tai॰brā॰ 1.5.5
ṛ̱tame̱va pa̍rame̱ṣṭhi|
ṛ̱taṃ nātye̍ti̱ kiñca̱na|
ṛ̱te sa̍mu̱dra āhi̍taḥ|
ṛ̱te bhūmi̍ri̱yagͫ̄śri̱tā|
a̱gnisti̱gmena̍ śo̱ciṣā̎|
tapa̱ ākrā̎ntamu̱ṣṇihā̎|
śira̱stapa̱syāhi̍tam|
vai̱śvā̱na̱rasya̱ teja̍sā|
ṛ̱tenā̎sya̱ ni va̍rtaye|
sa̱tyena̱ pari̍ vartaye|
tapa̍sā̱'syānu̍ vartaye|
śi̱venā̱syopa̍ vartaye|
śa̱gmenā̎syā̱bhi va̍rtaye|
tadṛ̱taṃ tathsa̱tyam|
tadvra̱taṃ taccha̍keyam|
tena̍ śakeya̱ṃ tena̍ rādhyāsam||21||
yadgha̱rmaḥ pa̱ryava̍rtayat|
antā̎npṛthi̱vyā di̱vaḥ|
a̱gnirīśā̍na̱ oja̍sā|
varu̍ṇo dhī̱tibhi̍ḥ sa̱ha|
indro̍ ma̱rudbhi̱ḥ sakhi̍bhiḥ sa̱ha|
a̱gnisti̱gmena̍ śo̱ciṣā̎|
tapa̱ ākrā̎ntamu̱ṣṇihā̎|
śira̱stapa̱syāhi̍tam|
vai̱śvā̱na̱rasya̱ teja̍sā|
ṛ̱tenā̎sya̱ ni va̍rtaye|
sa̱tyena̱ pari̍ vartaye|
tapa̍sā̱'syānu̍ vartaye|
śi̱venā̱syopa̍ vartaye|
śa̱gmenā̎syā̱bhi va̍rtaye|
tadṛ̱taṃ tathsa̱tyam|
tadvra̱taṃ taccha̍keyam|
tena̍ śakeya̱ṃ tena̍ rādhyāsam||22||
yo a̱syāḥ pṛ̍thi̱vyāstva̱ci|
ni̱va̱rtaya̱tyoṣa̍dhīḥ|
a̱gnirīśā̍na̱ oja̍sā|
varu̍ṇo dhī̱tibhi̍ḥ sa̱ha|
indro̍ ma̱rudbhi̱ḥ sakhi̍bhiḥ sa̱ha|
a̱gnisti̱gmena̍ śo̱ciṣā̎|
tapa̱ ākrā̎ntamu̱ṣṇihā̎|
śira̱stapa̱syāhi̍tam|
vai̱śvā̱na̱rasya̱ teja̍sā|
ṛ̱tenā̎sya̱ ni va̍rtaye|
sa̱tyena̱ pari̍ vartaye|
tapa̍sā̱'syānu̍ vartaye|
śi̱venā̱syopa̍ vartaye|
śa̱gmenā̎syā̱bhi va̍rtaye|
tadṛ̱taṃ tathsa̱tyam|
tadvra̱taṃ taccha̍keyam|
tena̍ śakeya̱ṃ tena̍ rādhyāsam||23||
eka̱ṃ māsa̱muda̍sṛjat|
pa̱ra̱me̱ṣṭhī pra̱jābhya̍ḥ|
tenā̎bhyo̱ maha̱ āva̍hat|
a̱mṛta̱ṃ martyā̎bhyaḥ|
pra̱jāmanu̱ pra jā̍yase|
tadu̍ te martyā̱mṛtam̎|
yena̱ māsā̍ ardhamā̱sāḥ|
ṛ̱tava̍ḥ parivathsa̱rāḥ|
yena̱ te te̎ prajāpate|
ī̱jā̱nasya̱ nyava̍rtayan|
tenā̱hama̱sya brahma̍ṇā|
niva̍rtayāmi jī̱vase̎|
a̱gnisti̱gmena̍ śo̱ciṣā̎|
tapa̱ ākrā̎ntamu̱ṣṇihā̎|
śira̱stapa̱syāhi̍tam|
vai̱śvā̱na̱rasya̱ teja̍sā|
ṛ̱tenā̎sya̱ ni va̍rtaye|
sa̱tyena̱ pari̍ vartaye|
tapa̍sā̱'syānu̍ vartaye|
śi̱venā̱syopa̍ vartaye|
śa̱gmenā̎syā̱bhi va̍rtaye|
tadṛ̱taṃ tathsa̱tyam|
tadvra̱taṃ taccha̍keyam|
tena̍ śakeya̱ṃ tena̍ rādhyāsam||24|| ॥TB 1.5.5॥
||1||tai॰ā॰ 1.1
oṃ bha̱draṃ karṇe̍bhiḥ śṛṇu̱yāma̍ devāḥ| bha̱draṃ pa̍śyemā̱kṣabhi̱ryaja̍trāḥ|
sthi̱rairaṅgai̎stuṣṭu̱vāgͫsa̍sta̱nūbhi̍ḥ| vyaśe̍ma de̱vahi̍ta̱ṃ yadāyu̍ḥ|
sva̱sti na̱ indro̍ vṛ̱ddhaśra̍vāḥ| sva̱sti na̍ḥ pū̱ṣā vi̱śvave̍dāḥ|
sva̱sti na̱stārkṣyo̱ ari̍ṣṭanemiḥ| sva̱sti no̱ bṛha̱spati̍rdadhātu||
oṃ śānti̱ḥ śānti̱ḥ śānti̍ḥ||
bha̱draṃ karṇe̍bhiḥ śṛṇu̱yāma̍ devāḥ| bha̱draṃ pa̍śyemā̱kṣabhi̱ryaja̍trāḥ|
sthi̱rairaṅgai̎stuṣṭu̱vāgͫsa̍sta̱nūbhi̍ḥ| vyaśe̍ma de̱vahi̍ta̱ṃ yadāyu̍ḥ|
sva̱sti na̱ indro̍ vṛ̱ddhaśra̍vāḥ| sva̱sti na̍ḥ pū̱ṣā vi̱śvave̍dāḥ|
sva̱sti na̱stārkṣyo̱ ari̍ṣṭanemiḥ| sva̱sti no̱ bṛha̱spati̍rdadhātu|
āpa̍māpāma̱paḥ sarvā̎ḥ| a̱smāda̱smādi̱to'muta̍ḥ||1||
a̱gnirvā̱yuśca̱ sūrya̍śca| sa̱ha sa̍ñcaska̱rarddhi̍yā|
vā̱yvaśvā̍ raśmi̱pata̍yaḥ| marī̎cyātmāno̱ adru̍haḥ|
de̱vīrbhu̍vana̱sūva̍rīḥ| pu̱tra̱va̱tvāya̍ me suta|
mahānāmnīrma̍hāmā̱nāḥ| ma̱ha̱so ma̍hasa̱ḥ sva̍ḥ|
de̱vīḥ pa̍rjanya̱sūva̍rīḥ| pu̱tra̱va̱tvāya̍ me suta||2||
a̱pāśnyu̍ṣṇima̱pā rakṣa̍ḥ| a̱pāśnyu̍ṣṇima̱pā ragham̎|
apā̎ghrā̱mapa̍ cā̱vartim̎| apa̍de̱vīri̱to hi̍ta|
vajra̍ṃ de̱vīrajī̍tāgͫ̄śca| bhuva̍naṃ deva̱sūva̍rīḥ|
ā̱di̱tyānadi̍tiṃ de̱vīm| yoni̍nordhvamu̱dīṣa̍ta|
śi̱vā na̱ḥ śanta̍mā bhavantu| di̱vyā āpa̱ oṣa̍dhayaḥ|
su̱mṛ̱ḍī̱kā sara̍svati| mā te̱ vyo̍ma sa̱ndṛśi̍||3|| ॥TA 1.1॥
||2||