṣā̱ṇā yu̱vāko̍: | ha̱vyāni̍ ca̱ prati̍bhṛtā vī̱taṃ na̍:
||1||pra vā̱mandhā̍ṃsi̱ madyā̍nyasthu̱rara̍ṃ gantaṃ ha̱viṣo̍ vī̱taye̍ me | ti̱ro a̱ryo hava̍nāni śru̱taṃ na̍:
||2||pra vā̱ṃ ratho̱ mano̍javā iyarti ti̱ro rajā̍ṃsyaśvinā śa̱toti̍: | a̱smabhya̍ṃ sūryāvasū iyā̱naḥ
||3||a̱yaṃ ha̱ yadvā̍ṃ deva̱yā u̱ adri̍rū̱rdhvo viva̍kti soma̱sudyu̱vabhyā̍m | ā va̱lgū vipro̍ vavṛtīta ha̱vyaiḥ
||4||ci̱traṃ ha̱ yadvā̱ṃ bhoja̍na̱ṃ nvasti̱ nyatra̍ye̱ mahi̍ṣvantaṃ yuyotam | yo vā̍mo̱māna̱ṃ dadha̍te pri̱yaḥ san
||5||u̱ta tyadvā̍ṃ jura̱te a̍śvinā bhū̱ccyavā̍nāya pra̱tītya̍ṃ havi̱rde | adhi̱ yadvarpa̍ i̱taū̍ti dha̱tthaḥ
||6||u̱ta tyaṃ bhu̱jyuma̍śvinā̱ sakhā̍yo̱ madhye̍ jahurdu̱revā̍saḥ samu̱dre | nirī̍ṃ parṣa̱darā̍vā̱ yo yu̱vāku̍:
||7||vṛkā̍ya ci̱jjasa̍mānāya śaktamu̱ta śru̍taṃ śa̱yave̍ hū̱yamā̍nā |
yāva̱ghnyāmapi̍nvatama̱po na sta̱rya̍ṃ ciccha̱ktya̍śvinā̱ śacī̍bhiḥ
||8||e̱ṣa sya kā̱rurja̍rate sū̱ktairagre̍ budhā̱na u̱ṣasā̍ṃ su̱manmā̍ |
i̱ṣā taṃ va̍rdhada̱ghnyā payo̍bhiryū̱yaṃ pā̍ta sva̱stibhi̱: sadā̍ naḥ
||9||8 maitrāvaruṇirvasiṣṭha:| aśvinau | triṣṭup |
ā vā̱ṃ ratho̱ roda̍sī badbadhā̱no hi̍ra̱ṇyayo̱ vṛṣa̍bhiryā̱tvaśvai̍: |
ghṛ̱tava̍rtaniḥ pa̱vibhī̍ rucā̱na i̱ṣāṃ vo̱l̤hā nṛ̱pati̍rvā̱jinī̍vān
||1||sa pa̍prathā̱no a̱bhi pañca̱ bhūmā̍ trivandhu̱ro mana̱sā yā̍tu yu̱ktaḥ |
viśo̱ yena̱ gaccha̍tho deva̱yantī̱: kutrā̍ ci̱dyāma̍maśvinā̱ dadhā̍nā
||2||svaśvā̍ ya̱śasā yā̍tama̱rvāgdasrā̍ ni̱dhiṃ madhu̍mantaṃ pibāthaḥ |
vi vā̱ṃ ratho̍ va̱dhvā̱3 yāda̍mā̱no'ntā̍ndi̱vo bā̍dhate varta̱nibhyā̍m
||3||yu̱voḥ śriya̱ṃ pari̱ yoṣā̍vṛṇīta̱ sūro̍ duhi̱tā pari̍takmyāyām |
yadde̍va̱yanta̱mava̍tha̱: śacī̍bhi̱: pari̍ ghra̱ṃsamo̱manā̍ vā̱ṃ vayo̍ gāt
||4||yo ha̱ sya vā̍ṃ rathirā̱ vasta̍ u̱srā ratho̍ yujā̱naḥ pa̍ri̱yāti̍ va̱rtiḥ |
tena̍ na̱: śaṃ yoru̱ṣaso̱ vyu̍ṣṭau̱ nya̍śvinā vahataṃ ya̱jñe a̱smin
||5||narā̍ gau̱reva̍ vi̱dyuta̍ṃ tṛṣā̱ṇā'smāka̍ma̱dya sava̱nopa̍ yātam |
pu̱ru̱trā hi vā̍ṃ ma̱tibhi̱rhava̍nte̱ mā vā̍ma̱nye ni ya̍mandeva̱yanta̍:
||6||yu̱vaṃ bhu̱jyumava̍viddhaṃ samu̱dra udū̍hathu̱rarṇa̍so̱ asri̍dhānaiḥ |
pa̱ta̱tribhi̍raśra̱maira̍vya̱thibhi̍rda̱ṃsanā̍bhiraśvinā pā̱raya̍ntā
||7||nū me̱ hava̱mā śṛ̍ṇutaṃ yuvānā yāsi̱ṣṭaṃ va̱rtira̍śvinā̱virā̍vat |
dha̱ttaṃ ratnā̍ni̱ jara̍taṃ ca sū̱rīnyū̱yaṃ pā̍ta sva̱stibhi̱: sadā̍ naḥ
||8||7 maitrāvaruṇirvasiṣṭha:| aśvinau | triṣṭup |
ā vi̍śvavārāśvinā gataṃ na̱: pra tatsthāna̍mavāci vāṃ pṛthi̱vyām |
aśvo̱ na vā̱jī śu̱napṛ̍ṣṭho asthā̱dā yatse̱dathu̍rdhru̱vase̱ na yoni̍m
||1||siṣa̍kti̱ sā vā̍ṃ suma̱tiścani̱ṣṭhā'tā̍pi gha̱rmo manu̍ṣo duro̱ṇe |
yo vā̍ṃ samu̱drāntsa̱rita̱: pipa̱rtyeta̍gvā ci̱nna su̱yujā̍ yujā̱naḥ
||2||yāni̱ sthānā̍nyaśvinā da̱dhāthe̍ di̱vo ya̱hvīṣvoṣa̍dhīṣu vi̱kṣu |
ni parva̍tasya mū̱rdhani̱ sada̱nteṣa̱ṃ janā̍ya dā̱śuṣe̱ vaha̍ntā
||3||ca̱ni̱ṣṭaṃ de̍vā̱ oṣa̍dhīṣva̱psu yadyo̱gyā a̱śnavai̍the̱ ṛṣī̍ṇām |
pu̱rūṇi̱ ratnā̱ dadha̍tau̱ nya1sme anu̱ pūrvā̍ṇi cakhyathuryu̱gāni̍
||4||śu̱śru̱vāṃsā̍ cidaśvinā pu̱rūṇya̱bhi brahmā̍ṇi cakṣāthe̱ ṛṣī̍ṇām |
prati̱ pra yā̍ta̱ṃ vara̱mā janā̍yā̱'sme vā̍mastu suma̱tiścani̍ṣṭhā
||5||yo vā̍ṃ ya̱jño nā̍satyā ha̱viṣmā̍nkṛ̱tabra̍hmā sama̱ryo̱3 bhavā̍ti |
upa̱ pra yā̍ta̱ṃ vara̱mā vasi̍ṣṭhami̱mā brahmā̍ṇyṛcyante yu̱vabhyā̍m
||6||i̱yaṃ ma̍nī̱ṣā i̱yama̍śvinā̱ gīri̱māṃ su̍vṛ̱ktiṃ vṛ̍ṣaṇā juṣethām |
i̱mā brahmā̍ṇi yuva̱yūnya̍gmanyū̱yaṃ pā̍ta sva̱stibhi̱: sadā̍ naḥ
||7||6 maitrāvaruṇirvasiṣṭha:| aśvinau | triṣṭup |
apa̱ svasu̍ru̱ṣaso̱ nagji̍hīte ri̱ṇakti̍ kṛ̱ṣṇīra̍ru̱ṣāya̱ panthā̍m |
aśvā̍maghā̱ goma̍ghā vāṃ huvema̱ divā̱ nakta̱ṃ śaru̍ma̱smadyu̍yotam
||1||u̱pāyā̍taṃ dā̱śuṣe̱ martyā̍ya̱ rathe̍na vā̱mama̍śvinā̱ vaha̍ntā |
yu̱yu̱tama̱smadani̍rā̱mamī̍vā̱ṃ divā̱ nakta̍ṃ mādhvī̱ trāsī̍thāṃ naḥ
||2||ā vā̱ṃ ratha̍mava̱masyā̱ṃ vyu̍ṣṭau sumnā̱yavo̱ vṛṣa̍ṇo vartayantu |
syūma̍gabhastimṛta̱yugbhi̱raśvai̱rāśvi̍nā̱ vasu̍mantaṃ vahethām
||3||yo vā̱ṃ ratho̍ nṛpatī̱ asti̍ vo̱l̤hā tri̍vandhu̱ro vasu̍mām̐ u̱srayā̍mā |
ā na̍ e̱nā nā̍sa̱tyopa̍ yātama̱bhi yadvā̍ṃ vi̱śvapsnyo̱ jigā̍ti
||4||yu̱vaṃ cyavā̍naṃ ja̱raso̍'mumukta̱ṃ ni pe̱dava̍ ūhathurā̱śumaśva̍m |
niraṃha̍sa̱stama̍saḥ sparta̱matri̱ṃ ni jā̍hu̱ṣaṃ śi̍thi̱re dhā̍tama̱ntaḥ
||5||i̱yaṃ ma̍nī̱ṣā i̱yama̍śvinā̱ gīri̱māṃ su̍vṛ̱ktiṃ vṛ̍ṣaṇā juṣethām |
i̱mā brahmā̍ṇi yuva̱yūnya̍gmanyū̱yaṃ pā̍ta sva̱stibhi̱: sadā̍ naḥ
||6||5 maitrāvaruṇirvasiṣṭha:| aśvinau | triṣṭup |
ā goma̍tā nāsatyā̱ rathe̱nā'śvā̍vatā puruśca̱ndreṇa̍ yātam |
a̱bhi vā̱ṃ viśvā̍ ni̱yuta̍: sacante spā̱rhayā̍ śri̱yā ta̱nvā̍ śubhā̱nā
||1||ā no̍ de̱vebhi̱rupa̍ yātama̱rvāksa̱joṣa̍sā nāsatyā̱ rathe̍na |
yu̱vorhi na̍: sa̱khyā pitryā̍ṇi samā̱no bandhu̍ru̱ta tasya̍ vittam
||2||udu̱ stomā̍so a̱śvino̍rabudhrañjā̱mi brahmā̍ṇyu̱ṣasa̍śca de̱vīḥ |
ā̱vivā̍sa̱nroda̍sī̱ dhiṣṇye̱me acchā̱ vipro̱ nāsa̍tyā vivakti
||3||vi cedu̱cchantya̍śvinā u̱ṣāsa̱: pra vā̱ṃ brahmā̍ṇi kā̱ravo̍ bharante |
ū̱rdhvaṃ bhā̱nuṃ sa̍vi̱tā de̱vo a̍średbṛ̱hada̱gnaya̍: sa̱midhā̍ jarante
||4||ā pa̱ścātā̍nnāsa̱tyā pu̱rastā̱dāśvi̍nā yātamadha̱rāduda̍ktāt |
ā vi̱śvata̱: pāñca̍janyena rā̱yā yū̱yaṃ pā̍ta sva̱stibhi̱: sadā̍ naḥ
||5||5 maitrāvaruṇirvasiṣṭha:| aśvinau | triṣṭup |
atā̍riṣma̱ tama̍saspā̱rama̱sya prati̱ stoma̍ṃ deva̱yanto̱ dadhā̍nāḥ |
pu̱ru̱daṃsā̍ puru̱tamā̍ purā̱jā'ma̍rtyā havate a̱śvinā̱ gīḥ
||1||nyu̍ pri̱yo manu̍ṣaḥ sādi̱ hotā̱ nāsa̍tyā̱ yo yaja̍te̱ vanda̍te ca |
a̱śnī̱taṃ madhvo̍ aśvinā upā̱ka ā vā̍ṃ voce vi̱dathe̍ṣu̱ praya̍svān
||2||ahe̍ma ya̱jñaṃ pa̱thāmu̍rā̱ṇā i̱māṃ su̍vṛ̱ktiṃ vṛ̍ṣaṇā juṣethām |
śru̱ṣṭī̱veva̱ preṣi̍to vāmabodhi̱ prati̱ stomai̱rjara̍māṇo̱ vasi̍ṣṭhaḥ
||3||upa̱ tyā vahnī̍ gamato̱ viśa̍ṃ no rakṣo̱haṇā̱ sambhṛ̍tā vī̱l̤upā̍ṇī |
samandhā̍ṃsyagmata matsa̱rāṇi̱ mā no̍ mardhiṣṭa̱mā ga̍taṃ śi̱vena̍
||4||ā pa̱ścātā̍nnāsa̱tyā pu̱rastā̱dāśvi̍nā yātamadha̱rāduda̍ktāt |
ā vi̱śvata̱: pāñca̍janyena rā̱yā yū̱yaṃ pā̍ta sva̱stibhi̱: sadā̍ naḥ
||5||6 maitrāvaruṇirvasiṣṭha:| aśvinau |pragātha:=(viṣamā bṛhatī, samā satobṛhatī) |
i̱mā u̍ vā̱ṃ divi̍ṣṭaya u̱srā ha̍vante aśvinā |
a̱yaṃ vā̍ma̱hve'va̍se śacīvasū̱ viśa̍ṃviśa̱ṃ hi gaccha̍thaḥ
||1||yu̱vaṃ ci̱traṃ da̍dathu̱rbhoja̍naṃ narā̱ code̍thāṃ sū̱nṛtā̍vate |
a̱rvāgratha̱ṃ sama̍nasā̱ ni ya̍cchata̱ṃ piba̍taṃ so̱myaṃ madhu̍
||2||ā yā̍ta̱mupa̍ bhūṣata̱ṃ madhva̍: pibatamaśvinā |
du̱gdhaṃ payo̍ vṛṣaṇā jenyāvasū̱ mā no̍ mardhiṣṭa̱mā ga̍tam
||3||aśvā̍so̱ ye vā̱mupa̍ dā̱śuṣo̍ gṛ̱haṃ yu̱vāṃ dīya̍nti̱ bibhra̍taḥ |
ma̱kṣū̱yubhi̍rnarā̱ haye̍bhiraśvi̱nā ''de̍vā yātamasma̱yū
||4||adhā̍ ha̱ yanto̍ a̱śvinā̱ pṛkṣa̍: sacanta sū̱raya̍: |
tā ya̍ṃsato ma̱ghava̍dbhyo dhru̱vaṃ yaśa̍ścha̱rdira̱smabhya̱ṃ nāsa̍tyā
||5||pra ye ya̱yura̍vṛ̱kāso̱ rathā̍ iva nṛpā̱tāro̱ janā̍nām |
u̱ta svena̱ śava̍sā śūśuvu̱rnara̍ u̱ta kṣi̍yanti sukṣi̱tim
||6||8 maitrāvaruṇirvasiṣṭha:| uṣasa:| triṣṭup |
vyu1ṣā ā̍vo divi̱jā ṛ̱tenā̍''viṣkṛṇvā̱nā ma̍hi̱māna̱māgā̍t |
apa̱ druha̱stama̍ āva̱raju̍ṣṭa̱maṅgi̍rastamā pa̱thyā̍ ajīgaḥ
||1||ma̱he no̍ a̱dya su̍vi̱tāya̍ bo̱dhyuṣo̍ ma̱he saubha̍gāya̱ pra ya̍ndhi |
ci̱traṃ ra̱yiṃ ya̱śasa̍ṃ dhehya̱sme devi̱ marte̍ṣu mānuṣi śrava̱syum
||2||e̱te tye bhā̱navo̍ darśa̱tāyā̍ści̱trā u̱ṣaso̍ a̱mṛtā̍sa̱ āgu̍: |
ja̱naya̍nto̱ daivyā̍ni vra̱tānyā̍pṛ̱ṇanto̍ a̱ntari̍kṣā̱ vya̍sthuḥ
||3||e̱ṣā syā yu̍jā̱nā pa̍rā̱kātpañca̍ kṣi̱tīḥ pari̍ sa̱dyo ji̍gāti |
a̱bhi̱paśya̍ntī va̱yunā̱ janā̍nāṃ di̱vo du̍hi̱tā bhuva̍nasya̱ patnī̍
||4||vā̱jinī̍vatī̱ sūrya̍sya̱ yoṣā̍ ci̱trāma̍ghā rā̱ya ī̍śe̱ vasū̍nām |
ṛṣi̍ṣṭutā ja̱raya̍ntī ma̱ghonyu̱ṣā u̍cchati̱ vahni̍bhirgṛṇā̱nā
||5||prati̍ dyutā̱nāma̍ru̱ṣāso̱ aśvā̍ści̱trā a̍dṛśrannu̱ṣasa̱ṃ vaha̍ntaḥ |
yāti̍ śu̱bhrā vi̍śva̱piśā̱ rathe̍na̱ dadhā̍ti̱ ratna̍ṃ vidha̱te janā̍ya
||6||sa̱tyā sa̱tyebhi̍rmaha̱tī ma̱hadbhi̍rde̱vī de̱vebhi̍ryaja̱tā yaja̍traiḥ |
ru̱jaddṛ̱l̤hāni̱ dada̍du̱sriyā̍ṇā̱ṃ prati̱ gāva̍ u̱ṣasa̍ṃ vāvaśanta
||7||nū no̱ goma̍dvī̱rava̍ddhehi̱ ratna̱muṣo̱ aśvā̍vatpuru̱bhojo̍ a̱sme |
mā no̍ ba̱rhiḥ pu̍ru̱ṣatā̍ ni̱de ka̍ryū̱yaṃ pā̍ta sva̱stibhi̱: sadā̍ naḥ
||8||7 maitrāvaruṇirvasiṣṭha:| uṣasa: | triṣṭup |
udu̱ jyoti̍ra̱mṛta̍ṃ vi̱śvaja̍nyaṃ vi̱śvāna̍raḥ savi̱tā de̱vo a̍śret |
kratvā̍ de̱vānā̍majaniṣṭa̱ cakṣu̍rā̱vira̍ka̱rbhuva̍na̱ṃ viśva̍mu̱ṣāḥ
||1||pra me̱ panthā̍ deva̱yānā̍ adṛśra̱nnama̍rdhanto̱ vasu̍bhi̱riṣkṛ̍tāsaḥ |
abhū̍du ke̱turu̱ṣasa̍: pu̱rastā̍tpratī̱cyāgā̱dadhi̍ ha̱rmyebhya̍:
||2||tānīdahā̍ni bahu̱lānyā̍sa̱nyā prā̱cīna̱mudi̍tā̱ sūrya̍sya |
yata̱: pari̍ jā̱ra i̍vā̱cara̱ntyuṣo̍ dadṛ̱kṣe na puna̍rya̱tīva̍
||3||ta idde̱vānā̍ṃ sadha̱māda̍ āsannṛ̱tāvā̍naḥ ka̱vaya̍: pū̱rvyāsa̍: |
gū̱l̤haṃ jyoti̍: pi̱taro̱ anva̍vindantsa̱tyama̍ntrā ajanayannu̱ṣāsa̍m
||4||sa̱mā̱na ū̱rve adhi̱ saṃga̍tāsa̱: saṃ jā̍nate̱ na ya̍tante mi̱thaste |
te de̱vānā̱ṃ na mi̍nanti vra̱tānyama̍rdhanto̱ vasu̍bhi̱ryāda̍mānāḥ
||5||prati̍ tvā̱ stomai̍rīl̤ate̱ vasi̍ṣṭhā uṣa̱rbudha̍: subhage tuṣṭu̱vāṃsa̍: |
gavā̍ṃ ne̱trī vāja̍patnī na u̱cchoṣa̍: sujāte pratha̱mā ja̍rasva
||6||e̱ṣā ne̱trī rādha̍saḥ sū̱nṛtā̍nāmu̱ṣā u̱cchantī̍ ribhyate̱ vasi̍ṣṭhaiḥ |
dī̱rgha̱śruta̍ṃ ra̱yima̱sme dadhā̍nā yū̱yaṃ pā̍ta sva̱stibhi̱: sadā̍ naḥ
||7||6 maitrāvaruṇirvasiṣṭha:| uṣasa: | triṣṭup |
upo̍ ruruce yuva̱tirna yoṣā̱ viśva̍ṃ jī̱vaṃ pra̍su̱vantī̍ ca̱rāyai̍ |
abhū̍da̱gniḥ sa̱midhe̱ mānu̍ṣāṇā̱maka̱rjyoti̱rbādha̍mānā̱ tamā̍ṃsi
||1||viśva̍ṃ pratī̱cī sa̱prathā̱ uda̍sthā̱druśa̱dvāso̱ bibhra̍tī śu̱krama̍śvait |
hira̍ṇyavarṇā su̱dṛśī̍kasaṃdṛ̱ggavā̍ṃ mā̱tā ne̱tryahnā̍maroci
||2||de̱vānā̱ṃ cakṣu̍: su̱bhagā̱ vaha̍ntī śve̱taṃ naya̍ntī su̱dṛśī̍ka̱maśva̍m |
u̱ṣā a̍darśi ra̱śmibhi̱rvya̍ktā ci̱trāma̍ghā̱ viśva̱manu̱ prabhū̍tā
||3||anti̍vāmā dū̱re a̱mitra̍muccho̱rvīṃ gavyū̍ti̱mabha̍yaṃ kṛdhī naḥ |
yā̱vaya̱ dveṣa̱ ā bha̍rā̱ vasū̍ni co̱daya̱ rādho̍ gṛṇa̱te ma̍ghoni
||4||a̱sme śreṣṭhe̍bhirbhā̱nubhi̱rvi bhā̱hyuṣo̍ devi prati̱rantī̍ na̱ āyu̍: |
iṣa̍ṃ ca no̱ dadha̍tī viśvavāre̱ goma̱daśvā̍va̱dratha̍vacca̱ rādha̍:
||5||yāṃ tvā̍ divo duhitarva̱rdhaya̱ntyuṣa̍: sujāte ma̱tibhi̱rvasi̍ṣṭhāḥ |
sāsmāsu̍ dhā ra̱yimṛ̱ṣvaṃ bṛ̱hanta̍ṃ yū̱yaṃ pā̍ta sva̱stibhi̱: sadā̍ naḥ
||6||5 maitrāvaruṇirvasiṣṭha:| uṣasa: | triṣṭup |
prati̍ ke̱tava̍: pratha̱mā a̍dṛśrannū̱rdhvā a̍syā a̱ñjayo̱ vi śra̍yante |
uṣo̍ a̱rvācā̍ bṛha̱tā rathe̍na̱ jyoti̍ṣmatā vā̱mama̱smabhya̍ṃ vakṣi
||1||prati̍ ṣīma̱gnirja̍rate̱ sami̍ddha̱: prati̱ viprā̍so ma̱tibhi̍rgṛ̱ṇanta̍: |
u̱ṣā yā̍ti̱ jyoti̍ṣā̱ bādha̍mānā̱ viśvā̱ tamā̍ṃsi duri̱tāpa̍ de̱vī
||2||e̱tā u̱ tyāḥ pratya̍dṛśranpu̱rastā̱jjyoti̱ryaccha̍ntīru̱ṣaso̍ vibhā̱tīḥ |
ajī̍jana̱ntsūrya̍ṃ ya̱jñama̱gnima̍pā̱cīna̱ṃ tamo̍ agā̱daju̍ṣṭam
||3||ace̍ti di̱vo du̍hi̱tā ma̱ghonī̱ viśve̍ paśyantyu̱ṣasa̍ṃ vibhā̱tīm |
āsthā̱dratha̍ṃ sva̱dhayā̍ yu̱jyamā̍na̱mā yamaśvā̍saḥ su̱yujo̱ vaha̍nti
||4||prati̍ tvā̱dya su̱mana̍so budhantā̱'smākā̍so ma̱ghavā̍no va̱yaṃ ca̍ |
ti̱lvi̱lā̱yadhva̍muṣaso vibhā̱tīryū̱yaṃ pā̍ta sva̱stibhi̱: sadā̍ naḥ
||5||5 maitrāvaruṇirvasiṣṭha:| uṣasa: | triṣṭup |
vyu1ṣā ā̍vaḥ pa̱thyā̱3 janā̍nā̱ṃ pañca̍ kṣi̱tīrmānu̍ṣīrbo̱dhaya̍ntī |
su̱sa̱ṃdṛgbhi̍ru̱kṣabhi̍rbhā̱numa̍śre̱dvi sūryo̱ roda̍sī̱ cakṣa̍sāvaḥ
||1||vya̍ñjate di̱vo ante̍ṣva̱ktūnviśo̱ na yu̱ktā u̱ṣaso̍ yatante |
saṃ te̱ gāva̱stama̱ ā va̍rtayanti̱ jyoti̍ryacchanti savi̱teva̍ bā̱hū
||2||abhū̍du̱ṣā indra̍tamā ma̱ghonyajī̍janatsuvi̱tāya̱ śravā̍ṃsi |
vi di̱vo de̱vī du̍hi̱tā da̍dhā̱tyaṅgi̍rastamā su̱kṛte̱ vasū̍ni
||3||tāva̍duṣo̱ rādho̍ a̱smabhya̍ṃ rāsva̱ yāva̍tsto̱tṛbhyo̱ ara̍do gṛṇā̱nā |
yāṃ tvā̍ ja̱jñurvṛ̍ṣa̱bhasyā̱ rave̍ṇa̱ vi dṛ̱l̤hasya̱ duro̱ adre̍raurṇoḥ
||4||de̱vaṃde̍va̱ṃ rādha̍se co̱daya̍ntyasma̱drya̍ksū̱nṛtā̍ ī̱raya̍ntī |
vyu̱cchantī̍ naḥ sa̱naye̱ dhiyo̍ dhā yū̱yaṃ pā̍ta sva̱stibhi̱: sadā̍ naḥ
||5||3 maitrāvaruṇirvasiṣṭha:| uṣasa: | triṣṭup |
prati̱ stome̍bhiru̱ṣasa̱ṃ vasi̍ṣṭhā gī̱rbhirviprā̍saḥ pratha̱mā a̍budhran |
vi̱va̱rtaya̍ntī̱ṃ raja̍sī̱ sama̍nte āviṣkṛṇva̱tīṃ bhuva̍nāni̱ viśvā̍
||1||e̱ṣā syā navya̱māyu̱rdadhā̍nā gū̱ḍhvī tamo̱ jyoti̍ṣo̱ṣā a̍bodhi |
agra̍ eti yuva̱tirahra̍yāṇā̱ prāci̍kita̱tsūrya̍ṃ ya̱jñama̱gnim
||2||aśvā̍vatī̱rgoma̍tīrna u̱ṣāso̍ vī̱rava̍tī̱: sada̍mucchantu bha̱drāḥ |
ghṛ̱taṃ duhā̍nā vi̱śvata̱: prapī̍tā yū̱yaṃ pā̍ta sva̱stibhi̱: sadā̍ naḥ
||3||6 maitrāvaruṇirvasiṣṭha:| uṣasa: |pragātha:=(viṣamā bṛhatī, samā satobṛhatī )|
pratyu̍ adarśyāya̱tyu1cchantī̍ duhi̱tā di̱vaḥ |
apo̱ mahi̍ vyayati̱ cakṣa̍se̱ tamo̱ jyoti̍ṣkṛṇoti sū̱narī̍
||1||udu̱sriyā̍: sṛjate̱ sūrya̱: sacā̍m̐ u̱dyannakṣa̍tramarci̱vat |
tavedu̍ṣo̱ vyuṣi̱ sūrya̍sya ca̱ saṃ bha̱ktena̍ gamemahi
||2||prati̍ tvā duhitardiva̱ uṣo̍ jī̱rā a̍bhutsmahi |
yā vaha̍si pu̱ru spā̱rhaṃ va̍nanvati̱ ratna̱ṃ na dā̱śuṣe̱ maya̍:
||3||u̱cchantī̱ yā kṛ̱ṇoṣi̍ ma̱ṃhanā̍ mahi pra̱khyai de̍vi̱ sva̍rdṛ̱śe |
tasyā̍ste ratna̱bhāja̍ īmahe va̱yaṃ syāma̍ mā̱turna sū̱nava̍:
||4||tacci̱traṃ rādha̱ ā bha̱roṣo̱ yaddī̍rgha̱śrutta̍mam |
yatte̍ divo duhitarmarta̱bhoja̍na̱ṃ tadrā̍sva bhu̱najā̍mahai
||5||śrava̍: sū̱ribhyo̍ a̱mṛta̍ṃ vasutva̱naṃ vājā̍m̐ a̱smabhya̱ṃ goma̍taḥ |
co̱da̱yi̱trī ma̱ghona̍: sū̱nṛtā̍vatyu̱ṣā u̍ccha̱dapa̱ sridha̍:
||6||10 maitrāvaruṇirvasiṣṭha:| indrāvaruṇau |jagatī |
indrā̍varuṇā yu̱vama̍dhva̱rāya̍ no vi̱śe janā̍ya̱ mahi̱ śarma̍ yacchatam |
dī̱rghapra̍yajyu̱mati̱ yo va̍nu̱ṣyati̍ va̱yaṃ ja̍yema̱ pṛta̍nāsu dū̱ḍhya̍:
||1||sa̱mrāl̤a̱nyaḥ sva̱rāl̤a̱nya u̍cyate vāṃ ma̱hāntā̱vindrā̱varu̍ṇā ma̱hāva̍sū |
viśve̍ de̱vāsa̍: para̱me vyo̍mani̱ saṃ vā̱mojo̍ vṛṣaṇā̱ saṃ bala̍ṃ dadhuḥ
||2||anva̱pāṃ khānya̍tṛnta̱moja̱sā sūrya̍mairayataṃ di̱vi pra̱bhum |
indrā̍varuṇā̱ made̍ asya mā̱yino'pi̍nvatama̱pita̱: pinva̍ta̱ṃ dhiya̍:
||3||yu̱vāmidyu̱tsu pṛta̍nāsu̱ vahna̍yo yu̱vāṃ kṣema̍sya prasa̱ve mi̱tajña̍vaḥ |
ī̱śā̱nā vasva̍ u̱bhaya̍sya kā̱rava̱ indrā̍varuṇā su̱havā̍ havāmahe
||4||indrā̍varuṇā̱ yadi̱māni̍ ca̱krathu̱rviśvā̍ jā̱tāni̱ bhuva̍nasya ma̱jmanā̍ |
kṣeme̍ṇa mi̱tro varu̍ṇaṃ duva̱syati̍ ma̱rudbhi̍ru̱graḥ śubha̍ma̱nya ī̍yate
||5||ma̱he śu̱lkāya̱ varu̍ṇasya̱ nu tvi̱ṣa ojo̍ mimāte dhru̱vama̍sya̱ yatsvam |
ajā̍mima̱nyaḥ śna̱thaya̍nta̱māti̍radda̱bhrebhi̍ra̱nyaḥ pra vṛ̍ṇoti̱ bhūya̍saḥ
||6||na tamaṃho̱ na du̍ri̱tāni̱ martya̱mindrā̍varuṇā̱ na tapa̱: kuta̍śca̱na |
yasya̍ devā̱ gaccha̍tho vī̱tho a̍dhva̱raṃ na taṃ marta̍sya naśate̱ pari̍hvṛtiḥ
||7||a̱rvāṅna̍rā̱ daivye̱nāva̱sā ga̍taṃ śṛṇu̱taṃ hava̱ṃ yadi̍ me̱ jujo̍ṣathaḥ |
yu̱vorhi sa̱khyamu̱ta vā̱ yadāpya̍ṃ mārḍī̱kami̍ndrāvaruṇā̱ ni ya̍cchatam
||8||a̱smāka̍mindrāvaruṇā̱ bhare̍bhare puroyo̱dhā bha̍vataṃ kṛṣṭyojasā |
yadvā̱ṃ hava̍nta u̱bhaye̱ adha̍ spṛ̱dhi nara̍sto̱kasya̱ tana̍yasya sā̱tiṣu̍
||9||a̱sme indro̱ varu̍ṇo mi̱tro a̍rya̱mā dyu̱mnaṃ ya̍cchantu̱ mahi̱ śarma̍ sa̱pratha̍: |
a̱va̱dhraṃ jyoti̱radi̍teṝtā̱vṛdho̍ de̱vasya̱ śloka̍ṃ savi̱turma̍nāmahe
||10||10 maitrāvaruṇirvasiṣṭha:| indrāvaruṇau |jagatī |
yu̱vāṃ na̍rā̱ paśya̍mānāsa̱ āpya̍ṃ prā̱cā ga̱vyanta̍: pṛthu̱parśa̍vo yayuḥ |
dāsā̍ ca vṛ̱trā ha̱tamāryā̍ṇi ca su̱dāsa̍mindrāvaru̱ṇāva̍sāvatam
||1||yatrā̱ nara̍: sa̱maya̍nte kṛ̱tadhva̍jo̱ yasmi̍nnā̱jā bhava̍ti̱ kiṃ ca̱na pri̱yam |
yatrā̱ bhaya̍nte̱ bhuva̍nā sva̱rdṛśa̱statrā̍ na indrāvaru̱ṇādhi̍ vocatam
||2||saṃ bhūmyā̱ antā̍ dhvasi̱rā a̍dṛkṣa̱tendrā̍varuṇā di̱vi ghoṣa̱
āru̍hat | asthu̱rjanā̍nā̱mupa̱ māmarā̍tayo̱'rvāgava̍sā havanaśru̱tā ga̍tam
||3||indrā̍varuṇā va̱dhanā̍bhirapra̱ti bhe̱daṃ va̱nvantā̱ pra su̱dāsa̍māvatam |
brahmā̍ṇyeṣāṃ śṛṇuta̱ṃ havī̍mani sa̱tyā tṛtsū̍nāmabhavatpu̱rohi̍tiḥ
||4||indrā̍varuṇāva̱bhyā ta̍panti mā̱ghānya̱ryo va̱nuṣā̱marā̍tayaḥ |
yu̱vaṃ hi vasva̍ u̱bhaya̍sya̱ rāja̱tho'dha̍ smā no'vata̱ṃ pārye̍ di̱vi
||5||yu̱vāṃ ha̍vanta u̱bhayā̍sa ā̱jiṣvindra̍ṃ ca̱ vasvo̱ varu̍ṇaṃ ca sā̱taye̍ |
yatra̱ rāja̍bhirda̱śabhi̱rnibā̍dhita̱ṃ pra su̱dāsa̱māva̍ta̱ṃ tṛtsu̍bhiḥ sa̱ha
||6||daśa̱ rājā̍na̱: sami̍tā̱ aya̍jyavaḥ su̱dāsa̍mindrāvaruṇā̱ na yu̍yudhuḥ |
sa̱tyā nṛ̱ṇāma̍dma̱sadā̱mupa̍stutirde̱vā e̍ṣāmabhavande̱vahū̍tiṣu
||7||dā̱śa̱rā̱jñe pari̍yattāya vi̱śvata̍: su̱dāsa̍ indrāvaruṇāvaśikṣatam |
śvi̱tyañco̱ yatra̱ nama̍sā kapa̱rdino̍ dhi̱yā dhīva̍nto̱ asa̍panta̱ tṛtsa̍vaḥ
||8||vṛ̱trāṇya̱nyaḥ sa̍mi̱theṣu̱ jighna̍te vra̱tānya̱nyo a̱bhi ra̍kṣate̱ sadā̍ |
havā̍mahe vāṃ vṛṣaṇā suvṛ̱ktibhi̍ra̱sme i̍ndrāvaruṇā̱ śarma̍ yacchatam
||9||a̱sme indro̱ varu̍ṇo mi̱tro a̍rya̱mā dyu̱mnaṃ ya̍cchantu̱ mahi̱ śarma̍ sa̱pratha̍: |
a̱va̱dhraṃ jyoti̱radi̍teṝtā̱vṛdho̍ de̱vasya̱ śloka̍ṃ savi̱turma̍nāmahe
||10||5 maitrāvaruṇirvasiṣṭha:| indrāvaruṇau | triṣṭup |
ā vā̍ṃ rājānāvadhva̱re va̍vṛtyāṃ ha̱vyebhi̍rindrāvaruṇā̱ namo̍bhiḥ |
pra vā̍ṃ ghṛ̱tācī̍ bā̱hvordadhā̍nā̱ pari̱ tmanā̱ viṣu̍rūpā jigāti
||1||yu̱vo rā̱ṣṭraṃ bṛ̱hadi̍nvati̱ dyauryau se̱tṛbhi̍rara̱jjubhi̍: sinī̱thaḥ |
pari̍ no̱ hel̤o̱ varu̍ṇasya vṛjyā u̱ruṃ na̱ indra̍: kṛṇavadu lo̱kam
||2||kṛ̱taṃ no̍ ya̱jñaṃ vi̱dathe̍ṣu̱ cāru̍ṃ kṛ̱taṃ brahmā̍ṇi sū̱riṣu̍ praśa̱stā |
upo̍ ra̱yirde̱vajū̍to na etu̱ pra ṇa̍: spā̱rhābhi̍rū̱tibhi̍stiretam
||3||a̱sme i̍ndrāvaruṇā vi̱śvavā̍raṃ ra̱yiṃ dha̍tta̱ṃ vasu̍mantaṃ puru̱kṣum |
pra ya ā̍di̱tyo anṛ̍tā mi̱nātyami̍tā̱ śūro̍ dayate̱ vasū̍ni
||4||i̱yamindra̱ṃ varu̍ṇamaṣṭa me̱ gīḥ prāva̍tto̱ke tana̍ye̱ tūtu̍jānā |
su̱ratnā̍so de̱vavī̍tiṃ gamema yū̱yaṃ pā̍ta sva̱stibhi̱: sadā̍ naḥ
||5||5 maitrāvaruṇirvasiṣṭha:| indrāvaruṇau | triṣṭup |
pu̱nī̱ṣe vā̍mara̱kṣasa̍ṃ manī̱ṣāṃ soma̱mindrā̍ya̱ varu̍ṇāya̱ juhva̍t |
ghṛ̱tapra̍tīkāmu̱ṣasa̱ṃ na de̱vīṃ tā no̱ yāma̍nnuruṣyatāma̱bhīke̍
||1||spardha̍nte̱ vā u̍ deva̱hūye̱ atra̱ yeṣu̍ dhva̱jeṣu̍ di̱dyava̱: pata̍nti |
yu̱vaṃ tām̐ i̍ndrāvaruṇāva̱mitrā̍nha̱taṃ parā̍ca̱: śarvā̱ viṣū̍caḥ
||2||āpa̍ści̱ddhi svaya̍śasa̱: sada̍:su de̱vīrindra̱ṃ varu̍ṇaṃ de̱vatā̱ dhuḥ |
kṛ̱ṣṭīra̱nyo dhā̱raya̍ti̱ pravi̍ktā vṛ̱trāṇya̱nyo a̍pra̱tīni̍ hanti
||3||sa su̱kratu̍ṝta̱cida̍stu̱ hotā̱ ya ā̍ditya̱ śava̍sā vā̱ṃ nama̍svān |
ā̱va̱varta̱dava̍se vāṃ ha̱viṣmā̱nasa̱ditsa su̍vi̱tāya̱ praya̍svān
||4||i̱yamindra̱ṃ varu̍ṇamaṣṭa me̱ gīḥ prāva̍tto̱ke tana̍ye̱ tūtu̍jānā |
su̱ratnā̍so de̱vavī̍tiṃ gamema yū̱yaṃ pā̍ta sva̱stibhi̱: sadā̍ naḥ
||5||8 maitrāvaruṇirvasiṣṭha:| varuṇa: | triṣṭup |
dhīrā̱ tva̍sya mahi̱nā ja̱nūṃṣi̱ vi yasta̱stambha̱ roda̍sī cidu̱rvī |
pra nāka̍mṛ̱ṣvaṃ nu̍nude bṛ̱hanta̍ṃ dvi̱tā nakṣa̍traṃ pa̱pratha̍cca̱ bhūma̍
||1||u̱ta svayā̍ ta̱nvā̱3 saṃ va̍de̱ tatka̱dā nva1ntarvaru̍ṇe bhuvāni |
kiṃ me̍ ha̱vyamahṛ̍ṇāno juṣeta ka̱dā mṛ̍l̤ī̱kaṃ su̱manā̍ a̱bhi khya̍m
||2||pṛ̱cche tadeno̍ varuṇa di̱dṛkṣūpo̍ emi ciki̱tuṣo̍ vi̱pṛccha̍m |
sa̱mā̱naminme̍ ka̱vaya̍ścidāhura̱yaṃ ha̱ tubhya̱ṃ varu̍ṇo hṛṇīte
||3||kimāga̍ āsa varuṇa̱ jyeṣṭha̱ṃ yatsto̱tāra̱ṃ jighā̍ṃsasi̱ sakhā̍yam |
pra tanme̍ voco dūl̤abha svadhā̱vo'va̍ tvāne̱nā nama̍sā tu̱ra i̍yām
||4||ava̍ dru̱gdhāni̱ pitryā̍ sṛjā̱ no'va̱ yā va̱yaṃ ca̍kṛ̱mā ta̱nūbhi̍: |
ava̍ rājanpaśu̱tṛpa̱ṃ na tā̱yuṃ sṛ̱jā va̱tsaṃ na dāmno̱ vasi̍ṣṭham
||5||na sa svo dakṣo̍ varuṇa̱ dhruti̱: sā surā̍ ma̱nyurvi̱bhīda̍ko̱ aci̍ttiḥ |
asti̱ jyāyā̱nkanī̍yasa upā̱re svapna̍śca̱nedanṛ̍tasya prayo̱tā
||6||ara̍ṃ dā̱so na mī̱l̤huṣe̍ karāṇya̱haṃ de̱vāya̱ bhūrṇa̱ye'nā̍gāḥ |
ace̍tayada̱cito̍ de̱vo a̱ryo gṛtsa̍ṃ rā̱ye ka̱vita̍ro junāti
||7||a̱yaṃ su tubhya̍ṃ varuṇa svadhāvo hṛ̱di stoma̱ upa̍śritaścidastu |
śaṃ na̱: kṣeme̱ śamu̱ yoge̍ no astu yū̱yaṃ pā̍ta sva̱stibhi̱: sadā̍ naḥ
||8||7 maitrāvaruṇirvasiṣṭha:| varuṇa:| triṣṭup |
rada̍tpa̱tho varu̍ṇa̱: sūryā̍ya̱ prārṇā̍ṃsi samu̱driyā̍ na̱dīnā̍m |
sargo̱ na sṛ̱ṣṭo arva̍tīṝtā̱yañca̱kāra̍ ma̱hīra̱vanī̱raha̍bhyaḥ
||1||ā̱tmā te̱ vāto̱ raja̱ ā na̍vīnotpa̱śurna bhūrṇi̱ryava̍se sasa̱vān |
a̱ntarma̱hī bṛ̍ha̱tī roda̍sī̱me viśvā̍ te̱ dhāma̍ varuṇa pri̱yāṇi̍
||2||pari̱ spaśo̱ varu̍ṇasya̱ smadi̍ṣṭā u̱bhe pa̍śyanti̱ roda̍sī su̱meke̍ |
ṛ̱tāvā̍naḥ ka̱vayo̍ ya̱jñadhī̍rā̱: prace̍taso̱ ya i̱ṣaya̍nta̱ manma̍
||3||u̱vāca̍ me̱ varu̍ṇo̱ medhi̍rāya̱ triḥ sa̱pta nāmāghnyā̍ bibharti |
vi̱dvānpa̱dasya̱ guhyā̱ na vo̍cadyu̱gāya̱ vipra̱ upa̍rāya̱ śikṣa̍n
||4||ti̱sro dyāvo̱ nihi̍tā a̱ntara̍sminti̱sro bhūmī̱rupa̍rā̱: ṣaḍvi̍dhānāḥ |
gṛtso̱ rājā̱ varu̍ṇaścakra e̱taṃ di̱vi pre̱ṅkhaṃ hi̍ra̱ṇyaya̍ṃ śu̱bhe kam
||5||ava̱ sindhu̱ṃ varu̍ṇo̱ dyauri̍va sthāddra̱pso na śve̱to mṛ̱gastuvi̍ṣmān |
ga̱mbhī̱raśa̍ṃso̱ raja̍so vi̱māna̍: supā̱rakṣa̍traḥ sa̱to a̱sya rājā̍
||6||yo mṛ̱l̤ayā̍ti ca̱kruṣe̍ ci̱dāgo̍ va̱yaṃ syā̍ma̱ varu̍ṇe̱ anā̍gāḥ |
anu̍ vra̱tānyadi̍teṝ̱dhanto̍ yū̱yaṃ pā̍ta sva̱stibhi̱: sadā̍ naḥ
||7||7 maitrāvaruṇirvasiṣṭha:| varuṇa:, ( 7 pāśavimocanī) | triṣṭup |
pra śu̱ndhyuva̱ṃ varu̍ṇāya̱ preṣṭhā̍ṃ ma̱tiṃ va̍siṣṭha mī̱l̤huṣe̍ bharasva |
ya ī̍ma̱rvāñca̱ṃ kara̍te̱ yaja̍traṃ sa̱hasrā̍magha̱ṃ vṛṣa̍ṇaṃ bṛ̱hanta̍m
||1||adhā̱ nva̍sya sa̱ṃdṛśa̍ṃ jaga̱nvāna̱gneranī̍ka̱ṃ varu̍ṇasya maṃsi |
sva1ryadaśma̍nnadhi̱pā u̱ andho̱'bhi mā̱ vapu̍rdṛ̱śaye̍ ninīyāt
||2||ā yadru̱hāva̱ varu̍ṇaśca̱ nāva̱ṃ pra yatsa̍mu̱dramī̱rayā̍va̱ madhya̍m |
adhi̱ yada̱pāṃ snubhi̱ścarā̍va̱ pra pre̱ṅkha ī̍ṅkhayāvahai śu̱bhe kam
||3||vasi̍ṣṭhaṃ ha̱ varu̍ṇo nā̱vyādhā̱dṛṣi̍ṃ cakāra̱ svapā̱ maho̍bhiḥ |
sto̱tāra̱ṃ vipra̍: sudina̱tve ahnā̱ṃ yānnu dyāva̍sta̱tana̱nyādu̱ṣāsa̍:
||4||kva1 tyāni̍ nau sa̱khyā ba̍bhūvu̱: sacā̍vahe̱ yada̍vṛ̱kaṃ pu̱rā ci̍t |
bṛ̱hanta̱ṃ māna̍ṃ varuṇa svadhāvaḥ sa̱hasra̍dvāraṃ jagamā gṛ̱haṃ te̍
||5||ya ā̱pirnityo̍ varuṇa pri̱yaḥ santvāmāgā̍ṃsi kṛ̱ṇava̱tsakhā̍ te |
mā ta̱ ena̍svanto yakṣinbhujema ya̱ndhi ṣmā̱ vipra̍: stuva̱te varū̍tham
||6||dhru̱vāsu̍ tvā̱su kṣi̱tiṣu̍ kṣi̱yanto̱ vya1smatpāśa̱ṃ varu̍ṇo mumocat |
avo̍ vanvā̱nā adi̍teru̱pasthā̍dyū̱yaṃ pā̍ta sva̱stibhi̱: sadā̍ naḥ
||7||5 maitrāvaruṇirvasiṣṭha:| varuṇa: | gāyatrī, 5 jagatī|
mo ṣu va̍ruṇa mṛ̱nmaya̍ṃ gṛ̱haṃ rā̍janna̱haṃ ga̍mam | mṛ̱l̤ā su̍kṣatra mṛ̱l̤aya̍
||1||yademi̍ prasphu̱ranni̍va̱ dṛti̱rna dhmā̱to a̍drivaḥ | mṛ̱l̤ā su̍kṣatra mṛ̱l̤aya̍
||2||kratva̍: samaha dī̱natā̍ pratī̱paṃ ja̍gamā śuce | mṛ̱l̤ā su̍kṣatra mṛ̱l̤aya̍
||3||a̱pāṃ madhye̍ tasthi̱vāṃsa̱ṃ tṛṣṇā̍vidajjari̱tāra̍m | mṛ̱l̤ā su̍kṣatra mṛ̱l̤aya̍
||4||yatkiṃ ce̱daṃ va̍ruṇa̱ daivye̱ jane̍'bhidro̱haṃ ma̍nu̱ṣyā̱3ścarā̍masi |
aci̍ttī̱ yattava̱ dharmā̍ yuyopi̱ma mā na̱stasmā̱dena̍so deva rīriṣaḥ
||5||7 maitrāvaruṇirvasiṣṭha:| vāyu:, 5 -7 indravāyū| triṣṭup |
pra vī̍ra̱yā śuca̍yo dadrire vāmadhva̱ryubhi̱rmadhu̍mantaḥ su̱tāsa̍: |
vaha̍ vāyo ni̱yuto̍ yā̱hyacchā̱ pibā̍ su̱tasyāndha̍so̱ madā̍ya
||1||ī̱śā̱nāya̱ prahu̍ti̱ṃ yasta̱ āna̱ṭ śuci̱ṃ soma̍ṃ śucipā̱stubhya̍ṃ vāyo |
kṛ̱ṇoṣi̱ taṃ martye̍ṣu praśa̱staṃ jā̱tojā̍to jāyate vā̱jya̍sya
||2||rā̱ye nu yaṃ ja̱jñatū̱ roda̍sī̱me rā̱ye de̱vī dhi̱ṣaṇā̍ dhāti de̱vam |
adha̍ vā̱yuṃ ni̱yuta̍: saścata̱ svā u̱ta śve̱taṃ vasu̍dhitiṃ nire̱ke
||3||u̱cchannu̱ṣasa̍: su̱dinā̍ ari̱prā u̱ru jyoti̍rvividu̱rdīdhyā̍nāḥ |
gavya̍ṃ cidū̱rvamu̱śijo̱ vi va̍vru̱steṣā̱manu̍ pra̱diva̍: sasru̱rāpa̍:
||4||te sa̱tyena̱ mana̍sā̱ dīdhyā̍nā̱: svena̍ yu̱ktāsa̱: kratu̍nā vahanti |
indra̍vāyū vīra̱vāha̱ṃ ratha̍ṃ vāmīśā̱nayo̍ra̱bhi pṛkṣa̍: sacante
||5||ī̱śā̱nāso̱ ye dadha̍te̱ sva̍rṇo̱ gobhi̱raśve̍bhi̱rvasu̍bhi̱rhira̍ṇyaiḥ |
indra̍vāyū sū̱rayo̱ viśva̱māyu̱rarva̍dbhirvī̱raiḥ pṛta̍nāsu sahyuḥ
||6||arva̍nto̱ na śrava̍so̱ bhikṣa̍māṇā indravā̱yū su̍ṣṭu̱tibhi̱rvasi̍ṣṭhāḥ |
vā̱ja̱yanta̱: svava̍se huvema yū̱yaṃ pā̍ta sva̱stibhi̱: sadā̍ naḥ
||7||7 maitrāvaruṇirvasiṣṭha:| 1,3 vāyu: , 2, 4-7 indravāyū | triṣṭup |
ku̱vida̱ṅga nama̍sā̱ ye vṛ̱dhāsa̍: pu̱rā de̱vā a̍nava̱dyāsa̱ āsa̍n |
te vā̱yave̱ mana̍ve bādhi̱tāyā'vā̍sayannu̱ṣasa̱ṃ sūrye̍ṇa
||1||u̱śantā̍ dū̱tā na dabhā̍ya go̱pā mā̱saśca̍ pā̱thaḥ śa̱rada̍śca pū̱rvīḥ |
indra̍vāyū suṣṭu̱tirvā̍miyā̱nā mā̍rḍī̱kamī̍ṭṭe suvi̱taṃ ca̱ navya̍m
||2||pīvo̍annām̐ rayi̱vṛdha̍: sume̱dhāḥ śve̱taḥ si̍ṣakti ni̱yutā̍mabhi̱śrīḥ |
te vā̱yave̱ sama̍naso̱ vi ta̍sthu̱rviśvennara̍: svapa̱tyāni̍ cakruḥ
||3||yāva̱ttara̍sta̱nvo̱3 yāva̱dojo̱ yāva̱nnara̱ścakṣa̍sā̱ dīdhyā̍nāḥ |
śuci̱ṃ soma̍ṃ śucipā pātama̱sme indra̍vāyū̱ sada̍taṃ ba̱rhiredam
||4||ni̱yu̱vā̱nā ni̱yuta̍: spā̱rhavī̍rā̱ indra̍vāyū sa̱ratha̍ṃ yātama̱rvāk |
i̱daṃ hi vā̱ṃ prabhṛ̍ta̱ṃ madhvo̱ agra̱madha̍ prīṇā̱nā vi mu̍muktama̱sme
||5||yā vā̍ṃ śa̱taṃ ni̱yuto̱ yāḥ sa̱hasra̱mindra̍vāyū vi̱śvavā̍rā̱: saca̍nte |
ābhi̍ryātaṃ suvi̱datrā̍bhira̱rvākpā̱taṃ na̍rā̱ prati̍bhṛtasya̱ madhva̍:
||6||arva̍nto̱ na śrava̍so̱ bhikṣa̍māṇā indravā̱yū su̍ṣṭu̱tibhi̱rvasi̍ṣṭhāḥ |
vā̱ja̱yanta̱: svava̍se huvema yū̱yaṃ pā̍ta sva̱stibhi̱: sadā̍ naḥ
||7||5 maitrāvaruṇirvasiṣṭha:| vāyu: , 2, 4 indravāyū | triṣṭup |
ā vā̍yo bhūṣa śucipā̱ upa̍ naḥ sa̱hasra̍ṃ te ni̱yuto̍ viśvavāra |
upo̍ te̱ andho̱ madya̍mayāmi̱ yasya̍ deva dadhi̱ṣe pū̍rva̱peya̍m
||1||pra sotā̍ jī̱ro a̍dhva̱reṣva̍sthā̱tsoma̱mindrā̍ya vā̱yave̱ piba̍dhyai |
pra yadvā̱ṃ madhvo̍ agri̱yaṃ bhara̍ntyadhva̱ryavo̍ deva̱yanta̱: śacī̍bhiḥ
||2||pra yābhi̱ryāsi̍ dā̱śvāṃsa̱macchā̍ ni̱yudbhi̍rvāyavi̱ṣṭaye̍ duro̱ṇe |
ni no̍ ra̱yiṃ su̱bhoja̍saṃ yuvasva̱ ni vī̱raṃ gavya̱maśvya̍ṃ ca̱ rādha̍:
||3||ye vā̱yava̍ indra̱māda̍nāsa̱ āde̍vāso ni̱tośa̍nāso a̱ryaḥ |
ghnanto̍ vṛ̱trāṇi̍ sū̱ribhi̍: ṣyāma sāsa̱hvāṃso̍ yu̱dhā nṛbhi̍ra̱mitrā̍n
||4||ā no̍ ni̱yudbhi̍: śa̱tinī̍bhiradhva̱raṃ sa̍ha̱sriṇī̍bhi̱rupa̍ yāhi ya̱jñam | vā
yo̍ a̱smintsava̍ne mādayasva yū̱yaṃ pā̍ta sva̱stibhi̱: sadā̍ naḥ
||5||8 maitrāvaruṇirvasiṣṭha:| indrāgnī| triṣṭup |
śuci̱ṃ nu stoma̱ṃ nava̍jātama̱dyendrā̍gnī vṛtrahaṇā ju̱ṣethā̍m |
u̱bhā hi vā̍ṃ su̱havā̱ joha̍vīmi̱ tā vāja̍ṃ sa̱dya u̍śa̱te dheṣṭhā̍
||1||tā sā̍na̱sī śa̍vasānā̱ hi bhū̱taṃ sā̍ka̱ṃvṛdhā̱ śava̍sā śūśu̱vāṃsā̍ |
kṣaya̍ntau rā̱yo yava̍sasya̱ bhūre̍: pṛ̱ṅktaṃ vāja̍sya̱ sthavi̍rasya̱ ghṛṣve̍:
||2||upo̍ ha̱ yadvi̱datha̍ṃ vā̱jino̱ gurdhī̱bhirviprā̱: prama̍timi̱cchamā̍nāḥ |
arva̍nto̱ na kāṣṭhā̱ṃ nakṣa̍māṇā indrā̱gnī johu̍vato̱ nara̱ste
||3||gī̱rbhirvipra̱: prama̍timi̱cchamā̍na̱ īṭṭe̍ ra̱yiṃ ya̱śasa̍ṃ pūrva̱bhāja̍m |
indrā̍gnī vṛtrahaṇā suvajrā̱ pra no̱ navye̍bhistirataṃ de̱ṣṇaiḥ
||4||saṃ yanma̱hī mi̍tha̱tī spardha̍māne tanū̱rucā̱ śūra̍sātā̱ yatai̍te |
ade̍vayuṃ vi̱dathe̍ deva̱yubhi̍: sa̱trā ha̍taṃ soma̱sutā̱ jane̍na
||5||i̱māmu̱ ṣu soma̍suti̱mupa̍ na̱ endrā̍gnī saumana̱sāya̍ yātam |
nū ci̱ddhi pa̍rima̱mnāthe̍ a̱smānā vā̱ṃ śaśva̍dbhirvavṛtīya̱ vājai̍:
||6||so a̍gna e̱nā nama̍sā̱ sami̱ddho'cchā̍ mi̱traṃ varu̍ṇa̱mindra̍ṃ voceḥ |
yatsī̱māga̍ścakṛ̱mā tatsu mṛ̍l̤a̱ tada̍rya̱mādi̍tiḥ śiśrathantu
||7||e̱tā a̍gna āśuṣā̱ṇāsa̍ i̱ṣṭīryu̱voḥ sacā̱bhya̍śyāma̱ vājā̍n |
mendro̍ no̱ viṣṇu̍rma̱ruta̱: pari̍ khyanyū̱yaṃ pā̍ta sva̱stibhi̱: sadā̍ naḥ
||8||12 maitrāvaruṇirvasiṣṭha:| indrāgnī|gāyatrī, 12 anuṣṭup |
i̱yaṃ vā̍ma̱sya manma̍na̱ indrā̍gnī pū̱rvyastu̍tiḥ | a̱bhrādvṛ̱ṣṭiri̍vājani
||1||śṛ̱ṇu̱taṃ ja̍ri̱turhava̱mindrā̍gnī̱ vana̍ta̱ṃ gira̍: | ī̱śā̱nā pi̍pyata̱ṃ dhiya̍:
||2||mā pā̍pa̱tvāya̍ no na̱rendrā̍gnī̱ mābhiśa̍staye | mā no̍ rīradhataṃ ni̱de
||3||indre̍ a̱gnā namo̍ bṛ̱hatsu̍vṛ̱ktimera̍yāmahe | dhi̱yā dhenā̍ ava̱syava̍:
||4||tā hi śaśva̍nta̱ īl̤a̍ta i̱tthā viprā̍sa ū̱taye̍ | sa̱bādho̱ vāja̍sātaye
||5||tā vā̍ṃ gī̱rbhirvi̍pa̱nyava̱: praya̍svanto havāmahe | me̱dhasā̍tā sani̱ṣyava̍:
||6||indrā̍gnī̱ ava̱sā ga̍tama̱smabhya̍ṃ carṣaṇīsahā | mā no̍ du̱:śaṃsa̍ īśata
||7||mā kasya̍ no̱ ara̍ruṣo dhū̱rtiḥ praṇa̱ṅmartya̍sya | indrā̍gnī̱ śarma̍ yacchatam
||8||goma̱ddhira̍ṇyava̱dvasu̱ yadvā̱maśvā̍va̱dīma̍he | indrā̍gnī̱ tadva̍nemahi
||9||yatsoma̱ ā su̱te nara̍ indrā̱gnī ajo̍havuḥ | saptī̍vantā sapa̱ryava̍:
||10||u̱kthebhi̍rvṛtra̱hanta̍mā̱ yā ma̍ndā̱nā ci̱dā gi̱rā | ā̱ṅgū̱ṣairā̱vivā̍sataḥ
||11||tāviddu̱:śaṃsa̱ṃ martya̱ṃ durvi̍dvāṃsaṃ rakṣa̱svina̍m | ā̱bho̱gaṃ hanma̍nā hatamuda̱dhiṃ hanma̍nā hatam
||12||6 maitrāvaruṇirvasiṣṭha:| sarasvatī , 3 sarasvān | triṣṭup |
pra kṣoda̍sā̱ dhāya̍sā sasra e̱ṣā sara̍svatī dha̱ruṇa̱māya̍sī̱ pūḥ |
pra̱bāba̍dhānā ra̱thye̍va yāti̱ viśvā̍ a̱po ma̍hi̱nā sindhu̍ra̱nyāḥ
||1||ekā̍ceta̱tsara̍svatī na̱dīnā̱ṃ śuci̍rya̱tī gi̱ribhya̱ ā sa̍mu̱drāt |
rā̱yaśceta̍ntī̱ bhuva̍nasya̱ bhūre̍rghṛ̱taṃ payo̍ duduhe̱ nāhu̍ṣāya
||2||sa vā̍vṛdhe̱ naryo̱ yoṣa̍ṇāsu̱ vṛṣā̱ śiśu̍rvṛṣa̱bho ya̱jñiyā̍su |
sa vā̱jina̍ṃ ma̱ghava̍dbhyo dadhāti̱ vi sā̱taye̍ ta̱nva̍ṃ māmṛjīta
||3||u̱ta syā na̱: sara̍svatī juṣā̱ṇopa̍ śravatsu̱bhagā̍ ya̱jṇe a̱smin |
mi̱tajñu̍bhirnama̱syai̍riyā̱nā rā̱yā yu̱jā ci̱dutta̍rā̱ sakhi̍bhyaḥ
||4||i̱mā juhvā̍nā yu̱ṣmadā namo̍bhi̱: prati̱ stoma̍ṃ sarasvati juṣasva |
tava̱ śarma̍npri̱yata̍me̱ dadhā̍nā̱ upa̍ stheyāma śara̱ṇaṃ na vṛ̱kṣam
||5||a̱yamu̍ te sarasvati̱ vasi̍ṣṭho̱ dvārā̍vṛ̱tasya̍ subhage̱ vyā̍vaḥ |
vardha̍ śubhre stuva̱te rā̍si̱ vājā̍nyū̱yaṃ pā̍ta sva̱stibhi̱: sadā̍ naḥ
||6||6 maitrāvaruṇirvasiṣṭha:| sarasvatī, 4-6 sarasvān | 1-2= pragātha: (1 bṛhatī, 2 satobṛhatī ), 3 prastārapaṃkti:, 4-6 gāyatrī|
bṛ̱hadu̍ gāyiṣe̱ vaco̍'su̱ryā̍ na̱dīnā̍m |
sara̍svatī̱minma̍hayā suvṛ̱ktibhi̱: stomai̍rvasiṣṭha̱ roda̍sī
||1||u̱bhe yatte̍ mahi̱nā śu̍bhre̱ andha̍sī adhikṣi̱yanti̍ pū̱rava̍: |
sā no̍ bodhyavi̱trī ma̱rutsa̍khā̱ coda̱ rādho̍ ma̱ghonā̍m
||2||bha̱dramidbha̱drā kṛ̍ṇava̱tsara̍sva̱tyaka̍vārī cetati vā̱jinī̍vatī |
gṛ̱ṇā̱nā ja̍madagni̱vatstu̍vā̱nā ca̍ vasiṣṭha̱vat
||3||ja̱nī̱yanto̱ nvagra̍vaḥ putrī̱yanta̍: su̱dāna̍vaḥ | sara̍svantaṃ havāmahe
||4||ye te̍ sarasva ū̱rmayo̱ madhu̍manto ghṛta̱ścuta̍: | tebhi̍rno'vi̱tā bha̍va
||5||pī̱pi̱vāṃsa̱ṃ sara̍svata̱: stana̱ṃ yo vi̱śvada̍rśataḥ | bha̱kṣī̱mahi̍ pra̱jāmiṣa̍m
||6||10 maitrāvaruṇirvasiṣṭha:| 1 indra:, 2,4-8 bṛhaspati:, 3,9 indrābrahmaṇaspatī, 10 indrābṛhaspatī | triṣṭup |
ya̱jñe di̱vo nṛ̱ṣada̍ne pṛthi̱vyā naro̱ yatra̍ deva̱yavo̱ mada̍nti |
indrā̍ya̱ yatra̱ sava̍nāni su̱nve gama̱nmadā̍ya pratha̱maṃ vaya̍śca
||1||ā daivyā̍ vṛṇīma̱he'vā̍ṃsi̱ bṛha̱spati̍rno maha̱ ā sa̍khāyaḥ |
yathā̱ bhave̍ma mī̱l̤huṣe̱ anā̍gā̱ yo no̍ dā̱tā pa̍rā̱vata̍: pi̱teva̍
||2||tamu̱ jyeṣṭha̱ṃ nama̍sā ha̱virbhi̍: su̱śeva̱ṃ brahma̍ṇa̱spati̍ṃ gṛṇīṣe |
indra̱ṃ śloko̱ mahi̱ daivya̍: siṣaktu̱ yo brahma̍ṇo de̱vakṛ̍tasya̱ rājā̍
||3||sa ā no̱ yoni̍ṃ sadatu̱ preṣṭho̱ bṛha̱spati̍rvi̱śvavā̍ro̱ yo asti̍ |
kāmo̍ rā̱yaḥ su̱vīrya̍sya̱ taṃ dā̱tparṣa̍nno̱ ati̍ sa̱ścato̱ ari̍ṣṭān
||4||tamā no̍ a̱rkama̱mṛtā̍ya̱ juṣṭa̍mi̱me dhā̍sura̱mṛtā̍saḥ purā̱jāḥ |
śuci̍krandaṃ yaja̱taṃ pa̱styā̍nā̱ṃ bṛha̱spati̍mana̱rvāṇa̍ṃ huvema
||5||taṃ śa̱gmāso̍ aru̱ṣāso̱ aśvā̱ bṛha̱spati̍ṃ saha̱vāho̍ vahanti |
saha̍ści̱dyasya̱ nīla̍vatsa̱dhastha̱ṃ nabho̱ na rū̱pama̍ru̱ṣaṃ vasā̍nāḥ
||6||sa hi śuci̍: śa̱tapa̍tra̱: sa śu̱ndhyurhira̍ṇyavāśīriṣi̱raḥ sva̱rṣāḥ |
bṛha̱spati̱: sa svā̍ve̱śa ṛ̱ṣvaḥ pu̱rū sakhi̍bhya āsu̱tiṃ kari̍ṣṭhaḥ
||7||de̱vī de̱vasya̱ roda̍sī̱ jani̍trī̱ bṛha̱spati̍ṃ vāvṛdhaturmahi̱tvā |
da̱kṣāyyā̍ya dakṣatā sakhāya̱: kara̱dbrahma̍ṇe su̱tarā̍ sugā̱dhā
||8||i̱yaṃ vā̍ṃ brahmaṇaspate suvṛ̱ktirbrahmendrā̍ya va̱jriṇe̍ akāri |
a̱vi̱ṣṭaṃ dhiyo̍ jigṛ̱taṃ pura̍ṃdhīrjaja̱stama̱ryo va̱nuṣā̱marā̍tīḥ
||9||bṛha̍spate yu̱vamindra̍śca̱ vasvo̍ di̱vyasye̍śāthe u̱ta pārthi̍vasya |
dha̱ttaṃ ra̱yiṃ stu̍va̱te kī̱raye̍ cidyū̱yaṃ pā̍ta sva̱stibhi̱: sadā̍ naḥ
||10||7 maitrāvaruṇirvasiṣṭha:| indra:, 7 indrābṛhaspatī | triṣṭup |
adhva̍ryavo'ru̱ṇaṃ du̱gdhama̱ṃśuṃ ju̱hota̍na vṛṣa̱bhāya̍ kṣitī̱nām |
gau̱rādvedī̍yām̐ ava̱pāna̱mindro̍ vi̱śvāhedyā̍ti su̱taso̍mami̱cchan
||1||yadda̍dhi̱ṣe pra̱divi̱ cārvanna̍ṃ di̱vedi̍ve pī̱timida̍sya vakṣi |
u̱ta hṛ̱dota mana̍sā juṣā̱ṇa u̱śanni̍ndra̱ prasthi̍tānpāhi̱ somā̍n
||2||ja̱jñā̱naḥ soma̱ṃ saha̍se papātha̱ pra te̍ mā̱tā ma̍hi̱māna̍muvāca |
endra̍ paprātho̱rva1ntari̍kṣaṃ yu̱dhā de̱vebhyo̱ vari̍vaścakartha
||3||yadyo̱dhayā̍ maha̱to manya̍mānā̱ntsākṣā̍ma̱ tānbā̱hubhi̱: śāśa̍dānān |
yadvā̱ nṛbhi̱rvṛta̍ indrābhi̱yudhyā̱staṃ tvayā̱jiṃ sau̍śrava̱saṃ ja̍yema
||4||prendra̍sya vocaṃ pratha̱mā kṛ̱tāni̱ pra nūta̍nā ma̱ghavā̱ yā ca̱kāra̍ |
ya̱dedade̍vī̱rasa̍hiṣṭa mā̱yā athā̍bhava̱tkeva̍la̱: somo̍ asya
||5||tave̱daṃ viśva̍ma̱bhita̍: paśa̱vyaṃ1 yatpaśya̍si̱ cakṣa̍sā̱ sūrya̍sya |
gavā̍masi̱ gopa̍ti̱reka̍ indra bhakṣī̱mahi̍ te̱ praya̍tasya̱ vasva̍:
||6||bṛha̍spate yu̱vamindra̍śca̱ vasvo̍ di̱vyasye̍śāthe u̱ta pārthi̍vasya |
dha̱ttaṃ ra̱yiṃ stu̍va̱te kī̱raye̍ cidyū̱yaṃ pā̍ta sva̱stibhi̱: sadā̍ naḥ
||7||7 maitrāvaruṇirvasiṣṭha:| viṣṇu:, 4-6 indrāviṣṇū | triṣṭup |
pa̱ro mātra̍yā ta̱nvā̍ vṛdhāna̱ na te̍ mahi̱tvamanva̍śnuvanti |
u̱bhe te̍ vidma̱ raja̍sī pṛthi̱vyā viṣṇo̍ deva̱ tvaṃ pa̍ra̱masya̍ vitse
||1||na te̍ viṣṇo̱ jāya̍māno̱ na jā̱to deva̍ mahi̱mnaḥ para̱manta̍māpa |
uda̍stabhnā̱ nāka̍mṛ̱ṣvaṃ bṛ̱hanta̍ṃ dā̱dhartha̱ prācī̍ṃ ka̱kubha̍ṃ pṛthi̱vyāḥ
||2||irā̍vatī dhenu̱matī̱ hi bhū̱taṃ sū̍yava̱sinī̱ manu̍ṣe daśa̱syā |
vya̍stabhnā̱ roda̍sī viṣṇave̱te dā̱dhartha̍ pṛthi̱vīma̱bhito̍ ma̱yūkhai̍:
||3||u̱ruṃ ya̱jñāya̍ cakrathuru lo̱kaṃ ja̱naya̍ntā̱ sūrya̍mu̱ṣāsa̍ma̱gnim |
dāsa̍sya cidvṛṣaśi̱prasya̍ mā̱yā ja̱ghnathu̍rnarā pṛta̱nājye̍ṣu
||4||indrā̍viṣṇū dṛṃhi̱tāḥ śamba̍rasya̱ nava̱ puro̍ nava̱tiṃ ca̍ śnathiṣṭam |
śa̱taṃ va̱rcina̍: sa̱hasra̍ṃ ca sā̱kaṃ ha̱tho a̍pra̱tyasu̍rasya vī̱rān
||5||i̱yaṃ ma̍nī̱ṣā bṛ̍ha̱tī bṛ̱hanto̍rukra̱mā ta̱vasā̍ va̱rdhaya̍ntī |
ra̱re vā̱ṃ stoma̍ṃ vi̱dathe̍ṣu viṣṇo̱ pinva̍ta̱miṣo̍ vṛ̱jane̍ṣvindra
||6||vaṣa̍ṭ te viṣṇavā̱sa ā kṛ̍ṇomi̱ tanme̍ juṣasva śipiviṣṭa ha̱vyam |
vardha̍ntu tvā suṣṭu̱tayo̱ giro̍ me yū̱yaṃ pā̍ta sva̱stibhi̱: sadā̍ naḥ
||7||7 maitrāvaruṇirvasiṣṭha:| viṣṇu:| triṣṭup |
nū marto̍ dayate sani̱ṣyanyo viṣṇa̍va urugā̱yāya̱ dāśa̍t |
pra yaḥ sa̱trācā̱ mana̍sā̱ yajā̍ta e̱tāva̍nta̱ṃ narya̍mā̱vivā̍sāt
||1||tvaṃ vi̍ṣṇo suma̱tiṃ vi̱śvaja̍nyā̱mapra̍yutāmevayāvo ma̱tiṃ dā̍: |
parco̱ yathā̍ naḥ suvi̱tasya̱ bhūre̱raśvā̍vataḥ puruśca̱ndrasya̍ rā̱yaḥ
||2||trirde̱vaḥ pṛ̍thi̱vīme̱ṣa e̱tāṃ vi ca̍krame śa̱tarca̍saṃ mahi̱tvā |
pra viṣṇu̍rastu ta̱vasa̱stavī̍yāntve̱ṣaṃ hya̍sya̱ sthavi̍rasya̱ nāma̍
||3||vi ca̍krame pṛthi̱vīme̱ṣa e̱tāṃ kṣetrā̍ya̱ viṣṇu̱rmanu̍ṣe daśa̱syan |
dhru̱vāso̍ asya kī̱rayo̱ janā̍sa urukṣi̱tiṃ su̱jani̍mā cakāra
||4||pra tatte̍ a̱dya śi̍piviṣṭa̱ nāmā̱'ryaḥ śa̍ṃsāmi va̱yunā̍ni vi̱dvān |
taṃ tvā̍ gṛṇāmi ta̱vasa̱mata̍vyā̱nkṣaya̍ntama̱sya raja̍saḥ parā̱ke
||5||kimitte̍ viṣṇo pari̱cakṣya̍ṃ bhū̱tpra yadva̍va̱kṣe śi̍pivi̱ṣṭo a̍smi |
mā varpo̍ a̱smadapa̍ gūha e̱tadyada̱nyarū̍paḥ sami̱the ba̱bhūtha̍
||6||vaṣa̍ṭ te viṣṇavā̱sa ā kṛ̍ṇomi̱ tanme̍ juṣasva śipiviṣṭa ha̱vyam |
vardha̍ntu tvā suṣṭu̱tayo̱ giro̍ me yū̱yaṃ pā̍ta sva̱stibhi̱: sadā̍ naḥ
||7||6 maitrāvaruṇirvasiṣṭha:| (vṛṣṭikāma ), kumāra āgneyo vā |parjanya:| triṣṭup |
ti̱sro vāca̱: pra va̍da̱ jyoti̍ragrā̱ yā e̱taddu̱hre ma̍dhudo̱ghamūdha̍: |
sa va̱tsaṃ kṛ̱ṇvangarbha̱moṣa̍dhīnāṃ sa̱dyo jā̱to vṛ̍ṣa̱bho ro̍ravīti
||1||yo vardha̍na̱ oṣa̍dhīnā̱ṃ yo a̱pāṃ yo viśva̍sya̱ jaga̍to de̱va īśe̍ |
sa tri̱dhātu̍ śara̱ṇaṃ śarma̍ yaṃsattri̱vartu̱ jyoti̍: svabhi̱ṣṭya1sme
||2||sta̱rīru̍ tva̱dbhava̍ti̱ sūta̍ u tvadyathāva̱śaṃ ta̱nva̍ṃ cakra e̱ṣaḥ |
pi̱tuḥ paya̱: prati̍ gṛbhṇāti mā̱tā tena̍ pi̱tā va̍rdhate̱ tena̍ pu̱traḥ
||3||yasmi̱nviśvā̍ni̱ bhuva̍nāni ta̱sthusti̱sro dyāva̍stre̱dhā sa̱srurāpa̍: |
traya̱: kośā̍sa upa̱seca̍nāso̱ madhva̍: ścotantya̱bhito̍ vira̱pśam
||4||i̱daṃ vaca̍: pa̱rjanyā̍ya sva̱rāje̍ hṛ̱do a̱stvanta̍ra̱ṃ tajju̍joṣat |
ma̱yo̱bhuvo̍ vṛ̱ṣṭaya̍: santva̱sme su̍pippa̱lā oṣa̍dhīrde̱vago̍pāḥ
||5||sa re̍to̱dhā vṛ̍ṣa̱bhaḥ śaśva̍tīnā̱ṃ tasmi̍nnā̱tmā jaga̍tasta̱sthuṣa̍śca |
tanma̍ ṛ̱taṃ pā̍tu śa̱taśā̍radāya yū̱yaṃ pā̍ta sva̱stibhi̱: sadā̍ naḥ
||6||3 maitrāvaruṇirvasiṣṭha:|{ vṛṣṭikāma:} kumāra āgneyo vā | parjanya: | gāyatrī, 2 pādanicṛta |
pa̱rjanyā̍ya̱ pra gā̍yata di̱vaspu̱trāya̍ mī̱l̤huṣe̍ | sa no̱ yava̍samicchatu
||1||yo garbha̱moṣa̍dhīnā̱ṃ gavā̍ṃ kṛ̱ṇotyarva̍tām | pa̱rjanya̍: puru̱ṣīṇā̍m
||2||tasmā̱ idā̱sye̍ ha̱virju̱hotā̱ madhu̍mattamam | il̤ā̍ṃ naḥ sa̱ṃyata̍ṃ karat
||3||10 maitrāvaruṇirvasiṣṭha:|maṇḍūkā: { parjanya: } | triṣṭup , 1 anuṣṭup |
sa̱ṃva̱tsa̱raṃ śa̍śayā̱nā brā̍hma̱ṇā vra̍tacā̱riṇa̍: |
vāca̍ṃ pa̱rjanya̍jinvitā̱ṃ pra ma̱ṇḍūkā̍ avādiṣuḥ
||1||di̱vyā āpo̍ a̱bhi yade̍na̱māya̱ndṛti̱ṃ na śuṣka̍ṃ sara̱sī śayā̍nam |
gavā̱maha̱ na mā̱yurva̱tsinī̍nāṃ ma̱ṇḍūkā̍nāṃ va̱gnuratrā̱ same̍ti
||2||yadī̍menām̐ uśa̱to a̱bhyava̍rṣīttṛ̱ṣyāva̍taḥ prā̱vṛṣyāga̍tāyām |
a̱khkha̱lī̱kṛtyā̍ pi̱tara̱ṃ na pu̱tro a̱nyo a̱nyamupa̱ vada̍ntameti
||3||a̱nyo a̱nyamanu̍ gṛbhṇātyenora̱pāṃ pra̍sa̱rge yadama̍ndiṣātām |
ma̱ṇḍūko̱ yada̱bhivṛ̍ṣṭa̱: kani̍ṣka̱npṛśni̍: sampṛ̱ṅkte hari̍tena̱ vāca̍m
||4||yade̍ṣāma̱nyo a̱nyasya̱ vāca̍ṃ śā̱ktasye̍va̱ vada̍ti̱ śikṣa̍māṇaḥ |
sarva̱ṃ tade̍ṣāṃ sa̱mṛdhe̍va̱ parva̱ yatsu̱vāco̱ vada̍tha̱nādhya̱psu
||5||gomā̍yu̱reko̍ a̱jamā̍yu̱reka̱: pṛśni̱reko̱ hari̍ta̱ eka̍ eṣām |
sa̱mā̱naṃ nāma̱ bibhra̍to̱ virū̍pāḥ puru̱trā vāca̍ṃ pipiśu̱rvada̍ntaḥ
||6||brā̱hma̱ṇāso̍ atirā̱tre na some̱ saro̱ na pū̱rṇama̱bhito̱ vada̍ntaḥ |
sa̱ṃva̱tsa̱rasya̱ tadaha̱: pari̍ ṣṭha̱ yanma̍ṇḍūkāḥ prāvṛ̱ṣīṇa̍ṃ ba̱bhūva̍
||7||brā̱hma̱ṇāsa̍: so̱mino̱ vāca̍makrata̱ brahma̍ kṛ̱ṇvanta̍: parivatsa̱rīṇa̍m |
a̱dhva̱ryavo̍ gha̱rmiṇa̍: siṣvidā̱nā ā̱virbha̍vanti̱ guhyā̱ na ke ci̍t
||8||de̱vahi̍tiṃ jugupurdvāda̱śasya̍ ṛ̱tuṃ naro̱ na pra mi̍nantye̱te |
sa̱ṃva̱tsa̱re prā̱vṛṣyāga̍tāyāṃ ta̱ptā gha̱rmā a̍śnuvate visa̱rgam
||9||gomā̍yuradāda̱jamā̍yuradā̱tpṛśni̍radā̱ddhari̍to no̱ vasū̍ni |
gavā̍ṃ ma̱ṇḍūkā̱ dada̍taḥ śa̱tāni̍ sahasrasā̱ve pra ti̍ranta̱ āyu̍:
||10||25 maitrāvaruṇirvasiṣṭha:| {rākṣoghnaṃ} indrāsomau , 8 ,16 ,19 -22 indra:, 9, 12-13 soma:, 10-14 agni:,11 devā:, 17 grāvāṇa:, 18 maruta:, 23 {pūrvārdhasya} vasiṣṭhāśī:, {uttarārdhasya} pṛthivyantarikṣe| triṣṭup , 1-6,18, 21 ,23 jagatī ; 7 jagatī triṣṭubvā, 25 anuṣṭup |
indrā̍somā̱ tapa̍ta̱ṃ rakṣa̍ u̱bjata̱ṃ nya̍rpayataṃ vṛṣaṇā tamo̱vṛdha̍: |
parā̍ śṛṇītama̱cito̱ nyo̍ṣataṃ ha̱taṃ nu̱dethā̱ṃ ni śi̍śītama̱triṇa̍:
||1||indrā̍somā̱ sama̱ghaśa̍ṃsama̱bhya1ghaṃ tapu̍ryayastu ca̱rura̍gni̱vām̐ i̍va |
bra̱hma̱dviṣe̍ kra̱vyāde̍ gho̱raca̍kṣase̱ dveṣo̍ dhattamanavā̱yaṃ ki̍mī̱dine̍
||2||indrā̍somā du̱ṣkṛto̍ va̱vre a̱ntara̍nārambha̱ṇe tama̍si̱ pra vi̍dhyatam |
yathā̱ nāta̱: puna̱reka̍śca̱nodaya̱ttadvā̍mastu̱ saha̍se manyu̱macchava̍:
||3||indrā̍somā va̱rtaya̍taṃ di̱vo va̱dhaṃ saṃ pṛ̍thi̱vyā a̱ghaśa̍ṃsāya̱ tarha̍ṇam |
utta̍kṣataṃ sva̱ryaṃ1 parva̍tebhyo̱ yena̱ rakṣo̍ vāvṛdhā̱naṃ ni̱jūrva̍thaḥ
||4||indrā̍somā va̱rtaya̍taṃ di̱vasparya̍gnita̱ptebhi̍ryu̱vamaśma̍hanmabhiḥ |
tapu̍rvadhebhira̱jare̍bhira̱triṇo̱ ni parśā̍ne vidhyata̱ṃ yantu̍ nisva̱ram
||5||indrā̍somā̱ pari̍ vāṃ bhūtu vi̱śvata̍ i̱yaṃ ma̱tiḥ ka̱kṣyāśve̍va vā̱jinā̍ |
yāṃ vā̱ṃ hotrā̍ṃ parihi̱nomi̍ me̱dhaye̱mā brahmā̍ṇi nṛ̱patī̍va jinvatam
||6||prati̍ smarethāṃ tu̱jaya̍dbhi̱revai̍rha̱taṃ dru̱ho ra̱kṣaso̍ bhaṅgu̱rāva̍taḥ |
indrā̍somā du̱ṣkṛte̱ mā su̱gaṃ bhū̱dyo na̍: ka̱dā ci̍dabhi̱dāsa̍ti dru̱hā
||7||yo mā̱ pāke̍na̱ mana̍sā̱ cara̍ntamabhi̱caṣṭe̱ anṛ̍tebhi̱rvaco̍bhiḥ |
āpa̍ iva kā̱śinā̱ saṃgṛ̍bhītā̱ asa̍nna̱stvāsa̍ta indra va̱ktā
||8||ye pā̍kaśa̱ṃsaṃ vi̱hara̍nta̱ evai̱rye vā̍ bha̱draṃ dū̱ṣaya̍nti sva̱dhābhi̍: |
aha̍ye vā̱ tānpra̱dadā̍tu̱ soma̱ ā vā̍ dadhātu̱ niṝ̍teru̱pasthe̍
||9||yo no̱ rasa̱ṃ dipsa̍ti pi̱tvo a̍gne̱ yo aśvā̍nā̱ṃ yo gavā̱ṃ yasta̱nūnā̍m |
ri̱puḥ ste̱naḥ ste̍ya̱kṛdda̱bhrame̍tu̱ ni ṣa hī̍yatāṃ ta̱nvā̱3 tanā̍ ca
||10||pa̱raḥ so a̍stu ta̱nvā̱3 tanā̍ ca ti̱sraḥ pṛ̍thi̱vīra̱dho a̍stu̱ viśvā̍: |
prati̍ śuṣyatu̱ yaśo̍ asya devā̱ yo no̱ divā̱ dipsa̍ti̱ yaśca̱ nakta̍m
||11||su̱vi̱jñā̱naṃ ci̍ki̱tuṣe̱ janā̍ya̱ saccāsa̍cca̱ vaca̍sī paspṛdhāte |
tayo̱ryatsa̱tyaṃ ya̍ta̱radṛjī̍ya̱staditsomo̍'vati̱ hantyāsa̍t
||12||na vā u̱ somo̍ vṛji̱naṃ hi̍noti̱ na kṣa̱triya̍ṃ mithu̱yā dhā̱raya̍ntam |
hanti̱ rakṣo̱ hantyāsa̱dvada̍ntamu̱bhāvindra̍sya̱ prasi̍tau śayāte
||13||yadi̍ vā̱hamanṛ̍tadeva̱ āsa̱ mogha̍ṃ vā de̱vām̐ a̍pyū̱he a̍gne |
kima̱smabhya̍ṃ jātavedo hṛṇīṣe drogha̱vāca̍ste niṝ̱thaṃ sa̍cantām
||14||a̱dyā mu̍rīya̱ yadi̍ yātu̱dhāno̱ asmi̱ yadi̱ vāyu̍sta̱tapa̱ pūru̍ṣasya |
adhā̱ sa vī̱rairda̱śabhi̱rvi yū̍yā̱ yo mā̱ mogha̱ṃ yātu̍dhā̱netyāha̍
||15||yo māyā̍tu̱ṃ yātu̍dhā̱netyāha̱ yo vā̍ ra̱kṣāḥ śuci̍ra̱smītyāha̍ |
indra̱staṃ ha̍ntu maha̱tā va̱dhena̱ viśva̍sya ja̱ntora̍dha̱maspa̍dīṣṭa
||16||pra yā jigā̍ti kha̱rgale̍va̱ nakta̱mapa̍ dru̱hā ta̱nvaṃ1 gūha̍mānā |
va̱vrām̐ a̍na̱ntām̐ ava̱ sā pa̍dīṣṭa̱ grāvā̍ṇo ghnantu ra̱kṣasa̍ upa̱bdaiḥ
||17||vi ti̍ṣṭhadhvaṃ maruto vi̱kṣvi1cchata̍ gṛbhā̱yata̍ ra̱kṣasa̱: saṃ pi̍naṣṭana |
vayo̱ ye bhū̱tvī pa̱taya̍nti na̱ktabhi̱rye vā̱ ripo̍ dadhi̱re de̱ve a̍dhva̱re
||18||pra va̍rtaya di̱vo aśmā̍namindra̱ soma̍śitaṃ maghava̱ntsaṃ śi̍śādhi |
prāktā̱dapā̍ktādadha̱rāduda̍ktāda̱bhi ja̍hi ra̱kṣasa̱: parva̍tena
||19||e̱ta u̱ tye pa̍tayanti̱ śvayā̍tava̱ indra̍ṃ dipsanti di̱psavo'dā̍bhyam |
śiśī̍te śa̱kraḥ piśu̍nebhyo va̱dhaṃ nū̱naṃ sṛ̍jada̱śani̍ṃ yātu̱madbhya̍:
||20||indro̍ yātū̱nāma̍bhavatparāśa̱ro ha̍vi̱rmathī̍nāma̱bhyā̱3vivā̍satām |
a̱bhīdu̍ śa̱kraḥ pa̍ra̱śuryathā̱ vana̱ṃ pātre̍va bhi̱ndantsa̱ta e̍ti ra̱kṣasa̍:
||21||ulū̍kayātuṃ śuśu̱lūka̍yātuṃ ja̱hi śvayā̍tumu̱ta koka̍yātum |
su̱pa̱rṇayā̍tumu̱ta gṛdhra̍yātuṃ dṛ̱ṣade̍va̱ pra mṛ̍ṇa̱ rakṣa̍ indra
||22||mā no̱ rakṣo̍ a̱bhi na̍ḍyātu̱māva̍tā̱mapo̍cchatu mithu̱nā yā ki̍mī̱dinā̍ |
pṛ̱thi̱vī na̱: pārthi̍vātpā̱tvaṃha̍so̱'ntari̍kṣaṃ di̱vyātpā̍tva̱smān
||23||indra̍ ja̱hi pumā̍ṃsaṃ yātu̱dhāna̍mu̱ta striya̍ṃ mā̱yayā̱ śāśa̍dānām |
vigrī̍vāso̱ mūra̍devā ṛdantu̱ mā te dṛ̍śa̱ntsūrya̍mu̱ccara̍ntam
||24||prati̍ cakṣva̱ vi ca̱kṣvendra̍śca soma jāgṛtam | rakṣo̍bhyo va̱dhama̍syatama̱śani̍ṃ yātu̱madbhya̍:
||25||