Śrīśaṅkarabhagavatpādakṛtā
īkṣitṛtvaṃ svataḥsiddhaṃ jantūnāṃ ca tato'nyatā |
ajñānādityato'nyatvaṃ sadasīti nivartyate ||
||1||etāvad dhyamṛtatvaṃ na kiṃcidanyat sahāyakam |
jñānasyeti bruvacchāstraṃ saliṅgaṃ karma bādhate ||
||2||sarveṣāṃ manaso vṛttamaviśeṣeṇa paśyataḥ |
tasya me nirvikārasya viśeṣaḥ syāt kathaṃcana ||
||3||manovṛttaṃ manaścaiva svapnavaj jāgratīkṣituḥ |
samprasāde dvayāsattvāc cinmātraḥ sarvago'dvayaḥ ||
||4||svapnaḥ satyo yathā ''bodhād dehātmatvaṃ tathaiva ca |
pratyakṣādeḥ pramāṇatvaṃ jāgrat syādā ''tmavedanāt ||
||5||vyomavat sarvabhūtastho bhūtadoṣairvivarjitaḥ |
sākṣī cetā'guṇaḥ śuddho brahmaivāsmīti kevalaḥ ||
||6||nāmarūpakriyābhyo'nyo nityamuktasvarūpavān |
ahamātmā paraṃ brahma cinmātro'haṃ sadādvayaḥ ||
||7||ahaṃ brahmāsmi kartā ca bhoktā cāsmīti ye viduḥ |
te naṣṭā jñānakarmabhyāṃ nāstikāḥ syurna saṃśayaḥ ||
||8||dharmādharmaphalairyoga iṣṭo'dṛṣṭo yathātmanaḥ |
śāstrād brahmatvamapyasya mokṣo jñānāt tatheṣyatām ||
||9||yā māhārājanādyāstā vāsanāḥ svapnadarśibhiḥ |
anubhūyanta eveha tato'nyaḥ kevalo dṛṣiḥ ||
||10||kośādiva viniṣkṛṣṭaḥ kāryakāraṇavarjitaḥ |
yathāsirdṛśyate svapne tadvad boddhā svayaṃprabhaḥ ||
||11||āpeṣāt pratibuddhasya jñasya svābhāvikaṃ padam |
uktaṃ netyādivākyena kalpitasyāpanetṛṇā ||
||12||mahārājādayo lokā mayi yadvat prakalpitāḥ |
svapne tadvad dvayaṃ vidyād rūpaṃ vāsanayā saha ||
||13||dehaliṅgātmanā kāryā vāsanārūpiṇā kriyā |
netinetyātmarūpatvān na me kāryā kriyā kvacit ||
||14||na tato'mṛtatāśāsti karmaṇo'jñānahetutaḥ |
mokṣasya jñānahetutvān na tadanyadapekṣate ||
||15||amṛtaṃ cābhayaṃ nārtaṃ netītyātmā priyo mama |
viparītamato'nyad yat tyajet tat sakriyaṃ tataḥ ||
||16||