śrīśaṅkarabhagavatpādakṛtam
acyutaṃ keśavaṃ rāma-nārāyaṇaṃ
kṛṣṇa-dāmodaraṃ vāsudevaṃ harim |
śrīdharaṃ mādhavaṃ gopikāvallabhaṃ
jānakīnāyakaṃ rāmacandraṃ bhaje ||
||1||acyutaṃ keśavaṃ satyabhāmādhavaṃ
mādhavaṃ śrīdharaṃ rādhikārādhitam |
indirā mandiraṃ cetasā sundaraṃ
devakīnandanaṃ nandanaṃ sandadhe ||
||2||viṣṇave jiṣṇave śaṅkhine cakriṇe
rukmiṇī-rāgine jānakī-jānaye |
vallavī-vallabhāyā'rcitāyātmane
kaṃsa-vidhvaṃsine vaṃśine te namaḥ ||
||3||kṛṣṇa govinda he rāma nārāyaṇa
śrīpate vāsudevārjita-śrīnidhe |
acyutānanta he mādhavādhokṣaja
dvārakā-nāyaka draupadī-rakṣaka ||
||4||rākṣasakṣobhitaḥ sītayā śobhito
daṇḍakāraṇya-bhū-puṇyatā-kāraṇaḥ |
lakṣmaṇenānvito vānaraiḥ sevito-
'gastyasampūjito rāghavaḥ pātu mām ||
||5||dhenukāriṣṭako'niṣṭakṛd dveṣiṇāṃ
keśihā kaṃsahṛd vaṃśikāvādakaḥ |
pūtanākopakaḥ sūrajā-khelano
bāla-gopālakaḥ pātu māṃ sarvadā ||
||6||vidyudādyotavān prasphuradvāsasaṃ
prāvṛḍambhodavat prollasadvigraham |
vanyayā mālayā śobhitorasthalaṃ
lohitāṅghridvayaṃ vārijākṣaṃ bhaje ||
||7||kuñcitaiḥ kuntalairbhrājimānānanaṃ
ratnamauliṃ lasat kuṇḍalaṃ gaṇḍayoḥ |
hārakeyūrakaṃ kaṅkaṇa-projjvalaṃ
kiṅkiṇī-mañjulaṃ śyāmalaṃ taṃ bhaje ||
||8||acyutasyāṣṭakaṃ yaḥ paṭhediṣṭadaṃ
premataḥ pratyahaṃ pūruṣaḥ saspṛham |
vṛttataḥ sundaraṃ vedyaviśvambaraṃ
tasya vaśyo harirjāyate satvaram ||
||9||iti śrīmatparamahaṃsaparivrājakācāryasya śrī-govinda-bhagavatpūjya-pāda-śiṣyasya śrīmacchaṅkarabhagavataḥ kṛtau śrī-acyutāṣṭakaṃ sampūrṇam