10 maitrāvaruṇirvasiṣṭha:| indrāvaruṇau |jagatī |
yu̱vāṃ na̍rā̱ paśya̍mānāsa̱ āpya̍ṃ prā̱cā ga̱vyanta̍: pṛthu̱parśa̍vo yayuḥ |
dāsā̍ ca vṛ̱trā ha̱tamāryā̍ṇi ca su̱dāsa̍mindrāvaru̱ṇāva̍sāvatam
||1||yatrā̱ nara̍: sa̱maya̍nte kṛ̱tadhva̍jo̱ yasmi̍nnā̱jā bhava̍ti̱ kiṃ ca̱na pri̱yam |
yatrā̱ bhaya̍nte̱ bhuva̍nā sva̱rdṛśa̱statrā̍ na indrāvaru̱ṇādhi̍ vocatam
||2||saṃ bhūmyā̱ antā̍ dhvasi̱rā a̍dṛkṣa̱tendrā̍varuṇā di̱vi ghoṣa̱
āru̍hat | asthu̱rjanā̍nā̱mupa̱ māmarā̍tayo̱'rvāgava̍sā havanaśru̱tā ga̍tam
||3||indrā̍varuṇā va̱dhanā̍bhirapra̱ti bhe̱daṃ va̱nvantā̱ pra su̱dāsa̍māvatam |
brahmā̍ṇyeṣāṃ śṛṇuta̱ṃ havī̍mani sa̱tyā tṛtsū̍nāmabhavatpu̱rohi̍tiḥ
||4||indrā̍varuṇāva̱bhyā ta̍panti mā̱ghānya̱ryo va̱nuṣā̱marā̍tayaḥ |
yu̱vaṃ hi vasva̍ u̱bhaya̍sya̱ rāja̱tho'dha̍ smā no'vata̱ṃ pārye̍ di̱vi
||5||yu̱vāṃ ha̍vanta u̱bhayā̍sa ā̱jiṣvindra̍ṃ ca̱ vasvo̱ varu̍ṇaṃ ca sā̱taye̍ |
yatra̱ rāja̍bhirda̱śabhi̱rnibā̍dhita̱ṃ pra su̱dāsa̱māva̍ta̱ṃ tṛtsu̍bhiḥ sa̱ha
||6||daśa̱ rājā̍na̱: sami̍tā̱ aya̍jyavaḥ su̱dāsa̍mindrāvaruṇā̱ na yu̍yudhuḥ |
sa̱tyā nṛ̱ṇāma̍dma̱sadā̱mupa̍stutirde̱vā e̍ṣāmabhavande̱vahū̍tiṣu
||7||dā̱śa̱rā̱jñe pari̍yattāya vi̱śvata̍: su̱dāsa̍ indrāvaruṇāvaśikṣatam |
śvi̱tyañco̱ yatra̱ nama̍sā kapa̱rdino̍ dhi̱yā dhīva̍nto̱ asa̍panta̱ tṛtsa̍vaḥ
||8||vṛ̱trāṇya̱nyaḥ sa̍mi̱theṣu̱ jighna̍te vra̱tānya̱nyo a̱bhi ra̍kṣate̱ sadā̍ |
havā̍mahe vāṃ vṛṣaṇā suvṛ̱ktibhi̍ra̱sme i̍ndrāvaruṇā̱ śarma̍ yacchatam
||9||a̱sme indro̱ varu̍ṇo mi̱tro a̍rya̱mā dyu̱mnaṃ ya̍cchantu̱ mahi̱ śarma̍ sa̱pratha̍: |
a̱va̱dhraṃ jyoti̱radi̍teṝtā̱vṛdho̍ de̱vasya̱ śloka̍ṃ savi̱turma̍nāmahe
||10||