Study
- Anukramaṇī
- īśānabaliḥ
- Source
- याजुषमन्त्ररत्नाकरम् (मुद्रितग्रन्थः) पृष्ठम् ६३८–६३९ — मुद्रितग्रन्थस्य PDF-पाठात् स्वरसहितं यथावत् उद्धृतम्। कोष्ठकेषु सङ्ख्याः ग्रन्थस्य पृष्ठनिर्देशाः।
īśānabaliḥ
yanme̍ mā̱tā pralu̍lobha̱ cara̱tyana̍nuvratā| tanme̱ reta̍ḥ pi̱tā vṛ̍ṅktāṃ mā̱''bhura̱nyo'va̍padyatāma̱muṣmai̱ svāhā̎| yāstiṣṭha̍nti̱ yā dhāva̍nti̱ yā ā̎rdro̱ghnīḥ pari̍ta̱sthuṣī̎ḥ| a̱dbhirviśva̍sya bha̱rtrībhi̍ra̱ntara̱nyaṃ pi̱turda̍dhe̱'muṣmai̱ svāhā̎| yanme̍ pitāma̱hī pralu̍lobha̱ cara̱tyana̍nuvratā|
||1||tanme̱ reta̍ḥ pitāma̱ho vṛ̍ṅktāṃ mā̱''bhura̱nyo'va̍padyatāma̱muṣmai̱ svāhā̎| a̱ntarda̍dhe̱ parva̍taira̱ntarmahyā̍ pṛthi̱vyā| ā̱bhirdi̱gbhira̍na̱ntābhi̍ra̱ntara̱nyaṃ pi̍tāma̱hādda̍dhe̱'muṣmai̱ svāhā̎| yanme̎ prapitāma̱hī pralu̍lobha̱ cara̱tyana̍nuvratā| tanme̱ reta̍ḥ prapitāma̱ho vṛ̍ṅktāṃ mā̱''bhura̱nyo'va̍padyatāma̱muṣmai̱ svāhā̎|
||2||a̱ntarda̍dha ṛ̱tubhi̍rahorā̱traiḥ sa̍ sa̱ndhibhi̍ḥ| a̱rdha̱mā̱saiśca̱ māsai̎ścā̱ntara̱nyaṃ pra̍pitāma̱hādda̍dhe̱'muṣmai̱ svāhā̎| ye ce̱ha pi̱taro̱ ye ca̱ neha̱ yāgͫ̄śca̍ vi̱dma yāgͫ u̍ ca̱ na pra̍vi̱dma| agne̱ tān ve̎ttha̱ yadi̱ te jā̍taveda̱stayā̎ pra̱ttagͫ̄ sva̱dhayā̍ madantu̱ svāhā̎| svāhā̍ pi̱tre| pi̱tre svāhā̎| svāhā̍ pi̱tre|
||3||pi̱tre svāhā̎| sva̱dhā svāhā̎| a̱gnaye̍ kavya̱vāha̍nāya sva̱dhā svāhā̎|
||4||e̱ṣa te̍ tata̱ madhu̍māgͫ ū̱rmiḥ sara̍svā̱n yāvā̍na̱gniśca̍ pṛthi̱vī ca̱ tāva̍tyasya mā̱trā tāva̍tīṃ ta e̱tāṃ mātrā̎ṃ dadāmi̱ yathā̱'gnira̍kṣi̱to'nu̍padasta e̱vaṃ mahya̍ṃ pi̱tre'kṣi̱to'nu̍padastaḥ sva̱dhā bha̍va̱ tāṃ tvagͫ̄ sva̱dhāṃ taiḥ sa̱hopa̍jīva̱rcaste̍ mahimai̱ṣa te̍ pitāmaha̱ madhu̍māgͫ ū̱rmiḥ sara̍svā̱n yāvā̎n vā̱yuścā̱ntari̍kṣaṃ ca̱ tāva̍tyasya mā̱trā tāva̍tīṃ ta e̱tāṃ mātrā̎ṃ dadāmi̱ yathā̍ vā̱yura̍kṣi̱to'nu̍padasta e̱vaṃ mahya̍ṃ pitāma̱hāyā̍kṣi̱to'nu̍padastaḥ sva̱dhā bha̍va̱ tāṃ tvagͫ̄ sva̱dhāṃ taiḥ sa̱hopa̍jīva̱ sāmā̍ni te mahimai̱ṣa te̎ prapitāmaha̱ madhu̍māgͫ ū̱rmiḥ sara̍svā̱n yāvā̍nādi̱tyaśca̱ dyauśca̱ tāva̍tyasya mā̱trā tāva̍tīṃ ta e̱tāṃ mātrā̎ṃ dadāmi̱ yathā̍''di̱tyo'kṣi̱to'nu̍padasta e̱vaṃ mahya̍ṃ prapitāma̱hāyā̍kṣi̱to'nu̍padastaḥ sva̱dhā bha̍va̱ tāṃ tvagͫ̄ sva̱dhāṃ taiḥ sa̱hopa̍jīva̱ yajū̍gͫṣi te mahi̱mā||19||
||5||