6 vivṛhā kāśyapaḥ| yakṣmanāśanam| anuṣṭup|
a̱kṣībhyā̍ṃ te̱ nāsi̍kābhyā̱ṃ karṇā̍bhyā̱ṃ chubu̍kā̱dadhi̍ | yakṣma̍ṃ śīrṣa̱ṇya̍ṃ ma̱stiṣkā̍jji̱hvāyā̱ vi vṛ̍hāmi te ॥10.163.1॥
अ॒क्षीभ्यां॑ ते॒ नासि॑काभ्यां॒ कर्णा॑भ्यां॒ छुबु॑का॒दधि॑ । यक्ष्मं॑ शीर्ष॒ण्यं॑ म॒स्तिष्का॑ज्जि॒ह्वाया॒ वि वृ॑हामि ते
grī̱vābhya̍sta u̱ṣṇihā̍bhya̱: kīka̍sābhyo anū̱kyā̍t | yakṣma̍ṃ doṣa̱ṇya1maṃsā̍bhyāṃ bā̱hubhyā̱ṃ vi vṛ̍hāmi te ॥10.163.2॥
ग्री॒वाभ्य॑स्त उ॒ष्णिहा॑भ्य॒: कीक॑साभ्यो अनू॒क्या॑त् । यक्ष्मं॑ दोष॒ण्य१मंसा॑भ्यां बा॒हुभ्यां॒ वि वृ॑हामि ते
ā̱ntrebhya̍ste̱ gudā̍bhyo vani̱ṣṭhorhṛda̍yā̱dadhi̍ | yakṣma̱ṃ mata̍snābhyāṃ ya̱knaḥ plā̱śibhyo̱ vi vṛ̍hāmi te ॥10.163.3॥
आ॒न्त्रेभ्य॑स्ते॒ गुदा॑भ्यो वनि॒ष्ठोर्हृद॑या॒दधि॑ । यक्ष्मं॒ मत॑स्नाभ्यां य॒क्नः प्ला॒शिभ्यो॒ वि वृ॑हामि ते
ū̱rubhyā̍ṃ te aṣṭhī̱vadbhyā̱ṃ pārṣṇi̍bhyā̱ṃ prapa̍dābhyām | yakṣma̱ṃ śroṇi̍bhyā̱ṃ bhāsa̍dā̱dbhaṃsa̍so̱ vi vṛ̍hāmi te ॥10.163.4॥
ऊ॒रुभ्यां॑ ते अष्ठी॒वद्भ्यां॒ पार्ष्णि॑भ्यां॒ प्रप॑दाभ्याम् । यक्ष्मं॒ श्रोणि॑भ्यां॒ भास॑दा॒द्भंस॑सो॒ वि वृ॑हामि ते
meha̍nādvana̱ṃkara̍ṇā̱lloma̍bhyaste na̱khebhya̍: | yakṣma̱ṃ sarva̍smādā̱tmana̱stami̱daṃ vi vṛ̍hāmi te ॥10.163.5॥
मेह॑नाद्वनं॒कर॑णा॒ल्लोम॑भ्यस्ते न॒खेभ्य॑: । यक्ष्मं॒ सर्व॑स्मादा॒त्मन॒स्तमि॒दं वि वृ॑हामि ते
aṅgā̍daṅgā̱llomno̍lomno jā̱taṃ parva̍ṇiparvaṇi | yakṣma̱ṃ sarva̍smādā̱tmana̱stami̱daṃ vi vṛ̍hāmi te ॥10.163.6॥
अङ्गा॑दङ्गा॒ल्लोम्नो॑लोम्नो जा॒तं पर्व॑णिपर्वणि । यक्ष्मं॒ सर्व॑स्मादा॒त्मन॒स्तमि॒दं वि वृ॑हामि ते