Anuvāka 1
oṃ santvā̍ siñcāmi̱ yajuṣā̍ pra̱jāmāyu̱rdhana̍ṃ ca.. oṃ śānti̱ḥ śānti̱ḥ śānti̍ḥ..
pa̱re̱yu̱vāṃsa̍ṃ pra̱vato̍ ma̱hīranu̍ ba̱hubhya̱ḥ panthā̍manapaspaśā̱nam.
vai̱va̱sva̱taṃ sa̱ṅgama̍na̱ṃ janā̍nāṃ ya̱maṃ rājā̍naṃ ha̱viṣā̍ duvasyata.
i̱daṃ tvā̱ vastra̍ṃ pratha̱manvāga̱nnapai̱tadū̍ha̱ yadi̱hābi̍bhaḥ pu̱rā.
i̱ṣṭā̱pū̱rtamanu̱ sampa̍śya̱ dakṣi̍ṇā̱ṃ yathā̍ te da̱ttaṃ ba̍hu̱dhā vi ba̍ndhuṣu.
i̱mau yu̍najmi te va̱hnī asu̍nīthāya vo̱ḍhave̎.
yābhyā̎ṃ ya̱masya̱ sāda̍naṃ su̱kṛtā̱ṃ cāpi̍ gacchatāt.
pū̱ṣā tve̱taścyā̍vayatu̱ pravi̱dvānana̍ṣṭapaśu̱rbhuva̍nasya go̱pāḥ.
sa tvai̱tebhya̱ḥ pari̍dadātpi̱tṛbhyo̱'gnirde̱vebhya̍ḥ suvi̱datre̎bhyaḥ.
pū̱ṣemā āśā̱ anu̍veda̱ sarvā̱ḥ so a̱smāṃ abha̍yatamena neṣat.
sva̱sti̱dā aghṛ̍ṇi̱ḥ sarva̍vī̱ro'pra̍yucchanpu̱ra e̍tu̱ pravi̱dvān..1..
āyu̍rvi̱śvāyu̱ḥ pari̍pāsati tvā pū̱ṣā tvā̍ pātu̱ prapa̍the pu̱rastā̎t.
yatrā''sa̍te su̱kṛto̱ yatra̱ te ya̱yustatra̍ tvā de̱vaḥ sa̍vi̱tā da̍dhātu.
bhuva̍nasya pata i̱daṃ ha̱viḥ.
a̱gnaye̍ rayi̱mate̱ svāhā̎.
puru̍ṣasya sayāva̱ryapeda̱ghāni̍ mṛjmahe.
yathā̍ no̱ atra̱ nāpa̍raḥ pu̱rā ja̱rasa̱ āya̍ti.
puru̍ṣasya sayāvari̱ vi te̎ prā̱ṇama̍si srasam.
śarī̍reṇa ma̱hīmihi̍ sva̱dhayehi̍ pi̱tṝnupa̍ pra̱jayā̱'smāni̱hāva̍ha.
maiva̍ṃ mā̱ṃ stā pri̍ye̱'haṃ de̱vī sa̱tī pi̍tṛlo̱kaṃ yadaiṣi̍.
vi̱śvavā̍rā̱ nabha̍sā̱ saṃvya̍yantyu̱bhau no̍ lo̱kau paya̍sā̱'bhyāva̍vṛthsva..2..
i̱yaṃ nārī̍ patilo̱kaṃ vṛ̍ṇā̱nā nipa̍dyata̱ upa̍ tvā martya̱ pretam̎.
viśva̍ṃ purā̱ṇamanu̍ pā̱laya̍ntī̱ tasyai̎ pra̱jāṃ dravi̍ṇaṃ ce̱ha dhe̍hi.
udī̎rṣva nārya̱bhi jī̍valo̱kami̱tāsu̍me̱tamupa̍śeṣa̱ ehi̍.
ha̱sta̱grā̱bhasya̍ didhi̱ṣostvame̱tatpatyu̍rjani̱tvama̱bhi samba̍bhūva.
su̱varṇa̱ṃ hastā̍dā̱dadā̍nā mṛ̱tasya̍ śri̱yai brahma̍ṇe̱ teja̍se̱ balā̍ya.
atrai̱va tvami̱ha va̱yaṃ su̱śevā̱ viśvā̱ḥ spṛdho̍ a̱bhimā̍tīrjayema.
dhanu̱ṟhastā̍dā̱dadā̍nā mṛ̱tasya̍ śri̱yai kṣa̱trāyauja̍se̱ balā̍ya.
atrai̱va tvami̱ha va̱yaṃ su̱śevā̱ viśvā̱ḥ spṛdho̍ a̱bhimā̍tīrjayema.
maṇi̱ṃ hastā̍dā̱dadā̍nā mṛ̱tasya̍ śri̱yai vi̱śe puṣṭyai̱ balā̍ya.
atrai̱va tvami̱ha va̱yaṃ su̱śevā̱ viśvā̱ḥ spṛdho̍ a̱bhimā̍tīrjayema..3..
i̱mama̍gne cama̱saṃ mā vijī̎hvaraḥ pri̱yo de̱vānā̍mu̱ta so̱myānā̎m.
e̱ṣa yaśca̍ma̱so de̍va̱pāna̱stasmi̍nde̱vā a̱mṛtā̍ mādayantām.
a̱gnervarma̱ pari̱ gobhi̍rvyayasva̱ saṃ prorṇu̍ṣva̱ meda̍sā̱ pīva̍sā ca.
nettvā̍ dhṛ̱ṣṇurhara̍sā̱ jarhṛ̍ṣāṇo̱ dadha̍dvidha̱kṣyanparya̱ṅkhayā̍tai.
maina̍magne̱ vida̍ho̱ mā'bhiśo̍co̱ mā'sya̱ tvaca̍ṃ cikṣipo̱ mā śarī̍ram.
ya̱dā śṛ̱taṃ ka̱ravo̍ jātave̱do'the̍mena̱ṃ prahi̍ṇutātpi̱tṛbhya̍ḥ.
śṛ̱taṃ ya̱dā ka̱rasi̍ jātave̱do'the̍mena̱ṃ pari̍dattātpi̱tṛbhya̍ḥ.
ya̱dā gacchā̱tyasu̍nītime̱tāmathā̍ de̱vānā̎ṃ vaśa̱nīrbha̍vāti.
sūrya̍ṃ te̱ cakṣu̍rgacchatu̱ vāta̍mā̱tmā dyāṃ ca̱ gaccha̍ pṛthi̱vīṃ ca̱ dharma̍ṇā.
a̱po vā̍ gaccha̱ yadi̱ tatra̍ te hi̱tamoṣa̍dhīṣu̱ prati̍tiṣṭhā̱ śarī̍raiḥ.
a̱jo bhā̱gastapa̍sā̱ taṃ ta̍pasva̱ taṃ te̍ śo̱cista̍patu̱ taṃ te̍ a̱rciḥ.
yāste̍ śi̱vāsta̱nuvo̍ jātaveda̱stābhi̍rvahe̱maṃ su̱kṛtā̱ṃ yatra̍ lo̱kāḥ.
a̱yaṃ vai tvama̱smādadhi̱ tvame̱tada̱yaṃ vai tada̍sya̱ yoni̍rasi.
vai̱śvā̱na̱raḥ pu̱traḥ pi̱tre lo̍ka̱kṛjjā̍tavedo̱ vahe̍maṃ su̱kṛtā̱ṃ yatra̍ lo̱kāḥ..4..
Anuvāka 2
ya e̱tasya̍ pa̱tho go̱ptāra̱stebhya̱ḥ svāhā̱ ya e̱tasya̍ pa̱tho ra̍kṣi̱tāra̱stebhya̱ḥ svāhā̱ ya e̱tasya̍ pa̱tho̍bhi'ra̍kṣi̱tāra̱stebhya̱ḥ svāhā̎''khyā̱tre svāhā̍'pākhyā̱tre svāhā̍'bhi̱lāla̍pate̱ svāhā̍'pa̱lāla̍pate̱ svāhā̱'gnaye̍ karma̱kṛte̱ svāhā̱ yamatra̱ nādhī̱mastasmai̱ svāhā̎.
yasta̍ i̱dhmaṃ ja̱bhara̍thsiṣvidā̱no mū̱rdhāna̍ṃ vāta̱ tapa̍te tvā̱yā.
divo̱ viśva̍smāthsīmaghāya̱ta u̍ruṣyaḥ.
a̱smāttvamadhi̍ jā̱to̍'si̱ tvada̱yaṃ jā̍yatā̱ṃ puna̍ḥ.
a̱gnaye̍ vaiśvāna̱rāya̍ suva̱rgāya̍ lo̱kāya̱ svāhā̎..5..
Anuvāka 3
pra ke̱tunā̍ bṛha̱tā bhā̎tya̱gnirā̱virviśvā̍ni vṛṣa̱bho ro̍ravīti.
di̱vaści̱dantā̱dupa̱ māmu̱dāna̍ḍa̱pāmu̱pasthe̍ mahi̱ṣo va̍vardha.
i̱daṃ ta̱ eka̍ṃ pa̱ra ū̍ta̱ eka̍ṃ tṛ̱tīye̍na̱ jyoti̍ṣā̱ saṃvi̍śasva.
sa̱ṃveśa̍nasta̱nuvai̱ cāru̍redhi pri̱yo de̱vānā̎ṃ para̱me sa̱dhasthe̎.
nāke̍ supa̱rṇamupa̱ yatpata̍ntaṃ hṛ̱dā vena̍nto a̱bhyaca̍kṣata tvā.
hira̍ṇyapakṣa̱ṃ varu̍ṇasya dū̱taṃ ya̱masya̱ yonau̍ śaku̱naṃ bhu̍ra̱ṇyum.
ati̍drava sārame̱yau śvānau̍ catura̱kṣau śa̱balau̍ sā̱dhunā̍ pa̱thā.
athā̍ pi̱tṝnthsu̍vi̱datrā̱ṃ apī̍hi ya̱mena̱ ye sa̍dha̱māda̱ṃ mada̍nti.
yau te̱ śvānau̍ yamarakṣi̱tārau̍ catura̱kṣau pa̍thi̱rakṣī̍ nṛ̱cakṣa̍sā.
tābhyā̍ṃ rāja̱npari̍ dehyenaṃ sva̱sti cā̎smā anamī̱vaṃ ca̍ dhehi..6..
u̱ru̱ṇa̱sāva̍su̱tṛpā̍vulumba̱lau ya̱masya̍ dū̱tau ca̍rato̱ vaśā̱ṃ anu̍.
tāva̱smabhya̍ṃ dṛ̱śaye̱ sūryā̍ya̱ puna̍rdattā̱ vasu̍ma̱dyeha bha̱dram.
soma̱ eke̎bhyaḥ pavate ghṛ̱tameka̱ upā̍sate.
yebhyo̱ madhu̍ pra̱dhāva̍ti̱ tāṃści̍de̱vāpi̍ gacchatāt.
ye yudhya̍nte pra̱dhane̍ṣu̱ śūrā̍so̱ ye ta̍nu̱tyaja̍ḥ.
ye vā̍ sa̱hasra̍dakṣiṇā̱stāṃści̍de̱vāpi̍ gacchatāt.
tapa̍sā̱ ye a̍nādhṛ̱ṣyāstapa̍sā̱ ye suva̍rga̱tāḥ.
tapo̱ ye ca̍kri̱re ma̱hattāṃści̍de̱vāpi̍ gacchatāt.
aśma̍nvatī revatī̱ḥ saṃ ra̍bhadhva̱mutti̍ṣṭhata̱ prata̍ratā sakhāyaḥ.
atrā̍ jahāma̱ ye asa̱nnaśe̍vāḥ śi̱vān va̱yama̱bhi vājā̱nutta̍rema..7..
yadvai de̱vasya̍ savi̱tuḥ pa̱vitra̍ṃ sa̱hasra̍dhāra̱ṃ vita̍tama̱ntari̍kṣe.
yenāpu̍nā̱dindra̱manā̎rta̱mārtyai̱ tenā̱haṃ māṃ sa̱rvata̍nuṃ punāmi.
yā rā̱ṣṭrātpa̱nnādapa̱ yanti̱ śākhā̍ a̱bhimṛ̍tā nṛ̱pati̍mi̱cchamā̍nāḥ.
dhā̱tustāḥ sarvā̱ḥ pava̍nena pū̱tāḥ pra̱jayā̱smānra̱yyā varca̍sā̱ saṃsṛ̍jātha.
udva̱yaṃ tama̍sa̱spari̱ paśya̍nto̱ jyoti̱rutta̍ram.
de̱vaṃ de̍va̱trā sūrya̱maga̍nma̱ jyoti̍rutta̱mam.
dhā̱tā pu̍nātu savi̱tā pu̍nātu.
a̱gnesteja̍sā̱ sūrya̍sya̱ varca̍sā..8..
Anuvāka 4
yante̍ a̱gnimama̍nthāma vṛṣa̱bhāye̍va̱ pakta̍ve.
i̱mantaṃ śa̍mayāmasi kṣī̱reṇa̍ coda̱kena̍ ca.
yantvama̍gne sa̱mada̍ha̱stvamu̱ nirvā̍payā̱ puna̍ḥ.
kyā̱mbūratra̍ jāyatāṃ pākadū̱rvā vya̍lkaśā.
śīti̍ke̱ śīti̍kāvati̱ hlādu̍ke̱ hlādu̍kāvati.
ma̱ṇḍū̱kyā̍ susaṅga̱maye̱maṃ sva̍gniṃ śa̱maya̍.
śaṃ te̍ dhanva̱nyā āpa̱ḥ śamu̍ te santvanū̱kyā̎ḥ.
śaṃ te̍ samu̱driyā̱ āpa̱ḥ śamu̍ te santu̱ varṣyā̎ḥ.
śaṃ te̱ srava̍ntīsta̱nuve̱ śamu̍ te santu̱ kūpyā̎ḥ.
śante̍ nīhā̱ro va̍rṣatu̱ śamu̱ pṛṣvā'va̍śīyatām..9..
ava̍ sṛja̱ puna̍ragne pi̱tṛbhyo̱ yasta̱ āhu̍ta̱ścara̍ti sva̱dhābhi̍ḥ.
āyu̱rvasā̍na̱ upa̍ yātu̱ śeṣa̱ṃ saṅga̍cchatāṃ ta̱nuvā̍ jātavedaḥ.
saṅga̍cchasva pi̱tṛbhi̱ḥ saṃ sva̱dhābhi̱ḥ sami̍ṣṭāpū̱rtena̍ para̱me vyo̍man.
yatra̱ bhūmyai̍ vṛ̱ṇase̱ tatra̍ gaccha̱ tatra̍ tvā de̱vaḥ sa̍vi̱tā da̍dhātu.
yatte̍ kṛ̱ṣṇaḥ śa̍ku̱na ā̍tu̱toda̍ pipī̱laḥ sa̱rpa u̱ta vā̱ śvāpa̍daḥ.
a̱gniṣṭadviśvā̍danṛ̱ṇaṃ kṛ̍ṇotu̱ soma̍śca̱ yo brā̎hma̱ṇamā̍vi̱veśa̍.
utti̱ṣṭhāta̍sta̱nuva̱ṃ sambha̍rasva̱ meha gātra̱mava̍hā̱ mā śarī̍ram.
yatra̱ bhūmyai̍ vṛ̱ṇase̱ tatra̍ gaccha̱ tatra̍ tvā de̱vaḥ sa̍vi̱tā da̍dhātu.
i̱daṃ ta̱ eka̍ṃ pa̱ra ū̍ta̱ eka̍ṃ tṛ̱tīye̍na̱ jyoti̍ṣā̱ saṃvi̍śasva.
sa̱ṃveśa̍nasta̱nuvai̱ cāru̍redhi pri̱yo de̱vānā̎ṃ para̱me sa̱dhasthe̎.
utti̍ṣṭha̱ prehi̱ pradra̱vauka̍ḥ kṛṇuṣva para̱me vyo̍man.
ya̱mena̱ tvaṃ ya̱myā̍ saṃvidā̱notta̱maṃ nāka̱madhi̍ rohe̱mam.
aśma̍nvatī revatī̱ryadvai de̱vasya̍ savi̱tuḥ pa̱vitra̱ṃ yā rā̱ṣṭrātpa̱nnādudva̱yaṃ tama̍sa̱spari̍ dhā̱tā pu̍nātu.
a̱smāttvamadhi̍ jā̱to̎'sya̱yaṃ tvadadhi̍jāyatām.
a̱gnaye̍ vaiśvāna̱rāya̍ suva̱rgāya̍ lo̱kāya̱ svāhā̎..10..
Anuvāka 5
āyā̍tu de̱vaḥ su̱manā̍bhirū̱tibhi̍rya̱mo ha̍ve̱ha praya̍tābhira̱ktā.
āsī̍datāṃ supra̱yate̍ha ba̱rhiṣyūrjā̍ya jā̱tyai mama̍ śatru̱hatyai̎.
ya̱me i̍va̱ yata̍māne̱ yadaita̱ṃ pravā̎mbhara̱nmānu̍ṣā deva̱yanta̍ḥ.
āsī̍data̱ṃ svamu̍ lo̱kaṃ vidā̍ne svāsa̱sthe bha̍vata̱minda̍ve naḥ.
ya̱māya̱ soma̍ṃ sunuta ya̱māya̍ juhutā ha̱viḥ.
ya̱maṃ ha̍ ya̱jño ga̍cchatya̱gnidū̍to̱ ara̍ṅkṛtaḥ.
ya̱māya̍ ghṛ̱tava̍ddha̱virju̱hota̱ pra ca̍ tiṣṭhata.
sa no̍ de̱veṣvāya̍maddī̱rghamāyu̱ḥ pra jī̱vase̎.
ya̱māya̱ madhu̍mattama̱ṃ rājñe̍ ha̱vyaṃ ju̍hotana.
i̱daṃ nama̱ ṛṣi̍bhyaḥ pūrva̱jebhya̱ḥ pūrve̎bhyaḥ pathi̱kṛdbhya̍ḥ..11..
yo'sya̱ kauṣṭhya̱ jaga̍ta̱ḥ pārthi̍va̱syaika̍ idva̱śī.
ya̱maṃ bha̍ṅgyaśra̱vo gā̍ya̱ yo rājā̍napa̱rodhya̍ḥ.
ya̱maṅgāya̍ bhaṅgya̱śravo̱ yo rājā̍napa̱rodhya̍ḥ.
yenā̱''po na̱dyo̍ dhanvā̍ni̱ yena̱ dyauḥ pṛ̍thi̱vī dṛ̱ḍhā.
hi̱ra̱ṇya̱ka̱kṣyān su̱dhurān̍ hiraṇyā̱kṣāna̍yaḥ śa̱phān.
aśvā̍na̱naśya̍to dā̱na̱ṃ ya̱mo rā̍jā'bhi̱ tiṣṭha̍ti.
ya̱mo dā̍dhāra pṛthi̱vīṃ ya̱mo viśva̍mi̱daṃ jaga̍t.
ya̱māya̱ sarva̱mitra̍sthe̱ yatprā̱ṇadvā̱yura̍kṣi̱tam.
yathā̱ pañca̱ yathā̱ ṣaḍya̱thā pañca̍ da̱śarṣa̍yaḥ.
ya̱maṃ yo vi̍dyā̱thsa brū̍yādya̱thaika ṛṣi̍rvijāna̱te..12..
trika̍drukebhi̱ḥ pata̍ti̱ ṣaḍu̱rvīreka̱midbṛ̱hat.
gā̱ya̱trī tri̱ṣṭupchandā̍ṃsi̱ sarvā̱ tā ya̱ma āhi̍tā.
aha̍raha̱rnaya̍māno̱ gāmaśva̱ṃ puru̍ṣa̱ṃ jaga̍t.
vaiva̍svato̱ na tṛ̍pyati̱ pañca̍bhi̱rmāna̍vairya̱maḥ.
vaiva̍svate̱ vivi̍cyante̱ yame̱ rāja̍ni te ja̱nāḥ.
ye ce̱ha sa̱tyeneccha̍nte̱ ya u̱ cānṛ̍tavādi̱naḥ.
te rā̍janni̱ha vivi̍cyante̱'thā ya̍nti tvā̱mupa̍.
de̱vāṃśca̱ ye na̍ma̱syanti̱ brāhma̍ṇāṃścāpa̱citya̍ti.
yasmi̍nvṛ̱kṣe su̍palā̱śe de̱vaiḥ sa̱mpiba̍te ya̱maḥ.
atrā̍ no vi̱śpati̍ḥ pi̱tā pu̍rā̱ṇā anu̍venati..13..
Anuvāka 6
vai̱śvā̱na̱re ha̱viri̱daṃ ju̍homi sāha̱sramuthsa̍ṃ śa̱tadhā̍rame̱tam.
tasmi̍nne̱ṣa pi̱tara̍ṃ pitāma̱haṃ prapi̍tāmahaṃ bibhara̱tpinva̍māne.
dra̱phsaśca̍skanda pṛthi̱vīmanu̱ dyāmi̱maṃ ca̱ yoni̱manu̱ yaśca̱ pūrva̍ḥ.
tṛ̱tīya̱ṃ yoni̱manu̍ sa̱ñcara̍ntaṃ dra̱phsaṃ ju̍ho̱myanu̍ sa̱pta hotrā̎ḥ.
i̱maṃ sa̍mu̱draṃ śa̱tadhā̍ra̱muthsa̍ṃvya̱cyamā̍na̱ṃ bhuva̍nasya̱ madhye̎.
ghṛ̱taṃ duhā̍nā̱madi̍ti̱ṃ janā̱yāgne̱ mā hi̍ṃsīḥ para̱me vyo̍man.
ape̍ta̱ vīta̱ vi ca̍ sarpa̱tāto̱ ye'tra̱ stha pu̍rā̱ṇā ye ca̱ nūta̍nāḥ.
aho̍bhira̱dbhira̱ktubhi̱rvya̍ktaṃ ya̱mo da̍dātvava̱sāna̍masmai.
sa̱vi̱taitāni̱ śarī̍rāṇi pṛthi̱vyai mā̱turu̱pastha̱ āda̍dhe.
tebhi̍ryujyantāmaghni̱yāḥ..14..
śu̱naṃ vā̱hāḥ śu̱naṃ nā̱rāḥ śu̱naṃ kṛ̍ṣatu̱ lāṅga̍lam.
śu̱naṃ va̍ra̱trā ba̍dhyantāṃ śu̱namaṣṭrā̱mudi̍ṅgaya̱ śunā̍sīrā śu̱nama̱smāsu̍ dhattam.
śunā̍sīrāvi̱māṃ vāca̱ṃ yaddi̱vi ca̍kra̱thuḥ paya̍ḥ.
tene̱māmupa̍ siñcatam.
sīte̱ vandā̍mahe tvā̱'rvācī̍ subhage bhava.
yathā̍ naḥ su̱bhagā sa̍si̱ yathā̍ naḥ su̱phalā sa̍si.
sa̱vi̱taitāni̱ śarī̍rāṇi pṛthi̱vyai mā̱turu̱pastha̱ āda̍dhe.
tebhi̍radite̱ śaṃ bha̍va.
vimu̍cyadhvamaghni̱yā de̍va̱yānā̱ atā̍riṣma̱ tama̍saspā̱rama̱sya.
jyoti̍rāpāma̱ suva̍raganma..15..
pra vātā̱ vānti̍ pa̱taya̍nti vi̱dyuta̱ udoṣa̍dhīrjihate̱ pinva̍te̱ suva̍ḥ.
irā̱ viśva̍smai̱ bhuva̍nāya jāyate̱ yatpa̱rjanya̍ḥ pṛthi̱vīṃ reta̱sā'va̍ti.
yathā̍ ya̱māya̍ hā̱rmyamava̍pa̱npañca̍ māna̱vāḥ.
e̱vaṃ va̍pāmi hā̱rmyaṃ yathāsā̍ma jīvalo̱ke bhūra̍yaḥ.
cita̍ḥ stha pari̱cita̍ ūrdhva̱cita̍ḥ śrayadhvaṃ pi̱taro̍ de̱vatā̎.
pra̱jāpa̍tirvaḥ sādayatu̱ tayā̍ de̱vata̍yā.
āpyā̍yasva̱ sante̎..16..%
Anuvāka 7
utte̍ tabhnomi pṛthi̱vīṃ tvatparī̱maṃ lo̱kaṃ ni̱dadha̱nmo a̱haṃ ri̍ṣam.
e̱tāṃ sthūṇā̎ṃ pi̱taro̍ dhārayantu̱ te'trā̍ ya̱maḥ sāda̍nātte minotu.
upa̍sarpa mā̱tara̱ṃ bhūmi̍me̱tāmu̍ru̱vyaca̍saṃ pṛthi̱vīṃ su̱śevā̎m.
ūrṇa̍mradā yuva̱tirdakṣi̍ṇāvatye̱ṣā tvā̍ pātu̱ nirṛ̍tyā u̱pasthe̎.
uchma̍ñcasva pṛthivi̱ mā vibā̍dhithāḥ sūpāya̱nāsmai̍ bhava sūpavañca̱nā.
mā̱tā pu̱traṃ yathā̍ si̱cābhye̍naṃ bhūmi vṛṇu.
u̱chmañca̍mānā pṛthi̱vī hi tiṣṭha̍si sa̱hasra̱ṃ mita̱ upa̱ hi śraya̍ntām.
te gṛ̱hāso̍ madhu̱ścuto̱ viśvāhā̎smai śara̱ṇāḥ sa̱ntvatra̍.
eṇī̎rdhā̱nā hari̍ṇī̱rarju̍nīḥ santu dhe̱nava̍ḥ.
tila̍vathsā̱ ūrja̍masmai̱ duhā̍nā̱ viśvāhā̍ sa̱ntvanapa̍sphurantīḥ..17..
e̱ṣā te̍ yama̱sāda̍ne sva̱dhā nidhī̍yate gṛ̱he.
akṣi̍ti̱rnāma̍ te asau.
i̱daṃ pi̱tṛbhya̱ḥ prabha̍rema ba̱rhirde̱vebhyo̱ jīva̍nta̱ utta̍raṃ bharema.
tattva̍māro̱hāso̱ meghyo̱ bhava̍ṃ ya̱mena̱ tvaṃ ya̱myā̍ saṃvidā̱naḥ.
mā tvā̍ vṛ̱kṣau sambā̍dhiṣṭā̱ṃ mā mā̱tā pṛ̍thivi̱ tvam.
pi̱tṝn hi yatra̱ gacchā̱syedhā̍saṃ yama̱rājye̎.
mā tvā̍ vṛ̱kṣau sambā̍dhethā̱ṃ mā mā̱tā pṛ̍thi̱vī ma̱hī.
vai̱va̱sva̱taṃ hi gacchā̍si yama̱rājye̱ virā̍jasi.
na̱l̤aṃ pla̱vamāro̍hai̱taṃ na̱l̤ena̍ pa̱tho'nvi̍hi.
sa tva̍ṃ na̱l̤apla̍vo bhū̱tvā̱ santa̍ra̱ prata̱rotta̍ra..18..
sa̱vi̱taitāni̱ śarī̍rāṇi pṛthi̱vyai mā̱turu̱pastha̱ āda̍dhe.
tebhya̍ḥ pṛthivi̱ śaṃ bha̍va.
ṣaḍḍho̍tā̱ sūrya̍ṃ te̱ cakṣu̍rgacchatu̱ vāta̍mā̱tmā dyāṃ ca̱ gaccha̍ pṛthi̱vīṃ ca̱ dharma̍ṇā.
a̱po vā̍ gaccha̱ yadi̱ tatra̍ te hi̱tamoṣa̍dhīṣu̱ prati̍tiṣṭhā̱ śarī̍raiḥ.
para̍ṃ mṛtyo̱ anu̱pare̍hi̱ panthā̱ṃ yaste̱ sva ita̍ro deva̱yānā̎t.
cakṣu̍ṣmate śṛṇva̱te te̎ bravīmi̱ mā na̍ḥ pra̱jāṃ rī̍riṣo̱ mota vī̱rān.
śaṃ vāta̱ḥ śaṃ hi te̱ ghṛṇi̱ḥ śamu̍ te sa̱ntvoṣa̍dhīḥ.
kalpa̍ntāṃ me̱ diśa̍ḥ śa̱gmāḥ.
pṛ̱thi̱vyāstvā̍ lo̱ke sā̍dayāmya̱muṣya̱ śarmā̍si pi̱taro̍ de̱vatā̎.
pra̱jāpa̍tistvā sādayatu̱ tayā̍ de̱vata̍yā.
a̱ntari̍kṣasya tvā di̱vastvā̍ di̱śāṃ tvā̱ nāka̍sya tvā pṛ̱ṣṭhe bra̱dhnasya̍ tvā vi̱ṣṭape̍ sādayāmya̱muṣya̱ śarmā̍si pi̱taro̍ de̱vatā̎.
pra̱jāpa̍tistvā sādayatu̱ tayā̍ de̱vata̍yā..19..
a̱pū̱pavā̎nghṛ̱tavā̍ṃśca̱rureha sī̍datūttabhnu̱van pṛ̍thi̱vīṃ dyāmu̱topari̍.
yo̱ni̱kṛta̍ḥ pathi̱kṛta̍ḥ saparyata̱ ye de̱vānā̎ṃ ghṛ̱tabhā̍gā i̱ha stha.
e̱ṣā te̍ yama̱sāda̍ne sva̱dhā nidhī̍yate gṛ̱he̍'sau.
daśā̎kṣarā̱ tāṃ ra̍kṣasva̱ tāṃ go̍pāyasva̱ tāṃ te̱ pari̍dadāmi̱ tasyā̎ṃ tvā̱ mā da̍bhanpi̱taro̍ de̱vatā̎.
pra̱jāpa̍tistvā sādayatu̱ tayā̍ de̱vata̍yā.
a̱pū̱pavā̎ñchṛ̱tavā̎n kṣī̱ravā̱ndadhi̍vā̱nmadhu̍māṃśca̱rureha sī̍datūttabhnu̱van pṛ̍thi̱vīṃ dyāmu̱topari̍.
yo̱ni̱kṛta̍ḥ pathi̱kṛta̍ḥ saparyata̱ ye de̱vānā̍ṃ śṛ̱tabhā̍gāḥ kṣī̱rabhā̍gā̱ dadhi̍bhāgā̱ madhu̍bhāgā i̱ha stha.
e̱ṣā te̍ yama̱sāda̍ne sva̱dhā nidhī̍yate gṛ̱he̍'sau.
śa̱tākṣa̍rā sa̱hasrā̎kṣarā̱'yutā̎kṣa̱rā'cyu̍tākṣarā̱ tāṃ ra̍kṣasva̱ tāṃ go̍pāyasva̱ tāṃ te̱ pari̍dadāmi̱ tasyā̎ṃ tvā̱ mā da̍bhanpi̱taro̍ de̱vatā̎.
pra̱jāpa̍tistvā sādayatu̱ tayā̍ de̱vata̍yā..20..
Anuvāka 8
e̱tāste̎ sva̱dhā a̱mṛtā̎ḥ karomi̱ yāste̍ dhā̱nāḥ pa̍ri̱kirā̱myatra̍.
tāste̍ ya̱maḥ pi̱tṛbhi̍ḥ saṃvidā̱no'tra̍ dhe̱nūḥ kā̍ma̱dughā̎ḥ karotu.
tvāmarju̱nauṣa̍dhīnā̱ṃ payo̎ bra̱hmāṇa̱ idvi̍duḥ.
tāsā̎ṃ tvā̱ madhyā̱dāda̍de ca̱rubhyo̱ api̍dhātave.
dū̱rvāṇā̍ṃ sta̱mbamāha̍rai̱tāṃ pri̱yata̍mā̱ṃ mama̍.
i̱māṃ diśa̍ṃ manu̱ṣyā̍ṇā̱ṃ bhūyi̱ṣṭhānu̱ vi ro̍hatu.
kāśā̍nāṃ sta̱mbamāha̍ra̱ rakṣa̍sā̱mapa̍hatyai.
ya e̱tasyai̍ di̱śaḥ pa̱rābha̍vannaghā̱yavo̱ yathā̱ tenābha̍vā̱npuna̍ḥ.
da̱rbhāṇā̍ṃ sta̱mbamāha̍ra pitṛ̱ṇāmoṣa̍dhīṃ pri̱yām.
anvasyai̱ mūla̍ṃ jīvā̱danu̱ kāṇḍa̱matho̱ phalam̎..21..
lo̱kaṃ pṛ̍ṇa̱ tā a̍sya̱ sūda̍dohasaḥ.
śaṃ vāta̱ḥ śaṃ hi te̱ ghṛṇi̱ḥ śamu̍ te sa̱ntvoṣa̍dhīḥ.
kalpantāṃ te̱ diśa̱ḥ sarvā̎ḥ.
i̱dame̱va meto'pa̍rā̱mārti̍mārāma̱ kāñca̱na.
tathā̱ tada̱śvibhyā̎ṃ kṛ̱taṃ mi̱treṇa̱ varu̍ṇena ca.
va̱ra̱ṇo vā̍rayādi̱daṃ de̱vo vana̱spati̍ḥ.
ārtyai̱ nirṛ̍tyai̱ dveṣā̎cca̱ vana̱spati̍ḥ.
vidhṛ̍tirasi̱ vidhā̍rayā̱smada̱ghā dveṣā̍ṃsi śa̱mi śa̱mayā̱smada̱ghā dveṣā̍ṃsi ya̱va ya̱vayā̱smada̱ghā dveṣā̍ṃsi.
pṛ̱thi̱vīṃ ga̍cchā̱ntari̍kṣaṃ gaccha̱ diva̍ṃ gaccha̱ diśo̍ gaccha̱ suva̍rgaccha̱ suva̍rgaccha̱ diśo̍ gaccha̱ diva̍ṃ gacchā̱ntari̍kṣaṃ gaccha pṛthi̱vīṃ ga̍cchā̱''po vā̍ gaccha̱ yadi̱ tatra̍ te hi̱tamoṣa̍dhīṣu̱ prati̍tiṣṭhā̱ śarī̍raiḥ.
aśma̍nvatī revatī̱ryadvai de̱vasya̍ savi̱tuḥ pa̱vitra̱ṃ yā rā̱ṣṭrātpa̱nnādudva̱yaṃ tama̍sa̱spari̍ dhā̱tā pu̍nātu..22..
Anuvāka 9
ā ro̍ha̱tā''yu̍rja̱rasa̍ṃ gṛṇā̱nā a̍nupū̱rvaṃ yata̍mānā̱ yati̱ṣṭa.
i̱ha tvaṣṭā̍ su̱jani̍mā su̱ratno̍ dī̱rghamāyu̍ḥ karatu jī̱vase̍ vaḥ.
yathā'hā̎nyanupū̱rvaṃ bhava̍nti̱ yatha̱rtava̍ ṛ̱tubhi̱ryanti̍ kḷ̱ptāḥ.
yathā̱ na pūrva̱mapa̍ro̱ jahā̎tye̱vā dhā̍ta̱rāyū̍ṃṣi kalpayaiṣām.
na hi̍ te agne ta̱nuvai̎ krū̱raṃ ca̱kāra̱ martya̍ḥ.
ka̱pirba̍bhasti̱ teja̍na̱ṃ puna̍rja̱rāyu̱ gauri̍va.
apa̍ na̱ḥ śośu̍cada̱ghamagne̍ śuśu̱dhyā ra̱yim.
apa̍ na̱ḥ śośu̍cada̱ghaṃ mṛ̱tyave̱ svāhā̎.
a̱na̱ḍvāha̍ma̱nvāra̍bhāmahe sva̱staye̎.
sa na̱ indra̍ iva de̱vebhyo̱ vahni̍ḥ sa̱mpāra̍ṇo bhava..23..
i̱me jī̱vā vi̍ mṛ̱tairāva̍varti̱nnabhū̎dbha̱drā de̱vahū̍tiṃ no a̱dya.
prāñjo̍gāmānṛ̱taye̱ hasā̍ya̱ drāghī̍ya̱ āyu̍ḥ prata̱rāṃ dadhā̍nāḥ.
mṛ̱tyoḥ pa̱daṃ yo̱paya̍nto̱ yadaima̱ drāghī̍ya̱ āyu̍ḥ prata̱rāṃ dadhā̍nāḥ.
ā̱pyāya̍mānāḥ pra̱jayā̱ dhane̍na śu̱ddhāḥ pū̱tā bha̍vatha yajñiyāsaḥ.
i̱maṃ jī̱vebhya̍ḥ pari̱dhiṃ da̍dhāmi̱ mā no'nu̍gā̱dapa̍ro̱ ardha̍me̱tam.
śa̱taṃ jī̍vantu śa̱rada̍ḥ purū̱cīsti̱ro mṛ̱tyuṃ da̍dmahe̱ parva̍tena.
i̱mā nārī̍ravidha̱vāḥ su̱patnī̱rāñja̍nena sa̱rpiṣā̱ sammṛ̍śantām.
a̱na̱śravo̍ anamī̱vāḥ su̱śevā̱ āro̍hantu̱ jana̍yo̱ yoni̱magre̎.
yadāñja̍naṃ traikaku̱daṃ jā̱taṃ hi̱mava̍ta̱spari̍.
tenā̱mṛta̍sya̱ mūle̱nārā̍tīrjambhayāmasi.
yathā̱ tvamu̍dbhi̱nathsyo̍ṣadhe pṛthi̱vyā adhi̍.
e̱vami̱ma udbhi̍ndantu kī̱rtyā yaśa̍sā brahmavarca̱sena̍.
अ॒जो᳚ऽस्यजा॒स्मद॒घा द्वेषाꣳ॑सि य॒वो॑ऽसि य॒वया॒स्मद॒घा द्वेषाꣳ॑सि॥२४॥
Anuvāka 10
अप॑ नः॒ शोशु॑चद॒घमग्ने॑ शुशु॒ध्या र॒यिम्।
अप॑ नः॒ शोशु॑चद॒घम्।
सु॒क्षे॒त्रि॒या सु॑गातु॒या व॑सू॒या च॑ यजामहे।
अप॑ नः॒ शोशु॑चद॒घम्।
प्रयद्भन्दि॑ष्ठ एषां॒ प्रास्माका॑सश्च सू॒रयः॑।
अप॑ नः॒ शोशु॑चद॒घम्।
प्रयद॒ग्नेः सह॑स्वतो वि॒श्वतो॒ यन्ति॑ सू॒रयः॑।
अप॑ नः॒ शोशु॑चद॒घम्।
प्रयत्ते॑ अग्ने सू॒रयो॒ जाये॑महि॒ प्र ते॑ व॒यम्।
अप॑ नः॒ शोशु॑चद॒घम्॥२५॥
त्वꣳ हि वि॑श्वतोमुख वि॒श्वतः॑ परि॒भूरसि॑।
अप॑ नः॒ शोशु॑चद॒घम्।
द्विषो॑ नो विश्वतोमु॒खाऽति॑ ना॒वेव॑ पारय।
अप॑ नः॒ शोशु॑चद॒घम्।
स नः॒ सिन्धु॑मिव ना॒वयाति॑ पर्षा स्व॒स्तये᳚।
अप॑ नः॒ शोशु॑चद॒घम्।
आपः॑ प्रव॒णादि॑व य॒तीरपा॒स्मथ्स्य॑न्दताम॒घम्।
अप॑ नः॒ शोशु॑चद॒घम्।
उ॒द्व॒नादु॑द॒कानी॒वापा॒स्मथ्स्य॑न्दताम॒घम्।
apa̍ na̱ḥ śośu̍cada̱gham.
ā̱na̱ndāya̍ pramo̱dāya̱ puna̱rāgā̱ṃ svāngṛ̱hān.
apa̍ na̱ḥ śośu̍cada̱gham.
na vai tatra̱ pramī̍yate̱ gauraśva̱ḥ puru̍ṣaḥ pa̱śuḥ.
yatre̱daṃ brahma̍ kri̱yate̍ pari̱dhirjīva̍nāya̱kamapa̍ na̱ḥ śośu̍cada̱gham..26..
Anuvāka 11
apa̍śyāma yuva̱timā̱cara̍ntīṃ mṛ̱tāya̍ jī̱vāṃ pa̍riṇī̱yamā̍nām.
a̱ndhena̱ yā tama̍sā̱ prāvṛ̍tā'si̱ prācī̱mavā̍cī̱mava̱yannari̍ṣṭyai.
mayai̱tāṃ mā̱ṃstāṃ bhri̱yamā̍ṇā de̱vī sa̱tī pi̍tṛlo̱kaṃ yadaiṣi̍.
vi̱śvavā̍rā̱ nabha̍sā̱ saṃvya̍yantyu̱bhau no̍ lo̱kau paya̱sā''vṛ̍ṇīhi.
rayi̍ṣṭhāma̱gniṃ madhu̍mantamū̱rmiṇa̱mūrja̍ḥ santaṃ tvā̱ paya̱sopa̱ saṃsa̍dema.
saṃ ra̱yyā samu̱ varca̍sā̱ saca̍svā naḥ sva̱staye̎.
ye jī̱vā ye ca̍ mṛ̱tā ye jā̱tā ye ca̱ jantyā̎ḥ.
tebhyo̍ ghṛ̱tasya̍ dhārayitu̱ṃ madhu̍dhārā vyunda̱tī.
mā̱tā ru̱drāṇā̎ṃ duhi̱tā vasū̍nā̱ṃ svasā̍''di̱tyānā̍ma̱mṛta̍sya̱ nābhi̍ḥ.
praṇu̱voca̍ṃ ciki̱tuṣe̱ janā̍ya̱ māgāmanā̍gā̱madi̍tiṃ vadhiṣṭa.
piba̍tūda̱kaṃ tṛṇā̎nyattu.
omuthsṛ̱jata..27..
santvā̍ siñcāmi̱ yajuṣā̍ pra̱jāmāyu̱rdhana̍ṃ ca.. oṃ śānti̱ḥ śānti̱ḥ śānti̍ḥ..
su̱ma̱ṅga̱līri̱yaṃ va̱dhūri̱māṃ sa̍meta̱ paśya̍ta.
saubhā̎gyama̱syai da̱ttvāyāthāsta̱ṃ vi pare̍tana.
i̱māṃ tvami̍ndra mīḍhvaḥ supu̱trāṃ su̱bhagā̎ṃ kuru.
daśā̎syāṃ pu̱trānā dhe̍hi̱ pati̍mekāda̱śaṃ kṛ̍dhi.. ā̱vaha̍ntī vitanvā̱nā.
ku̱rvā̱ṇā cīra̍mā̱tmana̍ḥ.
vāsā̍ṃsi̱ mama̱ gāva̍śca.
a̱nna̱pā̱ne ca̍ sarva̱dā.
tato̍ me̱ śriya̱māva̍ha.
oṃ śānti̱ḥ śānti̱ḥ śānti̍ḥ..