10 bhaumo'triḥ| parjanyaḥ| triṣṭup, 2-4 jagatī, 9 anuṣṭup|
acchā̍ vada ta̱vasa̍ṃ gī̱rbhirā̱bhiḥ stu̱hi pa̱rjanya̱ṃ nama̱sā vi̍vāsa |
kani̍kradad vṛṣa̱bho jī̱radā̍nū̱ reto̍ dadhā̱tyoṣa̍dhīṣu̱ garbha̍m ॥5.83.1॥
अच्छा॑ वद त॒वसं॑ गी॒र्भिरा॒भिः स्तु॒हि प॒र्जन्यं॒ नम॒सा वि॑वास ।
कनि॑क्रदद् वृष॒भो जी॒रदा॑नू॒ रेतो॑ दधा॒त्योष॑धीषु॒ गर्भ॑म्
vi vṛ̱kṣān ha̍ntyu̱ta ha̍nti ra̱kṣaso̱ viśva̍ṃ bibhāya̱ bhuva̍naṃ ma̱hāva̍dhāt |
u̱tānā̍gā īṣate̱ vṛṣṇyā̍vato̱ yat pa̱rjanya̍: sta̱naya̱nhanti̍ du̱ṣkṛta̍: ॥5.83.2॥
वि वृ॒क्षान् ह॑न्त्यु॒त ह॑न्ति र॒क्षसो॒ विश्वं॑ बिभाय॒ भुव॑नं म॒हाव॑धात् ।
उ॒ताना॑गा ईषते॒ वृष्ण्या॑वतो॒ यत् प॒र्जन्य॑: स्त॒नय॒न्हन्ति॑ दु॒ष्कृत॑:
ra̱thīva̱ kaśa̱yāśvā̍m̐ abhikṣi̱pannā̱virdū̱tān kṛ̍ṇute va̱rṣyā̱m̐3 aha̍ |
dū̱rāt si̱ṃhasya̍ sta̱nathā̱ udī̍rate̱ yat pa̱rjanya̍: kṛṇu̱te va̱rṣyaṃ1 nabha̍: ॥5.83.3॥
र॒थीव॒ कश॒याश्वाँ॑ अभिक्षि॒पन्ना॒विर्दू॒तान् कृ॑णुते व॒र्ष्याँ॒३ अह॑ ।
दू॒रात् सिं॒हस्य॑ स्त॒नथा॒ उदी॑रते॒ यत् प॒र्जन्य॑: कृणु॒ते व॒र्ष्यं१ नभ॑:
pra vātā̱ vānti̍ pa̱taya̍nti vi̱dyuta̱ udoṣa̍dhī̱rjiha̍te̱ pinva̍te̱ sva̍: |
irā̱ viśva̍smai̱ bhuva̍nāya jāyate̱ yat pa̱rjanya̍: pṛthi̱vīṃ reta̱sāva̍ti ॥5.83.4॥
प्र वाता॒ वान्ति॑ प॒तय॑न्ति वि॒द्युत॒ उदोष॑धी॒र्जिह॑ते॒ पिन्व॑ते॒ स्व॑: ।
इरा॒ विश्व॑स्मै॒ भुव॑नाय जायते॒ यत् प॒र्जन्य॑: पृथि॒वीं रेत॒साव॑ति
yasya̍ vra̱te pṛ̍thi̱vī nanna̍mīti̱ yasya̍ vra̱te śa̱phava̱jjarbhu̍rīti |
yasya̍ vra̱ta oṣa̍dhīrvi̱śvarū̍pā̱: sa na̍: parjanya̱ mahi̱ śarma̍ yaccha ॥5.83.5॥
यस्य॑ व्र॒ते पृ॑थि॒वी नन्न॑मीति॒ यस्य॑ व्र॒ते श॒फव॒ज्जर्भु॑रीति ।
यस्य॑ व्र॒त ओष॑धीर्वि॒श्वरू॑पा॒: स न॑: पर्जन्य॒ महि॒ शर्म॑ यच्छ
di̱vo no̍ vṛ̱ṣṭiṃ ma̍ruto rarīdhva̱ṃ pra pi̍nvata̱ vṛṣṇo̱ aśva̍sya̱ dhārā̍: |
a̱rvāṅe̱tena̍ stanayi̱tnunehya̱po ni̍ṣi̱ñcannasu̍raḥ pi̱tā na̍: ॥5.83.6॥
दि॒वो नो॑ वृ॒ष्टिं म॑रुतो ररीध्वं॒ प्र पि॑न्वत॒ वृष्णो॒ अश्व॑स्य॒ धारा॑: ।
अ॒र्वाङे॒तेन॑ स्तनयि॒त्नुनेह्य॒पो नि॑षि॒ञ्चन्नसु॑रः पि॒ता न॑:
a̱bhi kra̍nda sta̱naya̱ garbha̱mā dhā̍ uda̱nvatā̱ pari̍ dīyā̱ rathe̍na |
dṛti̱ṃ su ka̍rṣa̱ viṣi̍ta̱ṃ nya̍ñcaṃ sa̱mā bha̍vantū̱dvato̍ nipā̱dāḥ ॥5.83.7॥
अ॒भि क्र॑न्द स्त॒नय॒ गर्भ॒मा धा॑ उद॒न्वता॒ परि॑ दीया॒ रथे॑न ।
दृतिं॒ सु क॑र्ष॒ विषि॑तं॒ न्य॑ञ्चं स॒मा भ॑वन्तू॒द्वतो॑ निपा॒दाः
ma̱hānta̱ṃ kośa̱muda̍cā̱ ni ṣi̍ñca̱ syanda̍ntāṃ ku̱lyā viṣi̍tāḥ pu̱rastā̍t |
ghṛ̱tena̱ dyāvā̍pṛthi̱vī vyu̍ndhi suprapā̱ṇaṃ bha̍vatva̱ghnyābhya̍: ॥5.83.8॥
म॒हान्तं॒ कोश॒मुद॑चा॒ नि षि॑ञ्च॒ स्यन्द॑न्तां कु॒ल्या विषि॑ताः पु॒रस्ता॑त् ।
घृ॒तेन॒ द्यावा॑पृथि॒वी व्यु॑न्धि सुप्रपा॒णं भ॑वत्व॒घ्न्याभ्य॑:
yat pa̍rjanya̱ kani̍kradat sta̱naya̱nhaṃsi̍ du̱ṣkṛta̍: |
pratī̱daṃ viśva̍ṃ modate̱ yat kiṃ ca̍ pṛthi̱vyāmadhi̍ ॥5.83.9॥
यत् प॑र्जन्य॒ कनि॑क्रदत् स्त॒नय॒न्हंसि॑ दु॒ष्कृत॑: ।
प्रती॒दं विश्वं॑ मोदते॒ यत् किं च॑ पृथि॒व्यामधि॑
ava̍rṣīrva̱rṣamudu̱ ṣū gṛ̍bhā̱yā'ka̱rdhanvā̱nyatye̍ta̱vā u̍ |
ajī̍jana̱ oṣa̍dhī̱rbhoja̍nāya̱ kamu̱ta pra̱jābhyo̍'vido manī̱ṣām ॥5.83.10॥
अव॑र्षीर्व॒र्षमुदु॒ षू गृ॑भा॒याऽक॒र्धन्वा॒न्यत्ये॑त॒वा उ॑ ।
अजी॑जन॒ ओष॑धी॒र्भोज॑नाय॒ कमु॒त प्र॒जाभ्यो॑ऽविदो मनी॒षाम्