Study
- Anukramaṇī
- Source
9 vihavya āṃgirasaḥ| viśvedevāḥ| triṣṭup , 9 jagatī|
mamā̍gne̱ varco̍ viha̱veṣva̍stu va̱yaṃ tvendhā̍nāsta̱nva̍ṃ puṣema |
mahya̍ṃ namantāṃ pra̱diśa̱ścata̍sra̱stvayādhya̍kṣeṇa̱ pṛta̍nā jayema ॥10.128.1॥
ममा॑ग्ने॒ वर्चो॑ विह॒वेष्व॑स्तु व॒यं त्वेन्धा॑नास्त॒न्वं॑ पुषेम ।
मह्यं॑ नमन्तां प्र॒दिश॒श्चत॑स्र॒स्त्वयाध्य॑क्षेण॒ पृत॑ना जयेम
mama̍ de̱vā vi̍ha̱ve sa̍ntu̱ sarva̱ indra̍vanto ma̱ruto̱ viṣṇu̍ra̱gniḥ |
mamā̱ntari̍kṣamu̱rulo̍kamastu̱ mahya̱ṃ vāta̍: pavatā̱ṃ kāme̍ a̱smin ॥10.128.2॥
मम॑ दे॒वा वि॑ह॒वे स॑न्तु॒ सर्व॒ इन्द्र॑वन्तो म॒रुतो॒ विष्णु॑र॒ग्निः ।
ममा॒न्तरि॑क्षमु॒रुलो॑कमस्तु॒ मह्यं॒ वात॑: पवतां॒ कामे॑ अ॒स्मिन्
mayi̍ de̱vā dravi̍ṇa̱mā ya̍jantā̱ṃ mayyā̱śīra̍stu̱ mayi̍ de̱vahū̍tiḥ |
daivyā̱ hotā̍ro vanuṣanta̱ pūrve'ri̍ṣṭāḥ syāma ta̱nvā̍ su̱vīrā̍: ॥10.128.3॥
मयि॑ दे॒वा द्रवि॑ण॒मा य॑जन्तां॒ मय्या॒शीर॑स्तु॒ मयि॑ दे॒वहू॑तिः ।
दैव्या॒ होता॑रो वनुषन्त॒ पूर्वेऽरि॑ष्टाः स्याम त॒न्वा॑ सु॒वीरा॑:
mahya̍ṃ yajantu̱ mama̱ yāni̍ ha̱vyā''kū̍tiḥ sa̱tyā mana̍so me astu |
eno̱ mā ni gā̍ṃ kata̱macca̱nāhaṃ viśve̍ devāso̱ adhi̍ vocatā naḥ ॥10.128.4॥
मह्यं॑ यजन्तु॒ मम॒ यानि॑ ह॒व्याऽऽकू॑तिः स॒त्या मन॑सो मे अस्तु ।
एनो॒ मा नि गां॑ कत॒मच्च॒नाहं विश्वे॑ देवासो॒ अधि॑ वोचता नः
devī̍: ṣal̤urvīru̱ru na̍: kṛṇota̱ viśve̍ devāsa i̱ha vī̍rayadhvam |
mā hā̍smahi pra̱jayā̱ mā ta̱nūbhi̱rmā ra̍dhāma dviṣa̱te so̍ma rājan ॥10.128.5॥
देवी॑: षळुर्वीरु॒रु न॑: कृणोत॒ विश्वे॑ देवास इ॒ह वी॑रयध्वम् ।
मा हा॑स्महि प्र॒जया॒ मा त॒नूभि॒र्मा र॑धाम द्विष॒ते सो॑म राजन्
agne̍ ma̱nyuṃ pra̍tinu̱danpare̍ṣā̱mada̍bdho go̱pāḥ pari̍ pāhi na̱stvam |
pra̱tyañco̍ yantu ni̱guta̱: puna̱ste̱3'maiṣā̍ṃ ci̱ttaṃ pra̱budhā̱ṃ vi ne̍śat ॥10.128.6॥
अग्ने॑ म॒न्युं प्र॑तिनु॒दन्परे॑षा॒मद॑ब्धो गो॒पाः परि॑ पाहि न॒स्त्वम् ।
प्र॒त्यञ्चो॑ यन्तु नि॒गुत॒: पुन॒स्ते॒३ऽमैषां॑ चि॒त्तं प्र॒बुधां॒ वि ने॑शत्
dhā̱tā dhā̍tṝ̱ṇāṃ bhuva̍nasya̱ yaspati̍rde̱vaṃ trā̱tāra̍mabhimātiṣā̱ham |
i̱maṃ ya̱jñama̱śvino̱bhā bṛha̱spati̍rde̱vāḥ pā̍ntu̱ yaja̍mānaṃ nya̱rthāt ॥10.128.7॥
धा॒ता धा॑तॄ॒णां भुव॑नस्य॒ यस्पति॑र्दे॒वं त्रा॒तार॑मभिमातिषा॒हम् ।
इ॒मं य॒ज्ञम॒श्विनो॒भा बृह॒स्पति॑र्दे॒वाः पा॑न्तु॒ यज॑मानं न्य॒र्थात्
u̱ru̱vyacā̍ no mahi̱ṣaḥ śarma̍ yaṃsada̱sminhave̍ puruhū̱taḥ pu̍ru̱kṣuḥ |
sa na̍: pra̱jāyai̍ haryaśva mṛl̤a̱yendra̱ mā no̍ rīriṣo̱ mā parā̍ dāḥ ॥10.128.8॥
उ॒रु॒व्यचा॑ नो महि॒षः शर्म॑ यंसद॒स्मिन्हवे॑ पुरुहू॒तः पु॑रु॒क्षुः ।
स न॑: प्र॒जायै॑ हर्यश्व मृळ॒येन्द्र॒ मा नो॑ रीरिषो॒ मा परा॑ दाः
ye na̍: sa̱patnā̱ apa̱ te bha̍vantvindrā̱gnibhyā̱mava̍ bādhāmahe̱ tān |
vasa̍vo ru̱drā ā̍di̱tyā u̍pari̱spṛśa̍ṃ mo̱graṃ cettā̍ramadhirā̱jama̍kran ॥10.128.9॥
ये न॑: स॒पत्ना॒ अप॒ ते भ॑वन्त्विन्द्रा॒ग्निभ्या॒मव॑ बाधामहे॒ तान् ।
वस॑वो रु॒द्रा आ॑दि॒त्या उ॑परि॒स्पृशं॑ मो॒ग्रं चेत्ता॑रमधिरा॒जम॑क्रन्