Prathamaḥ khaṇḍaḥ
ukthe tu hotrakāṇāṃ
||1||ehyūṣu bruvāṇi ta āgniragāmi bhārataścarṣaṇīdhṛtamastabhnādyāmasura iti tṛcāvindrāvaruṇā yuvamāvāṃ rājānāvindrāvaruṇā madhumattamasyeti yājyā | vayamu tvāmapūrvya yo na idamidaṃ pureti pragāthau sarvāḥ kakubhaḥ pramaṃhiṣṭhāyodapruto'cchāma indraṃ bṛhaspate yuvamindraśca vasva iti yājyā | aghāhīndra girvaṇa iyanta indra girvaṇa kraturjanitrīnūmartto bhavā mitraḥ sa vāṃ karmaṇendrāviṣṇū madapatī madānāmiti yājyā
||2||ityanta ukthyaḥ
||3||Dvitīyaḥ khaṇḍaḥ
atha ṣol̤aśī
||1||atha ṣoḍaśī asāvi soma indra ta iti stotriyānurūpau
||2||ā tvā vahantu haraya iti tisro gāyatryaḥ
||3||upoṣu śṛṇuhī giraḥ susaṃdṛśantvā vayaṃ maghavannityekā dve ca paṅktī
||4||yadindrapṛtanā jyeyante astu haryata ityauṣṇihabārhatau tṛcau | ādhūrṣvasmā iti dvipadā
||5||brahman vīra brahmakṛtiṃ juṣāṇa iti triṣṭup | eṣa brahmā ya ṛtviya indro nāma śruto gṛṇe | visrutayo yathāpatha indra tvadyanti rātayaḥ | tvāmicchavasaspate yanti giro na saṃyata iti tisro dvipadāḥ | pra te mahe vidathe śaṃsiṣaṃ harī iti tisro jagatyaḥ | trikaḍukeṣu mahiṣo yavāśiraṃ proṣvasmai purorathamiti tṛcāvāticchandasau
||6||pacchaḥpūrvaṃ dvedhākāraṃ
||7||uttaramanuṣṭubgāyatrīkāraṃ
||8||pracetana pracetayāyāhi piba matsva | kratuśchanda ṛtaṃ bṛhat sunna ādhehi no vasavityanuṣṭup | pra pra vastriṣṭubhamiṣamarcata prārcatayovyatīm̐ raphāṇayaditi tṛcā ānuṣṭubhāḥ
||9||uttamasyottamāṃ śiṣṭvottamāṃ nividandadhyāt
||10||liṅgaiḥ padānupūrvaṃ vyākhyāsyāmo matsadahiṃ vṛtramapāṃ jinvadudāryamudyān divi samudraṃ parvatā iha
||11||udyadbradhnasya viṣṭapamiti paridhānīyā | evāhyevaivāhīndra 3 | evāhi śakro vaśī hi śakra iti japitvā | apāḥ pūrveṣāṃ harivaḥ sutānāmiti yajati
||12||Tṛtīyaḥ khaṇḍaḥ
vihṛtasyendrajuṣasva pravahāyāhi śūra harī iha | pibā sutasya matirna madhvaścakānaścārurmadāya | indra jaṭharaṃ navyaṃ na pṛṇasva madhordivo na | asya sutasya svarṇopa tvā madāḥ suvāco asthuḥ | indra sturāṣāṇmitro na jaghāna vṛtraṃ yatirna | bibheda balaṃ bhṛgurna sasāhe śatrūnmade somasya | śrudhīhavaṃ na indro na giro juṣasva vajrī na | indra sayugbhirdidyunnamatsvāmadāya maheraṇāya | ā tvā viśantu kavirna sutāsa indra tvaṣṭā na | pṛṇasva kukṣī somo nāviḍḍhi śūradhiyā hi yā naḥ | sādhurna gṛdhnurṛbhurnāsteva śūraścamaso na | yāteva bhīmo viṣṇarna tveṣaḥ samatsukraturneti stotriyānurūpau
||1||ūrdhvaṃ stotriyānurūpābhyāntadeva śasyaṃ viharet
||2||pādān vyavadhāyādharcaśaḥ śaṃset
||3||pūrvāsāṃ pūrvāṇi padāni
||4||gāyatryaḥ paṅktibhiḥ
||5||paṃktīnāṃ tu dve dve pade śiṣyete tābhyāṃ praṇuyāt
||6||uṣṇiho bṛhatībhiruṣṇihāntūttamān pādān dvau kuryyāt
||7||caturakṣaramādyaṃ
||8||dvipadāścaturdhā kṛtvā prathamāṃ triṣṭubhottarā jagatībhiḥ
||9||uttamāyāścaturthamakṣaramantyaṃ pūrvasyādyamuttarasya
||10||dvitīyatṛtīyayostṛtīyayoḥ pādayoravasānata upadadhyāt | pracetaneti pūrvasyāṃ pracetayetyuttarasyāṃ
||11||uttarāsvitarān pādān ṣaṣṭhān kṛtvā'nuṣṭupkāraṃ śaṃset
||12||ūrdhvaṃ stotriyānurūpābhyāmāto vihṛtaḥ
||13||tatra pratigara othāmo daivamade madāmo daivomatheti
||14||yājyāṃ japenopasṛjet
||15||evāhyevāpāḥ pūrveṣāṃ harivaḥ sutāmevāhīndrā m̐atho idaṃ savanaṃ kevalante | evā hi śakro mama dvisomaṃ madhumantamindravaśīhi śakraḥ satrāvṛṣan jaṭhara āvṛṣasveti
||16||samānamanyat
||17||stotriyāya nivide paridhānīyāyā ityāhāvaḥ
||18||āhutaṃ ṣoḍaśipātraṃ samupahāvaṃ bhakṣayanti
||19||gharme ca bhakṣiṇaḥ
||20||maitrāvaruṇastrayaśchandogāḥ
||21||indra ṣoḍaśinnojasviṃstvandeveṣvasyojasvantamāmāyuṣmantaṃ varca svantaṃ manuṣyeṣu kuru | tasya ta indra pītasyānuṣṭupchandasa upahūtasyopahūto bhakṣayāmīti bhakṣajapaḥ
||23||Caturthaḥ khaṇḍaḥ
atirātre paryāyāṇāmuktaḥ śasyopāyo hoturapi yathā hotrakāṇāṃ
||1||prathame paryāye hoturādyāṃ varjayitvā pratyṛcaṃ stotriyānurūpeṣu prathamāni padāni dviruktvā'vasyanti
||2||śiṣṭe samasitvā praṇuvanti
||3||sarve sarvāsāṃ madhyame madhyamāni pratyādāya ṛgantaiḥ praṇuvanti
||4||uttamānyuttame
||5||caturakṣarāṇi tvachāvākaḥ
||6||catuḥśastrāḥ paryāyāḥ
||7||hoturādyaṃ
||8||yājyābhyaḥ pūrve paryāsāḥ
||9||pāntamā vo andhasopāduśipryandhasastyamu vaḥ satrāsāhamiti sūktaśeṣo'bhityaṃ meṣamadhvaryavo bharatendrāya somamiti yājyā | pra va indrāya mādanaṃ prakṛtānyṛjīṣiṇaḥ pratiśrutāya vo dhṛṣaditi pañcadaśa divaścidasyeti paryāsaḥ sa no navyebhiriti cāsya made puruvapāṃsi vidvāniti yājyā | vayamu tvā dadidarthā vayamindratvāya vo'bhivārtrahatyāyetyuttamāmuddharedindroaṅga mahadbhayamabhinyūṣu vāvamapsu dhūtasya harivaḥ pibeheti yājyā | indrāya madvane sutamindramidgāthino bṛhadendrasānasimeto'nvindrastavāmeśānaṃ mā no asmin maghavannindrapiba tubhyaṃ suto madāyeti yājyā | ayanta indra somo'yante mānuṣe jana udghedabhītyuttamāmuddharedahaṃ bhuvamapāyyasyāndhaso madāyeti yājyā | ātūna indra kṣumantamā pradrava parāvato na hyanyaṃ baḍākaramityaṣṭāvīṃkhayantīrahandāṃ pātā sutamindroastu somaṃ hantā vṛtramiti yājyā | abhi tvā vṛṣabhā sute'bhi pra gopatiṅgirātūna indramadraygitisūkte aśvāvatiprogrāṃ pītiṃ vṛṣṇa iyarmi satyāmiti yājyā | idaṃ vaso sutamandha indrehi matsyandhasaḥ pra samrājamupakramasvābhara dhṛṣatā tadasmai navyamasya piba yasya jajñāna indreti yājyā | idaṃ hyanvojasā mahām̐ indro ya ojasā samasya manyave viśa iti dvicatvāriṃśadviśvajite tiṣṭhāharīratha āyujyamāneti yājyā | ātvetā niṣīdatā tvaśatravāgahi nakirindratvaduttara ityuttamāmuddharecchratte dadhāmīdantyat yat pātramindrapānamiti yājyā | yoge yoge tava staraṃ yujanti bradhnamaruṣaṃ yadindrāhaṃ pratemaha ūtī śacī vastava vīryeṇeti yājyā | indraḥsuteṣu someṣu ya indra somapātama ādyā ye agnimindhata iti saptadaśa ya indra camaseṣvā somaḥ pra vaḥ satāṃ prodroṇe harayaḥ karmāgmanini yājyā
||10||iti paryāyāḥ
||11||paryāsavarjaṃ gāyatrāḥ
||12||Pañcamaḥ khaṇḍaḥ
saṃsthiteṣvāśvināya stuvate
||1||śaṃsiṣyan visaṃsthitasañcareṇa niṣkramyāgnīdhrīye jānvācyāhutīrjuhuyāt | agnirajvī gāyatreṇa chandasā tamaśyāntamanvārabhe tasmai māmavatu tasmai svāhā | uṣā ajvinī traiṣṭubhena chandasā tāmaśyāntāmanvārabhe tasmai māmavatu tasmai svāhā | aśvināvajvinau jāgatena chandasā tāvaśyāntāvanvārabhe tābhyāṃ māmavatu tābhyāṃ svāhā | baṇmahām̐ asi sūryeti dvābhyāmindravo viśvatasparīti ca
||2||prāśyājyaśeṣamapa upaspṛśennācāmedvijñāyate devaratho vā eṣa yaddhotā nākṣamadbhiḥ karavāṇīti
||3||prāśya pratiprasṛpya paścāt svasya dhiṣṇasyopaviśet samastajaṅghoruraratnibhyāṃ jānubhyāṃ copasthaṃ kṛtvā yathā śakunirutpatiṣyan
||4||upasthakṛtastvevāśvinaṃ śaṃset
||5||agnirhotā gṛhapatiḥ sa rājeti pratipadekapātinī pacchaḥ
||6||etayā''gneyaṃ gāyatramupasantanuyāt
||7||prātaranuvākanyāyena tasyaiva samāmnāyasya sahasrāvamamodetoḥ śaṃset
||8||bārhatāstrayastṛcā stotriyāḥ pragāthā vā tān purastādanudaivataṃ svasya chandaso yathāstutaṃ śaṃset
||9||yeṣu vānyeṣu
||10||paccho dvipadāḥ
||11||upasantanuyādekapadāḥ
||12||tābhyaścottarāḥ
||13||vicchandasa uddharet
||14||api vā tannyāyena śaṃsanaṃ
||15||na tu paccho'nyāstriṣṭubjagatībhyaḥ
||16||pāṅktenodite sauryāṇi pratipadyate
||17||sūryo no diva udu tyaṃ jātavedasamiti nava citraṃ devānāṃ namo mitrasyendrakratuṃ na ābharābhitvā śūra nonumo bahavaḥ sūracakṣasa iti pragāthā mahī dyauḥ pṛthivī ca naste hi dyāvāpṛthivī viśvaśambhuvā | viśvasya devomṛcayasya janmano'nayā roṣātinagrabhaditi dvipadā
||18||bṛhaspate atiyadaryo arhāditi paridhānoyā
||19||pratipade paridhānīyāyā ityāhāvaḥ
||20||bṛhat sāma cet tasya yoniṃ pragātheṣu dvitīyāṃ tṛtīyāṃ vā
||21||na vā
||22||āśvinena graheṇa sapuroḍāśena caranti
||23||ime somāsas tiro ahnyāsas tīvrās tiṣṭhanti pītaye yuvābhyām | haviṣmatā nāsatyā rathena ā ātam upabhūṣatam pibadhyā ity anuvākyā
||22||hotā yakṣad aśvinā somānām tiro ahnyānām iti praiṣaḥ | pra vām andhāṃsi madyāny asthur ubhā pibatam aśvinā iti yājye adhyardhām anvavānam
||24||yadyetasya puroḍāśasya sviṣṭakṛtā careyuḥ | puroḍā agne pacato'gne vṛdhāna āhutimiti saṃyājye
||25||Ṣaṣṭhaḥ khaṇḍaḥ
yadi paryāyānabhivyucchet sarvebhya ekaṃ sambhareyuḥ
||1||prathamāddhotā dvitīyānmaitrāvaruṇo brāhmaṇācchaṃsī cottamādacchāvākaḥ
||2||dvau cet dvau prathamāt dvā uttamāt
||3||api vā sarve syuḥ stomanirhrastāḥ
||4||ūrdhvaṃ stotriyānurūpebhyaḥ prathamottamāṃstṛcāñchaṃseyuḥ
||5||nirhrāsa evaikasmin
||6||hotṛvarjamityeke
||7||āśvināyaikastotriyo'gne vivasvaduṣasa iti
||8||taṃ purastādanudaivataṃ svasya chandaso yathāstutaṃ śaṃset
||9||trīṇi ṣaṣṭiśatānyāśvinaṃ
||10||vimatānāṃ prasavasannipāte saṃsavo'nantarhiteṣu nadyā vā parvatena vā
||11||apyeke'ntarhiteṣvapi
||12||tathā sati santvarā devatāvāhanāt
||13||kayāśubheti ca marutvatīye purastāt sūktasya śaṃset
||14||yo jāta eveti niṣkevalye
||15||mamāgne varca iti vaiśvadevasūktasya
||16||api vaiteṣveva nivido dadhyāduddhareditarāṇi
||17||sthānaṃ cennivido'tiharenmā pragāmeti purastāt sūktaṃ śastvā'nyasmiṃstaddaivate dadhyāt
||18||Saptamaḥ khaṇḍaḥ
somātireke stutaśastropajanaḥ
||1||prātaḥsavane'sti somo ayaṃ suto gaurdhayati marutāmiti stotriyānurūpau | mahām̐ indro ya ojasā''to devā avantu na ityaindrībhirvaiṣṇavībhiśca stomamatiśasyaindr yā yajet
||2||vaiṣṇavyā vā
||3||aindrāvaiṣṇavyeti gāṇagārirdevatapradhānatvāt
||4||saṃ vāṃ karmaṇā samiṣā hinomīti
||5||mādhyandine baṇmahām̐ asi sūryodu tyaddarśataṃ vapuriti pragāthau stotriyānurūpau | mahām̐ indro nṛvadviṣṇornukaṃ yā viśvāsāṃ janitārā matīnāmiti yājyā
||6||tṛtīyasavana uttarottarāṃ saṃsthāmupeyurā''tirātrāt
||7||atirātrāccet pra tatte adya śipiviṣṭa nāma pra tadviṣṇustava te vīryeṇeti stotriyānurūpau | mādhyandinena śeṣaḥ
||8||tveṣamitthāsa maraṇaṃ śimīvatoriti vā yājyā
||9||Aṣṭamaḥ khaṇḍaḥ
krīte rājani naṣṭe dagdhe vā
||1||apidadhāni sado havirdhānānyanāvṛtā kriyeran
||2||āvṛtā vā
||3||anyaṃ rājānamabhiṣuṇuyuḥ
||4||anadhigame pūtīkān phālgunāni
||5||anyā vā oṣadhayaḥ pūtīkaiḥ saha
||6||prāyaścittaṃ vā hutvottaramārabheta
||7||sutyāsūktameva manyeta
||8||pratidhuk prātaḥsavane
||9||śṛtaṃ mādhyandine
||10||dadhi tṛtīyasavane
||11||śrāyantīyaṃ brahma sāma yadi phālgunāni vāravantīyaṃ yajñāyajñīyasya sthāne śrāyantīyameke
||12||ekadakṣiṇaṃ yajñaṃ saṃsthāpyodavasāya punaryajeta
||14||tasmin pūrvasya dakṣiṇā dadyāt
||15||somādhigame prakṛtyā
||16||Navamaḥ khaṇḍaḥ
dīkṣitānāmupatāpe parihite prātaranuvāke'nupākṛte vā puṣṭipate puṣṭiścakṣuṣe cakṣuḥ prāṇāya prāṇaṃ tmane tmānaṃ vāce vācamasmai punardehi svāheti brahmāhutiṃ hutvā śītoṣṇā apaḥ samānīyaikaviṃśatiṃ tāsu yavān kuśapiñjūlāṃścāvadhāya tābhiradbhirabarthaṃ kurvīta tābhirenamāplāvayejjīvānāmasthatā3 | imamamuñjīvayata jīvikānāmasthatā3 | imamamuñjīvayata sañjīvānāmasthatā3 | imamamuṃ sañjīvayata sañjīvikānāmasthatā3 | imamuṃ sañjīvayatetyauṣadhisūktena ca
||1||āplāvyānumṛjet
||2||upāṃśvantaryāmau te prāṇāpānau pātāmasā upāṃśusavanaste vyānaṃ pātvasāvaindravāyavaste vācaṃ pātvasau maitrāvaruṇaste cakṣuṣī pātvasāvāśvinaste śrotraṃ pātvasāvāgrayaṇaste dakṣakratū pātvasā ukthaste'ṅgāni pātvasau dhruvasta āyuḥ pātvasāviti
||3||yathāsanamanuparikramaṇaṃ
||4||trātāramindramavitāramindramiti tārkṣyādiḥ
||5||yady apy anyad aikāhikād vaiśvadevam svasty ātreye nividam dadhyāt
||6||prakṛtyā'gade
||7||Daśamaḥ khaṇḍaḥ
saṃsthite tīrthena nirhṛtyāvabhṛthe pretālaṅkārān kurvanti
||1||keśaśmaśrulomanakhāni vāpayanti
||2||naladenānulimpanti
||3||naladamālāṃ pratimuñcanti
||4||niḥpurīṣameke kṛtvā pṛṣadājyaṃ pūrayanti
||5||ahatasya vāsasaḥ pāśataḥ pādamātramavacchidya prorṇuvanti pratyagdaśenā''viḥpādaṃ
||6||avacchedamasya putrā amākurvīran
||7||agnīnasya samāropya dakṣiṇato bahirvedi daheyuḥ
||8||āhāyaṇānāhitāgniṃ
||9||patnīñca
||10||pratyetyāhaḥ samāpayeyuḥ
||11||prātaranabhyāsamanabhihiṃkṛtāni śastrānuvacanābhiṣṭavanasaṃstavanāni
||12||purā grahagrahaṇāt tīrthena niṣkramya triḥprasavyamāyatanaṃ parītya paryupaviśanti
||13||paścāddhotā
||14||uttaro'dhvaryuḥ | tasya paścācchandogāḥ
||15||āyaṅgauḥ pṛśnirakramīd ityupāṃśu stuvate
||16||stute hotā prasavyamāyatanaṃ parivrajan stotriyamanudravedapraṇuvan
||17||yāmīśca
||18||prehi prehi pathibhiḥ pūrvyebhiriti pañcānāṃ tṛtīyamuddharet | mainamagne vi daho mābhiśoca iti ṣaṭ | pūṣā tvetaścyāvayatu pra vidvāniti catasra upasarpa mātaraṃ bhūmimetāmiti catasraḥ soma ekebhyaḥ
||19||urūṇasāvasutṛpā udugbalāviti ca samāpya | sañcitya tīrthena prapādya yathāsanamāsādayeyuḥ
||20||bhakṣeṣu prāṇabhakṣān bhakṣayitvā dakṣiṇe mārjālīye ninayeyuḥ | dakṣiṇasyāṃ vā vediśroṇyāṃ
||21||saptadaśamaharbhavati trivṛtaḥ pavamānā rathantarapṛṣṭho'gniṣṭomaḥ
||22||saṃsthite'vabhṛthameke gamayantyetasyaitadaharabhiśabdayantaḥ
||23||nirmanthyena vā dagdhvā nikhāya saṃvatsarādenamagniṣṭomena yājayeyuḥ
||24||nediṣṭhinaṃ vā dīkṣayeyuḥ
||25||api votthānaṃ gṛhapatau
||26||uktaḥ stutaśastravikāraḥ
||27||ekāheṣu yajamānāsane śayīta
||28||saṃsthite'pāyatīṣvavabhṛthaṃ gamayeyurityālekhanaḥ
||29||pūrveṇa sado daheyurityāśmarathyaḥ
||30||eṣa evāvabhṛthaḥ
||31||Ekādaśaḥ khaṇḍaḥ
agniṣṭomo'tyagniṣṭoma ukthaḥ ṣoḍaśī vājapeyo'tirātro'ptoryāma iti saṃsthāḥ
||1||tāsāṃ yāmupayanti tasyā ante yajñapucchaṃ
||2||anuyājādyuktaṃ paśunāśaṃ yuvākāt
||3||uttamastviha sūktavākapraiṣaḥ
||4||avīvṛdhateti puroḍāśadevatāṃ
||5||eke yadi savanīyasya paśoḥ paśupuroḍāśaṃ kuryuravīvṛdhetāṃ puroḍāśairityeva brūyāt
||6||savanīyairevendrovardhate paśupuroḍāśena paśudevatā
||7||ūrdhvaṃ śaṃyuvākāddhāriyojanaḥ
||8||apāḥ somamindraprayāhi dhānā somānāmindrāddhi ca piba ca yunajmi te brahmaṇā keśinā harī iti
||9||ijyānuvākye antyeṣvahaḥsu
||10||tiṣṭhā su kaṃ maghavanmā parāgā ayaṃ yajño devayā ayaṃ miyedha itītareṣu
||11||parāyāhi maghavannā ca yāhīti vā'nuvākyottaravatsvahaḥsu
||12||ananuvaṣaṭkṛte'tipraiṣaṃ maitrāvaruṇa āheha mada eva maghavannindrate'śva iti
||13||adyetyatirātre
||14||adya sutyāmiti ca
||15||tasyāntaṃ śrutvā''gnīdhraḥ śvaḥsutyāṃ prāha śvaḥsutyāṃ vā eṣāṃ brāhmaṇānāṃ tāmindrāyendrāgnibhyāṃ prabravīmi mitrāvaruṇābhyāṃ vasubhyo rudrebhya ādityebhyo viśvebhyo devebhyo brāhmaṇebhyaḥ saumyebhyaḥ somapebhyo brahman vācaṃ yaccheti
||16||Dvādaśaḥ khaṇḍaḥ
āhṛtamunnetrā droṇakalaśamiḍāmiva pratigṛhyopahavamiṣṭvā'vekṣeta
||1||harivataste hāriyojanasya stutastomasya śastokthasyeṣṭayajuṣo yo bhakṣo gosaniraśvasanistasya ta upahūtasyopahūto bhakṣayāmīti prāṇabhakṣaṃ bhakṣayitvā pratipradāya droṇakalaśamātmānamāpyāyya yathāprasṛptaṃ vinisṛpyāgnīdhrīye vinisṛptāhutī juhvatyayaṃ pīta indurindraṃ madedhādayaṃ vipro vācamarcanniyacchan | ayaṃ kasyaciddruhatādabhīke somo rājā na sakhāyaṃ riṣedhāt svāhā | idaṃ rādho agninā dattamāgādyaśobhargaḥ saha ojo balañca | dīrghāyutvāya śataśāradāya pratigṛbhnābhimahate vīryāya svāheti
||2||āhavanīye ṣaṭ ṣaṭ śakalānyabhyādadhati | devakṛtasyainaso'vayajanamasi svāhā | pitṛkṛtasyainaso'vayajanamasi svāhā | manuṣyakṛtasyainaso'vayajanamasi svāhā | ātmakṛtasyainaso'vayajanamasi svāhā | enasa enaso'vayajanamasi svāhā | yadvo devāścakṛma jihvayā gurviti ca
||3||droṇakalaśāddhānā gṛhītvā'vekṣerannāpūryā'sthāmāpūrayata prajayā ca dhanena ca | indrasya kāmadughāḥ stha kāmān me dhuṅdhvaṃ prajāñca paśūṃśceti
||4||avaghrāyāntaḥparidhideśe nivapeyuḥ
||5||pratyetya tīrthadeśe'pāṃ pūrṇāścamasāstāntsavyāvṛto vrajanti
||6||haritatṛṇāni vimṛjya pratisvañcamasebhyastriḥ prasavyamudakairātmanaḥ paryukṣante dakṣiṇaiḥ pāṇibhiḥ
||7||itarairvā pradakṣiṇaṃ
||8||svadhā pitre svadhā pitāmahāya svadhā prapitāmahāyeti
||9||uktaṃ jīvamṛtebhyaḥ
||10||pāṇīṃścamaseṣvavadhāyāpsu dhūtasya deva soma te mativido nṛbhiḥ sutasya stutastomasya śastokthasyeṣṭayajuṣo yo bhakṣo gosaniraśvasanistasya ta upahūtasyopahūto bhakṣayāmīti prāṇabhakṣān bhakṣayitvā mā'haṃ prajāṃ parāsicamityetenābhyātmaṃ ninīyācchāyaṃ vo marutaḥ śloka etvityetayā'bhimṛśanti
||11||dadhikrābṇo akāriṣamityāgnīdhrīye dadhidrapsān prāśya sakhyāni visṛjante | ubhā kavī yuvānā satyādā dharmaṇaspatī | parisatyasya dharmaṇā visakhyāni sṛjāmaha iti
||12||Trayodaśaḥ khaṇḍaḥ
patnīsaṃyājaiścaritvā'vabhṛthaṃ vrajanti
||1||vrajantaḥ sāmno nidhanam upayanti
||2||avabhṛtheṣṭyā tiṣṭhantaścaranti
||3||prayājādyanuyājāntā nāsyāmiḍā na barhiṣmantau prayājānuyājāvapsumantau
||4||gāyatrau
||5||vāruṇaṃ haviḥ
||6||ava te heḍo varuṇa namobhiriti dve | agnīvaruṇau sviṣṭakṛdarthe
||7||tvanno agne varuṇasya vidvāniti dve | saṃsthitāyāṃ pādānudakānte'vadadhyarnamo varuṇāyābhiṣṭhito varuṇasya pāśa iti
||8||tata ācāmanti bhakṣasyāvabhṛtho'si bhakṣitasyāvabhṛtho'si bhakṣaṃ kṛtasyāvabhṛtho'sīti
||9||prothya prathamena praṣṭhīvanti pragirantyuttarābhyāṃ
||10||tata ācamyāplavanta āpo asmān mātaraḥ śundhayantvidamāpaḥ pravahata sumitryā na āpa oṣadhayaḥ santviti
||11||etayā''vṛtā'bhyukṣeranneva vāpyadīkṣitāḥ
||12||unnetainānunnayati
||13||udvayantamasasparītyudetya
||15||samānamata ūrdhvaṃ hṛdayaśūlenāsaṃsthājapāt
||16||saṃsthājapenopatiṣṭhante ye ye'pavṛttakarmāṇaḥ
||17||Caturdaśaḥ khaṇḍaḥ
gārhapatya udayanīyayā caranti
||1||sā prāyaṇīyayoktā
||2||pathyā svastirihottamājyahaviṣāṃ
||3||viparītāśca yājyānuvākyāḥ
||4||te caiva kuryurye prāyaṇīyāṃ
||5||prakṛtyā saṃyājye
||6||saṃsthitāyāṃ maitrāvaruṇyanūbandhyā
||7||sadasyeke
||8||uttaravedyāmeke
||9||hutāyāṃ vapāyāṃ yadyekādaśinyagrataḥ kṛtā'gnīṣomīyeṇa sañcareṇa vrajitvā gārhapatye tvāṣṭreṇa paśunā caranti
||10||añjanādi paryagni kṛtvotsṛjantyapunarāyanāya
||11||yadi tvadhvaryava ājyena samāpnuyustathaiva hotā kuryāt
||12||sampraiṣavadādeśān
||13||paśuvannipātān
||14||yadyanūbandhye paśupuroḍāśamanudevikāhavīṃṣi nirvapeyurdhātānumatī rākā sinīvālī kuhūḥ
||15||dhātā dadātu dāśuṣe prācīṃ jīvātumakṣitāṃ | vayaṃ devasya dhīmahi sumatiṃ vājinīvataḥ | dhātā prajānāmuta rāya īśe dhātedaṃ viśvaṃ bhuvanaṃ jajāna | dhātā kṛṣṭīranimiṣābhicaṣṭe dhātra iddhavyaṃ ghṛtavajjuhoteti
||16||devīnāṃ cet sūryo dyauruṣā gauḥ pṛthivī
||17||smatyurandhirna āgahīti dve ādyāntanoṣi raśmibhirāvahantī poṣyāvāryāṇi na tā arvāreṇukakāṭo aśnute na tānaśanti na dabhātitasvaro baḍitthā parvatānāṃ dṛḍhā cidyā vanaspatīn
||18||paśvalābhe payasyā maitrāvaruṇyanūbaṃdhyāsthāne
||19||ājyabhāgaprabhṛtivājināntā
||20||karmiṇo vājinaṃ bhakṣayeyuḥ
||21||sarve tu dīkṣitāḥ
||22||sarve tu dīkṣitotthitāḥ pṛthagagnīn samāropyodagdevayajanānmathitvodavasānīyayā yajante
||23||paunarādheyikyavikṛtā'vikṛtā
||24||