8 vāgāmbhṛṇī| ātmā| triṣṭup , 2 jagatī|
a̱haṃ ru̱drebhi̱rvasu̍bhiścarāmya̱hamā̍di̱tyairu̱ta vi̱śvade̍vaiḥ |
a̱haṃ mi̱trāvaru̍ṇo̱bhā bi̍bharmya̱hami̍ndrā̱gnī a̱hama̱śvino̱bhā ॥10.125.1॥
a̱haṃ soma̍māha̱nasa̍ṃ bibharmya̱haṃ tvaṣṭā̍ramu̱ta pū̱ṣaṇa̱ṃ bhaga̍m |
a̱haṃ da̍dhāmi̱ dravi̍ṇaṃ ha̱viṣma̍te suprā̱vye̱3 yaja̍mānāya sunva̱te ॥10.125.2॥
a̱haṃ rāṣṭrī̍ sa̱ṃgama̍nī̱ vasū̍nāṃ ciki̱tuṣī̍ pratha̱mā ya̱jñiyā̍nām |
tāṃ mā̍ de̱vā vya̍dadhuḥ puru̱trā bhūri̍sthātrā̱ṃ bhūryā̍ve̱śaya̍ntīm ॥10.125.3॥
mayā̱ so anna̍matti̱ yo vi̱paśya̍ti̱ yaḥ prāṇi̍ti̱ ya ī̍ṃ śṛ̱ṇotyu̱ktam |
a̱ma̱ntavo̱ māṃ ta upa̍ kṣiyanti śru̱dhi śru̍ta śraddhi̱vaṃ te̍ vadāmi ॥10.125.4॥
a̱hame̱va sva̱yami̱daṃ va̍dāmi̱ juṣṭa̍ṃ de̱vebhi̍ru̱ta mānu̍ṣebhiḥ |
yaṃ kā̱maye̱ taṃta̍mu̱graṃ kṛ̍ṇomi̱ taṃ bra̱hmāṇa̱ṃ tamṛṣi̱ṃ taṃ su̍me̱dhām ॥10.125.5॥
a̱haṃ ru̱drāya̱ dhanu̱rā ta̍nomi brahma̱dviṣe̱ śara̍ve̱ hanta̱vā u̍ |
a̱haṃ janā̍ya sa̱mada̍ṃ kṛṇomya̱haṃ dyāvā̍pṛthi̱vī ā vi̍veśa ॥10.125.6॥
a̱haṃ su̍ve pi̱tara̍masya mū̱rdhanmama̱ yoni̍ra̱psva1ntaḥ sa̍mu̱dre |
tato̱ vi ti̍ṣṭhe̱ bhuva̱nānu̱ viśvo̱tāmūṃ dyāṃ va̱rṣmaṇopa̍ spṛśāmi ॥10.125.7॥
a̱hame̱va vāta̍ iva̱ pra vā̍myā̱rabha̍māṇā̱ bhuva̍nāni̱ viśvā̍ |
pa̱ro di̱vā pa̱ra e̱nā pṛ̍thi̱vyaitāva̍tī mahi̱nā saṃ ba̍bhūva ॥10.125.8॥