Study
- Anukramaṇī
- Saṃhitā citations
- Source
tai॰brā॰ 2.7.12
a̱syā jarā̍so da̱mā ma̱ritrā̎ḥ|
a̱rcaddhū̍māso a̱gnaya̍ḥ pāva̱kāḥ|
śvi̱cī̱caya̍ḥ śvā̱trāso̍ bhura̱ṇyava̍ḥ|
va̱na̱ṟṣado̍ vā̱yavo̱ na somā̎ḥ|
yajā̍ no mi̱trāvaru̍ṇā|
yajā̍ de̱vāgͫ ṛ̱taṃ bṛ̱hat|
agne̱ yakṣi̱ svandamam̎|
aśvi̍nā̱ piba̍tagͫ su̱tam|
dīdya̍gnī śucivratā|
ṛ̱tunā̍ yajñavāhasā||35||
dve virū̍pe carata̱ḥ svarthe̎|
a̱nyā'nyā̍ va̱thsamupa̍ dhāpayete|
hari̍ra̱nyasyā̱ṃ bhava̍ti sva̱dhāvān̍|
śu̱kro a̱nyasyā̎ṃ dadṛśe su̱varcā̎ḥ|
pū̱rvā̱pa̱raṃ ca̍rato mā̱yayai̱tau|
śiśū̱ krīḍa̍ntau̱ pari̍ yāto adhva̱ram|
viśvā̎nya̱nyo bhuva̍nā'bhi̱ caṣṭe̎|
ṛ̱tūna̱nyo vi̱dadha̍jjāyate̱ puna̍ḥ|
trīṇi̍ śa̱tā trīṣa̱hasrā̎ṇya̱gnim|
tri̱g̱ͫśacca̍ de̱vā nava̍ cā'saparyan||36||
aukṣa̍ṃ ghṛ̱tairāstṛ̍ṇanba̱ṟhira̍smai|
ādiddhotā̍ra̱ṃ nya̍ṣādayanta|
a̱gninā̱'gniḥ sami̍dhyate|
ka̱virgṛ̱hapa̍ti̱ryuvā̎|
ha̱vya̱vāḍju̱hvā̎''syaḥ|
a̱gnirde̱vānā̎ṃ ja̱ṭharam̎|
pū̱tada̍kṣaḥ ka̱vikra̍tuḥ|
de̱vo de̱vebhi̱rā ga̍mat|
a̱gni̱śriyo̍ ma̱ruto̍ vi̱śvakṛ̍ṣṭayaḥ|
ā tve̱ṣamu̱gramava̍ īmahe va̱yam||37||
te svā̱nino̍ ru̱driyā̍ va̱ṟṣani̍rṇijaḥ|
si̱g̱ͫhā na he̱ṣakra̍tavaḥ su̱dāna̍vaḥ|
yadu̍tta̱me ma̍ruto madhya̱me vā̎|
yadvā̍'va̱me su̍bhagāso di̱vi ṣṭha|
tato̍ no rudrā u̱ta vā̱'nvasya̍|
agne̍ vi̱ttāddha̱viṣo̱ yadyajā̍maḥ|
īḍe̍ a̱gnigͫ̄ svava̍sa̱nnamo̍bhiḥ|
i̱ha pra̍sa̱pto vi ca̍ yatkṛ̱taṃ na̍ḥ|
rathai̍riva̱ prabha̍re vāja̱yadbhi̍ḥ|
pra̱da̱kṣi̱ṇinma̱rutā̱g̱ͫ̄ stoma̍mṛddhyām||38||
śru̱dhi śru̍tkarṇa̱ vahni̍bhiḥ|
de̱vaira̍gne sa̱yāva̍bhiḥ|
āsī̍dantu ba̱ṟhiṣi̍|
mi̱tro varu̍ṇo arya̱mā|
prā̱ta̱ryāvā̍ṇo adhva̱ram|
viśve̍ṣā̱madi̍tirya̱jñiyā̍nām|
viśve̍ṣā̱mati̍thi̱rmānu̍ṣāṇām|
a̱gnirde̱vānā̱mava̍ āvṛṇā̱naḥ|
su̱mṛ̱ḍī̱ko bha̍vatu vi̱śvave̍dāḥ|
tve a̍gne suma̱tiṃ bhikṣa̍māṇāḥ||39||
di̱vi śravo̍ dadhire ya̱jñiyā̍saḥ|
naktā̍ ca ca̱kruru̱ṣasā̱ virū̍pe|
kṛ̱ṣṇaṃ ca̱ varṇa̍maru̱ṇaṃ ca̱ sandhu̍ḥ|
tvāma̍gna ādi̱tyāsa̍ ā̱syam̎|
tvāṃ ji̱hvāgͫ śuca̍yaścakrire kave|
tvāgͫ rā̍ti̱ṣāco̍ adhva̱reṣu̍ saścire|
tve de̱vā ha̱vira̍da̱ntyāhu̍tam|
ni tvā̍ ya̱jñasya̱ sādha̍nam|
agne̱ hotā̍ramṛ̱tvijam̎|
va̱nu̱ṣvadde̍va dhīmahi̱ prace̍tasam|
jī̱raṃ dū̱tamama̍rtyam||40|| ॥TB 2.7.12॥
||1||