Study
13 aindro laba:|ātmā (indraḥ) | gāyatrī|
iti̱ vā iti̍ me̱ mano̱ gāmaśva̍ṃ sanuyā̱miti̍ | ku̱vitsoma̱syāpā̱miti̍ ॥10.119.1॥
इति॒ वा इति॑ मे॒ मनो॒ गामश्वं॑ सनुया॒मिति॑ । कु॒वित्सोम॒स्यापा॒मिति॑
pra vātā̍ iva̱ dodha̍ta̱ unmā̍ pī̱tā a̍yaṃsata | ku̱vitsoma̱syāpā̱miti̍ ॥10.119.2॥
प्र वाता॑ इव॒ दोध॑त॒ उन्मा॑ पी॒ता अ॑यंसत । कु॒वित्सोम॒स्यापा॒मिति॑
unmā̍ pī̱tā a̍yaṃsata̱ ratha̱maśvā̍ ivā̱śava̍: | ku̱vitsoma̱syāpā̱miti̍ ॥10.119.3॥
उन्मा॑ पी॒ता अ॑यंसत॒ रथ॒मश्वा॑ इवा॒शव॑: । कु॒वित्सोम॒स्यापा॒मिति॑
upa̍ mā ma̱tira̍sthita vā̱śrā pu̱trami̍va pri̱yam | ku̱vitsoma̱syāpā̱miti̍ ॥10.119.4॥
उप॑ मा म॒तिर॑स्थित वा॒श्रा पु॒त्रमि॑व प्रि॒यम् । कु॒वित्सोम॒स्यापा॒मिति॑
a̱haṃ taṣṭe̍va va̱ndhura̱ṃ parya̍cāmi hṛ̱dā ma̱tim | ku̱vitsoma̱syāpā̱miti̍ ॥10.119.5॥
अ॒हं तष्टे॑व व॒न्धुरं॒ पर्य॑चामि हृ॒दा म॒तिम् । कु॒वित्सोम॒स्यापा॒मिति॑
na̱hi me̍ akṣi̱pacca̱nā'cchā̍ntsu̱: pañca̍ kṛ̱ṣṭaya̍: | ku̱vitsoma̱syāpā̱miti̍ ॥10.119.6॥
न॒हि मे॑ अक्षि॒पच्च॒नाऽच्छा॑न्त्सु॒: पञ्च॑ कृ॒ष्टय॑: । कु॒वित्सोम॒स्यापा॒मिति॑
na̱hi me̱ roda̍sī u̱bhe a̱nyaṃ pa̱kṣaṃ ca̱na prati̍ | ku̱vitsoma̱syāpā̱miti̍ ॥10.119.7॥
न॒हि मे॒ रोद॑सी उ॒भे अ॒न्यं प॒क्षं च॒न प्रति॑ । कु॒वित्सोम॒स्यापा॒मिति॑
a̱bhi dyāṃ ma̍hi̱nā bhu̍vama̱bhī̱3māṃ pṛ̍thi̱vīṃ ma̱hīm | ku̱vitsoma̱syāpā̱miti̍ ॥10.119.8॥
अ॒भि द्यां म॑हि॒ना भु॑वम॒भी॒३मां पृ॑थि॒वीं म॒हीम् । कु॒वित्सोम॒स्यापा॒मिति॑
hantā̱haṃ pṛ̍thi̱vīmi̱māṃ ni da̍dhānī̱ha ve̱ha vā̍ | ku̱vitsoma̱syāpā̱miti̍ ॥10.119.9॥
हन्ता॒हं पृ॑थि॒वीमि॒मां नि द॑धानी॒ह वे॒ह वा॑ । कु॒वित्सोम॒स्यापा॒मिति॑
o̱ṣamitpṛ̍thi̱vīma̱haṃ ja̱ṅghanā̍nī̱ha ve̱ha vā̍ | ku̱vitsoma̱syāpā̱miti̍ ॥10.119.10॥
ओ॒षमित्पृ॑थि॒वीम॒हं ज॒ङ्घना॑नी॒ह वे॒ह वा॑ । कु॒वित्सोम॒स्यापा॒मिति॑
di̱vi me̍ a̱nyaḥ pa̱kṣo̱3'dho a̱nyama̍cīkṛṣam | ku̱vitsoma̱syāpā̱miti̍ ॥10.119.11॥
दि॒वि मे॑ अ॒न्यः प॒क्षो॒३ऽधो अ॒न्यम॑चीकृषम् । कु॒वित्सोम॒स्यापा॒मिति॑
a̱hama̍smi mahāma̱ho̍'bhina̱bhyamudī̍ṣitaḥ | ku̱vitsoma̱syāpā̱miti̍ ॥10.119.12॥
अ॒हम॑स्मि महाम॒हो॑ऽभिन॒भ्यमुदी॑षितः । कु॒वित्सोम॒स्यापा॒मिति॑
gṛ̱ho yā̱myara̍ṃkṛto de̱vebhyo̍ havya̱vāha̍naḥ | ku̱vitsoma̱syāpā̱miti̍ ॥10.119.13॥
गृ॒हो या॒म्यरं॑कृतो दे॒वेभ्यो॑ हव्य॒वाह॑नः । कु॒वित्सोम॒स्यापा॒मिति॑