5 ṛṣabho vairājaḥ, ṛṣabhaḥ śākvaro vā| sapatnghnam| anuṣṭup , 5 mahāpaṃktiḥ|
ṛ̱ṣa̱bhaṃ mā̍ samā̱nānā̍ṃ sa̱patnā̍nāṃ viṣāsa̱him | ha̱ntāra̱ṃ śatrū̍ṇāṃ kṛdhi vi̱rāja̱ṃ gopa̍ti̱ṃ gavā̍m ॥10.166.1॥
ऋ॒ष॒भं मा॑ समा॒नानां॑ स॒पत्ना॑नां विषास॒हिम् । ह॒न्तारं॒ शत्रू॑णां कृधि वि॒राजं॒ गोप॑तिं॒ गवा॑म्
a̱hama̍smi sapatna̱hendra̍ i̱vāri̍ṣṭo̱ akṣa̍taḥ | a̱dhaḥ sa̱patnā̍ me pa̱dori̱me sarve̍ a̱bhiṣṭhi̍tāḥ ॥10.166.2॥
अ॒हम॑स्मि सपत्न॒हेन्द्र॑ इ॒वारि॑ष्टो॒ अक्ष॑तः । अ॒धः स॒पत्ना॑ मे प॒दोरि॒मे सर्वे॑ अ॒भिष्ठि॑ताः
atrai̱va vo'pi̍ nahyāmyu̱bhe ārtnī̍ iva̱ jyayā̍ | vāca̍spate̱ ni ṣe̍dhe̱mānyathā̱ madadha̍ra̱ṃ vadā̍n ॥10.166.3॥
अत्रै॒व वोऽपि॑ नह्याम्यु॒भे आर्त्नी॑ इव॒ ज्यया॑ । वाच॑स्पते॒ नि षे॑धे॒मान्यथा॒ मदध॑रं॒ वदा॑न्
a̱bhi̱bhūra̱hamāga̍maṃ vi̱śvaka̍rmeṇa̱ dhāmnā̍ | ā va̍ści̱ttamā vo̍ vra̱tamā vo̱'haṃ sami̍tiṃ dade ॥10.166.4॥
अ॒भि॒भूर॒हमाग॑मं वि॒श्वक॑र्मेण॒ धाम्ना॑ । आ व॑श्चि॒त्तमा वो॑ व्र॒तमा वो॒ऽहं समि॑तिं ददे
yo̱ga̱kṣe̱maṃ va̍ ā̱dāyā̱'haṃ bhū̍yāsamutta̱ma ā vo̍ mū̱rdhāna̍makramīm |
a̱dha̱spa̱dānma̱ udva̍data ma̱ṇḍūkā̍ ivoda̱kānma̱ṇḍūkā̍ uda̱kādi̍va ॥10.166.5॥
यो॒ग॒क्षे॒मं व॑ आ॒दाया॒ऽहं भू॑यासमुत्त॒म आ वो॑ मू॒र्धान॑मक्रमीम् ।
अ॒ध॒स्प॒दान्म॒ उद्व॑दत म॒ण्डूका॑ इवोद॒कान्म॒ण्डूका॑ उद॒कादि॑व