Śaṅkara by tradition
nāhaṃ deho nendriyāṇyantaraṅgo
nāhaṅkāraḥ prāṇavargo na buddhiḥ |
dārāpatyakṣetravittādidūraḥ
sākṣī nityaḥ pratyagātmā śivo'ham ||
||1||rajjvajñānādbhāti rajjau yathāhiḥ
svātmājñānādātmano jīvabhāvaḥ |
āptoktyā'hibhrāntināśe sa rajju-
rjīvo nāhaṃ deśikoktyā śivo'ham ||
||2||ābhātīdaṃ viśvamātmanyasatyam
satyajñānānandarūpe vimohāt |
nidrāmohātsvapnavattanna satyam
śuddhaḥ pūrṇo nitya ekaḥ śivo'ham ||
||3||nāhaṃ jāto na pravṛddho na naṣṭo
dehasyoktāḥ prākṛtāḥ sarvadharmāḥ |
kartṛtvādiścinmayasyāsti nāhaṃ-
kārasyaiva hyātmano me śivo'ham ||
||4||matto nānyatkiñcidatrāsti viśvaṃ
satyaṃ bāhyaṃ vastu māyopaklṛptam |
ādarśāntarbhāsamānasya tulyaṃ
mayyadvaite bhāti tasmācchivo'ham ||
||5||iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau advaita pañcaratnaṃ athavā ātmapaṅcakaṃ sampūrṇam