Śrīśaṅkarabhagavatpādakṛtā
dṛśisvarūpaṃ gaganopamaṃ paraṃ sakṛdvibhātaṃ tvajamekamakṣaram |
alepakaṃ sarvagataṃ yadadvayaṃ tadeva cāhaṃ satataṃ vimukta om ||
||1||dṛṣistu śuddho'hamavikriyātmako na me'sti kaścid viśayaḥ svabhāvataḥ |
purastiraścordhvamadhaśca sarvataḥ supūrṇabhūmā tvaja ātmani sthitaḥ ||
||2||ajo'maraścaiva tathājaro'mṛtaḥ svayaṃprabhaḥ sarvagato'hamadvayaḥ |
na kāraṇaṃ kāryamatīva nirmalaḥ sadaiva tṛptaśca tato vimukta om ||
||3||suṣuptajāratsvapataśca darśanaṃ na me'sti kiṃcit svamiveha mohanam |
svataśca teṣāṃ parato'pyasattvatasturīya evāsmi sadā dṛgadvayaḥ ||
||4||śarīrabuddhīndriyaduḥkhasaṃtatirna me na cāhaṃ mama nirvikārataḥ |
asattvahetośca tathaiva saṃtaterasattvamasyāḥ svapato hi dṛśyavat ||
||5||idaṃ tu satyaṃ mama nāsti vikriyā vikāraheturna hi me'dvayatvataḥ |
na puṇyapāpe na ca mokṣabandhane na cāsti varṇaśramatāśaīrataḥ ||
||6||anādito nirguṇato na karma me phalaṃ ca tasmāt paramo'hamadvayaḥ |
yathā nabhaḥ sarvagataṃ na lipyate tathā hyahaṃ dehagato'pi sūkṣmataḥ ||
||7||sadā ca bhūteṣu samo'hamīśvaraḥ kṣarākṣarābhyāṃ paramo hyathottamaḥ |
parātmatattvaśca tathādvayo'pi san viparyayeṇābhivṛtastvavidyayā ||
||8||avidyayā bhāvanayā ca karmabhirvivikta ātmāvyavadhiḥ sunirmalaḥ |
dṛgādiśaktipracito'hamadvayaḥ sthitaḥ svarūpe gaganaṃ yathācalam ||
||9||ahaṃ paraṃ brahma viniścayātmadṛñ na jāyate bhūya iti śrutervacaḥ |
na caiva bīje tvasati prajāyate phalaṃ na janmāsti tato hyamohatā |
||10||mamedamitthaṃ ca tavāda īdṛśaṃ tathāhamevaṃ na paro'pi cānyathā |
vimūḍhataivasya janasya kalpanā sadā same brahmaṇi cādvaye śive ||
||11||yadadvayaṃ jñānamatīva nirmalaṃ mahātmanāṃ tatra na śokamohatā |
tayorabhāve na hi karma janma vā bhavedayaṃ vedavidāṃ viniścayaḥ ||
||12||suṣuptavaj jāgrati yo na paśyati dvayaṃ tu paśyannapi cādvayataḥ |
tathā ca kurvannapi niṣkriyaśca yaḥ sa ātmavin nānya itīha niścayaḥ ||
||13||itīdamuktaṃ paramārthadarśanaṃ mayā hi vedāntaviniścitaṃ param |
vimucyate'smin yadi niścito bhaven na lipyate vyomavadeva karmabhiḥ ||
||14||