Study
- Anukramaṇī
- tai॰brā॰ 2.5.1
- Saṃhitā citations
- Source
- Taittirīya / Ṛgveda corpus, as compiled in Yājuṣa Mantra Ratnākaram. Learn svara from a guru.
tai॰brā॰ 2.5.1
prā̱ṇo ra̍kṣati̱ viśva̱meja̍t|
iryo̍ bhū̱tvā ba̍hu̱dhā ba̱hūni̍|
sa ithsarva̱ṃ vyā̍naśe|
yo de̱vo de̱veṣu̍ vi̱bhūra̱ntaḥ|
āvṛ̍dū̱dāt kṣetriya̍dhva̱gadvṛṣā̎|
tamitprā̱ṇaṃ mana̱sopa̍ śikṣata|
agra̍ṃ de̱vānā̍mi̱dama̍ttu no ha̱viḥ|
mana̍sa̱ścitte̱dam|
bhū̱taṃ bhavya̍ṃ ca gupyate|
taddhi de̱veṣva̍gri̱yam||1||
ā na̍ etu puraśca̱ram|
sa̱ha de̱vairi̱magͫ havam̎|
mana̱ḥ śreya̍siśreyasi|
karma̍n ya̱jñapa̍ti̱ṃ dadha̍t|
ju̱ṣatā̎ṃ me̱ vāgi̱dagͫ ha̱viḥ|
vi̱rāḍde̱vī pu̱rohi̍tā|
ha̱vya̱vāḍana̍pāyinī|
yayā̍ rū̱pāṇi̍ bahu̱dhā vada̍nti|
peśāgͫ̍si de̱vāḥ pa̍ra̱me ja̱nitre̎|
sā no̍ vi̱rāḍana̍pasphurantī||2||
vāgde̱vī ju̍ṣatāmi̱dagͫ ha̱viḥ|
cakṣu̍rde̱vānā̱ṃ jyoti̍ra̱mṛte̱ nya̍ktam|
a̱sya vi̱jñānā̍ya bahu̱dhā nidhī̍yate|
tasya̍ su̱mnama̍śīmahi|
mā no̍ hāsīdvicakṣa̱ṇam|
āyu̱rinna̱ḥ pratī̎ryatām|
ana̍ndhā̱ścakṣu̍ṣā va̱yam|
jī̱vā jyoti̍raśīmahi|
suva̱rjyoti̍ru̱tāmṛtam̎|
śrotre̍ṇa bha̱dramu̱ta śṛ̍ṇvanti sa̱tyam|
śrotre̍ṇa̱ vāca̍ṃ bahu̱dhodyamā̍nām|
śrotre̍ṇa̱ moda̍śca̱ maha̍śca śrūyate|
śrotre̍ṇa̱ sarvā̱ diśa̱ ā śṛ̍ṇomi|
yena̱ prācyā̍ u̱ta da̍kṣi̱ṇā|
pra̱tīcyai̍ di̱śaḥ śṛ̱ṇvantyu̍tta̱rāt|
tadicchrotra̍ṃ bahu̱dhodyamā̍nam|
a̱rānna ne̱miḥ pari̱ sarva̍ṃ babhūva||3|| ॥TB 2.5.1॥
||1||