Study
- Anukramaṇī
- samāvartanamantrāḥ
- Source
- याजुषमन्त्ररत्नाकरम् (मुद्रितग्रन्थः) पृष्ठम् ६२४–६२६ — मुद्रितग्रन्थस्य PDF-पाठात् स्वरसहितं यथावत् उद्धृतम्। कोष्ठकेषु सङ्ख्याः ग्रन्थस्य पृष्ठनिर्देशाः।
samāvartanamantrāḥ
i̱magͫ̄ stoma̱marha̍te jā̱tave̍dase̱ ratha̍miva̱ saṃma̍hemā manī̱ṣayā̎| bha̱drā hi na̱ḥ prama̍tirasya sa̱gͫsadyagne̍ sa̱khye̍ mā ri̍ṣāmā va̱yaṃ tava̍| tryā̱yu̱ṣaṃ ja̱mada̍gneḥ ka̱śyapa̍sya tryāyu̱ṣam| yadde̱vānā̎ṃ tryāyu̱ṣaṃ tanme̍ astu tryāyu̱ṣam| śi̱vo nāmā̍si̱ svadhi̍tiste pi̱tā nama̍ste astu̱ mā mā̍ higͫsīḥ|
||1||(u̱ṣṇena̍ vāyavuda̱kenetye̱ṣaḥ|) i̱dama̱hama̱muṣyā̍muṣyāya̱ṇasya̍ pā̱pmāna̱mupa̍gūhā̱myutta̍ro̱'sau dvi̱ṣadbhya̍ḥ| (āpo̱ hiṣṭhā ma̍yo̱bhuva̱ iti̍ ti̱sro hira̍ṇyavarṇā̱ḥ suca̍yaḥ pāva̱kā iti̍ ti̱sraḥ|) a̱nnādyā̍ya̱ vyū̍hadhvaṃ dīrghā̱yura̱hama̍nnā̱do bhū̍yāsam| somo̱ rājā̱ yamāga̍ma̱tsa me̱ mukha̱ṃ prave̎kṣyati̱ bhage̍na sa̱ha varca̍sā|
||2||soma̍sya ta̱nūra̍si ta̱nuva̍ṃ me pāhi̱ svā mā̍ ta̱nūrāvi̍śa| namo̎ gra̱hāya̍ cābhigra̱hāya̍ ca̱ nama̍ḥ śākajañja̱bhābhyā̱ṃ nama̱stābhyo̍ de̱vatā̎bhyo̱ yā a̍bhigrā̱hiṇī̎ḥ| a̱psa̱rassu̱ yo ga̱ndho ga̍ndha̱rveṣu̍ ca̱ yadyaśa̍ḥ| daivo̱ yo mā̍nu̱ṣo ga̱ndhaḥ sa mā̍ ga̱ndhaḥ su̍ra̱bhirju̍ṣatām| i̱yamoṣa̍dhe̱ trāya̍māṇā̱ saha̍mānā̱ saha̍svatī|
||3||sā mā̱ hira̍ṇyavarcasaṃ brahmavarca̱sina̍ṃ mā karotu| apā̍śo̱'syuro̍ me̱ mā sagͫ śā̍rīḥ śi̱vo mopa̍ tiṣṭhasva dīrghāyu̱tvāya̍ śa̱taśā̍radāya| śa̱tagͫ śa̱radbhya̱ āyu̍ṣe̱ varca̍se jī̱vātvai puṇyā̍ya| (re̱vatī̎stvā̱ vya̍kṣṇa̱nnitye̱tāḥ)||7||
||4||ā̱yu̱ṣya̍ṃ varca̱sya̍gͫ su̱vīrya̍gͫ rā̱yaspoṣa̱maudbhi̍dyam| i̱dagͫ hira̍ṇya̱ṃ jaitryā̱yāvi̍śatā̱ṃ mām| u̱ccai̱rvā̱di pṛ̍tanā̱ji sa̍trāsā̱haṃ dha̍nañja̱yam| sarvā̱ḥ samṛ̍ddhī̱rṛddha̍yo̱ hira̍ṇye̱'smin sa̱māhi̍tāḥ| śu̱nama̱hagͫ hira̍ṇyasya pi̱turi̍va̱ nāmā̎grabhaiṣam| taṃ mā̱ hira̍ṇyavarcasaṃ pū̱ruṣu̍ pri̱yaṃ ku̍ru|
||5||pri̱yaṃ mā̍ de̱veṣu̍ kuru pri̱yaṃ mā̱ brahma̍ṇe kuru| pri̱yaṃ vi̱śye̍ṣu śū̱dreṣu̍ pri̱yagͫ rāja̍su mā kuru| yā ti̱raścī̍ ni̱padya̍se̱'haṃ vi̱dhara̍ṇī̱ iti̍| tāṃ tvā̍ ghṛ̱tasya̱ dhāra̍yā̱ yaje̍ sa̱gͫrādha̍nīma̱ham| sa̱gͫrādha̍nyai de̱vyai svāhā̎ pra̱sādha̍nyai de̱vyai svāhā̎| sa̱mrāja̍ṃ ca vi̱rāja̍ṃ cābhi̱śrīryā ca̍ no gṛ̱he|
||6||la̱kṣmī rā̱ṣṭrasya̱ yā mukhe̱ tayā̍ mā̱ sagͫ sṛ̍jāmasi| śubhi̍ke̱ śira̱ ā ro̍ha śo̱bhaya̍ntī̱ mukha̱ṃ mama̍| mukha̍gͫ hi̱ mama̍ śobhaya̱ bhūyā̍gͫsaṃ ca̱ bhaga̍ṃ kuru| yāmāha̍rajja̱mada̍gniḥ śra̱ddhāyai̍ kāmāyā̱nyai| i̱māṃ tāmapi̍ nahye̱'haṃ bhage̍na sa̱ha varca̍sā| yadāñja̍naṃ traikaku̱daṃ jā̱tagͫ hi̱mava̍ta u̱pari̍| tena̍ vāmāñje̱ teja̍se̱ varca̍se̱ bhagā̍ya ca||8||
||7||mayi̍ parvatapūru̱ṣaṃ mayi̍ parvatavarca̱saṃ mayi̍ parvatabheṣa̱jaṃ mayi̍ parvatāyu̱ṣam| yanme̱ varca̍ḥ pa̱rāga̍tamā̱tmāna̍mupa̱tiṣṭha̍ti| i̱daṃ tatpuna̱rāda̍de dīrghāyu̱tvāya̱ varca̍se| pra̱ti̱ṣṭhe stho̍ de̱vatā̍nā̱ṃ mā mā̱ saṃtā̎ptam| pra̱jāpa̍te̱ḥ śara̍ṇamasi̱ brahma̍ṇaścha̱dirvi̍śvaja̱nasya̍ chā̱yā'si̍ sa̱rvato̍ mā pāhi|
||8||de̱vasya̍ tvā savi̱tuḥ pra̍sa̱ve̎'śvino̎rbā̱hubhyā̎ṃ pū̱ṣṇo hastā̎bhyā̱māda̍de dviṣa̱to va̱dhāyendra̍sya̱ vajro̍si̱ vārtra̍ghna̱ḥ śarma̍ me bhava̱ yatpā̱paṃ tannivā̍raya| (devī̎ḥ ṣaḍurvī̱ritye̱ṣā|) {devī̎ḥ ṣaḍurvīru̱ruṇa̍ḥ kṛṇota̱ viśve̍devāsa i̱ha vī̍rayadhvam| mā hā̎smahi pra̱jayā̱ mā ta̱nūbhi̱rmā ra̍dhāma dviṣa̱te so̍ma rājan||}
||9||