Anuvāka 1
oṃ śaṃ na̱stanno̱ mā hā̍sīt.. oṃ śānti̱ḥ śānti̱ḥ śānti̍ḥ..
de̱vā vai sa̱tramā̍sata.
ṛddhi̍parimita̱ṃ yaśa̍skāmāḥ.
te̎'bruvan.
yanna̍ḥ pratha̱maṃ yaśa̍ ṛ̱cchāt.
sarve̍ṣāṃ na̱stathsa̱hāsa̱diti̍.
teṣā̎ṃ kurukṣe̱traṃ vedi̍rāsīt.
tasyai̍ khāṇḍa̱vo da̍kṣiṇā̱rdha ā̍sīt.
tūrghna̍muttarā̱rdhaḥ.
pa̱rī̱ṇajja̍ghanā̱rdhaḥ.
ma̱rava̍ utka̱raḥ..1..
teṣā̎ṃ ma̱khaṃ vai̎ṣṇa̱vaṃ yaśa̍ ārcchat.
tannya̍kāmayata.
tenāpā̎krāmat.
taṃ de̱vā anvā̍yan.
yaśo̍'va̱ruru̍thsamānāḥ.
tasyā̱nvāga̍tasya.
sa̱vyāddhanu̱rajā̍yata.
dakṣi̍ṇā̱diṣa̍vaḥ.
tasmā̍diṣudha̱nvaṃ puṇya̍janma.
ya̱jñaja̍nmā̱ hi..2..
tameka̱ṃ santam̎.
ba̱havo̱ nābhya̍dhṛṣṇuvan.
tasmā̱deka̍miṣudha̱nvinam̎.
ba̱havo̍'niṣudha̱nvā nābhidhṛ̍ṣṇuvanti.
so̎'smayata.
eka̍ṃ mā̱ santa̍ṃ ba̱havo̱ nābhya̍dharṣiṣu̱riti̍.
tasya̍ siṣmiyā̱ṇasya̱ tejo'pā̎krāmat.
tadde̱vā oṣa̍dhīṣu̱ nya̍mṛjuḥ.
te śyā̱mākā̍ abhavan.
sma̱yākā̱ vai nāmai̱te..3..
tathsma̱yākā̍nāṃ smayāka̱tvam.
tasmā̎ddīkṣi̱tenā̍pi̱gṛhya̍ smeta̱vyam̎.
teja̍so̱ dhṛtyai̎.
sa dhanu̍ḥ prati̱ṣkabhyā̍tiṣṭhat.
tā u̍pa̱dīkā̍ abruva̱nvara̍ṃ vṛṇāmahai.
atha̍ va i̱maṃ ra̍ndhayāma.
yatra̱ kva̍ ca̱ khanā̍ma.
tada̱po̍'bhitṛ̍ṇadā̱meti̍.
tasmā̍dupa̱dīkā̱ yatra̱ kva̍ ca̱ khana̍nti.
tada̱po̍'bhitṛ̍ndanti..4..
vāre̍vṛta̱ṃ hyā̍sām.
tasya̱ jyāmapyā̍dan.
tasya̱ dhanu̍rvi̱prava̍māṇa̱ṃ śira̱ uda̍vartayat.
taddyāvā̍pṛthi̱vī anu̱prāva̍rtata.
yatprāva̍rtata.
tatpra̍va̱rgya̍sya pravargya̱tvam.
yadghrām̐(4)ityapa̍tat.
tadgha̱rmasya̍ gharma̱tvam.
ma̱ha̱to vī̱rya̍mapapta̱diti̍.
tanma̍hāvī̱rasya̍ mahāvīra̱tvam..5..
yada̱syāḥ sa̱mabha̍ran.
tathsa̱mrājña̍ḥ samrā̱ṭtvam.
taṃ stṛ̱taṃ de̱vatā̎stre̱dhā vya̍gṛhṇata.
a̱gniḥ prā̍taḥ sava̱nam.
indro̱ mādhya̍ṃ dina̱ṃ sava̍nam.
viśve̍de̱vāstṛ̍tīyasava̱nam.
tenāpa̍śīrṣṇā ya̱jñena̱ yaja̍mānāḥ.
nā''śiṣo̱'vāru̍ndhata.
na su̍va̱rgaṃ lo̱kama̱bhya̍jayan.
te de̱vā a̱śvinā̍vabruvan..6..
bhi̱ṣajau̱ vai stha̍ḥ.
i̱daṃ ya̱jñasya̱ śira̱ḥ prati̍dhatta̱miti̍.
tāva̍brūtā̱ṃ vara̍ṃ vṛṇāvahai.
graha̍ e̱va nā̱vatrāpi̍ gṛhyatā̱miti̍.
tābhyā̍me̱tamā̎śvi̱nama̍gṛhṇan.
tāve̱tadya̱jñasya̱ śira̱ḥ pratya̍dhattām.
yatpra̍va̱rgya̍ḥ.
tena̱ saśī̎rṣṇā ya̱jñena̱ yaja̍mānāḥ.
avā̱''śiṣo'ru̍ndhata.
a̱bhi su̍va̱rgaṃ lo̱kama̍jayan.
yatpra̍va̱rgya̍ṃ pravṛ̱ṇakti̍.
ya̱jñasyai̱va tacchira̱ḥ prati̍dadhāti.
tena̱ saśī̎rṣṇā ya̱jñena̱ yaja̍mānaḥ.
avā̱śiṣo̍ ru̱ndhe.
a̱bhi su̍va̱rgaṃ lo̱kaṃ ja̍yati.
tasmā̍de̱ṣa ā̎śvi̱napra̍vayā iva.
yatpra̍va̱rgya̍ḥ..7..
Anuvāka 2
sā̱vi̱traṃ ju̍hoti̱ prasū̎tyai.
ca̱tu̱rgṛ̱hī̱tena̍ juhoti.
catu̍ṣpādaḥ pa̱śava̍ḥ.
pa̱śūne̱vāva̍rundhe.
cata̍sro̱ diśa̍ḥ.
di̱kṣve̍va prati̍tiṣṭhati.
chandā̍ṃsi de̱vebhyo'pā̎krāman.
na vo̍'bhā̱gāni̍ ha̱vyaṃ va̍kṣyāma̱ iti̍.
tebhya̍ e̱tacca̍turgṛhī̱tama̍dhārayan.
pu̱ro̱nu̱vā̱kyā̍yai yā̱jyā̍yai..8..
de̱vatā̍yai vaṣaṭkā̱rāya̍.
yacca̍turgṛhī̱taṃ ju̱hoti̍.
chandā̍ṃsye̱va tat prī̍ṇāti.
tānya̍sya prī̱tāni̍ de̱vebhyo̍ ha̱vyaṃ va̍hanti.
bra̱hma̱vā̱dino̍ vadanti.
ho̱ta̱vya̍ṃ dīkṣi̱tasya̍ gṛ̱hā(3)i na ho̍ta̱vyā(3)miti̍.
ha̱virvai dī̎kṣi̱taḥ.
yajju̍hu̱yāt.
ha̱viṣkṛ̍ta̱ṃ yaja̍mānama̱gnau prada̍dhyāt.
yanna ju̍hu̱yāt..9..
ya̱jña̱pa̱rura̱ntari̍yāt.
yaju̍re̱va va̍det.
na ha̱viṣkṛ̍ta̱ṃ yaja̍mānama̱gnau pra̱dadhā̍ti.
na ya̍jñapa̱rura̱ntare̍ti.
gā̱ya̱trī chandā̱ṃsyatya̍manyata.
tasyai̍ vaṣaṭkā̱ro̎'bhyayya̱ śiro̎'cchinat.
tasyai̎ dve̱dhā rasa̱ḥ parā̍patat.
pṛ̱thi̱vīma̱rdhaḥ prāvi̍śat.
pa̱śūna̱rdhaḥ.
yaḥ pṛ̍thi̱vīṃ prāvi̍śat..10..
sa kha̍di̱ro̍'bhavat.
yaḥ pa̱śūn.
so̍'jām.
yatkhā̍di̱ryabhri̱rbhava̍ti.
chanda̍sāme̱va rase̍na ya̱jñasya̱ śira̱ḥ sambha̍rati.
yadaudu̍mbarī.
ūrgvā u̍du̱mbara̍ḥ.
ū̱rjaiva ya̱jñasya̱ śira̱ḥ sambha̍rati.
yadvai̍ṇa̱vī.
tejo̱ vai veṇu̍ḥ..11..
teja̍sai̱va ya̱jñasya̱ śira̱ḥ sambha̍rati.
yadvaika̍ṅkatī.
bhā e̱vāva̍rundhe.
de̱vasya̍ tvā savi̱tuḥ pra̍sa̱va ityabhri̱māda̍tte̱ prasū̎tyai.
a̱śvino̎rbā̱hubhyā̱mityā̍ha.
a̱śvinau̱ hi de̱vānā̍madhva̱ryū āstā̎m.
pū̱ṣṇo hastā̎bhyā̱mityā̍ha̱ yatyai̎.
vajra̍ iva̱ vā e̱ṣā.
yadabhri̍ḥ.
abhri̍rasi̱ nāri̍ra̱sītyā̍ha̱ śāntyai̎..12..
a̱dhva̱ra̱kṛdde̱vebhya̱ ityā̍ha.
ya̱jño vā a̍dhva̱raḥ.
ya̱jña̱kṛdde̱vebhya̱ iti̱ vāvaitadā̍ha.
utti̍ṣṭha brahmaṇaspata̱ ityā̍ha.
brahma̍ṇai̱va ya̱jñasya̱ śiro'cchai̍ti.
praitu̱ brahma̍ṇa̱spati̱rityā̍ha.
pretyai̱va ya̱jñasya̱ śiro'cchai̍ti.
pra de̱vye̍tu sū̱nṛtetyā̍ha.
ya̱jño vai sū̱nṛtā̎.
acchā̍ vī̱raṃ narya̍ṃ pa̱ṅktirā̍dhasa̱mityā̍ha..13..
pāṅkto̱ hi ya̱jñaḥ.
de̱vā ya̱jñaṃ na̍yantu na̱ ityā̍ha.
de̱vāne̱va ya̍jña̱niya̍ḥ kurute.
devī̎ dyāvāpṛthivī̱ anu̍ me maṃsāthā̱mityā̍ha.
ā̱bhyāme̱vānu̍mato ya̱jñasya̱ śira̱ḥ sambha̍rati.
ṛ̱ddhyāsa̍ma̱dya ma̱khasya̱ śira̱ ityā̍ha.
ya̱jño vai ma̱khaḥ.
ṛ̱ddhyāsa̍ma̱dya ya̱jñasya̱ śira̱ iti vāvaitadā̍ha.
ma̱khāya̍ tvā ma̱khasya̍ tvā śī̱rṣṇa ityā̍ha.
ni̱rdiśyai̱vaina̍ddharati..14..
trirha̍rati.
traya̍ i̱me lo̱kāḥ.
e̱bhya e̱va lo̱kebhyo̍ ya̱jñasya̱ śira̱ḥ sambha̍rati.
tū̱ṣṇīṃ ca̍tu̱rthaṃ ha̍rati.
apa̍rimitāde̱va ya̱jñasya̱ śira̱ḥ sambha̍rati.
mṛ̱tkha̱nādagre̍ harati.
tasmā̎nmṛtkha̱naḥ ka̍ru̱ṇya̍taraḥ.
iya̱tyagra̍ āsī̱rityā̍ha.
a̱syāme̱vācha̍mbaṭkāraṃ ya̱jñasya̱ śira̱ḥ sambha̍rati.
ūrja̱ṃ vā e̱taṃ rasa̍ṃ pṛthi̱vyā u̍pa̱dīkā̱ uddi̍hanti..15..
yadva̱lmīkam̎.
yadva̍lmīkava̱pā sa̍mbhā̱ro bhava̍ti.
ūrja̍me̱va rasa̍ṃ pṛthi̱vyā ava̍rundhe.
atho̱ śrotra̍me̱va.
śrotra̱ṃ hye̍tatpṛ̍thi̱vyāḥ.
yadva̱lmīka̍ḥ.
aba̍dhiro bhavati.
ya e̱vaṃ veda̍.
indro̍ vṛ̱trāya̱ vajra̱muda̍yacchat.
sa yatra̍ yatra pa̱rākra̍mata..16..
tannāddhri̍yata.
sa pū̍tīkasta̱mbe parā̎kramata.
so̎'ddhriyata.
so̎'bravīt.
ū̱tiṃ vai me̍ dhā̱ iti̍.
tadū̱tīkā̍nāmūtīka̱tvam.
yadū̱tīkā̱ bhava̍nti.
ya̱jñāyai̱votiṃ da̍dhati.
a̱gni̱jā a̍si pra̱jāpa̍te̱ reta̱ ityā̍ha.
ya e̱va rasa̍ḥ pa̱śūnprāvi̍śat..17..
tame̱vāva̍rundhe.
pañcai̱te sa̍mbhā̱rā bha̍vanti.
pāṅkto̍ ya̱jñaḥ.
yāvā̍ne̱va ya̱jñaḥ.
tasya̱ śira̱ḥ sambha̍rati.
yadgrā̱myāṇā̎ṃ paśū̱nāṃ carma̍ṇā sa̱mbhare̎t.
grā̱myānpa̱śūñchu̱cā'rpa̍yet.
kṛ̱ṣṇā̱ji̱nena̱ sambha̍rati.
ā̱ra̱ṇyāne̱va pa̱śūñchu̱cā'rpa̍yati.
tasmā̎thsa̱māva̍tpaśū̱nāṃ pra̱jāya̍mānānām..18..
ā̱ra̱ṇyāḥ pa̱śava̱ḥ kanī̍yāṃsaḥ.
śu̱cā hyṛ̍tāḥ.
lo̱ma̱taḥ sambha̍rati.
ato̱ hya̍sya̱ medhyam̎.
pa̱ri̱gṛhyā ya̍nti.
rakṣa̍sā̱mapa̍hatyai.
ba̱havo̍ haranti.
apa̍citime̱vāsmi̍ndadhati.
uddha̍te̱ sika̍topopte̱ pari̍śrite̱ nida̍dhati̱ śāntyai̎.
mada̍ntībhi̱rupa̍ sṛjati..19..
teja̍ e̱vāsmi̍ndadhāti.
madhu̍ tvā madhu̱lā ka̍ro̱tvityā̍ha.
brahma̍ṇai̱vāsmi̱ntejo̍ dadhāti.
yadgrā̱myāṇā̱ṃ pātrā̍ṇāṃ ka̱pālai̎ḥ saṃsṛ̱jet.
grā̱myāṇi̱ pātrā̍ṇi śu̱cā'rpa̍yet.
a̱rma̱ka̱pā̱laiḥ saṃsṛ̍jati.
e̱tāni̱ vā a̍nupajīvanī̱yāni̍.
tānye̱va śu̱cā'rpa̍yati.
śarka̍rābhi̱ḥ saṃsṛ̍jati̱ dhṛtyai̎.
atho̍ śa̱ntvāya̍.
a̱ja̱lo̱maiḥ saṃsṛ̍jati.
e̱ṣā vā a̱gneḥ pri̱yā ta̱nūḥ.
yada̱jā.
pri̱yayai̱vaina̍ṃ ta̱nuvā̱ saṃsṛ̍jati.
atho̱ teja̍sā.
kṛ̱ṣṇā̱ji̱nasya̱ loma̍bhi̱ḥ saṃsṛ̍jati.
ya̱jño vai kṛ̍ṣṇāji̱nam.
ya̱jñenai̱va ya̱jñaṃ saṃsṛ̍jati..20..
Anuvāka 3
pari̍śrite karoti.
bra̱hma̱va̱rca̱sasya̱ pari̍gṛhītyai.
na ku̱rvanna̱bhi prā̎ṇyāt.
yatku̱rvanna̍bhi prā̱ṇyāt.
prā̱ṇāñchu̱cā'rpa̍yet.
a̱pa̱hāya̱ prāṇi̍ti.
prā̱ṇānā̎ṃ gopī̱thāya̍.
na pra̍va̱rgya̍ṃ cā''di̱tyaṃ cā̱ntare̍yāt.
yada̍ntare̱yāt.
du̱ścarmā̎ syāt..21..
tasmā̱nnānta̱rāyyam̎.
ā̱tmano̍ gopī̱thāya̍.
veṇu̍nā karoti.
tejo̱ vai veṇu̍ḥ.
teja̍ḥ prava̱rgya̍ḥ.
teja̍sai̱va teja̱ḥ sama̍rdhayati.
ma̱khasya̱ śiro̱'sītyā̍ha.
ya̱jño vai ma̱khaḥ.
tasyai̱tacchira̍ḥ.
yatpra̍va̱rgya̍ḥ..22..
tasmā̍de̱vamā̍ha.
ya̱jñasya̍ pa̱de stha̱ ityā̍ha.
ya̱jñasya̱ hye̍te pa̱de.
atho̱ prati̍ṣṭhityai.
gā̱ya̱treṇa̍ tvā̱ chanda̍sā karo̱mītyā̍ha.
chando̍bhire̱vaina̍ṃ karoti.
tryu̍ddhiṃ karoti.
traya̍ i̱me lo̱kāḥ.
e̱ṣāṃ lo̱kānā̱māptyai̎.
chando̍bhiḥ karoti..23..
vī̱rya̍ṃ vai chandā̍ṃsi.
vī̱rye̍ṇai̱vaina̍ṃ karoti.
yaju̍ṣā̱ bila̍ṃ karoti̱ vyāvṛ̍tyai.
iya̍ṃ taṃ karoti.
pra̱jāpa̍tinā yajñamu̱khena̱ sammi̍tam.
iya̍ṃ taṃ karoti.
ya̱jña̱pa̱ruṣā̱ sammi̍tam.
iya̍ṃ taṃ karoti.
e̱tāva̱dvai puru̍ṣe vī̱ryam̎.
vī̱rya̍sammitam..24..
apa̍rimitaṃ karoti.
apa̍rimita̱syāva̍ruddhyai.
pa̱ri̱grī̱vaṃ ka̍roti̱ dhṛtyai̎.
sūrya̍sya̱ hara̍sā śrā̱yetyā̍ha.
ya̱thā̱ya̱jure̱vaitat.
a̱śva̱śa̱kena̍ dhūpayati.
prā̱jā̱pa̱tyo vā aśva̍ḥ sayoni̱tvāya̍.
vṛṣṇo̱ aśva̍sya ni̱ṣpada̱sītyā̍ha.
a̱sau vā ā̍di̱tyo vṛṣā'śva̍ḥ.
tasya̱ chandā̍ṃsi ni̱ṣpat..25..
chando̍bhire̱vaina̍ṃ dhūpayati.
a̱rciṣe̎ tvā śo̱ciṣe̱ tvetyā̍ha.
teja̍ e̱vāsmi̍ndadhāti.
vā̱ru̱ṇo̍'bhīddha̍ḥ.
mai̱triyopai̍ti̱ śāntyai̎.
siddhyai̱ tvetyā̍ha.
ya̱thā̱ya̱jure̱vaitat.
de̱vastvā̍ savi̱todva̍pa̱tvityā̍ha.
sa̱vi̱tṛpra̍sūta e̱vaina̱ṃ brahma̍ṇā de̱vatā̍bhi̱rudva̍pati.
apa̍dyamānaḥ pṛthi̱vyāmāśā̱ diśa̱ āpṛ̱ṇetyā̍ha..26..
tasmā̍da̱gniḥ sarvā̱ diśo'nu̱ vibhā̍ti.
utti̍ṣṭha bṛ̱hanbha̍vo̱rdhvasti̍ṣṭha dhru̱vastvamityā̍ha̱ prati̍ṣṭhityai.
ī̱śva̱ro vā e̱ṣo̎'ndho bhavi̍toḥ.
yaḥ pra̍va̱rgya̍ma̱nvīkṣa̍te.
sūrya̍sya tvā̱ cakṣu̱ṣā'nvī̎kṣa̱ ityā̍ha.
cakṣu̍ṣo gopī̱thāya̍.
ṛ̱jave̎ tvā sā̱dhave̎ tvā sukṣi̱tyai tvā̱ bhūtyai̱ tvetyā̍ha.
i̱yaṃ vā ṛ̱juḥ.
a̱ntari̍kṣaṃ sā̱dhu.
a̱sau su̍kṣi̱tiḥ..27..
diśo̱ bhūti̍ḥ.
i̱māne̱vāsmai̍ lo̱kānka̍lpayati.
atho̱ prati̍ṣṭhityai.
i̱dama̱hama̱mumā̍muṣyāya̱ṇaṃ vi̱śā pa̱śubhi̍rbrahmavarca̱sena̱ paryū̍hā̱mītyā̍ha.
vi̱śaivaina̍ṃ pa̱śubhi̍rbrahmavarca̱sena̱ paryū̍hati.
vi̱śeti̍ rāja̱nya̍sya brūyāt.
vi̱śaivaina̱ṃ paryū̍hati.
pa̱śubhi̱riti̱ vaiśya̍sya.
pa̱śubhi̍re̱vaina̱ṃ paryū̍hati.
a̱su̱rya̍ṃ pātra̱manā̎cchṛṇṇam..28..
ācchṛ̍ṇatti.
de̱va̱trāka̍ḥ.
a̱ja̱kṣī̱reṇā''cchṛ̍ṇatti.
pa̱ra̱maṃ vā e̱tatpaya̍ḥ.
yada̍jakṣī̱ram.
pa̱ra̱meṇai̱vaina̱ṃ paya̱sā''cchṛ̍ṇatti.
yaju̍ṣā̱ vyāvṛ̍ttyai.
chando̍bhi̱rācchṛ̍ṇatti.
chando̍bhi̱rvā e̱ṣa kri̍yate.
chando̍bhire̱va chandā̱ṃsyācchṛ̍ṇatti.
chṛ̱ndhi vāca̱mityā̍ha.
vāca̍me̱vāva̍rundhe.
chṛ̱ndhyūrja̱mityā̍ha.
ūrja̍me̱vāva̍rundhe.
chṛ̱ndhi ha̱virityā̍ha.
ha̱vire̱vāka̍ḥ.
deva̍ puraścara sa̱ghyāsa̱ntvetyā̍ha.
ya̱thā̱ya̱jure̱vaitat..29..%
Anuvāka 4
brahma̱npraca̍riṣyāmo̱ hota̍rgha̱rmama̱bhiṣṭu̱hītyā̍ha.
e̱ṣa vā e̱tarhi̱ bṛha̱spati̍ḥ.
yadbra̱hmā.
tasmā̍ e̱va pra̍ti̱procya̱ praca̍rati.
ā̱tmano'nā̎rtyai.
ya̱māya̍ tvā ma̱khāya̱ tvetyā̍ha.
e̱tā vā e̱tasya̍ de̱vatā̎ḥ.
tābhi̍re̱vaina̱ṃ sama̍rdhayati.
mada̍ntībhi̱ḥ prokṣa̍ti.
teja̍ e̱vāsmi̍ndadhāti..30..
a̱bhi̱pū̱rvaṃ prokṣa̍ti.
a̱bhi̱pū̱rvame̱vāsmi̱ntejo̍ dadhāti.
triḥ prokṣa̍ti.
tryā̍vṛ̱ddhi ya̱jñaḥ.
atho̍ medhya̱tvāya̍.
hotā'nvā̍ha.
rakṣa̍sā̱mapa̍hatyai.
ana̍vānam.
prā̱ṇānā̱ṃ santa̍tyai.
tri̱ṣṭubha̍ḥ sa̱tīrgā̍ya̱trīri̱vānvā̍ha..31..
gā̱ya̱tro hi prā̱ṇaḥ.
prā̱ṇame̱va yaja̍māne dadhāti.
santa̍ta̱manvā̍ha.
prā̱ṇānā̍ma̱nnādya̍sya̱ santa̍tyai.
atho̱ rakṣa̍sā̱mapa̍hatyai.
yatpari̍mitā anubrū̱yāt.
pari̍mita̱mava̍rundhīta.
apa̍rimitā̱ anvā̍ha.
apa̍rimita̱syāva̍ruddhyai.
śiro̱ vā e̱tadya̱jñasya̍..32..
yatpra̍va̱rgya̍ḥ.
ūrṅmuñjā̎ḥ.
yanmau̱ñjo ve̱do bhava̍ti.
ū̱rjaiva ya̱jñasya̱ śira̱ḥ sama̍rdhayati.
prā̱ṇā̱hu̱tīrju̍hoti.
prā̱ṇāne̱va yaja̍māne dadhāti.
sa̱pta ju̍hoti.
sa̱pta vai śī̍rṣa̱ṇyā̎ḥ prā̱ṇāḥ.
prā̱ṇāne̱vāsmi̍ndadhāti.
de̱vastvā̍ savi̱tā madhvā̍'na̱ktvityā̍ha..33..
teja̍sai̱vaina̍manakti.
pṛ̱thi̱vīṃ tapa̍sastrāya̱sveti̱ hira̍ṇya̱mupā̎syati.
a̱syā ana̍tidāhāya.
śiro̱ vā e̱tadya̱jñasya̍.
yatpra̍va̱rgya̍ḥ.
a̱gniḥ sarvā̍ de̱vatā̎ḥ.
pra̱la̱vānā̱dīpyopā̎syati.
de̱vatā̎sve̱va ya̱jñasya̱ śira̱ḥ prati̍dadhāti.
apra̍tiśīrṇāgraṃ bhavati.
e̱tadba̍rhi̱rhye̍ṣaḥ..34..
a̱rcira̍si śo̱cira̱sītyā̍ha.
teja̍ e̱vāsmi̍nbrahmavarca̱saṃ da̍dhāti.
saṃsī̍dasva ma̱hāṃ a̱sītyā̍ha.
ma̱hān hye̍ṣaḥ.
bra̱hma̱vā̱dino̍ vadanti.
e̱te vāva ta ṛ̱tvija̍ḥ.
ye da̍rśapūrṇamā̱sayo̎ḥ.
atha̍ ka̱thā hotā̱ yaja̍mānāyā̱''śiṣo̱ nāśā̎sta̱ iti̍.
pu̱rastā̍dāśī̱ḥ khalu̱ vā a̱nyo ya̱jñaḥ.
u̱pari̍ṣṭādāśīra̱nyaḥ..35..
a̱nā̱dhṛ̱ṣyā pu̱rastā̱diti̱ yade̱tāni̱ yajū̱ṃṣyāha̍.
śī̱ṟṣa̱ta e̱va ya̱jñasya̱ yaja̍māna ā̱śiṣo'va̍rundhe.
āyu̍ḥ pu̱rastā̍dāha.
pra̱jāṃ da̍kṣiṇa̱taḥ.
prā̱ṇaṃ pa̱ścāt.
śrotra̍muttara̱taḥ.
vidhṛ̍timu̱pari̍ṣṭāt.
prā̱ṇāne̱vāsmai̍ sa̱mīco̍ dadhāti.
ī̱śva̱ro vā e̱ṣa diśo'nūnma̍ditoḥ.
yaṃ diśo'nu̍ vyāsthā̱paya̍nti..36..
mano̱raśvā̍si̱ bhūri̍pu̱tretī̱māma̱bhimṛ̍śati.
i̱yaṃ vai mano̱raśvā̱ bhūri̍putrā.
a̱syāme̱va prati̍tiṣṭha̱tyanu̍nmādāya.
sū̱pa̱sadā̍ me bhūyā̱ mā mā̍ hiṃsī̱rityā̱hāhi̍ṃsāyai.
cita̍ḥ stha pari̱cita̱ ityā̍ha.
apa̍citime̱vāsmi̍ndadhāti.
śiro̱ vā e̱tadya̱jñasya̍.
yatpra̍va̱rgya̍ḥ.
a̱sau khalu̱ vā ā̍di̱tyaḥ pra̍va̱rgya̍ḥ.
tasya̍ ma̱ruto̍ ra̱śmaya̍ḥ..37..
svāhā̍ ma̱rudbhi̱ḥ pari̍śraya̱svetyā̍ha.
a̱mume̱vā''di̱tyaṃ ra̱śmibhi̱ḥ paryū̍hati.
tasmā̍da̱sāvā̍di̱tyo̍'muṣmi̍m̐llo̱ke ra̱śmibhi̱ḥ paryū̍ḍhaḥ.
tasmā̱drājā̍ vi̱śā paryū̍ḍhaḥ.
tasmā̎dgrāma̱ṇīḥ sa̍jā̱taiḥ paryū̍ḍhaḥ.
a̱gneḥ sṛ̱ṣṭasya̍ ya̱taḥ.
vika̍ṅkata̱ṃ bhā ā̎rcchat.
yadvaika̍ṅkatāḥ pari̱dhayo̱ bhava̍nti.
bhā e̱vāva̍rundhe.
dvāda̍śa bhavanti..38..
dvāda̍śa̱ māsā̎ḥ saṃvathsa̱raḥ.
sa̱ṃva̱thsa̱rame̱vāva̍rundhe.
asti̍ trayoda̱śo māsa̱ ityā̍huḥ.
yattra̍yoda̱śaḥ pa̍ri̱dhirbhava̍ti.
tenai̱va tra̍yoda̱śaṃ māsa̱mava̍rundhe.
a̱ntari̍kṣasyānta̱rdhira̱sītyā̍ha̱ vyāvṛ̍ttyai.
diva̱ṃ tapa̍sastrāya̱svetyu̱pari̍ṣṭā̱ddhira̍ṇya̱madhi̱ nida̍dhāti.
a̱muṣyā̱ ana̍tidāhāya.
atho̍ ā̱bhyāme̱vaina̍mubha̱yata̱ḥ pari̍gṛhṇāti.
arha̍n bibharṣi̱ sāya̍kāni̱ dhanvetyā̍ha..39..
stautye̱vaina̍me̱tat.
gā̱ya̱trama̍si̱ traiṣṭu̍bhamasi̱ jāga̍tama̱sīti̍ dha̱vitrā̱ṇyāda̍tte.
chando̍bhire̱vainā̱nyāda̍tte.
madhu̱ madhviti̍ dhūnoti.
prā̱ṇo vai madhu̍.
prā̱ṇame̱va yaja̍māne dadhāti.
triḥ pari̍yanti.
tri̱vṛddhi prā̱ṇaḥ.
triḥ pari̍yanti.
tryā̍vṛ̱ddhi ya̱jñaḥ..40..
atho̱ rakṣa̍sā̱mapa̍hatyai.
triḥ puna̱ḥ pari̍yanti.
ṣaṭthsaṃ pa̍dyante.
ṣaḍvā ṛ̱tava̍ḥ.
ṛ̱tuṣve̱va prati̍tiṣṭhanti.
yo vai gha̱rmasya̍ pri̱yāṃ ta̱nuva̍mā̱krāma̍ti.
du̱ścarmā̱ vai sa bha̍vati.
e̱ṣa ha̱ vā a̍sya pri̱yāṃ ta̱nuva̱mākrā̍mati.
yattriḥ pa̱rītya̍ catu̱rthaṃ parye̍ti.
e̱tāṃ ha̱ vā a̍syo̱grade̍vo̱ rāja̍ni̱rāca̍krāma..41..
tato̱ vai sa du̱ścarmā̍'bhavat.
tasmā̱ttriḥ pa̱rītya̱ na ca̍tu̱rthaṃ parī̍yāt.
ā̱tmano̍ gopī̱thāya̍.
prā̱ṇā vai dha̱vitrā̍ṇi.
avya̍tiṣaṅgaṃ dhūnvanti.
prā̱ṇānā̱mavya̍tiṣaṅgāya̱ klṛptyai̎.
vi̱ni̱ṣadya̍ dhūnvanti.
di̱kṣve̍va prati̍tiṣṭhanti.
ū̱rdhvaṃ dhū̎nvanti.
su̱va̱rgasya̍ lo̱kasya̱ sama̍ṣṭyai.
sa̱rvato̍ dhūnvanti.
tasmā̍da̱yaṃ sa̱rvata̍ḥ pavate..42..
Anuvāka 5
a̱gniṣṭvā̱ vasu̍bhiḥ pu̱rastā̎drocayatu gāya̱treṇa̱ chanda̱setyā̍ha.
a̱gnire̱vaina̱ṃ vasu̍bhiḥ pu̱rastā̎drocayati gāya̱treṇa̱ chanda̍sā.
sa mā̍ ruci̱to ro̍ca̱yetyā̍ha.
ā̱śiṣa̍me̱vaitāmā śā̎ste.
indra̍stvā ru̱drairda̍kṣiṇa̱to ro̍cayatu̱ traiṣṭu̍bhena̱ chanda̱setyā̍ha.
indra̍ e̱vaina̍ṃ ru̱drairda̍kṣiṇa̱to ro̍cayati̱ traiṣṭu̍bhena̱ chanda̍sā.
sa mā̍ ruci̱to ro̍ca̱yetyā̍ha.
ā̱śiṣa̍me̱vaitāmā śā̎ste.
varu̍ṇastvā''di̱tyaiḥ pa̱ścādro̍cayatu̱ jāga̍tena̱ chanda̱setyā̍ha.
varu̍ṇa e̱vaina̍mādi̱tyaiḥ pa̱ścādro̍cayati̱ jāga̍tena̱ chanda̍sā..43..
sa mā̍ ruci̱to ro̍ca̱yetyā̍ha.
ā̱śiṣa̍me̱vaitāmā śā̎ste.
dyu̱tā̱nastvā̍ māru̱to ma̱rudbhi̍ruttara̱to ro̍caya̱tvānu̍ṣṭubhena̱ chanda̱setyā̍ha.
dyu̱tā̱na e̱vaina̍ṃ māru̱to ma̱rudbhi̍ruttara̱to ro̍caya̱tyānu̍ṣṭubhena̱ chanda̍sā.
sa mā̍ ruci̱to ro̍ca̱yetyā̍ha.
ā̱śiṣa̍me̱vaitāmā śā̎ste.
bṛha̱spati̍stvā̱ viśvai̎rde̱vairu̱pari̍ṣṭādrocayatu̱ pāṅkte̍na̱ chanda̱setyā̍ha.
bṛha̱spati̍re̱vaina̱ṃ viśvai̎rde̱vairu̱pari̍ṣṭādrocayati̱ pāṅkte̍na̱ chanda̍sā.
sa mā̍ ruci̱to ro̍ca̱yetyā̍ha.
ā̱śiṣa̍me̱vaitāmā śā̎ste..44..
ro̱ci̱tastvaṃ de̍va gharma de̱veṣvasītyā̍ha.
ro̱ci̱to hye̍ṣa de̱veṣu̍.
ro̱ci̱ṣī̱yāhaṃ ma̍nu̱ṣye̎ṣvityā̍ha.
roca̍ta e̱vaiṣa ma̍nu̱ṣye̍ṣu.
samrā̎ḍgharma ruci̱tastvaṃ de̱veṣvāyu̍ṣmāṃsteja̱svī bra̍hmavarca̱sya̍sītyā̍ha.
ru̱ci̱to hye̍ṣa de̱veṣvāyu̍ṣmāṃsteja̱svī bra̍hmavarca̱sī.
ru̱ci̱to̍'haṃ ma̍nu̱ṣye̎ṣvāyu̍ṣmāṃsteja̱svī bra̍hmavarca̱sī bhū̍yāsa̱mityā̍ha.
ru̱ci̱ta e̱vaiṣa ma̍nu̱ṣye̎ṣvāyu̍ṣmāṃsteja̱svī bra̍hmavarca̱sī bha̍vati.
ruga̍si̱ ruca̱ṃ mayi̍ dhehi̱ mayi̱ rugityā̍ha.
ā̱śiṣa̍me̱vaitāmā śā̎ste.
taṃ yade̱tairyaju̍rbhi̱raro̍cayitvā.
ru̱ci̱to gha̱rma iti̍ prabrū̱yāt.
aro̍cuko'dhva̱ryuḥ syāt.
aro̍cuko̱ yaja̍mānaḥ.
atha̱ yade̍name̱tairyaju̍rbhī rocayi̱tvā.
ru̱ci̱to gharma̱ iti̱ prāha̍.
rocu̍ko'dhva̱ryurbhava̍ti.
rocu̍ko̱ yaja̍mānaḥ..45..
Anuvāka 6
śiro̱ vā e̱tadya̱jñasya̍.
yatpra̍va̱rgya̍ḥ.
grī̱vā u̍pa̱sada̍ḥ.
pu̱rastā̍dupa̱sadā̎ṃ prava̱rgya̍ṃ pravṛ̍ṇakti.
grī̱vāsve̱va ya̱jñasya̱ śira̱ḥ prati̍dadhāti.
triḥ pravṛ̍ṇakti.
traya̍ i̱me lo̱kāḥ.
e̱bhya e̱va lo̱kebhyo̍ ya̱jñasya̱ śiro'va̍rundhe.
ṣaṭthsaṃ pa̍dyante.
ṣaḍvā ṛ̱tava̍ḥ..46..
ṛ̱tubhya̍ e̱va ya̱jñasya̱ śiro'va̍rundhe.
dvāda̍śa̱kṛtva̱ḥ pravṛ̍ṇakti.
dvāda̍śa̱ māsā̎ḥ saṃvathsa̱raḥ.
sa̱ṃva̱thsa̱rāde̱va ya̱jñasya̱ śiro'va̍rundhe.
catu̍rviṃśati̱ḥ saṃ pa̍dyante.
catu̍rviṃśatirardhamā̱sāḥ.
a̱rdha̱mā̱sebhya̍ e̱va ya̱jñasya̱ śiro'va̍rundhe.
atho̱ khalu̍.
sa̱kṛde̱va pra̱vṛjya̍ḥ.
eka̱ṃ hi śira̍ḥ..47..
a̱gni̱ṣṭo̱me pravṛ̍ṇakti.
e̱tāvā̱ṉ vai ya̱jñaḥ.
yāvā̍nagniṣṭo̱maḥ.
yāvā̍ne̱va ya̱jñaḥ.
tasya̱ śira̱ḥ prati̍dadhāti.
nokthye̎ pravṛ̍ñjyāt.
pra̱jā vai pa̱śava̍ u̱kthāni̍.
yadu̱kthye̎ pravṛ̱ñjyāt.
pra̱jāṃ pa̱śūna̍sya̱ nirda̍het.
vi̱śva̱jiti̱ sarva̍pṛṣṭhe̱ pravṛ̍ṇakti..48..
pṛ̱ṣṭhāni̱ vā acyu̍taṃ cyāvayanti.
pṛ̱ṣṭhaire̱vāsmā̱ acyu̍taṃ cyāvayi̱tvā'va̍rundhe.
apa̍śyaṃ go̱pāmityā̍ha.
prā̱ṇo vai go̱pāḥ.
prā̱ṇame̱va pra̱jāsu̱ viyā̍tayati.
apa̍śyaṃ go̱pāmityā̍ha.
a̱sau vā ā̍di̱tyo go̱pāḥ.
sa hīmāḥ pra̱jā go̍pā̱yati̍.
tame̱va pra̱jānā̎ṃ go̱ptāra̍ṃ kurute.
ani̍padyamāna̱mityā̍ha..49..
na hye̍ṣa ni̱padya̍te.
ā ca̱ parā̍ ca pa̱thibhi̱ścara̍nta̱mityā̍ha.
ā ca̱ hye̍ṣa parā̍ ca pa̱thibhi̱ścara̍ti.
sa sa̱dhrīcī̱ḥ sa viṣū̍cī̱rvasā̍na̱ ityā̍ha.
sa̱dhrīcī̎śca̱ hye̍ṣa viṣū̍cīśca̱ vasā̍naḥ pra̱jā a̱bhi vi̱paśya̍ti.
āva̍rīvarti̱ bhuva̍neṣva̱ntarityā̍ha.
ā hye̍ṣa va̍rī̱varti̱ bhuva̍neṣva̱ntaḥ.
atra̍ prā̱vīrmadhu̱ mādhvī̎bhyā̱ṃ madhu̱ mādhū̍cībhyā̱mityā̍ha.
vāsa̍ntikāve̱vāsmā̍ ṛ̱tū ka̍lpayati.
sama̱gnira̱gninā̍ ga̱tetyā̍ha..50..
graiṣmā̍ve̱vāsmā̍ ṛ̱tū ka̍lpayati.
sama̱gnira̱gninā̍ ga̱tetyā̍ha.
a̱gnirhye̍vaiṣo̎'gninā̍ sa̱ṅgaccha̍te.
svāhā̱ sama̱gnistapa̍sā ga̱tetyā̍ha.
pūrva̍me̱vodi̱tam.
utta̍reṇā̱bhigṛ̍ṇāti.
dha̱rtā di̱vo vibhā̍si̱ raja̍saḥ pṛthi̱vyā ityā̍ha.
śā̱ra̱dāve̱vāsmā̍ ṛ̱tū ka̍lpayati..51..
di̱vi de̱veṣu̱ hotrā̍ ya̱cchetyā̍ha.
hotrā̍bhire̱vemām̐llo̱kānthsanda̍dhāti.
viśvā̍sāṃ bhuvāṃ pata̱ ityā̍ha.
haima̍ntikāve̱vāsmā̍ ṛ̱tū ka̍lpayati.
de̱va̱śrūstvaṃ de̍va gharma de̱vānpā̱hītyā̍ha.
śai̱śi̱rāve̱vāsmā̍ ṛ̱tū ka̍lpayati.
ta̱po̱jāṃ vāca̍ma̱sme niya̍ccha devā̱yuva̱mityā̍ha.
yā vai medhyā̱ vāk.
sā ta̍po̱jāḥ.
tāme̱vāva̍rundhe..52..
garbho̍ de̱vānā̱mityā̍ha.
garbho̱ hye̍ṣa de̱vānā̎m.
pi̱tā ma̍tī̱nāmityā̍ha.
pra̱jā vai ma̱taya̍ḥ.
tāsā̍me̱ṣa e̱va pi̱tā.
yatpra̍va̱rgya̍ḥ.
tasmā̍de̱vamā̍ha.
pati̍ḥ pra̱jānā̱mityā̍ha.
pati̱rhye̍ṣa pra̱jānā̎m.
mati̍ḥ kavī̱nāmityā̍ha..53..
mati̱rhye̍ṣa ka̍vī̱nām.
saṃ de̱vo de̱vena̍ savi̱trā ya̍tiṣṭa̱ saṃ sūrye̍ṇāru̱ktetyā̍ha.
a̱muṃ cai̱vā''di̱tyaṃ pra̍va̱rgya̍ṃ ca̱ saṃśā̎sti.
ā̱yu̱rdāstvama̱smabhya̍ṃ gharma varco̱dā a̱sītyā̍ha.
ā̱śiṣa̍me̱vaitāmā śā̎ste.
pi̱tā no̍'si pi̱tā no̍ bo̱dhetyā̍ha.
bo̱dhaya̍tye̱vainam̎.
na vai̱ te̍'vakā̱śā bha̍vanti.
patni̍yai daśa̱maḥ.
nava̱ vai puru̍ṣe prā̱ṇāḥ..54..
nābhi̍rdaśa̱mī.
prā̱ṇāne̱va yaja̍māne dadhāti.
atho̱ daśā̎kṣarā vi̱rāṭ.
anna̍ṃ vi̱rāṭ.
vi̱rājai̱vānnādya̱mava̍rundhe.
ya̱jñasya̱ śiro̎'cchidyata.
tadde̱vā hotrā̍bhi̱ḥ pratya̍dadhuḥ.
ṛ̱tvijo've̎kṣante.
e̱tā vai hotrā̎ḥ.
hotrā̍bhire̱va ya̱jñasya̱ śira̱ḥ prati̍dadhāti..55..
ru̱ci̱tamave̎kṣante.
ru̱ci̱tādvai pra̱jāpa̍tiḥ pra̱jā a̍sṛjata.
pra̱jānā̱ṃ sṛṣṭyai̎.
ru̱ci̱tamave̎kṣante.
ru̱ci̱tādvai pa̱rjanyo̍ varṣati.
varṣu̍kaḥ pa̱rjanyo̍ bhavati.
saṃ pra̱jā e̍dhante.
ru̱ci̱tamave̎kṣante.
ru̱ci̱taṃ vai bra̍hmavarca̱sam.
bra̱hma̱va̱rca̱sino̍ bhavanti..56..
a̱dhī̱yanto've̎kṣante.
sarva̱māyu̍ryanti.
na patnyave̎kṣeta.
yatpatnya̱vekṣe̍ta.
prajā̍yeta.
pra̱jāṃ tva̍syai̱ nirda̍het.
yannāvekṣe̍ta.
na prajā̍yeta.
nāsyai̎ pra̱jāṃ nirda̍het.
ti̱ra̱skṛtya̱ yaju̍rvācayati.
prajā̍yate.
nāsyai̎ pra̱jāṃ nirda̍hati.
tvaṣṭī̍matī te sape̱yetyā̍ha.
sapā̱ddhi pra̱jāḥ pra̱jāya̍nte..57..
Anuvāka 7
de̱vasya̍ tvā savi̱tuḥ pra̍sa̱va iti̍ raśa̱nāmāda̍tte̱ prasū̎tyai.
a̱śvino̎rbā̱hubhyā̱mityā̍ha.
a̱śvinau̱ hi de̱vānā̍madhva̱ryū āstā̎m.
pū̱ṣṇo hastā̎bhyā̱mityā̍ha̱ yatyai̎.
āda̱de'di̍tyai̱ rāsnā̱'sītyā̍ha̱ yaju̍ṣkṛtyai.
iḍa̱ ehyadi̍ta̱ ehi̱ sara̍sva̱tyehītyā̍ha.
e̱tāni̱ vā a̍syai devanā̱māni̍.
de̱va̱nā̱maire̱vainā̱māhva̍yati.
asā̱vehyasā̱vehyasā̱vehītyā̍ha.
e̱tāni̱ vā a̍syai manuṣyanā̱māni̍..58..
ma̱nu̱ṣya̱nā̱maire̱vainā̱māhva̍yati.
ṣaṭthsaṃ pa̍dyante.
ṣaḍvā ṛ̱tava̍ḥ.
ṛ̱tubhi̍re̱vainā̱māhva̍yati.
adi̍tyā u̱ṣṇīṣa̍ma̱sītyā̍ha.
ya̱thā̱ya̱jure̱vaitat.
vā̱yura̍syai̱ḍa ityā̍ha.
vā̱yu̱de̱va̱tyo̍ vai va̱thsaḥ.
pū̱ṣā tvo̱pāva̍sṛja̱tvityā̍ha.
pau̱ṣṇā vai de̱vata̍yā pa̱śava̍ḥ..59..
svayai̱vaina̍ṃ de̱vata̍yo̱pāva̍sṛjati.
a̱śvibhyā̱ṃ pradā̍pa̱yetyā̍ha.
a̱śvinau̱ vai de̱vānā̎ṃ bhi̱ṣajau̎.
tābhyā̍me̱vāsmai̍ bheṣa̱jaṃ ka̍roti.
yaste̱ stana̍ḥ śaśa̱ya ityā̍ha.
stautye̱vainā̎m.
usra̍ gha̱rmaṃ śi̱ṃṣosra̍ gha̱rmaṃ pā̍hi gha̱rmāya̍ śi̱ṃṣetyā̍ha.
yathā̎ brū̱yāda̱muṣmai̍ de̱hīti̍.
tā̱dṛge̱va tat.
bṛha̱spati̱stvopa̍ sīda̱tvityā̍ha..60..
brahma̱ vai de̱vānā̱ṃ bṛha̱spati̍ḥ.
brahma̍ṇai̱vainā̱mupa̍sīdati.
dāna̍vaḥ stha̱ pera̍va̱ ityā̍ha.
medhyā̍ne̱vainā̎nkaroti.
vi̱ṣva̱gvṛto̱ lohi̍te̱netyā̍ha̱ vyāvṛ̍ttyai.
a̱śvibhyā̎ṃ pinvasva̱ sara̍svatyai pinvasva pū̱ṣṇe pi̍nvasva̱ bṛha̱spata̍ye pinva̱svetyā̍ha.
e̱tābhyo̱ hye̍ṣā de̱vatā̎bhya̱ḥ pinva̍te.
indrā̍ya pinva̱svendrā̍ya pinva̱svetyā̍ha.
indra̍me̱va bhā̍ga̱dheye̍na̱ sama̍rdhayati.
dvirindrā̱yetyā̍ha..61..
tasmā̱dindro̍ de̱vatā̍nāṃ bhūyiṣṭha̱bhākta̍maḥ.
gā̱ya̱tro̍'si̱ traiṣṭu̍bho'si̱ jāga̍tama̱sīti̍ śaphopaya̱mānāda̍tte.
chando̍bhire̱vainā̱nāda̍tte.
sa̱horjo bhā̱genopa̱mehītyā̍ha.
ū̱rja e̱vaina̍ṃ bhā̱gama̍kaḥ.
a̱śvinau̱ vā e̱tadya̱jñasya̱ śira̍ḥ prati̱dadha̍tāvabrūtām.
ā̱vābhyā̍me̱va pūrvā̎bhyā̱ṃ vaṣa̍ṭkriyātā̱ iti̍.
indrā̎śvinā̱ madhu̍naḥ sāra̱ghasyetyā̍ha.
a̱śvibhyā̍me̱va pūrvā̎bhyā̱ṃ vaṣa̍ṭkaroti.
atho̍ a̱śvinā̍ve̱va bhā̍ga̱dheye̍na̱ sama̍rdhayati..62..
gha̱rmaṃ pā̍ta vasavo̱ yaja̍tā̱ vaḍityā̍ha.
vasū̍ne̱va bhā̍ga̱dheye̍na̱ sama̍rdhayati.
yadva̍ṣaṭku̱ryāt.
yā̱tayā̍mā'sya vaṣaṭkā̱raḥ syā̎t.
yanna va̍ṣaṭku̱ryāt.
rakṣā̍ṃsi ya̱jñaṃ ha̍nyuḥ.
vaḍityā̍ha.
pa̱rokṣa̍me̱va vaṣa̍ṭkaroti.
nāsya̍ yā̱tayā̍mā vaṣaṭkā̱ro bhava̍ti.
na ya̱jñaṃ rakṣā̍ṃsi ghnanti..63..
svāhā̎ tvā̱ sūrya̍sya ra̱śmaye̍ vṛṣṭi̱vana̍ye juho̱mītyā̍ha.
yo vā a̍sya̱ puṇyo̍ ra̱śmiḥ.
sa vṛ̍ṣṭi̱vani̍ḥ.
tasmā̍ e̱vaina̍ṃ juhoti.
madhu̍ ha̱vira̱sītyā̍ha.
sva̱daya̍tye̱vainam̎.
sūrya̍sya̱ tapa̍sta̱petyā̍ha.
ya̱thā̱ya̱jure̱vaitat.
dyāvā̍pṛthi̱vībhyā̎ṃ tvā̱ pari̍gṛhṇā̱mītyā̍ha.
dyāvā̍pṛthi̱vībhyā̍me̱vaina̱ṃ pari̍gṛhṇāti..64..
a̱ntari̍kṣeṇa̱ tvopa̍yacchā̱mītyā̍ha.
a̱ntari̍kṣeṇai̱vaina̱mupa̍yacchati.
na vā e̱taṃ ma̍nu̱ṣyo̍ bhartu̍marhati.
de̱vānā̎ṃ tvā pitṛ̱ṇāmanu̍mato̱ bhartu̍ṃ śakeya̱mityā̍ha.
de̱vaire̱vaina̍ṃ pi̱tṛbhi̱ranu̍mata̱ āda̍tte.
vi vā e̍name̱tada̍rdhayanti.
yatpa̱ścātpra̱vṛjya̍ pu̱ro juhva̍ti.
tejo̍'si̱ tejo'nu̱ prehītyā̍ha.
teja̍ e̱vāsmi̍ndadhāti.
di̱vi̱spṛṅmā mā̍ hiṃsīrantarikṣa̱spṛṅmā mā̍ hiṃsīḥ pṛthivi̱spṛṅmā mā̍ hiṃsī̱rityā̱hāhi̍ṃsāyai..65..
suva̍rasi̱ suva̍rme yaccha̱ diva̍ṃ yaccha di̱vo mā̍ pā̱hītyā̍ha.
ā̱śiṣa̍me̱vaitāmā śā̎ste.
śiro̱ vā e̱tadya̱jñasya̍.
yatpra̍va̱rgya̍ḥ.
ā̱tmā vā̱yuḥ.
u̱dyatya̍ vātanā̱mānyā̍ha.
ā̱tmanne̱va ya̱jñasya̱ śira̱ḥ prati̍dadhāti.
ana̍vānam.
prā̱ṇānā̱ṃ santa̍tyai.
pañcā̍''ha..66..
pāṅkto̍ ya̱jñaḥ.
yāvā̍ne̱va ya̱jñaḥ.
tasya̱ śira̱ḥ prati̍dadhāti.
a̱gnaye̎ tvā̱ vasu̍mate̱ svāhetyā̍ha.
a̱sau vā ā̍di̱tyo̎'gnirvasu̍mān.
tasmā̍ e̱vaina̍ṃ juhoti.
somā̍ya tvā ru̱drava̍te̱ svāhetyā̍ha.
ca̱ndramā̱ vai somo̍ ru̱dravān̍.
tasmā̍ e̱vaina̍ṃ juhoti.
varu̍ṇāya tvā''di̱tyava̍te̱ svāhetyā̍ha..67..
a̱phsu vai varu̍ṇa ādi̱tyavān̍.
tasmā̍ e̱vaina̍ṃ juhoti.
bṛha̱spata̍ye tvā vi̱śvade̎vyāvate̱ svāhetyā̍ha.
brahma̱ vai de̱vānā̱ṃ bṛha̱spati̍ḥ.
brahma̍ṇai̱vaina̍ṃ juhoti.
sa̱vi̱tre tva̍rbhu̱mate̍ vibhu̱mate̎ prabhu̱mate̱ vāja̍vate̱ svāhetyā̍ha.
sa̱ṃva̱thsa̱ro vai sa̍vi̱tarbhu̱mān vi̍bhu̱mānpra̍bhu̱mān vāja̍vān.
tasmā̍ e̱vaina̍ṃ juhoti.
ya̱māya̱ tvā'ṅgi̍rasvate pitṛ̱mate̱ svāhetyā̍ha.
prā̱ṇo vai ya̱mo'ṅgi̍rasvānpitṛ̱mān..68..
tasmā̍ e̱vaina̍ṃ juhoti.
e̱tābhya̍ e̱vaina̍ṃ de̱vatā̎bhyo juhoti.
daśa̱ saṃ pa̍dyante.
daśā̎kṣarā vi̱rāṭ.
anna̍ṃ vi̱rāṭ.
vi̱rājai̱vānnādya̱mava̍rundhe.
rau̱hi̱ṇābhyā̱ṃ vai de̱vāḥ su̍va̱rga̍ṃ lo̱kamā̍yan.
tadrau̍hi̱ṇayo̍ rauhiṇa̱tvam.
yadrau̍hi̱ṇau bhava̍taḥ.
rau̱hi̱ṇābhyā̍me̱va tadyaja̍mānaḥ suva̱rgaṃ lo̱kame̍ti.
aha̱rjyoti̍ḥ ke̱tunā̍ juṣatāṃ sujyo̱tirjyoti̍ṣā̱ṃ svāhā̱ rātri̱rjyoti̍ḥ ke̱tunā̍ juṣatāṃ sujyo̱tirjyoti̍ṣā̱ṃ svāhetyā̍ha.
ā̱di̱tyame̱va tada̱muṣmi̍m̐llo̱ke'hnā̍ pa̱rastā̎ddādhāra.
rātri̍yā a̱vastā̎t.
tasmā̍da̱sāvā̍di̱tyo̍'muṣmi̍m̐llo̱ke̍'horā̱trābhyā̎ṃ dhṛ̱taḥ..69..
Anuvāka 8
viśvā̱ āśā̍ dakṣiṇa̱sadityā̍ha.
viśvā̍ne̱va de̱vānprī̍ṇāti.
atho̱ duri̍ṣṭyā e̱vaina̍ṃ pāti.
viśvā̎ṃ de̱vāna̍yāḍi̱hetyā̍ha.
viśvā̍ne̱va de̱vānbhā̍ga̱dheye̍na̱ sama̍rdhayati.
svāhā̍kṛtasya gha̱rmasya̱ madho̎ḥ pibatamaśvi̱netyā̍ha.
a̱śvinā̍ve̱va bhā̍ga̱dheye̍na̱ sama̍rdhayati.
svāhā̱'gnaye̍ ya̱jñiyā̍ya̱ śaṃ yaju̍rbhi̱rityā̍ha.
a̱bhye̍vaina̍ṃ ghārayati.
atho̍ ha̱vire̱vāka̍ḥ..70..
aśvi̍nā gha̱rmaṃ pā̍taṃ hārdivā̱namaha̍rdi̱vābhi̍rū̱tibhi̱rityā̍ha.
a̱śvinā̍ve̱va bhā̍ga̱dheye̍na̱ sama̍rdhayati.
anu̍ vā̱ṃ dyāvā̍pṛthi̱vī ma̍ṃsātā̱mityā̱hānu̍matyai.
svāhendrā̍ya̱ svāhendrā̱vaḍityā̍ha.
indrā̍ya̱ hi pu̱ro hū̱yate̎.
ā̱śrāvyā̍ha gha̱rmasya̍ ya̱jeti̍.
vaṣa̍ṭkṛte juhoti.
rakṣa̍sā̱mapa̍hatyai.
anu̍yajati sva̱gākṛ̍tyai.
gha̱rmama̍pātamaśvi̱netyā̍ha..71..
pūrva̍me̱vodi̱tam.
utta̍reṇā̱bhigṛ̍ṇāti.
anu̍ vā̱ṃ dyāvā̍pṛthi̱vī a̍maṃsātā̱mityā̱hānu̍matyai.
taṃ prā̱vya̍ṃ yathā̱vaṇṇamo̍ di̱ve nama̍ḥ pṛthi̱vyā ityā̍ha.
ya̱thā̱ya̱jure̱vaitat.
di̱vidhā̍ i̱maṃ ya̱jñaṃ ya̱jñami̱maṃ di̱vidhā̱ ityā̍ha.
su̱va̱rgame̱vaina̍ṃ lo̱kaṃ ga̍mayati.
diva̍ṃ gacchā̱ntari̍kṣaṃ gaccha pṛthi̱vīṃ ga̱cchetyā̍ha.
e̱ṣve̍vaina̍ṃ lo̱keṣu̱ prati̍ṣṭhāpayati.
pañca̍ pra̱diśo̍ ga̱cchetyā̍ha..72..
di̱kṣve̍vaina̱ṃ prati̍ṣṭhāpayati.
de̱vāngha̍rma̱pānga̍ccha pi̱tṝngha̍rma̱pānga̱cchetyā̍ha.
u̱bhaye̎ṣve̱vaina̱ṃ prati̍ṣṭhāpayati.
yatpinva̍te.
varṣu̍kaḥ pa̱rjanyo̍ bhavati.
tasmā̱tpinva̍māna̱ḥ puṇya̍ḥ.
yatprāṅpinva̍te.
tadde̱vānā̎m.
yadda̍kṣi̱ṇā.
tatpi̍tṛ̱ṇām..73..
yatpra̱tyak.
tanma̍nu̱ṣyā̍ṇām.
yadudaṅṅ̍.
tadru̱drāṇā̎m.
prāñca̱muda̍ñcaṃ pinvayati.
de̱va̱trāka̍ḥ.
atho̱ khalu̍.
sarvā̱ anu̱ diśa̍ḥ pinvayati.
sarvā̱ diśa̱ḥ same̍dhante.
a̱nta̱ḥpa̱ri̱dhi pi̍nvayati..74..
teja̱so'ska̍ndāya.
i̱ṣe pī̍pihyū̱rje pī̍pi̱hītyā̍ha.
iṣa̍me̱vorja̱ṃ yaja̍māne dadhāti.
yaja̍mānāya pīpi̱hītyā̍ha.
yaja̍mānāyai̱vaitāmā̱śiṣa̱mā śā̎ste.
mahya̱ṃ jyaiṣṭhyā̍ya pīpi̱hītyā̍ha.
ā̱tmana̍ e̱vaitāmā̱śiṣa̱mā śā̎ste.
tviṣyai̎ tvā dyu̱mnāya̍ tvendri̱yāya̍ tvā̱ bhūtyai̱ tvetyā̍ha.
ya̱thā̱ya̱jure̱vaitat.
dharmā̍si su̱dharmā me̎ nya̱sme brahmā̍ṇi dhāra̱yetyā̍ha..75..
brahma̍nne̱vaina̱ṃ prati̍ṣṭhāpayati.
nettvā̱ vāta̍ḥ ska̱ndayā̱diti̱ yadya̍bhi̱care̎t.
a̱muṣya̍ tvā prā̱ṇe sā̍dayāmya̱munā̍ sa̱ha ni̍ra̱rthaṃ ga̱ccheti̍ brūyā̱dyaṃ dvi̱ṣyāt.
yame̱va dveṣṭi̍.
tenai̍naṃ sa̱ha ni̍ra̱rthaṃ ga̍mayati.
pū̱ṣṇe śara̍se̱ svāhetyā̍ha.
yā e̱va de̱vatā̍ hu̱tabhā̍gāḥ.
tābhya̍ e̱vaina̍ṃ juhoti.
grāva̍bhya̱ḥ svāhetyā̍ha.
yā e̱vāntari̍kṣe̱ vāca̍ḥ..76..
tābhya̍ e̱vaina̍ṃ juhoti.
pra̱ti̱rebhya̱ḥ svāhetyā̍ha.
prā̱ṇā vai de̱vāḥ pra̍ti̱rāḥ.
tebhya̍ e̱vaina̍ṃ juhoti.
dyāvā̍pṛthi̱vībhyā̱ṃ svāhetyā̍ha.
dyāvā̍pṛthi̱vībhyā̍me̱vaina̍ṃ juhoti.
pi̱tṛbhyo̍ gharma̱pebhya̱ḥ svāhetyā̍ha.
ye vai yajvā̍naḥ.
te pi̱taro̍ gharma̱pāḥ.
tebhya̍ e̱vaina̍ṃ juhoti..77..
ru̱drāya̍ ru̱draho̎tre̱ svāhetyā̍ha.
ru̱drame̱va bhā̍ga̱dheye̍na̱ sama̍rdhayati.
sa̱rvata̱ḥ sama̍nakti.
sa̱rvata̍ e̱va ru̱draṃ ni̱rava̍dayate.
uda̍ñca̱ṃ nira̍syati.
e̱ṣā vai ru̱drasya̱ dik.
svāyā̍me̱va di̱śi ru̱draṃ ni̱rava̍dayate.
a̱pa upa̍spṛśati medhya̱tvāya̍.
nānvī̎kṣeta.
yada̱nvīkṣe̍ta..78..
cakṣu̍rasya pra̱māyu̍kaṃ syāt.
tasmā̱nnānvīkṣya̍ḥ.
apī̍paro̱ mā'hno̱ rātri̍yai mā pāhye̱ṣā te̍ agne sa̱mittayā̱ sami̍dhya̱svāyu̍rme dā̱ varca̍sā mā''ñjī̱rityā̍ha.
āyu̍re̱vāsmi̱nvarco̍ dadhāti.
apī̍paro mā̱ rātri̍yā̱ ahno̍ mā pāhye̱ṣā te̍ agne sa̱mittayā̱ sami̍dhya̱svā''yu̍rme dā̱ varca̍sā mā''ñjī̱rityā̍ha.
āyu̍re̱vāsmi̱nvarco̍ dadhāti.
a̱gnirjyoti̱rjyoti̍ra̱gniḥ svāhā̱ sūryo̱ jyoti̱rjyoti̱ḥ sūrya̱ḥ svāhetyā̍ha.
ya̱thā̱ya̱jure̱vaitat.
bra̱hma̱vā̱dino̍ vadanti.
ho̱ta̱vya̍magniho̱trā(3)nna ho̍ta̱vyā(3)miti̍..79..
yadyaju̍ṣā juhu̱yāt.
aya̍thāpūrva̱māhu̍tī juhuyāt.
yanna ju̍hu̱yāt.
a̱gniḥ parā̍bhavet.
bhūḥ svāhetye̱va ho̍ta̱vyam̎.
ya̱thā̱pū̱rvamāhu̍tī ju̱hoti̍.
nāgniḥ parā̍bhavati.
hu̱taṃ ha̱virmadhu̍ ha̱virityā̍ha.
sva̱daya̍tye̱vainam̎.
indra̍tame̱'gnāvityā̍ha..80..
prā̱ṇo vā indra̍tamo̱'gniḥ.
prā̱ṇa e̱vaina̱mindra̍tame̱'gnau ju̍hoti.
pi̱tā no̍'si̱ mā mā̍ hiṃsī̱rityā̱hāhi̍ṃsāyai.
a̱śyāma̍ te deva gharma̱ madhu̍mato̱ vāja̍vataḥ pitu̱mata̱ ityā̍ha.
ā̱śiṣa̍me̱vaitāmā śā̎ste.
sva̱dhā̱vino̍'śī̱mahi̍ tvā̱ mā mā̍ hiṃsī̱rityā̱hāhi̍ṃsāyai.
teja̍sā̱ vā e̱te vyṛ̍dhyante.
ye pra̍va̱rgye̍ṇa̱ cara̍nti.
prāśña̍nti.
teja̍ e̱vā''tmanda̍dhate..81..
sa̱ṃva̱thsa̱raṃ na mā̱ṃsama̍śñīyāt.
na rā̱māmupe̍yāt.
na mṛ̱nmaye̍na pibet.
nāsya̍ rā̱ma ucchi̍ṣṭaṃ pibet.
teja e̱va tathsaṃśya̍ti.
de̱vā̱su̱rāḥ saṃya̍ttā āsan.
te de̱vā vi̍ja̱yamu̍pa̱yanta̍ḥ.
vi̱bhrāji̍ sau̱rye brahma̱sannya̍dadhata.
yatkiṃ ca̍ divākī̱rtyam̎.
tade̱tenai̱va vra̱tenā̍gopāyat.
tasmā̍de̱tadvra̱taṃ cā̱ryam̎.
teja̍so gopī̱thāya̍.
tasmā̍de̱tāni̱ yajū̍ṃṣi vi̱bhrāja̍ḥ sau̱ryasyetyā̍huḥ.
svāhā̎ tvā̱ sūrya̍sya ra̱śmibhya̱ iti̍ prā̱taḥ saṃsā̍dayati.
svāhā̎ tvā̱ nakṣa̍trebhya̱ iti̍ sā̱yam.
e̱tā vā e̱tasya̍ de̱vatā̎ḥ.
tābhi̍re̱vaina̱ṃ sama̍rdhayati..82..
Anuvāka 9
gharma̱ yā te̍ di̱vi śugiti̍ ti̱sra āhu̍tīrjuhoti.
chando̍bhire̱vāsyai̱bhyo lo̱kebhya̱ḥ śuca̱mava̍ yajate.
iya̱tyagre̍ juhoti.
atheya̱tyatheya̍ti.
traya̍ i̱me lo̱kāḥ.
anu̍ no̱'dyānu̍mati̱rityā̱hānu̍matyai.
di̱vastvā̍ para̱spāyā̱ ityā̍ha.
di̱va e̱vemām̐llo̱kāndā̍dhāra.
brahma̍ṇastvā para̱spāyā̱ ityā̍ha..83..
e̱ṣve̍va lo̱keṣu̍ pra̱jā dā̍dhāra.
prā̱ṇasya̍ tvā para̱spāyā̱ ityā̍ha.
pra̱jāsve̱va prā̱ṇāndā̍dhāra.
śiro̱ vā e̱tadya̱jñasya̍.
yatpra̍va̱rgya̍ḥ.
a̱sau khalu̱ vā ā̍di̱tyaḥ pra̍va̱rgya̍ḥ.
taṃ yadda̍kṣi̱ṇā pra̱tyañca̱muda̍ñcamudvā̱saye̎t.
ji̱hmaṃ ya̱jñasya̱ śiro̍ haret.
prāñca̱mudvā̍sayati.
pu̱rastā̍de̱va ya̱jñasya̱ śira̱ḥ prati̍dadhāti..84..
prāñca̱mudvā̍sayati.
tasmā̍da̱sāvā̍di̱tyaḥ pu̱rastā̱dude̍ti.
śa̱pho̱pa̱ya̱māndha̱vitrā̍ṇi̱ dhṛṣṭī̱ itya̱nvava̍haranti.
sātmā̍name̱vaina̱ṃ sata̍nuṃ karoti.
sātmā̱'muṣmi̍m̐llo̱ke bha̍vati.
ya e̱vaṃ veda̍.
audu̍mbarāṇi bhavanti.
ūrgvā u̍du̱mbara̍ḥ.
ūrja̍me̱vāva̍rundhe.
vartma̍nā̱ vā a̱nvitya̍..85..
ya̱jñaṃ rakṣā̍ṃsi jighāṃsanti.
sāmnā̎ prasto̱tā'nvavai̍ti.
sāma̱ vai ra̍kṣo̱hā.
rakṣa̍sā̱mapa̍hatyai.
trirni̱dhana̱mupai̍ti.
traya̍ i̱me lo̱kāḥ.
e̱bhya e̱va lo̱kebhyo̱ rakṣā̱ṃsyapa̍hanti.
puru̍ṣaḥ puruṣo ni̱dhana̱mupai̍ti.
puru̍ṣaḥ puruṣo̱ hi ra̍kṣa̱svī.
rakṣa̍sā̱mapa̍hatyai..86..
yatpṛ̍thi̱vyāmu̍dvā̱saye̎t.
pṛ̱thi̱vīṃ śu̱cā'rpa̍yet.
yada̱phsu.
a̱paḥ śu̱cā'rpa̍yet.
yadoṣa̍dhīṣu.
oṣa̍dhīḥ śu̱cā'rpa̍yet.
yadvana̱spati̍ṣu.
vana̱spatī̎ñchu̱cā'rpa̍yet.
hira̍ṇyaṃ ni̱dhāyodvā̍sayati.
a̱mṛta̱ṃ vai hira̍ṇyam..87..
a̱mṛta̍ e̱vaina̱ṃ prati̍ṣṭhāpayati.
va̱lgura̍si śa̱ṃ yudhā̍yā̱ iti̱ triḥ pa̍riṣi̱ñcanparye̍ti.
tri̱vṛdvā a̱gniḥ.
yāvā̍ne̱vāgniḥ.
tasya̱ śuca̍ṃ śamayati.
triḥ puna̱ḥ parye̍ti.
ṣaṭthsaṃ pa̍dyante.
ṣaḍvā ṛ̱tava̍ḥ.
ṛ̱tubhi̍re̱vāsya̱ śuca̍ṃ śamayati.
catu̍ḥ srakti̱rnābhi̍rṛ̱tasyetyā̍ha..88..
i̱yaṃ vā ṛ̱tam.
tasyā̍ e̱ṣa e̱va nābhi̍ḥ.
yatpra̍va̱rgya̍ḥ.
tasmā̍de̱vamā̍ha.
sado̍ vi̱śvāyu̱rityā̍ha.
sado̱ hīyam.
apa̱ dveṣo̱ apa̱ hvara̱ ityā̍ha̱ bhrātṛ̍vyāpanuttyai.
gharmai̱tatte'nna̍me̱tatpurī̍ṣa̱miti̍ da̱dhnā ma̍dhumi̱śreṇa̍ pūrayati.
ūrgvā a̱nnādya̱ṃ dadhi̍.
ū̱rjaivaina̍ma̱nnādye̍na̱ sama̍rdhayati..89..
ana̍śanāyuko bhavati.
ya e̱vaṃ veda̍.
ranti̱rnāmā̍si di̱vyo ga̍ndha̱rva ityā̍ha.
rū̱pame̱vāsyai̱tanma̍hi̱māna̱ṃ ranti̍ṃ ba̱ndhutā̱ṃ vyāca̍ṣṭe.
sama̱hamāyu̍ṣā̱ saṃ prā̱ṇenetyā̍ha.
ā̱śiṣa̍me̱vaitāmā śā̎ste.
vya̍sau yo̎'smāndveṣṭi̱ yaṃ ca̍ va̱yaṃ dvi̱ṣma ityā̍ha.
a̱bhi̱cā̱ra e̱vāsyai̱ṣaḥ.
aci̍krada̱dvṛṣā̱ hari̱rityā̍ha.
vṛṣā̱ hye̍ṣaḥ..90..
vṛṣā̱ hari̍ḥ.
ma̱hānmi̱tro na da̍rśa̱ta ityā̍ha.
stautye̱vaina̍me̱tat.
cida̍si samu̱drayo̍ni̱rityā̍ha.
svāme̱vaina̱ṃ yoni̍ṃ gamayati.
nama̍ste astu̱ mā mā̍ hiṃsī̱rityā̱hāhi̍ṃsāyai.
vi̱śvāva̍suṃ soma gandha̱rvamityā̍ha.
yade̱vāsya̍ kri̱yamā̍ṇasyānta̱ryanti̍.
tade̱vāsyai̱tenā pyā̍yayati.
vi̱śvāva̍sura̱bhi tanno̍ gṛṇā̱tvityā̍ha..91..
pūrva̍me̱vodi̱tam.
utta̍reṇā̱bhi gṛ̍ṇāti.
dhiyo̍ hinvā̱no dhiya̱ inno̍ avyā̱dityā̍ha.
ṛ̱tūne̱vāsmai̍ kalpayati.
prā''sā̎ṃ gandha̱rvo a̱mṛtā̍ni voca̱dityā̍ha.
prā̱ṇā vā a̱mṛtā̎ḥ.
prā̱ṇāne̱vāsmai̍ kalpayati.
e̱tattvaṃ de̍va gharma de̱vo de̱vānupā̍gā̱ ityā̍ha.
de̱vo hye̍ṣa saṃ de̱vānu̱paiti̍.
i̱dama̱haṃ ma̍nu̱ṣyo̍ manu̱ṣyā̍nityā̍ha..92..
ma̱nu̱ṣyo̍ hi.
e̱ṣa sanma̍nu̱ṣyā̍nu̱paiti̍.
ī̱śva̱ro vai pra̍va̱rgya̍mudvā̱sayan̍.
pra̱jāṃ pa̱śūnthso̍mapī̱thama̍nū̱dvāsa̱ḥ soma̍ pī̱thānu̱mehi̍.
sa̱ha pra̱jayā̍ sa̱ha rā̱yaspoṣe̱ṇetyā̍ha.
pra̱jāme̱va pa̱śūnthso̍mapī̱thamā̱tmandha̍tte.
su̱mi̱trā na̱ āpa̱ oṣa̍dhayaḥ sa̱ntvityā̍ha.
ā̱śiṣa̍me̱vaitāmā śā̎ste.
du̱rmi̱trāstasmai̍ bhūyāsu̱ryo̎'smāndveṣṭi̱ yaṃ ca̍ va̱yaṃ dvi̱ṣma ityā̍ha.
a̱bhi̱cā̱ra e̱vāsyai̱ṣaḥ.
pra vā e̱ṣo̎'smāllo̱kāccya̍vate.
yaḥ pra̍va̱rgya̍mudvā̱sayati̍.
udu̱tyaṃ ci̱tramiti̍ sau̱rībhyā̍mṛ̱gbhyāṃ puna̱retya̱ gārha̍patye juhoti.
a̱yaṃ vai lo̱ko gārha̍patyaḥ.
a̱sminne̱va lo̱ke prati̍tiṣṭhati.
a̱sau khalu̱ vā ā̍di̱tyaḥ su̍va̱rgo lo̱kaḥ.
yathsau̱rī bhava̍taḥ.
tenai̱va su̍va̱rgāllo̱kānnaiti̍..93..
Anuvāka 10
pra̱jāpa̍ti̱ṃ vai de̱vāḥ śu̱kraṃ payo̍'duhran.
tade̎bhyo̱ na vya̍bhavat.
tada̱gnirvya̍karot.
tāni̱ śukri̍yāṇi̱ sāmā̎nyabhavan.
teṣā̱ṃ yo raso̱'tyakṣa̍rat.
tāni̍ śukraya̱jūṃṣya̍bhavan.
śukri̍yāṇā̱ṃ vā e̱tāni̱ śukri̍yāṇi.
sā̱ma̱pa̱ya̱saṃ vā e̱tayo̍ra̱nyat.
de̱vānā̍ma̱nyatpaya̍ḥ.
yadgoḥ paya̍ḥ..94..
tathsāmna̱ḥ paya̍ḥ.
yada̱jāyai̱ paya̍ḥ.
tadde̱vānā̱ṃ paya̍ḥ.
tasmā̱dyatrai̱tairyaju̍rbhi̱ścara̍nti.
tatpaya̍sā caranti.
pra̱jāpa̍time̱va tatpaya̍sā̱'nnādye̍na̱ sama̍rdhayanti.
e̱ṣa ha tvai sā̱kṣātpra̍va̱rgya̍ṃ bhakṣayati.
yasyai̱vaṃ vi̱duṣa̍ḥ prava̱rgya̍ḥ pravṛ̱jyate̎.
u̱tta̱ra̱ve̱dyāmudvā̍saye̱tteja̍skāmasya.
tejo̱ vā u̍ttarave̱diḥ..95..
teja̍ḥ prava̱rgya̍ḥ.
teja̍sai̱va teja̱ḥ sama̍rdhayati.
u̱tta̱ra̱ve̱dyāmudvā̍saye̱danna̍kāmasya.
śiro̱ vā e̱tadya̱jñasya̍.
yatpra̍va̱rgya̍ḥ.
mukha̍muttarave̱diḥ.
śī̱rṣṇaiva mukha̱ṃ sanda̍dhātya̱nnādyā̍ya.
a̱nnā̱da e̱va bha̍vati.
yatra̱ khalu̱ vā e̱tamudvā̍sita̱ṃ vayā̍ṃsi pa̱ryāsa̍te.
pari̱ vai tāṃ samā̎ṃ pra̱jā vayā̍ṃsyāsate..96..
tasmā̍duttarave̱dyāme̱vodvā̍sayet.
pra̱jānā̎ṃ gopī̱thāya̍.
pu̱ro vā̍ pa̱ścādvodvā̍sayet.
pu̱rastā̱dvā e̱tajjyoti̱rude̍ti.
tatpa̱ścānnimro̍cati.
svāme̱vaina̱ṃ yoni̱manūdvā̍sayati.
a̱pāṃ madhya̱ udvā̍sayet.
a̱pāṃ vā e̱tanmadhyā̱jjyoti̍rajāyata.
jyoti̍ḥ prava̱rgya̍ḥ.
svayai̱vaina̱ṃ yonau̱ prati̍ṣṭhāpayati..97..
yaṃ dvi̱ṣyāt.
yatra̱ sa syāt.
tasyā̎ṃ di̱śyudvā̍sayet.
e̱ṣa vā a̱gnirvai̎śvāna̱raḥ.
yatpra̍va̱rgya̍ḥ.
a̱gninai̱vaina̍ṃ vaiśvāna̱reṇā̱bhi prava̍rtayati.
audu̍mbaryā̱ṃ śākhā̍yā̱mudvā̍sayet.
ūrgvā u̍du̱mbara̍ḥ.
anna̍ṃ prā̱ṇaḥ.
śuggha̱rmaḥ..98..
i̱dama̱hama̱muṣyā̍muṣyāya̱ṇasya̍ śu̱cā prā̱ṇamapi̍ dahā̱mītyā̍ha.
śu̱caivāsya̍ prā̱ṇamapi̍ dahati.
tā̱jagārti̱mārccha̍ti.
yatra̍ da̱rbhā u̍pa̱dīka̍santatā̱ḥ syuḥ.
tadudvā̍saye̱dvṛṣṭi̍kāmasya.
e̱tā vā a̱pāma̍nū̱jjhāva̍ryo̱ nāma̍.
yadda̱rbhāḥ.
a̱sau khalu̱ vā ā̍di̱tya i̱to vṛṣṭi̱mudī̍rayati.
a̱sāve̱vāsmā̍ ādi̱tyo vṛṣṭi̱ṃ niya̍cchati.
tā āpo̱ niya̍tā̱ dhanva̍nā yanti..99..
Anuvāka 11
pra̱jāpa̍tiḥ sambhri̱yamā̍ṇaḥ.
sa̱mrāṭthsambhṛ̍taḥ.
gha̱rmaḥ pravṛ̍ktaḥ.
ma̱hā̱vī̱ra udvā̍sitaḥ.
a̱sau khalu̱ vāvaiṣa ā̍di̱tyaḥ.
yatpra̍va̱rgya̍ḥ.
sa e̱tāni̱ nāmā̎nyakuruta.
ya e̱vaṃ veda̍.
vi̱dure̍na̱ṃ nāmnā̎.
bra̱hma̱vā̱dino̍ vadanti..100..
yo vai vasī̍yāṃsaṃ yathānā̱mamu̍pa̱cara̍ti.
puṇyā̎rti̱ṃ vai sa tasmai̍ kāmayate.
puṇyā̎rtimasmai kāmayante.
ya e̱vaṃ veda̍.
tasmā̍de̱vaṃ vi̱dvān.
gha̱rma iti̱ divā''ca̍kṣīta.
sa̱mrāḍiti̱ naktam̎.
e̱te vā e̱tasya̍ pri̱ye ta̱nuvau̎.
e̱te a̍sya pri̱ye nāma̍nī.
pri̱yayai̱vaina̍ṃ ta̱nuvā̎..101..
pri̱yeṇa̱ nāmnā̱ sama̍rdhayati.
kī̱rtira̍sya̱ pūrvāga̍cchati ja̱natā̍māya̱taḥ.
gā̱ya̱trī de̱vebhyo'pā̎krāmat.
tāṃ de̱vāḥ pra̍va̱rgye̍ṇai̱vānu̱ vya̍bhavan.
pra̱va̱rgye̍ṇā''pnuvan.
yacca̍turviṃśati̱kṛtva̍ḥ prava̱rgya̍ṃ pravṛ̱ṇakti̍.
gā̱ya̱trīme̱va tadanu̱ vibha̍vati.
gā̱ya̱trīmā̎pnoti.
pūrvā̎'sya̱ jana̍ṃ ya̱taḥ kī̱rtirga̍cchati.
vai̱śva̱de̱vaḥ saṃsa̍nnaḥ..102..
vasa̍va̱ḥ pravṛ̍ktaḥ.
somo̍'bhikī̱ryamā̍ṇaḥ.
ā̱śvi̱naḥ paya̍syānī̱yamā̍ne.
mā̱ru̱taḥ kvathan̍.
pau̱ṣṇa uda̍ntaḥ.
sā̱ra̱sva̱to vi̱ṣyanda̍mānaḥ.
mai̱traḥ śaro̍ gṛhī̱taḥ.
teja̱ udya̍taḥ.
vā̱yurhri̱yamā̍ṇaḥ.
pra̱jāpa̍tirhū̱yamā̍no̱ vāgghu̱taḥ..103..
a̱sau khalu̱ vāvaiṣa ā̍di̱tyaḥ.
yatpra̍va̱rgya̍ḥ.
sa e̱tāni̱ nāmā̎nyakuruta.
ya e̱vaṃ veda̍.
vi̱dure̍na̱ṃ nāmnā̎.
bra̱hma̱vā̱dino̍ vadanti.
yanmṛ̱nmaya̱māhu̍ti̱ṃ nāśñu̱te'tha̍.
kasmā̍de̱ṣo̎'śñuta̱ iti̍.
vāge̱ṣa iti̍ brūyāt.
vā̱cye̍va vāca̍ṃ dadhāti..104..
tasmā̍daśñute.
pra̱jāpa̍ti̱rvā e̱ṣa dvā̍daśa̱dhā vihi̍taḥ.
yatpra̍va̱rgya̍ḥ.
yatprāga̍vakā̱śebhya̍ḥ.
tena̍ pra̱jā a̍sṛjata.
a̱va̱kā̱śairde̍vāsu̱rāna̍sṛjata.
yadū̱rdhvama̍vakā̱śebhya̍ḥ.
tenānna̍masṛjata.
anna̍ṃ pra̱jāpa̍tiḥ.
pra̱jāpa̍ti̱rvāvaiṣaḥ..105..
Anuvāka 12
sa̱vi̱tā bhū̱tvā pra̍tha̱me'ha̱npravṛ̍jyate.
tena̱ kāmā̍ṃ eti.
yaddvi̱tīye'ha̍npravṛ̱jyate̎.
a̱gnirbhū̱tvā de̱vāne̍ti.
yattṛ̱tīye'ha̍npravṛ̱jyate̎.
vā̱yurbhū̱tvā prā̱ṇāne̍ti.
yacca̍tu̱rthe'ha̍npravṛ̱jyate̎.
ā̱di̱tyo bhū̱tvā ra̱śmīne̍ti.
yatpa̍ñca̱me'ha̍npravṛ̱jyate̎.
ca̱ndramā̍ bhū̱tvā nakṣa̍trāṇyeti..106..
yatṣa̱ṣṭhe'ha̍npravṛ̱jyate̎.
ṛ̱turbhū̱tvā sa̍ṃvathsa̱rame̍ti.
yathsa̍pta̱me'ha̍npravṛ̱jyate̎.
dhā̱tā bhū̱tvā śakva̍rīmeti.
yada̍ṣṭa̱me'ha̍npravṛ̱jyate̎.
bṛha̱spati̍rbhū̱tvā gā̍ya̱trīme̍ti.
yanna̍va̱me'ha̍npravṛ̱jyate̎.
mi̱tro bhū̱tvā tri̱vṛta̍ i̱mām̐llo̱kāne̍ti.
yadda̍śa̱me'ha̍npravṛ̱jyate̎.
varu̍ṇo bhū̱tvā vi̱rāja̍meti..107..
yade̍kāda̱śe'ha̍npravṛ̱jyate̎.
indro̍ bhū̱tvā tri̱ṣṭubha̍meti.
yaddvā̍da̱śe'ha̍npravṛ̱jyate̎.
somo̍ bhū̱tvā su̱tyāme̍ti.
yatpu̱rastā̍dupa̱sadā̎ṃ pravṛ̱jyate̎.
tasmā̍di̱taḥ parā̍ṅa̱mūm̐llo̱kāṃstapa̍nneti.
yadu̱pari̍ṣṭādupa̱sadā̎ṃ pravṛ̱jyate̎.
tasmā̍da̱muto̱'rvāṅi̱mām̐llo̱kāṃstapa̍nneti.
ya e̱vaṃ veda̍.
aiva ta̍pati..108..
oṃ śaṃ na̱stanno̱ mā hā̍sīt.. oṃ śānti̱ḥ śānti̱ḥ śānti̍ḥ..