Study
- Anukramaṇī
- Saṃhitā citations
- Also in this saṅgraha
- Source
6 dīrghatamā aucathyaḥ| viṣṇuḥ| triṣṭup|
viṣṇo̱rnu ka̍ṃ vī̱ryā̍ṇi̱ pra vo̍ca̱ṃ yaḥ pārthi̍vāni vima̱me rajā̍ṃsi |
yo aska̍bhāya̱dutta̍raṃ sa̱dhastha̍ṃ vicakramā̱ṇastre̱dhoru̍gā̱yaḥ ॥1.154.1॥
विष्णो॒र्नु कं॑ वी॒र्या॑णि॒ प्र वो॑चं॒ यः पार्थि॑वानि विम॒मे रजां॑सि ।
यो अस्क॑भाय॒दुत्त॑रं स॒धस्थं॑ विचक्रमा॒णस्त्रे॒धोरु॑गा॒यः
pra tad viṣṇu̍: stavate vī̱rye̍ṇa mṛ̱go na bhī̱maḥ ku̍ca̱ro gi̍ri̱ṣṭhāḥ |
yasyo̱ruṣu̍ tri̱ṣu vi̱krama̍ṇeṣvadhikṣi̱yanti̱ bhuva̍nāni̱ viśvā̍ ॥1.154.2॥
प्र तद् विष्णु॑: स्तवते वी॒र्ये॑ण मृ॒गो न भी॒मः कु॑च॒रो गि॑रि॒ष्ठाः ।
यस्यो॒रुषु॑ त्रि॒षु वि॒क्रम॑णेष्वधिक्षि॒यन्ति॒ भुव॑नानि॒ विश्वा॑
pra viṣṇa̍ve śū̱ṣame̍tu̱ manma̍ giri̱kṣita̍ urugā̱yāya̱ vṛṣṇe̍ |
ya i̱daṃ dī̱rghaṃ praya̍taṃ sa̱dhastha̱meko̍ vima̱me tri̱bhirit pa̱debhi̍: ॥1.154.3॥
प्र विष्ण॑वे शू॒षमे॑तु॒ मन्म॑ गिरि॒क्षित॑ उरुगा॒याय॒ वृष्णे॑ ।
य इ॒दं दी॒र्घं प्रय॑तं स॒धस्थ॒मेको॑ विम॒मे त्रि॒भिरित् प॒देभि॑:
yasya̱ trī pū̱rṇā madhu̍nā pa̱dānyakṣī̍yamāṇā sva̱dhayā̱ mada̍nti |
ya u̍ tri̱dhātu̍ pṛthi̱vīmu̱ta dyāmeko̍ dā̱dhāra̱ bhuva̍nāni̱ viśvā̍ ॥1.154.4॥
यस्य॒ त्री पू॒र्णा मधु॑ना प॒दान्यक्षी॑यमाणा स्व॒धया॒ मद॑न्ति ।
य उ॑ त्रि॒धातु॑ पृथि॒वीमु॒त द्यामेको॑ दा॒धार॒ भुव॑नानि॒ विश्वा॑
tada̍sya pri̱yama̱bhi pātho̍ aśyā̱ṃ naro̱ yatra̍ deva̱yavo̱ mada̍nti |
u̱ru̱kra̱masya̱ sa hi bandhu̍ri̱tthā viṣṇo̍: pa̱de pa̍ra̱me madhva̱ utsa̍: ॥1.154.5॥
तद॑स्य प्रि॒यम॒भि पाथो॑ अश्यां॒ नरो॒ यत्र॑ देव॒यवो॒ मद॑न्ति ।
उ॒रु॒क्र॒मस्य॒ स हि बन्धु॑रि॒त्था विष्णो॑: प॒दे प॑र॒मे मध्व॒ उत्स॑:
tā vā̱ṃ vāstū̍nyuśmasi̱ gama̍dhyai̱ yatra̱ gāvo̱ bhūri̍śṛṅgā a̱yāsa̍: |
atrāha̱ tadu̍rugā̱yasya̱ vṛṣṇa̍: para̱maṃ pa̱damava̍ bhāti̱ bhūri̍ ॥1.154.6॥
ता वां॒ वास्तू॑न्युश्मसि॒ गम॑ध्यै॒ यत्र॒ गावो॒ भूरि॑शृङ्गा अ॒यास॑: ।
अत्राह॒ तदु॑रुगा॒यस्य॒ वृष्ण॑: पर॒मं प॒दमव॑ भाति॒ भूरि॑
21 medhātithiḥ kāṇvaḥ| 1-4 aśvinau, 5-8 savitā, 9-10 agniḥ, 11 devyaḥ, 12 indrāṇī varuṇānyagnāyyaḥ, 13-14 dyāvāpṛthivyau, 15 pṛthivī, 16 viṣṇurdevā vā, 17-21 viṣṇuḥ| gāyatrī|
ato̍ de̱vā a̍vantu no̱ yato̱ viṣṇu̍rvicakra̱me | pṛ̱thi̱vyāḥ sa̱pta dhāma̍bhiḥ ॥1.22.16॥
अतो॑ दे॒वा अ॑वन्तु नो॒ यतो॒ विष्णु॑र्विचक्र॒मे । पृ॒थि॒व्याः स॒प्त धाम॑भिः
i̱daṃ viṣṇu̱rvi ca̍krame tre̱dhā ni da̍dhe pa̱dam | samū̍hlamasya pāṃsu̱re ॥1.22.17॥
इ॒दं विष्णु॒र्वि च॑क्रमे त्रे॒धा नि द॑धे प॒दम् । समू॑ह्लमस्य पांसु॒रे
trīṇi̍ pa̱dā vi ca̍krame̱ viṣṇu̍rgo̱pā adā̍bhyaḥ | ato̱ dharmā̍ṇi dhā̱raya̍n ॥1.22.18॥
त्रीणि॑ प॒दा वि च॑क्रमे॒ विष्णु॑र्गो॒पा अदा॑भ्यः । अतो॒ धर्मा॑णि धा॒रय॑न्
viṣṇo̱: karmā̍ṇi paśyata̱ yato̍ vra̱tāni̍ paspa̱śe | indra̍sya̱ yujya̱: sakhā̍ ॥1.22.19॥
विष्णो॒: कर्मा॑णि पश्यत॒ यतो॑ व्र॒तानि॑ पस्प॒शे । इन्द्र॑स्य॒ युज्य॒: सखा॑
tad viṣṇo̍: para̱maṃ pa̱daṃ sadā̍ paśyanti sū̱raya̍: | di̱vī̍va̱ cakṣu̱rāta̍tam ॥1.22.20॥
तद् विष्णो॑: पर॒मं प॒दं सदा॑ पश्यन्ति सू॒रय॑: । दि॒वी॑व॒ चक्षु॒रात॑तम्
tad viprā̍so vipa̱nyavo̍ jāgṛ̱vāṃsa̱: sami̍ndhate | viṣṇo̱ryat pa̍ra̱maṃ pa̱dam ॥1.22.21॥
तद् विप्रा॑सो विप॒न्यवो॑ जागृ॒वांस॒: समि॑न्धते । विष्णो॒र्यत् प॑र॒मं प॒दम्
7 maitrāvaruṇirvasiṣṭha:| viṣṇu:, 4-6 indrāviṣṇū | triṣṭup |
pa̱ro mātra̍yā ta̱nvā̍ vṛdhāna̱ na te̍ mahi̱tvamanva̍śnuvanti |
u̱bhe te̍ vidma̱ raja̍sī pṛthi̱vyā viṣṇo̍ deva̱ tvaṃ pa̍ra̱masya̍ vitse ॥7.99.1॥
प॒रो मात्र॑या त॒न्वा॑ वृधान॒ न ते॑ महि॒त्वमन्व॑श्नुवन्ति ।
उ॒भे ते॑ विद्म॒ रज॑सी पृथि॒व्या विष्णो॑ देव॒ त्वं प॑र॒मस्य॑ वित्से
na te̍ viṣṇo̱ jāya̍māno̱ na jā̱to deva̍ mahi̱mnaḥ para̱manta̍māpa |
uda̍stabhnā̱ nāka̍mṛ̱ṣvaṃ bṛ̱hanta̍ṃ dā̱dhartha̱ prācī̍ṃ ka̱kubha̍ṃ pṛthi̱vyāḥ ॥7.99.2॥
न ते॑ विष्णो॒ जाय॑मानो॒ न जा॒तो देव॑ महि॒म्नः पर॒मन्त॑माप ।
उद॑स्तभ्ना॒ नाक॑मृ॒ष्वं बृ॒हन्तं॑ दा॒धर्थ॒ प्राचीं॑ क॒कुभं॑ पृथि॒व्याः
irā̍vatī dhenu̱matī̱ hi bhū̱taṃ sū̍yava̱sinī̱ manu̍ṣe daśa̱syā |
vya̍stabhnā̱ roda̍sī viṣṇave̱te dā̱dhartha̍ pṛthi̱vīma̱bhito̍ ma̱yūkhai̍: ॥7.99.3॥
इरा॑वती धेनु॒मती॒ हि भू॒तं सू॑यव॒सिनी॒ मनु॑षे दश॒स्या ।
व्य॑स्तभ्ना॒ रोद॑सी विष्णवे॒ते दा॒धर्थ॑ पृथि॒वीम॒भितो॑ म॒यूखै॑:
u̱ruṃ ya̱jñāya̍ cakrathuru lo̱kaṃ ja̱naya̍ntā̱ sūrya̍mu̱ṣāsa̍ma̱gnim |
dāsa̍sya cidvṛṣaśi̱prasya̍ mā̱yā ja̱ghnathu̍rnarā pṛta̱nājye̍ṣu ॥7.99.4॥
उ॒रुं य॒ज्ञाय॑ चक्रथुरु लो॒कं ज॒नय॑न्ता॒ सूर्य॑मु॒षास॑म॒ग्निम् ।
दास॑स्य चिद्वृषशि॒प्रस्य॑ मा॒या ज॒घ्नथु॑र्नरा पृत॒नाज्ये॑षु
indrā̍viṣṇū dṛṃhi̱tāḥ śamba̍rasya̱ nava̱ puro̍ nava̱tiṃ ca̍ śnathiṣṭam |
śa̱taṃ va̱rcina̍: sa̱hasra̍ṃ ca sā̱kaṃ ha̱tho a̍pra̱tyasu̍rasya vī̱rān ॥7.99.5॥
इन्द्रा॑विष्णू दृंहि॒ताः शम्ब॑रस्य॒ नव॒ पुरो॑ नव॒तिं च॑ श्नथिष्टम् ।
श॒तं व॒र्चिन॑: स॒हस्रं॑ च सा॒कं ह॒थो अ॑प्र॒त्यसु॑रस्य वी॒रान्
i̱yaṃ ma̍nī̱ṣā bṛ̍ha̱tī bṛ̱hanto̍rukra̱mā ta̱vasā̍ va̱rdhaya̍ntī |
ra̱re vā̱ṃ stoma̍ṃ vi̱dathe̍ṣu viṣṇo̱ pinva̍ta̱miṣo̍ vṛ̱jane̍ṣvindra ॥7.99.6॥
इ॒यं म॑नी॒षा बृ॑ह॒ती बृ॒हन्तो॑रुक्र॒मा त॒वसा॑ व॒र्धय॑न्ती ।
र॒रे वां॒ स्तोमं॑ वि॒दथे॑षु विष्णो॒ पिन्व॑त॒मिषो॑ वृ॒जने॑ष्विन्द्र
vaṣa̍ṭ te viṣṇavā̱sa ā kṛ̍ṇomi̱ tanme̍ juṣasva śipiviṣṭa ha̱vyam |
vardha̍ntu tvā suṣṭu̱tayo̱ giro̍ me yū̱yaṃ pā̍ta sva̱stibhi̱: sadā̍ naḥ ॥7.99.7॥
वष॑ट् ते विष्णवा॒स आ कृ॑णोमि॒ तन्मे॑ जुषस्व शिपिविष्ट ह॒व्यम् ।
वर्ध॑न्तु त्वा सुष्टु॒तयो॒ गिरो॑ मे यू॒यं पा॑त स्व॒स्तिभि॒: सदा॑ नः
7 maitrāvaruṇirvasiṣṭha:| viṣṇu:| triṣṭup |
nū marto̍ dayate sani̱ṣyanyo viṣṇa̍va urugā̱yāya̱ dāśa̍t |
pra yaḥ sa̱trācā̱ mana̍sā̱ yajā̍ta e̱tāva̍nta̱ṃ narya̍mā̱vivā̍sāt ॥7.100.1॥
नू मर्तो॑ दयते सनि॒ष्यन्यो विष्ण॑व उरुगा॒याय॒ दाश॑त् ।
प्र यः स॒त्राचा॒ मन॑सा॒ यजा॑त ए॒ताव॑न्तं॒ नर्य॑मा॒विवा॑सात्
tvaṃ vi̍ṣṇo suma̱tiṃ vi̱śvaja̍nyā̱mapra̍yutāmevayāvo ma̱tiṃ dā̍: |
parco̱ yathā̍ naḥ suvi̱tasya̱ bhūre̱raśvā̍vataḥ puruśca̱ndrasya̍ rā̱yaḥ ॥7.100.2॥
त्वं वि॑ष्णो सुम॒तिं वि॒श्वज॑न्या॒मप्र॑युतामेवयावो म॒तिं दा॑: ।
पर्चो॒ यथा॑ नः सुवि॒तस्य॒ भूरे॒रश्वा॑वतः पुरुश्च॒न्द्रस्य॑ रा॒यः
trirde̱vaḥ pṛ̍thi̱vīme̱ṣa e̱tāṃ vi ca̍krame śa̱tarca̍saṃ mahi̱tvā |
pra viṣṇu̍rastu ta̱vasa̱stavī̍yāntve̱ṣaṃ hya̍sya̱ sthavi̍rasya̱ nāma̍ ॥7.100.3॥
त्रिर्दे॒वः पृ॑थि॒वीमे॒ष ए॒तां वि च॑क्रमे श॒तर्च॑सं महि॒त्वा ।
प्र विष्णु॑रस्तु त॒वस॒स्तवी॑यान्त्वे॒षं ह्य॑स्य॒ स्थवि॑रस्य॒ नाम॑
vi ca̍krame pṛthi̱vīme̱ṣa e̱tāṃ kṣetrā̍ya̱ viṣṇu̱rmanu̍ṣe daśa̱syan |
dhru̱vāso̍ asya kī̱rayo̱ janā̍sa urukṣi̱tiṃ su̱jani̍mā cakāra ॥7.100.4॥
वि च॑क्रमे पृथि॒वीमे॒ष ए॒तां क्षेत्रा॑य॒ विष्णु॒र्मनु॑षे दश॒स्यन् ।
ध्रु॒वासो॑ अस्य की॒रयो॒ जना॑स उरुक्षि॒तिं सु॒जनि॑मा चकार
pra tatte̍ a̱dya śi̍piviṣṭa̱ nāmā̱'ryaḥ śa̍ṃsāmi va̱yunā̍ni vi̱dvān |
taṃ tvā̍ gṛṇāmi ta̱vasa̱mata̍vyā̱nkṣaya̍ntama̱sya raja̍saḥ parā̱ke ॥7.100.5॥
प्र तत्ते॑ अ॒द्य शि॑पिविष्ट॒ नामा॒ऽर्यः शं॑सामि व॒युना॑नि वि॒द्वान् ।
तं त्वा॑ गृणामि त॒वस॒मत॑व्या॒न्क्षय॑न्तम॒स्य रज॑सः परा॒के
kimitte̍ viṣṇo pari̱cakṣya̍ṃ bhū̱tpra yadva̍va̱kṣe śi̍pivi̱ṣṭo a̍smi |
mā varpo̍ a̱smadapa̍ gūha e̱tadyada̱nyarū̍paḥ sami̱the ba̱bhūtha̍ ॥7.100.6॥
किमित्ते॑ विष्णो परि॒चक्ष्यं॑ भू॒त्प्र यद्व॑व॒क्षे शि॑पिवि॒ष्टो अ॑स्मि ।
मा वर्पो॑ अ॒स्मदप॑ गूह ए॒तद्यद॒न्यरू॑पः समि॒थे ब॒भूथ॑
vaṣa̍ṭ te viṣṇavā̱sa ā kṛ̍ṇomi̱ tanme̍ juṣasva śipiviṣṭa ha̱vyam |
vardha̍ntu tvā suṣṭu̱tayo̱ giro̍ me yū̱yaṃ pā̍ta sva̱stibhi̱: sadā̍ naḥ ॥7.100.7॥
वष॑ट् ते विष्णवा॒स आ कृ॑णोमि॒ तन्मे॑ जुषस्व शिपिविष्ट ह॒व्यम् ।
वर्ध॑न्तु त्वा सुष्टु॒तयो॒ गिरो॑ मे यू॒यं पा॑त स्व॒स्तिभि॒: सदा॑ नः