Study
- Anukramaṇī
- Saṃhitā citations
- Source
tai॰ā॰ 2.3
yadde̍vā deva̱hel̤a̍na̱ṃ devā̍saścakṛ̱mā va̱yam|
ādi̍tyā̱stasmā̎nmā muñcata̱rtasya̱rtena̱ māmi̱ta|
devā̍ jīvanakā̱myā yadvā̱cā'nṛ̍tamūdi̱ma|
tasmā̎nna i̱ha mu̍ñcata̱ viśve̍ devāḥ sa̱joṣa̍saḥ|
ṛ̱tena̍ dyāvāpṛthivī ṛ̱tena̱ tvagͫ sa̍rasvati|
kṛ̱tānna̍ḥ pā̱hyena̍so̱ yatkiṃ cānṛ̍tamūdi̱ma|
i̱ndrā̱gnī mi̱trāvaru̍ṇau̱ somo̍ dhā̱tā bṛha̱spati̍ḥ|
te no̍ muñca̱ntvena̍so̱ yada̱nyakṛ̍tamāri̱ma|
sa̱jā̱ta̱śa̱g̱ͫsādu̱ta jā̍miśa̱g̱ͫsājjyāya̍sa̱ḥ śagͫsā̍du̱ta vā̱ kanī̍yasaḥ|
anā̍dhṛṣṭaṃ de̱vakṛ̍ta̱ṃ yadena̱stasmā̱t tvama̱smāñjā̍tavedo mumugdhi||3||
yadvā̱cā yanmana̍sā bā̱hubhyā̍mū̱rubhyā̍maṣṭhī̱vadbhyāgͫ̍ śi̱śnairyadanṛ̍taṃ cakṛ̱mā va̱yam|
a̱gnirmā̱ tasmā̱dena̍so̱ gārha̍patya̱ḥ pramu̍ñcatu cakṛ̱ma yāni̍ duṣkṛ̱tā|
yena̍ tri̱to a̍rṇa̱vānni̍rba̱bhūva̱ yena̱ sūrya̱ṃ tama̍so nirmu̱moca̍|
yenendro̱ viśvā̱ aja̍hā̱darā̍tī̱stenā̱haṃ jyoti̍ṣā̱ jyoti̍rānaśā̱na ā̎kṣi|
yatkusī̍da̱mapra̍tītta̱ṃ maye̱ha yena̍ ya̱masya̍ ni̱dhinā̱ carā̍mi|
e̱tattada̍gne anṛ̱ṇo bha̍vāmi̱ jīva̍nne̱va prati̱ tatte̍ dadhāmi|
yanmayi̍ mā̱tā yadā̍ pi̱peṣa̱ yada̱ntari̍kṣa̱ṃ yadā̱śasāti̍krāmāmi tri̱te de̱vā di̱vi jā̱tā yadāpa̍ i̱maṃ me̍ varuṇa̱ tattvā̍ yāmi̱ tvaṃ no̍ agne̱ sa tvaṃ no̍ agne̱ tvama̍gne a̱yāsi̍||4|| ॥TA 2.3॥
||1||