Study
- Anukramaṇī
- Saṃhitā citations
- Also in this book
- Source
tai॰ā॰ 4.42
śaṃ no̱ vāta̍ḥ pavatāṃ māta̱riśvā̱ śaṃ na̍stapatu̱ sūrya̍ḥ|
ahā̍ni̱śaṃ bha̍vantu na̱ḥ śagͫ rātri̱ḥ prati̍dhīyatām|
śamu̱ṣā no̱ vyu̍cchatu̱ śamā̍di̱tya ude̍tu naḥ|
śi̱vā na̱ḥ śanta̍mā bhava sumṛḍī̱kā sara̍svati|
mā te̱ vyo̍ma sa̱ndṛśi̍|
iḍā̍yai̱ vāstva̍si vāstu̱madvā̎stu̱manto̍ bhūyāsma̱ mā vāsto̎śchithsmahyavā̱stuḥ sa bhū̍yā̱dyo̎'smāndveṣṭi̱ yaṃ ca̍ va̱yaṃ dvi̱ṣmaḥ|
pra̱ti̱ṣṭhāsi̍ prati̱ṣṭhāva̍nto bhūyāsma̱ mā pra̍ti̱ṣṭhāyā̎śchithsmahyaprati̱ṣṭhaḥ sa bhū̍yā̱dyo̎'smāndveṣṭi̱ yaṃ ca̍ va̱yaṃ dvi̱ṣmaḥ|
ā vā̍ta vāhi bheṣa̱jaṃ vi vā̍ta vāhi̱ yadrapa̍ḥ|
tvagͫ hi vi̱śvabhe̍ṣajo de̱vānā̎ṃ dū̱ta īya̍se|
dvāvi̱mau vātau̍ vāta̱ ā sindho̱rā pa̍rā̱vata̍ḥ||89||
dakṣa̍ṃ me a̱nya ā̱vātu̱ parā̱nyo vā̍tu̱ yadrapa̍ḥ|
yada̱do vā̍tate gṛ̱he̍'mṛta̍sya ni̱dhirhi̱taḥ|
tato̍ no dehi jī̱vase̱ tato̍ no dhehi bheṣa̱jam|
tato̍ no̱ maha̱ āva̍ha̱ vāta̱ āvā̍tu bheṣa̱jam|
śa̱mbhūrma̍yo̱bhūrno̍ hṛ̱de pra ṇa̱ āyūgͫ̍ṣi tāriṣat|
indra̍sya gṛ̱ho̍'si̱ taṃ tvā̱ prapa̍dye̱ sagu̱ḥ sāśva̍ḥ|
sa̱ha yanme̱ asti̱ tena̍|
bhūḥ prapa̍dye̱ bhuva̱ḥ prapa̍dye̱ suva̱ḥ prapa̍dye̱ bhūrbhuva̱ḥ suva̱ḥ prapa̍dye vā̱yuṃ prapa̱dye'nā̎rtāṃ de̱vatā̱ṃ prapa̱dye'śmā̍namākha̱ṇaṃ prapa̍dye pra̱jāpa̍terbrahmako̱śaṃ brahma̱ prapa̍dya̱ oṃ prapa̍dye|
a̱ntari̍kṣaṃ ma u̱rva̍ntara̍ṃ bṛ̱hada̱gnaya̱ḥ parva̍tāśca̱ yayā̱ vāta̍ḥ sva̱styā sva̍sti̱māntayā̎ sva̱styā sva̍sti̱māna̍sāni|
prāṇā̍pānau mṛ̱tyormā̍ pāta̱ṃ prāṇā̍pānau̱ mā mā̍ hāsiṣṭa̱ṃ mayi̍ me̱dhāṃ mayi̍ pra̱jāṃ mayya̱gnistejo̍ dadhātu̱ mayi̍ me̱dhāṃ mayi̍ pra̱jāṃ mayīndra̍ indri̱yaṃ da̍dhātu̱ mayi̍ me̱dhāṃ mayi̍ pra̱jāṃ mayi̱ sūryo̱ bhrājo̍ dadhātu||90||
dyu̱bhira̱ktubhi̱ḥ pari̍pātama̱smānari̍ṣṭebhiraśvinā̱ saubha̍gebhiḥ|
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ|
kayā̍ naści̱tra ā bhu̍vadū̱tī sa̱dāvṛ̍dha̱ḥ sakhā̎|
kayā̱ śaci̍ṣṭhayā vṛ̱tā|
kastvā̍ sa̱tyo madā̍nā̱ṃ magͫhi̍ṣṭho mathsa̱dandha̍saḥ|
dṛ̱ḍhāci̍dā̱ruje̱ vasu̍|
a̱bhī ṣu ṇa̱ḥ sakhī̍nāmavi̱tā ja̍ritṝ̱ṇām|
śa̱taṃ bha̍vāsyū̱tibhi̍ḥ|
vaya̍ḥ supa̱rṇā upa̍sedu̱rindra̍ṃ pri̱yame̍dhā̱ ṛṣa̍yo̱ nādha̍mānāḥ|
apa̍ dhvā̱ntamū̎rṇu̱hi pū̱rdhi cakṣu̍rmumu̱gdhya̍smānni̱dhaye̍va ba̱ddhān||91||
śaṃ no̍ de̱vīra̱bhiṣṭa̍ya̱ āpo̍ bhavantu pī̱taye̎|
śa̱ṃ yora̱bhisra̍vantu naḥ|
īśā̍nā̱ vāryā̍ṇā̱ṃ kṣaya̍ntīścarṣaṇī̱nām|
a̱po yā̍cāmi bheṣa̱jam|
su̱mi̱trā na̱ āpa̱ oṣa̍dhayaḥ santu durmi̱trāstasmai̍ bhūyāsu̱ryo̎'smāndveṣṭi̱ yaṃ ca̍ va̱yaṃ dvi̱ṣmaḥ|
āpo̱ hi ṣṭhā ma̍yo̱bhuva̱stā na̍ ū̱rje da̍dhātana|
ma̱he raṇā̍ya̱ cakṣa̍se|
yo va̍ḥ śi̱vata̍mo̱ rasa̱stasya̍ bhājayate̱ha na̍ḥ|
u̱śa̱tīri̍va mā̱tara̍ḥ|
tasmā̱ ara̍ṃ gamāma vo̱ yasya̱ kṣayā̍ya̱ jinva̍tha||92||
āpo̍ ja̱naya̍thā ca naḥ|
pṛ̱thi̱vī śā̱ntā sā'gninā̍ śā̱ntā sā me̍ śā̱ntā śucagͫ̍ śamayatu|
a̱ntari̍kṣagͫ śā̱ntaṃ tadvā̱yunā̍ śā̱ntaṃ tanme̍ śā̱ntagͫ śucagͫ̍ śamayatu|
dyauḥ śā̱ntā sā''di̱tyena̍ śā̱ntā sā me̍ śā̱ntā śucagͫ̍ śamayatu|
pṛ̱thi̱vī śānti̍ra̱ntari̍kṣa̱g̱ͫ śānti̱rdyauḥ śānti̱rdiśa̱ḥ śānti̍ravāntaradi̱śāḥ śānti̍ra̱gniḥ śānti̍rvā̱yuḥ śānti̍rādi̱tyaḥ śānti̍śca̱ndramā̱ḥ śānti̱rnakṣa̍trāṇi̱ śānti̱rāpa̱ḥ śānti̱roṣa̍dhaya̱ḥ śānti̱rvana̱spata̍ya̱ḥ śānti̱rgauḥ śānti̍ra̱jā śānti̱raśva̱ḥ śānti̱ḥ puru̍ṣa̱ḥ śānti̱rbrahma̱ śānti̍rbrāhma̱ṇaḥ śānti̱ḥ śānti̍re̱va śānti̱ḥ śānti̍rme astu̱ śānti̍ḥ|
tayā̱hagͫ śā̱ntyā sa̍rvaśā̱ntyā mahya̍ṃ dvi̱pade̱ catu̍ṣpade ca̱ śānti̍ṃ karomi̱ śānti̍rme astu̱ śānti̍ḥ|
eha̱ śrīśca̱ hrīśca̱ dhṛti̍śca̱ tapo̍ me̱dhā pra̍ti̱ṣṭhā śra̱ddhā sa̱tyaṃ dharma̍ścai̱tāni̱ motti̍ṣṭhanta̱manūtti̍ṣṭhantu̱ mā mā̱g̱ͫ̄ śrīśca̱ hrīśca̱ dhṛti̍śca̱ tapo̍ me̱dhā pra̍ti̱ṣṭhā śra̱ddhā sa̱tyaṃ dharma̍ścai̱tāni̍ mā̱ mā hā̍siṣuḥ|
udāyu̍ṣā svā̱yuṣodoṣa̍dhīnā̱g̱ͫ rase̱notpa̱rjanya̍sya̱ śuṣme̱ṇoda̍sthāma̱mṛtā̱g̱ͫ anu̍|
taccakṣu̍rde̱vahi̍taṃ pu̱rastā̎cchu̱kramu̱ccara̍t|
paśye̍ma śa̱rada̍ḥ śa̱taṃ jīve̍ma śa̱rada̍ḥ śa̱taṃ nandā̍ma śa̱rada̍ḥ śa̱taṃ modā̍ma śa̱rada̍ḥ śa̱taṃ bhavā̍ma śa̱rada̍ḥ śa̱tagͫ śṛ̱ṇavā̍ma śa̱rada̍ḥ śa̱taṃ prabra̍vāma śa̱rada̍ḥ śa̱tamajī̍tāḥ syāma śa̱rada̍ḥ śa̱taṃ jyokca̱ sūrya̍ṃ dṛ̱śe|
ya uda̍gānmaha̱to'rṇavā̎dvi̱bhrāja̍mānaḥ sari̱rasya̱ madhyā̱thsa mā̍ vṛṣa̱bho lo̍hitā̱kṣaḥ sūryo̍ vipa̱ścinmana̍sā punātu|
brahma̍ṇa̱ścota̍nyasi̱ brahma̍ṇa ā̱ṇī stho̱ brahma̍ṇa ā̱vapa̍namasi dhāri̱teyaṃ pṛ̍thi̱vī brahma̍ṇā ma̱hī dhā̍ri̱tame̍nena ma̱hada̱ntari̍kṣa̱ṃ diva̍ṃ dādhāra pṛthi̱vīgͫ sade̍vā̱ṃ yada̱haṃ veda̱ tada̱haṃ dhā̍rayāṇi̱ mā madvedo'dhi̱visra̍sat|
me̱dhā̱ma̱nī̱ṣe māvi̍śatāgͫ sa̱mīcī̍ bhū̱tasya̱ bhavya̱syāva̍rudhyai̱ sarva̱māyu̍rayāṇi̱ sarva̱māyu̍rayāṇi|
ā̱bhirgī̱rbhiryadato̍ na ū̱namāpyā̍yaya harivo̱ vardha̍mānaḥ|
ya̱dā sto̱tṛbhyo̱ mahi̍ go̱trā ru̱jāsi̍ bhūyiṣṭha̱bhājo̱ adha̍ te syāma|
brahma̱ prāvā̍diṣma̱ tanno̱ mā hā̍sīt||93||
namo̍ vā̱ce yā co̍di̱tā yā cānu̍ditā̱ tasyai̍ vā̱ce namo̱ namo̍ vā̱ce namo̍ vā̱caspata̍ye̱ nama̱ ṛṣi̍bhyo mantra̱kṛdbhyo̱ mantra̍patibhyo̱ mā māmṛṣa̍yo mantra̱kṛto̍ mantra̱pata̍ya̱ḥ parā̍du̱rmāhamṛṣī̎nmantra̱kṛto̍ mantra̱patī̱nparā̍dāṃ vaiśvade̱vīṃ vāca̍mudyāsagͫ śi̱vāmada̍stā̱ṃ juṣṭā̎ṃ de̱vebhya̱ḥ śarma̍ me̱ dyauḥ śarma̍ pṛthi̱vī śarma̱ viśva̍mi̱daṃ jaga̍t|
śarma̍ ca̱ndraśca̱ sūrya̍śca̱ śarma̍ brahmaprajāpa̱tī|
bhū̱taṃ va̍diṣye̱ bhuva̍naṃ vadiṣye̱ tejo̍ vadiṣye̱ yaśo̍ vadiṣye̱ tapo̍ vadiṣye̱ brahma̍ vadiṣye sa̱tyaṃ va̍diṣye̱ tasmā̍ a̱hami̱damu̍pa̱stara̍ṇa̱mupa̍stṛṇa upa̱stara̍ṇaṃ me pra̱jāyai̍ paśū̱nāṃ bhū̍yādupa̱stara̍ṇama̱haṃ pra̱jāyai̍ paśū̱nāṃ bhū̍yāsa̱ṃ prāṇā̍pānau mṛ̱tyormā̍ pāta̱ṃ prāṇā̍pānau̱ mā mā̍ hāsiṣṭa̱ṃ madhu̍ maniṣye̱ madhu̍ janiṣye̱ madhu̍ vakṣyāmi̱ madhu̍ vadiṣyāmi̱ madhu̍matīṃ de̱vebhyo̱ vāca̍mudyāsagͫ śuśrū̱ṣeṇyā̎ṃ manu̱ṣye̎bhya̱staṃ mā̍ de̱vā a̍vantu śo̱bhāyai̍ pi̱taro'nu̍madantu|
oṃ śānti̱ḥ śānti̱ḥ śānti̍ḥ|| ॥TA 4.42॥
||1||