śrīśaṅkarabhagavatpādakṛtam
[]
cidaṃśaṃ vibhuṃ nirmalaṃ nirvikalpaṃ
nirīhaṃ nirākāramoṅkāragamyam |
guṇātītamavyaktamekaṃ turīyaṃ
paraṃ brahma yaṃ veda tasmai namaste ||
||1||viśuddhaṃ śivaṃ śāntamādyantaśūnyaṃ
jagajjīvanaṃ jyotirānandarūpam |
adigdeśakālavyavacchedanīyaṃ
trayī vakti yaṃ veda tasmai namaste ||
||2||mahāyogapīṭhe paribhrājamāne
dharaṇyāditattvātmake śaktiyukte |
guṇāhaskare vahnibimbārdhamadhye
samāsīnamoṅkarṇike'ṣṭākṣarābje ||
||3||samānoditānekasūryendukoṭi-
prabhāpūratulyadyutiṃ durnirīkṣam |
na śītaṃ na coṣṇaṃ suvarṇāvadāta-
prasannaṃ sadānandasaṃvitsvarūpam ||
||4||sunāsāpuṭaṃ sundarabhrūlalāṭaṃ
kirīṭocitākuñcitasnigdhakeśam |
sphurat puṇḍarīkābhirāmāyatākṣaṃ
samutphullaratnaprasūnāvataṃsam ||
||5||lasat kuṇḍalāmṛṣṭagaṇḍasthalāntaṃ
japārāgacorādharaṃ cāruhāsam |
alivyākulāmolimandāramālaṃ
mahorasphuratkaustubhodārahāram ||
||6||suratnāṅgadairanvitaṃ bāhudaṇḍaiḥ
caturbhiścalatkaṅkaṇālaṅkṛtāgraiḥ |
udārodarālaṅkṛtaṃ pītavastraṃ
padadvandvanirdhūtapadmābhirāmam ||
||7||svabhakteṣu sandarśitākāramevaṃ
sadā bhāvayan sanniruddhendriyāśvaḥ |
durāpaṃ naro yāti saṃsārapāraṃ
parasmai parebhyo'pi tasmai namaste ||
||8||śriyā śātakumbhadyutisnigdhakāntyā
dharaṇyā ca dūrvādalaśyāmalāṅgyā |
kalatradvayenāmunā toṣitāya
trilokīgṛhasthāya viṣṇo namaste ||
||9||śarīraṃ kalatraṃ sutaṃ bandhuvargaṃ
vayasyaṃ dhanaṃ sadma bhṛtyaṃ bhuvaṃ ca |
samastaṃ parityajya hā kaṣṭameko
gamiṣyāmi duḥkhena dūraṃ kilāham ||
||10||jareyaṃ piśācīva hā jīvato me
vasāmakti raktaṃ ca māṃsaṃ balaṃ ca |
aho deva sīdāmi dīnānukampin
kimadyāpi hanta tvayodāsitavyam ||
||11||kaphavyāhatoṣṇolbaṇaśvāsavega-
vyathāvisphuratsarvamarmāsthibandhām |
vicintyāhamantyāmasaṅkhyāmavasthāṃ
bibhemi prabho kiṃ karomi prasīda ||
||12||lapannacyutānanta govinda viṣṇo
murāre hare nātha nārāyaṇeti |
yathā'nusmariṣyāmi bhaktyā bhavantaṃ
tathā me dayāśīla deva prasīda ||
||13||bhujaṅgaprayātaṃ paṭhedyastu bhaktyā
samādhāya citte bhavantaṃ murāre |
sa mohaṃ vihāyā''śu yuṣmatprasādāt
samāśritya yogaṃ vrajatyacyutaṃ tvām ||
||14||iti śrīmatparamahaṃsaparivrājakācāryasya śrī-govinda-bhagavatpūjya-pāda-śiṣyasya śrīmacchaṅkarabhagavataḥ kṛtau śrī-viṣṇubhujaṅgaprayātastotraṃ sampūrṇam