Study
6 dhruva āṃgirasaḥ| rājā| anuṣṭup|
ā tvā̍hārṣama̱ntare̍dhi dhru̱vasti̱ṣṭhāvi̍cācaliḥ | viśa̍stvā̱ sarvā̍ vāñchantu̱ mā tvadrā̱ṣṭramadhi̍ bhraśat ॥10.173.1॥
आ त्वा॑हार्षम॒न्तरे॑धि ध्रु॒वस्ति॒ष्ठावि॑चाचलिः । विश॑स्त्वा॒ सर्वा॑ वाञ्छन्तु॒ मा त्वद्रा॒ष्ट्रमधि॑ भ्रशत्
i̱haivaidhi̱ māpa̍ cyoṣṭhā̱: parva̍ta i̱vāvi̍cācaliḥ | indra̍ ive̱ha dhru̱vasti̍ṣṭhe̱ha rā̱ṣṭramu̍ dhāraya ॥10.173.2॥
इ॒हैवैधि॒ माप॑ च्योष्ठा॒: पर्व॑त इ॒वावि॑चाचलिः । इन्द्र॑ इवे॒ह ध्रु॒वस्ति॑ष्ठे॒ह रा॒ष्ट्रमु॑ धारय
i̱mamindro̍ adīdharaddhru̱vaṃ dhru̱veṇa̍ ha̱viṣā̍ | tasmai̱ somo̱ adhi̍ brava̱ttasmā̍ u̱ brahma̍ṇa̱spati̍: ॥10.173.3॥
इ॒ममिन्द्रो॑ अदीधरद्ध्रु॒वं ध्रु॒वेण॑ ह॒विषा॑ । तस्मै॒ सोमो॒ अधि॑ ब्रव॒त्तस्मा॑ उ॒ ब्रह्म॑ण॒स्पति॑:
dhru̱vā dyaurdhru̱vā pṛ̍thi̱vī dhru̱vāsa̱: parva̍tā i̱me | dhru̱vaṃ viśva̍mi̱daṃ jaga̍ddhru̱vo rājā̍ vi̱śāma̱yam ॥10.173.4॥
ध्रु॒वा द्यौर्ध्रु॒वा पृ॑थि॒वी ध्रु॒वास॒: पर्व॑ता इ॒मे । ध्रु॒वं विश्व॑मि॒दं जग॑द्ध्रु॒वो राजा॑ वि॒शाम॒यम्
dhru̱vaṃ te̱ rājā̱ varu̍ṇo dhru̱vaṃ de̱vo bṛha̱spati̍: | dhru̱vaṃ ta̱ indra̍ścā̱gniśca̍ rā̱ṣṭraṃ dhā̍rayatāṃ dhru̱vam ॥10.173.5॥
ध्रु॒वं ते॒ राजा॒ वरु॑णो ध्रु॒वं दे॒वो बृह॒स्पति॑: । ध्रु॒वं त॒ इन्द्र॑श्चा॒ग्निश्च॑ रा॒ष्ट्रं धा॑रयतां ध्रु॒वम्
dhru̱vaṃ dhru̱veṇa̍ ha̱viṣā̱'bhi soma̍ṃ mṛśāmasi | atho̍ ta̱ indra̱: keva̍lī̱rviśo̍ bali̱hṛta̍skarat ॥10.173.6॥
ध्रु॒वं ध्रु॒वेण॑ ह॒विषा॒ऽभि सोमं॑ मृशामसि । अथो॑ त॒ इन्द्र॒: केव॑ली॒र्विशो॑ बलि॒हृत॑स्करत्
5 abhīvarta āṃgirasaḥ| rājā| anuṣṭup|
a̱bhī̱va̱rtena̍ ha̱viṣā̱ yenendro̍ abhivāvṛ̱te | tenā̱smānbra̍hmaṇaspate̱'bhi rā̱ṣṭrāya̍ vartaya ॥10.174.1॥
अ॒भी॒व॒र्तेन॑ ह॒विषा॒ येनेन्द्रो॑ अभिवावृ॒ते । तेना॒स्मान्ब्र॑ह्मणस्पते॒ऽभि रा॒ष्ट्राय॑ वर्तय
a̱bhi̱vṛtya̍ sa̱patnā̍na̱bhi yā no̱ arā̍tayaḥ | a̱bhi pṛ̍ta̱nyanta̍ṃ tiṣṭhā̱'bhi yo na̍ ira̱syati̍ ॥10.174.2॥
अ॒भि॒वृत्य॑ स॒पत्ना॑न॒भि या नो॒ अरा॑तयः । अ॒भि पृ॑त॒न्यन्तं॑ तिष्ठा॒ऽभि यो न॑ इर॒स्यति॑
a̱bhi tvā̍ de̱vaḥ sa̍vi̱tā'bhi somo̍ avīvṛtat | a̱bhi tvā̱ viśvā̍ bhū̱tānya̍bhīva̱rto yathāsa̍si ॥10.174.3॥
अ॒भि त्वा॑ दे॒वः स॑वि॒ताऽभि सोमो॑ अवीवृतत् । अ॒भि त्वा॒ विश्वा॑ भू॒तान्य॑भीव॒र्तो यथास॑सि
yenendro̍ ha̱viṣā̍ kṛ̱tvyabha̍vaddyu̱mnyu̍tta̱maḥ | i̱daṃ tada̍kri devā asapa̱tnaḥ kilā̍bhuvam ॥10.174.4॥
येनेन्द्रो॑ ह॒विषा॑ कृ॒त्व्यभ॑वद्द्यु॒म्न्यु॑त्त॒मः । इ॒दं तद॑क्रि देवा असप॒त्नः किला॑भुवम्
a̱sa̱pa̱tnaḥ sa̍patna̱hā'bhirā̍ṣṭro viṣāsa̱hiḥ | yathā̱hame̍ṣāṃ bhū̱tānā̍ṃ vi̱rājā̍ni̱ jana̍sya ca ॥10.174.5॥
अ॒स॒प॒त्नः स॑पत्न॒हाऽभिरा॑ष्ट्रो विषास॒हिः । यथा॒हमे॑षां भू॒तानां॑ वि॒राजा॑नि॒ जन॑स्य च