Study
- Anukramaṇī
- Saṃhitā citations
- Source
tai॰ā॰ 2.6
vai̱śvā̱na̱rāya̱ prati̍vedayāmo̱ yadī̍nṛ̱ṇagͫ sa̍ṅga̱ro de̱vatā̍su|
sa e̱tānpāśā̎n pra̱muca̱n prave̍da̱ sa no̍ muñcātu duri̱tādava̱dyāt|
vai̱śvā̱na̱raḥ pava̍yānnaḥ pa̱vitrai̱ryathsa̍ṅga̱rama̱bhidhāvā̎myā̱śām|
anā̍jāna̱nmana̍sā̱ yāca̍māno̱ yadatraino̱ ava̱ tathsu̍vāmi|
a̱mī ye su̱bhage̍ di̱vi vi̱cṛtau̱ nāma̱ tāra̍ke|
prehāmṛta̍sya yacchatāme̱tadba̍ddhaka̱moca̍nam|
viji̍hīrṣva lo̱kānkṛ̍dhi ba̱ndhānmu̍ñcāsi̱ baddha̍kam|
yone̍riva̱ pracyu̍to̱ garbha̱ḥ sarvā̎n pa̱tho a̍nuṣva|
sa pra̍jā̱nanprati̍gṛbhṇīta vi̱dvānpra̱jāpa̍tiḥ prathama̱jā ṛ̱tasya̍|
a̱smābhi̍rda̱ttaṃ ja̱rasa̍ḥ pa̱rastā̱dacchi̍nna̱ṃ tantu̍manu̱sañca̍rema||9||
ta̱taṃ tantu̱manveke̱ anu̱ sañca̍ranti̱ yeṣā̎ṃ da̱ttaṃ pitrya̱māya̍navat|
a̱ba̱ndhveke̱ dada̍taḥ pra̱yacchā̱ddātu̱ṃ ceccha̱knavā̱g̱ͫsaḥ sva̱rga e̍ṣām|
āra̍bhethā̱manu̱ sagͫra̍bhethāgͫ samā̱naṃ panthā̍mavatho ghṛ̱tena̍|
yadvā̎ṃ pū̱rtaṃ pari̍viṣṭa̱ṃ yada̱gnau tasmai̱ gotrā̍ye̱ha jāyā̍patī̱ sagͫra̍bhethām|
yada̱ntari̍kṣaṃ pṛthi̱vīmu̱ta dyāṃ yanmā̱tara̍ṃ pi̱tara̍ṃ vā jihigͫsi̱ma|
a̱gnirmā̱ tasmā̱dena̍so̱ gārha̍patya̱ unno̍ neṣadduri̱tā yāni̍ cakṛ̱ma|
bhūmi̍rmā̱tā'di̍tirno ja̱nitra̱ṃ bhrātā̱'ntari̍kṣama̱bhiśa̍sta enaḥ|
dyaurna̍ḥ pi̱tā pi̍tṛ̱yācchaṃ bha̍vāsi jā̱mi mi̱tvā mā vi̍vithsi lo̱kāt|
yatra̍ su̱hārda̍ḥ su̱kṛto̱ mada̍nte vi̱hāya̱ roga̍ṃ ta̱nvā(1"E009)g̱ͫ̄ svāyā̎m|
a̱ślo̱ṇāṅgai̱rahru̍tāḥ sva̱rge tatra̍ paśyema pi̱tara̍ṃ ca pu̱tram|
yadanna̱madmyanṛ̍tena devā dā̱syannadā̎syannu̱ta vā̍ kari̱ṣyan|
yadde̱vānā̱ṃ cakṣu̱ṣyāgo̱ asti̱ yade̱va kiṃ ca̍ pratijagrā̱hama̱gnirmā̱ tasmā̍danṛ̱ṇaṃ kṛ̍ṇotu|
yadanna̱madmi̍ bahu̱dhā virū̍pa̱ṃ vāso̱ hira̍ṇyamu̱ta gāma̱jāmavim̎|
yadde̱vānā̱ṃ cakṣu̱ṣyāgo̱ asti̱ yade̱va kiṃ ca̍ pratijagrā̱hama̱gnirmā̱ tasmā̍danṛ̱ṇaṃ kṛ̍ṇotu|
ya̱nmayā̍ mana̍sā vā̱cā̱ kṛ̱ta̱mena̍ḥ kadā̱cana|
sarvasmā̎ttasmā̎nmel̤i̍to mo̱gdhi̱ tvagͫ hi vettha̍ yathāta̱tham||10|| ॥TA 2.6॥
||1||