Anuvāka 1
oṃ namo̱ brahma̍ṇe̱ namo̍ astva̱gnaye̱ nama̍ḥ pṛthi̱vyai nama̱ oṣa̍dhībhyaḥ.
namo̍ vā̱ce namo̍ vā̱caspata̍ye̱ namo̱ viṣṇa̍ve bṛha̱te ka̍romi..
oṃ śānti̱ḥ śānti̱ḥ śānti̍ḥ..
saha̱ vai de̱vānā̱ṃ cāsu̍rāṇāṃ ca ya̱jñau prata̍tāvāstāṃ va̱yaṃ sva̱rgaṃ lo̱kame̎ṣyāmo va̱yame̎ṣyāma̱ iti̱ te'su̍rāḥ sa̱nnahya̱ saha̍sai̱vāca̍ran brahma̱carye̍ṇa̱ tapa̍saiva de̱vāste'su̍rā amuhya̱ṃste na prājā̍na̱ṃste parā̍'bhava̱nte na sva̱rgaṃ lo̱kamā̍ya̱n prasṛ̍tena̱ vai ya̱jñena̍ de̱vāḥ sva̱rgaṃ lo̱kamā̍ya̱nna prasṛ̍te̱nāsu̍rā̱n parā̍bhāvaya̱n prasṛ̍to ha̱ vai ya̍jñopavī̱tino̍ ya̱jño'pra̍sṛ̱to'nu̍pavī̱tino̱ yatkiṃ ca̍ brāhma̱ṇo ya̍jñopavī̱tyadhī̍te̱ yaja̍ta e̱va tattasmā̎dyajñopavī̱tye̍vādhī̍yīta yā̱jaye̱dyaje̍ta vā ya̱jñasya̱ prasṛ̍tyā̱ aji̍na̱ṃ vāso̍ vā dakṣiṇa̱ta u̍pa̱vīya̱ dakṣi̍ṇaṃ bā̱humuddha̍ra̱te'va̍ dhatte sa̱vyamiti̍ yajñopavī̱tame̱tade̱va vipa̍rītaṃ prācīnāvī̱taṃ sa̱ṃvīta̍ṃ mānu̱ṣam..1..
Anuvāka 2
rakṣā̍ṃsi̱ ha vā̍ puro'nuvā̱ke tapogra̍matiṣṭhanta̱ tān pra̱jāpa̍tirva̱reṇo̱pāma̍ntrayata̱ tāni̱ vara̍mavṛṇītā''di̱tyo no̱ yoddhā̱ iti̱ tān pra̱jāpa̍tirabravī̱dyodha̍ya̱dhvamiti̱ tasmā̱dutti̍ṣṭhanta̱ṃ ha vā̱ tāni̱ rakṣā̍ṃsyādi̱tyaṃ yodha̍yanti̱ yāva̍dasta̱manva̍gā̱ttāni̍ ha̱ vā e̱tāni̱ rakṣā̍ṃsi gāyatri̱yā'bhi̍mantrite̱nāmbha̍sā śāmyanti̱ tadu̍ ha̱ vā e̱te bra̍hmavā̱dina̍ḥ pū̱rvābhi̍mu̱khāḥ sa̱ndhyāyā̎ṃ gāyatri̱yā'bhi̍mantritā̱ āpa̍ ū̱rdhvaṃ vikṣi̍panti̱ tā e̱tā āpo̍ va̱jrībhū̱tvā tāni̱ rakṣā̍ṃsi ma̱ndehāru̍ṇe dvī̱pe prakṣi̍panti̱ yatpra̍dakṣi̱ṇaṃ prakra̍manti̱ tena̍ pā̱pmāna̱mava̍dhūnvantyu̱dyanta̍masta̱ṃ yanta̍m ādi̱tyama̍bhidhyā̱yan ku̱rvan brā̎hma̱ṇo vi̱dvānthsa̱kala̍ṃ bha̱drama̍śnute̱'sāvā̍di̱tyo bra̱hmeti̱ brahmai̱va san brahmā̱pyeti̱ ya e̱vaṃ veda̍..2..
Anuvāka 3
yadde̍vā deva̱hel̤a̍na̱ṃ devā̍saścakṛ̱mā va̱yam.
ādi̍tyā̱stasmā̎nmā muñcata̱rtasya̱rtena̱ māmi̱ta.
devā̍ jīvanakā̱myā yadvā̱cā'nṛ̍tamūdi̱ma.
tasmā̎nna i̱ha mu̍ñcata̱ viśve̍ devāḥ sa̱joṣa̍saḥ.
ṛ̱tena̍ dyāvāpṛthivī ṛ̱tena̱ tvaṃ sa̍rasvati.
kṛ̱tānna̍ḥ pā̱hyena̍so̱ yatkiṃ cānṛ̍tamūdi̱ma.
i̱ndrā̱gnī mi̱trāvaru̍ṇau̱ somo̍ dhā̱tā bṛha̱spati̍ḥ.
te no̍ muñca̱ntvena̍so̱ yada̱nyakṛ̍tamāri̱ma.
sa̱jā̱ta̱śa̱ṃsādu̱ta jā̍miśa̱ṃsājjyāya̍sa̱ḥ śaṃsā̍du̱ta vā̱ kanī̍yasaḥ.
anā̍dhṛṣṭaṃ de̱vakṛ̍ta̱ṃ yadena̱stasmā̱t tvama̱smāñjā̍tavedo mumugdhi..3..
yadvā̱cā yanmana̍sā bā̱hubhyā̍mū̱rubhyā̍maṣṭhī̱vadbhyā̍ṃ śi̱śnairyadanṛ̍taṃ cakṛ̱mā va̱yam.
a̱gnirmā̱ tasmā̱dena̍so̱ gārha̍patya̱ḥ pramu̍ñcatu cakṛ̱ma yāni̍ duṣkṛ̱tā.
yena̍ tri̱to a̍rṇa̱vānni̍rba̱bhūva̱ yena̱ sūrya̱ṃ tama̍so nirmu̱moca̍.
yenendro̱ viśvā̱ aja̍hā̱darā̍tī̱stenā̱haṃ jyoti̍ṣā̱ jyoti̍rānaśā̱na ā̎kṣi.
yatkusī̍da̱mapra̍tītta̱ṃ maye̱ha yena̍ ya̱masya̍ ni̱dhinā̱ carā̍mi.
e̱tattada̍gne anṛ̱ṇo bha̍vāmi̱ jīva̍nne̱va prati̱ tatte̍ dadhāmi.
yanmayi̍ mā̱tā yadā̍ pi̱peṣa̱ yada̱ntari̍kṣa̱ṃ yadā̱śasāti̍krāmāmi tri̱te de̱vā di̱vi jā̱tā yadāpa̍ i̱maṃ me̍ varuṇa̱ tattvā̍ yāmi̱ tvaṃ no̍ agne̱ sa tvaṃ no̍ agne̱ tvama̍gne a̱yāsi̍..4..
Anuvāka 4
yadadī̎vyannṛ̱ṇama̱haṃ ba̱bhūvādi̍thsanvā sañja̱gara̱ jane̎bhyaḥ.
अ॒ग्निर्मा॒ तस्मा॒दिन्द्र॑श्च संविदा॒नौ प्रमु॑ञ्चताम्।
यद्धस्ता᳚भ्यां च॒कर॒ किल्बि॑षाण्य॒क्षाणां᳚ व॒ग्नुमु॑प॒जिघ्न॑मानः।
उ॒ग्रं॒ प॒श्या च॑ राष्ट्र॒भृच्च॒ तान्य॑फ्स॒रसा॒वनु॑दत्तामृ॒णानि॑।
उग्रं॑ पश्ये॒ राष्ट्र॑भृ॒त्किल्बि॑षाणि॒ यद॒क्षवृ॑त्त॒मनु॑दत्तमे॒तत्।
नेन्न॑ ऋ॒णानृ॒णव॒ इथ्स॑मानो य॒मस्य॑ लो॒के अधि॑रज्जु॒राय॑।
अव॑ ते॒ हेळ॒ उदु॑त्त॒ममि॒मं मे॑ वरुण॒ तत्त्वा॑ यामि॒ त्वं नो॑ अग्ने॒ स त्वं नो अग्ने।
सङ्कु॑सुको॒ विकु॑सुको निर्ऋ॒थो यश्च॑ निस्व॒नः।
तेऽ(१"E009)स्मद्यक्ष्म॒मना॑गसो दू॒राद्दू॒रम॑चीचतम्।
निर्य॑क्ष्ममचीचते कृ॒त्यां निर्ऋ॑तिं च।
तेन॒ योऽ(१"E009)स्मथ्समृ॑च्छातै॒ तम॑स्मै॒ प्रसु॑वामसि।
दुः॒श॒ꣳ॒सा॒नु॒श॒ꣳ॒साभ्यां᳚ घ॒णेना॑नुघ॒णेन॑ च।
तेना॒न्योऽ(१"E009)स्मथ्समृ॑च्छातै॒ तम॑स्मै॒ प्रसु॑वामसि।
सं वर्च॑सा॒ पय॑सा॒ सन्त॒नूभि॒रग॑न्महि॒ मन॑सा॒ सꣳ शि॒वेन॑।
त्वष्टा॑ नो॒ अत्र॒ विद॑धातु रा॒योऽनु॑मार्ष्टु त॒न्वो(१"E009) यद्विलि॑ष्टम्॥५॥
Anuvāka 5
आयु॑ष्टे वि॒श्वतो॑ दधद॒यम॒ग्निर्वरे᳚ण्यः।
पुन॑स्ते प्रा॒ण आया॑ति॒ परा॒यक्ष्मꣳ॑ सुवामि ते।
आ॒यु॒र्दा अ॑ग्ने ह॒विषो॑ जुषा॒णो घृ॒तप्र॑तीको घृ॒तयो॑निरेधि।
घृ॒तं पी॒त्वा मधु॒ चारु॒ गव्यं॑ पि॒तेव॑ पु॒त्रम॒भिर॑क्षतादि॒मम्।
इ॒मम॑ग्न॒ आयु॑षे॒ वर्च॑से कृधि ति॒ग्ममोजो॑ वरुण॒ सꣳशि॑शाधि।
मा॒तेवा᳚स्मा अदिते॒ शर्म॑ यच्छ॒ विश्वे॑ देवा॒ जर॑दष्टि॒र्यथाऽस॑त्।
अग्न॒ आयूꣳ॑षि पवस॒ आ सु॒वोर्ज॒मिषं॑ च नः।
आ॒रे बा॑धस्व दु॒च्छुना᳚म्।
अग्ने॒ पव॑स्व॒ स्वपा॑ अ॒स्मे वर्चः॑ सु॒वीर्यम्᳚।
दध॑द्र॒यिं मयि॒ पोषम्᳚॥६॥
अ॒ग्निर्ऋषिः॒ पव॑मानः॒ पाञ्च॑जन्यः पु॒रोहि॑तः।
तमी॑महे महाग॒यम्।
अग्ने॑ जा॒तान्प्रणु॑दा नः स॒पत्ना॒न्प्रत्यजा॑ताञ्जातवेदो नुदस्व।
अ॒स्मे दी॑दिहि सु॒मना॒ अहे॑ळ॒ञ्छर्म॑न्ते स्याम त्रि॒वरू॑थ उ॒द्भौ।
सह॑सा जा॒तान्प्रणु॑दा नः स॒पत्ना॒न्प्रत्यजा॑ताञ्जातवेदो नुदस्व।
अधि॑ नो ब्रूहि सुमन॒स्यमा॑नो व॒यꣴ स्या॑म॒ प्रणु॑दा नः स॒पत्नान्॑।
अग्ने॒ यो नो॒ऽभितो॒ जनो॒ वृको॒ वारो॒ जिघाꣳ॑सति।
ताꣴस्त्वं वृ॑त्रहं जहि॒ वस्व॒स्मभ्य॒माभ॑र।
अग्ने॒ यो नो॑ऽभि॒दास॑ति समा॒नो यश्च॒ निष्ट्यः॑।
तं व॒यꣳ स॒मिधं॑ कृ॒त्वा तुभ्य॑म॒ग्नेऽपि॑ दध्मसि॥७॥
यो नः॒ शपा॒दश॑पतो॒ यश्च॑ नः॒ शप॑तः॒ शपा᳚त्।
उ॒षाश्च॒ तस्मै॑ नि॒म्रुक्च॒ सर्वं॑ पा॒पꣳ समू॑हताम्।
यो नः॑ स॒पत्नो॒ यो रणो॒ मर्तो॑ऽभि॒दास॑ति देवाः।
इ॒ध्मस्ये॑व प्र॒क्षाय॑तो॒ मा तस्योच्छे॑षि॒ किं च॒न।
यो मां द्वेष्टि॑ जातवेदो॒ यं चा॒हं द्वेष्मि॒ यश्च॒ माम्।
सर्वा॒ꣴ॒स्तान॑ग्ने॒ सन्द॑ह॒ याꣴश्चा॒हं द्वेष्मि॒ ये च॒ माम्।
यो अ॒स्मभ्य॑मराती॒याद्यश्च॑ नो॒ द्वेष॑ते॒ जनः॑।
निन्दा॒द्यो अ॒स्मान्दिफ्सा᳚च्च॒ सर्वा॒ꣴ॒स्तान्म॑ष्म॒षा कु॑रु।
सꣳशि॑तं मे॒ ब्रह्म॒ सꣳशि॑तं वी॒र्या(१"E009)म्बलम्᳚।
सꣳशि॑तं क्ष॒त्रं मे॑ जि॒ष्णु यस्या॒हमस्मि॑ पु॒रोहि॑तः।
उदे॑षां बा॒हू अ॑तिर॒मुद्वर्चो॒ अथो॒ बलम्᳚।
क्षि॒णोमि॒ ब्रह्म॑णा॒ऽमित्रा॒नुन्न॑यामि॒ स्वा(१)म् अ॒हम्।
पुन॒र्मनः॒ पुन॒रायु॑र्म॒ आगा॒त्पुन॒श्चक्षुः॒ पुनः॒ श्रोत्रं॑ म॒ आगा॒त्पुनः॑ प्रा॒णः पुन॒राकू॑तं म॒ आगा॒त्पुन॑श्चि॒त्तं पुन॒राधी॑तं म॒ आगा᳚त्।
वै॒श्वा॒न॒रो मेऽद॑ब्धस्तनू॒पा अव॑बाधतां दुरि॒तानि॒ विश्वा᳚॥८॥
Anuvāka 6
वै॒श्वा॒न॒राय॒ प्रति॑वेदयामो॒ यदी॑नृ॒णꣳ स॑ङ्ग॒रो दे॒वता॑सु।
स ए॒तान्पाशा᳚न् प्र॒मुच॒न् प्रवे॑द॒ स नो॑ मुञ्चातु दुरि॒तादव॒द्यात्।
वै॒श्वा॒न॒रः पव॑यान्नः प॒वित्रै॒र्यथ्स॑ङ्ग॒रम॒भिधावा᳚म्या॒शाम्।
अना॑जान॒न्मन॑सा॒ याच॑मानो॒ यदत्रैनो॒ अव॒ तथ्सु॑वामि।
अ॒मी ये सु॒भगे॑ दि॒वि वि॒चृतौ॒ नाम॒ तार॑के।
प्रेहामृत॑स्य यच्छतामे॒तद्ब॑द्धक॒मोच॑नम्।
विजि॑हीर्ष्व लो॒कान्कृ॑धि ब॒न्धान्मु॑ञ्चासि॒ बद्ध॑कम्।
योने॑रिव॒ प्रच्यु॑तो॒ गर्भः॒ सर्वा᳚न् प॒थो अ॑नुष्व।
स प्र॑जा॒नन्प्रति॑गृभ्णीत वि॒द्वान्प्र॒जाप॑तिः प्रथम॒जा ऋ॒तस्य॑।
अ॒स्माभि॑र्द॒त्तं ज॒रसः॑ प॒रस्ता॒दच्छि॑न्नं॒ तन्तु॑मनु॒सञ्च॑रेम॥९॥
त॒तं तन्तु॒मन्वेके॒ अनु॒ सञ्च॑रन्ति॒ येषां᳚ द॒त्तं पित्र्य॒माय॑नवत्।
अ॒ब॒न्ध्वेके॒ दद॑तः प्र॒यच्छा॒द्दातुं॒ चेच्छ॒क्नवा॒ꣳ॒सः स्व॒र्ग ए॑षाम्।
आर॑भेथा॒मनु॒ सꣳर॑भेथाꣳ समा॒नं पन्था॑मवथो घृ॒तेन॑।
यद्वां᳚ पू॒र्तं परि॑विष्टं॒ यद॒ग्नौ तस्मै॒ गोत्रा॑ये॒ह जाया॑पती॒ सꣳर॑भेथाम्।
यद॒न्तरि॑क्षं पृथि॒वीमु॒त द्यां यन्मा॒तरं॑ पि॒तरं॑ वा जिहिꣳसि॒म।
अ॒ग्निर्मा॒ तस्मा॒देन॑सो॒ गार्ह॑पत्य॒ उन्नो॑ नेषद्दुरि॒ता यानि॑ चकृ॒म।
bhūmi̍rmā̱tā'di̍tirno ja̱nitra̱ṃ bhrātā̱'ntari̍kṣama̱bhiśa̍sta enaḥ.
dyaurna̍ḥ pi̱tā pi̍tṛ̱yācchaṃ bha̍vāsi jā̱mi mi̱tvā mā vi̍vithsi lo̱kāt.
yatra̍ su̱hārda̍ḥ su̱kṛto̱ mada̍nte vi̱hāya̱ roga̍ṃ ta̱nvā(1"E009)ṃ̱ svāyā̎m.
a̱ślo̱ṇāṅgai̱rahru̍tāḥ sva̱rge tatra̍ paśyema pi̱tara̍ṃ ca pu̱tram.
yadanna̱madmyanṛ̍tena devā dā̱syannadā̎syannu̱ta vā̍ kari̱ṣyan.
yadde̱vānā̱ṃ cakṣu̱ṣyāgo̱ asti̱ yade̱va kiṃ ca̍ pratijagrā̱hama̱gnirmā̱ tasmā̍danṛ̱ṇaṃ kṛ̍ṇotu.
yadanna̱madmi̍ bahu̱dhā virū̍pa̱ṃ vāso̱ hira̍ṇyamu̱ta gāma̱jāmavim̎.
yadde̱vānā̱ṃ cakṣu̱ṣyāgo̱ asti̱ yade̱va kiṃ ca̍ pratijagrā̱hama̱gnirmā̱ tasmā̍danṛ̱ṇaṃ kṛ̍ṇotu.
ya̱nmayā̍ mana̍sā vā̱cā̱ kṛ̱ta̱mena̍ḥ kadā̱cana.
sarvasmā̎ttasmā̎nmel̤i̍to mo̱gdhi̱ tvaṃ hi vettha̍ yathāta̱tham..10..
Anuvāka 7
vāta̍raśanā ha̱ vā ṛṣa̍yaḥ śrama̱ṇā ū̱rdhvama̍nthi̱no ba̍bhūvu̱stānṛṣa̍yo̱'rthamā̍ya̱ṃste ni̱lāya̍macara̱ṃste'nu̍praviśuḥ kūśmā̱ṇḍāni̱ tāṃsteṣvanva̍vindañchra̱ddhayā̍ ca̱ tapa̍sā ca̱ tānṛṣa̍yo'bruvanka̱thā ni̱lāya̍ṃ cara̱theti̱ ta ṛṣī̍nabruva̱nnamo̍ vo'stu bhagavanto̱'smindhā̎mni̱ kena̍ vaḥ saparyā̱meti̱ tānṛṣa̍yo'bruvanpa̱vitra̍ṃ no brūta̱ yenā̍re̱pasa̍ḥ syā̱meti̱ ta e̱tāni̍ sū̱ktānya̍paśya̱n yadde̍vā deva̱hel̤a̍na̱ṃ yadadī̎vyannṛ̱ṇama̱haṃ ba̱bhūvā''yu̍ṣṭe vi̱śvato̍ dadha̱ditye̱tairājya̍ṃ juhuta vaiśvāna̱rāya̱ prati̍vedayāma̱ ityupa̍tiṣṭhata̱ yada̍rvā̱cīna̱meno̎ bhrūṇaha̱tyāyā̱stasmā̎nmokṣyadhva̱ iti̱ ta e̱taira̍juhavu̱ste're̱paso̍'bhavankarmā̱diṣve̱tairju̍huyātpū̱to de̍valo̱kānthsama̍śnute..11..
Anuvāka 8
kū̱śmā̱ṇḍairju̍huyā̱dyo'pū̍ta iva̱ manye̍ta̱ yathā̎ ste̱no yathā̎ bhrūṇa̱haivame̱ṣa bha̍vati̱ yo'yonau̱ reta̍ḥ si̱ñcati̱ yada̍rvā̱cīna̱meno̎ bhrūṇaha̱tyāyā̱stasmā̎nmucyate̱ yāva̱deno̍ dī̱kṣāmupai̍ti dīkṣi̱ta e̱taiḥ sa̍ta̱ti ju̍hoti saṃvathsa̱raṃ dī̎kṣi̱to bha̍vati saṃvathsa̱rāde̱vā''tmāna̍ṃ punīte̱ māsa̍ṃ dīkṣi̱to bha̍vati̱ yo māsa̱ḥ sa sa̍ṃvathsa̱raḥ sa̍ṃvathsa̱rāde̱vā''tmāna̍ṃ punīte̱ catu̍rviṃśati̱ṃ rātrī̎rdīkṣi̱to bha̍vati̱ catu̍rviṃśatirardhamā̱sāḥ sa̍ṃvathsa̱raḥ sa̍ṃvathsa̱rāde̱vā''tmāna̍ṃ punīte̱ dvāda̍śa̱ rātrī̎rdīkṣi̱to bha̍vati̱ dvāda̍śa̱ māsā̎ḥ saṃvathsa̱raḥ sa̍ṃvathsa̱rāde̱vā''tmāna̍ṃ punīte̱ ṣaḍrātrī̎rdīkṣi̱to bha̍vati̱ ṣaḍvā ṛ̱tava̍ḥ saṃvathsa̱raḥ sa̍ṃvathsa̱rāde̱vā''tmāna̍ṃ punīte ti̱sro rātrī̎rdīkṣi̱to bha̍vati tri̱padā̍ gāya̱trī gā̍yatri̱yā e̱vā''tmāna̍ṃ punīte̱ na mā̱ṃsama̍śnīyā̱nna striya̱mupe̍yā̱nnoparyā̍sīta̱ jugu̍phse̱tānṛ̍tā̱tpayo̎ brāhma̱ṇasya̍ vra̱taṃ ya̍vā̱gū rā̍ja̱nya̍syā̱'̱'̱mikṣā̱ vaiśya̱syātho̍ sau̱myepya̍dhva̱ra e̱tadvra̱taṃ brū̍yā̱dyadi̱ manye̍topa̱dasyā̱mītyo̍da̱naṃ dhā̱nāḥ saktū̎n ghṛ̱tamityanu̍vratayedā̱tmano'nu̍padāsāya..12..
Anuvāka 9
a̱jān ha̱ vai pṛśnī̍ṃstapa̱syamā̍nā̱n brahma̍ svaya̱mbhva̍bhyāna̍rṣa̱tta ṛṣa̍yo'bhava̱ntadṛṣī̍ṇāmṛṣi̱tvaṃ tāṃ de̱vatā̱mupā̍tiṣṭhanta ya̱jñakā̍mā̱sta e̱taṃ bra̍hmaya̱jñama̍paśya̱ntamāha̍ra̱ntenā̍yajanta̱ yadṛ̱co'dhyagī̍ṣata̱ tāḥ paya̍āhutayo de̱vānā̍mabhava̱ṉ yadyajū̍ṃṣi ghṛ̱tāhu̍tayo̱ yathsāmā̍ni̱ somā̍hutayo̱ yadatha̍rvāṅgi̱raso̱ madhvā̍hutayo̱ yadbrā̎hma̱ṇānī̍tihā̱sān pu̍rā̱ṇāni̱ kalpā̱ngāthā̍ nārāśa̱ṃsīrme̍dāhu̱tayo̍ de̱vānā̍mabhava̱ntābhi̱ḥ kṣudha̍ṃ pā̱pmāna̱mapā̎ghna̱nnapa̍hatapāpmāno de̱vāḥ sva̱rgaṃ lo̱kamā̍ya̱n brahma̍ṇa̱ḥ sāyu̍jya̱mṛṣa̍yo'gacchan..13..
Anuvāka 10
pañca̱ vā e̱te ma̍hāya̱jñāḥ sa̍ta̱ti pratā̍yante sata̱ti santi̍ṣṭhante devaya̱jñaḥ pi̍tṛya̱jño bhū̍taya̱jño ma̍nuṣyaya̱jño bra̍hmaya̱jña iti̱ yada̱gnau ju̱hotya̱pi sa̱midha̱ṃ tadde̍vaya̱jñaḥ santi̍ṣṭhate̱ yatpi̱tṛbhya̍ḥ sva̱dhā ka̱rotyapya̱pastatpi̍tṛya̱jñaḥ santi̍ṣṭhate̱ yadbhū̱tebhyo̍ ba̱liṃ hara̍ti̱ tadbhū̍taya̱jñaḥ santi̍ṣṭhate̱ yadbrā̎hma̱ṇebhyo'nna̱ṃ dadā̍ti̱ tanma̍nuṣyaya̱jñaḥ santi̍ṣṭhate̱ yathsvā̎dhyā̱yamadhī̍yī̱taikā̍mapyṛ̱caṃ yaju̱ḥ sāma̍ vā̱ tadbra̍hmaya̱jñaḥ santi̍ṣṭhate̱ yadṛ̱co'dhī̍te̱ paya̍sa̱ḥ kūlyā̍ asya pi̱tṝnthsva̱dhā a̱bhiva̍hanti̱ yadyajū̍ṃṣi ghṛ̱tasya̍ kūlyā̱ yathsāmā̍ni̱ soma̍ ebhyaḥ pavate̱ yadatha̍rvāṅgi̱raso̱ madho̎ḥ kūlyā̱ yadbrā̎hma̱ṇānī̍tihā̱sān pu̍rā̱ṇāni̱ kalpā̱ngāthā̍ nārāśa̱ṃsīrmeda̍sa̱ḥ kūlyā̍ asya pi̱tṝnthsva̱dhā a̱bhiva̍hanti̱ yadṛ̱co'dhī̍te̱ paya̍āhutibhire̱va tadde̱vāṃsta̍rpayati̱ yadyajū̍ṃṣi ghṛ̱tāhu̍tibhi̱ryathsāmā̍ni̱ somā̍hutibhi̱ryadatha̍rvāṅgi̱raso̱ madhvā̍hutibhi̱ryadbrā̎hma̱ṇānī̍tihā̱sān pu̍rā̱ṇāni̱ kalpā̱ngāthā̍ nārāśa̱ṃsīrme̍dāhu̱tibhi̍re̱va tadde̱vāṃsta̍rpayati̱ ta e̍naṃ tṛ̱ptā āyu̍ṣā̱ teja̍sā̱ varca̍sā śri̱yā yaśa̍sā brahmavarca̱senā̱nnādye̍na ca tarpayanti..14..%
Anuvāka 11
bra̱hma̱ya̱jñena̍ ya̱kṣyamā̍ṇa̱ḥ prācyā̎ṃ di̱śi grāmā̱dacha̍dirda̱rśa udī̎cyāṃ prāgudī̱cyāṃ vo̱dita̍ ādi̱tye da̍kṣiṇa̱ta u̍pa̱vīyo̍pa̱viśya̱ hastā̍vava̱nijya̱ trirācā̍me̱ddviḥ pa̍ri̱mṛjya̍ sa̱kṛdu̍pa̱spṛśya̱ śira̱ścakṣu̍ṣī̱ nāsi̍ke̱ śrotre̱ hṛda̍yamā̱labhya̱ yattrirā̱cāma̍ti̱ tena̱ ṛca̍ḥ prīṇāti̱ yaddviḥ pa̍ri̱mṛja̍ti̱ tena̱ yajū̍ṃṣi̱ yathsa̱kṛdu̍pa̱spṛśa̍ti̱ tena̱ sāmā̍ni̱ yathsa̱vyaṃ pā̱ṇiṃ pā̱dau pro̱kṣati̱ yacchira̱ścakṣu̍ṣī̱ nāsi̍ke̱ śrotre̱ hṛda̍yamā̱labha̍te̱ tenātha̍rvāṅgi̱raso̎ brāhma̱ṇānī̍tihā̱sān pu̍rā̱ṇāni̱ kalpā̱ngāthā̍ nārāśa̱ṃsīḥ prī̍ṇāti̱ darbhā̍ṇāṃ ma̱hadu̍pa̱stīryo̱pastha̍ṃ kṛ̱tvā prāṅāsī̍naḥ svādhyā̱yamadhī̍yītā̱pāṃ vā e̱ṣa oṣa̍dhīnā̱ṃ raso̱ yadda̱rbhāḥ sara̍same̱va brahma̍ kurute dakṣiṇotta̱rau pā̱ṇī pā̱dau kṛ̱tvā sapa̱vitrā̱vomiti̱ prati̍padyata e̱tadvai yaju̍strayīṃ vi̱dyāṃ pratye̱ṣā vāge̱tatpa̍ra̱mama̱kṣara̱ṃ tade̱tadṛ̱cā'bhyu̍ktamṛ̱co a̱kṣare̍ para̱me vyo̍ma̱ṉ yasmi̍nde̱vā adhi̱ viśve̍ niṣe̱duryastanna veda̱ kimṛ̱cā ka̍riṣyati̱ ya ittadvi̱dusta i̱me samā̍sata̱ iti̱ trīne̱va prāyu̍ṅkta̱ bhūrbhuva̱ḥ sva̍rityā̍hai̱tadvai vā̱caḥ sa̱tyaṃ yade̱va vā̱caḥ sa̱tyaṃ tatprāyu̱ṅktātha̍ sāvi̱trīṃ gā̍ya̱trīṃ triranvā̍ha pa̱ccho̎'rdharca̍śo'navā̱naṃ sa̍vi̱tā śriya̍ḥ prasavi̱tā śriya̍me̱vā''pno̱tyatho̎ pra̱jñāta̍yai̱va pra̍ti̱padā̱ chandā̍ṃsi̱ prati̍padyate..15..
Anuvāka 12
grāme̱ mana̍sā svādhyā̱yamadhī̍yīta̱ divā̱ nakta̍ṃ ve̱ti ha̍ smā̱''ha śau̱ca ā̎hne̱ya u̱tāra̍ṇye̱'bala̍ u̱ta vā̱cota tiṣṭha̍nnu̱ta vraja̍nnu̱tā''sī̍na u̱ta śayā̍no̱'dhīyī̍tai̱va svā̎dhyā̱yaṃ tapa̍svī̱ puṇyo̍ bhavati̱ ya e̱vaṃ vidvānthsvā̎dhyā̱yamadhī̍te̱ namo̱ brahma̍ṇe̱ namo̍ astva̱gnaye̱ nama̍ḥ pṛthi̱vyai nama̱ oṣa̍dhībhyaḥ.
namo̍ vā̱ce namo̍ vā̱caspata̍ye̱ namo̱ viṣṇa̍ve bṛha̱te ka̍romi..16..
Anuvāka 13
ma̱dhyandi̍ne pra̱bala̱madhī̍yītā̱sau khalu̱ vāvaiṣa ā̍di̱tyo yadbrā̎hma̱ṇastasmā̱ttarhi̱ te'kṣṇi̍ṣṭhaṃ tapati̱ tade̱ṣā'bhyu̍ktā.
ci̱traṃ de̱vānā̱muda̍gā̱danī̍ka̱ṃ cakṣu̍rmi̱trasya̱ varu̍ṇasyā̱gneḥ.
ā'prā̱ dyāvā̍pṛthi̱vī a̱ntari̍kṣa̱ṃ sūrya̍ ā̱tmā jaga̍tasta̱sthuṣa̱śceti̱ sa vā e̱ṣa ya̱jñaḥ sa̱dyaḥ pratā̍yate sa̱dyaḥ santi̍ṣṭhate̱ tasya̱ prāk sā̱yama̍vabhṛ̱tho namo̱ brahma̍ṇa̱ iti̍ paridhā̱nīyā̱ṃ triranvā̍hā̱pa u̍pa̱spṛśya̍ gṛ̱hāne̍ti̱ tato̱ yatkiṃ ca̱ dadā̍ti̱ sā dakṣi̍ṇā..17..
Anuvāka 14
tasya̱ vā e̱tasya̍ ya̱jñasya̱ megho̍ havi̱rdhāna̍ṃ vi̱dyuda̱gnirva̱ṟṣaṃ ha̱viḥ sta̍nayi̱tnurva̍ṣaṭkā̱ro yada̍va̱sphūrja̍ti̱ so'nu̍vaṣaṭkā̱ro vā̱yurā̱tmā'mā̍vā̱syā̎ sviṣṭa̱kṛdya e̱vaṃ vi̱dvānme̱ghe va̱rṣati̍ vi̱dyota̍māne sta̱naya̍tyava̱sphūrja̍ti̱ pava̍māne vā̱yāva̍māvā̱syā̍yāṃ svādhyā̱yamadhī̍te̱ tapa̍ e̱va tatta̍pyate̱ tapo̍ hi svādhyā̱ya ityu̍tta̱maṃ nāka̍ṃ rohatyutta̱maḥ sa̍mā̱nānā̎ṃ bhavati̱ yāva̍ntaṃ ha̱ vā i̱māṃ vi̱ttasya̍ pū̱rṇāṃ dada̍thsva̱rgaṃ lo̱kaṃ ja̍yati̱ tāva̍ntaṃ lo̱kaṃ ja̍yati̱ bhūyā̍ṃsaṃ cākṣa̱yyaṃ cāpa̍ punarmṛ̱tyuṃ ja̍yati̱ brahma̍ṇa̱ḥ sāyu̍jyaṃ gacchati..18..
Anuvāka 15
tasya̱ vā e̱tasya̍ ya̱jñasya̱ dvāva̍nadhyā̱yau yadā̱tmā'śuci̱ryadde̱śaḥ samṛ̍ddhirdaiva̱tāni̱ ya e̱vaṃ vi̱dvānma̍hārā̱tra u̱ṣasyudi̍te̱ vraja̱ṃstiṣṭha̱nnāsī̍na̱ḥ śayā̍no̱'raṇye̎ grāme̱ vā yāva̍tta̱rasa̍ṃ svādhyā̱yamadhī̍te̱ sarvā̎m̐llo̱kāñja̍yati̱ sarvā̎m̐llo̱kāna̍nṛ̱ṇo'nu̱sañca̍rati̱ tade̱ṣābhyu̍ktā.
a̱nṛ̱ṇā a̱sminna̍nṛ̱ṇāḥ para̍smiṃstṛ̱tīye̍ lo̱ke a̍nṛ̱ṇāḥ syā̍ma.
ye de̍va̱yānā̍ u̱ta pi̍tṛ̱yāṇā̱ḥ sarvā̎npa̱tho a̍nṛ̱ṇā ākṣī̍ye̱metya̱gniṃ vai jā̱taṃ pā̱pmā ja̍grāha̱ taṃ de̱vā āhu̍tībhiḥ pā̱pmāna̱mapā̎ghna̱nnāhu̍tīnāṃ ya̱jñena̍ ya̱jñasya̱ dakṣi̍ṇābhi̱rdakṣi̍ṇānāṃ brāhma̱ṇena̍ brāhma̱ṇasya̱ chando̍bhi̱śchanda̍sāṃ svādhyā̱yenāpa̍hatapāpmā svādhyā̱yo̍ de̱vapa̍vitra̱ṃ vā e̱tattaṃ yo'nū̎thsṛ̱jatyabhā̍go vā̱ci bha̍va̱tyabhā̍go nā̱ke tade̱ṣā'bhyu̍ktā.
yasti̱tyāja̍ sakhi̱vida̱ṃ sakhā̍ya̱ṃ na tasya̍ vā̱cyapi̍ bhā̱go a̍sti.
yadī̍ṃ śṛ̱ṇotya̱laka̍ṃ śṛṇoti̱ na hi pra̱veda̍ sukṛ̱tasya̱ panthā̱miti̱ tasmā̎thsvādhyā̱yo'dhye̍ta̱vyo̍ yaṃ ya̍ṃ kra̱tumadhī̍te̱ tena̍ tenāsye̱ṣṭaṃ bha̍vatya̱gnervā̱yorā̍di̱tyasya̱ sāyu̍jyaṃ gacchati̱ tade̱ṣā'bhyu̍ktā.
ye a̱rvāṅu̱ta vā̍ purā̱ṇe ve̱daṃ vi̱dvāṃsa̍ma̱bhito̍ vadantyādi̱tyame̱va te pari̍vadanti̱ sarve̍ a̱gniṃ dvi̱tīya̍ṃ tṛ̱tīya̍ṃ ca ha̱ṃsamiti̱ yāva̍tī̱rvai de̱vatā̱stāḥ sarvā̍ veda̱vidi̍ brāhma̱ṇe va̍santi̱ tasmā̎dbrāhma̱ṇebhyo̍ veda̱vidbhyo̍ di̱ve di̍ve̱ nama̍skuryā̱nnāślī̱laṃ kī̎rtayede̱tā e̱va de̱vatā̎ḥ prīṇāti..19..
Anuvāka 16
ricya̍ta iva̱ vā e̱ṣa preva ri̍cyate̱ yo yā̱jaya̍ti̱ prati̍ vā gṛ̱hṇāti̍ yā̱jayi̍tvā pratigṛ̱hya vā'na̍śna̱ntriḥ svā̎dhyā̱yaṃ ve̱damadhī̍yīta trirā̱traṃ vā̍ sāvi̱trīṃ gā̍ya̱trīma̱nvāti̍recayati̱ varo̱ dakṣi̍ṇā̱ vare̍ṇai̱va vara̍ṃ spṛṇotyā̱tmā hi vara̍ḥ..20..
Anuvāka 17
du̱he ha̱ vā e̱ṣa chandā̍ṃsi̱ yo yā̱jaya̍ti̱ sa yena̍ yajñakra̱tunā̍ yā̱jaye̱thso'ra̍ṇyaṃ pa̱retya̍ śucau de̱śe svā̎dhyā̱yame̱vaina̱madhī̍yannāsī̱ta tasyā̱naśa̍naṃ dī̱kṣā sthā̱namu̍pa̱sada̱ āsa̍naṃ su̱tyā vāgju̱hūrmana̍ upa̱bhṛddhṛ̱tirdhru̱vā prā̱ṇo ha̱viḥ sāmā̎dhva̱ryuḥ sa vā e̱ṣa ya̱jñaḥ prā̱ṇada̍kṣi̱ṇo'na̍ntadakṣiṇa̱ḥ samṛ̍ddhataraḥ..21..
Anuvāka 18
ka̱ti̱dhāva̍kīrṇī pravi̱śati̍ catu̱rdhetyā̍hurbrahmavā̱dino̍ ma̱ruta̍ḥ prā̱ṇairindra̱ṃ bale̍na̱ bṛha̱spati̍ṃ brahmavarca̱senā̱gnime̱veta̍reṇa̱ sarve̍ṇa̱ tasyai̱tāṃ prāya̍ścittiṃ vi̱dāṃ ca̍kāra sude̱vaḥ kā̎śya̱po yo bra̍hmacā̱rya̍va̱kire̍damāvā̱syā̍yā̱ṃ rātryā̍ma̱gniṃ pra̱ṇīyo̍pasamā̱dhāya̱ dvirājya̍syopa̱ghāta̍ṃ juhoti̱ kāmāva̍kīrṇo̱'smyava̍kīrṇo'smi̱ kāma̱ kāmā̍ya̱ svāhā̱ kāmābhi̍drugdho̱'smyabhi̍drugdho'smi̱ kāma̱ kāmā̍ya̱ svāhetya̱mṛta̱ṃ vā ājya̍ma̱mṛta̍me̱vā''tmandha̍tte hu̱tvā praya̍tāñja̱liḥ kavā̍tiryaṅṅa̱gnima̱bhima̍ntrayeta̱ saṃ mā̍''siñcantu ma̱ruta̱ḥ samindra̱ḥ saṃ bṛha̱spati̍ḥ.
saṃ mā̱'yama̱gniḥ si̍ñca̱tvāyu̍ṣā ca̱ bale̍na̱ cā''yu̍ṣmantaṃ karota̱ meti̱ prati̍ hāsmai ma̱ruta̍ḥ prā̱ṇānda̍dhati̱ pratīndro̱ bala̱ṃ prati̱ bṛha̱spati̍rbrahmavarca̱saṃ pratya̱gniri̱tara̱thsarva̱ṃ sarva̍tanurbhū̱tvā sarva̱māyu̍reti̱ trira̱bhima̍ntrayeta̱ triṣa̍tyā̱ hi de̱vā yo'pū̍ta iva̱ manye̍ta̱ sa i̱tthaṃ ju̍huyādi̱tthama̱bhima̍ntrayeta̱ punī̍ta e̱vā''tmāna̱māyu̍re̱vā''tmandha̍tte̱ varo̱ dakṣi̍ṇā̱ vare̍ṇai̱va vara̍ṃ spṛṇotyā̱tmā hi vara̍ḥ..22..
Anuvāka 19
bhūḥ prapa̍dye̱ bhuva̱ḥ prapa̍dye̱ sva̍ḥ prapa̍dye̱ bhūrbhuva̱ḥ sva̍ḥ prapa̍dye̱ brahma̱ prapa̍dye brahmako̱śaṃ prapa̍dye̱'mṛta̱ṃ prapa̍dye'mṛtako̱śaṃ prapa̍dye caturjā̱laṃ bra̍hmako̱śaṃ yaṃ mṛ̱tyurnāva̱paśya̍ti̱ taṃ prapa̍dye de̱vān prapa̍dye devapu̱raṃ prapa̍dye̱ parī̍vṛto̱ varī̍vṛto̱ brahma̍ṇā̱ varma̍ṇā̱'haṃ teja̍sā̱ kaśya̍pasya̱ yasmai̱ nama̱stacchiro̱ dharmo̍ mū̱rdhāna̍ṃ bra̱hmotta̍rā̱ hanu̍rya̱jño'dha̍rā̱ viṣṇu̱ṟhṛda̍yaṃ saṃvathsa̱raḥ pra̱jana̍nama̱śvinau̍ pūrva̱pādā̍va̱trirmadhya̍ṃ mi̱trāvaru̍ṇāvapara̱pādā̍va̱gniḥ puccha̍sya pratha̱maṃ kāṇḍa̱ṃ tata̱ indra̱stata̍ḥ pra̱jāpa̍ti̱rabha̍yaṃ catu̱rthaṃ sa vā e̱ṣa di̱vyaḥ śā̎kva̱raḥ śiśu̍māra̱staṃ ha̱ ya e̱vaṃ vedāpa̍ punarmṛ̱tyuṃ ja̍yati̱ jaya̍ti sva̱rgaṃ lo̱kaṃ nādhvani̱ pramī̍yate̱ nāphsu pramī̍yate̱ nāgnau pramī̍yate̱ nāna̱patya̍ḥ pramī̱yate̍ la̱ghvānno̍ bhavati dhru̱vastvama̍si dhru̱vasya kṣi̍tamasi̱ tvaṃ bhū̱tānā̱madhi̍patirasi̱ tvaṃ bhū̱tānā̱ṃ śreṣṭho̍'si̱ tvāṃ bhū̱tānyupa̍ pa̱ryāva̍rtante̱ nama̍ste̱ nama̱ḥ sarva̍ṃ te̱ namo̱ nama̍ḥ śiśukumārāya̱ nama̍ḥ..23..
Anuvāka 20
nama̱ḥ prācyai̍ di̱śe yāśca̍ de̱vatā̍ e̱tasyā̱ṃ prati̍vasantye̱tābhya̍śca̱ namo̱ namo dakṣi̍ṇāyai di̱śe yāśca̍ de̱vatā̍ e̱tasyā̱ṃ prati̍vasantye̱tābhya̍śca̱ namo̱ nama̱ḥ pratī̎cyai di̱śe yāśca̍ de̱vatā̍ e̱tasyā̱ṃ prati̍vasantye̱tābhya̍śca̱ namo̱ nama̱ udī̎cyai di̱śe yāśca̍ de̱vatā̍ e̱tasyā̱ṃ prati̍vasantye̱tābhya̍śca̱ namo̱ nama̍ ū̱rdhvāyai̍ di̱śe yāśca̍ de̱vatā̍ e̱tasyā̱ṃ prati̍vasantye̱tābhya̍śca̱ namo̱ namo'dha̍rāyai di̱śe yāśca̍ de̱vatā̍ e̱tasyā̱ṃ prati̍vasantye̱tābhya̍śca̱ namo̱ namo̍'vānta̱rāyai̍ di̱śe yāśca̍ de̱vatā̍ e̱tasyā̱ṃ prati̍vasantye̱tābhya̍śca̱ namo̱ namo gaṅgāyamunayormadhye ye̍ vasa̱nti̱ te me prasannātmānaściraṃ jīvitaṃ va̍rdhaya̱nti̱ namo gaṅgāyamunayormuni̍bhyaśca̱ namo̱ namo gaṅgāyamunayormuni̍bhyaśca̱ namaḥ..24..
oṃ namo̱ brahma̍ṇe̱ namo̍ astva̱gnaye̱ nama̍ḥ pṛthi̱vyai nama̱ oṣa̍dhībhyaḥ.
namo̍ vā̱ce namo̍ vā̱caspata̍ye̱ namo̱ viṣṇa̍ve bṛha̱te ka̍romi..\\
..oṃ śānti̱ḥ śānti̱ḥ śānti̍ḥ..