26 saptarṣaya: ( 1 bharadvājo bārhaspatya: , 2 kaśyapo mārīca:, 3 gotamo rāhūgaṇa:, 4 bhaumo'tri:, 5 viśvāmitro gāthina:, 6 jamadagnirbhārgava:, 7 maitrāvaruṇirvasiṣṭha: ) |pavamāna: soma: | pragātha:= (1,4,6,8,9,10,12,14,17 bṛhatī; 2,5,7,11,13,15,18 satobṛhatī, ) 3,16 dvipadā virāṭ ; 19-26 pragātha:= ( viṣamā bṛhatī, samā satobṛhatī ) |
parī̱to ṣi̍ñcatā su̱taṃ somo̱ ya u̍tta̱maṃ ha̱viḥ |
da̱dha̱nvām̐ yo naryo̍ a̱psva1ntarā su̱ṣāva̱ soma̱madri̍bhiḥ
||1||nū̱naṃ pu̍nā̱no'vi̍bhi̱: pari̍ sra̱vā'da̍bdhaḥ sura̱bhinta̍raḥ |
su̱te ci̍ttvā̱psu ma̍dāmo̱ andha̍sā śrī̱ṇanto̱ gobhi̱rutta̍ram
||2||pari̍ suvā̱naścakṣa̍se deva̱māda̍na̱: kratu̱rindu̍rvicakṣa̱ṇaḥ
||3||pu̱nā̱naḥ so̍ma̱ dhāra̍yā̱'po vasā̍no arṣasi |
ā ra̍tna̱dhā yoni̍mṛ̱tasya̍ sīda̱syutso̍ deva hira̱ṇyaya̍:
||4||du̱hā̱na ūdha̍rdi̱vyaṃ madhu̍ pri̱yaṃ pra̱tnaṃ sa̱dhastha̱māsa̍dat |
ā̱pṛcchya̍ṃ dha̱ruṇa̍ṃ vā̱jya̍rṣati̱ nṛbhi̍rdhū̱to vi̍cakṣa̱ṇaḥ
||5||pu̱nā̱naḥ so̍ma̱ jāgṛ̍vi̱ravyo̱ vāre̱ pari̍ pri̱yaḥ |
tvaṃ vipro̍ abha̱vo'ṅgi̍rastamo̱ madhvā̍ ya̱jñaṃ mi̍mikṣa naḥ
||6||somo̍ mī̱ḍhvānpa̍vate gātu̱vitta̍ma̱ ṛṣi̱rvipro̍ vicakṣa̱ṇaḥ |
tvaṃ ka̱vira̍bhavo deva̱vīta̍ma̱ ā sūrya̍ṃ rohayo di̱vi
||7||soma̍ u ṣuvā̱ṇaḥ so̱tṛbhi̱radhi̱ ṣṇubhi̱ravī̍nām |
aśva̍yeva ha̱ritā̍ yāti̱ dhāra̍yā ma̱ndrayā̍ yāti̱ dhāra̍yā
||8||a̱nū̱pe gomā̱ngobhi̍rakṣā̱: somo̍ du̱gdhābhi̍rakṣāḥ |
sa̱mu̱draṃ na sa̱ṃvara̍ṇānyagmanma̱ndī madā̍ya tośate
||9||ā so̍ma suvā̱no adri̍bhisti̱ro vārā̍ṇya̱vyayā̍ |
jano̱ na pu̱ri ca̱mvo̍rviśa̱ddhari̱: sado̱ vane̍ṣu dadhiṣe
||10||sa mā̍mṛje ti̱ro aṇvā̍ni me̱ṣyo̍ mī̱l̤he sapti̱rna vā̍ja̱yuḥ |
a̱nu̱mādya̱: pava̍māno manī̱ṣibhi̱: somo̱ vipre̍bhi̱ṝkva̍bhiḥ
||11||pra so̍ma de̱vavī̍taye̱ sindhu̱rna pi̍pye̱ arṇa̍sā |
a̱ṃśoḥ paya̍sā madi̱ro na jāgṛ̍vi̱racchā̱ kośa̍ṃ madhu̱ścuta̍m
||12||ā ha̍rya̱to arju̍ne̱ atke̍ avyata pri̱yaḥ sū̱nurna marjya̍: |
tamī̍ṃ hinvantya̱paso̱ yathā̱ ratha̍ṃ na̱dīṣvā gabha̍styoḥ
||13||a̱bhi somā̍sa ā̱yava̱: pava̍nte̱ madya̱ṃ mada̍m |
sa̱mu̱drasyādhi̍ vi̱ṣṭapi̍ manī̱ṣiṇo̍ matsa̱rāsa̍: sva̱rvida̍:
||14||tara̍tsamu̱draṃ pava̍māna ū̱rmiṇā̱ rājā̍ de̱va ṛ̱taṃ bṛ̱hat |
arṣa̍nmi̱trasya̱ varu̍ṇasya̱ dharma̍ṇā̱ pra hi̍nvā̱na ṛ̱taṃ bṛ̱hat
||15||nṛbhi̍ryemā̱no ha̍rya̱to vi̍cakṣa̱ṇo rājā̍ de̱vaḥ sa̍mu̱driya̍:
||16||indrā̍ya pavate̱ mada̱: somo̍ ma̱rutva̍te su̱taḥ | sa̱hasra̍dhāro̱ atyavya̍marṣati̱ tamī̍ mṛjantyā̱yava̍:
||17||pu̱nā̱naśca̱mū ja̱naya̍nma̱tiṃ ka̱viḥ somo̍ de̱veṣu̍ raṇyati |
a̱po vasā̍na̱: pari̱ gobhi̱rutta̍ra̱: sīda̱nvane̍ṣvavyata
||18||tavā̱haṃ so̍ma rāraṇa sa̱khya i̍ndo di̱vedi̍ve |
pu̱rūṇi̍ babhro̱ ni ca̍ranti̱ māmava̍ pari̱dhīm̐rati̱ tām̐ i̍hi
||19||u̱tāhaṃ nakta̍mu̱ta so̍ma te̱ divā̍ sa̱khyāya̍ babhra̱ ūdha̍ni |
ghṛ̱ṇā tapa̍nta̱mati̱ sūrya̍ṃ pa̱raḥ śa̍ku̱nā i̍va paptima
||20||mṛ̱jyamā̍naḥ suhastya samu̱dre vāca̍minvasi |
ra̱yiṃ pi̱śaṅga̍ṃ bahu̱laṃ pu̍ru̱spṛha̱ṃ pava̍mānā̱bhya̍rṣasi
||21||mṛ̱jā̱no vāre̱ pava̍māno a̱vyaye̱ vṛṣāva̍ cakrado̱ vane̍ |
de̱vānā̍ṃ soma pavamāna niṣkṛ̱taṃ gobhi̍rañjā̱no a̍rṣasi
||22||pava̍sva̱ vāja̍sātaye̱'bhi viśvā̍ni̱ kāvyā̍ |
tvaṃ sa̍mu̱draṃ pra̍tha̱mo vi dhā̍rayo de̱vebhya̍: soma matsa̱raḥ
||23||sa tū pa̍vasva̱ pari̱ pārthi̍va̱ṃ rajo̍ di̱vyā ca̍ soma̱ dharma̍bhiḥ |
tvāṃ viprā̍so ma̱tibhi̍rvicakṣaṇa śu̱bhraṃ hi̍nvanti dhī̱tibhi̍:
||24||pava̍mānā asṛkṣata pa̱vitra̱mati̱ dhāra̍yā |
ma̱rutva̍nto matsa̱rā i̍ndri̱yā hayā̍ me̱dhāma̱bhi prayā̍ṃsi ca
||25||a̱po vasā̍na̱: pari̱ kośa̍marṣa̱tīndu̍rhiyā̱naḥ so̱tṛbhi̍: |
ja̱naya̱ñjyoti̍rma̱ndanā̍ avīvaśa̱dgāḥ kṛ̍ṇvā̱no na ni̱rṇija̍m
||26||