5 prājāpatyo yakṣmanāśanaḥ|indrāgnī, rājayakṣmaghnaṃ vā| triṣṭup , 5 anuṣṭup|
mu̱ñcāmi̍ tvā ha̱viṣā̱ jīva̍nāya̱ kama̍jñātaya̱kṣmādu̱ta rā̍jaya̱kṣmāt |
grāhi̍rja̱grāha̱ yadi̍ vai̱tade̍na̱ṃ tasyā̍ indrāgnī̱ pra mu̍muktamenam ॥10.161.1॥
मु॒ञ्चामि॑ त्वा ह॒विषा॒ जीव॑नाय॒ कम॑ज्ञातय॒क्ष्मादु॒त रा॑जय॒क्ष्मात् ।
ग्राहि॑र्ज॒ग्राह॒ यदि॑ वै॒तदे॑नं॒ तस्या॑ इन्द्राग्नी॒ प्र मु॑मुक्तमेनम्
yadi̍ kṣi̱tāyu̱ryadi̍ vā̱ pare̍to̱ yadi̍ mṛ̱tyora̍nti̱kaṃ nī̍ta e̱va |
tamā ha̍rāmi̱ niṝ̍teru̱pasthā̱daspā̍rṣamenaṃ śa̱taśā̍radāya ॥10.161.2॥
यदि॑ क्षि॒तायु॒र्यदि॑ वा॒ परे॑तो॒ यदि॑ मृ॒त्योर॑न्ति॒कं नी॑त ए॒व ।
तमा ह॑रामि॒ निॠ॑तेरु॒पस्था॒दस्पा॑र्षमेनं श॒तशा॑रदाय
sa̱ha̱srā̱kṣeṇa̍ śa̱taśā̍radena śa̱tāyu̍ṣā ha̱viṣāhā̍rṣamenam |
śa̱taṃ yathe̱maṃ śa̱rado̱ nayā̱tīndro̱ viśva̍sya duri̱tasya̍ pā̱ram ॥10.161.3॥
स॒ह॒स्रा॒क्षेण॑ श॒तशा॑रदेन श॒तायु॑षा ह॒विषाहा॑र्षमेनम् ।
श॒तं यथे॒मं श॒रदो॒ नया॒तीन्द्रो॒ विश्व॑स्य दुरि॒तस्य॑ पा॒रम्
śa̱taṃ jī̍va śa̱rado̱ vardha̍mānaḥ śa̱taṃ he̍ma̱ntāñcha̱tamu̍ vasa̱ntān |
śa̱tami̍ndrā̱gnī sa̍vi̱tā bṛha̱spati̍: śa̱tāyu̍ṣā ha̱viṣe̱maṃ puna̍rduḥ ॥10.161.4॥
श॒तं जी॑व श॒रदो॒ वर्ध॑मानः श॒तं हे॑म॒न्ताञ्छ॒तमु॑ वस॒न्तान् ।
श॒तमि॑न्द्रा॒ग्नी स॑वि॒ता बृह॒स्पति॑: श॒तायु॑षा ह॒विषे॒मं पुन॑र्दुः
āhā̍rṣa̱ṃ tvāvi̍daṃ tvā̱ puna̱rāgā̍: punarnava | sarvā̍ṅga̱ sarva̍ṃ te̱ cakṣu̱: sarva̱māyu̍śca te'vidam ॥10.161.5॥
आहा॑र्षं॒ त्वावि॑दं त्वा॒ पुन॒रागा॑: पुनर्नव । सर्वा॑ङ्ग॒ सर्वं॑ ते॒ चक्षु॒: सर्व॒मायु॑श्च तेऽविदम्