śrīśaṅkarabhagavatpādakṛtam
bhaja govindaṃ bhaja govindaṃ
govindaṃ bhaja mūḍhamate |
samprāpte sannihite kāle
na hi na hi rakṣati ḍukṛñ karaṇe ||
||1||mūḍha jahīhi dhanāgamatṛṣṇāṃ
kuru sadbuddhiṃ manasi vitṛṣṇām |
yallabhase nijakarmopāttaṃ
vittaṃ tena vinodaya cittam ||
||2||nārīstanabharanābhīdeśaṃ
dṛṣṭvā mā gā mohāveśam |
etanmāṃsāvasādi vikāraṃ
manasi vicintaya vāraṃ vāram ||
||3||nalinīdalagatajalamatitaralaṃ
tadvajjīvitamatiśayacapalam |
viddhi vyādhyabhimānagrastaṃ
lokaṃ śokahataṃ ca samastam ||
||4||yāvadvittopārjana-saktaḥ
tāvannija-parivāro raktaḥ |
paścājjīvati jarjaradehe
vārtāṃ ko'pi na pṛcchati gehe ||
||5||yāvat pavano nivasati dehe
tāvat pṛcchati kuśalaṃ gehe |
gatavati vāyau dehāpāye
bhāryā bibhyati tasmin kāye ||
||6||bālastāvatkrīḍāsaktaḥ
taruṇastāvattaruṇīsaktaḥ |
vṛddhastāvaccintāsaktaḥ
pare brahmaṇi ko'pi na saktaḥ ||
||7||kā te kāntā kaste putraḥ
saṃsāro'yamatīva vicitraḥ |
kasya tvaṃ kaḥ kuta āyātaḥ
tattvaṃ cintaya tadiha bhrātaḥ ||
||8||satsaṅgatve niḥsaṅgatvaṃ
niḥsaṅgatve nirmohatvam |
nirmohatve niścalitattvaṃ
niścalitattve jīvana-muktiḥ ||
||9||vayasi gate kaḥ kāmavikāraḥ
śuṣke nīre kaḥ kāsāraḥ |
kṣīṇe vitte kaḥ parivāraḥ
jñāte tattve kaḥ saṃsāraḥ ||
||10||mā kuru dhanajanayauvanagarvaṃ
harati nimeṣāt kālaḥ sarvam |
māyāmayamidamakhilaṃ hitvā
brahmapadaṃ tvaṃ praviśa viditvā ||
||11||dinayāminyau sāyaṃ prātaḥ
śiśiravasantau punarāyātaḥ |
kālaḥ krīḍati gacchatyāyuḥ
tadapi na muñcatyāśāvāyuḥ ||
||12||dvādaśamañjarikābhiraśeṣaḥ
kathito vaiyākaraṇasyaiṣaḥ |
upadeśo bhūdvidyānipuṇaiḥ
śrīmacchaṅkarabhagavaccharaṇaiḥ ||
||13||kā te kāntā dhanagatacintā
vātula kiṃ tava nāsti niyantā |
trijagati sajjanasaṅgatirekā
bhavati bhavārṇavataraṇe naukā ||
||14||jaṭilo muṇḍī luñchitakeśaḥ
kāṣāyāmbarabahukṛtaveṣaḥ |
paśyannapi cana paśyati mūḍhaḥ
udaranimittaṃ bahukṛtaveṣaḥ ||
||15||aṅgaṃ galitaṃ palitaṃ muṇḍaṃ
daśanavihīnaṃ jātaṃ tuṇḍam |
vṛddho yāti gṛhītvā daṇḍaṃ
tadapi na muñcatyāśāpiṇḍam ||
||16||agre vahniḥ pṛṣṭhe bhānuḥ
rātrau cubukasamarpitajānuḥ |
karatalabhikṣastarutalavāsaḥ
tadapi na muñcatyāśāpāśaḥ ||
||17||kurute gaṅgāsāgaragamanaṃ
vrataparipālanamathavā dānam |
jñānavihīnaḥ sarvamatena
muktiṃ na bhajati janmaśatena ||
||18||suramandira-tarumūla-nivāsaḥ
śayyā bhūtalamajinaṃ vāsaḥ |
sarva-parigraha bhogatyāgaḥ
kasya sukhaṃ na karoti virāgaḥ ||
||19||yogarato vā bhogarato vā
saṅgarato vā saṅgavihīnaḥ |
yasya brahmaṇi ramate cittaṃ
nandati nandati nandatyeva ||
||20||bhagavadgītā kiñcidadhītā
gaṅgājalalava-kaṇikā pītā |
sakṛdapi yena murāri samarcā
kriyate tasya yamena na carcā ||
||21||punarapi jananaṃ punarapi maraṇaṃ
punarapi jananī-jaṭhare śayanam |
iha saṃsāre bahudustāre
kṛpayā'pāre pāhi murāre ||
||22||rathyā-carpaṭa-viracita-kanthaḥ
puṇyāpuṇya-vivarjita-panthaḥ |
yogī yoganiyojita citto
ramate bālonmattavadeva ||
||23||kastvaṃ ko'haṃ kuta āyātaḥ
kā me jananī ko me tātaḥ |
iti paribhāvaya sarvamasāraṃ
viśvaṃ tyaktvā svapnavicāram ||
||24||tvayi mayi cānyatraiko viṣṇuḥ
vyarthaṃ kupyasi mayyasahiṣṇuḥ |
sarvasminnapi paśyātmānaṃ
sarvatrotsṛja bhedājñānam ||
||25||śatrau mitre putre bandhau
mā kuru yatnaṃ vigrahasandhau |
bhava samacittaḥ sarvatra tvaṃ
vāñchasyacirādyadi viṣṇutvam ||
||26||kāmaṃ krodhaṃ lobhaṃ mohaṃ
tyaktvā''tmānaṃ bhāvaya ko'ham |
ātmajñānavihīnā mūḍhāḥ
te pacyante narakanigūḍhāḥ ||
||27||geyaṃ gītā nāmasahasraṃ
dhyeyaṃ śrīpati-rūpamajasram |
neyaṃ sajjana-saṅge cittaṃ
deyaṃ dīnajanāya ca vittam ||
||28||sukhataḥ kriyate rāmābhogaḥ
paścāddhanta śarīre rogaḥ |
yadyapi loke maraṇaṃ śaraṇaṃ
tadapi na muñcati pāpācaraṇam ||
||29||arthamanarthaṃ bhāvaya nityaṃ
nāsti tataḥ sukhaleśaḥ satyam |
putrādapi dhanabhājāṃ bhītiḥ
sarvatraiṣā vihitā rītiḥ ||
||30||prāṇāyāmaṃ pratyāhāraṃ
nityānitya-vivekavicāram |
jāpyasameta-samādhividhānaṃ
kurvavadhānaṃ mahadavadhānam ||
||31||gurucaraṇāmbuja-nirbhara-bhaktaḥ
saṃsārādacirādbhava muktaḥ |
sendriyamānasa-niyamādevaṃ
drakṣyasi nijahṛdayasthaṃ devam ||
||32||mūḍhaḥ kaścana vaiyākaraṇo
ḍukṛñkaraṇādhyayana-dhuriṇaḥ |
śrīmacchaṅkara-bhagavacchiṣyaiḥ
bodhita āsicchodhitakaraṇaḥ ||
||33||bhaja govindaṃ bhaja govindaṃ
govindaṃ bhaja mūḍhamate |
nāmasmaraṇādanyamupāyaṃ
na hi paśyāmo bhavataraṇe ||
||34||iti śrīmatparamahaṃsaparivrājakācāryasya śrī-govinda-bhagavatpūjya-pāda-śiṣyasya śrīmacchaṅkarabhagavataḥ kṛtau bhaja govindaṃ sampūrṇam