अध्ययनम्
- अनुक्रमणिका
- तै॰ब्रा॰ १.२.५
- संहिता निर्देशाः
- मूलम्
- तैत्तिरीय-ऋग्वेदपाठः याजुषमन्त्ररत्नाकरानुसारेण। स्वरः गुरोः समीपे एव।
तै॰ब्रा॰ १.२.५
अप्र॑तिष्ठां॒ वा ए॒ते ग॑च्छन्ति।
येषाꣳ॑ संवथ्स॒रेऽना॒प्तेऽथ॑।
ए॒का॒द॒शिन्या॒प्यते᳚।
वै॒ष्ण॒वं वा॑म॒नमाल॑भन्ते।
य॒ज्ञो वै विष्णुः॑।
य॒ज्ञमे॒वाल॑भन्ते॒ प्रति॑ष्ठित्यै।
ऐ॒न्द्रा॒ग्नमाल॑भन्ते।
इ॒न्द्रा॒ग्नी वै दे॒वाना॒मया॑तयामानौ।
ये ए॒व दे॒वते॒ अया॑तयाम्नी।
ते ए॒वाऽऽल॑भन्ते॥४०॥
वै॒श्व॒दे॒वमाल॑भन्ते।
दे॒वता॑ ए॒वाव॑रुन्धते।
द्या॒वा॒पृ॒थिव्यां᳚ धे॒नुमाल॑भन्ते।
द्यावा॑पृथि॒व्योरे॒व प्रति॑ तिष्ठन्ति।
वा॒य॒व्यं॑ व॒थ्समाल॑भन्ते।
वा॒युरे॒वैभ्यो॑ यथाऽऽयत॒नाद्दे॒वता॒ अव॑ रुन्धे।
आ॒दि॒त्यामविं॑ व॒शामाल॑भन्ते।
इ॒यं वा अदि॑तिः।
अ॒स्यामे॒व प्रति॑ तिष्ठन्ति।
मै॒त्रा॒व॒रु॒णीमाल॑भन्ते॥४१॥
मि॒त्रेणै॒व य॒ज्ञस्य॒ स्वि॑ष्टꣳ शमयन्ति।
वरु॑णेन॒ दुरि॑ष्टम्।
प्रा॒जा॒प॒त्यं तू॑प॒रं म॑हाव्र॒त आल॑भन्ते।
प्रा॒जा॒प॒त्यो॑ऽतिग्रा॒ह्यो॑ गृह्यते।
अह॑रे॒व रू॒पेण॒ सम॑र्धयन्ति।
अथो॒ अह्न॑ ए॒वैष ब॒लिर्ह्रि॑यते।
आ॒ग्ने॒यमा ल॑भन्ते॒ प्रति॒ प्रज्ञा᳚त्यै।
अ॒ज॒पे॒त्वान् वा ए॒ते पूर्वै॒र्मासै॒रव॑ रुन्धते।
यदे॒ते ग॒व्याः प॒शव॑ आल॒भ्यन्ते᳚।
उ॒भये॑षां पशू॒नामव॑रुद्ध्यै॥४२॥
यदति॑रिक्तामेकाद॒शिनी॑मा॒लभे॑रन्।
अप्रि॑यं॒ भ्रातृ॑व्यम॒भ्यति॑रिच्येत।
यद्द्वौ द्वौ॑ प॒शू स॒मस्ये॑युः।
कनी॑य॒ आयुः॑ कुर्वीरन्।
यदे॒ते ब्राह्म॑णवन्तः प॒शव॑ आल॒भ्यन्ते᳚।
नाप्रि॑यं॒ भ्रातृ॑व्यम॒भ्य॑ति॒रिच्य॑ते।
न कनी॑य॒ आयुः॑ कुर्वते॥४३॥ ॥TB 1.2.5॥
॥१॥