Dvitīyāṣṭakam

Anuvāka 1

aṅgi̍raso̱ vai sa̱tramā̍sata.
teṣā̱ṃ pṛśñi̍rgharma̱dhugā̍sīt.
sarjī̱ṣeṇā̍jīvat.
te̎'bruvan.
kasmai̱ nu sa̱tramā̎smahe.
ye̎'syā oṣa̍dhī̱rna ja̱nayā̍ma̱ iti̍.
te di̱vo vṛṣṭi̍masṛjanta.
yāva̍ntaḥ sto̱kā a̱vāpa̍dyanta.
tāva̍tī̱roṣa̍dhayo'jāyanta.
tā jā̱tāḥ pi̱taro̍ vi̱ṣeṇā̍limpan..1..

tāsā̎ṃ ja̱gdhvā rupya̱ntyait.
te̎'bruvan.
ka i̱dami̱tthama̍ka̱riti̍.
va̱yaṃ bhā̍ga̱dheya̍mi̱cchamā̍nā̱ iti̍ pi̱taro̎'bruvan.
kiṃ vo̍ bhāga̱dheya̱miti̍.
a̱gni̱ho̱tra e̱va no'pya̱stvitya̍bruvan.
tebhya̍ e̱tadbhā̍ga̱dheya̱ṃ prāya̍cchan.
yaddhu̱tvā ni̱mārṣṭi̍.
tato̱ vai ta oṣa̍dhīrasvadayan.
ya e̱vaṃ veda̍..2..

svada̍nte'smā̱ oṣa̍dhayaḥ.
te va̱thsamu̱pāvā̍sṛjan.
i̱daṃ no̍ ha̱vyaṃ pradā̍pa̱yeti̍.
so̎'bravī̱dvara̍ṃ vṛṇai.
daśa̍ mā̱ rātrī̎rjā̱taṃ na do̍han.
ā̱sa̱ṅga̱vaṃ mā̱trā sa̱ha ca̍rā̱ṇīti̍.
tasmā̎dva̱thsaṃ jā̱taṃ daśa̱ rātrī̱rna du̍hanti.
ā̱sa̱ṅga̱vaṃ mā̱trā sa̱ha ca̍rati.
vāre̍vṛta̱ṃ hya̍sya.
tasmā̎dva̱thsaṃ sa̍ṃsṛṣṭadha̱yaṃ ru̱dro ghātu̍kaḥ.
ati̱ hi sa̱ndhāndhaya̍ti..3..

Anuvāka 2

pra̱jāpa̍tira̱gnima̍sṛjata.
taṃ pra̱jā anva̍sṛjyanta.
tama̍bhā̱ga upā̎sta.
so̎'sya pra̱jābhi̱rapā̎krāmat.
tama̍va̱ruru̍thsamā̱no'nvai̎t.
tama̍va̱rudha̱ṃ nāśa̍knot.
sa tapo̍'tapyata.
so̎'gnirupā̍rama̱tātā̍pi̱ vai sya pra̱jāpa̍ti̱riti̍.
sa ra̱rāṭā̱duda̍mṛṣṭa..4..

tadghṛ̱tama̍bhavat.
tasmā̱dyasya̍ dakṣiṇa̱taḥ keśā̱ unmṛ̍ṣṭāḥ.
tāñjye̎ṣṭhala̱kṣmī prā̍jāpa̱tyetyā̍huḥ.
yadra̱rāṭā̍du̱damṛ̍ṣṭa.
tasmā̎dra̱rāṭe̱ keśā̱ na sa̍nti.
tada̱gnau prāgṛ̍hṇāt.
tadvya̍cikithsat.
ju̱havā̱nī(3) mā hau̱ṣā(3)miti̍.
tadvi̍ciki̱thsāyai̱ janma̍.
ya e̱vaṃ vi̱dvān vi̍ci̱kithsa̍ti..5..

vasī̍ya e̱va ce̍tayate.
taṃ vāga̱bhya̍vadajju̱hudhīti̍.
so̎'bravīt.
kastvama̱sīti̍.
svaiva te̱ vāgitya̍bravīt.
so̍'juho̱thsvāheti̍.
tathsvā̍hākā̱rasya̱ janma̍.
ya e̱vaṃsvā̍hākā̱rasya̱ janma̱ veda̍.
ka̱roti̍ svāhākā̱reṇa̍ vī̱ryam̎.
yasyai̱vaṃ vi̱duṣa̍ḥ svāhākā̱reṇa̱ juhva̍ti..6..

bhogā̍yai̱vāsya̍ hu̱taṃ bha̍vati.
tasyā̱ āhu̍tyai̱ puru̍ṣamasṛjata.
dvi̱tīya̍majuhot.
so'śva̍masṛjata.
tṛ̱tīya̍majuhot.
sa gāma̍sṛjata.
ca̱tu̱rthama̍juhot.
so'vi̍masṛjata.
pa̱ñca̱mama̍juhot.
so̍'jāma̍sṛjata..7..

so̎'gnira̍bibhet.
āhu̍tībhi̱rvai mā̎''pno̱tīti̍.
sa pra̱jāpa̍ti̱ṃ puna̱ḥ prāvi̍śat.
taṃ pra̱jāpa̍tirabravīt.
jāya̱sveti̍.
so̎'bravīt.
kiṃ bhā̍ga̱dheya̍ma̱bhi ja̍niṣya̱ iti̍.
tubhya̍me̱vedaṃ hū̍yātā̱ itya̍bravīt.
sa e̱tadbhā̍ga̱dheya̍ma̱bhya̍jāyata.
yada̍gniho̱tram..8..

tasmā̍dagniho̱tramu̍cyate.
taddhū̱yamā̍namādi̱tyo̎'bravīt.
mā hau̍ṣīḥ.
u̱bhayo̱rvai nā̍ve̱taditi̍.
so̎'gnira̍bravīt.
ka̱thaṃ nau̍ hoṣya̱ntīti̍.
sā̱yame̱va tubhya̍ṃ ju̱havan̍.
prā̱tarmahya̱mitya̍bravīt.
tasmā̍da̱gnaye̍ sā̱yaṃ hū̍yate.
sūryā̍ya prā̱taḥ..9..

ā̱gne̱yī vai rātri̍ḥ.
ai̱ndramaha̍ḥ.
yadanu̍dite̱ sūrye̎ prā̱tarju̍hu̱yāt.
u̱bhaya̍me̱vāgne̱yaṃ syā̎t.
udi̍te̱ sūrye̎ prā̱tarju̍hoti.
tathā̱'gnaye̍ sā̱yaṃ hū̍yate.
sūryā̍ya prā̱taḥ.
rātri̱ṃ vā anu̍ pra̱jāḥ pra jā̍yante.
ahnā̱ prati̍ tiṣṭhanti.
yathsā̱yaṃ ju̱hoti̍..10..

praiva tena̍ jāyate.
udi̍te̱ sūrye̎ prā̱tarju̍hoti.
pratye̱va tena̍ tiṣṭhati.
pra̱jāpa̍tirakāmayata̱ prajā̍ye̱yeti̍.
sa e̱tada̍gniho̱traṃ mi̍thu̱nama̍paśyat.
tadudi̍te̱ sūrye̍'juhot.
yaju̍ṣā̱'nyat.
tū̱ṣṇīma̱nyat.
tato̱ vai sa prājā̍yata.
yasyai̱vaṃ vi̱duṣa̱ udi̍te̱ sūrye̎'gniho̱traṃ juhva̍ti..11..

praiva jā̍yate.
atho̱ yathā̱ divā̎ prajā̱nanneti̍.
tā̱dṛge̱va tat.
atho̱ khalvā̍huḥ.
yasya̱ vai dvau puṇyau̍ gṛ̱he vasa̍taḥ.
yastayo̍ra̱nyaṃ rā̱dhaya̍tya̱nyaṃ na.
u̱bhau vāva sa tāvṛ̍ccha̱tīti̍.
a̱gniṃ vāvā''di̱tyaḥ sā̱yaṃ pra vi̍śati.
tasmā̍da̱gnirdū̱rānnakta̍ṃ dadṛśe.
u̱bhe hi teja̍sī sa̱mpadye̍te..12..

u̱dyanta̱ṃ vāvā''di̱tyama̱gniranu̍ sa̱māro̍hati.
tasmā̎ddhū̱ma e̱vāgnerdivā̍ dadṛśe.
yada̱gnaye̍ sā̱yaṃ ju̍hu̱yāt.
ā sūryā̍ya vṛścyeta.
yathsūryā̍ya prā̱tarju̍hu̱yāt.
ā'gnaye̍ vṛścyeta.
de̱vatā̎bhyaḥ sa̱mada̍ṃ dadhyāt.
a̱gnirjyoti̱rjyoti̱ḥ sūrya̱ḥ svāhetye̱va sā̱yaṃ ho̍ta̱vyam̎.
sūryo̱ jyoti̱rjyoti̍ra̱gniḥ svāheti̍ prā̱taḥ.
tatho̱bhābhyā̍ṃ sā̱yaṃ hū̍yate..13..

u̱bhābhyā̎ṃ prā̱taḥ.
na de̱vatā̎bhyaḥ sa̱mada̍ṃ dadhāti.
a̱gnirjyoti̱rityā̍ha.
a̱gnirvai re̍to̱dhāḥ.
pra̱jā jyoti̱rityā̍ha.
pra̱jā e̱vāsmai̱ pra ja̍nayati.
sūryo̱ jyoti̱rityā̍ha.
pra̱jāsve̱va prajā̍tāsu̱ reto̍ dadhāti.
jyoti̍ra̱gniḥ svāhetyā̍ha.
pra̱jā e̱va prajā̍tā a̱syāṃ prati̍ṣṭhāpayati..14..

tū̱ṣṇīmutta̍rā̱māhu̍tiṃ juhoti.
mi̱thu̱na̱tvāya̱ prajā̎tyai.
yadudi̍te̱ sūrye̎ prā̱tarju̍hu̱yāt.
yathā'ti̍thaye̱ pradru̍tāya śū̱nyāyā̍vasa̱thāyā̍hā̱rya̍ṃ hara̍nti.
tā̱dṛge̱va tat.
kvā''ha̱ tata̱stadbhava̱tītyā̍huḥ.
yathsa na veda̍.
yasmai̱ taddhara̱ntīti̍.
tasmā̱dyadau̍ṣa̱saṃ ju̱hoti̍.
tade̱va sa̍mpra̱ti.
atho̱ yathā̱ prārtha̍mauṣa̱saṃ pa̍ri̱veve̎ṣṭi.
tā̱dṛge̱va tat..15..

Anuvāka 3

ru̱dro vā e̱ṣaḥ.
yada̱gniḥ.
patnī̎ sthā̱lī.
yanmadhye̱'gnera̍dhi̱śraye̎t.
ru̱drāya̱ patnī̱mapi̍ dadhyāt.
pra̱māyu̍kā syāt.
udī̱co'ṅgā̍rānni̱rūhyādhi̍ śrayati.
patni̍yai gopī̱thāya̍.
vya̍ntānkaroti.
tathā̱ patnyapra̍māyukā bhavati..16..

gha̱rmo vā e̱ṣo'śā̎ntaḥ.
aha̍raha̱ḥ pra vṛ̍jyate.
yada̍gniho̱tram.
prati̍ṣiñcetpa̱śukā̍masya.
śā̱ntami̍va̱ hi pa̍śa̱vyam̎.
na prati̍ṣiñcedbrahmavarca̱sakā̍masya.
sami̍ddhamiva̱ hi bra̍hmavarca̱sam.
atho̱ khalu̍.
pra̱ti̱ṣicya̍me̱va.
yatpra̍tiṣi̱ñcati̍..17..

tatpa̍śa̱vyam̎.
yajju̱hoti̍.
tadbra̍hmavarca̱si.
u̱bhaya̍me̱vāka̍ḥ.
pracyu̍ta̱ṃ vā e̱tada̱smāllo̱kāt.
aga̍taṃ devalo̱kam.
yacchṛ̱taṃ ha̱virana̍bhighāritam.
a̱bhi dyo̍tayati.
a̱bhye̍vaina̍dghārayati.
atho̍ deva̱traivaina̍dgamayati..18..

parya̍gni karoti.
rakṣa̍sā̱mapa̍hatyai.
triḥ parya̍gni karoti.
tryā̍vṛ̱ddhi ya̱jñaḥ.
atho̍ medhya̱tvāya̍.
yatprā̱cīna̍mudvā̱saye̎t.
yaja̍mānaṃ śu̱cā'rpa̍yet.
yadda̍kṣi̱ṇā.
pi̱tṛ̱de̱va̱tya̍ṃ syāt.
yatpra̱tyak..19..

patnī̍ṃ śu̱cā'rpa̍yet.
u̱dī̱cīna̱mudvā̍sayati.
e̱ṣā vai de̍vamanu̱ṣyāṇā̍ṃ śā̱ntā dik.
tāme̱vaina̱danūdvā̍sayati̱ śāntyai̎.
vartma̍ karoti.
ya̱jñasya̱ santa̍tyai.
niṣṭa̍pati.
upai̱va tathstṛ̍ṇāti.
ca̱turunna̍yati.
catu̍ṣpādaḥ pa̱śava̍ḥ..20..

pa̱śūne̱vāva̍ rundhe.
sarvā̎npū̱rṇānunna̍yati.
sarve̱ hi puṇyā̍ rā̱ddhāḥ.
a̱nūca̱ unna̍yati.
pra̱jāyā̍ anūcīna̱tvāya̍.
a̱nūcye̱vāsya̍ pra̱jā'rdhu̍kā bhavati.
sammṛ̍śati̱ vyāvṛ̍ttyai.
nāho̎ṣya̱nnupa̍ sādayet.
yadaho̎ṣyannupasā̱daye̎t.
yathā̱'nyasmā̍ upani̱dhāya̍..21..

a̱nyasmai̎ pra̱yaccha̍ti.
tā̱dṛge̱va tat.
ā'smai̍ vṛścyeta.
yade̱va gārha̍patye'dhi̱ śraya̍ti.
tena̱ gārha̍patyaṃ prīṇāti.
a̱gnira̍bibhet.
āhu̍tayo̱ mā'tye̎ṣya̱ntīti̍.
sa e̱tāṃ sa̱midha̍mapaśyat.
tāmā'dha̍tta.
tato̱ vā a̱gnāvāhu̍tayo'dhriyanta..22..

yade̍naṃ sa̱maya̍cchat.
tathsa̱midha̍ḥ sami̱ttvam.
sa̱midha̱mā da̍dhāti.
same̱vaina̍ṃ yacchati.
āhu̍tīnā̱ṃ dhṛtyai̎.
atho̍ agniho̱trame̱vedhmava̍tkaroti.
āhu̍tīnā̱ṃ prati̍ṣṭhityai.
bra̱hma̱vā̱dino̍ vadanti.
yadekā̍ṃ sa̱midha̍mā̱dhāya̱ dve āhu̍tī ju̱hoti̍.
atha̱ kasyā̍ṃ sa̱midhi̍ dvi̱tīyā̱māhu̍tiṃ juho̱tīti̍..23..

yaddve sa̱midhā̍vā da̱dhyāt.
bhrātṛ̍vyamasmai janayet.
ekā̍ṃ sa̱midha̍mā̱dhāya̍.
yaju̍ṣā̱'nyāmāhu̍tiṃ juhoti.
u̱bhe e̱va sa̱midva̍tī̱ āhu̍tī juhoti.
nāsmai̱ bhrātṛ̍vyaṃ janayati.
ādī̎ptāyāṃ juhoti.
sami̍ddhamiva̱ hi bra̍hmavarca̱sam.
atho̱ yathā'ti̍thi̱ṃ jyoti̍ṣkṛ̱tvā pa̍ri̱ veve̎ṣṭi.
tā̱dṛge̱va tat.
ca̱turunna̍yati.
dvirju̍hoti.
tasmā̎ddvi̱pāccatu̍ṣpādamatti.
atho̎ dvi̱padye̱va catu̍ṣpada̱ḥ prati̍ṣṭhāpayati..24..

Anuvāka 4

u̱tta̱rāva̍tī̱ṃ vai de̱vā āhu̍ti̱maju̍havuḥ.
avā̍cī̱masu̍rāḥ.
tato̍ de̱vā abha̍van.
parā'su̍rāḥ.
yaṃ kā̱maye̍ta̱ vasī̍yānthsyā̱diti̍.
kanī̍ya̱stasya̱ pūrva̍ṃ hu̱tvā.
utta̍ra̱ṃ bhūyo̍ juhuyāt.
e̱ṣā vā u̍tta̱rāva̱tyāhu̍tiḥ.
tānde̱vā a̍juhavuḥ.
tata̱ste̍'bhavan..25..

yasyai̱vaṃ juhva̍ti.
bhava̍tye̱va.
yaṃ kā̱maye̍ta̱ pāpī̍yānthsyā̱diti̍.
bhūya̱stasya̱ pūrva̍ṃ hu̱tvā.
utta̍ra̱ṃ kanī̍yo juhuyāt.
e̱ṣā vā avā̱cyāhu̍tiḥ.
tāmasu̍rā ajuhavuḥ.
tata̱ste parā̍'bhavan.
yasyai̱vaṃ juhva̍ti.
parai̱va bha̍vati..26..

hu̱tvopa̍ sādaya̱tyajā̍mitvāya.
atho̱ vyāvṛ̍ttyai.
gārha̍patya̱ṃ pratī̎kṣate.
ana̍nudhyāyiname̱vaina̍ṃ karoti.
a̱gni̱ho̱trasya̱ vai sthā̱ṇura̍sti.
taṃ ya ṛ̱cchet.
ya̱jña̱sthā̱ṇumṛ̍cchet.
e̱ṣa vā a̍gniho̱trasya̍ sthā̱ṇuḥ.
yatpūrvā''hu̍tiḥ.
tāṃ yadutta̍rayā̱'bhi ju̍hu̱yāt..27..

ya̱jña̱sthā̱ṇumṛ̍cchet.
a̱ti̱hāya̱ pūrvā̱māhu̍tiṃ juhoti.
ya̱jña̱sthā̱ṇume̱va pari̍ vṛṇakti.
atho̱ bhrātṛ̍vyame̱vāptvā'ti̍ krāmati.
a̱vā̱cīna̍ṃ sā̱yamupa̍mārṣṭi.
reta̍ e̱va tadda̍dhāti.
ū̱rdhvaṃ prā̱taḥ.
pra ja̍nayatye̱va tat.
bra̱hma̱vā̱dino̍ vadanti.
ca̱turunna̍yati..28..

dvirju̍hoti.
atha̱ kva̍ dve āhu̍tī bhavata̱ iti̍.
a̱gnau vai̎śvāna̱ra iti̍ brūyāt.
e̱ṣa vā a̱gnirvai̎śvāna̱raḥ.
yadbrā̎hma̱ṇaḥ.
hu̱tvā dviḥ prāśñā̍ti.
a̱gnāve̱va vai̎śvāna̱re dve āhu̍tī juhoti.
dvirju̱hoti̍.
dvirnimā̎rṣṭi.
dviḥ prāśñā̍ti..29..

ṣaṭthsaṃ pa̍dyante.
ṣaḍvā ṛ̱tava̍ḥ.
ṛ̱tūne̱va prī̍ṇāti.
bra̱hma̱vā̱dino̍ vadanti.
ki̱ṃ de̱va̱tya̍magniho̱tramiti̍.
vai̱śva̱de̱vamiti̍ brūyāt.
yadyaju̍ṣā ju̱hoti̍.
tadai̎ndrā̱gnam.
yattū̱ṣṇīm.
tatprā̍jāpa̱tyam..30..

yanni̱mārṣṭi̍.
tadoṣa̍dhīnām.
yaddvi̱tīyam̎.
tatpi̍tṛ̱ṇām.
yatprāśñā̍ti.
tadgarbhā̍ṇām.
tasmā̱dgarbhā̱ ana̍śñanto vardhante.
yadā̱cāma̍ti.
tanma̍nu̱ṣyā̍ṇām.
uda̍ṅparyā̱vṛtyācā̍mati..31..

ā̱tmano̍ gopī̱thāya̍.
nirṇe̍nekti̱ śuddhyai̎.
niṣṭa̍pati sva̱gākṛ̍tyai.
uddi̍śati.
sa̱pta̱ṟṣīne̱va prī̍ṇāti.
da̱kṣi̱ṇā pa̱ryāva̍rtate.
svame̱va vī̱rya̍manu̍ pa̱ryāva̍rtate.
tasmā̱ddakṣi̱ṇo'rdha̍ ā̱tmano̍ vī̱ryā̍vattaraḥ.
atho̍ ādi̱tyasyai̱vāvṛta̱manu̍ pa̱ryāva̍rtate.
hu̱tvopa̱ sami̍ndhe..32..

bra̱hma̱va̱rca̱sasya̱ sami̍ddhyai.
na ba̱ṟhiranu̱ pra ha̍ret.
asa̍ṃsthito̱ vā e̱ṣa ya̱jñaḥ.
yada̍gniho̱tram.
yada̍nu pra̱hare̎t.
ya̱jñaṃ vicchi̍ndyāt.
tasmā̱nnānu̍ pra̱hṛtyam̎.
ya̱jñasya̱ santa̍tyai.
a̱po ni na̍yati.
a̱va̱bhṛ̱thasyai̱va rū̱pama̍kaḥ..33..

Anuvāka 5

bra̱hma̱vā̱dino̍ vadanti.
a̱gni̱ho̱traprā̍yaṇā ya̱jñāḥ.
kiṃ prā̍yaṇamagniho̱tramiti̍.
va̱thso vā a̍gniho̱trasya̱ prāya̍ṇam.
a̱gni̱ho̱traṃ ya̱jñānā̎m.
tasya̍ pṛthi̱vī sada̍ḥ.
a̱ntari̍kṣa̱māgnī̎ddhram.
dyaurha̍vi̱rdhānam̎.
di̱vyā āpa̱ḥ prokṣa̍ṇayaḥ.
oṣa̍dhayo ba̱ṟhiḥ..34..

vana̱spata̍ya i̱dhmaḥ.
diśa̍ḥ pari̱dhaya̍ḥ.
ā̱di̱tyo yūpa̍ḥ.
yaja̍mānaḥ pa̱śuḥ.
sa̱mu̱dro̍'vabhṛ̱thaḥ.
sa̱ṃva̱thsa̱raḥ sva̍gākā̱raḥ.
tasmā̱dāhi̍tāgne̱ḥ sarva̍me̱va ba̍rhi̱ṣya̍ṃ da̱ttaṃ bha̍vati.
yathsā̱yaṃ ju̱hoti̍.
rātri̍me̱va tena̍ dakṣi̱ṇyā̎ṃ kurute.
yatprā̱taḥ..35..

aha̍re̱va tena̍ dakṣi̱ṇya̍ṃ kurute.
yattato̱ dadā̍ti.
sā dakṣi̍ṇā.
yāva̍nto̱ vai de̱vā ahu̍ta̱mādan̍.
te parā̍'bhavan.
ta e̱tada̍gniho̱traṃ sarva̍syai̱va sa̍mava̱dāyā̍juhavuḥ.
tasmā̍dāhuḥ.
a̱gni̱ho̱traṃ vai de̱vā gṛ̱hāṇā̱ṃ niṣkṛ̍timapaśya̱nniti̍.
yathsā̱yaṃ ju̱hoti̍.
rātri̍yā e̱va taddhu̱tādyā̍ya..36..

yaja̍māna̱syāpa̍rābhāvāya.
yatprā̱taḥ.
ahna̍ e̱va taddhu̱tādyā̍ya.
yaja̍māna̱syāpa̍rābhāvāya.
yattato̱'śñāti̍.
hu̱tame̱va tat.
dvayo̱ḥ paya̍sā juhuyātpa̱śukā̍masya.
e̱tadvā a̍gniho̱traṃ mi̍thu̱nam.
ya e̱vaṃ veda̍.
pra pra̱jayā̍ pa̱śubhi̍rmithu̱nairjā̍yate..37..

i̱māme̱va pūrva̍yā du̱he.
a̱mūmutta̍rayā.
a̱dhi̱śrityotta̍ra̱mā na̍yati.
yonā̍ve̱va tadreta̍ḥ siñcati pra̱jana̍ne.
ājye̍na juhuyā̱tteja̍skāmasya.
tejo̱ vā ājyam̎.
te̱ja̱svye̍va bha̍vati.
paya̍sā pa̱śukā̍masya.
e̱tadvai pa̍śū̱nāṃ rū̱pam.
rū̱peṇai̱vāsmai̍ pa̱śūnava̍ rundhe..38..

pa̱śu̱māne̱va bha̍vati.
da̱dhnendri̱yakā̍masya.
i̱ndri̱yaṃ vai dadhi̍.
i̱ndri̱yā̱vye̍va bha̍vati.
ya̱vā̱gvā̎ grāma̍kāmasyauṣa̱dhā vai ma̍nu̱ṣyā̎ḥ.
bhā̱ga̱dheye̍nai̱vāsmai̍ sajā̱tānava̍ rundhe.
grā̱mye̍va bha̍vati.
aya̍jño̱ vā e̱ṣaḥ.
yo̍'sā̱mā..39..

ca̱turunna̍yati.
catu̍rakṣaraṃ rathanta̱ram.
ra̱tha̱nta̱rasyai̱ṣa varṇa̍ḥ.
u̱parī̍va harati.
a̱ntari̍kṣaṃ vāmade̱vyam.
vā̱ma̱de̱vyasyai̱ṣa varṇa̍ḥ.
dvirju̍hoti.
dvya̍kṣaraṃ bṛ̱hat.
bṛ̱ha̱ta e̱ṣa varṇa̍ḥ.
a̱gni̱ho̱trame̱va tathsāma̍nvatkaroti..40..

yo vā a̍gniho̱trasyo̍pa̱sado̱ veda̍.
upai̍namupa̱sado̍ namanti.
vi̱ndata̍ upasa̱ttāram̎.
u̱nnīyopa̍ sādayati.
pṛ̱thi̱vīme̱va prī̍ṇāti.
ho̱ṣyannupa̍sādayati.
a̱ntari̍kṣame̱va prī̍ṇāti.
hu̱tvopa̍ sādayati.
diva̍me̱va prī̍ṇāti.
e̱tā vā a̍gniho̱trasyo̍pa̱sada̍ḥ..41..

ya e̱vaṃ veda̍.
upai̍namupa̱sado̍ namanti.
vi̱ndata̍ upasa̱ttāram̎.
yo vā a̍gniho̱trasyāśrā̍vitaṃ pra̱tyāśrā̍vita̱ṃ hotā̍raṃ bra̱hmāṇa̍ṃ vaṣaṭkā̱raṃ veda̍.
tasya̱ tve̍va hu̱tam.
prā̱ṇo vā a̍gniho̱trasyāśrā̍vitam.
a̱pā̱naḥ pra̱tyāśrā̍vitam.
mano̱ hotā̎.
cakṣu̍rbra̱hmā.
ni̱me̱ṣo va̍ṣaṭkā̱raḥ..42..

ya e̱vaṃ veda̍.
tasya̱ tve̍va hu̱tam.
sā̱ya̱ṃ yāvā̍naśca̱ vai de̱vāḥ prā̍ta̱ryāvā̍ṇaścāgniho̱triṇo̍ gṛ̱hamāga̍cchanti.
tān yanna ta̱rpaye̎t.
pra̱jayā̎'sya pa̱śubhi̱rvi ti̍ṣṭheran.
yatta̱rpaye̎t.
tṛ̱ptā e̍naṃ pra̱jayā̍ pa̱śubhi̍starpayeyuḥ.
sa̱jūrde̱vaiḥ sā̱yaṃ yāva̍bhi̱riti̍ sā̱yaṃ sammṛ̍śati.
sa̱jūrde̱vaiḥ prā̱taryāva̍bhi̱riti̍ prā̱taḥ.
ye cai̱va de̱vāḥ sā̍ya̱ṃ yāvā̍no̱ ye ca̍ prāta̱ryāvā̍ṇaḥ..43..

tāne̱vobhayā̍ṃstarpayati.
ta e̍naṃ tṛ̱ptāḥ pra̱jayā̍ pa̱śubhi̍starpayanti.
a̱ru̱ṇo ha̍ smā̱haupa̍veśiḥ.
a̱gni̱ho̱tra e̱vāhaṃ sā̱yaṃ prā̍ta̱rvajra̱ṃ bhrātṛ̍vyebhya̱ḥ pra ha̍rāmi.
tasmā̱nmatpāpī̍yāṃso̱ bhrātṛ̍vyā̱ iti̍.
ca̱turunna̍yati.
dvirju̍hoti.
sa̱mithsa̍pta̱mī.
sa̱ptapa̍dā̱ śakva̍rī.
śā̱kva̱ro vajra̍ḥ.
a̱gni̱ho̱tra e̱va tathsā̱yaṃ prā̍ta̱rvajra̱ṃ yaja̍māno̱ bhrātṛ̍vyāya̱ pra ha̍rati.
bhava̍tyā̱tmanā̎.
parā̎'sya̱ bhrātṛ̍vyo bhavati..44..

Anuvāka 6

pra̱jāpa̍tirakāmayatā''tma̱nvanme̍ jāye̱teti̍.
so̍'juhot.
tasyā̎''tma̱nvada̍jāyata.
a̱gnirvā̱yurā̍di̱tyaḥ.
te̎'bruvan.
pra̱jāpa̍tirahauṣīdātma̱nvanme̍ jāye̱teti̍.
tasya̍ va̱yama̍janiṣmahi.
jāya̍tānna ātma̱nvaditi̱ te̍'juhavuḥ.
prā̱ṇānā̍ma̱gniḥ.
ta̱nuvai̍ vā̱yuḥ..45..

cakṣu̍ṣa ādi̱tyaḥ.
teṣā̍ṃ hu̱tāda̍jāyata̱ gaure̱va.
tasyai̱ paya̍si̱ vyāya̍cchanta.
mama̍ hu̱tāda̍jani̱ mameti̍.
te pra̱jāpa̍tiṃ pra̱śñamā̍yan.
sa ā̍di̱tyo̎'gnima̍bravīt.
ya̱ta̱ro nau̱ jayā̎t.
tannau̍ sa̱hāsa̱diti̍.
kasyai ko'hau̍ṣī̱diti̍ pra̱jāpa̍tirabravī̱tkasyai ka̱ iti̍.
prā̱ṇānā̍ma̱hamitya̱gniḥ..46..

ta̱nuvā̍ a̱hamiti̍ vā̱yuḥ.
cakṣu̍ṣo̱'hamityā̍di̱tyaḥ.
ya e̱va prā̱ṇānā̱mahau̍ṣīt.
tasya̍ hu̱tāda̍ja̱nīti̍.
a̱gnerhu̱tāda̍ja̱nīti̍.
tada̍gniho̱trasyā̎gnihotra̱tvam.
gaurvā a̍gniho̱tram.
ya e̱vaṃ veda̱ gaura̍gniho̱tramiti̍.
prā̱ṇā̱pā̱nābhyā̍me̱vāgniṃ sama̍rdhayati.
avya̍rdhukaḥ prāṇāpā̱nābhyā̎ṃ bhavati..47..

ya e̱vaṃ veda̍.
tau vā̱yura̍bravīt.
anu̱ mā bha̍jata̱miti̍.
yade̱va gārha̍patye'dhi̱śrityā̍hava̱nīya̍ma̱bhyu̍ddravān̍.
tena̱ tvāṃ prī̍ṇā̱nitya̍brūtām.
tasmā̱dyadgārha̍patye'dhi̱śrityā̍hava̱nīya̍ma̱bhyu̍ddrava̍ti.
vā̱yume̱va tena̍ prīṇāti.
pra̱jāpa̍tirde̱vatā̎ḥ sṛ̱jamā̍naḥ.
a̱gnime̱va de̱vatā̍nāṃ pratha̱mama̍sṛjata.
so̎'nyadā̍la̱mbhya̍mavi̍tvā..48..

pra̱jāpa̍tima̱bhi pa̱ryāva̍rtata.
sa mṛ̱tyora̍bibhet.
so̍'mumā̍di̱tyamā̱tmano̱ nira̍mimīta.
taṃ hu̱tvā parā̎ṅpa̱ryāva̍rtata.
tato̱ vai sa mṛ̱tyumapā̍jayat.
apa̍ mṛ̱tyuṃ ja̍yati.
ya e̱vaṃ veda̍.
tasmā̱dyasyai̱vaṃ vi̱duṣa̍ḥ.
u̱taikā̱hamu̱ta dvya̱haṃ na juhva̍ti.
hu̱tame̱vāsya̍ bhavati.
a̱sau hyā̍di̱tyo̎'gniho̱tram..49..

Anuvāka 7

rau̱draṃ gavi̍.
vā̱ya̱vya̍mupa̍sṛṣṭam.
ā̱śvi̱naṃ du̱hyamā̍nam.
sau̱myaṃ du̱gdham.
vā̱ru̱ṇamadhi̍ śritam.
vai̱śva̱de̱vā bhi̱ndava̍ḥ.
pau̱ṣṇamuda̍ntam.
sā̱ra̱sva̱taṃ vi̱ṣyanda̍mānam.
mai̱traṃ śara̍ḥ.
dhā̱turudvā̍sitam.
bṛha̱spate̱runnī̍tam.
sa̱vi̱tuḥ pra krā̎ntam.
dyā̱vā̱pṛ̱thi̱vya̍ṃ hri̱yamā̍ṇam.
ai̱ndrā̱gnamupa̍sannam.
a̱gneḥ pūrvā''hu̍tiḥ.
pra̱jāpa̍te̱rutta̍rā.
ai̱ndraṃ hu̱tam..50..

Anuvāka 8

da̱kṣi̱ṇa̱ta upa̍ sṛjati.
pi̱tṛ̱lo̱kame̱va tena̍ jayati.
prācī̱mā va̍rtayati.
de̱va̱lo̱kame̱va tena̍ jayati.
udī̍cīmā̱vṛtya̍ dogdhi.
ma̱nu̱ṣya̱lo̱kame̱va tena̍ jayati.
pūrvau̍ duhyājjye̱ṣṭhasya̍ jyaiṣṭhine̱yasya̍.
yo vā̍ ga̱taśrī̱ḥ syāt.
apa̍rau duhyātkani̱ṣṭhasya̍ kāniṣṭhine̱yasya̍.
yo vā̱ bubhū̍ṣet..51..

na saṃ mṛ̍śati.
pā̱pa̱va̱sya̱sasya̱ vyāvṛ̍ttyai.
vā̱ya̱vya̍ṃ vā e̱tadupa̍sṛṣṭam.
ā̱śvi̱naṃ du̱hyamā̍nam.
mai̱traṃ du̱gdham.
a̱rya̱mṇa u̍dvā̱syamā̍nam.
tvā̱ṣṭramu̍nnī̱yamā̍nam.
bṛha̱spate̱runnī̍tam.
sa̱vi̱tuḥ prakrā̎ntam.
dyā̱vā̱pṛ̱thi̱vya̍ṃ hri̱yamā̍ṇam..52..

ai̱ndrā̱gnamupa̍ sāditam.
sarvā̎bhyo̱ vā e̱ṣa de̱vatā̎bhyo juhoti.
yo̎'gniho̱traṃ ju̱hoti̍.
yathā̱ khalu̱ vai dhe̱nuṃ tī̱rthe ta̱rpaya̍ti.
e̱vama̍gniho̱trī yaja̍mānaṃ tarpayati.
tṛpya̍ti pra̱jayā̍ pa̱śubhi̍ḥ.
pra su̍va̱rgaṃ lo̱kaṃ jā̍nāti.
paśya̍ti pu̱tram.
paśya̍ti̱ pautram̎.
pra pra̱jayā̍ pa̱śubhi̍rmithu̱nairjā̍yate.
yasyai̱vaṃ vi̱duṣo̎'gniho̱traṃ juhva̍ti.
ya u̍ cainade̱vaṃ veda̍..53..

Anuvāka 9

trayo̱ vai prai̍yame̱dhā ā̍san.
teṣā̱ṃ trireko̎'gniho̱trama̍juhot.
dvireka̍ḥ.
sa̱kṛdeka̍ḥ.
teṣā̱ṃ yastriraju̍hot.
sa ṛ̱cā'ju̍hot.
yo dviḥ.
sa yaju̍ṣā.
yaḥ sa̱kṛt.
sa tū̱ṣṇīm..54..

yaśca̱ yaju̱ṣā'ju̍ho̱dyaśca̍ tū̱ṣṇīm.
tāvu̱bhāvā̎rdhnutām.
tasmā̱dyaju̱ṣā''hu̍ti̱ḥ pūrvā̍ hota̱vyā̎.
tū̱ṣṇīmutta̍rā.
u̱bhe e̱vardhī ava̍ rundhe.
a̱gnirjyoti̱rjyoti̍ra̱gniḥ svāheti̍ sā̱yaṃ ju̍hoti.
reta̍ e̱va tadda̍dhāti.
sūryo̱ jyoti̱rjyoti̱ḥ sūrya̱ḥ svāheti̍ prā̱taḥ.
reta̍ e̱va hi̱taṃ pra ja̍nayati.
reto̱ vā e̱tasya̍ hi̱taṃ na pra jā̍yate..55..

yasyā̎gniho̱tramahu̍ta̱ṃ sūryo̱'bhyu̍deti̍.
yadyante̱ syāt.
u̱nnīya̱ prāṅu̱dādra̍vet.
sa u̍pa̱sādyātami̍torāsīta.
sa ya̱dā tāmye̎t.
atha̱ bhūḥ svāheti̍ juhuyāt.
pra̱jāpa̍ti̱rvai bhū̱taḥ.
tame̱vopā̍sarat.
sa e̱vaina̱ṃ tata̱ unna̍yati.
nārti̱mārccha̍ti̱ yaja̍mānaḥ..56..

Anuvāka 10

yada̱gnimu̱ddhara̍ti.
vasa̍va̱starhya̱gniḥ.
tasmi̱ṉ yasya̱ tathā̍vidhe̱ juhva̍ti.
vasu̍ṣve̱vāsyā̎gniho̱traṃ hu̱taṃ bha̍vati.
nihi̍to dhūpā̱yañche̍te.
ru̱drāstarhya̱gniḥ.
tasmi̱ṉ yasya̱ tathā̍vidhe̱ juhva̍ti.
ru̱dreṣve̱vāsyā̎gniho̱traṃ hu̱taṃ bha̍vati.
pra̱tha̱mami̱dhmama̱rcirā la̍bhate.
ā̱di̱tyāstarhya̱gniḥ..57..

tasmi̱ṉ yasya̱ tathā̍vidhe̱ juhva̍ti.
ā̱di̱tyeṣve̱vāsyā̎gniho̱traṃ hu̱taṃ bha̍vati.
sarva̍ e̱va sa̍rva̱śa i̱dhma ādī̎pto bhavati.
viśve̍ de̱vāstarhya̱gniḥ.
tasmi̱ṉ yasya̱ tathā̍vidhe̱ juhva̍ti.
viśve̎ṣve̱vāsya̍ de̱veṣva̍gniho̱traṃ hu̱taṃ bha̍vati.
ni̱ta̱rāma̱rciru̱pāvai̍ti lohi̱nīke̍va bhavati.
indra̱starhya̱gniḥ.
tasmi̱ṉ yasya̱ tathā̍vidhe̱ juhva̍ti.
indra̍ e̱vāsyā̎gniho̱traṃ hu̱taṃ bha̍vati..58..

aṅgā̍rā bhavanti.
tebhyo'ṅgā̍rebhyo̱'rcirude̍ti.
pra̱jāpa̍ti̱starhya̱gniḥ.
tasmi̱ṉ yasya̱ tathā̍vidhe̱ juhva̍ti.
pra̱jāpa̍tāve̱vāsyā̎gniho̱traṃ hu̱taṃ bha̍vati.
śaro'ṅgā̍rā̱ adhyū̍hante.
brahma̱ tarhya̱gniḥ.
tasmi̱ṉ yasya̱ tathā̍vidhe̱ juhva̍ti.
brahma̍nne̱vāsyā̎gniho̱traṃ hu̱taṃ bha̍vati.
vasu̍ṣu ru̱dreṣvā̍di̱tyeṣu̱ viśve̍ṣu de̱veṣu̍.
indre̎ pra̱jāpa̍tau̱ brahman̍.
apa̍rivargame̱vāsyai̱tāsu̍ de̱vatā̍su hu̱taṃ bha̍vati.
yasyai̱vaṃ vi̱duṣo̎'gniho̱traṃ juhva̍ti.
ya u̍ cainade̱vaṃ veda̍..59..

Anuvāka 11

ṛ̱taṃ tvā̍ sa̱tyena̱ pari̍ṣiñcā̱mīti̍ sā̱yaṃ pari̍ṣiñcati.
sa̱tyaṃ tva̱rtena̱ pari̍ṣiñcā̱mīti̍ prā̱taḥ.
a̱gnirvā ṛ̱tam.
a̱sāvā̍di̱tyaḥ sa̱tyam.
a̱gnime̱va tadā̍di̱tyena̍ sā̱yaṃ pari̍ṣiñcati.
a̱gninā̍''di̱tyaṃ prā̱taḥ saḥ.
yāva̍dahorā̱tre bhava̍taḥ.
tāva̍dasya lo̱kasya̍.
nārti̱rna riṣṭi̍ḥ.
nānto̱ na pa̍rya̱nto̎'sti.
yasyai̱vaṃ vi̱duṣo̎'gniho̱traṃ juhva̍ti.
ya u̍cainade̱vaṃ veda̍..60..

Anuvāka 1

pra̱jāpa̍tirakāmayata pra̱jāḥ sṛ̍je̱yeti̍.
sa e̱taṃ daśa̍hotāramapaśyat.
taṃ mana̍sā'nu̱drutya̍ darbhasta̱mbe̍'juhot.
tato̱ vai sa pra̱jā a̍sṛjata.
tā a̍smāthsṛ̱ṣṭā apā̎krāman.
tā grahe̍ṇāgṛhṇāt.
tadgraha̍sya graha̱tvam.
yaḥ kā̱maye̍ta̱ prajā̍ye̱yeti̍.
sa daśa̍hotāra̱ṃ mana̍sā'nu̱drutya̍ darbhasta̱mbe ju̍huyāt.
pra̱jāpa̍ti̱rvai daśa̍hotā..1..

pra̱jāpa̍tire̱va bhū̱tvā prajā̍yate.
mana̍sā juhoti.
mana̍ iva̱ hi pra̱jāpa̍tiḥ.
pra̱jāpa̍te̱rāptyai̎.
pū̱rṇayā̍ juhoti.
pū̱rṇa i̍va̱ hi pra̱jāpa̍tiḥ.
pra̱jāpa̍te̱rāptyai̎.
nyū̍nayā juhoti.
nyū̍nā̱ddhi pra̱jāpa̍tiḥ pra̱jā asṛ̍jata.
pra̱jānā̱ṃ sṛṣṭyai̎..2..

da̱rbha̱sta̱mbe ju̍hoti.
e̱tasmā̱dvai yone̎ḥ pra̱jāpa̍tiḥ pra̱jā a̍sṛjata.
yasmā̍de̱va yone̎ḥ pra̱jāpa̍tiḥ pra̱jā asṛ̍jata.
tasmā̍de̱va yone̱ḥ prajā̍yate.
brā̱hma̱ṇo da̍kṣiṇa̱ta upā̎ste.
brā̱hma̱ṇo vai pra̱jānā̍mupadra̱ṣṭā.
u̱pa̱dra̱ṣṭu̱matye̱va prajā̍yate.
graho̍ bhavati.
pra̱jānā̍ṃ sṛ̱ṣṭānā̱ṃ dhṛtyai̎.
yaṃ brā̎hma̱ṇaṃ vi̱dyāṃ vi̱dvāṃsa̱ṃ yaśo̱ narcchet..3..

so'ra̍ṇyaṃ pa̱retya̍.
da̱rbha̱sta̱mbamu̱dgrathya̍.
brā̱hma̱ṇaṃ da̍kṣiṇa̱to ni̱ṣādya̍.
catu̍rhotṝ̱nvyāca̍kṣīta.
e̱tadvai de̱vānā̎ṃ para̱maṃ guhya̱ṃ brahma̍.
yaccatu̍rhotāraḥ.
tade̱va pra̍kā̱śaṃ ga̍mayati.
tade̍naṃ prakā̱śaṃ ga̱tam.
pra̱kā̱śaṃ pra̱jānā̎ṃ gamayati.
da̱rbha̱sta̱mbamu̱dgrathya̱ vyāca̍ṣṭe..4..

a̱gni̱vān vai da̍rbhasta̱mbaḥ.
a̱gni̱vatye̱va vyāca̍ṣṭe.
brā̱hma̱ṇo da̍kṣiṇa̱ta upā̎ste.
brā̱hma̱ṇo vai pra̱jānā̍mupadra̱ṣṭā.
u̱pa̱dra̱ṣṭu̱matye̱vaina̱ṃ yaśa̍ ṛcchati.
ī̱śva̱rantaṃ yaśorto̱rityā̍huḥ.
yasyānte̎ vyā̱caṣṭa̱ iti̍.
vara̱stasmai̱ deya̍ḥ.
yade̱vaina̱ṃ tatro̍pa̱nama̍ti.
tade̱vāva̍ rundhe..5..

a̱gnimā̱dadhā̍no̱ daśa̍hotrā̱'raṇi̱mava̍ dadhyāt.
prajā̍tame̱vaina̱mā dha̍tte.
tenai̱voddrutyā̎gniho̱traṃ ju̍huyāt.
prajā̍tame̱vaina̍jjuhoti.
ha̱virni̍rva̱phsyaṃ daśa̍hotāra̱ṃ vyāca̍kṣīta.
prajā̍tame̱vaina̱ṃ nirva̍pati.
sā̱mi̱dhe̱nīra̍nuva̱kṣyaṃ daśa̍hotāra̱ṃ vyāca̍kṣīta.
sā̱mi̱dhe̱nīre̱va sṛ̱ṣṭvā''rabhya̱ prata̍nute.
atho̍ ya̱jño vai daśa̍hotā.
ya̱jñame̱va ta̍nute..6..

a̱bhi̱cara̱ṃ daśa̍hotāraṃ juhuyāt.
nava̱ vai puru̍ṣe prā̱ṇāḥ.
nābhi̍rdaśa̱mī.
saprā̍ṇame̱vaina̍ma̱bhi ca̍rati.
e̱tāva̱dvai puru̍ṣasya̱ svam.
yāva̍tprā̱ṇāḥ.
yāva̍de̱vāsyāsti̍.
tada̱bhi ca̍rati.
svakṛ̍ta̱ iri̍ṇe juhoti prada̱re vā̎.
e̱tadvā a̱syai nirṛ̍tigṛhītam.
nirṛ̍tigṛhīta e̱vaina̱ṃ nirṛ̍tyā grāhayati.
yadvā̱caḥ krū̱ram.
tena̱ vaṣa̍ṭkaroti.
vā̱ca e̱vaina̍ṃ krū̱reṇa̱ pra vṛ̍ścati.
tā̱jagārti̱mārccha̍ti..7..

Anuvāka 2

pra̱jāpa̍tirakāmayata darśapūrṇamā̱sau sṛ̍je̱yeti̍.
sa e̱taṃ catu̍rhotāramapaśyat.
taṃ mana̍sā'nu̱drutyā̍''hava̱nīye̍'juhot.
tato̱ vai sa da̍rśapūrṇamā̱sāva̍sṛjata.
tāva̍smāthsṛ̱ṣṭāvapā̎krāmatām.
tau grahe̍ṇāgṛhṇāt.
tadgraha̍sya graha̱tvam.
da̱rśa̱pū̱rṇa̱mā̱sāvā̱labha̍mānaḥ.
catu̍rhotāra̱ṃ mana̍sā'nu̱drutyā̍hava̱nīye̍ juhuyāt.
da̱rśa̱pū̱rṇa̱mā̱sāve̱va sṛ̱ṣṭvā''rabhya̱ prata̍nute..8..

graho̍ bhavati.
da̱ṟśa̱pū̱rṇa̱mā̱sayo̎ḥ sṛ̱ṣṭayo̱rdhṛtyai̎.
so̍'kāmayata cāturmā̱syāni̍ sṛje̱yeti̍.
sa e̱taṃ pañca̍hotāramapaśyat.
taṃ mana̍sā'nu̱drutyā̍''hava̱nīye̍'juhot.
tato̱ vai sa cā̍turmā̱syānya̍sṛjata.
tānya̍smāthsṛ̱ṣṭānyapā̎krāman.
tāni̱ grahe̍ṇāgṛhṇāt.
tadgraha̍sya graha̱tvam.
cā̱tu̱rmā̱syānyā̱labha̍mānaḥ..9..

pañca̍hotāra̱ṃ mana̍sā'nu̱drutyā̍''hava̱nīye̍ juhuyāt.
cā̱tu̱rmā̱syānye̱va sṛ̱ṣṭvā''rabhya̱ prata̍nute.
graho̍ bhavati.
cā̱tu̱rmā̱syānā̍ṃ sṛ̱ṣṭānā̱ṃ dhṛtyai̎.
so̍'kāmayata paśuba̱ndhaṃ sṛ̍je̱yeti̍.
sa e̱taṃ ṣaḍḍho̍tāramapaśyat.
taṃ mana̍sā'nu̱drutyā̍''hava̱nīye̍'juhot.
tato̱ vai sa pa̍śuba̱ndhama̍sṛjata.
so̎smāthsṛ̱ṣṭo'pā̎krāmat.
taṃ grahe̍ṇāgṛhṇāt..10..

tadgraha̍sya graha̱tvam.
pa̱śu̱ba̱ndhena̍ ya̱kṣyamā̍ṇaḥ.
ṣaḍḍho̍tāra̱ṃ mana̍sā'nu̱drutyā̍''hava̱nīye̍ juhuyāt.
pa̱śu̱ba̱ndhame̱va sṛ̱ṣṭvā''rabhya̱ pra ta̍nute.
graho̍ bhavati.
pa̱śu̱ba̱ndhasya̍ sṛ̱ṣṭasya̱ dhṛtyai̎.
so̍'kāmayata sau̱myama̍dhva̱raṃ sṛ̍je̱yeti̍.
sa e̱taṃ sa̱ptaho̍tāramapaśyat.
taṃ mana̍sā'nu̱drutyā̍''hava̱nīye̍'juhot.
tato̱ vai sa sau̱myama̍dhva̱rama̍sṛjata..11..

so̎'smāthsṛ̱ṣṭo'pā̎krāmat.
taṃ grahe̍ṇāgṛhṇāt.
tadgraha̍sya graha̱tvam.
dī̱kṣi̱ṣyamā̍ṇaḥ.
sa̱ptaho̍tāra̱ṃ mana̍sā'nu̱drutyā̍''hava̱nīye̍ juhuyāt.
sau̱myame̱vādhva̱raṃ sṛ̱ṣṭvā''rabhya̱ pra ta̍nute.
graho̍ bhavati.
sau̱myasyā̎dhva̱rasya̍ sṛ̱ṣṭasya̱ dhṛtyai̎.
de̱vebhyo̱ vai ya̱jño na prābha̍vat.
tame̍tāva̱cchaḥ sama̍bharan..12..

yathsa̍mbhā̱rāḥ.
tato̱ vai tebhyo̍ ya̱jñaḥ prābha̍vat.
yathsa̍mbhā̱rā bhava̍nti.
ya̱jñasya̱ prabhū̎tyai.
ā̱ti̱thyamā̱sādya̱ vyāca̍ṣṭe.
ya̱jña̱mu̱khaṃ vā ā̍ti̱thyam.
mu̱kha̱ta e̱va ya̱jñaṃ sa̱mbhṛtya̱ pra ta̍nute.
aya̍jño̱ vā e̱ṣaḥ.
yo̍'pa̱tnīka̍ḥ.
na pra̱jāḥ prajā̍yeran.
patnī̱rvyāca̍ṣṭe.
ya̱jñame̱vāka̍ḥ.
pra̱jānā̎ṃ pra̱jana̍nāya.
u̱pa̱sathsu̱ vyāca̍ṣṭe.
e̱tadvai patnī̍nāmā̱yata̍nam.
sva e̱vainā̍ ā̱yata̱ne'va̍kalpayati..13..

Anuvāka 3

pra̱jāpa̍tirakāmayata̱ prajā̍ye̱yeti̍.
sa tapo̍'tapyata.
sa tri̱vṛta̱ṃ stoma̍masṛjata.
taṃ pa̍ñcada̱śaḥ stomo̍ madhya̱ta uda̍tṛṇat.
tau pū̎rvapa̱kṣaścā̍parapa̱kṣaścā̍bhavatām.
pū̱rva̱pa̱kṣaṃ de̱vā anvasṛ̍jyanta.
a̱pa̱ra̱pa̱kṣamanvasu̍rāḥ.
tato̍ de̱vā abha̍van.
parā'su̍rāḥ.
yaṃ kā̱maye̍ta̱ vasī̍yānthsyā̱diti̍..14..

taṃ pū̎rvapa̱kṣe yā̍jayet.
vasī̍yāne̱va bha̍vati.
yaṃ kā̱maye̍ta̱ pāpī̍yānthsyā̱diti̍.
tama̍parapa̱kṣe yā̍jayet.
pāpī̍yāne̱va bha̍vati.
tasmā̎tpūrvapa̱kṣo̍'parapa̱kṣātka̍ru̱ṇya̍taraḥ.
pra̱jāpa̍ti̱rvai daśa̍hotā.
catu̍rhotā̱ pañca̍hotā.
ṣaḍḍho̍tā sa̱ptaho̍tā.
ṛ̱tava̍ḥ saṃvathsa̱raḥ..15..

pra̱jāḥ pa̱śava̍ i̱me lo̱kāḥ.
ya e̱vaṃ pra̱jāpa̍tiṃ ba̱horbhūyā̍ṃsa̱ṃ veda̍.
ba̱hore̱va bhūyā̎nbhavati.
pra̱jāpa̍tirdevāsu̱rāna̍sṛjata.
sa indra̱mapi̱ nāsṛ̍jata.
taṃ de̱vā a̍bruvan.
indra̍ṃ no jana̱yeti̍.
so̎'bravīt.
yathā̱'haṃ yu̱ṣmāṃstapa̱sā'sṛ̍kṣi.
e̱vamindra̍ṃ janayadhva̱miti̍..16..

te tapo̍'tapyanta.
ta ā̱tmannindra̍mapaśyan.
tama̍bruvan.
jāya̱sveti̍.
so̎'bravīt.
kiṃ bhā̍ga̱dheya̍ma̱bhi ja̍niṣya̱ iti̍.
ṛ̱tūnthsa̍ṃvathsa̱ram.
pra̱jāḥ pa̱śūn.
i̱mām̐llo̱kānitya̍bruvan.
taṃ vai mā''hu̍tyā̱ pra ja̍naya̱tetya̍bravīt..17..

taṃ catu̍rhotrā̱ prāja̍nayan.
yaḥ kā̱maye̍ta vī̱ro ma̱ ājā̍ye̱teti̍.
sa catu̍rhotāraṃ juhuyāt.
pra̱jāpa̍ti̱rvai catu̍rhotā.
pra̱jāpa̍tire̱va bhū̱tvā prajā̍yate.
ja̱jana̱dindra̍mindri̱yāya̱ svāheti̱ grahe̍ṇa juhoti.
ā'sya̍ vī̱ro jā̍yate.
vī̱raṃ hi de̱vā e̱tayā''hu̍tyā̱ prāja̍nayan.
ā̱di̱tyāścāṅgi̍rasaśca suva̱rge lo̱ke̎'spardhanta.
va̱yaṃ pūrve̍ suva̱rgaṃ lo̱kami̍yāma va̱yaṃ pūrva̱ iti̍..18..

ta ā̍di̱tyā e̱taṃ pañca̍hotāramapaśyan.
taṃ pu̱rā prā̍taranuvā̱kādāgnī̎dhre'juhavuḥ.
tato̱ vai te pūrve̍ suva̱rgaṃ lo̱kamā̍yan.
yaḥ su̍va̱rgakā̍ma̱ḥ syāt.
sa pañca̍hotāraṃ pu̱rā prā̍taranuvā̱kādāgnī̎dhre juhuyāt.
sa̱ṃva̱thsa̱ro vai pañca̍hotā.
sa̱ṃva̱thsa̱raḥ su̍va̱rgo lo̱kaḥ.
sa̱ṃva̱thsa̱ra e̱vartuṣu̍ prati̱ṣṭhāya̍.
su̱va̱rgaṃ lo̱kame̍ti.
te̎'bruva̱nnaṅgi̍rasa ādi̱tyān..19..

kva̍ stha.
kva̍ vaḥ sa̱dbhyo ha̱vyaṃ va̍kṣyāma̱ iti̍.
chanda̱ḥ svitya̍bruvan.
gā̱ya̱tri̱yāṃ tri̱ṣṭubhi̱ jaga̍tyā̱miti̍.
tasmā̱cchanda̍ḥ su sa̱dbhya ā̍di̱tyebhya̍ḥ.
ā̱ṅgī̱ra̱sīḥ pra̱jā ha̱vyaṃ va̍hanti.
vaha̍ntyasmai pra̱jā ba̱lim.
aina̱mapra̍tikhyātaṃ gacchati.
ya e̱vaṃ veda̍.
dvāda̍śa̱ māsā̱ḥ pañca̱rtava̍ḥ.
traya̍ i̱me lo̱kāḥ.
a̱sāvā̍di̱tya e̍kavi̱ṃśaḥ.
e̱tasmi̱nvā e̱ṣa śri̱taḥ.
e̱tasmi̱nprati̍ṣṭhitaḥ.
ya e̱vame̱taṃ śri̱taṃ prati̍ṣṭhita̱ṃ veda̍.
pratye̱va ti̍ṣṭhati..20..

Anuvāka 4

pra̱jāpa̍tirakāmayata̱ prajā̍ye̱yeti̍.
sa e̱taṃ daśa̍hotāramapaśyat.
tena̍ daśa̱dhā''tmāna̍ṃ vi̱dhāya̍.
daśa̍hotrā'tapyata.
tasya̱ citti̱ḥ srugāsī̎t.
ci̱ttamājyam̎.
tasyai̱tāva̍tye̱va vāgāsī̎t.
e̱tāvān̍ yajñakra̱tuḥ.
sa catu̍rhotāramasṛjata.
so̍'nandat..21..

asṛ̍kṣi̱ vā i̱mamiti̍.
tasya̱ somo̍ ha̱virāsī̎t.
sa catu̍rhotrā'tapyata.
so̍'tāmyat.
sa bhūriti̱ vyāha̍rat.
sa bhūmi̍masṛjata.
a̱gni̱ho̱traṃ da̍rśapūrṇamā̱sau yajū̍ṃṣi.
sa dvi̱tīya̍matapyata.
so̍'tāmyat.
sa bhuva̱ iti̱ vyāha̍rat..22..

so̎'ntari̍kṣamasṛjata.
cā̱tu̱rmā̱syāni̱ sāmā̍ni.
sa tṛ̱tīya̍matapyata.
so̍'tāmyat.
sa suva̱riti̱ vyāha̍rat.
sa diva̍masṛjata.
a̱gni̱ṣṭo̱mamu̱kthya̍matirā̱tramṛca̍ḥ.
e̱tā vai vyāhṛ̍taya i̱me lo̱kāḥ.
i̱mānkhalu̱ vai lo̱kānanu̍ pra̱jāḥ pa̱śava̱śchandā̍ṃsi̱ prājā̍yanta.
ya e̱vame̱tāḥ pra̱jāpa̍teḥ pratha̱mā vyāhṛ̍tī̱ḥ prajā̍tā̱ veda̍..23..

pra pra̱jayā̍ pa̱śubhi̍rmithu̱nairjā̍yate.
sa pañca̍hotāramasṛjata.
sa ha̱virnāvi̍ndata.
tasmai̱ soma̍sta̱nuva̱ṃ prāya̍cchat.
e̱tatte̍ ha̱viriti̍.
sa pañca̍hotrā'tapyata.
so̍'tāmyat.
sa pra̱tyaṅṅa̍bādhata.
so'su̍rānasṛjata.
tada̱syāpri̍yamāsīt..24..

taddu̱rvarṇa̱ṃ hira̍ṇyamabhavat.
taddu̱rvarṇa̍sya̱ hira̍ṇyasya̱ janma̍.
sa dvi̱tīya̍matapyata.
so̍'tāmyat.
sa prāṅa̍bādhata.
sa de̱vāna̍sṛjata.
tada̍sya pri̱yamā̍sīt.
tathsu̱varṇa̱ṃ hira̍ṇyamabhavat.
tathsu̱varṇa̍sya̱ hira̍ṇyasya̱ janma̍.
ya e̱vaṃ su̱varṇa̍sya̱ hira̍ṇyasya̱ janma̱ veda̍..25..

su̱varṇa̍ ā̱tmanā̍ bhavati.
du̱rvarṇo̎'sya̱ bhrātṛ̍vyaḥ.
tasmā̎thsu̱varṇa̱ṃ hira̍ṇyaṃ bhā̱ryam̎.
su̱varṇa̍ e̱va bha̍vati.
aina̍ṃ pri̱yaṃ ga̍cchati̱ nāpri̍yam.
sa sa̱ptaho̍tāramasṛjata.
sa sa̱ptaho̎trai̱va su̍va̱rgaṃ lo̱kamai̎t.
tri̱ṇa̱vena̱ stome̍nai̱bhyo lo̱kebhyo'su̍rā̱nprāṇu̍data.
tra̱ya̱stri̱ṃśena̱ pratya̍tiṣṭhat.
e̱ka̱vi̱ṃśena̱ ruca̍madhatta..26..

sa̱pta̱da̱śena̱ prājā̍yata.
ya e̱vaṃ vi̱dvānthsome̍na̱ yaja̍te.
sa̱ptaho̎trai̱va su̍va̱rgaṃ lo̱kame̍ti.
tri̱ṇa̱vena̱ stome̍nai̱bhyo lo̱kebhyo̱ bhrātṛ̍vyā̱npraṇu̍date.
tra̱ya̱stri̱ṃśena̱ prati̍ tiṣṭhati.
e̱ka̱vi̱ṃśena̱ ruca̍ṃ dhatte.
sa̱pta̱da̱śena̱ pra jā̍yate.
tasmā̎thsaptada̱śaḥ stomo̱ na ni̱ṟhṛtya̍ḥ.
pra̱jāpa̍ti̱rvai sa̍ptada̱śaḥ.
pra̱jāpa̍time̱va ma̍dhya̱to dha̍tte̱ prajā̎tyai..27..

Anuvāka 5

de̱vā vai varu̍ṇamayājayan.
sa yasyai̍yasyai de̱vatā̍yai̱ dakṣi̍ṇā̱mana̍yat.
tāma̍vlīnāt.
te̎'bruvan.
vyā̱vṛtya̱ prati̍gṛhṇāma.
tathā̍ no̱ dakṣi̍ṇā̱ na vle̎ṣya̱tīti̍.
te vyā̱vṛtya̱ pratya̍gṛhṇan.
tato̱ vai tāndakṣi̍ṇā̱ nāvlī̍nāt.
ya e̱vaṃ vi̱dvānvyā̱vṛtya̱ dakṣi̍ṇāṃ pratigṛ̱hṇāti̍.
naina̱ṃ dakṣi̍ṇā vlīnāti..28..

rājā̎ tvā̱ varu̍ṇo nayatu devi dakṣiṇe̱'gnaye̱ hira̍ṇya̱mityā̍ha.
ā̱gne̱yaṃ vai hira̍ṇyam.
svayai̱vaina̍dde̱vata̍yā̱ prati̍gṛhṇāti.
somā̍ya̱ vāsa̱ ityā̍ha.
sau̱myaṃ vai vāsa̍ḥ.
svayai̱vaina̍dde̱vata̍yā̱ prati̍gṛhṇāti.
ru̱drāya̱ gāmityā̍ha.
rau̱drī vai gauḥ.
svayai̱vainā̎ṃ de̱vata̍yā̱ prati̍gṛhṇāti.
varu̍ṇā̱yāśva̱mityā̍ha..29..

vā̱ru̱ṇo vā aśva̍ḥ.
svayai̱vaina̍ṃ de̱vata̍yā̱ prati̍gṛhṇāti.
pra̱jāpa̍taye̱ puru̍ṣa̱mityā̍ha.
prā̱jā̱pa̱tyo vai puru̍ṣaḥ.
svayai̱vaina̍ṃ de̱vata̍yā̱ prati̍ gṛhṇāti.
mana̍ve̱ talpa̱mityā̍ha.
mā̱na̱vo vai talpa̍ḥ.
svayai̱vaina̍ṃ de̱vata̍yā̱ prati̍ gṛhṇāti.
u̱ttā̱nāyā̎ṅgīra̱sāyāna̱ ityā̍ha.
i̱yaṃ vā u̍ttā̱na ā̎ṅgīra̱saḥ..30..

a̱nayai̱vaina̱tprati̍ gṛhṇāti.
vai̱śvā̱na̱ryarcā ratha̱ṃ prati̍ gṛhṇāti.
vai̱śvā̱na̱ro vai de̱vata̍yā̱ ratha̍ḥ.
svayai̱vaina̍ṃ de̱vata̍yā̱ prati̍ gṛhṇāti.
tenā̍mṛta̱tvama̍śyā̱mityā̍ha.
a̱mṛta̍me̱vā''tmandha̍tte.
vayo̍ dā̱tra ityā̍ha.
vaya̍ e̱vaina̍ṃ kṛ̱tvā.
su̱va̱rgaṃ lo̱kaṃ ga̍mayati.
mayo̱ mahya̍mastu pratigrahī̱tra ityā̍ha..31..

yadvai śi̱vam.
tanmaya̍ḥ.
ā̱tmana̍ e̱vaiṣā parī̎ttiḥ.
ka i̱daṃ kasmā̍ adā̱dityā̍ha.
pra̱jāpa̍ti̱rvai kaḥ.
sa pra̱jāpa̍taye dadāti.
kāma̱ḥ kāmā̱yetyā̍ha.
kāme̍na̱ hi dadā̍ti.
kāme̍na pratigṛ̱hṇāti̍.
kāmo̍ dā̱tā kāma̍ḥ pratigrahī̱tetyā̍ha..32..

kāmo̱ hi dā̱tā.
kāma̍ḥ pratigrahī̱tā.
kāma̍ṃ samu̱dramāvi̱śetyā̍ha.
sa̱mu̱dra i̍va̱ hi kāma̍ḥ.
neva̱ hi kāma̱syānto'sti̍.
na sa̍mu̱drasya̍.
kāme̍na tvā̱ prati̍gṛhṇā̱mītyā̍ha.
yena̱ kāme̍na pratigṛ̱hṇāti̍.
sa e̱vaina̍ma̱muṣmi̍m̐llo̱ke kāma̱ āga̍cchati.
kāmai̱tatta̍ e̱ṣā te̍ kāma̱ dakṣi̱ṇetyā̍ha.
kāma̍ e̱va tadyaja̍māno̱'muṣmi̍m̐llo̱ke dakṣi̍ṇāmicchati.
na pra̍tigrahī̱tari̍.
ya e̱vaṃ vi̱dvāndakṣi̍ṇāṃ pratigṛ̱hṇāti̍.
a̱nṛ̱ṇāme̱vainā̱ṃ prati̍ gṛhṇāti..33..

Anuvāka 6

anto̱ vā e̱ṣa ya̱jñasya̍.
yadda̍śa̱mamaha̍ḥ.
da̱śa̱me'ha̎nthsarparā̱jñiyā̍ ṛ̱gbhiḥ stu̍vanti.
ya̱jñasyai̱vānta̍ṃ ga̱tvā.
a̱nnādya̱mava̍ rundhate.
ti̱sṛbhi̍ḥ stuvanti.
traya̍ i̱me lo̱kāḥ.
e̱bhya e̱va lo̱kebhyo̱'nnādya̱mava̍ rundhate.
pṛśñi̍vatīrbhavanti.
anna̱ṃ vai pṛśñi̍..34..

anna̍me̱vāva̍ rundhate.
mana̍sā̱ prastau̍ti.
mana̱sodgā̍yati.
mana̍sā̱ prati̍ harati.
mana̍ iva̱ hi pra̱jāpa̍tiḥ.
pra̱jāpa̍te̱rāptyai̎.
de̱vā vai sa̱rpāḥ.
teṣā̍mi̱yaṃ rājñī̎.
yathsa̍rparā̱jñiyā̍ ṛ̱gbhiḥ stu̱vanti̍.
a̱syāme̱va prati̍ tiṣṭhanti..35..

catu̍rhotṝ̱ṉ hotā̱ vyāca̍ṣṭe.
stu̱tamanu̍śaṃsati̱ śāntyai̎.
anto̱ vā e̱ṣa ya̱jñasya̍.
yadda̍śa̱mamaha̍ḥ.
e̱tatkhalu̱ vai de̱vānā̎ṃ para̱maṃ guhya̱ṃ brahma̍.
yaccatu̍rhotāraḥ.
da̱śa̱me'ha̱ṃścatu̍rhotṝ̱nvyāca̍ṣṭe.
ya̱jñasyai̱vānta̍ṃ ga̱tvā.
pa̱ra̱maṃ de̱vānā̱ṃ guhya̱ṃ brahmāva̍ rundhe.
tade̱va pra̍kā̱śaṃ ga̍mayati..36..

tade̍naṃ prakā̱śaṃ ga̱tam.
pra̱kā̱śaṃ pra̱jānā̎ṃ gamayati.
vāca̍ṃ yacchati.
ya̱jñasya̱ dhṛtyai̎.
ya̱ja̱mā̱na̱de̱va̱tya̍ṃ vā aha̍ḥ.
bhrā̱tṛ̱vya̱de̱va̱tyā̍ rātri̍ḥ.
ahnā̱ rātri̍ṃ dhyāyet.
bhrātṛ̍vyasyai̱va tallo̱kaṃ vṛ̍ṅkte.
yaddivā̱ vāca̍ṃ visṛ̱jet.
aha̱rbhrātṛ̍vyā̱yocchi̍ṃṣet.
yannakta̍ṃ visṛ̱jet.
rātri̱ṃ bhrātṛ̍vyā̱yocchi̍ṃṣet.
a̱dhi̱vṛ̱kṣa̱sū̱rye vāca̱ṃ visṛ̍jati.
e̱tāva̍ntame̱vāsmai̍ lo̱kamucchi̍ṃṣati.
yāva̍dādi̱tyo̎'sta̱meti̍..37..

Anuvāka 7

pra̱jāpa̍tiḥ pra̱jā a̍sṛjata.
tāḥ sṛ̱ṣṭāḥ sama̍śliṣyan.
tā rū̱peṇānu̱prāvi̍śat.
tasmā̍dāhuḥ.
rū̱paṃ vai pra̱jāpa̍ti̱riti̍.
tā nāmnā'nu̱ prāvi̍śat.
tasmā̍dāhuḥ.
nāma̱ vai pra̱jāpa̍ti̱riti̍.
tasmā̱dapyā̍mi̱trau sa̱ṅgatya̍.
nāmnā̱ ceddhvaye̍te..38..

mi̱trame̱va bha̍vataḥ.
pra̱jāpa̍tirdevāsu̱rāna̍sṛjata.
sa indra̱mapi̱ nāsṛ̍jata.
taṃ de̱vā a̍bruvan.
indra̍ṃ no jana̱yeti̍.
sa ā̱tmannindra̍mapaśyat.
tama̍sṛjata.
taṃ tri̱ṣṭugvī̱rya̍ṃ bhū̱tvā'nu̱ prāvi̍śat.
tasya̱ vajra̍ḥ pañcada̱śo hasta̱ āpa̍dyata.
teno̱dayyāsu̍rāna̱bhya̍bhavat..39..

ya e̱vaṃ veda̍.
a̱bhi bhrātṛ̍vyānbhavati.
te de̱vā asu̍rairvi̱jitya̍.
su̱va̱rgaṃ lo̱kamā̍yan.
te̍'muṣmi̍m̐llo̱ke vya̍kṣudhyan.
te̎'bruvan.
a̱muta̍ḥ pradāna̱ṃ vā upa̍jijīvi̱meti̍.
te sa̱ptaho̍tāraṃ ya̱jñaṃ vi̱dhāyā̱yāsyam̎.
ā̱ṅgī̱ra̱saṃ prāhi̍ṇvan.
e̱tenā̱mutra̍ kalpa̱yeti̍..40..

tasya̱ vā i̱yaṃ kḷpti̍ḥ.
yadi̱daṃ kiṃ ca̍.
ya e̱vaṃ veda̍.
kalpa̍te'smai.
sa vā a̱yaṃ ma̍nu̱ṣye̍ṣu ya̱jñaḥ sa̱ptaho̍tā.
a̱mutra̍ sa̱dbhyo de̱vebhyo̍ ha̱vyaṃ va̍hati.
ya e̱vaṃ veda̍.
upai̍naṃ ya̱jño na̍mati.
so̍'manyata.
a̱bhi vā i̱me̎'smāllo̱kāda̱muṃ lo̱kaṃ ka̍miṣyanta̱ iti̍.
sa vāca̍spate̱ hṛditi̱ vyāha̍rat.
tasmā̎tpu̱tro hṛda̍yam.
tasmā̍da̱smāllo̱kāda̱muṃ lo̱kaṃ nābhi kā̍mayante.
pu̱tro hi hṛda̍yam..41..

Anuvāka 8

de̱vā vai catu̍rhotṛbhirya̱jñama̍tanvata.
te vi pā̱pmanā̱ bhrātṛ̍vye̱ṇāja̍yanta.
a̱bhi su̍va̱rgaṃ lo̱kama̍jayan.
ya e̱vaṃ vi̱dvāṃścatu̍rhotṛbhirya̱jñaṃ ta̍nu̱te.
vi pā̱pmanā̱ bhrātṛ̍vyeṇa jayate.
a̱bhi su̍va̱rgaṃ lo̱kaṃ ja̍yati.
ṣaḍḍho̎trā prāya̱ṇīya̱mā sā̍dayati.
a̱muṣmai̱ vai lo̱kāya̱ ṣaḍḍho̍tā.
ghnanti̱ khalu̱ vā e̱tathsomam̎.
yada̍bhiṣu̱ṇvanti̍..42..

ṛ̱ju̱dhaivaina̍ma̱muṃ lo̱kaṃ ga̍mayati.
catu̍rhotrā''ti̱thyam.
yaśo̱ vai catu̍rhotā.
yaśa̍ e̱vā''tmandha̍tte.
pañca̍hotrā pa̱śumupa̍sādayati.
su̱va̱rgyo̍ vai pañca̍hotā.
yaja̍mānaḥ pa̱śuḥ.
yaja̍māname̱va su̍va̱rgaṃ lo̱kaṃ ga̍mayati.
grahā̎ngṛhī̱tvā sa̱ptaho̍tāraṃ juhoti.
i̱ndri̱yaṃ vai sa̱ptaho̍tā..43..

i̱ndri̱yame̱vā''tmandha̍tte.
yo vai catu̍rhotṝnanusava̱naṃ ta̱rpaya̍ti.
tṛpya̍ti pra̱jayā̍ pa̱śubhi̍ḥ.
upai̍naṃ somapī̱tho na̍mati.
ba̱hi̱ṣpa̱va̱mā̱ne daśa̍hotāra̱ṃ vyāca̍kṣīta.
mādhya̍ṃ dine̱ pava̍māne̱ catu̍rhotāram.
ārbha̍ve̱ pava̍māne̱ pañca̍hotāram.
pi̱tṛ̱ya̱jñe ṣaḍḍho̍tāram.
ya̱jñā̱ya̱jñiya̍sya sto̱tre sa̱ptaho̍tāram.
a̱nu̱sa̱va̱name̱vainā̍ṃstarpayati..44..

tṛpya̍ti pra̱jayā̍ pa̱śubhi̍ḥ.
upai̍naṃ somapī̱tho na̍mati.
de̱vā vai catu̍rhotṛbhiḥ sa̱tramā̍sata.
ṛddhi̍parimita̱ṃ yaśa̍skāmāḥ.
te̎'bruvan.
yanna̍ḥ pratha̱maṃ yaśa̍ ṛ̱cchāt.
sarve̍ṣānna̱stathsa̱hāsa̱diti̍.
soma̱ścatu̍rhotrā.
a̱gniḥ pañca̍hotrā.
dhā̱tā ṣaḍḍho̎trā..45..

indra̍ḥ sa̱ptaho̎trā.
pra̱jāpa̍ti̱rdaśa̍hotrā.
teṣā̱ṃ soma̱ṃ rājā̍na̱ṃ yaśa̍ ārcchat.
tannya̍kāmayata.
tenāpā̎krāmat.
tena̍ pra̱lāya̍macarat.
taṃ de̱vāḥ prai̱ṣaiḥ praiṣa̍maicchan.
tatprai̱ṣāṇā̎ṃ praiṣa̱tvam.
ni̱vidbhi̱rnya̍vedayan.
tanni̱vidā̎nnivi̱ttvam..46..

ā̱prībhi̍rāpnuvan.
tadā̱prīṇā̍māpri̱tvam.
tama̍ghnan.
tasya̱ yaśo̱ vya̍gṛhṇata.
te grahā̍ abhavan.
tadgrahā̍ṇāṃ graha̱tvam.
yasyai̱vaṃ vi̱duṣo̱ grahā̍ gṛ̱hyante̎.
tasya̱ tve̍va gṛ̍hī̱tāḥ.
te̎'bruvan.
yo vai na̱ḥ śreṣṭho'bhū̎t..47..

tama̍vadhiṣma.
puna̍ri̱maṃ su̍vāmahā̱ iti̍.
taṃ chando̍bhirasuvanta.
tacchanda̍sāṃ chanda̱stvam.
sāmnā̱ samāna̍yan.
tathsāmna̍ḥ sāma̱tvam.
u̱kthairuda̍sthāpayan.
tadu̱kthānā̍muktha̱tvam.
ya e̱vaṃ veda̍.
pratye̱va ti̍ṣṭhati..48..

sarva̱māyu̍reti.
somo̱ vai yaśa̍ḥ.
ya e̱vaṃ vi̱dvānthsoma̍mā̱gaccha̍ti.
yaśa̍ e̱vaina̍mṛcchati.
tasmā̍dāhuḥ.
yaścai̱vaṃ veda̱ yaśca̱ na.
tāvu̱bhau soma̱māga̍cchataḥ.
somo̱ hi yaśa̍ḥ.
taṃ tvā'va yaśa̍ ṛccha̱tītyā̍huḥ.
yaḥ some̱ soma̱ṃ prāheti̍.
tasmā̱thsome̱ soma̱ḥ procya̍ḥ.
yaśa̍ e̱vaina̍mṛcchati..49..

Anuvāka 9

i̱daṃ vā agre̱ naiva kiṃ ca̱ nā''sī̎t.
na dyaurā̍sīt.
na pṛ̍thi̱vī.
nāntari̍kṣam.
tadasa̍de̱va sanmano̍'kuruta̱ syāmiti̍.
tada̍tapyata.
tasmā̎ttepā̱nāddhū̱mo̍'jāyata.
tadbhūyo̍'tapyata.
tasmā̎ttepā̱nāda̱gnira̍jāyata.
tadbhūyo̍'tapyata..50..

tasmā̎ttepā̱nājjyoti̍rajāyata.
tadbhūyo̍'tapyata.
tasmā̎ttepā̱nāda̱rcira̍jāyata.
tadbhūyo̍'tapyata.
tasmā̎ttepā̱nānmarī̍cayo'jāyanta.
tadbhūyo̍'tapyata.
tasmā̎ttepā̱nādu̍dā̱rā a̍jāyanta.
tadbhūyo̍'tapyata.
tada̱bhrami̍va̱ sama̍hanyata.
tadva̱stima̍bhinat..51..

sa sa̍mu̱dro̍'bhavat.
tasmā̎thsamu̱drasya̱ na pi̍banti.
pra̱jana̍namiva̱ hi manya̍nte.
tasmā̎tpa̱śorjāya̍mānā̱dāpa̍ḥ pu̱rastā̎dyanti.
taddaśa̍ho̱tā'nva̍sṛjyata.
pra̱jāpa̍ti̱rvai daśa̍hotā.
ya e̱vaṃ tapa̍so vī̱rya̍ṃ vi̱dvāṃstapya̍te.
bhava̍tye̱va.
tadvā i̱damāpa̍ḥ sali̱lamā̍sīt.
so̍'rodītpra̱jāpa̍tiḥ..52..

sa kasmā̍ ajñi.
yadya̱syā apra̍tiṣṭhāyā̱ iti̍.
yada̱phsva̍vāpa̍dyata.
sā pṛ̍thi̱vya̍bhavat.
yadvyamṛ̍ṣṭa.
tada̱ntari̍kṣamabhavat.
yadū̱rdhvamu̱damṛ̍ṣṭa.
sā dyaura̍bhavat.
yadaro̍dīt.
tada̱nayo̍ roda̱stvam..53..

ya e̱vaṃ veda̍.
nāsya̍ gṛ̱he ru̍danti.
e̱tadvā e̱ṣāṃ lo̱kānā̱ṃ janma̍.
ya e̱vame̱ṣāṃ lo̱kānā̱ṃ janma̱ veda̍.
naiṣu lo̱keṣvārti̱mārccha̍ti.
sa i̱māṃ pra̍ti̱ṣṭhāma̍vindata.
sa i̱māṃ pra̍ti̱ṣṭhāṃ vi̱tvā'kā̍mayata̱ prajā̍ye̱yeti̍.
sa tapo̍'tapyata.
so̎'ntarvā̍nabhavat.
sa ja̱ghanā̱dasu̍rānasṛjata..54..

tebhyo̍ mṛ̱nmaye̱ pātre'nna̍maduhat.
yā'sya̱ sā ta̱nūrāsī̎t.
tāmapā̍hata.
sā tami̍srā'bhavat.
so̍'kāmayata̱ prajā̍ye̱yeti̍.
sa tapo̍'tapyata.
so̎ntarvā̍nabhavat.
sa pra̱jana̍nāde̱va pra̱jā a̍sṛjata.
tasmā̍di̱mā bhūyi̍ṣṭhāḥ.
pra̱jana̍nā̱ddhye̍nā̱ asṛ̍jata..55..

tābhyo̍ dāru̱maye̱ pātre̱ payo̍'duhat.
yā'sya̱ sā ta̱nūrāsī̎t.
tāmapā̍hata.
sā jothsnā̍'bhavat.
so̍'kāmayata̱ prajā̍ye̱yeti̍.
sa tapo̍'tapyata.
so̎'ntarvā̍nabhavat.
sa u̍papa̱kṣābhyā̍me̱vartūna̍sṛjata.
tebhyo̍ raja̱te pātre̍ ghṛ̱tama̍duhat.
yā'sya̱ sā ta̱nūrāsī̎t..56..

tāmapā̍hata.
so̍'horā̱trayo̎ḥ sa̱ndhira̍bhavat.
so̍'kāmayata̱ prajā̍ye̱yeti̍.
sa tapo̍'tapyata.
so̎'ntarvā̍nabhavat.
sa mukhā̎dde̱vāna̍sṛjata.
tebhyo̱ hari̍te̱ pātre̱ soma̍maduhat.
yā'sya̱ sā ta̱nūrāsī̎t.
tāmapā̍hata.
tadaha̍rabhavat..57..

e̱te vai pra̱jāpa̍te̱rdohā̎ḥ.
ya e̱vaṃ veda̍.
du̱ha e̱va pra̱jāḥ.
divā̱ vai no̍'bhū̱diti̍.
tadde̱vānā̎ṃ deva̱tvam.
ya e̱vaṃ de̱vānā̎ṃ deva̱tvaṃ veda̍.
de̱vavā̍ne̱va bha̍vati.
e̱tadvā a̍horā̱trāṇā̱ṃ janma̍.
ya e̱vama̍horā̱trāṇā̱ṃ janma̱ veda̍.
nāho̍rā̱treṣvārti̱mārccha̍ti..58..

asa̱to'dhi̱ mano̍'sṛjyata.
mana̍ḥ pra̱jāpa̍timasṛjata.
pra̱jāpa̍tiḥ pra̱jā a̍sṛjata.
tadvā i̱daṃ mana̍sye̱va pa̍ra̱maṃ prati̍ṣṭhitam.
yadi̱daṃ kiṃ ca̍.
tade̱tacchvo̍vasya̱sannāma̱ brahma̍.
vyu̱cchantī̎vyucchantyasmai̱ vasya̍sīvasyasī̱ vyu̍cchati.
prajā̍yate pra̱jayā̍ pa̱śubhi̍ḥ.
pra pa̍rame̱ṣṭhino̱ mātrā̍māpnoti.
ya e̱vaṃ veda̍..59..

Anuvāka 10

pra̱jāpa̍ti̱rindra̍masṛjatānujāva̱raṃ de̱vānā̎m.
taṃ prāhi̍ṇot.
pare̍hi.
e̱teṣā̎ṃ de̱vānā̱madhi̍patire̱dhīti̍.
taṃ de̱vā a̍bruvan.
kastvamasi̍.
va̱yaṃ vai tvacchreyā̍ṃsaḥ sma̱ iti̍.
so̎'bravīt.
kastvamasi̍ va̱yaṃ vai tvacchreyā̍ṃsaḥ sma̱ iti̍ mā de̱vā a̍voca̱nniti̍.
atha̱ vā i̱daṃ tarhi̍ pra̱jāpa̍tau̱ hara̍ āsīt..60..

yada̱sminnā̍di̱tye.
tade̍namabravīt.
e̱tanme̱ praya̍ccha.
athā̱hame̱teṣā̎ṃ de̱vānā̱madhi̍patirbhaviṣyā̱mīti̍.
ko̍'haṃ syā̱mitya̍bravīt.
e̱tatpra̱dāyeti̍.
e̱tathsyā̱ itya̍bravīt.
yade̱tadbravī̱ṣīti̍.
ko ha̱ vai nāma̍ pra̱jāpa̍tiḥ.
ya e̱vaṃ veda̍..61..

vi̱dure̍na̱ṃ nāmnā̎.
tada̍smai ru̱kmaṃ kṛ̱tvā pratya̍muñcat.
tato̱ vā indro̍ de̱vānā̱madhi̍patirabhavat.
ya e̱vaṃ veda̍.
adhi̍patire̱va sa̍mā̱nānā̎ṃ bhavati.
so̍'manyata.
kiṃ ki̱ṃ vā a̍kara̱miti̍.
sa ca̱ndraṃ ma̱ āha̱reti̱ prāla̍pat.
tacca̱ndrama̍saścandrama̱stvam.
ya e̱vaṃ veda̍..62..

ca̱ndravā̍ne̱va bha̍vati.
taṃ de̱vā a̍bruvan.
su̱vīryo̍ maryā̱ yathā̍ gopā̱yata̱ iti̍.
tathsūrya̍sya sūrya̱tvam.
ya e̱vaṃ veda̍.
naina̍ṃ dabhnoti.
kaśca̱ nāsmi̱nvā i̱dami̍ndri̱yaṃ pratya̍sthā̱diti̍.
tadindra̍syendra̱tvam.
ya e̱vaṃ veda̍.
i̱ndri̱yā̱vye̍va bha̍vati..63..

a̱yaṃ vā i̱daṃ pa̍ra̱mo̍'bhū̱diti̍.
tatpa̍rame̱ṣṭhina̍ḥ parameṣṭhi̱tvam.
ya e̱vaṃ veda̍.
pa̱ra̱māme̱va kāṣṭhā̎ṃ gacchati.
taṃ de̱vāḥ sa̍ma̱ntaṃ parya̍viśan.
vasa̍vaḥ pu̱rastā̎t.
ru̱drā da̍kṣiṇa̱taḥ.
ā̱di̱tyāḥ pa̱ścāt.
viśve̍ de̱vā u̍ttara̱taḥ.
aṅgi̍rasaḥ pra̱tyañcam̎..64..

sā̱dhyāḥ parā̎ñcam.
ya e̱vaṃ veda̍.
upai̍naṃ samā̱nāḥ saṃvi̍śanti.
sa pra̱jāpa̍tire̱va bhū̱tvā pra̱jā āva̍yat.
tā a̍smai̱ nāti̍ṣṭhantā̱nnādyā̍ya.
tā mukha̍ṃ pu̱rastā̱tpaśya̍ntīḥ.
da̱kṣi̱ṇa̱taḥ paryā̍yan.
sa da̍kṣiṇa̱taḥ parya̍vartayata.
tā mukha̍ṃ pu̱rastā̱tpaśya̍ntīḥ.
mukha̍ṃ dakṣiṇa̱taḥ..65..

pa̱ścātparyā̍yan.
sa pa̱ścātparya̍vartayata.
tā mukha̍ṃ pu̱rastā̱tpaśya̍ntīḥ.
mukha̍ṃ dakṣiṇa̱taḥ.
mukha̍ṃ pa̱ścāt.
u̱tta̱ra̱taḥ paryā̍yan.
sa u̍ttara̱taḥ parya̍vartayata.
tā mukha̍ṃ pu̱rastā̱tpaśya̍ntīḥ.
mukha̍ṃ dakṣiṇa̱taḥ.
mukha̍ṃ pa̱ścāt..66..

mukha̍muttara̱taḥ.
ū̱rdhvā udā̍yan.
sa u̱pari̍ṣṭā̱nnya̍vartayata.
tāḥ sa̱rvato̍mukho bhū̱tvā''va̍yat.
tato̱ vai tasmai̎ pra̱jā ati̍ṣṭhantā̱nnādyā̍ya.
ya e̱vaṃ vi̱dvānpari̍ ca va̱rtaya̍te̱ ni ca̍.
pra̱jāpa̍tire̱va bhū̱tvā pra̱jā a̍tti.
tiṣṭha̍nte'smai pra̱jā a̱nnādyā̍ya.
a̱nnā̱da e̱va bha̍vati..67..

Anuvāka 11

pra̱jāpa̍tirakāmayata ba̱horbhūyā̎nthsyā̱miti̍.
sa e̱taṃ daśa̍hotāramapaśyat.
taṃ prāyu̍ṅkta.
tasya̱ prayu̍kti ba̱horbhūyā̍nabhavat.
yaḥ kā̱maye̍ta ba̱horbhūyā̎nthsyā̱miti̍.
sa daśa̍hotāra̱ṃ prayu̍ñjīta.
ba̱hore̱va bhūyā̎nbhavati.
so̍'kāmayata vī̱ro ma̱ ājā̍ye̱teti̍.
sa daśa̍hotu̱ścatu̍rhotāra̱ṃ nira̍mimīta.
taṃ prāyu̍ṅkta..68..

tasya̱ prayu̱ktīndro̍'jāyata.
yaḥ kā̱maye̍ta vī̱ro ma̱ ājā̍ye̱teti̍.
sa catu̍rhotāra̱ṃ prayu̍ñjīta.
ā'sya̍ vī̱ro jā̍yate.
so̍'kāmayata paśu̱mānthsyā̱miti̍.
sa catu̍rhotu̱ḥ pañca̍hotāra̱ṃ nira̍mimīta.
taṃ prāyu̍ṅkta.
tasya̱ prayu̍kti paśu̱māna̍bhavat.
yaḥ kā̱maye̍ta paśu̱mānthsyā̱miti̍.
sa pañca̍hotāra̱ṃ prayu̍ñjīta..69..

pa̱śu̱māne̱va bha̍vati.
so̍'kāmayata̱rtavo̍ me kalpera̱nniti̍.
sa pañca̍hotu̱ḥ ṣaḍḍho̍tāra̱ṃ nira̍mimīta.
taṃ prāyu̍ṅkta.
tasya̱ prayu̍ktyṛ̱tavo̎'smā akalpanta.
yaḥ kā̱maye̍ta̱rtavo̍ me kalpera̱nniti̍.
sa ṣaḍḍho̍tāra̱ṃ prayu̍ñjīta.
kalpa̍nte'smā ṛ̱tava̍ḥ.
so̍'kāmayata soma̱paḥ so̍mayā̱jī syā̎m.
ā me̍ soma̱paḥ so̍mayā̱jī jā̍ye̱teti̍..70..

sa ṣaḍḍho̍tuḥ sa̱ptaho̍tāra̱ṃ nira̍mimīta.
taṃ prāyu̍ṅkta.
tasya̱ prayu̍kti soma̱paḥ so̍mayā̱jya̍bhavat.
ā'sya̍ soma̱paḥ so̍mayā̱jya̍jāyata.
yaḥ kā̱maye̍ta soma̱paḥ so̍mayā̱jī syā̎m.
ā me̍ soma̱paḥ so̍mayā̱jī jā̍ye̱teti̍.
sa sa̱ptaho̍tāra̱ṃ prayu̍ñjīta.
so̱ma̱pa e̱va so̍mayā̱jī bha̍vati.
ā'sya̍ soma̱paḥ so̍mayā̱jī jā̍yate.
sa vā e̱ṣa pa̱śuḥ pa̍ñca̱dhā prati̍ tiṣṭhati..71..

pa̱dbhirmukhe̍na.
te de̱vāḥ pa̱śūn vi̱tvā.
su̱va̱rgaṃ lo̱kamā̍yan.
te̍'muṣmi̍m̐llo̱ke vya̍kṣudhyan.
te̎'bruvan.
a̱muta̍ḥ pradāna̱ṃ vā upa̍jijīvi̱meti̍.
te sa̱ptaho̍tāraṃ ya̱jñaṃ vi̱dhāyā̱yāsyam̎.
ā̱ṅgī̱ra̱saṃ prāhi̍ṇvan.
e̱tenā̱mutra̍ kalpa̱yeti̍.
tasya̱ vā i̱yaṃ kḷpti̍ḥ..72..

yadi̱daṃ kiṃ ca̍.
ya e̱vaṃ veda̍.
kalpa̍te'smai.
sa vā a̱yaṃ ma̍nu̱ṣye̍ṣu ya̱jñaḥ sa̱ptaho̍tā.
a̱mutra̍ sa̱dbhyo de̱vebhyo̍ ha̱vyaṃ va̍hati.
ya e̱vaṃ veda̍.
upai̍naṃ ya̱jño na̍mati.
yo vai catu̍rhotṛṇāṃ ni̱dāna̱ṃ veda̍.
ni̱dāna̍vānbhavati.
a̱gni̱ho̱traṃ vai daśa̍hoturni̱dānam̎.
da̱ṟśa̱pū̱rṇa̱mā̱sau catu̍rhotuḥ.
cā̱tu̱rmā̱syāni̱ pañca̍hotuḥ.
pa̱śu̱ba̱ndhaḥ ṣaḍḍho̍tuḥ.
sau̱myo̎'dhva̱raḥ sa̱ptaho̍tuḥ.
e̱tadvai catu̍rhotṛṇāṃ ni̱dānam̎.
ya e̱vaṃ veda̍.
ni̱dāna̍vānbhavati..73..

Anuvāka 1

bra̱hma̱vā̱dino̍ vadanti.
kiṃ catu̍rhotṛṇāṃ caturhotṛ̱tvamiti̍.
yade̱vaiṣu ca̍tu̱rdhā hotā̍raḥ.
tena̱ catu̍rhotāraḥ.
tasmā̱ccatu̍rhotāra ucyante.
taccatur̍hotṛṇāṃ caturhotṛ̱tvam.
somo̱ vai catu̍rhotā.
a̱gniḥ pañca̍hotā.
dhā̱tā ṣaḍḍho̍tā.
indra̍ḥ sa̱ptaho̍tā..1..

pra̱jāpa̍ti̱rdaśa̍hotā.
ya e̱vaṃ catu̍rhotṛṇā̱mṛddhi̱ṃ veda̍.
ṛ̱dhnotye̱va.
ya e̍ṣāme̱vaṃ ba̱ndhutā̱ṃ veda̍.
bandhu̍mānbhavati.
ya e̍ṣāme̱vaṃ kḷpti̱ṃ veda̍.
kalpa̍te'smai.
ya e̍ṣāme̱vamā̱yata̍na̱ṃ veda̍.
ā̱yata̍navānbhavati.
ya e̍ṣāme̱vaṃ pra̍ti̱ṣṭhāṃ veda̍..2..

pratye̱va ti̍ṣṭhati.
bra̱hma̱vā̱dino̍ vadanti.
daśa̍hotā̱ catu̍rhotā.
pañca̍hotā̱ ṣaḍḍho̍tā sa̱ptaho̍tā.
atha̱ kasmā̱ccatu̍rhotāra ucyanta̱ iti̍.
indro̱ vai catu̍rhotā.
indra̱ḥ khalu̱ vai śreṣṭho̍ de̱vatā̍nāmupa̱deśa̍nāt.
ya e̱vamindra̱ṃ śreṣṭha̍ṃ de̱vatā̍nāmupa̱deśa̍nā̱dveda̍.
vasi̍ṣṭhaḥ samā̱nānā̎ṃ bhavati.
tasmā̱cchreṣṭha̍mā̱yanta̍ṃ pratha̱menai̱vānu̍ budhyante.
a̱yamāgan̍.
a̱yamavā̍sā̱diti̍.
kī̱rtira̍sya̱ pūrvā''ga̍cchati ja̱natā̍māya̱taḥ.
atho̍ enaṃ pratha̱menai̱vānu̍ budhyante.
a̱yamāgan̍.
a̱yamavā̍sā̱diti̍..3..

Anuvāka 2

dakṣi̍ṇāṃ pratigrahī̱ṣyanthsa̱ptada̍śa̱kṛtvo'pā̎nyāt.
ā̱tmāna̍me̱va sami̍ndhe.
teja̍se vī̱ryā̍ya.
atho̎ pra̱jāpa̍tire̱vainā̎ṃ bhū̱tvā prati̍gṛhṇāti.
ā̱tmano'nā̎rtyai.
yadye̍na̱mārtvi̍jyādvṛ̱taṃ santa̍ṃ ni̱ṟhare̍ran.
āgnī̎dhre juhuyā̱ddaśa̍hotāram.
ca̱tu̱rgṛ̱hī̱tenā''jye̍na.
pu̱rastā̎tpra̱tyaṅtiṣṭhan̍.
pra̱ti̱lo̱maṃ vi̱grāham̎..4..

prā̱ṇāne̱vāsyopa̍ dāsayati.
yadye̍na̱ṃ puna̍rupa̱ śikṣe̍yuḥ.
āgnī̎dhra e̱va ju̍huyā̱ddaśa̍hotāram.
ca̱tu̱rgṛ̱hī̱tenā''jye̍na.
pa̱ścātprāṅāsī̍naḥ.
a̱nu̱lo̱mamavi̍grāham.
prā̱ṇāne̱vāsmai̍ kalpayati.
prāya̍ścittī̱ vāgghotetyṛ̍tumu̱khaṛ̍tumukhe juhoti.
ṛ̱tūne̱vāsmai̍ kalpayati.
kalpa̍nte'smā ṛ̱tava̍ḥ..5..

kḷ̱ptā a̍smā ṛ̱tava̱ āya̍nti.
ṣaḍḍho̍tā̱ vai bhū̱tvā pra̱jāpa̍tiri̱daṃ sarva̍masṛjata.
sa mano̍'sṛjata.
mana̱so'dhi̍ gāya̱trīma̍sṛjata.
tadgā̍ya̱trīṃ yaśa̍ ārcchat.
tāmā'la̍bhata.
gā̱ya̱tri̱yā adhi̱ chandā̍ṃsyasṛjata.
chando̱bhyo'dhi̱ sāma̍.
tathsāma̱ yaśa̍ ārcchat.
tadā'la̍bhata..6..

sāmno'dhi̱ yajū̍ṃṣyasṛjata.
yaju̱rbhyo'dhi̱ viṣṇum̎.
tadviṣṇu̱ṃ yaśa̍ ārcchat.
tamā'la̍bhata.
viṣṇo̱radhyoṣa̍dhīrasṛjata.
oṣa̍dhī̱bhyo'dhi̱ somam̎.
tathsoma̱ṃ yaśa̍ ārcchat.
tamā'la̍bhata.
somā̱dadhi̍ pa̱śūna̍sṛjata.
pa̱śubhyo'dhīndram̎..7..

tadindra̱ṃ yaśa̍ ārcchat.
tade̍na̱ṃ nāti̱ prācya̍vata.
indra̍ iva yaśa̱svī bha̍vati.
ya e̱vaṃ veda̍.
naina̱ṃ yaśo'ti̱ pracya̍vate.
yadvā i̱daṃ kiṃ ca̍.
tathsarva̍muttā̱na e̱vā''ṅgī̍ra̱saḥ pratya̍gṛhṇāt.
tade̍na̱ṃ prati̍gṛhīta̱ṃ nāhi̍nat.
yatkiṃ ca̍ pratigṛhṇī̱yāt.
tathsarva̍muttā̱nastvā̎''ṅgīra̱saḥ prati̍gṛhṇā̱tvitye̱va prati̍gṛhṇīyāt.
i̱yaṃ vā u̍ttā̱na ā̎ṅgīra̱saḥ.
a̱nayai̱vaina̱tprati̍gṛhṇāti.
naina̍ṃ hinasti.
ba̱ṟhiṣā̱ pratī̍yā̱dgāṃ vā'śva̍ṃ vā.
e̱tadvai pa̍śū̱nāṃ pri̱yaṃ dhāma̍.
pri̱yeṇai̱vaina̱ṃ dhāmnā̱ pratye̍ti..8..

Anuvāka 3

yo vā avi̍dvānniva̱rtaya̍te.
viśī̍rṣā̱ sapā̎pmā̱'muṣmi̍m̐llo̱ke bha̍vati.
atha̱ yo vi̱dvānni̍va̱rtaya̍te.
saśī̍rṣā̱ vipā̎pmā̱'muṣmi̍m̐llo̱ke bha̍vati.
de̱vatā̱ vai sa̱pta puṣṭi̍kāmā̱ nya̍vartayanta.
a̱gniśca̍ pṛthi̱vī ca̍.
vā̱yuścā̱ntari̍kṣaṃ ca.
ā̱di̱tyaśca̱ dyauśca̍ ca̱ndramā̎ḥ.
a̱gnirnya̍vartayata.
sa sā̍ha̱srama̍puṣyat..9..

pṛ̱thi̱vī nya̍vartayata.
sauṣa̍dhībhi̱rvana̱spati̍bhirapuṣyat.
vā̱yurnya̍vartayata.
sa marī̍cībhirapuṣyat.
a̱ntari̍kṣa̱ṃ nya̍vartayata.
tadvayo̍bhirapuṣyat.
ā̱di̱tyo nya̍vartayata.
sa ra̱śmibhi̍rapuṣyat.
dyaurnya̍vartayata.
sā nakṣa̍trairapuṣyat.
ca̱ndramā̱ nya̍vartayata.
so̍'horā̱traira̍rdhamā̱sairmāsair̍ṛ̱tubhi̍ḥ saṃvathsa̱reṇā̍puṣyat.
tānpoṣā̎npuṣyati.
yāṃste'pu̍ṣyan.
ya e̱vaṃ vi̱dvānni ca̍ va̱rtaya̍te̱ pari̍ ca..10..

Anuvāka 4

tasya̱ vā a̱gnerhira̍ṇyaṃ pratijagra̱huṣa̍ḥ.
a̱rdhami̍ndri̱yasyāpā̎krāmat.
tade̱tenai̱va pratya̍gṛhṇāt.
tena̱ vai so̎'rdhami̍ndri̱yasyā̱''tmannu̱pādha̍tta.
a̱rdhami̍ndri̱yasyā̱''tmannu̱pādha̍tte.
ya e̱vaṃ vi̱dvān hira̍ṇyaṃ pratigṛ̱hṇāti̍.
atha̱ yo'vi̍dvānpratigṛ̱hṇāti̍.
a̱rdhama̍syendri̱yasyāpa̍krāmati.
tasya̱ vai soma̍sya̱ vāsa̍ḥ pratijagra̱huṣa̍ḥ.
tṛtī̍yamindri̱yasyāpā̎krāmat..11..

tade̱tenai̱va pratya̍gṛhṇāt.
tena̱ vai sa tṛtī̍yamindri̱yasyā̱''tmannu̱pādha̍tta.
tṛtī̍yamindri̱yasyā̱''tmannu̱pādha̍tte.
ya e̱vaṃ vi̱dvān vāsa̍ḥ pratigṛ̱hṇāti̍.
atha̱ yo'vi̍dvānpratigṛ̱hṇāti̍.
tṛtī̍yamasyendri̱yasyāpa̍krāmati.
tasya̱ vai ru̱drasya̱ gāṃ pra̍tijagra̱huṣa̍ḥ.
ca̱tu̱rthami̍ndri̱yasyāpā̎krāmat.
tāme̱tenai̱va pratya̍gṛhṇāt.
tena̱ vai sa ca̍tu̱rthami̍ndri̱yasyā̱''tmannu̱pādha̍tta..12..

ca̱tu̱rthami̍ndri̱yasyā̱''tmannu̱pādha̍tte.
ya e̱vaṃ vi̱dvāngāṃ pra̍tigṛ̱hṇāti̍.
atha̱ yo'vi̍dvānpratigṛ̱hṇāti̍.
ca̱tu̱rthama̍syendri̱yasyāpa̍krāmati.
tasya̱ vai varu̍ṇa̱syāśva̍ṃ pratijagra̱huṣa̍ḥ.
pa̱ñca̱mami̍ndri̱yasyāpā̎krāmat.
tame̱tenai̱va pratya̍gṛhṇāt.
tena̱ vai sa pa̍ñca̱mami̍ndri̱yasyā̱''tmannu̱pādha̍tta.
pa̱ñca̱mami̍ndri̱yasyā̱''tmannu̱pādha̍tte.
ya e̱vaṃ vi̱dvānaśva̍ṃ pratigṛ̱hṇāti̍..13..

atha̱ yo'vi̍dvānpratigṛ̱hṇāti̍.
pa̱ñca̱mama̍syendri̱yasyāpa̍krāmati.
tasya̱ vai pra̱jāpa̍te̱ḥ puru̍ṣaṃ pratijagra̱huṣa̍ḥ.
ṣa̱ṣṭhami̍ndri̱yasyāpā̎krāmat.
tame̱tenai̱va pratya̍gṛhṇāt.
tena̱ vai sa ṣa̱ṣṭhami̍ndri̱yasyā̱''tmannu̱pādha̍tta.
ṣa̱ṣṭhami̍ndri̱yasyā̱''tmannu̱pādha̍tte.
ya e̱vaṃ vi̱dvānpuru̍ṣaṃ pratigṛ̱hṇāti̍.
atha̱ yo'vi̍dvānpratigṛ̱hṇāti̍.
ṣa̱ṣṭhama̍syendri̱yasyāpa̍krāmati..14..

tasya̱ vai mano̱stalpa̍ṃ pratijagra̱huṣa̍ḥ.
sa̱pta̱mami̍ndri̱yasyāpā̎krāmat.
tame̱tenai̱va pratya̍gṛhṇāt.
tena̱ vai sa sa̍pta̱mami̍ndri̱yasyā̱''tmannu̱pādha̍tta.
sa̱pta̱mami̍ndri̱yasyā̱''tmannu̱pādha̍tte.
ya e̱vaṃ vi̱dvāṃstalpa̍ṃ pratigṛ̱hṇāti̍.
atha̱ yo'vi̍dvānpratigṛ̱hṇāti̍.
sa̱pta̱mama̍syendri̱yasyāpa̍krāmati.
tasya̱ vā u̍ttā̱nasyā̎''ṅgīra̱sasyāprā̍ṇatpratijagra̱huṣa̍ḥ.
a̱ṣṭa̱mami̍ndri̱yasyāpā̎krāmat..15..

tade̱tenai̱va pratya̍gṛhṇāt.
tena̱ vai so̎'ṣṭa̱mami̍ndri̱yasyā̱''tmannu̱pādha̍tta.
a̱ṣṭa̱mami̍ndri̱yasyā̱''tmannu̱pādha̍tte.
ya e̱vaṃ vi̱dvānaprā̍ṇatpratigṛ̱hṇāti̍.
atha̱ yo'vi̍dvānpratigṛ̱hṇāti̍.
a̱ṣṭa̱mama̍syendri̱yasyāpa̍krāmati.
yadvā i̱daṃ kiṃ ca̍.
tathsarva̍muttā̱na e̱vā''ṅgī̍ra̱saḥ pratya̍gṛhṇāt.
tade̍na̱ṃ prati̍gṛhīta̱ṃ nāhi̍nat.
yatkiṃ ca̍ pratigṛhṇī̱yāt.
tathsarva̍muttā̱nastvā̎''ṅgīra̱saḥ prati̍gṛhṇā̱tvitye̱va prati̍gṛhṇīyāt.
i̱yaṃ vā u̍ttā̱na ā̎ṅgīra̱saḥ.
a̱nayai̱vaina̱tprati̍gṛhṇāti.
naina̍ṃ hinasti..16..

Anuvāka 5

bra̱hma̱vā̱dino̍ vadanti.
yaddaśa̍hotāraḥ sa̱tramāsa̍ta.
kena̱ te gṛ̱hapa̍tinā''rdhnuvan.
kena̍ pra̱jā a̍sṛja̱nteti̍.
pra̱jāpa̍tinā̱ vai te gṛ̱hapa̍tinā''rdhnuvan.
tena̍ pra̱jā a̍sṛjanta.
yaccatu̍rhotāraḥ sa̱tramāsa̍ta.
kena̱ te gṛ̱hapa̍tinā''rdhnuvan.
kenauṣa̍dhīrasṛja̱nteti̍.
some̍na̱ vai te gṛ̱hapa̍tinā''rdhnuvan..17..

tenauṣa̍dhīrasṛjanta.
yatpañca̍hotāraḥ sa̱tramāsa̍ta.
kena̱ te gṛ̱hapa̍tinā''rdhnuvan.
kenai̱bhyo lo̱kebhyo'su̍rā̱nprāṇu̍danta.
kenai̍ṣāṃ pa̱śūna̍vṛñja̱teti̍.
a̱gninā̱ vai te gṛ̱hapa̍tinā''rdhnuvan.
tenai̱bhyo lo̱kebhyo'su̍rā̱nprāṇu̍danta.
tenai̍ṣāṃ pa̱śūna̍vṛñjata.
yathṣaḍḍho̍tāraḥ sa̱tramāsa̍ta.
kena̱ te gṛ̱hapa̍tinā''rdhnuvan..18..

kena̱rtūna̍kalpaya̱nteti̍.
dhā̱trā vai te gṛ̱hapa̍tinā''rdhnuvan.
tena̱rtūna̍kalpayanta.
yathsa̱ptaho̍tāraḥ sa̱tramāsa̍ta.
kena̱ te gṛ̱hapa̍tinā''rdhnuvan.
kena̱ suva̍rāyan.
kene̱mām̐llo̱kānthsama̍tanva̱nniti̍.
a̱rya̱mṇā vai te gṛ̱hapa̍tinā''rdhnuvan.
tena̱ suva̍rāyan.
tene̱mām̐llo̱kānthsama̍tanva̱nniti̍..19..

e̱te vai de̱vā gṛ̱hapa̍tayaḥ.
tān ya e̱vaṃ vi̱dvān.
apya̱nyasya̍ gārhapa̱te dīkṣa̍te.
a̱vā̱nta̱rame̱va sa̱triṇā̍mṛdhnoti.
yo vā a̍rya̱maṇa̱ṃ veda̍.
dāna̍kāmā asmai pra̱jā bha̍vanti.
ya̱jño vā a̍rya̱mā.
āryā̍vasa̱tiriti̱ vai tamā̍hu̱ryaṃ pra̱śaṃsa̍nti.
āryā̍vasa̱tirbha̍vati.
ya e̱vaṃ veda̍..20..

yadvā i̱daṃ kiṃ ca̍.
tathsarva̱ṃ catu̍rhotāraḥ.
catu̍rhotṛ̱bhyo'dhi̍ ya̱jño nirmi̍taḥ.
sa ya e̱vaṃ vi̱dvān vi̱vade̍ta.
a̱hame̱va bhūyo̍ veda.
yaścatu̍rhotṝ̱n vedeti̍.
sa hye̍va bhūyo̱ veda̍.
yaścatu̍rhotṝ̱n veda̍.
yo vai catu̍rhotṛṇā̱ṃ hotṝ̱n veda̍.
sarvā̍su pra̱jāsvanna̍matti..21..

sarvā̱ diśo̱'bhi ja̍yati.
pra̱jāpa̍ti̱rvai daśa̍hotṛṇā̱ṃ hotā̎.
soma̱ścatu̍rhotṛṇā̱ṃ hotā̎.
a̱gniḥ pañca̍hotṛṇā̱ṃ hotā̎.
dhā̱tā ṣaḍḍho̍tṛṇā̱ṃ hotā̎.
a̱rya̱mā sa̱ptaho̍tṛṇā̱ṃ hotā̎.
e̱te vai catu̍rhotṛṇā̱ṃ hotā̍raḥ.
tān ya e̱vaṃ veda̍.
sarvā̍su pra̱jāsvanna̍matti.
sarvā̱ diśo̱'bhi ja̍yati..22..

Anuvāka 6

pra̱jāpa̍tiḥ pra̱jāḥ sṛ̱ṣṭvā vya̍sraṃsata.
sa hṛda̍yaṃ bhū̱to̍'śayat.
ātma̱ṉ hā(3) ityahva̍yat.
āpa̱ḥ pratya̍śṛṇvan.
tā a̍gniho̱treṇai̱va ya̍jñakra̱tunopa̍ pa̱ryāva̍rtanta.
tāḥ kusi̍ndha̱mupau̍han.
tasmā̍dagniho̱trasya̍ yajñakra̱toḥ.
eka̍ ṛ̱tvik.
ca̱tu̱ṣkṛtvo'hva̍yat.
a̱gnirvā̱yurā̍di̱tyaśca̱ndramā̎ḥ..23..

te pratya̍śṛṇvan.
te da̍rśapūrṇamā̱sābhyā̍me̱va ya̍jñakra̱tunopa̍ pa̱ryāva̍rtanta.
ta upau̍haṃśca̱tvāryaṅgā̍ni.
tasmā̎ddarśapūrṇamā̱sayo̎ryajñakra̱toḥ.
ca̱tvāra̍ ṛ̱tvija̍ḥ.
pa̱ñca̱kṛtvo'hva̍yat.
pa̱śava̱ḥ pratya̍śṛṇvan.
te cā̍turmā̱syaire̱va ya̍jñakra̱tunopa̍ pa̱ryāva̍rtanta.
ta upau̍ham̐lloma̍ cha̱vīṃ mā̱ṃsamasthi̍ ma̱jjānam̎.
tasmā̎ccāturmā̱syānā̎ṃ yajñakra̱toḥ..24..

pañca̱rtvija̍ḥ.
ṣa̱ṭkṛtvo'hva̍yat.
ṛ̱tava̱ḥ pratya̍śṛṇvan.
te pa̍śuba̱ndhenai̱va ya̍jñakra̱tunopa̍pa̱ryāva̍rtanta.
ta upau̍ha̱nthstanā̍vā̱ṇḍau śi̱śñamavā̎ñcaṃ prā̱ṇam.
tasmā̎tpaśuba̱ndhasya̍ yajñakra̱toḥ.
ṣaḍṛ̱tvija̍ḥ.
sa̱pta̱kṛtvo'hva̍yat.
hotrā̱ḥ pratya̍śṛṇvan.
tāḥ sau̱myenai̱vādhva̱reṇa̍ yajñakra̱tunopa̍pa̱ryāva̍rtanta..25..

tā upau̍hanthsa̱pta śī̍rṣa̱ṇyā̎nprā̱ṇān.
tasmā̎thsau̱myasyā̎dhva̱rasya̍ yajñakra̱toḥ.
sa̱pta hotrā̱ḥ prācī̱rvaṣa̍ṭkurvanti.
da̱śa̱kṛtvo'hva̍yat.
tapa̱ḥ pratya̍śṛṇot.
tatkarma̍ṇai̱va sa̍ṃvathsa̱reṇa̱ sarvai̎ryajñakra̱tubhi̱rupa̍ pa̱ryāva̍rtata.
tathsarva̍mā̱tmāna̱mapa̍rivarga̱mupau̍hat.
tasmā̎thsaṃvathsa̱re sarve̍ yajñakra̱tavo'va̍rudhyante.
tasmā̱ddaśa̍hotā̱ catu̍rhotā.
pañca̍hotā̱ ṣaḍḍho̍tā sa̱ptaho̍tā.
eka̍hotre ba̱liṃ ha̍ranti.
hara̍ntyasmai pra̱jā ba̱lim.
aina̱mapra̍tikhyātaṃ gacchati.
ya e̱vaṃ veda̍..26..

Anuvāka 7

pra̱jāpa̍ti̱ḥ puru̍ṣamasṛjata.
so̎'gnira̍bravīt.
mamā̱yamanna̍ma̱stviti̍.
so̍'bibhet.
sarva̱ṃ vai mā̱'yaṃ pra dha̍kṣya̱tīti̍.
sa e̱tāṃścatu̍rhotṝnātma̱spara̍ṇānapaśyat.
tāna̍juhot.
tairvai sa ā̱tmāna̍maspṛṇot.
yada̍gniho̱traṃ ju̱hoti̍.
eka̍hotārame̱va tadya̍jñakra̱tumā̎pnotyagniho̱tram..27..

kusi̍ndhaṃ cā̱''tmana̍ḥ spṛ̱ṇoti̍.
ā̱di̱tyasya̍ ca̱ sāyu̍jyaṃ gacchati.
ca̱turunna̍yati.
catu̍rhotārame̱va tadya̍jñakra̱tumā̎pnoti darśapūrṇamā̱sau.
ca̱tvāri̍ cā̱''tmano'ṅgā̍ni spṛ̱ṇoti̍.
ā̱di̱tyasya̍ ca̱ sāyu̍jyaṃ gacchati.
ca̱turunna̍yati.
sa̱mitpa̍ñca̱mī.
pañca̍hotārame̱va tadya̍jñakra̱tumā̎pnoti cāturmā̱syāni̍.
loma̍ cha̱vīṃ mā̱ṃsamasthi̍ ma̱jjānam̎..28..

tāni̍ cā̱''tmana̍ḥ spṛ̱ṇoti̍.
ā̱di̱tyasya̍ ca̱ sāyu̍jyaṃ gacchati.
ca̱turunna̍yati.
dvirju̍hoti.
ṣaḍḍho̍tārame̱va tadya̍jñakra̱tumā̎pnoti paśuba̱ndham.
stanā̍vā̱ṇḍau śi̱śñamavā̎ñcaṃ prā̱ṇam.
tāni̍ cā̱''tmana̍ḥ spṛ̱ṇoti̍.
ā̱di̱tyasya̍ ca̱ sāyu̍jyaṃ gacchati.
ca̱turunna̍yati.
dvirju̍hoti..29..

sa̱mithsa̍pta̱mī.
sa̱ptaho̍tārame̱va tadya̍jñakra̱tumā̎pnoti sau̱myama̍dhva̱ram.
sa̱pta cā̱''tmana̍ḥ śīrṣa̱ṇyā̎nprā̱ṇānthspṛ̱ṇoti̍.
ā̱di̱tyasya̍ ca̱ sāyu̍jyaṃ gacchati.
ca̱turunna̍yati.
dvirju̱hoti̍.
dvirnimā̎rṣṭi.
dviḥ prāśñā̍ti.
daśa̍hotārame̱va tadya̍jñakra̱tumā̎pnoti saṃvathsa̱ram.
sarva̍ṃ cā̱''tmāna̱mapa̍rivargaṃ spṛ̱ṇoti̍.
ā̱di̱tyasya̍ ca̱ sāyu̍jyaṃ gacchati..30..

Anuvāka 8

pra̱jāpa̍tirakāmayata̱ prajā̍ye̱yeti̍.
sa tapo̍'tapyata.
so̎'ntarvā̍nabhavat.
sa hari̍taḥ śyā̱vo̍'bhavat.
tasmā̱thstrya̍ntarva̍tnī.
hari̍ṇī sa̱tī śyā̱vā bha̍vati.
sa vi̱jāya̍māno̱ garbhe̍ṇātāmyat.
sa tā̱ntaḥ kṛ̱ṣṇaḥ śyā̱vo̍'bhavat.
tasmā̎ttā̱ntaḥ kṛ̱ṣṇaḥ śyā̱vo bha̍vati.
tasyāsu̍re̱vājī̍vat..31..

tenāsu̱nā'su̍rānasṛjata.
tadasu̍rāṇāmasura̱tvam.
ya e̱vamasu̍rāṇāmasura̱tvaṃ veda̍.
asu̍māne̱va bha̍vati.
naina̱masu̍rjahāti.
so'su̍rānthsṛ̱ṣṭvā pi̱tevā̍manyata.
tadanu̍ pi̱tṝna̍sṛjata.
tatpi̍tṛ̱ṇāṃ pi̍tṛ̱tvam.
ya e̱vaṃ pi̍tṛ̱ṇāṃ pi̍tṛ̱tvaṃ veda̍.
pi̱tevai̱va svānā̎ṃ bhavati..32..

yantya̍sya pi̱taro̱ havam̎.
sa pi̱tṝnthsṛ̱ṣṭvā''ma̍nasyat.
tadanu̍ manu̱ṣyā̍nasṛjata.
tanma̍nu̱ṣyā̍ṇāṃ manuṣya̱tvam.
ya e̱vaṃ ma̍nu̱ṣyā̍ṇāṃ manuṣya̱tvaṃ veda̍.
ma̱na̱svye̍va bha̍vati.
naina̱ṃ manu̍rjahāti.
tasmai̍ manu̱ṣyā̎nthsasṛjā̱nāya̍.
divā̍ deva̱trā'bha̍vat.
tadanu̍ de̱vāna̍sṛjata.
tadde̱vānā̎ṃ deva̱tvam.
ya e̱vaṃ de̱vānā̎ṃ deva̱tvaṃ veda̍.
divā̍ hai̱vāsya̍ deva̱trā bha̍vati.
tāni̱ vā e̱tāni̍ ca̱tvāryambhā̍ṃsi.
de̱vā ma̍nu̱ṣyā̎ḥ pi̱taro'su̍rāḥ.
teṣu̱ sarve̱ṣvambho̱ nabha̍ iva bhavati.
ya e̱vaṃ veda̍..33..

Anuvāka 9

bra̱hma̱vā̱dino̍ vadanti.
yo vā i̱maṃ vi̱dyāt.
yato̱'yaṃ pava̍te.
yada̍bhi̱ pava̍te.
yada̍bhi sa̱mpava̍te.
sarva̱māyu̍riyāt.
na pu̱rā''yu̍ṣa̱ḥ pra mī̍yeta.
pa̱śu̱mānthsyā̎t.
vi̱ndeta̍ pra̱jām.
yo vā i̱maṃ veda̍..34..

yato̱'yaṃ pava̍te.
yada̍bhi̱ pava̍te.
yada̍bhi sa̱mpava̍te.
sarva̱māyu̍reti.
na pu̱rā''yu̍ṣa̱ḥ pra mī̍yate.
pa̱śu̱mānbha̍vati.
vi̱ndate̎ pra̱jām.
a̱dbhyaḥ pa̍vate.
a̱po̍'bhi pa̍vate.
a̱po̍'bhi sampa̍vate..35..

a̱syāḥ pa̍vate.
i̱māma̱bhi pa̍vate.
i̱māma̱bhi sampa̍vate.
a̱gneḥ pa̍vate.
a̱gnima̱bhi pa̍vate.
a̱gnima̱bhi sampa̍vate.
a̱ntari̍kṣātpavate.
a̱ntari̍kṣama̱bhi pa̍vate.
a̱ntari̍kṣama̱bhi sampa̍vate.
ā̱di̱tyātpa̍vate..36..

ā̱di̱tyama̱bhi pa̍vate.
ā̱di̱tyama̱bhi sampa̍vate.
dyoḥ pa̍vate.
diva̍ma̱bhi pa̍vate.
diva̍ma̱bhi sampa̍vate.
di̱gbhyaḥ pa̍vate.
diśo̱'bhi pa̍vate.
diśo̱'bhi sampa̍vate.
sa yatpu̱rastā̱dvāti̍.
prā̱ṇa e̱va bhū̱tvā pu̱rastā̎dvāti..37..

tasmā̎tpu̱rastā̱dvāntam̎.
sarvā̎ḥ pra̱jāḥ prati̍ nandanti.
prā̱ṇo hi pri̱yaḥ pra̱jānā̎m.
prā̱ṇa i̍va pri̱yaḥ pra̱jānā̎ṃ bhavati.
ya e̱vaṃ veda̍.
sa vā e̱ṣa prā̱ṇa e̱va.
atha̱ yadda̍kṣiṇa̱to vāti̍.
mā̱ta̱riśvai̱va bhū̱tvā da̍kṣiṇa̱to vā̍ti.
tasmā̎ddakṣiṇa̱to vānta̍ṃ vi̱dyāt.
sarvā̱ diśa̱ ā vā̍ti..38..

sarvā̱ diśo'nu̱ vi vā̍ti.
sarvā̱ diśo'nu̱ saṃ vā̱tīti̍.
sa vā e̱ṣa mā̍ta̱riśvai̱va.
atha̱ yatpa̱ścādvāti̍.
pava̍māna e̱va bhū̱tvā pa̱ścādvā̍ti.
pū̱tama̍smā̱ āha̍ranti.
pū̱tamupa̍haranti.
pū̱tama̍śñāti.
ya e̱vaṃ veda̍.
sa vā e̱ṣa pava̍māna e̱va..39..

atha̱ yadu̍ttara̱to vāti̍.
sa̱vi̱taiva bhū̱tvotta̍ra̱to vā̍ti.
sa̱vi̱teva̱ svānā̎ṃ bhavati.
ya e̱vaṃ veda̍.
sa vā e̱ṣa sa̍vi̱taiva.
te ya e̍naṃ pu̱rastā̍dā̱yanta̍mupa̱vada̍nti.
ya e̱vāsya̍ pu̱rastā̎tpā̱pmāna̍ḥ.
tāṃste'pa̍ ghnanti.
pu̱rastā̱dita̍rānpā̱pmana̍ḥ sacante.
atha̱ ya e̍naṃ dakṣiṇa̱ta ā̱yanta̍mupa̱vada̍nti..40..

ya e̱vāsya̍ dakṣiṇa̱taḥ pā̱pmāna̍ḥ.
tāṃste'pa̍ ghnanti.
da̱kṣi̱ṇa̱ta ita̍rānpā̱pmana̍ḥ sacante.
atha̱ ya e̍naṃ pa̱ścādā̱yanta̍mupa̱ vada̍nti.
ya e̱vāsya̍ pa̱ścātpā̱pmāna̍ḥ.
tāṃste'pa̍ ghnanti.
pa̱ścādita̍rānpā̱pmana̍ḥ sacante.
atha̱ ya e̍namuttara̱ta ā̱yanta̍mupa̱ vada̍nti.
ya e̱vāsyo̎ttara̱taḥ pā̱pmāna̍ḥ.
tāṃste'pa̍ ghnanti..41..

u̱tta̱ra̱ta ita̍rānpā̱pmana̍ḥ sacante.
tasmā̍de̱vaṃ vi̱dvān.
vīva̍ nṛtyet.
preva̍ calet.
vyasye̍vā̱kṣyau bhā̍ṣeta.
ma̱ṇṭaye̍diva.
krā̱thaye̍diva.
śṛ̱ṅgā̱yete̍va.
u̱ta mopa̍ vadeyuḥ.
u̱ta me̍ pā̱pmāna̱mapa̍ hanyu̱riti̍.
sa yāndiśa̍ṃ sa̱nime̱ṣyanthsyāt.
ya̱dā tāndiśa̱ṃ vāto̍ vā̱yāt.
atha̱ prave̱yāt.
pra vā̍ dhāvayet.
sā̱tame̱va ra̍di̱taṃ vyū̍ḍhaṃ ga̱ndhama̱bhi pracya̍vate.
ā'sya̱ taṃ ja̍napa̱daṃ pūrvā̍ kī̱rtirga̍cchati.
dāna̍kāmā asmai pra̱jā bha̍vanti.
ya e̱vaṃ veda̍..42..

Anuvāka 10

pra̱jāpa̍ti̱ḥ soma̱ṃ rājā̍namasṛjata.
taṃ trayo̱ vedā̱ anva̍sṛjyanta.
tān haste̍'kuruta.
atha̱ ha sītā̍ sāvi̱trī.
soma̱ṃ rājā̍naṃ cakame.
śra̱ddhāmu̱ sa ca̍kame.
sā''ha̍ pi̱tara̍ṃ pra̱jāpa̍ti̱mupa̍sasāra.
taṃ ho̍vāca.
nama̍ste astu bhagavaḥ.
upa̍ tvā'yāni..43..

pra tvā̍ padye.
soma̱ṃ vai rājā̍naṃ kāmaye.
śra̱ddhāmu̱ sa kā̍mayata̱ iti̍.
tasyā̍ u̱ ha sthā̍ga̱rama̍laṅkā̱raṃ ka̍lpayi̱tvā.
daśa̍hotāraṃ pu̱rastā̎dvyā̱khyāya̍.
catu̍rhotāraṃ dakṣiṇa̱taḥ.
pañca̍hotāraṃ pa̱ścāt.
ṣaḍḍho̍tāramuttara̱taḥ.
sa̱ptaho̍tāramu̱pari̍ṣṭāt.
sa̱mbhā̱raiśca̱ patni̍bhiśca̱ mukhe̍'la̱ṅkṛtya̍..44..

ā'syārdhaṃ va̍vrāja.
tāṃ ho̱dīkṣyo̍vāca.
upa̱ mā va̍rta̱sveti̍.
taṃ ho̍vāca.
bhoga̱ṃ tu ma̱ āca̍kṣva.
e̱tanma̱ āca̍kṣva.
yatte̍ pā̱ṇāviti̍.
tasyā̍ u̱ ha trīn vedā̱nprada̍dau.
tasmā̱duha̱ striyo̱ bhoga̱maiva hā̍rayante.
sa yaḥ kā̱maye̍ta pri̱yaḥ syā̱miti̍..45..

yaṃ vā̍ kā̱maye̍ta pri̱yaḥ syā̱diti̍.
tasmā̍ e̱taṃ sthā̍ga̱rama̍laṅkā̱raṃ ka̍lpayi̱tvā.
daśa̍hotāraṃ pu̱rastā̎dvyā̱khyāya̍.
catu̍rhotāraṃ dakṣiṇa̱taḥ.
pañca̍hotāraṃ pa̱ścāt.
ṣaḍḍho̍tāramuttara̱taḥ.
sa̱ptaho̍tāramu̱pari̍ṣṭāt.
sa̱mbhā̱raiśca̱ patni̍bhiśca̱ mukhe̍'la̱ṅkṛtya̍.
āsyārdhaṃ vra̍jet.
pri̱yo hai̱va bha̍vati..46..

Anuvāka 11

brahmā̎tma̱nvada̍sṛjata.
tada̍kāmayata.
samā̱tmanā̍ padye̱yeti̍.
ātma̱nnātma̱nnityāma̍ntrayata.
tasmai̍ daśa̱maṃ hū̱taḥ pratya̍śṛṇot.
sa daśa̍hūto'bhavat.
daśa̍hūto ha̱ vai nāmai̱ṣaḥ.
taṃ vā e̱taṃ daśa̍hūta̱ṃ santam̎.
daśa̍ho̱tetyāca̍kṣate pa̱rokṣe̍ṇa.
pa̱rokṣa̍priyā iva̱ hi de̱vāḥ..47..

ātma̱nnātma̱nnityāma̍ntrayata.
tasmai̍ sapta̱maṃ hū̱taḥ pratya̍śṛṇot.
sa sa̱ptahū̍to'bhavat.
sa̱ptahū̍to ha̱ vai nāmai̱ṣaḥ.
taṃ vā e̱taṃ sa̱ptahū̍ta̱ṃ santam̎.
sa̱ptaho̱tetyāca̍kṣate pa̱rokṣe̍ṇa.
pa̱rokṣa̍priyā iva̱ hi de̱vāḥ.
ātma̱nnātma̱nnityāma̍ntrayata.
tasmai̍ ṣa̱ṣṭhaṃ hū̱taḥ pratya̍śṛṇot.
sa ṣaḍḍhū̍to'bhavat..48..

ṣaḍḍhū̍to ha̱ vai nāmai̱ṣaḥ.
taṃ vā e̱taṃ ṣaḍḍhū̍ta̱ṃ santam̎.
ṣaḍḍho̱tetyāca̍kṣate pa̱rokṣe̍ṇa.
pa̱rokṣa̍priyā iva̱ hi de̱vāḥ.
ātma̱nnātma̱nnityāma̍ntrayata.
tasmai̍ pañca̱maṃ hū̱taḥ pratya̍śṛṇot.
sa pañca̍hūto'bhavat.
pañca̍hūto ha̱ vai nāmai̱ṣaḥ.
taṃ vā e̱taṃ pañca̍hūta̱ṃ santam̎.
pañca̍ho̱tetyāca̍kṣate pa̱rokṣe̍ṇa..49..

pa̱rokṣa̍priyā iva̱ hi de̱vāḥ.
ātma̱nnātma̱nnityāma̍ntrayata.
tasmai̍ catu̱rthaṃ hū̱taḥ pratya̍śṛṇot.
sa catu̍rhūto'bhavat.
catu̍rhūto ha̱ vai nāmai̱ṣaḥ.
taṃ vā e̱taṃ catu̍rhūta̱ṃ santam̎.
catu̍rho̱tetyāca̍kṣate pa̱rokṣe̍ṇa.
pa̱rokṣa̍priyā iva̱ hi de̱vāḥ.
tama̍bravīt.
tvaṃ vai me̱ nedi̍ṣṭhaṃ hū̱taḥ pratya̍śrauṣīḥ.
tvayai̍nānākhyā̱tāra̱ iti̍.
tasmā̱nnu hai̍nā̱ṃścatu̍rhotāra̱ ityāca̍kṣate.
tasmā̎cchuśrū̱ṣuḥ pu̱trāṇā̱ṃ hṛdya̍tamaḥ.
nedi̍ṣṭho̱ hṛdya̍tamaḥ.
nedi̍ṣṭho̱ brahma̍ṇo bhavati.
ya e̱vaṃ veda̍..50..

Anuvāka 1

juṣṭo̱ damū̍nā̱ ati̍thirduro̱ṇe.
i̱maṃ no̍ ya̱jñamupa̍ yāhi vi̱dvān.
viśvā̍ agne'bhi̱yujo̍ vi̱hatya̍.
śa̱trū̱ya̱tāmā bha̍rā̱ bhoja̍nāni.
agne̱ śardha̍ maha̱te saubha̍gāya.
tava̍ dyu̱mnānyu̍tta̱māni̍ santu.
sañjā̎spa̱tyaṃ su̱yama̱mā kṛ̍ṇuṣva.
śa̱trū̱ya̱tāma̱bhi ti̍ṣṭhā̱ mahā̍ṃsi.
agne̱ yo no̱'bhito̱ jana̍ḥ.
vṛko̱ vāro̱ jighā̍ṃsati..1..

tāṃstvaṃ vṛ̍trahaṃ jahi.
vasva̱smabhya̱mā bha̍ra.
agne̱ yo no̍'bhi̱dāsa̍ti.
sa̱mā̱no yaśca̱ niṣṭya̍ḥ.
i̱dhmasye̍va pra̱kṣāya̍taḥ.
mā tasyocche̍ṣi̱ kiñca̱na.
tvami̍ndrābhi̱bhūra̍si.
de̱vo vijñā̍tavīryaḥ.
vṛ̱tra̱hā pu̍ru̱ceta̍naḥ.
apa̱ prāca̍ indra̱ viśvā̍ṃ a̱mitrān̍..2..

apāpā̍co abhibhūte nudasva.
apodī̍co̱ apa̍śūrādha̱rā ca̍ ū̱rau.
yathā̱ tava̱ śarma̱nmade̍ma.
tamindra̍ṃ vājayāmasi.
ma̱he vṛ̱trāya̱ hanta̍ve.
sa vṛṣā̍ vṛṣa̱bho bhu̍vat.
yu̱je ratha̍ṃ ga̱veṣa̍ṇa̱ṃ hari̍bhyām.
upa̱ brahmā̍ṇi jujuṣā̱ṇama̍sthuḥ.
vibā̍dhiṣṭā̱sya roda̍sī mahi̱tvā.
indro̍ vṛ̱trāṇya̍pra̱tīja̍gha̱nvān..3..

ha̱vya̱vāha̍mabhimāti̱ṣāham̎.
ra̱kṣo̱haṇa̱ṃ pṛta̍nāsu ji̱ṣṇum.
jyoti̍ṣmanta̱ṃ dīdya̍ta̱ṃ pura̍ndhim.
a̱gniṃ svi̍ṣṭa̱kṛta̱mā hu̍vema.
svi̍ṣṭamagne a̱bhi tatpṛ̍ṇāhi.
viśvā̍ deva̱ pṛta̍nā a̱bhi ṣya.
u̱ruṃ na̱ḥ panthā̎ṃ pradi̱śanvibhā̍hi.
jyoti̍ṣmaddhehya̱jara̍ṃ na̱ āyu̍ḥ.
tvāma̍gne ha̱viṣma̍ntaḥ.
de̱vaṃ martā̍sa īḍate..4..

manye̎ tvā jā̱tave̍dasam.
sa ha̱vyā va̍kṣyānu̱ṣak.
viśvā̍ni no du̱rgahā̍ jātavedaḥ.
sindhu̱ṃ na nā̱vā du̍ri̱tā'ti̍ parṣi.
agne̍ atri̱vanmana̍sā gṛṇā̱naḥ.
a̱smāka̍ṃ bodhyavi̱tā ta̱nūnā̎m.
pū̱ṣā gā anve̍tu naḥ.
pū̱ṣā ra̍kṣa̱tvarva̍taḥ.
pū̱ṣā vāja̍ṃ sanotu naḥ.
pū̱ṣemā āśā̱ anu̍veda̱ sarvā̎ḥ..5..

so a̱smāṃ abha̍yatamena neṣat.
sva̱sti̱dā aghṛ̍ṇi̱ḥ sarva̍vīraḥ.
apra̍yucchanpu̱ra e̍tu̱ prajā̱nan.
tvama̍gne sa̱prathā̍ asi.
juṣṭo̱ hotā̱ vare̎ṇyaḥ.
tvayā̍ ya̱jñaṃ vita̍nvate.
a̱gnī rakṣā̍ṃsi sedhati.
śu̱kraśo̍ci̱rama̍rtyaḥ.
śuci̍ḥ pāva̱ka īḍya̍ḥ.
agne̱ rakṣā̍ ṇo̱ aṃha̍saḥ..6..

prati̍ ṣma deva̱ rīṣa̍taḥ.
tapi̍ṣṭhaira̱jaro̍ daha.
agne̱ haṃsi̱ nya̍triṇam̎.
dīdya̱nmartye̱ṣvā.
sve kṣaye̍ śucivrata.
ā vā̍ta vāhi bheṣa̱jam.
vi vā̍ta vāhi̱ yadrapa̍ḥ.
tvaṃ hi vi̱śvabhe̍ṣajaḥ.
de̱vānā̎ṃ dū̱ta īya̍se.
dvāvi̱mau vātau̍ vātaḥ..7..

ā sindho̱rā pa̍rā̱vata̍ḥ.
dakṣa̍ṃ me a̱nya ā̱vātu̍.
parā̱nyo vā̍tu̱ yadrapa̍ḥ.
yada̱do vā̍ta te gṛ̱he.
a̱mṛta̍sya ni̱dhirhi̱taḥ.
tato̍ no dehi jī̱vase̎.
tato̍ no dhehi bheṣa̱jam.
tato̍ no̱ maha̱ āva̍ha.
vāta̱ āvā̍tu bheṣa̱jam.
śa̱mbhūrma̍yo̱bhūrno̍ hṛ̱de..8..

pra ṇa̱ āyū̍ṃṣi tāriṣat.
tvama̍gne a̱yāsi̍.
a̱yā sanmana̍sā hi̱taḥ.
a̱yā san ha̱vyamū̍hiṣe.
a̱yā no̍ dhehi bheṣa̱jam.
i̱ṣṭo a̱gnirāhu̍taḥ.
svāhā̍kṛtaḥ pipartu naḥ.
sva̱gā de̱vebhya̍ i̱daṃ nama̍ḥ.
kāmo̍ bhū̱tasya̱ bhavya̍sya.
sa̱mrāḍeko̱ virā̍jati..9..

sa i̱daṃ prati̍ paprathe.
ṛ̱tūnuthsṛ̍jate va̱śī.
kāma̱stadagre̱ sama̍varta̱tādhi̍.
mana̍so̱ reta̍ḥ pratha̱maṃ yadāsī̎t.
sa̱to bandhu̱masa̍ti̱ nira̍vindan.
hṛ̱di pra̱tīṣyā̍ ka̱vayo̍ manī̱ṣā.
tvayā̍ manyo sa̱ratha̍māru̱janta̍ḥ.
harṣa̍māṇāso dhṛṣa̱tā ma̍rutvaḥ.
ti̱gmeṣa̍va̱ āyu̍dhā sa̱ṃśiśā̍nāḥ.
upa̱ praya̍nti̱ naro̍ a̱gnirū̍pāḥ..10..

ma̱nyurbhago̍ ma̱nyure̱vāsa̍ de̱vaḥ.
ma̱nyurhotā̱ varu̍ṇo vi̱śvave̍dāḥ.
ma̱nyuṃ viśa̍ īḍate deva̱yantī̎ḥ.
pā̱hi no̍ manyo̱ tapa̍sā̱ śrame̍ṇa.
tvama̍gne vrata̱bhṛcchuci̍ḥ.
de̱vāṃ āsā̍dayā i̱ha.
agne̍ ha̱vyāya̱ voḍha̍ve.
vra̱tānubibhra̍dvrata̱pā adā̎bhyaḥ.
yajā̍ no de̱vāṃ a̱jara̍ḥ su̱vīra̍ḥ.
dadha̱dratnā̍ni suvidā̱no a̍gne.
go̱pā̱ya no̍ jī̱vase̍ jātavedaḥ..11..

Anuvāka 2

cakṣu̍ṣo hete̱ mana̍so hete.
vāco̍ hete̱ brahma̍ṇo hete.
yo mā̍'ghā̱yura̍bhi̱dāsa̍ti.
tama̍gne me̱nyā me̱niṃ kṛ̍ṇu.
yo mā̱ cakṣu̍ṣā̱ yo mana̍sā.
yo vā̱cā brahma̍ṇā'ghā̱yura̍bhi̱dāsa̍ti.
tayā̎'gne̱ tvaṃ me̱nyā.
a̱muma̍me̱niṃ kṛ̍ṇu.
yatkiṃ cā̱sau mana̍sā̱ yacca̍ vā̱cā.
ya̱jñairju̱hoti̱ yaju̍ṣā ha̱virbhi̍ḥ..12..

tanmṛ̱tyurnirṛ̍tyā saṃvidā̱naḥ.
pu̱rādi̱ṣṭādāhu̍tīrasya hantu.
yā̱tu̱dhānā̱ nirṛ̍ti̱rādu̱rakṣa̍ḥ.
te a̍sya ghna̱ntvanṛ̍tena sa̱tyam.
indre̍ṣitā̱ ājya̍masya mathnantu.
mā tathsamṛ̍ddhi̱ yada̱sau ka̱roti̍.
hanmi̍ te̱'haṃ kṛ̱taṃ ha̱viḥ.
yo me̍ gho̱ramacī̍kṛtaḥ.
apā̎ñcau ta u̱bhau bā̱hū.
apa̍nahyāmyā̱syam̎..13..

apa̍ nahyāmi te bā̱hū.
apa̍ nahyāmyā̱syam̎.
a̱gnerde̱vasya̱ brahma̍ṇā.
sarva̍ṃ te'vadhiṣaṃ kṛ̱tam.
pu̱rā'muṣya̍ vaṣaṭkā̱rāt.
ya̱jñaṃ de̱veṣu̍ naskṛdhi.
svi̍ṣṭama̱smāka̍ṃ bhūyāt.
mā'smānprāpa̱nnarā̍tayaḥ.
anti̍ dū̱re sa̱to a̍gne.
bhrātṛ̍vyasyābhi̱dāsa̍taḥ..14..

va̱ṣa̱ṭkā̱reṇa̱ vajre̍ṇa.
kṛ̱tyāṃ ha̍nmi kṛ̱tāma̱ham.
yo mā̱ nakta̱ṃ divā̍ sā̱yam.
prā̱taścāhno̍ ni̱pīya̍ti.
a̱dyā tami̍ndra̱ vajre̍ṇa.
bhātṛ̍vyaṃ pādayāmasi.
indra̍sya gṛ̱ho̍'si̱ tantvā̎.
prapa̍dye̱ sagu̱ḥ sāśva̍ḥ.
sa̱ha yanme̱ asti̱ tena̍.
īḍe̍ a̱gniṃ vi̍pa̱ścitam̎..15..

gi̱rā ya̱jñasya̱ sādha̍nam.
śru̱ṣṭī̱vāna̍ndhi̱tāvā̍nam.
agne̍ śa̱kema̍ te va̱yam.
yama̍ṃ de̱vasya̍ vā̱jina̍ḥ.
ati̱ dveṣā̍ṃsi tarema.
ava̍taṃ mā̱ sama̍nasau̱ samo̍kasau.
sace̍tasau̱ sare̍tasau.
u̱bhau māma̍vatañjātavedasau.
śi̱vau bha̍vatama̱dya na̍ḥ.
sva̱yaṃ kṛ̍ṇvā̱naḥ su̱gamapra̍yāvam..16..

ti̱gmaśṛ̍ṅgo vṛṣa̱bhaḥ śośu̍cānaḥ.
pra̱tnaṃ sa̱dhastha̱manu̱ paśya̍mānaḥ.
ā tantu̍ma̱gnirdi̱vyaṃ ta̍tāna.
tvanna̱stantu̍ru̱ta setu̍ragne.
tvaṃ panthā̍ bhavasi deva̱yāna̍ḥ.
tvayā̎'gne pṛ̱ṣṭhaṃ va̱yamāru̍hema.
athā̍ de̱vaiḥ sa̍dha̱māda̍ṃ madema.
udu̍tta̱maṃ mu̍mugdhi naḥ.
vi pāśa̍ṃ madhya̱mañcṛ̍ta.
avā̍dha̱māni̍ jī̱vase̎..17..

va̱yaṃ so̍ma vra̱te tava̍.
mana̍sta̱nūṣu̱ bibhra̍taḥ.
pra̱jāva̍nto aśīmahi.
i̱ndrā̱ṇī de̱vī su̱bhagā̍ su̱patnī̎.
udaṃśe̍na pati̱vidye̍ jigāya.
tri̱ṃśada̍syā ja̱ghana̱ṃ yoja̍nāni.
u̱pastha̱ indra̱ṃ sthavi̍raṃ bibharti.
senā̍ ha̱ nāma̍ pṛthi̱vī dha̍nañja̱yā.
vi̱śvavya̍cā̱ adi̍ti̱ḥ sūrya̍tvak.
i̱ndrā̱ṇī de̱vī prā̱sahā̱ dadā̍nā..18..

sā no̍ de̱vī su̱havā̱ śarma̍ yacchatu.
ātvā̍'hārṣama̱ntara̍bhūḥ.
dhru̱vasti̱ṣṭhāvi̍cācaliḥ.
viśa̍stvā̱ sarvā̍ vāñchantu.
mā tvadrā̱ṣṭramadhi̍ bhraśat.
dhru̱vā dyaurdhru̱vā pṛ̍thi̱vī.
dhru̱vaṃ viśva̍mi̱daṃ jaga̍t.
dhru̱vā ha̱ parva̍tā i̱me.
dhru̱vo rājā̍ vi̱śāma̱yam.
i̱haivaidhi̱ mā vya̍thiṣṭhāḥ..19..

parva̍ta i̱vāvi̍cācaliḥ.
indra̍ ive̱ha dhru̱vasti̍ṣṭha.
i̱ha rā̱ṣṭramu̍ dhāraya.
a̱bhiti̍ṣṭha pṛtanya̱taḥ.
adha̍re santu̱ śatra̍vaḥ.
indra̍ iva vṛtra̱hā ti̍ṣṭha.
a̱paḥ kṣetrā̍ṇi sa̱ñjayan̍.
indra̍ eṇamadīdharat.
dhru̱vaṃ dhru̱veṇa̍ ha̱viṣā̎.
tasmai̍ de̱vā adhi̍bravan.
a̱yaṃ ca̱ brahma̍ṇa̱spati̍ḥ..20..

Anuvāka 3

juṣṭī̍ naro̱ brahma̍ṇā vaḥ pitṛ̱ṇām.
akṣa̍mavyaya̱ṃ na kilā̍riṣātha.
yacchakva̍rīṣu bṛha̱tā rave̍ṇa.
indre̱ śuṣma̱mada̍dhāthā vasiṣṭhāḥ.
pā̱va̱kā na̱ḥ sara̍svatī.
vāje̍bhirvā̱jinī̍vatī.
ya̱jñaṃ va̍ṣṭu dhi̱yā va̍suḥ.
sara̍svatya̱bhino̍ neṣi̱ vasya̍ḥ.
mā pa̍spharī̱ḥ paya̍sā̱ mā na̱ ādha̍k.
ju̱ṣasva̍ naḥ sa̱khyā̍ ve̱śyā̍ ca..21..

mā tvakṣetrā̱ṇyara̍ṇāni ganma.
vṛ̱ñje ha̱virnama̍sā ba̱ṟhira̱gnau.
ayā̍mi̱ srugghṛ̱tava̍tī suvṛ̱ktiḥ.
amya̍kṣi̱ sadma̱ sada̍ne pṛthi̱vyāḥ.
aśrā̍yi ya̱jñaḥ sūrye̱ na cakṣu̍ḥ.
i̱hārvāñca̱mati̍ hvaye.
indra̱ṃ jaitrā̍ya̱ jeta̍ve.
a̱smāka̍mastu̱ keva̍laḥ.
a̱rvāñca̱mindra̍ma̱muto̍ havāmahe.
yo go̱jiddha̍na̱jida̍śva̱jidyaḥ..22..

i̱maṃ no̍ ya̱jñaṃ vi̍ha̱ve ju̍ṣasva.
a̱sya ku̍rmo harivo me̱dina̍ṃ tvā.
asa̍mmṛṣṭo jāyase mātṛ̱voḥ śuci̍ḥ.
ma̱ndraḥ ka̱viruda̍tiṣṭho̱ viva̍svataḥ.
ghṛ̱tena̍ tvā vardhayannagna āhuta.
dhū̱maste̍ ke̱tura̍bhavaddi̱vi śri̱taḥ.
a̱gniragre̎ pratha̱mo de̱vatā̍nām.
saṃyā̍tānāmutta̱mo viṣṇu̍rāsīt.
yaja̍mānāya pari̱gṛhya̍ de̱vān.
dī̱kṣaye̱daṃ ha̱virā ga̍cchatannaḥ..23..

a̱gniśca̍ viṣṇo̱ tapa̍ utta̱maṃ ma̱haḥ.
dī̱kṣā̱pā̱lebhyo̱'vana̍ta̱ṃ hi śa̍krā.
viśvai̎rde̱vairya̱jñiyai̎ḥ saṃvidā̱nau.
dī̱kṣāma̱smai yaja̍mānāya dhattam.
pra tadviṣṇu̍ḥ stavate vī̱ryā̍ya.
mṛ̱go na bhī̱maḥ ku̍ca̱ro gi̍ri̱ṣṭhāḥ.
yasyo̱ruṣu̍ tri̱ṣu vi̱krama̍ṇeṣu.
adhi̍ kṣi̱yanti̱ bhuva̍nāni̱ viśvā̎.
nūmarto̍ dayate sani̱ṣyan yaḥ.
viṣṇa̍va urugā̱yāya̱ dāśa̍t..24..

pra yaḥ sa̱trācā̱ mana̍sā̱ yajā̍tai.
e̱tāva̍nta̱nnarya̍mā̱ vivā̍sāt.
vica̍krame pṛthi̱vīme̱ṣa e̱tām.
kṣetrā̍ya̱ viṣṇu̱rmanu̍ṣe daśa̱syan.
dhru̱vāso̍ asya kī̱rayo̱ janā̍saḥ.
u̱ru̱kṣi̱tiṃ su̱jani̍mā cakāra.
trirde̱vaḥ pṛ̍thi̱vīme̱ṣa e̱tām.
vica̍krame śa̱tarca̍saṃ mahi̱tvā.
pra viṣṇu̍rastu ta̱vasa̱stavī̍yān.
tve̱ṣaṃ hya̍sya̱ sthavi̍rasya̱ nāma̍..25..

hotā̍raṃ ci̱trara̍thamadhva̱rasya̍.
ya̱jñasya̍yajñasya ke̱tuṃ ruśa̍ntam.
pratya̍rdhiṃ de̱vasya̍devasya ma̱hnā.
śri̱yā tva̍gnimati̍thi̱ṃ janā̍nām.
ā no̱ viśvā̍bhirū̱tibhi̍ḥ sa̱joṣā̎ḥ.
brahma̍ juṣā̱ṇo ha̍ryaśva yāhi.
varī̍vṛja̱thsthavi̍rebhiḥ suśipra.
a̱sme dadha̱dvṛṣa̍ṇa̱ṃ śuṣma̍mindra.
indra̍ḥ suva̱ṟṣā ja̱naya̱nnahā̍ni.
ji̱gāyo̱śigbhi̱ḥ pṛta̍nā abhi̱ śrīḥ..26..

prāro̍caya̱nmana̍ve ke̱tumahnā̎m.
avi̍nda̱jjyoti̍rbṛha̱te raṇā̍ya.
aśvi̍nā̱vava̍se̱ nihva̍ye vām.
ā nū̱naṃ yā̍taṃ sukṛ̱tāya̍ viprā.
prā̱ta̱ryu̱ktena̍ su̱vṛtā̱ rathe̍na.
u̱pāga̍cchata̱mava̱sāga̍tannaḥ.
a̱vi̱ṣṭaṃ dhī̱ṣvaśvi̍nā na ā̱su.
pra̱jāva̱dreto̱ ahra̍yaṃ no astu.
āvā̎ṃ to̱ke tana̍ye̱ tūtu̍jānāḥ.
su̱ratnā̍so de̱vavī̍tiṃ gamema..27..

tvaṃ so̍ma̱ kratu̍bhiḥ su̱kratu̍rbhūḥ.
tvaṃ dakṣai̎ḥ su̱dakṣo̍ vi̱śvave̍dāḥ.
tvaṃ vṛṣā̍ vṛṣa̱tvebhi̍rmahi̱tvā.
dyu̱mnebhi̍rdyu̱mnya̍bhavo nṛ̱cakṣā̎ḥ.
aṣā̍ḍhaṃ yu̱thsu pṛta̍nāsu̱ paprim̎.
su̱va̱ṟṣāma̱phsvāṃ vṛ̱jana̍sya go̱pām.
bha̱re̱ṣu̱jāṃ su̍kṣi̱tiṃ su̱śrava̍sam.
jaya̍nta̱ṃ tvāmanu̍ madema soma.
bhavā̍ mi̱tro na śevyo̍ ghṛ̱tāsu̍tiḥ.
vibhū̍tadyumna eva̱ yā u̍ sa̱prathā̎ḥ..28..

adhā̍ te viṣṇo vi̱duṣā̍ ci̱dṛdhya̍ḥ.
stomo̍ ya̱jñasya̱ rādhyo̍ ha̱viṣma̍taḥ.
yaḥ pū̱rvyāya̍ ve̱dhase̱ navī̍yase.
su̱majjā̍naye̱ viṣṇa̍ve̱ dadā̍śati.
yo jā̱tama̱sya ma̍ha̱to ma̱hi bravā̎t.
sedu̱ śravo̍bhiryu̱jya̍ṃ cida̱bhya̍sat.
tamu̍ stotāraḥ pū̱rvyaṃ yathā̍ vi̱da ṛ̱tasya̍.
garbha̍ṃ ha̱viṣā̍ pipartana.
ā'sya̍ jā̱nanto̱ nāma̍ cidvivaktana.
bṛ̱hatte̍ viṣṇo suma̱tiṃ bha̍jāmahe..29..

i̱mā dhā̱nā ghṛ̍ta̱snuva̍ḥ.
harī̍ i̱hopa̍vakṣataḥ.
indra̍ṃ su̱khata̍me̱ rathe̎.
e̱ṣa bra̱hmā prate̍ma̱he.
vi̱dathe̍ śaṃsiṣa̱ṃ harī̎.
ya ṛ̱tviya̱ḥ prate̍ vanve.
va̱nuṣo̍ harya̱taṃ madam̎.
indro̱ nāma̍ ghṛ̱tannayaḥ.
hari̍bhi̱ścāru̱ seca̍te.
śru̱to ga̱ṇa ā tvā̍ viśantu..30..

hari̍varpasa̱ṅgira̍ḥ.
āca̍rṣaṇi̱prā vṛ̍ṣa̱bho janā̍nām.
rājā̍ kṛṣṭī̱nāṃ pu̍ruhū̱ta indra̍ḥ.
stu̱taśra̍va̱syannava̱sopa̍ma̱drik.
yu̱ktvā harī̱ vṛṣa̱ṇāyā̎hya̱rvāṅ.
pra yathsindha̍vaḥ prasa̱vaṃ yadāyan̍.
āpa̍ḥ samu̱draṃ ra̱thye̍va jagmuḥ.
ata̍ści̱dindra̱ḥ sada̍so̱ varī̍yān.
yadī̱ṃ soma̍ḥ pṛ̱ṇati̍ du̱gdho a̱ṃśuḥ.
hvayā̍masi̱ tvendra̍ yā̱hya̍rvāṅ..31..

ara̍nte̱ soma̍sta̱nuve̍ bhavāti.
śata̍krato mā̱daya̍svā su̱teṣu̍.
prāsmāṃ a̍va̱ pṛta̍nāsu̱ prayu̱thsu.
indrā̍ya̱ somā̎ḥ pra̱divo̱ vidā̍nāḥ.
ṛ̱bhuryebhi̱rvṛṣa̍parvā̱ vihā̍yāḥ.
pra̱ya̱myamā̍ṇā̱nprati̱ ṣū gṛ̍bhāya.
indra̱ piba̱ vṛṣa̍dhūtasya̱ vṛṣṇa̍ḥ.
ahe̍ḍamāna̱ upa̍yāhi ya̱jñam.
tubhya̍ṃ pavanta̱ inda̍vaḥ su̱tāsa̍ḥ.
gāvo̱ na va̍jrinthsva̱moko̱ accha̍..32..

indrā ga̍hi pratha̱mo ya̱jñiyā̍nām.
yā te̍ kā̱kuthsukṛ̍tā̱ yā vari̍ṣṭhā.
yayā̱ śaśva̱tpiba̍si̱ madhva̍ ū̱rmim.
tayā̍ pāhi̱ pra te̍ adhva̱ryura̍sthāt.
sante̱ vajro̍ vartatāmindra ga̱vyuḥ.
prā̱ta̱ryujā̱ vi bo̍dhaya.
aśvi̍nā̱veha ga̍cchatam.
a̱sya soma̍sya pī̱taye̎.
prā̱ta̱ryāvā̍ṇā pratha̱mā ya̍jadhvam.
pu̱rā gṛdhrā̱dara̍ruṣaḥ pibāthaḥ.
prā̱tarhi ya̱jñama̱śvinā̱ dadhā̍te.
praśa̍ṃsanti ka̱vaya̍ḥ pūrva̱bhāja̍ḥ.
prā̱tarya̍jadhvama̱śvinā̍ hinota.
na sā̱yama̍sti deva̱yā aju̍ṣṭam.
u̱tānyo a̱smadya̍jate̱ vicā̍yaḥ.
pūrva̍ḥ pūrvo̱ yaja̍māno̱ vanī̍yān..33..

Anuvāka 4

na̱kta̱ṃ jā̱tā'syo̍ṣadhe.
rāme̱ kṛṣṇe̱ asi̍kni ca.
i̱daṃ ra̍jani rajaya.
ki̱lāsa̍ṃ pali̱taṃ ca̱ yat.
ki̱lāsa̍ṃ ca pali̱taṃ ca̍.
niri̱to nā̍śayā̱ pṛṣa̍t.
ā na̱ḥ svo a̍śñutā̱ṃ varṇa̍ḥ.
parā̎ śve̱tāni̍ pātaya.
asi̍taṃ te ni̱laya̍nam.
ā̱sthāna̱masi̍ta̱ṃ tava̍..34..

asi̍kniyasyoṣadhe.
niri̱to nā̍śayā̱ pṛṣa̍t.
a̱sthi̱jasya̍ ki̱lāsa̍sya.
ta̱nū̱jasya̍ ca̱ yattva̱ci.
kṛ̱tyayā̍ kṛ̱tasya̱ brahma̍ṇā.
lakṣma̍ śve̱tama̍nīnaśam.
sarū̍pā̱ nāma̍ te mā̱tā.
sarū̍po̱ nāma̍ te pi̱tā.
sarū̍pā'syoṣadhe̱ sā.
sarū̍pami̱daṃ kṛ̍dhi..35..

śu̱naṃ hu̍vema ma̱ghavā̍na̱mindram̎.
a̱sminbhare̱ nṛta̍ma̱ṃ vāja̍sātau.
śṛ̱ṇvanta̍mu̱gramū̱taye̍ sa̱mathsu̍.
ghnanta̍ṃ vṛ̱trāṇi̍ sa̱ñjita̱ṃ dhanā̍nām.
dhū̱nu̱tha dyāṃ parva̍tāndā̱śuṣe̱ vasu̍.
ni vo̱ vanā̍ jihate̱ yāma̍ no bhi̱yā.
ko̱paya̍tha pṛthi̱vīṃ pṛ̍śñimātaraḥ.
yu̱dhe yadu̍grā̱ḥ pṛṣa̍tī̱rayu̍gdhvam.
prave̍payanti̱ parva̍tān.
vivi̍ñcanti̱ vana̱spatīn̍..36..

provā̍rata maruto du̱rmadā̍ iva.
devā̍sa̱ḥ sarva̍yā vi̱śā.
pu̱ru̱trā hi sa̱dṛṅṅasi̍.
viśo̱ viśvā̱ anu̍ pra̱bhu.
sa̱mathsu̍ tvā havāmahe.
sa̱mathsva̱gnimava̍se.
vā̱ja̱yanto̍ havāmahe.
vāje̍ṣu ci̱trarā̍dhasam.
saṅga̍cchadhva̱ṃ saṃva̍dadhvam.
saṃ vo̱ manā̍ṃsi jānatām..37..

de̱vā bhā̱gaṃ yathā̱ pūrve̎.
sa̱ñjā̱nā̱nā u̱pāsa̍ta.
sa̱mā̱no mantra̱ḥ sami̍tiḥ samā̱nī.
sa̱mā̱naṃ mana̍ḥ sa̱ha ci̱ttame̍ṣām.
sa̱mā̱naṃ keto̍ a̱bhi saṃ ra̍bhadhvam.
sa̱ṃjñāne̍na vo ha̱viṣā̍ yajāmaḥ.
sa̱mā̱nī va̱ ākū̍tiḥ.
sa̱mā̱nā hṛda̍yāni vaḥ.
sa̱mā̱nama̍stu vo̱ mana̍ḥ.
yathā̍ va̱ḥ susa̱hāsa̍ti..38..

sa̱ṃjñāna̍ṃ na̱ḥ svaiḥ.
sa̱ṃjñāna̱mara̍ṇaiḥ.
sa̱ṃjñāna̍maśvinā yu̱vam.
i̱hāsmāsu̱ niya̍cchatam.
sa̱ṃjñāna̍ṃ me̱ bṛha̱spati̍ḥ.
sa̱ṃjñāna̍ṃ savi̱tā ka̍rat.
sa̱ṃjñāna̍maśvinā yu̱vam.
i̱ha mahya̱ṃ ni ya̍cchatam.
upa̍ cchā̱yāmi̍va̱ ghṛṇe̎ḥ.
aga̍nma̱ śarma̍ te va̱yam..39..

agne̱ hira̍ṇyasandṛśaḥ.
ada̍bdhebhiḥ savitaḥ pā̱yubhi̱ṣṭvam.
śi̱vebhi̍ra̱dya pari̍pāhi no̱ gayam̎.
hira̍ṇyajihvaḥ suvi̱tāya̱ navya̍se.
rakṣā̱ māki̍rno a̱ghaśa̍ṃsa īśata.
made̍made̱ hi no̍ da̱duḥ.
yū̱thā gavā̍mṛju̱kratu̍ḥ.
saṅgṛ̍bhāya pu̱rūśa̱tā.
u̱bha̱yā ha̱styā vasu̍.
śi̱śī̱hi rā̱ya ā bha̍ra..40..

śipri̍nvājānāṃ pate.
śacī̍va̱stava̍ da̱ṃsanā̎.
ā tū na̍ indra bhājaya.
goṣvaśve̍ṣu śu̱bhruṣu̍.
sa̱hasre̍ṣu tuvīmagha.
yadde̍vā deva̱heḍa̍nam.
devā̍saścakṛ̱mā va̱yam.
ādi̍tyā̱stasmā̎nmā yū̱yam.
ṛ̱tasya̱rtena̍ muñcata.
ṛ̱tasya̱rtenā̍''dityāḥ..41..

yaja̍trā mu̱ñcate̱ha mā̎.
ya̱jñairvo̍ yajñavāhasaḥ.
ā̱śikṣa̍nto̱ na śe̍kima.
meda̍svatā̱ yaja̍mānāḥ.
sru̱cā''jye̍na̱ juhva̍taḥ.
a̱kā̱mā vo̍ viśvedevāḥ.
śikṣa̍nto̱ nopa̍ śekima.
yadi̱ divā̱ yadi̱ naktam̎.
ena̍ ena̱syoka̍rat.
bhū̱taṃ mā̱ tasmā̱dbhavya̍ṃ ca..42..

dru̱pa̱dādi̍va muñcatu.
dru̱pa̱dādi̱venmu̍mucā̱naḥ.
svi̱nnaḥ snā̱tvī malā̍diva.
pū̱taṃ pa̱vitre̍ṇe̱vā''jyam̎.
viśve̍ muñcantu̱ maina̍saḥ.
udva̱yaṃ tama̍sa̱spari̍.
paśya̍nto̱ jyoti̱rutta̍ram.
de̱vaṃ de̍va̱trā sūryam̎.
aga̍nma̱ jyoti̍rutta̱mam..43..

Anuvāka 5

vṛṣā̱ so a̱ṃśuḥ pa̍vate ha̱viṣmā̱nthsoma̍ḥ.
indra̍sya bhā̱ga ṛ̍ta̱yuḥ śa̱tāyu̍ḥ.
sa mā̱ vṛṣā̍ṇaṃ vṛṣa̱bhaṃ kṛ̍ṇotu.
pri̱yaṃ vi̱śāṃ sarva̍vīraṃ su̱vīram̎.
kasya̱ vṛṣā̍ su̱te sacā̎.
ni̱yutvā̎nvṛṣa̱bho ra̍ṇat.
vṛ̱tra̱hā soma̍pītaye.
yaste̍ śṛṅga vṛṣonapāt.
praṇa̍pātkuṇḍa̱pāyya̍ḥ.
nya̍smindadhra̱ ā mana̍ḥ..44..

taṃ sa̱dhrīcī̍rū̱tayo̱ vṛṣṇi̍yāni.
pauṃsyā̍ni ni̱yuta̍ḥ saścu̱rindram̎.
sa̱mu̱draṃ na sindha̍va u̱kthaśu̍ṣmāḥ.
u̱ru̱vyaca̍sa̱ṅgira̱ ā vi̍śanti.
indrā̍ya̱ giro̱ ani̍śitasargāḥ.
a̱paḥ praira̍ya̱nthsaga̍rasya bu̱dhnāt.
yo akṣe̍ṇeva ca̱kriyā̱ śacī̍bhiḥ.
viṣva̍kta̱stambha̍ pṛthi̱vīmu̱ta dyām.
akṣo̍daya̱cchava̍sā̱ kṣāma̍bu̱dhnam.
vārṇavā̍ta̱stavi̍ṣībhi̱rindra̍ḥ..45..

dṛ̱ḍhānyau̎ghnādu̱śamā̍na̱ oja̍ḥ.
avā̍bhinatka̱kubha̱ḥ parva̍tānām.
ā no̍ agne suke̱tunā̎.
ra̱yiṃ vi̱śvāyu̍poṣasam.
mā̱rḍī̱kaṃ dhe̍hi jī̱vase̎.
tvaṃ so̍ma ma̱he bhagam̎.
tvaṃ yūna̍ ṛtāya̱te.
dakṣa̍ṃ dadhāsi jī̱vase̎.
ratha̍ṃ yuñjate ma̱ruta̍ḥ śu̱bhe su̱gam.
sūro̱ na mi̍trāvaruṇā̱ gavi̍ṣṭiṣu..46..

rajā̍ṃsi ci̱trā vica̍ranti ta̱nyava̍ḥ.
di̱vaḥ sa̍mrājā̱ paya̍sā na ukṣatam.
vāca̱ṃ sumi̍trāvaruṇā̱virā̍vatīm.
pa̱rjanya̍ści̱trāṃ va̍dati̱ tviṣī̍matīm.
a̱bhrā va̍sata marutaḥ sumā̱yayā̎.
dyāṃ va̍rṣayatamaru̱ṇāma̍re̱pasam̎.
ayu̍kta sa̱pta śu̱ndhyuva̍ḥ.
sūro̱ ratha̍sya na̱ptriya̍ḥ.
tābhi̍ryāti̱ svayu̍ktibhiḥ.
vahi̍ṣṭhebhirvi̱hara̍n yāsi̱ tantum̎..47..

a̱va̱vyaya̱nnasi̍taṃ deva̱ vasva̍ḥ.
davi̍dhvato ra̱śmaya̱ḥ sūrya̍sya.
carme̱vāvā̍dhu̱stamo̍ a̱phsva̍ntaḥ.
pa̱rjanyā̍ya̱ pra gā̍yata.
di̱vaspu̱trāya̍ mī̱ḍhuṣe̎.
sa no̍ ya̱vasa̍micchatu.
acchā̍ vada ta̱vasa̍ṃ gī̱rbhirā̱bhiḥ.
stu̱hi pa̱rjanya̱ṃ nama̱sā''vi̍vāsa.
kani̍kradadvṛṣa̱bho jī̱radā̍nuḥ.
reto̍ dadhā̱tvoṣa̍dhīṣu̱ garbham̎..48..

yo garbha̱moṣa̍dhīnām.
gavā̎ṃ kṛ̱ṇotyarva̍tām.
pa̱rjanya̍ḥ puru̱ṣīṇā̎m.
tasmā̱ idā̱sye̍ ha̱viḥ.
ju̱hotā̱ madhu̍mattamam.
iḍāṃ naḥ sa̱ṃyata̍ṃ karat.
ti̱sro yada̍gne śa̱rada̱stvāmit.
śuci̍ṃ ghṛ̱tena̱ śuca̍yaḥ sapa̱ryan.
nāmā̍ni ciddadhire ya̱jñiyā̍ni.
asū̍dayanta ta̱nuva̱ḥ sujā̍tāḥ..49..

indra̍śca naḥ śunāsīrau.
i̱maṃ ya̱jñaṃ mi̍mikṣatam.
garbha̍ṃ dhattaṃ sva̱staye̎.
yayo̍ri̱daṃ viśva̱ṃ bhuva̍namā vi̱veśa̍.
yayo̍rāna̱ndo nihi̍to̱ maha̍śca.
śunā̍sīrāvṛ̱tubhi̍ḥ saṃvidā̱nau.
indra̍vantau ha̱viri̱daṃ ju̍ṣethām.
āghā̱ye a̱gnimi̍ndha̱te.
stṛ̱ṇanti̍ ba̱ṟhirā̍nu̱ṣak.
yeṣā̱mindro̱ yuvā̱ sakhā̎.
agna̱ indra̍śca me̱dinā̎.
ha̱tho vṛ̱trāṇya̍pra̱ti.
yu̱vaṃ hi vṛ̍tra̱hanta̍mā.
yābhyā̱ṃ suva̱raja̍ya̱nnagra̍ e̱va.
yāvā̍tastha̱turbhuva̍nasya̱ madhye̎.
praca̍rṣa̱ṇī vṛ̍ṣaṇā̱ vajra̍bāhū.
a̱gnī indrā̍vṛtra̱haṇā̍ huve vām..50..

Anuvāka 6

u̱ta na̍ḥ pri̱yā pri̱yāsu̍.
sa̱ptasvasā̱ suju̍ṣṭā.
sara̍svatī̱ stomyā̍'bhūt.
i̱mā juhvā̍nāyu̱ṣmadā namo̍bhiḥ.
prati̱ stoma̍ṃ sarasvati juṣasva.
tava̱ śarma̍npri̱yata̍me̱ dadhā̍nāḥ.
upa̍stheyāma śara̱ṇaṃ na vṛ̱kṣam.
trīṇi̍ pa̱dā vica̍krame.
viṣṇu̍rgo̱pā adā̎bhyaḥ.
tato̱ dharmā̍ṇi dhā̱rayan̍..51..

tada̍sya pri̱yama̱bhi pātho̍ aśyām.
naro̱ yatra̍ deva̱yavo̱ mada̍nti.
u̱ru̱kra̱masya̱ sa hi bandhu̍ri̱tthā.
viṣṇo̎ḥ pa̱de pa̍ra̱me madhva̱ uthsa̍ḥ.
kra̱tvā̱dā a̍sthu̱ śreṣṭha̍ḥ.
a̱dya tvā̍ va̱nvanthsu̱rekṇā̎ḥ.
marta̍ ānāśa suvṛ̱ktim.
i̱mā bra̍hma brahmavāha.
pri̱yā ta̱ ā ba̱ṟhiḥ sī̍da.
vī̱hi sū̍ra puro̱ḍāśam̎..52..

upa̍ naḥ sū̱navo̱ gira̍ḥ.
śṛ̱ṇvantva̱mṛta̍sya̱ ye.
su̱mṛ̱ḍī̱kā bha̍vantu naḥ.
a̱dyā no̍ deva savitaḥ.
pra̱jāva̍thsāvī̱ḥ saubha̍gam.
parā̍ du̱ḥṣvapni̍yaṃ suva.
viśvā̍ni deva savitaḥ.
du̱ri̱tāni̱ parā̍ suva.
yadbha̱draṃ tanma̱ ā su̍va.
śuci̍ma̱rkairbṛha̱spatim̎..53..

a̱dhva̱reṣu̍ namasyata.
a̱nā̱myoja̱ ā ca̍ke.
yā dhā̱raya̍nta de̱vā su̱dakṣā̱ dakṣa̍pitārā.
a̱su̱ryā̍ya̱ prama̍hasā.
sa it kṣeti̱ sudhi̍ta̱ oka̍si̱ sve.
tasmā̱ iḍā̍ pinvate viśva̱dānī̎.
tasmai̱ viśa̍ḥ sva̱yame̱vāna̍manti.
yasmi̍nbra̱hmā rāja̍ni̱ pūrva̱ eti̍.
sakū̍timindra̱ sacyu̍tim.
sacyu̍tiṃ ja̱ghana̍cyutim..54..

ka̱nātkā̱bhānna̱ ā bha̍ra.
pra̱ya̱phsyanni̍va sa̱kthyau̎.
vi na̍ indra̱ mṛdho̍ jahi.
kanī̍khunadiva sā̱payan̍.
a̱bhi na̱ḥ suṣṭu̍tiṃ naya.
pra̱jāpa̍tiḥ stri̱yāṃ yaśa̍ḥ.
mu̱ṣkayo̍radadhā̱thsapam̎.
kāma̍sya̱ tṛpti̍māna̱ndam.
tasyā̎gne bhājaye̱ha mā̎.
moda̍ḥ pramo̱da ā̍na̱ndaḥ..55..

mu̱ṣkayo̱rnihi̍ta̱ḥ sapa̍ḥ.
sṛ̱tveva̱ kāma̍sya tṛpyāṇi.
dakṣi̍ṇānāṃ pratigra̱he.
mana̍saści̱ttamākū̍tim.
vā̱caḥ sa̱tyama̍śīmahi.
pa̱śū̱nāṃ rū̱pamanna̍sya.
yaśa̱ḥ śrīḥ śra̍yatā̱ṃ mayi̍.
yathā̱'hama̱syā atṛ̍paṃ stri̱yai pumān̍.
yathā̱ strī tṛpya̍ti pu̱ṃsi pri̱ye pri̱yā.
e̱vaṃ bhaga̍sya tṛpyāṇi..56..

ya̱jñasya̱ kāmya̍ḥ pri̱yaḥ.
dadā̱mītya̱gnirva̍dati.
tatheti̍ vā̱yurā̍ha̱ tat.
hanteti̍ sa̱tyaṃ ca̱ndramā̎ḥ.
ā̱di̱tyaḥ sa̱tyamomiti̍.
āpa̱stathsa̱tyamā bha̍ran.
yaśo̍ ya̱jñasya̱ dakṣi̍ṇām.
a̱sau me̱ kāma̱ḥ samṛ̍ddhyatām.
na hi spaśa̱mavi̍danna̱nyama̱smāt.
vai̱śvā̱na̱rātpu̍rae̱tāra̍ma̱gneḥ..57..

athe̍mamanthanna̱mṛta̱mamū̍rāḥ.
vai̱śvā̱na̱raṃ kṣe̎tra̱jityā̍ya de̱vāḥ.
yeṣā̍mi̱me pūrve̱ armā̍sa̱ āsan̍.
a̱yū̱pāḥ sadma̱ vibhṛ̍tā pu̱rūṇi̍.
vaiśvā̍nara̱ tvayā̱ te nu̱ttāḥ.
pṛ̱thi̱vīma̱nyāma̱bhita̍sthu̱rjanā̍saḥ.
pṛ̱thi̱vīṃ mā̱tara̍ṃ ma̱hīm.
a̱ntari̍kṣa̱mupa̍ bruve.
bṛ̱ha̱tīmū̱taye̱ divam̎.
viśva̍ṃ bibharti pṛthi̱vī..58..

a̱ntari̍kṣa̱ṃ vi pa̍prathe.
du̱he dyaurbṛ̍ha̱tī paya̍ḥ.
na tā na̍śanti̱ na da̍bhāti̱ taska̍raḥ.
nainā̍ ami̱tro vyathi̱rāda̍dharṣati.
de̱vāṃśca̱ yābhi̱ryaja̍te̱ dadā̍ti ca.
jyogittābhi̍ḥ sacate̱ gopa̍tiḥ sa̱ha.
na tā arvā̍ re̱ṇuka̍kāṭo aśñute.
na sa̍ṃskṛta̱tramupa̍ yanti̱ tā a̱bhi.
u̱ru̱gā̱yamabha̍ya̱ṃ tasya̱ tā anu̍.
gāvo̱ martya̍sya̱ vi ca̍ranti̱ yajva̍naḥ..59..

rātrī̱ vya̍khyadāya̱tī.
pu̱ru̱trā de̱vya̍kṣabhi̍ḥ.
viśvā̱ adhi̱ śriyo̍'dhita.
upa̍ te̱ gā i̱vāka̍ram.
vṛ̱ṇī̱ṣva du̍hitardivaḥ.
rātrī̱ stoma̱ṃ na ji̱gyuṣī̎.
de̱vīṃ vāca̍majanayanta de̱vāḥ.
tāṃ vi̱śvarū̍pāḥ pa̱śavo̍ vadanti.
sā no̍ ma̱ndreṣa̱mūrja̱ṃ duhā̍nā.
dhe̱nurvāga̱smānupa̱ suṣṭu̱taitu̍..60..

yadvāgvada̍ntyaviceta̱nāni̍.
rāṣṭrī̍ de̱vānāṃ niṣa̱sāda̍ ma̱ndrā.
cata̍sra̱ ūrja̍ṃ duduhe̱ payā̍ṃsi.
kva̍ svidasyāḥ para̱maṃ ja̍gāma.
gau̱rī mi̍māya sali̱lāni̱ takṣa̍tī.
eka̍padī dvi̱padī̱ sā catu̍ṣpadī.
a̱ṣṭāpa̍dī̱ nava̍padī babhū̱vuṣī̎.
sa̱hasrā̎kṣarā para̱me vyo̍man.
tasyā̍ṃ samu̱drā adhi̱ vikṣa̍ranti.
tena̍ jīvanti pra̱diśa̱ścata̍sraḥ..61..

tata̍ḥ kṣaratya̱kṣaram̎.
tadviśva̱mupa̍ jīvati.
indrā̱sūrā̍ ja̱naya̍nvi̱śvaka̍rmā.
ma̱rutvā̍ṃ astu ga̱ṇavā̎nthsajā̱tavān̍.
a̱sya snu̱ṣā śvaśu̍rasya̱ praśi̍ṣṭim.
sa̱patnā̱ vāca̱ṃ mana̍sā̱ upā̍satām.
indra̱ḥ sūro̍ atara̱drajā̍ṃsi.
snu̱ṣā sa̱patnā̱ śvaśu̍ro̱'yama̍stu.
a̱yaṃ śatrū̎ñjayatu̱ jarhṛ̍ṣāṇaḥ.
a̱yaṃ vāja̍ṃ jayatu̱ vāja̍sātau.
a̱gniḥ kṣa̍tra̱bhṛdani̍bhṛṣṭa̱moja̍ḥ.
sa̱ha̱sriyo̍ dīpyatā̱mapra̍yucchan.
vi̱bhrāja̍mānaḥ samidhā̱ na u̱graḥ.
ā'ntari̍kṣamaruha̱daga̱ndyām..62..

Anuvāka 7

vṛṣā̎'sya̱ṃśurvṛ̍ṣa̱bhāya̍ gṛhyase.
vṛṣā̱'yamu̱gro nṛ̱cakṣa̍se.
di̱vyaḥ ka̍rma̱ṇyo̍ hi̱to bṛ̱hannāma̍.
vṛ̱ṣa̱bhasya̱ yā ka̱kut.
vi̱ṣū̱vān vi̍ṣṇo bhavatu.
a̱yaṃ yo mā̍ma̱ko vṛṣā̎.
atho̱ indra̍ iva de̱vebhya̍ḥ.
vi bra̍vītu̱ jane̎bhyaḥ.
āyu̍ṣmanta̱ṃ varca̍svantam.
atho̱ adhi̍patiṃ vi̱śām..63..

a̱syāḥ pṛ̍thi̱vyā adhya̍kṣam.
i̱mami̍ndra vṛṣa̱bhaṃ kṛ̍ṇu.
yaḥ su̱śṛṅga̍ḥ suvṛṣa̱bhaḥ.
ka̱lyāṇo̱ droṇa̱ āhi̍taḥ.
kārṣī̍vala pragāṇena.
vṛ̱ṣa̱bheṇa̍ yajāmahe.
vṛ̱ṣa̱bheṇa̱ yaja̍mānāḥ.
akrū̍reṇeva sa̱rpiṣā̎.
mṛddha̍śca̱ sarvā̱ indre̍ṇa.
pṛta̍nāśca jayāmasi..64..

yasyā̱yamṛ̍ṣa̱bho ha̱viḥ.
indrā̍ya pariṇī̱yate̎.
jayā̍ti̱ śatru̍mā̱yantam̎.
atho̍ hanti pṛtanya̱taḥ.
nṛ̱ṇāmaha̍ pra̱ṇīrasa̍t.
agra̍ udbhinda̱tāma̍sat.
indra̱ śuṣma̍ṃ ta̱nuvā̱ mera̍yasva.
nī̱cā viśvā̍ a̱bhiti̍ṣṭhā̱bhimā̍tīḥ.
ni śṛ̍ṇīhyābā̱dhaṃ yo no̱ asti̍.
u̱ruṃ no̍ lo̱kaṃ kṛ̍ṇuhi jīradāno..65..

prehya̱bhi prehi̱ pra bha̍rā̱ saha̍sva.
mā vive̍no̱ vi śṛ̍ṇuṣvā̱ jane̍ṣu.
udī̍ḍi̱to vṛ̍ṣabha̱ tiṣṭha̱ śuṣmai̎ḥ.
indra̱ śatrū̎npu̱ro a̱smāka̍ yudhya.
agne̱ jetā̱ tvaṃ ja̍ya.
śatrū̎nthsahasa̱ oja̍sā.
vi śatrū̱ṉ vimṛdho̍ nuda.
e̱taṃ te̱ stoma̍ṃ tuvijāta̱ vipra̍ḥ.
ratha̱ṃ na dhīra̱ḥ svapā̍ atakṣam.
yadīda̍gne̱ prati̱tvaṃ de̍va̱ haryā̎ḥ..66..

suva̍rvatīra̱pa e̍nā jayema.
yo ghṛ̱tenā̱bhimā̍nitaḥ.
indra̱ jaitrā̍ya jajñiṣe.
sa na̱ḥ saṅkā̍su pāraya.
pṛ̱ta̱nā̱sāhye̍ṣu ca.
indro̍ jigāya pṛthi̱vīm.
a̱ntari̍kṣa̱ṃ suva̍rma̱hat.
vṛ̱tra̱hā pu̍ru̱ceta̍naḥ.
indro̍ jigāya̱ saha̍sā̱ sahā̍ṃsi.
indro̍ jigāya̱ pṛta̍nāni̱ viśvā̎..67..

indro̍ jā̱to vi puro̍ ruroja.
sa na̍ḥ para̱spā vari̍vaḥ kṛṇotu.
a̱yaṃ kṛ̱tnuragṛ̍bhītaḥ.
vi̱śva̱jidu̱dbhidithsoma̍ḥ.
ṛṣi̱rvipra̱ḥ kāvye̍na.
vā̱yura̍gre̱gā ya̍jña̱prīḥ.
sā̱kaṅga̱nmana̍sā ya̱jñam.
śi̱vo ni̱yudbhi̍ḥ śi̱vābhi̍ḥ.
vāyo̍ śu̱kro a̍yāmi te.
madhvo̱ agra̱ṃ divi̍ṣṭiṣu..68..

ā yā̍hi̱ soma̍ pītaye.
svā̱ru̱ho de̍va ni̱yutva̍tā.
i̱mami̍ndra vardhaya kṣa̱triyā̍ṇām.
a̱yaṃ vi̱śāṃ vi̱śpati̍rastu̱ rājā̎.
a̱smā i̍ndra̱ mahi̱ varcā̍ṃsi dhehi.
a̱va̱rcasa̍ṃ kaṇuhi̱ śatru̍masya.
i̱mamā bha̍ja̱ grāme̱ aśve̍ṣu̱ goṣu̍.
nira̱muṃ bha̍ja̱ yo̍'mitro̍ asya.
varṣma̍n kṣa̱trasya̍ ka̱kubhi̍ śrayasva.
tato̍ na u̱gro vi bha̍jā̱ vasū̍ni..69..

a̱sme dyā̍vāpṛthivī̱ bhūri̍ vā̱mam.
sandu̍hāthāṃ gharma̱dughe̍va dhe̱nuḥ.
a̱yaṃ rājā̎ pri̱ya indra̍sya bhūyāt.
pri̱yo gavā̱moṣa̍dhīnāmu̱tāpām.
yu̱najmi̍ ta utta̱rāva̍nta̱mindram̎.
yena̱ jayā̍si̱ na parā̱ jayā̍sai.
sa tvā̍'karekavṛṣa̱bhaṃ svānā̎m.
atho̍ rājannutta̱maṃ mā̍na̱vānā̎m.
utta̍ra̱stvamadha̍re te sa̱patnā̎ḥ.
eka̍vṛṣā̱ indra̍sakhā jigī̱vān..70..

viśvā̱ āśā̱ḥ pṛta̍nāḥ sa̱ñjaya̱ṃ jayan̍.
a̱bhi ti̍ṣṭha śatrūya̱taḥ sa̍hasva.
tubhya̍ṃ bharanti kṣi̱tayo̍ yaviṣṭha.
ba̱lima̍gne̱ anti̍ta̱ ota dū̱rāt.
ā bhandi̍ṣṭhasya suma̱tiṃ ci̍kiddhi.
bṛ̱hatte̍ agne̱ mahi̱ śarma̍ bha̱dram.
yo de̱hyo ana̍mayadvadha̱snaiḥ.
yo arya̍patnīru̱ṣasa̍śca̱kāra̍.
sa ni̱rudhyā̱ nahu̍ṣo ya̱hvo a̱gniḥ.
viśa̍ścakre bali̱hṛta̱ḥ saho̍bhiḥ..71..

pra sa̱dyo a̍gne̱ atye̎ṣya̱nyān.
ā̱viryasmai̱ cāru̍taro ba̱bhūtha̍.
ī̱ḍenyo̍ vapu̱ṣyo̍ vi̱bhāvā̎.
pri̱yo vi̱śāmati̍thi̱rmānu̍ṣīṇām.
brahma̍jyeṣṭhā vī̱ryā̍ sambhṛ̍tāni.
brahmāgre̱ jyeṣṭha̱ṃ diva̱mā ta̍tāna.
ṛ̱tasya̱ brahma̍ pratha̱mota ja̍jñe.
tenā̍rhati̱ brahma̍ṇā̱ spardhi̍tu̱ṅkaḥ.
brahma̱ sruco̍ ghṛ̱tava̍tīḥ.
brahma̍ṇā̱ svara̍vo mi̱tāḥ..72..

brahma̍ ya̱jñasya̱ tanta̍vaḥ.
ṛ̱tvijo̱ ye ha̍vi̱ṣkṛta̍ḥ.
śṛṅgā̍ṇī̱vecchṛ̱ṅgiṇā̱ṃ sanda̍dṛśrire.
ca̱ṣāla̍vanta̱ḥ svara̍vaḥ pṛthi̱vyām.
te de̱vāsa̱ḥ svara̍vastasthi̱vāṃsa̍ḥ.
nama̱ḥ sakhi̍bhyaḥ sa̱nnānmā'va̍gāta.
a̱bhi̱bhūra̱gnira̍tara̱drajā̍ṃsi.
spṛdho̍ vi̱hatya̱ pṛta̍nā abhi̱śrīḥ.
ju̱ṣā̱ṇo ma̱ āhu̍tiṃ māmahiṣṭa.
ha̱tvā sa̱patnā̱ṉ vari̍vaskarannaḥ.
īśā̍naṃ tvā̱ bhuva̍nānāmabhi̱śriyam̎.
staumya̍gna uru̱kṛta̍ṃ su̱vīram̎.
ha̱virju̍ṣā̱ṇaḥ sa̱patnā̍ṃ abhi̱bhūra̍si.
ja̱hi śatrū̱ṃ rapa̱ mṛdho̍ nudasva..73..

Anuvāka 8

sa pra̍tna̱vannavī̍yasā.
agne̎ dyu̱mnena̍ sa̱ṃyatā̎.
bṛ̱hatta̍tantha bhā̱nunā̎.
nava̱ṃ nu stoma̍ma̱gnaye̎.
di̱vaḥ śye̱nāya̍ jījanam.
vaso̎ḥ ku̱vidva̱nāti̍ naḥ.
svā̱ru̱hā yasya̱ śriyo̍ dṛ̱śe.
ra̱yirvī̱rava̍to yathā.
agre̍ ya̱jñasya̱ ceta̍taḥ.
adā̎bhyaḥ purae̱tā..74..

a̱gnirvi̱śāṃ mānu̍ṣīṇām.
tūrṇī̱ ratha̱ḥ sadā̱ nava̍ḥ.
nava̱ṃ somā̍ya vā̱jine̎.
ājya̱ṃ paya̍so'jani.
juṣṭa̱ṃ śuci̍tama̱ṃ vasu̍.
nava̍ṃ soma juṣasva naḥ.
pī̱yūṣa̍sye̱ha tṛ̍pṇuhi.
yaste̍ bhā̱ga ṛ̱tā va̱yam.
nava̍sya soma te va̱yam.
ā su̍ma̱tiṃ vṛ̍ṇīmahe..75..

sa no̍ rāsva saha̱sriṇa̍ḥ.
nava̍ṃ ha̱virju̍ṣasva naḥ.
ṛ̱tubhi̍ḥ soma̱ bhūta̍mam.
tada̱ṅga prati̍harya naḥ.
rāja̎nthsoma sva̱staye̎.
nava̱ṃstoma̱nnava̍ṃ ha̱viḥ.
i̱ndrā̱gnibhyā̱ṃ ni ve̍daya.
tajju̍ṣetā̱ṃ sace̍tasā.
śuci̱ṃ nu stoma̱ṃ nava̍jātama̱dya.
indrā̎gnī vṛtrahaṇā ju̱ṣethā̎m..76..

u̱bhā hi vā̍ṃ su̱havā̱ joha̍vīmi.
tā vāja̍ṃ sa̱dya u̍śa̱te dheṣṭhā̎.
a̱gnirindro̱ nava̍sya naḥ.
a̱sya ha̱vyasya̍ tṛpyatām.
i̱ha de̱vau sa̍ha̱sriṇau̎.
ya̱jñaṃ na̱ ā hi gaccha̍tām.
vasu̍mantaṃ suva̱rvidam̎.
a̱sya ha̱vyasya̍ tṛpyatām.
a̱gnirindro̱ nava̍sya naḥ.
viśvā̎nde̱vāṃsta̍rpayata..77..

ha̱viṣo̱'sya nava̍sya naḥ.
su̱va̱rvido̱ hi ja̍jñi̱re.
edaṃ ba̱ṟhiḥ su̱ṣṭarī̍mā̱ nave̍na.
a̱yaṃ ya̱jño yaja̍mānasya bhā̱gaḥ.
a̱yaṃ ba̍bhūva̱ bhuva̍nasya̱ garbha̍ḥ.
viśve̍ de̱vā i̱dama̱dyāga̍miṣṭhāḥ.
i̱me nu dyāvā̍pṛthi̱vī sa̱mīcī̎.
ta̱nvā̱ne ya̱jñaṃ pu̍ru̱peśa̍sandhi̱yā.
ā'smai̍ pṛṇītā̱ṃ bhuva̍nāni̱ viśvā̎.
pra̱jāṃ puṣṭi̍ma̱mṛta̱ṃ nave̍na..78..

i̱me dhe̱nū a̱mṛta̱ṃ ye du̱hāte̎.
paya̍svatyutta̱rāme̍tu̱ puṣṭi̍ḥ.
i̱maṃ ya̱jñaṃ ju̱ṣamā̍ṇe̱ nave̍na.
sa̱mīcī̱ dyāvā̍pṛthi̱vī ghṛ̱tācī̎.
yavi̍ṣṭho havya̱vāha̍naḥ.
ci̱trabhā̍nurghṛ̱tāsu̍tiḥ.
nava̍jāto̱ vi ro̍case.
agne̱ tatte̍ mahitva̱nam.
tvama̍gne de̱vatā̎bhyaḥ.
bhā̱ge de̍va̱ na mī̍yase..79..

sa e̍nā vi̱dvān ya̍kṣyasi.
nava̱ṃ stoma̍ṃ juṣasva naḥ.
a̱gniḥ pra̍tha̱maḥ prāśñā̍tu.
sa hi veda̱ yathā̍ ha̱viḥ.
śi̱vā a̱smabhya̱moṣa̍dhīḥ.
kṛ̱ṇotu̍ vi̱śvaca̍rṣaṇiḥ.
bha̱drānna̱ḥ śreya̱ḥ sama̍naiṣṭa devāḥ.
tvayā̍'va̱sena̱ sama̍śīmahi tvā.
sa no̍ mayo̱bhūḥ pi̍to̱ ā vi̍śasva.
śaṃ to̱kāya̍ ta̱nuve̎ syo̱naḥ.
e̱tamu̱ tyaṃ madhu̍nā̱ saṃyu̍ta̱ṃ yavam̎.
sara̍svatyā̱ adhi̍ma̱nāva̍carkṛṣuḥ.
indra̍ āsī̱thsīra̍patiḥ śa̱takra̍tuḥ.
kī̱nāśā̍ āsanma̱ruta̍ḥ su̱dāna̍vaḥ..80..

Anuvāka 1

prā̱ṇo ra̍kṣati̱ viśva̱meja̍t.
iryo̍ bhū̱tvā ba̍hu̱dhā ba̱hūni̍.
sa ithsarva̱ṃ vyā̍naśe.
yo de̱vo de̱veṣu̍ vi̱bhūra̱ntaḥ.
āvṛ̍dū̱dāt kṣetriya̍dhva̱gadvṛṣā̎.
tamitprā̱ṇaṃ mana̱sopa̍ śikṣata.
agra̍ṃ de̱vānā̍mi̱dama̍ttu no ha̱viḥ.
mana̍sa̱ścitte̱dam.
bhū̱taṃ bhavya̍ṃ ca gupyate.
taddhi de̱veṣva̍gri̱yam..1..

ā na̍ etu puraśca̱ram.
sa̱ha de̱vairi̱maṃ havam̎.
mana̱ḥ śreya̍siśreyasi.
karma̍n ya̱jñapa̍ti̱ṃ dadha̍t.
ju̱ṣatā̎ṃ me̱ vāgi̱daṃ ha̱viḥ.
vi̱rāḍde̱vī pu̱rohi̍tā.
ha̱vya̱vāḍana̍pāyinī.
yayā̍ rū̱pāṇi̍ bahu̱dhā vada̍nti.
peśā̍ṃsi de̱vāḥ pa̍ra̱me ja̱nitre̎.
sā no̍ vi̱rāḍana̍pasphurantī..2..

vāgde̱vī ju̍ṣatāmi̱daṃ ha̱viḥ.
cakṣu̍rde̱vānā̱ṃ jyoti̍ra̱mṛte̱ nya̍ktam.
a̱sya vi̱jñānā̍ya bahu̱dhā nidhī̍yate.
tasya̍ su̱mnama̍śīmahi.
mā no̍ hāsīdvicakṣa̱ṇam.
āyu̱rinna̱ḥ pratī̎ryatām.
ana̍ndhā̱ścakṣu̍ṣā va̱yam.
jī̱vā jyoti̍raśīmahi.
suva̱rjyoti̍ru̱tāmṛtam̎.
śrotre̍ṇa bha̱dramu̱ta śṛ̍ṇvanti sa̱tyam.
śrotre̍ṇa̱ vāca̍ṃ bahu̱dhodyamā̍nām.
śrotre̍ṇa̱ moda̍śca̱ maha̍śca śrūyate.
śrotre̍ṇa̱ sarvā̱ diśa̱ ā śṛ̍ṇomi.
yena̱ prācyā̍ u̱ta da̍kṣi̱ṇā.
pra̱tīcyai̍ di̱śaḥ śṛ̱ṇvantyu̍tta̱rāt.
tadicchrotra̍ṃ bahu̱dhodyamā̍nam.
a̱rānna ne̱miḥ pari̱ sarva̍ṃ babhūva..3..

Anuvāka 2

u̱dehi̍ vāji̱nyo a̍sya̱phsva̍ntaḥ.
i̱daṃ rā̱ṣṭramā vi̍śa sū̱nṛtā̍vat.
yo rohi̍to̱ viśva̍mi̱daṃ ja̱jāna̍.
sa no̍ rā̱ṣṭreṣu̱ sudhi̍tāndadhātu.
roha̍ṃroha̱ṃ rohi̍ta̱ āru̍roha.
pra̱jābhi̱rvṛddhi̍ṃ ja̱nuṣā̍mu̱pastham̎.
tābhi̱ḥ saṃra̍bdho avida̱thṣaḍu̱rvīḥ.
gā̱tuṃ pra̱paśya̍nni̱ha rā̱ṣṭramā'hā̎ḥ.
ā'hā̍rṣīdrā̱ṣṭrami̱ha rohi̍taḥ.
mṛdho̱ vyā̎stha̱dabha̍yaṃ no astu..4..

a̱smabhya̍ṃ dyāvāpṛthivī̱ śakva̍rībhiḥ.
rā̱ṣṭraṃ du̍hāthāmi̱ha re̱vatī̍bhiḥ.
vima̍marśa̱ rohi̍to vi̱śvarū̍paḥ.
sa̱mā̱ca̱krā̱ṇaḥ pra̱ruho̱ ruha̍śca.
diva̍ṃ ga̱tvāya̍ maha̱tā ma̍hi̱mnā.
vi no̍ rā̱ṣṭramu̍nattu̱ paya̍sā̱ svena̍.
yāste̱ viśa̱stapa̍sā saṃ babhū̱vuḥ.
gā̱ya̱traṃ va̱thsamanu̱ tāsta̱ ā'gu̍ḥ.
tāstvā vi̍śantu̱ maha̍sā̱ svena̍.
saṃ mā̍tā pu̱tro a̱bhye̍tu̱ rohi̍taḥ..5..

yū̱yamu̍grā marutaḥ pṛśñimātaraḥ.
indre̍ṇa sa̱yujā̱ pramṛ̍ṇītha̱ śatrūn̍.
ā vo̱ rohi̍to aśṛṇodabhidyavaḥ.
trisa̍ptāso marutaḥ svādusammudaḥ.
rohi̍to̱ dyāvā̍pṛthi̱vī ja̍jāna.
tasmi̱ṃstantu̍ṃ parame̱ṣṭhī ta̍tāna.
tasmi̍ñchiśriye a̱ja eka̍pāt.
adṛ̍ṃha̱ddyāvā̍pṛthi̱vī bale̍na.
rohi̍to̱ dyāvā̍pṛthi̱vī a̍dṛṃhat.
tena̱ suva̍ḥ stabhi̱taṃ tena̱ nāka̍ḥ..6..

so a̱ntari̍kṣe̱ raja̍so vi̱māna̍ḥ.
tena̍ de̱vāḥ suva̱ranva̍vindan.
su̱śeva̍ṃ tvā bhā̱navo̍ dīdi̱vāṃsam̎.
sama̍grāso ju̱hvo̍ jātavedaḥ.
u̱kṣanti̍ tvā vā̱jina̱mā ghṛ̱tena̍.
saṃsa̍magne yuvase̱ bhoja̍nāni.
agne̱ śardha̍ maha̱te saubha̍gāya.
tava̍ dyu̱mnānyu̍tta̱māni̍ santu.
sañjā̎spa̱tyaṃ su̱yama̱mā kṛ̍ṇuṣva.
śa̱trū̱ya̱tāma̱bhi ti̍ṣṭhā̱ mahā̍ṃsi..7..

Anuvāka 3

puna̍rna̱ indro̍ ma̱ghavā̍ dadātu.
dhanā̍ni śa̱kro dhanya̍ḥ su̱rādhā̎ḥ.
a̱rvā̱cīna̍ṃ kṛṇutāṃ yāci̱to mana̍ḥ.
śru̱ṣṭī no̍ a̱sya ha̱viṣo̍ juṣā̱ṇaḥ.
yāni̍ no'ji̱naṃ dhanā̍ni.
ja̱hartha̍ śūra ma̱nyunā̎.
indrānu̍vinda na̱stāni̍.
a̱nena̍ ha̱viṣā̱ puna̍ḥ.
indra̱ āśā̎bhya̱ḥ pari̍.
sarvā̱bhyo'bha̍yaṃ karat..8..

jetā̱ śatrū̱ṉ vica̍rṣaṇiḥ.
ākū̎tyai tvā̱ kāmā̍ya tvā sa̱mṛdhe̎ tvā.
pu̱ro da̍dhe amṛta̱tvāya̍ jī̱vase̎.
ākū̍tima̱syāva̍se.
kāma̍masya̱ samṛ̍ddhyai.
indra̍sya yuñjate̱ dhiya̍ḥ.
ākū̍tiṃ de̱vīṃ mana̍saḥ pu̱ro da̍dhe.
ya̱jñasya̍ mā̱tā su̱havā̍ me astu.
yadi̱cchāmi̱ mana̍sā̱ sakā̍maḥ.
vi̱deya̍mena̱ddhṛda̍ye̱ nivi̍ṣṭam..9..

seda̱gnira̱gnīṃratye̎tya̱nyān.
yatra̍ vā̱jī tana̍yo vī̱ḍupā̍ṇiḥ.
sa̱hasra̍pāthā a̱kṣarā̍ sa̱meti̍.
āśā̍nāṃ tvā''śāpā̱lebhya̍ḥ.
ca̱turbhyo̍ a̱mṛte̎bhyaḥ.
i̱daṃ bhū̱tasyādhya̍kṣebhyaḥ.
vi̱dhema̍ ha̱viṣā̍ va̱yam.
viśvā̱ āśā̱ madhu̍nā̱ saṃ sṛ̍jāmi.
a̱na̱mī̱vā āpa̱ oṣa̍dhayo bhavantu.
a̱yaṃ yaja̍māno̱ mṛdho̱ vya̍syatām..10..

agṛ̍bhītāḥ pa̱śava̍ḥ santu̱ sarve̎.
a̱gniḥ somo̱ varu̍ṇo mi̱tra indra̍ḥ.
bṛha̱spati̍ḥ savi̱tā yaḥ sa̍ha̱srī.
pū̱ṣā no̱ gobhi̱rava̍sā̱ sara̍svatī.
tvaṣṭā̍ rū̱pāṇi̱ sama̍naktu ya̱jñaiḥ.
tvaṣṭā̍ rū̱pāṇi̱ dadha̍tī̱ sara̍svatī.
pū̱ṣā bhaga̍ṃ savi̱tā no̍ dadātu.
bṛha̱spati̱rdada̱dindra̍ḥ sa̱hasram̎.
mi̱tro dā̱tā varu̍ṇa̱ḥ somo̍ a̱gniḥ..11..

Anuvāka 4

ā no̍ bhara̱ bhaga̍mindra dyu̱mantam̎.
ni te̍ de̱ṣṇasya̍ dhīmahi prare̱ke.
u̱rva i̍va paprathe̱ kāmo̍ a̱sme.
tamāpṛ̍ṇā vasupate̱ vasū̍nām.
i̱maṃ kāma̍ṃ mandayā̱ gobhi̱raśvai̎ḥ.
ca̱ndrava̍tā̱ rādha̍sā pa̱pratha̍śca.
su̱va̱ryavo̍ ma̱tibhi̱stubhya̱ṃ viprā̎ḥ.
indrā̍ya̱ vāha̍ḥ kuśi̱kāso̍ akran.
indra̍sya̱ nu vī̱ryā̍ṇi̱ pravo̍cam.
yāni̍ ca̱kāra̍ pratha̱māni̍ va̱jrī..12..

aha̱nnahi̱manva̱pasta̍tarda.
prava̱kṣaṇā̍ abhina̱tparva̍tānām.
aha̱nnahi̱ṃ parva̍te śiśriyā̱ṇam.
tvaṣṭā̎'smai̱ vajra̍ṃ sva̱rya̍ntatakṣa.
vā̱śrā i̍va dhe̱nava̱ḥ syanda̍mānāḥ.
añja̍ḥ samu̱dramava̍ jagmu̱rāpa̍ḥ.
vṛ̱ṣā̱yamā̍ṇo'vṛṇīta̱ somam̎.
trika̍drukeṣvapibathsu̱tasya̍.
ā sāya̍kaṃ ma̱ghavā̍ datta̱ vajram̎.
aha̍nnenaṃ prathama̱jā mahī̍nām..13..

yadindrāha̍nprathama̱jā mahī̍nām.
ānmā̱yinā̱mami̍nā̱ḥ prota mā̱yāḥ.
āthsūrya̍ṃ ja̱naya̱ndyāmu̱ṣāsam̎.
tā̱dīknā̱ śatrū̱nna kilā̍vivithse.
aha̍nvṛ̱traṃ vṛ̍tra̱tara̱ṃ vyaṃsam̎.
indro̱ vajre̍ṇa maha̱tā va̱dhena̍.
skandhā̍ṃsīva̱ kuli̍śenā̱vivṛ̍kṇā.
ahi̍ḥ śayata upa̱pṛkpṛ̍thi̱vyām.
a̱yo̱dhyeva du̱rmada̱ ā hi ju̱hve.
ma̱hā̱vī̱raṃ tu̍vibā̱dhamṛ̍jī̱ṣam..14..

nātā̍rīrasya̱ samṛ̍tiṃ va̱dhānā̎m.
saṃ ru̱jānā̎ḥ pipiṣa̱ indra̍śatruḥ.
viśvo̱ vihā̍yā ara̱tiḥ.
vasu̍rdadhe̱ haste̱ dakṣi̍ṇe.
ta̱raṇi̱rna śi̍śrathat.
śra̱va̱sya̍yā̱ na śi̍śrathat.
viśva̍smā̱ idi̍ṣudhya̱se.
de̱va̱trā ha̱vyamūhi̍ṣe.
viśva̍smā̱ ithsu̱kṛte̱ vāra̍mṛṇvati.
a̱gnirdvārā̱ vyṛ̍ṇvati..15..

udu̱jjihā̍no a̱bhi kāma̍mī̱rayan̍.
pra̱pṛ̱ñcanviśvā̱ bhuva̍nāni pū̱rvathā̎.
ā ke̱tunā̱ suṣa̍middho̱ yaji̍ṣṭhaḥ.
kāma̍ṃ no agne a̱bhiha̍rya di̱gbhyaḥ.
ju̱ṣā̱ṇo ha̱vyama̱mṛte̍ṣu dū̱ḍhya̍ḥ.
ā no̍ ra̱yiṃ ba̍hu̱lāṃ goma̍tī̱miṣam̎.
ni dhe̍hi̱ yakṣa̍da̱mṛte̍ṣu̱ bhūṣan̍.
aśvi̍nā ya̱jñamāga̍tam.
dā̱śuṣa̱ḥ puru̍daṃsasā.
pū̱ṣā ra̍kṣatu no ra̱yim..16..

i̱maṃ ya̱jñama̱śvinā̍ va̱rdhaya̍ntā.
i̱mau ra̱yiṃ yaja̍mānāya dhattam.
i̱mau pa̱śūnra̍kṣatāṃ vi̱śvato̍ naḥ.
pū̱ṣā na̍ḥ pātu̱ sada̱mapra̍yacchan.
prate̍ ma̱he sa̍rasvati.
subha̍ge̱ vāji̍nīvati.
sa̱tya̱vāce̍ bhare ma̱tim.
i̱daṃ te̍ ha̱vyaṃ ghṛ̱tava̍thsarasvati.
sa̱tya̱vāce̱ prabha̍remā ha̱vīṃṣi̍.
i̱māni̍ te duri̱tā saubha̍gāni.
tebhi̍rva̱yaṃ su̱bhagā̍saḥ syāma..17..

Anuvāka 5

ya̱jño rā̱yo ya̱jña ī̍śe̱ vasū̍nām.
ya̱jñaḥ sa̱syānā̍mu̱ta su̍kṣitī̱nām.
ya̱jña i̱ṣṭaḥ pū̱rvaci̍ttiṃ dadhātu.
ya̱jño bra̍hma̱ṇvāṃ apye̍tu de̱vān.
a̱yaṃ ya̱jño va̍rdhatā̱ṃ gobhi̱raśvai̎ḥ.
i̱yaṃ vedi̍ḥ svapa̱tyā su̱vīrā̎.
i̱daṃ ba̱ṟhirati̍ ba̱ṟhīṃṣya̱nyā.
i̱maṃ ya̱jñaṃ viśve̍ avantu de̱vāḥ.
bhaga̍ e̱va bhaga̍vāṃ astu devāḥ.
tena̍ va̱yaṃ bhaga̍vantaḥ syāma..18..

taṃ tvā̍ bhaga̱ sarva̱ ijjo̍havīmi.
sa no̍ bhaga purae̱tā bha̍ve̱ha.
bhaga̱ praṇe̍ta̱rbhaga̱ satya̍rādhaḥ.
bhage̱māṃ dhiya̱muda̍va̱ dada̍nnaḥ.
bhaga̱ pra ṇo̍ janaya̱ gobhi̱raśvai̎ḥ.
bhaga̱ pra nṛbhi̍rnṛ̱vanta̍ḥ syāma.
śaśva̍tī̱ḥ samā̱ upa̍yanti lo̱kāḥ.
śaśva̍tī̱ḥ samā̱ upa̍ya̱ntyāpa̍ḥ.
i̱ṣṭaṃ pū̱rtaṃ śaśva̍tīnā̱ṃ samā̍nāṃ śāśva̱tena̍.
ha̱viṣe̱ṣṭvā'na̱ntaṃ lo̱kaṃ para̱mā ru̍roha..19..

i̱yame̱va sā yā pra̍tha̱mā vyauccha̍t.
sā rū̱pāṇi̍ kurute̱ pañca̍ de̱vī.
dve svasā̍rau vayata̱stantra̍me̱tat.
sa̱nā̱tana̱ṃ vita̍ta̱ṃ ṣaṇma̍yūkham.
avā̱nyāṃstantū̎nki̱rato̍ dha̱tto a̱nyān.
nāva̍pṛ̱jyāte̱ na ga̍māte̱ antam̎.
ā vo̍ yantūdavā̱hāso̍ a̱dya.
vṛṣṭi̱ṃ ye viśve̍ ma̱ruto̍ ju̱nanti̍.
a̱yaṃ yo a̱gnirma̍ruta̱ḥ sami̍ddhaḥ.
e̱taṃ ju̍ṣadhvaṃ kavayo yuvānaḥ..20..

dhā̱rā̱va̱rā ma̱ruto̍ dhṛ̱ṣṇuvo̍jasaḥ.
mṛ̱gā na bhī̱māsta̍vi̱ṣebhi̍rū̱rmibhi̍ḥ.
a̱gnayo̱ na śu̍śucā̱nā ṛ̍jī̱ṣiṇa̍ḥ.
bhrumi̱ndhama̍nta̱ upa̱ gā a̍vṛṇvata.
vi ca̍krame̱ trirde̱vaḥ.
ā ve̱dhasa̱ṃ nīla̍pṛṣṭhaṃ bṛ̱hantam̎.
bṛha̱spati̱ṃ sada̍ne sādayadhvam.
sā̱dadyo̍ni̱ṃ dama̱ ā dī̍di̱vāṃsam̎.
hira̍ṇyavarṇamaru̱ṣaṃ sa̍pema.
sa hi śuci̍ḥ śa̱tapa̍tra̱ḥ sa śu̱ndhyūḥ..21..

hira̍ṇyavāśīriṣi̱raḥ su̍va̱ṟṣāḥ.
bṛha̱spati̱ḥ sa svā̍ve̱śa ṛ̱ṣvāḥ.
pū̱rū sakhi̍bhya āsu̱tiṃ ka̍riṣṭhaḥ.
pūṣa̱ṃ stava̍ vra̱te va̱yam.
nari̍ṣyema ka̱dāca̱na.
sto̱tāra̍sta i̱ha sma̍si.
yāste̍ pūṣa̱nnā vo̍ a̱ntaḥ sa̍mu̱dre.
hi̱ra̱ṇyayī̍ra̱ntari̍kṣe̱ cara̍nti.
yābhi̍ryāsi dū̱tyāṃ sūrya̍sya.
kāme̍na kṛ̱taśrava̍ i̱cchamā̍naḥ..22..

ara̍ṇyā̱nyara̍ṇyānya̱sau.
yā preva̱ naśya̍si.
ka̱thā grāma̱ṃ na pṛ̍cchasi.
na tvā̱bhīri̍va vindatī(3).
vṛ̱ṣā̱ra̱vāya̱ vada̍te.
yadu̱pāva̍ti cicci̱kaḥ.
ā̱ghā̱ṭībhi̍riva dhā̱vayan̍.
a̱ra̱ṇyā̱nirma̍hīyate.
u̱ta gāva̍ ivādan.
u̱to veśme̍va dṛśyate..23..

u̱to a̍raṇyā̱niḥ sā̱yam.
śa̱ka̱ṭīri̍va sarjati.
gāma̱ṅgaiṣa̱ ā hva̍yati.
dārva̱ṅgaiṣa̱ upā̍vadhīt.
vasa̍nnaraṇyā̱nyāṃ sā̱yam.
akru̍kṣa̱diti̍ manyate.
na vā a̍raṇyā̱nirha̍nti.
a̱nyaścennābhi̱gaccha̍ti.
svā̱doḥ phala̍sya ja̱gdhvā.
yatra̱ kāma̱ṃ ni pa̍dyate.
āñja̍nagandhīṃ sura̱bhīm.
ba̱hva̱nnāmakṛ̍ṣīvalām.
prāhaṃ mṛ̱gāṇā̎ṃ mā̱taram̎.
a̱ra̱ṇyā̱nīma̍śaṃsiṣam..24..

Anuvāka 6

vārtra̍hatyāya̱ śava̍se.
pṛ̱ta̱nā̱sāhyā̍ya ca.
indra̱ tvā va̍rtayāmasi.
su̱brahmā̍ṇaṃ vī̱rava̍ntaṃ bṛ̱hantam̎.
u̱ruṃ ga̍bhī̱raṃ pṛ̱thubu̍dhnamindra.
śru̱tarṣi̍mu̱grama̍bhimāti̱ṣāham̎.
a̱smabhya̍ṃ ci̱traṃ vṛṣa̍ṇaṃ ra̱yiṃ dā̎ḥ.
kṣe̱tri̱yai tvā̱ nirṛ̍tyai tvā.
dru̱ho mu̍ñcāmi̱ varu̍ṇasya̱ pāśā̎t.
a̱nā̱gasa̱ṃ brahma̍ṇe tvā karomi..25..

śi̱ve te̱ dyāvā̍pṛthi̱vī u̱bhe i̱me.
śaṃ te̍ a̱gniḥ sa̱hādbhira̍stu.
śaṃ dyāvā̍pṛthi̱vī sa̱hauṣa̍dhībhiḥ.
śama̱ntari̍kṣaṃ sa̱ha vāte̍na te.
śaṃ te̱ cata̍sraḥ pra̱diśo̍ bhavantu.
yā daivī̱ścata̍sraḥ pra̱diśa̍ḥ.
vāta̍patnīra̱bhi sūryo̍ vica̱ṣṭe.
tāsāṃ tvā ja̱rasa̱ ā da̍dhāmi.
pra yakṣma̍ etu̱ nirṛ̍tiṃ parā̱caiḥ.
amo̍ci̱ yakṣmā̎dduri̱tādava̍rtyai..26..

dru̱haḥ pāśā̱nnirṛ̍tyai̱ coda̍moci.
ahā̱ ava̍rti̱mavi̍dathsyo̱nam.
apya̍bhūdbha̱dre su̍kṛ̱tasya̍ lo̱ke.
sūrya̍mṛ̱taṃ tama̍so̱ grāhyā̱ yat.
de̱vā amu̍ñca̱nnasṛ̍ja̱nvye̍nasaḥ.
e̱vama̱hami̱maṃ kṣe̎tri̱yājjā̍miśa̱ṃsāt.
dru̱ho mu̍ñcāmi̱ varu̍ṇasya̱ pāśā̎t.
bṛha̍spate yu̱vamindra̍śca̱ vasva̍ḥ.
di̱vyasye̍śāthe u̱ta pārthi̍vasya.
dha̱ttaṃ ra̱yiṃ stu̍va̱te kī̱raye̍cit..27..

yū̱yaṃ pā̍ta sva̱stibhi̱ḥ sadā̍ naḥ.
de̱vā̱yudha̱mindra̱mā johu̍vānāḥ.
vi̱śvā̱vṛdha̍ma̱bhi ye rakṣa̍māṇāḥ.
yena̍ ha̱tā dī̱rghamadhvā̍na̱māyan̍.
a̱na̱ntamartha̱mani̍varthsyamānāḥ.
yatte̍ sujāte hi̱mava̍thsu bheṣa̱jam.
ma̱yo̱bhūḥ śanta̍mā̱ yaddhṛ̱do'si̍.
tato̍ no dehi sībale.
a̱do gi̱ribhyo̱ adhi̱ yatpra̱dhāva̍si.
sa̱ṃśobha̍mānā ka̱nye̍va śubhre..28..

tāṃ tvā̱ mudga̍lā ha̱viṣā̍ vardhayanti.
sā na̍ḥ sībale ra̱yimā bhā̍jaye̱ha.
pūrva̍ṃ devā̱ apa̍reṇānu̱paśya̱ṃ janma̍bhiḥ.
janmā̱nyava̍rai̱ḥ parā̍ṇi.
vedā̍ni devā a̱yama̱smīti̱ mām.
a̱haṃ hi̱tvā śarī̍raṃ ja̱rasa̍ḥ pa̱rastā̎t.
prā̱ṇā̱pā̱nau cakṣu̱ḥ śrotram̎.
vāca̱ṃ mana̍si̱ sambhṛ̍tām.
hi̱tvā śarī̍raṃ ja̱rasa̍ḥ pa̱rastā̎t.
ā bhūti̱ṃ bhūti̍ṃ va̱yama̍śñavāmahai.
i̱mā e̱va tā u̱ṣaso̱ yāḥ pra̍tha̱mā vyaucchan̍.
tā de̱vya̍ḥ kurvate̱ pañca̍rū̱pā.
śaśva̍tī̱rnāva̍pṛjyanti.
na ga̍ma̱ntyantam̎..29..

Anuvāka 7

vasū̍nā̱ṃ tvā'dhī̍tena.
ru̱drāṇā̍mū̱rmyā.
ā̱di̱tyānā̱ṃ teja̍sā.
viśve̍ṣāṃ de̱vānā̱ṃ kratu̍nā.
ma̱rutā̱memnā̍ juhomi̱ svāhā̎.
a̱bhibhū̍tira̱hamāga̍mam.
indra̍sakhā svā̱yudha̍ḥ.
āsvāśā̍su du̱ṣṣaha̍ḥ.
i̱daṃ varco̍ a̱gninā̍ da̱ttamāgā̎t.
yaśo̱ bharga̱ḥ saha̱ ojo̱ bala̍ṃ ca..30..

dī̱rghā̱yu̱tvāya̍ śa̱taśā̍radāya.
prati̍gṛbhṇāmi maha̱te vī̱ryā̍ya.
āyu̍rasi vi̱śvāyu̍rasi.
sa̱rvāyu̍rasi̱ sarva̱māyu̍rasi.
sarva̍ṃ ma̱ āyu̍rbhūyāt.
sarva̱māyu̍rgeṣam.
bhūrbhuva̱ḥ suva̍ḥ.
a̱gnirdharme̍ṇānnā̱daḥ.
mṛ̱tyurdharme̱ṇānna̍patiḥ.
brahma̍ kṣa̱traṃ svāhā̎..31..

pra̱jāpa̍tiḥ praṇe̱tā.
bṛha̱spati̍ḥ purae̱tā.
ya̱maḥ panthā̎ḥ.
ca̱ndramā̎ḥ punara̱suḥ svāhā̎.
a̱gnira̍nnā̱do'nna̍patiḥ.
a̱nnādya̍ma̱smin ya̱jñe yaja̍mānāya dadātu̱ svāhā̎.
somo̱ rājā̱ rāja̍patiḥ.
rā̱jyama̱smin ya̱jñe yaja̍mānāya dadātu̱ svāhā̎.
varu̍ṇaḥ sa̱mrāṭthsa̱mrāṭpa̍tiḥ.
sāmrā̎jyama̱smin ya̱jñe yaja̍mānāya dadātu̱ svāhā̎..32..

mi̱traḥ kṣa̱traṃ kṣa̱trapa̍tiḥ.
kṣa̱trama̱smin ya̱jñe yaja̍mānāya dadātu̱ svāhā̎.
indro̱ bala̱ṃ bala̍patiḥ.
bala̍ma̱smin ya̱jñe yaja̍mānāya dadātu̱ svāhā̎.
bṛha̱spati̱rbrahma̱ brahma̍patiḥ.
brahmā̱smin ya̱jñe yaja̍mānāya dadātu̱ svāhā̎.
sa̱vi̱tā rā̱ṣṭraṃ rā̱ṣṭrapa̍tiḥ.
rā̱ṣṭrama̱smin ya̱jñe yaja̍mānāya dadātu̱ svāhā̎.
pū̱ṣā vi̱śāṃ viṭpa̍tiḥ.
viśa̍ma̱smin ya̱jñe yaja̍mānāya dadātu̱ svāhā̎.
sara̍svatī̱ puṣṭi̱ḥ puṣṭi̍patnī.
puṣṭi̍ma̱smin ya̱jñe yaja̍mānāya dadātu̱ svāhā̎.
tvaṣṭā̍ paśū̱nāṃ mi̍thu̱nānā̍ṃ rūpa̱kṛdrū̱papa̍tiḥ.
ru̱peṇā̱smin ya̱jñe yaja̍mānāya pa̱śūnda̍dātu̱ svāhā̎..33..

Anuvāka 8

sa ī̎ṃ pāhi̱ ya ṛ̍jī̱ṣī taru̍traḥ.
yaḥ śipra̍vānvṛṣa̱bho yo ma̍tī̱nām.
yo go̎tra̱bhidva̍jra̱bhṛdyo ha̍ri̱ṣṭhāḥ.
sa i̍ndra ci̱trāṃ a̱bhi tṛ̍ndhi̱ vājān̍.
ā te̱ śuṣmo̍ vṛṣa̱bha e̍tu pa̱ścāt.
otta̱rāda̍dha̱rāgā pu̱rastā̎t.
ā vi̱śvato̍ a̱bhisame̎tva̱rvāṅ.
indra̍ dyu̱mnaṃ suva̍rvaddhehya̱sme.
proṣva̍smai purora̱tham.
indrā̍ya śū̱ṣama̍rcata..34..

a̱bhīke̍ cidu loka̱kṛt.
sa̱ṅge sa̱mathsu̍ vṛtra̱hā.
a̱smāka̍ṃ bodhi codi̱tā.
nabha̍ntāmanya̱keṣā̎m.
jyā̱kā adhi̱ dhanva̍su.
indra̍ṃ va̱yaṃ śu̍nā̱sīram̎.
a̱smin ya̱jñe ha̍vāmahe.
ā vājai̱rupa̍ no gamat.
indrā̍ya̱ śunā̱sīrā̍ya.
sru̱cā ju̍huta no ha̱viḥ..35..

ju̱ṣatā̱ṃ prati̱ medhi̍raḥ.
pra ha̱vyāni̍ ghṛ̱tava̍ntyasmai.
harya̍śvāya bharatā sa̱joṣā̎ḥ.
indra̱rtubhi̱rbrahma̍ṇā vāvṛdhā̱naḥ.
śu̱nā̱sī̱rī ha̱viri̱daṃ ju̍ṣasva.
vaya̍ḥ supa̱rṇā upa̍sedu̱rindram̎.
pri̱yame̍dhā̱ ṛṣa̍yo̱ nādha̍mānāḥ.
apa̍ dhvā̱ntamū̎rṇu̱hi pū̱rdhi cakṣu̍ḥ.
mu̱mu̱gdhya̍smānni̱dhaye̍'va ba̱ddhān.
bṛ̱hadindrā̍ya gāyata..36..

maru̍to vṛtra̱hanta̍mam.
yena̱ jyoti̱raja̍nayannṛtā̱vṛdha̍ḥ.
de̱vaṃ de̱vāya̱ jāgṛ̍vi.
kāmi̱haikā̱ḥ ka i̱me pa̍ta̱ṅgāḥ.
mā̱nthā̱lāḥ kuli̱pari̍māpatanti.
anā̍vṛtainā̱npradha̍mantu de̱vāḥ.
saupa̍rṇa̱ṃ cakṣu̍sta̱nuvā̍ videya.
e̱vā va̍ndasva̱ varu̍ṇaṃ bṛ̱hantam̎.
na̱ma̱syādhīra̍ma̱mṛta̍sya go̱pām.
sa na̱ḥ śarma̍ tri̱varū̍tha̱ṃ viya̍ṃsat..37..

yū̱yaṃ pā̍ta sva̱stibhi̱ḥ sadā̍ naḥ.
nāke̍ supa̱rṇamupa̱ yatpata̍ntam.
hṛ̱dā vena̍nto a̱bhyaca̍kṣata tvā.
hira̍ṇyapakṣa̱ṃ varu̍ṇasya dū̱tam.
ya̱masya̱ yonau̍ śaku̱naṃ bhu̍ra̱ṇyum.
śaṃ no̍ de̱vīra̱bhiṣṭa̍ye.
āpo̍ bhavantu pī̱taye̎.
śaṃ yora̱bhi sra̍vantu naḥ.
īśā̍nā̱ vāryā̍ṇām.
kṣaya̍ntīścarṣaṇī̱nām..38..

a̱po yā̍cāmi bheṣa̱jam.
a̱phsu me̱ somo̍ abravīt.
a̱ntarviśvā̍ni bheṣa̱jā.
a̱gniṃ ca̍ vi̱śvaśa̍mbhuvam.
āpa̍śca vi̱śvabhe̍ṣajīḥ.
yada̱phsu te̍ sarasvati.
goṣvaśve̍ṣu̱ yanmadhu̍.
tena̍ me vājinīvati.
mukha̍maṅgdhi sarasvati.
yā sara̍svatī vaiśambha̱lyā..39..

tasyā̎ṃ me rāsva.
tasyā̎ste bhakṣīya.
tasyā̎ste bhūyiṣṭha̱bhājo̍ bhūyāsma.
a̱haṃ tvada̍smi̱ mada̍si̱ tvame̱tat.
mamā̍si̱ yoni̱stava̱ yoni̍rasmi.
mamai̱va sanvaha̍ ha̱vyānya̍gne.
pu̱traḥ pi̱tre lo̍ka̱kṛjjā̍tavedaḥ.
i̱haiva santatra̱ santa̍ṃ tvā'gne.
prā̱ṇena̍ vā̱cā mana̍sā bibharmi.
ti̱ro mā̱ santa̱māyu̱rmā prahā̍sīt..40..

jyoti̍ṣā tvā vaiśvāna̱reṇopa̍tiṣṭhe.
a̱yaṃ te̱ yoni̍rṛ̱tviya̍ḥ.
yato̍ jā̱to aro̍cathāḥ.
taṃ jā̱nanna̍gna̱ āro̍ha.
athā̍ no vardhayā ra̱yim.
yā te̍ agne ya̱jñiyā̍ ta̱nūstayehyāro̍hā̱tmā''tmānam̎.
acchā̱ vasū̍ni kṛ̱ṇvanna̱sme naryā̍ pu̱rūṇi̍.
ya̱jño bhū̱tvā ya̱jñamā sī̍da̱ svāṃ yonim̎.
jāta̍vedo̱ bhuva̱ ā jāya̍māna̱ḥ sakṣa̍ya̱ ehi̍.
u̱pāva̍roha jātaveda̱ḥ puna̱stvam..41..

de̱vebhyo̍ ha̱vyaṃ va̍ha naḥ prajā̱nan.
āyu̍ḥ pra̱jāṃ ra̱yima̱smāsu̍ dhehi.
aja̍sro dīdihi no duro̱ṇe.
tamindra̍ṃ johavīmi ma̱ghavā̍namu̱gram.
sa̱trā dadhā̍na̱mapra̍tiṣkuta̱ṃ śavā̍ṃsi.
maṃhi̍ṣṭho gī̱rbhirā ca̍ ya̱jñiyo̍'va̱varta̍t.
rā̱ye no̱ viśvā̍ su̱pathā̍ kṛṇotu va̱jrī.
trika̍drukeṣu mahi̱ṣo yavā̍śiraṃ tuvi̱śuṣma̍stṛ̱pat.
soma̍mapiba̱dviṣṇu̍nā su̱taṃ yathā'va̍śat.
sa ī̎ṃ mamāda̱ mahi̱ karma̱ karta̍ve ma̱hāmu̱rum..42..

saina̍ṃ saścadde̱vaṃ de̱vaḥ sa̱tyamindu̍ṃ sa̱tya indra̍ḥ.
vi̱dadyatī̍ sa̱ramā̍ ru̱gṇamadre̎ḥ.
mahi̱ pātha̍ḥ pū̱rvyaṃ sa̱ddhriya̍kkaḥ.
agra̍ṃ nayathsu̱padyakṣa̍rāṇām.
acchā̱ rava̍ṃ pratha̱mā jā̍na̱tīgā̎t.
vi̱dadgavya̍ṃ sa̱ramā̍ dṛ̱ḍhamū̱rvam.
yenā̱nuka̱ṃ mānu̍ṣī̱ bhoja̍te̱ viṭ.
ā ye viśvā̎ḥ svapa̱tyāni̍ ca̱kruḥ.
kṛ̱ṇvā̱nāso̍ amṛta̱tvāya̍ gā̱tum.
tvaṃ nṛbhi̍rnṛpate de̱vahū̍tau..43..

bhūrī̍ṇi vṛ̱tvā ha̍ryaśva haṃsi.
tvannida̍syu̱ñcumu̍rim.
dhuni̱ṃ cāsvā̍payo da̱bhīta̍ye su̱hantu̍.
e̱vā pā̍hi pra̱tnathā̱ manda̍tu tvā.
śru̱dhi brahma̍ vāvṛdhasvo̱ta gī̱rbhiḥ.
ā̱viḥ sūrya̍ṃ kṛṇu̱hi pī̱pihī̱ṣaḥ.
ja̱hi śatrū̍ṃ ra̱bhi gā i̍ndra tṛndhi.
agne̱ bādha̍sva̱ vi mṛdho̍ nudasva.
apāmī̍vā̱ apa̱ rakṣā̍ṃsi sedha.
a̱smāthsa̍mu̱drādbṛ̍ha̱to di̱vo na̍ḥ..44..

a̱pāṃ bhū̱māna̱mupa̍ naḥ sṛje̱ha.
yajña̱ prati̍ tiṣṭha suma̱tau su̱śevā̱ ā tvā̎.
vasū̍ni puru̱dhā vi̍śantu.
dī̱rghamāyu̱ryaja̍mānāya kṛ̱ṇvan.
athā̱mṛte̍na jari̱tāra̍maṅgdhi.
indra̍ḥ śu̱nāva̱dvita̍noti̱ sīram̎.
sa̱ṃva̱thsa̱rasya̍ prati̱māṇa̍me̱tat.
a̱rkasya̱ jyoti̱stadidā̍sa̱ jyeṣṭham̎.
sa̱ṃva̱thsa̱raṃ śu̱nava̱thsīra̍me̱tat.
indra̍sya̱ rādha̱ḥ praya̍taṃ pu̱ru tmanā̎.
tada̍rkarū̱paṃ vi̱mimā̍nameti.
dvāda̍śāre̱ prati̍ tiṣṭha̱tīdvṛṣā̎.
a̱śvā̱yanto̍ ga̱vyanto̍ vā̱jaya̍ntaḥ.
havā̍mahe̱ tvopa̍ganta̱vā u̍.
ā̱bhūṣa̍ntastvā suma̱tau navā̍yām.
va̱yami̍ndra tvā śu̱naṃ hu̍vema..45..

Anuvāka 1

svā̱dvīṃ tvā̎ svā̱dunā̎.
tī̱vrāṃ tī̱vreṇa̍.
a̱mṛtā̍ma̱mṛte̍na.
madhu̍matī̱ṃ madhu̍matā.
sṛ̱jāmi̱ saṃ some̍na.
somo̎'sya̱śvibhyā̎ṃ pacyasva.
sara̍svatyai pacyasva.
indrā̍ya su̱trāmṇe̍ pacyasva.
parī̱to ṣi̍ñcatā su̱tam.
somo̱ ya u̍tta̱maṃ ha̱viḥ..1..

da̱dha̱nvā yo naryo̍ a̱phsva̍ntarā.
su̱ṣāva̱ soma̱madri̍bhiḥ.
pu̱nātu̍ te pari̱srutam̎.
soma̱ṃ sūrya̍sya duhi̱tā.
vāre̍ṇa̱ śaśva̍tā̱ tanā̎.
vā̱yuḥ pū̱taḥ pa̱vitre̍ṇa.
prāṅkhsomo̱ ati̍drutaḥ.
indra̍sya̱ yujya̱ḥ sakhā̎.
vā̱yuḥ pū̱taḥ pa̱vitre̍ṇa.
pra̱tyaṅkhsomo̱ ati̍drutaḥ..2..

indra̍sya̱ yujya̱ḥ sakhā̎.
brahma̍ kṣa̱traṃ pa̍vate̱ teja̍ indri̱yam.
sura̍yā̱ soma̍ḥ su̱ta āsu̍to̱ madā̍ya.
śu̱kreṇa̍ deva de̱vatā̎ḥ pipṛgdhi.
rase̱nānna̱ṃ yaja̍mānāya dhehi.
ku̱vida̱ṅga yava̍manto̱ yava̍ñcit.
yathā̱ dāntya̍nupū̱rvaṃ vi̱yūya̍.
i̱hehai̍ṣāṃ kṛṇuta̱ bhoja̍nāni.
ye ba̱ṟhiṣo̱ namo̍vṛkti̱ṃ na ja̱gmuḥ.
u̱pa̱yā̱magṛ̍hīto'sya̱śvibhyā̎ṃ tvā̱ juṣṭa̍ṃ gṛhṇāmi..3..

sara̍svatyā̱ indrā̍ya su̱trāmṇe̎.
e̱ṣa te̱ yoni̱steja̍se tvā.
vī̱ryā̍ya tvā̱ balā̍ya tvā.
tejo̍'si̱ tejo̱ mayi̍ dhehi.
vī̱rya̍masi vī̱rya̍ṃ mayi̍ dhehi.
bala̍masi̱ bala̱ṃ mayi̍ dhehi.
nānā̱ hi vā̎ṃ de̱vahi̍ta̱ṃ sada̍ḥ kṛ̱tam.
mā saṃsṛ̍kṣāthāṃ para̱me vyo̍man.
surā̱ tvamasi̍ śu̱ṣmiṇī̱ soma̍ e̱ṣaḥ.
mā mā̍ hiṃsī̱ḥ svāṃ yoni̍māvi̱śan..4..

u̱pa̱yā̱magṛ̍hīto'syāśvi̱naṃ teja̍ḥ.
sā̱ra̱sva̱taṃ vī̱ryam̎.
ai̱ndraṃ balam̎.
e̱ṣa te̱ yoni̱rmodā̍ya tvā.
ā̱na̱ndāya̍ tvā̱ maha̍se tvā.
ojo̱'syojo̱ mayi̍ dhehi.
ma̱nyura̍si ma̱nyuṃ mayi̍ dhehi.
maho̍'si̱ maho̱ mayi̍ dhehi.
saho̍'si̱ saho̱ mayi̍ dhehi.
yā vyā̱ghraṃ viṣū̍cikā.
u̱bhau vṛka̍ṃ ca̱ rakṣa̍ti.
śye̱naṃ pa̍ta̱triṇa̍ṃ si̱ṃham.
semaṃ pā̱tvaṃha̍saḥ.
sa̱mpṛca̍ḥ stha̱ saṃ mā̍ bha̱dreṇa̍ pṛṅkta.
vi̱pṛca̍ḥ stha̱ vi mā̍ pā̱pmanā̍ pṛṅkta..5..

Anuvāka 2

somo̱ rājā̱'mṛta̍ṃ su̱taḥ.
ṛ̱jī̱ṣeṇā̍jahānmṛ̱tyum.
ṛ̱tena̍ sa̱tyami̍ndri̱yam.
vipāna̍ṃ śu̱kramandha̍saḥ.
indra̍syendri̱yam.
i̱daṃ payo̱'mṛta̱ṃ madhu̍.
soma̍ma̱dbhyo vya̍pibat.
chanda̍sā ha̱ṃsaḥ śu̍ci̱ṣat.
ṛ̱tena̍ sa̱tyami̍ndri̱yam.
a̱dbhyaḥ kṣī̱raṃ vya̍pibat..6..

kruṅṅā̎ṅgira̱so dhi̱yā.
ṛ̱tena̍ sa̱tyami̍ndri̱yam.
annā̎tpari̱sruto̱ rasam̎.
brahma̍ṇā̱ vya̍pibat kṣa̱tram.
ṛ̱tena̍ sa̱tyami̍ndri̱yam.
reto̱ mūtra̱ṃ vija̍hāti.
yoni̍ṃ pravi̱śadi̍ndri̱yam.
garbho̍ ja̱rāyu̱ṇā''vṛ̍taḥ.
ulba̍ṃ jahāti̱ janma̍nā.
ṛ̱tena̍ sa̱tyami̍ndri̱yam..7..

vede̍na rū̱pe vya̍karot.
sa̱tā̱sa̱tī pra̱jāpa̍tiḥ.
ṛ̱tena̍ sa̱tyami̍ndri̱yam.
some̍na̱ somau̱ vya̍pibat.
su̱tā̱su̱tau pra̱jāpa̍tiḥ.
ṛ̱tena̍ sa̱tyami̍ndri̱yam.
dṛ̱ṣṭvā rū̱pe vyāka̍rot.
sa̱tyā̱nṛ̱te pra̱jāpa̍tiḥ.
aśra̍ddhā̱manṛ̱te'da̍dhāt.
śra̱ddhāṃ sa̱tye pra̱jāpa̍tiḥ.
ṛ̱tena̍ sa̱tyami̍ndri̱yam.
dṛ̱ṣṭvā pa̍ri̱sruto̱ rasam̎.
śu̱kreṇa̍ śu̱kraṃ vya̍pibat.
paya̱ḥ soma̍ṃ pra̱jāpa̍tiḥ.
ṛ̱tena̍ sa̱tyami̍ndri̱yam.
vipāna̍ṃ śu̱kramandha̍saḥ.
indra̍syendri̱yam.
i̱daṃ payo̱'mṛta̱ṃ madhu̍..8..

Anuvāka 3

surā̍vantaṃ barhi̱ṣada̍ṃ su̱vīram̎.
ya̱jñaṃ hi̍nvanti mahi̱ṣā namo̍bhiḥ.
dadhā̍nā̱ḥ soma̍ṃ di̱vi de̱vatā̍su.
made̱mendra̱ṃ yaja̍mānāḥ sva̱rkāḥ.
yaste̱ rasa̱ḥ sambhṛ̍ta̱ oṣa̍dhīṣu.
soma̍sya̱ śuṣma̱ḥ sura̍yā su̱tasya̍.
tena̍ jinva̱ yaja̍māna̱ṃ made̍na.
sara̍svatīma̱śvinā̱vindra̍ma̱gnim.
yama̱śvinā̱ namu̍cerāsu̱rādadhi̍.
sara̍sva̱tyasa̍nodindri̱yāya̍..9..

i̱mantaṃ śu̱kraṃ madhu̍manta̱mindum̎.
soma̱ṃ rājā̍nami̱ha bha̍kṣayāmi.
yadatra̍ ri̱ptaṃ ra̱sina̍ḥ su̱tasya̍.
yadindro̱ api̍ba̱cchacī̍bhiḥ.
a̱haṃ tada̍sya̱ mana̍sā śi̱vena̍.
soma̱ṃ rājā̍nami̱ha bha̍kṣayāmi.
pi̱tṛbhya̍ḥ svadhā̱vibhya̍ḥ sva̱dhā nama̍ḥ.
pi̱tā̱ma̱hebhya̍ḥ svadhā̱vibhya̍ḥ sva̱dhā nama̍ḥ.
prapi̍tāmahebhyaḥ svadhā̱vibhya̍ḥ sva̱dhā nama̍ḥ.
akṣa̍npi̱tara̍ḥ..10..

amī̍madanta pi̱tara̍ḥ.
atī̍tṛpanta pi̱tara̍ḥ.
amī̍mṛjanta pi̱tara̍ḥ.
pita̍ra̱ḥ śundha̍dhvam.
pu̱nantu̍ mā pi̱tara̍ḥ so̱myāsa̍ḥ.
pu̱nantu̍ mā pitāma̱hāḥ.
pu̱nantu̱ prapi̍tāmahāḥ.
pa̱vitre̍ṇa śa̱tāyu̍ṣā.
pu̱nantu̍ mā pitāma̱hāḥ.
pu̱nantu̱ prapi̍tāmahāḥ..11..

pa̱vitre̍ṇa śa̱tāyu̍ṣā.
viśva̱māyu̱rvya̍śñavai.
agna̱ āyū̍ṃṣi pava̱se'gne̱ pava̍sva.
pava̍māna̱ḥ suva̱rjana̍ḥ pu̱nantu̍ mā devaja̱nāḥ.
jāta̍vedaḥ pa̱vitra̍va̱dyatte̍ pa̱vitra̍ma̱rciṣi̍.
u̱bhābhyā̎ṃ deva savitarvaiśvade̱vī pu̍na̱tī.
ye sa̍mā̱nāḥ sama̍nasaḥ.
pi̱taro̍ yama̱rājye̎.
teṣā̎ṃ lo̱kaḥ sva̱dhā nama̍ḥ.
ya̱jño de̱veṣu̍ kalpatām..12..

ye sa̍jā̱tāḥ sama̍nasaḥ.
jī̱vā jī̱veṣu̍ māma̱kāḥ.
teṣā̱ṃ śrīrmayi̍ kalpatām.
a̱smim̐llo̱ke śa̱taṃ samā̎ḥ.
dve sru̱tī a̍śṛṇavaṃ pitṛ̱ṇām.
a̱haṃ de̱vānā̍mu̱ta martyā̍nām.
yābhyā̍mi̱daṃ viśva̱meja̱thsame̍ti.
yada̍nta̱rā pi̱tara̍ṃ mā̱tara̍ṃ ca.
i̱daṃ ha̱viḥ pra̱jana̍naṃ me astu.
daśa̍vīraṃ sa̱rvaga̍ṇaṃ sva̱staye̎.
ā̱tma̱sani̍ prajā̱sani̍.
pa̱śu̱sanya̍bhaya̱sani̍ loka̱sani̍.
a̱gniḥ pra̱jāṃ ba̍hu̱lāṃ me̍ karotu.
anna̱ṃ payo̱ reto̍ a̱smāsu̍ dhatta.
rā̱yaspoṣa̱miṣa̱mūrja̍ma̱smāsu̍ dīdhara̱thsvāhā̎..13..

Anuvāka 4

sīse̍na̱ tantra̱ṃ mana̍sā manī̱ṣiṇa̍ḥ.
ū̱rṇā̱sū̱treṇa̍ ka̱vayo̍ vayanti.
a̱śvinā̍ ya̱jñaṃ sa̍vi̱tā sara̍svatī.
indra̍sya rū̱paṃ varu̍ṇo bhiṣa̱jyan.
tada̍sya rū̱pama̱mṛta̱ṃ śacī̍bhiḥ.
ti̱sro'da̍dhurde̱vatā̎ḥ saṃrarā̱ṇāḥ.
lomā̍ni̱ śaṣpai̎rbahu̱dhā na tokma̍bhiḥ.
tvaga̍sya mā̱ṃsama̍bhava̱nna lā̱jāḥ.
tada̱śvinā̍ bhi̱ṣajā̍ ru̱drava̍rtanī.
sara̍svatī vayati̱ peśo̱ anta̍raḥ..14..

asthi̍ ma̱jjāna̱ṃ māsa̍raiḥ.
kā̱ro̱ta̱reṇa̱ dadha̍to̱ gavā̎ṃ tva̱ci.
sara̍svatī̱ mana̍sā peśa̱laṃ vasu̍.
nāsa̍tyābhyāṃ vayati darśa̱taṃ vapu̍ḥ.
rasa̍ṃ pari̱srutā̱ na rohi̍tam.
na̱gnahu̱rdhīra̱stasa̍ra̱nna vema̍.
paya̍sā śu̱krama̱mṛta̍ṃ ja̱nitram̎.
sura̍yā̱ mūtrā̎jjanayanti̱ reta̍ḥ.
apāma̍tiṃ durma̱tiṃ bādha̍mānāḥ.
ūva̍dhya̱ṃ vāta̍ṃ sa̱buva̱ntadā̱rāt..15..

indra̍ḥ su̱trāmā̱ hṛda̍yena sa̱tyam.
pu̱ro̱ḍāśe̍na savi̱tā ja̍jāna.
yakṛ̍tklo̱māna̱ṃ varu̍ṇo bhiṣa̱jyan.
mata̍sne vāya̱vyai̎rna mi̍nāti pi̱ttam.
ā̱ntrāṇi̍ sthā̱lī madhu̱ pinva̍mānā.
gudā̱ pātrā̍ṇi su̱dughā̱ na dhe̱nuḥ.
śye̱nasya̱ patra̱ṃ na plī̱hā śacī̍bhiḥ.
ā̱sa̱ndī nābhi̍ru̱dara̱ṃ na mā̱tā.
ku̱mbho va̍ni̱ṣṭhurja̍ni̱tā śacī̍bhiḥ.
yasmi̱nnagre̱ yonyā̱ṃ garbho̍ a̱ntaḥ..16..

plā̱śīrvya̍ktaḥ śa̱tadhā̍ra̱ uthsa̍ḥ.
du̱he na ku̱mbhīṃ sva̱dhāṃ pi̱tṛbhya̍ḥ.
mukha̱ṃ sada̍sya̱ śira̱ ithsade̍na.
ji̱hvā pa̱vitra̍ma̱śvinā̱ saṃ sara̍svatī.
cappa̱nna pā̱yurbhi̱ṣaga̍sya̱ vāla̍ḥ.
va̱stirna śepo̱ hara̍sā tara̱svī.
a̱śvibhyā̱ṃ cakṣu̍ra̱mṛta̱ṃ grahā̎bhyām.
chāge̍na̱ tejo̍ ha̱viṣā̍ śṛ̱tena̍.
pakṣmā̍ṇi go̱dhūmai̱ḥ kva̍lairu̱tāni̍.
peśo̱ na śu̱klamasi̍taṃ vasāte..17..

avi̱rna me̱ṣo na̱si vī̱ryā̍ya.
prā̱ṇasya̱ panthā̍ a̱mṛto̱ grahā̎bhyām.
sara̍sva̱tyupa̱vākai̎rvyā̱nam.
nasyā̍ni ba̱ṟhirbada̍rairjajāna.
indra̍sya rū̱pamṛ̍ṣa̱bho balā̍ya.
karṇā̎bhyā̱ṃ śrotra̍ma̱mṛta̱ṃ grahā̎bhyām.
yavā̱ na ba̱ṟhirbhru̱vi kesa̍rāṇi.
ka̱rkandhu̍ jajñe̱ madhu̍ sāra̱ghaṃ mukhā̎t.
ā̱tmannu̱pasthe̱ na vṛka̍sya̱ loma̍.
mukhe̱ śmaśrū̍ṇi̱ na vyā̎ghralo̱mam..18..

keśā̱ na śī̱ṟṣan yaśa̍se śri̱yai śikhā̎.
si̱ṃhasya̱ loma̱ tviṣi̍rindri̱yāṇi̍.
aṅgā̎nyā̱tmanbhi̱ṣajā̱ tada̱śvinā̎.
ā̱tmāna̱maṅgai̱ḥ sama̍dhā̱thsara̍svatī.
indra̍sya rū̱paṃ śa̱tamā̍na̱māyu̍ḥ.
ca̱ndreṇa̱ jyoti̍ra̱mṛta̱ṃ dadhā̍nā.
sara̍svatī̱ yonyā̱ṃ garbha̍ma̱ntaḥ.
a̱śvibhyā̱ṃ patnī̱ sukṛ̍taṃ bibharti.
a̱pāṃ rase̍na̱ varu̍ṇo̱ na sāmnā̎.
indra̍ṃ śri̱yai ja̱naya̍nna̱phsu rājā̎.
teja̍ḥ paśū̱nāṃ ha̱viri̍ndri̱yāva̍t.
pa̱ri̱srutā̱ paya̍sā sāra̱ghaṃ madhu̍.
a̱śvibhyā̎ṃ du̱gdhaṃ bhi̱ṣajā̱ sara̍svatyā sutāsu̱tābhyā̎m.
a̱mṛta̱ḥ soma̱ indu̍ḥ..19..

Anuvāka 5

mi̱tro̍'si̱ varu̍ṇo'si.
sama̱haṃ viśvai̎rde̱vaiḥ.
kṣa̱trasya̱ nābhi̍rasi.
kṣa̱trasya̱ yoni̍rasi.
syo̱nāmā sī̍da.
su̱ṣadā̱mā sī̍da.
mā tvā̍ hiṃsīt.
mā mā̍ hiṃsīt.
niṣa̍sāda dhṛ̱tavra̍to̱ varu̍ṇaḥ.
pa̱styā̎svā..20..

sāmrā̎jyāya su̱kratu̍ḥ.
de̱vasya̍ tvā savi̱tuḥ pra̍sa̱ve.
a̱śvino̎rbā̱hubhyā̎m.
pū̱ṣṇo hastā̎bhyām.
a̱śvino̱rbhaiṣa̍jyena.
teja̍se brahmavarca̱sāyā̱bhiṣi̍ñcāmi.
de̱vasya̍ tvā savi̱tuḥ pra̍sa̱ve.
a̱śvino̎rbā̱hubhyā̎m.
pū̱ṣṇo hastā̎bhyām.
sara̍svatyai̱ bhaiṣa̍jyena..21..

vī̱ryā̍yā̱nnādyā̍yā̱bhiṣi̍ñcāmi.
de̱vasya̍ tvā savi̱tuḥ pra̍sa̱ve.
a̱śvino̎rbā̱hubhyā̎m.
pū̱ṣṇo hastā̎bhyām.
indra̍syendri̱yeṇa̍.
śri̱yai yaśa̍se̱ balā̍yā̱bhiṣi̍ñcāmi.
ko̍'si kata̱mo̍'si.
kasmai̎ tvā̱ kāya̍ tvā.
suślo̱kām̐(4) suma̍ṅga̱lām̐(4) satya̍rā̱jā(3)n.
śiro̍ me̱ śrīḥ..22..

yaśo̱ mukham̎.
tviṣi̱ḥ keśā̎śca̱ śmaśrū̍ṇi.
rājā̍ me prā̱ṇo̍'mṛtam̎.
sa̱mrāṭcakṣu̍ḥ.
vi̱rāṭchrotram̎.
ji̱hvā me̍ bha̱dram.
vāṅmaha̍ḥ.
mano̍ ma̱nyuḥ.
sva̱rāḍbhāma̍ḥ.
modā̎ḥ pramo̱dā a̱ṅgulī̱raṅgā̍ni..23..

ci̱ttaṃ me̱ saha̍ḥ.
bā̱hū me̱ bala̍mindri̱yam.
hastau̍ me̱ karma̍ vī̱ryam̎.
ā̱tmā kṣa̱tramuro̱ mama̍.
pṛ̱ṣṭīrme̍ rā̱ṣṭramu̱dara̱maṃsau̎.
grī̱vāśca̱ śroṇyau̎.
ū̱rū a̍ra̱tnī jānu̍nī.
viśo̱ me'ṅgā̍ni sa̱rvata̍ḥ.
nābhi̍rme ci̱ttaṃ vi̱jñānam̎.
pā̱yurme'pa̍citirbha̱sat..24..

ā̱na̱nda̱na̱ndāvā̱ṇḍau me̎.
bhaga̱ḥ saubhā̎gya̱ṃ pasa̍ḥ.
jaṅghā̎bhyāṃ pa̱dbhyāṃ dharmo̎'smi.
vi̱śi rājā̱ prati̍ṣṭhitaḥ.
prati̍ kṣa̱tre prati̍ tiṣṭhāmi rā̱ṣṭre.
pratyaśve̍ṣu̱ prati̍ tiṣṭhāmi̱ goṣu̍.
pratyaṅge̍ṣu̱ prati̍ tiṣṭhāmyā̱tman.
prati̍ prā̱ṇeṣu̱ prati̍ tiṣṭhāmi pu̱ṣṭe.
prati̱ dyāvā̍pṛthi̱vyoḥ.
prati̍ tiṣṭhāmi ya̱jñe..25..

tra̱yā de̱vā ekā̍daśa.
tra̱ya̱stri̱ṃśāḥ su̱rādha̍saḥ.
bṛha̱spati̍purohitāḥ.
de̱vasya̍ savi̱tuḥ sa̱ve.
de̱vā de̱vaira̍vantu mā.
pra̱tha̱mā dvi̱tīyai̎ḥ.
dvi̱tīyā̎stṛ̱tīyai̎ḥ.
tṛ̱tīyā̎ḥ sa̱tyena̍.
sa̱tyaṃ ya̱jñena̍.
ya̱jño yaju̍rbhiḥ..26..

yajū̍ṃṣi̱ sāma̍bhiḥ.
sāmā̎nyṛ̱gbhiḥ.
ṛco̍ yā̱jyā̍bhiḥ.
yā̱jyā̍ vaṣaṭkā̱raiḥ.
va̱ṣa̱ṭkā̱rā āhu̍tibhiḥ.
āhu̍tayo me̱ kāmā̱nthsama̍rdhayantu.
bhūḥ svāhā̎.
lomā̍ni̱ praya̍ti̱rmama̍.
tvaṅma̱ āna̍ti̱rāga̍tiḥ.
mā̱ṃsaṃ ma̱ upa̍natiḥ.
vasvasthi̍.
ma̱jjā ma̱ āna̍tiḥ..27..

Anuvāka 6

yadde̍vā deva̱heḍa̍nam.
devā̍saścakṛ̱mā va̱yam.
a̱gnirmā̱ tasmā̱dena̍saḥ.
viśvā̎nmuñca̱tvaṃha̍saḥ.
yadi̱ divā̱ yadi̱ naktam̎.
enā̍ṃsi cakṛ̱mā va̱yam.
vā̱yurmā̱ tasmā̱dena̍saḥ.
viśvā̎nmuñca̱tvaṃha̍saḥ.
yadi̱ jāgra̱dyadi̱ svapne̎.
enā̍ṃsi cakṛ̱mā va̱yam..28..

sūryo̍ mā̱ tasmā̱dena̍saḥ.
viśvā̎nmuñca̱tvaṃha̍saḥ.
yadgrāme̱ yadara̍ṇye.
yathsa̱bhāyā̱ṃ yadi̍ndri̱ye.
yacchū̱dre yada̱rye̎.
ena̍ścakṛ̱mā va̱yam.
yadeka̱syādhi̱ dharma̍ṇi.
tasyā̍va̱yaja̍namasi.
yadāpo̱ aghni̍yā̱ varu̱ṇeti̱ śapā̍mahe.
tato̍ varuṇa no muñca..29..

ava̍bhṛtha nicaṅkuṇa nice̱rura̍si nicaṅkuṇa.
ava̍ de̱vairde̱vakṛ̍ta̱meno̍'yāṭ.
ava̱ martyai̱rmartya̍kṛtam.
u̱rorā no̍ deva ri̱ṣaspā̍hi.
su̱mi̱trā na̱ āpa̱ oṣa̍dhayaḥ santu.
du̱rmi̱trāstasmai̍ bhūyāsuḥ.
yo̎'smāndveṣṭi̍.
yaṃ ca̍ va̱yaṃ dvi̱ṣmaḥ.
dru̱pa̱dādi̱venmu̍mucā̱naḥ.
svi̱nnaḥ snā̱tvī malā̍diva..30..

pū̱taṃ pa̱vitre̍ṇe̱vā''jyam̎.
āpa̍ḥ śundhantu̱ maina̍saḥ.
udva̱yaṃ tama̍sa̱spari̍.
paśya̍nto̱ jyoti̱rutta̍ram.
de̱vaṃ de̍va̱trā sūryam̎.
aga̍nma̱ jyoti̍rutta̱mam.
prati̍yuto̱ varu̍ṇasya̱ pāśa̍ḥ.
pratya̍sto̱ varu̍ṇasya̱ pāśa̍ḥ.
edho̎'syedhiṣī̱mahi̍.
sa̱mida̍si..31..

tejo̍'si̱ tejo̱ mayi̍ dhehi.
a̱po anva̍cāriṣam.
rase̍na̱ sama̍sṛkṣmahi.
paya̍svāṃ agna̱ āga̍mam.
taṃ mā̱ saṃsṛ̍ja̱ varca̍sā.
pra̱jayā̍ ca̱ dhane̍na ca.
sa̱māva̍varti pṛthi̱vī.
samu̱ṣāḥ.
samu̱ sūrya̍ḥ.
samu̱ viśva̍mi̱daṃ jaga̍t.
vai̱śvā̱na̱rajyo̍tirbhūyāsam.
vi̱bhuṃ kāma̱ṃ vya̍śñavai.
bhūḥ svāhā̎..32..

Anuvāka 7

hotā̍ yakṣathsa̱midhendra̍mi̱ḍaspa̱de.
nābhā̍ pṛthi̱vyā adhi̍.
di̱vo varṣma̱nthsami̍dhyate.
oji̍ṣṭhaścarṣaṇī̱ sahān̍.
vetvā''jya̍sya̱ hota̱ryaja̍.
hotā̍ yakṣa̱ttanū̱napā̍tam.
ū̱tibhi̱rjetā̍ra̱mapa̍rājitam.
indra̍ṃ de̱vaṃ su̍va̱rvidam̎.
pa̱thibhi̱rmadhu̍mattamaiḥ.
narā̱śaṃse̍na̱ teja̍sā..33..

vetvā''jya̍sya̱ hota̱ryaja̍.
hotā̍ yakṣa̱diḍā̍bhi̱rindra̍mīḍi̱tam.
ā̱juhvā̍na̱mama̍rtyam.
de̱vo de̱vaiḥ savī̎ryaḥ.
vajra̍hastaḥ puranda̱raḥ.
vetvā''jya̍sya̱ hota̱ryaja̍.
hotā̍yakṣadba̱ṟhiṣīndra̍nniṣadva̱ram.
vṛ̱ṣa̱bhaṃ naryā̍pasam.
vasu̍bhīru̱drairā̍di̱tyaiḥ.
sa̱yugbhi̍rba̱ṟhirāsa̍dat..34..

vetvā''jya̍sya̱ hota̱ryaja̍.
hotā̍ yakṣa̱dojo̱ na vī̱ryam̎.
saho̱ dvāra̱ indra̍mavardhayan.
su̱prā̱ya̱ṇā viśra̍yantāmṛtā̱vṛdha̍ḥ.
dvāra̱ indrā̍ya mī̱ḍhuṣe̎.
vi̱yantvājya̍sya̱ hota̱ryaja̍.
hotā̍ yakṣadu̱ṣe indra̍sya dhe̱nū.
su̱dughe̍ mā̱tarau̍ ma̱hī.
savā̱tarau̱ na teja̍sī.
va̱thsamindra̍mavardhatām..35..

vī̱tāmājya̍sya̱ hota̱ryaja̍.
hotā̍ yakṣa̱ddaivyā̱ hotā̍rā.
bhi̱ṣajā̱ sakhā̍yā.
ha̱viṣendra̍ṃ bhiṣajyataḥ.
ka̱vī de̱vau prace̍tasau.
indrā̍ya dhatta indri̱yam.
vī̱tāmājya̍sya̱ hota̱ryaja̍.
hotā̍ yakṣatti̱sro de̱vīḥ.
traya̍stri̱dhāta̍vo̱pasa̍ḥ.
iḍā̱ sara̍svatī̱ bhāra̍tī..36..

ma̱hīndra̍patnīrha̱viṣma̍tīḥ.
vi̱yantvājya̍sya̱ hota̱ryaja̍.
hotā̍ yakṣa̱ttvaṣṭā̍ra̱mindra̍ṃ de̱vam.
bhi̱ṣaja̍ṃ su̱yaja̍ṃ ghṛta̱śriyam̎.
pu̱ru̱rūpa̍ṃ su̱reta̍saṃ ma̱ghonim̎.
indrā̍ya̱ tvaṣṭā̱ dadha̍dindri̱yāṇi̍.
vetvā''jya̍sya̱ hota̱ryaja̍.
hotā̍ yakṣa̱dvana̱spatim̎.
śa̱mi̱tāra̍ṃ śa̱takra̍tum.
dhi̱yo jo̱ṣṭāra̍mindri̱yam..37..

madhvā̍ sama̱ñjanpa̱thibhi̍ḥ su̱gebhi̍ḥ.
svadā̍ti ha̱vyaṃ madhu̍nā ghṛ̱tena̍.
vetvā''jya̍sya̱ hota̱ryaja̍.
hotā̍ yakṣa̱dindra̱ṃ svāhā''jya̍sya.
svāhā̱ meda̍saḥ.
svāhā̎ sto̱kānā̎m.
svāhā̱ svāhā̍kṛtīnām.
svāhā̍ ha̱vyasū̎ktīnām.
svāhā̍ de̱vāṃ ā̎jya̱pān.
svāhendra̍ṃ ho̱trājju̍ṣā̱ṇāḥ.
indra̱ ājya̍sya viyantu.
hota̱ryaja̍..38..

Anuvāka 8

sami̍ddha̱ indra̍ u̱ṣasā̱manī̍ke.
pu̱ro̱rucā̍ pūrva̱kṛdvā̍vṛdhā̱naḥ.
tri̱bhirde̱vaistri̱ṃśatā̱ vajra̍bāhuḥ.
ja̱ghāna̍ vṛ̱traṃ vi duro̍ vavāra.
narā̱śaṃsa̱ḥ prati̱śūro̱ mimā̍naḥ.
tanū̱napā̱tprati̍ ya̱jñasya̱ dhāma̍.
gobhi̍rva̱pāvā̱nmadhu̍nā sama̱ñjan.
hira̍ṇyaiśca̱ndrī ya̍jati̱ prace̍tāḥ.
ī̱ḍi̱to de̱vairhari̍vāṃ abhi̱ṣṭiḥ.
ā̱juhvā̍no ha̱viṣā̱ śardha̍mānaḥ..39..

pu̱ra̱nda̱ro ma̱ghavā̱ṉ vajra̍bāhuḥ.
āyā̍tu ya̱jñamupa̍no juṣā̱ṇaḥ.
ju̱ṣā̱ṇo ba̱ṟhirhari̍vānna̱ indra̍ḥ.
prā̱cīna̍ṃ sīdatpra̱diśā̍ pṛthi̱vyāḥ.
u̱ru̱vyacā̱ḥ pratha̍mānaṃ syo̱nam.
ā̱di̱tyaira̱ktaṃ vasu̍bhiḥ sa̱joṣā̎ḥ.
indra̱ṃ dura̍ḥ kava̱ṣyo̍ dhāva̍mānāḥ.
vṛṣā̍ṇaṃ yantu̱ jana̍yaḥ su̱patnī̎ḥ.
dvāro̍ de̱vīra̱bhito̱ viśra̍yantām.
su̱vīrā̍ vī̱raṃ pratha̍mānā̱ maho̍bhiḥ..40..

u̱ṣāsā̱naktā̍ bṛha̱tī bṛ̱hantam̎.
paya̍svatī su̱dughe̱ śūra̱mindram̎.
peśa̍svatī̱ tantu̍nā sa̱ṃvyaya̍ntī.
de̱vānā̎ṃ de̱vaṃ ya̍jataḥ suru̱kme.
daivyā̱ mimā̍nā̱ mana̍sā puru̱trā.
hotā̍rā̱vindra̍ṃ pratha̱mā su̱vācā̎.
mū̱rdhan ya̱jñasya̱ madhu̍nā̱ dadhā̍nā.
prā̱cīna̱ṃ jyoti̍rha̱viṣā̍ vṛdhātaḥ.
ti̱sro de̱vīrha̱viṣā̱ vardha̍mānāḥ.
indra̍ṃ juṣā̱ṇā vṛṣa̍ṇa̱ṃ na patnī̎ḥ..41..

acchi̍nna̱ṃ tantu̱ṃ paya̍sā̱ sara̍svatī.
iḍā̍ de̱vī bhāra̍tī vi̱śvatū̎rtiḥ.
tvaṣṭā̱ dadha̱dindrā̍ya̱ śuṣmam̎.
apā̱koci̍ṣṭurya̱śase̍ pu̱rūṇi̍.
vṛṣā̱ yaja̱nvṛṣa̍ṇa̱ṃ bhūri̍retāḥ.
mū̱rdhan ya̱jñasya̱ sama̍naktu de̱vān.
vana̱spati̱rava̍sṛṣṭo̱ na pāśai̎ḥ.
tmanyā̍ sama̱ñjañcha̍mi̱tā na de̱vaḥ.
indra̍sya ha̱vyairja̱ṭhara̍ṃ pṛṇā̱naḥ.
svadā̍ti ha̱vyaṃ madhu̍nā ghṛ̱tena̍.
sto̱kānā̱mindu̱ṃ prati̱ śūra̱ indra̍ḥ.
vṛ̱ṣā̱yamā̍ṇo vṛṣa̱bhastu̍rā̱ṣāṭ.
ghṛ̱ta̱pruṣā̱ madhu̍nā ha̱vyamu̱ndan.
mū̱rdhan ya̱jñasya̍ juṣatā̱ṃ svāhā̎..42..

Anuvāka 9

āca̍rṣaṇi̱prā vi̱veṣa̱ yanmā̎.
taṃ sa̱dhrīcī̎ḥ.
sa̱tyamittanna tvāvā̍ṃ a̱nyo asti̍.
indra̍ de̱vo na martyo̱ jyāyān̍.
aha̱nnahi̍ṃ pari̱śayā̍na̱marṇa̍ḥ.
avā̍sṛjo̱'po acchā̍ samu̱dram.
prasa̍sāhiṣe puruhūta̱ śatrūn̍.
jyeṣṭha̍ste̱ śuṣma̍ i̱ha rā̱tira̍stu.
indrā bha̍ra̱ dakṣi̍ṇenā̱ vasū̍ni.
pati̱ḥ sindhū̍nāmasi re̱vatī̍nām.
sa śevṛ̍dha̱madhi̍ dhāddyu̱mnama̱sme.
mahi̍ kṣa̱traṃ ja̍nā̱ṣāḍi̍ndra̱ tavyam̎.
rakṣā̍ ca no ma̱ghona̍ḥ pā̱hi sū̱rīn.
rā̱ye ca̍ naḥ svapa̱tyā i̱ṣe dhā̎ḥ..43..

Anuvāka 10

de̱vaṃ ba̱ṟhirindra̍ṃ sude̱vaṃ de̱vaiḥ.
vī̱rava̍thstī̱rṇaṃ vedyā̍mavardhayat.
vasto̎rvṛ̱taṃ prākto̎rbhṛ̱tam.
rā̱yā ba̱ṟhiṣma̱to'tya̍gāt.
va̱su̱vane̍ vasu̱dheya̍sya vetu̱ yaja̍.
de̱vīrdvāra̱ indra̍ṃ saṅghā̱te.
vi̱ḍvīryāma̍nnavardhayan.
ā va̱thsena̱ taru̍ṇena kumā̱reṇa̍ camīvi̱tā apārvā̍ṇam.
re̱ṇuka̍kāṭaṃ nudantām.
va̱su̱vane̍ vasu̱dheya̍sya viyantu̱ yaja̍..44..

de̱vī u̱ṣāsā̱naktā̎.
indra̍ṃ ya̱jñe pra̍ya̱tya̍hvetām.
daivī̱rviśa̱ḥ prāyā̍siṣṭām.
suprī̍te̱ sudhi̍te abhūtām.
va̱su̱vane̍ vasu̱dheya̍sya vītā̱ṃ yaja̍.
de̱vī joṣṭrī̱ vasu̍dhitī.
de̱vamindra̍mavardhatām.
ayā̎vya̱nyāghā dveṣā̍ṃsi.
ānyāvā̎kṣī̱dvasu̱ vāryā̍ṇi.
yaja̍mānāya śikṣi̱te..45..

va̱su̱vane̍ vasu̱dheya̍sya vītā̱ṃ yaja̍.
de̱vī ū̱rjāhu̍tī̱ dughe̍ su̱dughe̎.
paya̱sendra̍mavardhatām.
iṣa̱mūrja̍ma̱nyā'vā̎kṣīt.
sagdhi̱ṃ sapī̍tima̱nyā.
nave̍na̱ pūrva̱ṃ daya̍māne.
pu̱rā̱ṇena̱ navam̎.
adhā̍tā̱mūrja̍mū̱rjāhu̍tī̱ vasu̱ vāryā̍ṇi.
yaja̍mānāya śikṣi̱te.
va̱su̱vane̍ vasu̱dheya̍sya vītā̱ṃ yaja̍..46..

de̱vā daivyā̱ hotā̍rā.
de̱vamindra̍mavardhatām.
ha̱tāgha̍śaṃsā̱vābhā̎rṣṭā̱ṃ vasu̱vāryā̍ṇi.
yaja̍mānāya śikṣi̱tau.
va̱su̱vane̍ vasu̱dheya̍sya vītā̱ṃ yaja̍.
de̱vīsti̱srasti̱sro de̱vīḥ.
pati̱mindra̍mavardhayan.
aspṛ̍kṣa̱dbhāra̍tī̱ divam̎.
ru̱drairya̱jñaṃ sara̍svatī.
iḍā̱ vasu̍matī gṛ̱hān..47..

va̱su̱vane̍ vasu̱dheya̍sya viyantu̱ yaja̍.
de̱va indro̱ narā̱śaṃsa̍ḥ.
tri̱va̱rū̱thastri̍vandhu̱raḥ.
de̱vamindra̍mavardhayat.
śa̱tena̍ śitipṛ̱ṣṭhānā̱māhi̍taḥ.
sa̱hasre̍ṇa̱ prava̍rtate.
mi̱trāvaru̱ṇeda̍sya ho̱tramarha̍taḥ.
bṛha̱spati̍ḥ sto̱tram.
a̱śvinā''dhva̍ryavam.
va̱su̱vane̍ vasu̱dheya̍sya vetu̱ yaja̍..48..

de̱va indro̱ vana̱spati̍ḥ.
hira̍ṇyaparṇo̱ madhu̍śākhaḥ supippa̱laḥ.
de̱vamindra̍mavardhayat.
diva̱magre̍ṇāprāt.
ā'ntari̍kṣaṃ pṛthi̱vīma̍dṛṃhīt.
va̱su̱vane̍ vasu̱dheya̍sya vetu̱ yaja̍.
de̱vaṃ ba̱ṟhirvāri̍tīnām.
de̱vamindra̍mavardhayat.
svā̱sa̱sthamindre̱ṇāsa̍nnam.
a̱nyā ba̱ṟhīṃṣya̱bhya̍bhūt.
va̱su̱vane̍ vasu̱dheyasya̍ vetu̱ yaja̍.
de̱vo a̱gniḥ svi̍ṣṭa̱kṛt.
de̱vamindra̍mavardhayat.
svi̍ṣṭaṃ ku̱rvanthsvi̍ṣṭa̱kṛt.
svi̍ṣṭama̱dya ka̍rotu naḥ.
va̱su̱vane̍ vasu̱dheya̍sya vetu̱ yaja̍..49..

Anuvāka 11

hotā̍ yakṣathsa̱midhā̱'gnimi̱ḍaspa̱de.
a̱śvinendra̱ṃ sara̍svatīm.
a̱jo dhū̱mro na go̱dhūmai̱ḥ kva̍lairbheṣa̱jam.
madhu̱ śaṣpai̱rna teja̍ indri̱yam.
paya̱ḥ soma̍ḥ pari̱srutā̍ ghṛ̱taṃ madhu̍.
vi̱yantvājya̍sya̱ hota̱ryaja̍.
hotā̍ yakṣa̱ttanū̱napā̱thsara̍svatī.
avi̍rme̱ṣo na bhe̍ṣa̱jam.
pa̱thā madhu̍ma̱tābha̍ran.
a̱śvinendrā̍ya vī̱ryam̎..50..

bada̍rairupa̱vākā̍bhirbheṣa̱jaṃ tokma̍bhiḥ.
paya̱ḥ soma̍ḥ pari̱srutā̍ ghṛ̱taṃ madhu̍.
vi̱yantvājya̍sya̱ hota̱ryaja̍.
hotā̍ yakṣa̱ṃ narā̱śaṃsa̱ṃ na na̱gnahum̎.
pati̱ṃ surā̍yai bheṣa̱jam.
me̱ṣaḥ sara̍svatī bhi̱ṣak.
ratho̱ na ca̱ndrya̍śvino̎rva̱pā indra̍sya vī̱ryam̎.
bada̍rairupa̱vākā̍bhirbheṣa̱jaṃ tokma̍bhiḥ.
paya̱ḥ soma̍ḥ pari̱srutā̍ ghṛ̱taṃ madhu̍.
vi̱yantvājya̍sya̱ hota̱ryaja̍..51..

hotā̍ yakṣadi̱ḍeḍi̱ta ā̱juhvā̍na̱ḥ sara̍svatīm.
indra̱ṃ bale̍na va̱rdhayan̍.
ṛ̱ṣa̱bheṇa̱ gave̎ndri̱yam.
a̱śvinendrā̍ya vī̱ryam̎.
yavai̎ḥ ka̱rkandhu̍bhiḥ.
madhu̍ lā̱jairna māsa̍ram.
paya̱ḥ soma̍ḥ pari̱srutā̍ ghṛ̱taṃ madhu̍.
vi̱yantvājya̍sya̱ hota̱ryaja̍.
hotā̍ yakṣadba̱ṟhiḥ su̱ṣṭarī̱morṇa̍mradāḥ.
bhi̱ṣaṅnāsa̍tyā..52..

bhi̱ṣajā̱'śvinā'śvā̱ śiśu̍matī.
bhi̱ṣagdhe̱nuḥ sara̍svatī.
bhi̱ṣagdu̱ha indrā̍ya bheṣa̱jam.
paya̱ḥ soma̍ḥ pari̱srutā̍ ghṛ̱taṃ madhu̍.
vi̱yantvājya̍sya̱ hota̱ryaja̍.
hotā̍ yakṣa̱dduro̱ diśa̍ḥ.
ka̱va̱ṣyo̍ na vyaca̍svatīḥ.
a̱śvibhyā̱ṃ na duro̱ diśa̍ḥ.
indro̱ na roda̍sī̱ dughe̎.
du̱he kāmā̱nthsara̍svatī..53..

a̱śvinendrā̍ya bheṣa̱jam.
śu̱kraṃ na jyoti̍rindri̱yam.
paya̱ḥ soma̍ḥ pari̱srutā̍ ghṛ̱taṃ madhu̍.
vi̱yantvājya̍sya̱ hota̱ryaja̍.
hotā̍ yakṣathsu̱peśa̍so̱ṣe nakta̱ṃ divā̎.
a̱śvinā̍ sañjānā̱ne.
sama̍ṃ jāte̱ sara̍svatyā.
tviṣi̱mindre̱ na bhe̍ṣa̱jam.
śye̱no na raja̍sā hṛ̱dā.
paya̱ḥ soma̍ḥ pari̱srutā̍ ghṛ̱taṃ madhu̍..54..

vi̱yantvājya̍sya̱ hota̱ryaja̍.
hotā̍ yakṣa̱ddaivyā̱ hotā̍rā bhi̱ṣajā̱'śvinā̎.
indra̱ṃ na jāgṛ̍vī̱ divā̱ nakta̱ṃ na bhe̍ṣa̱jaiḥ.
śūṣa̱ṃ sara̍svatī bhi̱ṣak.
sīse̍na duha indri̱yam.
paya̱ḥ soma̍ḥ pari̱srutā̍ ghṛ̱taṃ madhu̍.
vi̱yantvājya̍sya̱ hota̱ryaja̍.
hotā̍ yakṣatti̱sro de̱vīrna bhe̍ṣa̱jam.
traya̍stri̱dhāta̍vo̱'pasa̍ḥ.
rū̱pamindre̍ hira̱ṇyayam̎..55..

a̱śvineḍā̱ na bhāra̍tī.
vā̱cā sara̍svatī.
maha̱ indrā̍ya dadhurindri̱yam.
paya̱ḥ soma̍ḥ pari̱srutā̍ ghṛ̱taṃ madhu̍.
vi̱yantvājya̍sya̱ hota̱ryaja̍.
hotā̍ yakṣa̱ttvaṣṭā̍ra̱mindra̍ma̱śvinā̎.
bhi̱ṣaja̱ṃ na sara̍svatīm.
ojo̱ na jū̱tiri̍ndri̱yam.
vṛko̱ na ra̍bha̱so bhi̱ṣak.
yaśa̱ḥ sura̍yā bheṣa̱jam..56..

śri̱yā na māsa̍ram.
paya̱ḥ soma̍ḥ pari̱srutā̍ ghṛ̱taṃ madhu̍.
vi̱yantvājya̍sya̱ hota̱ryaja̍.
hotā̍ yakṣa̱dvana̱spatim̎.
śa̱mi̱tāra̍ṃ śa̱takra̍tum.
bhī̱maṃ na ma̱nyuṃ rājā̍naṃ vyā̱ghraṃ nama̍sā̱'śvinā̱ bhāmam̎.
sara̍svatī bhi̱ṣak.
indrā̍ya duha indri̱yam.
paya̱ḥ soma̍ḥ pari̱srutā̍ ghṛ̱taṃ madhu̍.
vi̱yantvājya̍sya̱ hota̱ryaja̍..57..

hotā̍ yakṣada̱gniṃ svāhā''jya̍sya sto̱kānā̎m.
svāhā̱ meda̍sā̱ṃ pṛtha̍k.
svāhā̱ chāga̍ma̱śvibhyā̎m.
svāhā̍ me̱ṣaṃ sara̍svatyai.
svāha̍rṣa̱bhamindrā̍ya si̱ṃhāya̱ saha̍sendri̱yam.
svāhā̱'gniṃ na bhe̍ṣa̱jam.
svāhā̱ soma̍mindri̱yam.
svāhendra̍ṃ su̱trāmā̍ṇaṃ savi̱tāra̱ṃ varu̍ṇaṃ bhi̱ṣajā̱ṃ patim̎.
svāhā̱ vana̱spati̍ṃ pri̱yaṃ pātho̱ na bhe̍ṣa̱jam.
svāhā̍ de̱vāṃ ā̎jya̱pān..58..

svāhā̱'gniṃ ho̱trājju̍ṣā̱ṇo a̱gnirbhe̍ṣa̱jam.
paya̱ḥ soma̍ḥ pari̱srutā̍ ghṛ̱taṃ madhu̍.
vi̱yantvājya̍sya̱ hota̱ryaja̍.
hotā̍ yakṣada̱śvinā̱ sara̍svatī̱mindra̍ṃ su̱trāmā̍ṇam.
i̱me somā̎ḥ su̱rāmā̍ṇaḥ.
chāgai̱rna me̱ṣairṛ̍ṣa̱bhaiḥ su̱tāḥ.
śaṣpai̱rna tokma̍bhiḥ.
lā̱jairmaha̍svantaḥ.
madā̱ māsa̍reṇa̱ pari̍ṣkṛtāḥ.
śu̱krāḥ paya̍svanto̱'mṛtā̎ḥ.
prasthi̍tā vo madhu̱ścuta̍ḥ.
tāna̱śvinā̱ sara̍sva̱tīndra̍ḥ su̱trāmā̍ vṛtra̱hā.
ju̱ṣantā̍ṃ sau̱myaṃ madhu̍.
piba̍ntu̱ mada̍ntu vi̱yantu̱ somam̎.
hota̱ryaja̍..59..

Anuvāka 12

sami̍ddho a̱gnira̍śvinā.
ta̱pto gha̱rmo vi̱rāṭthsu̱taḥ.
du̱he dhe̱nuḥ sara̍svatī.
soma̍ṃ śu̱krami̱hendri̱yam.
ta̱nū̱pā bhi̱ṣajā̍ su̱te.
a̱śvino̱bhā sara̍svatī.
madhvā̱ rajā̍ṃsīndri̱yam.
indrā̍ya pa̱thibhi̍rvahān.
indrā̱yendu̱ṃ sara̍svatī.
narā̱śaṃse̍na na̱gnahu̍ḥ..60..

adhā̍tāma̱śvinā̱ madhu̍.
bhe̱ṣa̱jaṃ bhi̱ṣajā̍ su̱te.
ā̱juhvā̍nā̱ sara̍svatī.
indrā̍yendri̱yāṇi̍ vī̱ryam̎.
iḍā̍bhiraśvinā̱viṣam̎.
samūrja̱ṃ saṃ ra̱yiṃ da̍dhuḥ.
aśvi̍nā̱ namu̍ceḥ su̱tam.
soma̍ṃ śu̱kraṃ pa̍ri̱srutā̎.
sara̍svatī̱ tamābha̍rat.
ba̱ṟhiṣendrā̍ya̱ pāta̍ve..61..

ka̱va̱ṣyo̍ na vyaca̍svatīḥ.
a̱śvibhyā̱ṃ na duro̱ diśa̍ḥ.
indro̱ na roda̍sī̱ dughe̎.
du̱he kāmā̱nthsara̍svatī.
u̱ṣāsā̱ nakta̍maśvinā.
divendra̍ṃ sā̱yami̍ndri̱yaiḥ.
sa̱ñjā̱nā̱ne su̱peśa̍sā.
sama̍ṃ jāte̱ sara̍svatyā.
pā̱taṃ no̍ aśvinā̱ divā̎.
pā̱hi nakta̍ṃ sarasvati..62..

daivyā̍ hotārā bhiṣajā.
pā̱tamindra̱ṃ sacā̍ su̱te.
ti̱srastre̱dhā sara̍svatī.
a̱śvinā̱ bhāra̱tīḍā̎.
tī̱vraṃ pa̍ri̱srutā̱ somam̎.
indrā̍ya suṣavu̱rmadam̎.
aśvi̍nā bheṣa̱jaṃ madhu̍.
bhe̱ṣa̱jaṃ na̱ḥ sara̍svatī.
indre̱ tvaṣṭā̱ yaśa̱ḥ śriyam̎.
rū̱paṃ rū̍pamadhuḥ su̱te.
ṛ̱tu̱thendro̱ vana̱spati̍ḥ.
śa̱śa̱mā̱naḥ pa̍ri̱srutā̎.
kī̱lāla̍ma̱śvibhyā̱ṃ madhu̍.
du̱he dhe̱nuḥ sara̍svatī.
gobhi̱rna soma̍maśvinā.
māsa̍reṇa pari̱ṣkṛtā̎.
sama̍dhātā̱ṃ sara̍svatyā.
svāhendre̍ su̱taṃ madhu̍..63..

Anuvāka 13

a̱śvinā̍ ha̱viri̍ndri̱yam.
namu̍cerdhi̱yā sara̍svatī.
ā śu̱kramā̍su̱rādva̱su.
ma̱ghamindrā̍ya jabhrire.
yama̱śvinā̱ sara̍svatī.
ha̱viṣendra̱mava̍rdhayan.
sa bi̍bheda va̱laṃ ma̱gham.
namu̍cāvāsu̱re sacā̎.
tamindra̍ṃ pa̱śava̱ḥ sacā̎.
a̱śvino̱bhā sara̍svatī..64..

dadhā̍nā a̱bhya̍nūṣata.
ha̱viṣā̍ ya̱jñami̍ndri̱yam.
ya indra̍ indri̱yaṃ da̱dhuḥ.
sa̱vi̱tā varu̍ṇo̱ bhaga̍ḥ.
sa su̱trāmā̍ ha̱viṣpa̍tiḥ.
yaja̍mānāya saścata.
sa̱vi̱tā varu̍ṇo̱'dadha̍t.
yaja̍mānāya dā̱śuṣe̎.
āda̍tta̱ namu̍ce̱rvasu̍.
su̱trāmā̱ bala̍mindri̱yam..65..

varu̍ṇaḥ kṣa̱trami̍ndri̱yam.
bhage̍na savi̱tā śriyam̎.
su̱trāmā̱ yaśa̍sā̱ balam̎.
dadhā̍nā ya̱jñamā̍śata.
aśvi̍nā̱ gobhi̍rindri̱yam.
aśve̍bhirvī̱rya̍ṃ balam̎.
ha̱viṣendra̱ṃ sara̍svatī.
yaja̍mānamavardhayan.
tā nāsa̍tyā su̱peśa̍sā.
hira̍ṇyavartanī̱ narā̎.
sara̍svatī ha̱viṣma̍tī.
indra̱ karma̍su no'vata.
tā bhi̱ṣajā̍ su̱karma̍ṇā.
sā su̱dughā̱ sara̍svatī.
sa vṛ̍tra̱hā śa̱takra̍tuḥ.
indrā̍ya dadhurindri̱yam..66..

Anuvāka 14

de̱vaṃ ba̱ṟhiḥ sara̍svatī.
su̱de̱vamindre̍ a̱śvinā̎.
tejo̱ na cakṣu̍ra̱kṣyoḥ.
ba̱ṟhiṣā̍ dadhurindri̱yam.
va̱su̱vane̍ vasu̱dheya̍sya viyantu̱ yaja̍.
de̱vīrdvāro̍ a̱śvinā̎.
bhi̱ṣajendre̱ sara̍svatī.
prā̱ṇaṃ na vī̱rya̍nna̱si.
dvāro̍ dadhurindri̱yam.
va̱su̱vane̍ vasu̱dheya̍sya viyantu̱ yaja̍..67..

de̱vī u̱ṣāsā̍va̱śvinā̎.
bhi̱ṣajendre̱ sara̍svatī.
bala̱ṃ na vāca̍mā̱sye̎.
u̱ṣābhyā̎ṃ dadhurindri̱yam.
va̱su̱vane̍ vasu̱dheya̍sya viyantu̱ yaja̍.
de̱vī joṣṭrī̍ a̱śvinā̎.
su̱trāmendre̱ sara̍svatī.
śrotra̱ṃ na karṇa̍yo̱ryaśa̍ḥ.
joṣṭrī̎bhyāṃ dadhurindri̱yam.
va̱su̱vane̍ vasu̱dheya̍sya viyantu̱ yaja̍..68..

de̱vī ū̱rjāhu̍tī̱ dughe̍ su̱dughe̎.
paya̱sendra̱ṃ sara̍svatya̱śvinā̍ bhi̱ṣajā̍'vata.
śu̱kraṃ na jyoti̱ḥ stana̍yo̱rāhu̍tī dhatta indri̱yam.
va̱su̱vane̍ vasu̱dheya̍sya viyantu̱ yaja̍.
de̱vā de̱vānā̎ṃ bhi̱ṣajā̎.
hotā̍rā̱vindra̍ma̱śvinā̎.
va̱ṣa̱ṭkā̱raiḥ sara̍svatī.
tviṣi̱ṃ na hṛda̍ye ma̱tim.
hotṛ̍bhyāṃ dadhurindri̱yam.
va̱su̱vane̍ vasu̱dheya̍sya viyantu̱ yaja̍..69..

de̱vīsti̱srasti̱sro de̱vīḥ.
sara̍svatya̱śvinā̱ bhāra̱tīḍā̎.
śūṣa̱nna madhye̱ nābhyā̎m.
indrā̍ya dadhurindri̱yam.
va̱su̱vane̍ vasu̱dheya̍sya viyantu̱ yaja̍.
de̱va indro̱ narā̱śaṃsa̍ḥ.
tri̱va̱rū̱thaḥ sara̍svatyā̱'śvibhyā̍mīyate̱ ratha̍ḥ.
reto̱ na rū̱pama̱mṛta̍ṃ ja̱nitram̎.
indrā̍ya̱ tvaṣṭā̱ dadha̍dindri̱yāṇi̍.
va̱su̱vane̍ vasu̱dheya̍sya viyantu̱ yaja̍..70..

de̱va indro̱ vana̱spati̍ḥ.
hira̍ṇyaparṇo a̱śvibhyām̎.
sara̍svatyāḥ supippa̱laḥ.
indrā̍ya pacyate̱ madhu̍.
ojo̱ na jū̱timṛ̍ṣa̱bho na bhāmam̎.
vana̱spati̍rno̱ dadha̍dindri̱yāṇi̍.
va̱su̱vane̍ vasu̱dheya̍sya viyantu̱ yaja̍.
de̱vaṃ ba̱ṟhirvāri̍tīnām.
a̱dhva̱re stī̱rṇama̱śvibhyā̎m.
ūrṇa̍mradā̱ḥ sara̍svatyāḥ..71..

syo̱nami̍ndra te̱ sada̍ḥ.
ī̱śāyai̍ ma̱nyuṃ rājā̍naṃ ba̱ṟhiṣā̍ dadhurindri̱yam.
va̱su̱vane̍ vasu̱dheya̍sya viyantu̱ yaja̍.
de̱vo a̱gniḥ svi̍ṣṭa̱kṛt.
de̱vān ya̍kṣadyathāya̱tham.
hotā̍rā̱vindra̍ma̱śvinā̎.
vā̱cā vāca̱ṃ sara̍svatīm.
a̱gniṃ soma̍ṃ sviṣṭa̱kṛt.
svi̍ṣṭa̱ indra̍ḥ su̱trāmā̍ savi̱tā varu̍ṇo bhi̱ṣak.
i̱ṣṭo de̱vo vana̱spati̍ḥ.
svi̍ṣṭā de̱vā ā̎jya̱pāḥ.
i̱ṣṭo a̱gnira̱gninā̎.
hotā̍ ho̱tre svi̍ṣṭa̱kṛt.
yaśo̱ na dadha̍dindri̱yam.
ūrja̱mapa̍citiṃ sva̱dhām.
va̱su̱vane̍ vasu̱dheya̍sya viyantu̱ yaja̍..72..

Anuvāka 15

a̱gnima̱dya hotā̍ramavṛṇīta.
a̱yaṃ su̍tāsu̱tī yaja̍mānaḥ.
paca̍npa̱ktīḥ.
paca̍npuro̱ḍāśān̍.
gṛ̱hṇangrahān̍.
ba̱dhnanna̱śvibhyā̱ṃ chāga̱ṃ sara̍svatyā̱ indrā̍ya.
ba̱dhnanthsara̍svatyai me̱ṣamindrā̍yā̱śvibhyā̎m.
ba̱dhnannindrā̍yarṣa̱bhama̱śvibhyā̱ṃ sara̍svatyai.
sū̱pa̱sthā a̱dya de̱vo vana̱spati̍rabhavat.
a̱śvibhyā̱ṃ chāge̍na̱ sara̍svatyā̱ indrā̍ya..73..

sara̍svatyai me̱ṣeṇendrā̍yā̱śvibhyā̎m.
indrā̍yarṣa̱bheṇā̱śvibhyā̱ṃ sara̍svatyai.
akṣa̱ṃstānme̍da̱staḥ prati̍paca̱tāgra̍bhīṣuḥ.
avī̍vṛdhanta̱ grahai̎ḥ.
apā̍tāma̱śvinā̱ sara̍sva̱tīndra̍ḥ su̱trāmā̍ vṛtra̱hā.
somā̎nthsu̱rāmṇa̍ḥ.
upo̍ ukthāma̱dāḥ śrau̱dvimadā̍ adan.
avī̍vṛdhantāṅgū̱ṣaiḥ.
tvāma̱dyarṣa̍ ārṣeyarṣīṇāṃ napādavṛṇīta.
a̱yaṃ su̍tāsu̱tī yaja̍mānaḥ.
ba̱hubhya̱ ā saṅga̍tebhyaḥ.
e̱ṣa me̍ de̱veṣu̱ vasu̱ vāryā ya̍kṣyata̱ iti̍.
tā yā de̱vā de̍va̱dānā̱nyadu̍ḥ.
tānya̍smā̱ ā ca̱ śāsva̍.
ā ca̍ gurasva.
i̱ṣi̱taśca̍ hota̱rasi̍ bhadra̱vācyā̍ya̱ preṣi̍to̱ mānu̍ṣaḥ.
sū̱kta̱vā̱kāya̍ sū̱ktā brū̍hi..74..

Anuvāka 16

u̱śanta̍stvā havāmaha̱ ā no̍ agne suke̱tunā̎.
tvaṃ so̍ma ma̱he bhaga̱ṃ tvaṃ so̍ma̱ praci̍kito manī̱ṣā.
tvayā̱ hi na̍ḥ pi̱tara̍ḥ soma̱ pūrve̱ tvaṃ so̍ma pi̱tṛbhi̍ḥ saṃvidā̱naḥ.
barhi̍ṣadaḥ pitara̱ ā'haṃ pi̱tṝn.
upa̍hūtāḥ pi̱taro'gni̍ṣvāttāḥ pitaraḥ.
a̱gni̱ṣvā̱ttānṛ̍tu̱mato̍ havāmahe.
narā̱śaṃse̍ somapī̱thaṃ ya ā̱śuḥ.
te no̱ arva̍ntaḥ su̱havā̍ bhavantu.
śaṃ no̍ bhavantu dvi̱pade̱ śaṃ catu̍ṣpade.
ye a̍gniṣvā̱ttā ye'na̍gniṣvāttāḥ..75..

a̱ṃho̱muca̍ḥ pi̱tara̍ḥ so̱myāsa̍ḥ.
pare'va̍re̱'mṛtā̍so̱ bhava̍ntaḥ.
adhi̍ bruvantu̱ te a̍vantva̱smān.
vā̱nyā̍yai du̱gdhe ju̱ṣamā̍ṇāḥ kara̱mbham.
u̱dīrā̍ṇā̱ ava̍re̱ pare̍ ca.
a̱gni̱ṣvā̱ttā ṛ̱tubhi̍ḥ saṃvidā̱nāḥ.
indra̍vanto ha̱viri̱daṃ ju̍ṣantām.
yada̍gne kavyavāhana̱ tvama̍gna īḍi̱to jā̍tavedaḥ.
māta̍lī ka̱vyaiḥ.
ye tā̍tṛ̱purde̍va̱trā jeha̍mānāḥ.
ho̱trā̱vṛdha̱ḥ stoma̍taṣṭāso a̱rkaiḥ.
ā'gne̍ yāhi suvi̱datre̍bhira̱rvāṅ.
sa̱tyaiḥ ka̱vyaiḥ pi̱tṛbhi̍rgharma̱sadbhi̍ḥ.
ha̱vya̱vāha̍ma̱jara̍ṃ purupri̱yam.
a̱gniṃ ghṛ̱tena̍ ha̱viṣā̍ sapa̱ryan.
upā̍sadaṃ kavya̱vāha̍ṃ pitṛ̱ṇām.
sa na̍ḥ pra̱jāṃ vī̱rava̍tī̱ṃ samṛ̍ṇvatu..76..

Anuvāka 17

hotā̍ yakṣadi̱ḍaspa̱de.
sa̱mi̱dhā̱naṃ ma̱hadyaśa̍ḥ.
suṣa̍middha̱ṃ vare̎ṇyam.
a̱gnimindra̍ṃ vayo̱dhasam̎.
gā̱ya̱trīṃ chanda̍ indri̱yam.
tryavi̱ṃ gāṃ vayo̱ dadha̍t.
vetvā''jya̍sya̱ hota̱ryaja̍.
hotā̍ yakṣa̱cchuci̍vratam.
tanū̱napā̍tamu̱dbhidam̎.
yaṃ garbha̱madi̍tirda̱dhe..77..

śuci̱mindra̍ṃ vayo̱dhasam̎.
u̱ṣṇiha̱ṃ chanda̍ indri̱yam.
di̱tya̱vāha̱ṃ gāṃ vayo̱ dadha̍t.
vetvā''jya̍sya̱ hota̱ryaja̍.
hotā̍ yakṣadī̱ḍenyam̎.
ī̱ḍi̱taṃ vṛ̍tra̱hanta̍mam.
iḍā̍bhi̱rīḍya̱ṃ saha̍ḥ.
soma̱mindra̍ṃ vayo̱dhasam̎.
a̱nu̱ṣṭubha̱ṃ chanda̍ indri̱yam.
tri̱va̱thsaṃ gāṃ vayo̱ dadha̍t..78..

vetvā''jya̍sya̱ hota̱ryaja̍.
hotā̍ yakṣathsubarhi̱ṣadam̎.
pū̱ṣa̱ṇvanta̱mama̍rtyam.
sīda̍ntaṃ ba̱ṟhiṣi̍ pri̱ye.
a̱mṛtendra̍ṃ vayo̱dhasam̎.
bṛ̱ha̱tīṃ chanda̍ indri̱yam.
pañcā̍vi̱ṃ gāṃ vayo̱ dadha̍t.
vetvā''jya̍sya̱ hota̱ryaja̍.
hotā̍yakṣa̱dvyaca̍svatīḥ.
su̱prā̱ya̱ṇā ṛ̍tā̱vṛdha̍ḥ..79..

dvāro̍ de̱vīrhi̍ra̱ṇyayī̎ḥ.
bra̱hmāṇa̱ indra̍ṃ vayo̱dhasam̎.
pa̱ṅktiṃ chanda̍ i̱hendri̱yam.
tu̱rya̱vāha̱ṃ gāṃ vayo̱ dadha̍t.
vetvā''jya̍sya̱ hota̱ryaja̍.
hotā̍ yakṣathsu̱peśa̍se.
su̱śi̱lpe bṛ̍ha̱tī u̱bhe.
nakto̱ṣāsā̱ na da̍rśa̱te.
viśva̱mindra̍ṃ vayo̱dhasam̎.
tri̱ṣṭubha̱ṃ chanda̍ indri̱yam..80..

pa̱ṣṭha̱vāha̱ṃ gāṃ vayo̱ dadha̍t.
vetvā''jya̍sya̱ hota̱ryaja̍.
hotā̍ yakṣa̱tprace̍tasā.
de̱vānā̍mutta̱maṃ yaśa̍ḥ.
hotā̍rā̱ daivyā̍ ka̱vī.
sa̱yujendra̍ṃ vayo̱dhasam̎.
jaga̍tī̱ṃ chanda̍ i̱hendri̱yam.
a̱na̱ḍvāha̱ṃ gāṃ vayo̱ dadha̍t.
vetvā''jya̍sya̱ hota̱ryaja̍.
hotā̍ yakṣa̱tpeśa̍svatīḥ..81..

ti̱sro de̱vīrhi̍ra̱ṇyayī̎ḥ.
bhāra̍tīrbṛha̱tīrma̱hīḥ.
pati̱mindra̍ṃ vayo̱dhasam̎.
vi̱rāja̱ṃ chanda̍ i̱hendri̱yam.
dhe̱nuṃ gāṃ na vayo̱ dadha̍t.
vetvā''jya̍sya̱ hota̱ryaja̍.
hotā̍ yakṣathsu̱reta̍sam.
tvaṣṭā̍raṃ puṣṭi̱vardha̍nam.
rū̱pāṇi̱ bibhra̍ta̱ṃ pṛtha̍k.
puṣṭi̱mindra̍ṃ vayo̱dhasam̎..82..

dvi̱pada̱ṃ chanda̍ i̱hendri̱yam.
u̱kṣāṇa̱ṃ gāṃ na vayo̱ dadha̍t.
vetvā''jya̍sya̱ hota̱ryaja̍.
hotā̍ yakṣaccha̱takra̍tum.
hira̍ṇyaparṇamu̱kthinam̎.
ra̱śa̱nāṃ bibhra̍taṃ va̱śim.
bhaga̱mindra̍ṃ vayo̱dhasam̎.
ka̱kubha̱ṃ chanda̍ i̱hendri̱yam.
va̱śāṃ ve̱hata̱ṃ gāṃ na vayo̱ dadha̍t.
vetvā''jya̍sya̱ hota̱ryaja̍.
hotā̍ yakṣa̱thsvāhā̍kṛtīḥ.
a̱gniṃ gṛ̱hapa̍ti̱ṃ pṛtha̍k.
varu̍ṇaṃ bheṣa̱jaṃ ka̱vim.
kṣa̱tramindra̍ṃ vayo̱dhasam̎.
ati̍cchandasa̱ṃ chanda̍ indri̱yam.
bṛ̱hadṛ̍ṣa̱bhaṃ gāṃ vayo̱ dadha̍t.
vetvā''jya̍sya̱ hota̱ryaja̍..83..

Anuvāka 18

sami̍ddho a̱gniḥ sa̱midhā̎.
suṣa̍middho̱ vare̎ṇyaḥ.
gā̱ya̱trī chanda̍ indri̱yam.
tryavi̱rgaurvayo̍ dadhuḥ.
tanū̱napā̱cchuci̍vrataḥ.
ta̱nū̱pācca̱ sara̍svatī.
u̱ṣṇikchanda̍ indri̱yam.
di̱tya̱vāḍgaurvayo̍ dadhuḥ.
iḍā̍bhira̱gnirīḍya̍ḥ.
somo̍ de̱vo ama̍rtyaḥ..84..

a̱nu̱ṣṭupchanda̍ indri̱yam.
tri̱va̱thso gaurvayo̍ dadhuḥ.
su̱ba̱ṟhira̱gniḥ pū̍ṣa̱ṇvān.
stī̱rṇaba̍rhi̱rama̍rtyaḥ.
bṛ̱ha̱tī chanda̍ indri̱yam.
pañcā̍vi̱rgaurvayo̍ dadhuḥ.
duro̍ de̱vīrdiśo̍ ma̱hīḥ.
bra̱hmā de̱vo bṛha̱spati̍ḥ.
pa̱ṅktiśchanda̍ i̱hendri̱yam.
tu̱rya̱vāḍgaurvayo̍ dadhuḥ..85..

u̱ṣe ya̱hvī su̱peśa̍sā.
viśve̍ de̱vā ama̍rtyāḥ.
tri̱ṣṭupchanda̍ indri̱yam.
pa̱ṣṭha̱vādgaurvayo̍ dadhuḥ.
daivyā̍ hotārā bhiṣajā.
indre̍ṇa sa̱yujā̍ yu̱jā.
jaga̍tī̱ chanda̍ i̱hendri̱yam.
a̱na̱ḍvāngaurvayo̍ dadhuḥ.
ti̱sra iḍā̱ sara̍svatī.
bhāra̍tī ma̱ruto̱ viśa̍ḥ..86..

vi̱rāṭchanda̍ i̱hendri̱yam.
dhe̱nurgaurna vayo̍ dadhuḥ.
tvaṣṭā̍ tu̱rīpo̱ adbhu̍taḥ.
i̱ndrā̱gnī pu̍ṣṭi̱vardha̍nā.
dvi̱pācchanda̍ i̱hendri̱yam.
u̱kṣā gaurna vayo̍ dadhuḥ.
śa̱mi̱tā no̱ vana̱spati̍ḥ.
sa̱vi̱tā pra̍su̱vanbhagam̎.
ka̱kucchanda̍ i̱hendri̱yam.
va̱śā ve̱hadgaurna vayo̍ dadhuḥ.
svāhā̍ ya̱jñaṃ varu̍ṇaḥ.
su̱kṣa̱tro bhe̍ṣa̱jaṃ ka̍rat.
ati̍cchandā̱śchanda̍ indri̱yam.
bṛ̱hadṛ̍ṣa̱bho gaurvayo̍ dadhuḥ..87..

Anuvāka 19

va̱sa̱ntena̱rtunā̍ de̱vāḥ.
vasa̍vastri̱vṛtā̎ stu̱tam.
ra̱tha̱nta̱reṇa̱ teja̍sā.
ha̱virindre̱ vayo̍ dadhuḥ.
grī̱ṣmeṇa̍ de̱vā ṛ̱tunā̎.
ru̱drāḥ pa̍ñcada̱śe stu̱tam.
bṛ̱ha̱tā yaśa̍sā̱ balam̎.
ha̱virindre̱ vayo̍ dadhuḥ.
va̱ṟṣābhi̍rṛ̱tunā̍''di̱tyāḥ.
stome̍ saptada̱śe stu̱tam..88..

vai̱rū̱peṇa̍ vi̱śauja̍sā.
ha̱virindre̱ vayo̍ dadhuḥ.
śā̱ra̱dena̱rtunā̍ de̱vāḥ.
e̱ka̱vi̱ṃśa ṛ̱bhava̍ḥ stu̱tam.
vai̱rā̱jena̍ śri̱yā śriyam̎.
ha̱virindre̱ vayo̍ dadhuḥ.
he̱ma̱ntena̱rtunā̍ de̱vāḥ.
ma̱ruta̍striṇa̱ve stu̱tam.
bale̍na̱ śakva̍rī̱ḥ saha̍ḥ.
ha̱virindre̱ vayo̍ dadhuḥ.
śai̱śi̱reṇa̱rtunā̍ de̱vāḥ.
tra̱ya̱stri̱ṃśe̍'mṛta̍ṃ stu̱tam.
sa̱tyena̍ re̱vatī̎ḥ kṣa̱tram.
ha̱virindre̱ vayo̍ dadhuḥ..89..

Anuvāka 20

de̱vaṃ ba̱ṟhirindra̍ṃ vayo̱dhasam̎.
de̱vaṃ de̱vama̍vardhayat.
gā̱ya̱tri̱yā chanda̍sendri̱yam.
teja̱ indre̱ vayo̱ dadha̍t.
va̱su̱vane̍ vasu̱dheya̍sya vetu̱ yaja̍.
de̱vīrdvāro̍ de̱vamindra̍ṃ vayo̱dhasam̎.
de̱vīrde̱vama̍vardhayan.
u̱ṣṇihā̱ chanda̍sendri̱yam.
prā̱ṇamindre̱ vayo̱ dadha̍t.
va̱su̱vane̍ vasu̱dheya̍sya viyantu̱ yaja̍..90..

de̱vī de̱vaṃ va̍yo̱dhasam̎.
u̱ṣe indra̍mavardhatām.
a̱nu̱ṣṭubhā̱ chanda̍sendri̱yam.
vāca̱mindre̱ vayo̱ dadha̍t.
va̱su̱vane̍ vasu̱dheya̍sya vītā̱ṃ yaja̍.
de̱vī joṣṭrī̍ de̱vamindra̍ṃ vayo̱dhasam̎.
de̱vī de̱vama̍vardhatām.
bṛ̱ha̱tyā chanda̍sendri̱yam.
śrotra̱mindre̱ vayo̱ dadha̍t.
va̱su̱vane̍ vasu̱dheya̍sya vītā̱ṃ yaja̍..91..

de̱vī ū̱rjāhu̍tī de̱vamindra̍ṃ vayo̱dhasam̎.
de̱vī de̱vama̍vardhatām.
pa̱ṅktyā chanda̍sendri̱yam.
śu̱kramindre̱ vayo̱ dadha̍t.
va̱su̱vane̍ vasu̱dheya̍sya vītā̱ṃ yaja̍.
de̱vā daivyā̱ hotā̍rā de̱vamindra̍ṃ vayo̱dhasam̎.
de̱vā de̱vama̍vardhatām.
tri̱ṣṭubhā̱ chanda̍sendri̱yam.
tviṣi̱mindre̱ vayo̱ dadha̍t.
va̱su̱vane̍ vasu̱dheya̍sya vītā̱ṃ yaja̍..92..

de̱vīsti̱srasti̱sro de̱vīrva̍yo̱dhasam̎.
pati̱mindra̍mavardhayan.
jaga̍tyā̱ chanda̍sendri̱yam.
bala̱mindre̱ vayo̱ dadha̍t.
va̱su̱va̱ne̍ vasu̱dheya̍sya viyantu̱ yaja̍.
de̱vo narā̱śaṃso̍ de̱vamindra̍ṃ vayo̱dhasam̎.
de̱vo de̱vama̍vardhayat.
vi̱rājā̱ chanda̍sendri̱yam.
reta̱ indre̱ vayo̱ dadha̍t.
va̱su̱vane̍ vasu̱dheya̍sya vetu̱ yaja̍..93..

de̱vo vana̱spati̍rde̱vamindra̍ṃ vayo̱dhasam̎.
de̱vo de̱vama̍vardhayat.
dvi̱padā̱ chanda̍sendri̱yam.
bhaga̱mindre̱ vayo̱ dadha̍t.
va̱su̱vane̍ vasu̱dheya̍sya vetu̱ yaja̍.
de̱vaṃ ba̱ṟhirvāri̍tīnāṃ de̱vamindra̍ṃ vayo̱dhasam̎.
de̱vaṃ de̱vama̍vardhayat.
ka̱kubhā̱ chanda̍sendri̱yam.
yaśa̱ indre̱ vayo̱ dadha̍t.
va̱su̱vane̍ vasu̱dheya̍sya vetu̱ yaja̍.
de̱vo a̱gniḥ svi̍ṣṭa̱kṛdde̱vamindra̍ṃ vayo̱dhasam̎.
de̱vo de̱vama̍vardhayat.
ati̍cchandasā̱ chanda̍sendri̱yam.
kṣa̱tramindre̱ vayo̱ dadha̍t.
va̱su̱vane̍ vasu̱dheya̍sya vetu̱ yaja̍..94..

Anuvāka 1

tri̱vṛthstomo̍ bhavati.
bra̱hma̱va̱rca̱saṃ vai tri̱vṛt.
bra̱hma̱va̱rca̱same̱vāva̍ rundhe.
a̱gni̱ṣṭo̱maḥ somo̍ bhavati.
bra̱hma̱va̱rca̱saṃ vā a̍gniṣṭo̱maḥ.
bra̱hma̱va̱rca̱same̱vāva̍ rundhe.
ra̱tha̱nta̱raṃ sāma̍ bhavati.
bra̱hma̱va̱rca̱saṃ vai ra̍thanta̱ram.
bra̱hma̱va̱rca̱same̱vāva̍ rundhe.
pa̱ri̱sra̱jī hotā̍ bhavati..1..

a̱ru̱ṇo mi̍rmi̱rastriśu̍kraḥ.
e̱tadvai bra̍hmavarca̱sasya̍ rū̱pam.
rū̱peṇai̱va bra̍hmavarca̱samava̍ rundhe.
bṛha̱spati̍rakāmayata de̱vānā̎ṃ puro̱dhāṃ ga̍ccheya̱miti̍.
sa e̱taṃ bṛ̍haspatisa̱vama̍paśyat.
tamā'ha̍rat.
tenā̍yajata.
tato̱ vai sa de̱vānā̎ṃ puro̱dhāma̍gacchat.
yaḥ pu̍ro̱dhākā̍ma̱ḥ syāt.
sa bṛ̍haspatisa̱vena̍ yajeta..2..

pu̱ro̱dhāme̱va ga̍cchati.
tasya̍ prātaḥ sava̱ne sa̱nneṣu̍ nārāśa̱ṃseṣu̍.
ekā̍daśa̱ dakṣi̍ṇā nīyante.
ekā̍daśa̱ mādhya̍ṃ dine̱ sava̍ne sa̱nneṣu̍ nārāśa̱ṃseṣu̍.
ekā̍daśa tṛtīyasava̱ne sa̱nneṣu̍ nārāśa̱ṃseṣu̍.
traya̍striṃśa̱thsaṃ pa̍dyante.
traya̍striṃśa̱dvai de̱vatā̎ḥ.
de̱vatā̍ e̱vāva̍ rundhe.
aśva̍ścatustri̱ṃśaḥ.
prā̱jā̱pa̱tyo vā aśva̍ḥ..3..

pra̱jāpa̍tiścatustri̱ṃśo de̱vatā̍nām.
yāva̍tīre̱va de̱vatā̎ḥ.
tā e̱vāva̍ rundhe.
kṛ̱ṣṇā̱ji̱ne̍'bhiṣi̍ñcati.
brahma̍ṇo̱ vā e̱tadrū̱pam.
yatkṛ̍ṣṇāji̱nam.
bra̱hma̱va̱rca̱senai̱vaina̱ṃ sama̍rdhayati.
ājye̍nā̱bhiṣi̍ñcati.
tejo̱ vā ājyam̎.
teja̍ e̱vāsmi̍ndadhāti..4..

Anuvāka 2

yadā̎gne̱yo bhava̍ti.
a̱gnimu̍khā̱ hyṛddhi̍ḥ.
atha̱ yatpau̱ṣṇaḥ.
puṣṭi̱rvai pū̱ṣā.
puṣṭi̱rvaiśya̍sya.
puṣṭi̍me̱vāva̍ rundhe.
pra̱sa̱vāya̍ sāvi̱traḥ.
atha̱ yattvā̱ṣṭraḥ.
tvaṣṭā̱ hi rū̱pāṇi̍ vika̱roti̍.
ni̱rva̱ru̱ṇa̱tvāya̍ vāru̱ṇaḥ..5..

atho̱ ya e̱va kaśca̱ santhsū̱yate̎.
sa hi vā̍ru̱ṇaḥ.
atha̱ yadvai̎śvade̱vaḥ.
vai̱śva̱de̱vo hi vaiśya̍ḥ.
atha̱ yanmā̍ru̱taḥ.
mā̱ru̱to hi vaiśya̍ḥ.
sa̱ptaitāni̍ ha̱vīṃṣi̍ bhavanti.
sa̱ptaga̍ṇā̱ vai ma̱ruta̍ḥ.
pṛśñi̍ḥ paṣṭhau̱hī mā̍ru̱tyā la̍bhyate.
viḍvai ma̱ruta̍ḥ.
viśa̍ e̱vaitanma̍dhya̱to̍'bhiṣi̍cyate.
tasmā̱dvā e̱ṣa vi̱śaḥ pri̱yaḥ.
vi̱śo hi ma̍dhya̱to̍'bhiṣi̱cyate̎.
ṛ̱ṣa̱bha̱ca̱rme'dhya̱bhiṣi̍ñcati.
sa hi pra̍janayi̱tā.
da̱dhnā'bhiṣi̍ñcati.
ūrgvā a̱nnādya̱ṃ dadhi̍.
ū̱rjaivaina̍ma̱nnādye̍na̱ sama̍rdhayati..6..

Anuvāka 3

yadā̎gne̱yo bhava̍ti.
ā̱gne̱yo vai brā̎hma̱ṇaḥ.
atha̱ yathsau̱myaḥ.
sau̱myo hi brā̎hma̱ṇaḥ.
pra̱sa̱vāyai̱va sā̍vi̱traḥ.
atha̱ yadbā̍rhaspa̱tyaḥ.
e̱tadvai brā̎hma̱ṇasya̍ vākpa̱tīyam̎.
atha̱ yada̍gnīṣo̱mīya̍ḥ.
ā̱gne̱yo vai brā̎hma̱ṇaḥ.
tau ya̱dā sa̱ṅgacche̍te..7..

atha̍ vī̱ryā̍vattaro bhavati.
atha̱ yathsā̍rasva̱taḥ.
e̱taddhi pra̱tyakṣa̍ṃ brāhma̱ṇasya̍ vākpa̱tīyam̎.
ni̱rva̱ru̱ṇa̱tvāyai̱va vā̍ru̱ṇaḥ.
atho̱ ya e̱va kaśca̱ santhsū̱yate̎.
sa hi vā̍ru̱ṇaḥ.
atha̱ yaddyā̍vāpṛthi̱vya̍ḥ.
indro̍ vṛ̱trāya̱ vajra̱muda̍yacchat.
taṃ dyāvā̍pṛthi̱vī nānva̍manyetām.
tame̱tenai̱va bhā̍ga̱dheye̱nānva̍manyetām..8..

vajra̍sya̱ vā e̱ṣo̍'numā̱nāya̍.
anu̍matavajraḥ sūyātā̱ iti̍.
a̱ṣṭāve̱tāni̍ ha̱vīṃṣi̍ bhavanti.
a̱ṣṭākṣa̍rā gāya̱trī.
gā̱ya̱trī bra̍hmavarca̱sam.
gā̱ya̱tri̱yaiva bra̍hmavarca̱samava̍ rundhe.
hira̍ṇyena ghṛ̱tamutpu̍nāti.
teja̍sa e̱va ru̱ce.
kṛ̱ṣṇā̱ji̱ne̍'bhiṣi̍ñcati.
brahma̍ṇo̱ vā e̱tadṛ̍khsā̱mayo̍ rū̱pam.
yatkṛ̍ṣṇāji̱nam.
brahma̍nne̱vaina̍mṛkhsā̱mayo̱radhya̱bhiṣi̍ñcati.
ghṛ̱tenā̱bhiṣi̍ñcati.
tathā̍ vī̱ryā̍vattaro bhavati..9..

Anuvāka 4

na vai some̍na̱ soma̍sya sa̱vo̎'sti.
ha̱to hye̍ṣaḥ.
a̱bhiṣu̍to̱ hye̍ṣaḥ.
na hi ha̱taḥ sū̱yate̎.
sau̱mīṃ sū̱tava̍śā̱mā la̍bhate.
somo̱ vai re̍to̱dhāḥ.
reta̍ e̱va tadda̍dhāti.
sau̱myarcā'bhiṣi̍ñcati.
re̱to̱dhā hye̍ṣā.
reta̱ḥ soma̍ḥ.
reta̍ e̱vāsmi̍ndadhāti.
yatkiṃ ca̍ rāja̱sūya̍mṛ̱te somam̎.
tathsarva̍ṃ bhavati.
aṣā̍ḍhaṃ yu̱thsu pṛta̍nāsu̱ paprim̎.
su̱va̱ṟṣāma̱phsvāṃ vṛ̱jana̍sya go̱pām.
bha̱re̱ṣu̱jāṃ su̍kṣi̱tiṃ su̱śrava̍sam.
jaya̍nta̱ṃ tvāmanu̍ madema soma..10..

Anuvāka 5

yo vai some̍na sū̱yate̎.
sa de̍vasa̱vaḥ.
yaḥ pa̱śunā̍ sū̱yate̎.
sa de̍vasa̱vaḥ.
ya iṣṭyā̍ sū̱yate̎.
sa ma̍nuṣyasa̱vaḥ.
e̱taṃ vai pṛtha̍ye de̱vāḥ prāya̍cchan.
tato̱ vai so'pyā̍ra̱ṇyānā̎ṃ paśū̱nāma̍sūyata.
yāva̍tī̱ḥ kiya̍tīśca pra̱jā vāca̱ṃ vada̍nti.
tāsā̱ṃ sarvā̍sāṃ sūyate..11..

ya e̱tena̱ yaja̍te.
ya u̍ cainame̱vaṃ veda̍.
nā̱rā̱śa̱ṃsyarcā'bhiṣi̍ñcati.
ma̱nu̱ṣyā̍ vai narā̱śaṃsa̍ḥ.
ni̱hnutya̱ vāvaitat.
athā̱bhiṣi̍ñcati.
yatkiṃ ca̍ rāja̱sūya̍manuttarave̱dīkam̎.
tathsarva̍ṃ bhavati.
ye me̍ pañcā̱śata̍ṃ da̱duḥ.
aśvā̍nāṃ sa̱dhastu̍tiḥ.
dyu̱mada̍gne̱ mahi̱ śrava̍ḥ.
bṛ̱hatkṛ̍dhi ma̱ghonā̎m.
nṛ̱vada̍mṛta nṛ̱ṇām..12..

Anuvāka 6

e̱ṣa go̍sa̱vaḥ.
ṣa̱ṭtri̱ṃśa u̱kthyo̍ bṛ̱hathsā̍mā.
pava̍māne kaṇvarathanta̱raṃ bha̍vati.
yo vai vā̍ja̱peya̍ḥ.
sa sa̍mrāṭthsa̱vaḥ.
yo rā̍ja̱sūya̍ḥ.
sa va̍ruṇasa̱vaḥ.
pra̱jāpa̍ti̱ḥ svārā̎jyaṃ parame̱ṣṭhī.
svārā̎jya̱ṃ gaure̱va.
gauri̍va bhavati..13..

ya e̱tena̱ yaja̍te.
ya u̍ cainame̱vaṃ veda̍.
u̱bhe bṛ̍hadrathanta̱re bha̍vataḥ.
taddhi svārā̎jyam.
a̱yuta̱ṃ dakṣi̍ṇāḥ.
taddhi svārā̎jyam.
pra̱ti̱dhuṣā̱'bhiṣi̍ñcati.
taddhi svārā̎jyam.
anu̍ddhate̱ vedyai̍ dakṣiṇa̱ta ā̍hava̱nīya̍sya bṛha̱taḥ sto̱traṃ pratya̱bhiṣi̍ñcati.
i̱yaṃ vāva ra̍thanta̱ram..14..

a̱sau bṛ̱hat.
a̱nayo̍re̱vaina̱mana̍ntarhitama̱bhiṣi̍ñcati.
pa̱śu̱sto̱mo vā e̱ṣaḥ.
tena̍ gosa̱vaḥ.
ṣa̱ṭtri̱ṃśaḥ sarva̍ḥ.
re̱vajjā̱taḥ saha̍sā vṛ̱ddhaḥ.
kṣa̱trāṇā̎ṃ kṣatra̱bhṛtta̍mo vayo̱dhāḥ.
ma̱hānma̍hi̱tve ta̍stabhā̱naḥ.
kṣa̱tre rā̱ṣṭre ca̍ jāgṛhi.
pra̱jāpa̍testvā parame̱ṣṭhina̱ḥ svārā̎jyenā̱bhiṣi̍ñcā̱mītyā̍ha.
svārā̎jyame̱vaina̍ṃ gamayati..15..

Anuvāka 7

si̱ṃhe vyā̱ghra u̱ta yā pṛdā̍kau.
tviṣi̍ra̱gnau brā̎hma̱ṇe sūrye̱ yā.
indra̱ṃ yā de̱vī su̱bhagā̍ ja̱jāna̍.
sā na̱ āga̱nvarca̍sā saṃvidā̱nā.
yā rā̍ja̱nye̍ dundu̱bhāvāya̍tāyām.
aśva̍sya̱ krandye̱ puru̍ṣasya mā̱yau.
indra̱ṃ yā de̱vī su̱bhagā̍ ja̱jāna̍.
sā na̱ āga̱nvarca̍sā saṃvidā̱nā.
yā ha̱stini̍ dvī̱pini̱ yā hira̍ṇye.
tviṣi̱raśve̍ṣu̱ puru̍ṣeṣu̱ goṣu̍..16..

indra̱ṃ yā de̱vī su̱bhagā̍ ja̱jāna̍.
sā na̱ āga̱nvarca̍sā saṃvidā̱nā.
rathe̍ a̱kṣeṣu̍ vṛṣa̱bhasya̱ vāje̎.
vāte̍ pa̱rjanye̱ varu̍ṇasya̱ śuṣme̎.
indra̱ṃ yā de̱vī su̱bhagā̍ ja̱jāna̍.
sā na̱ āga̱nvarca̍sā saṃvidā̱nā.
rāḍa̍si vi̱rāḍa̍si.
sa̱mrāḍa̍si sva̱rāḍa̍si.
indrā̍ya tvā̱ teja̍svate̱ teja̍svantaṃ śrīṇāmi.
indrā̍ya̱ tvauja̍svata̱ oja̍svantaṃ śrīṇāmi..17..

indrā̍ya tvā̱ paya̍svate̱ paya̍svantaṃ śrīṇāmi.
indrā̍ya̱ tvā''yu̍ṣmata̱ āyu̍ṣmantaṃ śrīṇāmi.
tejo̍'si.
tatte̱ pra ya̍cchāmi.
teja̍svadastu me̱ mukham̎.
teja̍sva̱cchiro̍ astu me.
teja̍svān vi̱śvata̍ḥ pra̱tyaṅṅ.
teja̍sā̱ sampi̍pṛgdhi mā.
ojo̍'si.
tatte̱ pra ya̍cchāmi..18..

oja̍svadastu me̱ mukham̎.
oja̍sva̱cchiro̍ astu me.
oja̍svān vi̱śvata̍ḥ pra̱tyaṅṅ.
oja̍sā̱ saṃ pi̍pṛgdhi mā.
payo̍'si.
tatte̱ pra ya̍cchāmi.
paya̍svadastu me̱ mukham̎.
paya̍sva̱cchiro̍ astu me.
paya̍svān vi̱śvata̍ḥ pra̱tyaṅṅ.
paya̍sā̱ saṃ pi̍pṛgdhi mā..19..

āyu̍rasi.
tatte̱ pra ya̍cchāmi.
āyu̍ṣmadastu me̱ mukham̎.
āyu̍ṣma̱cchiro̍ astu me.
āyu̍ṣmān vi̱śvata̍ḥ pra̱tyaṅṅ.
āyu̍ṣā̱ saṃ pi̍pṛgdhi mā.
i̱mama̍gna̱ āyu̍ṣe̱ varca̍se kṛdhi.
pri̱yaṃ reto̍ varuṇa soma rājan.
mā̱tevā̎smā adite̱ śarma̍ yaccha.
viśve̍ devā̱ jara̍daṣṭi̱ryathā'sa̍t..20..

āyu̍rasi vi̱śvāyu̍rasi.
sa̱rvāyu̍rasi̱ sarva̱māyu̍rasi.
yato̱ vāto̱ mano̍javāḥ.
yata̱ḥ kṣara̍nti̱ sindha̍vaḥ.
tāsā̎ṃ tvā̱ sarvā̍sāṃ ru̱cā.
a̱bhiṣi̍ñcāmi̱ varca̍sā.
sa̱mu̱dra i̍vāsi ga̱hmanā̎.
soma̍ ivā̱syadā̎bhyaḥ.
a̱gniri̍va vi̱śvata̍ḥ pra̱tyaṅṅ.
sūrya̍ iva̱ jyoti̍ṣā vi̱bhūḥ..21..

a̱pāṃ yo drava̍ṇe̱ rasa̍ḥ.
tama̱hama̱smā ā̍muṣyāya̱ṇāya̍.
teja̍se brahmavarca̱sāya̍ gṛhṇāmi.
a̱pāṃ ya ū̱rmau rasa̍ḥ.
tama̱hama̱smā ā̍muṣyāya̱ṇāya̍.
oja̍se vī̱ryā̍ya gṛhṇāmi.
a̱pāṃ yo ma̍dhya̱to rasa̍ḥ.
tama̱hama̱smā ā̍muṣyāya̱ṇāya̍.
puṣṭyai̎ pra̱jana̍nāya gṛhṇāmi.
a̱pāṃ yo ya̱jñiyo̱ rasa̍ḥ.
tama̱hama̱smā ā̍muṣyāya̱ṇāya̍.
āyu̍ṣe dīrghāyu̱tvāya̍ gṛhṇāmi..22..

Anuvāka 8

a̱bhiprehi̍ vī̱raya̍sva.
u̱graścettā̍ sapatna̱hā.
āti̍ṣṭha mitra̱vardha̍naḥ.
tubhya̍ṃ de̱vā adhi̍bravan.
a̱ṅkau nya̱ṅkāva̱bhita̱ āti̍ṣṭha vṛtraha̱nratham̎.
ā̱tiṣṭha̍nta̱ṃ pari̱ viśve̍ abhūṣan.
śriya̱ṃ vasā̍naścarati̱ svaro̍cāḥ.
ma̱hattada̱syāsu̍rasya̱ nāma̍.
ā vi̱śvarū̍po a̱mṛtā̍ni tasthau.
anu̱ tvendro̍ mada̱tvanu̱ bṛha̱spati̍ḥ..23..

anu̱ somo̱ anva̱gnirā̍vīt.
anu̍ tvā̱ viśve̍ de̱vā a̍vantu.
anu̍ sa̱pta rājā̍no̱ ya u̱tābhiṣi̍ktāḥ.
anu̍ tvā mi̱trāvaru̍ṇāvi̱hāva̍tam.
anu̱ dyāvā̍pṛthi̱vī vi̱śvaśa̍mbhū.
sūryo̱ aho̍bhi̱ranu̍ tvā'vatu.
ca̱ndramā̱ nakṣa̍trai̱ranu̍ tvā'vatu.
dyauśca̍ tvā pṛthi̱vī ca̱ prace̍tasā.
śu̱kro bṛ̱haddakṣi̍ṇā tvā pipartu.
anu̍ sva̱dhā ci̍kitā̱ṃ somo̍ a̱gniḥ.
ā'yaṃ pṛ̍ṇaktu̱ raja̍sī u̱pastham̎..24..

Anuvāka 9

pra̱jāpa̍tiḥ pra̱jā a̍sṛjata.
tā a̍smāthsṛ̱ṣṭāḥ parā̍cīrāyan.
sa e̱taṃ pra̱jāpa̍tiroda̱nama̍paśyat.
so'nna̍ṃ bhū̱to̍'tiṣṭhat.
tā a̱nyatrā̱nnādya̱mavi̍tvā.
pra̱jāpa̍tiṃ pra̱jā u̱pāva̍rtanta.
anna̍me̱vaina̍ṃ bhū̱taṃ paśya̍ntīḥ pra̱jā u̱pāva̍rtante.
ya e̱tena̱ yaja̍te.
ya u̍ cainame̱vaṃ veda̍.
sarvā̱ṇyannā̍ni bhavanti..25..

sarve̱ puru̍ṣāḥ.
sarvā̎ṇye̱vānnā̱nyava̍ rundhe.
sarvā̱npuru̍ṣān.
rāḍa̍si vi̱rāḍa̱sītyā̍ha.
svārā̎jyame̱vaina̍ṃ gamayati.
yaddhira̍ṇya̱ṃ dadā̍ti.
teja̱stenāva̍ rundhe.
yatti̍sṛdha̱nvam.
vī̱rya̍ṃ tena̍.
yadaṣṭrā̎m..26..

puṣṭi̱ṃ tena̍.
yatka̍ma̱ṇḍalum̎.
āyu̱ṣṭena̍.
yaddhira̍ṇyamā ba̱dhnāti̍.
jyoti̱rvai hira̍ṇyam.
jyoti̍re̱vāsmi̍ndadhāti.
atho̱ tejo̱ vai hira̍ṇyam.
teja̍ e̱vā''tmandha̍tte.
yado̍da̱naṃ prā̱śñāti̍.
e̱tade̱va sarva̍mava̱rudhya̍..27..

tada̍sminneka̱dhā'dhā̎t.
ro̱hi̱ṇyāṃ kā̱rya̍ḥ.
yadbrā̎hma̱ṇa e̱va ro̍hi̱ṇī.
tasmā̍de̱va.
atho̱ varṣmai̱vaina̍ṃ samā̱nānā̎ṃ karoti.
u̱dya̱tā sūrye̍ṇa kā̱rya̍ḥ.
u̱dyanta̱ṃ vā e̱taṃ sarvā̎ḥ pra̱jāḥ prati̍nandanti.
di̱dṛ̱kṣeṇyo̍ darśa̱nīyo̍ bhavati.
ya e̱vaṃ veda̍.
bra̱hma̱vā̱dino̍ vadanti..28..

a̱vetyo̍'vabhṛ̱thā(3) nā(3) iti̍.
yadda̍rbhapuñjī̱laiḥ pa̱vaya̍ti.
tathsvi̍de̱vāvai̍ti.
tannāvai̍ti.
tri̱bhiḥ pa̍vayati.
traya̍ i̱me lo̱kāḥ.
e̱bhire̱vaina̍ṃ lo̱kaiḥ pa̍vayati.
atho̍ a̱pāṃ vā e̱tattejo̱ varca̍ḥ.
yadda̱rbhāḥ.
yadda̍rbhapuñjī̱laiḥ pa̱vaya̍ti.
a̱pāme̱vaina̱ṃ teja̍sā̱ varca̍sā̱'bhiṣi̍ñcati..29..

Anuvāka 10

pra̱jāpa̍tirakāmayata ba̱horbhūyā̎nthsyā̱miti̍.
sa e̱taṃ pa̍ñcaśāra̱dīya̍mapaśyat.
tamā'ha̍rat.
tenā̍yajata.
tato̱ vai sa ba̱horbhūyā̍nabhavat.
yaḥ kā̱maye̍ta ba̱horbhūyā̎nthsyā̱miti̍.
sa pa̍ñcaśāra̱dīye̍na yajeta.
ba̱hore̱va bhūyā̎nbhavati.
ma̱ru̱thsto̱mo vā e̱ṣaḥ.
ma̱ruto̱ hi de̱vānā̱ṃ bhūyi̍ṣṭhāḥ..30..

ba̱hurbha̍vati.
ya e̱tena̱ yaja̍te.
ya u̍cainame̱vaṃ veda̍.
pa̱ñca̱śā̱ra̱dīyo̍ bhavati.
pañca̱ vā ṛ̱tava̍ḥ saṃvathsa̱raḥ.
ṛ̱tuṣve̱va sa̍ṃvathsa̱re prati̍ tiṣṭhati.
atho̱ pañcā̎kṣarā pa̱ṅktiḥ.
pāṅkto̍ ya̱jñaḥ.
ya̱jñame̱vāva̍ rundhe.
sa̱pta̱da̱śaṃ stomā̱ nāti̍ yanti.
sa̱pta̱da̱śaḥ pra̱jāpa̍tiḥ.
pra̱jāpa̍te̱rāptyai̎..31..

Anuvāka 11

a̱gastyo̍ ma̱rudbhya̍ u̱kṣṇaḥ praukṣa̍t.
tānindra̱ āda̍tta.
ta e̍na̱ṃ vajra̍mu̱dyatyā̱bhyā̍yanta.
tāna̱gastya̍ścai̱vendra̍śca kayāśu̱bhīye̍nāśamayatām.
tāñchā̱ntānupā̎hvayata.
yatka̍yāśu̱bhīya̱ṃ bhava̍ti̱ śāntyai̎.
tasmā̍de̱ta ai̎ndrāmāru̱tā u̱kṣāṇa̍ḥ sava̱nīyā̍ bhavanti.
traya̍ḥ pratha̱me'ha̱nnā la̍bhyante.
e̱vaṃ dvi̱tīye̎.
e̱vaṃ tṛ̱tīye̎..32..

e̱vaṃ ca̍tu̱rthe.
pañco̎tta̱me'ha̱nnā la̍bhyante.
varṣi̍ṣṭhamiva̱ hye̍tadaha̍ḥ.
varṣi̍ṣṭhaḥ samā̱nānā̎ṃ bhavati.
ya e̱tena̱ yaja̍te.
ya u̍cainame̱vaṃ veda̍.
svārā̎jya̱ṃ vā e̱ṣa ya̱jñaḥ.
e̱tena̱ vā eka̱yā vā̍ kānda̱maḥ svārā̎jyamagacchat.
svārā̎jyaṃ gacchati.
ya e̱tena̱ yaja̍te..33..

ya u̍ cainame̱vaṃ veda̍.
mā̱ru̱to vā e̱ṣaḥ stoma̍ḥ.
e̱tena̱ vai ma̱ruto̍ de̱vānā̱ṃ bhūyi̍ṣṭhā abhavan.
bhūyi̍ṣṭhaḥ samā̱nānā̎ṃ bhavati.
ya e̱tena̱ yaja̍te.
ya u̍ cainame̱vaṃ veda̍.
pa̱ñca̱śā̱ra̱dīyo̱ vā e̱ṣa ya̱jñaḥ.
ā pa̍ñca̱mātpuru̍ṣā̱danna̍matti.
ya e̱tena̱ yaja̍te.
ya u̍ cainame̱vaṃ veda̍.
sa̱pta̱da̱śaṃ stomā̱ nāti̍ yanti.
sa̱pta̱da̱śaḥ pra̱jāpa̍tiḥ.
pra̱jāpa̍tere̱va naiti̍..34..

Anuvāka 12

a̱syā jarā̍so da̱mā ma̱ritrā̎ḥ.
a̱rcaddhū̍māso a̱gnaya̍ḥ pāva̱kāḥ.
śvi̱cī̱caya̍ḥ śvā̱trāso̍ bhura̱ṇyava̍ḥ.
va̱na̱ṟṣado̍ vā̱yavo̱ na somā̎ḥ.
yajā̍ no mi̱trāvaru̍ṇā.
yajā̍ de̱vāṃ ṛ̱taṃ bṛ̱hat.
agne̱ yakṣi̱ svandamam̎.
aśvi̍nā̱ piba̍taṃ su̱tam.
dīdya̍gnī śucivratā.
ṛ̱tunā̍ yajñavāhasā..35..

dve virū̍pe carata̱ḥ svarthe̎.
a̱nyā'nyā̍ va̱thsamupa̍ dhāpayete.
hari̍ra̱nyasyā̱ṃ bhava̍ti sva̱dhāvān̍.
śu̱kro a̱nyasyā̎ṃ dadṛśe su̱varcā̎ḥ.
pū̱rvā̱pa̱raṃ ca̍rato mā̱yayai̱tau.
śiśū̱ krīḍa̍ntau̱ pari̍ yāto adhva̱ram.
viśvā̎nya̱nyo bhuva̍nā'bhi̱ caṣṭe̎.
ṛ̱tūna̱nyo vi̱dadha̍jjāyate̱ puna̍ḥ.
trīṇi̍ śa̱tā trīṣa̱hasrā̎ṇya̱gnim.
tri̱ṃśacca̍ de̱vā nava̍ cā'saparyan..36..

aukṣa̍ṃ ghṛ̱tairāstṛ̍ṇanba̱ṟhira̍smai.
ādiddhotā̍ra̱ṃ nya̍ṣādayanta.
a̱gninā̱'gniḥ sami̍dhyate.
ka̱virgṛ̱hapa̍ti̱ryuvā̎.
ha̱vya̱vāḍju̱hvā̎''syaḥ.
a̱gnirde̱vānā̎ṃ ja̱ṭharam̎.
pū̱tada̍kṣaḥ ka̱vikra̍tuḥ.
de̱vo de̱vebhi̱rā ga̍mat.
a̱gni̱śriyo̍ ma̱ruto̍ vi̱śvakṛ̍ṣṭayaḥ.
ā tve̱ṣamu̱gramava̍ īmahe va̱yam..37..

te svā̱nino̍ ru̱driyā̍ va̱ṟṣani̍rṇijaḥ.
si̱ṃhā na he̱ṣakra̍tavaḥ su̱dāna̍vaḥ.
yadu̍tta̱me ma̍ruto madhya̱me vā̎.
yadvā̍'va̱me su̍bhagāso di̱vi ṣṭha.
tato̍ no rudrā u̱ta vā̱'nvasya̍.
agne̍ vi̱ttāddha̱viṣo̱ yadyajā̍maḥ.
īḍe̍ a̱gniṃ svava̍sa̱nnamo̍bhiḥ.
i̱ha pra̍sa̱pto vi ca̍ yatkṛ̱taṃ na̍ḥ.
rathai̍riva̱ prabha̍re vāja̱yadbhi̍ḥ.
pra̱da̱kṣi̱ṇinma̱rutā̱ṃ stoma̍mṛddhyām..38..

śru̱dhi śru̍tkarṇa̱ vahni̍bhiḥ.
de̱vaira̍gne sa̱yāva̍bhiḥ.
āsī̍dantu ba̱ṟhiṣi̍.
mi̱tro varu̍ṇo arya̱mā.
prā̱ta̱ryāvā̍ṇo adhva̱ram.
viśve̍ṣā̱madi̍tirya̱jñiyā̍nām.
viśve̍ṣā̱mati̍thi̱rmānu̍ṣāṇām.
a̱gnirde̱vānā̱mava̍ āvṛṇā̱naḥ.
su̱mṛ̱ḍī̱ko bha̍vatu vi̱śvave̍dāḥ.
tve a̍gne suma̱tiṃ bhikṣa̍māṇāḥ..39..

di̱vi śravo̍ dadhire ya̱jñiyā̍saḥ.
naktā̍ ca ca̱kruru̱ṣasā̱ virū̍pe.
kṛ̱ṣṇaṃ ca̱ varṇa̍maru̱ṇaṃ ca̱ sandhu̍ḥ.
tvāma̍gna ādi̱tyāsa̍ ā̱syam̎.
tvāṃ ji̱hvāṃ śuca̍yaścakrire kave.
tvāṃ rā̍ti̱ṣāco̍ adhva̱reṣu̍ saścire.
tve de̱vā ha̱vira̍da̱ntyāhu̍tam.
ni tvā̍ ya̱jñasya̱ sādha̍nam.
agne̱ hotā̍ramṛ̱tvijam̎.
va̱nu̱ṣvadde̍va dhīmahi̱ prace̍tasam.
jī̱raṃ dū̱tamama̍rtyam..40..

Anuvāka 13

tiṣṭhā̱ harī̱ ratha̱ ā yu̱jyamā̍nā yā̱hi.
vā̱yurna ni̱yuto̍ no̱ accha̍.
pibā̱syandho̍ a̱bhisṛ̍ṣṭo a̱sme.
indra̱ḥ svāhā̍ rari̱mā te̱ madā̍ya.
kasya̱ vṛṣā̍ su̱te sacā̎.
ni̱yutvā̎nvṛṣa̱bho ra̍ṇat.
vṛ̱tra̱hā soma̍pītaye.
indra̍ṃ va̱yaṃ ma̍hādha̱ne.
indra̱marbhe̍ havāmahe.
yuja̍ṃ vṛ̱treṣu̍ va̱jriṇam̎..41..

dvi̱tā yo vṛ̍tra̱hanta̍maḥ.
vi̱da indra̍ḥ śa̱takra̍tuḥ.
upa̍ no̱ hari̍bhiḥ su̱tam.
sa sūra̱ āja̱naya̱ṃ jyoti̱rindram̎.
a̱yā dhi̱yā ta̱raṇi̱radri̍barhāḥ.
ṛ̱tena̍ śu̱ṣmī nava̍māno a̱rkaiḥ.
vyu̍sridho̍ a̱sro adri̍rbibheda.
u̱tatyadā̱śvaśvi̍yam.
yadi̍ndra̱ nāhu̍ṣī̱ṣvā.
agre̍ vi̱kṣu pratīda̍yat..42..

bhare̱ṣvindra̍ṃ su̱hava̍ṃ havāmahe.
a̱ṃho̱muca̍ṃ su̱kṛta̱ṃ daivya̱ṃ janam̎.
a̱gniṃ mi̱traṃ varu̍ṇaṃ sā̱taye̱ bhagam̎.
dyāvā̍pṛthi̱vī ma̱ruta̍ḥ sva̱staye̎.
ma̱hi kṣetra̍ṃ pu̱ruśca̱ndraṃ vi vi̱dvān.
ādithsakhi̍bhyaśca̱ratha̱ṃ samai̍rat.
indro̱ nṛbhi̍rajana̱ddīdyā̍naḥ sā̱kam.
sūrya̍mu̱ṣasa̍ṃ gā̱tuma̱gnim.
u̱ruṃ no̍ lo̱kamanu̍ neṣi vi̱dvān.
suva̍rva̱jjyoti̱rabha̍yaṃ sva̱sti..43..

ṛ̱ṣvā ta̍ indra̱ sthavi̍rasya bā̱hū.
upa̍stheyāma śara̱ṇā bṛ̱hantā̎.
ā no̱ viśvā̍bhirū̱tibhi̍ḥ sa̱joṣā̎ḥ.
brahma̍ juṣā̱ṇo ha̍ryaśva yāhi.
varī̍vṛja̱thsthavi̍rebhiḥ suśipra.
a̱sme dadha̱dvṛṣa̍ṇa̱ṃ śuṣma̍mindra.
indrā̍ya̱ gāva̍ ā̱śiram̎.
du̱du̱hre va̱jriṇe̱ madhu̍.
yathsī̍mupahva̱re vi̱dat.
tāste̍ vajrindhe̱navo̍ jojayurnaḥ..44..

gabha̍stayo ni̱yuto̍ vi̱śvavā̍rāḥ.
aha̍raha̱rbhūya̱ ijjogu̍vānāḥ.
pū̱rṇā i̍ndra kṣu̱mato̱ bhoja̍nasya.
i̱māṃ te̱ dhiya̱ṃ pra bha̍re ma̱ho ma̱hīm.
a̱sya sto̱tre dhi̱ṣaṇā̱ yatta̍ āna̱je.
tamu̍thsa̱ve ca̍ prasa̱ve ca̍ sāsa̱him.
indra̍ṃ de̱vāsa̱ḥ śava̍sā mada̱ṃ nanu̍..45..

Anuvāka 14

pra̱jāpa̍tiḥ pa̱śūna̍sṛjata.
te̎'smāthsṛ̱ṣṭāḥ parā̎ṃ ca āyan.
tāna̍gniṣṭo̱mena̱ nā''pno̎t.
tānu̱kthye̍na̱ nā''pno̎t.
tānthṣo̍ḍa̱śinā̱ nā''pno̎t.
tānrātri̍yā̱ nā''pno̎t.
tānthsa̱ndhinā̱ nā''pno̎t.
so̎'gnima̍bravīt.
i̱mānma̍ ī̱phseti̍.
tāna̱gnistri̱vṛtā̱ stome̍na̱ nā''pno̎t..46..

sa indra̍mabravīt.
i̱mānma̍ ī̱phseti̍.
tānindra̍ḥ pañcada̱śena̱ stome̍na̱ nā''pno̎t.
sa viśvā̎nde̱vāna̍bravīt.
i̱mānma̍ īphsa̱teti̍.
tān viśve̍de̱vāḥ sa̍ptada̱śena̱ stome̍na̱ nā''pnu̍van.
sa viṣṇu̍mabravīt.
i̱mānma̍ ī̱phseti̍.
tān viṣṇu̍rekavi̱ṃśena̱ stome̍nā''pnot.
vā̱ra̱va̱ntīye̍nāvārayata..47..

i̱daṃ viṣṇu̱rvi ca̍krama̱ iti̱ vya̍kramata.
yasmā̎tpa̱śava̱ḥ prapreva̱ bhraṃśe̍ran.
sa e̱tena̍ yajeta.
yadāpno̎t.
tada̱ptoryāma̍syāptoryāma̱tvam.
e̱tena̱ vai de̱vā jaitvā̍ni ji̱tvā.
yaṃ kāma̱makā̍mayanta̱ tamā̎''pnuvan.
yaṃ kāma̍ṃ kā̱maya̍te.
tame̱tenā̎''pnoti..48..

Anuvāka 15

vyā̱ghro̍'yama̱gnau ca̍rati̱ pravi̍ṣṭaḥ.
ṛṣī̍ṇāṃ pu̱tro a̍bhiśasti̱pā a̱yam.
na̱ma̱skā̱reṇa̱ nama̍sā te juhomi.
mā de̱vānā̎ṃ mithu̱yāka̍rma bhā̱gam.
sāvī̱ṟhi de̍va prasa̱vāya̍ pitre.
va̱rṣmāṇa̍masmai vari̱māṇa̍masmai.
athā̱smabhya̍ṃ savitaḥ sa̱rvatā̍tā.
di̱vedi̍va̱ ā su̍vā̱ bhūri̍ pa̱śvaḥ.
bhū̱to bhū̱teṣu̍ carati̱ pravi̍ṣṭaḥ.
sa bhū̱tānā̱madhi̍patirbabhūva..49..

tasya̍ mṛ̱tyau ca̍rati rāja̱sūyam̎.
sa rājā̍ rā̱jyamanu̍ manyatāmi̱dam.
yebhi̱ḥ śilpai̎ḥ paprathā̱nāmadṛ̍ṃhat.
yebhi̱rdyāma̱bhyapi̍ṃśatpra̱jāpa̍tiḥ.
yebhi̱rvāca̍ṃ vi̱śvarū̍pāṃ sa̱mavya̍yat.
tene̱mama̍gna i̱ha varca̍sā̱ sama̍ṅgdhi.
yebhi̍rādi̱tyastapa̍ti̱ pra ke̱tubhi̍ḥ.
yebhi̱ḥ sūryo̍ dadṛ̱śe ci̱trabhā̍nuḥ.
yebhi̱rvāca̍ṃ puṣka̱lebhi̱ravya̍yat.
tene̱mama̍gna i̱ha varca̍sā̱ sama̍ṅgdhi..50..

ā'yaṃ bhā̍tu̱ śava̍sā̱ pañca̍ kṛ̱ṣṭīḥ.
indra̍ iva jye̱ṣṭho bha̍vatu pra̱jāvān̍.
a̱smā a̍stu puṣka̱laṃ ci̱trabhā̍nu.
ā'yaṃ pṛ̍ṇaktu̱ raja̍sī u̱pastham̎.
yatte̱ śilpa̍ṃ kaśyapa roca̱nāva̍t.
i̱ndri̱yāva̍tpuṣka̱laṃ ci̱trabhā̍nu.
yasmi̱nthsūryā̱ arpi̍tāḥ sa̱pta sā̱kam.
tasmi̱nrājā̍na̱madhi̱ viśra̍ye̱mam.
dyaura̍si pṛthi̱vya̍si.
vyā̱ghro vaiyā̱ghre'dhi̍..51..

viśra̍yasva̱ diśo̍ ma̱hīḥ.
viśa̍stvā̱ sarvā̍ vāñchantu.
mā tvadrā̱ṣṭramadhi̍ bhraśat.
yā di̱vyā āpa̱ḥ paya̍sā sambabhū̱vuḥ.
yā a̱ntari̍kṣa u̱ta pārthi̍vī̱ryāḥ.
tāsā̎ṃ tvā̱ sarvā̍sāṃ ru̱cā.
a̱bhiṣi̍ñcāmi̱ varca̍sā.
a̱bhi tvā̱ varca̍sā'sicaṃ di̱vyena̍.
paya̍sā sa̱ha.
yathāsā̍ rāṣṭra̱vardha̍naḥ..52..

tathā̎ tvā savi̱tā ka̍rat.
indra̱ṃ viśvā̍ avīvṛdhan.
sa̱mu̱dravya̍casa̱ṅgira̍ḥ.
ra̱thīta̍maṃ rathī̱nām.
vājā̍nā̱ṃ satpa̍ti̱ṃ patim̎.
vasa̍vastvā pu̱rastā̍da̱bhiṣi̍ñcantu gāya̱treṇa̱ chanda̍sā.
ru̱drāstvā̍ dakṣiṇa̱to̍'bhiṣi̍ñcantu̱ traiṣṭu̍bhena̱ chanda̍sā.
ā̱di̱tyāstvā̍ pa̱ścāda̱bhiṣi̍ñcantu̱ jāga̍tena̱ chanda̍sā.
viśve̎ tvā de̱vā u̍ttara̱to̍'bhiṣi̍ñca̱ṃ tvā'nu̍ṣṭubhena̱ chanda̍sā.
bṛha̱spati̍stvo̱pari̍ṣṭāda̱bhiṣi̍ñcatu̱ pāṅkte̍na̱ chanda̍sā..53..

a̱ru̱ṇaṃ tvā̱ vṛka̍mu̱graṅkha̍jaṅka̱ram.
roca̍mānaṃ ma̱rutā̱magre̍ a̱rciṣa̍ḥ.
sūrya̍vantaṃ ma̱ghavā̍naṃ viṣāsa̱him.
indra̍mu̱ktheṣu̍ nāma̱hūta̍maṃ huvema.
pra bā̱havā̍ sisṛtaṃ jī̱vase̍ naḥ.
ā no̱ gavyū̍timukṣataṃ ghṛ̱tena̍.
ā no̱ jane̎ śravayataṃ yuvānā.
śru̱taṃ me̍ mitrāvaruṇā̱ have̱mā.
indra̍sya te vīrya̱kṛta̍ḥ.
bā̱hū u̱pāva̍ harāmi..54..

Anuvāka 16

a̱bhi prehi̍ vī̱raya̍sva.
u̱graścettā̍ sapatna̱hā.
āti̍ṣṭha vṛtra̱hanta̍maḥ.
tubhya̍ṃ de̱vā adhi̍bravan.
a̱ṅkau nya̱ṅkāva̱bhito̱ ratha̱ṃ yau.
dhvā̱ntaṃ vā̍tā̱gramanu̍ sa̱ñcara̍ntau.
dū̱rehe̍tirindri̱yāvā̎npata̱trī.
te no̱'gnaya̱ḥ papra̍yaḥ pārayantu.
nama̍sta ṛṣe gada.
avya̍thāyai tvā sva̱dhāyai̎ tvā..55..

mā na̍ indrā̱bhita̱stvadṛ̱ṣvāri̍ṣṭāsaḥ.
e̱vā bra̍hma̱ntaveda̍stu.
tiṣṭhā̱ rathe̱ adhi̱ yadvajra̍hastaḥ.
ā ra̱śmīnde̍va yuvase̱ svaśva̍ḥ.
ā ti̍ṣṭha vṛtrahannā̱tiṣṭha̍nta̱ṃ pari̍.
anu̱ tvendro̍ mada̱tvanu̍ tvā mi̱trāvaru̍ṇau.
dyauśca̍ tvā pṛthi̱vī ca̱ prace̍tasā.
śu̱kro bṛ̱haddakṣi̍ṇā tvā pipartu.
anu̍ sva̱dhā ci̍kitā̱ṃ somo̍ a̱gniḥ.
anu̍ tvā'vatu savi̱tā sa̱vena̍..56..

indra̱ṃ viśvā̍ avīvṛdhan.
sa̱mu̱dravya̍casa̱ṅgira̍ḥ.
ra̱thīta̍maṃ rathī̱nām.
vājā̍nā̱ṃ satpa̍ti̱ṃ patim̎.
pari̍mā se̱nyā ghoṣā̎ḥ.
jyānā̎ṃ vṛñjantu gṛ̱dhnava̍ḥ.
me̱thi̱ṣṭhāḥ pinva̍mānā i̱ha.
māṃ gopa̍tima̱bhi saṃvi̍śantu.
tanme'nu̍mati̱ranu̍ manyatām.
tanmā̱tā pṛ̍thi̱vī tatpi̱tā dyauḥ..57..

tadgrāvā̍ṇaḥ soma̱suto̍ mayo̱bhuva̍ḥ.
tada̍śvinā śṛṇutaṃ saubhagā yu̱vam.
ava̍ te̱ heḍa̱ udu̍tta̱mam.
e̱nā vyā̱ghraṃ pa̍riṣasvajā̱nāḥ.
si̱ṃhaṃ hi̍nvanti maha̱te saubha̍gāya.
sa̱mu̱draṃ na su̱huva̍ntasthi̱vāṃsam̎.
ma̱rmṛ̱jyante̎ dvī̱pina̍ma̱phsva̍ntaḥ.
uda̱sāve̍tu̱ sūrya̍ḥ.
udi̱daṃ mā̍ma̱kaṃ vaca̍ḥ.
udi̍hi deva sūrya.
sa̱ha va̱gnunā̱ mama̍.
a̱haṃ vā̱co vi̱vāca̍nam.
mayi̱ vāga̍stu dharṇa̱siḥ.
yantu̍ na̱dayo̱ varṣa̍ntu pa̱rjanyā̎ḥ.
su̱pi̱ppa̱lā oṣa̍dhayo bhavantu.
anna̍vatāmoda̱nava̍tāmā̱mikṣa̍vatām.
e̱ṣāṃ rājā̍ bhūyāsam..58..

Anuvāka 17

ye ke̱śina̍ḥ pratha̱māḥ sa̱tramāsa̍ta.
yebhi̱rābhṛ̍ta̱ṃ yadi̱daṃ vi̱roca̍te.
tebhyo̍ juhomi bahu̱dhā ghṛ̱tena̍.
rā̱yaspoṣe̍ṇe̱maṃ varca̍sā̱ saṃ sṛ̍jātha.
narte brahma̍ṇa̱stapa̍so vimo̱kaḥ.
dvi̱nāmnī̍ dī̱kṣā va̱śinī̱ hyu̍grā.
pra keśā̎ḥ su̱vate̍ kā̱ṇḍino̍ bhavanti.
teṣā̎ṃ bra̱hmedīśe̱ vapa̍nasya̱ nānyaḥ.
ā ro̍ha̱ proṣṭha̱ṃ viṣa̍hasva̱ śatrūn̍.
avā̎srāgdī̱kṣā va̱śinī̱ hyu̍grā..59..

de̱hi dakṣi̍ṇā̱ṃ prati̍ra̱svāyu̍ḥ.
athā̍mucyasva̱ varu̍ṇasya̱ pāśā̎t.
yenāva̍pathsavi̱tā kṣu̱reṇa̍.
soma̍sya̱ rājño̱ varu̍ṇasya vi̱dvān.
tena̍ brahmāṇo vapate̱dama̱syorjemam.
ra̱yyā varca̍sā̱ saṃ sṛ̍jātha.
mā te̱ keśā̱nanu̍ gā̱dvarca̍ e̱tat.
tathā̍ dhā̱tā ka̍rotu te.
tubhya̱mindro̱ bṛha̱spati̍ḥ.
sa̱vi̱tā varca̱ āda̍dhāt..60..

tebhyo̍ ni̱dhāna̍ṃ bahu̱dhā vyaicchan̍.
a̱nta̱rā dyāvā̍pṛthi̱vī a̱paḥ suva̍ḥ.
da̱rbha̱sta̱mbe vī̱rya̍kṛte ni̱dhāya̍.
pauṃsye̍ne̱maṃ varca̍sā̱ saṃ sṛ̍jātha.
bala̍ṃ te bāhu̱voḥ sa̍vi̱tā da̍dhātu.
soma̍stvā'naktu̱ paya̍sā ghṛ̱tena̍.
strī̱ṣu rū̱pama̍śvinai̱tanni dha̍ttam.
pauṃsye̍ne̱maṃ varca̍sā̱ saṃsṛ̍jātha.
yathsī̱manta̱ṃ kaṅka̍taste li̱lekha̍.
yadvā̎ kṣu̱raḥ pa̍riva̱varja̱ vapa̍ṃste.
strī̱ṣu rū̱pama̍śvinai̱tanni dha̍ttam.
pauṃsye̍ne̱maṃ saṃ sṛ̍jātho vī̱rye̍ṇa..61..

Anuvāka 18

indra̱ṃ vai svāviśo̍ ma̱ruto̱ nāpā̍cāyan.
so'na̍pacāyyamāna e̱taṃ vi̍gha̱nama̍paśyat.
tamā'ha̍rat.
tenā̍yajata.
tenai̱vāsā̱ntaṃ sa̍ṃ sta̱mbhaṃ vya̍han.
yadvyahan̍.
tadvi̍gha̱nasya̍ vighana̱tvam.
vi pā̱pmāna̱ṃ bhrātṛ̍vyaṃ hate.
ya e̱tena̱ yaja̍te.
ya u̍ cainame̱vaṃ veda̍..62..

yaṃ rājā̍na̱ṃ viśo̱ nāpa̱cāye̍yuḥ.
yo vā̎ brāhma̱ṇastama̍sā pā̱pmanā̱ prāvṛ̍ta̱ḥ syāt.
sa e̱tena̍ yajeta.
vi̱gha̱nenai̱vaina̍dvi̱hatya̍.
vi̱śāmādhi̍patyaṃ gacchati.
tasya̱ dve dvā̍da̱śe sto̱tre bhava̍taḥ.
dve ca̍turvi̱ṃśe.
audbhi̍dyame̱va tat.
e̱tadvai kṣa̱trasyaudbhi̍dyam.
yada̍smai̱ svāviśo̍ ba̱liṃ hara̍nti..63..

hara̍ntyasmai̱ viśo̍ ba̱lim.
aina̱mapra̍tikhyātaṃ gacchati.
ya e̱vaṃ veda̍.
pra̱bāhu̱gvā agre̎ kṣa̱trāṇyāte̍puḥ.
teṣā̱mindra̍ḥ kṣa̱trāṇyāda̍tta.
na vā i̱māni̍ kṣa̱trāṇya̍bhūva̱nniti̍.
tannakṣa̍trāṇāṃ nakṣatra̱tvam.
ā śreya̍so̱ bhrātṛ̍vyasya̱ teja̍ indri̱yaṃ da̍tte.
ya e̱tena̱ yaja̍te.
ya u̍ cainame̱vaṃ veda̍..64..

tadyathā̍ ha̱ vai sa̍ca̱kriṇau̱ kapla̍kāvu̱pāva̍hitau̱ syātā̎m.
e̱vame̱tau yu̱gmantau̱ stomau̎.
a̱yukṣu̱ stome̍ṣu kriyete.
pā̱pmano'pa̍hatyai.
apa̍ pā̱pmāna̱ṃ bhrātṛ̍vyaṃ hate.
ya e̱tena̱ yaja̍te.
ya u̍ cainame̱vaṃ veda̍.
tadyathā̍ ha̱ vai sū̍tagrāma̱ṇya̍ḥ.
e̱vaṃ chandā̍ṃsi.
teṣva̱sāvā̍di̱tyo bṛ̍ha̱tīra̱bhyū̍ḍhaḥ..65..

sa̱tobṛ̍hatīṣu stuvate sa̱to bṛ̍han.
pra̱jayā̍ pa̱śubhi̍rasā̱nītye̱va.
vyati̍ṣaktābhiḥ stuvate.
vyati̍ṣakta̱ṃ vai kṣa̱traṃ vi̱śā.
vi̱śaivaina̍ṃ kṣa̱treṇa̱ vyati̍ṣajati.
vyati̍ṣaktābhiḥ stuvate.
vyati̍ṣakto̱ vai grā̍ma̱ṇīḥ sa̍jā̱taiḥ.
sa̱jā̱taire̱vaina̱ṃ vyati̍ṣajati.
vyati̍ṣaktābhiḥ stuvate.
vyati̍ṣakto̱ vai puru̍ṣaḥ pā̱pmabhi̍ḥ.
vyati̍ṣaktābhire̱vāsya̍ pā̱pmano̍ nudate..66..

Anuvāka 1

pīvo̎nnāṃ rayi̱vṛdha̍ḥ sume̱dhāḥ.
śve̱taḥ si̍ṣakti ni̱yutā̍mabhi̱śrīḥ.
te vā̱yave̱ sama̍naso̱ vita̍sthuḥ.
viśvennara̍ḥ svapa̱tyāni̍ cakruḥ.
rā̱ye'nu yañja̱jñatū̱ roda̍sī u̱bhe.
rā̱ye de̱vī dhi̱ṣaṇā̍ dhāti de̱vam.
adhā̍ vā̱yuṃ ni̱yuta̍ḥ saścata̱ svāḥ.
u̱ta śve̱taṃ vasu̍dhitinnire̱ke.
ā vā̍yo̱ pra yābhi̍ḥ.
pra vā̱yumacchā̍ bṛha̱tī ma̍nī̱ṣā..1..

bṛ̱hadra̍yiṃ vi̱śvavā̍rāṃ ratha̱prām.
dyu̱tadyā̍mā ni̱yuta̱ḥ patya̍mānaḥ.
ka̱viḥ ka̱vimi̍yakṣasi prayajyo.
ā no̍ ni̱yudbhi̍ḥ śa̱tinī̍bhiradhva̱ram.
sa̱ha̱sriṇī̍bhi̱rupa̍ yāhi ya̱jñam.
vāyo̍ a̱smin ha̱viṣi̍ mādayasva.
yū̱yaṃ pā̍ta sva̱stibhi̱ḥ sadā̍ naḥ.
prajā̍pate̱ na tvade̱tānya̱nyaḥ.
viśvā̍ jā̱tāni̱ pari̱ tā ba̍bhūva.
yatkā̍māste juhu̱mastaṃ no̍ astu..2..

va̱yaṃ syā̍ma̱ pata̍yo rayī̱ṇām.
ra̱yī̱ṇāṃ pati̍ṃ yaja̱taṃ bṛ̱hantam̎.
a̱sminbhare̱ nṛta̍ma̱ṃ vāja̍sātau.
pra̱jāpa̍tiṃ prathama̱jāmṛ̱tasya̍.
yajā̍ma de̱vamadhi̍ no bravītu.
prajā̍pate̱ tvanni̍dhi̱pāḥ pu̍rā̱ṇaḥ.
de̱vānā̎ṃ pi̱tā ja̍ni̱tā pra̱jānā̎m.
pati̱rviśva̍sya̱ jaga̍taḥ para̱spāḥ.
ha̱virno̍ deva viha̱ve ju̍ṣasva.
tave̱me lo̱kāḥ pra̱diśo̱ diśa̍śca..3..

pa̱rā̱vato̍ ni̱vata̍ u̱dvata̍śca.
prajā̍pate viśva̱sṛjjī̱vadha̍nya i̱daṃ no̍ deva.
prati̍harya ha̱vyam.
pra̱jāpa̍tiṃ pratha̱maṃ ya̱jñiyā̍nām.
de̱vānā̱magre̍ yaja̱taṃ ya̍jadhvam.
sa no̍ dadātu̱ dravi̍ṇaṃ su̱vīryam̎.
rā̱yaspoṣa̱ṃ vi ṣya̍tu̱ nābhi̍ma̱sme.
yo rā̱ya īśe̍ śatadā̱ya u̱kthya̍ḥ.
yaḥ pa̍śū̱nāṃ ra̍kṣi̱tā viṣṭhi̍tānām.
pra̱jāpa̍tiḥ prathama̱jā ṛ̱tasya̍..4..

sa̱hasra̍dhāmā juṣatāṃ ha̱virna̍ḥ.
somā̍pūṣaṇe̱mau de̱vau.
somā̍pūṣaṇā̱ raja̍so vi̱mānam̎.
sa̱ptaca̍kra̱ṃ ratha̱mavi̍śvaminvam.
vi̱ṣū̱vṛta̱ṃ mana̍sā yu̱jyamā̍nam.
taṃ ji̍nvatho vṛṣaṇā̱ pañca̍raśmim.
di̱vya̍nyaḥ sada̍naṃ ca̱kra u̱ccā.
pṛ̱thi̱vyāma̱nyo adhya̱ntari̍kṣe.
tāva̱smabhya̍ṃ puru̱vāra̍ṃ puru̱kṣum.
rā̱yaspoṣa̱ṃ viṣya̍tā̱nnābhi̍ma̱sme..5..

dhiya̍ṃ pū̱ṣā ji̍nvatu viśvami̱nvaḥ.
ra̱yiṃ somo̍ rayi̱pati̍rdadhātu.
ava̍tu de̱vyadi̍tirana̱rvā.
bṛ̱hadva̍dema vi̱dathe̍ su̱vīrā̎ḥ.
viśvā̎nya̱nyo bhuva̍nā ja̱jāna̍.
viśva̍ma̱nyo a̍bhi̱cakṣā̍ṇa eti.
somā̍pūṣaṇā̱vava̍ta̱ṃ dhiya̍ṃ me.
yu̱vabhyā̱ṃ viśvā̱ḥ pṛta̍nā jayema.
udu̍tta̱maṃ va̍ru̱ṇāsta̍bhnā̱ddyām.
yatkiṃ ce̱daṃ ki̍ta̱vāsa̍ḥ.
ava̍ te̱ heḍa̱stattvā̍ yāmi.
ā̱di̱tyānā̱mava̍sā̱ na da̍kṣi̱ṇā.
dhā̱raya̍nta ādi̱tyāsa̍sti̱sro bhūmī̎rdhārayan.
ya̱jño de̱vānā̱ṃ śuci̍ra̱paḥ..6..

Anuvāka 2

te śu̱krāsa̱ḥ śuca̍yo raśmi̱vanta̍ḥ.
sīda̍nnādi̱tyā adhi̍ ba̱ṟhiṣi̍ pri̱ye.
kāme̍na de̱vāḥ sa̱ratha̍ṃ di̱vo na̍ḥ.
ā yā̎ntu ya̱jñamupa̍ no juṣā̱ṇāḥ.
te sū̱navo̱ adi̍teḥ pīva̱sāmiṣam̎.
ghṛ̱taṃ pinva̱tprati̍haryannṛte̱jāḥ.
pra ya̱jñiyā̱ yaja̍mānāya yemure.
ā̱di̱tyāḥ kāma̍ṃ pitu̱manta̍ma̱sme.
ā na̍ḥ pu̱trā adi̍teryāntu ya̱jñam.
ā̱di̱tyāsa̍ḥ pa̱thibhi̍rdeva̱yānai̎ḥ..7..

a̱sme kāma̍ṃ dā̱śuṣe̍ sa̱nnama̍ntaḥ.
puro̱ḍāśa̍ṃ ghṛ̱tava̍ntaṃ juṣantām.
ska̱bhā̱yata̱ nirṛ̍ti̱ṃ sedha̱tāma̍tim.
pra ra̱śmibhi̱ryata̍mānā amṛdhrāḥ.
ādi̍tyā̱ḥ kāma̱ praya̍tā̱ṃ vaṣa̍ṭkṛtim.
ju̱ṣadhva̍ṃ no ha̱vyadā̍tiṃ yajatrāḥ.
ā̱di̱tyānkāma̱mava̍se huvema.
ye bhū̱tāni̍ ja̱naya̍nto vici̱khyuḥ.
sīda̍ntu pu̱trā adi̍teru̱pastham̎.
stī̱rṇaṃ ba̱ṟhirha̍vi̱radyā̍ya de̱vāḥ..8..

stī̱rṇaṃ ba̱ṟhiḥ sī̍datā ya̱jñe a̱smin.
dhrā̱jāḥ sedha̍nto̱ ama̍tiṃ du̱revā̎m.
a̱smabhya̍ṃ putrā adite̱ḥ pra ya̍ṃsata.
ādi̍tyā̱ḥ kāma̍ ha̱viṣo̍ juṣā̱ṇāḥ.
agne̱ naya̍ su̱pathā̍ rā̱ye a̱smān.
viśvā̍ni deva va̱yunā̍ni vi̱dvān.
yu̱yo̱dhya̍smajju̍hurā̱ṇamena̍ḥ.
bhūyi̍ṣṭhānte̱ nama̍ uktiṃ vidhema.
pra va̍ḥ śu̱krāya̍ bhā̱nave̍ bharadhvam.
ha̱vyaṃ ma̱tiṃ cā̱gnaye̱ supū̍tam..9..

yo daivyā̍ni̱ mānu̍ṣā ja̱nūṃṣi̍.
a̱ntarviśvā̍ni vi̱dmanā̱ jigā̍ti.
acchā̱ giro̍ ma̱tayo̍ deva̱yantī̎ḥ.
a̱gniṃ ya̍nti̱ dravi̍ṇa̱ṃ bhikṣa̍māṇāḥ.
su̱sa̱ndṛśa̍ṃ su̱pratī̍ka̱ṃ svañcam̎.
ha̱vya̱vāha̍mara̱tiṃ mānu̍ṣāṇām.
agne̱ tvama̱smadyu̍yo̱dhyamī̍vāḥ.
ana̍gnitrā a̱bhya̍manta kṛ̱ṣṭīḥ.
puna̍ra̱smabhya̍ṃ suvi̱tāya̍ deva.
kṣāṃ viśve̍bhira̱jare̍bhiryajatra..10..

agne̱ tvaṃ pā̍rayā̱ navyo̍ a̱smān.
sva̱stibhi̱rati̍ du̱rgāṇi̱ viśvā̎.
pūśca̍ pṛ̱thvī ba̍hu̱lā na̍ u̱rvī.
bhavā̍ to̱kāya̱ tana̍yāya̱ śaṃ yoḥ.
prakā̍ravo mana̱nā va̱cyamā̍nāḥ.
de̱va̱drīcī̎ṃ nayatha deva̱yanta̍ḥ.
da̱kṣi̱ṇā̱vāḍvā̱jinī̱ prācye̍ti.
ha̱virbhara̍ntya̱gnaye̍ ghṛ̱tācī̎.
indra̱ṃ naro̍ yu̱je ratham̎.
ja̱gṛ̱bhṇāte̱ dakṣi̍ṇamindra̱ hastam̎..11..

va̱sū̱yavo̍ vasupate̱ vasū̍nām.
vi̱dmā hi tvā̱ gopa̍tiṃ śūra̱ gonā̎m.
a̱smabhya̍ṃ ci̱traṃ vṛṣa̍ṇaṃ ra̱yindā̎ḥ.
tave̱daṃ viśva̍ma̱bhita̍ḥ paśa̱vyam̎.
yatpaśya̍si̱ cakṣa̍sā̱ sūrya̍sya.
gavā̍masi̱ gopa̍ti̱reka̍ indra.
bha̱kṣī̱mahi̍ te̱ praya̍tasya̱ vasva̍ḥ.
sami̍ndra ṇo̱ mana̍sā neṣi̱ gobhi̍ḥ.
saṃ sū̱ribhi̍rmaghava̱nthsaṃ sva̱styā.
saṃ brahma̍ṇā de̱vakṛ̍ta̱ṃ yadasti̍..12..

saṃ de̱vānā̍ṃ suma̱tyā ya̱jñiyā̍nām.
ā̱rācchatru̱mapa̍ bādhasva dū̱ram.
u̱gro yaḥ śamba̍ḥ puruhūta̱ tena̍.
a̱sme dhe̍hi̱ yava̍ma̱dgoma̍dindra.
kṛ̱dhīdhiya̍ṃ jari̱tre vāja̍ratnām.
ā ve̱dhasa̱ṃ sa hi śuci̍ḥ.
bṛha̱spati̍ḥ pratha̱maṃ jāya̍mānaḥ.
ma̱ho jyoti̍ṣaḥ para̱me vyo̍man.
sa̱ptāsya̍stuvijā̱to rave̍ṇa.
vi sa̱ptara̍śmiradhama̱ttamā̍ṃsi..13..

bṛha̱spati̱ḥ sama̍jaya̱dvasū̍ni.
ma̱ho vra̱jāngoma̍to de̱va e̱ṣaḥ.
a̱paḥ siṣā̍sa̱nthsuva̱rapra̍tīttaḥ.
bṛha̱spati̱ṟhantya̱mitra̍ma̱rkaiḥ.
bṛha̍spate̱ parye̱vā pi̱tre.
ā no̍ di̱vaḥ pāvī̍ravī.
i̱mā juhvā̍nā̱ yaste̱ stana̍ḥ.
sara̍svatya̱bhi no̍ neṣi.
i̱yaṃ śuṣme̍bhirbisa̱khā i̍vārujat.
sānu̍ girī̱ṇāṃ ta̍vi̱ṣebhi̍rū̱rmibhi̍ḥ.
pā̱rā̱va̱da̱ghnīmava̍se suvṛ̱ktibhi̍ḥ.
sara̍svatī̱mā vi̍vāsema dhī̱tibhi̍ḥ..14..

Anuvāka 3

somo̍ dhe̱nuṃ somo̱ arva̍ntamā̱śum.
somo̍ vī̱raṃ ka̍rma̱ṇya̍ṃ dadātu.
sā̱da̱nya̍ṃ vida̱thya̍ṃ sa̱bheyam̎.
pi̱tu̱ḥ śrava̍ṇa̱ṃ yo dadā̍śadasmai.
aṣā̍ḍhaṃ yu̱thsu tvaṃ so̍ma̱ kratu̍bhiḥ.
yā te̱ dhāmā̍ni ha̱viṣā̱ yaja̍nti.
tvami̱mā oṣa̍dhīḥ soma̱ viśvā̎ḥ.
tvama̱po a̍janaya̱stvaṅgāḥ.
tvamāta̍tantho̱rva̍ntari̍kṣam.
tvaṃ jyoti̍ṣā̱ vi tamo̍ vavartha..15..

yā te̱ dhāmā̍ni di̱vi yā pṛ̍thi̱vyām.
yā parva̍te̱ṣvoṣa̍dhīṣva̱phsu.
tebhi̍rno̱ viśvai̎ḥ su̱manā̱ ahe̍ḍan.
rāja̎nthsoma̱ prati̍ ha̱vyā gṛ̍bhāya.
viṣṇo̱rnuka̱ṃ tada̍sya pri̱yam.
pra tadviṣṇu̍ḥ.
pa̱ro mātra̍yā ta̱nuvā̍ vṛdhāna.
na te̍ mahi̱tvamanva̍śñuvanti.
u̱bhe te̍ vidma̱ raja̍sī pṛthi̱vyā viṣṇo̍ deva̱ tvam.
pa̱ra̱masya̍ vithse..16..

vica̍krame̱ trirde̱vaḥ.
ā te̍ ma̱ho yo jā̱ta e̱va.
a̱bhi go̱trāṇi̍.
ābhi̱ḥ spṛdho̍ mitha̱tīrari̍ṣaṇyan.
a̱mitra̍sya vyathayā ma̱nyumi̍ndra.
ābhi̱rviśvā̍ abhi̱yujo̱ viṣū̍cīḥ.
āryā̍ya̱ viśova̍tārī̱rdāsī̎ḥ.
a̱yaṃ śṛ̍ṇve̱ adha̱ jaya̍nnu̱ta ghnan.
a̱yamu̱ta pra kṛ̍ṇute yu̱dhā gāḥ.
ya̱dā sa̱tyaṃ kṛ̍ṇu̱te ma̱nyumindra̍ḥ..17..

viśva̍ṃ dṛ̱ḍhaṃ bha̍yata̱ eja̍dasmāt.
anu̍ sva̱dhāma̍kṣara̱nnāpo̍ asya.
ava̍rdhata̱ madhya̱ ā nā̱vyā̍nām.
sa̱dhrī̱cīne̍na̱ mana̍sā̱ tami̍ndra̱ oji̍ṣṭhena.
hanma̍nāhanna̱bhidyūn.
ma̱rutva̍ntaṃ vṛṣa̱bhaṃ vā̍vṛdhā̱nam.
aka̍vāriṃ di̱vyaṃ śā̱samindram̎.
vi̱śvā̱sāha̱mava̍se̱ nūta̍nāya.
u̱graṃ sa̍ho̱dāmi̱ha taṃ hu̍vema.
jani̍ṣṭhā u̱graḥ saha̍se tu̱rāya̍..18..

ma̱ndra oji̍ṣṭho bahu̱lābhi̍mānaḥ.
ava̍rdha̱nnindra̍ṃ ma̱ruta̍ści̱datra̍.
mā̱tā yadvī̱raṃ da̱dhana̱ddhani̍ṣṭhā.
kva̍syāvo̍ marutaḥ sva̱dhā''sī̎t.
yanmāmeka̍ṃ sa̱madha̍ttāhi̱hatye̎.
a̱haṃ hyu̍grasta̍vi̱ṣastuvi̍ṣmān.
viśva̍sya̱ śatro̱rana̍maṃ vadha̱snaiḥ.
vṛ̱trasya̍ tvā śva̱sathā̱ dīṣa̍māṇāḥ.
viśve̍ de̱vā a̍jahu̱rye sakhā̍yaḥ.
ma̱rudbhi̍rindra sa̱khyaṃ te̍ astu..19..

athe̱mā viśvā̱ḥ pṛta̍nā jayāsi.
vadhī̎ṃ vṛ̱traṃ ma̍ruta indri̱yeṇa̍.
svena̱ bhāme̍na tavi̱ṣo ba̍bhū̱vān.
a̱hame̱tā mana̍ve vi̱śvaśca̍ndrāḥ.
su̱gā a̱paśca̍kara̱ vajra̍bāhuḥ.
sa yo vṛṣā̱ vṛṣṇi̍yebhi̱ḥ samo̍kāḥ.
ma̱ho di̱vaḥ pṛ̍thi̱vyāśca̍ sa̱mrāṭ.
sa̱tī̱nasa̍tvā̱ havyo̱ bhare̍ṣu.
ma̱rutvā̎ṃ no bhava̱tvindra̍ ū̱tī.
indro̍ vṛ̱trama̍taradvṛtra̱tūrye̎..20..

a̱nā̱dhṛ̱ṣyo ma̱ghavā̱ śūra̱ indra̍ḥ.
anve̍na̱ṃ viśo̍ amadanta pū̱rvīḥ.
a̱yaṃ rājā̱ jaga̍taścarṣaṇī̱nām.
sa e̱va vī̱raḥ sa u̍ vī̱ryā̍vān.
sa e̍karā̱jo jaga̍taḥ para̱spāḥ.
ya̱dā vṛ̱tramata̍ra̱cchūra̱ indra̍ḥ.
athā̍bhavaddami̱tābhikra̍tūnām.
indro̍ ya̱jñaṃ va̱rdhaya̍nvi̱śvave̍dāḥ.
pu̱ro̱ḍāśa̍sya juṣatāṃ ha̱virna̍ḥ.
vṛ̱traṃ tī̱rtvā dā̍na̱vaṃ vajra̍bāhuḥ..21..

diśo̍'dṛṃhaddṛṃhi̱tā dṛṃha̍ṇena.
i̱maṃ ya̱jñaṃ va̱rdhaya̍nvi̱śvave̍dāḥ.
pu̱ro̱ḍāśa̱ṃ prati̍ gṛbhṇā̱tvindra̍ḥ.
ya̱dā vṛ̱tramata̍ra̱cchūra̱ indra̍ḥ.
athai̍karā̱jo a̍bhava̱jjanā̍nām.
indro̍ de̱vāñcha̍mbara̱hatya̍ āvat.
indro̍ de̱vānā̍mabhavatpuro̱gāḥ.
indro̍ ya̱jñe ha̱viṣā̍ vāvṛdhā̱naḥ.
vṛ̱tra̱tūrno̱ abha̍ya̱ṃ śarma̍ yaṃsat.
yaḥ sa̱pta sindhū̱ṃ rada̍dhātpṛthi̱vyām.
yaḥ sa̱pta lo̱kānakṛ̍ṇo̱ddiśa̍śca.
indro̍ ha̱viṣmā̱nthsaga̍ṇo ma̱rudbhi̍ḥ.
vṛ̱tra̱tūrno̍ ya̱jñami̱hopa̍ yāsat..22..

Anuvāka 4

indra̱stara̍svānabhimāti̱hograḥ.
hira̍ṇyavāśīriṣi̱raḥ su̍va̱ṟṣāḥ.
tasya̍ va̱yaṃ su̍ma̱tau ya̱jñiya̍sya.
api̍ bha̱dre sau̍mana̱se syā̍ma.
hira̍ṇyavarṇo̱ abha̍yaṃ kṛṇotu.
a̱bhi̱mā̱ti̱hendra̱ḥ pṛta̍nāsu ji̱ṣṇuḥ.
sa na̱ḥ śarma̍ tri̱varū̍tha̱ṃ vi ya̍ṃsat.
yū̱yaṃ pā̍ta sva̱stibhi̱ḥ sadā̍ naḥ.
indra̍ṃ stuhi va̱jriṇa̱ṃ stoma̍pṛṣṭham.
pu̱ro̱ḍāśa̍sya juṣatāṃ ha̱virna̍ḥ..23..

ha̱tvā'bhimā̍tī̱ḥ pṛta̍nā̱ḥ saha̍svān.
athābha̍yaṃ kṛṇuhi vi̱śvato̍ naḥ.
stu̱hi śūra̍ṃ va̱jriṇa̱mapra̍tīttam.
a̱bhi̱mā̱ti̱hana̍ṃ puruhū̱tamindram̎.
ya eka̱ iccha̱tapa̍ti̱rjane̍ṣu.
tasmā̱ indrā̍ya ha̱virā ju̍hota.
indro̍ de̱vānā̍madhi̱pāḥ pu̱rohi̍taḥ.
di̱śāṃ pati̍rabhavadvā̱jinī̍vān.
a̱bhi̱mā̱ti̱hā ta̍vi̱ṣastuvi̍ṣmān.
a̱smabhya̍ṃ ci̱traṃ vṛṣa̍ṇaṃ ra̱yindā̎t..24..

ya i̱me dyāvā̍pṛthi̱vī ma̍hi̱tvā.
bale̱nādṛ̍ṃhadabhimāti̱hendra̍ḥ.
sa no̍ ha̱viḥ prati̍ gṛbhṇātu rā̱taye̎.
de̱vānā̎ṃ de̱vo ni̍dhi̱pā no̍ avyāt.
ana̍vaste̱ ratha̱ṃ vṛṣṇe̱ yatte̎.
indra̍sya̱ nu vī̱ryā̎ṇyaha̱nnahim̎.
indro̍ yā̱to'va̍sitasya̱ rājā̎.
śama̍sya ca śṛ̱ṅgiṇo̱ vajra̍bāhuḥ.
sedu̱ rājā̎ kṣeti carṣaṇī̱nām.
a̱rānna ne̱miḥ pari̱ tā ba̍bhūva..25..

a̱bhi si̱dhmo a̍jigādasya̱ śatrūn̍.
viti̱gmena̍ vṛṣa̱bheṇā̱ puro̍bhet.
saṃ vajre̍ṇāsṛjadvṛ̱tramindra̍ḥ.
pra svāṃ ma̱tima̍tira̱cchāśa̍dānaḥ.
viṣṇu̍ṃ de̱vaṃ varu̍ṇamū̱taye̱ bhagam̎.
meda̍sā de̱vā va̱payā̍ yajadhvam.
tā no̍ ya̱jñamāga̍taṃ vi̱śvadhe̍nā.
pra̱jāva̍da̱sme dravi̍ṇe̱ha dha̍ttam.
meda̍sā de̱vā va̱payā̍ yajadhvam.
viṣṇu̍ṃ ca de̱vaṃ varu̍ṇaṃ ca rā̱tim..26..

tā no̱ amī̍vā apa̱ bādha̍mānau.
i̱maṃ ya̱jñaṃ ju̱ṣamā̍ṇā̱vupetam̎.
viṣṇū̍varuṇā yu̱vama̍dhva̱rāya̍ naḥ.
vi̱śe janā̍ya̱ mahi̱ śarma̍ yacchatam.
dī̱rghapra̍yajjyū ha̱viṣā̍ vṛdhā̱nā.
jyoti̱ṣā'rā̍tīrdahata̱ntamā̍ṃsi.
yayo̱roja̍sā skabhi̱tā rajā̍ṃsi.
vī̱rye̍bhirvī̱rata̍mā̱ śavi̍ṣṭhā.
yā'patye̍ te̱ apra̍tīttā̱ saho̍bhiḥ.
viṣṇū̍ aga̱nvaru̍ṇā pū̱rvahū̍tau..27..

viṣṇū̍varuṇāvabhiśasti̱pāvā̎m.
de̱vā ya̍janta ha̱viṣā̍ ghṛ̱tena̍.
apāmī̍vāṃ sedhataṃ ra̱kṣasa̍śca.
athā̍dhatta̱ṃ yaja̍mānāya̱ śaṃ yoḥ.
a̱ṃho̱mucā̍ vṛṣa̱bhā su̱pratū̎rtī.
de̱vānā̎ṃ de̱vata̍mā̱ śaci̍ṣṭhā.
viṣṇū̍varuṇā̱ prati̍haryatannaḥ.
i̱daṃ narā̱ praya̍tamū̱taye̍ ha̱viḥ.
ma̱hī nu dyāvā̍pṛthi̱vī i̱ha jyeṣṭhe̎.
ru̱cā bha̍vatāṃ śu̱caya̍dbhira̱rkaiḥ..28..

yathsī̱ṃ vari̍ṣṭhe bṛha̱tī vi̍mi̱nvan.
nṛ̱vadbhyo̱kṣā pa̍prathā̱nebhi̱revai̎ḥ.
prapū̎rva̱je pi̱tarā̱ navya̍sībhiḥ.
gī̱rbhiḥ kṛ̍ṇudhva̱ṃ sada̍ne ṛ̱tasya̍.
ā no̎ dyāvāpṛthivī̱ daivye̍na.
jane̍na yāta̱ṃ mahi̍ vā̱ṃ varū̍tham.
sa ithsvapā̱ bhuva̍neṣvāsa.
ya i̱me dyāvā̍pṛthi̱vī ja̱jāna̍.
u̱rvī ga̍bhī̱re raja̍sī su̱meke̎.
a̱va̱ṃśe dhīra̱ḥ śacyā̱ samai̍rat..29..

bhūri̱ṃ dve aca̍rantī̱ cara̍ntam.
pa̱dvanta̱ṃ garbha̍ma̱padī̍dadhāte.
nitya̱ṃ na sū̱nuṃ pi̱troru̱pasthe̎.
taṃ pi̍pṛtaṃ rodasī satya̱vācam̎.
i̱daṃ dyā̍vāpṛthivī sa̱tyama̍stu.
pita̱rmāta̱ryadi̱hopa̍ bru̱ve vā̎m.
bhū̱taṃ de̱vānā̍mava̱me avo̍bhiḥ.
vidyāme̱ṣaṃ vṛ̱jana̍ṃ jī̱radā̍num.
u̱rvī pṛ̱thvī ba̍hu̱le dū̱re a̍nte.
upa̍ bruve̱ nama̍sā ya̱jñe a̱smin.
dadhā̍te̱ ye su̱bhage̍ su̱pratū̎rtī.
dyāvā̱ rakṣa̍taṃ pṛthi̱vī no̱ abhvā̎t.
yā jā̱tā oṣa̍dha̱yo'ti̱ viśvā̎ḥ pari̱ṣṭhāḥ.
yā oṣa̍dhaya̱ḥ soma̍rājñīraśvāva̱tīṃ so̍mava̱tīm.
oṣa̍dhī̱riti̍ mātaro̱'nyā vo̍ a̱nyāma̍vatu..30..

Anuvāka 5

śuci̱ṃ nu stoma̱ṃ śñatha̍dvṛ̱tram.
u̱bhā vā̍mindrāgnī̱ pra ca̍rṣa̱ṇibhya̍ḥ.
ā vṛ̍trahaṇā gī̱rbhirvipra̍ḥ.
brahma̍ṇaspate̱ tvama̱sya ya̱ntā.
sū̱ktasya̍ bodhi̱ tana̍yaṃ ca jinva.
viśva̱ṃ tadbha̱draṃ yada̱vanti̍ de̱vāḥ.
bṛ̱hadva̍dema vi̱dathe̍ su̱vīrā̎ḥ.
sa ī̍ṃ sa̱tyebhi̱ḥ sakhi̍bhiḥ śu̱cadbhi̍ḥ.
godhā̍yasa̱ṃ vidha̍na̱saira̍tardat.
brahma̍ṇa̱spati̱rvṛṣa̍bhirva̱rāhai̎ḥ..31..

gha̱rmasve̍debhi̱rdravi̍ṇa̱ṃ vyā̍naṭ.
brahma̍ṇa̱spate̍rabhavadyathāva̱śam.
sa̱tyo ma̱nyurmahi̱ karmā̍ kariṣya̱taḥ.
yo gā u̱dāja̱thsa di̱ve vi cā̍bhajat.
ma̱hīva̍ rī̱tiḥ śava̍sā sara̱tpṛtha̍k.
indhā̍no a̱gniṃ va̍navadvanuṣya̱taḥ.
kṛ̱tabra̍hmā śūśuvadrā̱taha̍vya̱ it.
jā̱tena̍ jā̱tamati̱sṛtpra sṛ̍ṃsate.
yaṃ ya̱ṃ yuja̍ṃ kṛṇu̱te brahma̍ṇa̱spati̍ḥ.
brahma̍ṇaspate su̱yama̍sya vi̱śvahā̎..32..

rā̱yaḥ syā̍ma ra̱thyo̍ viva̍svataḥ.
vī̱reṣu̍ vī̱rāṃ upa̍pṛṅgdhi na̱stvam.
yadīśā̍no̱ brahma̍ṇā̱ veṣi̍ me̱ havam̎.
sa ijjane̍na̱ sa vi̱śā sa janma̍nā.
sa pu̱trairvāja̍ṃ bharate̱ dhanā̱ nṛbhi̍ḥ.
de̱vānā̱ṃ yaḥ pi̱tara̍mā̱ vivā̍sati.
śra̱ddhāma̍nā ha̱viṣā̱ brahma̍ṇa̱spatim̎.
yāste̍ pūṣa̱nnāvo̍ a̱ntaḥ.
śu̱kraṃ te̍ a̱nyatpū̱ṣemā āśā̎ḥ.
prapa̍the pa̱thāma̍janiṣṭa pū̱ṣā..33..

prapa̍the di̱vaḥ prapa̍the pṛthi̱vyāḥ.
u̱bhe a̱bhi pri̱yata̍me sa̱dhasthe̎.
ā ca̱ parā̍ ca carati prajā̱nan.
pū̱ṣā su̱bandhu̍rdi̱va ā pṛ̍thi̱vyāḥ.
i̱ḍaspati̍rma̱ghavā̍ da̱smava̍rcāḥ.
taṃ de̱vāso̱ ada̍duḥ sū̱ryāyai̎.
kāme̍na kṛ̱taṃ ta̱vasa̱ṃ svañcam̎.
a̱jā'śva̍ḥ paśu̱pā vāja̍bastyaḥ.
dhi̱ya̱ṃ ji̱nvo viśve̱ bhuva̍ne̱ arpi̍taḥ.
aṣṭrā̎ṃ pū̱ṣā śi̍thi̱rāmu̱dvarī̍vṛjat..34..

sa̱ñcakṣā̍ṇo̱ bhuva̍nā de̱va ī̍yate.
śucī̍ vo ha̱vyā ma̍ruta̱ḥ śucī̍nām.
śuci̍ṃ hinomyadhva̱raṃ śuci̍bhyaḥ.
ṛ̱tena̍ sa̱tyamṛta̱sāpa̍ āyan.
śuci̍janmāna̱ḥ śuca̍yaḥ pāva̱kāḥ.
pra ci̱trama̱rkaṃ gṛ̍ṇa̱te tu̱rāya̍.
māru̍tāya̱ svata̍vase bharadhvam.
ye sahā̍ṃsi̱ saha̍sā̱ saha̍nte.
reja̍te agne pṛthi̱vī ma̱khebhya̍ḥ.
aṃse̱ṣvā ma̍rutaḥ khā̱dayo̍ vaḥ..35..

vakṣa̍ḥ suru̱kmā upa̍ śiśriyā̱ṇāḥ.
vi vi̱dyuto̱ na vṛ̱ṣṭibhī̍ rucā̱nāḥ.
anu̍ sva̱dhāmāyu̍dhai̱ryaccha̍mānāḥ.
yā va̱ḥ śarma̍ śaśamā̱nāya̱ santi̍.
tri̱dhātū̍ni dā̱śuṣe̍ yaccha̱tādhi̍.
a̱smabhya̱ṃ tāni̍ maruto̱ viya̍nta.
ra̱yiṃ no̍ dhatta vṛṣaṇaḥ su̱vīram̎.
i̱me tu̱raṃ ma̱ruto̍ rāmayanti.
i̱me saha̱ḥ saha̍sa̱ ā na̍manti.
i̱me śaṃsa̍ṃvanuṣya̱to ni pā̎nti..36..

gu̱rudveṣo̱ ara̍ruṣe dadhanti.
a̱rā i̱vedaca̍ramā̱ ahe̍va.
prapra̍ jāyante̱ aka̍vā̱ maho̍bhiḥ.
pṛśñe̎ḥ pu̱trā u̍pa̱māso̱ rabhi̍ṣṭhāḥ.
svayā̍ ma̱tyā ma̱ruta̱ḥ saṃ mi̍mikṣuḥ.
anu̍ te dāyi ma̱ha i̍ndri̱yāya̍.
sa̱trā te̱ viśva̱manu̍ vṛtra̱hatye̎.
anu̍ kṣa̱tramanu̱ saho̍ yajatra.
indra̍ de̱vebhi̱ranu̍ te nṛ̱ṣahye̎.
ya indra̱ śuṣmo̍ maghavante̱ asti̍..37..

śikṣā̱ sakhi̍bhyaḥ puruhūta̱ nṛbhya̍ḥ.
tvaṃ hi dṛ̱ḍhā ma̍ghava̱nvice̍tāḥ.
apā̍vṛdhi̱ pari̍vṛti̱ṃ na rādha̍ḥ.
indro̱ rājā̱ jaga̍taścarṣaṇī̱nām.
a̱dhi̱kṣami̱ viṣu̍rūpa̱ṃ yadasti̍.
tato̍ dadātu dā̱śuṣe̱ vasū̍ni.
coda̱drādha̱ upa̍stutaścida̱rvāk.
tamu̍ṣṭuhi̱ yo a̱bhibhū̎tyojāḥ.
va̱nvannavā̍taḥ puruhū̱ta indra̍ḥ.
aṣā̍ḍhamu̱graṃ saha̍mānamā̱bhiḥ..38..

gī̱rbhirva̍rdha vṛṣa̱bhaṃ ca̍rṣaṇī̱nām.
sthū̱rasya̍ rā̱yo bṛ̍ha̱to ya īśe̎.
tamu̍ ṣṭavāma vi̱dathe̱ṣvindram̎.
yo vā̱yunā̱ jaya̍ti̱ goma̍tīṣu.
pra dhṛ̍ṣṇu̱yā na̍yati̱ vasyo̱ accha̍.
ā te̱ śuṣmo̍ vṛṣa̱bha e̍tu pa̱ścāt.
otta̱rāda̍dha̱rāgā pu̱rastā̎t.
ā vi̱śvato̍ a̱bhisame̎tva̱rvāṅ.
indra̍ dyu̱mnaṃ suva̍rvaddhehya̱sme..39..

Anuvāka 6

ā de̱vo yā̍tu savi̱tā su̱ratna̍ḥ.
a̱nta̱ri̱kṣa̱prā vaha̍māno̱ aśvai̎ḥ.
haste̱ dadhā̍no̱ naryā̍ pu̱rūṇi̍.
ni̱ve̱śaya̍ṃ ca prasu̱vaṃ ca̱ bhūma̍.
a̱bhīvṛ̍ta̱ṃ kṛśa̍nairvi̱śvarū̍pam.
hira̍ṇyaśamyaṃ yaja̱to bṛ̱hantam̎.
āsthā̱dratha̍ṃ savi̱tā ci̱trabhā̍nuḥ.
kṛ̱ṣṇā rajā̍ṃsi̱ tavi̍ṣī̱ṃ dadhā̍naḥ.
saghā̍ no de̱vaḥ sa̍vi̱tā sa̱vāya̍.
ā sā̍viṣa̱dvasu̍pati̱rvasū̍ni..40..

vi̱śraya̍māṇo̱ ama̍timurū̱cīm.
ma̱rta̱bhoja̍na̱madha̍rāsatena.
vijanā̎ñchyā̱vāḥ śi̍ti̱pādo̍ akhyan.
ratha̱ṃ hira̍ṇyaprauga̱ṃ vaha̍ntaḥ.
śaśva̱ddiśa̍ḥ savi̱turdaivya̍sya.
u̱pasthe̱ viśvā̱ bhuva̍nāni tasthuḥ.
vi su̍pa̱rṇo a̱ntari̍kṣāṇyakhyat.
ga̱bhī̱rave̍pā̱ asu̍raḥ sunī̱thaḥ.
kve̍dānī̱ṃ sūrya̱ḥ kaści̍keta.
ka̱ta̱māndyāṃ ra̱śmira̱syā ta̍tāna..41..

bhaga̱ṃ dhiya̍ṃ vā̱jaya̍nta̱ḥ pura̍ndhim.
narā̱śaṃso̱ gnāspati̍rno avyāt.
ā ye vā̱masya̍ saṅga̱the ra̍yī̱ṇām.
pri̱yā de̱vasya̍ savi̱tuḥ syā̍ma.
ā no̱ viśve̱ askrā̍gamantu de̱vāḥ.
mi̱tro a̍rya̱mā varu̍ṇaḥ sa̱joṣā̎ḥ.
bhuva̱ṉ yathā̍ no̱ viśve̍ vṛ̱dhāsa̍ḥ.
kara̎nthsu̱ṣāhā̍ vithu̱raṃ na śava̍ḥ.
śaṃ no̍ de̱vā vi̱śvade̍vā bhavantu.
śaṃ sara̍svatī sa̱ha dhī̱bhira̍stu..42..

śama̍bhi̱ṣāca̱ḥ śamu̍ rāti̱ṣāca̍ḥ.
śaṃ no̍ di̱vyāḥ pārthi̍vā̱ḥ śaṃ no̱ apyā̎ḥ.
ye sa̍vi̱tuḥ sa̱tyasa̍vasya̱ viśve̎.
mi̱trasya̍ vra̱te varu̍ṇasya de̱vāḥ.
te saubha̍gaṃ vī̱rava̱dgoma̱dapna̍ḥ.
dadhā̍tana̱ dravi̍ṇaṃ ci̱trama̱sme.
agne̍ yā̱hi dū̱tya̍ṃ vāri̍ṣeṇyaḥ.
de̱vāṃ acchā̎ brahma̱kṛtā̍ ga̱ṇena̍.
sara̍svatīṃ ma̱ruto̍ a̱śvinā̱'paḥ.
ya̱kṣi̱ de̱vānra̍tna̱dheyā̍ya̱ viśvān̍..43..

dyauḥ pi̍ta̱ḥ pṛthi̍vi̱ māta̱radhru̍k.
agne̎ bhrātarvasavo mṛ̱ḍatā̍ naḥ.
viśva̍ ādityā adite sa̱joṣā̎ḥ.
a̱smabhya̱ṃ śarma̍ bahu̱laṃ vi ya̍nta.
viśve̍ devāḥ śṛṇu̱temaṃ hava̍ṃ me.
ye a̱ntari̍kṣe̱ ya upa̱ dyavi̱ ṣṭha.
ye a̍gniji̱hvā u̱ta vā̱ yaja̍trāḥ.
ā̱sadyā̱sminba̱ṟhiṣi̍ mādayadhvam.
ā vā̎ṃ mitrāvaruṇā ha̱vyaju̍ṣṭim.
nama̍sā devā̱vava̍sā''vavṛtyām..44..

a̱smāka̱ṃ brahma̱ pṛta̍nāsu sahyā a̱smākam̎.
vṛ̱ṣṭirdi̱vyā su̍pā̱rā.
yu̱vaṃ vastrā̍ṇi pīva̱sā va̍sāthe.
yu̱voracchi̍drā̱ manta̍vo ha̱ sargā̎ḥ.
avā̍tirata̱manṛ̍tāni̱ viśvā̎.
ṛ̱tena̍ mitrāvaruṇā sacethe.
tathsu vā̎ṃ mitrāvaruṇā mahi̱tvam.
ī̱rmā ta̱sthuṣī̱raha̍bhirduduhre.
viśvā̎ḥ pinvatha̱ svasa̍rasya̱ dhenā̎ḥ.
anu̍ vā̱meka̍ḥ pa̱virā va̍varti..45..

yadbaṃhi̍ṣṭha̱nnāti̱ vide̍ sudānū.
acchi̍dra̱ṃ śarma̱ bhuva̍nasya gopā.
tato̍ no mitrāvaruṇāvavīṣṭam.
siṣā̍santo jīgi̱vāṃsa̍ḥ syāma.
ā no̍ mitrāvaruṇā ha̱vyadā̍tim.
ghṛ̱tairgavyū̍timukṣata̱miḍā̍bhiḥ.
prati̍ vā̱matra̱ vara̱mā janā̍ya.
pṛ̱ṇī̱tamu̱dno di̱vyasya̱ cāro̎ḥ.
pra bā̱havā̍ sisṛtaṃ jī̱vase̍ naḥ.
ā no̱ gavyū̍timukṣataṃ ghṛ̱tena̍..46..

ā no̱ jane̎ śravayataṃ yuvānā.
śru̱taṃ me̍ mitrāvaruṇā̱ have̱mā.
i̱mā ru̱drāya̍ sthi̱radha̍nvane̱ gira̍ḥ.
kṣi̱preṣa̍ve de̱vāya̍ sva̱dhāmne̎.
aṣā̍ḍhāya̱ saha̍mānāya mī̱ḍhuṣe̎.
ti̱gmāyu̍dhāya bharatā śṛ̱ṇota̍na.
tvāda̍ttebhī rudra̱ śanta̍mebhiḥ.
śa̱taṃ himā̍ aśīya bheṣa̱jebhi̍ḥ.
vya̍smaddveṣo̍ vita̱raṃ vyaṃha̍ḥ.
vyamī̍vāṃścātayasvā̱ viṣū̍cīḥ..47..

arha̍nbibharṣi̱ mā na̍sto̱ke.
ā te̍ pitarmarutāṃ su̱mname̍tu.
mā na̱ḥ sūrya̍sya sa̱ndṛśo̍ yuyothāḥ.
a̱bhi no̍ vī̱ro arva̍ti kṣameta.
pra jā̍yemahi rudra pra̱jābhi̍ḥ.
e̱vā ba̍bhro vṛṣabha cekitāna.
yathā̍ deva̱ na hṛ̍ṇī̱ṣe na haṃsi̍.
hā̱va̱na̱śrūrno̍ rudre̱ha bo̍dhi.
bṛ̱hadva̍dema vi̱dathe̍ su̱vīrā̎ḥ.
pari̍ ṇo ru̱drasya̍ he̱tiḥ stu̱hi śru̱tam.
mīḍhu̍ṣṭa̱mārha̍nbibharṣi.
tvama̍gne ru̱dra ā vo̱ rājā̍nam..48..

Anuvāka 7

sūryo̍ de̱vīmu̱ṣasa̱ṃ roca̍mānā̱marya̍ḥ.
na yoṣā̍ma̱bhye̍ti pa̱ścāt.
yatrā̱ naro̍ deva̱yanto̍ yu̱gāni̍.
vi̱ta̱nvate̱ prati̍ bha̱drāya̍ bha̱dram.
bha̱drā aśvā̍ ha̱rita̱ḥ sūrya̍sya.
ci̱trā eda̍gvā anu̱mādyā̍saḥ.
na̱ma̱syanto̍ di̱va ā pṛ̱ṣṭhama̍sthuḥ.
pari̱ dyāvā̍pṛthi̱vī ya̍nti sa̱dyaḥ.
tathsūrya̍sya deva̱tvaṃ tanma̍hi̱tvam.
ma̱dhyā karto̱rvita̍ta̱ṃ sañja̍bhāra..49..

ya̱dedayu̍kta ha̱rita̍ḥ sa̱dhasthā̎t.
ādrātrī̱ vāsa̍stanute si̱masmai̎.
tanmi̱trasya̱ varu̍ṇasyābhi̱cakṣe̎.
sūryo̍ rū̱paṃ kṛ̍ṇute̱ dyoru̱pasthe̎.
a̱na̱ntama̱nyadruśa̍dasya̱ pāja̍ḥ.
kṛ̱ṣṇama̱nyaddha̱rita̱ḥ saṃ bha̍ranti.
a̱dyā de̍vā̱ udi̍tā̱ sūrya̍sya.
niraṃha̍saḥ pipṛ̱tānnira̍va̱dyāt.
tanno̍ mi̱tro varu̍ṇo māmahantām.
adi̍ti̱ḥ sindhu̍ḥ pṛthi̱vī u̱ta dyauḥ..50..

di̱vo ru̱kma u̍ru̱cakṣā̱ ude̍ti.
dū̱re a̍rthasta̱raṇi̱rbhrāja̍mānaḥ.
nū̱naṃ janā̱ḥ sūrye̍ṇa̱ prasū̍tāḥ.
āyannarthā̍ni kṛ̱ṇava̱nnapā̍ṃsi.
śaṃ no̍ bhava̱ cakṣa̍sā̱ śaṃ no̱ ahnā̎.
śaṃ bhā̱nunā̱ śaṃ hi̱mā śaṃ ghṛ̱ṇena̍.
yathā̱ śama̱smai śamasa̍dduro̱ṇe.
tathsū̎rya̱ dravi̍ṇaṃ dhe̱hi ci̱tram.
ci̱traṃ de̱vānā̱muda̍gā̱danī̍kam.
cakṣu̍rmi̱trasya̱ varu̍ṇasyā̱gneḥ..51..

āprā̱ dyāvā̍pṛthi̱vī a̱ntari̍kṣam.
sūrya̍ ā̱tmā jaga̍tasta̱sthuṣa̍śca.
tvaṣṭā̱ dadha̱ttanna̍stu̱rīpam̎.
tvaṣṭā̍ vī̱raṃ pi̱śaṅga̍rūpaḥ.
daśe̱mantvaṣṭu̍rjanayanta̱ garbham̎.
ata̍ndrāso yuva̱tayo̱ bibha̍rtram.
ti̱gmānī̍ka̱ṃ svaya̍śasa̱ṃ jane̍ṣu.
vi̱roca̍māna̱ṃ pari̍ṣīnnayanti.
āviṣṭyo̍ vardhate̱ cāru̍rāsu.
ji̱hmānā̍mū̱rdhvasvaya̍śā u̱pasthe̎..52..

u̱bhe tvaṣṭu̍rbibhyatu̱rjāya̍mānāt.
pra̱tīcī̍ si̱ṃhaṃ prati̍joṣayete.
mi̱tro janā̱npra sa mi̍tra.
a̱yaṃ mi̱tro na̍ma̱sya̍ḥ su̱śeva̍ḥ.
rājā̍ sukṣa̱tro a̍janiṣṭa ve̱dhāḥ.
tasya̍ va̱yaṃ su̍ma̱tau ya̱jñiya̍sya.
api̍ bha̱dre sau̍mana̱se syā̍ma.
a̱na̱mī̱vāsa̱ iḍa̍yā̱ mada̍ntaḥ.
mi̱tajma̍vo̱ vari̍ma̱nnā pṛ̍thi̱vyāḥ.
ā̱di̱tyasya̍ vra̱tamu̍pa̱kṣyanta̍ḥ..53..

va̱yaṃ mi̱trasya̍ suma̱tau syā̍ma.
mi̱traṃ na īṃ śimyā̱ goṣu̍ ga̱vyava̍t.
svā̱dhiyo̍ vi̱dathe̍ a̱phsvajī̍janan.
are̍jayatā̱ṃ roda̍sī̱ pāja̍sā gi̱rā.
prati̍ pri̱yaṃ ya̍ja̱taṃ ja̱nuṣā̱mava̍ḥ.
ma̱hāṃ ā̍di̱tyo nama̍sopa̱sadya̍ḥ.
yā̱ta̱yajja̍no gṛṇa̱te su̱śeva̍ḥ.
tasmā̍ e̱tatpanya̍tamāya̱ juṣṭam̎.
a̱gnau mi̱trāya̍ ha̱virā ju̍hota.
ā vā̱ṃ ratho̱ roda̍sī badbadhā̱naḥ..54..

hi̱ra̱ṇyayo̱ vṛṣa̍bhiryā̱tvaśvai̎ḥ.
ghṛ̱tava̍rtaniḥ pa̱vibhī̍rucā̱naḥ.
i̱ṣāṃ vo̱ḍhā nṛ̱pati̍rvā̱jinī̍vān.
sa pa̍prathā̱no a̱bhi pañca̱ bhūma̍.
tri̱va̱ndhu̱ro mana̱sā''yā̍tu yu̱ktaḥ.
viśo̱ yena̱ gaccha̍tho deva̱yantī̎ḥ.
kutrā̍ ci̱dyāma̍maśvinā̱ dadhā̍nā.
svaśvā̍ ya̱śasā''yā̍tama̱rvāk.
dasrā̍ ni̱dhiṃ madhu̍mantaṃ pibāthaḥ.
vi vā̱ṃ ratho̍ va̱dhvā̍ yāda̍mānaḥ..55..

antā̎ndi̱vo bā̍dhate varta̱nibhyā̎m.
yu̱voḥ śriya̱ṃ pari̱ yoṣā̍vṛṇīta.
sūro̍ duhi̱tā pari̍takmiyāyām.
yadde̍va̱yanta̱mava̍tha̱ḥ śacī̍bhiḥ.
pari̍ghra̱ṃ savā̱ṃ manā̍vā̱ṃ vayo̍gām.
yo ha̱syavā̍ṃ rathirā̱vasta̍ u̱srāḥ.
ratho̍ yujā̱naḥ pa̍ri̱yāti̍ va̱rtiḥ.
tena̍ na̱ḥ śaṃ yoru̱ṣaso̱ vyu̍ṣṭau.
nya̍śvinā vahataṃ ya̱jñe a̱smin.
yu̱vaṃ bhu̱jyumava̍viddhaṃ samu̱dre..56..

udū̍hathu̱rarṇa̍so̱ asri̍dhānaiḥ.
pa̱ta̱tribhi̍raśra̱maira̍vya̱thibhi̍ḥ.
da̱ṃsanā̍bhiraśvinā pā̱raya̍ntā.
agnī̍ṣomā̱ yo a̱dya vā̎m.
i̱daṃ vaca̍ḥ sapa̱ryati̍.
tasmai̍ dhattaṃ su̱vīryam̎.
gavā̱ṃ poṣa̱ṃ svaśvi̍yam.
yo a̱gnīṣomā̍ ha̱viṣā̍ sapa̱ryāt.
de̱va̱drīcā̱ mana̍sā̱ yo ghṛ̱tena̍.
tasya̍ vra̱taṃ ra̍kṣataṃ pā̱tamaṃha̍saḥ..57..

vi̱śe janā̍ya̱ mahi̱ śarma̍ yacchatam.
agnī̍ṣomā̱ ya āhu̍tim.
yo vā̱ṃ dāśā̎ddha̱viṣkṛ̍tim.
sa pra̱jayā̍ su̱vīryam̎.
viśva̱māyu̱rvya̍śñavat.
agnī̍ṣomā̱ ceti̱ tadvī̱rya̍ṃ vām.
yadamu̍ṣṇītamava̱saṃ pa̱ṇiṅgoḥ.
avā̍tirata̱ṃ pratha̍yasya̱ śeṣa̍ḥ.
avi̍ndata̱ṃ jyoti̱reka̍ṃ ba̱hubhya̍ḥ.
agnī̍ṣomāvi̱maṃ su me'gnī̍ṣomā ha̱viṣa̱ḥ prasthi̍tasya..58..

Anuvāka 8

a̱hama̍smi prathama̱jā ṛ̱tasya̍.
pūrva̍ṃ de̱vebhyo̍ a̱mṛta̍sya̱ nābhi̍ḥ.
yo mā̱ dadā̍ti̱ sa ide̱va mā''vā̎ḥ.
a̱hamanna̱manna̍ma̱danta̍madmi.
pūrva̍ma̱gnerapi̍ daha̱tyannam̎.
ya̱ttau hā̍sāte ahamutta̱reṣu̍.
vyātta̍masya pa̱śava̍ḥ su̱jambham̎.
paśya̍nti̱ dhīrā̱ḥ praca̍ranti̱ pākā̎ḥ.
jahā̎mya̱nyanna ja̍hāmya̱nyam.
a̱hamanna̱ṃ vaśa̱micca̍rāmi..59..

sa̱mā̱namartha̱ṃ parye̍mi bhu̱ñjat.
ko māmanna̍ṃ manu̱ṣyo̍ dayeta.
parā̍ke̱ anna̱ṃ nihi̍taṃ lo̱ka e̱tat.
viśvai̎rde̱vaiḥ pi̱tṛbhi̍rgu̱ptamannam̎.
yada̱dyate̍ lu̱pyate̱ yatpa̍ro̱pyate̎.
śa̱ta̱ta̱mī sā ta̱nūrme̍ babhūva.
ma̱hāntau̍ ca̱rū sa̍kṛddu̱gdhena̍ paprau.
diva̍ṃ ca̱ pṛśñi̍ pṛthi̱vīṃ ca̍ sā̱kam.
tathsa̱mpiba̍nto̱ na mi̍nanti ve̱dhasa̍ḥ.
naitadbhūyo̱ bhava̍ti̱ no kanī̍yaḥ..60..

anna̍ṃ prā̱ṇamanna̍mapā̱namā̍huḥ.
anna̍ṃ mṛ̱tyuṃ tamu̍ jī̱vātu̍māhuḥ.
anna̍ṃ bra̱hmāṇo̍ ja̱rasa̍ṃ vadanti.
anna̍māhuḥ pra̱jana̍naṃ pra̱jānā̎m.
mogha̱manna̍ṃ vindate̱ apra̍cetāḥ.
sa̱tyaṃ bra̍vīmi va̱dha ithsa tasya̍.
nārya̱maṇa̱ṃ puṣya̍ti̱ no sakhā̍yam.
keva̍lāgho bhavati kevalā̱dī.
a̱haṃ me̱ghaḥ sta̱naya̱nvarṣa̍nnasmi.
māma̍dantya̱hama̍dmya̱nyān..61..

a̱haṃ sada̱mṛto̍ bhavāmi.
madā̍di̱tyā adhi̱ sarve̍ tapanti.
de̱vīṃ vāca̍majanayanta̱ yadvāgvada̍ntī.
a̱na̱ntāmantā̱dadhi̱ nirmi̍tāṃ ma̱hīm.
yasyā̎ṃ de̱vā a̍dadhu̱rbhoja̍nāni.
ekā̎kṣarāṃ dvi̱padā̱ṃ ṣaṭpa̍dāṃ ca.
vāca̍ṃ de̱vā upa̍ jīvanti̱ viśve̎.
vāca̍ṃ de̱vā upa̍ jīvanti̱ viśve̎.
vāca̍ṃ gandha̱rvāḥ pa̱śavo̍ manu̱ṣyā̎ḥ.
vā̱cīmā viśvā̱ bhuva̍nā̱nyarpi̍tā..62..

sā no̱ hava̍ṃ juṣatā̱mindra̍patnī.
vāga̱kṣara̍ṃ prathama̱jā ṛ̱tasya̍.
vedā̍nāṃ mā̱tā'mṛta̍sya̱ nābhi̍ḥ.
sā no̍ juṣā̱ṇopa̍ ya̱jñamāgā̎t.
ava̍ntī de̱vī su̱havā̍ me astu.
yāmṛṣa̍yo mantra̱kṛto̍ manī̱ṣiṇa̍ḥ.
a̱nvaiccha̍ṃ de̱vāstapa̍sā̱ śrame̍ṇa.
tānde̱vīṃ vāca̍ṃ ha̱viṣā̍ yajāmahe.
sā no̍ dadhātu sukṛ̱tasya̍ lo̱ke.
ca̱tvāri̱ vākpari̍mitā pa̱dāni̍..63..

tāni̍ vidurbrāhma̱ṇā ye ma̍nī̱ṣiṇa̍ḥ.
guhā̱ trīṇi̱ nihi̍tā̱ neṅga̍yanti.
tu̱rīya̍ṃ vā̱co ma̍nu̱ṣyā̍ vadanti.
śra̱ddhayā̱'gniḥ sami̍dhyate.
śra̱ddhayā̍ vindate ha̱viḥ.
śra̱ddhāṃ bhaga̍sya mū̱rdhani̍.
vaca̱sā ve̍dayāmasi.
pri̱yaṃ śra̍ddhe̱ dada̍taḥ.
pri̱yaṃ śra̍ddhe̱ didā̍sataḥ.
pri̱yaṃ bho̱jeṣu̱ yajva̍su..64..

i̱daṃ ma̍ udi̱taṃ kṛ̍dhi.
yathā̍ de̱vā asu̍reṣu.
śra̱ddhāmu̱greṣu̍ cakri̱re.
e̱vaṃ bho̱jeṣu̱ yajva̍su.
a̱smāka̍mudi̱taṃ kṛ̍dhi.
śra̱ddhāṃ de̍vā̱ yaja̍mānāḥ.
vā̱yugo̍pā̱ upā̍sate.
śra̱ddhāṃ hṛ̍da̱yya̍yā''kū̎tyā.
śra̱ddhayā̍ hūyate ha̱viḥ.
śra̱ddhāṃ prā̱tarha̍vāmahe..65..

śra̱ddhāṃ ma̱dhyandi̍na̱ṃ pari̍.
śra̱ddhāṃ sūrya̍sya ni̱mruci̍.
śraddhe̱ śraddhā̍paye̱ha mā̎.
śra̱ddhā de̱vānadhi̍ vaste.
śra̱ddhā viśva̍mi̱daṃ jaga̍t.
śra̱ddhāṃ kāma̍sya mā̱taram̎.
ha̱viṣā̍ vardhayāmasi.
brahma̍ jajñā̱naṃ pra̍tha̱maṃ pu̱rastā̎t.
vi sī̍ma̱taḥ su̱ruco̍ ve̱na ā̍vaḥ.
sa bu̱dhniyā̍ upa̱ mā a̍sya vi̱ṣṭhāḥ..66..

sa̱taśca̱ yoni̱masa̍taśca̱ viva̍ḥ.
pi̱tā vi̱rājā̍mṛṣa̱bho ra̍yī̱ṇām.
a̱ntari̍kṣaṃ vi̱śvarū̍pa̱ āvi̍veśa.
tama̱rkaira̱bhya̍rcanti va̱thsam.
brahma̱ santa̱ṃ brahma̍ṇā va̱rdhaya̍ntaḥ.
brahma̍ de̱vāna̍janayat.
brahma̱ viśva̍mi̱daṃ jaga̍t.
brahma̍ṇaḥ kṣa̱traṃ nirmi̍tam.
brahma̍ brāhma̱ṇa ā̱tmanā̎.
a̱ntara̍sminni̱me lo̱kāḥ..67..

a̱ntarviśva̍mi̱daṃ jaga̍t.
brahmai̱va bhū̱tānā̱ṃ jyeṣṭham̎.
tena̱ ko̍'rhati̱ spardhi̍tum.
brahma̍nde̱vāstraya̍striṃśat.
brahma̍nnindraprajāpa̱tī.
brahma̍n ha̱ viśvā̍ bhū̱tāni̍.
nā̱vīvā̱ntaḥ sa̱māhi̍tā.
cata̍sra̱ āśā̱ḥ praca̍rantva̱gnaya̍ḥ.
i̱maṃ no̍ ya̱jñaṃ na̍yatu prajā̱nan.
ghṛ̱taṃ pinva̍nna̱jara̍ṃ su̱vīram̎..68..

brahma̍ sa̱midbha̍va̱tyāhu̍tīnām.
ā gāvo̍ agmannu̱ta bha̱drama̍kran.
sīda̍ntu go̱ṣṭhe ra̱ṇaya̍ntva̱sme.
pra̱jāva̍tīḥ puru̱rūpā̍ i̱ha syuḥ.
indrā̍ya pū̱rvīru̱ṣaso̱ duhā̍nāḥ.
indro̱ yajva̍ne pṛṇa̱te ca̍ śikṣati.
upedda̍dāti̱ na svaṃ mu̍ṣāyati.
bhūyo̍bhūyo ra̱yimida̍sya va̱rdhayan̍.
abhi̍nne khi̱lle ni da̍dhāti deva̱yum.
na tā na̍śanti̱ na tā arvā̎..69..

gāvo̱ bhago̱ gāva̱ indro̍ me acchāt.
gāva̱ḥ soma̍sya pratha̱masya̍ bha̱kṣaḥ.
i̱mā yā gāva̱ḥ saja̍nāsa̱ indra̍ḥ.
i̱cchāmīddhṛ̱dā mana̍sā ci̱dindram̎.
yū̱yaṃ gā̍vo medayathā kṛ̱śaṃ ci̍t.
a̱ślī̱laṃ ci̍tkṛṇuthā su̱pratī̍kam.
bha̱draṃ gṛ̱haṃ kṛ̍ṇutha bhadravācaḥ.
bṛ̱hadvo̱ vaya̍ ucyate sa̱bhāsu̍.
pra̱jāva̍tīḥ sū̱yava̍saṃ ri̱śantī̎ḥ.
śu̱ddhā a̱paḥ su̍prapā̱ṇe piba̍ntīḥ.
mā va̍ḥ ste̱na ī̍śata̱ mā'ghaśa̍ṃsaḥ.
pari̍ vo he̱tī ru̱drasya̍ vṛñjyāt.
upe̱damu̍pa̱parca̍nam.
ā̱su goṣūpa̍pṛcyatām.
upa̍rṣa̱bhasya̱ reta̍si.
upe̎ndra̱ tava̍ vī̱rye̎..70..

Anuvāka 9

tā sū̎ryācandra̱masā̍ viśva̱bhṛtta̍mā ma̱hat.
tejo̱ vasu̍madrājato di̱vi.
sāmā̎tmānā carataḥ sāmacā̱riṇā̎.
yayo̎rvra̱taṃ na ma̱me jātu̍ de̱vayo̎ḥ.
u̱bhāvantau̱ pari̍ yāta̱ armyā̎.
di̱vo na ra̱śmīṃsta̍nu̱to vya̍rṇa̱ve.
u̱bhā bhu̍va̱ntī bhuva̍nā ka̱vikra̍tū.
sūryā̱ na ca̱ndrā ca̍rato ha̱tāma̍tī.
patī̎ dyu̱madvi̍śva̱vidā̍ u̱bhā di̱vaḥ.
sūryā̍ u̱bhā ca̱ndrama̍sā vicakṣa̱ṇā..71..

vi̱śvavā̍rā varivo̱bhā vare̎ṇyā.
tā no̍'vataṃ mati̱mantā̱ mahi̍vratā.
vi̱śva̱vapa̍rī pra̱tara̍ṇā tara̱ntā.
su̱va̱rvidā̍ dṛ̱śaye̱ bhūri̍raśmī.
sūryā̱ hi ca̱ndrā vasu̍ tve̱ṣada̍rśatā.
ma̱na̱svino̱bhānu̍cara̱tonu̱ sandivam̎.
a̱sya śravo̍ na̱dya̍ḥ sa̱pta bi̍bhrati.
dyāvā̱ kṣāmā̍ pṛthi̱vī da̍rśa̱taṃ vapu̍ḥ.
a̱sme sū̎ryācandra̱masā̍'bhi̱cakṣe̎.
śra̱ddhekami̍ndra carato vicartu̱ram..72..

pū̱rvā̱pa̱raṃ ca̍rato mā̱yayai̱tau.
śiśū̱ krīḍa̍ntau̱ pari̍ yāto adhva̱ram.
viśvā̎nya̱nyo bhuva̍nā'bhi̱ caṣṭe̎.
ṛ̱tūna̱nyo vi̱dadha̍jjāyate̱ puna̍ḥ.
hira̍ṇyavarṇā̱ḥ śuca̍yaḥ pāva̱kā yāsā̱ṃ rājā̎.
yāsā̎ṃ de̱vāḥ śi̱vena̍ mā̱ cakṣu̍ṣā paśyata.
āpo̍ bha̱drā āditpa̍śyāmi.
nāsa̍dāsī̱nno sadā̍sītta̱dānī̎m.
nāsī̱drajo̱ no vyo̍mā pa̱ro yat.
kimāva̍rīva̱ḥ kuha̱ kasya̱ śarman̍..73..

ambha̱ḥ kimā̍sī̱dgaha̍naṃ gabhī̱ram.
na mṛ̱tyura̱mṛta̱ṃ tarhi̱ na.
rātri̍yā̱ ahna̍ āsītprake̱taḥ.
ānī̍davā̱taṃ sva̱dhayā̱ tadekam̎.
tasmā̎ddhā̱nyaṃ na pa̱raḥ kiṃ ca̱ nā''sa̍.
tama̍ āsī̱ttama̍sā gū̱ḍhamagre̎ prake̱tam.
sa̱li̱laṃ sarva̍mā i̱dam.
tu̱cchenā̱bhvapi̍hita̱ṃ yadāsī̎t.
tama̍sa̱stanma̍hi̱nā jā̍ya̱taikam̎.
kāma̱stadagre̱ sama̍varta̱tādhi̍..74..

mana̍so̱ reta̍ḥ pratha̱maṃ yadāsī̎t.
sa̱to bandhu̱masa̍ti̱ nira̍vindan.
hṛ̱di pra̱tīṣyā̍ ka̱vayo̍ manī̱ṣā.
ti̱ra̱ścīno̱ vita̍to ra̱śmire̍ṣām.
a̱dhaḥ svi̍dā̱sī(3)du̱pari̍ svidāsī(3)t.
re̱to̱dhā ā̍sanmahi̱māna̍ āsan.
sva̱dhā a̱vastā̱tpraya̍tiḥ pa̱rastā̎t.
ko a̱ddhā ve̍da̱ ka i̱ha pra vo̍cat.
kuta̱ ājā̍tā̱ kuta̍ i̱yaṃ visṛ̍ṣṭiḥ.
a̱rvāgde̱vā a̱sya vi̱sarja̍nāya..75..

athā̱ ko ve̍da̱ yata̍ āba̱bhūva̍.
i̱yaṃ visṛ̍ṣṭi̱ryata̍ āba̱bhūva̍.
yadi̍ vā da̱dhe yadi̍ vā̱ na.
yo a̱syādhya̍kṣaḥ para̱me vyo̍man.
so a̱ṅga ve̍da̱ yadi̍ vā̱ na veda̍.
kiṃsvi̱dvana̱ṅka u̱ sa vṛ̱kṣa ā̍sīt.
yato̱ dyāvā̍pṛthi̱vī ni̍ṣṭata̱kṣuḥ.
manī̍ṣiṇo̱ mana̍sā pṛ̱cchatedu̱tat.
yada̱dhyati̍ṣṭha̱dbhuva̍nāni dhā̱rayan̍.
brahma̱ vana̱ṃ brahma̱ sa vṛ̱kṣa ā̍sīt..76..

yato̱ dyāvā̍pṛthi̱vī ni̍ṣṭata̱kṣuḥ.
manī̍ṣiṇo̱ mana̍sā̱ vibra̍vīmi vaḥ.
brahmā̱dhyati̍ṣṭha̱dbhuva̍nāni dhā̱rayan̍.
prā̱tara̱gniṃ prā̱tarindra̍ṃ havāmahe.
prā̱tarmi̱trāvaru̍ṇā prā̱tara̱śvinā̎.
prā̱tarbhaga̍ṃ pū̱ṣaṇa̱ṃ brahma̍ṇa̱spatim̎.
prā̱taḥ soma̍mu̱ta ru̱draṃ hu̍vema.
prā̱ta̱rjita̱ṃ bhaga̍mu̱graṃ hu̍vema.
va̱yaṃ pu̱tramadi̍te̱ryo vi̍dha̱rtā.
ā̱dhraści̱dyaṃ manya̍mānastu̱raści̍t..77..

rājā̍ ci̱dyaṃ bhaga̍ṃ bha̱kṣītyāha̍.
bhaga̱ praṇe̍ta̱rbhaga̱ satya̍rādhaḥ.
bhage̱māṃ dhiya̱muda̍va̱ dada̍nnaḥ.
bhaga̱ pra ṇo̍ janaya̱ gobhi̱raśvai̎ḥ.
bhaga̱ pra nṛbhi̍rnṛ̱vanta̍ḥ syāma.
u̱tedānī̱ṃ bhaga̍vantaḥ syāma.
u̱ta prapi̱tva u̱ta madhye̱ ahnā̎m.
u̱todi̍tā maghava̱nthsūrya̍sya.
va̱yaṃ de̱vānā̍ṃ suma̱tau syā̍ma.
bhaga̍ e̱va bhaga̍vāṃ astu devāḥ..78..

tena̍ va̱yaṃ bhaga̍vantaḥ syāma.
taṃ tvā̍ bhaga̱ sarva̱ ijjo̍havīmi.
sa no̍ bhaga pura e̱tā bha̍ve̱ha.
sama̍dhva̱rāyo̱ṣaso̍ namanta.
da̱dhi̱krāve̍va̱ śuca̍ye pa̱dāya̍.
a̱rvā̱cī̱naṃ va̍su̱vida̱ṃ bhaga̍ṃ naḥ.
ratha̍mi̱vāśvā̍ vā̱jina̱ āva̍hantu.
aśvā̍vatī̱rgoma̍tīrna u̱ṣāsa̍ḥ.
vī̱rava̍tī̱ḥ sada̍mucchantu bha̱drāḥ.
ghṛ̱taṃ duhā̍nā vi̱śvata̱ḥ prapī̍nāḥ.
yū̱yaṃ pā̍ta sva̱stibhi̱ḥ sadā̍ naḥ..79..