अध्ययनम्
- अनुक्रमणिका
- विविधकर्माणि
- मूलम्
- याजुषमन्त्ररत्नाकरम् (मुद्रितग्रन्थः) पृष्ठम् ६४२–६४३ — मुद्रितग्रन्थस्य PDF-पाठात् स्वरसहितं यथावत् उद्धृतम्। कोष्ठकेषु सङ्ख्याः ग्रन्थस्य पृष्ठनिर्देशाः।
विविधकर्माणि
या त॑ ए॒षा र॑रा॒ट्या॑ त॒नूर्म॒न्योर्मृ॒ध्रस्य॒ नाशि॑नी। तां दे॒वा ब्र॑ह्मचा॒रिणो॒ विन॑यन्तु सुमे॒धसः॑। यत्त॑ ए॒तन्मुखे॑ऽम॒तꣳ र॒राट॒मुदि॑व॒ विध्य॑ति। वि ते॒ क्रोधं॑ नयामसि॒ गर्भ॑मश्वत॒र्या इ॑व। अव॒ ज्यामि॑व॒ धन्व॑नो हृ॒दो म॒न्युं त॑नोमि ते। इन्द्रापा᳚स्य पलि॒गम॒न्येभ्यः॒ पुरु॑षेभ्यो॒ऽन्यत्र॒ मत्।
॥१॥यद॒हं धने॑न॒ प्रप॒णꣴश्च॑रामि॒ धने॑न देवा॒ धन॑मि॒च्छमा॑नः। तस्मि॒न् सोमो॒ रुच॒माद॑धात्व॒ग्निरिन्द्रो॒ बृह॒स्पति॑श्च॒ स्वाहा᳚। परि॑ त्वा॒ गिरे॑रमिहं॒ परि॒ भ्रातुः॒ परि॒ष्वसुः॑। परि॒ सर्वे᳚भ्यो॒ ज्ञाति॑भ्यः॒ परि॑षीतः॒ क्वे᳚ष्यसि॑। शश्व॒त्परि॑कुपितेन॒ सं॒क्रामे॒णाऽवि॑च्छिदा। उ॒लेन॒ परि॑षीतोसि॒ परि॑षीतोस्यु॒लेन॑।
॥२॥(आव॑र्तन वर्त॒येत्ये॒षा।) {आव॑र्तन वर्तय॒ नि नि॑वर्तन वर्त॒येन्द्र॑ नर्दबुद। भूम्या॒श्चत॑स्रः प्र॒दिश॒स्ताभि॒रा व॑र्तया॒ पुनः॑॥} आ॒व॑र्तने नि॒वर्त॑न आ॒वर्त॑ननिवर्त॒नाय॒ स्वाहा᳚। अनु॑ पोऽह्वदनु॒ह्वयो॒ निव॑र्तो पो॒ न्य॑वीवृतत्। ऐ॒न्द्रः परि॑क्रोशो वः॒ परि॑क्रोशतु स॒र्वतः॑। यदि॒ मामति॒ मन्या᳚ध्वा॒ अदे॑वा दे॒वव॑त्तरम्।
॥३॥इन्द्रः॒ पाशे॑न सि॒क्त्वा वो॒ मह्य॒मिद्व॒शमान॑या॒त्स्वाहा᳚। यदि॑ वृ॒क्षाद्यद्य॒न्तरि॑क्षा॒त्फल॑म॒भ्य॑पत॒त्तदु॑ वा॒युरे॒व। यत्रास्पृ॑क्षत्त॒नुवं॒ यत्र॒ वास॒ आपो॑ बाधन्तां॒ निर्ऋ॑तिं परा॒चैः। ये प॒क्षिणः॑ प॒तय॑न्ति बि॒भ्यतो॒ निर्ऋ॑तैः स॒ह। ते मा॑ शि॒वेन॑ श॒ग्मेन॒ तेज॑सो॒न्दन्तु॒ वर्च॑सा।
॥४॥दि॒वो नु मा॑ बृह॒तो अ॒न्तरि॑क्षाद॒पाꣴ स्तो॒को अ॒भ्य॑पतच्छि॒वेन॑। सम॒हमि॑न्द्रि॒येण॒ मन॑सा॒ऽसमागां॒ ब्रह्म॑णा संपृचा॒नः सु॒कृता॑ कृ॒तेन॑।
॥५॥(इ॒मं मे॑ वरुण॒ तत्त्वा॑ यामि॒ त्वं नो॑ अग्ने॒ स त्वं नो॑ अग्ने॒ त्वम॑ग्ने अ॒याऽसि॒ प्रजा॑पते।) (सं॒राजं॑ च॒ व्याहृ॑ती॒र्विहृ॑ताः।) इ॒मं जी॒वेभ्यः॑ परि॒धिं द॑धामि॒ मैषां नु॑ गा॒दप॑रो॒ अर्ध॑मे॒तम्। श॒तं जी॑वन्तु श॒रदः॑ पुरू॒चीस्ति॒रो मृ॒त्युं द॑धतां॒ पर्व॑तेन॥२२॥
॥६॥