Nakṣatrasūktam (dvi ṛcaḥ)

Study

sa̱tyamid vā u̍ aśvinā yu̱vāmā̍hurmayo̱bhuvā̍ | tā yāma̍n yāma̱hūta̍mā̱ yāma̱nnā mṛ̍l̤a̱yatta̍mā ॥5.73.9॥

स॒त्यमिद् वा उ॑ अश्विना यु॒वामा॑हुर्मयो॒भुवा॑ । ता याम॑न् याम॒हूत॑मा॒ याम॒न्ना मृ॑ळ॒यत्त॑मा

i̱mā brahmā̍ṇi̱ vardha̍nā̱ 'śvibhyā̍ṃ santu̱ śaṃta̍mā | yā takṣā̍ma̱ rathā̍m̐ i̱vā'vo̍cāma bṛ̱hannama̍: ॥5.73.10॥

इ॒मा ब्रह्मा॑णि॒ वर्ध॑ना॒ ऽश्विभ्यां॑ सन्तु॒ शंत॑मा । या तक्षा॑म॒ रथाँ॑ इ॒वाऽवो॑चाम बृ॒हन्नम॑:

ya̱māya̍ ghṛ̱tava̍ddha̱virju̱hota̱ pra ca̍ tiṣṭhata | sa no̍ de̱veṣvā ya̍maddī̱rghamāyu̱: pra jī̱vase̍ ॥10.14.14॥

य॒माय॑ घृ॒तव॑द्ध॒विर्जु॒होत॒ प्र च॑ तिष्ठत । स नो॑ दे॒वेष्वा य॑मद्दी॒र्घमायु॒: प्र जी॒वसे॑

ya̱māya̱ madhu̍mattama̱ṃ rājñe̍ ha̱vyaṃ ju̍hotana | i̱daṃ nama̱ ṛṣi̍bhyaḥ pūrva̱jebhya̱: pūrve̍bhyaḥ pathi̱kṛdbhya̍: ॥10.14.15॥

य॒माय॒ मधु॑मत्तमं॒ राज्ञे॑ ह॒व्यं जु॑होतन । इ॒दं नम॒ ऋषि॑भ्यः पूर्व॒जेभ्य॒: पूर्वे॑भ्यः पथि॒कृद्भ्य॑:

u̱ta no̱ brahma̍nnaviṣa u̱ktheṣu̍ deva̱hūta̍maḥ |

śaṃ na̍: śocā ma̱rudvṛ̱dho'gne̍ sahasra̱sāta̍maḥ ॥3.13.6॥

उ॒त नो॒ ब्रह्म॑न्नविष उ॒क्थेषु॑ देव॒हूत॑मः ।

शं न॑: शोचा म॒रुद्वृ॒धोऽग्ने॑ सहस्र॒सात॑मः

nū no̍ rāsva sa̱hasra̍vat to̱kava̍tpuṣṭi̱mad vasu̍ |

dyu̱mada̍gne su̱vīrya̱ṃ varṣi̍ṣṭha̱manu̍pakṣitam ॥3.13.7॥

नू नो॑ रास्व स॒हस्र॑वत् तो॒कव॑त्पुष्टि॒मद् वसु॑ ।

द्यु॒मद॑ग्ने सु॒वीर्यं॒ वर्षि॑ष्ठ॒मनु॑पक्षितम्

sa it kṣe̍ti̱ sudhi̍ta̱ oka̍si̱ sve tasmā̱ il̤ā̍ pinvate viśva̱dānī̍m |

tasmai̱ viśa̍: sva̱yame̱vā na̍mante̱ yasmi̍n bra̱hmā rāja̍ni̱ pūrva̱ eti̍ ॥4.50.8॥

स इत् क्षे॑ति॒ सुधि॑त॒ ओक॑सि॒ स्वे तस्मा॒ इळा॑ पिन्वते विश्व॒दानी॑म् ।

तस्मै॒ विश॑: स्व॒यमे॒वा न॑मन्ते॒ यस्मि॑न् ब्र॒ह्मा राज॑नि॒ पूर्व॒ एति॑

apra̍tīto jayati̱ saṃ dhanā̍ni̱ prati̍janyānyu̱ta yā saja̍nyā |

a̱va̱syave̱ yo vari̍vaḥ kṛ̱ṇoti̍ bra̱hmaṇe̱ rājā̱ tama̍vanti de̱vāḥ ॥4.50.9॥

अप्र॑तीतो जयति॒ सं धना॑नि॒ प्रति॑जन्यान्यु॒त या सज॑न्या ।

अ॒व॒स्यवे॒ यो वरि॑वः कृ॒णोति॑ ब्र॒ह्मणे॒ राजा॒ तम॑वन्ति दे॒वाः

yā te̱ dhāmā̍ni ha̱viṣā̱ yaja̍nti̱ tā te̱ viśvā̍ pari̱bhūra̍stu ya̱jñam |

ga̱ya̱sphāna̍: pra̱tara̍ṇaḥ su̱vīro 'vī̍rahā̱ pra ca̍rā soma̱ duryā̍n ॥1.91.19॥

या ते॒ धामा॑नि ह॒विषा॒ यज॑न्ति॒ ता ते॒ विश्वा॑ परि॒भूर॑स्तु य॒ज्ञम् ।

ग॒य॒स्फान॑: प्र॒तर॑णः सु॒वीरो ऽवी॑रहा॒ प्र च॑रा सोम॒ दुर्या॑न्

somo̍ dhe̱nuṃ somo̱ arva̍ntamā̱śuṃ somo̍ vī̱raṃ ka̍rma̱ṇya̍ṃ dadāti |

sā̱da̱nya̍ṃ vida̱thya̍ṃ sa̱bheya̍ṃ pitṛ̱śrava̍ṇa̱ṃ yo dadā̍śadasmai ॥1.91.20॥

सोमो॑ धे॒नुं सोमो॒ अर्व॑न्तमा॒शुं सोमो॑ वी॒रं क॑र्म॒ण्यं॑ ददाति ।

सा॒द॒न्यं॑ विद॒थ्यं॑ स॒भेयं॑ पितृ॒श्रव॑णं॒ यो ददा॑शदस्मै

i̱mā ru̱drāya̍ ta̱vase̍ kapa̱rdine̍ kṣa̱yadvī̍rāya̱ pra bha̍rāmahe ma̱tīḥ |

yathā̱ śamasa̍d dvi̱pade̱ catu̍ṣpade̱ viśva̍ṃ pu̱ṣṭaṃ grāme̍ a̱sminna̍nātu̱ram ॥1.114.1॥

इ॒मा रु॒द्राय॑ त॒वसे॑ कप॒र्दिने॑ क्ष॒यद्वी॑राय॒ प्र भ॑रामहे म॒तीः ।

यथा॒ शमस॑द् द्वि॒पदे॒ चतु॑ष्पदे॒ विश्वं॑ पु॒ष्टं ग्रामे॑ अ॒स्मिन्न॑नातु॒रम्

mṛ̱l̤ā no̍ rudro̱ta no̱ maya̍skṛdhi kṣa̱yadvī̍rāya̱ nama̍sā vidhema te |

yacchaṃ ca̱ yośca̱ manu̍rāye̱je pi̱tā tada̍śyāma̱ tava̍ rudra̱ praṇī̍tiṣu ॥1.114.2॥

मृ॒ळा नो॑ रुद्रो॒त नो॒ मय॑स्कृधि क्ष॒यद्वी॑राय॒ नम॑सा विधेम ते ।

यच्छं च॒ योश्च॒ मनु॑राये॒जे पि॒ता तद॑श्याम॒ तव॑ रुद्र॒ प्रणी॑तिषु

bhūrja̍jña uttā̱napa̍do bhu̱va āśā̍ ajāyanta | adi̍te̱rdakṣo̍ ajāyata̱ dakṣā̱dvadi̍ti̱: pari̍ ॥10.72.4॥

भूर्ज॑ज्ञ उत्ता॒नप॑दो भु॒व आशा॑ अजायन्त । अदि॑ते॒र्दक्षो॑ अजायत॒ दक्षा॒द्वदि॑ति॒: परि॑

adi̍ti̱rhyaja̍niṣṭa̱ dakṣa̱ yā du̍hi̱tā tava̍ | tāṃ de̱vā anva̍jāyanta bha̱drā a̱mṛta̍bandhavaḥ ॥10.72.5॥

अदि॑ति॒र्ह्यज॑निष्ट॒ दक्ष॒ या दु॑हि॒ता तव॑ । तां दे॒वा अन्व॑जायन्त भ॒द्रा अ॒मृत॑बन्धवः

e̱vā pi̱tre vi̱śvade̍vāya̱ vṛṣṇe̍ ya̱jñairvi̍dhema̱ nama̍sā ha̱virbhi̍: |

bṛha̍spate supra̱jā vī̱rava̍nto va̱yaṃ syā̍ma̱ pata̍yo rayī̱ṇām ॥4.50.6॥

ए॒वा पि॒त्रे वि॒श्वदे॑वाय॒ वृष्णे॑ य॒ज्ञैर्वि॑धेम॒ नम॑सा ह॒विर्भि॑: ।

बृह॑स्पते सुप्र॒जा वी॒रव॑न्तो व॒यं स्या॑म॒ पत॑यो रयी॒णाम्

sa id rājā̱ prati̍janyāni̱ viśvā̱ śuṣme̍ṇa tasthāva̱bhi vī̱rye̍ṇa |

bṛha̱spati̱ṃ yaḥ subhṛ̍taṃ bi̱bharti̍ valgū̱yati̱ vanda̍te pūrva̱bhāja̍m ॥4.50.7॥

स इद् राजा॒ प्रति॑जन्यानि॒ विश्वा॒ शुष्मे॑ण तस्थाव॒भि वी॒र्ये॑ण ।

बृह॒स्पतिं॒ यः सुभृ॑तं बि॒भर्ति॑ वल्गू॒यति॒ वन्द॑ते पूर्व॒भाज॑म्

sa̱rpa̍ḥ sa̱rpo a̍ja̱ga̱raḥ sa̱rpira̍viṣo ma̱hān | tasya̍ sa̱rpātsindha̍vastasya̍ gā̱dhama̍śīmahi || 1 ||

||1||

kā̱l̤i̱ko nāma̍ sa̱rpo na̍vanāgasahasraba̱l̤aḥ | yamu̱nahra̱de ha̍ so jāto̱3 yo nā̍rāyaṇavā̱hanaḥ || 2 ||

||2||

tvama̍gna īl̤i̱to jā̍tave̱do'vā̍ḍḍha̱vyāni̍ sura̱bhīṇi̍ kṛ̱tvī |

prādā̍: pi̱tṛbhya̍: sva̱dhayā̱ te a̍kṣanna̱ddhi tvaṃ de̍va̱ praya̍tā ha̱vīṃṣi̍ ॥10.15.12॥

त्वम॑ग्न ईळि॒तो जा॑तवे॒दोऽवा॑ड्ढ॒व्यानि॑ सुर॒भीणि॑ कृ॒त्वी ।

प्रादा॑: पि॒तृभ्य॑: स्व॒धया॒ ते अ॑क्षन्न॒द्धि त्वं दे॑व॒ प्रय॑ता ह॒वींषि॑

ye ce̱ha pi̱taro̱ ye ca̱ neha yām̐śca̍ vi̱dma yām̐ u̍ ca̱ na pra̍vi̱dma |

tvaṃ ve̍ttha̱ yati̱ te jā̍tavedaḥ sva̱dhābhi̍rya̱jñaṃ sukṛ̍taṃ juṣasva ॥10.15.13॥

ये चे॒ह पि॒तरो॒ ये च॒ नेह याँश्च॑ वि॒द्म याँ उ॑ च॒ न प्र॑वि॒द्म ।

त्वं वे॑त्थ॒ यति॒ ते जा॑तवेदः स्व॒धाभि॑र्य॒ज्ञं सुकृ॑तं जुषस्व

u̱tedānī̱ṃ bhaga̍vantaḥ syāmo̱ta pra̍pi̱tva u̱ta madhye̱ ahnā̍m |

u̱todi̍tā maghava̱ntsūrya̍sya va̱yaṃ de̱vānā̍ṃ suma̱tau syā̍ma ॥7.41.4॥

उ॒तेदानीं॒ भग॑वन्तः स्यामो॒त प्र॑पि॒त्व उ॒त मध्ये॒ अह्ना॑म् ।

उ॒तोदि॑ता मघव॒न्त्सूर्य॑स्य व॒यं दे॒वानां॑ सुम॒तौ स्या॑म

bhaga̍ e̱va bhaga̍vām̐ astu devā̱stena̍ va̱yaṃ bhaga̍vantaḥ syāma |

taṃ tvā̍ bhaga̱ sarva̱ ijjo̍havīti̱ sa no̍ bhaga purae̱tā bha̍ve̱ha ॥7.41.5॥

भग॑ ए॒व भग॑वाँ अस्तु देवा॒स्तेन॑ व॒यं भग॑वन्तः स्याम ।

तं त्वा॑ भग॒ सर्व॒ इज्जो॑हवीति॒ स नो॑ भग पुरए॒ता भ॑वे॒ह

tvama̍gne̱ varu̍ṇo̱ jāya̍se̱ yattvaṃ mi̱tro bha̍vasi̱ yatsami̍ddhaḥ |

tve viśve̍ sahasasputra de̱vāstvamindro̍ dā̱śuṣe̱ martyā̍ya ॥5.3.1॥

त्वम॑ग्ने॒ वरु॑णो॒ जाय॑से॒ यत्त्वं मि॒त्रो भ॑वसि॒ यत्समि॑द्धः ।

त्वे विश्वे॑ सहसस्पुत्र दे॒वास्त्वमिन्द्रो॑ दा॒शुषे॒ मर्त्या॑य

tvama̍rya̱mā bha̍vasi̱ yat ka̱nīnā̱ṃ nāma̍ svadhāva̱n guhya̍ṃ bibharṣi |

a̱ñjanti̍ mi̱traṃ sudhi̍ta̱ṃ na gobhi̱ryad dampa̍tī̱ sama̍nasā kṛ̱ṇoṣi̍ ॥5.3.2॥

त्वम॑र्य॒मा भ॑वसि॒ यत् क॒नीनां॒ नाम॑ स्वधाव॒न् गुह्यं॑ बिभर्षि ।

अ॒ञ्जन्ति॑ मि॒त्रं सुधि॑तं॒ न गोभि॒र्यद् दम्प॑ती॒ सम॑नसा कृ॒णोषि॑

śaṃ no̍ bhava̱ cakṣa̍sā̱ śaṃ no̱ ahnā̱ śaṃ bhā̱nunā̱ śaṃ hi̱mā śaṃ ghṛ̱ṇena̍ |

yathā̱ śamadhva̱ñchamasa̍dduro̱ṇe tatsū̍rya̱ dravi̍ṇaṃ dhehi ci̱tram ॥10.37.10॥

शं नो॑ भव॒ चक्ष॑सा॒ शं नो॒ अह्ना॒ शं भा॒नुना॒ शं हि॒मा शं घृ॒णेन॑ ।

यथा॒ शमध्व॒ञ्छमस॑द्दुरो॒णे तत्सू॑र्य॒ द्रवि॑णं धेहि चि॒त्रम्

a̱smāka̍ṃ devā u̱bhayā̍ya̱ janma̍ne̱ śarma̍ yacchata dvi̱pade̱ catu̍ṣpade |

a̱datpiba̍dū̱rjaya̍māna̱māśi̍ta̱ṃ tada̱sme śaṃ yora̍ra̱po da̍dhātana ॥10.37.11॥

अ॒स्माकं॑ देवा उ॒भया॑य॒ जन्म॑ने॒ शर्म॑ यच्छत द्वि॒पदे॒ चतु॑ष्पदे ।

अ॒दत्पिब॑दू॒र्जय॑मान॒माशि॑तं॒ तद॒स्मे शं योर॑र॒पो द॑धातन

prati̍ na̱: stoma̱ṃ tvaṣṭā̍ juṣeta̱ syāda̱sme a̱rama̍tirvasū̱yuḥ ॥7.34.21॥

प्रति॑ न॒: स्तोमं॒ त्वष्टा॑ जुषेत॒ स्याद॒स्मे अ॒रम॑तिर्वसू॒युः

tā no̍ rāsanrāti̱ṣāco̱ vasū̱nyā roda̍sī varuṇā̱nī śṛ̍ṇotu |

varū̍trībhiḥ suśara̱ṇo no̍ astu̱ tvaṣṭā̍ su̱datro̱ vi da̍dhātu̱ rāya̍: ॥7.34.22॥

ता नो॑ रासन्राति॒षाचो॒ वसू॒न्या रोद॑सी वरुणा॒नी शृ॑णोतु ।

वरू॑त्रीभिः सुशर॒णो नो॑ अस्तु॒ त्वष्टा॑ सु॒दत्रो॒ वि द॑धातु॒ राय॑:

vāyo̍ śu̱kro a̍yāmi te̱ madhvo̱ agra̱ṃ divi̍ṣṭiṣu |

ā yā̍hi̱ soma̍pītaye spā̱rho de̍va ni̱yutva̍tā ॥4.47.1॥

वायो॑ शु॒क्रो अ॑यामि ते॒ मध्वो॒ अग्रं॒ दिवि॑ष्टिषु ।

आ या॑हि॒ सोम॑पीतये स्पा॒र्हो दे॑व नि॒युत्व॑ता

indra̍śca vāyaveṣā̱ṃ somā̍nāṃ pī̱tima̍rhathaḥ |

yu̱vāṃ hi yantīnda̍vo ni̱mnamāpo̱ na sa̱dhrya̍k ॥4.47.2॥

इन्द्र॑श्च वायवेषां॒ सोमा॑नां पी॒तिम॑र्हथः ।

यु॒वां हि यन्तीन्द॑वो नि॒म्नमापो॒ न स॒ध्र्य॑क्

indrā̍gnī a̱pādi̱yaṃ pūrvāgā̍tpa̱dvatī̍bhyaḥ | hi̱tvī śiro̍ ji̱hvayā̱ vāva̍da̱ccara̍ttri̱ṃśatpa̱dā nya̍kramīt ॥6.59.6॥

इन्द्रा॑ग्नी अ॒पादि॒यं पूर्वागा॑त्प॒द्वती॑भ्यः । हि॒त्वी शिरो॑ जि॒ह्वया॒ वाव॑द॒च्चर॑त्त्रिं॒शत्प॒दा न्य॑क्रमीत्

indrā̍gnī̱ ā hi ta̍nva̱te naro̱ dhanvā̍ni bā̱hvoḥ | mā no̍ a̱sminma̍hādha̱ne parā̍ varkta̱ṃ gavi̍ṣṭiṣu ॥6.59.7॥

इन्द्रा॑ग्नी॒ आ हि त॑न्व॒ते नरो॒ धन्वा॑नि बा॒ह्वोः । मा नो॑ अ॒स्मिन्म॑हाध॒ने परा॑ वर्क्तं॒ गवि॑ष्टिषु

a̱yaṃ mi̱tro na̍ma̱sya̍: su̱śevo̱ rājā̍ sukṣa̱tro a̍janiṣṭa ve̱dhāḥ |

tasya̍ va̱yaṃ su̍ma̱tau ya̱jñiya̱syā'pi̍ bha̱dre sau̍mana̱se syā̍ma ॥3.59.4॥

अ॒यं मि॒त्रो न॑म॒स्य॑: सु॒शेवो॒ राजा॑ सुक्ष॒त्रो अ॑जनिष्ट वे॒धाः ।

तस्य॑ व॒यं सु॑म॒तौ य॒ज्ञिय॒स्याऽपि॑ भ॒द्रे सौ॑मन॒से स्या॑म

ma̱hām̐ ā̍di̱tyo nama̍sopa̱sadyo̍ yāta̱yajja̍no gṛṇa̱te su̱śeva̍: |

tasmā̍ e̱tatpanya̍tamāya̱ juṣṭa̍ma̱gnau mi̱trāya̍ ha̱virā ju̍hota ॥3.59.5॥

म॒हाँ आ॑दि॒त्यो नम॑सोप॒सद्यो॑ यात॒यज्ज॑नो गृण॒ते सु॒शेव॑: ।

तस्मा॑ ए॒तत्पन्य॑तमाय॒ जुष्ट॑म॒ग्नौ मि॒त्राय॑ ह॒विरा जु॑होत

pibā̱ soma̍ma̱bhi yamu̍gra̱ tarda̍ ū̱rvaṃ gavya̱ṃ mahi̍ gṛṇā̱na i̍ndra |

vi yo dhṛ̍ṣṇo̱ vadhi̍ṣo vajrahasta̱ viśvā̍ vṛ̱trama̍mi̱triyā̱ śavo̍bhiḥ ॥6.17.1॥

पिबा॒ सोम॑म॒भि यमु॑ग्र॒ तर्द॑ ऊ॒र्वं गव्यं॒ महि॑ गृणा॒न इ॑न्द्र ।

वि यो धृ॑ष्णो॒ वधि॑षो वज्रहस्त॒ विश्वा॑ वृ॒त्रम॑मि॒त्रिया॒ शवो॑भिः

sa ī̍ṃ pāhi̱ ya ṛ̍jī̱ṣī taru̍tro̱ yaḥ śipra̍vān vṛṣa̱bho yo ma̍tī̱nām |

yo go̍tra̱bhid va̍jra̱bhṛd yo ha̍ri̱ṣṭhāḥ sa i̍ndra ci̱trām̐ a̱bhi tṛ̍ndhi̱ vājā̍n ॥6.17.2॥

स ईं॑ पाहि॒ य ऋ॑जी॒षी तरु॑त्रो॒ यः शिप्र॑वान् वृष॒भो यो म॑ती॒नाम् ।

यो गो॑त्र॒भिद् व॑ज्र॒भृद् यो ह॑रि॒ष्ठाः स इ॑न्द्र चि॒त्राँ अ॒भि तृ॑न्धि॒ वाजा॑न्

pra tā̱ryāyu̍: prata̱raṃ navī̍ya̱: sthātā̍reva̱ kratu̍matā̱ ratha̍sya |

adha̱ cyavā̍na̱ utta̍vī̱tyartha̍ṃ parāta̱raṃ su niṝ̍tirjihītām ॥10.59.1॥

प्र ता॒र्यायु॑: प्रत॒रं नवी॑य॒: स्थाता॑रेव॒ क्रतु॑मता॒ रथ॑स्य ।

अध॒ च्यवा॑न॒ उत्त॑वी॒त्यर्थं॑ परात॒रं सु निॠ॑तिर्जिहीताम्

sāma̱nnu rā̱ye ni̍dhi̱mannvanna̱ṃ karā̍mahe̱ su pu̍ru̱dha śravā̍ṃsi |

tā no̱ viśvā̍ni jari̱tā ma̍mattu parāta̱raṃ su niṝ̍tirjihītām ॥10.59.2॥

साम॒न्नु रा॒ये नि॑धि॒मन्न्वन्नं॒ करा॑महे॒ सु पु॑रु॒ध श्रवां॑सि ।

ता नो॒ विश्वा॑नि जरि॒ता म॑मत्तु परात॒रं सु निॠ॑तिर्जिहीताम्

i̱damā̍pa̱: pra va̍hata̱ yatkiṃ ca̍ duri̱taṃ mayi̍ | yadvā̱hama̍bhidu̱droha̱ yadvā̍ śe̱pa u̱tānṛ̍tam ॥10.9.8॥

इ॒दमा॑प॒: प्र व॑हत॒ यत्किं च॑ दुरि॒तं मयि॑ । यद्वा॒हम॑भिदु॒द्रोह॒ यद्वा॑ शे॒प उ॒तानृ॑तम्

āpo̍ a̱dyānva̍cāriṣa̱ṃ rase̍na̱ sama̍gasmahi | paya̍svānagna̱ ā ga̍hi̱ taṃ mā̱ saṃ sṛ̍ja̱ varca̍sā ॥10.9.9॥

आपो॑ अ॒द्यान्व॑चारिषं॒ रसे॑न॒ सम॑गस्महि । पय॑स्वानग्न॒ आ ग॑हि॒ तं मा॒ सं सृ॑ज॒ वर्च॑सा

de̱vaṃ vo̍ a̱dya sa̍vi̱tāra̱meṣe̱ bhaga̍ṃ ca̱ ratna̍ṃ vi̱bhaja̍ntamā̱yoḥ |

ā vā̍ṃ narā purubhujā vavṛtyāṃ di̱vedi̍ve cidaśvinā sakhī̱yan ॥5.49.1॥

दे॒वं वो॑ अ॒द्य स॑वि॒तार॒मेषे॒ भगं॑ च॒ रत्नं॑ वि॒भज॑न्तमा॒योः ।

आ वां॑ नरा पुरुभुजा ववृत्यां दि॒वेदि॑वे चिदश्विना सखी॒यन्

prati̍ pra̱yāṇa̱masu̍rasya vi̱dvān tsū̱ktairde̱vaṃ sa̍vi̱tāra̍ṃ duvasya |

upa̍ bruvīta̱ nama̍sā vijā̱nañjyeṣṭha̍ṃ ca̱ ratna̍ṃ vi̱bhaja̍ntamā̱yoḥ ॥5.49.2॥

प्रति॑ प्र॒याण॒मसु॑रस्य वि॒द्वान् त्सू॒क्तैर्दे॒वं स॑वि॒तारं॑ दुवस्य ।

उप॑ ब्रुवीत॒ नम॑सा विजा॒नञ्ज्येष्ठं॑ च॒ रत्नं॑ वि॒भज॑न्तमा॒योः

pra viṣṇa̍ve śū̱ṣame̍tu̱ manma̍ giri̱kṣita̍ urugā̱yāya̱ vṛṣṇe̍ |

ya i̱daṃ dī̱rghaṃ praya̍taṃ sa̱dhastha̱meko̍ vima̱me tri̱bhirit pa̱debhi̍: ॥1.154.3॥

प्र विष्ण॑वे शू॒षमे॑तु॒ मन्म॑ गिरि॒क्षित॑ उरुगा॒याय॒ वृष्णे॑ ।

य इ॒दं दी॒र्घं प्रय॑तं स॒धस्थ॒मेको॑ विम॒मे त्रि॒भिरित् प॒देभि॑:

yasya̱ trī pū̱rṇā madhu̍nā pa̱dānyakṣī̍yamāṇā sva̱dhayā̱ mada̍nti |

ya u̍ tri̱dhātu̍ pṛthi̱vīmu̱ta dyāmeko̍ dā̱dhāra̱ bhuva̍nāni̱ viśvā̍ ॥1.154.4॥

यस्य॒ त्री पू॒र्णा मधु॑ना प॒दान्यक्षी॑यमाणा स्व॒धया॒ मद॑न्ति ।

य उ॑ त्रि॒धातु॑ पृथि॒वीमु॒त द्यामेको॑ दा॒धार॒ भुव॑नानि॒ विश्वा॑

jani̍ṣṭhā u̱graḥ saha̍se tu̱rāya̍ ma̱ndra oji̍ṣṭho bahu̱lābhi̍mānaḥ |

ava̍rdha̱nnindra̍ṃ ma̱ruta̍ści̱datra̍ mā̱tā yadvī̱raṃ da̱dhana̱ddhani̍ṣṭhā ॥10.73.1॥

जनि॑ष्ठा उ॒ग्रः सह॑से तु॒राय॑ म॒न्द्र ओजि॑ष्ठो बहु॒लाभि॑मानः ।

अव॑र्ध॒न्निन्द्रं॑ म॒रुत॑श्चि॒दत्र॑ मा॒ता यद्वी॒रं द॒धन॒द्धनि॑ष्ठा

dru̱ho niṣa̍ttā pṛśa̱nī ci̱devai̍: pu̱rū śaṃse̍na vāvṛdhu̱ṣṭa indra̍m |

a̱bhīvṛ̍teva̱ tā ma̍hāpa̱dena̍ dhvā̱ntātpra̍pi̱tvāduda̍ranta̱ garbhā̍: ॥10.73.2॥

द्रु॒हो निष॑त्ता पृश॒नी चि॒देवै॑: पु॒रू शंसे॑न वावृधु॒ष्ट इन्द्र॑म् ।

अ॒भीवृ॑तेव॒ ता म॑हाप॒देन॑ ध्वा॒न्तात्प्र॑पि॒त्वादुद॑रन्त॒ गर्भा॑:

yathā̍ ha̱ tyad va̍savo gau̱rya̍ṃ cit pa̱di ṣi̱tāmamu̍ñcatā yajatrāḥ |

e̱vo ṣva1smanmu̍ñcatā̱ vyaṃha̱: pra tā̍ryagne prata̱raṃ na̱ āyu̍: ॥4.12.6॥

यथा॑ ह॒ त्यद् व॑सवो गौ॒र्यं॑ चित् प॒दि षि॒ताममु॑ञ्चता यजत्राः ।

ए॒वो ष्व१स्मन्मु॑ञ्चता॒ व्यंह॒: प्र ता॑र्यग्ने प्रत॒रं न॒ आयु॑:

ava̍ te̱ hel̤o̍ varuṇa̱ namo̍bhi̱rava̍ ya̱jñebhi̍rīmahe ha̱virbhi̍: |

kṣaya̍nna̱smabhya̍masura pracetā̱ rāja̱nnenā̍ṃsi śiśrathaḥ kṛ̱tāni̍ ॥1.24.14॥

अव॑ ते॒ हेळो॑ वरुण॒ नमो॑भि॒रव॑ य॒ज्ञेभि॑रीमहे ह॒विर्भि॑: ।

क्षय॑न्न॒स्मभ्य॑मसुर प्रचेता॒ राज॒न्नेनां॑सि शिश्रथः कृ॒तानि॑

udu̍tta̱maṃ va̍ruṇa̱ pāśa̍ma̱smadavā̍dha̱maṃ vi ma̍dhya̱maṃ śra̍thāya |

athā̍ va̱yamā̍ditya vra̱te tavānā̍gaso̱ adi̍taye syāma ॥1.24.15॥

उदु॑त्त॒मं व॑रुण॒ पाश॑म॒स्मदवा॑ध॒मं वि म॑ध्य॒मं श्र॑थाय ।

अथा॑ व॒यमा॑दित्य व्र॒ते तवाना॑गसो॒ अदि॑तये स्याम

u̱ta no'hi̍rbu̱dhnya̍: śṛṇotva̱ja eka̍pātpṛthi̱vī sa̍mu̱draḥ |

viśve̍ de̱vā ṛ̍tā̱vṛdho̍ huvā̱nāḥ stu̱tā mantrā̍: kaviśa̱stā a̍vantu ॥6.50.14॥

उ॒त नोऽहि॑र्बु॒ध्न्य॑: शृणोत्व॒ज एक॑पात्पृथि॒वी स॑मु॒द्रः ।

विश्वे॑ दे॒वा ऋ॑ता॒वृधो॑ हुवा॒नाः स्तु॒ता मन्त्रा॑: कविश॒स्ता अ॑वन्तु

e̱vā napā̍to̱ mama̱ tasya̍ dhī̱bhirbha̱radvā̍jā a̱bhya̍rcantya̱rkaiḥ |

gnā hu̱tāso̱ vasa̱vo'dhṛ̍ṣṭā̱ viśve̍ stu̱tāso̍ bhūtā yajatrāḥ ॥6.50.15॥

ए॒वा नपा॑तो॒ मम॒ तस्य॑ धी॒भिर्भ॒रद्वा॑जा अ॒भ्य॑र्चन्त्य॒र्कैः ।

ग्ना हु॒तासो॒ वस॒वोऽधृ॑ष्टा॒ विश्वे॑ स्तु॒तासो॑ भूता यजत्राः

sa̱jūrde̱vebhi̍ra̱pāṃ napā̍ta̱ṃ sakhā̍yaṃ kṛdhvaṃ śi̱vo no̍ astu ॥7.34.15॥

स॒जूर्दे॒वेभि॑र॒पां नपा॑तं॒ सखा॑यं कृध्वं शि॒वो नो॑ अस्तु

a̱bjāmu̱kthairahi̍ṃ gṛṇīṣe bu̱dhne na̱dīnā̱ṃ raja̍: su̱ ṣīda̍n ॥7.34.16॥

अ॒ब्जामु॒क्थैरहिं॑ गृणीषे बु॒ध्ने न॒दीनां॒ रज॑: सु॒ षीद॑न्

mā no'hi̍rbu̱dhnyo̍ ri̱ṣe dhā̱nmā ya̱jño a̍sya sridhadṛtā̱yoḥ ॥7.34.17॥

मा नोऽहि॑र्बु॒ध्न्यो॑ रि॒षे धा॒न्मा य॒ज्ञो अ॑स्य स्रिधदृता॒योः

yāste̍ pūṣa̱nnāvo̍ a̱ntaḥ sa̍mu̱dre hi̍ra̱ṇyayī̍ra̱ntari̍kṣe̱ cara̍nti |

tābhi̍ryāsi dū̱tyāṃ sūrya̍sya̱ kāme̍na kṛta̱ śrava̍ i̱cchamā̍naḥ ॥6.58.3॥

यास्ते॑ पूष॒न्नावो॑ अ॒न्तः स॑मु॒द्रे हि॑र॒ण्ययी॑र॒न्तरि॑क्षे॒ चर॑न्ति ।

ताभि॑र्यासि दू॒त्यां सूर्य॑स्य॒ कामे॑न कृत॒ श्रव॑ इ॒च्छमा॑नः

pū̱ṣā su̱bandhu̍rdi̱va ā pṛ̍thi̱vyā i̱l̤aspati̍rma̱ghavā̍ da̱smava̍rcāḥ |

yaṃ de̱vāso̱ ada̍duḥ sū̱ryāyai̱ kāme̍na kṛ̱taṃ ta̱vasa̱ṃ svañca̍m ॥6.58.4॥

पू॒षा सु॒बन्धु॑र्दि॒व आ पृ॑थि॒व्या इ॒ळस्पति॑र्म॒घवा॑ द॒स्मव॑र्चाः ।

यं दे॒वासो॒ अद॑दुः सू॒र्यायै॒ कामे॑न कृ॒तं त॒वसं॒ स्वञ्च॑म्