(6) 1-2 lopāmudrā, 3-4 agastyo maitrāvaruṇiḥ, 5-6 agastyaśiṣyo brahmacārī| ratiḥ| triṣṭup, 5 bṛhatī|
pū̱rvīra̱haṃ śa̱rada̍: śaśramā̱ṇā do̱ṣā vasto̍ru̱ṣaso̍ ja̱raya̍ntīḥ |
mi̱nāti̱ śriya̍ṃ jari̱mā ta̱nūnā̱mapyū̱ nu patnī̱rvṛṣa̍ṇo jagamyuḥ ॥1.179.1॥
पू॒र्वीर॒हं श॒रद॑: शश्रमा॒णा दो॒षा वस्तो॑रु॒षसो॑ ज॒रय॑न्तीः ।
मि॒नाति॒ श्रियं॑ जरि॒मा त॒नूना॒मप्यू॒ नु पत्नी॒र्वृष॑णो जगम्युः
ye ci̱ddhi pūrva̍ ṛta̱sāpa̱ āsa̍n tsā̱kaṃ de̱vebhi̱rava̍dannṛ̱tāni̍ |
te ci̱davā̍surna̱hyanta̍mā̱puḥ samū̱ nu patnī̱rvṛṣa̍bhirjagamyuḥ ॥1.179.2॥
ये चि॒द्धि पूर्व॑ ऋत॒साप॒ आस॑न् त्सा॒कं दे॒वेभि॒रव॑दन्नृ॒तानि॑ ।
ते चि॒दवा॑सुर्न॒ह्यन्त॑मा॒पुः समू॒ नु पत्नी॒र्वृष॑भिर्जगम्युः
na mṛṣā̍ śrā̱ntaṃ yadava̍nti de̱vā viśvā̱ it spṛdho̍ a̱bhya̍śnavāva |
jayā̱vedatra̍ śa̱tanī̍thamā̱jiṃ yat sa̱myañcā̍ mithu̱nāva̱bhyajā̍va ॥1.179.3॥
न मृषा॑ श्रा॒न्तं यदव॑न्ति दे॒वा विश्वा॒ इत् स्पृधो॑ अ॒भ्य॑श्नवाव ।
जया॒वेदत्र॑ श॒तनी॑थमा॒जिं यत् स॒म्यञ्चा॑ मिथु॒नाव॒भ्यजा॑व
na̱dasya̍ mā rudha̱taḥ kāma̱ āga̍nni̱ta ājā̍to a̱muta̱: kuta̍ścit |
lopā̍mudrā̱ vṛṣa̍ṇa̱ṃ nī ri̍ṇāti̱ dhīra̱madhī̍rā dhayati śva̱santa̍m ॥1.179.4॥
न॒दस्य॑ मा रुध॒तः काम॒ आग॑न्नि॒त आजा॑तो अ॒मुत॒: कुत॑श्चित् ।
लोपा॑मुद्रा॒ वृष॑णं॒ नी रि॑णाति॒ धीर॒मधी॑रा धयति श्व॒सन्त॑म्
i̱maṃ nu soma̱manti̍to hṛ̱tsu pī̱tamupa̍ bruve |
yat sī̱māga̍ścakṛ̱mā tat su mṛ̍l̤atu pulu̱kāmo̱ hi martya̍: ॥1.179.5॥
इ॒मं नु सोम॒मन्ति॑तो हृ॒त्सु पी॒तमुप॑ ब्रुवे ।
यत् सी॒माग॑श्चकृ॒मा तत् सु मृ॑ळतु पुलु॒कामो॒ हि मर्त्य॑:
a̱gastya̱: khana̍mānaḥ kha̱nitrai̍: pra̱jāmapa̍tya̱ṃ bala̍mi̱cchamā̍naḥ |
u̱bhau varṇā̱vṛṣi̍ru̱graḥ pu̍poṣa sa̱tyā de̱veṣvā̱śiṣo̍ jagāma ॥1.179.6॥
अ॒गस्त्य॒: खन॑मानः ख॒नित्रै॑: प्र॒जामप॑त्यं॒ बल॑मि॒च्छमा॑नः ।
उ॒भौ वर्णा॒वृषि॑रु॒ग्रः पु॑पोष स॒त्या दे॒वेष्वा॒शिषो॑ जगाम