Study
- Anukramaṇī
- Also in this saṅgraha
- Source
10 gotamo rāhūgaṇaḥ| viśvedevāḥ, (1-2, 8-9 devāḥ, 10 aditiḥ)| jagatī, 6 virāṭ-sthānā, 8-10 triṣṭup|
bha̱draṃ karṇe̍bhiḥ śṛṇuyāma devā bha̱draṃ pa̍śyemā̱kṣabhi̍ryajatrāḥ |
sthi̱rairaṅgai̍stuṣṭu̱vāṃsa̍sta̱nūbhi̱rvya̍śema de̱vahi̍ta̱ṃ yadāyu̍: ॥1.89.8॥
भ॒द्रं कर्णे॑भिः शृणुयाम देवा भ॒द्रं प॑श्येमा॒क्षभि॑र्यजत्राः ।
स्थि॒रैरङ्गै॑स्तुष्टु॒वांस॑स्त॒नूभि॒र्व्य॑शेम दे॒वहि॑तं॒ यदायु॑:
18 gotamo rāhūgaṇaḥ| uṣāḥ, 16-18 aśvinau | 1-4 jagatī, 5-12 triṣṭup, 13-18 uṣṇik|
puna̍:puna̱rjāya̍mānā purā̱ṇī sa̍mā̱naṃ varṇa̍ma̱bhi śumbha̍mānā |
śva̱ghnīva̍ kṛ̱tnurvija̍ āminā̱nā marta̍sya de̱vī ja̱raya̱ntyāyu̍: ॥1.92.10॥
पुन॑:पुन॒र्जाय॑माना पुरा॒णी स॑मा॒नं वर्ण॑म॒भि शुम्भ॑माना ।
श्व॒घ्नीव॑ कृ॒त्नुर्विज॑ आमिना॒ना मर्त॑स्य दे॒वी ज॒रय॒न्त्यायु॑:
15 pragātho ghaura: kāṇva:| soma: | triṣṭup , 5 jagatī |
tvaṃ hi na̍sta̱nva̍: soma go̱pā gātre̍gātre niṣa̱satthā̍ nṛ̱cakṣā̍: |
yatte̍ va̱yaṃ pra̍mi̱nāma̍ vra̱tāni̱ sa no̍ mṛl̤a suṣa̱khā de̍va̱ vasya̍: ॥8.48.9॥
त्वं हि न॑स्त॒न्व॑: सोम गो॒पा गात्रे॑गात्रे निष॒सत्था॑ नृ॒चक्षा॑: ।
यत्ते॑ व॒यं प्र॑मि॒नाम॑ व्र॒तानि॒ स नो॑ मृळ सुष॒खा दे॑व॒ वस्य॑:
apa̱ tyā a̍sthu̱rani̍rā̱ amī̍vā̱ nira̍trasa̱ntami̍ṣīcī̱rabhai̍ṣuḥ |
ā somo̍ a̱smām̐ a̍ruha̱dvihā̍yā̱ aga̍nma̱ yatra̍ prati̱ranta̱ āyu̍: ॥8.48.11॥
अप॒ त्या अ॑स्थु॒रनि॑रा॒ अमी॑वा॒ निर॑त्रस॒न्तमि॑षीची॒रभै॑षुः ।
आ सोमो॑ अ॒स्माँ अ॑रुह॒द्विहा॑या॒ अग॑न्म॒ यत्र॑ प्रति॒रन्त॒ आयु॑:
9 kāśyapo'sito devalo vā | pavamāna: soma: | gāyatrī |
vṛ̱ṣṭiṃ di̱vaḥ pari̍ srava dyu̱mnaṃ pṛ̍thi̱vyā adhi̍ | saho̍ naḥ soma pṛ̱tsu dhā̍: ॥9.8.8॥
वृ॒ष्टिं दि॒वः परि॑ स्रव द्यु॒म्नं पृ॑थि॒व्या अधि॑ । सहो॑ नः सोम पृ॒त्सु धा॑:
30nidhruvi: kāśyapaḥ | pavamāna: soma: | gāyatrī |
a̱sme vasū̍ni dhāraya̱ soma̍ di̱vyāni̱ pārthi̍vā | indo̱ viśvā̍ni̱ vāryā̍ ॥9.63.30॥
अ॒स्मे वसू॑नि धारय॒ सोम॑ दि॒व्यानि॒ पार्थि॑वा । इन्दो॒ विश्वा॑नि॒ वार्या॑
14 luśo dhānākaḥ| viśvedevāḥ | jagatī,13-14 triṣṭup|
sa̱vi̱tā pa̱ścātā̍tsavi̱tā pu̱rastā̍tsavi̱totta̱rāttā̍tsavi̱tādha̱rāttā̍t |
sa̱vi̱tā na̍: suvatu sa̱rvatā̍tiṃ savi̱tā no̍ rāsatāṃ dī̱rghamāyu̍: ॥10.36.14॥
स॒वि॒ता प॒श्चाता॑त्सवि॒ता पु॒रस्ता॑त्सवि॒तोत्त॒रात्ता॑त्सवि॒ताध॒रात्ता॑त् ।
स॒वि॒ता न॑: सुवतु स॒र्वता॑तिं सवि॒ता नो॑ रासतां दी॒र्घमायु॑:
47 sāvitrī sūryā ṛṣikā| 1-5 somaḥ, 6-16 sūryāvivāhaḥ, 17 devāḥ, 18 somārkau, 19 candramāḥ, 20-28 nṛṇāṃ vivāhamantrā āśī:prāyāḥ, 29-30 vadhūvāsaḥ saṃsparśanindā, 31 dampatyoryakṣmanāśanaṃ, 32-47 sūryā sāvitrī| anuṣṭup , 14,19-21,23-24,26,36-37,44 triṣṭup, 18,27,43 jagatī, 34 urobṛhatī|
navo̍navo bhavati̱ jāya̍mā̱no'hnā̍ṃ ke̱turu̱ṣasā̍me̱tyagra̍m |
bhā̱gaṃ de̱vebhyo̱ vi da̍dhātyā̱yanpra ca̱ndramā̍stirate dī̱rghamāyu̍: ॥10.85.19॥
नवो॑नवो भवति॒ जाय॑मा॒नोऽह्नां॑ के॒तुरु॒षसा॑मे॒त्यग्र॑म् ।
भा॒गं दे॒वेभ्यो॒ वि द॑धात्या॒यन्प्र च॒न्द्रमा॑स्तिरते दी॒र्घमायु॑:
18 ailaḥ purūravāḥ| urvaśī devatā| 2,4-5,7, 11, 13, 15-16,18, urvaśī ṛṣikā| purūravā devatā| triṣṭup|
vi̱dyunna yā pata̍ntī̱ davi̍dyo̱dbhara̍ntī me̱ apyā̱ kāmyā̍ni |
jani̍ṣṭo a̱po narya̱: sujā̍ta̱: prorvaśī̍ tirata dī̱rghamāyu̍: ॥10.95.10॥
वि॒द्युन्न या पत॑न्ती॒ दवि॑द्यो॒द्भर॑न्ती मे॒ अप्या॒ काम्या॑नि ।
जनि॑ष्टो अ॒पो नर्य॒: सुजा॑त॒: प्रोर्वशी॑ तिरत दी॒र्घमायु॑: