Study
- Anukramaṇī
- Also in this saṅgraha
- Source
9 madhucchandā vaiśvāmitraḥ| 1-3 vāyuḥ, 4-6 indra-vāyu, 7-9 mitrā-varuṇau| gāyatrī|
vāya̱vā yā̍hi darśate̱me somā̱ ara̍ṃkṛtāḥ| teṣā̍ṃ pāhi śru̱dhī hava̍m ॥1.2.1॥
वाय॒वा या॑हि दर्शते॒मे सोमा॒ अरं॑कृताः। तेषां॑ पाहि श्रु॒धी हव॑म्
vāya̍ u̱kthebhi̍rjarante̱ tvāmacchā̍ jari̱tāra̍:| su̱taso̍mā aha̱rvida̍: ॥1.2.2॥
वाय॑ उ॒क्थेभि॑र्जरन्ते॒ त्वामच्छा॑ जरि॒तार॑:। सु॒तसो॑मा अह॒र्विद॑:
vāyo̱ tava̍ prapṛñca̱tī dhenā̍ jigāti dā̱śuṣe̍| u̱rū̱cī soma̍pītaye ॥1.2.3॥
वायो॒ तव॑ प्रपृञ्च॒ती धेना॑ जिगाति दा॒शुषे॑। उ॒रू॒ची सोम॑पीतये
indra̍vāyū i̱me su̱tā upa̱ prayo̍bhi̱rā ga̍tam| inda̍vo vāmu̱śanti̱ hi ॥1.2.4॥
इन्द्र॑वायू इ॒मे सु॒ता उप॒ प्रयो॑भि॒रा ग॑तम्। इन्द॑वो वामु॒शन्ति॒ हि
vāya̱vindra̍śca cetathaḥ su̱tānā̍ṃ vājinīvasū| tāvā yā̍ta̱mupa̍ dra̱vat ॥1.2.5॥
वाय॒विन्द्र॑श्च चेतथः सु॒तानां॑ वाजिनीवसू। तावा या॑त॒मुप॑ द्र॒वत्
vāya̱vindra̍śca sunva̱ta ā yā̍ta̱mupa̍ niṣkṛ̱tam| ma̱kṣvi1tthā dhi̱yā na̍rā ॥1.2.6॥
वाय॒विन्द्र॑श्च सुन्व॒त आ या॑त॒मुप॑ निष्कृ॒तम्। म॒क्ष्वि१त्था धि॒या न॑रा
mi̱traṃ hu̍ve pū̱tada̍kṣa̱ṃ varu̍ṇaṃ ca ri̱śāda̍sam| dhiya̍ṃ ghṛ̱tācī̱ṃ sādha̍ntā ॥1.2.7॥
मि॒त्रं हु॑वे पू॒तद॑क्षं॒ वरु॑णं च रि॒शाद॑सम्। धियं॑ घृ॒ताचीं॒ साध॑न्ता
ṛ̱tena̍ mitrāvaruṇāvṛtāvṛdhāvṛtaspṛśā| kratu̍ṃ bṛ̱hanta̍māśāthe ॥1.2.8॥
ऋ॒तेन॑ मित्रावरुणावृतावृधावृतस्पृशा। क्रतुं॑ बृ॒हन्त॑माशाथे
ka̱vī no̍ mi̱trāvaru̍ṇā tuvijā̱tā u̍ru̱kṣayā̍| dakṣa̍ṃ dadhāte a̱pasa̍m ॥1.2.9॥
क॒वी नो॑ मि॒त्रावरु॑णा तुविजा॒ता उ॑रु॒क्षया॑। दक्षं॑ दधाते अ॒पस॑म्