1 jūtiḥ, 2 vātajūtiḥ, 3 viprajūtiḥ, 4 vṛṣāṇakaḥ, 5 karikrataḥ, 6 etaśaḥ 7 ṛṣyaśrṛṃgaḥ (ete vātaraśanā munayaḥ)| keśinaḥ = agni-sūrya-vāyavaḥ| anuṣṭup|
ke̱śya1gniṃ ke̱śī vi̱ṣaṃ ke̱śī bi̍bharti̱ roda̍sī | ke̱śī viśva̱ṃ sva̍rdṛ̱śe ke̱śīdaṃ jyoti̍rucyate ॥10.136.1॥
के॒श्य१ग्निं के॒शी वि॒षं के॒शी बि॑भर्ति॒ रोद॑सी । के॒शी विश्वं॒ स्व॑र्दृ॒शे के॒शीदं ज्योति॑रुच्यते
muna̍yo̱ vāta̍raśanāḥ pi̱śaṅgā̍ vasate̱ malā̍ | vāta̱syānu̱ dhrāji̍ṃ yanti̱ yadde̱vāso̱ avi̍kṣata ॥10.136.2॥
मुन॑यो॒ वात॑रशनाः पि॒शङ्गा॑ वसते॒ मला॑ । वात॒स्यानु॒ ध्राजिं॑ यन्ति॒ यद्दे॒वासो॒ अवि॑क्षत
unma̍ditā̱ maune̍yena̱ vātā̱m̐ ā ta̍sthimā va̱yam | śarī̱reda̱smāka̍ṃ yū̱yaṃ martā̍so a̱bhi pa̍śyatha ॥10.136.3॥
उन्म॑दिता॒ मौने॑येन॒ वाताँ॒ आ त॑स्थिमा व॒यम् । शरी॒रेद॒स्माकं॑ यू॒यं मर्ता॑सो अ॒भि प॑श्यथ
a̱ntari̍kṣeṇa patati̱ viśvā̍ rū̱pāva̱cāka̍śat | muni̍rde̱vasya̍devasya̱ saukṛ̍tyāya̱ sakhā̍ hi̱taḥ ॥10.136.4॥
अ॒न्तरि॑क्षेण पतति॒ विश्वा॑ रू॒पाव॒चाक॑शत् । मुनि॑र्दे॒वस्य॑देवस्य॒ सौकृ॑त्याय॒ सखा॑ हि॒तः
vāta̱syāśvo̍ vā̱yoḥ sakhātho̍ de̱veṣi̍to̱ muni̍: | u̱bhau sa̍mu̱drāvā kṣe̍ti̱ yaśca̱ pūrva̍ u̱tāpa̍raḥ ॥10.136.5॥
वात॒स्याश्वो॑ वा॒योः सखाथो॑ दे॒वेषि॑तो॒ मुनि॑: । उ॒भौ स॑मु॒द्रावा क्षे॑ति॒ यश्च॒ पूर्व॑ उ॒ताप॑रः
a̱psa̱rasā̍ṃ gandha̱rvāṇā̍ṃ mṛ̱gāṇā̱ṃ cara̍ṇe̱ cara̍n | ke̱śī keta̍sya vi̱dvāntsakhā̍ svā̱durma̱dinta̍maḥ ॥10.136.6॥
अ॒प्स॒रसां॑ गन्ध॒र्वाणां॑ मृ॒गाणां॒ चर॑णे॒ चर॑न् । के॒शी केत॑स्य वि॒द्वान्त्सखा॑ स्वा॒दुर्म॒दिन्त॑मः
vā̱yura̍smā̱ upā̍manthatpi̱naṣṭi̍ smā kunanna̱mā | ke̱śī vi̱ṣasya̱ pātre̍ṇa̱ yadru̱dreṇāpi̍batsa̱ha ॥10.136.7॥
वा॒युर॑स्मा॒ उपा॑मन्थत्पि॒नष्टि॑ स्मा कुनन्न॒मा । के॒शी वि॒षस्य॒ पात्रे॑ण॒ यद्रु॒द्रेणापि॑बत्स॒ह