Study
- Anukramaṇī
- Saṃhitā citations
- Source
tai॰brā॰ 2.7.16
a̱bhi prehi̍ vī̱raya̍sva|
u̱graścettā̍ sapatna̱hā|
āti̍ṣṭha vṛtra̱hanta̍maḥ|
tubhya̍ṃ de̱vā adhi̍bravan|
a̱ṅkau nya̱ṅkāva̱bhito̱ ratha̱ṃ yau|
dhvā̱ntaṃ vā̍tā̱gramanu̍ sa̱ñcara̍ntau|
dū̱rehe̍tirindri̱yāvā̎npata̱trī|
te no̱'gnaya̱ḥ papra̍yaḥ pārayantu|
nama̍sta ṛṣe gada|
avya̍thāyai tvā sva̱dhāyai̎ tvā||55||
mā na̍ indrā̱bhita̱stvadṛ̱ṣvāri̍ṣṭāsaḥ|
e̱vā bra̍hma̱ntaveda̍stu|
tiṣṭhā̱ rathe̱ adhi̱ yadvajra̍hastaḥ|
ā ra̱śmīnde̍va yuvase̱ svaśva̍ḥ|
ā ti̍ṣṭha vṛtrahannā̱tiṣṭha̍nta̱ṃ pari̍|
anu̱ tvendro̍ mada̱tvanu̍ tvā mi̱trāvaru̍ṇau|
dyauśca̍ tvā pṛthi̱vī ca̱ prace̍tasā|
śu̱kro bṛ̱haddakṣi̍ṇā tvā pipartu|
anu̍ sva̱dhā ci̍kitā̱g̱ͫ somo̍ a̱gniḥ|
anu̍ tvā'vatu savi̱tā sa̱vena̍||56||
indra̱ṃ viśvā̍ avīvṛdhan|
sa̱mu̱dravya̍casa̱ṅgira̍ḥ|
ra̱thīta̍magͫ rathī̱nām|
vājā̍nā̱g̱ͫ satpa̍ti̱ṃ patim̎|
pari̍mā se̱nyā ghoṣā̎ḥ|
jyānā̎ṃ vṛñjantu gṛ̱dhnava̍ḥ|
me̱thi̱ṣṭhāḥ pinva̍mānā i̱ha|
māṃ gopa̍tima̱bhi saṃvi̍śantu|
tanme'nu̍mati̱ranu̍ manyatām|
tanmā̱tā pṛ̍thi̱vī tatpi̱tā dyauḥ||57||
tadgrāvā̍ṇaḥ soma̱suto̍ mayo̱bhuva̍ḥ|
tada̍śvinā śṛṇutagͫ saubhagā yu̱vam|
ava̍ te̱ heḍa̱ udu̍tta̱mam|
e̱nā vyā̱ghraṃ pa̍riṣasvajā̱nāḥ|
si̱g̱ͫhagͫ hi̍nvanti maha̱te saubha̍gāya|
sa̱mu̱draṃ na su̱huva̍ntasthi̱vāgͫsam̎|
ma̱rmṛ̱jyante̎ dvī̱pina̍ma̱phsva̍ntaḥ|
uda̱sāve̍tu̱ sūrya̍ḥ|
udi̱daṃ mā̍ma̱kaṃ vaca̍ḥ|
udi̍hi deva sūrya|
sa̱ha va̱gnunā̱ mama̍|
a̱haṃ vā̱co vi̱vāca̍nam|
mayi̱ vāga̍stu dharṇa̱siḥ|
yantu̍ na̱dayo̱ varṣa̍ntu pa̱rjanyā̎ḥ|
su̱pi̱ppa̱lā oṣa̍dhayo bhavantu|
anna̍vatāmoda̱nava̍tāmā̱mikṣa̍vatām|
e̱ṣāgͫ rājā̍ bhūyāsam||58|| ॥TB 2.7.16॥
||1||