pāramparikam
dhyānam
kailāsācala-madhyasthaṃ kāmitābhīṣṭadāyakam |
brahmādi-prārthanā-prāpta-divyamānuṣa-vigraham ||
||1||bhaktānugrahaṇaikānta-śānta-svānta-samujjvalam |
saṃyajñaṃ saṃyamīndrāṇāṃ sārvabhaumaṃ jagadgurum ||
||2||kiṅkarībhūtabhaktainaḥ paṅkajātaviśoṣaṇam |
dhyāyāmi śaṅkarācāryaṃ sarvalokaikaśaṅkaram ||
||3||stotram
śrīśaṅkarācāryavaryo brahmajñānapradāyakaḥ |
ajñānatimirādityaḥ sujñānāmbudhicandramā ||
||4||varṇāśramapratiṣṭhātā śrīmān muktipradāyakaḥ |
śiṣyopadeśanirato bhaktābhīṣṭapradāyakaḥ ||
||5||sūkṣmatattvarahasyajñaḥ kāryākāryaprabodhakaḥ |
jñānamudrāñcitakaraḥ śiṣya-hṛttāpa-hārakaḥ ||
||6||pārivrājyāśramoddhartā sarvatantrasvatantradhīḥ |
advaitasthāpanācāryaḥ sākṣācchaṅkararūpabhṛt ||
||7||ṣaṇmatasthāpanācāryastrayīmārgaprakāśakaḥ |
vedavedāntatattvajño durvādimatakhaṇḍanaḥ ||
||8||vairāgyanirataḥ śāntaḥ saṃsārārṇavatārakaḥ |
prasannavadanāmbhojaḥ paramārthaprakāśakaḥ ||
||9||purāṇasmṛtisārajño nityatṛpto mahacchuciḥ |
nityānando nirātaṅko niḥsaṅgo nirmalātmakaḥ ||
||10||nirmamo nirahaṅkāro viśvavandyapadāmbujaḥ |
sattvapradhānaḥ sadbhāvaḥ saṅkhyātītaguṇojjvalaḥ ||
||11||anaghaḥ sārahṛdayaḥ sudhīḥ sārasvatapradaḥ |
satyātmā puṇyaśīlaśca sāṅkhyayogavicakṣaṇaḥ ||
||12||taporāśirmahātejā guṇatrayavibhāgavit |
kalighnaḥ kāladharmajñastamoguṇanivārakaḥ ||
||13||bhagavān bhāratījetā śāradāhvānapaṇḍitaḥ |
dharmādharmavibhāgajño lakṣyabhedapradarśakaḥ ||
||14||nādabindukalābhijño yogihṛtpadmabhāskaraḥ |
atīndriya-jñānanidhirnityānityavivekavān ||
||15||cidānandaścinmayātmā parakāya-praveśakṛt |
amānuṣa-caritrāḍhyaḥ kṣemadāyī kṣamākaraḥ ||
||16||bhavo bhadraprado bhūrimahimā viśvarañjakaḥ |
svaprakāśaḥ sadādhāro viśvabandhuḥ śubhodayaḥ ||
||17||viśālakīrtirvāgīśaḥ sarvalokahitotsukaḥ |
kailāsayātrā-samprāpta-candramauli-prapūjakaḥ ||
||18||kāñcyāṃ śrīcakra-rājākhya-yantrasthāpana-dīkṣitaḥ |
śrīcakrātmaka-tāṭaṅka-poṣitāmbā-manorathaḥ ||
||19||śrībrahmasūtropaniṣadbhāṣyādigranthakalpakaḥ |
caturdikcaturāmnāyapratiṣṭhātā mahāmatiḥ ||
||20||dvisaptati-matocchettā sarvadigvijayaprabhuḥ |
kāṣāyavasanopeto bhasmoddhūlitavigrahaḥ ||
||21||jñānātmakaikadaṇḍāḍhyaḥ kamaṇḍalulasatkaraḥ |
vyāsasandarśanaprīto bhagavatpādasaṃjñakaḥ ||
||22||catuḥṣaṣṭikalābhijño brahmarākṣasa-mokṣadaḥ |
saundaryalaharīmukhyabahustotravidhāyakaḥ ||
||23||śrīmanmaṇḍanamiśrākhyasvayambhūjayasannutaḥ |
toṭakācāryasampūjyaḥ padmapādārcitāṅghrikaḥ ||
||24||hastāmalakayogīndrabrahmajñānapradāyakaḥ |
sureśvarādi-sacchiṣya-sannyāsāśrama-dāyakaḥ ||
||25||nirvyājakaruṇāmūrtirjagatpūjyo jagadguruḥ
bherīpaṭahavādyādirājalakṣaṇalakṣitaḥ
sakṛtsmaraṇasantuṣṭaḥ sarvajño jñānadāyakaḥ ||
||26||iti śrī-śaṅkarācāryāṣṭottaraśatanāmastotraṃ sampūrṇam