6 dīrghatamā aucathyaḥ| aśvinau|triṣṭup, 6 anuṣṭup|
vasū̍ ru̱drā pu̍ru̱mantū̍ vṛ̱dhantā̍ daśa̱syata̍ṃ no vṛṣaṇāva̱bhiṣṭau̍ |
dasrā̍ ha̱ yad rekṇa̍ auca̱thyo vā̱ṃ pra yat sa̱srāthe̱ aka̍vābhirū̱tī ॥1.158.1॥
वसू॑ रु॒द्रा पु॑रु॒मन्तू॑ वृ॒धन्ता॑ दश॒स्यतं॑ नो वृषणाव॒भिष्टौ॑ ।
दस्रा॑ ह॒ यद् रेक्ण॑ औच॒थ्यो वां॒ प्र यत् स॒स्राथे॒ अक॑वाभिरू॒ती
ko vā̍ṃ dāśat suma̱taye̍ cida̱syai vasū̱ yad dhethe̱ nama̍sā pa̱de goḥ |
ji̱gṛ̱tama̱sme re̱vatī̱: pura̍ṃdhīḥ kāma̱preṇe̍va̱ mana̍sā̱ cara̍ntā ॥1.158.2॥
को वां॑ दाशत् सुम॒तये॑ चिद॒स्यै वसू॒ यद् धेथे॒ नम॑सा प॒दे गोः ।
जि॒गृ॒तम॒स्मे रे॒वती॒: पुरं॑धीः काम॒प्रेणे॑व॒ मन॑सा॒ चर॑न्ता
yu̱kto ha̱ yad vā̍ṃ tau̱gryāya̍ pe̱rurvi madhye̱ arṇa̍so̱ dhāyi̍ pa̱jraḥ |
upa̍ vā̱mava̍: śara̱ṇaṃ ga̍meya̱ṃ śūro̱ nājma̍ pa̱taya̍dbhi̱revai̍: ॥1.158.3॥
यु॒क्तो ह॒ यद् वां॑ तौ॒ग्र्याय॑ पे॒रुर्वि मध्ये॒ अर्ण॑सो॒ धायि॑ प॒ज्रः ।
उप॑ वा॒मव॑: शर॒णं ग॑मेयं॒ शूरो॒ नाज्म॑ प॒तय॑द्भि॒रेवै॑:
upa̍stutirauca̱thyamu̍ruṣye̱nmā māmi̱me pa̍ta̱triṇī̱ vi du̍gdhām |
mā māmedho̱ daśa̍tayaści̱to dhā̱k pra yad vā̍ṃ ba̱ddhastmani̱ khāda̍ti̱ kṣām ॥1.158.4॥
उप॑स्तुतिरौच॒थ्यमु॑रुष्ये॒न्मा मामि॒मे प॑त॒त्रिणी॒ वि दु॑ग्धाम् ।
मा मामेधो॒ दश॑तयश्चि॒तो धा॒क् प्र यद् वां॑ ब॒द्धस्त्मनि॒ खाद॑ति॒ क्षाम्
na mā̍ garan na̱dyo̍ mā̱tṛta̍mā dā̱sā yadī̱ṃ susa̍mubdhama̱vādhu̍: |
śiro̱ yada̍sya traita̱no vi̱takṣa̍t sva̱yaṃ dā̱sa uro̱ aṃsā̱vapi̍ gdha ॥1.158.5॥
न मा॑ गरन् न॒द्यो॑ मा॒तृत॑मा दा॒सा यदीं॒ सुस॑मुब्धम॒वाधु॑: ।
शिरो॒ यद॑स्य त्रैत॒नो वि॒तक्ष॑त् स्व॒यं दा॒स उरो॒ अंसा॒वपि॑ ग्ध
dī̱rghata̍mā māmate̱yo ju̍ju̱rvān da̍śa̱me yu̱ge |
a̱pāmartha̍ṃ ya̱tīnā̍ṃ bra̱hmā bha̍vati̱ sāra̍thiḥ ॥1.158.6॥
दी॒र्घत॑मा मामते॒यो जु॑जु॒र्वान् द॑श॒मे यु॒गे ।
अ॒पामर्थं॑ य॒तीनां॑ ब्र॒ह्मा भ॑वति॒ सार॑थिः