Study
- Anukramaṇī
- Also in this saṅgraha
- Source
8 vāmadevo gautamaḥ| 1-3 kṣetrapatiḥ, 4 śunaḥ, 5, 8 śunāsīrau, 6-7 sītā| anuṣṭup, 5 pura uṣṇik, 2, 3, 8 triṣṭup|
kṣetra̍sya̱ pati̍nā va̱yaṃ hi̱tene̍va jayāmasi |
gāmaśva̍ṃ poṣayi̱tnvā sa no̍ mṛl̤ātī̱dṛśe̍ ॥4.57.1॥
क्षेत्र॑स्य॒ पति॑ना व॒यं हि॒तेने॑व जयामसि ।
गामश्वं॑ पोषयि॒त्न्वा स नो॑ मृळाती॒दृशे॑
kṣetra̍sya pate̱ madhu̍mantamū̱rmiṃ dhe̱nuri̍va̱ payo̍ a̱smāsu̍ dhukṣva |
ma̱dhu̱ścuta̍ṃ ghṛ̱tami̍va̱ supū̍tamṛ̱tasya̍ na̱: pata̍yo mṛl̤ayantu ॥4.57.2॥
क्षेत्र॑स्य पते॒ मधु॑मन्तमू॒र्मिं धे॒नुरि॑व॒ पयो॑ अ॒स्मासु॑ धुक्ष्व ।
म॒धु॒श्चुतं॑ घृ॒तमि॑व॒ सुपू॑तमृ॒तस्य॑ न॒: पत॑यो मृळयन्तु
madhu̍matī̱roṣa̍dhī̱rdyāva̱ āpo̱ madhu̍manno bhavatva̱ntari̍kṣam |
kṣetra̍sya̱ pati̱rmadhu̍mān no a̱stvari̍ṣyanto̱ anve̍naṃ carema ॥4.57.3॥
मधु॑मती॒रोष॑धी॒र्द्याव॒ आपो॒ मधु॑मन्नो भवत्व॒न्तरि॑क्षम् ।
क्षेत्र॑स्य॒ पति॒र्मधु॑मान् नो अ॒स्त्वरि॑ष्यन्तो॒ अन्वे॑नं चरेम
śu̱naṃ vā̱hāḥ śu̱naṃ nara̍: śu̱naṃ kṛ̍ṣatu̱ lāṅga̍lam |
śu̱naṃ va̍ra̱trā ba̍dhyantāṃ śu̱namaṣṭrā̱mudi̍ṅgaya ॥4.57.4॥
शु॒नं वा॒हाः शु॒नं नर॑: शु॒नं कृ॑षतु॒ लाङ्ग॑लम् ।
शु॒नं व॑र॒त्रा ब॑ध्यन्तां शु॒नमष्ट्रा॒मुदि॑ङ्गय
śunā̍sīrāvi̱māṃ vāca̍ṃ juṣethā̱ṃ yad di̱vi ca̱krathu̱: paya̍: | tene̱māmupa̍ siñcatam ॥4.57.5॥
शुना॑सीरावि॒मां वाचं॑ जुषेथां॒ यद् दि॒वि च॒क्रथु॒: पय॑: । तेने॒मामुप॑ सिञ्चतम्
a̱rvācī̍ subhage bhava̱ sīte̱ vandā̍mahe tvā | yathā̍ naḥ su̱bhagāsa̍si̱ yathā̍ naḥ su̱phalāsa̍si ॥4.57.6॥
अ॒र्वाची॑ सुभगे भव॒ सीते॒ वन्दा॑महे त्वा । यथा॑ नः सु॒भगास॑सि॒ यथा॑ नः सु॒फलास॑सि
indra̱: sītā̱ṃ ni gṛ̍hṇātu̱ tāṃ pū̱ṣānu̍ yacchatu | sā na̱: paya̍svatī duhā̱mutta̍rāmuttarā̱ṃ samā̍m ॥4.57.7॥
इन्द्र॒: सीतां॒ नि गृ॑ह्णातु॒ तां पू॒षानु॑ यच्छतु । सा न॒: पय॑स्वती दुहा॒मुत्त॑रामुत्तरां॒ समा॑म्
śu̱naṃ na̱: phālā̱ vi kṛ̍ṣantu̱ bhūmi̍ṃ śu̱naṃ kī̱nāśā̍ a̱bhi ya̍ntu vā̱haiḥ |
śu̱naṃ pa̱rjanyo̱ madhu̍nā̱ payo̍bhi̱: śunā̍sīrā śu̱nama̱smāsu̍ dhattam ॥4.57.8॥
शु॒नं न॒: फाला॒ वि कृ॑षन्तु॒ भूमिं॑ शु॒नं की॒नाशा॑ अ॒भि य॑न्तु वा॒हैः ।
शु॒नं प॒र्जन्यो॒ मधु॑ना॒ पयो॑भि॒: शुना॑सीरा शु॒नम॒स्मासु॑ धत्तम्