5 maitrāvaruṇirvasiṣṭha:| aśvinau | triṣṭup |
atā̍riṣma̱ tama̍saspā̱rama̱sya prati̱ stoma̍ṃ deva̱yanto̱ dadhā̍nāḥ |
pu̱ru̱daṃsā̍ puru̱tamā̍ purā̱jā'ma̍rtyā havate a̱śvinā̱ gīḥ
||1||nyu̍ pri̱yo manu̍ṣaḥ sādi̱ hotā̱ nāsa̍tyā̱ yo yaja̍te̱ vanda̍te ca |
a̱śnī̱taṃ madhvo̍ aśvinā upā̱ka ā vā̍ṃ voce vi̱dathe̍ṣu̱ praya̍svān
||2||ahe̍ma ya̱jñaṃ pa̱thāmu̍rā̱ṇā i̱māṃ su̍vṛ̱ktiṃ vṛ̍ṣaṇā juṣethām |
śru̱ṣṭī̱veva̱ preṣi̍to vāmabodhi̱ prati̱ stomai̱rjara̍māṇo̱ vasi̍ṣṭhaḥ
||3||upa̱ tyā vahnī̍ gamato̱ viśa̍ṃ no rakṣo̱haṇā̱ sambhṛ̍tā vī̱l̤upā̍ṇī |
samandhā̍ṃsyagmata matsa̱rāṇi̱ mā no̍ mardhiṣṭa̱mā ga̍taṃ śi̱vena̍
||4||ā pa̱ścātā̍nnāsa̱tyā pu̱rastā̱dāśvi̍nā yātamadha̱rāduda̍ktāt |
ā vi̱śvata̱: pāñca̍janyena rā̱yā yū̱yaṃ pā̍ta sva̱stibhi̱: sadā̍ naḥ
||5||