10 maitrāvaruṇirvasiṣṭha:| indrāvaruṇau |jagatī |
indrā̍varuṇā yu̱vama̍dhva̱rāya̍ no vi̱śe janā̍ya̱ mahi̱ śarma̍ yacchatam |
dī̱rghapra̍yajyu̱mati̱ yo va̍nu̱ṣyati̍ va̱yaṃ ja̍yema̱ pṛta̍nāsu dū̱ḍhya̍:
||1||sa̱mrāl̤a̱nyaḥ sva̱rāl̤a̱nya u̍cyate vāṃ ma̱hāntā̱vindrā̱varu̍ṇā ma̱hāva̍sū |
viśve̍ de̱vāsa̍: para̱me vyo̍mani̱ saṃ vā̱mojo̍ vṛṣaṇā̱ saṃ bala̍ṃ dadhuḥ
||2||anva̱pāṃ khānya̍tṛnta̱moja̱sā sūrya̍mairayataṃ di̱vi pra̱bhum |
indrā̍varuṇā̱ made̍ asya mā̱yino'pi̍nvatama̱pita̱: pinva̍ta̱ṃ dhiya̍:
||3||yu̱vāmidyu̱tsu pṛta̍nāsu̱ vahna̍yo yu̱vāṃ kṣema̍sya prasa̱ve mi̱tajña̍vaḥ |
ī̱śā̱nā vasva̍ u̱bhaya̍sya kā̱rava̱ indrā̍varuṇā su̱havā̍ havāmahe
||4||indrā̍varuṇā̱ yadi̱māni̍ ca̱krathu̱rviśvā̍ jā̱tāni̱ bhuva̍nasya ma̱jmanā̍ |
kṣeme̍ṇa mi̱tro varu̍ṇaṃ duva̱syati̍ ma̱rudbhi̍ru̱graḥ śubha̍ma̱nya ī̍yate
||5||ma̱he śu̱lkāya̱ varu̍ṇasya̱ nu tvi̱ṣa ojo̍ mimāte dhru̱vama̍sya̱ yatsvam |
ajā̍mima̱nyaḥ śna̱thaya̍nta̱māti̍radda̱bhrebhi̍ra̱nyaḥ pra vṛ̍ṇoti̱ bhūya̍saḥ
||6||na tamaṃho̱ na du̍ri̱tāni̱ martya̱mindrā̍varuṇā̱ na tapa̱: kuta̍śca̱na |
yasya̍ devā̱ gaccha̍tho vī̱tho a̍dhva̱raṃ na taṃ marta̍sya naśate̱ pari̍hvṛtiḥ
||7||a̱rvāṅna̍rā̱ daivye̱nāva̱sā ga̍taṃ śṛṇu̱taṃ hava̱ṃ yadi̍ me̱ jujo̍ṣathaḥ |
yu̱vorhi sa̱khyamu̱ta vā̱ yadāpya̍ṃ mārḍī̱kami̍ndrāvaruṇā̱ ni ya̍cchatam
||8||a̱smāka̍mindrāvaruṇā̱ bhare̍bhare puroyo̱dhā bha̍vataṃ kṛṣṭyojasā |
yadvā̱ṃ hava̍nta u̱bhaye̱ adha̍ spṛ̱dhi nara̍sto̱kasya̱ tana̍yasya sā̱tiṣu̍
||9||a̱sme indro̱ varu̍ṇo mi̱tro a̍rya̱mā dyu̱mnaṃ ya̍cchantu̱ mahi̱ śarma̍ sa̱pratha̍: |
a̱va̱dhraṃ jyoti̱radi̍teṝtā̱vṛdho̍ de̱vasya̱ śloka̍ṃ savi̱turma̍nāmahe
||10||