अध्ययनम्
- अनुक्रमणिका
- संहिता निर्देशाः
- मूलम्
तै॰ब्रा॰ २.७.५
यो वै सोमे॑न सू॒यते᳚।
स दे॑वस॒वः।
यः प॒शुना॑ सू॒यते᳚।
स दे॑वस॒वः।
य इष्ट्या॑ सू॒यते᳚।
स म॑नुष्यस॒वः।
ए॒तं वै पृथ॑ये दे॒वाः प्राय॑च्छन्।
ततो॒ वै सोऽप्या॑र॒ण्यानां᳚ पशू॒नाम॑सूयत।
याव॑तीः॒ किय॑तीश्च प्र॒जा वाचं॒ वद॑न्ति।
तासा॒ꣳ॒ सर्वा॑साꣳ सूयते॥११॥
य ए॒तेन॒ यज॑ते।
य उ॑ चैनमे॒वं वेद॑।
ना॒रा॒श॒ꣴ॒स्यर्चाऽभिषि॑ञ्चति।
म॒नु॒ष्या॑ वै नरा॒शꣳसः॑।
नि॒ह्नुत्य॒ वावैतत्।
अथा॒भिषि॑ञ्चति।
यत्किं च॑ राज॒सूय॑मनुत्तरवे॒दीकम्᳚।
तथ्सर्वं॑ भवति।
ये मे॑ पञ्चा॒शतं॑ द॒दुः।
अश्वा॑नाꣳ स॒धस्तु॑तिः।
द्यु॒मद॑ग्ने॒ महि॒ श्रवः॑।
बृ॒हत्कृ॑धि म॒घोना᳚म्।
नृ॒वद॑मृत नृ॒णाम्॥१२॥ ॥TB 2.7.5॥
॥१॥