saptamakāṇḍe prathamaḥ praśnaḥ 1
1 pra̱jana̍na̱ṃ jyoti̍ra̱gnirde̱vatā̍nā̱ṃ jyoti̍rvi̱rāṭchaṃda̍sā̱ṃ
jyoti̍rvi̱rāḍvā̱co̎'gnau saṃ ti̍ṣṭhate vi̱rāja̍ma̱bhi saṃ pa̍dyate̱
tasmā̱ttajjyoti̍rucyate̱ dvau stomau̎ prātaḥsava̱naṃ va̍hato̱ yathā̎
prā̱ṇaścā̍pā̱naśca̱ dvau mādhya̍ṃdina̱g̱ͫ sava̍na̱ṃ yathā̱ cakṣu̍śca̱
śrotra̍ṃ ca̱ dvau tṛ̍tīyasava̱naṃ yathā̱ vāk ca̍ prati̱ṣṭhā ca̱ puru̍ṣa
saṃmito̱ vā e̱ṣa ya̱jño'sthū̍ri̱
2 ryaṃ kāma̍ṃ kā̱maya̍te̱ tame̱tenā̱bhya̍śnute̱ sarva̱gg̱
hyasthū̍riṇābhyaśnu̱te̎'gniṣṭo̱mena̱ vai pra̱jāpa̍tiḥ pra̱jā a̍sṛjata̱
tā a̍gniṣṭo̱menai̱va parya̍gṛhṇā̱ttāsā̱ṃ pari̍gṛhītānāmaśvata̱ro'tya̍
pravata̱ tasyā̍nu̱hāya̱ reta̱ āda̍tta̱ tadga̍rda̱bhe nya̍mā̱rṭ tasmā̎dgarda̱bho
dvi̱retā̱ atho̍ āhu̱rvaḍa̍bāyā̱ṃ nya̍mā̱rḍiti̱ tasmā̱dvaḍa̍bā dvi̱retā̱ atho̍
āhu̱roṣa̍dhīṣu̱
3 nya̍mā̱rḍiti̱ tasmā̱doṣa̍dha̱yo'na̍bhyaktā rebha̱ntyatho̍ āhuḥ pra̱jāsu̱
nya̍mā̱rḍiti̱ tasmā̎dya̱mau jā̍yete̱ tasmā̍daśvata̱ro na pra jā̍yata̱ ātta̍retā̱
hi tasmā̎dba̱ṟhiṣyana̍vaklṛptaḥ sarvaveda̱se vā̍ sa̱hasre̱ vāva̍klṛ̱pto'ti̱
hyapra̍vata̱ ya e̱vaṃ vi̱dvāna̍gniṣṭo̱mena̱ yaja̍te̱ prājā̍tāḥ pra̱jā ja̱naya̍ti̱
pari̱ prajā̍tā gṛhṇāti̱ tasmā̍dāhurjyeṣṭhaya̱jña iti̍
4 pra̱jāpa̍ti̱rvāva jyeṣṭha̱ḥ sa hye̍tenāgre'ya̍jata pra̱jāpa̍tirakāmayata̱ pra
jā̍ye̱yeti̱ sa mu̍kha̱tastri̱vṛta̱ṃ nira̍mimīta̱ tama̱gnirde̱vatānva̍sṛjyata
gāya̱trī chando̍ rathaṃta̱ragͫ sāma̍ brāhma̱ṇo ma̍nu̱ṣyā̍ṇāma̱jaḥ pa̍śū̱nāṃ
tasmā̱tte mukhyā̍ mukha̱to hyasṛ̍jya̱ntora̍so bā̱hubhyā̎ṃ pañcada̱śaṃ
nira̍mimīta̱ tamindro̍ de̱vatānva̍sṛjyata tri̱ṣṭupchando̍ bṛ̱hath
5 sāma̍ rāja̱nyo̍ manu̱ṣyā̍ṇā̱mavi̍ḥ paśū̱nāṃ tasmā̱tte vī̱ryā̍vanto
vī̱ryā̎ddhyasṛ̍jyanta madhya̱taḥ sa̍ptada̱śaṃ nira̍mimīta̱ taṃ viśve̍
de̱vā de̱vatā̱ anva̍sṛjyanta̱ jaga̍tī̱ chando̍ vairū̱pagͫ sāma̱ vaiśyo̍
manu̱ṣyā̍ṇā̱ṃ gāva̍ḥ paśū̱nāṃ tasmā̱tta ā̱dyā̍ anna̱dhānā̱ddhyasṛ̍jyanta̱
tasmā̱dbhūyāgͫ̍so̱'nyebhyo̱ bhūyi̍ṣṭhā̱ hi de̱vatā̱ anvasṛ̍jyanta pa̱tta
e̍kavi̱g̱ͫśaṃ nira̍mimīta̱ tama̍nu̱ṣṭupchando
6 'nva̍sṛjyata vairā̱jagͫ sāma̍ śū̱dro ma̍nu̱ṣyā̍ṇā̱maśva̍ḥ paśū̱nāṃ
tasmā̱ttau bhū̍tasaṃkrā̱miṇā̱vaśva̍śca śū̱draśca̱ tasmā̎cchū̱dro
ya̱jñe'na̍vaklṛpto̱ na hi de̱vatā̱ anvasṛ̍jyata̱ tasmā̱tpādā̱vupa̍ jīvataḥ
pa̱tto hyasṛ̍jyetāṃ prā̱ṇā vai tri̱vṛda̍rdhamā̱sāḥ pa̍ñcada̱śaḥ pra̱jāpa̍tiḥ
saptada̱śastraya̍ i̱me lo̱kā a̱sāvā̍di̱tya e̍kavi̱g̱ͫśa e̱tasmi̱nvā
e̱te śri̱tā e̱tasmi̱nprati̍ṣṭhitā̱ ya e̱vaṃ vedai̱tasmi̍nne̱va śra̍yata
e̱tasmi̱nprati̍ tiṣṭhati
||7.1.1||asthū̍ri̱roṣa̍dhīṣu jyeṣṭhaya̱jña iti̍
bṛ̱hada̍nu̱ṣṭupchaṃda̱ḥ prati̍ṣṭhitā̱ nava̍ ca
||7.1.1||7 prā̱ta̱ḥsa̱va̱ne vai gā̍ya̱treṇa̱ chaṃda̍sā tri̱vṛte̱ stomā̍ya̱
jyoti̱rdadha̍deti tri̱vṛtā̎ brahmavarca̱sena̍ pañcada̱śāya̱ jyoti̱rdadha̍deti
pañcada̱śenauja̍sā vī̱rye̍ṇa saptada̱śāya̱ jyoti̱rdadha̍deti saptada̱śena̍
prājāpa̱tyena̍ pra̱jana̍nenaikavi̱g̱ͫśāya̱ jyoti̱rdadha̍deti̱ stoma̍ e̱va
tathstomā̍ya̱ jyoti̱rdadha̍de̱tyatho̱ stoma̍ e̱va stoma̍ma̱bhi praṇa̍yati̱ yāva̍nto̱
vai stomā̱stāva̍nta̱ḥ kāmā̱stāva̍nto lo̱kāstāva̍nti̱ jyotīg̍ṣye̱tāva̍ta e̱va
stomā̍ne̱tāva̍ta̱ḥ kāmā̍ne̱tāva̍to lo̱kāne̱tāva̍nti̱ jyotī̱g̱ṣyava̍ ruṃdhe
||7.1.2||tāva̍nto lo̱kāstrayo̍daśa ca
||7.1.2||8 bra̱hma̱vā̱dino̍ vadanti̱ sa tvai ya̍jeta̱ yo̎'gniṣṭo̱mena̱ yaja̍mā̱no'tha̱
sarva̍stomena̱ yaje̱teti̱ yasya̍ tri̱vṛta̍manta̱ryanti̍ prā̱ṇāgstasyā̱ntarya̍nti
prā̱ṇeṣu̱ me'pya̍sa̱diti̱ khalu̱ vai ya̱jñena̱ yaja̍māno yajate̱ yasya̍
pañcada̱śama̍nta̱ryanti̍ vī̱rya̍ṃ tasyā̱ntarya̍nti vī̱rye̍ me'pya̍sa̱diti̱
khalu̱ vai ya̱jñena̱ yaja̍māno yajate̱ yasya̍ saptada̱śama̍nta̱ryanti̍
9 pra̱jāṃ tasyā̱ntarya̍nti pra̱jāyā̱ṃ me'pya̍sa̱diti̱ khalu̱ vai ya̱jñena̱
yaja̍māno yajate̱ yasyai̍kavi̱g̱ͫśama̍nta̱ryanti̍ prati̱ṣṭhāṃ tasyā̱ntarya̍nti
prati̱ṣṭhāyā̱ṃ me'pya̍sa̱diti̱ khalu̱ vai ya̱jñena̱ yaja̍māno yajate̱
yasya̍ triṇa̱vama̍nta̱ryantyṛ̱tūgśca̱ tasya̍ nakṣa̱triyā̎ṃ ca
vi̱rāja̍ma̱ntarya̍ntyṛ̱tuṣu̱ me'pya̍sannakṣa̱triyā̍yāṃ ca vi̱rājīti̱
10 khalu̱ vai ya̱jñena̱ yaja̍māno yajate̱ yasya̍ trayastri̱g̱ͫśama̍nta̱ryanti̍
de̱vatā̱stasyā̱ntarya̍nti de̱vatā̍su̱ me'pya̍sa̱diti̱ khalu̱ vai ya̱jñena̱
yaja̍māno yajate̱ yo vai stomā̍nāmava̱maṃ pa̍ra̱matā̱ṃ gaccha̍nta̱ṃ veda̍
para̱matā̍me̱va ga̍cchati tri̱vṛdvai stomā̍nāmava̱mastri̱vṛtpa̍ra̱mo ya e̱vaṃ
veda̍ para̱matā̍me̱va ga̍cchati
||7.1.3||sa̱pta̱da̱śama̍nta̱ryanti̍ vi̱rājīti̱
catu̍ścatvārigͫśacca
||7.1.3||11 aṃgi̍raso̱ vai sa̱ttramā̍sata̱ te su̍va̱rgaṃ lo̱kamā̍ya̱nteṣāgͫ̍
ha̱viṣmāg̍śca havi̱ṣkṛccā̍hīyetā̱ṃ tāva̍kāmayetāgͫ suva̱rgaṃ
lo̱kami̍yā̱veti̱ tāve̱taṃ dvi̍rā̱trama̍paśyatā̱ṃ tamāha̍ratā̱ṃ tenā̍yajetā̱ṃ
tato̱ vai tau su̍va̱rgaṃ lo̱kamai̍tā̱ṃ ya e̱vaṃ vi̱dvāndvi̍rā̱treṇa̱ yaja̍te
suva̱rgame̱va lo̱kame̍ti̱ tāvaitā̱ṃ pūrve̱ṇāhnāga̍cchatā̱mutta̍reṇā
12 'bhipla̱vaḥ pūrva̱maha̍rbhavati̱ gati̱rutta̍ra̱ṃ jyoti̍ṣṭomo'gniṣṭo̱maḥ
pūrva̱maha̍rbhavati̱ teja̱stenāva̍ ruṃdhe̱ sarva̍stomo'tirā̱tra utta̍ra̱g̱ͫ
sarva̱syāptyai̱ sarva̱syāva̍ruddhyai gāya̱traṃ pūrveha̱nthsāma̍ bhavati̱ tejo̱ vai
gā̍ya̱trī gā̍ya̱trī bra̍hmavarca̱saṃ teja̍ e̱va bra̍hmavarca̱samā̱tmandha̍tte̱
traiṣṭu̍bha̱mutta̍ra̱ ojo̱ vai vī̱rya̍ṃ tri̱ṣṭugoja̍ e̱va vī̱rya̍mā̱tmandha̍tte
rathaṃta̱raṃ pūrve
13 'ha̱nthsāma̍ bhavatī̱yaṃ vai ra̍thaṃta̱rama̱syāme̱va prati̍ tiṣṭhati
bṛ̱hadutta̍re̱'sau vai bṛ̱hada̱muṣyā̍me̱va prati̍ tiṣṭhati̱ tadā̍hu̱ḥ kva̍
jaga̍tī cānu̱ṣṭupceti̍ vaikhāna̱saṃ pūrve'ha̱nthsāma̍ bhavati̱ tena̱ jaga̍tyai̱
naiti̍ ṣoḍa̱śyutta̍re̱ tenā̍nu̱ṣṭubho'thā̍hu̱ryathsa̍mā̱ne̎'rdhamā̱se
syātā̍manyata̱rasyāhno̍ vī̱rya̍manu̍ padye̱tetya̍māvā̱syā̍yā̱ṃ
pūrva̱maha̍rbhava̱tyutta̍rasmi̱nnutta̍ra̱ṃ nānai̱vārdha̍mā̱sayo̎rbhavato̱ nānā̍vīrye
bhavato ha̱viṣma̍nnidhana̱ṃ pūrva̱maha̍rbhavati havi̱ṣkṛnni̍dhana̱mutta̍ra̱ṃ
prati̍ṣṭhityai
||7.1.4||utta̍reṇa rathanta̱raṃ pūrve'nveka̍ vigͫśatiśca
||7.1.4||14 āpo̱ vā i̱damagre̍ sali̱lamā̍sī̱ttasmi̍npra̱jāpa̍tirvā̱yurbhū̱tvāca̍ra̱thsa
i̱māma̍paśya̱ttāṃ va̍rā̱ho bhū̱tvāha̍ra̱ttāṃ vi̱śvaka̍rmā bhū̱tvā
vya̍mā̱rṭsāpra̍thata̱ sā pṛ̍thi̱vya̍bhava̱ttatpṛ̍thi̱vyai pṛ̍thivi̱tvaṃ
tasyā̍maśrāmyatpra̱jāpa̍ti̱ḥ sa de̱vāna̍sṛjata̱ vasū̎nru̱drānā̍di̱tyānte de̱vāḥ
pra̱jāpa̍timabruva̱n pra jā̍yāmahā̱ iti̱ so̎'bravī̱d
15 yathā̱haṃ yu̱ṣmāgstapa̱sāsṛ̍kṣye̱vaṃ tapa̍si pra̱jana̍namicchadhva̱miti̱
tebhyo̱'gnimā̱yata̍na̱ṃ prāya̍cchade̱tenā̱yata̍nena śrāmya̱teti̱
te̎'gninā̱yata̍nenāśrāmya̱nte sa̍ṃvathsa̱ra ekā̱ṃ gāma̍sṛjanta̱ tāṃ vasu̍bhyo
ru̱drebhya̍ ādi̱tyebhya̱ḥ prāya̍cchanne̱tāgͫ ra̍kṣadhva̱miti̱ tāṃ vasa̍vo ru̱drā
ā̍di̱tyā a̍rakṣanta̱ sā vasu̍bhyo ru̱drebhya̍ ādi̱tyebhya̱ḥ prājā̍yata̱ trīṇi̍ ca
16 śa̱tāni̱ traya̍strigͫśata̱ṃ cātha̱ saiva sa̍hasrata̱mya̍bhava̱tte
de̱vāḥ pra̱jāpa̍timabruvanthsa̱hasre̍ṇa no yāja̱yeti̱ so̎'gniṣṭo̱mena̱
vasū̍nayājaya̱tta i̱maṃ lo̱kama̍jaya̱ntaccā̍dadu̱ḥ sa u̱kthye̍na
ru̱drāna̍yājaya̱nte̎'ntari̍kṣamajaya̱ntaccā̍dadu̱ḥ
so̍'tirā̱treṇā̍di̱tyāna̍yājaya̱tte̍'muṃ
lo̱kama̍jaya̱ntaccā̍dadu̱stada̱ntari̍kṣa̱ṃ
17 vyavai̎ryata̱ tasmā̎dru̱drā ghātu̍kā anāyata̱nā hi tasmā̍dāhuḥ śithi̱laṃ vai
ma̍dhya̱mamaha̍strirā̱trasya̱ vi hi tada̱vairya̱teti̱ traiṣṭu̍bhaṃ madhya̱masyāhna̱
ājya̍ṃ bhavati sa̱ṃyānā̍ni sū̱ktāni̍ śagͫsati ṣoḍa̱śinagͫ̍ śagͫsa̱tyahno̱
dhṛtyā̱ aśi̍thilaṃ bhāvāya̱ tasmā̎ttrirā̱trasyā̎gniṣṭo̱ma e̱va pra̍tha̱mamaha̍ḥ
syā̱datho̱kthyo'thā̍tirā̱tra e̱ṣāṃ lo̱kānā̱ṃ vidhṛ̍tyai̱ trīṇi̍trīṇi
śa̱tānya̍nūcīnā̱hamavya̍vacchinnāni dadā
18 tye̱ṣāṃ lo̱kānā̱manu̱ saṃta̍tyai da̱śata̱ṃ na vi cchi̍ndyādvi̱rāja̱ṃ
nedvi̍cchi̱nadā̱nītyatha̱ yā sa̍hasrata̱myāsī̱ttasyā̱mindra̍śca̱ viṣṇu̍śca̱
vyāya̍cchetā̱g̱ͫ sa indro̍'manyatā̱nayā̱ vā i̱daṃ viṣṇu̍ḥ sa̱hasra̍ṃ varkṣyata̱
iti̱ tasyā̍makalpetā̱ṃ dvibhā̍ga̱ indra̱stṛtī̍ye̱ viṣṇu̱stadvā e̱ṣābhyanū̎cyata
u̱bhā ji̍gyathu̱riti̱ tāṃ vā e̱tāma̍cchāvā̱ka
19 e̱va śagͫ̍sa̱tyatha̱ yā sa̍hasrata̱mī sā hotre̱ deyeti̱ hotā̍ra̱ṃ
vā a̱bhyati̍ricyate̱ yada̍ti̱ricya̍te̱ hotānā̎ptasyāpayi̱tāthā̍hurunne̱tre
deyetyati̍riktā̱ vā e̱ṣā sa̱hasra̱syāti̍rikta unne̱tartvijā̱mathā̍hu̱ḥ sarve̎bhyaḥ
sada̱sye̎bhyo̱ deyetyathā̍hurudā̱kṛtyā̱ sā vaśa̍ṃ care̱dityathā̍hurbra̱hmaṇe̍
cā̱gnīdhe̍ ca̱ deyeti̱
20 dvibhā̍gaṃ bra̱hmaṇe̱ tṛtī̍yama̱gnīdha̍ ai̱ndro vai bra̱hmā
vai̎ṣṇa̱vo̎'gnīdyathai̱va tāvaka̍lpetā̱mityathā̍hu̱ryā ka̍lyā̱ṇī ba̍hurū̱pā sā
deyetyathā̍hu̱ryā dvi̍rū̱pobha̱yata̍ enī̱ sā deyeti̍ sa̱hasra̍sya̱ pari̍gṛhītyai̱
tadvā e̱tathsa̱hasra̱syāya̍nagͫ sa̱hasragg̍ sto̱trīyā̎ḥ sa̱hasra̱ṃ dakṣi̍ṇāḥ
sa̱hasra̍ saṃmitaḥ suva̱rgo lo̱kaḥ su̍va̱rgasya̍ lo̱kasyā̱bhiji̍tyai
||7.1.5||a̱bra̱vī̱cca̱ tada̱ntari̍kṣandadātyacchāvā̱kaśca̱ deyeti̍
sa̱ptaca̍tvārigͫśacca
||7.1.5||21 somo̱ vai sa̱hasra̍mavinda̱ttamindro'nva̍vinda̱ttau ya̱mo
nyāga̍ccha̱ttāva̍bravī̱dastu̱ me'trāpītyastu̱ hī3 itya̍brūtā̱g̱ͫ sa ya̱ma
eka̍syāṃ vī̱rya̍ṃ parya̍paśyadi̱yaṃ vā a̱sya sa̱hasra̍sya vī̱rya̍ṃ bibha̱rtīti̱
tāva̍bravīdi̱yaṃ mamāstve̱tadyu̱vayo̱riti̱ tāva̍brūtā̱g̱ͫ sarve̱ vā e̱tade̱tasyā̎ṃ
vī̱rya̍ṃ
22 pari̍ paśyā̱mo'gͫśa̱mā ha̍rāmahā̱ iti̱ tasyā̱magͫśa̱māha̍ranta̱
tāma̱psu prāve̍śaya̱nthsomā̍yo̱dehīti̱ sā rohi̍ṇī piṅga̱laika̍hāyanī rū̱paṃ
kṛ̱tvā traya̍strigͫśatā ca tri̱bhiśca̍ śa̱taiḥ sa̱hodaittasmā̱drohi̍ṇyā
piṅga̱layaika̍hāyanyā̱ soma̍ṃ krīṇīyā̱dya e̱vaṃ vi̱dvān rohi̍ṇyā
piṅga̱layaika̍hāyanyā̱ soma̍ṃ krī̱ṇāti̱ traya̍strigͫśatā cai̱vāsya̍ tri̱bhiśca̍
23 śa̱taiḥ soma̍ḥ krī̱to bha̍vati̱ sukrī̍tena yajate̱ tāma̱psu
prāve̍śaya̱nnindrā̍yo̱dehīti̱ sā rohi̍ṇī lakṣma̱ṇā pa̍ṣṭhau̱hī vārtra̍ghnī rū̱paṃ
kṛ̱tvā traya̍strigͫśatā ca tri̱bhiśca̍ śa̱taiḥ sa̱hodaittasmā̱drohi̍ṇīṃ
lakṣma̱ṇāṃ pa̍ṣṭhau̱hīṃ vārtra̍ghnīṃ dadyā̱dya e̱vaṃ vi̱dvānrohi̍ṇīṃ lakṣma̱ṇāṃ
pa̍ṣṭhau̱hīṃ vārtra̍ghnī̱ṃ dadā̍ti̱ traya̍strigͫśaccai̱vāsya̱ trīṇi̍ ca
śa̱tāni̱ sā da̱ttā
24 bha̍vati̱ tāma̱psu prāve̍śayan, ya̱māyo̱dehīti̱ sā jara̍tī mū̱rkhā ta̍jjagha̱nyā
rū̱paṃ kṛ̱tvā traya̍strigͫśatā ca tri̱bhiśca̍ śa̱taiḥ sa̱hodaittasmā̱jjara̍tīṃ
mū̱rkhāṃ ta̍jjagha̱nyāma̍nu̱stara̍ṇīṃ kurvīta̱ ya e̱vaṃ vi̱dvāñjara̍tīṃ mū̱rkhāṃ
ta̍jjagha̱nyāma̍nu̱stara̍ṇīṃ kuru̱te traya̍strigͫśaccai̱vāsya̱ trīṇi̍ ca
śa̱tāni̱ sāmuṣmi̍3gͫllo̱ke bha̍vati̱ vāge̱va sa̍hasrata̱mī tasmā̱d
25 varo̱ deya̱ḥ sā hi vara̍ḥ sa̱hasra̍masya̱ sā da̱ttā bha̍vati̱ tasmā̱dvaro̱
na pra̍ti̱gṛhya̱ḥ sā hi vara̍ḥ sa̱hasra̍masya̱ prati̍gṛhītaṃ bhavatī̱yaṃ vara̱
iti̍ brūyā̱dathā̱nyāṃ brū̍yādi̱yaṃ mameti̱ tathā̎sya̱ tathsa̱hasra̱mapra̍tigṛhītaṃ
bhavatyubhayata e̱nī syā̱ttadā̍huranyata e̱nī syā̎thsa̱hasra̍ṃ pa̱rastā̱deta̱miti̱
yaiva vara̍ḥ
26 kalyā̱ṇī rū̱pasa̍mṛddhā̱ sā syā̱thsā hi vara̱ḥ samṛ̍ddhyai̱
tāmutta̍re̱ṇāgnī̎dhraṃ paryā̱ṇīyā̍hava̱nīya̱syānte̎ droṇakala̱śamava̍
ghrāpaye̱dā ji̍ghra ka̱laśa̍ṃ mahyu̱rudhā̍rā̱ paya̍sva̱tyā tvā̍ viśa̱ntvinda̍vaḥ
samu̱drami̍va̱ sindha̍va̱ḥ sā mā̍ sa̱hasra̱ ā bha̍ja pra̱jayā̍ pa̱śubhi̍ḥ sa̱ha
puna̱rmā' vi̍śatādra̱yiriti̍ pra̱jayai̱vaina̍ṃ pa̱śubhī̍ ra̱yyā sa
27 ma̍rdhayati pra̱jāvā̎npaśu̱mānra̍yi̱mānbha̍vati̱ ya e̱vaṃ veda̱ tayā̍
sa̱hāgnī̎dhraṃ pa̱retya̍ pu̱rastā̎tpra̱tīcyā̱ṃ tiṣṭha̍ntyāṃ juhuyādu̱bhā
ji̍gyathu̱rna parā̍ jayethe̱ na parā̍ jigye kata̱raśca̱naino̎ḥ | indra̍śca viṣṇo̱
yadapa̍spṛdhethāṃ tre̱dhā sa̱hasra̱ṃ vi tadai̍rayethā̱miti̍ tredhāvibha̱ktaṃ vai
tri̍rā̱tre sa̱hasragͫ̍ sāha̱srīme̱vainā̎ṃ karoti sa̱hasra̍syai̱vainā̱ṃ mātrā̎ṃ
28 karoti rū̱pāṇi̍ juhoti rū̱paire̱vainā̱g̱ͫ sama̍rdhayati̱ tasyā̍
upo̱tthāya̱ karṇa̱mā ja̍pe̱diḍe̱ rante'di̍te̱ sara̍svati̱ priye̱ preya̍si̱
mahi̱ viśru̍tye̱tāni̍ te aghniye̱ nāmā̍ni su̱kṛta̍ṃ mā de̱veṣu̍ brūtā̱diti̍
de̱vebhya̍ e̱vaina̱mā ve̍daya̱tyanve̍naṃ de̱vā bu̍dhyante
||7.1.6||e̱tade̱tasyā̎ṃ
vī̱rya̍masya tri̱bhiśca̍ da̱ttā sa̍hasrata̱mī tasmā̍de̱va vara̱ḥ saṃ mātrā̱mekā̱nna
ca̍tvāri̱g̱ͫśacca̍
||7.1.6||29 sa̱ha̱sra̱ta̱myā̍ vai yaja̍mānaḥ suva̱rgaṃ lo̱kame̍ti̱ sainagͫ̍ suva̱rgaṃ
lo̱kaṃ ga̍mayati̱ sā mā̍ suva̱rgaṃ lo̱kaṃ ga̍ma̱yetyā̍ha suva̱rgame̱vaina̍ṃ lo̱kaṃ
ga̍mayati̱ sā mā̱ jyoti̍ṣmantaṃ lo̱kaṃ ga̍ma̱yetyā̍ha̱ jyoti̍ṣmantame̱vaina̍ṃ
lo̱kaṃ ga̍mayati̱ sā mā̱ sarvā̱npuṇyā̎3gͫllo̱kānga̍ma̱yetyā̍ha̱ sarvā̍ne̱vaina̱ṃ
puṇyā̎3gͫ llo̱kānga̍mayati̱ sā
30 mā̎ prati̱ṣṭhāṃ ga̍maya pra̱jayā̍ pa̱śubhi̍ḥ sa̱ha puna̱rmā
vi̍śatādra̱yiriti̍ pra̱jayai̱vaina̍ṃ pa̱śubhī̍ ra̱yyāṃ prati̍ṣṭhāpayati
pra̱jāvā̎npaśu̱mānra̍yi̱mānbha̍vati̱ ya e̱vaṃ veda̱ tāma̱gnīdhe̍ vā bra̱hmaṇe̍
vā̱ hotre̍ vodgā̱tre vā̎dhva̱ryave̍ vā dadyāthsa̱hasra̍masya̱ sā da̱ttā bha̍vati
sa̱hasra̍masya̱ prati̍gṛhītaṃ bhavati̱ yastāmavi̍dvān
31 pratigṛ̱hṇāti̱ tāṃ prati̍ gṛhṇīyā̱dekā̍si̱ na sa̱hasra̱mekā̎ṃ tvā bhū̱tāṃ
prati̍ gṛhṇāmi̱ na sa̱hasra̱mekā̍ mā bhū̱tā vi̍śa̱ mā sa̱hasra̱mityekā̍me̱vainā̎ṃ
bhū̱tāṃ prati̍ gṛhṇāti̱ na sa̱hasra̱ṃ ya e̱vaṃ veda̍ syo̱nāsi̍ su̱ṣadā̍ su̱śevā̎
syo̱nā mā vi̍śa su̱ṣadā̱ mā vi̍śa su̱śevā̱ mā vi̱śe
32 tyā̍ha syo̱naivainagͫ̍ su̱ṣadā̍ su̱śevā̍ bhū̱tāvi̍śati̱
nainagͫ̍ hinasti brahmavā̱dino̍ vadanti sa̱hasragͫ̍ sahasrata̱myanve̱tī
3 sa̍hasrata̱mīgͫ sa̱hasrā 3 miti̱ yatprācī̍muthsṛ̱jethsa̱hasragͫ̍
sahasrata̱myanvi̍yā̱ttathsa̱hasra̍maprajñā̱tragͫ su̍va̱rgaṃ lo̱kaṃ na pra
jā̍nīyātpra̱tīcī̱muthsṛ̍jati̱ tāgͫ sa̱hasra̱manu̍ pa̱ryāva̍rtate̱ sā
pra̍jāna̱tī su̍va̱rgaṃ lo̱kame̍ti̱ yaja̍mānama̱bhyuthsṛ̍jati kṣi̱pre sa̱hasra̱ṃ
pra jā̍yata utta̱mā nī̱yate̎ pratha̱mā de̱vānga̍cchati
||7.1.7||lo̱kānga̍mayati̱
sā'vi̍dvānthsu̱śevā̱ mā'vi̍śa̱ yaja̍māna̱ndvāda̍śa ca
||7.1.7||33 atri̍radadā̱daurvā̍ya pra̱jāṃ pu̱trakā̍māya̱ sa ri̍ricā̱no̍'manyata̱ nirvī̎ryaḥ
śithi̱lo yā̱tayā̍mā̱ sa e̱taṃ ca̍tūrā̱trama̍paśya̱ttamāha̍ra̱ttenā̍yajata̱
tato̱ vai tasya̍ ca̱tvāro̍ vī̱rā ājā̍yanta̱ suho̍tā̱ sū̎dgātā̱ sva̍dhvaryu̱ḥ
susa̍bheyo̱ ya e̱vaṃ vi̱dvāgśca̍tūrā̱treṇa̱ yaja̍ta̱ āsya̍ ca̱tvāro̍ vī̱rā
jā̍yante̱ suho̍tā̱ sū̎dgātā̱ sva̍dhvaryu̱ḥ susa̍bheyo̱ ye ca̍turvi̱g̱ͫśāḥ
pava̍mānā brahmavarca̱saṃ tad
34 ya u̱dyanta̱ḥ stomā̱ḥ śrīḥ sātrigg̍ śra̱ddhāde̍va̱ṃ yaja̍mānaṃ ca̱tvāri̍
vī̱ryā̍ṇi̱ nopā̍nama̱nteja̍ indri̱yaṃ bra̍hmavarca̱sama̱nnādya̱g̱ͫ sa
e̱tāgśca̱tura̱ścatu̍ṣṭomā̱nthsomā̍napaśya̱ttānāha̍ra̱ttaira̍yajata̱ teja̍ e̱va
pra̍tha̱menāvā̍ruṃdheṃdri̱yaṃ dvi̱tīye̍na brahmavarca̱saṃ tṛ̱tīye̍nā̱nnādya̍ṃ
catu̱rthena̱ ya e̱vaṃ vi̱dvāgśca̱tura̱ścatu̍ṣṭomā̱nthsomā̍nā̱hara̍ti̱
tairyaja̍te̱ teja̍ e̱va pra̍tha̱menāva̍ ruṃdha iṃdri̱yaṃ dvi̱tīye̍na brahmavarca̱saṃ
tṛ̱tīye̍nā̱nnādya̍ṃ catu̱rthena̱ yāme̱vātri̱ṟṛddhi̱mārdhno̱ttāme̱va yaja̍māna
ṛdhnoti
||7.1.8||tatteja̍ e̱vāṣṭāda̍śa ca
||7.1.8||35 ja̱mada̍gni̱ḥ puṣṭi̍kāmaścatūrā̱treṇā̍yajata̱ sa e̱tānpoṣāgͫ̍
apuṣya̱ttasmā̎tpali̱tau jāma̍dagniyau̱ na saṃ jā̍nāte e̱tāne̱va poṣā̎npuṣyati̱ ya
e̱vaṃ vi̱dvāgśca̍tūrā̱treṇa̱ yaja̍te puroḍā̱śinya̍ upa̱sado̍ bhavanti pa̱śavo̱
vai pu̍ro̱ḍāśa̍ḥ pa̱śūne̱vāva̍ ru̱ṃdhe'nna̱ṃ vai pu̍ro̱ḍāśo'nna̍me̱vāva̍
ruṃdhe'nnā̱daḥ pa̍śu̱mānbha̍vati̱ ya e̱vaṃ vi̱dvāgśca̍tūrā̱treṇa̱ yaja̍te
||7.1.9||ja̱mada̍gnira̱ṣṭā ca̍tvārigͫśat
||7.1.9||36 sa̱ṃva̱thsa̱ro vā i̱dameka̍ āsī̱thso̍'kāmayata̱rtūnthsṛ̍je̱yeti̱ sa e̱taṃ
pa̍ñcarā̱trama̍paśya̱ttamāha̍ra̱ttenā̍yajata̱ tato̱ vai sa ṛ̱tūna̍sṛjata̱
ya e̱vaṃ vi̱dvānpa̍ñcarā̱treṇa̱ yaja̍te̱ praiva jā̍yate̱ ta ṛ̱tava̍ḥ sṛ̱ṣṭā
na vyāva̍rtanta̱ ta e̱taṃ pa̍ñcarā̱trama̍paśya̱ntamāha̍ra̱ntenā̍yajanta̱ tato̱
vai te vyāva̍rtanta̱
37 ya e̱vaṃ vi̱dvānpa̍ñcarā̱treṇa̱ yaja̍te̱ vi pā̱pmanā̱
bhrātṛ̍vye̱ṇāva̍rtate̱ sārva̍seniḥ śauce̱yo̍'kāmayata paśu̱mānthsyā̱miti̱ sa
e̱taṃ pa̍ñcarā̱tramāha̍ra̱ttenā̍yajata̱ tato̱ vai sa sa̱hasra̍ṃ pa̱śūnprāpno̱dya
e̱vaṃ vi̱dvānpa̍ñcarā̱treṇa̱ yaja̍te̱ pra sa̱hasra̍ṃ pa̱śūnā̎pnoti baba̱raḥ
prāvā̍haṇirakāmayata vā̱caḥ pra̍vadi̱tā syā̱miti̱ sa e̱taṃ pa̍ñcarā̱tramā
38 'ha̍ra̱ttenā̍yajata̱ tato̱ vai sa vā̱caḥ pra̍vadi̱tābha̍va̱dya e̱vaṃ
vi̱dvānpa̍ñcarā̱treṇa̱ yaja̍te pravadi̱taiva vā̱co bha̍va̱tyatho̍ enaṃ
vā̱caspati̱rityā̍hu̱ranā̎ptaścatūrā̱tro'ti̍riktaḥ ṣaḍrā̱tro'tha̱ vā e̱ṣa
sa̍ṃ pra̱ti ya̱jño yatpa̍ñcarā̱tro ya e̱vaṃ vi̱dvānpa̍ñcarā̱treṇa̱ yaja̍te
saṃ pra̱tye̍va ya̱jñena̍ yajate pañcarā̱tro bha̍vati̱ pañca̱ vā ṛ̱tava̍ḥ
saṃvathsa̱ra
39 ṛ̱tuṣve̱va sa̍ṃvathsa̱re prati̍ tiṣṭha̱tyatho̱ pañcā̎kṣarā
pa̱ṅktiḥ pāṅkto̍ ya̱jño ya̱jñame̱vāva̍ ruṃdhe tri̱vṛda̍gniṣṭo̱mo
bha̍vati̱ teja̍ e̱vāva̍ ruṃdhe pañcada̱śo bha̍vatīndri̱yame̱vāva̍
ruṃdhe saptada̱śo bha̍vatya̱nnādya̱syāva̍ruddhyā̱ atho̱ praiva tena̍
jāyate pañcavi̱g̱ͫśo̎'gniṣṭo̱mo bha̍vati pra̱jāpa̍te̱rāptyai̍
mahāvra̱tavā̍na̱nnādya̱syāva̍ruddhyai viśva̱jithsarva̍pṛṣṭho'tirā̱tro bha̍vati̱
sarva̍syā̱bhiji̍tyai
||7.1.10||te vyāva̍rtanta pravadi̱tā syā̱miti̱ sa e̱taṃ
pa̍ñcarā̱tramā sa̍ṃvathsa̱ro̍'bhiji̍tyai
||7.1.10||40 de̱vasya̍ tvā savi̱tuḥ pra̍sa̱ve̎'śvino̎rbā̱hubhyā̎ṃ pū̱ṣṇo hastā̎bhyā̱mā
da̍da i̱māma̍gṛbhṇanraśa̱nāmṛ̱tasya̱ pūrva̱ āyu̍ṣi vi̱dathe̍ṣu ka̱vyā | tayā̍
de̱vāḥ su̱tamā ba̍bhūvurṛ̱tasya̱ sāma̎nthsa̱ramā̱rapa̍ntī || a̱bhi̱dhā a̍si̱
bhuva̍namasi ya̱ntāsi̍ dha̱rtāsi̱ so̎'gniṃ vai̎śvāna̱ragͫ sapra̍tha saṃ gaccha̱
svāhā̍kṛtaḥ pṛthi̱vyāṃ ya̱ntā rāḍya̱ntāsi̱ yama̍no dha̱rtāsi̍ dha̱ruṇa̍ḥ kṛ̱ṣyai
tvā̱ kṣemā̍ya tvā ra̱yyai tvā̱ poṣā̍ya tvā pṛthi̱vyai tvā̱ntari̍kṣāya tvā di̱ve
tvā̍ sa̱te tvāsa̍te tvā̱dbhyastvauṣa̍dhībhyastvā̱ viśve̎bhyastvā bhū̱tebhya̍ḥ
||7.1.11||dha̱ruṇa̱ḥ pañca̍vigͫśatiśca
||7.1.11||41 vi̱bhūrmā̱trā pra̱bhūḥ pi̱trāśvo̍'si̱ hayo̱'syatyo̍'si̱ naro̱'syarvā̍si̱
sapti̍rasi vā̱jya̍si̱ vṛṣā̍si nṛ̱maṇā̍ asi̱ yayu̱rnāmā̎syādi̱tyānā̱ṃ
patvānvi̍hya̱gnaye̱ svāhā̱ svāhe̎ndrā̱gnibhyā̱g̱ svāhā̎ pra̱jāpa̍taye̱ svāhā̱
viśve̎bhyo de̱vebhya̱ḥ svāhā̱ sarvā̎bhyo de̱vatā̎bhya i̱ha dhṛti̱ḥ svāhe̱ha
vidhṛ̍ti̱ḥ svāhe̱ha ranti̱ḥ svāhe̱ha rama̍ti̱ḥ svāhā̱ bhūra̍si bhu̱ve tvā̱ bhavyā̍ya
tvā bhaviṣya̱te tvā̱ viśve̎bhyastvā bhū̱tebhyo̱ devā̍ āśāpālā e̱taṃ de̱vebhyo'śva̱ṃ
medhā̍ya̱ prokṣi̍taṃ gopāyata
||7.1.12||ranti̱ḥ svāhā̱ dvāvigͫ̍śatiśca
||7.1.12||42 āya̍nāya̱ svāhā̱ prāya̍ṇāya̱ svāho̎ddrā̱vāya̱ svāhoddru̍tāya̱ svāhā̍ śūkā̱rāya̱
svāhā̱ śūkṛ̍tāya̱ svāhā̱ palā̍yitāya̱ svāhā̱palā̍yitāya̱ svāhā̱valga̍te̱ svāhā̍
parā̱valga̍te̱ svāhā̍ya̱te svāhā̎ praya̱te svāhā̱ sarva̍smai̱ svāhā̎
||7.1.13||āya̍nā̱yotta̍ramā̱palā̍yitāya̱ ṣaḍvigͫ̍śatiḥ
||7.1.13||43 a̱gnaye̱ svāhā̱ somā̍ya̱ svāhā̍ vā̱yave̱ svāhā̱pāṃ modā̍ya̱ svāhā̍ savi̱tre
svāhā̱ sara̍svatyai̱ svāhendrā̍ya̱ svāhā̱ bṛha̱spata̍ye̱ svāhā̍ mi̱trāya̱
svāhā̱ varu̍ṇāya̱ svāhā̱ sarva̍smai̱ svāhā̎
||7.1.14||a̱gnaye̍ vā̱yave̱'pāṃ
modā̱yendrā̍ya̱ trayo̍vigͫśatiḥ
||7.1.14||44 pṛ̱thi̱vyai svāhā̱ntari̍kṣāya̱ svāhā̍ di̱ve svāhā̱ sūryā̍ya̱ svāhā̍
ca̱ndrama̍se̱ svāhā̱ nakṣa̍trebhya̱ḥ svāhā̱ prācyai̍ di̱śe svāhā̱ dakṣi̍ṇāyai
di̱śe svāhā̎ pra̱tīcyai̍ di̱śe svāhodī̎cyai di̱śe svāho̱rdhvāyai̍ di̱śe
svāhā̍ di̱gbhyaḥ svāhā̍vāntaradi̱śābhya̱ḥ svāhā̱ samā̎bhya̱ḥ svāhā̍ śa̱radbhya̱ḥ
svāhā̍horā̱trebhya̱ḥ svāhā̎rdhamā̱sebhya̱ḥ svāhā̱ māse̎bhya̱ḥ svāha̱rtubhya̱ḥ svāhā̍
saṃvathsa̱rāya̱ svāhā̱ sarva̍smai̱ svāhā̎
||7.1.15||pṛ̱thi̱vyai sūryā̍ya̱
nakṣa̍trebhya̱ḥ prācyai̍ sa̱pta ca̍tvārigͫśat
||7.1.15||45 a̱gnaye̱ svāhā̱ somā̍ya̱ svāhā̍ savi̱tre svāhā̱ sara̍svatyai̱ svāhā̍ pū̱ṣṇe
svāhā̱ bṛha̱spata̍ye̱ svāhā̱pāṃ modā̍ya̱ svāhā̍ vā̱yave̱ svāhā̍ mi̱trāya̱ svāhā̱
varu̍ṇāya̱ svāhā̱ sarva̍smai̱ svāhā̎
||7.1.16||a̱gnaye̍ savi̱tre pū̱ṣṇe̍'pāṃ
modā̍ya vā̱yave̱ trayo̍vigͫśatiḥ
||7.1.16||46 pṛ̱thi̱vyai svāhā̱ntari̍kṣāya̱ svāhā̍ di̱ve svāhā̱gnaye̱ svāhā̱ somā̍ya̱
svāhā̱ sūryā̍ya̱ svāhā̍ ca̱ndrama̍se̱ svāhāhne̱ svāhā̱ rātri̍yai̱ svāha̱rjave̱
svāhā̍ sā̱dhave̱ svāhā̍ sukṣi̱tyai svāhā̎ kṣu̱dhe svāhā̍śiti̱mne svāhā̱ rogā̍ya̱
svāhā̍ hi̱māya̱ svāhā̍ śī̱tāya̱ svāhā̍ta̱pāya̱ svāhāra̍ṇyāya̱ svāhā̍ suva̱rgāya̱
svāhā̍ lo̱kāya̱ svāhā̱ sarva̍smai̱ svāhā̎
||7.1.17||pṛ̱thi̱vyā a̱gnaye'hne̱
rātri̍yai̱ catu̍ścatvārigͫśat
||7.1.17||47 bhuvo̍ de̱vānā̱ṃ karma̍ṇā̱pasa̱rtasya̍ pa̱thyā̍si̱ vasu̍bhirde̱vebhi̍rde̱vata̍yā
gāya̱treṇa̍ tvā̱ chaṃda̍sā yunajmi vasa̱ntena̍ tva̱rtunā̍ ha̱viṣā̍ dīkṣayāmi
ru̱drebhi̍rde̱vebhi̍rde̱vata̍yā̱ traiṣṭu̍bhena tvā̱ chaṃda̍sā yunajmi
grī̱ṣmeṇa̍ tva̱rtunā̍ ha̱viṣā̍ dīkṣayāmyādi̱tyebhi̍rde̱vebhi̍rde̱vata̍yā̱
jāga̍tena tvā̱ chaṃda̍sā yunajmi va̱ṟṣābhi̍stva̱rtunā̍ ha̱viṣā̍ dīkṣayāmi̱
viśve̍bhirde̱vebhi̍rde̱vata̱yānu̍ṣṭubhena tvā̱ chaṃda̍sā yunajmi
48 śa̱radā̎ tva̱rtunā̍ ha̱viṣā̍ dīkṣayā̱myaṃgi̍robhirde̱vebhi̍rde̱vata̍yā̱
pāṅkte̍na tvā̱ chaṃda̍sā yunajmi hemantaśiśi̱rābhyā̎ṃ tva̱rtunā̍ ha̱viṣā̍
dīkṣayā̱myāhaṃ dī̱kṣāma̍ruhamṛ̱tasya̱ patnī̎ṃ gāya̱treṇa̱ chaṃda̍sā̱ brahma̍ṇā
ca̱rtagͫ sa̱tye̍'dhāgͫ sa̱tyamṛ̱te̍'dhām || ma̱hī mū̱ṣu su̱trāmā̍ṇami̱ha
dhṛti̱ḥ svāhe̱ha vidhṛ̍ti̱ḥ svāhe̱ha ranti̱ḥ svāhe̱ha rama̍ti̱ḥ svāhā̎
||7.1.18||ānu̍ṣṭebhena tvā̱ chanda̍sā yuna̱jmyekā̱nna pa̍ñcā̱śacca̍
||7.1.18||49 ī̱ṃkā̱rāya̱ svāheṃkṛ̍tāya̱ svāhā̱ kranda̍te̱ svāhā̍va̱kranda̍te̱
svāhā̱ protha̍te̱ svāhā̎ pra̱protha̍te̱ svāhā̍ ga̱ndhāya̱ svāhā̎ ghrā̱tāya̱
svāhā̎ prā̱ṇāya̱ svāhā̎ vyā̱nāya̱ svāhā̍'pā̱nāya̱ svāhā̍ saṃdī̱yamā̍nāya̱
svāhā̱ saṃdi̍tāya̱ svāhā̍ vicṛ̱tyamā̍nāya̱ svāhā̱ vicṛ̍ttāya̱ svāhā̍
palāyi̱ṣyamā̍ṇāya̱ svāhā̱ palā̍yitāya̱ svāho̍para2gͫsya̱ te svāhopa̍ratāya̱
svāhā̍ nivekṣya̱te svāhā̍ nivi̱śamā̍nāya̱ svāhā̱ nivi̍ṣṭāya̱ svāhā̍ niṣathsya̱
te svāhā̍ ni̱ṣīda̍te̱ svāhā̱ niṣa̍ṇṇāya̱ svāhā̍
50 'siṣya̱te svāhāsī̍nāya̱ svāhā̍si̱tāya̱ svāhā̍ nipathsya̱te svāhā̍
ni̱padya̍mānāya̱ svāhā̱ nipa̍nnāya̱ svāhā̍ śayiṣya̱te svāhā̱ śayā̍nāya̱ svāhā̍
śayi̱tāya̱ svāhā̍ saṃ mīliṣya̱te svāhā̍ sa̱ṃ mīla̍te̱ svāhā̱ saṃ mī̍litāya̱
svāhā̎ svapsya̱te svāhā̎ svapa̱te svāhā̍ su̱ptāya̱ svāhā̎ prabhothsya̱te svāhā̎
pra̱budhya̍mānāya̱ svāhā̱ prabu̍ddhāya̱ svāhā̍ jāgariṣya̱te svāhā̱ jāgra̍te̱ svāhā̍
jāgari̱tāya̱ svāhā̱ śuśrū̍ṣamāṇāya̱ svāhā̍ śaṛṇva̱te svāhā̎ śru̱tāya̱ svāhā̍
vīkṣiṣya̱te svāhā̱
51 vīkṣa̍māṇāya̱ svāhā̱ vīkṣi̍tāya̱ svāhā̍ sagͫhāsya̱te svāhā̍ sa̱ṃjihā̍nāya̱
svāho̱jjihā̍nāya̱ svāhā̍ vivarthsya̱te svāhā̍ vi̱varta̍mānāya̱ svāhā̱ vivṛ̍ttāya̱
svāho̎tthāsya̱te svāho̱ttiṣṭha̍te̱ svāhotthi̍tāya̱ svāhā̍ vidhaviṣya̱te svāhā̍
vidhūnvā̱nāya̱ svāhā̱ vidhū̍tāya̱ svāho̎tkra2gͫsya̱te svāho̱tkrāma̍te̱
svāhotkrā̎ntāya̱ svāhā̍ caṃkramiṣya̱te svāhā̍ caṃkra̱myamā̍ṇāya̱ svāhā̍
caṃkrami̱tāya̱ svāhā̍ kaṇḍūyiṣya̱te svāhā̍ kaṇḍū̱yamā̍nāya̱ svāhā̍ kaṇḍūyi̱tāya̱
svāhā̍ nikaṣiṣya̱te svāhā̍ ni̱kaṣa̍māṇāya̱ svāhā̱ nika̍ṣitāya̱ svāhā̱
yadatti̱ tasmai̱ svāhā̱ yatpiba̍ti̱ tasmai̱ svāhā̱ yanmeha̍ti̱ tasmai̱ svāhā̱
yacchakṛ̍tka̱roti̱ tasmai̱ svāhā̱ reta̍se̱ svāhā̎ pra̱jābhya̱ḥ svāhā̎
pra̱jana̍nāya̱ svāhā̱ sarva̍smai̱ svāhā̎
||7.1.19||niṣa̍ṇṇāya̱ svāhā̍
vīkṣiṣya̱te svāhā̍ ni̱kaṣa̍māṇāya̱ svāhā̍ sa̱ptavigͫ̍śatiśca
||7.1.19||52 a̱gnaye̱ svāhā̍ vā̱yave̱ svāhā̱ sūryā̍ya̱ svāha̱rtama̍syṛ̱tasya̱rtama̍si
sa̱tyama̍si sa̱tyasya̍ sa̱tyama̍syṛ̱tasya̱ panthā̍ asi de̱vānā̎ṃ chā̱yāmṛta̍sya̱
nāma̱ tathsa̱tyaṃ yattvaṃ pra̱jāpa̍ti̱rasyadhi̱ yada̍sminvā̱jinī̍va̱ śubha̱ḥ
spardha̍nte̱ diva̱ḥ sūrye̍ṇa̱ viśo̱'po vṛ̍ṇā̱naḥ pa̍vate ka̱vyanpa̱śuṃ na go̱pā
irya̱ḥ pari̍jmā
||7.1.20||a̱gnaye̍ vā̱yave̱ sūryā̍yā̱'ṣṭā ca̍tvārigͫśat
||7.1.20||saptamakāṇḍe dvitīyaḥ praśnaḥ 2
1 sā̱dhyā vai de̱vāḥ su̍va̱rgakā̍mā e̱tagͫ
ṣa̍ḍrā̱trama̍paśya̱ntamāha̍ra̱ntenā̍yajanta̱ tato̱ vai te su̍va̱rgaṃ
lo̱kamā̍ya̱ṉ ya e̱vaṃ vi̱dvāgͫsa̍ḥ ṣaḍrā̱tramāsa̍te suva̱rgame̱va lo̱kaṃ
ya̍nti devasa̱ttraṃ vai ṣa̍ḍrā̱traḥ pra̱tyakṣa̱gg̱ hye̍tāni̍ pṛ̱ṣṭhāni̱
ya e̱vaṃ vi̱dvāgͫsa̍ḥ ṣaḍrā̱tramāsa̍te sā̱kṣāde̱va de̱vatā̍ a̱bhyāro̍hanti
ṣaḍrā̱tro bha̍vati̱ ṣaḍvā ṛ̱tava̱ḥ ṣaṭpṛ̱ṣṭhāni̍
2 pṛ̱ṣṭhaire̱vartūna̱nvāro̍hantyṛ̱tubhi̍ḥ saṃvathsa̱raṃ te sa̍ṃvathsa̱ra e̱va
prati̍ tiṣṭhanti bṛhadrathaṃta̱rābhyā̎ṃ yantī̱yaṃ vāva ra̍thaṃta̱rama̱sau
bṛ̱hadā̱bhyāme̱va ya̱ntyatho̍ a̱nayo̍re̱va prati̍ tiṣṭhantye̱tevai
ya̱jñasyā̎ñja̱sāya̍nī sru̱tī tābhyā̍me̱va su̍va̱rgaṃ lo̱kaṃ ya̍nti
tri̱vṛda̍gniṣṭo̱mo bha̍vati̱ teja̍ e̱vāva̍ ruṃdhate pañcada̱śo
bha̍vatīndri̱yame̱vāva̍ ruṃdhate saptada̱śo
3 bha̍vatya̱nnādya̱syāva̍ruddhyā̱ atho̱ praiva tena̍ jāyanta ekavi̱g̱ͫśo
bha̍vati̱ prati̍ṣṭhityā̱ atho̱ ruca̍me̱vātmanda̍dhate triṇa̱vo bha̍vati̱
viji̍tyai trayastri̱g̱ͫśo bha̍vati̱ prati̍ṣṭhityai sadohavirdhā̱nina̍
e̱tena̍ ṣaḍrā̱treṇa̍ yajera̱nnāśva̍tthī havi̱rdhāna̱ṃ cāgnī̎dhraṃ ca
bhavata̱staddhi su̍va̱rgya̍ṃ ca̱krīva̍tī bhavataḥ suva̱rgasya̍ lo̱kasya̱
sama̍ṣṭyā u̱lūkha̍labudhno̱ yūpo̍ bhavati̱ prati̍ṣṭhityai̱ prāñco̍ yānti̱
prāṅi̍va̱ hi su̍va̱rgo
4 lo̱kaḥ sara̍svatyā yāntye̱ṣa vai de̍va̱yāna̱ḥ panthā̱stame̱vānvāro̍hantyā̱krośa̍nto
yā̱ntyava̍rtime̱vānyasmi̍nprati̱ṣajya̍ prati̱ṣṭhāṃ ga̍cchanti ya̱dā
daśa̍ śa̱taṃ ku̱rvantyathaika̍mu̱tthānagͫ̍ śa̱tāyu̱ḥ puru̍ṣaḥ
śa̱tendri̍ya̱ āyu̍ṣye̱vendri̱ye prati̍ tiṣṭhanti ya̱dā śa̱tagͫ sa̱hasra̍ṃ
ku̱rvantyathaika̍mu̱tthānagͫ̍ sa̱hasra̍saṃmito̱ vā a̱sau lo̱ko̍'mume̱va
lo̱kama̱bhi ja̍yanti ya̱daiṣā̎ṃ pra̱mīye̍ta ya̱dā vā̱ jīye̍ra̱nnathaika̍mu̱tthāna̱ṃ
taddhi tī̱rtham
||7.2.1||pṛ̱ṣṭhāni̍ saptada̱śaḥ su̍va̱rgo ja̍yanti ya̱daikā̍daśa
ca
||7.2.1||5 ku̱su̱ru̱binda̱ auddā̍lakirakāmayata paśu̱mānthsyā̱miti̱ sa
e̱tagͫ sa̍ptarā̱tramāha̍ra̱ttenā̍yajata̱ tena̱ vai sa yāva̍nto grā̱myāḥ
pa̱śava̱stānavā̍ruṃdha̱ ya e̱vaṃ vi̱dvānthsa̍ptarā̱treṇa̱ yaja̍te̱ yāva̍nta e̱va
grā̱myāḥ pa̱śava̱stāne̱vāva̍ ruṃdhe saptarā̱tro bha̍vati sa̱pta grā̱myāḥ pa̱śava̍ḥ
sa̱ptāra̱ṇyāḥ sa̱pta chandāg̍syu̱bhaya̱syāva̍ruddhyai tri̱vṛda̍gniṣṭo̱mo bha̍vati̱
teja̍
6 e̱vāva̍ ruṃdhe pañcada̱śo bha̍vatīndri̱yame̱vāva̍ ruṃdhe saptada̱śo
bha̍vatya̱nnādya̱syāva̍ruddhyā̱ atho̱ praiva tena̍ jāyata ekavi̱g̱ͫśo
bha̍vati̱ prati̍ṣṭhityā̱ atho̱ ruca̍me̱vātmandha̍tte triṇa̱vo bha̍vati̱
viji̍tyai pañcavi̱g̱ͫśo̎'gniṣṭo̱mo bha̍vati pra̱jāpa̍te̱rāptyai̍
mahāvra̱tavā̍na̱nnādya̱syāva̍ruddhyai viśva̱jithsarva̍pṛṣṭho'tirā̱tro bha̍vati̱
sarva̍syā̱bhiji̍tyai̱ yatpra̱tyakṣa̱ṃ pūrve̱ṣvaha̍ssu pṛ̱ṣṭhānyu̍pe̱yuḥ
pra̱tyakṣa̍ṃ
7 viśva̱jiti̱ yathā̍ du̱gdhāmu̍pa̱sīda̍tye̱vamu̍tta̱mamaha̍ḥ
syā̱nnaika̍rā̱traśca̱na syā̎dbṛhadrathanta̱re pūrve̱ṣvaha̱ssūpa̍ yantī̱yaṃ
vāva ra̍thaṃta̱rama̱sau bṛ̱hadā̱bhyāme̱va na ya̱ntyatho̍ a̱nayo̍re̱va prati̍
tiṣṭhanti̱ yatpra̱tyakṣa̍ṃ viśva̱jiti̍ pṛ̱ṣṭhānyu̍pa̱yanti̱ yathā̱ prattā̎ṃ
du̱he tā̱dṛge̱va tat
||7.2.2||teja̍ upe̱yuḥ pra̱tyakṣa̱ṃ dvica̍tvārigͫśacca
||7.2.2||8 bṛha̱spati̍rakāmayata brahmavarca̱sī syā̱miti̱ sa e̱tama̍ṣṭarā̱trama̍paśya̱t
tamāha̍ra̱t tenā̍yajata̱ tato̱ vai sa bra̍hmavarca̱sya̍bhava̱dya e̱vaṃ
vi̱dvāna̍ṣṭarā̱treṇa̱ yaja̍te brahmavarca̱sye̍va bha̍vatyaṣṭarā̱tro
bha̍vatya̱ṣṭākṣa̍rā gāya̱trī gā̍ya̱trī bra̍hmavarca̱saṃ gā̍yatri̱yaiva
bra̍hmavarca̱samava̍ ruṃdhe'ṣṭarā̱tro bha̍vati̱ cata̍sro̱ vai
diśa̱ścata̍sro'vāntaradi̱śā di̱gbhya e̱va bra̍hmavarca̱samava̍ ruṃdhe
9 tri̱vṛda̍gniṣṭo̱mo bha̍vati̱ teja̍ e̱vāva̍ ruṃdhe pañcada̱śo
bha̍vatīndri̱yame̱vāva̍ ruṃdhe saptada̱śo bha̍vatya̱nnādya̱syāva̍ruddhyā̱
atho̱ praiva tena̍ jāyata ekavi̱g̱ͫśo bha̍vati̱ prati̍ṣṭhityā̱ atho̱
ruca̍me̱vātmandha̍tte triṇa̱vo bha̍vati̱ viji̍tyai trayastri̱g̱ͫśo bha̍vati̱
prati̍ṣṭhityai pañcavi̱g̱ͫśo̎'gniṣṭo̱mo bha̍vati pra̱jāpa̍te̱rāptyai̍
mahāvra̱tavā̍na̱nnādya̱syāva̍ruddhyai viśva̱jithsarva̍pṛṣṭho'tirā̱tro
bha̍vati̱ sarva̍syā̱bhiji̍tyai
||7.2.3||di̱gbhya e̱va bra̍hmavarca̱samava̍
rundhe̱'bhiji̍tyai
||7.2.3||10 pra̱jāpa̍tiḥ pra̱jā a̍sṛjata̱ tāḥ sṛ̱ṣṭāḥ, kṣudha̱ṃ nyā̍ya̱nthsa e̱taṃ
na̍varā̱trama̍paśya̱t tamāha̍ra̱t tenā̍yajata̱ tato̱ vai pra̱jābhyo̍'kalpata̱
yarhi̍ pra̱jāḥ, kṣudha̍ṃ ni̱gacche̍yu̱starhi̍ navarā̱treṇa̍ yajete̱me hi vā e̱tāsā̎ṃ
lo̱kā aklṛ̍ptā̱ athai̱tāḥ, kṣudha̱ṃ ni ga̍cchantī̱māne̱vābhyo̍ lo̱kānka̍lpayati̱
tānkalpa̍mānānpra̱jābhyo'nu̍ kalpate̱ kalpa̍nte
11 'smā i̱me lo̱kā ūrja̍ṃ pra̱jāsu̍ dadhāti trirā̱treṇai̱vemaṃ lo̱kaṃ
ka̍lpayati trirā̱ttreṇā̱ntari̍kṣaṃ trirā̱treṇā̱muṃ lo̱kaṃ yathā̍ gu̱ṇe
gu̱ṇama̱nvasya̍tye̱vame̱va tallo̱ke lo̱kamanva̍syati̱ dhṛtyā̱ aśi̍thilaṃ
bhāvāya̱ jyoti̱rgaurāyu̱riti̍ jñā̱tā stomā̍ bhavantī̱yaṃ vāva jyoti̍ra̱ntari̍kṣa̱ṃ
gaura̱sāvāyu̍re̱ṣve̍va lo̱keṣu̱ prati̍ tiṣṭhanti̱ jñātra̍ṃ pra̱jānā̎ṃ
12 gacchati navarā̱tro bha̍vatyabhipū̱rvame̱vāsmi̱ntejo̍ dadhāti̱ yo jyogā̍mayāvī̱
syāthsa na̍varā̱treṇa̍ yajeta prā̱ṇā hi vā e̱tasyādhṛ̍tā̱ athai̱tasya̱ jyogā̍mayati
prā̱ṇāne̱vāsmi̍ndādhāro̱ta yadī̱tāsu̱rbhava̍ti̱ jīva̍tye̱va
||7.2.4||kalpa̍nte
pra̱jānā̱ntraya̍strigͫśacca
||7.2.4||13 pra̱jāpa̍tirakāmayata̱ pra jā̍ye̱yeti̱ sa e̱taṃ
daśa̍hotāramapaśya̱ttama̍juho̱ttena̍ daśarā̱trama̍sṛjata̱ tena̍ daśarā̱treṇa̱
prājā̍yata daśarā̱trāya̍ dīkṣi̱ṣyamā̍ṇo̱ daśa̍hotāraṃ juhuyā̱ddaśa̍hotrai̱va
da̍śarā̱tragͫ sṛ̍jate̱ tena̍ daśarā̱treṇa̱ pra jā̍yate vairā̱jo vā e̱ṣa
ya̱jño yadda̍śarā̱tro
14 ya e̱vaṃ vi̱dvānda̍śarā̱treṇa̱ yaja̍te vi̱rāja̍me̱va ga̍cchati
prājāpa̱tyo vā e̱ṣa ya̱jño yadda̍śarā̱tro ya e̱vaṃ vi̱dvānda̍śarā̱treṇa̱
yaja̍te̱ praiva jā̍yata̱ indro̱ vai sa̱dṛṅge̱vatā̍bhirāsī̱thsa
na vyā̱vṛta̍magaccha̱thsa pra̱jāpa̍ti̱mupā̍dhāva̱ttasmā̍
e̱taṃ da̍śarā̱traṃ prāya̍ccha̱ttamāha̍ra̱ttenā̍yajata̱ tato̱ vai
so̎'nyābhi̍rde̱vatā̍bhirvyā̱vṛta̍magaccha̱dya e̱vaṃ vi̱dvānda̍śarā̱treṇa̱
yaja̍te vyā̱vṛta̍me̱va pā̱pmanā̱ bhrātṛ̍vyeṇa gacchati trika̱kudvā
15 e̱ṣa ya̱jño yadda̍śarā̱traḥ ka̱kutpa̍ñcada̱śaḥ ka̱kude̍kavi̱g̱ͫśaḥ
ka̱kuttra̍yastri̱g̱ͫśo ya e̱vaṃ vi̱dvānda̍śarā̱treṇa̱ yaja̍te trika̱kude̱va
sa̍mā̱nānā̎ṃ bhavati̱ yaja̍mānaḥ pañcada̱śo yaja̍māna ekavi̱g̱ͫśo
yaja̍mānastrayastri̱g̱ͫśaḥ pura̱ ita̍rā abhica̱ryamā̍ṇo daśarā̱treṇa̍
yajeta devapu̱rā e̱va paryū̍hate̱ tasya̱ na kuta̍śca̱nopā̎vyā̱dho bha̍vati̱
naina̍mabhi̱cara̎nthstṛṇute devāsu̱rāḥ saṃya̍ttā āsa̱nte de̱vā e̱tā
16 de̍vapu̱rā a̍paśya̱ṉ, yadda̍śarā̱trastāḥ paryau̍hanta̱ teṣā̱ṃ
na kuta̍śca̱nopā̎vyā̱dho̍'bhava̱ttato̍ de̱vā abha̍va̱nparāsu̍rā̱ yo
bhrātṛ̍vyavā̱nthsyāthsa da̍śarā̱treṇa̍ yajeta devapu̱rā e̱va paryū̍hate̱ tasya̱ na
kuta̍śca̱nopā̎vyā̱dho bha̍vati̱ bhava̍tyā̱tmanā̱ parā̎sya̱ bhrātṛ̍vyo bhavati̱
stoma̱ stoma̱syopa̍stirbhavati̱ bhrātṛ̍vyame̱vopa̍stiṃ kurute jā̱mi vā
17 e̱tatku̍rvanti̱ yajjyāyāgͫ̍ sa̱gg̱ stoma̍mu̱petya̱ kanī̍yāgͫsamupa̱yanti̱
yada̍gniṣṭomasā̱mānya̱vastā̎cca pa̱rastā̎cca̱ bhava̱ntyajā̍mitvāya
tri̱vṛda̍gniṣṭo̱mo̎'gni̱ṣṭudā̎gne̱yīṣu̍ bhavati̱ teja̍ e̱vāva̍ ruṃdhe
pañcada̱śa u̱kthya̍ ai̱ndrīṣvi̍ndri̱yame̱vāva̍ ruṃdhe tri̱vṛda̍gniṣṭo̱mo
vai̎śvade̱vīṣu̱ puṣṭi̍me̱vāva̍ ruṃdhe saptada̱śo̎'gniṣṭo̱maḥ prā̍jāpa̱tyāsu̍
tīvraso̱mo̎'nnādya̱syāva̍ruddhyā̱ atho̱ praiva tena̍ jāyata
18 ekavi̱g̱ͫśa u̱kthya̍ḥ sau̱rīṣu̱ prati̍ṣṭhityā̱ atho̱ ruca̍me̱vātmandha̍tte
saptada̱śo̎'gniṣṭo̱maḥ prā̍jāpa̱tyāsū̍paha̱vya̍ upaha̱vame̱va ga̍cchati
triṇa̱vāva̍gniṣṭo̱māva̱bhita̍ ai̱ndrīṣu̱ viji̍tyai trayastri̱g̱ͫśa u̱kthyo̍
vaiśvade̱vīṣu̱ prati̍ṣṭhityai viśva̱jithsarva̍pṛṣṭho'tirā̱tro bha̍vati̱
sarva̍syā̱bhiji̍tyai
||7.2.5||vi̱rāja̍me̱va ga̍cchati prājāpa̱tyo vā e̱ṣa
ya̱jño yadda̍śarā̱trastri̍ka̱kudvā e̱tā vai jā̍yata̱ eka̍trigͫśacca
||7.2.5||19 ṛ̱tavo̱ vai pra̱jākā̍māḥ pra̱jāṃ nāvi̍ndanta̱ te̍'kāmayanta pra̱jāgͫ
sṛ̍jemahi pra̱jāmava̍ ruṃdhīmahi pra̱jāṃ vi̍ndemahi pra̱jāva̍ntaḥ syā̱meti̱
ta e̱tame̍kādaśarā̱trama̍paśya̱ntamāha̍ra̱ntenā̍yajanta̱ tato̱ vai te
pra̱jāma̍sṛjanta pra̱jāmavā̍ruṃdhata pra̱jāma̍vindanta pra̱jāva̍nto'bhava̱nta
ṛ̱tavo̍'bhava̱ntadā̎rta̱vānā̍mārtava̱tvamṛ̍tū̱nāṃ vā e̱te pu̱trāstasmā̍
20 dārta̱vā u̍cyante̱ ya e̱vaṃ vi̱dvāgͫsa̍ ekādaśarā̱tramāsa̍te pra̱jāme̱va
sṛ̍jante pra̱jāmava̍ ruṃdhate pra̱jāṃ vi̍ndante pra̱jāva̍nto bhavanti̱
jyoti̍ratirā̱tro bha̍vati̱ jyoti̍re̱va pu̱rastā̎ddadhate suva̱rgasya̍
lo̱kasyānu̍khyātyai̱ pṛṣṭhya̍ḥ ṣaḍa̱ho bha̍vati̱ ṣaḍvā ṛ̱tava̱ḥ
ṣaṭpṛ̱ṣṭhāni̍ pṛ̱ṣṭhaire̱vartūna̱nvāro̍hantyṛ̱tubhi̍ḥ saṃvathsa̱raṃ
te sa̍ṃvathsa̱ra e̱va prati̍ tiṣṭhanti caturvi̱g̱ͫśo bha̍vati̱
catu̍rvigͫśatyakṣarā gāya̱trī
21 gā̍ya̱traṃ bra̍hmavarca̱saṃ gā̍yatri̱yāme̱va bra̍hmavarca̱se prati̍ tiṣṭhanti
catuścatvāri̱g̱ͫśo bha̍vati̱ catu̍ścatvārigͫśadakṣarā tri̱ṣṭugi̍ṃdri̱yaṃ
tri̱ṣṭuptri̱ṣṭubhye̱vendri̱ye prati̍ tiṣṭhantyaṣṭācatvāri̱g̱ͫśo
bha̍vatya̱ṣṭāca̍tvārigͫśadakṣarā̱ jaga̍tī̱ jāga̍tāḥ pa̱śavo̱ jaga̍tyāme̱va
pa̱śuṣu̱ prati̍ tiṣṭhantyekādaśarā̱tro bha̍vati̱ pañca̱ vā ṛ̱tava̍
ārta̱vāḥ pañca̱rtuṣve̱vārta̱veṣu̍ saṃvathsa̱re pra̍ti̱ṣṭhāya̍ pra̱jāmava̍
ruṃdhate'tirā̱trāva̱bhito̍ bhavataḥ pra̱jāyai̱ pari̍gṛhītyai
||7.2.6||tasmā̎dgāya̱tryekā̱nna pa̍ñcā̱śacca̍
||7.2.6||22 ai̱ndra̱vā̱ya̱vāgrā̎ngṛhṇīyā̱dyaḥ kā̱maye̍ta yathāpū̱rvaṃ
pra̱jāḥ ka̍lpera̱nniti̍ ya̱jñasya̱ vai klṛpti̱manu̍ pra̱jāḥ ka̍lpante
ya̱jñasyāklṛ̍pti̱manu̱ na ka̍lpante yathāpū̱rvame̱va pra̱jāḥ ka̍lpayati̱ na
jyāyāgͫ̍ sa̱ṃ kanī̍yā̱nati̍ krāmatyaindravāya̱vāgrā̎ngṛhṇīyādāmayā̱vina̍ḥ
prā̱ṇena̱ vā e̱ṣa vyṛ̍dhyate̱ yasyā̱maya̍ti prā̱ṇa ai̎ndravāya̱vaḥ
prā̱ṇenai̱vaina̱g̱ͫ sama̍rdhayati maitrāvaru̱ṇāgrā̎ngṛhṇīra̱n yeṣā̎ṃ
dīkṣi̱tānā̎ṃ pra̱mīye̍ta
23 prāṇāpā̱nābhyā̱ṃ vā e̱te vyṛ̍dhyante̱ yeṣā̎ṃ dīkṣi̱tānā̎ṃ pra̱mīya̍te
prāṇāpā̱nau mi̱trāvaru̍ṇau prāṇāpā̱nāve̱va mu̍kha̱taḥ pari̍ haranta
āśvi̱nāgrā̎ngṛhṇītānujāva̱ro̎śvinau̱ vai de̱vānā̍mānujāva̱rau pa̱ścevāgra̱ṃ
paryai̍tāma̱śvinā̍ve̱tasya̍ de̱vatā̱ ya ā̍nujāva̱rastāve̱vaina̱magra̱ṃ pari̍
ṇayataḥ śu̱krāgrā̎ngṛhṇīta ga̱taśrī̎ḥ prati̱ṣṭhākā̍mo̱'sau vā ā̍di̱tyaḥ śu̱kra
e̱ṣo'nto'nta̍ṃ manu̱ṣya̍ḥ
24 śri̱yai ga̱ttvā ni va̍rta̱te'ntā̍de̱vānta̱mā ra̍bhate̱ na tata̱ḥ
pāpī̍yānbhavati ma̱nthya̍grāngṛhṇītābhi̱cara̍nnārtapā̱traṃ vā e̱tadyanma̍nthipā̱traṃ
mṛ̱tyunai̱vaina̍ṃ grāhayati tā̱jagārti̱mārccha̍tyāgraya̱ṇāgrā̎ngṛhṇīta̱ yasya̍
pi̱tā pi̍tāma̱haḥ puṇya̱ḥ syādatha̱ tanna prā̎pnu̱yādvā̱cā vā e̱ṣa i̍ndri̱yeṇa̱
vyṛ̍dhyate̱ yasya̍ pi̱tā pi̍tāma̱haḥ puṇyo̱
25 bhava̱tyatha̱ tanna prā̱pnotyura̍ ivai̱tadya̱jñasya̱ vāgi̍va̱
yadā̎graya̱ṇo vā̱caivaina̍mindri̱yeṇa̱ sama̍rdhayati̱ na tata̱ḥ
pāpī̍yānbhavatyu̱'kthyā̎grāngṛhṇītābhica̱ryamā̍ṇa̱ḥ sarve̍ṣā̱ṃ vā
e̱tatpātrā̍ṇāmiṃdri̱yaṃ yadu̍kthyapā̱tragͫ sarve̍ṇai̱vaina̍mindri̱yeṇāti̱ pra
yu̍ṅkte̱ sara̍svatya̱bhi no̍neṣi̱ vasya̱ iti̍ puro̱ruca̍ṃ kuryā̱dvāgvai
26 sara̍svatī vā̱caivaina̱mati̱ pra yu̍ṅkte̱ mā tvatkṣetrā̱ṇyara̍ṇāni ga̱nmetyā̍ha
mṛ̱tyorvai kṣetrā̱ṇyara̍ṇāni̱ tenai̱va mṛ̱tyoḥ, kṣetrā̍ṇi̱ na ga̍cchati
pū̱rṇāngrahā̎ngṛhṇīyādāmayā̱vina̍ḥ prā̱ṇān, vā e̱tasya̱ śugṛ̍cchati̱
yasyā̱maya̍ti prā̱ṇā grahā̎ḥ prā̱ṇāne̱vāsya̍ śu̱co mu̍ñcatyu̱ta
yadī̱tāsu̱rbhava̍ti̱ jīva̍tye̱va pū̱rṇāngrahā̎ngṛhṇīyā̱dyarhi̍ pa̱rjanyo̱ na
varṣe̎tprā̱ṇān, vā e̱tarhi̍ pra̱jānā̱g̱ͫ śugṛ̍cchati̱ yarhi̍ pa̱rjanyo̱
na varṣa̍ti prā̱ṇā grahā̎ḥ prā̱ṇāne̱va pra̱jānāgͫ̍ śu̱co mu̍ñcati tā̱jakpra
va̍rṣati
||7.2.7||pra̱mīye̍ta manu̱ṣya̍ ṛdhyate̱ yasya̍ pi̱tā pi̍tāma̱haḥ
puṇyo̱ vāgvā e̱va pū̱rṇāngrahā̱npañca̍vigͫśatiśca
||7.2.7||27 gā̱ya̱tro vā ai̎ndravāya̱vo gā̍ya̱traṃ
prā̍ya̱ṇīya̱maha̱stasmā̎tprāya̱ṇīye'ha̍nnaindravāya̱vo gṛ̍hyate̱ sva
e̱vaina̍mā̱yata̍ne gṛhṇāti̱ traiṣṭu̍bho̱ vai śu̱krastraiṣṭu̍bhaṃ
dvi̱tīya̱maha̱stasmā̎ddvi̱tīye'ha̍ñchu̱kro gṛ̍hyate̱
sva e̱vaina̍mā̱yata̍ne gṛhṇāti̱ jāga̍to̱ vā ā̎graya̱ṇo jāga̍taṃ
tṛ̱tīya̱maha̱stasmā̎ttṛ̱tīye'ha̍nnāgraya̱ṇo gṛ̍hyate̱ sva e̱vaina̍mā̱yata̍ne
gṛhṇātye̱tadvai
28 ya̱jñamā̍pa̱dyacchandāg̍syā̱pnoti̱ yadā̎graya̱ṇaḥ śvo gṛ̱hyate̱ yatrai̱va
ya̱jñamadṛ̍śa̱ntata̍ e̱vaina̱ṃ puna̱ḥ pra yu̍ṅkte̱ jaga̍nmukho̱ vai
dvi̱tīya̍strirā̱tro jāga̍ta āgraya̱ṇo yacca̍tu̱rthe'ha̍nnāgraya̱ṇo gṛ̱hyate̱
sva e̱vaina̍mā̱yata̍ne gṛhṇā̱tyatho̱ svame̱va chando'nu̍ pa̱ryāva̍rtante̱
rātha̍ṃtaro̱ vā ai̎ndravāya̱vo rātha̍ṃtaraṃ pañca̱mamaha̱stasmā̎t pañca̱me'ha̍
29 nnaindravāya̱vo gṛ̍hyate̱ sva e̱vaina̍mā̱yata̍ne gṛhṇāti̱ bārha̍to̱ vai
śu̱kro bārha̍tagͫ ṣa̱ṣṭhamaha̱stasmā̎tṣa̱ṣṭhe'ha̍ñchu̱kro gṛ̍hyate̱ sva
e̱vaina̍mā̱yata̍ne gṛhṇātye̱tadvai dvi̱tīya̍ṃ ya̱jñamā̍pa̱dyacchandāg̍syā̱pnoti̱
yacchu̱kraḥ śvo gṛ̱hyate̱ yatrai̱va ya̱jñamadṛ̍śa̱ntata̍ e̱vaina̱ṃ puna̱ḥ
pra yu̍ṅkte tri̱ṣṭuṅmukho̱ vai tṛ̱tīya̍strirā̱trastraiṣṭu̍bhaḥ
30 śu̱kro yathsa̍pta̱me'ha̍ñchu̱kro gṛ̱hyate̱ sva e̱vaina̍mā̱yata̍ne
gṛhṇā̱tyatho̱ svame̱va chando'nu̍ pa̱ryāva̍rtante̱ vāgvā ā̎graya̱ṇo
vāga̍ṣṭa̱mamaha̱stasmā̍daṣṭa̱me'ha̍nnāgraya̱ṇo gṛ̍hyate̱
sva e̱vaina̍mā̱yata̍ne gṛhṇāti prā̱ṇo vā ai̎ndravāya̱vaḥ prā̱ṇo
na̍va̱mamaha̱stasmā̎nnava̱me'ha̍nnaindravāya̱vo gṛ̍hyate̱ sva e̱vaina̍mā̱yata̍ne
gṛhṇātye̱tad
31 vai tṛ̱tīya̍ṃ ya̱jñamā̍pa̱dyacchandāg̍syā̱pnoti̱ yadai̎ndravāya̱vaḥ
śvo gṛ̱hyate̱ yatrai̱va ya̱jñamadṛ̍śa̱ntata̍ e̱vaina̱ṃ puna̱ḥ pra
yu̱ṅkte'tho̱ svame̱va chando'nu̍ pa̱ryāva̍rtante pa̱tho vā e̱te'dhyapa̍thena
yanti̱ ye̎'nyenai̎ndravāya̱vātpra̍ti̱padya̱nte'nta̱ḥ khalu̱ vā e̱ṣa ya̱jñasya̱
yadda̍śa̱mamaha̍rdaśa̱me'ha̍nnaindravāya̱vo gṛ̍hyate ya̱jñasyai̱
32 vānta̍ṃ ga̱tvāpa̍thā̱tpanthā̱mapi̍ ya̱ntyatho̱ yathā̱ vahī̍yasā
prati̱sāra̱ṃ vaha̍nti tā̱dṛge̱va tacchandāg̍sya̱nyo̎'nyasya̍
lo̱kama̱bhya̍dhyāya̱ntānye̱tenai̱va de̱vā vya̍vāhayannaindravāya̱vasya̱
vā e̱tadā̱yata̍na̱ṃ yacca̍tu̱rthamaha̱stasmi̍nnāgraya̱ṇo gṛ̍hyate̱
tasmā̍dāgraya̱ṇasyā̱yata̍ne nava̱me'ha̍nnaindravāya̱vo gṛ̍hyate śu̱krasya̱
vā e̱tadā̱yata̍na̱ṃ yatpa̍ñca̱ma
33 maha̱stasmi̍nnaindravāya̱vo gṛ̍hyate̱ tasmā̍daindravāya̱vasyā̱yata̍ne
sapta̱me'ha̍ñchu̱kro gṛ̍hyata āgraya̱ṇasya̱ vā
e̱tadā̱yata̍na̱ṃ yatṣa̱ṣṭhamaha̱stasmi̍ñchu̱kro gṛ̍hyate̱
tasmā̎cchu̱krasyā̱yata̍ne'ṣṭa̱me'ha̍nnāgraya̱ṇo gṛ̍hyate̱ chandāg̍sye̱va
tadvi vā̍hayati̱ pra vasya̍so vivā̱hamā̎pnoti̱ ya e̱vaṃ vedātho̍ de̱vatā̎bhya e̱va
ya̱jñe sa̱ṃvida̍ṃ dadhāti̱ tasmā̍di̱dama̱nyo̎'nyasmai̍ dadāti
||7.2.8||e̱tadvai
pa̍ñca̱me'ha̱ntraiṣṭu̍bha e̱tadgṛ̍hyate ya̱jñasya̍ pañca̱mama̱nyasmā̱
eka̍ñca
||7.2.8||gā̱ya̱trastraiṣṭu̍bho̱ jāga̍to̱ jaga̍nmu̱kho'tho̱ svagͫ
rātha̍ntaro̱ bārha̍ta e̱tadvai dvi̱tīyagͫ̍ śu̱krastri̱ṣṭuṅgu̱kho̱'tho̱
vākprā̱ṇa e̱tadatho̍ pa̱thaśca̍tu̱rthaṃ na̍va̱me pa̍ṃca̱magͫ sa̍pta̱me
yathṣa̱ṣṭhama̍ṣṭame'ha̱ñchaṃdāgͫ̍si ||
34 pra̱jāpa̍tirakāmayata̱ pra jā̍ye̱yeti̱ sa e̱taṃ
dvā̍daśarā̱trama̍paśya̱ttamāha̍ra̱ttenā̍yajata̱ tato̱ vai sa prājā̍yata̱
yaḥ kā̱maye̍ta̱ pra jā̍ye̱yeti̱ sa dvā̍daśarā̱treṇa̍ yajeta̱ praiva jā̍yate
brahmavā̱dino̍ vadantyagniṣṭo̱maprā̍yaṇā ya̱jñā atha̱ kasmā̍datirā̱traḥ pūrva̱ḥ
pra yu̍jyata̱ iti̱ cakṣu̍ṣī̱ vā e̱te ya̱jñasya̱ yada̍tirā̱trau ka̱nīni̍ke
agniṣṭo̱mau ya
35 da̍gniṣṭo̱maṃ pūrva̍ṃ prayuṃjī̱ranba̍hi̱rdhā ka̱nīni̍ke dadhyu̱stasmā̍datirā̱traḥ
pūrva̱ḥ pra yu̍jyate̱ cakṣu̍ṣī e̱va ya̱jñe dhi̱tvā ma̍dhya̱taḥ ka̱nīni̍ke̱
prati̍ dadhati̱ yo vai gā̍ya̱trīṃ jyoti̍ḥpakṣā̱ṃ veda̱ jyoti̍ṣā bhā̱sā su̍va̱rgaṃ
lo̱kame̍ti̱ yāva̍gniṣṭo̱mau tau pa̱kṣau ye'nta̍re̱'ṣṭāvu̱kthyā̎ḥ sa ā̱tmaiṣā
vai gā̍ya̱trī jyoti̍ḥpakṣā̱ ya e̱vaṃ veda̱ jyoti̍ṣā bhā̱sā su̍va̱rgaṃ lo̱ka
36 me̍ti pra̱jāpa̍ti̱rvā e̱ṣa dvā̍daśa̱dhā vihi̍to̱ yaddvā̍daśarā̱tro
yāva̍tirā̱trau tau pa̱kṣau ye'nta̍re̱'ṣṭāvu̱kthyā̎ḥ sa ā̱tmā pra̱jāpa̍ti̱rvāvaiṣa
santhsaddha̱ vai sa̱ttreṇa̍ spṛṇoti prā̱ṇā vai satprā̱ṇāne̱va spṛ̍ṇoti̱ sarvā̍sā̱ṃ
vā e̱te pra̱jānā̎ṃ prā̱ṇairā̍sate̱ ye sa̱ttramāsa̍te̱ tasmā̎tpṛcchanti̱ kime̱te
sa̱ttriṇa̱ iti̍ pri̱yaḥ pra̱jānā̱mutthi̍to bhavati̱ ya e̱vaṃ veda̍
||7.2.9||a̱gni̱ṣṭo̱mau yathsu̍va̱rga3gͫllo̱kaṃ pri̱yaḥ pra̱jānā̱ṃ pañca̍ ca
||7.2.9||37 na vā e̱ṣo̎'nyato̍ vaiśvānaraḥ suva̱rgāya̍ lo̱kāya̱ prābha̍vadū̱rdhvo ha̱ vā
e̱ṣa āta̍ta āsī̱tte de̱vā e̱taṃ vai̎śvāna̱raṃ paryau̍hanthsuva̱rgasya̍ lo̱kasya̱ pra
bhū̎tyā ṛ̱tavo̱ vā e̱tena̍ pra̱jāpa̍timayājaya̱nteṣvā̎rdhno̱dadhi̱ tadṛ̱dhnoti̍
ha̱ vā ṛ̱tvikṣu̱ ya e̱vaṃ vi̱dvāndvā̍daśā̱hena̱ yaja̍te̱ te̎'sminnaicchanta̱
sa rasa̱maha̍ vasa̱ntāya̱ prāya̍ccha̱d
38 yava̍ṃ grī̱ṣmāyauṣa̍dhīrva̱ṟṣābhyo̎ vrī̱hīñcha̱rade̍ māṣati̱lau
he̍mantaśiśi̱rābhyā̱ṃ tenendra̍ṃ pra̱jāpa̍tirayājaya̱ttato̱ vā indra̱
indro̍'bhava̱ttasmā̍dāhurānujāva̱rasya̍ ya̱jña iti̱ sa hye̍tenāgre'ya̍jatai̱ṣa
ha̱ vai ku̱ṇapa̍matti̱ yaḥ sa̱ttre pra̍tigṛ̱hṇāti̍ puruṣakuṇa̱pama̍śvakuṇa̱paṃ
gaurvā anna̱ṃ yena̱ pātre̱ṇānna̱ṃ bibhra̍ti̱ yattanna ni̱rṇeni̍jati̱ tato'dhi̱
39 mala̍ṃ jāyata̱ eka̍ e̱va ya̍je̱taiko̱ hi pra̱jāpa̍ti̱rārdhno̱ddvāda̍śa̱
rātrī̎rdīkṣi̱taḥ syā̱ddvāda̍śa̱ māsā̎ḥ saṃvathsa̱raḥ sa̍ṃvathsa̱raḥ pra̱jāpa̍tiḥ
pra̱jāpa̍ti̱rvāvaiṣa e̱ṣa ha̱ tvai jā̍yate̱ yastapa̱so'dhi̱ jāya̍te catu̱rdhā
vā e̱tāsti̱srasti̍sro̱ rātra̍yo̱ yaddvāda̍śo'pa̱sado̱ yāḥ pra̍tha̱mā ya̱jñaṃ
tābhi̱ḥ saṃbha̍rati̱ yā dvi̱tīyā̍ ya̱jñaṃ tābhi̱rā ra̍bhate̱
40 yāstṛ̱tīyā̱ḥ pātrā̍ṇi̱ tābhi̱rnirṇe̍nikte̱ yāśca̍tu̱rthīrapi̱
tābhi̍rā̱tmāna̍mantara̱taḥ śu̍ndhate̱ yo vā a̍sya pa̱śumatti̍ mā̱g̱ͫsagͫ
so̎'tti̱ yaḥ pu̍ro̱ḍāśa̍ṃ ma̱stiṣka̱g̱ͫ sa yaḥ pa̍rivā̱paṃ purī̍ṣa̱g̱ͫ
sa ya ājya̍ṃ ma̱jjāna̱g̱ͫ sa yassoma̱gg̱ sveda̱g̱ͫ so'pi̍ ha̱ vā a̍sya
śīrṣa̱ṇyā̍ ni̱ṣpada̱ḥ prati̍ gṛhṇāti̱ yo dvā̍daśā̱he pra̍tigṛ̱hṇāti̱
tasmā̎ddvādaśā̱hena̱ na yājya̍ṃ pā̱pmano̱ vyāvṛ̍ttyai
||7.2.10||aya̍ccha̱dadhi̍
rabhate dvādaśā̱hena̍ ca̱tvāri̍ ca
||7.2.10||41 eka̍smai̱ svāhā̱ dvābhyā̱g̱ svāhā̎ tri̱bhyaḥ svāhā̍ ca̱turbhya̱ḥ svāhā̍
pa̱ñcabhya̱ḥ svāhā̍ ṣa̱ḍbhyaḥ svāhā̍ sa̱ptabhya̱ḥ svāhā̎ṣṭā̱bhyaḥ svāhā̍
na̱vabhya̱ḥ svāhā̍ da̱śabhya̱ḥ svāhai̍kāda̱śabhya̱ḥ svāhā̎ dvāda̱śabhya̱ḥ
svāhā̎ trayoda̱śabhya̱ḥ svāhā̍ caturda̱śabhya̱ḥ svāhā̍ pañcada̱śabhya̱ḥ
svāhā̍ ṣoḍa̱śabhya̱ḥ svāhā̍ saptada̱śabhya̱ḥ svāhā̎ṣṭāda̱śabhya̱ḥ svāhaikā̱nna
vigͫ̍śa̱tyai svāhā̱ nava̍vigͫśatyai̱ svāhaikā̱nna ca̍tvāri̱g̱ͫśate̱
svāhā̱ nava̍catvārigͫśate̱ svāhaikā̱nna ṣa̱ṣṭyai svāhā̱ nava̍ṣaṣṭyai̱
svāhaikā̱nnāśī̱tyai svāhā̱ navā̍śītyai̱ svāhaikā̱nna śa̱tāya̱ svāhā̍ śa̱tāya̱
svāhā̱ dvābhyāgͫ̍ śa̱tābhyā̱g̱ svāhā̱ sarva̍smai̱ svāhā̎
||7.2.11||nava̍catvārigͫśate̱ svāhaikā̱nnaika̍vigͫśatiśca
||7.2.11||42 eka̍smai̱ svāhā̎ tri̱bhyaḥ svāhā̍ pa̱ñcabhya̱ḥ svāhā̍ sa̱ptabhya̱ḥ svāhā̍
na̱vabhya̱ḥ svāhai̍kāda̱śabhya̱ḥ svāhā̎ trayoda̱śabhya̱ḥ svāhā̍ pañcada̱śabhya̱ḥ
svāhā̍ saptada̱śabhya̱ḥ svāhaikā̱nna vigͫ̍śa̱tyai svāhā̱ nava̍vigͫśatyai̱
svāhaikā̱nna ca̍tvāri̱g̱ͫśate̱ svāhā̱ nava̍catvārigͫśate̱ svāhaikā̱nna
ṣa̱ṣṭyai svāhā̱ nava̍ṣaṣṭyai̱ svāhaikā̱nnāśī̱tyai svāhā̱ navā̍śītyai̱
svāhaikā̱nna śa̱tāya̱ svāhā̍ śa̱tāya̱ svāhā̱ sarva̍smai̱ svāhā̎
||7.2.12||eka̍smai tri̱bhyaḥ pa̍ñcā̱śat
||7.2.12||43 dvābhyā̱g̱ svāhā̍ ca̱turbhya̱ḥ svāhā̍ ṣa̱ḍbhyaḥ svāhā̎'ṣṭā̱bhyaḥ svāhā̍
da̱śabhya̱ḥ svāhā̎ dvāda̱śabhya̱ḥ svāhā̍ caturda̱śabhya̱ḥ svāhā̍ ṣoḍa̱śabhya̱ḥ
svāhā̎'ṣṭāda̱śabhya̱ḥ svāhā̍ vigͫśa̱tyai svāhā̱'ṣṭāna̍vatyai̱ svāhā̍ śa̱tāya̱
svāhā̱ sarva̍smai̱ svāhā̎
||7.2.13||dvābhyā̍ma̱ṣṭāna̍vatyai̱ ṣaḍvigͫ̍śatiḥ
||7.2.13||44 tri̱bhyaḥ svāhā̍ pa̱ñcabhya̱ḥ svāhā̍ sa̱ptabhya̱ḥ svāhā̍ na̱vabhya̱ḥ
svāhai̍kāda̱śabhya̱ḥ svāhā̎ trayoda̱śabhya̱ḥ svāhā̍ pañcada̱śabhya̱ḥ svāhā̍
saptada̱śabhya̱ḥ svāhaikā̱nna vigͫ̍śa̱tyai svāhā̱ nava̍vigͫśatyai̱ svāhaikā̱nna
ca̍tvāri̱g̱ͫśate̱ svāhā̱ nava̍catvārigͫśate̱ svāhaikā̱nna ṣa̱ṣṭyai svāhā̱
nava̍ṣaṣṭyai̱ svāhaikā̱nnāśī̱tyai svāhā̱ navā̍śītyai̱ svāhaikā̱nna śa̱tāya̱ svāhā̍
śa̱tāya̱ svāhā̱ sarva̍smai̱ svāhā̎
||7.2.14||tri̱bhyo̎'ṣṭā catvāri̱g̱ͫśat
||7.2.14||45 ca̱turbhya̱ḥ svāhā̎ṣṭā̱bhyaḥ svāhā̎ dvāda̱śabhya̱ḥ svāhā̍ ṣoḍa̱śabhya̱ḥ
svāhā̍ vigͫśa̱tyai svāhā̱ ṣaṇṇa̍vatyai̱ svāhā̍ śa̱tāya̱ svāhā̱ sarva̍smai̱
svāhā̎
||7.2.15||ca̱turbhya̱ḥ ṣaṇṇa̍vatyai̱ ṣoḍa̍śa
||7.2.15||46 pa̱ñcabhya̱ḥ svāhā̍ da̱śabhya̱ḥ svāhā̍ pañcada̱śabhya̱ḥ svāhā̍ vigͫśa̱tyai
svāhā̱ pañca̍navatyai̱ svāhā̍ śa̱tāya̱ svāhā̱ sarva̍smai̱ svāhā̎
||7.2.16||pa̱ñcabhya̱ḥ pañca̍navatyai̱ catu̍rdaśa
||7.2.16||47 da̱śabhya̱ḥ svāhā̍ vigͫśa̱tyai svāhā̎ tri̱g̱ͫśate̱ svāhā̍
catvāri̱g̱ͫśate̱ svāhā̍ pañcā̱śate̱ svāhā̍ ṣa̱ṣṭyai svāhā̍ sapta̱tyai
svāhā̍'śī̱tyai svāhā̍ nava̱tyai svāhā̍ śa̱tāya̱ svāhā̱ sarva̍smai̱ svāhā̎
||7.2.17||da̱śabhyo̱ dvāvigͫ̍śatiḥ
||7.2.17||48 vi̱g̱ͫśa̱tyai svāhā̍ catvāri̱g̱ͫśate̱ svāhā̍ ṣa̱ṣṭyai svāhā̍śī̱tyai
svāhā̍ śa̱tāya̱ svāhā̱ sarva̍smai̱ svāhā̎
||7.2.18||vi̱g̱ͫśa̱tyai dvāda̍śa
||7.2.18||49 pa̱ñcā̱śate̱ svāhā̍ śa̱tāya̱ svāhā̱ dvābhyāgͫ̍ śa̱tābhyā̱g̱ svāhā̎
tri̱bhyaḥ śa̱tebhya̱ḥ svāhā̍ ca̱turbhya̍ḥ śa̱tebhya̱ḥ svāhā̍ pa̱ñcabhya̍ḥ
śa̱tebhya̱ḥ svāhā̍ ṣa̱ḍbhyaḥ śa̱tebhya̱ḥ svāhā̍ sa̱ptabhya̍ḥ śa̱tebhya̱ḥ
svāhā̎ṣṭā̱bhyaḥ śa̱tebhya̱ḥ svāhā̍ na̱vabhya̍ḥ śa̱tebhya̱ḥ svāhā̍ sa̱hasrā̍ya̱
svāhā̱ sarva̍smai̱ svāhā̎
||7.2.19||pa̱ṃcā̱śate̱ dvātrigͫ̍śat
||7.2.19||50 śa̱tāya̱ svāhā̍ sa̱hasrā̍ya̱ svāhā̱'yutā̍ya̱ svāhā̍ ni̱yutā̍ya̱ svāhā̎
pra̱yutā̍ya̱ svāhārbu̍dāya̱ svāhā̱ nya̍rbudāya̱ svāhā̍ samu̱drāya̱ svāhā̱ madhyā̍ya̱
svāhāntā̍ya̱ svāhā̍ parā̱rdhāya̱ svāho̱ṣase̱ svāhā̱ vyu̍ṣṭyai̱ svāho̍deṣya̱te
svāho̎dya̱te svāhodi̍tāya̱ svāhā̍ suva̱rgāya̱ svāhā̍ lo̱kāya̱ svāhā̱ sarva̍smai̱
svāhā̎
||7.2.20||śa̱tāyā̱ṣṭātrigͫ̍śat
||7.2.20||saptamakāṇḍe tṛtīyaḥ praśnaḥ 3
1 pra̱java̱ṃ vā e̱tena̍ yanti̱ yadda̍śa̱mamaha̍ḥ pāpāva̱hīya̱ṃ vā e̱tena̍ bhavanti̱
yadda̍śa̱mamaha̱ṟyo vai pra̱java̍ṃ ya̱tāmapa̍thena prati̱padya̍te̱ yaḥ sthā̱ṇugͫ
hanti̱ yo bhreṣa̱ṃ nyeti̱ sa hī̍yate̱ sa yo vai da̍śa̱me'ha̍nnavivā̱kya
u̍paha̱nyate̱ sa hī̍yate̱ tasmai̱ ya upa̍hatāya̱ vyāha̱ tame̱vānvā̱rabhya̱
sama̍śnu̱te'tha̱ yo vyāha̱ sa
2 hī̍yate̱ tasmā̎ddaśa̱me'ha̍nnavivā̱kya upa̍hatāya̱ na vyucya̱matho̱
khalvā̍hurya̱jñasya̱ vai samṛ̍ddhena de̱vāḥ su̍va̱rgaṃ lo̱kamā̍yan,
ya̱jñasya̱ vyṛ̍ddhe̱nāsu̍rā̱nparā̍bhāvaya̱nniti̱ yatkhalu̱ vai ya̱jñasya̱
samṛ̍ddha̱ṃ tadyaja̍mānasya̱ yadvyṛ̍ddha̱ṃ tadbhrātṛ̍vyasya̱ sa yo vai
da̍śa̱me'ha̍nnavivā̱kya u̍paha̱nyate̱ sa e̱vāti̍ recayati̱ te ye bāhyā̍
dṛśī̱kava̱ḥ
3 syuste vi brū̍yu̱ryadi̱ tatra̱ na vi̱ndeyu̍rantaḥ sada̱sādvyucya̱ṃ yadi̱
tatra̱ na vi̱ndeyu̍rgṛ̱hapa̍tinā̱ vyucya̱ṃ tadvyucya̍me̱vātha̱ vā
e̱tathsa̍rparā̱jñiyā̍ ṛ̱gbhiḥ stu̍vantī̱yaṃ vai sarpa̍to̱ rājñī̱ yadvā a̱syāṃ
kiṃ cārca̍nti̱ yadā̍nṛ̱custene̱yagͫ sa̍rparā̱jñī te yade̱va kiṃca̍
vā̱cānṛ̱curyada̱to'dhya̍rci̱tāra̱
4 stadu̱bhaya̍mā̱ptvāva̱rudhyotti̍ṣṭhā̱meti̱ tābhi̱rmana̍sā stuvate̱ na vā
i̱māma̍śvara̱tho nāśva̍tarīra̱thaḥ sa̱dyaḥ paryā̎ptumarhati̱ mano̱ vā i̱māgͫ
sa̱dyaḥ paryā̎ptumarhati̱ mana̱ḥ pari̍bhavitu̱matha̱ brahma̍ vadanti̱ pari̍mitā̱ vā
ṛca̱ḥ pari̍mitāni̱ sāmā̍ni̱ pari̍mitāni̱ yajū̱g̱ṣyathai̱tasyai̱vānto̱ nāsti̱
yadbrahma̱ tatpra̍tigṛṇa̱ta ā ca̍kṣīta̱ sa pra̍tiga̱raḥ
||7.3.1||vyāha̱ sa
dṛ̍śī̱kavo̎'rci̱tāra̱ḥ sa eka̍ṃ ca
||7.3.1||5 bra̱hma̱vā̱dino̍ vadanti̱ kiṃ dvā̍daśā̱hasya̍ pratha̱menāhna̱rtvijā̱ṃ yaja̍māno
vṛṅkta̱ iti̱ teja̍ indri̱yamiti̱ kiṃ dvi̱tīye̱neti̍ prā̱ṇāna̱nnādya̱miti̱
kiṃ tṛ̱tīye̱neti̱ trīni̱mā3gͫllo̱kāniti̱ kiṃ ca̍tu̱rtheneti̱ catu̍ṣpadaḥ
pa̱śūniti̱ kiṃ pa̍ñca̱meneti̱ pañcā̎kṣarāṃ pa̱ṅktimiti̱ kigͫ ṣa̱ṣṭheneti̱
ṣaḍṛ̱tūniti̱ kigͫ sa̍pta̱meneti̍ sa̱ptapa̍dā̱g̱ͫ śakva̍rī̱miti̱
6 kima̍ṣṭa̱menetya̱ṣṭākṣa̍rāṃ gāya̱trīmiti̱ kiṃ na̍va̱meneti̍
tri̱vṛta̱gg̱ stoma̱miti̱ kiṃ da̍śa̱meneti̱ daśā̎kṣarāṃ vi̱rāja̱miti̱
kime̍kāda̱śenetyekā̍daśākṣarāṃ tri̱ṣṭubha̱miti̱ kiṃ dvā̍da̱śeneti̱
dvāda̍śākṣarā̱ṃ jaga̍tī̱mitye̱tāva̱dvā a̍sti̱ yāva̍de̱tadyāva̍de̱vāsti̱
tade̍ṣāṃ vṛṅkte
||7.3.2||śakva̍rī̱mityeka̍ catvārigͫśacca
||7.3.2||7 e̱ṣa vā ā̱pto dvā̍daśā̱ho yattra̍yodaśarā̱traḥ sa̍mā̱na2gͫ
hye̍tadaha̱ryatprā̍ya̱ṇīya̍ścodaya̱nīya̍śca̱ trya̍tirātro bhavati̱ traya̍
i̱me lo̱kā e̱ṣāṃ lo̱kānā̱māptyai̎ prā̱ṇo vai pra̍tha̱mo̍'tirā̱tro vyā̱no
dvi̱tīyo̍'pā̱nastṛ̱tīya̍ḥ prāṇāpānodā̱neṣve̱vānnādye̱ prati̍ tiṣṭhanti̱
sarva̱māyu̍ryanti̱ ya e̱vaṃ vi̱dvāgͫsa̍strayodaśarā̱tramāsa̍te̱ tadā̍hu̱rvāgvā
e̱ṣā vita̍tā̱
8 yaddvā̍daśā̱hastāṃ vi cchi̍ndyu̱ryanmadhye̍'tirā̱traṃ ku̱ryuru̍pa̱dāsu̍kā
gṛ̱hapa̍te̱rvāksyā̍du̱pari̍ṣṭācchando̱mānā̎ṃ mahāvra̱taṃ ku̍rvanti̱ saṃta̍tāme̱va
vāca̱mava̍ ruṃdha̱te'nu̍padāsukā gṛ̱hapa̍te̱rvāgbha̍vati pa̱śavo̱ vai cha̍ndo̱mā
anna̍ṃ mahāvra̱taṃ yadu̱pari̍ṣṭācchando̱mānā̎ṃ mahāvra̱taṃ ku̱rvanti̍ pa̱śuṣu̍
cai̱vānnādye̍ ca̱ prati̍ tiṣṭhanti
||7.3.3||vita̍tā̱ trica̍tvārigͫśacca
||7.3.3||9 ā̱di̱tyā a̍kāmayanto̱bhayo̎rlo̱kayor̍ṛdhnuyā̱meti̱ ta e̱taṃ
ca̍turdaśarā̱trama̍paśya̱ntamāha̍ra̱ntenā̍yajanta̱ tato̱
vai ta u̱bhayo̎rlo̱kayo̍rārdhnuvanna̱smi2gͫścā̱muṣmigg̍śca
ya e̱vaṃ vi̱dvāgͫsa̍ścaturdaśarā̱tramāsa̍ta u̱bhayo̍re̱va
lo̱kayor̍ṛdhnuvantya̱smi2gͫścā̱muṣmigg̍śca caturdaśarā̱tro bha̍vati sa̱pta
grā̱myā oṣa̍dhayaḥ sa̱ptāra̱ṇyā u̱bhayī̍ṣā̱mava̍ruddhyai̱ yatpa̍rā̱cīnā̍ni
pṛ̱ṣṭhāni̱
10 bhava̍ntya̱mume̱va tairlo̱kama̱bhi ja̍yanti̱ yatpra̍tī̱cīnā̍ni pṛ̱ṣṭhāni̱
bhava̍ntī̱mame̱va tairlo̱kama̱bhi ja̍yanti trayastri̱g̱ͫśau ma̍dhya̱ta stomau̍
bhavata̱ḥ sāmrā̎jyame̱va ga̍cchantyadhirā̱jau bha̍vato'dhirā̱jā e̱va sa̍mā̱nānā̎ṃ
bhavantyatirā̱trāva̱bhito̍ bhavata̱ḥ pari̍gṛhītyai
||7.3.4||pṛ̱ṣṭhāni̱
catu̍strigͫśacca
||7.3.4||11 pra̱jāpa̍tiḥ suva̱rgaṃ lo̱kamai̱ttaṃ de̱vā anvā̍ya̱ntānā̍di̱tyāśca̍
pa̱śava̱ścānvā̍ya̱nte de̱vā a̍bruva̱ṉ yān pa̱śūnu̱pājī̍viṣma̱
ta i̱me̎'nvāgma̱nniti̱ tebhya̍ e̱taṃ ca̍turdaśarā̱traṃ pratyau̍ha̱nta
ā̍di̱tyāḥ pṛ̱ṣṭhaiḥ su̍va̱rgaṃ lo̱kamāro̍hantrya̱hābhyā̍ma̱smi3gͫllo̱ke
pa̱śūnpratyau̍hanpṛ̱ṣṭhairā̍di̱tyā a̱muṣmi̍3gͫllo̱ka
ārdhnu̍vantrya̱hābhyā̍ma̱smi3gͫ
12 llo̱ke pa̱śavo̱ ya e̱vaṃ vi̱dvāgͫsa̍ścaturdaśarā̱tramāsa̍ta u̱bhayo̍re̱va
lo̱kayor̍ṛdhnuvantya̱smi2gͫścā̱muṣmigg̍śca pṛ̱ṣṭhaire̱vāmuṣmi̍3gͫllo̱ka
ṛ̍dhnu̱vanti̍ trya̱hābhyā̍ma̱smi3gͫllo̱ke jyoti̱rgaurāyu̱riti̍
trya̱ho bha̍vatī̱yaṃ vāva jyoti̍ra̱ntari̍kṣa̱ṃ gaura̱sāvāyu̍ri̱māne̱va
lo̱kāna̱bhyāro̍hanti̱ yada̱nyata̍ḥ pṛ̱ṣṭhāni̱ syurvivi̍vadha2gͫ syā̱nmadhye̍
pṛ̱ṣṭhāni̍ bhavanti savivadha̱tvāyau
13 jo̱ vai vī̱rya̍ṃ pṛ̱ṣṭhānyoja̍ e̱va vī̱rya̍ṃ madhya̱to
da̍dhate bṛhadrathaṃta̱rābhyā̎ṃ yantī̱yaṃ vāva ra̍thaṃta̱rama̱sau
bṛ̱hadā̱bhyāme̱va ya̱ntyatho̍ a̱nayo̍re̱va prati̍ tiṣṭhantye̱te vai
ya̱jñasyā̎ñja̱sāya̍nī sru̱tī tābhyā̍me̱va su̍va̱rgaṃ lo̱kaṃ ya̍nti̱
parā̎ñco̱ vā e̱te su̍va̱rgaṃ lo̱kama̱bhyāro̍hanti̱ ye pa̍rā̱cīnā̍ni
pṛ̱ṣṭhānyu̍pa̱yanti̍ pra̱tyaṅtrya̱ho bha̍vati pra̱tyava̍rūḍhyā̱ atho̱
prati̍ṣṭhityā u̱bhayo̎rlo̱kayor̍ṛ̱ddhvotti̍ṣṭhanti̱ catu̍rdaśai̱tāstāsā̱ṃ
yā daśa̱ daśā̎kṣarā vi̱rāḍanna̍ṃ vi̱rāḍvi̱rājai̱vānnādya̱mava̍ ruṃdhate̱
yāścata̍sra̱ścata̍sro̱ diśo̍ di̱kṣve̍va prati̍ tiṣṭhantyatirā̱trāva̱bhito̍
bhavata̱ḥ pari̍gṛhītyai
||7.3.5||ārdhnu̍vantrya̱hābhyā̍ma̱sminthsa̍vivadha̱tvāya̱
prati̍ṣṭhityā̱ eka̍trigͫśacca
||7.3.5||14 indro̱ vai sa̱dṛṅge̱vatā̍bhirāsī̱thsa na
vyā̱vṛta̍magaccha̱thsa pra̱jāpa̍ti̱mupā̍dhāva̱ttasmā̍ e̱taṃ
pa̍ñcadaśarā̱traṃ prāya̍ccha̱ttamāha̍ra̱ttenā̍yajata̱ tato̱ vai
so̎'nyābhi̍rde̱vatā̍bhirvyā̱vṛta̍magaccha̱dya e̱vaṃ vi̱dvāgͫsa̍ḥ
pañcadaśarā̱tramāsa̍te vyā̱vṛta̍me̱va pā̱pmanā̱ bhrātṛ̍vyeṇa gacchanti̱
jyoti̱rgaurāyu̱riti̍ trya̱ho bha̍vatī̱yaṃ vāva jyoti̍ra̱ntari̍kṣa̱ṃ
15 gaura̱sāvāyu̍re̱ṣve̍va lo̱keṣu̱ prati̍ tiṣṭha̱ntyasa̍ttra̱ṃ vā
e̱tadyada̍chando̱maṃ yaccha̍ndo̱mā bhava̍nti̱ tena̍ sa̱ttraṃ de̱vatā̍ e̱va
pṛ̱ṣṭhairava̍ ruṃdhate pa̱śūñcha̍ndo̱ mairojo̱ vai vī̱rya̍ṃ pṛ̱ṣṭhāni̍
pa̱śava̍śchando̱mā oja̍sye̱va vī̱rye̍ pa̱śuṣu̱ prati̍ tiṣṭhanti
pañcadaśarā̱tro bha̍vati pañcada̱śo vajro̱ vajra̍me̱va bhrātṛ̍vyebhya̱ḥ
pra ha̍rantyati rā̱trāva̱bhito̍ bhavata indri̱yasya̱ pari̍gṛhītyai
||7.3.6||a̱ntari̍kṣamindri̱yasyaika̍ṃ ca
||7.3.6||16 indro̱ vai śi̍thi̱la i̱vāpra̍tiṣṭhita āsī̱thso'su̍rebhyo'bibhe̱thsa
pra̱jāpa̍ti̱mupā̍dhāva̱ttasmā̍ e̱taṃ pa̍ñcadaśarā̱traṃ vajra̱ṃ
prāya̍ccha̱ttenāsu̍rānparā̱bhāvya̍ vi̱jitya̱ śriya̍magacchadagni̱ṣṭutā̍ pā̱pmāna̱ṃ
nira̍dahata pañcadaśarā̱treṇaujo̱ bala̍miṃdri̱yaṃ vī̱rya̍mā̱tmanna̍dhatta̱ ya
e̱vaṃ vi̱dvāgͫsa̍ḥ pañcadaśarā̱tramāsa̍te̱ bhrātṛ̍vyāne̱va pa̍rā̱bhāvya̍
vi̱jitya̱ śriya̍ṃ gacchantyagni̱ṣṭutā̍ pā̱pmāna̱ṃ ni
17 rda̍hante pañcadaśarā̱treṇaujo̱ bala̍miṃdri̱yaṃ vī̱rya̍mā̱tmanda̍dhata e̱tā e̱va
pa̍śa̱vyā̎ḥ pañca̍daśa̱ vā a̍rdhamā̱sasya̱ rātra̍yo'rdhamāsa̱śaḥ sa̍ṃvathsa̱ra
ā̎pyate saṃvathsa̱raṃ pa̱śavo'nu̱ pra jā̍yante̱ tasmā̎tpaśa̱vyā̍ e̱tā e̱va
su̍va̱rgyā̎ḥ pañca̍daśa̱ vā a̍rdhamā̱sasya̱ rātra̍yo'rdhamāsa̱śaḥ sa̍ṃvathsa̱ra
ā̎pyate saṃvathsa̱raḥ su̍va̱rgo lo̱kastasmā̎thsuva̱rgyā̎ jyoti̱rgaurāyu̱riti̍
trya̱ho bha̍vatī̱yaṃ vāva jyoti̍ra̱ntari̍kṣa̱ṃ
18 gaura̱sāvāyu̍ri̱māne̱va lo̱kāna̱bhyāro̍hanti̱ yada̱nyata̍ḥ pṛ̱ṣṭhāni̱
syurvivi̍vadha2gͫ syā̱nmadhye̍ pṛ̱ṣṭhāni̍ bhavanti savivadha̱tvāyaujo̱ vai
vī̱rya̍ṃ pṛ̱ṣṭhānyoja̍ e̱va vī̱rya̍ṃ madhya̱to da̍dhate bṛhadrathaṃta̱rābhyā̎ṃ
yantī̱yaṃ vāva ra̍thaṃta̱rama̱sau bṛ̱hadā̱bhyāme̱va ya̱ntyatho̍ a̱nayo̍re̱va prati̍
tiṣṭhantye̱te vai ya̱jñasyā̎ñja̱sāya̍nī sru̱tī tābhyā̍me̱va su̍va̱rgaṃ lo̱kaṃ
19 ya̍nti̱ parā̎ñco̱ vā e̱te su̍va̱rgaṃ lo̱kama̱bhyāro̍hanti̱ ye pa̍rā̱cīnā̍ni
pṛ̱ṣṭhānyu̍pa̱yanti̍ pra̱tyaṅtrya̱ho bha̍vati pra̱tyava̍rūḍhyā̱ atho̱
prati̍ṣṭhityā u̱bhayo̎rlo̱kayor̍ṛ̱ddhvotti̍ṣṭhanti̱ pañca̍daśai̱tāstāsā̱ṃ yā
daśa̱ daśā̎kṣarā vi̱rāḍanna̍ṃ vi̱rāḍvi̱rājai̱vānnādya̱mava̍ ruṃdhate̱ yāḥ pañca̱
pañca̱ diśo̍ di̱kṣve̍va prati̍ tiṣṭhantyatirā̱trāva̱bhito̍ bhavata indri̱yasya̍
vī̱rya̍sya pra̱jāyai̍ paśū̱nāṃ pari̍gṛhītyai
||7.3.7||ga̱ccha̱ntya̱gni̱ṣṭutā̍
pā̱pmāna̱nnira̱ntari̍kṣaṃ lo̱kaṃ pra̱jāyai̱ dve ca̍
||7.3.7||20 pra̱jāpa̍tirakāmayatānnā̱daḥ syā̱miti̱ sa e̱tagͫ
sa̍ptadaśarā̱trama̍paśya̱ttamāha̍ra̱ttenā̍yajata̱ tato̱ vai so̎'nnā̱do̍'bhava̱dya
e̱vaṃ vi̱dvāgͫsa̍ḥ saptadaśarā̱tramāsa̍te'nnā̱dā e̱va bha̍vanti pañcā̱ho
bha̍vati̱ pañca̱ vā ṛ̱tava̍ḥ saṃvathsa̱ra ṛ̱tuṣve̱va sa̍ṃvathsa̱re prati̍
tiṣṭha̱ntyatho̱ pañcā̎kṣarā pa̱ṅktiḥ pāṅkto̍ ya̱jño ya̱jñame̱vāva̍
ruṃdha̱te'sa̍ttra̱ṃ vā e̱tad
21 yada̍cchando̱maṃ yaccha̍ndo̱mā bhava̍nti̱ tena̍ sa̱ttraṃ de̱vatā̍ e̱va
pṛ̱ṣṭhairava̍ ruṃdhate pa̱śūñcha̍ndo̱mairojo̱ vai vī̱rya̍ṃ pṛ̱ṣṭhāni̍
pa̱śava̍śchando̱mā oja̍sye̱va vī̱rye̍ pa̱śuṣu̱ prati̍ tiṣṭhanti saptadaśarā̱tro
bha̍vati saptada̱śaḥ pra̱jāpa̍tiḥ pra̱jāpa̍te̱rāptyā̍ atirā̱trāva̱bhito̍
bhavato̱'nnādya̍sya̱ pari̍gṛhītyai
||7.3.8||e̱tathsa̱pta trigͫ̍śacca
||7.3.8||22 sā vi̱rāḍvi̱kramyā̍tiṣṭha̱dbrahma̍ṇā de̱veṣvanne̱nāsu̍reṣu̱ te de̱vā
a̍kāmayanto̱bhaya̱g̱ͫ saṃ vṛ̍ñjīmahi̱ brahma̱ cānna̱ṃ ceti̱ ta e̱tā
vigͫ̍śa̱tigͫ rātrī̍rapaśya̱ntato̱ vai ta u̱bhaya̱g̱ͫ sama̍vṛñjata̱
brahma̱ cānna̍ṃ ca brahmavarca̱sino̎'nnā̱dā a̍bhava̱ṉ ya e̱vaṃ vi̱dvāgͫsa̍
e̱tā āsa̍ta u̱bhaya̍me̱va saṃ vṛ̍ñjate̱ brahma̱ cānna̍ṃ ca
23 brahmavarca̱sino̎'nnā̱dā bha̍vanti̱ dve vā e̱te vi̱rājau̱ tayo̍re̱va nānā̱
prati̍ tiṣṭhanti vi̱g̱ͫśo vai puru̍ṣo̱ daśa̱ hastyā̍ a̱ṅgula̍yo̱ daśa̱
padyā̱ yāvā̍ne̱va puru̍ṣa̱stamā̱ptvotti̍ṣṭhanti̱ jyoti̱rgaurāyu̱riti̍
trya̱hā bha̍vantī̱yaṃ vāva jyoti̍ra̱ntari̍kṣa̱ṃ gaura̱sāvāyu̍ri̱māne̱va
lo̱kāna̱bhyāro̍hantyabhipū̱rvaṃ trya̱hā bha̍vantyabhipū̱rvame̱va su̍va̱rgaṃ
24 lo̱kama̱bhyāro̍hanti̱ yada̱nyata̍ḥ pṛ̱ṣṭhāni̱ syurvivi̍vadha2gͫ syā̱nmadhye̍
pṛ̱ṣṭhāni̍ bhavanti savivadha̱tvāyaujo̱ vai vī̱rya̍ṃ pṛ̱ṣṭhānyoja̍
e̱va vī̱rya̍ṃ madhya̱to da̍dhate bṛhadrathaṃta̱rābhyā̎ṃ yantī̱yaṃ vāva
ra̍thaṃta̱rama̱sau bṛ̱hadā̱bhyāme̱va ya̱ntyatho̍ a̱nayo̍re̱va prati̍
tiṣṭhantye̱te vai ya̱jñasyā̎ñja̱sāya̍nī sru̱tī tābhyā̍me̱va su̍va̱rgaṃ lo̱kaṃ
ya̍nti̱ parā̎ñco̱ vā e̱te su̍va̱rgaṃ lo̱ka ma̱bhyāro̍hanti̱ ye pa̍rā̱cīnā̍ni
pṛ̱ṣṭhānyu̍pa̱yanti̍ pra̱tyaṅtrya̱ho bha̍vati pra̱tyava̍rūḍhyā̱ atho̱
prati̍ṣṭhityā u̱bhayo̎rlo̱kayor̍ṛ̱ddhvotti̍ṣṭhantyatirā̱trāva̱bhito̍ bhavato
brahmavarca̱sasyā̱nnādya̍sya̱ pari̍gṛhītyai
||7.3.9||vṛ̱ṃja̱te̱ brahma̱
cānna̍ṃca suva̱rgame̱te su̍va̱rgantrayo̍ vigͫśatiśca
||7.3.9||25 a̱sāvā̍di̱tyo̎'smi3gͫllo̱ka ā̍sī̱ttaṃ de̱vāḥ pṛ̱ṣṭhaiḥ pa̍ri̱gṛhya̍
suva̱rgaṃ lo̱kama̍gamaya̱nparai̍ra̱vastā̱tparya̍gṛhṇandivākī̱rtye̍na suva̱rge lo̱ke
pratya̍sthāpaya̱nparai̎ḥ pa̱rastā̱tparya̍gṛhṇanpṛ̱ṣṭhairu̱pāvā̍roha̱nthsa
vā a̱sāvā̍di̱tyo̍'muṣmi̍3gͫllo̱ke parai̍rubha̱yata̱ḥ pari̍gṛhīto̱
yatpṛ̱ṣṭhāni̱ bhava̍nti suva̱rgame̱va tairlo̱kaṃ yaja̍mānā yanti̱
parai̍ra̱vastā̱tpari̍ gṛhṇanti divākī̱rtye̍na
26 suva̱rge lo̱ke prati̍ tiṣṭhanti̱ parai̎ḥ pa̱rastā̱tpari̍ gṛhṇanti
pṛ̱ṣṭhairu̱pāva̍rohanti̱ yatpare̍ pa̱rastā̱nna syuḥ parā̎ñcaḥ
suva̱rgāllo̱kānniṣpa̍dyera̱ṉ yada̱vastā̱nna syuḥ pra̱jā nirda̍heyura̱bhito̍
divākī̱rtya̍ṃ para̍ḥ sāmāno bhavanti suva̱rga e̱vainā̎3gͫllo̱ka u̍bha̱yata̱ḥ pari̍
gṛhṇanti̱ yaja̍mānā̱ vai di̍vākī̱rtyagͫ̍ saṃvathsa̱raḥ para̍ḥ sāmāno̱'bhito̍
divākī̱rtya̍ṃ para̍ḥ sāmāno bhavanti saṃvathsa̱ra e̱vobha̱yata̱ḥ
27 prati̍ tiṣṭhanti pṛ̱ṣṭhaṃ vai di̍vākī̱rtya̍ṃ pā̱rśve para̍ḥ sāmāno̱'bhito̍
divākī̱rtya̍ṃ para̍ḥ sāmāno bhavanti̱ tasmā̍da̱bhita̍ḥ pṛ̱ṣṭhaṃ pā̱rśve
bhūyi̍ṣṭhā̱ grahā̍ gṛhyante̱ bhūyi̍ṣṭhagͫ śasyate ya̱jñasyai̱va tanma̍dhya̱to
gra̱nthiṃ gra̍thna̱ntyavi̍sragͫsāya sa̱pta gṛ̍hyante sa̱pta vai śī̍rṣa̱ṇyā̎ḥ
prā̱ṇāḥ prā̱ṇāne̱va yaja̍māneṣu dadhati̱ yatpa̍rā̱cīnā̍ni pṛ̱ṣṭhāni̱
bhava̍ntya̱mume̱va tairlo̱kama̱bhyāro̍hanti̱ yadi̱maṃ lo̱kaṃ na
28 pra̍tyava̱rohe̍yu̱rudvā̱ mādye̍yu̱ryaja̍mānā̱ḥ pra vā̍ mīyera̱ṉ
yatpra̍tī̱cīnā̍ni pṛ̱ṣṭhāni̱ bhava̍ntī̱mame̱va tairlo̱kaṃ pra̱tyava̍roha̱ntyatho̍
a̱sminne̱va lo̱ke prati̍ tiṣṭha̱ntyanu̍nmādā̱yendro̱ vā apra̍tiṣṭhita
āsī̱thsa pra̱jāpa̍ti̱mupā̍dhāva̱ttasmā̍ e̱tame̍kavigͫśatirā̱traṃ
prāya̍ccha̱ttamāha̍ra̱ttenā̍yajata̱ tato̱ vai sa pratya̍tiṣṭha̱dye
ba̍huyā̱jino'pra̍tiṣṭhitā̱ḥ
29 syusta e̍kavigͫśatirā̱tramā̍sīra̱ndvāda̍śa̱ māsā̱ḥ pañca̱rtava̱straya̍
i̱me lo̱kā a̱sāvā̍di̱tya e̍kavi̱g̱ͫśa e̱tāva̍nto̱ vai
de̍valo̱kāsteṣve̱va ya̍thāpū̱rvaṃ prati̍ tiṣṭhantya̱sāvā̍di̱tyo na
vya̍rocata̱ sa pra̱jāpa̍ti̱mupā̍dhāva̱ttasmā̍ e̱tame̍kavigͫśatirā̱traṃ
prāya̍ccha̱ttamāha̍ra̱ttenā̍yajata̱ tato̱ vai so̍'rocata̱ ya e̱vaṃ vi̱dvāgͫsa̍
ekavigͫśatirā̱tramāsa̍te̱ roca̍nta e̱vaika̍vigͫśatirā̱tro bha̍vati̱ rugvā
e̍kavi̱g̱ͫśo ruca̍me̱va ga̍ccha̱ntyatho̎ prati̱ṣṭhāme̱va pra̍ti̱ṣṭhā
hye̍kavi̱g̱ͫśo̍'tirā̱trāva̱bhito̍ bhavato brahmavarca̱sasya̱ pari̍gṛhītyai
||7.3.10||gṛ̱hṇa̱nti̱ di̱vā̱kī̱rtye̍nai̱vobha̱yato̱ nāpra̍tiṣṭhitā̱ āsa̍ta̱
eka̍vigͫśatiśca
||7.3.10||30 a̱rvāṅya̱jñaḥ saṃ krā̍matva̱muṣmā̱dadhi̱ māma̱bhi | ṛṣī̍ṇā̱ṃ yaḥ pu̱rohi̍taḥ
|| nirde̍va̱ṃ nirvī̍raṃ kṛ̱tvā viṣka̍ndha̱ṃ tasmi̍n hīyatā̱ṃ yo̎'smāndveṣṭi̍
| śarī̍raṃ yajñaśama̱laṃ kusī̍da̱ṃ tasmi̎nthsīdatu̱ yo̎'smāndveṣṭi̍ || yajña̍
ya̱jñasya̱ yatteja̱stena̱ saṃ krā̍ma̱ māma̱bhi | brā̱hma̱ṇānṛ̱tvijo̍ de̱vān,
ya̱jñasya̱ tapa̍sā te savā̱hamā hu̍ve || i̱ṣṭena̍ pa̱kvamupa̍
31 te huve savā̱ham | saṃ te̍ vṛñje sukṛ̱tagͫ saṃ pra̱jāṃ pa̱śūn ||
prai̱ṣānthsā̍midhe̱nīrā̍ghā̱rāvājya̍bhāgā̱vāśru̍taṃ pra̱tyāśru̍ta̱mā śaṛ̍ṇāmi
te | pra̱yā̱jā̱nū̱yā̱jānthsvi̍ṣṭa̱kṛta̱miḍā̍mā̱śiṣa̱ ā vṛ̍ñje̱
suva̍ḥ || a̱gninendre̍ṇa̱ some̍na̱ sara̍svatyā̱ viṣṇu̍nā de̱vatā̍bhiḥ |
yā̱jyā̱nu̱vā̱kyā̎bhyā̱mupa̍ te huve sa vā̱haṃ ya̱jñamā da̍dete̱ vaṣa̍ṭkṛtam ||
stu̱tagͫ śa̱straṃ pra̍tiga̱raṃ graha̱miḍā̍mā̱śiṣa̱
32 ā vṛ̍ñje̱ suva̍ḥ | pa̱tnī̱sa̱ṃyā̱jānupa̍ te huve savā̱hagͫ sa̍miṣṭa
ya̱jurā da̍de̱ tava̍ || pa̱śūnthsu̱taṃ pu̍ro̱ḍāśā̱nthsava̍nā̱nyota ya̱jñam |
de̱vānthsendrā̱nupa̍ te huve savā̱hama̱gnimu̍khā̱nthsoma̍vato̱ ye ca̱ viśve̎
||7.3.11||upa̱ graha̱miḍā̍mā̱śiṣo̱ dvātrigͫ̍śacca
||7.3.11||33 bhū̱taṃ bhavya̍ṃ bhavi̱ṣyadvaṣa̱ṭthsvāhā̱ nama̱ ṛksāma̱ yaju̱rvaṣa̱ṭthsvāhā̱
namo̍ gāya̱trī tri̱ṣṭubjaga̍tī̱ vaṣa̱ṭthsvāhā̱ nama̍ḥ pṛthi̱vya̍ntari̍kṣa̱ṃ
dyaurvaṣa̱ṭthsvāhā̱ namo̱gnirvā̱yuḥ sūṟyo̱ vaṣa̱ṭthsvāhā̱ nama̍ḥ prā̱ṇo
vyā̱no̍'pā̱no vaṣa̱ṭthsvāhā̱ namo'nna̍ṃ kṛ̱ṣirvṛṣṭi̱rvaṣa̱ṭthsvāhā̱ nama̍ḥ
pi̱tā pu̱traḥ pautro̱ vaṣa̱ṭthsvāhā̱ namo̱ bhūrbhuva̱ḥ suva̱rvaṣa̱ṭthsvāhā̱ nama̍ḥ
||7.3.12||bhuva̍śca̱tvāri̍ ca
||7.3.12||34 ā me̍ gṛ̱hā bha̍va̱ntvā pra̱jā ma̱ ā mā̍ ya̱jño vi̍śatu vī̱ryā̍vān |
āpo̍ de̱vīrya̱jñiyā̱ mā vi̍śantu sa̱hasra̍sya mā bhū̱mā mā pra hā̍sīt || ā me̱
graho̍ bhava̱tvā pu̍ro̱rukstu̍taśa̱stre mā vi̍śatāgͫ sa̱mīcī̎ | ā̱di̱tyā
ru̱drā vasa̍vo me sada̱syā̎ḥ sa̱hasra̍sya mā bhū̱mā mā pra hā̍sīt || ā mā̎gniṣṭo̱mo
vi̍śatū̱kthya̍ścātirā̱tro mā vi̍śatvāpiśarva̱raḥ | ti̱ro a̍hniyā mā̱ suhu̍tā̱
ā vi̍śantu sa̱hasra̍sya mā bhū̱mā mā pra hā̍sīt
||7.3.13||a̱gni̱ṣṭo̱mo
vi̍śatva̱ṣṭāda̍śa ca
||7.3.13||35 a̱gninā̱ tapo'nva̍bhavadvā̱cā brahma̍ ma̱ṇinā̍ rū̱pāṇīndre̍ṇa
de̱vān, vāte̍na prā̱ṇānthsūrye̍ṇa̱ dyāṃ ca̱ndrama̍sā̱ nakṣa̍trāṇi
ya̱mena̍ pi̱tṝnrājñā̍ manu̱ṣyā̎npha̱lena̍ nāde̱yāna̍jaga̱reṇa̍
sa̱rpānvyā̱ghreṇā̍ra̱ṇyānpa̱śūñchye̱nena̍ pata̱triṇo̱ vṛṣṇāśvā̍nṛṣa̱bheṇa̱
gāba̱stenā̱jā vṛ̱ṣṇināvī̎rvrī̱hiṇānnā̍ni̱ yave̱nauṣa̍dhīrnya̱grodhe̍na̱
vana̱spatī̍nudu̱ṃbare̱ṇorja̍ṃ gāyatri̱yā chandāgͫ̍si tri̱vṛtā̱
stomā̎nbrāhma̱ṇena̱ vāca̎m
||7.3.14||brā̱hma̱ṇenaika̍ṃ ca
||7.3.14||36 svāhā̱dhimādhī̍tāya̱ svāhā̱ svāhādhī̍ta̱ṃ mana̍se̱ svāhā̱ svāhā̱ mana̍ḥ
pra̱jāpa̍taye̱ svāhā̱ kāya̱ svāhā̱ kasmai̱ svāhā̍ kata̱masmai̱ svāhādi̍tyai̱
svāhādi̍tyai ma̱hyai̎ svāhādi̍tyai sumṛḍī̱kāyai̱ svāhā̱ sara̍svatyai̱ svāhā̱
sara̍svatyai bṛha̱tyai̎ svāhā̱ sara̍svatyai pāva̱kāyai̱ svāhā̍ pū̱ṣṇe svāhā̍
pū̱ṣṇe pra̍pa̱thyā̍ya̱ svāhā̍ pū̱ṣṇe na̱raṃdhi̍ṣāya̱ svāhā̱ tvaṣṭre̱ svāhā̱
tvaṣṭre̍ tu̱rīpā̍ya̱ svāhā̱ tvaṣṭre̍ puru̱rūpā̍ya̱ svāhā̱ viṣṇa̍ve̱ svāhā̱
viṣṇa̍ve nikhurya̱pāya̱ svāhā̱ viṣṇa̍ve nibhūya̱pāya̱ svāhā̱ sarva̍smai̱ svāhā̎
||7.3.15||pu̱ru̱rūpā̍ya̱ svāhā̱ daśa̍ ca
||7.3.15||37 da̱dbhyaḥ svāhā̱ hanū̎bhyā̱g̱ svāhoṣṭhā̎bhyā̱g̱ svāhā̱ mukhā̍ya̱
svāhā̱ nāsi̍kābhyā̱g̱ svāhā̱kṣībhyā̱g̱ svāhā̱ karṇā̎bhyā̱g̱ svāhā̍ pā̱ra
i̱kṣavo̍'vā̱rye̎bhya̱ḥ pakṣma̍bhya̱ḥ svāhā̍vā̱ra i̱kṣava̍ḥ pā̱rye̎bhya̱ḥ
pakṣma̍bhya̱ḥ svāhā̍ śī̱ṟṣṇe svāhā̎ bhrū̱bhyāg svāhā̍ la̱lāṭā̍ya̱ svāhā̍
mū̱rdhne svāhā̍ ma̱stiṣkā̍ya̱ svāhā̱ keśe̎bhya̱ḥ svāhā̱ vahā̍ya̱ svāhā̎
grī̱vābhya̱ḥ svāhā̎ ska̱ndhebhya̱ḥ svāhā̱ kīka̍sābhya̱ḥ svāhā̍ pṛ̱ṣṭībhya̱ḥ
svāhā̍ pāja̱syā̍ya̱ svāhā̍ pā̱ṟśvābhyā̱g̱ svāhā̱
38 'gͫsā̎bhyā̱g̱ svāhā̍ do̱ṣabhyā̱g̱ svāhā̍ bā̱hubhyā̱g̱ svāhā̱
jaṅghā̎bhyā̱g̱ svāhā̱ śroṇī̎bhyā̱g̱ svāho̱rubhyā̱g̱ svāhā̎ṣṭhī̱vadbhyā̱g̱ svāhā̱
jaṅghā̎bhyā̱g̱ svāhā̍ bha̱sade̱ svāhā̍ śikha̱ṇḍebhya̱ḥ svāhā̍ vāla̱dhānā̍ya̱
svāhā̱ṇḍābhyā̱g̱ svāhā̱ śepā̍ya̱ svāhā̱ reta̍se̱ svāhā̎ pra̱jābhya̱ḥ svāhā̎
pra̱jana̍nāya̱ svāhā̍ pa̱dbhyaḥ svāhā̍ śa̱phebhya̱ḥ svāhā̱ loma̍bhya̱ḥ svāhā̎
tva̱ce svāhā̱ lohi̍tāya̱ svāhā̍ mā̱g̱ͫsāya̱ svāhā̱ snāva̍bhya̱ḥ svāhā̱sthabhya̱ḥ
svāhā̍ ma̱jjabhya̱ḥ svāhāṅge̎bhya̱ḥ svāhā̱tmane̱ svāhā̱ sarva̍smai̱ svāhā̎
||7.3.16||pā̱rśvābhyā̱g̱ svāhā̍ ma̱jjabhya̱ḥ svāhā̱ ṣaṭca̍
||7.3.16||39 a̱ñjye̱tāya̱ svāhā̎ñjisa̱kthāya̱ svāhā̍ śiti̱pade̱ svāhā̱ śiti̍kakude̱
svāhā̍ śiti̱randhrā̍ya̱ svāhā̍ śitipṛ̱ṣṭhāya̱ svāhā̍ śi̱tyagͫsā̍ya̱ svāhā̍
puṣpa̱karṇā̍ya̱ svāhā̍ śi̱tyoṣṭhā̍ya̱ svāhā̍ śiti̱bhrave̱ svāhā̱ śiti̍bhasade̱
svāhā̎ śve̱tānū̍kāśāya̱ svāhā̱ñjaye̱ svāhā̍ la̱lāmā̍ya̱ svāhāsi̍tajñave̱ svāhā̍
kṛṣṇai̱tāya̱ svāhā̍ rohitai̱tāya̱ svāhā̍ruṇai̱tāya̱ svāhe̱dṛśā̍ya̱ svāhā̍
kī̱dṛśā̍ya̱ svāhā̍ tā̱dṛśā̍ya̱ svāhā̍ sa̱dṛśā̍ya̱ svāhā̱ visa̍dṛśāya̱
svāhā̱ susa̍dṛśāya̱ svāhā̍ rū̱pāya̱ svāhā̱ sarva̍smai̱ svāhā̎
||7.3.17||rū̱pāya̱ svāhā̱ dve ca̍
||7.3.17||40 kṛ̱ṣṇāya̱ svāhā̎ śve̱tāya̱ svāhā̍ pi̱śaṅgā̍ya̱ svāhā̍ sā̱raṅgā̍ya̱
svāhā̍ru̱ṇāya̱ svāhā̍ gau̱rāya̱ svāhā̍ ba̱bhrave̱ svāhā̍ naku̱lāya̱ svāhā̱
rohi̍tāya̱ svāhā̱ śoṇā̍ya̱ svāhā̎ śyā̱vāya̱ svāhā̎ śyā̱māya̱ svāhā̍ pāka̱lāya̱
svāhā̍ surū̱pāya̱ svāhānu̍rūpāya̱ svāhā̱ virū̍pāya̱ svāhā̱ sarū̍pāya̱ svāhā̱
prati̍rūpāya̱ svāhā̍ śa̱balā̍ya̱ svāhā̍ kama̱lāya̱ svāhā̱ pṛśna̍ye̱ svāhā̍
pṛśnisa̱kthāya̱ svāhā̱ sarva̍smai̱ svāhā̎
||7.3.18||kṛ̱ṣṇāya̱ ṣaṭ
ca̍tvārigͫśat
||7.3.18||41 oṣa̍dhībhya̱ḥ svāhā̱ mūle̎bhya̱ḥ svāhā̱ tūle̎bhya̱ḥ svāhā̱ kāṇḍe̎bhya̱ḥ svāhā̱
valśe̎bhya̱ḥ svāhā̱ puṣpe̎bhya̱ḥ svāhā̱ phale̎bhya̱ḥ svāhā̍ gṛhī̱tebhya̱ḥ
svāhāgṛ̍hītebhya̱ḥ svāhāva̍pannebhya̱ḥ svāhā̱ śayā̍nebhya̱ḥ svāhā̱ sarva̍smai̱
svāhā̎
||7.3.19||oṣa̍dhībhya̱ścatu̍rvigͫśatiḥ
||7.3.19||42 vana̱spati̍bhya̱ḥ svāhā̱ mūle̎bhya̱ḥ svāhā̱ tūle̎bhya̱ḥ svāhā̱ skandho̎bhya̱ḥ
svāhā̱ śākhā̎bhya̱ḥ svāhā̍ pa̱rṇebhya̱ḥ svāhā̱ puṣpe̎bhya̱ḥ svāhā̱
phale̎bhya̱ḥ svāhā̍ gṛhī̱tebhya̱ḥ svāhāgṛ̍hītebhya̱ḥ svāhāva̍pannebhya̱ḥ
svāhā̱ śayā̍nebhya̱ḥ svāhā̍ śi̱ṣṭāya̱ svāhāti̍śiṣṭāya̱ svāhā̱ pari̍śiṣṭāya̱
svāhā̱ sagͫśi̍ṣṭāya̱ svāhocchi̍ṣṭāya̱ svāhā̍ ri̱ktāya̱ svāhāri̍ktāya̱ svāhā̱
prari̍ktāya̱ svāhā̱ sagͫri̍ktāya̱ svāhodri̍ktāya̱ svāhā̱ sarva̍smai̱ svāhā̎
||7.3.20||vana̱spati̍bhya̱ḥ skandho̎bhyaḥ śi̱ṣṭāya̍ ri̱ktāya̱ ṣaṭ ca̍tvārigͫśat
||7.3.20||saptamakāṇḍe caturthaḥ praśnaḥ 4
1 bṛha̱spati̍rakāmayata̱ śranme̍ de̱vā dadhī̍ra̱ngacche̍yaṃ puro̱dhāmiti̱
sa e̱taṃ ca̍turvigͫśatirā̱trama̍paśya̱ttamāha̍ra̱ttenā̍yajata̱
tato̱ vai tasmai̱ śradde̱vā ada̍dha̱tāga̍cchatpuro̱dhāṃ ya e̱vaṃ
vi̱dvāgͫsa̍ścaturvigͫśatirā̱tramāsa̍te̱ śrade̎bhyo manu̱ṣyā̍
dadhate̱ gaccha̍nti puro̱dhāṃ jyoti̱rgaurāyu̱riti̍ trya̱hā bha̍vantī̱yaṃ vāva
jyoti̍ra̱ntari̍kṣa̱ṃ gaura̱sāvāyu̍
2 ri̱māne̱va lo̱kāna̱bhyāro̍hantyabhipū̱rvaṃ trya̱hā bha̍vantyabhipū̱rvame̱va
su̍va̱rgaṃ lo̱kama̱bhyāro̍ha̱ntyasa̍ttra̱ṃ vā e̱tadyada̍cchando̱maṃ
yaccha̍ndo̱mā bhava̍nti̱ tena̍ sa̱ttraṃ de̱vatā̍ e̱va pṛ̱ṣṭhairava̍
ruṃdhate pa̱śūñcha̍ndo̱mairojo̱ vai vī̱rya̍ṃ pṛ̱ṣṭhāni̍ pa̱śava̍śchando̱mā
oja̍sye̱va vī̱rye̍ pa̱śuṣu̱ prati̍ tiṣṭhanti bṛhadrathaṃta̱rābhyā̎ṃ yantī̱yaṃ
vāva ra̍thaṃta̱rama̱sau bṛ̱hadā̱bhyāme̱va
3 ya̱ntyatho̍ a̱nayo̍re̱va prati̍ tiṣṭhantye̱tevai ya̱jñasyā̎ñja̱sāya̍nī
sru̱tī tābhyā̍me̱va su̍va̱rgaṃ lo̱kaṃ ya̍nti caturvigͫśatirā̱tro bha̍vati̱
catu̍rvigͫśatirardhamā̱sāḥ sa̍ṃvathsa̱raḥ sa̍ṃvathsa̱raḥ su̍va̱rgo lo̱kaḥ
sa̍ṃvathsa̱ra e̱va su̍va̱rge lo̱ke prati̍ tiṣṭha̱ntyatho̱ catu̍rvigͫśatyakṣarā
gāya̱trī gā̍ya̱trī bra̍hmavarca̱saṃ gā̍yatri̱yaiva bra̍hmavarca̱samava̍
ruṃdhate'tirā̱trāva̱bhito̍ bhavato brahmavarca̱sasya̱ pari̍gṛhītyai
||7.4.1||a̱sāvāyu̍rā̱bhyāme̱va paṃca̍ catvārigͫśacca
||7.4.1||4 yathā̱ vai ma̍nu̱ṣyā̍ e̱vaṃ de̱vā agra̍ āsa̱nte̍'kāmaya̱ntāva̍rtiṃ pā̱pmāna̍ṃ
mṛ̱tyuma̍pa̱hatya̱ daivīgͫ̍ sa̱g̱ͫsada̍ṃ gacche̱meti̱ ta e̱taṃ
ca̍turvigͫśatirā̱trama̍paśya̱ntamāha̍ra̱ntenā̍yajanta̱ tato̱ vai te'va̍rtiṃ
pā̱pmāna̍ṃ mṛ̱tyuma̍pa̱hatya̱ daivīgͫ̍ sa̱g̱ͫ sada̍magaccha̱ṉ, ya e̱vaṃ
vi̱dvāgͫsa̍ścaturvigͫśati rā̱tramāsa̱te'va̍rtime̱va pā̱pmāna̍mapa̱hatya̱
śriya̍ṃ gacchanti̱ śrīrhi ma̍nu̱ṣya̍sya̱
5 daivī̍ sa̱g̱ͫsajjyoti̍ratirā̱tro bha̍vati suva̱rgasya̍ lo̱kasyānu̍khyātyai̱
pṛṣṭhya̍ḥ ṣaḍa̱ho bha̍vati̱ ṣaḍvā ṛ̱tava̍ḥ saṃvathsa̱rastaṃ māsā̍
ardhamā̱sā ṛ̱tava̍ḥ pra̱viśya̱ daivīgͫ̍ sa̱g̱ͫsada̍magaccha̱ṉ ya
e̱vaṃ vi̱dvāgͫsa̍ścaturvigͫśatirā̱tramāsa̍te saṃvathsa̱rame̱va pra̱viśya̱
vasya̍sīgͫ sa̱g̱ͫsada̍ṃ gacchanti̱ traya̍strayastri̱g̱ͫśā a̱vastā̎dbhavanti̱
traya̍strayastri̱g̱ͫśāḥ pa̱rastā̎ttrayastri̱g̱ͫśaire̱vobha̱yato'va̍rtiṃ
pā̱pmāna̍mapa̱hatya̱ daivīgͫ̍ sa̱g̱ͫsada̍ṃ madhya̱to
6 ga̍cchanti pṛ̱ṣṭhāni̱ hi daivī̍ sa̱g̱ͫsajjā̱mi vā e̱tatku̍rvanti̱
yattraya̍strayastri̱g̱ͫśā a̱nvañco̱ madhye'ni̍rukto bhavati̱ tenājā̎myū̱rdhvāni̍
pṛ̱ṣṭhāni̍ bhavantyū̱rdhvāścha̍ndo̱mā u̱bhābhyāgͫ̍ rū̱pābhyāgͫ̍ suva̱rgaṃ
lo̱kaṃ ya̱ntyasa̍ttra̱ṃ vā e̱tadyada̍cchando̱maṃ yaccha̍ndo̱mā bhava̍nti̱
tena̍ sa̱ttraṃ de̱vatā̍ e̱va pṛ̱ṣṭhairava̍ ruṃdhate pa̱śūñcha̍ndo̱mairojo̱
vai vī̱rya̍ṃ pṛ̱ṣṭhāni̍ pa̱śava̍
7 śchando̱mā oja̍sye̱va vī̱rye̍ pa̱śuṣu̱ prati̍ tiṣṭhanti̱
traya̍strayastri̱g̱ͫśā a̱vastā̎dbhavanti̱ traya̍strayastri̱g̱ͫśāḥ
pa̱rastā̱nmadhye̍ pṛ̱ṣṭhānyuro̱ vai tra̍yastri̱g̱ͫśā ā̱tmā pṛ̱ṣṭhānyā̱tmana̍
e̱va tadyaja̍mānā̱ḥ śarma̍ nahya̱nte'nā̎rtyai bṛhadrathaṃta̱rābhyā̎ṃ yantī̱yaṃ
vāva ra̍thaṃta̱rama̱sau bṛ̱hadā̱bhyāme̱va ya̱ntyatho̍ a̱nayo̍re̱va prati̍
tiṣṭhantye̱te vai ya̱jñasyā̎ñja̱sāya̍nī sru̱tī tābhyā̍me̱va
8 su̍va̱rgaṃ lo̱kaṃ ya̍nti̱ parā̎ñco̱ vā e̱te su̍va̱rgaṃ lo̱kama̱bhyāro̍hanti̱
ye pa̍rā̱cīnā̍ni pṛ̱ṣṭhānyu̍pa̱yanti̍ pra̱tyaṅkhṣa̍ḍa̱ho bha̍vati
pra̱tyava̍rūḍhyā̱ atho̱ prati̍ṣṭhityā u̱bhayo̎rlo̱kayor̍ ṛ̱ddhvotti̍ṣṭhanti
tri̱vṛto'dhi̍ tri̱vṛta̱mupa̍ yanti̱ stomā̍nā̱g̱ͫ saṃ pa̍ttyai prabha̱vāya̱
jyoti̍ragniṣṭo̱mo bha̍vatya̱yaṃ vāva sa kṣayo̱'smāde̱va tena̱ kṣayā̱nna ya̍nti
caturvigͫśatirā̱tro bha̍vati̱ catu̍rvigͫśatirardhamā̱sāḥ sa̍ṃvathsa̱raḥ
sa̍ṃvathsa̱raḥ su̍va̱rgo lo̱kaḥ sa̍ṃvathsa̱ra e̱va su̍va̱rge lo̱ke prati̍
tiṣṭha̱ntyatho̱ catu̍vigͫśatyakṣarā gāya̱trī gā̍ya̱trī bra̍hmavarca̱saṃ
gā̍yatri̱yaiva bra̍hmavarca̱samava̍ ruṃdhate'ti rā̱trāva̱bhito̍ bhavato
brahmavarca̱sasya̱ pari̍gṛhītyai
||7.4.2||ma̱nu̱ṣya̍sya madhya̱taḥ
pa̱śava̱stābhyā̍me̱va sa̍ṃvathsa̱raścatu̍rvigͫśatiśca
||7.4.2||9 ṛ̱kṣā vā i̱yama̍lo̱makā̍sī̱thsākā̍maya̱tauṣa̍dhībhi̱rvana̱spati̍bhi̱ḥ
pra jā̍ye̱yeti̱ saitāstri̱g̱ͫśata̱g̱ͫ rātrī̍rapaśya̱ttato̱ vā
i̱yamoṣa̍dhībhi̱rvana̱spati̍bhi̱ḥ prājā̍yata̱ ye pra̱jākā̍māḥ pa̱śukā̍mā̱ḥ
syusta e̱tā ā̍sīra̱npraiva jā̍yante pra̱jayā̍ pa̱śubhi̍ri̱yaṃ vā a̍kṣudhya̱thsaitāṃ
vi̱rāja̍mapaśya̱t tāmā̱tmandhi̱tvānnādya̱mavā̍ru̱ṃdhauṣa̍dhī̱
10 rvana̱spatī̎npra̱jāṃ pa̱śūntenā̍'vardhata̱ sā je̱māna̍ṃ mahi̱māna̍magaccha̱dya
e̱vaṃ vi̱dvāgͫsa̍ e̱tā āsa̍te vi̱rāja̍me̱vātmandhi̱tvānnādya̱mava̍ ruṃdhate̱
vardha̍nte pra̱jayā̍ pa̱śubhi̍rje̱māna̍ṃ mahi̱māna̍ṃ gacchanti̱ jyoti̍ratirā̱tro
bha̍vati suva̱rgasya̍ lo̱kasyānu̍khyātyai̱ pṛṣṭhya̍ḥ ṣaḍa̱ho bha̍vati̱
ṣaḍvā ṛ̱tava̱ḥ ṣaṭpṛ̱ṣṭhāni̍ pṛ̱ṣṭhaire̱vartūna̱nvāro̍hantyṛ̱tubhi̍ḥ
saṃvathsa̱raṃ te sa̍ṃvathsa̱ra e̱va
11 prati̍ tiṣṭhanti trayastri̱g̱ͫśāttra̍yastri̱g̱ͫśamupa̍ yanti ya̱jñasya̱
saṃta̍tyā̱ atho̎ pra̱jāpa̍ti̱rvai tra̍yastri̱g̱ͫśaḥ pra̱jāpa̍time̱vāra̍bhante̱
prati̍ṣṭhityai triṇa̱vo bha̍vati̱ viji̍tyā ekavi̱g̱ͫśo bha̍vati̱ prati̍ṣṭhityā̱
atho̱ ruca̍me̱vātmanda̍dhate tri̱vṛda̍gni̱ṣṭudbha̍vati pā̱pmāna̍me̱va tena̱
nirda̍ha̱nte'tho̱ tejo̱ vai tri̱vṛtteja̍ e̱vātmanda̍dhate pañcada̱śa i̍ndrasto̱mo
bha̍vatīndri̱yame̱vāva̍
12 ruṃdhate saptada̱śo bha̍vatya̱nnādya̱syāva̍ruddhyā̱ atho̱ praiva tena̍
jāyanta ekavi̱g̱ͫśo bha̍vati̱ prati̍ṣṭhityā̱ atho̱ ruca̍me̱vātmanda̍dhate
caturvi̱g̱ͫśo bha̍vati̱ catu̍rvigͫśatirardhamā̱sāḥ sa̍ṃvathsa̱raḥ
sa̍ṃvathsa̱raḥ su̍va̱rgo lo̱kaḥ sa̍ṃvathsa̱ra e̱va su̍va̱rge lo̱ke prati̍
tiṣṭha̱ntyatho̍ e̱ṣa vai vi̍ṣū̱vān, vi̍ṣū̱vanto̍ bhavanti̱ ya e̱vaṃ vi̱dvāgͫsa̍
e̱tā āsa̍te caturvi̱g̱ͫśātpṛ̱ṣṭhānyupa̍ yanti saṃvathsa̱ra e̱va pra̍ti̱ṣṭhāya̍
13 de̱vatā̍ a̱bhyāro̍hanti trayastri̱g̱ͫśāttra̍yastri̱g̱ͫśamupa̍ yanti̱
traya̍strigͫśa̱dvai de̱vatā̍ de̱vatā̎sve̱va prati̍ tiṣṭhanti triṇa̱vo bha̍vatī̱me
vai lo̱kāstri̍ṇa̱va e̱ṣve̍va lo̱keṣu̱ prati̍ tiṣṭhanti̱ dvāve̍kavi̱g̱ͫśau
bha̍vata̱ḥ prati̍ṣṭhityā̱ atho̱ ruca̍me̱vātmanda̍dhate ba̱hava̍ḥ ṣoḍa̱śino̍
bhavanti̱ tasmā̎dba̱hava̍ḥ pra̱jāsu̱ vṛṣā̍ṇo̱ yade̱te stomā̱ vyati̍ṣaktā̱
bhava̍nti̱ tasmā̍di̱yamoṣa̍dhībhi̱rvana̱spati̍bhi̱rvyati̍ṣaktā̱
14 vyati̍ṣajyante pra̱jayā̍ pa̱śubhi̱rya e̱vaṃ vi̱dvāgͫsa̍ e̱tā
āsa̱te'klṛ̍ptā̱ vā e̱te su̍va̱rgaṃ lo̱kaṃ ya̍ntyuccāva̱cān hi stomā̍nupa̱yanti̱
yade̱ta ū̱rdhvāḥ klṛ̱ptāḥ stomā̱ bhava̍nti klṛ̱ptā e̱va su̍va̱rgaṃ lo̱kaṃ
ya̍ntyu̱bhayo̍rebhyo lo̱kayo̎ḥ kalpate tri̱g̱ͫśade̱tāstri̱g̱ͫśada̍kṣarā
vi̱rāḍanna̍ṃ vi̱rāḍvi̱rājai̱vānnādya̱mava̍ ruṃdhate'tirā̱trāva̱bhito̍
bhavato̱'nnādya̍sya̱ pari̍gṛhītyai
||7.4.3||oṣa̍dhīḥ saṃvathsa̱ra e̱vāva̍
prati̱ṣṭhāya̱ vyati̍ṣa̱ktaikā̱nna pa̍ṃcā̱śacca̍
||7.4.3||15 pra̱jāpa̍tiḥ suva̱rgaṃ lo̱kamai̱ttaṃ de̱vā yena̍ yena̱ chaṃda̱sānu̱
prāyu̍ñjata̱ tena̱ nāpnu̍va̱nta e̱tā dvātrigͫ̍śata̱g̱ͫ
rātrī̍rapaśya̱ndvātrigͫ̍śadakṣarānu̱ṣṭugānu̍ṣṭubhaḥ pra̱jāpa̍ti̱ḥ
svenai̱va chaṃda̍sā pra̱jāpa̍timā̱ptvābhyā̱ruhya̍ suva̱rgaṃ
lo̱kamā̍ya̱ṉ ya e̱vaṃ vi̱dvāgͫsa̍ e̱tā āsa̍te̱ dvātrigͫ̍śade̱tā
dvātrigͫ̍śadakṣarānu̱ṣṭugānu̍ṣṭubhaḥ pra̱jāpa̍ti̱ḥ svenai̱va chaṃda̍sā
pra̱jāpa̍timā̱ptvā śriya̍ṃ gacchanti̱
16 śrīrhi ma̍nu̱ṣya̍sya suva̱rgo lo̱ko dvātrigͫ̍śade̱tā
dvātrigͫ̍śadakṣarānu̱ṣṭugvāga̍nu̱ṣṭupsarvā̍me̱va vāca̍māpnuvanti̱ sarve̍
vā̱co va̍di̱tāro̍ bhavanti̱ sarve̱ hi śriya̱ṃ gaccha̍nti̱ jyoti̱rgaurāyu̱riti̍
trya̱hā bha̍vantī̱yaṃ vāva jyoti̍ra̱ntari̍kṣa̱ṃ gaura̱sāvāyu̍ri̱māne̱va
lo̱kāna̱bhyāro̍hantyabhipū̱rvaṃ trya̱hā bha̍vantyabhipū̱rvame̱va su̍va̱rgaṃ
lo̱kama̱bhyāro̍hanti bṛhadrathaṃta̱rābhyā̎ṃ yantī̱
17 yaṃ vāva ra̍thaṃta̱rama̱sau bṛ̱hadā̱bhyāme̱va ya̱ntyatho̍ a̱nayo̍re̱va
prati̍ tiṣṭhantye̱te vai ya̱jñasyā̎ñja̱sāya̍nī sru̱tī tābhyā̍me̱va su̍va̱rgaṃ
lo̱kaṃ ya̍nti̱ parā̎ñco̱ vā e̱te su̍va̱rgaṃ lo̱kama̱bhyāro̍hanti̱ ye
parā̍castrya̱hānu̍pa̱yanti̍ pra̱tyaṅtrya̱ho bha̍vati pra̱tyava̍rūḍhyā̱ atho̱
prati̍ṣṭhityā u̱bhayo̎rlo̱kayor̍ ṛ̱ddhvotti̍ṣṭhanti̱ dvātrigͫ̍śade̱tāstāsā̱ṃ
yāstri̱g̱ͫśattri̱g̱ͫśada̍kṣarā vi̱rāḍanna̍ṃ vi̱rāḍvi̱rājai̱vānnādya̱mava̍
ruṃdhate̱ ye dve a̍horā̱tre e̱va te u̱bhābhyāgͫ̍ rū̱pābhyāgͫ̍ suva̱rgaṃ lo̱kaṃ
ya̍ntyatirā̱trāva̱bhito̍ bhavata̱ḥ pari̍gṛhītyai
||7.4.4||ga̱ccha̱nti̱ ya̱nti̱
tri̱g̱ͫśada̍kṣarā̱ dvāvigͫ̍śatiśca
||7.4.4||18 dve vāva de̍vasa̱ttre dvā̍daśā̱haścai̱va tra̍yastrigͫśada̱haśca̱
ya e̱vaṃ vi̱dvāgͫsa̍strayastrigͫśada̱hamāsa̍te sā̱kṣāde̱va de̱vatā̍
a̱bhyāro̍hanti̱ yathā̱ khalu̱ vai śreyā̍na̱bhyārū̍ḍhaḥ kā̱maya̍te̱ tathā̍
karoti̱ yadya̍va̱vidhya̍ti̱ pāpī̍yānbhavati̱ yadi̱ nāva̱vidhya̍ti sa̱dṛṅya
e̱vaṃ vi̱dvāgͫsa̍strayastrigͫśada̱hamāsa̍te̱ vi pā̱pmanā̱ bhrātṛ̍vye̱ṇā
va̍rtante'ha̱rbhājo̱ vā e̱tā de̱vā agra̱ āha̍ra̱
19 nnaha̱reko'bha̍ja̱tāha̱reka̱stābhi̱rvai te pra̱bāhu̍gārdhnuva̱ṉ ya e̱vaṃ
vi̱dvāgͫsa̍strayastrigͫśada̱hamāsa̍te̱ sarva̍ e̱va pra̱bāhu̍gṛdhnuvanti̱
sarve̱ grāma̍ṇīya̱ṃ prāpnu̍vanti pañcā̱hā bha̍vanti̱ pañca̱ vā ṛ̱tava̍ḥ
saṃvathsa̱ra ṛ̱tuṣve̱va sa̍ṃvathsa̱re prati̍ tiṣṭha̱ntyatho̱ pañcā̎kṣarā
pa̱ṅktiḥ pāṅkto̍ ya̱jño ya̱jñame̱vāva̍ ruṃdhate̱ trīṇyā̎śvi̱nāni̍ bhavanti̱
traya̍ i̱me lo̱kā e̱
20 ṣve̍va lo̱keṣu̱ prati̍ tiṣṭha̱ntyatho̱ trīṇi̱ vai ya̱jñasye̎ndri̱yāṇi̱
tānye̱vāva̍ ruṃdhate viśva̱jidbha̍vatya̱nnādya̱syāva̍ruddhyai̱ sarva̍pṛṣṭho bhavati̱
sarva̍syā̱bhiji̍tyai̱ vāgvai dvā̍daśā̱ho yatpu̱rastā̎ddvādaśā̱hamu̍pe̱yuranā̎ptā̱ṃ
vāca̱mupe̍yurupa̱dāsu̍kaiṣā̱ṃ vāksyā̍du̱pari̍ṣṭāddvādaśā̱hamupa̍ yantyā̱ptāme̱va
vāca̱mupa̍ yanti̱ tasmā̍du̱pari̍ṣṭādvā̱cā va̍dāmo'vānta̱raṃ
21 vai da̍śarā̱treṇa̍ pra̱jāpa̍tiḥ pra̱jā a̍sṛjata̱ yadda̍śarā̱tro
bhava̍ti pra̱jā e̱va tadyaja̍mānāḥ sṛjanta e̱tāgͫ ha̱ vā u̍da̱ṅkaḥ
śau̎lbāya̱naḥ sa̱ttrasyarddhi̍muvāca̱ yadda̍śarā̱tro yadda̍śarā̱tro
bhava̍ti sa̱ttrasya̍rddhyā̱ atho̱ yade̱va pūrve̱ṣvaha̍ssu̱ vilo̍ma
kri̱yate̱ tasyai̱vaiṣā śānti̍rdvyanī̱kā vā e̱tā rātra̍yo̱ yaja̍mānā
viśva̱jithsa̱hāti̍rā̱treṇa̱ pūrvā̱ḥ ṣoḍa̍śa sa̱hāti̍rā̱treṇotta̍rā̱ḥ
ṣoḍa̍śa̱ ya e̱vaṃ vi̱dvāgͫsa̍strayastrigͫśada̱hamāsa̍ta̱ aiṣā̎ṃ
dvyanī̱kā pra̱jā jā̍yate'tirā̱trāva̱bhito̍ bhavata̱ḥ pari̍gṛhītyai
||7.4.5||a̱ha̱ra̱nne̱ṣva̍vānta̱ragͫ ṣoḍa̍śa sa̱ha sa̱ptada̍śa ca
||7.4.5||22 ā̱di̱tyā a̍kāmayanta suva̱rgaṃ lo̱kami̍yā̱meti̱ te su̍va̱rgaṃ
lo̱kaṃ na prājā̍na̱nna su̍va̱rgaṃ lo̱kamā̍ya̱nta e̱tagͫ
ṣa̍ṭtrigͫśadrā̱trama̍paśya̱ntamāha̍ra̱ntenā̍yajanta̱ tato̱ vai te
su̍va̱rgaṃ lo̱kaṃ prājā̍nanthsuva̱rgaṃ lo̱kamā̍ya̱ṉ, ya e̱vaṃ vi̱dvāgͫsa̍ḥ
ṣaṭtrigͫśadrā̱tramāsa̍te suva̱rgame̱va lo̱kaṃ pra jā̍nanti suva̱rgaṃ lo̱kaṃ
ya̍nti̱ jyoti̍ratirā̱tro
23 bha̍vati̱ jyoti̍re̱va pu̱rastā̎ddadhate suva̱rgasya̍ lo̱kasyānu̍khyātyai ṣaḍa̱hā
bha̍vanti̱ ṣaḍvā ṛ̱tava̍ ṛ̱tuṣve̱va prati̍ tiṣṭhanti ca̱tvāro̍ bhavanti̱
cata̍sro̱ diśo̍ di̱kṣve̍va prati̍ tiṣṭha̱ntyasa̍ttra̱ṃ vā e̱tadyada̍chando̱maṃ
yaccha̍ndo̱mā bhava̍nti̱ tena̍ sa̱ttraṃ de̱vatā̍ e̱va pṛ̱ṣṭhairava̍ ruṃdhate
pa̱śūñcha̍ndo̱mairojo̱ vai vī̱rya̍ṃ pṛ̱ṣṭhāni̍ pa̱śava̍śchando̱mā oja̍sye̱va
24 vī̱rye̍ pa̱śuṣu̱ prati̍ tiṣṭhanti ṣaṭtrigͫśadrā̱tro bha̍vati̱
ṣaṭtrigͫ̍śadakṣarā bṛha̱tī bārha̍tāḥ pa̱śavo̍ bṛha̱tyaiva pa̱śūnava̍
ruṃdhate bṛha̱tī chaṃda̍sā̱g̱ svārā̎jyamāśnutāśnu̱vate̱ svārā̎jya̱ṃ
ya e̱vaṃ vi̱dvāgͫsa̍ḥ ṣaṭtrigͫśadrā̱tramāsa̍te suva̱rgame̱va lo̱kaṃ
ya̍ntyatirā̱trāva̱bhito̍ bhavataḥ suva̱rgasya̍ lo̱kasya̱ pari̍gṛhītyai
||7.4.6||a̱ti̱rā̱tra oja̍sye̱va ṣaṭ trigͫ̍śacca
||7.4.6||25 vasi̍ṣṭho ha̱tapu̍tro'kāmayata vi̱ndeya̍ pra̱jāma̱bhi sau̍dā̱sānbha̍veya̱miti̱
sa e̱tame̍kasmānna pañcā̱śama̍paśya̱ttamāha̍ra̱ttenā̍yajata̱ tato̱ vai so'vi̍ndata
pra̱jāma̱bhi sau̍dā̱sāna̍bhava̱dya e̱vaṃ vi̱dvāgͫsa̍ ekasmānna pañcā̱śamāsa̍te
vi̱ndante̎ pra̱jāma̱bhi bhrātṛ̍vyānbhavanti̱ traya̍stri̱vṛto̎'gniṣṭo̱mā
bha̍vanti̱ vajra̍syai̱va mukha̱g̱ͫ sa2gͫ śya̍nti̱ daśa̍ pañcada̱śā
bha̍vanti pañcada̱śo vajro̱
26 vajra̍me̱va bhrātṛ̍vyebhya̱ḥ pra ha̍ranti ṣoḍaśi̱madda̍śa̱mamaha̍rbhavati̱
vajra̍ e̱va vī̱rya̍ṃ dadhati̱ dvāda̍śa saptada̱śā bha̍vantya̱nnādya̱syāva̍ruddhyā̱
atho̱ praiva tairjā̍yante̱ pṛṣṭhya̍ḥ ṣaḍa̱ho bha̍vati̱ ṣaḍvā ṛ̱tava̱ḥ
ṣaṭpṛ̱ṣṭhāni̍ pṛ̱ṣṭhaire̱vartūna̱nvāro̍hantyṛ̱tubhi̍ḥ saṃvathsa̱raṃ
te sa̍ṃvathsa̱ra e̱va prati̍ tiṣṭhanti̱ dvāda̍śaikavi̱g̱ͫśā bha̍vanti̱
prati̍ṣṭhityā̱ atho̱ ruca̍me̱vātma
27 nda̍dhate ba̱hava̍ḥ ṣoḍa̱śino̍ bhavanti̱ viji̍tyai̱ ṣaḍā̎śvi̱nāni̍
bhavanti̱ ṣaḍvā ṛ̱tava̍ ṛ̱tuṣve̱va prati̍ tiṣṭhantyūnātiri̱ktā vā e̱tā
rātra̍ya ū̱nāstadyadeka̍syai̱ na pa̍ñcā̱śadati̍riktā̱stadyadbhūya̍sīra̱ṣṭā
ca̍tvārigͫśata ū̱nācca̱ khalu̱ vā ati̍riktācca pra̱jāpa̍ti̱ḥ prājā̍yata̱
ye pra̱jākā̍māḥ pa̱śukā̍mā̱ḥ syusta e̱tā ā̍sīra̱npraiva jā̍yante pra̱jayā̍
pa̱śubhi̍rvairā̱jo vā e̱ṣa ya̱jño yade̍kasmānnapañcā̱śo ya e̱vaṃ
vi̱dvāgͫsa̍ ekasmānnapañcā̱śamāsa̍te vi̱rāja̍me̱va ga̍cchantyannā̱dā
bha̍vantyatirā̱trāva̱bhito̍ bhavato̱'nnādya̍sya̱ pari̍gṛhītyai
||7.4.7||vajra̍
ā̱tmanpra̱jayā̱ dvāvigͫ̍śatiśca
||7.4.7||28 sa̱ṃva̱thsa̱rāya̍ dīkṣi̱ṣyamā̍ṇā ekāṣṭa̱kāyā̎ṃ dīkṣeranne̱ṣā vai
sa̍ṃvathsa̱rasya̱ patnī̱ yade̍kāṣṭa̱kaitasyā̱ṃ vā e̱ṣa e̱tāgͫ rātri̍ṃ vasati
sā̱kṣāde̱va sa̍ṃvathsa̱ramā̱rabhya̍ dīkṣanta̱ ārta̱ṃ vā e̱te sa̍ṃvathsa̱rasyā̱bhi
dī̎kṣante̱ ya e̍kāṣṭa̱kāyā̱ṃ dīkṣa̱nte'nta̍nāmānāvṛ̱tū bha̍vato̱ vya̍sta̱ṃ vā
e̱te sa̍ṃvathsa̱rasyā̱bhi dī̎kṣante̱ ya e̍kāṣṭa̱kāyā̱ṃ dīkṣa̱nte'nta̍nāmānāvṛ̱tū
bha̍vataḥ phalgunīpūrṇamā̱se dī̎kṣera̱nmukha̱ṃ vā e̱tath
29 sa̍ṃvathsa̱rasya̱ yatpha̍lgunīpūrṇamā̱so mu̍kha̱ta e̱va sa̍ṃvathsa̱ramā̱rabhya̍
dīkṣante̱ tasyaikai̱va ni̱ryā yathsāṃ me̎ghye viṣū̱vānthsa̱ṃ padya̍te citrāpūrṇamā̱se
dī̎kṣera̱nmukha̱ṃ vā e̱tathsa̍ṃvathsa̱rasya̱ yacci̍trāpūrṇamā̱so mu̍kha̱ta e̱va
sa̍ṃvathsa̱ramā̱rabhya̍ dīkṣante̱ tasya̱ na kāca̱na ni̱ryā bha̍vati catura̱he
pu̱rastā̎tpaurṇamā̱syai dī̎kṣera̱nteṣā̍mekāṣṭa̱kāyā̎ṃ kra̱yaḥ saṃ pa̍dyate̱
tenai̍kāṣṭa̱kāṃ na cha̱ṃbaṭku̍rvanti̱ teṣā̎ṃ
30 pūrvapa̱kṣe su̱tyā saṃ pa̍dyate pūrvapa̱kṣaṃ māsā̍ a̱bhi saṃ
pa̍dyante̱ te pū̎rvapa̱kṣa utti̍ṣṭhanti̱ tānu̱ttiṣṭha̍ta̱ oṣa̍dhayo̱
vana̱spata̱yo'nūtti̍ṣṭhanti̱ tānka̍lyā̱ṇī kī̱rtiranūtti̍ṣṭha̱tyarā̎thsuri̱me
yaja̍mānā̱ iti̱ tadanu̱ sarve̍ rādhnuvanti
||7.4.8||e̱taccha̱ṃbaṭku̍rvanti̱
teṣā̱ṃ catu̍strigͫśacca
||7.4.8||31 su̱va̱rgaṃ vā e̱te lo̱kaṃ ya̍nti̱ ye sa̱ttramu̍pa̱yantya̱bhīndha̍ta
e̱va dī̱kṣābhi̍rā̱tmānagg̍ śrapayanta upa̱sadbhi̱rdvābhyā̱ṃ lomāva̍ dyanti̱
dvābhyā̱ṃ tvaca̱ṃ dvābhyā̱masṛ̱ddvābhyā̎ṃ mā̱g̱ͫsaṃ dvābhyā̱masthi̱ dvābhyā̎ṃ
ma̱jjāna̍mā̱tmada̍kṣiṇa̱ṃ vai sa̱ttramā̱tmāna̍me̱va dakṣi̍ṇāṃ nī̱tvā su̍va̱rgaṃ
lo̱kaṃ ya̍nti̱ śikhā̱manu̱ pra va̍panta̱ ṛddhyā̱ atho̱ raghī̍yāgͫsaḥ suva̱rgaṃ
lo̱kama̍yā̱meti̍
||7.4.9||su̱va̱rgaṃ pa̍ṃcā̱śat
||7.4.9||32 bra̱hma̱vā̱dino̍ vadantyatirā̱traḥ pa̍ra̱mo ya̍jñakratū̱nāṃ
kasmā̱ttaṃ pra̍tha̱mamupa̍ ya̱ntītye̱tadvā a̍gniṣṭo̱maṃ pra̍tha̱mamupa̍
ya̱ntyatho̱kthya̍matha̍ ṣoḍa̱śina̱mathā̍tirā̱trama̍nupū̱rvame̱vaitadya̍jña
kra̱tūnu̱petya̱ tānā̱labhya̍ pari̱gṛhya̱ soma̍me̱vaitatpiba̍nta āsate̱ jyoti̍ṣṭomaṃ
pratha̱mamupa̍ yanti̱ jyoti̍ṣṭomo̱ vai stomā̍nā̱ṃ mukha̍ṃ mukha̱ta e̱va stomā̱n
pra yu̍ñjate̱ te
33 sa2gͫstu̍tā vi̱rāja̍ma̱bhi saṃ pa̍dyante̱ dve carcā̱vati̍
ricyete̱ eka̍yā̱ gaurati̍rikta̱ eka̱yāyu̍rū̱naḥ su̍va̱rgo vai lo̱ko
jyoti̱rūrgvi̱rāṭthsu̍va̱rgame̱va tena̍ lo̱kaṃ ya̍nti rathaṃta̱raṃ divā̱ bhava̍ti
rathaṃta̱raṃ nakta̱mityā̍hurbrahmavā̱dina̱ḥ kena̱ tadajā̱mīti̍ saubha̱raṃ
tṛ̍tīyasava̱ne bra̍hmasā̱maṃ bṛ̱hattanma̍dhya̱to da̍dhati̱ vidhṛ̍tyai̱
tenājā̍mi
||7.4.10||ta ekā̱nna pa̍ṃcā̱śacca̍
||7.4.10||34 jyoti̍ṣṭomaṃ pratha̱mamupa̍ yantya̱sminne̱va tena̍ lo̱ke prati̍ tiṣṭhanti̱
goṣṭo̍maṃ dvi̱tīya̱mupa̍ yantya̱ntari̍kṣa e̱va tena̱ prati̍ tiṣṭha̱ntyāyu̍ṣṭomaṃ
tṛ̱tīya̱mupa̍ yantya̱muṣmi̍nne̱va tena̍ lo̱ke prati̍ tiṣṭhantī̱yaṃ vāva
jyoti̍ra̱ntari̍kṣa̱ṃ gaura̱sāvāyu̱ryade̱tānthstomā̍nupa̱yantye̱ṣve̍va tallo̱keṣu̍
sa̱ttriṇa̍ḥ prati̱tiṣṭha̍nto yanti̱ te sa2gͫstu̍tā vi̱rāja̍
35 ma̱bhi saṃ pa̍dyante̱ dve carcā̱vati̍ ricyete̱ eka̍yā̱ gaurati̍rikta̱
eka̱yāyu̍rū̱naḥ su̍va̱rgo vai lo̱ko jyoti̱rūrgvi̱rāḍūrja̍me̱vāva̍ ruṃdhate̱
te na kṣu̱dhārti̱mārccha̱ntyakṣo̍dhukā bhavanti̱ kṣuthsa̍ṃbādhā iva̱
hi sa̱ttriṇo̎'gniṣṭo̱māva̱bhita̍ḥ pra̱dhītāvu̱kthyā̍ madhye̱ nabhya̱ṃ
tattade̱tatpa̍ri̱yadde̍vaca̱kraṃ yade̱tena̍
36 ṣaḍa̱hena̱ yanti̍ devaca̱krame̱va sa̱māro̍ha̱ntyari̍ṣṭyai̱ te
sva̱sti sama̍śnuvate ṣaḍa̱hena̍ yanti̱ ṣaḍvā ṛ̱tava̍ ṛ̱tuṣve̱va prati̍
tiṣṭhantyubha̱yato̎ jyotiṣā yantyubha̱yata̍ e̱va su̍va̱rge lo̱ke pra̍ti̱tiṣṭha̍nto
yanti̱ dvau ṣa̍ḍa̱hau bha̍vata̱stāni̱ dvāda̱śāhā̍ni̱ saṃ pa̍dyante dvāda̱śo
vai puru̍ṣo̱ dve sa̱kthyau̎ dvau bā̱hū ā̱tmā ca̱ śira̍śca ca̱tvāryaṅgā̍ni̱
stanau̎ dvāda̱śau
37 tatpuru̍ṣa̱manu̍ pa̱ryāva̍rtante̱ traya̍ḥ ṣaḍa̱hā bha̍vanti̱
tānya̱ṣṭāda̱śāhā̍ni̱ saṃ pa̍dyante̱ navā̱nyāni̱ navā̱nyāni̱ nava̱ vai
puru̍ṣe prā̱ṇāstatprā̱ṇānanu̍ pa̱ryāva̍rtante ca̱tvāra̍ḥ ṣaḍa̱hā bha̍vanti̱
tāni̱ catu̍rvigͫśati̱rahā̍ni̱ saṃ pa̍dyante̱ catu̍rvigͫśatirardhamā̱sāḥ
sa̍ṃvathsa̱rastathsa̍ṃvathsa̱ramanu̍ pa̱ryāva̍rta̱nte'pra̍tiṣṭhitaḥ saṃvathsa̱ra
iti̱ khalu̱ vā ā̍hu̱rvarṣī̍yānprati̱ṣṭhāyā̱ itye̱tāva̱dvai sa̍ṃvathsa̱rasya̱
brāhma̍ṇa̱ṃ yāva̍nmā̱so mā̱simā̎sye̱va pra̍ti̱tiṣṭha̍nto yanti
||7.4.11||vi̱rāja̍me̱tena̍ dvāda̱śāve̱tāva̱dvā a̱ṣṭau ca̍
||7.4.11||38 me̱ṣastvā̍ paca̱taira̍vatu̱ lohi̍tagrīva̱śchāgai̎ḥ śalma̱lirvṛddhyā̍ pa̱rṇo
brahma̍ṇā pla̱kṣo medhe̍na nya̱grodha̍ścama̱sairu̍du̱ṃbara̍ ū̱rjā gā̍ya̱trī
chando̍bhistri̱vṛthstomai̱rava̍ntī̱ḥ sthāva̍ntīstvāvantu pri̱yaṃ tvā̎ pri̱yāṇā̱ṃ
varṣi̍ṣṭha̱māpyā̍nāṃ nidhī̱nāṃ tvā̍ nidhi̱patigͫ̍ havāmahe vaso mama
||7.4.12||me̱ṣaḥ ṣaṭ trigͫ̍śat
||7.4.12||39 kūpyā̎bhya̱ḥ svāhā̱ kūlyā̎bhya̱ḥ svāhā̍ vika̱ryā̎bhya̱ḥ svāhā̍'va̱ṭyā̎bhya̱ḥ
svāhā̱ khanyā̎bhya̱ḥ svāhā̱ hradyā̎bhya̱ḥ svāhā̱ sūdyā̎bhya̱ḥ svāhā̍ sara̱syā̎bhya̱ḥ
svāhā̍ vaiśa̱ntībhya̱ḥ svāhā̍ palva̱lyā̎bhya̱ḥ svāhā̱ varṣyā̎bhya̱ḥ
svāhā̍'va̱ṟṣyābhya̱ḥ svāhā̎ hrā̱dunī̎bhya̱ḥ svāhā̱ pṛṣvā̎bhya̱ḥ
svāhā̱ syanda̍mānābhya̱ḥ svāhā̎ sthāva̱rābhya̱ḥ svāhā̍ nāde̱yībhya̱ḥ svāhā̍
saindha̱vībhya̱ḥ svāhā̍ samu̱driyā̎bhya̱ḥ svāhā̱ sarvā̎bhya̱ḥ svāhā̎
||7.4.13||kūpyā̎bhyaścatvāri̱g̱ͫśat
||7.4.13||40 a̱dbhyaḥ svāhā̱ vaha̍ntībhya̱ḥ svāhā̍ pari̱vaha̍ntībhya̱ḥ svāhā̍ sama̱ntaṃ
vaha̍ntībhya̱ḥ svāhā̱ śīghra̱ṃ vaha̍ntībhya̱ḥ svāhā̱ śībha̱ṃ vaha̍ntībhya̱ḥ
svāho̱graṃ vaha̍ntībhya̱ḥ svāhā̍ bhī̱maṃ vaha̍ntībhya̱ḥ svāhā'ṃbho̎bhya̱ḥ svāhā̱
nabho̎bhya̱ḥ svāhā̱ maho̎bhya̱ḥ svāhā̱ sarva̍smai̱ svāhā̎
||7.4.14||a̱dbhya
ekā̱nna tri̱g̱ͫśat
||7.4.14||41 yo arva̍nta̱ṃ jighāgͫ̍sati̱ tama̱bhya̍mīti̱ varu̍ṇaḥ | pa̱ro marta̍ḥ pa̱raḥ
śvā || a̱haṃ ca̱ tvaṃ ca̍ vṛtraha̱nthsaṃ ba̍bhūva sa̱nibhya̱ ā | a̱rā̱tī̱vā
ci̍dadri̱vo'nu̍ nau śūra magͫsatai bha̱drā indra̍sya rā̱taya̍ḥ || a̱bhi kratve̎ndra
bhū̱radha̱ jmanna te̍ vivyaṅmahi̱māna̱g̱ͫ rajāgͫ̍si | svenā̱ hi vṛ̱tragͫ
śava̍sā ja̱ghantha̱ na śatru̱ranta̍ṃ vividadyu̱dhā te̎
||7.4.15||vi̱vi̱da̱
dve ca̍
||7.4.15||42 namo̱ rājñe̱ namo̱ varu̍ṇāya̱ namo'śvā̍ya̱ nama̍ḥ pra̱jāpa̍taye̱
namo'dhi̍pata̱ye'dhi̍patira̱syadhi̍patiṃ mā ku̱rvadhi̍patira̱haṃ pra̱jānā̎ṃ
bhūyāsa̱ṃ māṃ dhe̍hi̱ mayi̍ dhehyu̱pākṛ̍tāya̱ svāhāla̍bdhāya̱ svāhā̍ hu̱tāya̱
svāhā̎
||7.4.16||nama̱ ekā̱nna tri̱g̱ͫśat
||7.4.16||43 ma̱yo̱bhūrvāto̍ a̱bhi vā̍tū̱srā ūrja̍svatī̱roṣa̍dhī̱rā ri̍śantām |
pīva̍svatīrjī̱vadha̍nyāḥ pibantvava̱sāya̍ pa̱dvate̍ rudra mṛḍa || yāḥ sarū̍pā̱
virū̍pā̱ eka̍rūpā̱ yāsā̍ma̱gniriṣṭyā̱ nāmā̍ni̱ veda̍ | yā aṃgi̍rasa̱stapa̍se̱ha
ca̱krustābhya̍ḥ parjanya̱ mahi̱ śarma̍ yaccha || yā de̱veṣu̍ ta̱nuva̱maira̍yanta̱
yāsā̱g̱ͫ somo̱ viśvā̍ rū̱pāṇi̱ veda̍ | tā a̱smabhya̱ṃ paya̍sā̱ pinva̍mānāḥ
pra̱jāva̍tīrindra
44 go̱ṣṭhe ri̍rīhi || pra̱jāpa̍ti̱rmahya̍me̱tā rarā̍ṇo̱ viśvai̎rde̱vaiḥ
pi̱tṛbhi̍ḥ saṃvidā̱naḥ | śi̱vāḥ sa̱tīrupa̍ no go̱ṣṭhamāka̱stāsā̎ṃ va̱yaṃ
pra̱jayā̱ sagͫ sa̍dema || i̱ha dhṛti̱ḥ svāhe̱ha vidhṛ̍ti̱ḥ svāhe̱ha ranti̱ḥ
svāhe̱ha rama̍ti̱ḥ svāhā̍ ma̱hī mū̱ṣu su̱trāmā̍ṇam
||7.4.17||i̱ndrā̱ṣṭā
trigͫ̍śacca
||7.4.17||45 ki2gͫ svi̍dāsītpū̱rvaci̍tti̱ḥ ki2gͫ svi̍dāsīdbṛ̱hadvaya̍ḥ | ki2gͫ
svi̍dāsītpiśaṃgi̱lā ki2gͫ svi̍dāsītpilippi̱lā || dyaurā̍sītpū̱rvaci̍tti̱raśva̍
āsīdbṛ̱hadvaya̍ḥ | rātri̍rāsītpiśaṃgi̱lāvi̍rāsītpilippi̱lā || kaḥ svi̍dekā̱kī
ca̍rati̱ ka u̍ svijjāyate̱ puna̍ḥ | ki2gͫ svi̍ddhi̱masya̍ bheṣa̱jaṃ ki2gͫ
svi̍dā̱vapa̍naṃ ma̱hat || sūrya̍ ekā̱kī ca̍rati
46 ca̱ndramā̍ jāyate̱ puna̍ḥ | a̱gnirhi̱masya̍ bheṣa̱jaṃ bhūmi̍rā̱vapa̍naṃ ma̱hat ||
pṛ̱cchāmi̍ tvā̱ para̱manta̍ṃ pṛthi̱vyāḥ pṛ̱cchāmi̍ tvā̱ bhuva̍nasya̱ nābhi̎m
| pṛ̱cchāmi̍ tvā̱ vṛṣṇo̱ aśva̍sya̱ reta̍ḥ pṛ̱cchāmi̍ vā̱caḥ pa̍ra̱maṃ
vyo̍ma || vedi̍māhu̱ḥ para̱manta̍ṃ pṛthi̱vyā ya̱jñamā̍hu̱rbhuva̍nasya̱ nābhi̎m |
soma̍māhu̱rvṛṣṇo̱ aśva̍sya̱ reto̱ brahmai̱va vā̱caḥ pa̍ra̱maṃ vyo̍ma
||7.4.18||sūrya̍ ekā̱kī ca̍rati̱ ṣaṭ ca̍tvārigͫśacca
||7.4.18||47 ambe̱ aṃbā̱lyaṃbi̍ke̱ na mā̍ nayati̱ kaśca̱na | sa̱ sastya̍śva̱kaḥ ||
subha̍ge̱ kāṃpī̍lavāsini suva̱rge lo̱ke saṃ prorṇvā̍thām | āhama̍jāni garbha̱dhamā
tvama̍jāsi garbha̱dham | tau sa̱ha ca̱tura̍ḥ pa̱daḥ saṃ pra sā̍rayāvahai | vṛṣā̍
vāgͫ reto̱dhā reto̍ dadhā̱tūthsa̱kthyo̎rgṛ̱daṃ dhe̎hya̱ṃjimuda̍ṃji̱manva̍ja |
yaḥ strī̱ṇāṃ jī̍va̱bhoja̍no̱ ya ā̍sāṃ
48 bila̱dhāva̍naḥ | pri̱yaḥ strī̱ṇāma̍pī̱cya̍ḥ | ya ā̍sāṃ kṛ̱ṣṇe lakṣma̍ṇi̱
sardi̍gṛdiṃ pa̱rāva̍dhīt || ambe̱ aṃbā̱lyaṃbi̍ke̱ na mā̍ yabhati̱ kaśca̱na |
sa̱sastya̍śva̱kaḥ || ū̱rdhvāme̍nā̱mucchra̍yatādveṇubhā̱raṃ gi̱rāvi̍va | athā̎syā̱
madhya̍medhatāgͫ śī̱te vāte̍ pu̱nanni̍va || ambe̱ aṃbā̱lyaṃbi̍ke̱ na mā̍ yabhati̱
kaśca̱na | sa̱sastya̍śva̱kaḥ || yaddha̍ri̱ṇī yava̱matti̱ na
49 pu̱ṣṭaṃ pa̱śu ma̍nyate | śū̱drā yadarya̍jārā̱ na poṣā̍ya dhanāyati || ambe̱
aṃbā̱lyaṃbi̍ke̱ na mā̍ yabhati̱ kaśca̱na | sa̱sastya̍śva̱kaḥ || i̱yaṃ ya̱kā
śa̍kunti̱kāhala̱miti̱ sarpa̍ti | āha̍taṃ ga̱bhe paso̱ ni ja̍lgulīti̱ dhāṇi̍kā ||
ambe̱ aṃbā̱lyaṃbi̍ke̱ na mā̍ yabhati̱ kaśca̱na | sa̱sastya̍śva̱kaḥ || mā̱tā ca̍
te pi̱tā ca̱ te'gra̍ṃ vṛ̱kṣasya̍ rohataḥ |
50 pra su̍lā̱mīti̍ te pi̱tā ga̱bhe mu̱ṣṭima̍tagͫsayat || da̱dhi̱krāvṇṇo̍ akāriṣaṃ
ji̱ṣṇoraśva̍sya vā̱jina̍ḥ | su̱ra̱bhi no̱ mukhā̍ kara̱tpraṇa̱ āyūgͫ̍ṣi tāriṣat
|| āpo̱ hiṣṭhā ma̍yo̱bhuva̱stā na̍ ū̱rje da̍dhātana | ma̱he raṇā̍ya̱ cakṣa̍se ||
yo va̍ḥ śi̱vata̍mo̱ rasa̱stasya̍ bhājayate̱ha na̍ḥ | u̱śa̱tīri̍va mā̱tara̍ḥ ||
tasmā̱ ara̍ṃ gamāma vo̱ yasya̱ kṣayā̍ya̱ jinva̍tha | āpo̍ ja̱naya̍thā ca naḥ
||7.4.19||ā̱sā̱matti̱ na ro̍hato̱ jinva̍tha ca̱tvāri̍ ca
||7.4.19||51 bhūrbhuva̱ḥsuva̱rvasa̍vastvā'ñjantu gāya̱treṇa̱ chaṃda̍sā ru̱drāsstvā̎ñjantu̱
traiṣṭu̍bhena̱ chaṃda̍sādi̱tyāstvā̎ñjantu̱ jāga̍tena̱ chaṃda̍sā̱ yadvāto̍
a̱po aga̍ma̱dindra̍sya ta̱nuva̍ṃ pri̱yām | e̱ta2gͫ sto̍tare̱tena̍ pa̱thā
puna̱raśva̱mā va̍rtayāsi naḥ || lājī 3 ñchācī 3 n, yaśo̍ ma̱mā 4 m | ya̱vyāyai̍
ga̱vyāyā̍ e̱tadde̍vā̱ anna̍mattai̱tadanna̍maddhi prajāpate || yu̱ñjanti̍
bra̱dhnama̍ru̱ṣaṃ cara̍nta̱ṃ pari̍ ta̱sthuṣa̍ḥ | roca̍nte roca̱nā di̱vi ||
yu̱ñjantya̍sya̱ kāmyā̱ harī̱ vipa̍kṣasā̱ rathe̎ | śoṇā̍ dhṛ̱ṣṇū nṛ̱vāha̍sā
|| ke̱tuṃ kṛ̱ṇvanna̍ke̱tave̱ peśo̍ maryā ape̱śase̎ | samu̱ṣadbhi̍rajāyathāḥ
||7.4.20||bra̱dhnaṃ paṃca̍ vigͫśatiśca
||7.4.20||52 prā̱ṇāya̱ svāhā̎ vyā̱nāya̱ svāhā̍pā̱nāya̱ svāhā̱ snāva̍bhya̱ḥ svāhā̍
saṃtā̱nebhya̱ḥ svāhā̱ pari̍saṃtānebhya̱ḥ svāhā̱ parva̍bhya̱ḥ svāhā̍ sa̱ṃdhāne̎bhya̱ḥ
svāhā̱ śarī̍rebhya̱ḥ svāhā̍ ya̱jñāya̱ svāhā̱ dakṣi̍ṇābhya̱ḥ svāhā̍ suva̱rgāya̱
svāhā̍ lo̱kāya̱ svāhā̱ sarva̍smai̱ svāhā̎
||7.4.21||prā̱ṇāyā̱ṣṭāvigͫ̍śatiḥ
||7.4.21||53 si̱tāya̱ svāhāsi̍tāya̱ svāhā̱bhihi̍tāya̱ svāhāna̍bhihitāya̱ svāhā̍ yu̱ktāya̱
svāhāyu̍ktāya̱ svāhā̱ suyu̍ktāya̱ svāhodyu̍ktāya̱ svāhā̱ vimu̍ktāya̱ svāhā̱
pramu̍ktāya̱ svāhā̱ vañca̍te̱ svāhā̍ pari̱vañca̍te̱ svāhā̍ sa̱ṃvañca̍te̱
svāhā̍nu̱vañca̍te̱ svāho̱dvañca̍te̱ svāhā̍ ya̱te svāhā̱ dhāva̍te̱ svāhā̱
tiṣṭha̍te̱ svāhā̱ sarva̍smai̱ svāhā̎
||7.4.22||si̱tāyā̱ṣṭā trigͫ̍śat
||7.4.22||saptamakāṇḍe pañcamaḥ praśnaḥ 5
1 gāvo̱ vā e̱tathsa̱ttramā̍satāśaṛ̱ṅgāḥ sa̱tīḥ śaṛṅgā̍ṇi no
jāyantā̱ iti̱ kāme̍na̱ tāsā̱ṃ daśa̱ māsā̱ niṣa̍ṇṇā̱ āsa̱nnatha̱
śaṛṅgā̎nyajāyanta̱ tā uda̍tiṣṭha̱nnarā̱thsmetyatha̱ yāsā̱ṃ nājā̍yanta̱ tāḥ
sa̍ṃvathsa̱ramā̱ptvoda̍tiṣṭha̱nnarā̱thsmeti̱ yāsā̱ṃ cājā̍yanta̱ yāsā̎ṃ ca̱
na tā u̱bhayī̱ruda̍tiṣṭha̱nnarā̱thsmeti̍ gosa̱ttraṃ vai
2 sa̍ṃvathsa̱ro ya e̱vaṃ vi̱dvāgͫsa̍ḥ saṃvathsa̱ramu̍pa̱yantyṛ̍dhnu̱vantye̱va
tasmā̎ttūpa̱rā vārṣi̍kau̱ māsau̱ partvā̍ carati sa̱ttrābhi̍jita̱gg̱
hya̍syai̱ tasmā̎thsaṃvathsara̱sado̱ yatkiṃca̍ gṛ̱he kri̱yate̱
tadā̱ptamava̍ruddhama̱bhiji̍taṃ kriyate samu̱draṃ vā e̱te pra pla̍vante̱ ye
sa̍ṃvathsa̱ramu̍pa̱yanti̱ yo vai sa̍mu̱drasya̍ pā̱raṃ na paśya̍ti̱ na vai sa
tata̱ ude̍ti saṃvathsa̱ro
3 vai sa̍mu̱drastasyai̱tatpā̱raṃ yada̍tirā̱trau ya e̱vaṃ vi̱dvāgͫsa̍ḥ
saṃvathsa̱ramu̍pa̱yantyanā̎rtā e̱vodṛca̍ṃ gacchantī̱yaṃ vai
pū?rvo̍'tirā̱tro̍'sāvutta̍ro̱ mana̱ḥ pūrvo̱ vāgutta̍raḥ prā̱ṇaḥ
pūrvo̍'pā̱na utta̍raḥ pra̱rodha̍na̱ṃ pūrva̍ u̱daya̍na̱mutta̍ro̱
jyoti̍ṣṭomo vaiśvāna̱ro̍'tirā̱tro bha̍vati̱ jyoti̍re̱va pu̱rastā̎ddadhate
suva̱rgasya̍ lo̱kasyānu̍khyātyai caturvi̱g̱ͫśaḥ prā̍ya̱ṇīyo̍ bhavati̱
catu̍rvigͫśatirardhamā̱sāḥ
4 sa̍ṃvathsa̱raḥ pra̱yanta̍ e̱va sa̍ṃvathsa̱re prati̍ tiṣṭhanti̱ tasya̱ trīṇi̍
ca śa̱tāni̍ ṣa̱ṣṭiśca̍ sto̱trīyā̱stāva̍tīḥ saṃvathsa̱rasya̱ rātra̍ya
u̱bhe e̱va sa̍ṃvathsa̱rasya̍ rū̱pe ā̎pnuvanti̱ te sa2gͫsthi̍tyā̱ ari̍ṣṭyā̱
utta̍rai̱raho̍bhiścaranti ṣaḍa̱hā bha̍vanti̱ ṣaḍvā ṛ̱tava̍ḥ saṃvathsa̱ra
ṛ̱tuṣve̱va sa̍ṃvathsa̱re prati̍ tiṣṭhanti̱ gauścāyu̍śca madhya̱taḥ stomau̍
bhavataḥ saṃvathsa̱rasyai̱va tanmi̍thu̱naṃ ma̍dhya̱to
5 da̍dhati pra̱jana̍nāya̱ jyoti̍ra̱bhito̍ bhavati vi̱moca̍name̱va tacchandāg̍sye̱va
tadvi̱moka̍ṃ ya̱ntyatho̍ ubha̱yato̎ jyotiṣai̱va ṣa̍ḍa̱hena̍ suva̱rgaṃ lo̱kaṃ
ya̍nti brahmavā̱dino̍ vada̱ntyāsa̍te̱ kena̍ ya̱ntīti̍ deva̱yāne̍na pa̱theti̍
brūyā̱cchandāgͫ̍si̱ vai de̍va̱yāna̱ḥ panthā̍ gāya̱trī tri̱ṣṭubjaga̍tī̱
jyoti̱rvai gā̍ya̱trī gaustri̱ṣṭugā?yu̱rjaga̍tī̱ yade̱te stomā̱ bhava̍nti
deva̱yāne̍nai̱va
6 tatpa̱thā ya̍nti samā̱nagͫ sāma̍ bhavati devalo̱ko vai sāma̍
devalo̱kāde̱va na ya̍ntya̱nyā a̍nyā̱ ṛco̍ bhavanti manuṣyalo̱ko vā ṛco̍
manuṣyalo̱kāde̱vānyama̍nyaṃ devalo̱kama̍bhyā̱roha̍nto yantyabhiva̱rto
bra̍hmasā̱maṃ bha̍vati suva̱rgasya̍ lo̱kasyā̱bhivṛ̍ttyā abhi̱jidbha̍vati
suva̱rgasya̍ lo̱kasyā̱bhiji̍tyai viśva̱jidbha̍vati̱ viśva̍sya̱ jityai̍
mā̱simā̍si pṛ̱ṣṭhānyupa̍ yanti mā̱simā̎syatigrā̱hyā̍ gṛhyante mā̱simā̎sye̱va
vī̱rya̍ṃ dadhati mā̱sāṃ prati̍ṣṭhityā u̱pari̍ṣṭānmā̱sāṃ pṛ̱ṣṭhānyupa̍ yanti̱
tasmā̍du̱pari̍ṣṭā̱doṣa̍dhaya̱ḥ phala̍ṃ gṛhṇanti
||7.5.1||go̱sa̱traṃ vā
e̍ti saṃvathsa̱ro̎'rdhamā̱sā mi̍thu̱naṃ ma̍dhya̱to de̍va̱yāne̍nai̱va vī̱ryaṃ
trayo̍daśa ca
||7.5.1||7 gāvo̱ vā e̱tathsa̱ttramā̍satāśaṛ̱ṅgāḥ sa̱tīḥ śaṛṅgā̍ṇi̱
siṣā̍santī̱stāsā̱ṃ daśa̱ māsā̱ niṣa̍ṇṇā̱ āsa̱nnatha̱ śaṛṅgā̎ṇyajāyanta̱
tā a̍bruva̱nnarā̱thsmotti̍ṣṭhā̱māva̱ taṃ kāma̍maruthsmahi̱ yena̱ kāme̍na̱
nyaṣa̍dā̱meti̱ tāsā̍mu̱ tvā a̍bruvanna̱rdhā vā̱ yāva̍tī̱rvāsā̍mahā e̱vemau
dvā̍da̱śau māsau̍ saṃvathsa̱ragͫ sa̱ṃ pādyotti̍ṣṭhā̱meti̱ tāsā̎ṃ
8 dvāda̱śe mā̱si śaṛṅgā̍ṇi̱ prāva̍rtanta śra̱ddhayā̱ vā'śra̍ddhayā vā̱ tā
i̱mā yāstū̍pa̱rā u̱bhayyo̱ vāva tā ā̎rdhnuva̱ṉ, yāśca̱ śaṛṅgā̱ṇyasa̍nva̱ṉ
yāścorja̍ma̱vāru̍ṃdhata̱rdhnoti̍ da̱śasu̍ mā̱sū̎ttiṣṭha̍nnṛ̱dhnoti̍
dvāda̱śasu̱ ya e̱vaṃ veda̍ pa̱dena̱ khalu̱ vā e̱te ya̍nti vi̱ndati̱ khalu̱
vai pa̱dena̱ yantadvā e̱tadṛ̱ddhamaya̍na̱ṃ tasmā̍de̱tadgo̱sani̍
||7.5.2||ti̱ṣṭhā̱meti̱ tāsā̱ṃ tasmā̱ddve ca̍
||7.5.2||9 pra̱tha̱me mā̱si pṛ̱ṣṭhānyupa̍ yanti madhya̱ma upa̍ yantyutta̱ma upa̍ yanti̱
tadā̍hu̱ryāṃ vai trireka̱syāhna̍ upa̱sīda̍nti da̱hraṃ vai sāpa̍rābhyā̱ṃ dohā̎bhyāṃ
du̱he'tha̱ kuta̱ḥ sā dho̎kṣyate̱ yāṃ dvāda̍śa̱ kṛtva̍ upa̱sīda̱ntīti̍
saṃvathsa̱ragͫ sa̱ṃ pādyo̎tta̱me mā̱si sa̱kṛtpṛ̱ṣṭhānyupe̍yu̱stadyaja̍mānā
ya̱jñaṃ pa̱śūnava̍ ruṃdhate samu̱draṃ vā
10 e̱te̍'navā̱rama̍pā̱raṃ pra pla̍vante̱ ye sa̍ṃvathsa̱ramu̍pa̱yanti̱
yadbṛ̍hadrathaṃta̱re a̱nvarje̍yu̱ryathā̱ madhye̍ samu̱drasya̍
pla̱vama̱nvarje̍yustā̱dṛktadanu̍thsargaṃ bṛhadrathaṃta̱rābhyā̍mi̱tvā
pra̍ti̱ṣṭhāṃ ga̍cchanti̱ sarve̎bhyo̱ vai kāme̎bhyaḥ sa̱ṃdhirdu̍he̱ tadyaja̍mānā̱ḥ
sarvā̱nkāmā̱nava̍ ruṃdhate
||7.5.3||sa̱mu̱draṃ vai catu̍strigͫśacca
||7.5.3||11 sa̱mā̱nya̍ ṛco̍ bhavanti manuṣyalo̱ko vā ṛco̍ manuṣyalo̱kāde̱va na
ya̍ntya̱nyada̍nya̱thsāma̍ bhavati devalo̱ko vai sāma̍ devalo̱kāde̱vānyama̍nyaṃ
manuṣyalo̱kaṃ pra̍tyava̱roha̍nto yanti̱ jaga̍tī̱magra̱ upa̍ yanti̱ jaga̍tī̱ṃ
vai chandāgͫ̍si pra̱tyava̍rohantyāgraya̱ṇaṃ grahā̍ bṛ̱hatpṛ̱ṣṭhāni̍
trayastri̱g̱ͫśa2gͫ stomā̱stasmā̱jjyāyāgͫ̍sa̱ṃ kanī̍yānpra̱tyava̍rohati
vaiśvakarma̱ṇo gṛ̍hyate̱ viśvā̎nye̱va tena̱ karmā̍ṇi̱ yaja̍mānā̱ ava̍ ruṃdhata
ādi̱tyo
12 gṛ̍hyata i̱yaṃ vā adi̍tira̱syāme̱va prati̍ tiṣṭhantya̱nyo̎'nyo gṛhyete
mithuna̱tvāya̱ prajā̎tyā avānta̱raṃ vai da̍śarā̱treṇa̍ pra̱jāpa̍tiḥ pra̱jā
a̍sṛjata̱ yadda̍śarā̱tro bhava̍ti pra̱jā e̱va tadyaja̍mānāḥ sṛjanta e̱tāgͫ ha̱
vā u̍da̱ṅkaḥ śau̎lbāya̱naḥ sa̱ttrasyarddhi̍muvāca̱ yadda̍śarā̱tro yadda̍śarā̱tro
bhava̍ti sa̱ttrasyardhyā̱ atho̱ yade̱va pūrve̱ṣvaha̍ssu̱ vilo̍ma kri̱yate̱
tasyai̱vaiṣā śānti̍ḥ
||7.5.4||ā̱di̱tyastasyai̱va dve ca̍
||7.5.4||13 yadi̱ somau̱ sagͫsu̍tau̱ syātā̎ṃ maha̱ti rātri̍yai
prātaranuvā̱kamu̱pāku̍ryā̱tpūrvo̱ vāca̱ṃ pūrvo̍ de̱vatā̱ḥ pūrva̱śchandāgͫ̍si
vṛṅkte̱ vṛṣa̍ṇvatīṃ prati̱pada̍ṃ kuryātprātaḥ sava̱nāde̱vaiṣā̱mindra̍ṃ
vṛ̱ṅkte'tho̱ khalvā̍huḥ savanamu̱khe sa̍vanamukhe kā̱ryeti̍
savanamu̱khāthsa̍vanamukhāde̱vaiṣā̱mindra̍ṃ vṛṅkte saṃve̱śāyo̍pave̱śāya̍
gāyatri̱yāstri̱ṣṭubho̱ jaga̍tyā anu̱ṣṭubha̍ḥ pa̱ṅktyā a̱bhibhū̎tyai̱ svāhā̱
chandāgͫ̍si̱ vai sa̍ṃve̱śa u̍pave̱śaśchando̍bhire̱vaiṣā̱ṃ
14 chandāgͫ̍si vṛṅkte saja̱nīya̱g̱ͫ śasya̍ṃ viha̱vyagͫ̍
śasya̍ma̱gastya̍sya kayāśu̱bhīya̱g̱ͫ śasya̍me̱tāva̱dvā a̍sti̱
yāva̍de̱tadyāva̍de̱vāsti̱ tade̍ṣāṃ vṛṅkte̱ yadi̍ prātaḥ sava̱ne ka̱laśo̱ dīrye̍ta
vaiṣṇa̱vīṣu̍ śipivi̱ṣṭava̍tīṣu stuvīra̱ṉ, yadvai ya̱jñasyā̍ti̱ricya̍te̱
viṣṇu̱ṃ tacchi̍pivi̱ṣṭama̱bhyati̍ ricyate̱ tadviṣṇu̍ḥ śipivi̱ṣṭo'ti̍rikta
e̱vāti̍riktaṃ dadhā̱tyatho̱ ati̍riktenai̱vāti̍riktamā̱ptvāva̍ ruṃdhate̱ yadi̍
ma̱dhyaṃdi̍ne̱ dīrye̍ta vaṣaṭkā̱rani̍dhana̱g̱ͫ sāma̍ kuryurvaṣaṭkā̱ro vai
ya̱jñasya̍ prati̱ṣṭhā pra̍ti̱ṣṭhāme̱vaina̍dgamayanti̱ yadi̍ tṛtīyasava̱na
e̱tade̱va
||7.5.5||chando̍bhire̱vaiṣā̱mavaikā̱nna vigͫ̍śa̱tiśca̍
||7.5.5||15 ṣa̱ḍa̱hairmāsā̎nthsa̱ṃ pādyāha̱ruthsṛ̍janti ṣaḍa̱hairhi māsā̎nthsa̱ṃ
paśya̍ntyardhamā̱sairmāsā̎nthsa̱ṃ pādyā'ha̱ruthsṛ̍jantyardhamā̱sairhi māsā̎nthsa̱ṃ
paśya̍ntyamāvā̱sya̍yā̱ māsā̎nthsa̱ṃ pādyāha̱ruthsṛ̍jantyamāvā̱sya̍yā̱ hi
māsā̎nthsa̱ṃ paśya̍nti paurṇamā̱syā māsā̎nthsa̱ṃ pādyāha̱ruthsṛ̍janti paurṇamā̱syā
hi māsā̎nthsa̱ṃ paśya̍nti̱ yo vai pū̱rṇa ā̍si̱ñcati̱ parā̱ sa si̍ñcati̱
yaḥ pū̱rṇādu̱daca̍ti
16 prā̱ṇama̍smi̱nthsa da̍dhāti̱ yatpau̎rṇamā̱syā māsā̎nthsa̱ṃ pādyāha̍ruthsṛ̱janti̍
saṃvathsa̱rāyai̱va tatprā̱ṇaṃ da̍dhati̱ tadanu̍ sa̱ttriṇa̱ḥ prāṇa̍nti̱
yadaha̱rnothsṛ̱jeyu̱ryathā̱ dṛti̱rupa̍naddho vi̱pata̍tye̱vagͫ sa̍ṃvathsa̱ro
vi pa̍te̱dārti̱mārcche̍yu̱ryatpau̎rṇamā̱syā māsā̎nthsa̱ṃ pādyāha̍ruthsṛ̱janti̍
saṃvathsa̱rāyai̱va tadu̍dā̱naṃ da̍dhati̱ tadanu̍ sa̱ttriṇa̱ u
17 da̍nanti̱ nārti̱mārccha̍nti pū̱rṇamā̍se̱ vai de̱vānāgͫ̍ su̱to yatpau̎rṇamā̱syā
māsā̎nthsa̱ṃ pādyāha̍ruthsṛ̱janti̍ de̱vānā̍me̱va tadya̱jñena̍ ya̱jñaṃ
pra̱tyava̍rohanti̱ vi vā e̱tadya̱jñaṃ chi̍ndanti̱ yatṣa̍ḍa̱ha sa̍ṃtata̱g̱ͫ
santa̱mathāha̍ruthsṛ̱janti̍ prājāpa̱tyaṃ pa̱śumāla̍bhante pra̱jāpa̍ti̱ḥ sarvā̍
de̱vatā̍ de̱vatā̍bhire̱va ya̱jñagͫ saṃ ta̍nvanti̱ yanti̱ vā e̱te sava̍nā̱dye'ha̍
18 ruthsṛ̱janti̍ tu̱rīya̱ṃ khalu̱ vā e̱tathsava̍na̱ṃ yathsā̎nnā̱yyaṃ yathsā̎nnā̱yyaṃ
bhava̍ti̱ tenai̱va sava̍nā̱nnaya̍nti samupa̱hūya̍ bhakṣayantye̱tathso̍mapīthā̱
hye̍tarhi̍ yathāyata̱naṃ vā e̱teṣāgͫ̍ savana̱bhājo̍ de̱vatā̍ gacchanti̱
ye'ha̍ruthsṛ̱jantya̍nusava̱naṃ pu̍ro̱ḍāśā̱nnirva̍panti yathāyata̱nāde̱va
sa̍vana̱bhājo̍ de̱vatā̱ ava̍ ruṃdhate̱'ṣṭāka̍pālān prātaḥ sava̱na
ekā̍daśakapālā̱nmādhya̍ṃdine̱ sava̍ne̱ dvāda̍śakapālāgstṛtīyasava̱ne
chandāg̍sye̱vāptvāva̍ ruṃdhate vaiśvade̱vaṃ ca̱ruṃ tṛ̍tīyasava̱ne nirva̍panti
vaiśvade̱vaṃ vai tṛ̍tīyasava̱naṃ tenai̱va tṛ̍tīyasava̱nānna ya̍nti
||7.5.6||u̱daca̱tyudye'ha̍rā̱ptvā paṃca̍daśa ca
||7.5.6||19 u̱thsṛjyāṃ3 nothsṛjyā3 miti̍ mīmāgͫsante
brahmavā̱dina̱stadvā̍huru̱?thsṛjya̍me̱vetya̍māvā̱syā̍yāṃ ca paurṇamā̱syāṃ
co̱thsṛjya̱mityā̍hure̱te hi ya̱jñaṃ vaha̍ta iti̱ te tvāva nothsṛjye̱
ityā̍hu̱rye a̍vānta̱raṃ ya̱jñaṃ bhe̱jāte̱ iti̱ yā pra̍tha̱mā vya̍ṣṭakā̱
tasyā̍mu̱thsṛjya̱mityā̍hure̱ṣa vai mā̱so vi̍śa̱ra iti̱ nādi̍ṣṭa̱
20 muthsṛ̍jeyu̱ryadādi̍ṣṭamuthsṛ̱jeyu̍ryā̱dṛśe̱ puna̍ḥ
paryāplā̱ve madhye̍ ṣaḍa̱hasya̍ sa̱ṃ padye̍ta ṣaḍa̱hairmāsā̎nthsa̱ṃ
pādya̱ yathsa̍pta̱mamaha̱stasmi̱nnuthsṛ̍jeyu̱stada̱gnaye̱ vasu̍mate
puro̱ḍāśa̍ma̱ṣṭāka̍pāla̱ṃ nirva̍peyurai̱ndraṃ dadhīndrā̍ya ma̱rutva̍te
puro̱ḍāśa̱mekā̍daśakapālaṃ vaiśvade̱vaṃ dvāda̍śakapālama̱gnervai vasu̍mataḥ
prātaḥsava̱naṃ yada̱gnaye̱ vasu̍mate puro̱ḍāśa̍ma̱ṣṭāka̍pālaṃ ni̱rvapa̍nti
de̱vatā̍me̱va tadbhā̱ginī̎ṃ ku̱rvanti̱
21 sava̍namaṣṭā̱bhirupa̍ yanti̱ yadai̱ndraṃ dadhi̱ bhava̱tīndra̍me̱va
tadbhā̍ga̱dheyā̱nna cyā̍vaya̱ntīndra̍sya̱ vai ma̱rutva̍to̱ mādhya̍ṃdina̱g̱ͫ
sava̍na̱ṃ yadindrā̍ya ma̱rutva̍te puro̱ḍāśa̱mekā̍daśakapālaṃ ni̱rvapa̍nti
de̱vatā̍me̱va tadbhā̱ginī̎ṃ ku̱rvanti̱ sava̍namekāda̱śabhi̱rupa̍ yanti̱
viśve̍ṣā̱ṃ vai de̱vānā̍mṛbhu̱matā̎ṃ tṛtīyasava̱naṃ yadvai̎śvade̱vaṃ
dvāda̍śakapālaṃ ni̱rvapa̍nti de̱vatā̍ e̱va tadbhā̱ginī̎ḥ ku̱rvanti̱ sava̍naṃ
dvāda̱śabhi̱
22 rupa̍ yanti prājāpa̱tyaṃ pa̱śumā la̍bhante ya̱jño vai
pra̱jāpa̍tirya̱jñasyāna̍nusargāyābhiva̱rta i̱taḥ ṣaṇmā̱so bra̍hmasā̱maṃ bha̍vati̱
brahma̱ vā a̍bhiva̱rto brahma̍ṇai̱va tathsu̍va̱rgaṃ lo̱kama̍bhiva̱rtaya̍nto yanti
pratikū̱lami̍va̱ hītaḥ su̍va̱rgo lo̱ka indra̱ kratu̍ṃ na̱ ā bha̍ra pi̱tā pu̱trebhyo̱
yathā̎ | śikṣā̍ no a̱sminpu̍ruhūta̱ yāma̍ni jī̱vā jyoti̍raśīma̱hītya̱muta̍
āya̱tāgͫ ṣaṇmā̱so bra̍hmasā̱maṃ bha̍vatya̱yaṃ vai lo̱ko jyoti̍ḥ pra̱jā
jyoti̍ri̱mame̱va tallo̱kaṃ paśya̍nto'bhi̱vada̍nta̱ ā ya̍nti
||7.5.7||nādi̍ṣṭaṃ
ku̱rvanti̍ dvāda̱śabhi̱riti̍ vigͫśa̱tiśca̍
||7.5.7||23 de̱vānā̱ṃ vā anta̍ṃ ja̱gmuṣā̍miṃdri̱yaṃ
vī̱rya̍mapā̎krāma̱ttatkro̱śenāvā̍ruṃdhata̱ tatkro̱śasya̍ krośa̱tvaṃ yatkro̱śena̱
cātvā̍la̱syānte̎ stu̱vanti̍ ya̱jñasyai̱vānta̍ṃ ga̱tveṃdri̱yaṃ vī̱rya̍mava̍
ruṃdhate sa̱ttrasyarddhyā̍hava̱nīya̱syānte̎ stuvantya̱gnime̱vopa̍dra̱ṣṭāra̍ṃ
kṛ̱tvarddhi̱mupa̍ yanti pra̱jāpa̍te̱ṟ hṛda̍yena havi̱rdhāne̱'ntaḥ stu̍vanti
pre̱māṇa̍me̱vāsya̍ gacchanti ślo̱kena̍ pu̱rastā̱thsada̍saḥ
24 stuva̱ntyanu̍ślokena pa̱ścādya̱jñasyai̱vānta̍ṃ ga̱tvā ślo̍ka̱bhājo̍
bhavanti na̱vabhi̍radhva̱ryurudgā̍yati̱ nava̱ vai puru̍ṣe prā̱ṇāḥ prā̱ṇāne̱va
yaja̍māneṣu dadhāti̱ sarvā̍ ai̱ndriyo̍ bhavanti prā̱ṇeṣve̱veṃdri̱yaṃ
da̍dha̱tyapra̍tihṛtābhi̱rudgā̍yati̱ tasmā̱tpuru̍ṣa̱ḥ sarvā̎ṇya̱nyāni̍
śī̱ṟṣṇo'ṅgā̍ni̱ pratya̍cati̱ śira̍ e̱va na pa̍ñcada̱śagͫ ra̍thaṃta̱raṃ
bha̍vatīndri̱yame̱vāva̍ ruṃdhate saptada̱śaṃ
25 bṛ̱hada̱nnādya̱syāva̍ruddhyā̱ atho̱ praiva tena̍ jāyanta ekavi̱g̱ͫśaṃ bha̱draṃ
dvi̱padā̍su̱ prati̍ṣṭhityai̱ patna̍ya̱ upa̍ gāyanti mithuna̱tvāya̱ prajā̎tyai
pra̱jāpa̍tiḥ pra̱jā a̍sṛjata̱ so̍'kāmayatā̱sāma̱hagͫ rā̱jyaṃ parī̍yā̱miti̱
tāsāgͫ̍ rāja̱nenai̱va rā̱jyaṃ paryai̱ttadrā̍ja̱nasya̍ rājana̱tvaṃ yadrā̍ja̱naṃ
bhava̍ti pra̱jānā̍me̱va tadyaja̍mānā rā̱jyaṃ pari̍ yanti pañcavi̱g̱ͫśaṃ bha̍vati
pra̱jāpa̍te̱
26 rāptyai̍ pa̱ñcabhi̱stiṣṭha̍ntaḥ stuvanti devalo̱kame̱vābhi ja̍yanti
pa̱ñcabhi̱rāsī̍nā manuṣyalo̱kame̱vābhi ja̍yanti̱ daśa̱ saṃ pa̍dyante̱ daśā̎kṣarā
vi̱rāḍanna̍ṃ vi̱rāḍvi̱rājai̱vānnādya̱mava̍ ruṃdhate pañca̱dhā vi̍ni̱ṣadya̍
stuvanti̱ pañca̱ diśo̍ di̱kṣve̍va prati̍ tiṣṭha̱ntyekai̍ka̱yāstu̍tayā
sa̱māya̍nti di̱gbhya e̱vānnādya̱g̱ͫ saṃbha̍ranti̱ tābhi̍rudgā̱todgā̍yati di̱gbhya
e̱vānnādyagͫ̍
27 sa̱ṃbhṛtya̱ teja̍ ā̱tmanda̍dhate̱ tasmā̱deka̍ḥ prā̱ṇaḥ
sarvā̱ṇyaṅgā̎nyava̱tyatho̱ yathā̍ supa̱rṇa u̍tpati̱ṣyañchira̍ utta̱maṃ ku̍ru̱ta
e̱vame̱va tadyaja̍mānāḥ pra̱jānā̍mutta̱mā bha̍vantyāsa̱ndīmu̍dgā̱tā'ro̍hati̱
sāmrā̎jyame̱va ga̍cchanti ple̱ṅkhagͫ hotā̱ nāka̍syai̱va pṛ̱ṣṭhagͫ
ro̍hanti kū̱rcāva̍dhva̱ryurbra̱dhnasyai̱va vi̱ṣṭapa̍ṃ gacchantye̱tāva̍nto̱
vai de̍valo̱kāsteṣve̱va ya̍thāpū̱rvaṃ prati̍ tiṣṭha̱ntyatho̍ ā̱krama̍ṇame̱va
tathsetu̱ṃ yaja̍mānāḥ kurvate suva̱rgasya̍ lo̱kasya̱ sama̍ṣṭyai
||7.5.8||sada̍saḥ
saptada̱śaṃ pra̱jāpa̍tergāyati di̱gbhya e̱vānnādya̱ṃ pratyekā̍daśa ca
||7.5.8||28 a̱rkye̍ṇa̱ vai sa̍hasra̱śaḥ pra̱jāpa̍tiḥ pra̱jā a̍sṛjata̱ tābhya̱
ilā̎nde̱nerā̱ṃ lūtā̱mavā̍ruṃdha̱ yada̱rkya̍ṃ bhava̍ti pra̱jā e̱va tadyaja̍mānāḥ
sṛjanta̱ ilā̎ndaṃ bhavati pra̱jābhya̍ e̱va sṛ̱ṣṭābhya̱ irā̱ṃ lūtā̱mava̍ ruṃdhate̱
tasmā̱dyāgͫ samāgͫ̍ sa̱ttragͫ samṛ̍ddha̱ṃ kṣodhu̍kā̱stāgͫ samā̎ṃ pra̱jā
iṣa̱gg̱ hyā̍sā̱mūrja̍mā̱dada̍te̱ yāgͫ samā̱ṃ vyṛ̍ddha̱makṣo̍dhukā̱stāgͫ
samā̎ṃ pra̱jā
29 na hyā̍sā̱miṣa̱mūrja̍mā̱dada̍ta utkro̱daṃ ku̍rvate̱ yathā̍ ba̱ndhānmu̍mucā̱nā
u̍tkro̱daṃ ku̱rvata̍ e̱vame̱va tadyaja̍mānā devaba̱ndhānmu̍mucā̱nā
u̍tkro̱daṃ ku̍rvata̱ iṣa̱mūrja̍mā̱tmandadhā̍nā vā̱ṇaḥ śa̱tata̍nturbhavati
śa̱tāyu̱ḥ puru̍ṣaḥ śa̱teṃdri̍ya̱ āyu̍ṣye̱vendri̱ye prati̍ tiṣṭhantyā̱jiṃ
dhā̍va̱ntyana̍bhijitasyā̱bhiji̍tyai dundu̱bhīnthsa̱māghna̍nti para̱mā vā e̱ṣā vāgyā
du̍ndu̱bhau pa̍ra̱māme̱va
30 vāca̱mava̍ ruṃdhate bhūmidundu̱bhimā ghna̍nti̱ yaivemāṃ vākpravi̍ṣṭā̱
tāme̱vāva̍ ruṃdha̱te'tho̍ i̱māme̱va ja̍yanti̱ sarvā̱ vāco̍ vadanti̱ sarvā̍sāṃ
vā̱cāmava̍ruddhyā ā̱rdre carma̱nvyāya̍cchete indri̱yasyāva̍ruddhyā̱ ānyaḥ krośa̍ti̱
prānyaḥ śagͫ̍sati̱ ya ā̱krośa̍ti pu̱nātye̱vainā̱nthsa yaḥ pra̱śagͫsa̍ti
pū̱teṣve̱vānnādya̍ṃ dadhā̱tyṛṣi̍kṛtaṃ ca̱
31 vā e̱te de̱vakṛ̍taṃ ca̱ pūrvai̱rmāsai̱rava̍ ruṃdhate̱ yadbhū̍te̱cchadā̱g̱ͫ
sāmā̍ni̱ bhava̍ntyu̱bhaya̱syāva̍ruddhyai̱ yanti̱ vā e̱te mi̍thu̱nādye
sa̍ṃvathsa̱ramu̍pa̱yantya̍ntarve̱di mi̍thu̱nau saṃbha̍vata̱stenai̱va mi̍thu̱nānna
ya̍nti
||7.5.9||vyṛ̍ddha̱makṣo̍dhukā̱stāgͫ samā̎ṃ pra̱jāḥ pa̍ra̱māme̱va
ca̍ tri̱g̱ͫśacca̍
||7.5.9||32 carmāva̍ bhindanti pā̱pmāna̍me̱vaiṣā̱mava̍ bhindanti̱ māpa̍
rāthsī̱rmāti̍ vyāthsī̱rityā̍ha saṃ pra̱tye̍vaiṣā̎ṃ pā̱pmāna̱mava̍
bhindantyudaku̱ṃbhāna̍dhini̱dhāya̍ dā̱syo̍ mārjā̱līya̱ṃ pari̍ nṛtyanti pa̱do
ni̍ghna̱tīri̱daṃ ma̍dhu̱ṃ gāya̍ntyo̱ madhu̱ vai de̱vānā̎ṃ para̱mama̱nnādya̍ṃ
para̱mame̱vānnādya̱mava̍ ruṃdhate pa̱do ni ghna̍nti mahī̱yāme̱vaiṣu̍ dadhati
||7.5.10||carmaikā̱nna pa̍ṃcā̱śat
||7.5.10||33 pṛ̱thi̱vyai svāhā̱ntari̍kṣāya̱ svāhā̍ di̱ve svāhā̍ saṃ ploṣya̱te svāhā̍
sa̱ṃ plava̍mānāya̱ svāhā̱ saṃ plu̍tāya̱ svāhā̍ medhāyiṣya̱te svāhā̍ meghāya̱te
svāhā̍ meghi̱tāya̱ svāhā̍ me̱ghāya̱ svāhā̍ nīhā̱rāya̱ svāhā̍ ni̱hākā̍yai̱ svāhā̎
prāsa̱cāya̱ svāhā̎ praca̱lākā̍yai̱ svāhā̍ vidyotiṣya̱te svāhā̍ vi̱dyota̍mānāya̱
svāhā̍ saṃ vi̱dyota̍mānāya̱ svāhā̎ stanayiṣya̱te svāhā̎ sta̱naya̍te̱ svāho̱gra2gͫ
sta̱naya̍te̱ svāhā̍ varṣiṣya̱te svāhā̱ varṣa̍te̱ svāhā̍bhi̱varṣa̍te̱ svāhā̍
pari̱varṣa̍te̱ svāhā̍ sa̱ṃvarṣa̍te̱
34 svāhā̍nu̱varṣa̍te̱ svāhā̍ śīkāyiṣya̱te svāhā̍ śīkāya̱te svāhā̍ śīki̱tāya̱
svāhā̎ proṣiṣya̱te svāhā̎ pruṣṇa̱te svāhā̍ paripruṣṇa̱te svāho̎dgrahīṣya̱te
svāho̎dgṛhṇa̱te svāhodgṛ̍hītāya̱ svāhā̍ viploṣya̱te svāhā̍ vi̱plava̍mānāya̱ svāhā̱
viplu̍tāya̱ svāhā̍tapsya̱te svāhā̱'tapa̍te̱ svāho̱gramā̱tapa̍te̱ svāha̱rgbhyaḥ
svāhā̱ yaju̍rbhya̱ḥ svāhā̱ sāma̍bhya̱ḥ svāhāṃgi̍robhya̱ḥ svāhā̱ vede̎bhya̱ḥ svāhā̱
gāthā̎bhya̱ḥ svāhā̍ nārāśa̱g̱ͫsībhya̱ḥ svāhā̱ raibhī̎bhya̱ḥ svāhā̱ sarva̍smai̱
svāhā̎
||7.5.11||sa̱ṃvarṣa̍te̱ raibhī̎bhya̱ḥ svāhā̱ dve ca̍
||7.5.11||35 da̱tvate̱ svāhā̍da̱ntakā̍ya̱ svāhā̎ prā̱ṇine̱ svāhā̎prā̱ṇāya̱ svāhā̱
mukha̍vate̱ svāhā̍mu̱khāya̱ svāhā̱ nāsi̍kavate̱ svāhā̍nāsi̱kāya̱ svāhā̎kṣa̱ṇvate̱
svāhā̍na̱kṣikā̍ya̱ svāhā̍ ka̱rṇine̱ svāhā̍'ka̱rṇakā̍ya̱ svāhā̍ śīrṣa̱ṇvate̱
svāhā̍śī̱ṟṣakā̍ya̱ svāhā̍ pa̱dvate̱ svāhā̍pā̱dakā̍ya̱ svāhā̎ prāṇa̱te
svāhāprā̍ṇate̱ svāhā̱ vada̍te̱ svāhāva̍date̱ svāhā̱ paśya̍te̱ svāhāpa̍śyate̱
svāhā̍ śaṛṇva̱te svāhāśaṛ̍ṇvate̱ svāhā̍ mana̱svine̱ svāhā̍
36 'ma̱nase̱ svāhā̍ reta̱svine̱ svāhā̍re̱taskā̍ya̱ svāhā̎ pra̱jābhya̱ḥ svāhā̎
pra̱jana̍nāya̱ svāhā̱ loma̍vate̱ svāhā̍lo̱makā̍ya̱ svāhā̎ tva̱ce svāhā̱tvakkā̍ya̱
svāhā̱ carma̍ṇvate̱ svāhā̍ca̱rmakā̍ya̱ svāhā̱ lohi̍tavate̱ svāhā̍lohi̱tāya̱ svāhā̍
māgͫsa̱nvate̱ svāhā̍mā̱g̱ͫsakā̍ya̱ svāhā̱ snāva̍bhya̱ḥ svāhā̎snā̱vakā̍ya̱
svāhā̎stha̱nvate̱ svāhā̍na̱sthikā̍ya̱ svāhā̍ majja̱nvate̱ svāhā̍ma̱jjakā̍ya̱
svāhā̱ṅgine̱ svāhā̍na̱ṅgāya̱ svāhā̱tmane̱ svāhānā̎tmane̱ svāhā̱ sarva̍smai̱
svāhā̎
||7.5.12||ma̱na̱svine̱ svāhā'nā̎tmane̱ svāhā̱ dve ca̍
||7.5.12||37 kastvā̍ yunakti̱ sa tvā̍ yunaktu̱ viṣṇu̍stvā yunaktva̱sya ya̱jñasyarddhyai̱
mahya̱g̱ͫ saṃna̍tyā a̱muṣmai̱ kāmā̱yāyu̍ṣe tvā prā̱ṇāya̍ tvāpā̱nāya̍ tvā
vyā̱nāya̍ tvā̱ vyu̍ṣṭyai tvā ra̱yyai tvā̱ rādha̍se tvā̱ ghoṣā̍ya tvā̱ poṣā̍ya
tvārādgho̱ṣāya̍ tvā̱ pracyu̍tyai tvā
||7.5.13||kastvā̱'ṣṭā trigͫ̍śat
||7.5.13||38 a̱gnaye̍ gāya̱trāya̍ tri̱vṛte̱ rātha̍ṃtarāya vāsa̱ntāyā̱ṣṭāka̍pāla̱ indrā̍ya̱
traiṣṭu̍bhāya pañcada̱śāya̱ bārha̍tāya̱ graiṣmā̱yaikā̍daśakapālo̱ viśve̎bhyo
de̱vebhyo̱ jāga̍tebhyaḥ saptada̱śebhyo̍ vairū̱pebhyo̱ vārṣi̍kebhyo̱ dvāda̍śakapālo
mi̱trāvaru̍ṇābhyā̱mānu̍ṣṭubhābhyāmekavi̱g̱ͫśābhyā̎ṃ vairā̱jābhyāgͫ̍
śāra̱dābhyā̎ṃ paya̱syā̍ bṛha̱spata̍ye̱ pāṅktā̍?ya triṇa̱vāya̍ śākva̱rāya̱
haima̍ntikāya ca̱ruḥ sa̍vi̱tra ā̍ticchaṃda̱sāya̍ trayastri̱g̱ͫśāya̍
raiva̱tāya̍ śaiśi̱rāya̱ dvāda̍śakapā̱lo'di̍tyai̱ viṣṇu̍patnyai ca̱rura̱gnaye̍
vaiśvāna̱rāya̱ dvāda̍śakapā̱lo'nu̍matyai ca̱ruḥ kā̱ya eka̍kapālaḥ
||7.5.14||a̱gnaye'di̍tyā̱ anu̍matyai sa̱ptaca̍tvārigͫśat
||7.5.14||39 yo vā a̱gnāva̱gniḥ pra̍hri̱yate̱ yaśca̱ somo̱ rājā̱ tayo̍re̱ṣa ā̍ti̱thyaṃ
yada̍gnīṣo̱mīyo'thai̱ṣa ru̱dro yaścī̱yate̱ yathsaṃci̍te̱'gnāve̱tāni̍
ha̱vīgͫṣi̱ na ni̱rvape̍de̱ṣa e̱va ru̱dro'śā̎nta upo̱tthāya̍ pra̱jāṃ pa̱śūn,
yaja̍mānasyā̱bhi ma̍nyeta̱ yathsaṃci̍te̱'gnāve̱tāni̍ ha̱vīgͫṣi̍ ni̱rvapa̍ti
bhāga̱dheye̍nai̱vainagͫ̍ śamayati̱ nāsya̍ ru̱dro'śā̎nta
40 upo̱tthāya̍ pra̱jāṃ pa̱śūna̱bhi ma̍nyate̱ daśa̍ ha̱vīgͫṣi̍ bhavanti̱
nava̱ vai puru̍ṣe prā̱ṇā nābhi̍rdaśa̱mī prā̱ṇāne̱va yaja̍māne dadhā̱tyatho̱
daśā̎kṣarā vi̱rāḍanna̍ṃ vi̱rāḍvi̱rājye̱vānnādye̱ prati̍ tiṣṭhatyṛ̱tubhi̱rvā e̱ṣa
chando̍bhi̱ḥ stomai̎ḥ pṛ̱ṣṭhaiśce̍ta̱vya̍ ityā̍hu̱ryade̱tāni̍ ha̱vīgͫṣi̍
ni̱rvapa̍tyṛ̱tubhi̍re̱vaina̱ṃ chando̍bhi̱ḥ stomai̎ḥ pṛ̱ṣṭhaiści̍nute̱
diśa̍ḥ suṣuvā̱ṇenā̍
41 'bhi̱jityā̱ ityā̍hu̱ryade̱tāni̍ ha̱vīgͫṣi̍ ni̱rvapa̍ti di̱śāma̱bhiji̍tyā
e̱tayā̱ vā indra̍ṃ de̱vā a̍yājaya̱ntasmā̍dindrasa̱va e̱tayā̱ manu̍ṃ
manu̱ṣyā̎stasmā̎nmanusa̱vo yathendro̍ de̱vānā̱ṃ yathā̱ manu̍rmanu̱ṣyā̍ṇāme̱vaṃ
bha̍vati̱ ya e̱vaṃ vi̱dvāne̱tayeṣṭyā̱ yaja̍te̱ digva̍tīḥ puro'nuvā̱kyā̍
bhavanti̱ sarvā̍sāṃ di̱śāma̱bhiji̍tyai
||7.5.15||aśā̎ntaḥ suṣuvā̱ṇenaika̍
catvārigͫśacca
||7.5.15||42 yaḥ prā̍ṇa̱to ni̍miṣa̱to ma̍hi̱tvaika̱ idrājā̱ jaga̍to ba̱bhūva̍ | ya
īśe̍ a̱sya dvi̱pada̱ścatu̍ṣpada̱ḥ kasmai̍ de̱vāya̍ ha̱viṣā̍ vidhema
|| u̱pa̱yā̱magṛ̍hīto'si pra̱jāpa̍taye tvā̱ juṣṭa̍ṃ gṛhṇāmi̱ tasya̍
te̱ dyaurma̍hi̱mā nakṣa̍trāṇi rū̱pamā̍di̱tyaste̱ teja̱stasmai̎ tvā mahi̱mne
pra̱jāpa̍taye̱ svāhā̎
||7.5.16||yaḥ prā̍ṇa̱to dyaurā̍di̱tyo̎'ṣṭā trigͫ̍śat
||7.5.16||43 ya ā̎tma̱dā ba̍la̱dā yasya̱ viśva̍ u̱pāsa̍te pra̱śiṣa̱ṃ yasya̍ de̱vāḥ
| yasya̍ chā̱yāmṛta̱ṃ yasya̍ mṛ̱tyuḥ kasmai̍ de̱vāya̍ ha̱viṣā̍ vidhema
|| u̱pa̱yā̱magṛ̍hīto'si pra̱jāpa̍taye tvā̱ juṣṭa̍ṃ gṛhṇāmi̱ tasya̍ te
pṛthi̱vī ma̍hi̱mauṣa̍dhayo̱ vana̱spata̍yo rū̱pama̱gniste̱ teja̱stasmai̎ tvā
mahi̱mne pra̱jāpa̍taye̱ svāhā̎
||7.5.17||ya ā̎tma̱dāḥ pṛ̍thi̱vya̍gnirekā̱nna
ca̍tvāri̱g̱ͫśat
||7.5.17||44 ā brahma̍nbrāhma̱ṇo bra̍hmavarca̱sī jā̍yatā̱māsminrā̱ṣṭre rā̍ja̱nya̍
iṣa̱vya̍ḥ śūro̍ mahāra̱tho jā̍yatā̱ṃ dogdhrī̍ dhe̱nurvoḍhā̍na̱ḍvānā̱śuḥ sapti̱ḥ
pura̍ndhi̱ṟyoṣā̍ ji̱ṣṇū ra̍the̱ṣṭhāḥ sa̱bheyo̱ yuvāsya yaja̍mānasya vī̱ro jā̍yatāṃ
nikā̱me ni̍kāme naḥ pa̱rjanyo̍ varṣatu pha̱linyo̍ na̱ oṣa̍dhayaḥ pacyantāṃ yogakṣe̱mo
na̍ḥ kalpatām
||7.5.18||ā brahma̱nneka̍ catvārigͫśat
||7.5.18||45 ākrān̍, vā̱jī pṛ̍thi̱vīma̱gniṃ yuja̍makṛta vā̱jyarvākrān̍, vā̱jya̍ntari̍kṣaṃ
vā̱yuṃ yuja̍makṛta vā̱jyarvā̱ dyāṃ vā̱jyākragg̍sta̱ sūrya̱ṃ yuja̍makṛta
vā̱jyarvā̱gniste̍ vāji̱ṉ, yuṅṅanu̱ tvāra̍bhe sva̱sti mā̱ saṃ pā̍raya vā̱yuste̍
vāji̱ṉ, yuṅṅanu̱ tvāra̍bhe sva̱sti mā̱ saṃ
46 pā̍rayādi̱tyaste̍ vāji̱ṉ, yuṅṅanu̱ tvāra̍bhe sva̱sti mā̱ saṃ
pā̍raya prāṇa̱dhṛga̍si prā̱ṇaṃ me̍ dṛgͫha vyāna̱dhṛga̍si vyā̱naṃ me̍
dṛgͫhāpāna̱dhṛga̍syapā̱naṃ me̍ dṛgͫha̱ cakṣu̍rasi̱ cakṣu̱rmayi̍ dhehi̱
śrotra̍masi̱ śrotra̱ṃ mayi̍ dhe̱hyāyu̍ra̱syāyu̱rmayi̍ dhehi
||7.5.19||vā̱yuste̍
vāji̱ṉ, yuṅṅanu̱ tvā'ra̍bhe sva̱sti mā̱ santrica̍tvārigͫśacca
||7.5.19||47 jajñi̱ bīja̱ṃ varṣṭā̍ pa̱rjanya̱ḥ paktā̍ sa̱syagͫ su̍pippa̱lā oṣa̍dhayaḥ
svadhicara̱ṇeyagͫ sū̍pasada̱no̎'gniḥ sva̍dhya̱kṣama̱ntari̍kṣagͫ
supā̱vaḥ pava̍mānaḥ sūpasthā̱nā dyauḥ śi̱vama̱sau tapan̍, yathāpū̱rvama̍horā̱tre
pa̍ñcada̱śino̎rdhamā̱sāstri̱g̱ͫśino̱ māsā̎ḥ klṛ̱ptā ṛ̱tava̍ḥ śā̱ntaḥ
sa̍ṃvathsa̱raḥ
||7.5.20||jajñi̱ bīja̱meka̍trigͫśat
||7.5.20||48 ā̱gne̱yo̎'ṣṭāka̍pālaḥ sau̱myaśca̱ruḥ sā̍vi̱tro̎ṣṭāka̍pālaḥ pau̱ṣṇaśca̱rū
rau̱draśca̱rura̱gnaye̍ vaiśvāna̱rāya̱ dvāda̍śakapālo mṛgākha̱re yadi̱
nāgacche̍da̱gnaye'gͫ̍ho̱muce̱'ṣṭāka̍pālaḥ sau̱ryaṃ payo̍ vāya̱vya̍ ājya̍bhāgaḥ
||7.5.21||ā̱gne̱yaścatu̍rvigͫśatiḥ
||7.5.21||49 a̱gnaye'gͫ̍ho̱muce̱'ṣṭāka̍pāla̱ indrā̍yāgͫho̱muca̱ ekā̍daśakapālo
mi̱trāvaru̍ṇābhyāmāgo̱mugbhyā̎ṃ paya̱syā̍ vāyosāvi̱tra ā̍go̱mugbhyā̎ṃ
ca̱rura̱śvibhyā̍māgo̱mugbhyā̎ṃ dhā̱nā ma̱rudbhya̍ eno̱mugbhya̍ḥ sa̱ptaka̍pālo̱
viśve̎bhyo de̱vebhya̍ eno̱mugbhyo̱ dvāda̍śakapā̱lo'nu̍matyai ca̱rura̱gnaye̍
vaiśvāna̱rāya̱ dvāda̍śakapālo̱ dyāvā̍pṛthi̱vībhyā̍magͫho̱mugbhyā̎ṃ dvikapā̱laḥ
||7.5.22||a̱gnaye'gͫ̍ho̱muce'nu̍matyai̱ dyāvā̍pṛthi̱vībhyā̎ṃ tri̱g̱ͫśat
||7.5.22||50 a̱gnaye̱ sama̍namatpṛthi̱vyai sama̍nama̱dyathā̱gniḥ pṛ̍thi̱vyā sa̱mana̍made̱vaṃ
mahya̍ṃ bha̱drāḥ saṃna̍taya̱ḥ saṃ na̍mantu vā̱yave̱ sama̍namada̱ntari̍kṣāya̱
sama̍nama̱dyathā̍ vā̱yura̱ntari̍kṣeṇa̱ sūryā̍ya̱ sama̍namaddi̱ve sama̍nama̱dyathā̱
sūṟyo̍ di̱vā ca̱ndrama̍se̱ sama̍nama̱nnakṣa̍trebhya̱ḥ sama̍nama̱dyathā̍
ca̱ndramā̱ nakṣa̍trai̱rvaru̍ṇāya̱ sama̍namada̱dbhyaḥ sama̍nama̱dyathā̱
51 varu̍ṇo̱'dbhiḥ sāmne̱ sama̍namadṛ̱ce sama̍nama̱dyathā̱ sāma̱rcā brahma̍ṇe̱
sama̍namatkṣa̱trāya̱ sama̍nama̱dyathā̱ brahma̍ kṣa̱treṇa̱ rājñe̱ sama̍namadvi̱śe
sama̍nama̱dyathā̱ rājā̍ vi̱śā rathā̍ya̱ sama̍nama̱daśve̎bhya̱ḥ sama̍nama̱dyathā̱
ratho'śvai̎ḥ pra̱jāpa̍taye̱ sama̍namadbhū̱tebhya̱ḥ sama̍nama̱dyathā̎
pra̱jāpa̍tirbhū̱taiḥ sa̱mana̍made̱vaṃ mahya̍ṃ bha̱drāḥ saṃna̍taya̱ḥ saṃ na̍mantu
||7.5.23||a̱dbhyaḥ sama̍nama̱dyathā̱ mahya̍ṃ ca̱tvāri̍ ca
||7.5.23||52 ye te̱ panthā̍naḥ savitaḥ pū̱rvyāso̍'re̱ṇavo̱ vita̍tā a̱ntari̍kṣe |
tebhi̍rno a̱dya pa̱thibhi̍ḥ su̱gebhī̱ rakṣā̍ ca no̱ adhi̍ ca deva brūhi ||
namo̱'gnaye̍ pṛthivi̱kṣite̍ loka̱spṛte̍ lo̱kama̱smai yaja̍mānāya dehi̱ namo̍
vā̱yave̎'ntarikṣa̱kṣite̍ loka̱spṛte̍ lo̱kama̱smai yaja̍mānāya dehi̱ nama̱ḥ
sūryā̍ya divi̱kṣite̍ loka̱spṛte̍ lo̱kama̱smai yaja̍mānāya dehi
||7.5.24||ye te̱
catu̍ścatvārigͫśat
||7.5.24||53 yo vā aśva̍sya̱ medhya̍sya̱ śiro̱ veda̍ śīrṣa̱ṇvānmedhyo̍ bhavatyu̱ṣā
vā aśva̍sya̱ medhya̍sya̱ śira̱ḥ sūrya̱ścakṣu̱rvāta̍ḥ prā̱ṇaśca̱ndramā̱ḥ
śrotra̱ṃ diśa̱ḥ pādā̍ avāntaradi̱śāḥ parśa̍vo'horā̱tre ni̍me̱ṣo̎'rdhamā̱sāḥ
parvā̍ṇi̱ māsā̎ḥ sa̱ṃdhānā̎nyṛ̱tavo'ṅgā̍ni saṃvathsa̱ra ā̱tmā ra̱śmaya̱ḥ keśā̱
nakṣa̍trāṇi rū̱paṃ tāra̍kā a̱sthāni̱ nabho̍ mā̱g̱ͫsānyoṣa̍dhayo̱ lomā̍ni̱
vana̱spata̍yo̱ vālā̍ a̱gnirmukha̍ṃ vaiśvāna̱ro vyāttagͫ̍
54 samu̱dra u̱dara̍ma̱ntari̍kṣaṃ pā̱yurdyāvā̍pṛthi̱vī ā̱ṇḍau grāvā̱ śepa̱ḥ somo̱
reto̱ yajja̍ñja̱bhyate̱ tadvi dyo̍tate̱ yadvi̍dhūnu̱te tathsta̍nayati̱ yanmeha̍ti̱
tadva̍rṣati̱ vāge̱vāsya̱ vāgaha̱rvā aśva̍sya̱ jāya̍mānasya mahi̱mā pu̱rastā̎jjāyate̱
rātri̍renaṃ mahi̱mā pa̱ścādanu̍ jāyata e̱tau vai ma̍hi̱mānā̱vaśva̍ma̱bhita̱ḥ
saṃ ba̍bhūvatu̱ṟhayo̍ de̱vāna̍vaha̱darvāsu̍rān, vā̱jī ga̍ndha̱rvānaśvo̍
manu̱ṣyā̎nthsamu̱dro vā aśva̍sya̱ yoni̍ḥ samu̱draḥ (samu̱dro bandhu̍ḥ - saṃpradāyadalli
hel̤uvudilla)
||7.5.25||vyātta̍mavaha̱ddvāda̍śa ca
||7.5.25||