Anuvāka 1
oṃ taccha̱ṃ yorāvṛ̍ṇīmahe.
gā̱tuṃ ya̱jñāya̍.
gā̱tuṃ ya̱jñapa̍taye.
daivī̎ sva̱stira̍stu naḥ.
sva̱stirmānu̍ṣebhyaḥ.
ū̱rdhvaṃ ji̍gātu bheṣa̱jam.
śaṃ no̍ astu dvi̱pade̎.
śaṃ catu̍ṣpade.
oṃ śānti̱ḥ śānti̱ḥ śānti̍ḥ..
citti̱ḥ sruk.
ci̱ttamājyam̎.
vāgvedi̍ḥ.
ādhī̍taṃ ba̱ṟhiḥ.
keto̍ a̱gniḥ.
vijñā̍tama̱gniḥ.
vākpa̍ti̱rhotā̎.
mana̍ upava̱ktā.
prā̱ṇo ha̱viḥ.
sāmā̎dhva̱ryuḥ.
vāca̍spate vidhe nāman.
vi̱dhema̍ te̱ nāma̍.
vi̱dhestvama̱smāka̱ṃ nāma̍.
vā̱caspati̱ḥ soma̍ṃ pibatu.
ā'smāsu̍ nṛ̱mṇandhā̱thsvāhā̎..1..
Anuvāka 2
pṛ̱thi̱vī hotā̎.
dyaura̍dhva̱ryuḥ.
ru̱dro̎'gnīt.
bṛha̱spati̍rupava̱ktā.
vāca̍spate vā̱co vī̱rye̍ṇa.
sambhṛ̍tatame̱nāya̍kṣyase.
yaja̍mānāya̱ vāryam̎.
āsuva̱skara̍smai.
vā̱caspati̱ḥ soma̍ṃ pibatu.
ja̱jana̱dindra̍mindri̱yāya̱ svāhā̎..2..%
Anuvāka 3
a̱gnirhotā̎.
a̱śvinā̎'dhva̱ryū.
tvaṣṭā̱'gnīt.
mi̱tra u̍pava̱ktā.
soma̱ḥ soma̍sya puro̱gāḥ.
śu̱kraḥ śu̱krasya̍ puro̱gāḥ.
śrā̱tāsta̍ indra̱ somā̎ḥ.
vātā̍perhavana̱śruta̱ḥ svāhā̎..3..%
Anuvāka 4
sūrya̍ṃ te̱ cakṣu̍ḥ.
vāta̍ṃ prā̱ṇaḥ.
dyāṃ pṛ̱ṣṭham.
a̱ntari̍kṣamā̱tmā.
aṅgai̎rya̱jñam.
pṛ̱thi̱vīṃ śarī̍raiḥ.
vāca̍spa̱te'cchi̍drayā vā̱cā.
acchi̍drayā ju̱hvā̎.
di̱vi de̍vā̱vṛdha̱ṃ hotrā̱ mera̍yasva̱ svāhā̎..4..%
Anuvāka 5
ma̱hāha̍vi̱rhotā̎.
sa̱tyaha̍viradhva̱ryuḥ.
acyu̍tapājā a̱gnīt.
acyu̍tamanā upava̱ktā.
a̱nā̱dhṛ̱ṣyaścā̎pratidhṛ̱ṣyaśca̍ ya̱jñasyā̍bhiga̱rau.
a̱yāsya̍ udgā̱tā.
vāca̍spate hṛdvidhe nāman.
vi̱dhema̍ te̱ nāma̍.
vi̱dhestvama̱smāka̱ṃ nāma̍.
vā̱caspati̱ḥ soma̍mapāt.
mā daivya̱stantu̱śchedi̱ mā ma̍nu̱ṣya̍ḥ.
namo̍ di̱ve.
nama̍ḥ pṛthi̱vyai svāhā̎..5..%
Anuvāka 6
vāgghotā̎.
dī̱kṣā patnī̎.
vāto̎'dhva̱ryuḥ.
āpo̍'bhiga̱raḥ.
mano̍ ha̱viḥ.
tapa̍si juhomi.
bhūrbhuva̱ḥ suva̍ḥ.
brahma̍ svaya̱mbhu.
brahma̍ṇe svaya̱mbhuve̱ svāhā̎..6..
Anuvāka 7
brā̱hma̱ṇa eka̍hotā.
sa ya̱jñaḥ.
sa me̍ dadātu pra̱jāṃ pa̱śūnpuṣṭi̱ṃ yaśa̍ḥ.
ya̱jñaśca̍ me bhūyāt.
a̱gnirdviho̍tā.
sa bha̱rtā.
sa me̍ dadātu pra̱jāṃ pa̱śūnpuṣṭi̱ṃ yaśa̍ḥ.
bha̱rtā ca̍ me bhūyāt.
pṛ̱thi̱vī triho̍tā.
sa pra̍ti̱ṣṭhā..7..
sa me̍ dadātu pra̱jāṃ pa̱śūnpuṣṭi̱ṃ yaśa̍ḥ.
pra̱ti̱ṣṭhā ca̍ me bhūyāt.
a̱ntari̍kṣa̱ṃ catu̍rhotā.
sa vi̱ṣṭhāḥ.
sa me̍ dadātu pra̱jāṃ pa̱śūnpuṣṭi̱ṃ yaśa̍ḥ.
vi̱ṣṭhāśca̍ me bhūyāt.
vā̱yuḥ pañca̍hotā.
sa prā̱ṇaḥ.
sa me̍ dadātu pra̱jāṃ pa̱śūnpuṣṭi̱ṃ yaśa̍ḥ.
prā̱ṇaśca̍ me bhūyāt..8..
ca̱ndramā̱ḥ ṣaḍḍho̍tā.
sa ṛ̱tūnka̍lpayāti.
sa me̍ dadātu pra̱jāṃ pa̱śūnpuṣṭi̱ṃ yaśa̍ḥ.
ṛ̱tava̍śca me kalpantām.
anna̍ṃ sa̱ptaho̍tā.
sa prā̱ṇasya̍ prā̱ṇaḥ.
sa me̍ dadātu pra̱jāṃ pa̱śūnpuṣṭi̱ṃ yaśa̍ḥ.
prā̱ṇasya̍ ca me prā̱ṇo bhū̍yāt.
dyaura̱ṣṭaho̍tā.
so̍'nādhṛ̱ṣyaḥ..9..
sa me̍ dadātu pra̱jāṃ pa̱śūnpuṣṭi̱ṃ yaśa̍ḥ.
a̱nā̱dhṛ̱ṣyaśca̍ bhūyāsam.
ā̱di̱tyo nava̍hotā.
sa te̍ja̱svī.
sa me̍ dadātu pra̱jāṃ pa̱śūnpuṣṭi̱ṃ yaśa̍ḥ.
te̱ja̱svī ca̍ bhūyāsam.
pra̱jāpa̍ti̱rdaśa̍hotā.
sa i̱daṃ sarvam̎.
sa me̍ dadātu pra̱jāṃ pa̱śūnpuṣṭi̱ṃ yaśa̍ḥ.
sarva̍ṃ ca me bhūyāt..10..
Anuvāka 8
a̱gniryaju̍rbhiḥ.
sa̱vi̱tā stomai̎ḥ.
indra̍ ukthāma̱daiḥ.
mi̱trāvaru̍ṇāvā̱śiṣā̎.
aṅgi̍raso̱ dhiṣṇi̍yaira̱gnibhi̍ḥ.
ma̱ruta̍ḥ sadohavirdhā̱nābhyā̎m.
āpa̱ḥ prokṣa̍ṇībhiḥ.
oṣa̍dhayo ba̱ṟhiṣā̎.
adi̍ti̱rvedyā̎.
somo̍ dī̱kṣayā̎..11..
tvaṣṭe̱dhmena̍.
viṣṇu̍rya̱jñena̍.
vasa̍va̱ ājye̍na.
ā̱di̱tyā dakṣi̍ṇābhiḥ.
viśve̍ de̱vā ū̱rjā.
pū̱ṣā sva̍gākā̱reṇa̍.
bṛha̱spati̍ḥ puro̱dhayā̎.
pra̱jāpa̍tirudgī̱thena̍.
a̱ntari̍kṣaṃ pa̱vitre̍ṇa.
vā̱yuḥ pātrai̎ḥ.
a̱haṃ śra̱ddhayā̎..12..
Anuvāka 9
senendra̍sya.
dhenā̱ bṛha̱spate̎ḥ.
pa̱tthyā̍ pū̱ṣṇaḥ.
vāgvā̱yoḥ.
dī̱kṣā soma̍sya.
pṛ̱thi̱vya̍gneḥ.
vasū̍nāṃ gāya̱trī.
ru̱drāṇā̎ṃ tri̱ṣṭuk.
ā̱di̱tyānā̱ṃ jaga̍tī.
viṣṇo̍ranu̱ṣṭuk..13..%
varu̍ṇasya vi̱rāṭ.
ya̱jñasya̍ pa̱ṅktiḥ.
pra̱jāpa̍te̱ranu̍matiḥ.
mi̱trasya̍ śra̱ddhā.
sa̱vi̱tuḥ prasū̍tiḥ.
sūrya̍sya̱ marī̍ciḥ.
ca̱ndrama̍so rohi̱ṇī.
ṛṣī̍ṇāmarundha̱tī.
pa̱rjanya̍sya vi̱dyut.
cata̍sro̱ diśa̍ḥ.
cata̍sro'vāntaradi̱śāḥ.
aha̍śca̱ rātri̍śca.
kṛ̱ṣiśca̱ vṛṣṭi̍śca.
tviṣi̱ścāpa̍citiśca.
āpa̱ścauṣa̍dhayaśca.
ūrkca̍ sū̱nṛtā̍ ca de̱vānā̱ṃ patna̍yaḥ..14..%
Anuvāka 10
de̱vasya̍ tvā savi̱tuḥ pra̍sa̱ve.
a̱śvino̎rbā̱hubhyā̎m.
pū̱ṣṇo hastā̎bhyā̱ṃ prati̍gṛhṇāmi.
rājā̎ tvā̱ varu̍ṇo nayatu devi dakṣiṇe̱'gnaye̱ hira̍ṇyam.
tenā̍mṛta̱tvama̍śyām.
vayo̍ dā̱tre.
mayo̱ mahya̍mastu pratigrahī̱tre.
ka i̱daṃ kasmā̍ adāt.
kāma̱ḥ kāmā̍ya.
kāmo̍ dā̱tā..15..
kāma̍ḥ pratigrahī̱tā.
kāma̍ṃ samu̱dramāvi̍śa.
kāme̍na tvā̱ prati̍gṛhṇāmi.
kāmai̱tatte̎.
e̱ṣā te̍ kāma̱ dakṣi̍ṇā.
u̱ttā̱nastvā̎ṅgīra̱saḥ prati̍gṛhṇātu.
somā̍ya̱ vāsa̍ḥ.
ru̱drāya̱ gām.
varu̍ṇā̱yāśvam̎.
pra̱jāpa̍taye̱ puru̍ṣam..16..%
mana̍ve̱ talpam̎.
tvaṣṭre̱'jām.
pū̱ṣṇe'vim̎.
nirṛ̍tyā aśvataragarda̱bhau.
hi̱mava̍to ha̱stinam̎.
ga̱ndha̱rvā̱phsa̱rābhya̍ḥ sragalaṃ kara̱ṇe.
viśve̎bhyo de̱vebhyo̍ dhā̱nyam.
vā̱ce'nnam̎.
brahma̍ṇa oda̱nam.
sa̱mu̱drāyā''pa̍ḥ..17..
u̱ttā̱nāyā̎ṅgīra̱sāyāna̍ḥ.
vai̱śvā̱na̱rāya̱ ratham̎.
vai̱śvā̱na̱raḥ pra̱tnathā̱ nāka̱māru̍hat.
di̱vaḥ pṛ̱ṣṭhaṃ bhanda̍mānaḥ su̱manma̍bhiḥ.
sa pū̎rva̱vajja̱naya̍jja̱ntave̱ dhanam̎.
sa̱mā̱nama̍jmā̱ pari̍yāti̱ jāgṛ̍viḥ.
rājā̎ tvā̱ varu̍ṇo nayatu devi dakṣiṇe vaiśvāna̱rāya̱ ratham̎.
tenā̍mṛta̱tvama̍śyām.
vayo̍ dā̱tre.
mayo̱ mahya̍mastu pratigrahī̱tre..18..
ka i̱daṃ kasmā̍ adāt.
kāma̱ḥ kāmā̍ya.
kāmo̍ dā̱tā.
kāma̍ḥ pratigrahī̱tā.
kāma̍ṃ samu̱dramā vi̍śa.
kāme̍na tvā̱ prati̍gṛhṇāmi.
kāmai̱tatte̎.
e̱ṣā te̍ kāma̱ dakṣi̍ṇā.
u̱ttā̱nastvā̎ṅgīra̱saḥ prati̍gṛhṇātu..19..
Anuvāka 11
su̱varṇa̍ṃ gha̱rmaṃ pari̍veda ve̱nam.
indra̍syā̱''tmāna̍ṃ daśa̱dhā cara̍ntam.
a̱ntaḥ sa̍mu̱dre mana̍sā̱ cara̍ntam.
brahmānva̍vinda̱ddaśa̍hotāra̱marṇe̎.
a̱ntaḥ pravi̍ṣṭaḥ śā̱stā janā̍nām.
eka̱ḥ sanba̍hu̱dhā vi̍cāraḥ.
śa̱taṃ śu̱krāṇi̱ yatraika̱ṃ bhava̍nti.
sarve̱ vedā̱ yatraika̱ṃ bhava̍nti.
sarve̱ hotā̍ro̱ yatraika̱ṃ bhava̍nti.
sa̱māna̍sīna ā̱tmā janā̍nām..20..%
a̱ntaḥ pravi̍ṣṭaḥ śā̱stā janā̍nā̱ṃ sarvā̎tmā.
sarvā̎ḥ pra̱jā yatraika̱ṃ bhava̍nti.
catu̍rhotāro̱ yatra̍ sa̱mpada̱ṃ gaccha̍nti de̱vaiḥ.
sa̱māna̍sīna ā̱tmā janā̍nām.
brahmendra̍ma̱gniṃ jaga̍taḥ prati̱ṣṭhām.
di̱va ā̱tmāna̍ṃ savi̱tāra̱ṃ bṛha̱spatim̎.
catu̍rhotāraṃ pra̱diśo'nu̍ kḷ̱ptam.
vā̱co vī̱rya̍ṃ tapa̱sā'nva̍vindat.
a̱ntaḥ pravi̍ṣṭaṃ ka̱rtāra̍me̱tam.
tvaṣṭā̍raṃ rū̱pāṇi̍ viku̱rvanta̍ṃ vipa̱ścim..21..
a̱mṛta̍sya prā̱ṇaṃ ya̱jñame̱tam.
catu̍rhotṛṇāmā̱tmāna̍ṃ ka̱vayo̱ nici̍kyuḥ.
a̱ntaḥ pravi̍ṣṭaṃ ka̱rtāra̍me̱tam.
de̱vānā̱ṃ bandhu̱ nihi̍ta̱ṃ guhā̍su.
a̱mṛte̍na kḷ̱ptaṃ ya̱jñame̱tam.
catu̍rhotṛṇāmā̱tmāna̍ṃ ka̱vayo̱ nici̍kyuḥ.
śa̱taṃ ni̱yuta̱ḥ pari̍veda̱ viśvā̍ vi̱śvavā̍raḥ.
viśva̍mi̱daṃ vṛ̍ṇāti.
indra̍syā̱''tmā nihi̍ta̱ḥ pañca̍hotā.
a̱mṛta̍ṃ de̱vānā̱māyu̍ḥ pra̱jānā̎m..22..%
indra̱ṃ rājā̍naṃ savi̱tāra̍me̱tam.
vā̱yorā̱tmāna̍ṃ ka̱vayo̱ nici̍kyuḥ.
ra̱śmiṃ ra̍śmī̱nāṃ madhye̱ tapa̍ntam.
ṛ̱tasya̍ pa̱de ka̱vayo̱ nipā̎nti.
ya ā̎ṇḍako̱śe bhuva̍naṃ bi̱bharti̍.
ani̍rbhiṇṇa̱ḥ sannatha̍ lo̱kān vi̱caṣṭe̎.
yasyā̎''ṇḍako̱śaṃ śuṣma̍mā̱huḥ prā̱ṇamulbam̎.
tena̍ kḷ̱pto̍'mṛte̍nā̱hama̍smi.
su̱varṇa̱ṃ kośa̱ṃ raja̍sā̱ parī̍vṛtam.
de̱vānā̎ṃ vasu̱dhānī̎ṃ vi̱rājam̎..23..%
a̱mṛta̍sya pū̱rṇāntāmu̍ ka̱lāṃ vica̍kṣate.
pāda̱ṃ ṣaḍḍho̍tu̱rna kilā̍vivithse.
yena̱rtava̍ḥ pañca̱dhota kḷ̱ptāḥ.
u̱ta vā̍ ṣa̱ḍdhā mana̱sota kḷ̱ptāḥ.
taṃ ṣaḍḍho̍tāramṛ̱tubhi̱ḥ kalpa̍mānam.
ṛ̱tasya̍ pa̱de ka̱vayo̱ nipā̎nti.
a̱ntaḥ pravi̍ṣṭaṃ ka̱rtāra̍me̱tam.
a̱ntaśca̱ndrama̍si̱ mana̍sā̱ cara̍ntam.
sa̱haiva santa̱ṃ na vijā̍nanti de̱vāḥ.
indra̍syā̱'̱'̱tmāna̍ṃ śata̱dhā cara̍ntam..24..%
indro̱ rājā̱ jaga̍to̱ ya īśe̎.
sa̱ptaho̍tā sapta̱dhā vikḷ̍ptaḥ.
pare̍ṇa̱ tantu̍ṃ pariṣi̱cyamā̍nam.
a̱ntarā̍di̱tye mana̍sā̱ cara̍ntam.
de̱vānā̱ṃ hṛda̍ya̱ṃ brahmānva̍vindat.
brahmai̱tadbrahma̍ṇa̱ ujja̍bhāra.
a̱rkaṃ ścota̍ntaṃ sari̱rasya̱ madhye̎.
ā yasmi̎nthsa̱pta pera̍vaḥ.
meha̍nti bahu̱lāṃ śriyam̎.
ba̱hva̱śvāmi̍ndra̱ goma̍tīm..25..%
acyu̍tāṃ bahu̱lāṃ śriyam̎.
sa hari̍rvasu̱vitta̍maḥ.
pe̱rurindrā̍ya pinvate.
ba̱hva̱śvāmi̍ndra̱ goma̍tīm.
acyu̍tāṃ bahu̱lāṃ śriyam̎.
mahya̱mindro̱ niya̍cchatu.
śa̱taṃ śa̱tā a̍sya yu̱ktā harī̍ṇām.
a̱rvāṅā yā̍tu̱ vasu̍bhī ra̱śmirindra̍ḥ.
pramaṃha̍māṇo bahu̱lāṃ śriyam̎.
ra̱śmirindra̍ḥ savi̱tā me̱ niya̍cchatu..26..%
ghṛ̱taṃ tejo̱ madhu̍madindri̱yam.
mayya̱yama̱gnirda̍dhātu.
hari̍ḥ pata̱ṅgaḥ pa̍ṭa̱rī su̍pa̱rṇaḥ.
di̱vi̱kṣayo̱ nabha̍sā̱ ya eti̍.
sa na̱ indra̍ḥ kāmava̱raṃ da̍dātu.
pañcā̍raṃ ca̱kraṃ pari̍vartate pṛ̱thu.
hira̍ṇyajyotiḥ sari̱rasya̱ madhye̎.
aja̍sra̱ṃ jyoti̱rnabha̍sā̱ sarpa̍deti.
sa na̱ indra̍ḥ kāmava̱raṃ da̍dātu.
sa̱pta yu̍ñjanti̱ ratha̱meka̍cakram..27..%
eko̱ aśvo̍ vahati saptanā̱mā.
tri̱nābhi̍ ca̱krama̱jara̱mana̍rvam.
yene̱mā viśvā̱ bhuva̍nāni tasthuḥ.
bha̱draṃ paśya̍nta̱ upa̍sedu̱ragre̎.
तपो॑ दी॒क्षामृष॑यः सुव॒र्विदः॑।
ततः॑ क्ष॒त्रं बल॒मोज॑श्च जा॒तम्।
तद॒स्मै दे॒वा अ॒भि सन्न॑मन्तु।
श्वे॒तꣳ र॒श्मिं बो॑भु॒ज्यमा॑नम्।
अ॒पां ने॒तारं॒ भुव॑नस्य गो॒पाम्।
इन्द्रं॒ निचि॑क्युः पर॒मे व्यो॑मन्॥२८॥
रोहि॑णीः पिङ्ग॒ला एक॑रूपाः।
क्षर॑न्तीः पिङ्ग॒ला एक॑रूपाः।
श॒तꣳ स॒हस्रा॑णि प्र॒युता॑नि॒ नाव्या॑नाम्।
अ॒यं यः श्वे॒तो र॒श्मिः।
परि॒ सर्व॑मि॒दं जग॑त्।
प्र॒जां प॒शून्धना॑नि।
अ॒स्माकं॑ ददातु।
श्वे॒तो र॒श्मिः परि॒ सर्वं॑ बभूव।
सुव॒न्मह्यं॑ प॒शून् वि॒श्वरू॑पान्।
प॒त॒ङ्गम॒क्तमसु॑रस्य मा॒यया᳚॥२९॥%
हृ॒दा प॑श्यन्ति॒ मन॑सा मनी॒षिणः॑।
स॒मु॒द्रे अ॒न्तः क॒वयो॒ विच॑क्षते।
मरी॑चीनां प॒दमि॑च्छन्ति वे॒धसः॑।
प॒त॒ङ्गो वाचं॒ मन॑सा बिभर्ति।
तां ग॑न्ध॒र्वो॑ऽवद॒द्गर्भे॑ अ॒न्तः।
तां द्योत॑मानाꣴ स्व॒र्यं॑ मनी॒षाम्।
ऋ॒तस्य॑ प॒दे क॒वयो॒ निपा᳚न्ति।
ये ग्रा॒म्याः प॒शवो॑ वि॒श्वरू॑पाः।
विरू॑पाः॒ सन्तो॑ बहु॒धैक॑रूपाः।
अ॒ग्निस्ताꣳ अग्रे॒ प्रमु॑मोक्तु दे॒वः॥३०॥
प्र॒जाप॑तिः प्र॒जया॑ संविदा॒नः।
वी॒तꣴ स्तु॑केस्तुके।
यु॒वम॒स्मासु॒ निय॑च्छतम्।
प्र प्र॑ य॒ज्ञप॑तिन्तिर।
ये ग्रा॒म्याः प॒शवो॑ वि॒श्वरू॑पाः।
विरू॑पाः॒ सन्तो॑ बहु॒धैक॑रूपाः।
तेषाꣳ॑ सप्ता॒नामि॒ह रन्ति॑रस्तु।
रा॒यस्पोषा॑य सुप्रजा॒स्त्वाय॑ सु॒वीर्या॑य।
य आ॑र॒ण्याः प॒शवो॑ वि॒श्वरू॑पाः।
विरू॑पाः॒ सन्तो॑ बहु॒धैक॑रूपाः।
वा॒युस्ताꣳ अग्रे॒ प्रमु॑मोक्तु दे॒वः।
प्र॒जाप॑तिः प्र॒जया॑ संविदा॒नः।
इडा॑यै सृ॒प्तं घृ॒तव॑च्चराच॒रम्।
दे॒वा अन्व॑विन्द॒न्गुहा॑ हि॒तम्।
य आ॑र॒ण्याः प॒शवो॑ वि॒श्वरू॑पाः।
विरू॑पाः॒ सन्तो॑ बहु॒धैक॑रूपाः।
तेषाꣳ॑ सप्ता॒नामि॒ह रन्ति॑रस्तु।
रा॒यस्पोषा॑य सुप्रजा॒स्त्वाय॑ सु॒वीर्या॑य॥३१॥
Anuvāka 12
स॒हस्र॑शीर्षा॒ पुरु॑षः।
स॒ह॒स्रा॒क्षः स॒हस्र॑पात्।
स भूमिं॑ वि॒श्वतो॑ वृ॒त्वा।
अत्य॑तिष्ठद्दशाङ्गु॒लम्।
पुरु॑ष ए॒वेदꣳ सर्वम्᳚।
यद्भू॒तं यच्च॒ भव्यम्᳚।
उ॒तामृ॑त॒त्वस्येशा॑नः।
यदन्ने॑नाति॒रोह॑ति।
ए॒तावा॑नस्य महि॒मा।
अतो॒ ज्यायाꣳ॑श्च॒ पूरु॑षः॥३२॥
पादो᳚ऽस्य॒ विश्वा॑ भू॒तानि॑।
त्रि॒पाद॑स्या॒मृतं॑ दि॒वि।
त्रि॒पादू॒र्ध्व उदै॒त्पुरु॑षः।
पादो᳚ऽस्ये॒हाभ॑वा॒त्पुनः॑।
ततो॒ विष्व॒ङ्व्य॑क्रामत्।
सा॒श॒ना॒न॒श॒ने अ॒भि।
तस्मा᳚द्वि॒राड॑जायत।
वि॒राजो॒ अधि॒ पूरु॑षः।
स जा॒तो अत्य॑रिच्यत।
प॒श्चाद्भूमि॒मथो॑ पु॒रः॥३३॥
यत्पुरु॑षेण ह॒विषा᳚।
दे॒वा य॒ज्ञमत॑न्वत।
व॒स॒न्तो अ॑स्यासी॒दाज्यम्᳚।
ग्री॒ष्म इ॒ध्मः श॒रद्ध॒विः।
स॒प्तास्या॑सन्परि॒धयः॑।
त्रिः स॒प्त स॒मिधः॑ कृ॒ताः।
दे॒वा यद्य॒ज्ञं त॑न्वा॒नाः।
aba̍dhna̱npuru̍ṣaṃ pa̱śum.
taṃ ya̱jñaṃ ba̱ṟhiṣi̱ praukṣan̍.
puru̍ṣaṃ jā̱tama̍gra̱taḥ..34..
tena̍ de̱vā aya̍janta.
sā̱dhyā ṛṣa̍yaśca̱ ye.
tasmā̎dya̱jñāthsa̍rva̱huta̍ḥ.
sambhṛ̍taṃ pṛṣadā̱jyam.
pa̱śūṃstāṃśca̍kre vāya̱vyān̍.
ā̱ra̱ṇyāngrā̱myāśca̱ ye.
tasmā̎dya̱jñāthsa̍rva̱huta̍ḥ.
ṛca̱ḥ sāmā̍ni jajñire.
chandā̍ṃsi jajñire̱ tasmā̎t.
yaju̱stasmā̍dajāyata..35..
tasmā̱daśvā̍ ajāyanta.
ye ke co̍bha̱yāda̍taḥ.
gāvo̍ ha jajñire̱ tasmā̎t.
tasmā̎jjā̱tā a̍jā̱vaya̍ḥ.
yatpuru̍ṣa̱ṃ vya̍dadhuḥ.
ka̱ti̱dhā vya̍kalpayan.
mukha̱ṃ kima̍sya̱ kau bā̱hū.
kāvū̱rū pādā̍vucyete.
brā̱hma̱ṇo̎'sya̱ mukha̍māsīt.
bā̱hū rā̍ja̱nya̍ḥ kṛ̱taḥ..36..
ū̱rū tada̍sya̱ yadvaiśya̍ḥ.
pa̱dbhyāṃ śū̱dro a̍jāyata.
ca̱ndramā̱ mana̍so jā̱taḥ.
cakṣo̱ḥ sūryo̍ ajāyata.
mukhā̱dindra̍ścā̱gniśca̍.
prā̱ṇādvā̱yura̍jāyata.
nābhyā̍ āsīda̱ntari̍kṣam.
śī̱rṣṇo dyauḥ sama̍vartata.
pa̱dbhyāṃ bhūmi̱rdiśa̱ḥ śrotrā̎t.
tathā̍ lo̱kāṃ a̍kalpayan..37..
vedā̱hame̱taṃ puru̍ṣaṃ ma̱hāntam̎.
ā̱di̱tyava̍rṇa̱ṃ tama̍sa̱stu pā̱re.
sarvā̍ṇi rū̱pāṇi̍ vi̱citya̱ dhīra̍ḥ.
nāmā̍ni kṛ̱tvā'bhi̱vada̱ṉ yadāste̎.
dhā̱tā pu̱rastā̱dyamu̍dāja̱hāra̍.
śa̱kraḥ pravi̱dvānpra̱diśa̱ścata̍sraḥ.
tame̱vaṃ vi̱dvāna̱mṛta̍ i̱ha bha̍vati.
nānyaḥ panthā̱ aya̍nāya vidyate.
ya̱jñena̍ ya̱jñama̍yajanta de̱vāḥ.
tāni̱ dharmā̍ṇi pratha̱mānyā̍san.
te ha̱ nāka̍ṃ mahi̱māna̍ḥ sacante.
yatra̱ pūrve̍ sā̱dhyāḥ santi̍ de̱vāḥ..38..
Anuvāka 13
a̱dbhyaḥ sambhū̍taḥ pṛthi̱vyai rasā̎cca.
vi̱śvaka̍rmaṇa̱ḥ sama̍varta̱tādhi̍.
tasya̱ tvaṣṭā̍ vi̱dadha̍drū̱pame̍ti.
tatpuru̍ṣasya̱ viśva̱mājā̍na̱magre̎.
vedā̱hame̱taṃ puru̍ṣaṃ ma̱hāntam̎.
ā̱di̱tyava̍rṇa̱ṃ tama̍sa̱ḥ para̍stāt.
tame̱vaṃ vi̱dvāna̱mṛta̍ i̱ha bha̍vati.
nānyaḥ panthā̍ vidya̱te'ya̍nāya.
pra̱jāpa̍tiścarati̱ garbhe̍ a̱ntaḥ.
a̱jāya̍māno bahu̱dhā vijā̍yate..39..
tasya̱ dhīrā̱ḥ pari̍jānanti̱ yonim̎.
marī̍cīnāṃ pa̱dami̍cchanti ve̱dhasa̍ḥ.
yo de̱vebhya̱ āta̍pati.
yo de̱vānā̎ṃ pu̱rohi̍taḥ.
pūrvo̱ yo de̱vebhyo̍ jā̱taḥ.
namo̍ ru̱cāya̱ brāhma̍ye.
ruca̍ṃ brā̱hmaṃ ja̱naya̍ntaḥ.
de̱vā agre̱ tada̍bruvan.
yastvai̱vaṃ brā̎hma̱ṇo vi̱dyāt.
tasya̍ de̱vā asa̱nvaśe̎.
hrīśca̍ te la̱kṣmīśca̱ patnyau̎.
a̱ho̱rā̱tre pā̱rśve.
nakṣa̍trāṇi rū̱pam.
a̱śvinau̱ vyāttam̎.
i̱ṣṭaṃ ma̍niṣāṇa.
a̱muṃ ma̍niṣāṇa.
sarva̍ṃ maniṣāṇa..40..
Anuvāka 14
bha̱rtā sanbhri̱yamā̍ṇo bibharti.
eko̍ de̱vo ba̍hu̱dhā nivi̍ṣṭaḥ.
ya̱dā bhā̱raṃ ta̱ndraya̍te̱ sa bhartum̎.
ni̱dhāya̍ bhā̱raṃ puna̱rasta̍meti.
tame̱va mṛ̱tyuma̱mṛta̱ṃ tamā̍huḥ.
taṃ bha̱rtāra̱ṃ tamu̍ go̱ptāra̍māhuḥ.
sa bhṛ̱to bhri̱yamā̍ṇo bibharti.
ya e̍na̱ṃ veda̍ sa̱tyena̱ bhartum̎.
sa̱dyo jā̱tamu̱ta ja̍hātye̱ṣaḥ.
u̱to jara̍nta̱ṃ na ja̍hā̱tyekam̎..41..
u̱to ba̱hūneka̱maha̍rjahāra.
ata̍ndro de̱vaḥ sada̍me̱va prārtha̍ḥ.
yastadveda̱ yata̍ āba̱bhūva̍.
sa̱ndhāṃ ca̱ yāṃ sa̍nda̱dhe brahma̍ṇai̱ṣaḥ.
rama̍te̱ tasmi̍nnu̱ta jī̱rṇe śayā̍ne.
naina̍ṃ jahā̱tyaha̍ḥ su pū̱rvyeṣu̍.
tvāmāpo̱ anu̱ sarvā̎ścaranti jāna̱tīḥ.
va̱thsaṃ paya̍sā punā̱nāḥ.
tvama̱gniṃ ha̍vya̱vāha̱ṃ sami̎nthse.
tvaṃ bha̱rtā mā̍ta̱riśvā̎ pra̱jānā̎m..42..
tvaṃ ya̱jñastvamu̍ve̱vāsi̱ soma̍ḥ.
tava̍ de̱vā hava̱māya̍nti̱ sarve̎.
tvameko̍'si ba̱hūnanu̱pravi̍ṣṭaḥ.
nama̍ste astu su̱havo̍ ma edhi.
namo̍ vāmastu śṛṇu̱taṃ hava̍ṃ me.
prāṇā̍pānāvaji̱raṃ sa̱ñcara̍ntau.
hvayā̍mi vā̱ṃ brahma̍ṇā tū̱rtametam̎.
yo māṃ dveṣṭi̱ taṃ ja̍hitaṃ yuvānā.
prāṇā̍pānau saṃvidā̱nau ja̍hitam.
a̱muṣyāsu̍nā̱mā saṅga̍sāthām..43..
taṃ me̍ devā̱ brahma̍ṇā saṃvidā̱nau.
va̱dhāya̍ datta̱ṃ tama̱haṃ ha̍nāmi.
asa̍jjajāna sa̱ta āba̍bhūva.
yaṃ ya̍ṃ ja̱jāna̱ sa u̍ go̱po a̍sya.
ya̱dā bhā̱raṃ ta̱ndraya̍te̱ sa bhartum̎.
pa̱rāsya̍ bhā̱raṃ puna̱rasta̍meti.
tadvai tvaṃ prā̱ṇo a̍bhavaḥ.
ma̱hānbhoga̍ḥ pra̱jāpa̍teḥ.
bhuja̍ḥ kari̱ṣyamā̍ṇaḥ.
yadde̱vānprāṇa̍yo̱ nava̍..44..
Anuvāka 15
hari̱ṃ hara̍nta̱manu̍yanti de̱vāḥ.
viśva̱syeśā̍naṃ vṛṣa̱bhaṃ ma̍tī̱nām.
brahma̱ sarū̍pa̱manu̍me̱damāgā̎t.
aya̍na̱ṃ mā viva̍dhī̱rvikra̍masva.
mā chi̍do mṛtyo̱ mā va̍dhīḥ.
mā me̱ bala̱ṃ vivṛ̍ho̱ mā pramo̍ṣīḥ.
pra̱jāṃ mā me̍ rīriṣa̱ āyu̍rugra.
nṛ̱cakṣa̍saṃ tvā ha̱viṣā̍ vidhema.
sa̱dyaśca̍kamā̱nāya̍.
pra̱ve̱pā̱nāya̍ mṛ̱tyave̎..45..
prāsmā̱ āśā̍ aśṛṇvan.
kāme̍nājanaya̱npuna̍ḥ.
kāme̍na me̱ kāma̱ āgā̎t.
hṛda̍yā̱ddhṛda̍yaṃ mṛ̱tyoḥ.
yada̱mīṣā̍ma̱daḥ pri̱yam.
tadaitūpa̱māma̱bhi.
para̍ṃ mṛtyo̱ anu̱ pare̍hi̱ panthā̎m.
yaste̱ sva ita̍ro deva̱yānā̎t.
cakṣu̍ṣmate śṛṇva̱te te̎ bravīmi.
mā na̍ḥ pra̱jāṃ rī̍riṣo̱ mota vī̱rān.
pra pū̱rvyaṃ mana̍sā̱ vanda̍mānaḥ.
nādha̍māno vṛṣa̱bhaṃ ca̍rṣaṇī̱nām.
yaḥ pra̱jānā̍meka̱rāṇmānu̍ṣīṇām.
mṛ̱tyuṃ ya̍je prathama̱jāmṛ̱tasya̍..46..
Anuvāka 16
ta̱raṇi̍rvi̱śvada̍rśato jyoti̱ṣkṛda̍si sūrya.
viśva̱mā bhā̍si roca̱nam.
u̱pa̱yā̱magṛ̍hīto'si̱ sūryā̍ya tvā̱ bhrāja̍svata e̱ṣa te̱ yoni̱ḥ sūryā̍ya tvā̱ bhrāja̍svate..47..
Anuvāka 17
ā pyā̍yasva madintama̱ soma̱ viśvā̍bhirū̱tibhi̍ḥ.
bhavā̍ naḥ sa̱pratha̍stamaḥ..48..
Anuvāka 18
ī̱yuṣṭe ye pūrva̍tarā̱mapa̍śyan vyu̱cchantī̍mu̱ṣasa̱ṃ martyā̍saḥ.
a̱smābhi̍rū̱ nu pra̍ti̱cakṣyā̍'bhū̱do te ya̍nti̱ ye a̍pa̱rīṣu̱ paśyān̍..49..%
Anuvāka 19
jyoti̍ṣmatīṃ tvā sādayāmi jyoti̱ṣkṛta̍ṃ tvā sādayāmi jyoti̱rvida̍ṃ tvā sādayāmi̱ bhāsva̍tīṃ tvā sādayāmi̱ jvala̍ntīṃ tvā sādayāmi malmalā̱bhava̍ntīṃ tvā sādayāmi̱ dīpya̍mānāṃ tvā sādayāmi̱ roca̍mānāṃ tvā sādayā̱myaja̍srāṃ tvā sādayāmi bṛ̱hajjyo̍tiṣaṃ tvā sādayāmi bo̱dhaya̍ntīṃ tvā sādayāmi̱ jāgra̍tīṃ tvā sādayāmi..50..
Anuvāka 20
pra̱yā̱sāya̱ svāhā̍''yā̱sāya̱ svāhā̍ viyā̱sāya̱ svāhā̍ saṃyā̱sāya̱ svāho̎dyā̱sāya̱ svāhā̍'vayā̱sāya̱ svāhā̍ śu̱ce svāhā̱ śokā̍ya̱ svāhā̍ tapya̱tvai svāhā̱ tapa̍te̱ svāhā̎ brahmaha̱tyāyai̱ svāhā̱ sarva̍smai̱ svāhā̎..51..%
Anuvāka 21
ci̱ttaṃ sa̍ntā̱nena̍ bha̱vaṃ ya̱knā ru̱drantani̍mnā paśu̱pati̍ṃ sthūlahṛda̱yenā̱gniṃ hṛda̍yena ru̱draṃ lohi̍tena śa̱rvaṃ mata̍snābhyāṃ mahāde̱vama̱ntaḥ pā̎rśvenauṣiṣṭha̱hana̍ṃ śiṅgīniko̱śyā̎bhyām..52..
taccha̱ṃ yorāvṛ̍ṇīmahe.
gā̱tuṃ ya̱jñāya̍.
gā̱tuṃ ya̱jñapa̍taye.
daivī̎ sva̱stira̍stu naḥ.
sva̱stirmānu̍ṣebhyaḥ.
ū̱rdhvaṃ ji̍gātu bheṣa̱jam.
śaṃ no̍ astu dvi̱pade̎.
śaṃ catu̍ṣpade.
oṃ śānti̱ḥ śānti̱ḥ śānti̍ḥ..